زمرہ جات کے محفوظات: غزل

کردار ہم میں تیسرا حارج ہوا تو بس

دسمبر 1, 2007منصور آفاق،شعراء،غزلفالج،مخارج،مدارج،معالج،کالج،کاٹج،امیج،حارج،خارجadmin

منصور آفاق ۔ غزل نمبر 189

میرے سوا کسی کو بھی میسج ہوا تو بس

کردار ہم میں تیسرا حارج ہوا تو بس

آسیب سرسرائیں سمندر کی چاپ میں

لہروں سے ہمکلام یہ کاٹج ہوا تو بس

پانی میں بہہ گئے ہیں غریبوں کے صبح و شام

پھر آسماں زمیں کا معالج ہوا تو بس

تھوڑا سا دم چراغ کے چہرے میں رہ گیا

اس مرتبہ بھی صبح کو فالج ہوا تو بس

میں لکھ رہا ہوں گم شدہ قبروں کی ڈائری

ابدال ایسا کشفِ مدارج ہوا تو بس

برسوں پھر اس کے بعد مجھے جاگنا پڑے

اک خواب میری نیند سے خارج ہوا تو بس

یہ روشنی، یہ پھول، یہ خوشبو، یہ سات رنگ

جب بند لڑکیوں کا یہ کالج ہوا تو بس

میں جا رہا ہوں آپ کے کہنے پہ اس کے پاس

میرا خراب دوستو امیج ہوا تو بس

منصور گفتگو ہے یہ پہلی کسی کے ساتھ

اک حرف کا غلط جو مخارج ہوا تو بس

منصور آفاق

پاؤں بے ساختہ لے آئے مجھے کار کے پاس

دسمبر 1, 2007منصور آفاق،شعراء،غزلکار،گلزار،بیدار،دیوار،دار،دستارadmin

منصور آفاق ۔ غزل نمبر 188

سوچ کا ثانیہ دم بھر کو گیا یار کے پاس

پاؤں بے ساختہ لے آئے مجھے کار کے پاس

ایک پتھر ہے کہ بس سرخ ہوا جاتا ہے

کوئی پہروں سے کھڑا ہے کسی دیوار کے پاس

گھنٹیاں شور مچاتی ہیں مرے کانوں میں

فون مردہ ہے مگر بسترِ بیدار کے پاس

کس طرح برف بھری رات گزاری ہو گی

میں بھی موجود نہ تھا جسمِ طرح دار کے پاس

عبرت آموز ہے دربارِ شب و روز کا تاج

طشتِ تاریخ میں سر رکھے ہیں دستار کے پاس

چشمِ لالہ پہ سیہ پٹیاں باندھیں منصور

سولیاں گاڑنے والے گل و گلزار کے پاس

منصور آفاق

گہری کالی رات کے دو المیے تھے آس پاس

دسمبر 1, 2007منصور آفاق،شعراء،غزللیے،ماہیے،مرثیے،چاہیے،کیے،کالیے،المیے،بالشتیے،ثانیے،جانیے،حاشیے،زاویےadmin

منصور آفاق ۔ غزل نمبر 187

روشنی کے خواب، خوشبو کے دیے تھے آس پاس

گہری کالی رات کے دو المیے تھے آس پاس

آ گئے، اچھا کیا، بھیگی ہوئی اِس شام میں

ایسی رت میں آپ ہی بس چاہیے تھے آس پاس

اک رندھی آواز تھی میرے گلے میں ہجر کی

درد کے روتے ہوئے کچھ ماہیے تھے آس پاس

ہونٹ میرے رات بھر، یہ سوچیے، ہونٹوں پہ تھے

ہاتھ میرے، آپ اتنا جانیے، تھے آس پاس

جب بدن میں بادلوں کا شور تھا تم تھے کہاں

جب چمکتے بجلیوں کے زاویے تھے آس پاس

دیکھتی تھیں اس کی آنکھیں میرے چہرے کے نقوش

زندگی کے آخری جب ثانیے تھے آس پاس

اک فریبِ ذات تھا پھیلا ہوا صدیوں کے بیچ

چاند جیسے ناموں والے کالیے تھے آس پاس

رات کی دیوار پر فوٹو گراف اک چاند کا

اور کالے بادلوں کے حاشیے تھے آس پاس

نظم کی میت کوئی لٹکا رہا تھا پیڑ سے

اور پریشاں حال کچھ بالشتیے تھے آس پاس

اک سفر میں نے کیا تھا وادیِ تاریخ میں

بین تھے چیخوں بھرے اور مرثیے تھے آس پاس

جب مرا سر کٹ رہا تھا کربلائے وقت میں

اہل کوفہ اپنی دستاریں لیے تھے آس پاس

ہفتہ بھر سے ڈائری ملتی نہیں منصور کی

فون پر کچھ رابطے میں نے کیے تھے آس پاس

منصور آفاق

اک سمندر میں بدلتی ہنج میرے آس پاس

دسمبر 1, 2007منصور آفاق،شعراء،غزلہنج،گنج،اسفنج،جنج،سنج،شطرنجadmin

منصور آفاق ۔ غزل نمبر 186

کس بھیانک زندگی کا رنج میرے آس پاس

اک سمندر میں بدلتی ہنج میرے آس پاس

کھوجتا پھرتا ہوں میں اسرار اپنی ذات کے

اور ان گلیوں میں داتا گنج میرے آس پاس

تھے مخالف بس مرے دونوں طرف کے لشکری

کیا عجب کھیلی گئی شطرنج میرے آس پاس

بہہ رہی تھی یاد کی سکرین پر دریا کے ساتھ

ناچتی گاتی ہوئی اک جنج میرے آس پاس

میرے ہونٹوں سے گرے جملے اٹھانے کے لیے

رہ رہے ہیں کتنے بذلہ سنج میرے آس پاس

آئینے کو دیکھ کر رویا تو ازراہِ مذاق

وقت نے پھیلا دیا اسفنج میرے آس پاس

منصور آفاق

وہ جو بولتی تھی سرائیکی بھری اردوئیں نہیں آس پاس

دسمبر 1, 2007منصور آفاق،شعراء،غزللویں،چھوئیں،کنوئیں،اردوئیں،دھوئیں،روئیںadmin

منصور آفاق ۔ غزل نمبر 185

وہی رنگ رنگ کی اجرکیں ، وہی خوشبوئیں نہیں آس پاس

وہ جو بولتی تھی سرائیکی بھری اردوئیں نہیں آس پاس

کہیں خشک سالی وصال کی کہیں آبِ لمس کا قحط ہے

وہ جو پیاس میری بجھاتے تھے وہی اب کنوئیں نہیں آس پاس

مرے دھوپ روپ دیار کے سبھی برف پوش مکان ہیں

وہ جو چمنیوں سے نکلتے تھے کبھی، وہ دھوئیں نہیں آس پاس

یہاں گرم ہاتھ کو پھیر مت، یہاں لمس لمس بکھیر مت

جو مچلتے تھے ترے قرب سے وہی اب روئیں نہیں آس پاس

سبھی شوخ و شنگ لباس ہیں کوئی لازوال بدن نہیں

جنہیں آنکھیں چومیں خیال میں جنہیں لب چھوئیں نہیں آس پاس

کوئی رات اجلی وصال کی کوئی گیت گاتی سی بالیاں

میرے سانس سے جو دہک اٹھیں وہی اب لویں نہیں آس پاس

منصور آفاق

یار کا میں ہوں اور ہے میرا یار لباس

دسمبر 1, 2007منصور آفاق،شعراء،غزلیار،پار،اخبار،بار،دیوار،دارadmin

منصور آفاق ۔ غزل نمبر 184

وصل کی راتوں کا شب زندہ دار لباس

یار کا میں ہوں اور ہے میرا یار لباس

سوچ کی چِپ میں سمٹی ہوئی اس دنیا کی

ٹیلی ویژن آنکھیں ہیں اخبار لباس

آدھے بدن پر ٹیبل لیمپ کا نیلا شیڈ

آدھے بدن پر رات کا جالی دار لباس

خواب بہت بوسیدہ ہوتے جاتے ہیں

آؤ بدل لیں نیندوں کے اس پار لباس

ننگ دکھائی دے جاتا ہے درزوں سے

کہنے کو ہے گھر کی ہر دیوار لباس

تنہائی کی ڈیٹوں میں منصور آفاق

تیرے میرے بیچ رہا ہر بار لباس

منصور آفاق

دیکھتا ہوں ویسی ہی آبِ رواں میں کوئی چیز

دسمبر 1, 2007منصور آفاق،شعراء،غزلمکاں،وگماں،کماں،اماں،آئندگاں،بیاں،جہاں،داستاں،رواںadmin

منصور آفاق ۔ غزل نمبر 183

جگمگاتی تھی جو طاقِ آسماں میں کوئی چیز

دیکھتا ہوں ویسی ہی آبِ رواں میں کوئی چیز

رات جیسا ساری دنیا میں نہیں ہے کوئی ظلم

اور دئیے جیسی نہیں سارے جہاں میں کوئی چیز

یہ بھی ہو سکتا ہے ممکن میں کوئی کردار ہوں

یا مرے جیسی کسی ہے داستاں میں کوئی چیز

دیکھنا میری طرف کچھ دن نہیں آنا تجھے

ایسا لگتا ہے کہ ہے میرے مکاں میں کوئی چیز

کوئی بے مفہوم نقطہ، کوئی مصرع کا فریب

ڈھونڈتی ہے رات پھر صبحِ بیاں میں کوئی چیز

لگتا ہے دشتِ جنوں کی آندھیوں کو دیکھ کر

اہل غم نے سونپ دی میری کماں میں کوئی چیز

واہمہ ہے سانحہ کا،خدشہ اِن ہونی کاہے

خوف جیسی ہے مرے وہم وگماں میں کوئی چیز

آیت الکرسی کا کب تک کھینچ رکھوں گا حصار

جانے والا دے گیا میری اماں میں کوئی چیز

نام ہے دیوانِ منصور اس کا، کل کی ڈاک میں

بھیج دی ہے صحبتِ آئندگاں میں کوئی چیز

منصور آفاق

منہ کو کلیجہ آتا ہے کچھ کیجئے پلیز

دسمبر 1, 2007منصور آفاق،شعراء،غزللیجئے،ماہیے،کیجئے،بولیے،دیکھئے،دئیےadmin

منصور آفاق ۔ غزل نمبر 182

ہیں خوفناک ہجر کے یہ المیے پلیز

منہ کو کلیجہ آتا ہے کچھ کیجئے پلیز

باقی ہیں انتظار کی کچھ ساعتیں ابھی

جلنے دو بام پر ابھی سارے دئیے پلیز

اب کاٹنے لگی ہے خموشی کی تیز دھار

کہیے پلیز کچھ مجھے ،کچھ بولیے پلیز

رہتے نہیں ہمیشہ تو ایسے خراب دن

خود کو سنبھالئے یہ دوا لیجئے پلیز

پہلے بہت اداس ہے شب کاسیہ مزاج

ایسے میں یہ سنائیے نہ ماہیے پلیز

منصور آگئی ہے وہ باہر گلی میں صبح

جانے بھی دیجئے ہمیں اب دیکھئے پلیز

منصور آفاق

پڑھتی ہے جن کو چوم کے بادِ صبا نماز

دسمبر 1, 2007منصور آفاق،شعراء،غزلقضا،لگا،وا،ادا،تھا،ثنا،جدا،حرا،خدا،دیا،دعا،رہا،صفا،صباadmin

منصور آفاق ۔ غزل نمبر 181

مٹی مرا وجود، زمیں میری جا نماز

پڑھتی ہے جن کو چوم کے بادِ صبا نماز

اک دلنواز شخص نے دیکھا مجھے تو میں

قوسِ قزح پہ عصر کی پڑھنے لگا نماز

پڑھتے ہیں سر پہ دھوپ کی دستار باندھ کر

سایہ بچھا کے اپنا ہم اہلِ صفا نماز

لات و منات اپنے بغل میں لیے ہوئے

کعبہ کی سمت پڑھتی ہے خلقِ خدا نماز

تیرا ہے کوئی اور تعین مرا میں آپ

تیری جدا نماز ہے میری جدا نماز

جانے کب آئے پھر یہ پلٹ کر شبِ وصال

ہو جائے گی ادا تو عشاء کی قضا نماز

میں نے کہا کہ صبح ہے اب تو افق کے پاس

اس نے کہا تو کیجیے اٹھ کر ادا نماز

مت پوچھ کیسی خواہشِ دیدار تھی مجھے

برسوں میں کوہِ طور پہ پڑھتا رہا نماز

قرباں خیالِ گنبدِ خضرا پہ ہیں سجود

اقرا مری دعا ، مری غارِ حرا نماز

اس مختصر قیام میں کافی یہی مجھے

میرا مکاں درود ہے میرا دیا نماز

پندارِ جاں میں آئی ہیں تجھ سے ملاحتیں

تجھ سے ہوئے دراز یہ دستِ دعا نماز

اے خواجہء فراق ! ملاقات کے لیے

پھر پڑھ کنارِ چشمۂ حمد و ثنا نماز

اے شیخ شاہِ وقت کے دربار سے نکل

دروازہ کر رہی ہے بغاوت کا وا نماز

اس کا خیال مجھ سے قضا ہی نہیں ہوا

لگتا ہے میرے واسطے منصور تھا نماز

منصور آفاق

جملہ ہائے عاشقاں را شب بخیر

دسمبر 1, 2007منصور آفاق،شعراء،غزلپرحسرتاں،آشیاں،بتاں،دلبراں،سوداگراں،ساحراں،عاشقاںadmin

منصور آفاق ۔ غزل نمبر 180

دشمناں را ، دوستاں را شب بخیر

جملہ ہائے عاشقاں را شب بخیر

در فلک مانندِنجم آوارہ ام

چاکرِ حسنِ بتاں را شب بخیر

خواب را سرمایہ ء آشوبِ دل

ساغراں را ساحراں را شب بخیر

از رخ ام صبحِ آسودہ گرفت

زلفِ دوتا دلبراں را شب بخیر

صحبتِ چشمِ سکوں تسخیر کرد

شورشِ سوداگراں را شب بخیر

چینِ ابرودل کتاں آید بروں

پیشِ مرغِ آشیاں را شب بخیر

دیدہِ منصور از چشمم تمام

دامنِ پُرحسرتاں را شب بخیر

منصور آفاق

سفر بخیر ہو ، مل کر کرو دعائے خیر

دسمبر 1, 2007منصور آفاق،شعراء،غزلمنظرو،ڈرو،کرو،گرو،دھرو،سروadmin

منصور آفاق ۔ غزل نمبر 179

اندھیری رات کے اے رہ روو،دعائے خیر

سفر بخیر ہو ، مل کر کرو دعائے خیر

مجھے سیاہی کی وحشت سے خوف آتا ہے

کہو چراغ صفت منظرو دعائے خیر

بنائے بت جو ہیں ہم نے خدا نہ بن بیٹھیں

بڑی ضروری ہے صورت گرو دعائے خیر

اب اس کے بعد لڑائی کبھی نہیں ہو گی

مری ہتھیلی پہ آؤ دھرو دعائے خیر

الف میں صرف کروڑوں مقام آتے ہیں

طلسمِ اسم کے خیرہ سرو دعائے خیر

گلی گلی میں ہے منصور کا تماشا بھی

دیارِ نور کے دیدہ ورو دعائے خیر

منصور آفاق

پھر کربلا میں شامِ محرم گزار خیر

دسمبر 1, 2007منصور آفاق،شعراء،غزلموسم،ماتم،محرم،پرنم،باہم،غمadmin

منصور آفاق ۔ غزل نمبر 178

جاری ہے پھر حسین کا ماتم گزار خیر

پھر کربلا میں شامِ محرم گزار خیر

پھٹ ہی نہ جائے کوئی یہاں بم گزار خیر

اک چھت تلے ہے فیملی باہم گزار خیر

خودکش دھماکے ہونے لگے ہیں گلی گلی

برپا جگہ جگہ پہ ہے ماتم گزار خیر

پھرتی ہے موت ظلم کے گرد و غبار میں

آیا ہے خاک و خون کا موسم گزار خیر

میرے وطن میں آگ لگی ہے اک ایک کوس

وہ سرنگوں ہے دین کا پرچم گزار خیر

منصور پہ کرم ہو خصوصی خدائے پاک

لگتی نہیں گزرتی شبِ غم گزار خیر

منصور آفاق

یہ خامشی کی غزل سُن، کسی کو یاد نہ کر

دسمبر 1, 2007منصور آفاق،شعراء،غزلفساد،یاد،گردباد،انجماد،انعقاد،اتحاد،اعتقاد،اعتماد،تضاد،جہاد،جائیداد،عنادadmin

منصور آفاق ۔ غزل نمبر 177

ملال خانہء شب کو چراغ زاد نہ کر

یہ خامشی کی غزل سُن، کسی کو یاد نہ کر

خزانے درد کے دل میں سدا سلامت رکھ

تُو شہرِ سنگ میں تقسیم جائیداد نہ کر

بدن کی آگ جلا برف برف بنگلے میں

نگاہِ سرد سے یہ کارِ انجماد نہ کر

یہ خشک پتے پکڑتے ہیں آگ کو فوراً

بلند اتنا یہاں شعلہ ء عناد نہ کر

شبِ وصال پسندیدہ شب ہے مولا کی

زبانِ حضرتِ واعظ پہ اعتقاد نہ کر

کئی بگولوں میں ہوتی ہے دیکھ دکھ کی آنکھ

یہ دشت دشت تُو تسخیرِ گردباد نہ کر

بھلا دے بچھڑی ہوئی رت کا خوبرو چہرہ

مقامِ یاد پہ جلسوں کا انعقاد نہ کر

یہ رات رات حریفانہ کشمکش کیا ہے

دل و دماغ میں پیدا کھلا تضاد نہ کر

ہر ایک شخص نے جینا ہے اپنی مرضی سے

بنامِ حرمتِ خلقِ خدا ، فساد نہ کر

یہ دور دل میں جہنم اٹھائے پھرتا ہے

بجز خدا تُو ، کسی پر بھی اعتماد نہ کر

ترے لیے ہے بدن کی گداز رعنائی

نفس نفس میں سلگتا ہوا جہاد نہ کر

بھروسہ کر تُو کمک پر عوام کی منصور

یزیدِ وقت کی فوجوں سے اتحاد نہ کر

منصور آفاق

حیراں ہیں اپنی اتنی پذیرائی دیکھ کر

دسمبر 1, 2007منصور آفاق،شعراء،غزلمسیحائی،گہرائی،پہنائی،پذیرائی،پرچھائی،پروائی،افزائی،آرائی،بینائی،تمنائی،تماشائی،تنہائی،دارائی،رعنائی،زیبائی،شناسائی،شرمائیadmin

منصور آفاق ۔ غزل نمبر 176

اک ایک ڈاٹ کام پہ رسوائی دیکھ کر

حیراں ہیں اپنی اتنی پذیرائی دیکھ کر

سگریٹ کی سمت بڑھ گیا پھر اس کا نرم ہاتھ

پہلے پہل ذرا ہمیں شرمائی دیکھ کر

یہ اور بات ڈوب گئے ہیں کہیں مگر

رکھا تھا پاؤں پانی کی گہرائی دیکھ کر

ہم آ گئے وہاں کہ جہاں واپسی نہیں

اس کی ذرا سی حوصلہ افزائی دیکھ کر

افسوس صبحِ عمر جہنم میں جھونک دی

اک لمس پوش رات کی رعنائی دیکھ کر

دانتوں سے کاٹ کاٹ لیں اس نے کلائیاں

میری کسی کے ساتھ شناسائی دیکھ کر

ہم نے تمام رات جلائی ہیں خواہشیں

دل ڈر گیا تھا برف سی تنہائی دیکھ کر

آتے ہیں زندگی میں کچھ ایسے مقام بھی

جب رو پڑے تماشا ، تماشائی دیکھ کر

بس انتہائیں حسن کی معلوم ہو گئیں

زیبا علی ظہور کی زیبائی دیکھ کر

واپس پلٹ گئے جنہیں شوقِ وصال تھا

بس پہلے آسمان کی پہنائی دیکھ کر

ہم آئینے کے سامنے تصویر ہو گئے

آنکھوں میں اس کی انجمن آرائی دیکھ کر

پھر ایک اور شخص گلی سے گزر گیا

پھر بج اٹھا تھا دل کوئی پرچھائی دیکھ کر

اک دلنواز گیت سا مدہم سروں کے پیچ

برسات گنگناتی تھی پروائی دیکھ کر

معجز نما ہے صبحِ ازل سے وصالِ یار

حیراں نہ ہو بدن کی مسیحائی دیکھ کر

اندھی سڑک پہ بھاگ پڑی رات کی طرف

یک لخت اتنی روشنی بینائی دیکھ کر

کس کس کے ساتھ جنگ کریں گے دیار میں

ہم سوچتے ہیں تیرے تمنائی دیکھ کر

منصور زندگی کی کہانی سمجھ گئے

دریائے تند و تیز کی دارائی دیکھ کر

منصور آفاق

میں انہیں دیکھتا رہتا ہوں سمندر ہو کر

دسمبر 1, 2007منصور آفاق،شعراء،غزلمندر،اندر،بندر،سمندر،سکندرadmin

منصور آفاق ۔ غزل نمبر 175

وہ جو پھرتے ہیں کناروں پہ قلندر ہو کر

میں انہیں دیکھتا رہتا ہوں سمندر ہو کر

انہی گلیوں میں ، ملا دیس نکالا جن سے

میں بھی پھرتا ہوں مقدر کا سکندر ہو کر

میں نے دیکھی ہے فقط ایک خدا کی تمجید

کبھی مسجد ، کبھی معبد ، کبھی مندر ہو کر

میں بہر طور تماشا ہوں تماشا گر کا

ڈگڈگی والا کبھی تو کبھی بندر ہو کر

مجھ کو معلوم دنیا کی حقیقت منصور

باہر آیا ہوں کئی بار میں اندر ہو کر

منصور آفاق

کون عریاں ہے نگاہوں میں سیہ جین پہن کر

دسمبر 1, 2007منصور آفاق،شعراء،غزلفراعین،قالین،نرمین،یٰسین،جین،سینadmin

منصور آفاق ۔ غزل نمبر 174

فلم چلتی ہے مسلسل وہی اک سین پہن کر

کون عریاں ہے نگاہوں میں سیہ جین پہن کر

کوئی کمرہ مرے پاؤں پہ اترتا ہی نہیں ہے

سیڑھیاں چلتی چلی جاتی ہیں قالین پہن کر

ہوتے رہتے ہیں جہازوں کے بڑے حادثے لیکن

کرتا رہتا ہوں سفر سورتِ یٰسین پہن کر

نرمگی اس کی ابھر آئی تھی ملبوس سے باہر

کتنی نازک سی سکرٹ آئی تھی نرمین پہن کر

تم مرے ہونٹوں کی کیا پیاس بجھا سکتی ہو وینس

میرا پیاسا ہے بدن، آبِ ابا سین پہن کر

ہیں خدائی کا مسائل کہ سرِ راہ پڑے ہیں

اک تماشے کا لبادہ سا فراعین پہن کر

منصور آفاق

اپنے ہونے کا سبب معلوم کر

دسمبر 1, 2007منصور آفاق،شعراء،غزللب،نسب،ڈھب،سبب،شب،طلبadmin

منصور آفاق ۔ غزل نمبر 173

آدمی کے جدو اب معلوم کر

اپنے ہونے کا سبب معلوم کر

پوچھ شجرہ زندگی سے جا کہیں

جاکے مٹی کا نسب معلوم کر

فیصلے یک طرفہ کرنے چھوڑ دے

مجھ سے بھی میری طلب معلوم کر

اپنی پہچانیں کہاں کھوئی گئیں

گم ہوئے کیوں چشم و لب معلوم کر

اور کتنے قوس جلنا ہے ہمیں

اے چراغ دشتِ شب معلوم کر

موت کے منصور شہرِ خوف میں

زندگی کا کوئی ڈھب معلوم کر

منصور آفاق

اعمال چھوڑ تُو مری نیت پہ رحم کر

دسمبر 1, 2007منصور آفاق،شعراء،غزلمشیت،نیت،وصیت،اذیت،حمیتadmin

منصور آفاق ۔ غزل نمبر 172

پرودگار! حرفِ کمیت پہ رحم کر

اعمال چھوڑ تُو مری نیت پہ رحم کر

نیزے پہ سج گیا ہے وہ چہرہ حسین کا

اے بے نیاز اپنی مشیت پہ رحم کر

اک دھوپ سے بھرے ہوئے بے رحم پہر میں

کھلتی ہوئی کلی کی اذیت پہ رحم کر

کچھ دن مزارِ دل پہ جلا درد کے چراغ

کچھ مرنے والے کی بھی وصیت پہ رحم کر

اتنی اکیلگی میں بھی اپنی طلب کرے

منصور کچھ تو دل کی حمیت پہ رحم کر

منصور آفاق

رونمائی کی تقریب منسوخ کر

دسمبر 1, 2007منصور آفاق،شعراء،غزلاسالیب،تہذیب،تقریب،تنصیب،تکذیب،تادیب،تخریب،تراکیب،ترتیب،ترغیبadmin

منصور آفاق ۔ غزل نمبر 171

اپنے چہرے کی تشبیب منسوخ کر

رونمائی کی تقریب منسوخ کر

اپنا دکھ پیش کر سادہ الفاظ میں

اتنی مشکل تراکیب منسوخ کر

لفظ تیرے زمانے کے عکاس ہوں

اب گذشتہ اسالیب منسوخ کر

حدِ فاصل کوئی کھینچ دن رات میں

دوغلے پن کی تہذیب منسوخ کر

خون سے بھر گئی ہے مری ہر گلی

اپنا اب ذوقِ تخریب منسوخ کر

ظلم کو ظلم کہہ ، رات کو رات لکھ

ظالموں کی نہ تکذیب منسوخ کر

روشنی کے لگا پول ہر چوک میں

اب صلیبوں کی تنصیب منسوخ کر

عادتاً تُو مسلسل یہ لیکچر نہ دے

بے وجہ اپنی تادیب منسوخ کر

تیری منزل پہ رکنا نہیں ہے مجھے

یہ محبت کی ترغیب منسوخ کر

دارپر پہلے جانا ہے منصور نے

عاشقوں کی یہ ترتیب منسوخ کر

منصور آفاق

اس کو بھی اپنی طرح برباد کر

دسمبر 1, 2007منصور آفاق،شعراء،غزلفریاد،یاد،افتاد،امداد،آباد،آزاد،ارشاد،باد،برباد،زادadmin

منصور آفاق ۔ غزل نمبر 170

اب کوئی ایسا ستم ایجاد کر

اس کو بھی اپنی طرح برباد کر

روند کر رکھ دوں ترے سات آسماں

اک ذرا بس موت سے آزاد کر

اب مجھے تسخیر کرنے کے لیے

اسم اعظم روح میں آباد کر

میری باتیں میری آنکھیں میرے ہاتھ

بیٹھ کر اب رو مجھے اور یاد کر

قریہء تشکیک کی سرحد پہ ہوں

صاحبِ لوح و قلم امداد کر

خالق و مخلوق میں دے فاصلے

ہم خدا زادوں کو آدم زاد کر

خشک سالی آ گئی آنکھوں تلک

پانیوں کے واسطے فریاد کر

ہے رکا کوئی یہاں برسوں کے بعد

بس دعائے عمرِ ابر و باد کر

اک قیامت سے نکل آیا ہوں میں

اب کوئی نازل نئی افتاد کر

ہیں ہمہ تن گوش ساتوں آسماں

بول کچھ منصور کچھ ارشاد کر

منصور آفاق

میلوں لمبا ایک جلوس سڑک پر

دسمبر 1, 2007منصور آفاق،شعراء،غزلفانوس،ملبوس،منحوس،مانوس،محسوس،جلوس،جوسadmin

منصور آفاق ۔ غزل نمبر 169

خالی پیٹ چلے مایوس سڑک پر

میلوں لمبا ایک جلوس سڑک پر

دیکھ کے پہلی بار دہکتا سورج

اس نے پھینک دیا ملبوس سڑک پر

برسوں پہلے میرا گھر ہوتا تھا

شہرِ فسوں کی اس مانوس سڑک پر

صرف یہ رستہ جانے والوں کا ہے

پہلی بار ہوا محسوس سڑک پر

میں نے آگ بھری بوتل کھولی تھی

اس نے پیا تھا اورنج جوس سڑک پر

چاند دکھائی دیتا تھا کھڑکی سے

دور لٹکتا اک فانوس سڑک پر

ننگے پاؤں چلتے ہیں ہم منصور

آگ اگلتی اک منحوس سڑک پر

منصور آفاق

ہے بوسہ زن بہار محمدﷺ کے نام پر

دسمبر 1, 2007منصور آفاق،شعراء،غزلناگوار،نثار،وقار،گار،بہار،بارadmin

منصور آفاق ۔ غزل نمبر 168

تہذیب کانکھار محمدﷺ کے نام پر

ہے بوسہ زن بہار محمدﷺ کے نام پر

بے عیب شاہکار ہے ربِ کریم کا

نقطہ بھی ناگوار محمدﷺ کے نام پر

لمحے اسی کے فیض کی زندہ امانتیں

یہ روز وشب نثار محمدﷺ کے نام پر

چودہ سو سال سے گل و گلزار کے تمام

موسم ہیں ساز گار محمدﷺ کے نام پر

ذرے ہوں مہر و ماہ اسی اسم کے طفیل

ذی حس ہوں ذی وقار محمدﷺ کے نام پر

منصور ان کے نام پہ مرنا عروجِ بخت

قرباں میں بار بار محمدﷺ کے نام پر

منصور آفاق

دو برہنہ شیڈ تھے اک لیمپ والے میز پر

دسمبر 1, 2007منصور آفاق،شعراء،غزللے،والے،کالے،پیالے،جالے،رسالےadmin

منصور آفاق ۔ غزل نمبر 167

کچھ اندھیرے جاگتے تھے کچھ اجالے میز پر

دو برہنہ شیڈ تھے اک لیمپ والے میز پر

آنکھ جھپکی تھی ذرا سی میں نے کرسی پر کہیں

وقت نے پھر بن دیے صدیوں کے جالے میز پر

صلح کی کوشش نہ کر ہابیل اور قابیل میں

کھول دیں گے فائلیں افلاک والے میز پر

آگ جلتے ہی لبوں کی مل گئیں پرچھائیاں

رہ گئے کافی کے دو آدھے پیالے میز پر

جسم استانی کا لتھڑا جا رہا تھا رال سے

چاک لکھتا جا رہا تھا نظم کالے میز پر

میری ہم مکتب نزاکت میں قیامت خیز تھی

چاہتا تھا دل اسے اپنی سجا لے میز پر

کوئی ترچھی آنکھ سے منصور کرتا تھا گناہ

سیکس کے رکھے تھے پاکیزہ رسالے میز پر

منصور آفاق

ناموں کے زخم رہ گئے برگد کی چھال پر

دسمبر 1, 2007منصور آفاق،شعراء،غزلقمیضوں،مریضوں،چیزوں،چھال،وصال،کنیزوں،کریزوں،تھال،خیال،شمیضوں،شال،عزیزوںadmin

منصور آفاق ۔ غزل نمبر 166

دونوں بچھڑ کے چل دیئے راہِ ملال پر

ناموں کے زخم رہ گئے برگد کی چھال پر

شب کے سکوت میں لیا یوں اس نے کوئی نام

مندری بجی ہو جس طرح پیتل کے تھال پر

بارش میں بھیگتی چلی آئی تھی کوئی ہیر

بوندیں ٹھہر گئی تھیں دھنک رنگ شال پر

آتی تھی ٹیلی فون سے آوازِ لمسِ یار

بستر بچھا تھا فرشِ بہشتِ خیال پر

منصور کیا سفید کرسمس کی رات ہے

تارے مچل رہے ہیں زمیں کے وصال پر

ذرا بھی دھیان نہیں وصل کے فریضوں پر

یونہی وہ کاڑھتی پھرتی ہے دل قمیضوں پر

قیام کرتا ہوں اکثر میں دل کے کمرے میں

کہ جم نہ جائے کہیں گرد اس کی چیزوں پر

یہی تو لوگ مسیحا ہیں زندگانی کے

ہزار رحمتیں ہوں عشق کے مریضوں پر

کسی انار کلی کے خیال میں اب تک

غلام گردشیں ماتم کناں کنیزوں پر

جلا رہی ہے مرے بادلوں کے پیراہن

پھوار گرتی ہوئی ململیں شمیضوں پر

غزل کہی ہے کسی بے چراغ لمحے میں

شبِ فراق کے کاجل زدہ عزیزوں پر

وہ غور کرتی رہی ہے تمام دن منصور

مرے لباس کی الجھی ہوئی کریزوں پر

منصور آفاق

چاند کا دل جل رہا تھا دور لاکھوں میل پر

دسمبر 1, 2007منصور آفاق،شعراء،غزلمیل،تمثیل،ترسیل،جھیل،جبریل،ریلadmin

منصور آفاق ۔ غزل نمبر 165

چاندنی پھیلی ہوئی تھی ریت کی شہنیل پر

چاند کا دل جل رہا تھا دور لاکھوں میل پر

ایک اچھے دوست کے ہمراہ گزری تھی کبھی

فروری کی ایک اجلی پیر ’’چشمہ جھیل‘‘ پر

لمبی کر کے اپنی گردن گھولتی تھی زرد چونچ

کونج تھی مامور شاید درد کی ترسیل پر

اور پھر تصویر پر تاریک سائے رہ گئے

روشنی سی پڑ گئی تھی کیمرے کی ریل پر

مانگتی ہے زندگی پھر روشنی الہام کی

اور ابد کی خامشی ہے قریہء جبریل پر

آئینے سے پھوٹتی ہیں نور کی پرچھائیاں

کیا کہوں منصور اپنے عکس کی تمثیل پر

منصور آفاق

امید غلط اندازوں پر

دسمبر 1, 2007منصور آفاق،شعراء،غزلپروازوں،اندازوں،آوازوں،دروازوں،رازوںadmin

منصور آفاق ۔ غزل نمبر 164

زنجیر بکف شہبازوں پر

امید غلط اندازوں پر

ہم لوگ سفر میں رہتے ہیں

منسوخ شدہ پروازوں پر

آسیب لکیریں کھینچ گیا

دیوار صفت دروازوں پر

اب بین خموشی کرتی ہے

مصلوب شدہ آوازوں پر

کیا گفت و شنید ازل کی ہو

منصور ابد کے رازوں پر

منصور آفاق

کیکر پہ لگا کرتے ہیں اخروٹ کہیں اور

دسمبر 1, 2007منصور آفاق،شعراء،غزلنوٹ،ووٹ،کوٹ،کھوٹ،گھوٹ،اوٹ،ایئرپورٹ،اخروٹ،روبوٹ،ریموٹadmin

منصور آفاق ۔ غزل نمبر 163

یہ دشتِ مغیلاں ہے، ثمرکوٹ کہیں اور

کیکر پہ لگا کرتے ہیں اخروٹ کہیں اور

اک پھول نے اب ہاتھ مرا تھام رکھا ہے

سردائی بدن بھنگ کی جا گھوٹ کہیں اور

اس ہاتھ پہ تقسیم کی اشکال بنا دیں

اقرارِ محبت کا لکھا نوٹ کہیں اور

سایوں کے تعاقب میں یہی ہوتا ہے شاید

میں اور کہیں ، چاند بھری اوٹ کہیں اور

چلتے تھے پسینے کے مری جلد پہ قطرے

بم جیسے مرے پاؤں میں ریموٹ کہیں اور

ہے اپنے مراسم میں کوئی اور بھی شامل

ہم ٹھیک ہی سمجھے تھے کہ ہے کھوٹ کہیں اور

اِس شہر کی گلیوں میں دھڑکتے ہوئے دل ہیں

اے حاکمِ جاں ! رہتے ہیں روبوٹ کہیں اور

اِس شہرِ منافق کو بھی کوفہ نہ کہیں کیوں

وعدہ تھا کسی اور سے اور ووٹ کہیں اور

ڈستی ہے مرے خواب کو پروازوں کی آواز

تعمیر کیا جائے ایئرپورٹ کہیں اور

ٹوٹا مرا دل تھا، جھڑی آنکھوں میں لگی تھی

احساس کہیں اور تھا اور چوٹ کہیں اور

اڑتا تھا تعلق کی کسی تیز ہوا میں

ٹائی کہیں جاتی تھی مری، کوٹ کہیں اور

منصور آفاق

یہ مثلث زندگی دو مستطیلوں میں گزار

دسمبر 1, 2007منصور آفاق،شعراء،غزلفصیلوں،قبیلوں،میلوں،مثیلوں،مستطیلوں،نیلوں،وسیلوں،ٹیلوں،پیلوں،جمیلوں،جھیلوں،جبرئیلوں،حیلوں،دلیلوں،ذوالجلیلوں،سبیلوں،سریلوں،شکیلوںadmin

منصور آفاق ۔ غزل نمبر 162

جسم میں ٹھونکی ہوئی میخوں میں کیلوں میں گزار

یہ مثلث زندگی دو مستطیلوں میں گزار

جا کہیں آباد کر ٹوٹے ہوئے برباد دل

جا کوئی دن بے سہاروں ،بے وسیلوں میں گزار

یاد کی تصویرسے باہر قدم رکھ ، جا کہیں

شہر کی شہلا شگن شامیں شکیلوں میں گزار

استراحت سایہ ء گل میں تجھے زیبا نہیں

عمر جا کر دشت کے آوارہ ٹیلوں میں گزار

قرب کی گرمی انوکھی ہی سہی لیکن یہ رات

ہے یہی بہتربہانوں اور حیلوں میں گزار

خود اُسے ناراض کرکے تُونے بھیجا تھا سو اب

واہموں میں کاٹ راتیں ،دن دلیلوں میں گزار

دید کے پیاسے پرندے اڑ رہے ہیں آس پاس

چاند کچھ دن،آنسوئوں کی گرم جھیلوں میں گزار

میری گردن پر جلاپھر اپنے بوسوں کے چراغ

پھر کوئی شب لمس کے پُر شوق نیلوں میں گزار

کوچہء جاناں ہی تیرا نقطہ ء پرکار ہے

زندگی اپنی انہی دوچار میلوں میں گزار

چاہیے ہے حسنِ مطلق کی اگر قربت تجھے

عمر اپنی خوبرووں میں جمیلوں میں گزار

خامہء دل !ہم سخن کر مثنوی مولائے روم

دن سروشوں میں کٹیں شب جبرئیلوں میں گزار

گر پڑا ہے تُو سفر میں دشت کے، سو زندگی

اب مثالِ استخوانِ تازہ چیلوں میں گزار

کچھ ہوا کے بول سن،پیڑوں کی بھیگی شام سے

سُن پرندوں کی سریں ،کچھ دن سریلوں میں گزار

رات اس کے عارض و لب کے قصیدوں میں کٹے

دن پہاڑوں پر کہیں باغی قبیلوں میں گزار

تُو مذاہب سے نکل کر آبِ سادہ بانٹ بس

یہ فساد فی سبیل اللہ سبیلوں میں گزار

آدمی ہوں میں مرے گھر میں گنہ ممکن بھی ہے

رات جاتُو ذوالجلالوں ، ذوالجلیلوں میں گزار

اے سویٹر بننے والی، رنگوں کی آواز سن

سرخ دھاگے کھینچ، نیلا سوت پیلوں میں گزار

صحبتِ صالح تُرا صالح کند ، طالع کند

دوگھڑی ہم بے نظیروں بے مثیلوں میں گزار

جب تلک منصورپیچھے سے کمک آتی نہیں

وقت قلعہ بند ہو کر بس فصیلوں میں گزار

منصور آفاق

یہ شاعری ہے صحبتِ شب سے ماخوذ

دسمبر 1, 2007منصور آفاق،شعراء،غزللب،نسب،ادب،بلب،شبadmin

منصور آفاق ۔ غزل نمبر 161

ہجراں کے سیہ داغِ طلب سے ماخوذ

یہ شاعری ہے صحبتِ شب سے ماخوذ

ہم چُنتے رہے فرش و فلک کے الہام

ہم دونوں جہانوں کے ادب سے ماخوذ

ہے رات تری زلف دوتا سے نکلی

ہے صبح ترے عارض و لب سے ماخوذ

دھڑکن کی طرح چیخ رہی ہیں کب سے

نظمیں ہیں دلِ مہر بلب سے ماخوذ

ہم رات کے پرودہ نہیں ہیں منصور

ہم خواب ہیں صبحوں کے نسب سے ماخوذ

منصور آفاق

یہی ہیں ہر دھرم کے ساتھ کاغذ

دسمبر 1, 2007منصور آفاق،شعراء،غزلقدم،محترم،نم،کم،کرم،الم،بھرم،حرم،حشم،خم،دھرم،درم،ستم،صنم،علم،عدم،غمadmin

منصور آفاق ۔ غزل نمبر 160

پڑے ہیں جو قلم کے ساتھ کاغذ

یہی ہیں ہر دھرم کے ساتھ کاغذ

جلا آیا جلوسِ دانشِ دِین

شعورِ محترم کے ساتھ کاغذ

جڑے بس رہ گئے ہیں داستاں میں

ترے عہدِ ستم کے ساتھ کاغذ

یہی بس التماسِ دل کہ رکھنا

یہ دیوارِ حرم کے ساتھ کاغذ

پرندے بنتے جاتے ہیں مسلسل

ترے فضل و کرم کے ساتھ کاغذ

میانوالی میں آئے ہیں فلک سے

یہ امکانِ عدم کے ساتھ کاغذ

خود اپنے قتل نامے کا کسی کو

دیا پورے بھرم کے ساتھ کاغذ

کسی مبہم سی انجانی زباں میں

پڑے ہیں ہر قدم کے ساتھ کاغذ

الٹنے ہیں پلٹنے ہیں لحد تک

خیالِ بیش و کم کے ساتھ کاغذ

یہ وہ تہذیب ہے جو بیچتی ہے

ابھی دام و درم کے ساتھ کاغذ

کسی کو دستخط کرکے دیے ہیں

سرِ تسلیم خم کے ساتھ کاغذ

درازوں میں چھپانے پڑ رہے ہیں

کلامِ چشمِ نم کے ساتھ کاغذ

انہیں عباس نے لکھا ہے خوں سے

یہ چپکا دے علم کے ساتھ کاغذ

چمکتے پھر رہے ہیں آسماں کے

چراغِ ذی حشم کے ساتھ کاغذ

بدل جاتے ہیں اکثر دیکھتا ہوں

مری تاریخِ غم کے ساتھ کاغذ

ابد کے قہوہ خانے میں ملے ہیں

کسی تازہ صنم کے ساتھ کاغذ

ہوئے ہیں کس قدر منصور کالے

یہ شب ہائے الم کے ساتھ کاغذ

منصور آفاق

دلِ آدمی سے دماغِ خدا تک محمد محمد محمد محمدﷺ

دسمبر 1, 2007منصور آفاق،شعراء،غزلملا،انتہا،بقا،بادصبا،خداadmin

منصور آفاق ۔ غزل نمبر 159

ضمیرِ زمیں سے شعورِ سما تک محمد محمد محمد محمدﷺ

دلِ آدمی سے دماغِ خدا تک محمد محمد محمد محمدﷺ

جمودِ عدم سے نمودِ مکاں تک، سکوتِ ازل سے خرام جہاں تک

دیارِ فنا سے طلسمِ بقا تک محمد محمد محمد محمدﷺ

درختوں کے پتوں کی حمد ونثامیں بہاروں کی پاکیزہ قوسِ قزح میں

چنبیلی کے پھولوں سے بادصبا تک محمد محمد محمد محمدﷺ

اے دنیا اے اعجازِ کن کی نمائش،ذرا تُو بھی صلِ علیٰ آج کہہ دے

تری ابتداء سے تری انتہا تک محمد محمد محمد محمدﷺ

خدا کے لبوں پر وہی ذکرِ اقدس ، وہ اسم گرامی ہے عرشِ علا پر

فضا سے خلا تک ، خلا سے ملا تک محمد محمد محمد محمدﷺ

منصور آفاق

یہ یاد آئے گا شاید ہزار سال کے بعد

دسمبر 1, 2007منصور آفاق،شعراء،غزلوصال،کال،بلال،خیال،سوال،سالadmin

منصور آفاق ۔ غزل نمبر 158

ہے تیرا سامنا کرنا، شبِ زوال کے بعد

یہ یاد آئے گا شاید ہزار سال کے بعد

ترے زمانے میں ہوتا تو عین ممکن تھا

کھڑا غلاموں میں ہوتا کہیں بلال کے بعد

عجب حصار سا کھینچا ہے اسم نے تیرے

خیال کوئی نہ آیا ترے خیال کے بعد

تجھے ملے تو ملاقاتیں سب ہوئیں منسوخ

ہوئی تلاش مکمل، ترے وصال کے بعد

فرشتے ٹانکتے پھرتے ہیں پھول شاخوں پر

خدا بدل گیا اس کی بس ایک کال کے بعد

وہ جس نے مجھ سے کہا آپ کون ہیں منصور

سوال بن گیا وہ آئینہ سوال کے بعد

منصور آفاق

منزلیں دیں گی کسے اپنا پتا میرے بعد

دسمبر 1, 2007منصور آفاق،شعراء،غزلہوا،فرا،قبا،نما،نیا،ندا،وفا،گلہ،گھٹا،پڑا،پا،پتا،ادا،بھلا،جفا،حنا،خدا،دیا،ذرا،رکھا،سما،سیہ،سرا،صبا،ضیاadmin

منصور آفاق ۔ غزل نمبر 157

کس طرف جائے گی اب راہ فنا میرے بعد

منزلیں دیں گی کسے اپنا پتا میرے بعد

رات کا دشت تھا کیا میرے لہو کا پیاسا

آسماں کتنا سحر پوش ہوا میرے بعد

یہ تو ہر طرح مرے جیسا دکھائی دے گا

کوزہ گر چاک پہ کیا تو نے رکھا میرے بعد

"کون پھر ہو گا حریفِ مے مرد افگنِ عشق؟”

کون دنیا کے لیے قبلہ نما میرے بعد

لڑکھڑاتی ہوئی گلیوں میں پھرے گی تقویم

وقت کا خاکہ اڑائے گی ہوا میرے بعد

میں خدا تو نہیں اس حسن مجسم کا مگر

کم نہیں میرا کیا اس نے گلہ میرے بعد

میں وہ سورج ہوں کہ بجھ کر بھی نظر آتا ہوں

اب نظر بند کرو میری ضیا میرے بعد

دشت میں آنکھ سمندر کو اٹھا لائی ہے

اب نہیں ہو گا کوئی آبلہ پا میرے بعد

تیرے کوچہ میں بھٹکتی ہی رہے گی شاید

سالہا سال تلک شام سیہ میرے بعد

گر پڑیں گے کسی پاتال سیہ میں جا کر

ایسا لگتا ہے مجھے ارض و سما میرے بعد

بعد از میر تھا میں میرِ سخن اے تشبیب

’کون کھولے گا ترے بند قبا میرے بعد‘

رات ہوتی تھی تو مہتاب نکل آتا تھا

اس کے گھر جائے گا اب کون بھلا میرے بعد

رک نہ جائے یہ مرے کن کی کہانی مجھ پر

کون ہو سکتا ہے آفاق نما میرے بعد

بزم سجتی ہی نہیں اب کہیں اہلِ دل کی

صاحبِ حال ہوئے اہل جفا میرے بعد

پھر جہالت کے اندھیروں میں اتر جائے گی

سر پٹختی ہوئی یہ خلق خدا میرے بعد

پہلے تو ہوتا تھا میں اوس بھی برگِ گل بھی

ہونٹ رکھے گی کہاں باد صبا میرے بعد

مجھ سے پہلے تو کئی قیس کئی مجنوں تھے

خاک ہو جائے گا یہ دشتِ وفا میرے بعد

بس یہی درد لیے جاتا ہوں دل میں اپنے

وہ دکھائے گی کسے ناز و ادا میرے بعد

جانے والوں کو کوئی یاد کہاں رکھتا ہے

جا بھی سکتے ہیں کہیں پائے حنا میرے بعد

زندگی کرنے کا بس اتنا صلہ کافی ہے

جل اٹھے گا مری بستی میں دیا میرے بعد

اس کو صحرا سے نہیں میرے جنون سے کد تھی

دشت میں جا کے برستی ہے گھٹا میرے بعد

میرے ہوتے ہوئے یہ میری خوشامد ہو گی

شکریہ ! کرنا یہی بات ذرا میرے بعد

میں ہی موجود ہوا کرتا تھا اُس جانب بھی

وہ جو دروازہ کبھی وا نہ ہوا میرے بعد

میرا بھی سر تھا سرِ صحرا کسی نیزے پر

کیسا سجدہ تھا… ہوا پھر نہ ادا میرے بعد

کاٹنے والے کہاں ہو گی یہ تیری مسند

یہ مرا سرجو اگر بول پڑا میرے بعد

پہلے تو ہوتی تھی مجھ پر یہ مری بزم تمام

کون اب ہونے لگا نغمہ سرا میرے بعد

میں کوئی آخری آواز نہیں تھا لیکن

کتنا خاموش ہوا کوہ ندا میرے بعد

میں بھی کر لوں گا گریباں کو رفو دھاگے سے

زخم تیرا بھی نہیں ہو گا ہرا میرے بعد

تیری راتوں کے بدن ہائے گراں مایہ کو

کون پہنائے گا سونے کی قبا میرے بعد

شمع بجھتی ہے‘ تو کیا اب بھی دھواں اٹھتا ہے

کیسی ہے محفلِ آشفتہ سرا میرے بعد

میں ہی لایا تھا بڑے شوق میں برمنگھم سے

اس نے پہنا ہے جو ملبوس نیا میرے بعد

عشق رکھ آیا تھا کیا دار و رسن پر منصور

کوئی سجادہ نشیں ہی نہ ہوا میرے بعد

منصور آفاق

فلم جاری ہے کہانی ختم شد

دسمبر 1, 2007منصور آفاق،شعراء،غزلفانی،لامکانی،مہربانی،معانی،نہانی،ناگہانی،کہانی،کرانی،گمانی،ٹھانی،پانی،پاسبانی،پرانی،بیانی،باغبانی،ترجمانی،جوانی،جاودانی،دخانی،روانی،رائیگانی،زبانی،سرگرانیadmin

منصور آفاق ۔ غزل نمبر 156

زندگی! اب زندگانی ختم شد

فلم جاری ہے کہانی ختم شد

رو لیا ہے جتنا رو سکتا تھا میں

آنکھ میں جو تھا وہ پانی ختم شد

کر رہا ہوں شام سے فکرِ سخن

یعنی عہدِ رائیگانی ختم شد

میں بھی ہوں موجود اب افلاک پر

لامکاں کی لامکانی ختم شد

رک گیا میں بھی کنارہ دیکھ کر

پانیوں کی بھی روانی ختم شد

چھوڑ آیا ہوں میں شورِ ناتمام

گاڑیوں کی سرگرانی ختم شد

اور باقی ہیں مگر امید کی

اک بلائے ناگہانی ختم شد

آنے سے پہلے بتاتی ہیں مجھے

بارشوں کی بے زبانی ختم شد

دیکھتے ہیں آسماں کے کیمرے

اب گلی کی پاسبانی ختم شد

آ گئے جب تم تو کیا پھر رہ گیا

جو تھا سوچا ، جو تھی ٹھانی ختم شد

بھیج غالب آتشِ دوزخ مجھے

سوزِ غم ہائے نہانی ختم شد

اڑ رہی ہے راکھ آتش دان میں

یار کی بھی مہربانی ختم شد

اب مرے کچھ بھی نہیں ہے آس پاس

ایک ہی تھی خوش گمانی ختم شد

وہ سمندر بھی بیاباں ہو گیا

وہ جو کشتی تھی دخانی ختم شد

اک تکلم اک تبسم کے طفیل

میرا شوقِ جاودانی ختم شد

آہٹیں سن کر خدا کی پچھلی رات

میرے دل کی بے کرانی ختم شد

اک مجسم آئینے کے سامنے

آرزو کی خوش بیانی ختم شد

لفظ کو کیا کر دیا ہے آنکھ نے

چیختے روتے معانی ختم شد

کچھ ہوا ایسا ہوا کے ساتھ بھی

جس طرح میری جوانی ختم شد

اہم اتنا تھا کوئی میرے لیے

اعتمادِ غیر فانی ختم شد

دشت کی وسعت جنوں کو چاہیے

اس چمن کی باغبانی ختم شد

اپنے بارے میں کروں گا گفتگو

یار کی اب ترجمانی ختم شد

ذہن میں منصور ہے تازہ محاذ

سرد جنگ اپنی پرانی ختم شد

منصور آفاق

پھر مہرباں ہوئی کسی نا مہرباں کی یاد

دسمبر 1, 2007منصور آفاق،شعراء،غزلمہرباں،مکاں،وہاں،کہاں،دلاں،دوستاں،رفتگاں،رواںadmin

منصور آفاق ۔ غزل نمبر 155

وہ خواب گاہِ عرش وہ باغِ جناں کی یاد

پھر مہرباں ہوئی کسی نا مہرباں کی یاد

آنکھوں میں کس کے عارض و لب کے چراغ ہیں

پھرتی ہے یہ خیال میں آخر کہاں کی یاد

پھر گونجنے لگی ہے مرے لاشعور میں

روزِ ازل سے پہلے کے کچھ رفتگاں کی یاد

میں آسماں نژاد زمیں پر مقیم ہوں

کچھ ہے یہاں کا درد تو کچھ ہے وہاں کی یاد

کوئی نہ تھا جہاں پہ مری ذات کے سوا

آئی سکوتِ شام سے اُس لا مکاں کی یاد

دیکھوں کہیں خلوص تو آتی ہے ذہن میں

پیچھے سے وار کرتے ہوئے دوستاں کی یاد

دریائے ٹیمز! اپنے کنارے سمیٹ لے

آئی ہے مجھ کو سندھ کے آبِ رواں کی یاد

منصور آ رہی ہے سرِ آئینہ مجھے

اِس شہرِ پُر فریب میں سادہ دلاں کی یاد

منصور آفاق

بڑے ہی نیک خرابوں کے چیف زندہ باد

دسمبر 1, 2007منصور آفاق،شعراء،غزللطیف،چیف،نحیف،کثیف،حلیف،حریفadmin

منصور آفاق ۔ غزل نمبر 154

ہر ایک جرم ، بنام شریف زندہ باد

بڑے ہی نیک خرابوں کے چیف زندہ باد

یہ خونخوار دھماکے تجھے مبارک ہوں

او دشمنانِ وطن کے حلیف زندہ باد

تباہ حال کرنسی پہ نعرۂ تکبیر

نئی معاش کی صبحِ لطیف زندہ باد

او بادشاہ سلامت تری حکومت میں

تمام ملکِ خدا کے حریف زندہ باد

مرے وطن کو تمنا سلامتی کی ہے

سلامتی کی صدائے نحیف زندہ باد

کہو دھواں دھواں لاہور پر غزل منصور

کہو یہ دھند کا شہرِ کثیف زندہ باد

منصور آفاق

زمیں کو عیدِ میلادِ محمدﷺ پر مبارک باد

دسمبر 1, 2007منصور آفاق،شعراء،غزلمحمد،مسند،آمد،اسود،حدadmin

منصور آفاق ۔ غزل نمبر 153

گلستاں کو بہارِ سبز گنبد پر مبارک باد

زمیں کو عیدِ میلادِ محمدﷺ پر مبارک باد

شعورِ ذہنِ انسانی جہاں منزل تلک پہنچا

دماغو! اُس خرد کی آخری حد پر مبارک باد

جہاں کو ہدیۂ تبریک کالی کملی پر میرا

جہاں کو آسمانِ شالِ اسود پر مبارک باد

زمیں پر نائبِ اللہ ہونے کی نوید آئی

مقامِ جانشینِ کُن کی مسند پر مبارک باد

تجھے رحمت بھرے بارہ ربیع اول کے دن منصور

رسولِ اقدس و اعظم کی آمد پر مبارک باد

منصور آفاق

ہاتھ تصویر پہ ملتی ہوئی چیخ

دسمبر 1, 2007منصور آفاق،شعراء،غزلملتی،مچلتی،چلتی،نکلتی،نگلتی،پگھلتی،اگلتی،بدلتی،سنبھلتیadmin

منصور آفاق ۔ غزل نمبر 152

آتشِ لمس سے جلتی ہوئی چیخ

ہاتھ تصویر پہ ملتی ہوئی چیخ

زخم پاؤں میں کیے جاتی ہے

خشک پتوں سے نکلتی ہوئی چیخ

اک شکاری کے کفن سے ابھری

برف کے ساتھ پگھلتی ہوئی چیخ

کس نے چپکائی ہے دیواروں پر

خواب میں رنگ بدلتی ہوئی چیخ

میں طلسمات سے نکلا تو ملی

بابِ حیرت پہ مچلتی ہوئی چیخ

قاتلو! دھوتے رہو نقشِ قدم

چلتی جاتی ہے وہ چلتی ہوئی چیخ

اک تعلق کے گلے سے نکلی

در و دیوار نگلتی ہوئی چیخ

پھر وہی ڈوبتا سورج منصور

پھر وہی آگ اگلتی ہوئی چیخ

آخری سانس میں ڈھلتی ہوئی چیخ

گر پڑی ایک سنبھلتی ہوئی چیخ

منصور آفاق

محمدﷺ کی زمینِ پاک کی تاریخ

دسمبر 1, 2007منصور آفاق،شعراء،غزللولاک،چاک،پوشاک،پیچاک،پاک،افلاک،املاک،آک،ادراک،خاشاک،سفاکadmin

منصور آفاق ۔ غزل نمبر 151

فلک سے بھی پرانی خاک کی تاریخ

محمدﷺ کی زمینِ پاک کی تاریخ

مکمل ہو گئی ہے آخرش مجھ پر

جنوں کے دامن صد چاک کی تاریخ

ابھی معلوم کرتا پھر رہا ہوں میں

تری دستار کے پیچاک کی تاریخ

مری آنکھوں میں اڑتی راکھ کی صورت

پڑی ہے سوختہ املاک کی تاریخ

رگِ جاں میں اتر کر عمر بھر میں نے

پڑھی ہے خیمہء افلاک کی تاریخ

سرِ صحرا ہوا نے نرم ریشوں سے

پھٹا کویا تو لکھ دی آک کی تاریخ

مسلسل ہے یہ کیلنڈر پہ میرے

جدائی کی شبِ سفاک کی تاریخ

پہن کر پھرتی ہے جس کو محبت

مرتب کر تُو اُس پوشاک کی تاریخ

ہوائے گل سناتی ہے بچشمِ کُن

جہاں کو صاحبِ لولاک کی تاریخ

کھجوروں کے سروں کو کاٹنے والو

دکھائی دی تمہیں ادراک کی تاریخ

ہے ماضی کے مزاروں میں لکھی منصور

بگولوں نے خس و خاشاک کی تاریخ

منصور آفاق

زندگی مجھ سے ملی پچھلے دسمبر کی طرح

دسمبر 1, 2007منصور آفاق،شعراء،غزلمنظر،گاگر،جھانجر،خنجر،دسمبر،سمندرadmin

منصور آفاق ۔ غزل نمبر 150

برف کی شال میں لپٹی ہوئی صرصر کی طرح

زندگی مجھ سے ملی پچھلے دسمبر کی طرح

کس طرح دیکھنا ممکن تھا کسی اور طرف

میں نے دیکھا تھا اُسے آخری منظر کی طرح

ہاتھ رکھ ، لمس بھری تیز نظر کے آگے

چیرتی جاتی ہے سینہ مرا خنجر کی طرح

بارشیں اس کا لب و لہجہ پہن لیتی تھیں

شور کرتی تھی وہ برسات میں جھانجر کی طرح

کچی مٹی کی مہک اوڑھ کے اِتراتی تھی

میں پہنتا تھا اسے گرم سمندر کی طرح

پلو گرتا ہوا ساڑھی کا اٹھا کر منصور

چلتی ہے چھلکی ہوئی دودھ کی گاگر کی طرح

منصور آفاق

مجھ کو محسوس کرودوستو خوشبو کی طرح

دسمبر 1, 2007منصور آفاق،شعراء،غزلہلاکو،ہو،پہلو،پکھیرو،آہو،آنسو،اردو،باہو،تو،ترازو،جو،خوشبو،دارو!admin

منصور آفاق ۔ غزل نمبر 149

میرا اعجاز نہیں رنگ کے جادو کی طرح

مجھ کو محسوس کرودوستو خوشبو کی طرح

ذکر آیا جو کہیں بزمِ سخن میں میرا

چشمِ جاناں سے نکل آیا میں آنسو کی طرح

اچھے موسم کی دعا مانگی تو موجود تھا میں

خشک آنکھوں میں کہیں رنج کے پہلو کی طرح

دل نہ تھا دامنِ گل پوش میں آخر میں بھی

اڑ گیا پیڑ سے اک روز پکھیرو کی طرح

اس کی دہلیزسے طالب کو دعا بھی نہ ملی

سر پٹختا ہی رہاموجِ لبِ جو کی طرح

میرے سینے سے نکلتی ہیں الوہی کرنیں

جسم میں گونجتی ہے ایک صدا ہو کی طرح

پھر ہرے ہو گئے اس دل میں تری یاد کے زخم

پھر چلی سرد ہوا میگھ کے دارو کی طرح

قتل کرتا ہے تو آداب بجا لاتا ہے

یار ظالم نہیں چنگیز و ہلاکو کی طرح

پھر سنائی دی انا الحق کی صدا پتوں سے

لگ رہی ہے مجھے آوازِ صبا ہو کی طرح

کشمکش ایک حریفانہ سی اُس میں بھی ہے

کشمکش مجھ میں بھی تفریقِ من و تُو کی طرح

شہر میں ہوتا تو پھر پوچھتے عاشق کا مزاج

دشت میں قیس چہکتا پھرے آہو کی طرح

اس کی آسودہ نفاست پہ ہے قربان فرانس

کیسی کمخواب سی نازک سی ہے اردو کی طرح

یہ شہادت کا عمل ہے کہ قلم کے وارث

مر کے بھی مرتے نہیں وارث و باہو کی طرح

وقت، سچائی ،خدا ساتھ تینوں میرے

میں ہوں منصور مشیت کے ترازو کی طرح

منصور آفاق

جی رہا ہوں مگر بے کسی کی طرح

دسمبر 1, 2007منصور آفاق،شعراء،غزلہوئی،قلی،ملتوی،منظری،نوکری،کسی،اونٹنی،اجنبی،جھری،سرمئی،شاعریadmin

منصور آفاق ۔ غزل نمبر 148

آدمی میں بھی ہوں آدمی کی طرح

جی رہا ہوں مگر بے کسی کی طرح

ہر قدم پر لہو کا تعاقب کرے

موت وحشت زدہ اونٹنی کی طرح

چار اطراف میں زندگی کی تڑپ

جسم کی آخری جھر جھری کی طرح

صرف حیرت تھی آنکھوں میں پھیلی ہوئی

کوئی منظر تھا بے منظری کی طرح

آئینے میں کسی اور کو دیر تک

دیکھتا میں رہا اجنبی کی طرح

ایک تقریبِصبح مسلسل ہے تُو

اور میں محفلِ ملتوی کی طرح

وقت کے کینوس پہ ادھورا سا میں

ایک تصویر بنتی ہوئی کی طرح

سانولی دھوپ آنکھوں میں پھرتی رہے

شام کی ساعتِ سرمئی کی طرح

عمر بھر اک سٹیشن پہ چلتے رہے

تیراساماں اٹھاکر قلی کی طرح

مصرعے اگلی کلاسوں کے بنتا ہوا

خواب کا جامعہ شاعری کی طرح

عمر منصور اس کی گلی میں کٹی

عشق میں نے کیا نوکری کی طرح

منصور آفاق

تبرا مردہ، مخنث امامتوں پر بھیج

دسمبر 1, 2007منصور آفاق،شعراء،غزلقیامتوں،قامتوں،قدامتوں،ملامتوں،ندامتوں،کرامتوں،امامتوں،سلامتوں،شامتوں،ضخامتوں،علامتوںadmin

منصور آفاق ۔ غزل نمبر 147

نصابِ درسِ حرم کی نظامتوں پر بھیج

تبرا مردہ، مخنث امامتوں پر بھیج

نماز پڑھ کے رسولِ زمیں کے کہنے پر

دو حرف زر کی فلک گیر قامتوں پر بھیج

جناب شیخ جو اتریں فقط غریبوں پر

ہزار لعنتیں ایسی قیامتوں پر بھیج

خبر نکال کوئی غیب کے اندھیرے سے

کوئی سراغ رساں تُو قدامتوں پر بھیج

یہی تو چیز بناتی ہے خوبرو دل کو

سلامتی کی دعائیں ، ندامتوں پر بھیج

وہی جو سنتِ نبوی پہ چلنے سے نکلیں

درود ایسی مقدس کرامتوں پر بھیج

دکھا جہاں کو مدنیہ کی امن زا تہذیب

بہار اپنی منور علامتوں پر بھیج

خود آپ چیر دے تاریک موسموں کی قبا

نوید صبح شبوں کی ضخامتوں پر بھیج

بدل دے لوح پہ لکھا مدینے کے صدقے

کرم شعور کا امت کی شامتوں پر بھیج

تُو آسمان سے رحمت کی پتیوں کے ڈھیر

شہیدوں پہ مرے زندہ سلامتوں پر بھیج

جو بھر دے روشنی روحِ سیاہ میں منصور

سلام ایسی مبارک ملامتوں پر بھیج

منصور آفاق

جواب اپنا زمیں کی شکاتیوں پر بھیج

دسمبر 1, 2007منصور آفاق،شعراء،غزلہدایتوں،کفایتوں،آیتوں،حمایتوں،حکایتوں،روایتوں،سرایتوں،شکاتیوں،عنایتوں،غایتوںadmin

منصور آفاق ۔ غزل نمبر 146

یہی پیام فلک کی نہایتوں پر بھیج

جواب اپنا زمیں کی شکاتیوں پر بھیج

خطوطِ وصل کے اسباق یاد کرنے ہیں

کوئی کتاب بدن کی حکایتوں پر بھیج

تلاش لیتی ہیں ہر رات جو نیا کمرا

تف ایسی صبح سراپا عنایتوں پر بھیج

اخذ کروں میں ہوا کی تلاوتوں سے کیا

شعورِ ابر ، سمندر کی آیتوں پر بھیج

دیارِ میر کی آرائشیں سلامت رکھ

بہار ، حسنِ سخن کی روایتوں پر بھیج

کوئی اشارہ کوئی روشنی کوئی سگنل

کوئی سروش تو ہم بے ہدایتوں پر بھیج

یہ فتح مند نہ مظلوم ہوں کہیں تیرے

کمک تُو بھیج ستم کی حمایتوں پر بھیج

کوئی صحیفہ ء گل ، کوئی رنگ خیز نمو

درختِ جاں میں خزاں کی سرایتوں پر بھیج

ہزار مرتبہ بھیگی ہوئی نظر کے خطوط

بلند بام چراغوں کی غایتوں پر بھیج

پرندوں کی طرح اپنے گزار دن منصور

بچت کو چھوڑ دے لعنت کفایتوں پر بھیج

منصور آفاق

ابھی دیکھا تھا اپنی روشنی کے ساتھ تھا سورج

دسمبر 1, 2007منصور آفاق،شعراء،غزلہوا،وفا،ڈوبتا،کا،گیا،پڑا،پھرا،بھرا،بجھا،بجا،تھا،تبصرہ،جاگتا،دوسرا،رہا،سوچتاadmin

منصور آفاق ۔ غزل نمبر 145

کسی نے کچھ کہا ہے کیا، کہاں یہ چل دیا سورج

ابھی دیکھا تھا اپنی روشنی کے ساتھ تھا سورج

اسے معلوم تھی شاید مری راتوں کی برفابی

مری آنکھوں کے بالکل سامنے دن بھر رہا سورج

چپک جاتا ہے خاموشی سے میرے ساتھ بستر میں

یہ نم دیدہ دسمبر کی اداسی سے بھرا سورج

برہنہ پانیوں پر شام کی کرنیں ٹپکتی تھیں

مگر پھر یوں ہوا نیلا سمندر ہو گیا سورج

مرے دریا کے پانی کو ہوا ہونے نہیں دیتا

کہیں برفیلے کہساروں کو پگھلاتا ہوا سورج

یہ کافی دیر سے کھڑکی کھلی ہے میرے کمرے کی

ابھی نکلا نہیں ہے اِس گلی میں صبح کا سورج

ابھی کچھ دیر رہنا چاہتا ہوں میں اجالوں میں

بلاتا ہے مجھے اپنی طرف پھر ڈوبتا سورج

مجھے دل کی گلی میں بھی تپش محسوس ہوتی ہے

خود اپنے ہجر میں اتنا زیادہ جل بجھا سورج

اُدھر پوری طرح اترا نہیں وہ روشنی کا تھال

نکلتا آ رہا ہے یہ کدھر سے دوسرا سورج

رکھا ہے ایک ہی چہرہ بدن کے بام پر میں نے

کوئی مہتاب کہتا ہے کسی کا تبصرہ سورج

نگاہوں کو شعاعوں کی ضرورت تھی بہت لیکن

کہاں تک میری گلیوں میں مسلسل جاگتا سورج

جہاں اس وقت روشن ہے تبسم تیرے چہرے کا

انہی راتوں میں برسوں تک یہ آوارہ پھرا سورج

اسے اچھے نہیں لگتے سلگتے رتجگے شاید

اکیلا چھوڑ جاتا ہے ہمیشہ بے وفا سورج

اجالے کا کفن بُننا کوئی آساں نہیں ہوتا

نظر آتا ہے شب کے پیرہن سے جا بجا سورج

ابھرنا ہی نہیں میں نے نکلنا ہی نہیں میں نے

اتر کر عرش کے نیچے یہی ہے سوچتا سورج

افق پر اک ذرا آندھی چلی تھی شام کی منصور

کہیں ٹوٹی ہوئی ٹہنی کی صورت گر پڑا سورج

منصور آفاق

ہے کوئی میرے علاوہ حرف کی جاگیر کا وارث

دسمبر 1, 2007منصور آفاق،شعراء،غزلتحریر،تصویر،جاگیر،زنجیر،شبیرadmin

منصور آفاق ۔ غزل نمبر 144

خانقاہِ غم کا سجادہ نشیں ہوں میر کا وارث

ہے کوئی میرے علاوہ حرف کی جاگیر کا وارث

نظم تلوارِ علی ہے اور مصرع لہجہء زینب

کربلائے لفظ ! میں ہوں خیمہء شبیر کا وارث

چشمِ دانش کی طرح گنتا نہیں ہوں ڈوبتے سورج

میں ابد آباد تک ہوں شام کی تحریر کا وارث

کنٹرول اتنا ہے روز و شب پہ سرمایہ پرستی کا

کہ مرا بیٹا ہے میرے پاؤں کی زنجیر کا وارث

نقش جس کے بولتے ہیں ، رنگ جس کے خواب جیسے ہیں

حضرتِ غالب وہی ہے پیکرِ تصویر کا وارث

منصور آفاق

بہتے پانی کی قسم، گریۂ جاں کارِ عبث

دسمبر 1, 2007منصور آفاق،شعراء،غزلفغاں،مکاں،نشاں،اماں،جہاں،جاں،رواں،زیاںadmin

منصور آفاق ۔ غزل نمبر 143

ساحلِ یاد پہ آہوں کا دھواں کارِ عبث

بہتے پانی کی قسم، گریۂ جاں کارِ عبث

دھوپ میں ساتھ بھلا کیسے وہ دے سکتا تھا

ایک سائے کے لیے آہ و فغاں کارِ عبث

میں تماشا ہوں تماشائی نہیں ہو سکتا

یہ فلک فہمی یہ تسخیرِ جہاں کارِ عبث

تیرے ہونے سے مہ و مہر مرے ہوتے تھے

اب تو ہے سلسلہء کون و مکاں کارِ عبث

یہ الگ چیختے رنگوں کا ہوں شاعر میں بھی

ہے مگر غلغلہء نام و نشاں کارِ عبث

ایک جھونکے کے تصرف پہ ہے قصہ موقوف

بلبلے اور سرِ آب رواں کار عبث

خیر باقی رہے یا شر کی عمل داری ہو

دونوں موجود ہوں تو امن و اماں کارِ عبث

کوئی انگلی، کوئی مضراب نہیں کچھ بھی نہیں

کھینچ رکھی گئی تارِ رگِ جاں کارِ عبث

رہ گئے جنت و دوزخ کہیں پیچھے منصور

اب جہاں میں ہوں وہاں سود و زیاں کارِ عبث

منصور آفاق

مرے لیے یہ ذرا سا چراغِ طور بہت

دسمبر 1, 2007منصور آفاق،شعراء،غزلقصور،کھجور،شعور،ضرور،طور،ظہورadmin

منصور آفاق ۔ غزل نمبر 142

گمانِ صبح ہے کافی، خیالِ نور بہت

مرے لیے یہ ذرا سا چراغِ طور بہت

میں بارگاہِ محبت میں کس طرح جاؤں

مرے گناہ بہت ہیں مرے قصور بہت

یہی بہت کہ خزاں میں بہار ہے مجھ پر

ہے پھول پھول، یہی شاخ کو شعور بہت

تمام عہد نے آنکھوں پہ ہاتھ رکھے ہیں

ہوا ہے شعر میں شاید مرا ظہور بہت

یہ میرے بیگ میں رکھ دے نا کانچ کے ٹکڑے

میں بھیج دوں گا نئی چوڑیاں ، ضرور، بہت

نصیب، نسبتِ دشتِ عرب جسے منصور

بروز حشر وہی سایۂ کھجور بہت

منصور آفاق

ہم نے تیری نظر اتاری دوست

دسمبر 1, 2007منصور آفاق،شعراء،غزلہماری،قراری،مداری،کنواری،کاروباری،گزاری،گساری،پیاری،اتاری،باری،تمہاری،جاری،داری،راہداری،شہریاری،شکاریadmin

منصور آفاق ۔ غزل نمبر 141

کر کے آنکھوں سے بادہ خواری دوست

ہم نے تیری نظر اتاری دوست

اک تعلق ہے خواب کا اس سے

وہ زیادہ نہیں ہماری دوست

زد میں آیا ہوا نہیں نکلا

شور کرتے رہے شکاری دوست

اس کی اک اک نظر میں لکھا تھا

میں تمہاری ہوں بس تمہاری دوست

کیوں مہکتی ہے تیز بارش میں

اک دہکتی ہوئی کنواری دوست

راہ بنتی ہے آنے جانے سے

اور بناتے ہیں باری باری دوست

کچھ عجب ہے تمہارے لہجے میں

بڑھتی جاتی ہے بے قراری دوست

ہم اداسی پہن کے پھرتے ہیں

کچھ ہماری بھی غم گساری دوست

ہم اکیلے ہیں اپنے پہلو میں

ایسی ہوتی ہے دوست داری دوست

رات بھر بیچتے تھے جو سورج

اب کہاں ہیں وہ کاروباری دوست

کیا ہیں کٹھ پتلیاں قیامت کی

برگزیدہ ہوئے مداری دوست

حق ہمارا تھا جس کے رنگوں پر

تم نے وہ زندگی گزاری دوست

ہر طرف ہجرتیں ہیں بستی میں

کیا تمہاری ہے شہریاری دوست

دشتِ دل میں تمہاری ایڑی سے

ہو گیا چشمہ ایک جاری دوست

ہجر کی بالکونی کی شاید

میلوں لمبی ہے راہداری دوست

زندگی نام کی کہیں منصور

ایک ہے دوجہاں سے پیاری دوست

منصور آفاق

یک ہزار ماہ سے عظیم رات

دسمبر 1, 2007منصور آفاق،شعراء،غزلقدیم،میم،یتیم،بھیم،حریم،رحیم،عظیمadmin

منصور آفاق ۔ غزل نمبر 140

روشنی کی روح میں مقیم رات

یک ہزار ماہ سے عظیم رات

سجدہِ گاہِ شام کی مجھے قسم

مہر نیم روز کی حریم رات

سہہ پہر نکھر رہی تھی ہر طرف

گار ہاتھا چاند راگ بھیم رات

نت نئی ترنگ سے کرے نزول

قرن ہا قرن سے قدیم رات

باغ میں گلاب بھی اداس تھا

چاند کے بغیر تھی یتیم رات

دل میں حمد حمد کے چراغ تھے

آنکھ میں تھی نور نور میم رات

بار بار آئے میرے صحن میں

وہ کریم اور وہ رحیم رات

منصور آفاق

میرے ساتھ چلی جاؤ تم یا سورج کے ساتھ۔ ایک ہی بات

دسمبر 1, 2007منصور آفاق،شعراء،غزلہاتھ،فرمودات،مات،پات،برسات،حالات،ساتھ،ساداتadmin

منصور آفاق ۔ غزل نمبر 139

اُس کی منزل تاریکی ہے،میری منزل رات۔ ایک ہی بات

میرے ساتھ چلی جاؤ تم یا سورج کے ساتھ۔ ایک ہی بات

موسم اور میں ایک ہی دریا کے دو پاگل فرد۔درد نورد

برکھا رت کے آنسو ہوں یاآنکھوں کی برسات۔ ایک ہی بات

تیز ہوا کی زد پر دونوں ،ایک ہی پل کا روپ۔موت کی دھوپ

جیون سے آویختہ میں یا پیڑ سے مردہ پات۔ ایک ہی بات

اس کے کنجِ لب میں میری مسکانوں کی دھول۔ ہجرکے پھول

یعنی جیت کسی کی اور مسلسل میری مات۔ ایک ہی بات

میں گمنام یہاں تو اس کا جانے کون مقام۔کون غلام

ملک سخن کامیں شہزادہ اور ہے وہ سادات۔ ایک ہی بات

تیز کراہیں ، آہیں ، چیخیں ،گرمی اور سیلاب۔سانس عذاب

پاکستان کے منظر ہو ں یادوزخ کے حالات۔ ایک ہی بات

رنگ گریں گے قوسِ قزح سے،پھولوں سے سنگیت۔میت کے گیت

صبحِ بدن پر میرا ہو یا بادصبا کا ہاتھ۔ ایک ہی بات

کیسے کہوں میں باہو ، بلھا ، وارث ، شاہ حسین۔پیر فرید

کیسے کہوں منصور کے یا اقبال کے فرمودات۔ ایک ہی بات

منصور آفاق

بنے ہوئے ہیں بڑے راجپوت آخرِ شب

دسمبر 1, 2007منصور آفاق،شعراء،غزلہبوط،قنوت،بلوط،بھوت،ثبوت،حنوط،راجپوت،سکوتadmin

منصور آفاق ۔ غزل نمبر 138

مرے دماغ کے سب عنکبوت آخرِ شب

بنے ہوئے ہیں بڑے راجپوت آخرِ شب

عشائے غم میری خیرہ سری میں گزری ہے

سو پڑھ رہا ہوں دعائے قنوت آخرِ شب

اداسیوں کے تنفس میں میرے اندر سے

نکل پڑا ہے عدم کا سکوت آخرِ شب

لکھا گیا تھا مجھے آسماں پہ کرنوں سے

ہوا ہے خاک پہ میرا ہبوط آخرِ شب

میں اپنے پاس تہجد کے وقت آیا ہوں

ملا ہے مجھ کو خود اپنا ثبوت آخرِ شب

دبا دیا تھا افق میں امید کا پتہ

نکل پڑا ہے کوئی شہ بلوط آخرِ شب

ہزار رنگ جہنم کے دیکھتا ہوں میں

کیا ہے موت کا منظر حنوط آخرِ شب

بدن پہ دھوپ کا آسیب دیکھ کر منصور

چرا کے برف کے لے آیا بھوت آخرِ شب

منصور آفاق

مارا نہ جاؤں میں بھی کہیں نام کے سبب

دسمبر 1, 2007منصور آفاق،شعراء،غزلفام،مادام،نام،ناکام،کام،پیغام،الہام،ایام،اسلام،اصنام،بام،بدنام،دشنام،شامadmin

منصور آفاق ۔ غزل نمبر 137

منصور پر خدائی کے الزام کے سبب

مارا نہ جاؤں میں بھی کہیں نام کے سبب

بس رہ گئی ہے یاد میں بجھتی سی ریل کار

میں لیٹ ہو گیا تھا کسی کام کے سبب

مہکا ہوا ہے دیر سے میری گلی کا موڑ

خوشبو پہن کے چلتی ہوئی شام کے سبب

کر لوں گا آسمانوں پہ آباد بستیاں

میں پُر یقیں ہوں زینہء ایام کے سبب

چہرے تک آ گئی تھیں شعاعوں کی ٹہنیاں

جاگا ہوں آفتابِ لبِ بام کے سبب

کتنے سفید کتنے حسین و جمیل لوگ

چھوڑ آیا ایک حسن سیہ فام کے سبب

انجامِ گفتگو ہوا پھولوں کے درمیان

آغازِ گفتگو ہوا دشنام کے سبب

بیٹھا ہوں کوہِ سرخ کے پتھر تراشتا

دریائے سندھ ! آپ کے پیغام کے سبب

صحرا نے صادقین کی تصویر اوڑھ لی

اک نظمِ گردباد کے الہام کے سبب

جس کی مجھے تلاش تھی وہ درد مل گیا

ہوں کامیاب صحبتِ ناکام کے سبب

سورج پلٹ گیا ہے ملاقات کے بغیر

زلف سیہ کے بسترِ بدنام کے سبب

پروردگارِ اول و آخر سے پانچ وقت

ملتے ہیں لوگ کمرئہ اصنام کے سبب

شب ہائے زخم زخم گزارے خوشی کے ساتھ

لندن کی ایک غم زدہ مادام کے سبب

دینا پڑے گا شیخ کو میرا حساب بھی

کافر ہوا ہوں چہرئہ اسلام کے سبب

منصور آفاق

ناراض ہو گئے مرے ہمدرد بے سبب

دسمبر 1, 2007منصور آفاق،شعراء،غزلہمدرد،فرد،مرد،گرد،درد،سردadmin

منصور آفاق ۔ غزل نمبر 136

کچھ موتیے کے پھول ہوئے زرد بے سبب

ناراض ہو گئے مرے ہمدرد بے سبب

ویسے ہی محوِ آئینہ داری تھی میری آنکھ

پھیلی ہے میرے چاروں طرف گرد بے سبب

کرتا رہا ہے میرا تعاقب تمام دن

شہرِ شبِ سیہ کا کوئی فرد بے سبب

یہ سچ ہے اس سے کوئی تعلق نہیں مرا

پھرتا ہے شہر جاں میں کوئی درد بے سبب

شامِ وصال آئی تھی آ کر گزر گئی

جاگا ہے مجھ میں سویا ہوا مرد بے سبب

گرتی رہی ہے برف مگر بس خیال میں

منصور میرا کمرہ ہوا سرد بے سبب

منصور آفاق

کیسے وہ پھر رہی ہے جدا مجھ سے بے سبب

دسمبر 1, 2007منصور آفاق،شعراء،غزلہوئے،قہقہے،کے،گئے،بے،راستےadmin

منصور آفاق ۔ غزل نمبر 135

شاید وہ مانگتی ہے ملن کے نئے سبب

کیسے وہ پھر رہی ہے جدا مجھ سے بے سبب

کچھ اس کے کار ہائے نمایاں بھی کم نہیں

دل نے بھی کچھ بگاڑے ہیں بنتے ہوئے سبب

روشن ہے میرے صحن میں امید کا درخت

پچھلی گلی میں جلتے ہوئے بلب کے سبب

دیکھی کبھی نہیں تھیں یہ گلیاں بہار کی

جب چل پڑا تو راہ میں بنتے گئے سبب

کیا کیا نکالتی ہو بہانے لڑائی کے

آنسو کبھی سبب تو کبھی قہقہے سبب

منصور اتفاق سے ملتی ہیں منزلیں

بے رہروی کبھی تو کبھی راستے سبب

منصور آفاق

شاید یہ زندگی کی جادو گری ہے خواب

دسمبر 1, 2007منصور آفاق،شعراء،غزلوہی،یہی،کھلی،گلی،گری،ابھی،بھی،دیدنی،دری،رہی،روشنی،زنیadmin

منصور آفاق ۔ غزل نمبر 134

بہتی بہار سپنا، چلتی ندی ہے خواب

شاید یہ زندگی کی جادو گری ہے خواب

ایسا نہ ہو کہ کوئی دروازہ توڑ دے

رکھ آؤ گھر سے باہر بہتر یہی ہے خواب

تُو نے بدل لیا ہے چہرہ تو کیا کروں

میری وہی ہیں آنکھیں میرا وہی ہے خواب

میں لکھ رہا ہوں جس کی کرنوں کے سبز گیت

وہ خوبرو زمانہ شاید ابھی ہے خواب

ہر سمت سے وہ آئے قوسِ قزح کے ساتھ

لگتا ہے آسماں کی بارہ دری ہے خواب

اس کے لیے ہیں آنکھیں اس کے لیے ہے نیند

جس میں دکھائی دوں میں وہ روشنی ہے خواب

دل نے مکانِ جاں تو دہکا دیا مگر

اْس لمسِ اخگری کی آتش زنی ہے خواب

اک شخص جا رہا ہے اپنے خدا کے پاس

دیکھو زمانے والو! کیا دیدنی ہے خواب

تجھ سے جدائی کیسی ، تجھ سے کہاں فراق

تیرا مکان دل ہے تیری گلی ہے خواب

سورج ہیں مانتا ہوں اس کی نگاہ میں

لیکن شبِ سیہ کی چارہ گری ہے خواب

امکان کا دریچہ میں بند کیا کروں

چشمِ فریب خوردہ پھر بُن رہی ہے خواب

رک جا یہیں گلی میں پیچھے درخت کے

تجھ میں کسی مکاں کی کھڑکی کھلی ہے، خواب

منصور وہ خزاں ہے عہدِ بہار میں

ہنستی ہوئی کلی کی تصویر بھی ہے خواب

منصور آفاق

کیا ہے جو دیکھتا ہوں پچھلی گلی کے خواب

دسمبر 1, 2007منصور آفاق،شعراء،غزللبی،کجی،کسی،گلی،اسی،حاصلیadmin

منصور آفاق ۔ غزل نمبر 133

لگتے ہیں خوبصورت گزری ہوئی کے خواب

کیا ہے جو دیکھتا ہوں پچھلی گلی کے خواب

ہیں بے چراغ دل کے جگنو قطار میں

پلکوں سے چُن رہا ہوں لا حاصلی کے خواب

آنسو بہا رہی ہیں آنکھیں فرات کی

پتھرا گئے ہیں جیسے تشنہ لبی کے خواب

ہے اجتماعی وحشت چشمِ شعور میں

اپنے خمیر میں ہیں کیا کیا کجی کے خواب

مجبور دل الگ ہے دل کی طلب الگ

بستر کسی کا بے شک دیکھے کسی کے خواب

منصور موتیوں سے جس کی بھری ہے جیب

تاریخ لکھ رہی ہے اک بس اسی کے خواب

منصور آفاق

جنت کے بنگلے کا پھاٹک اور شراب

دسمبر 1, 2007منصور آفاق،شعراء،غزلمسلک،ڈھولک،کالک،گاہک،پھاٹک،اجرک،بک،تک،دستک،شک،عینکadmin

منصور آفاق ۔ غزل نمبر 132

ایک شرابی ہاتھ کی دستک اور شراب

جنت کے بنگلے کا پھاٹک اور شراب

پیاس ہوائے شام میں اپنے بین کرے

ابر ہے بامِ ذات کی حد تک اور شراب

مجھ سے تیری یادیں چھین نہیں سکتے

اُس بازار کے سارے گاہک اور شراب

سات سمندر پار کا ایک پرانا کوٹ

بیچ سڑک کے ٹوٹی عینک اور شراب

سناٹوں کی آوازوں کا ایک ہجوم

شور میں گم ہو جانے کا شک اور شراب

تیری گلی آوازِ سگاں ، مجذوب ضمیر

ڈوب رہی ہے رات کی کالک اور شراب

عمر ہوئی میخانے کے دروازے پر

دست و گریباں میرا مسلک اور شراب

رات کے پچھلے پہر لہو کی صورت تھے

میری رگوں میں گھنگرو ڈھولک اور شراب

کھلتا سرخ سا فیتہ، دوشیزہ فائل

انٹر کام کی بجتی دستک اور شراب

دیکھ کے موسم خود ہی بچھتے جاتے ہیں

صحرا کی سہ پہر میں اجرک اور شراب

ایک گلی میں دو دیواریں ہیں منصور

ساتھ مری بے مقصد بک بک اور شراب

منصور آفاق

میرے کاہن عینک اور کتاب

دسمبر 1, 2007منصور آفاق،شعراء،غزلفورا،کاہن،برتن،جیون،درشن،ساونadmin

منصور آفاق ۔ غزل نمبر 131

غیب کا مدفن عینک اور کتاب

میرے کاہن عینک اور کتاب

ایک بہکتے حرف کے پہلو میں

رکھ دی فوراً عینک اور کتاب

ٹیرس پر تنہائی کی رم جھم

بھیگا ساون عینک اور کتاب

میر و غالب پھر مہمان ہوئے

چائے کے برتن عینک اور کتاب

یاد کی لائبریری زندہ باد

اپنا جیون عینک اور کتاب

برف بھری تنہائی میں منصور

یار کا درشن عینک اور کتاب

منصور آفاق

حادثے سے پہلے ہوٹل سے نکلنا پڑ گیا

دسمبر 1, 2007منصور آفاق،شعراء،غزلمچلنا،نکلنا،اچھلنا،جلنا،سنبھلناadmin

منصور آفاق ۔ غزل نمبر 130

برقی زینے پر مخالف سمت چلنا پڑ گیا

حادثے سے پہلے ہوٹل سے نکلنا پڑ گیا

ساحلوں کی ریت پر گرتے ہوئے آیا خیال

کیا ہواکہ موج سے مل کر اچھلنا پڑ گیا

آ گیا پھر یاد کہ پستی نہیں میرامقام

گرتے گرتے راستے میں پھر سنبھلنا پڑ گیا

دیکھ کر لاہور کو جاتا ہوا کوئی جہاز

ایک بچے کی طرح دل کو مچلنا پڑ گیا

درد تھا اس کی رگوں میں سلسلے تھے آگ کے

کار کے منصور انجن کو بھی جلنا پڑ گیا

منصور آفاق

چلنے لگے تو راستہ تقسیم ہو گیا

دسمبر 1, 2007منصور آفاق،شعراء،غزلکا،گیا،تھا،حوصلہ،راستہ،ساadmin

منصور آفاق ۔ غزل نمبر 129

دونوں طرف ذرا ذرا تقسیم ہو گیا

چلنے لگے تو راستہ تقسیم ہو گیا

کچھ دیدئہ سیاہ میں کچھ تیرہ بخت میں

کاجل شبِ فراق کا تقسیم ہو گیا

پہلے پہل تو ہنس پڑے سن کر کسی کی بات

پھر آنسوئوں میں حوصلہ تقسیم ہو گیا

خود کو کیا تھا جمع بڑی مشکلوں کے ساتھ

پھر کرچیوں میں بٹ گیا تقسیم ہو گیا

محسوس یوں ہوا کسی زلفِ سیہ کا لمس

شانوں پہ جیسے ابر سا تقسیم ہو گیا

منصور یادِ یار کے انبوہ میں کہیں

وہ دل جو دوست اپنا تھا تقسیم ہو گیا

منصور آفاق

آنکھ کا تالاب بد روحوں کا مسکن ہو گیا

دسمبر 1, 2007منصور آفاق،شعراء،غزلفورا،مسکن،کنگن،افگن،بچپن،تن،درشن،دشمن،روشن،ساونadmin

منصور آفاق ۔ غزل نمبر 128

آخرش ہجراں کے مہتابوں کا مد فن ہو گیا

آنکھ کا تالاب بد روحوں کا مسکن ہو گیا

دھوپ در آئی اچانک رات کو برسات میں

اس کا چہرہ آنسوئوں میں عکس افگن ہو گیا

دل چرا کر جا رہا تھا میں دبے پاؤں مگر

چاند نکلا اور سارا شہر روشن ہو گیا

رو پڑا تھا جا کے داتا گنج کے دربار پر

یوں ہوا پھر راہ میں سانول کا درشن ہو گیا

بجلیاں ہیں بادلوں کے بین ہیں کمرے کے بیچ

اور کیلنڈر کہے ہے، ختم ساون ہو گیا

کیوں سلگتی ریت نے سہلا دیے تلووں کے پھول

یہ اذیت کیش دل صحرا کا دشمن ہو گیا

جھلملا اٹھتا تھا برتن مانجھنے پر جھاگ سے

اس کلائی سے جو روٹھا زرد کنگن ہو گیا

تیری میری زندگی کی خوبصورت ساعتیں

تیرا بچپن ہو گیا یا میرا بچپن ہو گیا

ایک جلوے کی قیامت میں نے دیکھی طور پر

دھوپ تھی ایسی کہ سورج سوختہ تن ہو گیا

بے خدا ہوں سوچتا ہوں شکر کس کا ہو ادا

میں نے جو چاہا وہی منصور فوراً ہو گیا

منصور آفاق

گالی لہک اٹھی کبھی جوتا اتر گیا

دسمبر 1, 2007منصور آفاق،شعراء،غزلچہرہ،کا،پہیہ،بوسہ،جوتا،دریا،ستارہadmin

منصور آفاق ۔ غزل نمبر 127

خوابِ وصال میں بھی خرابہ اتر گیا

گالی لہک اٹھی کبھی جوتا اتر گیا

میں نے شبِ فراق کی تصویر پینٹ کی

کاغذ پہ انتظار کا چہرہ اتر گیا

کوئی بہشتِ دید ہوا اور دفعتاً

افسوس اپنے شوق کا دریا اتر گیا

رش اتنا تھا کہ سرخ لبوں کے دباؤ سے

اندر سفید شرٹ کے بوسہ اتر گیا

اس خواب کے مساج کی وحشت کا کیا کہوں

سارا بخار روح و بدن کا اتر گیا

کچھ تیز رو گلاب تھے کھائی میں جا گرے

ڈھلوان سے بہار کا پہیہ اتر گیا

منصور جس میں سمت کی مبہم نوید تھی

پھر آسماں سے وہ بھی ستارہ اتر گیا

منصور آفاق

سادہ دلوں کا نامہ ء قسمت بھرو گے کیا

دسمبر 1, 2007منصور آفاق،شعراء،غزلمرو،ڈرو،کرو،بھرو،دھروadmin

منصور آفاق ۔ غزل نمبر 126

جو خط لکھا نہیں اسے رسوا کرو گے کیا

سادہ دلوں کا نامہ ء قسمت بھرو گے کیا

کیا دیکھتے ہو مردہ بدن کو اے زندہ دل

پھر نفس کے محاذ پہ جا کر مرو گے کیا

رہنے دو میری قبر کو بے نام ، بے نشاں

اس نور کے وجود پہ پتھرو دھرو گے کیا

تم تو سگ مدینہ ہو ، باہو کے شیر ہو

بدشکل مولوی کی زباں سے ڈرو گے کیا

اے صاحب خرد! تری کامل سہی دلیل

بعد از ممات وہ جو ہوا تو کرو گے کیا

منصور آفاق

وہ اس کا مکاں تھا اپنا پتہ جا میں نے کیا

دسمبر 1, 2007منصور آفاق،شعراء،غزلیا،کا،تماشا،جا،رشتہadmin

منصور آفاق ۔ غزل نمبر 125

وہ چشم سراپا حیرت تھی کیا میں نے کیا

وہ اس کا مکاں تھا اپنا پتہ جا میں نے کیا

ہے فکر مجھے انجام مرے ہاتھوں سے نہ ہو

آغاز کا کیا ہے اس نے کیا یا میں نے کیا

کچھ زخم گلی کے بلب تلے تحریر کیے

پھر اپنے لہو سے اپنا تماشا میں نے کیا

صد شکر دیے کی آخری لو محفوظ ہوئی

ہے فخر مجھے دربند ہوا کا میں نے کیا

منصور وہ میری آنکھ کو اچھی لگتی تھی

سو ہجر کی کالی رات سے رشتہ میں نے کیا

منصور آفاق

خواب میں جا کر رقص کیا

دسمبر 1, 2007منصور آفاق،شعراء،غزلملا،منا،ٹکرا،اٹھا،بہا،بنا،بجھا،بجا،جھکا،جاadmin

منصور آفاق ۔ غزل نمبر 124

نیندجگاکر رقص کیا

خواب میں جا کر رقص کیا

خوشبو کے اکتارے پر

رنگ بجا کر رقص کیا

آبِ رواں کے پہلو میں

گیت بہاکر رقص کیا

نرم پروں پہ تتلی کے

شام بناکر رقص کیا

ابرِ سیہ کی بوندوں میں

شور مچاکر رقص کیا

دھوپ کے ننگے سینے پر

پیٹر جھکا کر رقص کیا

رات کے کالے شیشے سے

دن ٹکرا کر رقص کیا

خواب بھری آوازوں سے

لطف اٹھا کر رقص کیا

بزم سخن میں رومی سے

ہاتھ ملا کر رقص کیا

برف بھری منصور رُتیں

آگ بجھا کر رقص کیا

منصور آفاق

رنگ بکھرا دیے پھر تازہ ہوا نے کیا کیا

دسمبر 1, 2007منصور آفاق،شعراء،غزلہوا،فسا،نجا،دعا،زما،سرہا،صباadmin

منصور آفاق ۔ غزل نمبر 123

مل گئے مجھ کو بھی جینے کے بہانے کیا کیا

رنگ بکھرا دیے پھر تازہ ہوا نے کیا کیا

کیسی خوشبوئے بدن آتی ہے کمرے سے مجھے

پھول وہ چھوڑ گئی میرے سرہانے کیا کیا

میں تجھے کیسے بتاؤں مری نازک اندام

مجھ پہ گزرے ہیں مصائب کے زمانے کیا کیا

میری خاموشی پہ الزام لگانے والی

کہتی پھرتی ہیں تری آنکھیں نجانے کیا کیا

کیا غزل چھیڑی گئی سانولے رخساروں کی

شام کے گیت کہے بادِ صبا نے کیا کیا

میرے پہلو میں نئے پھول کھلے ہیں کتنے

مجھ کو شاداب کیا دستِ دعا نے کیا کیا

یونہی بے وجہ تعلق ہے کسی سے لیکن

پھیلتے جاتے ہیں منصور فسانے کیا کیا

منصور آفاق

فروزاں خواب کیے تیرہ طاق نے کیا کیا

دسمبر 1, 2007منصور آفاق،شعراء،غزلفراق،مذاق،نفاق،چاق،اتفاق،طاق،طباق،عراقadmin

منصور آفاق ۔ غزل نمبر 122

تری طلب نے ترے اشتیاق نے کیا کیا

فروزاں خواب کیے تیرہ طاق نے کیا کیا

میں جا رہا تھا کہیں اور عمر بھر کے لیے

بدل دیا ہے بس اک اتفاق نے کیا کیا

عشائے غم کی تلاوت رہے تہجد تک

سکھا دیا ہے یہ دینِ فراق نے کیا کیا

نری تباہی ہے عاشق مزاج ہونا بھی

دکھائے غم ہیں دلِ چست و چاق نے کیا کیا

وہ لب کھلے تو فسانہ بنا لیا دل نے

گماں دیے ترے حسنِ مذاق نے کیا کیا

مقامِ خوک ہوئے دونوں آستانِ وفا

ستم کیے ہیں دلوں پر نفاق نے کیا کیا

ہر ایک دور میں چنگیزیت مقابل تھی

لہو کے دیپ جلائے عراق نے کیا کیا

ہر اک شجر ہے کسی قبر پر کھڑا منصور

چھپا رکھا ہے زمیں کے طباق نے کیا کیا

منصور آفاق

ہجر کو وصل پر قیاس کیا

دسمبر 1, 2007منصور آفاق،شعراء،غزلقیاس،لباس،پاس،اداس،روشناسadmin

منصور آفاق ۔ غزل نمبر 121

یوں خیالوں نے بد حواس کیا

ہجر کو وصل پر قیاس کیا

اپنی پہچان کے عمل نے مجھے

روئے جاناں سے روشناس کیا

کچھ فسردہ زمیں سے تھے لیکن

آسماں نے بہت اداس کیا

ہم نے ہر اک نماز سے پہلے

زیبِ تن خاک کا لباس کیا

بھول آئے ہیں ہم وہاں منصور

کیا بسیرا کسی کے پاس کیا

منصور آفاق

آیت الکرسی پڑھی اور دم کیا

دسمبر 1, 2007منصور آفاق،شعراء،غزلموسم،ماتم،مدہم،پرنم،برہم،خم،دم،سانمadmin

منصور آفاق ۔ غزل نمبر 120

نیند کی ناراضگی کو کم کیا

آیت الکرسی پڑھی اور دم کیا

اس نے شانوں پر بکھیرے اپنے بال

اور شیتل شام کا موسم کیا

پہلے رنگوں کو اتارا اور پھر

اس نے ہیٹر کو ذرا مدہم کیا

ایک آمر کی ہلاکت پر کہو

سرنگوں کیوں ملک کا پرچم کیا

صبح آنسو پونچھ کے ہم سو گئے

روشنی کا رات بھر ماتم کیا

مان لی ہم نے کہانی رات کی

اس نے پلکوں کو ذرا سانم کیا

عاشقی کی داد چاہی شہر سے

ہیٹ اتارا اور سر کو خم کیا

دار پر کھینچا مرے منصور کو

اور سارے شہر کو برہم کیا

منصور آفاق

کبھی گھر کے درویوار سے مل کر رویا

دسمبر 1, 2007منصور آفاق،شعراء،غزلفنکار،ملہار،مسمار،انبار،اتوار،اشجار،درویوارadmin

منصور آفاق ۔ غزل نمبر 119

کبھی غم سے کبھی آزار سے مل کر رویا

کبھی گھر کے درویوار سے مل کر رویا

کبھی تصویریں اٹھائیں کبھی رکھ دیں میں نے

کبھی کپڑوں کے میں انبار سے مل کر رویا

کبھی انگن سے اٹھا لایا میں یادیں اس کی

کبھی باغیچے کے اشجار سے مل کر رویا

جسے پاؤں میں بچھایا تھا گذشتہ رت میں

کبھی اُس منزلِ مسمار سے مل کر رویا

کبھی ہم بھیگتے تھے جس کی سروں سے مل کر

اُسی بارش اُسی ملہار سے مل کر رویا

کبھی اشعار کہے اشک گزیدہ دل کے

کبھی اندر کے میں فنکار سے مل کر رویا

کہا کرتا تھا جسے پیار کا دن وہ منصور

اسی روتی ہوئی اتوار سے مل کر رویا

منصور آفاق

آوارگی کی شام مجھے گھر نے آ لیا

دسمبر 1, 2007منصور آفاق،شعراء،غزلمحشر،ور،گھر،گر،ٹھوکر،پتھرadmin

منصور آفاق ۔ غزل نمبر 118

ٹوٹے ہوئے کواڑ کے منظر نے آ لیا

آوارگی کی شام مجھے گھر نے آ لیا

میں جا رہا تھا زخم کا تحفہ لیے بغیر

پھر یوں ہوا کہ راہ کے پتھر نے آ لیا

میں سن رہا ہوں اپنے ہی اندر کی سسکیاں

کیا پھر کسی عمل کے مجھے ڈرنے آ لیا

گزرا کہیں سے اور یہ آنکھیں چھلک پڑیں

یادش بخیر ! یادِ ستم گر نے آ لیا

وہ جس جگہ پہ اُس سے ملاقات ہونی تھی

پہنچا وہاں تو داورِ محشر نے آ لیا

منصور چل رہا تھا ابھی کہکشاں کے پاس

یہ کیا ہوا کہ پاؤں کی ٹھوکر نے آ لیا

منصور آفاق

سوحریر سرخ اتار دی ،ہے لباسِ خاک پہن لیا

دسمبر 1, 2007منصور آفاق،شعراء،غزلفراک،پاک،انہماک،تپاک،خاک،راکھadmin

منصور آفاق ۔ غزل نمبر 117

کہ جو فقر نے ہے عطاکیا وہی چاک چاک پہن لیا

سوحریر سرخ اتار دی ،ہے لباسِ خاک پہن لیا

لیا ڈھانپ ننگ نصیب کا اسی جامہ ء شبِ تار سے

جو جلادیا تھا فقیر نے وہی راکھ راکھ پہن لیا

کبھی سردمہر ہوئے کہیں تو سیاہ چین زمین تھی

گریں دوپہر میں بھی بجلیاں جو کبھی تپاک پہن لیا

کبھی شہر کے کسی موڑپریونہی خالی ہاتھ بڑھا دئیے

کبھی ذکر و فکر کی غار میں ترا انہماک پہن لیا

جو مٹھائیوں کی طلب اٹھی توزمیں کی خاک ہی پھانک لی

جو سفید سوٹ کو جی کیا تو سیہ فراک پہن لیا

جہاں یاد آئیں حکومتیں وہیں ہم برہنہ ہو گئے

جہاں حرف زاد کوئی ملا وہیں ملکِ پاک پہن لیا

منصور آفاق

بچے نے اپنے خواب کا منظر بنا لیا

دسمبر 1, 2007منصور آفاق،شعراء،غزللشکر،مندر،منظر،کنکر،کر،پتھر،پر،اندر،اکثر،دلبر،در،سمندرadmin

منصور آفاق ۔ غزل نمبر 116

موجوں کے آس پاس کوئی گھر بنا لیا

بچے نے اپنے خواب کا منظر بنا لیا

اپنی سیاہ بختی کا اتنا رکھا لحاظ

گوہر ملا تو اس کو بھی کنکر بنا لیا

بدلی رُتوں کو دیکھ کے اک سرخ سا نشاں

ہر فاختہ نے اپنے پروں پر بنا لیا

شفاف پانیوں کے اجالوں میں تیرا روپ

دیکھا تو میں نے آنکھ کو پتھر بنا لیا

ہر شام بامِ دل پہ فروزاں کیے چراغ

اپنا مزار اپنے ہی اندر بنا لیا

پیچھے جو چل دیا مرے سائے کی شکل میں

میں نے اُس ایک فرد کو لشکر بنا لیا

شاید ہر اک جبیں کا مقدر ہے بندگی

مسجد اگر گرائی تو مندر بنا لیا

کھینچی پلک پلک کے برش سے سیہ لکیر

اک دوپہر میں رات کا منظر بنا لیا

پھر عرصۂ دراز گزارا اسی کے بیچ

اک واہموں کا جال سا اکثر بنا لیا

بس ایک بازگشت سنی ہے تمام عمر

اپنا دماغ گنبدِ بے در بنا لیا

باہر نکل رہے ہیں ستم کی سرنگ سے

لوگوں نے اپنا راستہ مل کر بنا لیا

گم کربِ ذات میں کیا یوں کربِ کائنات

آنکھوں کے کینوس پہ سمندر بنا لیا

منصور جس کی خاک میں افلاک دفن ہیں

دل نے اسی دیار کو دلبر بنا لیا

منصور آفاق

ڈوب گیا ہے تھل مارو میں میری آس کا دریا

دسمبر 1, 2007منصور آفاق،شعراء،غزلوسواس،یاس،پاس،الماس،آس،باس،حواسadmin

منصور آفاق ۔ غزل نمبر 115

پیر فرید کی روہی میں ہوں ، مجھ میں پیاس کا دریا

ڈوب گیا ہے تھل مارو میں میری آس کا دریا

عمرِ رواں کے ساحل پر اوقات یہی ہیں دل کے

صبح ، طلب کی بہتی کشتی، شب ،وسواس کا دریا

سورج ڈھالے جا سکتے تھے ہر قطرے سے لیکن

یوں ہی بہایا میں نے اشکوں کے الماس کا دریا

جس کے اک اک لمحے میں ہے صدیوں کی خاموشی

میرے اندر بہتا جائے اس بن باس کا دریا

ہم ہیں آبِ چاہ شباں کے ہم حمام سگاں کے

شہر میں پانی ڈھونڈ رہے ہو چھوڑ کے پاس کا دریا

تیری طلب میں رفتہ رفتہ میرے رخساروں پر

سوکھ رہا ہے قطرہ قطرہ تیز حواس کا دریا

سورج اک امید بھرا منصور نگر ہے لیکن

رات کو بہتا دیکھوں اکثر خود میں یاس کا دریا

منصور آفاق

ولولہ کیسا حیرت زدہ دید کی ایک لپ نے دیا

دسمبر 1, 2007منصور آفاق،شعراء،غزللپ،کپ،پنپ،تپ،جھڑپadmin

منصور آفاق ۔ غزل نمبر 114

ایک کھڑکی سے آتی ہوئی روشنی کی تڑپ نے دیا

ولولہ کیسا حیرت زدہ دید کی ایک لپ نے دیا

اس لڑائی سے پچھلی لڑائی کا کوئی تعلق نہ تھا

اِس لڑائی کو لیکن بڑھاوا گذشتہ جھڑپ نے دیا

تیرے جیسی کئی اور تھیں تجھ سے بہتربھی مل سکتی تھی

تیرے غم کایونہی کینسردل میں برسوں پنپنے دیا

میں نے سورج کو پھراک کرشمہ کہا اس پہ نظمیں کہیں

پہلے کچھ دیرآتی شعاعوں سے کمرے کو تپنے دیا

برف کی رات میں تم ہمیشہ رہو یہ دعادی اسے

جس ڈرنک کارنر کاپتہ چائے کے گرم کپ نے دیا

منصور آفاق

پانیوں کو چاند نے اشکال کا تحفہ دیا

دسمبر 1, 2007منصور آفاق،شعراء،غزلچترال،گھڑیال،اشکال،بال،تمثال،جال،خدوخال،شالadmin

منصور آفاق ۔ غزل نمبر 113

دائروں کی آنکھ دی، بھونچال کا تحفہ دیا

پانیوں کو چاند نے اشکال کا تحفہ دیا

رفتہ رفتہ اجنبی لڑکی لپٹتی ہی گئی

برف کی رت نے بدن کی شال کا تحفہ دیا

سوچتا ہوں وقت نے کیوں زندگی کے کھیل میں

پاؤں میرے چھین کر فٹ بال کا تحفہ دیا

’’آگ جلتی ہے بدن میں ‘‘بس کہا تھا کار میں

ہم سفر نے برف کے چترال کا تحفہ دیا

رات ساحل کے کلب میں مچھلیوں کو دیر تک

ساتھیوں نے اپنے اپنے جال کا تحفہ دیا

کچھ تو پتھر پر ابھر آیا ہے موسم کے طفیل

کچھ مجھے اشکوں نے خدوخال کا تحفہ دیا

پانیوں پر چل رہے تھے عکس میرے ساتھ دو

دھوپ کو اچھا لگا تمثال کا تحفہ دیا

وقت آگے تو نہیں پھر بڑھ گیا منصور سے

یہ کسی نے کیوں مجھے گھڑیال کا تحفہ دیا

منصور آفاق

یعنی میرا استعارہ رکھ دیا

دسمبر 1, 2007منصور آفاق،شعراء،غزلنظارہ،کنارہ،استعارہ،تارہ،دوبارہ،سارا،ستارہ،شرارہadmin

منصور آفاق ۔ غزل نمبر 112

ریل کی پٹڑی پہ تارہ رکھ دیا

یعنی میرا استعارہ رکھ دیا

کھینچ کر اس نے نظر کی ایک حد

آنکھ میں شوقِ نظارہ رکھ دیا

خاک پر بھیجا مجھے اور چاند پر

میری قسمت کا ستارہ رکھ دیا

بچ بچا کر کوزہ گر کی آنکھ سے

چاک پر خود کو دوبارہ رکھ دیا

دور تک نیلا سمندر دیکھ کر

میں نے کشتی میں کنارہ رکھ دیا

انتظار آباد یوں رکھا بدن

ہر روئیں پر ایک تارہ رکھ دیا

دیکھا جو سوکھی ہوئی لکڑی کا دل

اس میں خواہش کا شرارہ رکھ دیا

پہلے رکھا یاد نے منصور ہاتھ

رفتہ رفتہ بوجھ سارا رکھ دیا

منصور آفاق

گردشِ دوراں پہ ساغر رکھ دیا

دسمبر 1, 2007منصور آفاق،شعراء،غزلمقدر،منظر،چیتر،کر،گھر،پر،اندر،باہر،برابر،در،دسمبر،سمندر،ساغرadmin

منصور آفاق ۔ غزل نمبر 111

ہاتھ سے ہنگامِ محشر رکھ دیا

گردشِ دوراں پہ ساغر رکھ دیا

اک نظر دیکھا کسی نے کیا مجھے

بوجھ کہساروں کا دل پر رکھ دیا

پانیوں میں ڈوبتا جاتا ہوں میں

آنکھ میں کس نے سمندر رکھ دیا

اور پھر تازہ ہوا کے واسطے

ذہن کی دیوار میں در رکھ دیا

ٹھوکروں کی دلربائی دیکھ کر

پاؤں میں اس کے مقدر رکھ دیا

دیکھ کر افسوس تارے کی چمک

اس نے گوہر کو اٹھا کر رکھ دیا

ایک ہی آواز پہنی کان میں

ایک ہی مژگاں میں منظر رکھ دیا

نیند آور گولیاں کچھ پھانک کر

خواب کو بستر سے باہر رکھ دیا

دیدئہ تر میں سمندر دیکھ کر

اس نے صحرا میرے اندر رکھ دیا

اور پھر جاہ و حشم رکھتے ہوئے

میں نے گروی ایک دن گھر رکھ دیا

میری مٹی کا دیا تھا سو اسے

میں نے سورج کے برابر رکھ دیا

خانہء دل کو اٹھا کر وقت نے

بے سرو ساماں ، سڑک پر رکھ دیا

جو پہن کرآتی ہے زخموں کے پھول

نام اس رُت کا بھی چیتر رکھ دیا

کچھ کہا منصور اس نے اور پھر

میز پر لا کر دسمبر رکھ دیا

منصور آفاق

اور پھر شہر کے پاؤں میں سفر باندھ دیا

دسمبر 1, 2007منصور آفاق،شعراء،غزلنظر،گھر،اجر،تر،دگر،سفر،سر،شجرadmin

منصور آفاق ۔ غزل نمبر 110

پہلے سورج کو سرِ راہ گزر باندھ دیا

اور پھر شہر کے پاؤں میں سفر باندھ دیا

چند لکڑی کے کواڑوں کو لگا کر پہیے

وقت نے کار کے پیچھے مرا گھر باندھ دیا

وہ بھی آندھی کے مقابل میں اکیلا نہ رہے

میں نے خیمے کی طنابوں سے شجر باندھ دیا

میری پیشانی پہ انگارے لبوں کے رکھ کے

اپنے رومال سے اس نے مرا سر باندھ دیا

لفظ کو توڑتا تھا میری ریاضت کا ثمر

وسعتِ اجر تھی اتنی کہ اجر باندھ دیا

ایک تعویز جسے میں نے اتارا تھا ابھی

اس نے بازو پہ وہی بارِ دگر باندھ دیا

پھر وہ چڑھنے لگی تیزی سے بلندی کی طرف

پہلے رسہ کہیں تا حدِ نظر باندھ دیا

چلنے سے پہلے قیامت کے سفر پر منصور

آنکھ کی پوٹلی میں دیدۂ تر باندھ دیا

منصور آفاق

وہ جو مرتبت میں مثال ہے اسی آستاں سے گرا دیا

دسمبر 1, 2007منصور آفاق،شعراء،غزلوہاں،کماں،آسماں،آستاں،سائباںadmin

منصور آفاق ۔ غزل نمبر 109

مری بد لحاظ نگاہ نے مجھے عرشِ جاں سے گرا دیا

وہ جو مرتبت میں مثال ہے اسی آستاں سے گرا دیا

مجھے کچھ بھی اس نے کہا نہیں مگر اپنی رت ہی بدل گئی

مجھے دیکھتے ہوئے برف کو ذرا سائباں سے گرا دیا

مجھے دیکھ کر کہ میں زد پہ ہوں سرِ چشم آخری تیر کو

کسی نے کماں پہ چڑھا لیا کسی نے کماں سے گرا دیا

ہے عجب مزاج کی وہ کوئی کبھی ہم نفس کبھی اجنبی

کبھی چاند اس نے کہا مجھے کبھی آسماں سے گرا دیا

میں وہ خستہ حال مکان تھا جسے خوفِ جاں کے خیال سے

کسی نے یہاں سے گرا دیا کسی نے وہاں سے گرا دیا

منصور آفاق

ہزار ٹوٹ کے بھی طوقِ غم کو توڑ دیا

دسمبر 1, 2007منصور آفاق،شعراء،غزلتوڑadmin

منصور آفاق ۔ غزل نمبر 108

شکستِ جاں سے حصارِ الم کو توڑ دیا

ہزار ٹوٹ کے بھی طوقِ غم کو توڑ دیا

یہ احتجاج کا لہجہ نہیں بغاوت ہے

لکھے کو آگ لگا دی قلم کو توڑ دیا

قریب تر کسی پب کے مری رہائش تھی

اسی قرابتِ مے نے قسم کو توڑ دیا

قدم قدم پہ دلِ مصلحت زدہ رکھ کر

کسی نے راہِ وفا کے بھرم کو توڑ دیا

ہزار بار کہانی میں میرے ہیرو نے

دعا کی ضرب سے دستِ ستم کو توڑ دیا

سلام اس کی صلیبوں بھری جوانی پر

وہ جس نے موت کے جاہ و حشم کو توڑ دیا

نکل پڑا میں تلاشِ یزید میں اک دن

اور احتجاج کے کالے علم کو توڑدیا

یہ انتہا ہے دماغِ خراب کی منصور

دھرم کو چھوڑ دیا اور صنم کو توڑ دیا

منصور آفاق

وہ میرے ساتھ کوئی دن رہا تو اس نے کہا

دسمبر 1, 2007منصور آفاق،شعراء،غزلہوا،مرگیا،کیا،گرا،پڑا،دیا،رہا،سناadmin

منصور آفاق ۔ غزل نمبر 107

میں زندگی ہوں وہ جانے لگا تو اس نے کہا

وہ میرے ساتھ کوئی دن رہا تو اس نے کہا

مجھے زمین سے رکھنے ہیں اب مراسم بس

جب آسماں نے فسردہ کیا تو اس نے کہا

میں تتلیوں کے تعاقب میں جانے والا ہوں

کسی نے ماتھے پہ بوسہ دیا تو اس نے کہا

اداس رہنے کی عادت ہے مجھ کو ویسے ہی

گلی میں اس کی کوئی مرگیا تو اس نے کہا

مجھے بھی شام کی تنہائی اچھی لگتی ہے

مری اداسی کا قصہ سنا تو اس نے کہا

خیال رکھنا تجھے دل کا عارضہ بھی ہے

جب اس کے سامنے میں رو پڑا تو اس نے کہا

مجھے تو رات کی نیت خراب لگتی ہے

چراغ ہاتھ سے میرے گرا تو اس نے کہا

کوئی فرشتوں کی مجھ سے تھی دشمنی منصور

پڑھا نصیب کا لکھا ہوا تو اس نے کہا

منصور آفاق

تمام رات کوئی میری دسترس میں رہا

دسمبر 1, 2007منصور آفاق،شعراء،غزلہوس،قفس،قصص،نفس،کینوس،برس،بس،خس،دسترس،عبثadmin

منصور آفاق ۔ غزل نمبر 106

میں بدنصیب تھا احمق تھا پیش و پس میں رہا

تمام رات کوئی میری دسترس میں رہا

میں ایک شیش محل میں قیام کرتے ہوئے

کسی فقیر کی کٹیا کے خار و خس میں رہا

سمندروں کے اُدھر بھی تری حکومت تھی

سمندروں کے اِدھر بھی میں تیرے بس میں رہا

کسی کے لمس کی آتی ہے ایک شب جس میں

کئی برس میں مسلسل اسی برس میں رہا

گنہ نہیں ہے فروغ بدن کہ جنت سے

یہ آبِ زندگی، بس چشمۂ ہوس میں رہا

مرے افق پہ رکی ہے زوال کی ساعت

یونہی ستارہ مرا، حرکتِ عبث میں رہا

کنارے ٹوٹ کے گرتے رہے ہیں پانی میں

عجب فشار مرے موجۂ نفس میں رہا

وہی جو نکھرا ہوا ہے ہر ایک موسم میں

وہی برش میں وہی میرے کینوس میں رہا

قدم قدم پہ کہانی تھی حسن کی لیکن

ہمیشہ اپنے بنائے ہوئے قصص میں رہا

جسے مزاج جہاں گرد کا ملا منصور

تمام عمر پرندہ وہی قفس میں رہا

منصور آفاق

آسماں تجھ کو بنا کر کافری کرتا رہا

دسمبر 1, 2007منصور آفاق،شعراء،غزلملتوی،نبی،وہی،کہی،کافری،کاسنی،پوٹلی،پیروی،پیغمبری،بری،تہی،دوستیadmin

منصور آفاق ۔ غزل نمبر 105

تبصرہ اس کے بدن پر بس یہی کرتا رہا

آسماں تجھ کو بنا کر کافری کرتا رہا

میں ابوجہلوں کی بستی میں اکیلا آدمی

چاہتے تھے جو،وہی پیغمبری کرتا رہا

نیند آجائے کسی صورت مجھے، اس واسطے

میں ، خیالِ یار سے پہلو تہی کرتا رہا

کھول کر رنگوں بھرے سندر پرندوں کے قفس

میں بہشتِ دید کے ملزم بری کرتا رہا

جانتا تھا باغِ حیرت کے وہی ساتوں سوال

اک سفر تھا میں جسے بس ملتوی کرتا رہا

تھی ذرا سی روشنی سواحتیاطً بار بار

پوٹلی میں بند پھر میں پوٹلی کرتا رہا

سارادن اپنے کبوتر ہی اڑاکردل جلا

آسماں کا رنگ کچھ کچھ کاسنی کرتا رہا

دیدہ ء گرداب سے پہچان کر بحری جہاز

اک سمندرگفتگو کچھ ان کہی کرتا رہا

دشت میں موجودگی کے آخری ذرے تلک

ریت کا ٹیلاہوا سے دوستی کرتا رہا

رات کی آغوش میں گرتے رہے ، بجھتے رہے

میں کئی روشن دنوں کی پیروی کرتا رہا

اپنی ہٹ دھرمی پہ خوش ہوں اپنی ضد پر مطمئن

جو مجھے کرنا نہیں تھا میں وہی کرتا رہا

میں کہ پانچوں کا ملازم میں کہ چاروں کا غلام

حسبِ فرمانِ خدا ، وردِ نبیﷺ کرتا رہا

منصور آفاق

یہ انتظار کدہ ہے، یہ گیٹ پر لکھا

دسمبر 1, 2007منصور آفاق،شعراء،غزللپیٹ،گیٹ،پلیٹ،پیٹ،ریٹ،سلیٹ،سمیٹadmin

منصور آفاق ۔ غزل نمبر 104

کب اپنا نام مکاں کی پلیٹ پر لکھا

یہ انتظار کدہ ہے، یہ گیٹ پر لکھا

پھر ایک تازہ تعلق کو خواب حاضر ہیں

مٹا دیا ہے جو پہلے سلیٹ پر لکھا

وہ انتظار تھا بگلے کی بند آنکھوں میں

میں دستیاب ہوں مچھلی نے پیٹ پر لکھا

لکھا ہوا نے ’’یہ بس میری آخری حد ہے

"اب اس اڑان سے اپنے سمیٹ پر” لکھا

جہانِ برف پگھلنے کے بین لکھے ہیں

ہے نوحہ آگ کی بڑھتی لپیٹ پر لکھا

جنابِ شیخ کے فرمان قیمتی تھے بہت

سو میں نے تبصرہ ہونٹوں کے ریٹ پر لکھا

ہے کائنات تصرف میں خاک کے منصور

یہی فلک نے کری کی پلیٹ پر لکھا

منصور آفاق

میری پیدائش کا لمحہ پھر اسی سن میں رکھا

دسمبر 1, 2007منصور آفاق،شعراء،غزلگردن،اوون،برتن،جوبن،سن،ساونadmin

منصور آفاق ۔ غزل نمبر 103

اس نے پہلے مارشل لاء میرے آنگن میں رکھا

میری پیدائش کا لمحہ پھر اسی سن میں رکھا

صحن میں پھیلی ہوئی ہے گوشت جلنے کی سڑاند

جیسے سینے میں نہیں کچھ اس نے اوون میں رکھا

جب سوئمنگ پول کے شفاف پانی سے ملی

آنسوئوں والا فقط اک ہار گردن میں رکھا

ہونٹ ہیٹر پہ رکھے تھے اس کی یادوں پر نہیں

تھا جہنم خیز موسم غم کے جوبن میں رکھا

سانپ کو اس نے اجازت ہی نہیں دی وصل کی

گھر کے دروازے سے باہر دودھ برتن میں رکھا

میں اسے منصور بھیجوں کس لیے چیتر کے پھول

جس نے سارا سال مجھ کو غم کے ساون میں رکھا

منصور آفاق

وقت پر پاؤں کہانی ختم ہونے پر رکھا

دسمبر 1, 2007منصور آفاق،شعراء،غزلہونے،ڈبونے،کونے،بچھونے،بھگونے،رونےadmin

منصور آفاق ۔ غزل نمبر 102

آسرا کس وقت مٹی کے کھلونے پر رکھا

وقت پر پاؤں کہانی ختم ہونے پر رکھا

دیکھتا کیا میں تری دنیا کہ ہجرِ یار میں

دیدہ و دل کو ہمیشہ وقف رونے پر رکھا

پانیوں کو ساحلوں میں قید کر دینے کے بعد

موج کو پابند ساحل کے ڈبونے پر رکھا

چاہتا تو وقت کا ہم رقص بن سکتا تھا میں

خود سے ڈر کر خود کو لیکن ایک کونے پر رکھا

اپنی آنکھیں چھوڑ آیا اس کے دروازے کے پاس

اور اس کے خواب کو اپنے بچھونے پر رکھا

سونپ کر منصور دل کو آگ سلگانے کا کام

آنکھ کو مصروف دامن کے بھگونے پر رکھا

منصور آفاق

تُو خالی ہاتھ مجھے بھیج… اور در نہ دکھا

دسمبر 1, 2007منصور آفاق،شعراء،غزلتر،ثمر،خطر،در،سحرadmin

منصور آفاق ۔ غزل نمبر 101

مرے نصیب پہ رو دے، کسی کا گھر نہ دکھا

تُو خالی ہاتھ مجھے بھیج… اور در نہ دکھا

تُو اپنی شام کے بارے کلام کر مجھ سے

کسی کے بام پہ ابھری ہوئی سحر نہ دکھا

ابھی تو وصل کی منزل خیال میں بھی نہیں

شبِ فراق! ابھی سے یہ چشمِ تر نہ دکھا

گزار آیا ہوں صحرا ہزار پت جھڑ کے

فریبِ وقت! مجھے شاخِ بے ثمر نہ دکھا

میں جانتا ہوں قیامت ہے بیچ میں منصور

مجھے یہ راہ میں پھیلے ہوئے خطر نہ دکھا

منصور آفاق

سرابِ ذات کا کیسا سموتھ پانی تھا

دسمبر 1, 2007منصور آفاق،شعراء،غزلاچھوت،بلوط،بھوت،ثبوت،حنوط،سموتھadmin

منصور آفاق ۔ غزل نمبر 100

ہوا تھی تیز مگر ، پُرسکوت پانی تھا

سرابِ ذات کا کیسا سموتھ پانی تھا

وہاں پہ آگ کو کیا سرخروئی ملنی تھی

جہاں حیات کا پہلا ثبوت پانی تھا

وہ تشنہ لب رہا دریا کے پاس آ کر بھی

مرے کنارے کا شاید اچھوت پانی تھا

کئی ہزار برس پہلے میرے پاؤں میں

بشکلِ برف زمیں پر حنوط پانی تھا

اکیلگی تھی جزیرے پہ اور ہوائیں تھیں

گرے ہوئے تھے کئی شہ بلوط ، پانی تھا

ہر اک خیال کے اس انجماد میں منصور

حدِ نگاہ کا بے شکل بھوت پانی تھا

منصور آفاق

سمندر جیسی آنکھیں تھی گل و گلزار چہرہ تھا

دسمبر 1, 2007منصور آفاق،شعراء،غزلگفتار،گلنار،گلزار،بیدار،بار،دلدار،درکار،شہکارadmin

منصور آفاق ۔ غزل نمبر 99

کنارِ صبحِ امکاں اک تبسم بار چہرہ تھا

سمندر جیسی آنکھیں تھی گل و گلزار چہرہ تھا

مری نظریں اٹھیں تو پھر پلٹ کر ہی نہیں آئیں

عجب سندر سی آنکھیں تھی عجب دلدار چہرہ تھا

سنا ہے اس لیے اس نے تراشے خال و خد میرے

اسے پہچان کو اپنی کوئی درکار چہرہ تھا

ہوا کی آیتوں جیسی تکلم کی بہشتیں تھیں

شراب و شہد بہتے تھے وہ خوش گفتار چہرہ تھا

جہاں پر دھوپ کھلتی تھی وہیں بادل برستے تھے

جہاں پُر خواب آنکھیں تھیں وہیں بیدار چہرہ تھا

شفق کی سر خ اندامی لب و رخسار جیسی تھی

چناروں کے بدن پر شام کا گلنار چہرہ تھا

جسے بتیس برسوں سے مری آنکھیں تلاشے ہیں

بس اتنا جانتا ہوں وہ بہت شہکار چہرہ تھا

جہاں پر شمع داں رکھا ہوا ہے یاد کا منصور

یہاں اس طاقچے میں کوئی پچھلی بار چہرہ تھا

منصور آفاق

نیند کی نوٹ بک میں تھا، کچھ تھا

دسمبر 1, 2007منصور آفاق،شعراء،غزلمدعا،معاملہ،کہا،کا،گرا،ٹوٹتا،پکارتا،آسرا،بڑا،بجا،تھا،سلسلہadmin

منصور آفاق ۔ غزل نمبر 98

یاد کچھ بھی نہیں کہ کیا کچھ تھا

نیند کی نوٹ بک میں تھا، کچھ تھا

میں ہی کچھ سوچ کر چلا آیا

ورنہ کہنے کو تھا ، بڑا کچھ تھا

چاند کچھ اور کہتا جاتا تھا

دلِ وحشی پکارتا کچھ تھا

اس کی پاؤں کی چاپ تھی شاید

یا یونہی کان میں بجا کچھ تھا

میں لپٹتا تھا ہجر کی شب سے

میرے سینے میں ٹوٹتا کچھ تھا

کُن سے پہلے کی بات ہے کوئی

یاد پڑتا ہے کچھ، کہا کچھ تھا

پھرفلک سے بھی ہو گئے مایوس

پہلے پہلے تو آسرا کچھ تھا

ہے گواہی کو اک سیہ پتھر

آسماں سے کبھی گرا کچھ تھا

لوگ بنتے تھے گیت پہلے بھی

مجھ سے پہلے بھی سلسلہ کچھ تھا

موسمِ گل سے پہلے بھی موسم

گلستاں میں بہار کا کچھ تھا

اس کی آنکھیں تھیں پُر خطر اتنی

کہہ دیا کچھ ہے مدعا کچھ تھا

آنکھ کیوں سوگوار ہے منصور

خواب میں تو معاملہ کچھ تھا

منصور آفاق

یاد ہے وصل کی سبز اتوار تھی شام کا پیڑ تھا

دسمبر 1, 2007منصور آفاق،شعراء،غزلفام،مادام،نام،ناکام،افہام،الہام،الزام،ایام،آلام،آم،ابہام،دام،دشنام،سرسام،شامadmin

منصور آفاق ۔ غزل نمبر 97

ناریل کے درختوں کی شاخوں میں بادام کا پیڑ تھا

یاد ہے وصل کی سبز اتوار تھی شام کا پیڑ تھا

قمقموں سے پرویا ہوا، روشنی سے بھگویا ہوا

برف کے ڈھیر میں سرخ سا زخمِ ناکام کا پیڑ تھا

شاعری نہر کے ساتھ چلتی ہوئی چاپ تھی خواب کی

رات نظموں کی فٹ پاتھ تھی چاند الہام کا پیڑ تھا

میں ثمر باریوں کی توقع لئے دیکھتا تھا اسے

جو کرائے کے گھر میں لگایا ابھی آم کا پیڑ تھا

ایک دہکی ہوئی آگ کے تھے شمالی پہاڑوں پہ پھول

اک دہکتے چناروں میں کشمیر کے نام کا پیڑ تھا

جس کے پتوں سے تصویر کھینچی گئی میرے کردار کی

ٹہنیوں سے کئی جھوٹ لٹکے تھے، الزام کا پیڑ تھا

اک طرف نیکیوں کا شجر تھا سفیدی پھری قبر سا

اک طرف لمس افزا گناہِ سیہ فام کا پیڑ تھا

زلزلے بھی وبائیں بھی سیلاب بھی شاخ درشاخ تھے

ساری بستی پہ پھیلا ہوا کوئی آلام کا پیڑ تھا

سب پھلوں کے مگر مختلف ذائقے ، مختلف رنگ تھے

اپنی تفہیم کے باغ میں تازہ افہام کا پیڑ تھا

جس شجر کی جوانی کومیں چھوڑ آیا بہاروں کے بیچ

گالیاں چھاؤں میں چہچہاتی تھیں دشنام کا پیڑ تھا

کوئی انبوہ تھا اہلِ اسباب کا اس کی آغوش میں

کیا ہوس کار گلزار میں درہم و دام کا پیڑ تھا

برگ و بار اس پہ آئے ہوئے تھے نئی شاعری کے بہت

ایک دریا کے مبہم کنارے پہ ابہام کا پیڑ تھا

آگ ہی آگ تھی اس کی شاخوں میں پھیلی ہوئی لمس کی

باغِ فردوس میں ایک ممنوعہ مادام کا پیڑ تھا

اک جڑوں سے لپیٹی ہوئی موت کی بیل کی چیخ تھی

زندگی ، شورِ واہی تباہی تھی ، سرسام کا پیڑ تھا

جس سے منصور گنتے پرندے پھریں اپنی تنہائیاں

حسنِ تقویم کے صحن میں ایک ایام کا پیڑ تھا

منصور آفاق

یعنی قربانی کرتا ہوا شیر تھا

دسمبر 1, 2007منصور آفاق،شعراء،غزلہوا،ناطقہ،تھا،خدا،دلربا،ذراadmin

منصور آفاق ۔ غزل نمبر 96

اک سیہ بھیڑ تھی اک سیہ شیر تھا

یعنی قربانی کرتا ہوا شیر تھا

بلی کوبادشہ کیسے مانے وہ شخص

جس کی آنکھوں میں شیرِ خدا شیر تھا

شہر میں ہو گیا ہے درندہ صفت

جنگلوں میں مہذب ذرا شیر تھا

نوکری پیشہ یعنی کہ سرکس زدہ

لومڑی کا کوئی دلربا شیر تھا

ایک گیڈر جو گلیوں سے گزرا مری

شور اٹھا شیر تھا شیر تھاشیر تھا

ڈھاڑتا تھاجو منصور کو دیکھ کر

آدمی تھا کوئی ناطقہ شیر تھا

منصور آفاق

اس کی آنکھوں میں عزا کا درد تھا

دسمبر 1, 2007منصور آفاق،شعراء،غزلقضا،جزا،رضا،سزا،عزاadmin

منصور آفاق ۔ غزل نمبر 95

اک مقامِ پُر فضا کا درد تھا

اس کی آنکھوں میں عزا کا درد تھا

وقت کی قربان گاہ تھی دور تک

اور ازل بستہ قضا کا درد تھا

بات مجبوراً روابط کی تھی اور

مجھ کو رغبت اور رضا کا درد تھا

ہجر کے کالک بھرے ماحول سے

مجھ کو صحبت کی سزا کا درد تھا

اک طرف شہد و شراب و لمس تھے

اک طرف روزِ جزا کا درد تھا

منصور آفاق

خشک پتوں کو ہوا کا درد تھا

دسمبر 1, 2007منصور آفاق،شعراء،غزلہوا،نوا،نینوا،ناروا،دواadmin

منصور آفاق ۔ غزل نمبر 94

مضمحل ہوتے قویٰ کا درد تھا

خشک پتوں کو ہوا کا درد تھا

جان لیوا بس وہی ثابت ہوا

جو مسیحا کی دوا کا درد تھا

رک گیا، آہیں سُروں پر دیکھ کر

ساز کو بھی ہم نوا کا درد تھا

کچھ برس پہلے مرے احساس میں

تھا، سلوکِ ناروا کا درد تھا

مجھ کو دکھ تھا کربلائے وقت کا

اس کو خاکِ نینوا کا درد تھا

منصور آفاق

راکھ کو یعنی ہوا کا درد تھا

دسمبر 1, 2007منصور آفاق،شعراء،غزلہوا،چتا،پا،انا،انتہا،رساadmin

منصور آفاق ۔ غزل نمبر 93

دل کو یارِ بے وفا کا درد تھا

راکھ کو یعنی ہوا کا درد تھا

موت کی ہچکی مسیحا بن گئی

رات کچھ اِس انتہا کا درد تھا

ننگے پاؤں تھی ہوا کی اونٹنی

ریت تھی اور نقشِ پا کا درد تھا

کائناتیں ٹوٹتی تھیں آنکھ میں

عرش تک ذہنِ رسا کا درد تھا

میں جسے سمجھا تھا وحشت ہجر کی

زخم پروردہ انا کا درد تھا

رات کی کالک افق پر تھوپ دی

مجھ کو سورج کی چتا کا درد تھا

منصور آفاق

مجھ کو خاکِ کربلا کا درد تھا

دسمبر 1, 2007منصور آفاق،شعراء،غزلمبتلا،کربلا،ابتلا،بلا،برملا،خلاadmin

منصور آفاق ۔ غزل نمبر 92

آسمانوں کو الہ کا درد تھا

مجھ کو خاکِ کربلا کا درد تھا

اس کو خالی صحن کی تکلیف تھی

مجھ کو اندر کے خلا کا درد تھا

اب تلک احساس میں موجود ہے

کتنا حرفِ برملا کا درد تھا

رات تھی روتی ہوئی کوئل کہیں

اس کے لہجے میں بلا کا درد تھا

رو رہا تھا آسماں تک ساتھ ساتھ

ایسا تیرے مبتلا کا درد تھا

اب بھی آنکھوں سے ابل پڑتا ہے دل

کیسا پہلی ابتلا کا درد تھا

منصور آفاق

تیر سورج کی نظر میں لگ گیا تھا

دسمبر 1, 2007منصور آفاق،شعراء،غزلنظر،جگر،سفر،سحر،سر،شجرadmin

منصور آفاق ۔ غزل نمبر 91

اک چراغِ معتبر میں لگ گیا تھا

تیر سورج کی نظر میں لگ گیا تھا

اس پہ بچپن میں کہانی کھل گئی تھی

دکھ کا پتھر اس کے سر میں لگ گیا تھا

وہ کہیں رہتی تھی تاروں کے نگر میں

سارا دن بس کے سفر میں لگ گیا تھا

پہلے لکھے تھے ستاروں کے قصیدے

پھر قلم کارِ سحر میں لگ گیا تھا

رفتہ رفتہ چھاؤں میٹھی ہو گئی تھی

شہد کا چشمہ شجر میں لگ گیا تھا

پچھلے دکھ منصور جندڑی سہہ گئی تھی

زخم اک تازہ جگر میں لگ گیا تھا

منصور آفاق

صبح کے ماتھے پہ آ کر سج گیا تھا

دسمبر 1, 2007منصور آفاق،شعراء،غزلکج،اسوج،بج،تج،دھیرج،دھج،ذوالحج،سورج،ستلج،سجadmin

منصور آفاق ۔ غزل نمبر 90

پابجولاں کیا مرا سورج گیا تھا

صبح کے ماتھے پہ آ کر سج گیا تھا

وہ بھی تھی لپٹی ہوئی کچھ واہموں میں

رات کا پھر ایک بھی تو بج گیا تھا

کوئی آیا تھا مجھے ملنے ملانے

شہر اپنے آپ ہی سج دھج گیا تھا

پہلے پہلے لوٹ جاتا تھا گلی سے

رفتہ رفتہ بانکپن کا کج گیا تھا

مکہ کی ویران گلیاں ہو گئی تھیں

کربلا کیا موسمِ ذوالحج گیا تھا

تُو اسے بھی چھوڑ آیا ہے اسے بھی

تیری خاطر وہ جو مذہب تج گیا تھا

وہ مرے سینے میں شاید مر رہا ہے

جو مجھے دے کر بڑی دھیرج گیا تھا

کتنی آوازوں کے رستوں سے گزر کر

گیت نیلی بار سے ستلج گیا تھا

پاؤں بڑھ بڑھ چومتے تھے اڑتے پتے

تازہ تازہ باغ میں اسوج گیا تھا

چاند تاروں نے خبر منصور دی ہے

رات کی محفل میں کل سورج گیا تھا

منصور آفاق

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: