admin کی تمام پوسٹیں

کہ اوس اوس کلی بے لباسیوں سے ہوئی

دسمبر 1, 2007منصور آفاق،شعراء،غزللباسیوں،پیاسیوں،اداسیوں،حواسیوں،شناسیوںadmin

منصور آفاق ۔ غزل نمبر 447

وہ بر گزیدہ خطا رات عاصیوں سے ہوئی

کہ اوس اوس کلی بے لباسیوں سے ہوئی

ہر ایک صبح منور ہوئی ترے غم سے

ہر ایک شام فروزاں اداسیوں سے ہوئی

میں کھوجنے کے عمل میں شکار اپنا ہوا

مری اکیلگی چہرہ شناسیوں سے ہوئی

لپک کے بھاگ بھری نے کسی کو چوم لیا

گھٹا کی بات جو روہی کی پیاسیوں سے ہوئی

بہت سے داغ اجالوں کے رہ گئے منصور

جہاں میں رات عجب بد حواسیوں سے ہوئی

منصور آفاق

نیندوں کی بستیوں پہ مصیبت بنی ہوئی

دسمبر 1, 2007منصور آفاق،شعراء،غزلمحبت،مصیبت،برکت،صورت،ضرورت،عبرت،عزتadmin

منصور آفاق ۔ غزل نمبر 446

اس کی حرافہ یاد ہے آفت بنی ہوئی

نیندوں کی بستیوں پہ مصیبت بنی ہوئی

جلتی جہاں تھی آگ وہاں دیکھ تو سہی

اڑتی ہے راکھ، نوحۂ عبرت بنی ہوئی

وہ جمع لوگ ہیں کسی پاگل کے آس پاس

کوئی ہے انقلاب کی صورت بنی ہوئی

لگتا ہے تم ملاؤ گی اس کو بھی خاک میں

تھوڑی سی جو ہے شہر میں عزت بنی ہوئی

وہ اپنی خواہشوں کی ہے تکمیل کا چلن

جو چیز ہے جہاں میں محبت بنی ہوئی

ہر رات نظمِ تازہ اترتی ہے صحن میں

کیاہے جدائی باعثِ برکت بنی ہوئی

منصور رکھ د یا ہے اٹھا کرسٹور میں

پھرتی تھی وہ جو میری ضرورت بنی ہوئی

منصور آفاق

اک سیہ مورت سے مل کے صبح شرمندہ ہوئی

دسمبر 1, 2007منصور آفاق،شعراء،غزلمل،کھل،گل،پل،تل،دل،سل،ظلadmin

منصور آفاق ۔ غزل نمبر 445

کالکیں چہرے سے چھل کے صبح شرمندہ ہوئی

اک سیہ مورت سے مل کے صبح شرمندہ ہوئی

جس کی نس نس میں اندھیرے تھے تبسم آفریں

اس کلی کے ساتھ کھل کے صبح شرمندہ ہوئی

وہ مجسم رات وہ کالی صراحی کے خطوط

دامنِ خوباں میں سل کے صبح شرمندہ ہوئی

حسرتوں کی ٹھیکرے تھے، ڈھیر تھے افسوس کے

پھر کھنڈر میں آ کے دل کے صبح شرمندہ ہوئی

اس نے زلفوں کو بکھیرا اور سورج بجھ گیا

سامنے لہراتے ظل کے صبح شرمندہ ہوئی

ہر نمو مٹی کی کالی قبر سے آباد تھی

بیچ شہرِآب و گل کے صبح شرمندہ ہوئی

یار کے رخسار پر ہے اک عجب کالا گلاب

پھر مقابل ایک تل کے صبح شرمندہ ہوئی

کنجِ لب سے ہی نکلتی یار کے تو بات تھی

بس افق کے پاس کھل کے صبح شرمندہ ہوئی

جھانک سکتی ہی نہیں مٹی کے اندر روشنی

خاک پہ منصور پل کے صبح شرمندہ ہوئی

منصور آفاق

کچھ کہو وہ رت بدلنے پر پلٹ جانے کی عادت کیا ہوئی

دسمبر 1, 2007منصور آفاق،شعراء،غزلہجرت،قیامت،حرارت،روایت،عمارت،عادتadmin

منصور آفاق ۔ غزل نمبر 444

آب و دانہ کے لئے آئے پرندویہ سکونت کیا ہوئی

کچھ کہو وہ رت بدلنے پر پلٹ جانے کی عادت کیا ہوئی

چند دن وہ ساحلوں پر رکنے والے کیا ہوئے بحری جہاز

دور دیسوں کے سفر سے لوٹ آنے کی روایت کیا ہوئی

دیکھنے آئے تھے ہم کافر تو حسنِ کافرانہ کو مگر

اس گنہ آباد بستی میں مسلمانوں کی ہجرت کیا ہوئی

ساحلوں پر ڈوبتے سورج پہ اتری ہے کوئی پیتل کی کونج

سیپیاں چنتی ہوئی سر گرم کرنوں کی حرارت کیا ہوئی

ہو گئی بچی کی چھاتی تو سلگتے سگریٹوں سے داغ داغ

وہ جو آنی تھی زمیں پر آسمانوں سے قیامت کیا ہوئی

کیا ہوا وہ جنگ سے اجڑاہوابچوں بھرا منصورپارک

وہ کتابوں سے بھری تہذیب کی روشن عمارت کیا ہوئی

منصور آفاق

سب کچھ بدل کے رہ گیا تقصیر کیا ہوئی

دسمبر 1, 2007منصور آفاق،شعراء،غزلتقدیر،تقصیر،تحریر،تصویر،تعمیر،زنجیرadmin

منصور آفاق ۔ غزل نمبر 443

گھر لوٹنے میں اک ذرا تاخیر کیا ہوئی

سب کچھ بدل کے رہ گیا تقصیر کیا ہوئی

کمرے میں سن رہا ہوں کوئی اجنبی سی چاپ

دروازے پر لگی ہوئی زنجیر کیا ہوئی

وہ درد کیا ہوئے جنہیں رکھا تھا دل کے پاس

وہ میز پر پڑی ہوئی تصویر کیا ہوئی

جو گیت لا زوال تھے وہ گیت کیا ہوئے

وہ ریت پر وصال کی تحریر کیا ہوئی

ہر صبح دیکھتا ہوں میں کھڑکی سے موت کو

گرتے ہوئے مکان کی تعمیر کیا ہوئی

منصور اختیار کی وحشت کے سامنے

یہ جبرِ کائنات یہ تقدیر کیا ہوئی

منصور آفاق

جس کی جیب سے سگریٹ نکلے اس کے نام حشیش ہوئی

دسمبر 1, 2007منصور آفاق،شعراء،غزلبخشیش،تشویش،حشیش،ریش،شیشadmin

منصور آفاق ۔ غزل نمبر 442

پکڑے گئے ہم محشر میں اور ایسی غلط تفتیش ہوئی

جس کی جیب سے سگریٹ نکلے اس کے نام حشیش ہوئی

جاتے جاتے اس نے مڑ کرمیری جانب دیکھا تھا

گھنٹہ بھر تقریب تھی لیکن ایک نظر بخشیش ہوئی

دیواروں میں دیکھ کے اپنی شکل کے اتنے زیادہ عکس

اک بھولی بھالی سی ناگن شیش محل میں شیش ہوئی

دیوانے پن کے جنگل میں آنکھ کھلی تو علم ہوا

کپڑے لیراں لیراں اور بے ہنگھم اپنی ریش ہوئی

کس کی حکومت آئی ہے یہ کالک کیسی ہے منصور

آدھے دن تک رات جو دیکھی سورج کو تشویش ہوئی

منصور آفاق

پھر مری مجذوبیت افلاک کی گاہک ہوئی

دسمبر 1, 2007منصور آفاق،شعراء،غزلمسلک،کالک،گاہک،بالک،حدتک،زیرک،شکadmin

منصور آفاق ۔ غزل نمبر 441

نیلگوں دیوار پر اک بے صدا دستک ہوئی

پھر مری مجذوبیت افلاک کی گاہک ہوئی

پھر مجھے ابدال ہونے کا یقیں ہونے لگا

جب تلاش اپنی مکمل عرش کی حدتک ہوئی

میری چیخیں اپنی دھڑکن میں چھپا لیتی رہی

کس قدر اپنی سلگتی خامشی زیرک ہوئی

چاند تارے حسنِ فطرت کے تحائف ہو گئے

آسماں پر جب مکمل رات کی کالک ہوئی

میں نے جب سوچا، نہیں کوئی نہیں اسکا شریک

وہم ٹھہرا جسم اپنا جاں سراپا شک ہوئی

جس کے چاروں سمت ڈھلوانیں ہوں منہ کھولے ہوئے

زندگی اپنی وہی وحشت زدہ بالک ہوئی

ہم نفس میرے رہے منصور سقراط و حسین

روشنی مذہب ہوا اور چاندنی مسلک ہوئی

منصور آفاق

صحن میں اک چنبلی کی بوٹی ہوئی

دسمبر 1, 2007منصور آفاق،شعراء،غزللوٹی،ٹوٹی،بوٹی،جھوٹی،روٹھیadmin

منصور آفاق ۔ غزل نمبر 440

جاگ اٹھی جو قسمت تھی پھوٹی ہوئی

صحن میں اک چنبلی کی بوٹی ہوئی

صحنِ باغِ ارم کی ہیں رہداریاں

ہاتھیوں کے پڑاؤ سے ٹوٹی ہوئی

ہر طرف ہیں کھجوروں کے زخمی درخت

بستیاں ہیں مدینے کی لوٹی ہوئی

آسماں ہو گیا مہرباں خاک پر

لوٹ آئی ہے رُت کوئی روٹھی ہوئی

دل میں منصور خودکُش دھماکہ ہوا

اور پھر اپنی بن اطلاع جھوٹی ہوئی

منصور آفاق

دل کے قہوہ خانے میں بحث بھی بڑی ہوئی

دسمبر 1, 2007منصور آفاق،شعراء،غزللڑی،کھڑی،گڑی،گھڑی،پنکھڑی،اڑی،بڑی،جھڑیadmin

منصور آفاق ۔ غزل نمبر 439

یاد کے فلور پرچائے ہے پڑی ہوئی

دل کے قہوہ خانے میں بحث بھی بڑی ہوئی

پھانسیوں پہ جھولتی اک خبرہے موت کی

اپنی اپنی طے شدہ سوچ میں گڑی ہوئی

بدمزاج وقت ہے کچھ ملال خیز سا

اختتامِ سال سے شام ہے لڑی ہوئی

آتے جاتے دیکھ کر درد کچھ مرے ہوئے

اک الست مست کی ذات میں جھڑی ہوئی

بولتے تھے عادتاً کم بھرے ہوئے دماغ

دانش و شعور کی شوخ پنکھڑی ہوئی

آتی جاتی گاڑیاں موڑ کاٹنے لگیں

چلتے چلتے وہ گلی روڈ پر کھڑی ہوئی

چلنے والا تار پرمسخروں میں کھو گیا

جب صراطِ وقت پر آخری گھڑی ہوئی

آدمی کے گوشت کی ریشہ رشہ داستاں

صدرِ امن گاہ کے دانت میں اڑی ہوئی

منصور آفاق

روہی دو فرلانگ ہوئی

دسمبر 1, 2007منصور آفاق،شعراء،غزلفرلانگ،مانگ،چھلانگ،تانگ،رانگ،سوانگ،سانگadmin

منصور آفاق ۔ غزل نمبر 438

پیر فرید کی بانگ ہوئی

روہی دو فرلانگ ہوئی

آنکھ سے دیکھا باہو کی

دنیا ایک سوانگ ہوئی

شاہ حسین کی بستی میں

مادھولال کی مانگ ہوئی

بول وہ بلھا بول گیا

پار جگر کے سانگ ہوئی

اربوں سال کی تنہائی

اپنی ایک چھلانگ ہوئی

بات ہوئی بس اوروں سے

کال ہمیشہ رانگ ہوئی

کوئی کہاں منصور ملا

عمر سراپا تانگ ہوئی

منصور آفاق

پھر آنسوئوں کا وہ اسراف کر رہا ہے کوئی

دسمبر 1, 2007منصور آفاق،شعراء،غزلانصاف،اوصاف،آہ،اسراف،اصراف،صافadmin

منصور آفاق ۔ غزل نمبر 437

دریچے یاد کے شفاف کر رہا ہے کوئی

پھر آنسوئوں کا وہ اسراف کر رہا ہے کوئی

نکھرتی جاتی ہے شبنم اداس آنکھوں میں

کسی گلاب کو سی آف کر رہا ہے کوئی

گرا رہے ہیں در و بام چند بلڈوزر

سنا ہے شہر مرا ، صاف کر رہا ہے کوئی

بتا رہا ہے بدن کی نزاکتوں کا ناپ

بیان حسن کے اوصاف کر رہا ہے کوئی

بڑھا رہا ہے سرِشام وصل کی خواہش

وہ روشنی کا سوئچ آف کر رہا ہے کوئی

وہ لکھ رہا ہے کہ کرنا ہے رات کو کیا کیا

شبِفراق کا اصراف کر رہا ہے کوئی

بڑھارہا ہے محبت کے وائرس منصور

شبِ وصال سے انصاف کر رہا ہے کوئی

منصور آفاق

عشق فرمائے جہاں میں ہوں وہیں ہے کوئی

دسمبر 1, 2007منصور آفاق،شعراء،غزلنہیں،وہیں،کہیں،جبیں،زمیںadmin

منصور آفاق ۔ غزل نمبر 436

شیخ صاحب کہے افلاک نشیں ہے کوئی

عشق فرمائے جہاں میں ہوں وہیں ہے کوئی

پاؤں پڑتی ہے ازل کی صبح انوار فروش

چہرۂ برقِ تجلیٰ کی جبیں ہے کوئی

جانتا ہوں میں محمدﷺکے وسیلے سے اسے

مجھ کو محسوس نہیں ہوتا کہیں ہے کوئی

ذرے ذرے میں دھڑ کتا ہے وہ مشعوقِ ازل

کرسی و عرش و سموات و زمیں ہے کوئی

کیسی یکتائی کا احساس مجھے ہے منصور

ایک بس اس کے سوا میرا نہیں ہے کوئی

منصور آفاق

ہے مرے تعاقب میں ، نیند کے بس سٹاپ سے کوئی

دسمبر 1, 2007منصور آفاق،شعراء،غزلالاپ،آپ،بھاپ،تھاپ،سٹاپ،شاپadmin

منصور آفاق ۔ غزل نمبر 435

آشنا سا لگتا ہے اپنی پُر خواب چاپ سے کوئی

ہے مرے تعاقب میں ، نیند کے بس سٹاپ سے کوئی

موسمِ جدائی کی تنگ تھا زرد سی طوالت سے

رُت خرید لایا ہے وصل کی، لمس شاپ سے کوئی

قوس قوس آوازیں دور تک دائرے بناتی تھیں

لکھ رہا تھا کمرے میں گیت سا کیا الاپ سے کوئی

رقص کے الاؤ میں ڈوب کر پاؤں سے کلائی تک

جل اٹھا تھا ڈھولک کی نرم سی تیز تھاپ سے کوئی

سردیوں کی برفانی صبح میں گرم گرم سے بوسے

پھینکتا تھا ہونٹوں کی برف سی سرد بھاپ سے کوئی

جو کہیں نہیں موجود، روح کے آس پاس میں منصور

پوچھتا رہا اس کا، دیر تک اپنے آپ سے کوئی

منصور آفاق

آنکھ میں گلستاں کھلے کوئی

دسمبر 1, 2007منصور آفاق،شعراء،غزلقافلے،لے،ولولے،کھلے،گلے،بلے،حوصلے،سلسلےadmin

منصور آفاق ۔ غزل نمبر 434

چاہتا ہوں کہیں ملے کوئی

آنکھ میں گلستاں کھلے کوئی

رکھ گیا ہاتھ کی لکیروں میں

راستوں کے یہ سلسلے کوئی

میرے دل کا بھی بوجھ ہلکا ہو

میرے بھی تو سنے گلے کوئی

اس لئے میں بھٹکتا پھرتا ہوں

مجھ کو گلیوں میں ڈھونڈھ لے کوئی

کیا کروں ہجر کے جزیرے میں

لے گیا ساتھ حوصلے کوئی

اس کے آنے کی صرف افواہ پر

دیکھتا دل کے ولولے کوئی

یار آتا میرے علاقے میں

خیمہ زن ہوتے قافلے کوئی

گرمیٔ لمس کے مجھے منصور

بخش دے پھر سے آ بلے کوئی

منصور آفاق

نہیں ہے اور کہ میرا نہیں بدل کوئی

دسمبر 1, 2007منصور آفاق،شعراء،غزلمحل،پنل،اجل،بیربل،بدل،حل،خلل،عمل،غزلadmin

منصور آفاق ۔ غزل نمبر 433

مجھ ایسا غیر پسندیدہ بے محل کوئی

نہیں ہے اور کہ میرا نہیں بدل کوئی

گزار اعمرنہ سنجیدگی کے صحرا میں

ضروری ہے تری محفل میں بیربل کوئی

پھٹی ہوئی کسی چادر سے ڈھانپ دیتے ہیں

تلاش کرتے نہیں مسئلے کا حل کوئی

فنانژاد علاقہ ہے میری مٹی کا

نکال سکتا نہیں خاک سے اجل کوئی

یہ پوچھتا تھا کوئی اور بھی ہے میرے سوا

ملاتھا دشتِ جنوں میں مجھے پنل کوئی

اسی جریدۂ کون و مکاں کی سطروں میں

چھپی ہوئی ہے مرے واسطے غزل کوئی

نجانے کون شہادت سے سرفراز ہوا

کنارِ چشمۂ کوثر بنا محل کوئی

ٹھہر گیا ہے ستم ناک وقت میرے لئے

یا کائنات کی گردش میں ہے خلل کوئی

مری شکست کے اسباب پوچھتے کیا ہو

ہے کھیل ہی کے قواعد گیا بدل کوئی

اجل حیات کا پہلا سرا نہیں منصور

مراجعت کی مسافت کا ہے عمل کوئی

منصور آفاق

سرِ کہسار مسافت کا پڑاؤ کوئی

دسمبر 1, 2007منصور آفاق،شعراء،غزلناؤ،کٹاؤ،گھاؤ،گاؤ،پڑاؤ،بہاؤ،جھکاؤ،داؤadmin

منصور آفاق ۔ غزل نمبر 432

رات کے پچھلے پہر ، دور الاؤ کوئی

سرِ کہسار مسافت کا پڑاؤ کوئی

ہار جاؤں گا تو دنیاسے بھی اٹھ جاؤں گا

بس لگانا ہے مجھے آخری داؤ کوئی

ٹوٹ جانے میں بھلا کونسی اچھائی ہے

نرمگی کوئی، سرِ شاخ جھکاؤ کوئی

لوگ کہتے ہیں کہ باہو کے ہے دوہوں میں شفا

بیٹھ کے میرے سرہانے ذرا گاؤ کوئی

چاند کے روپ میں اک طنزِ مسلسل کی طرح

سینہ ء شب میں سلگتا ہوا گھاؤ کوئی

لوگ مرجاتے ہیں ساحل کی تمنا لے کر

اور سمندر میں چلی جاتی ہے ناؤ کوئی

کاش بچپن کی بہشتوں سے نہ باہر آؤں

روک لے عمر کے دریا کا کٹاؤ کوئی

لڑکھڑانا ہے نشیبوں میں ہمیشہ منصور

روک سکتا نہیں پانی کا بہاؤ کوئی

منصور آفاق

ذرا سے شہر میں ہے بے شمار تنہائی

دسمبر 1, 2007منصور آفاق،شعراء،غزلنگار،نثار،کنار،گزار،پکار،پار،پروردگار،انتظار،انحصار،اشکبار،بار،دار،سوگوار،شمار،شکار،غمگسارadmin

منصور آفاق ۔ غزل نمبر 431

بڑی اداس بڑی بے قرار تنہائی

ذرا سے شہر میں ہے بے شمار تنہائی

مجھے اداسیاں بچپن سے اچھی لگتی ہیں

مجھے عزیز مری اشکبار تنہائی

فراق یہ کہ وہ آغوش سے نکل جائے

وصال یہ کرے بوس و کنار تنہائی

پلٹ پلٹ کے مرے پاس آئی وحشت سے

کسی کو دیکھتے ہی بار بار تنہائی

مرے مزاج سے اس کا مزاج ملتا ہے

میں سوگوار … تو ہے سوگوار تنہائی

کوئی قریب سے گزرے تو جاگ اٹھتی ہے

شبِ سیہ میں مری جاں نثار تنہائی

مجھے ہے خوف کہیں قتل ہی نہ ہو جائے

یہ میرے غم کی فسانہ نگار تنہائی

نواح جاں میں ہمیشہ قیام اس کا تھا

دیارِ غم میں رہی غمگسار تنہائی

ترے علاوہ کوئی اور ہم نفس ہی نہیں

ذرا ذرا مجھے گھر میں گزار تنہائی

یونہی یہ شہر میں کیا سائیں سائیں کرتی ہے

ذرا سے دھیمے سروں میں پکار تنہائی

نہ کوئی نام نہ چہرہ نہ رابطہ نہ فراق

کسی کا پھر بھی مجھے انتظار، تنہائی

جو وجہ وصل ہوئی سنگسار تنہائی

تھی برگزیدہ ، تہجد گزار تنہائی

مری طرح کوئی تنہا اُدھر بھی رہتا ہے

بڑی جمیل، افق کے بھی پار تنہائی

کسی سوار کی آمد کا خوف ہے، کیا ہے

بڑی سکوت بھری، کوئے دار، تنہائی

دکھا رہی ہے تماشے خیال میں کیا کیا

یہ اضطراب و خلل کا شکار تنہائی

بفیضِ خلق یہی زندگی کی دیوی ہے

کہ آفتاب کا بھی انحصار تنہائی

اگرچہ زعم ہے منصور کو مگر کیسا

تمام تجھ پہ ہے پروردگار تنہائی

منصور آفاق

تخلیہ اے زندگانی تخلیہ

دسمبر 1, 2007منصور آفاق،شعراء،غزلفکانی،فشانی،مہربانی،میزبانی،یعنی،بنانی،بڑھانی،ترانی،جوانی،زندگانی،سائبانی،شادمانی،شبانیadmin

منصور آفاق ۔ غزل نمبر 430

دھڑکنوں کی بدزبانی تخلیہ

تخلیہ اے زندگانی تخلیہ

ظلِ سبحانی ہیں آئے درد کے

اے کنیزِ شادمانی تخلیہ

آرہا ہے وہ چراغِ صبح پا

چاند تارو ، مہربانی ، تخلیہ

مہ وشو!اب یاسمن کے باغ کی

دیکھتے ہیں گل فشانی ، تخلیہ

بجلیو! موسیٰ کلیم اللہ سے میں

سن رہاہوں لن ترانی تخلیہ

بارگاہِ دل میں شرمندہ نہ کر

لمس کی اندھی جوانی تخلیہ

ہے دمِ عارف نسیمِ صبح دم

اے کلیمی اے شبانی تخلیہ

زندگی سے بھر گیا دل حسرتو!

اب کہانی کیا بڑھانی تخلیہ

واہ ، آئی ہے کئی صدیوں کے بعد

پھر صدائے کن فکانی تخلیہ

جائیے کہ آئینے کے سامنے

شکلِ ہستی ہے بنانی تخلیہ

جارہا ہوں میں عدم کے باغ میں

موسموں کی میزبانی تخلیہ

آرہا ہے مجھ سے ملنے آفتاب

بادلوں کی سائبانی تخلیہ

ملنا ہے منصور نے منصور سے

گم کرو اب شکل یعنی تخلیہ

منصور آفاق

میں جا رہا ہوں شہر سے باہر کسی جگہ

دسمبر 1, 2007منصور آفاق،شعراء،غزلمنظر،کر،پر،اندر،باہرadmin

منصور آفاق ۔ غزل نمبر 429

مل جاؤ تھوڑی دیر تو آ کر کسی جگہ

میں جا رہا ہوں شہر سے باہر کسی جگہ

میں روزنامچہ ہوں تری صبح و شام کا

مجھ کو چھپا دے شیلف کے اندر کسی جگہ

جادو گری حواس کی پھیلی ہوئی ہے بس

ہوتا نہیں ہے کوئی بھی منظر کسی جگہ

کچھ دن گزارتا ہوں پرندوں کے آس پاس

جنگل میں چھت بناتا ہوں جا کر کسی جگہ

منصور اس گلی میں تو آتی نہیں ہے دھوپ

گھر ڈھونڈ کوئی مین سڑک پر کسی جگہ

منصور آفاق

آئینہ میں دیکھتا ہوں اور نظر آتا ہے وہ

دسمبر 1, 2007منصور آفاق،شعراء،غزلہنر،نظر،کر،گزر،پر،سرadmin

منصور آفاق ۔ غزل نمبر 428

اور اب تو میرے چہرے سے ابھر آتا ہے وہ

آئینہ میں دیکھتا ہوں اور نظر آتا ہے وہ

حالِ دل کہنے کو بارش کی ضرورت ہے مجھے

اور میرے گھر ہوا کے دوش پر آتا ہے وہ

رات بھر دل سے کوئی آواز آتی ہے مجھے

جسم کی دیوار سے کیسے گزر آتا ہے وہ

وقت کا احساس کھو جاتا تھا میری بزم میں

اپنے بازو پر گھڑی اب باندھ کر آتا ہے وہ

میں ہوا کی گفتگو لکھتا ہوں برگِ شام پر

جو کسی کو بھی نہیں آتا ہنر آتا ہے وہ

سر بریدوں کو تنک کر رات سورج نے کہا

اور جب شانوں پہ رکھ کر اپنا سر آتا ہے وہ

منصور آفاق

بم گراتا رہا خود اپنی ہی دہلیز پہ وہ

دسمبر 1, 2007منصور آفاق،شعراء،غزللیز،چیز،تفویض،تقریظ،تجہیز،تعویز،دہلیزadmin

منصور آفاق ۔ غزل نمبر 427

عالمی بنک کے اک وفد کی تجویز پہ وہ

بم گراتا رہا خود اپنی ہی دہلیز پہ وہ

کیا بتاتا کہ مرا اس سے تعلق کیا تھا

رو بھی سکتا نہ تھا تکفین پہ تجہیز پہ وہ

کھوجنی پڑتی ہے ماتھے سے وہ قیمت لیکن

ایک لیبل سا لگا دیتا ہے ہر چیز پہ وہ

ہو نہیں سکتا شب و روز کا مالک کوئی

عمر ہر شخص کو دیتا ہے فقط لیز پہ وہ

جانے کیا دیکھ کے کل شام کتابِ دل میں

خامشی چھوڑ گیا صفحۂ تقریظ پہ وہ

خوش تھی مٹی کہ مجھے مل گئے صدیوں کے خطوط

چیخ اٹھی تھی مگر ذہن کی تفویض پہ وہ

اس نئے دور کا منصور عجب عامل ہے

نام خود اپنا ہی لکھ دیتا ہے تعویز پہ وہ

منصور آفاق

سحر جب مسکرائے تو کہے ہر پھول بسم اللہ

دسمبر 1, 2007منصور آفاق،شعراء،غزلمسکرائے،کھائے،گنگنائے،گائے،آئے،سنائے،سرسرائےadmin

منصور آفاق ۔ غزل نمبر 426

صبا طیبہ سے آئے تو کہے ہر پھول بسم اللہ

سحر جب مسکرائے تو کہے ہر پھول بسم اللہ

قدم لینے لگے سبزہ ، شجر بھیجیں سلام اس پر

وہ گلشن میں جو آئے تو کہے ہر پھول بسم اللہ

کبھی ساون کے میٹھے انتظار انگیز لمحوں میں

ہوا ہولے سے گائے تو کہے ہر پھول بسم اللہ

کشادہ رکھتے ہیں اتنا درِ دل ہم چمن والے

کہ سایہ سرسرائے تو کہے ہر پھول بسم اللہ

محبت کے بلکتے چیختے بے چین موسم میں

جو بلبل گنگنائے تو کہے ہر پھول بسم اللہ

پہاڑی راگ کی بہتی ہوئی لے میں کہیں کوئی

ندی جب دکھ سنائے تو کہے ہر پھول بسم اللہ

یہ انکا رنگِ فطرت ہے ، یہ انکا ظرف ہے منصور

کہ کانٹا زخم کھائے تو کہے ہر پھول بسم اللہ

منصور آفاق

آ انتظار کے اک اور سال بسم اللہ

دسمبر 1, 2007منصور آفاق،شعراء،غزلملال،ڈھال،وبال،وصال،المثال،جال،حال،خیال،ذوالجلال،سوال،سال،شال،غزالadmin

منصور آفاق ۔ غزل نمبر 425

پرانے غم کے نئے احتمال بسم اللہ

آ انتظار کے اک اور سال بسم اللہ

بس ایک تیری کمی تھی جنوں کے صحرا میں

خوش آمدید اے میرے غزال، بسم اللہ

آ دیکھ زخم ترو تازہ ہیں مہکتے ہیں

آ مجھ سے پوچھنے پرسانِ حال بسم اللہ

اندھیرے کروٹیں لیتے ہیں مجھ میں پہلے بھی

بہ سرو چشم شبِ ذوالجلال بسم اللہ

سنا ہے آج اکیلا ہے اپنے کمرے میں

چل اس کے پاس دلِ خوش خیال بسم اللہ

لگی تھی آنکھ ذرا ہجر کی تھکاوٹ سے

میں اٹھ گیا میرے دشتِ ملال بسم اللہ

یہ کیسے خانۂ درویش یاد آیا ہے

بچھاؤں آنکھیں ؟ اے خوابِ وصال بسم اللہ

پھر اپنے زخم چھپانے کی رُت پلٹ آئی

شجر نے اوڑھ لی پتوں کی شال بسم اللہ

کھنچا ہوا ترا ناوک نہ جان ضائع ہو

ہے جان پہلے بھی جاں کا وبال بسم اللہ

یہ تیرے وار تو تمغے ہیں میری چھاتی کے

لو میں نے پھینک دی خود آپ ڈھال بسم اللہ

یہ لگ رہا ہے کہ اپنے بھی بخت جاگے ہیں

کسی نے مجھ پہ بھی پھینکا ہے جال بسم اللہ

نہیں کچھ اور تو امید رکھ ہتھیلی پر

دراز ہے مرا دستِ سوال بسم اللہ

کسی فقیر کی انگلی سے میرے سینے پر

لکھا ہوا ہے فقید المثال بسم اللہ

منصور آفاق

ہے لام حرکتِ لا ، لا الہ الا اللہ

دسمبر 1, 2007منصور آفاق،شعراء،غزللکھا،لا،کہا،کیا،پڑھا،بادصبا،دعا،سوا،صداadmin

منصور آفاق ۔ غزل نمبر 424

الف ہے حرفِ الہ، لا الہ الا اللہ

ہے لام حرکتِ لا ، لا الہ الا اللہ

یہ میم ،میمِ محمد رسول اللہ ہے

یہی خدا نے کہا،لا الہ الا اللہ

یہی ہے برقِ تجلی،یہی چراغ طور

یہی زمیں کی صدا،لا الہ الا اللہ

کرن کرن میں مچلتی ہے خوشبوئے لولاک

خرامِ بادصبا،لا الہ الا اللہ

نگارِ قوسِ قزح کے جمیل رنگوں سے

وہ بادلوں نے لکھا،لا الہ الا اللہ

سنائی دے یہی غنچوں کے بھی چٹکنے سے

کھلے ہیں دستِ دعا،لا الہ الا اللہ

وہی وجودہے واحد،وہی اکیلا ہے

کوئی نہ اُس کے سوا ،لا الہ الا اللہ

وہ کس کے قربِ مقدس کی دلربائی تھی

تھاکنکروں نے پڑھا ،لا الہ الا اللہ

ہر ایک دل کے غلافِ مہین پر منصور

کشید کس نے کیا ، لا الہ الا اللہ

منصور آفاق

کلیدِ باغِ جناں لا الہ الا اللہ

دسمبر 1, 2007منصور آفاق،شعراء،غزلنہاں،اماں،جہاں،جناں،عیاںadmin

منصور آفاق ۔ غزل نمبر 423

نجاتِ خلقتِ جاں لا الہ الا اللہ

کلیدِ باغِ جناں لا الہ الا اللہ

یہ خوفِ آتشِ دوزخ یہ خطرۂ ابلیس

وہاں کہاں کہ جہاں لا الہ الا اللہ

بگاڑ سکتی ہے کیا اس کا چرخ کی گردش

ہے جس کی جائے اماں لا الہ الا اللہ

یہ جائیدادِ جہاں کچھ نہیں ہے اُس کے لئے

ہے جس کے دل میں نہاں لا الہ الا اللہ

یہ کائنات یہ عالم نہیں وہاں باہو

جہاں جہاں پہ عیاں لا الہ الا اللہ

سلطان باہو کی فارسی غزل کا ترجمہ

منصور آفاق

مت پوچھ ایک پل کی طوالت کا واقعہ

دسمبر 1, 2007منصور آفاق،شعراء،غزلہدایت،قیامت،محبت،وحشت،خباثت،طوالت،عنایتadmin

منصور آفاق ۔ غزل نمبر 422

صدیوں پہ ہے محیط سکونت کا واقعہ

مت پوچھ ایک پل کی طوالت کا واقعہ

ممکن نہیں ہے صبحِ ازل پھر اسے لکھے

جیسا تھا بزمِ شمعِ ہدایت کا واقعہ

ہم اہلِ عشق ہیں سو بڑے جلد باز تھے

عجلت میں ہم نے لکھا محبت کا واقعہ

وہ دلنواز چیخ مری گود میں گری

یہ کاکروچ کی ہے خباثت کا واقعہ

جا خانۂ وراق پہ آواز دے کے دیکھ

مت پوچھ مجھ سے اس کی عنایت کا واقعہ

پاؤں رکھا جہاں پہ وہیں پھول کھل اٹھے

پھیلا ہے سارے دشت میں وحشت کا واقعہ

منصور اعتقاد ضروری سہی مگر

ہونا نہیں ہے کوئی قیامت کا واقعہ

منصور آفاق

یعنی کہیں پانی میں ترا خواب ہمیشہ

دسمبر 1, 2007منصور آفاق،شعراء،غزلاسباب،برفاب،تالاب،خواب،شادابadmin

منصور آفاق ۔ غزل نمبر 421

میں دیکھتا ہوں جھیل میں مہتاب ہمیشہ

یعنی کہیں پانی میں ترا خواب ہمیشہ

برسات کے موسم نے دعا دی مرے غم کو

آباد پرندوں سے ہو تالاب ہمیشہ

اجڑے ہوئے لوگوں کی دعا ہے کہ تمہارا

یہ تازہ تعلق رہے شاداب ہمیشہ

جاں سوختہ ہو جائے بھلے آگ میں میری

تجھ کو ملے خسخانہ و برفاب ہمیشہ

منصور شبِ غم کے سیہ پوش سفر میں

یادیں رہیں سرچشمۂ اسباب ہمیشہ

منصور آفاق

مرے سرمد کی رعنائی ، مرے منصور کا چہرہ

دسمبر 1, 2007منصور آفاق،شعراء،غزلمنصور،مزدور،چور،حور،دیجور،دستور،عاشورadmin

منصور آفاق ۔ غزل نمبر 420

دکھائی دے نگاہوں کو چراغِ طور کا چہرہ

مرے سرمد کی رعنائی ، مرے منصور کا چہرہ

مسلسل ابر وباراں میں کئی صدیاں گزار آئیں

دمشقِ صبح کی آنکھیں ، فراتِ نور کا چہرہ

جنابِ شیخ کو غلمان کی آنکھیں پسند آئیں

مجھے اچھا لگا اک کھکھلاتی حور کا چہرہ

مری تہذیب کا نغمہ ، اذاں میرے تمدن کی

یہی میلاد کی آنکھیں یہی عاشور کا چہرہ

اندھیری رات سے اُس زلف کوتشبیہ کیسے دوں

بھرا ہے غم کی کالک سے شبِ دیجور کا چہرہ

سنو جنت کے پھولوں سے کہیں بڑھ کر ہے پاکیزہ

کڑکتی دھوپ میں کھلتا ہوا مزدور کا چہرہ

ستم ہے لوگ پاکستان کہتے ہیں اسے منصور

بدلتاہے جہاں اقدار کا دستور کا چہرہ

منصور آفاق

آیا ہے نکل کر یہ سمندر سے ستارہ

دسمبر 1, 2007منصور آفاق،شعراء،غزلپتھر،بھر،برابر،دسمبر،سمندر،صنوبرadmin

منصور آفاق ۔ غزل نمبر 419

اجلا ہے بہت شام کے منظر سے ستارہ

آیا ہے نکل کر یہ سمندر سے ستارہ

یک لخت نگاہوں میں کئی رنگ ہیں آئے

گزرا ہے ابھی میرے برابر سے ستارہ

قسمت کہیں یخ بستہ رویوں میں جمی ہے

نکلا ہی نہیں اپنا دسمبر سے ستارہ

ہر شام نکلتا تھا کسی شاخِ حسیں سے

رکھتا تھا تعلق وہ صنوبر سے ستارہ

تم اندھی جوانی کی کرامات نہ پوچھو

وہ توڑدیا کرتی تھی پتھر سے ستارہ

میں کس طرح لے جاؤں اسے اپنی گلی میں

منصور شناسا ہے جہاں بھر سے ستارہ

منصور آفاق

نقشِ پا اپنے کہیں پر کھوجنا بے فائدہ

دسمبر 1, 2007منصور آفاق،شعراء،غزلناپنا،ڈھالنا،ڈالنا،کھولنا،کھوجنا،گھومنا،پھوٹنا،بولنا،بیٹھنا،بھیگنا،جاگنا،دیکھنا،سوچنا،سامناadmin

منصور آفاق ۔ غزل نمبر 418

اپنے بارے میں کسی سے پوچھنا بے فائدہ

نقشِ پا اپنے کہیں پر کھوجنا بے فائدہ

جا کہیں دفنا دے گزرے موسموں کی میتیں

دیکھ مردہ مسئلوں پر سوچنا بے فائدہ

جب نظر میں صبحِ دوشیزہ کا ہو حسنِ خرام

چاند کی گردن میں باہیں ڈالنا بے فائدہ

کیا تعلق کی لحد پر فاتحہ خوانی کروں

ایک پتھر کے بدن سے بولنا بے فائدہ

اب یہی بہتر ہے دونوں بھول جائیں گزرے دن

اب کہیں کچھ دیر مل کر بیٹھنا بے فائدہ

ہیر کو منصور کھیڑے لے گئے ہیں اپنے ساتھ

آنسوئوں سے اب ستارے ڈھالنا بے فائدہ

تیری خوشبوئے بدن سے ساونی کے رنگ ہیں

تُو نہ ہو تو بارشوں میں بھیگنا بے فائدہ

صبح کے یخ بستہ خالی صحن میں تیرے بغیر

نرم و نازک دھوپ کے پر کھولنا بے فائدہ

جز ترے کیا موجِ دریا، جز ترے کیابادِ شام

تُو نہ ہو تو ساحلوں پر گھومنابے فائدہ

تیرے بن کیا عکس اپنا، تیرے بن تمثال کیا

تُو نہیں تو پانیوں میں دیکھنا بے فائدہ

تیرے ہونے سے یہ گندم کی سنہری بالیاں

ورنہ بیجوں کا تہوں سے پھوٹنا بے فائدہ

تُو نہ ہو توکیا درختوں سے ہوا کی گفتگو

شاخِ گل پہ کونپلوں کا جاگنا بے فائدہ

تُونہ ہو تو راستوں میں بھولنے کا لطف کیا

اب مرا پگڈنڈیوں کو ناپنا بے فائدہ

جز ترے سندر رتیں بے کار ،بے مصرف تمام

تُو نہیں تو موسموں کا سامنا بے فائدہ

منصور آفاق

دل میں ہو غیر تو سجدہِ خاک بے فائدہ

دسمبر 1, 2007منصور آفاق،شعراء،غزلچاک،پوشاک،پیچاک،المناک،ادراک،خاکadmin

منصور آفاق ۔ غزل نمبر 417

جسم نا پاک پر جامہء پاک بے فائدہ

دل میں ہو غیر تو سجدہِ خاک بے فائدہ

صاحبِ فہم ہو توتمہیں اک الف کافی ہے

یہ کتابوں بھرا عقل و ادراک بے فائدہ

آدمی آخری حد ہے تشکیل و تخلیق کی

گردشِ وقت کا گھومتا چاک بے فائدہ

اس کی ساری توجہ رہی اپنی تلوار کی دھار پر

میں نے پہنی ہے زخموں کی پوشاک بے فائدہ

اِس دماغِ شرر خیز میں جھوٹ کے ڈھیر ہیں

تیری دستار کے اتنے پیچاک بے فائدہ

کون سا ا س نے منصور کمرے میں آ جانا ہے

گریۂ شب کا شورِ المناک بے فائدہ

منصور آفاق

روشنی اے روشنی اے روشنی چشم توجہ

دسمبر 1, 2007منصور آفاق،شعراء،غزلکی،گئی،پڑی،بھری،تھی،روشنی،سرسریadmin

منصور آفاق ۔ غزل نمبر 416

قبر سے تاریک تر جیون گلی چشم توجہ

روشنی اے روشنی اے روشنی چشم توجہ

چھپ نہیں سکتا خدا اگلی صدی تک آدمی سے

ہے ابھی افلاک پر کچھ سرسری چشم توجہ

وقتِ رخصت دیر تک جاتی ہوئی بس کا تعاقب

دھول میں پھر کھو گئی اشکوں بھری چشم توجہ

آپ جیسی ایک لڑکی پر لکھی ہے نظم میں نے

اک ذرا سی چاہیے بس آپ کی چشم توجہ

وہ اندھیرا تھا کہ میلوں دور چلتی گاڑیوں کی

روشنی کے ساتھ فوراً چل پڑی چشمِ توجہ

بیل بجی مدھم سروں میں در ہوا وا دھیرے دھیرے

اس کو دیکھا اور پھر پتھرا گئی چشمِ توجہ

اپنے چہرے پر سیاہی تھوپ دے منصور صاحب

اس کی ساری نیگرو کی سمت تھی چشم توجہ

منصور آفاق

جیپ جنگل میں بناتی جا رہی ہے راستہ

دسمبر 1, 2007منصور آفاق،شعراء،غزلملاتی،گراتی،اڑاتی،بناتی،بڑھاتی،بتاتیadmin

منصور آفاق ۔ غزل نمبر 415

پاؤں کی وحشت بچھاتی جا رہی ہے راستہ

جیپ جنگل میں بناتی جا رہی ہے راستہ

احتراماً چل رہا ہوں میں سڑک کے ساتھ ساتھ

اور سڑک ہے کہ بڑھاتی جا رہی ہے راستہ

اک بڑی اونچی پہاڑی رفتہ رفتہ ہاتھ سے

میرے پاؤں میں گراتی جا رہی ہے راستہ

سوچتا ہوں میری پُر آشوب بستی کس لیے

اپنا دریا سے ملاتی جا رہی ہے راستہ

پیچھے پیچھے پاؤں اٹھتے جا رہے ہیں شوق میں

آگے آگے وہ بتاتی جا رہی ہے راستہ

رہ بناتا جا رہا ہوں وقت میں منصور میں

عمر کی آندھی اڑاتی جا رہی ہے راستہ

منصور آفاق

دور تک ہے عزت و ناموس کی قربان گاہ

دسمبر 1, 2007منصور آفاق،شعراء،غزلفانوس،ملبوس،منحوس،مایوس،محسوس،مخصوص،معکوس،ناموس،سوسadmin

منصور آفاق ۔ غزل نمبر 414

ہے محیطِ جاں شبِ محبوس کی قربان گاہ

دور تک ہے عزت و ناموس کی قربان گاہ

بہہ رہا ہے مقتلِ احساس سے تازہ لہو

زندگی ہے عالم محسوس کی قربان گاہ

آ مجھے دے زخم پھر سے ، آ چلا تیغِ ادا

سرخ کر میرے دلِ مایوس کی قربان گاہ

پاؤں پر مہندی لگاسکتی ہے خوں کی ہم نفس

کرچیاں ہوتے ہوئے فانوس کی قربان گاہ

چل رہے ہیں الٹے پاؤں راستوں پرسارے لوگ

یہ نگر ہے منزل معکوس کی قربان گاہ

خوبصورت لوگ بھی اور خوبصورت پھول بھی

خوشبوئوں کے دلربا ملبوس کی قربان گاہ

سعد پل آیا نہیں کوئی کہیں بھی راہ میں

ہر گھڑی ہے ساعتِ منحوس کی قربان گاہ

وہ لگا دی شیخ نے سیدھی جہنم میں چھلانگ

حسن بھی تھامحشرِ مخصوص کی قربان گاہ

پھر انا الحق کی صدائے دلربا تجسیم کر

ڈھونڈھ پھرمنصور دشتِ سوس کی قربان گاہ

منصور آفاق

فوٹو گراف ہوتی ہوئی بات کے بھی دیکھ

دسمبر 1, 2007منصور آفاق،شعراء،غزلملاقات،بات،برسات،حالات،راتadmin

منصور آفاق ۔ غزل نمبر 413

انداز گفتگو کے، مدارات کے بھی دیکھ

فوٹو گراف ہوتی ہوئی بات کے بھی دیکھ

ممکن نہیں ہے قید میں رکھنا چراغ کو

یہ اضطراب اپنی سیہ رات کے بھی دیکھ

بادل پہن لیے ہیں درختوں کے جسم نے

یہ معجزے پہاڑ پہ برسات کے بھی دیکھ

اک آخری امید تھی مٹی میں مل گئی

کچھ روز اب تُو سختیِ حالات کے بھی دیکھ

قربت کی انتہا پہ ہیں صدیوں کے فاصلے

منصور سلسلے یہ ملاقات کے بھی دیکھ

منصور آفاق

صبحِ فلک پہ اب مجھے چلتے ہوئے بھی دیکھ

دسمبر 1, 2007منصور آفاق،شعراء،غزلمچلتے،چلتے،ڈھلتے،پگھلتے،اچھلتے،بدلتے،جلتے،سنبھلتےadmin

منصور آفاق ۔ غزل نمبر 412

جلتی ہوئی چتا سے نکلتے ہوئے بھی دیکھ

صبحِ فلک پہ اب مجھے چلتے ہوئے بھی دیکھ

جس کو بلا کا زعم تھا اپنے مزاج پر

وہ آہنی چٹان پگھلتے ہوئے بھی دیکھ

چھو کر کسی گلاب کو موجِ بدن کے رنگ

بہتی ہوئی ندی میں مچلتے ہوئے بھی دیکھ

اے بادِ تندِ یار تجھے اور کیا کہوں

بجھتے ہوئے چراغ کو جلتے ہوئے بھی دیکھ

پاگل سا ہو گیا تھا جسے دیکھ کر کبھی

اس چودھویں کے چاند کو ڈھلتے ہوئے بھی دیکھ

مجھ کو گرا دیا تھا زمیں پر تو کیا ہوا

سطحِ زمیں سے گیند اچھلتے ہوئے بھی دیکھ

وہ بھی تو ایک پیڑ تھا اپنے نصیب کا

موسم کے ساتھ اس کو بدلتے ہوئے بھی دیکھ

منصور پھر کھڑا ہے خود اپنے ہی پاؤں پر

جو گر گیا تھا اس کو سنبھلتے ہوئے بھی دیکھ

منصور آفاق

مہکے ہوئے بدن کے ذرا حاشیے بھی دیکھ

دسمبر 1, 2007منصور آفاق،شعراء،غزلہوئے،قمقمے،مجھے،مرحلے،کدے،بلبلے،حوصلے،حاشیے،زاویے،سرےadmin

منصور آفاق ۔ غزل نمبر 411

قوسِ قزح کے لکھے ہوئے تبصرے بھی دیکھ

مہکے ہوئے بدن کے ذرا حاشیے بھی دیکھ

رنگوں بھرے لباس کی مہکار پر نہ جا

میرے خیال و خواب کے ویراں کدے بھی دیکھ

تْو نے گرا دیا تھا فلک سے تو اب مجھے

بادِ صبا کے رنگ پہ چلتے ہوئے بھی دیکھ

دونوں طرف وجود ترا ہی کہیں نہ ہو

گردن ذرا گھما کے تُو کُن کے سرے بھی دیکھ

بے شک گلے لگا کے سمندر کو، رو مگر

ساحل کے پاس بنتے ہوئے بلبلے بھی دیکھ

ہر چند تارکول ہے پگھلی ہوئی تمام

میں بھی تو چل رہا ہوں سڑک پر، مجھے بھی دیکھ

سورج مرے قدم ہیں ستارے ہیں میری گرد

تسخیر کائنات کے یہ مرحلے بھی دیکھ

اک دلنواز خواب کی آمد کے آس پاس

آنکھوں میں جھلملاتے ہوئے قمقمے بھی دیکھ

کھینچی ہیں تم نے صرف لکیریں ہوا کے بیچ

بنتے ہوئے خطوط کے یہ زاویے بھی دیکھ

میں جل رہا ہوں تیز ہواؤں کے سامنے

اے شہرِ شب نژاد مرے حوصلے بھی دیکھ

منصور آفاق

ہے ساتھ ساتھ کوئی ہمسفر تسلی رکھ

دسمبر 1, 2007منصور آفاق،شعراء،غزلہمسفر،مختصر،نظر،کر،پر،رہگزرadmin

منصور آفاق ۔ غزل نمبر 410

طویل و تیرہ سہی شب مگر تسلی رکھ

ہے ساتھ ساتھ کوئی ہمسفر تسلی رکھ

اسے گزرنا انہی پتھروں سے ہے آخر

اومیری شوق بھری رہگزر تسلی رکھ

ابھی سے صبحِ جدائی کا خوف کیا کرنا

ہے مہتاب ابھی بام پر تسلی رکھ

کسی کا ساتھ گھڑی دو گھڑی بھی کافی ہے

او زندگی کی رہِ مختصر تسلی رکھ

نہیں نکلتی ترے منظروں سے بینائی

یہیں کہیں ہے ، گرفتِ نظر تسلی رکھ

شکست عشق میں ہوتی نہیں کبھی منصور

یہ ہار ، ہار نہیں ، ہار کر تسلی رکھ

منصور آفاق

یا مجھے اپنے ڈرائنگ روم تک محدود رکھ

دسمبر 1, 2007منصور آفاق،شعراء،غزلچہک،نمک،کھنک،تک،دھمک،دھنکadmin

منصور آفاق ۔ غزل نمبر 409

یا بدن کے سرخ گجروں کی مہک محدود رکھ

یا مجھے اپنے ڈرائنگ روم تک محدود رکھ

دھن کوئی کومل سی بس ترتیب کے لمحے میں ہے

اے محافظ کالے بوٹوں کی دھمک محدود رکھ

سو رہا ہے تیرے پہلو میں کوئی غمگین شخص

چوڑیوں کی رنگ پروردہ کھنک محدود رکھ

باغباں ہر شاخ سے لپٹے ہوئے ہیں زرد سانپ

گھونسلوں تک اپنی چڑیوں کی چہک محدود رکھ

جاگنے لگتے ہیں گلیوں میں غلط فہمی کے خواب

آئینے تک اپنی آنکھوں کی چمک محدود رکھ

لوگ چلنے لگتے ہیں قوسِ قزح کی شال پر

اپنے آسودہ تبسم کی دھنک محدود رکھ

منصور آفاق

یونہی رات رات غزل میں رو، یونہی شعر شعر سسک کے پڑھ

دسمبر 1, 2007منصور آفاق،شعراء،غزلفلک،لہک،مہک،کھنک،کسک،پلک،اٹک،بہک،دھنک،سڑک،سسکadmin

منصور آفاق ۔ غزل نمبر 408

یہی تیرے غم کا کِتھارسس، یونہی چشمِ نم سے ٹپک کے پڑھ

یونہی رات رات غزل میں رو، یونہی شعر شعر سسک کے پڑھ

جو اکائی میں نہیں ذہن کی اسے سوچنے کا کمال کر

یہ شعور نامۂ خاک سن، یہ درود لوحِ فلک کے پڑھ

یہی رتجگوں کی امانتیں ہیں بیاضِ جاں میں رکھی ہوئی

جو لکھے نہیں ہیں نصیب میں وہ ملن پلک سے پلک کے پڑھ

مرے کینوس پہ شفق بھری نہ لکیریں کھینچ ملال کی

کوئی نظم قوسِ قزح کی لکھ کوئی رنگ ونگ دھنک کے پڑھ

ترے نرم سر کا خرام ہو مری روح کے کسی راگ میں

مجھے انگ انگ میں گنگنا، مرا لمس لمس لہک کے پڑھ

یہ بجھا دے بلب امید کے، یہ بہشتِ دیدِ سعید کے

ابھی آسمان کے بورڈ پر وہی زخم اپنی کسک کے پڑھ

او ڈرائیور مرے دیس کے او جہاں نما مری سمت کے

یہ پہنچ گئے ہیں کہاں پہ ہم، ذرا سنگ میل سڑک کے پڑھ

کوئی پرفیوم خرید لا، کوئی پہن گجرا کلائی میں

نئے موسموں کا مشاعرہ کسی مشکبو میں مہک کے پڑھ

ہے کتابِ جاں کا ربن کھلا کسی واڈکا بھری شام میں

یہی افتتاحیہ رات ہے ذرا لڑکھڑا کے، بہک کے پڑھ

یہ ہے ایک رات کا ناولٹ، یہ ہے ایک شام کی سرگزشت

یہ فسانہ تیرے کرم کا ہے، اسے اتنا بھی نہ اٹک کے پڑھ

کئی فاختاؤں کی ہڈیاں تُو گلے میں اپنے پہن کے جا

وہ جو عہد نامۂ امن تھا اسے بزم شب میں کھنک کے پڑھ

منصور آفاق

قرار دیں ہمیں کافر روایتیں پڑھ پڑھ

دسمبر 1, 2007منصور آفاق،شعراء،غزلہدایتیں،نہایتیں،کفایتیں،حمایتیں،حکایتیں،روایتیں،رعایتیں،شکایتیں،عنایتیں،غایتیںadmin

منصور آفاق ۔ غزل نمبر 407

وہ جھوٹ بولتے پھرتے ہیں آیتیں پڑھ پڑھ

قرار دیں ہمیں کافر روایتیں پڑھ پڑھ

یہ چاہتے ہیں کہ کچھ دن گزاریں مرضی سے

جی تھک گیا ہے فلک کی ہدایتیں پڑھ پڑھ

شکار ہونا ہے احساسِ کمتری کا ہمیں

عجائباتِ جہاں کی حکایتیں پڑھ پڑھ

یہ لگ رہا ہے کہ جبریل اپنے اندر ہے

ورق ورق پہ اترتی عنایتیں پڑھ پڑھ

یہ ارتقاء کا تماشا ابھی ادھورا ہے

خیال آتا ہے ہستی کی غایتیں پڑھ پڑھ

یہ سوچتے ہیں ازل کتنا خوبصورت تھا

تباہ حال ابد کی نہایتیں پڑھ پڑھ

خزاں رسیدہ ہواکے خلاف ہونا تھا

گرے ہوئے کی مسلسل شکایتیں پڑھ پڑھ

حسابِ خرچۂ تدفین کر رہے ہیں ہم

بنک کاروں کی بھیجی کفایتیں پڑھ پڑھ

اے اہل کوفہ ہمیں یاد کربلا آئے

خطوط میں یہ ہزاروں حمایتیں پڑھ پڑھ

بڑھا سکے ہیں نہ قوت خرید کی منصور

ہر ایک چیز پہ اتنی رعایتیں پڑھ پڑھ

منصور آفاق

پڑا ہے شیخ کا پھر گنبدِ ہوس پہ وہ ہاتھ

دسمبر 1, 2007منصور آفاق،شعراء،غزلہوس،قفس،قصص،میٹرس،چس،کارنس،برسadmin

منصور آفاق ۔ غزل نمبر 406

جو پھیرتا تھا تہجد کے کینوس پہ وہ ہاتھ

پڑا ہے شیخ کا پھر گنبدِ ہوس پہ وہ ہاتھ

بنا رہا ہے جو قوسِ قزح کی تصویریں

دکھائی دے مجھے بادل کے کارنس پہ وہ ہاتھ

نگار خانۂ جاں کی نمائشِ کُن میں

لکیر کھینچ رہا ہے برس برس پہ وہ ہاتھ

یہ سوچتے ہوئے میری کہاں علامت ہے

کبھی پروں پہ رکھے وہ ،کبھی قفس پہ وہ ہاتھ

کسی کو خواب میں شایدپکڑ رکھا تھا کہیں

جمے ہوئے تھے مسہری کے میٹرس پہ وہ ہاتھ

عجیب بجلیاں بھر دیں ، عجیب کیف دیا

بنامِ زندگی ،ہائے اک ایک نس پہ وہ ہاتھ

نئے وصال دکھاتی ہے رات بھر منصور

کچھ ایسے رکھتی ہے گزرے ہوئے قصص پہ وہ ہاتھ

منصور آفاق

پھر بھی میں ہوں جلتی بجھتی روشنی کے ساتھ ساتھ

دسمبر 1, 2007منصور آفاق،شعراء،غزلپات،برسات،حالات،ذات،ساتھadmin

منصور آفاق ۔ غزل نمبر 405

چل رہی ہے زندگی کی اک بھیانک رات ساتھ

پھر بھی میں ہوں جلتی بجھتی روشنی کے ساتھ ساتھ

میں نے سوچا کیا کہیں گے میرے بچپن کے رفیق

اور پھر رختِ سفر میں رکھ لیے حالات ساتھ

میں اکیلا رونے والا تو نہیں ہوں دھوپ میں

دے رہی ہے کتنے برسوں سے مرا برسات ساتھ

چاہیے تھا صرف تعویذِ فروغِ کُن مجھے

دے دیا درویش نے اذنِ شعورِ ذات ساتھ

یہ خزاں زادے کہیں کیا گل رتوں کے مرثیے

یونہی بے مقصد ہواؤں کے ہیں سوکھے پات ساتھ

ایک بچھڑے یار کی پرسوز یادوں میں مگن

کوئی بگلا چل رہا تھا پانیوں کے ساتھ ساتھ

منصور آفاق

روشنی سے بنی کوئی شے تھی کہیں

دسمبر 1, 2007منصور آفاق،شعراء،غزللے،نے،کی،پی،شے،طےadmin

منصور آفاق ۔ غزل نمبر 404

آگ تھی رنگ تھے اور مے تھی کہیں

روشنی سے بنی کوئی شے تھی کہیں

سو گئی رات کے سائے گنتی ہوئی

جو ملاقات گلیوں میں طے تھی کہیں

میرے جیسا کوئی اور بیلے میں تھا

بانسری کی فسردہ سی لے تھی کہیں

شور تھا شہر میں عشق کاہر طرف

کوئی تازہ محبت کی نے تھی کہیں

اس کے اندر اترنا ہے گہرائی تک

سیکھتا جا کے ہوں ٹیلی پیتھی کہیں

جگمگاتی پھرے عشقِ منصور میں

کوئی سیتی کہیں کوئی کیتھی کہیں

منصور آفاق

تری گلی سے جو نکلے تو پھر رہے نہ کہیں

دسمبر 1, 2007منصور آفاق،شعراء،غزللے،مقبرے،ملے،مراسلے،ڈوبتے،کہے،کے،کرے،گئے،تبصرے،دوسرے،دے،رہے،رکے،سلسلےadmin

منصور آفاق ۔ غزل نمبر 403

کسی کے جسم سے مل کر کبھی بہے نہ کہیں

تری گلی سے جو نکلے تو پھر رہے نہ کہیں

عجیب رابطہ اپنے وجود رکھتے تھے

نکل کے تجھ سے تو خود میں بھی ہم رہے نہ کہیں

اسے تو پردے کے پیچھے بھی خوف ہے کہ مری

نظر نقاب پہ چہرہ لکیر لے نہ کہیں

بس اس خیال سے منزل پہن لی پاؤں نے

ہمارے غم میں زمانہ سفر کرے نہ کہیں

تمام عمر نہ دیکھا بری نظر سے اسے

یہ سوچتے ہوئے دنیا برا کہے نہ کہیں

اے آسمان! ذرا دیکھنا کہ دوزخ میں

گرے پڑے ہوں زمیں کے مراسلے نہ کہیں

ڈرا دیا کسی خودکُش خیال نے اتنا

ٹکٹ خرید رکھے تھے مگر گئے نہ کہیں

کئی دنوں سے اداسی ہے اپنے پہلو میں

ہمارے بیچ چلے آئیں دوسرے نہ کہیں

ہر اک مقام پہ بہکی ضرور ہیں نظریں

تری گلی کے علاوہ قدم رکے نہ کہیں

ہم اپنی اپنی جگہ پر سہی اکائی ہیں

ندی کے دونوں کنارے کبھی ملے نہ کہیں

ترے جمال پہ حق ہی نہیں تھا سو ہم نے

کیے گلاب کے پھولوں پہ تبصرے نہ کہیں

کبھی کبھار ملاقات خود سے ہوتی ہے

تعلقات کے پہلے سے سلسلے نہ کہیں

ہر ایک آنکھ ہمیں کھینچتی تھی پانی میں

بھلا یہ کیسے تھا ممکن کہ ڈوبتے نہ کہیں

اداس چاندنی ہم سے کہیں زیادہ تھی

کھلے دریچے ترے انتظار کے نہ کہیں

بس ایک زندہ سخن کی ہمیں تمنا ہے

بنائے ہم نے کتابوں کے مقبرے نہ کہیں

بدن کو راس کچھ اتنی ہے بے گھری اپنی

کئی رہائشیں آئیں مگر رہے نہ کہیں

دھواں اتار بدن میں حشیش کا منصور

یہ غم کا بھیڑیا سینہ ہی چیر دے نہ کہیں

منصور آفاق

کوئی اپنے دئیے جلائے کہیں

دسمبر 1, 2007منصور آفاق،شعراء،غزلآئے،آزمائے،جلائے،جائے،سرائے،سرسرائےadmin

منصور آفاق ۔ غزل نمبر 402

شب کہیں اور شب کے سائے کہیں

کوئی اپنے دئیے جلائے کہیں

ہے کہیں انتظارِ گاہِ حیات

اور ہے موت کی سرائے کہیں

کانچ سے بھی زیادہ نازک ہے

سنگ دل ، دل تو آزمائے کہیں

شخصیت کا یہ خول رہنے دے

میری رائے بدل نہ جائے کہیں

ہرطرف راستے ہیں گلیاں ہیں

گھر کوئی بھی نظر نہ آئے کہیں

جاگ اٹھیں نہ رات کی آنکھیں

کوئی سایہ سا سرسرائے کہیں

دونوں عالم کو خوف ہے منصور

خاک کا دل نہ ٹوٹ جائے کہیں

منصور آفاق

ایک سناٹا ہے گھر میں اور تو کچھ بھی نہیں

دسمبر 1, 2007منصور آفاق،شعراء،غزلمعتبر،نگر،گھر،بھر،جگر،دوپہر،سفر،سحرadmin

منصور آفاق ۔ غزل نمبر 401

خوف سا ہے بام و در میں اور تو کچھ بھی نہیں

ایک سناٹا ہے گھر میں اور تو کچھ بھی نہیں

کچھ نمک ہے زخم کا ، کچھ روشنی ہے یاد کی

چشمِ غم کی بوند بھر میں اور تو کچھ بھی نہیں

یاد کا ہے سائباں اور زندگی کی دھوپ ہے

اس ستم گر دوپہر میں اور تو کچھ بھی نہیں

ان کی رخشاں مسکراہٹ حاملِ صد مہر و مہ

ایک سورج ہے سحر میں اور تو کچھ بھی نہیں

ان سے رک سکتے ہیں کب دیوانگانِکوئے یار

کچھ بلائیں ہیں سفر میں اور تو کچھ بھی نہیں

ان کی چاہت کے سوا تاریک ہے فردِ عمل

داغ ہیں قلب و جگر میں اور تو کچھ بھی نہیں

گنبدِ خضرا کا ہر ذرہ بہشت آباد ہے

دہر کے دوزخ نگر میں اور تو کچھ بھی نہیں

نازشِ تخلیق ہے آفاق میں بس ایک ذات

میری فکرِ معتبر میں اور تو کچھ بھی نہیں

منصور آفاق

اور کرنوں کی طرح ہاتھ میں آئے بھی نہیں

دسمبر 1, 2007منصور آفاق،شعراء،غزلآئے،بنائے،جلائے،جگائے،سائےadmin

منصور آفاق ۔ غزل نمبر 400

وہ بدن کون ہے کچھ اپنا بتائے بھی نہیں

اور کرنوں کی طرح ہاتھ میں آئے بھی نہیں

دور تک برف بھری رات کے سناٹے ہیں

شہر میں یادکے ڈھلتے ہوئے سائے بھی نہیں

وصل خاموش بھی پُرشوربھی اپنے اندر

آگ محسوس بھی ہو اور جلائے بھی نہیں

کینوس میں مرے رنگوں کو رکھے قید کوئی

اورتصویر تعلق کی بنائے بھی نہیں

کوئی منصورمرے بسترِ آباد کے بیچ

مجھ کو بھی سونے بھی نہ دے اور جگائے بھی نہیں

منصور آفاق

پہلے تُو تھا مگر اب کوئی نہیں

دسمبر 1, 2007منصور آفاق،شعراء،غزلاب،بلب،جب،رب،شب،طلب،عجبadmin

منصور آفاق ۔ غزل نمبر 399

اور جینے کا سبب کوئی نہیں

پہلے تُو تھا مگر اب کوئی نہیں

صرف اک جاں سے گزرنا ہے مجھے

مجھ سا بھی سہل طلب کوئی نہیں

خواہشِ رزق درندوں کی طرح

جیسے اس شہر کا رب کوئی نہیں

وقت کیفیتِ برزخ میں ہے

کوئی سورج، کوئی شب، کوئی نہیں

ایک تعزیتی خاموشی ہے

شہر میں مہر بلب کوئی نہیں

وصل کی رات بھی تنہا میں تھا

میرے جیسا بھی عجب کوئی نہیں

کیوں گزرتا ہوں وہاں سے منصور

اس گلی میں مرا جب کوئی نہیں

منصور آفاق

تُو جہاں ہے کوئی موجود وہاں ہے کہ نہیں

دسمبر 1, 2007منصور آفاق،شعراء،غزلنہاں،وہاں،یہاں،کہاں،جہاں،دھاںadmin

منصور آفاق ۔ غزل نمبر 398

آسماں ! بول کہ اُس پار جہاں ہے کہ نہیں

تُو جہاں ہے کوئی موجود وہاں ہے کہ نہیں

اس خلاباز کی آواز میں سناٹے تھے

چاند پر جس نے کہا ’کوئی یہاں ہے کہ نہیں

مجھ میں موجود ہے کیسے ،یہ سمجھنا ہے ابھی

یہ سوال اور ہے ذرہ میں کہاں ہے کہ نہیں

کوئی لوٹا ہی نہیں روح کے تہہ خانے سے

کیسے معلوم ہو وہ مجھ میں نہاں ہے کہ نہیں

سو گئی تھی جو زرِ فاحشہ کے بستر میں

وہ سپہ آج کفِ شعلہ دھاں ہے کہ نہیں

پھر نکل عرشِ محبت کے سفر پر منصور

پہلے یہ دیکھ وہاں جان جہاں ہے کہ نہیں

منصور آفاق

اس جہنم میں کوئی باغ جناں ہے کہ نہیں

دسمبر 1, 2007منصور آفاق،شعراء،غزلمکاں،نشاں،کنواں،بارگراں،جناں،دھواںadmin

منصور آفاق ۔ غزل نمبر 397

اپنی بستی میں کہیں امن و اماں ہے کہ نہیں

اس جہنم میں کوئی باغ جناں ہے کہ نہیں

حلقہ زن ہوکے درِ دل پہ پکارے کوئی

زندگی تیرے لئے بارگراں ہے کہ نہیں

جس میں شہزادیاں سوئی تھیں بوقت تقسیم

اب وہ بستی میں تری اندھا کنواں ہے کہ نہیں

جو کسی کو بھی برہنہ نہیں ہونے دیتا

آسماں پر وہ سیہ پوش دھواں ہے کہ نہیں

خانۂ خاک تو آباد بتانِ زر سے

آسماں پر بھی کہیں تیرا مکاں ہے کہ نہیں

میرے جیسوں کو بتاتا ہے جو رستے کا پتہ

اُس ستارے کا کہیں نام و نشاں ہے کہ نہیں

منصور آفاق

یہ عمل تو پارسائی میں نہیں

دسمبر 1, 2007منصور آفاق،شعراء،غزلکلائی،گدائی،پارسائی،اکائی،خدائی،رسائیadmin

منصور آفاق ۔ غزل نمبر 396

درد کیوں چہرہ نمائی میں نہیں

یہ عمل تو پارسائی میں نہیں

آسماں ہیں میرے اندر ہی کہیں

ہاں مگر میری رسائی میں نہیں

فاقہ مستی کائناتوں پر محیط

معجزہ کوئی گدائی میں نہیں

میرے بنجاروں تمہاری خیر ہو

ایک بھی چوڑی کلائی میں نہیں

وقت میری وحدتوں میں ہے مقیم

میں زمانے کی اکائی میں نہیں

صرف میں منصور اک موجود ہوں

کوئی بھی پوری خدائی میں نہیں

منصور آفاق

میں ہجومِ ریشم و کمخواب میں رہتا نہیں

دسمبر 1, 2007منصور آفاق،شعراء،غزلمہتاب،کمخواب،آداب،اسباب،شادابadmin

منصور آفاق ۔ غزل نمبر 395

دھوپ میں پھرتا ہوں دن بھر خواب میں رہتا نہیں

میں ہجومِ ریشم و کمخواب میں رہتا نہیں

ہے مناسب بے کسی کی کوٹھری میرے لئے

غم پہن کر میں شبِ مہتاب میں رہتا نہیں

کھل کے روتا ہوں ہمیشہ بادلوں کے ساتھ میں

یونہی ہجراں کے ادب آداب میں رہتا نہیں

ایک صحرا ہے مرے چاروں طرف پھیلا ہوا

میں مری جاں ! قریۂ شاداب میں رہتا نہیں

ہر طرف بکھری ہوئی منصور ویرانی سی ہے

میں مکاں کے عالمِ اسباب میں رہتا نہیں

منصور آفاق

بندوق کے سلوٹ کوئی دیکھتا نہیں

دسمبر 1, 2007منصور آفاق،شعراء،غزلپھوٹ،بوٹ،جھوٹ،روٹ،سلوٹ،سوٹadmin

منصور آفاق ۔ غزل نمبر 394

تاریخ ساز ’’لوٹ‘‘ کوئی دیکھتا نہیں

بندوق کے سلوٹ کوئی دیکھتا نہیں

رقصاں ہیں ایڑیوں کی دھنوں پر تمام لوگ

کالے سیاہ بوٹ کوئی دیکھتا نہیں

انصاف گاہ ! تیرے ترازو کے آس پاس

اتنا سفید جھوٹ کوئی دیکھتا نہیں

چکلالہ چھاؤنی کی طرف ہے تمام رش

اسلام آباد روٹ کوئی دیکھتا نہیں

طاقت کے آس پاس حسیناؤں کا ہجوم

میرا عوامی سوٹ کوئی دیکھتا نہیں

سب دیکھتے ہیں میری نئی کار کی طرف

چہرے کی ٹوٹ پھوٹ کوئی دیکھتا نہیں

منصور آفاق

کوئی تمہیدِ انقلاب نہیں

دسمبر 1, 2007منصور آفاق،شعراء،غزلکتاب،انقلاب،ثواب،جواب،حجاب،خواب،خرابadmin

منصور آفاق ۔ غزل نمبر 393

اپنی نیندوں میں کوئی خواب نہیں

کوئی تمہیدِ انقلاب نہیں

ساحلوں پر برہنہ جوڑے ہیں

پر کوئی آنکھ بے حجاب نہیں

ہم سفر احتیاط، میرا بدن

نیکیوں کی کوئی کتاب نہیں

کچھ دنوں سے بجا ہے شب کا ایک

اور گھڑیال بھی خراب نہیں

عمر گزری ہے ایک کمرے میں

پھر بھی ہم رنگ اپنے خواب نہیں

کس لیے ذہن میں در آتے ہیں

جن سوالات کے جواب نہیں

آنکھ بھی خالی ہو گئی منصور

اور گٹھڑی میں بھی ثواب نہیں

منصور آفاق

ہو بھی جاؤ جو کسی اورکا ہونا ہے تمہیں

دسمبر 1, 2007منصور آفاق،شعراء،غزلہونا،چبھونا،ڈبونا،کونا،کھونا،کاکھلونا،پرونا،بچھونا،بونا،بھگونا،دھونا،سمونا،سوچاadmin

منصور آفاق ۔ غزل نمبر 392

یہی دوچار برس آنکھ نے رونا ہے تمہیں

ہو بھی جاؤ جو کسی اورکا ہونا ہے تمہیں

آخری بات کہ کس وقت ملیں گے کل ہم

مجھ کو معلوم ہے اب رات ہے ، سونا ہے تمہیں

یاد رکھنا کہ تمہیں چارہ گری کرنی ہے

زخم سینے ہیں مرے ،چاک پرونا ہے تمہیں

کیا گزاروگے اسی خیمہ ء افلاک میں رات

کیا بنانا یہی فٹ پاتھ بچھونا ہے تمہیں

کوئی خودکُش سا دھماکہ بھی ضروری ہے وہاں

جلدی سے جائے وقوعہ کو بھی دھونا ہے تمہیں

تم سے پہلوں نے جہاں اپنے قدم رکھے تھے

اسی آسیب زدہ غار میں کھونا ہے تمہیں

روح تک دیکھنے کی تم میں بصارت ہی نہیں

صرف کافی یہی مٹی کاکھلونا ہے تمہیں

سرخ فوارہ کی دھاروں کے دمادم کی قسم

رات کی چھاتی میں بس تیر چبھونا ہے تمہیں

دیکھنے ہیں مجھے جذبوں کی صراحی کے خطوط

میں نے وہسکی سے کسی روز بھگونا ہے تمہیں

صرف ہم نصف کے مالک ہیں بحکمِ ربی

فصل بھی کاٹنی ہے بیج بھی بونا ہے تمہیں

میری باہو سے ملاقات ہے ہونے والی

زندگی !’’ ہو‘‘ کے سمندر میں ڈبونا ہے تمہیں

تم پرندے ہو کسی وقت بھی اڑسکتے ہو

ساتھ رکھنے کے لئے جاں میں سمونا ہے تمہیں

جس میں چلتی چلی جاتی ہے قیامت منصور

اُس دوپٹے کا پکڑنا کوئی کونا ہے تمہیں

منصور آفاق

خوف دونوں طرف ایک لمحے کی تا خیر کے ہیں

دسمبر 1, 2007منصور آفاق،شعراء،غزلتحریر،تصویر،تعمیر،خیر،زنجیرadmin

منصور آفاق ۔ غزل نمبر 391

ایٹمی جنگ میں سوختہ خواب تسخیر کے ہیں

خوف دونوں طرف ایک لمحے کی تا خیر کے ہیں

وقت کی گیلری میں مکمل ہزاروں کی شکلیں

صرف ٹوٹے ہوئے خال و خد میری تصویر کے ہیں

شہر بمبار طیارے مسمار کرتے رہیں گے

شوق دنیا کو تازہ مکانوں کی تعمیر کے ہیں

ایک مقصد بھری زندگی وقت کی قید میں ہے

پاؤں پابند صدیوں سے منزل کی زنجیر کے ہیں

ایک آواز منصور کاغذ پہ پھیلی ہوئی ہے

میرے سناٹے میں شور خاموش تحریر کے ہیں

منصور آفاق

یہ بغیر تاروں کے بلب آن کیسے ہیں

دسمبر 1, 2007منصور آفاق،شعراء،غزلمکان،نشان،کان،گمان،آن،آسمان،خان،زبان،سائبان،ساربانadmin

منصور آفاق ۔ غزل نمبر 390

تیرا چہرہ کیسا ہے میرے دھیان کیسے ہیں

یہ بغیر تاروں کے بلب آن کیسے ہیں

خواب میں اسے ملنے کھیت میں گئے تھے ہم

کارپٹ پہ جوتوں کے یہ نشان کیسے ہیں

بولتی نہیں ہے جو وہ زبان کیسی ہے

یہ جو سنتے رہتے ہیں میرے کان کیسے ہیں

روکتے ہیں دنیا کو میری بات سننے سے

لوگ میرے بارے میں بد گمان کیسے ہیں

کیا ابھی نکلتا ہے ماہ تاب گلیوں میں

کچھ کہو میانوالی آسمان کیسے ہیں

کیا ابھی محبت کے گیت ریت گاتی ہے

تھل کی سسی کیسی ہے پنوں خان کیسے ہیں

کیا قطار اونٹوں کی چل رہی ہے صحرا میں

گھنٹیاں سی بجتی ہیں ، ساربان کیسے ہیں

چمنیوں کے ہونٹوں سے کیا دھواں نکلتا ہے

خالی خالی برسوں کے وہ مکان کیسے ہیں

دیکھتا تھا رم جھم سی بیٹھ کر جہاں تنہا

لان میں وہ رنگوں کے سائبان کیسے ہیں

اب بھی وہ پرندوں کو کیا ڈراتے ہیں منصور

کھیت کھیت لکڑی کے بے زبان کیسے ہیں

منصور آفاق

یعنی ماہتابوں کے گھر بدلتے رہتے ہیں

دسمبر 1, 2007منصور آفاق،شعراء،غزلور،گھر،پر،سرadmin

منصور آفاق ۔ غزل نمبر 389

کھڑکیاں بدلتی ہیں ، در بدلتے رہتے ہیں

یعنی ماہتابوں کے گھر بدلتے رہتے ہیں

موسموں کی تبدیلی معجزے دکھاتی ہے

جسم ایک رہتا ہے سر بدلتے رہتے ہیں

وہ بچھڑ بھی سکتا ہے، میں بدل بھی سکتا ہوں

کیا کریں محبت کے ڈر بدلتے رہتے ہیں

کائنات کا پنجرہ کوئی در نہیں رکھتا

اور ہم پرندوں کے پر بدلتے رہتے ہیں

ارتقاء کے پردے میں کیا عجیب صورت ہے

ہم نہیں بدل سکتے، پر، بدلتے رہتے ہیں

منصور آفاق

قسم خدا کی ۔۔ جہنم رسید ہوتے ہیں

دسمبر 1, 2007منصور آفاق،شعراء،غزلفرید،مزید،یزید،کشید،جدید،رسید،شدیدadmin

منصور آفاق ۔ غزل نمبر 388

یہ مسجدوں میں جوخود کُش شہید ہوتے ہیں

قسم خدا کی ۔۔ جہنم رسید ہوتے ہیں

طلب بھی پاتی ہے ترتیب ٹیلی ویژ ن سے

جہاں کو دیکھ کے ہم بھی جدید ہوتے ہیں

ہر اک دور کا اک شاہ حسین ہوتا ہے

ہرایک دور میں خواجہ فرید ہوتے ہیں

نکل کے گھر سے یونہی رات رات چلتا ہوں

بڑے ہی یا د کے حملے شدید ہوتے ہیں

یزید کوئی بھی ہوتا نہیں حسین مزاج

حسین نام کے لیکن یزید ہوتے ہیں

میں جتنی کرتا ہوں کوشش درست کرنے کی

خراب اتنے مسائل مزید ہوتے ہیں

نکلتی ہے یہ مصائب سے شاعری منصور

یہ مصرعے خونِ جگرسے کشید ہوتے ہیں

منصور آفاق

نور کے گیت کہاں تیرہ شباں سنتے ہیں

دسمبر 1, 2007منصور آفاق،شعراء،غزلگماں،گراں،اذاں،بیاں،رواں،شباںadmin

منصور آفاق ۔ غزل نمبر 387

رات کا شور، اندھیروں کی زباں سنتے ہیں

نور کے گیت کہاں تیرہ شباں سنتے ہیں

ایک سقراط نے زنجیر بپا آنا ہے

دوستو آؤ عدالت میں بیاں سنتے ہیں

کیوں پلٹتی ہی نہیں کوئی صدا کوئی پکار

یہ تو طے تھا کہ مرے چارہ گراں سنتے ہیں

اب بدلنی ہے شب و روز کی تقویم کہ لوگ

شام کے وقت سویرے کی اذاں سنتے ہیں

ایسے منفی تو لب و دیدہ نہیں ہیں اس کے

کچھ زیادہ ہی مرے وہم و گماں سنتے ہیں

بات کرتی ہے ہوا میری نگہ سے منصور

اور رک رک کے مجھے آبِ رواں سنتے ہیں

منصور آفاق

برف کے لوگ کوئی بات کہاں سنتے ہیں

دسمبر 1, 2007منصور آفاق،شعراء،غزلہاں،نہاں،وہاں،یہاں،کہاں،جہاںadmin

منصور آفاق ۔ غزل نمبر 386

جمع ہو جاتے ہیں سورج کا جہاں سنتے ہیں

برف کے لوگ کوئی بات کہاں سنتے ہیں

ایک آسیب ہے اس شخص کی رعنائی بھی

خوشبوئیں بولتی ہیں رنگ وہاں سنتے ہیں

ایک ویرانہ ہے، قبریں ہیں ، خموشی ہے مگر

دل یہ کہتا ہے کہ کچھ لوگ یہاں سنتے ہیں

زندگی ان کی شہیدوں کی طرح ہے شاید

آنکھ رکھتے ہیں شجر، بات بھی، ہاں ! سنتے ہیں

تخت گرتے ہیں تو یاد آتی ہے اپنی ورنہ

ہم فقیروں کی کہاں شاہ جہاں سنتے ہیں

بیٹھ کر ہم بھی ذرا ذاتِ حرا میں منصور

وہ جو آواز ہے سینے میں نہاں ، سنتے ہیں

منصور آفاق

شہر میں گندم و بارود بہم گرتے ہیں

دسمبر 1, 2007منصور آفاق،شعراء،غزلہم،قدم،کم،بہم،علم،غمadmin

منصور آفاق ۔ غزل نمبر 385

من و سلویٰ لیے ا فلاک سے بم گرتے ہیں

شہر میں گندم و بارود بہم گرتے ہیں

فتح مندی کی خبر آتی ہے واشنگٹن سے

اور لاہور کے ۸۷یہر روز علم گرتے ہیں

زرد پتے کی کہانی تو ہے موسم پہ محیط

ٹوٹ کے روز کہیں شاخ سے ہم گرتے ہیں

رقص ویک اینڈ پہ جتنا بھی رہے تیز مگر

طے شدہ وقت پہ لوگوں کے قدم گرتے ہیں

شہر کی آخری خاموش سڑک پر جیسے

میرے مژگاں سے سیہ رات کے غم گرتے ہیں

جانے کیا گزری ہے اس دل کے صدف پر منصور

ایسے موتی تو مری آنکھ سے کم گرتے ہیں

منصور آفاق

جہاں رہنا نہیں ہوتا وہاں پر گھر بناتے ہیں

دسمبر 1, 2007منصور آفاق،شعراء،غزلمنظر،گوہر،گھر،پر،بہتر،دلبرadmin

منصور آفاق ۔ غزل نمبر 384

یونہی ہم بستیوں کو خوبصورت تر بناتے ہیں

جہاں رہنا نہیں ہوتا وہاں پر گھر بناتے ہیں

بنا کر فرش سے بستر تلک ٹوٹی ہوئی چوڑی

گذشتہ رات کا تصویر میں منظر بناتے ہیں

لکھا ہے اس نے لکھ بھیجو شبِ ہجراں کی کیفیت

چلو ٹھہرے ہوئے دریا کو کاغذ پر بناتے ہیں

سمندر کے بدن جیسا ہے عورت کا تعلق بھی

لہو کی آبدوزوں کے سفر گوہر بناتے ہیں

مکمل تجربہ کرتے ہیں ہم اپنی تباہی کا

کسی آوارہ دوشیزہ کو اب دلبر بناتے ہیں

شرابوں نے دیا سچ بولنے کا حوصلہ منصور

غلط موسم مجھے کردار میں بہتر بناتے ہیں

منصور آفاق

آنکھ کے ایک کنارے پر رک جاتے ہیں

دسمبر 1, 2007منصور آفاق،شعراء،غزلہمارے،کنارے،اشارے،دھارے،ستارےadmin

منصور آفاق ۔ غزل نمبر 383

ٹوٹنے والے تارے پر رک جاتے ہیں

آنکھ کے ایک کنارے پر رک جاتے ہیں

وقت کی تیز ٹریفک چلتی رہتی ہے

ہم ہی سرخ اشارے پر رک جاتے ہیں

جب میں سطحِ آب پہ چلتا پھرتا ہوں

دیکھ کے لوگ کنارے پر رک جاتے ہیں

ہم ایسوں کے کون مقابل آئے گا

ہم طوفان کے دھارے پر رک جاتے ہیں

روز نکلتے ہیں مہتاب نگر میں ہم

لیکن ایک ستارے پر رک جاتے ہیں

اڑتے اڑتے گر پڑتے ہیں آگ کے بیچ

شام کے وقت ہمارے پر رک جاتے ہیں

منصور آفاق

عمر کی جیپ کے ٹائر تلے آئے ہوئے ہیں

دسمبر 1, 2007منصور آفاق،شعراء،غزلنئے،کے،کھیلنے،بڑے،بھلے،بھونکنے،بھیڑیے،تلے،دیکھنے،روکنے،سے،سانحےadmin

منصور آفاق ۔ غزل نمبر 382

جسم پر نقش گئے وقت کے آئے ہوئے ہیں

عمر کی جیپ کے ٹائر تلے آئے ہوئے ہیں

ہم سمجھتے ہیں بہت، لہجے کی تلخی کو مگر

تیرے کمرے میں کسی کام سے آئے ہوئے ہیں

دیکھ مت بھیج یہ میسج ہمیں موبائل پر

ہم کہیں دور بہت روٹھ کے آئے ہوئے ہیں

ہم نہیں جانتے روبوٹ سے کچھ وصل وصال

ہم ترے چاند پہ شاید نئے آئے ہوئے ہیں

پھر پگھلنے کو ہے بستی کوئی ایٹم بم سے

وقت کی آنکھ میں کچھ سانحے آئے ہوئے ہیں

ڈھونڈنے کے لیے گلیوں میں کوئی عرش نشیں

تیرے جیسے تو فلک سے بڑے آئے ہوئے ہیں

ہم سے چرواہوں کو تہذیب سکھانے کے لیے

دشت میں شہر سے کچھ بھیڑیے آئے ہوئے ہیں

کیا کریں اپنی رندھی ، زرد ، فسردہ آواز

غول کے غول یہاں بھونکنے آئے ہوئے ہیں

تجھ سے کچھ لینا نہیں ، دیکھ ! پریشان نہ ہو

ہم یہاں گزری رتیں دیکھنے آئے ہوئے ہیں

تھوڑی تھوڑی سی خوشی بانٹنے والے شاید

کوئی تبدیلی بڑی روکنے آئے ہوئے ہیں

اتنا کافی ہے تجھے بات سمجھنے کیلئے

ہم یہاں آئے نہیں ہیں بھلے آئے ہوئے ہیں

ہم محبت کے کھلاڑی ہیں سنوکر کے نہیں

کھیل منصور یونہی کھیلنے آئے ہوئے ہیں

منصور آفاق

دکھ ہمیں بھی ہوتا ہے آدمی تو ہم بھی ہیں

دسمبر 1, 2007منصور آفاق،شعراء،غزلفلسفی،ہتھکڑی،نمی،کلی،کسی،گلی،گھڑی،آخری،آدمی،ابھی،اجنبی،بھری،بانسری،تشنگی،روشنی،سنسنی،سی،شبنمیadmin

منصور آفاق ۔ غزل نمبر 381

دیکھتے لپک تیرے طنز کی تو ہم بھی ہیں

دکھ ہمیں بھی ہوتا ہے آدمی تو ہم بھی ہیں

کھلتے کھلتے کھلتے ہیں اپنی اپنی دنیا میں

تم اگر تجسس ہو سنسنی تو ہم بھی ہیں

تم سہی سیہ بدلی آنسوئوں کے موسم کی

آس پاس مژگاں کے کچھ نمی تو ہم بھی ہیں

عشق کی شریعت میں کیا جو قیس پہلے تھے

ہجر کی طریقت میں آخری تو ہم بھی ہیں

جانتے ہیں دنیا کو درد کا سمندر ہے

اور اس سمندر میں اک گلی تو ہم بھی ہیں

پیڑ سے تعلق تو ٹوٹ کے بھی رہتا ہے

سوختہ سہی لیکن شبنمی تو ہم بھی ہیں

دو گھڑی کا قصہ ہے زندگی محبت میں

دو گھڑی تو تم بھی ہو دو گھڑی تو ہم بھی ہیں

جیل کی عمارت ہے عاشقی کی صحبت بھی

بیڑیاں اگر تم ہو ہتھکڑی تو ہم بھی ہیں

نام وہ ہمارا پھر اک کرن کے ہونٹوں پر

وقت کے ستارے پر۔ ہاں ابھی تو ہم بھی ہیں

کیا ہوا جو ہجراں کی رہ رہے ہیں مشکل میں

یار کے شبستاں میں یاد سی تو ہم بھی ہیں

دیدنی زمانے میں بے خبر بہاروں سے

گلستانِ حیرت کی اک کلی تو ہم بھی ہیں

مانا عشق کرنے کا کچھ پتہ نہیں تم کو

دلبری کی بستی میں اجنبی تو ہم بھی ہیں

یہ الگ گوارا ہم وقت کو نہیں لیکن

جس طرح کے ہوتے ہیں آدمی تو ہم بھی ہیں

کربلا کی وحشت سے، سلسلہ نہیں لیکن

ساحلوں پہ دریا کے تشنگی تو ہم بھی ہیں

ہیر تیرے بیلے میں آنسوئوں کے ریلے میں

خالی خالی بیلے میں بانسری تو ہم بھی ہیں

تم چلو قیامت ہو تم چلو مصیبت ہو

بے بسی تو ہم بھی ہیں ، بے کسی تو ہم بھی ہیں

صبح کے نکلتے ہی بجھ تو جانا ہے ہم کو

رات کی سہی لیکن روشنی تو ہم بھی ہیں

دیکھتے ہیں پھولوں کو، سوچتے ہیں رنگوں کو

خوشبوئوں کے مکتب میں فلسفی تو ہم بھی ہیں

ایک الف لیلیٰ کی داستاں سہی کوئی

دوستو کہانی اک متھ بھری تو ہم بھی ہیں

منصور آفاق

کہیں بجھی سگریٹوں کے ٹکڑے ،کہیں کتابیں کھلی پڑی ہیں

دسمبر 1, 2007منصور آفاق،شعراء،غزلکتابیں،خوابیں،رکابیں،شتابیں،طنابیںadmin

منصور آفاق ۔ غزل نمبر 380

فراق کی انتظار گاہ میں کہیں شرابیں کھلی پڑی ہیں

کہیں بجھی سگریٹوں کے ٹکڑے ،کہیں کتابیں کھلی پڑی ہیں

کہا تو ہے سر پھری ہوا سے چلے سنبھل کر بہت سنبھل کر

میں خیمہء کائنات ہوں اور مری طنابیں کھلی پڑی ہیں

کوئی توآیا ہے خواب گاہِ دل و نظر میں ، یہ چھپ چھپا کے

تجوری ٹوٹی ہوئی ہے غم کی ، تمام خوابیں کھلی پڑی ہیں

جو انتظاروں کے ہم نفس ہیں قفس میں بس ہیں وہی پرندے

ملن کے چڑیاگھروں میں وحشت بھری شتابیں کھلی پڑی ہیں

وہاں ہے رخشِ حیات منصور اپنا پہنچا ، جہاں ابد پر

کہیں پہ ٹوٹی ہوئی ہیں باگیں ، کہیں رکابیں کھلی پڑی ہیں

منصور آفاق

ہمارے اور تمہارے خدا علیحدہ ہیں

دسمبر 1, 2007منصور آفاق،شعراء،غزلنما،وفا،کیا،ادا،تھا،خداadmin

منصور آفاق ۔ غزل نمبر 379

یزید زاد الگ، کربلا علیحدہ ہیں

ہمارے اور تمہارے خدا علیحدہ ہیں

نمازِ جسم میں کعبہ کی سمت لازم ہے

نمازِ عشق کے قبلہ نما علیحدہ ہیں

مرے فراق کے جلتے ہوئے سیہ موسم

تمہی کہو مری جاں ! تم سے کیا علیحدہ ہیں

سمجھ رہی ہو محبت میں وصل کو تعبیر

ہمارے خواب میں کہتا نہ تھا، علیحدہ ہیں

ہماری دھج کو نظر بھر کے دیکھتے ہیں لوگ

ہجوم شہر میں ہم کج ادا علیحدہ ہیں

سیاہ بختی ٹپکتی ہے ایک تو چھت سے

ترے ستم مری جانِ وفا علیحدہ ہیں

منصور آفاق

اصل میں نیکیوں کی آنکھیں ہیں

دسمبر 1, 2007منصور آفاق،شعراء،غزللڑکیوں،نیکیوں،کھڑکیوں،بچیوں،بجلیوں،بستیوں،تتلیوںadmin

منصور آفاق ۔ غزل نمبر 378

یہ جو جلتے دئیوں کی آنکھیں ہیں

اصل میں نیکیوں کی آنکھیں ہیں

حسنِ گل پوش کے تعاقب میں

پھر کئی تتلیوں کی آنکھیں ہیں

دھند لاہٹ دکھائی دیتی ہے

نم زدہ کھڑکیوں کی آنکھیں ہیں

کافی تنکے ہیں چُن لئے لیکن

چار سو بجلیوں کی آنکھیں ہیں

نیم وا رہتی ہیں محبت سے

کھلتی کب لڑکیوں کی آنکھیں ہیں

یہ جو سیارے ہیں خلاؤں میں

جنگجو بستیوں کی آنکھیں ہیں

راستہ ہے مدینہ کا منصور

پھول سی بچیوں کی آنکھیں ہیں

منصور آفاق

خاک طیبہ کے خزینے کی طرف آنکھیں ہیں

دسمبر 1, 2007منصور آفاق،شعراء،غزلمہینے،مدینے،نگینے،خزینے،زینے،سفینے،سینےadmin

منصور آفاق ۔ غزل نمبر 377

آسمانوں کے دفینے کی طرف آنکھیں ہیں

خاک طیبہ کے خزینے کی طرف آنکھیں ہیں

اس میں اک نام دھڑکتا ہے بڑے زور کے ساتھ

اپنی تو اپنے ہی سینے کی طرف آنکھیں ہیں

لوگ مشکل میں عبادت کریں واشنگٹن کی

شکر ہے اپنی ، مدینے کی طرف آنکھیں ہیں

روضے کی جالیاں چھونے کا شرف جس کو ملا

اُس انگوٹھی کے نگینے کی طرف آنکھیں ہیں

آرہا ہے جو سرِ عرش سے میری جانب

اُس اترے ہوئے زینے کی طرف آنکھیں ہیں

جس پہ بطحا کا سفر کرتے تھے عشاقِ رسول

اُس کرم بار سفینے کی طرف آنکھیں ہیں

جس میں آیا تھا اجالوں کا پیمبر منصور

اُس بہاروں کے مہینے کی طرف آنکھیں ہیں

منصور آفاق

ننگی تلواریں ہیں دونوں وہ کوئی آنکھیں ہیں

دسمبر 1, 2007منصور آفاق،شعراء،غزلہوئی،لگی،مری،وہی،کوئی،کھڑی،گھنی،بڑی،بھری،دھریadmin

منصور آفاق ۔ غزل نمبر 376

رات جن کاجلی آنکھوں سے لڑی آنکھیں ہیں

ننگی تلواریں ہیں دونوں وہ کوئی آنکھیں ہیں

آنکھ جھپکوں تو نکل آتی ہیں دیواروں سے

میرے کمرے میں دو آسیب بھری آنکھیں ہیں

ہجر کی جھیل ترا دکھ بھی ہے معلوم مگر

یہ کوئی نہر نہیں ہے یہ مری آنکھیں ہیں

دیکھتے ہیں کہ یہ سیلاب اترتا کب ہے

دیر سے ایک ہی پانی میں کھڑی آنکھیں ہیں

جن کی مژگاں پہ نمی دیکھ کے تُو روتی تھی

تیز بارش میں ترے در پہ وہی آنکھیں ہیں

کون بچھڑا ہے کہ گلیوں میں مرے چاروں طرف

غم زدہ چہرے ہیں او ر ر وتی ہوئی آنکھیں ہیں

انتظاروں کی دو شمعیں ہیں کہ بجھتی ہی نہیں

میری دہلیز پہ برسوں سے دھری آنکھیں ہیں

اب ٹھہر جا اے شبِ غم کہ کئی سال کے بعد

اک ذرا دیر ہوئی ہے یہ لگی آنکھیں ہیں

باقی ہر نقش اُسی کا ہے مرے سنگ تراش

اتنا ہے اس کی ذرا اور بڑی آنکھیں ہیں

خوف آتا ہے مجھے چشمِ سیہ سے منصور

دیکھ تو رات کی یہ کتنی گھنی آنکھیں ہیں

منصور آفاق

اک مرحلۂ شوق میں ہم جلوہ نشیں ہیں

دسمبر 1, 2007منصور آفاق،شعراء،غزلپردہ،جلوہ،رستہadmin

منصور آفاق ۔ غزل نمبر 375

پیروں تلے ہر لمحہ نیا طور نئی برق

اک مرحلۂ شوق میں ہم جلوہ نشیں ہیں

پیچھے سے کوئی اچھی خبر آئے تو جائیں

برزخ سے ذرا پہلے ابھی رستہ نشیں ہیں

دوچار نکل آئے ہیں جلباب سے باہر

منصور ابھی دوست کئی پردہ نشیں ہیں

منصور آفاق

تم لوگ بڑے لوگ ہو، ہم خاک نشیں ہیں

دسمبر 1, 2007منصور آفاق،شعراء،غزلفتراک،چاک،املاک،ادراک،خاک،خاشاکadmin

منصور آفاق ۔ غزل نمبر 374

ویسے ہی تمہیں وہم ہے، افلاک نشیں ہیں

تم لوگ بڑے لوگ ہو، ہم خاک نشیں ہیں

خس خانہ و برفاب کی خواہش نہیں رکھتے

ہم دھوپ صفت لوگ ہیں خاشاک نشیں ہیں

امید بغاوت کی ہم ایسوں سے نہ رکھو

ہم ظلم کے نخچیر ہیں ، فتراک نشیں ہیں

اطراف میں بکھری ہوئی ہے سوختہ بستی

ہم راکھ اڑاتے ہوئے املاک نشیں ہیں

معلوم ہے کیا تم نے کہا ہے پسِ تحریر

اسباقِ خفی ہم کو بھی ادراک نشیں ہیں

کیا کوزہ گری بھول گیا ہے کوئی منصور

ہم لوگ کئی سال ہوئے چاک نشیں ہیں

منصور آفاق

پروازِ مسلسل میں ہیں ، براق نشیں ہیں

دسمبر 1, 2007منصور آفاق،شعراء،غزلآفاق،اشفاق،اشراق،براق،طاقadmin

منصور آفاق ۔ غزل نمبر 373

الفاظ پہن کر ہمی اوراق نشیں ہیں

پروازِ مسلسل میں ہیں ، براق نشیں ہیں

یہ بات الگ روشنی ہوتی ہے کہیں اور

ہم مثلِ چراغِ شبِ غم طاق نشیں ہیں

سورج کی طرف دیکھنے والوں کی قسم ہم

اک خوابِ عشاء اوڑھ کے اشراق نشیں ہیں

چاہیں تو زباں کھینچ لیں انکار کی ہم لوگ

بس خوفِ خدا ہے ہمیں ، اشفاق نشیں ہیں

آتی ہیں شعاعوں سے انا الحق کی صدائیں

ہم نورِ ہیں منصور ہیں آفاق نشیں ہیں

منصور آفاق

اندھے نگر میں دیکھنے والے ہوئے تو ہیں

دسمبر 1, 2007منصور آفاق،شعراء،غزلوالے،پالے،اچھالے،اجالے،حوالے،سنبھالےadmin

منصور آفاق ۔ غزل نمبر 372

ہم واں نہیں وہاں سے نکالے ہوئے تو ہیں

اندھے نگر میں دیکھنے والے ہوئے تو ہیں

آنسو تمام شہر نے افلاک کی طرف

دستِ دعا پہ رکھ کے اچھالے ہوئے تو ہیں

اس میں کوئی مکان جلا ہے تو کیا ہوا

دوچار دن گلی میں اجالے ہوئے تو ہیں

یادیں بھی یادگاریں بھی لوٹانے کا ہے حکم

تصویریں اور خطوط سنبھالے ہوئے تو ہیں

سچ کہہ رہی ہے صبح کی زر خیزروشنی

ہم لوگ آسمان کے پالے ہوئے تو ہیں

آخر کبھی تو شامِ ملاقات آئے گی

ڈیرے کسی کے شہر میں ڈالے ہوئے تو ہیں

منصور کب وہاں پہ پہنچتے ہیں کیاکہیں

کچھ برگِ گل ہواکے حوالے ہوئے تو ہیں

منصور آفاق

طلسمِ شب ہے سحر تک بلائیں حاکم ہیں

دسمبر 1, 2007منصور آفاق،شعراء،غزلمبارک،مسلک،ناٹک،کالک،گاہک،ٹھنڈک،پھاٹک،بک،تک،زیرک،شک،عینکadmin

منصور آفاق ۔ غزل نمبر 371

دیارِ گل میں بھیانک بلائیں حاکم ہیں

طلسمِ شب ہے سحر تک بلائیں حاکم ہیں

سفید پوش ہیں سہمے ہوئے مکانوں میں

گلی میں پھرتی ہے کالک بلائیں حاکم ہیں

یہاں سے ہجرتیں کرنی ہیں خوش دماغوں نے

یہاں ہے موت کی ٹھنڈک بلائیں حاکم ہیں

یہ گفتگو سے سویرے طلوع کرتی ہیں

وطن پہ رات کی زیرک بلائیں حاکم ہیں

نکل پڑے ہیں ہزاروں سگانِ آدم خور

کھلے ہیں موت کے پھاٹک بلائیں حاکم ہیں

وہ ساری روشنیوں کی سہانی آوازیں

تھا اقتدار کا ناٹک بلائیں حاکم ہیں

جو طمطراق سے جالب کے گیت گاتی ہیں

وہ انقلاب کی گاہک بلائیں حاکم ہیں

کسی چراغ میں ہمت نہیں ہے جلنے کی

بڑا اندھیرا ہے بے شک بلائیں حاکم ہیں

سعودیہ سے ہواہے نزولِ پاک ان کا

چلو وطن میں مبارک بلائیں حاکم ہیں

خدا کے نام دھماکے نبیؐ کے نام فساد

بنامِ دین ہے بک بک بلائیں حاکم ہیں

یہ مال و زر کی پجاری ہیں وقت کی قارون

نہیں ہے مذہب و مسلک بلائیں حاکم ہیں

نظر نہ آئیں سہولت سے آنکھ کو منصور

لگا کے دیکھئے عینک بلائیں حاکم ہیں

منصور آفاق

پاؤں ہیں بے چین لیکن راستے ممنوع ہیں

دسمبر 1, 2007منصور آفاق،شعراء،غزلقہقہے،قمقمے،آبلے،بلبلے،راستےadmin

منصور آفاق ۔ غزل نمبر 370

جنگلوں میں جگنوں کے قافلے ممنوع ہیں

پاؤں ہیں بے چین لیکن راستے ممنوع ہیں

صرف پروانے کو جلنے کی اجازت بزم میں

رونے پر پابندیاں ہیں ، قہقہے ممنوع ہیں

دشت کی تپتی زمیں پرمعجزہ کوئی کریں

ننگے پاؤں چلنا ہے اور آبلے ممنوع ہیں

بام پر اب دل جلائیں اورمژہ پر دھڑکنیں

روشنی بھی کرنی ہے اور قمقمے ممنوع ہیں

موج کومنصورہے چلنا ہوا کے ساتھ ساتھ

ساحلوں پرپانیوں کے بلبلے ممنوع ہیں

منصور آفاق

کربلا کی رات ہے اور مرثیے ممنوع ہیں

دسمبر 1, 2007منصور آفاق،شعراء،غزللئے،مرثیے،ڈاکیے،حاشیے،زاویےadmin

منصور آفاق ۔ غزل نمبر 369

اک بلیک آوٹ ہے روشن دئیے ممنوع ہیں

کربلا کی رات ہے اور مرثیے ممنوع ہیں

ہم محبت کی ریاضی پاس کر سکتے نہیں

اک مثلت لازمی ہے زاویے ممنوع ہیں

کوئی تحفہ تو کجا خط بھی پہنچ سکتا نہیں

اُس گلی میں ہر طرح کے ڈاکیے ممنوع ہیں

ہجر میں ممکن نہیں ہے استراحت کا خیال

راحتوں کے سلسلے میرے لئے ممنوع ہیں

بارشیں منصور برسانے کا آڈر ہے مگر

آسماں پر بادلوں کے حاشیے ممنوع ہیں

منصور آفاق

میرے ساتھ خوشبو اور روشنی مسافر ہیں

دسمبر 1, 2007منصور آفاق،شعراء،غزلہمی،یونہی،کوئی،کاغذی،گھڑی،آخری،ابھی،روشنیadmin

منصور آفاق ۔ غزل نمبر 368

یاد کے گلی میں دو اجنبی مسافر ہیں

میرے ساتھ خوشبو اور روشنی مسافر ہیں

گھر میں کمپیوٹر کی صرف ایک کھڑکی ہے

ورنہ قیدیوں کے دل ہر گھڑی مسافر ہیں

چند ٹن بیئر کے ہیں چند چپس کے پیکٹ

رات کی سڑک ہے اور ہم یونہی مسافر ہیں

کون ریل کو سگنل لالٹین سے دے گا

گاؤں کے سٹیشن پر اک ہمی مسافر ہیں

نیند کے جزیرے پر، آنکھ کی عمارت میں

اجنبی سے لگتے ہیں ، یہ کوئی مسافر ہیں

شب پناہ گیروں کے ساتھ ساتھ رہتی ہے

روشنی کی بستی میں ہم ابھی مسافر ہیں

اور اک سمندر سا پھر عبور کرنا ہے

خار و خس کی کشتی ہے کاغذی مسافر ہیں

چند اور رہتے ہیں دھوپ کے قدم منصور

شام کی گلی کے ہم آخری مسافر ہیں

منصور آفاق

قانون کے جدید دیاروں میں قید ہیں

دسمبر 1, 2007منصور آفاق،شعراء،غزلکچھاروں،کناروں،کاروں،بہاروں،دیاروںadmin

منصور آفاق ۔ غزل نمبر 367

ہم چوک چوک سرخ اشاروں میں قید ہیں

قانون کے جدید دیاروں میں قید ہیں

جنگل میں لومڑی کی شہنشاہی ان دنوں

بیچارے شیر اپنے کچھاروں میں قید ہیں

یہ سبز میز پوش پہ بکھرے ہوئے خیال

دراصل چند فرضی بہاروں میں قید ہیں

بے حد و بے کراں کا تصور بجا مگر

سارے سمندر اپنے کناروں میں قید ہیں

منصور زر پرست ہیں فالج زدہ سے جسم

یہ لوگ زرق برق سی کاروں میں قید ہیں

منصور آفاق

جسم کی ہر اک سڑک پر کیمرے موجود ہیں

دسمبر 1, 2007منصور آفاق،شعراء،غزلہوئے،لیے،نابغے،کیمرے،سے،سامنےadmin

منصور آفاق ۔ غزل نمبر 366

مخبری کے غیر مرئی ڈاکیے موجود ہیں

جسم کی ہر اک سڑک پر کیمرے موجود ہیں

کھل نہیں سکتے اگر بابِ نبوت کے کواڑ

سینکڑوں جبریل مجھ میں کس لیے موجود ہیں

بس صدا ڈی کوڈ کرنی ہے خموشی کی مجھے

کتنے سگنل عرش سے آئے ہوئے موجود ہیں

چاند شاید پیڑ کی شاخوں میں الجھا ہے کہیں

صحن میں کچھ روشنی کے شیڈ سے موجود ہیں

قیمتی سوٹوں کی جلسہ گاہ میں خاموش رہ

کرسیوں پر کیسے کیسے نابغے موجود ہیں

کھول کر اپنے گریباں کے بٹن ہم سرفروش

موت کی بندوق کے پھر سامنے موجود ہیں

منصور آفاق

آنکھیں کسی جلتے ہوئے منظر کی طرح ہیں

دسمبر 1, 2007منصور آفاق،شعراء،غزللنگر،لشکر،مقدر،منظر،اکثر،ازبر،بستر،خنجر،زیور،سمندرadmin

منصور آفاق ۔ غزل نمبر 365

پلکیں کسی برہن کے کھلے سر کی طرح ہیں

آنکھیں کسی جلتے ہوئے منظر کی طرح ہیں

گرتے ہیں ہمی میں کئی بپھرے ہوئے دریا

ہم وقت ہیں ، لمحوں کے سمندر کی طرح ہیں

بس ٹوٹتے پتوں کی صدائیں ہیں ہوا میں

موسم بھی مرادوں کے مقدر کی طرح ہیں

رکھتے ہیں اک اک چونچ میں کنکر کئی دکھ کے

اب حرف ابابیلوں کے لشکر کی طرح ہیں

بکتے ہوئے سو بار ہمیں سوچنا ہو گا

اب ہم بھی کسی آخری زیور کی طرح ہیں

یہ خواب جنہیں اوڑھ کے سونا تھا نگر کو

فٹ پاتھ پہ بچھتے ہوئے بستر کی طرح ہیں

ناراض نہ ہو اپنے بہک جانے پہ جاناں

ہم لوگ بھی انسان ہیں ، اکثر کی طرح ہیں

اب اپنا بھروسہ نہیں ، ہم ساحلِ جاں پر

طوفان میں ٹوٹے ہوئے لنگر کی طرح ہیں

تم صرفِ نظر کیسے، کہاں ہم سے کرو گے

وہ لوگ ہیں ہم جو تمہیں ازبر کی طرح ہیں

منصور ہمیں بھولنا ممکن ہی نہیں ہے

ہم زخم میں اترے ہوئے خنجر کی طرح ہیں

منصور آفاق

ہم دیدئہ حیرت ہیں ، تحیر کی طرح ہیں

دسمبر 1, 2007منصور آفاق،شعراء،غزلتاثر،تحیر،تغیر،حر،سرadmin

منصور آفاق ۔ غزل نمبر 364

سورج پہ گلابوں کے تصور کی طرح ہیں

ہم دیدئہ حیرت ہیں ، تحیر کی طرح ہیں

چھیڑو نہ ہمیں دوستو پھر تھم نہ سکیں گے

ملہار کے ہم بھیگے ہوئے سُر کی طرح ہیں

صد شکر کہ سینے میں دھڑکتا ہے ابھی دل

ہم کفر کے لشکر میں سہی حر کی طرح ہیں

بجھ جاتا ہے سورج کا ہمیں دیکھ کے چہرہ

ہم شام کے آزردہ تاثر کی طرح ہیں

ہر دور میں شاداب ہیں سر سبز ہیں منصور

وہ لوگ جو موسم کے تغیر کی طرح ہیں

منصور آفاق

ہم لوگ سدھارتھ کے کھلے در کی طرح ہیں

دسمبر 1, 2007منصور آفاق،شعراء،غزلمنظر،مرمر،پیمبر،پتھر،در،سخنور،صرصرadmin

منصور آفاق ۔ غزل نمبر 363

لٹنے کو خزانوں بھرے مندر کی طرح ہیں

ہم لوگ سدھارتھ کے کھلے در کی طرح ہیں

ہم حرفِ زمیں ، چیختی صدیوں کی امانت

گم گشتہ ثقافت کے سخنور کی طرح ہیں

ہم پھول کنول کے ہیں ہمیں نقش کھنڈر کے

آثارِ قدیمہ کے پیمبر کی طرح ہیں

فرعون کے اہرام بھی موسیٰ کا عصا بھی

ہم نیل کی تہذیب کے منظر کی طرح ہیں

آدم کے ہمی نقشِ کفِ پا ہیں فلک پر

کعبہ میں ہمی عرش کے پتھر کی طرح ہیں

ہم گنبد و مینار ہوئے تاج محل کے

ہم قرطبہ کے سرخ سے مرمر کی طرح ہیں

ہم عہدِ ہڑپہ کی جوانی پہ شب و روز

دیواروں میں روتی ہوئی صرصر کی طرح ہیں

منصور آفاق

ہم ریس کے گھوڑے ہیں ، مقدر کی طرح ہیں

دسمبر 1, 2007منصور آفاق،شعراء،غزلہیٹر،مقدر،کیکر،گاگر،گر،تیتر،تھیٹر،دفتر،دلبرadmin

منصور آفاق ۔ غزل نمبر 362

جیتے ہوئے لوگوں کے سوئمبر کی طرح ہیں

ہم ریس کے گھوڑے ہیں ، مقدر کی طرح ہیں

ہر لمحہ پیانو سے نئی شکل ابھاریں

یہ انگلیاں اپنی، کسی بت گر کی طرح ہیں

کیا چھاؤں کی امید لیے آئے گا کوئی

ہم دشت میں سوکھے ہوئے کیکر کی طرح ہیں

الحمدِ مسلسل کا تسلسل ہے ہمی سے

ہم صبحِ ازل زاد کے تیتر کی طرح ہیں

جلتے ہوئے موسم میں ہیں یخ بستہ ہوا سے

ہم برف بھری رات میں ہیٹر کی طرح ہیں

حیرت بھری نظروں کے لیے جیسے تماشا

ہم گاؤں میں آئے ہوئے تھیٹر کی طرح ہیں

یہ بینچ بھی ہے زانوئے دلدار کی مانند

یہ پارک بھی اپنے لیے دلبر کی طرح ہیں

پیاسوں سے کہو آئیں وہ سیرابیِ جاں کو

ہم دودھ کی بہتی ہوئی گاگر کی طرح ہیں

منصور ہمیں چھیڑ نہ ہم شیخِ فلک کے

مسجد میں لگائے ہوئے دفتر کی طرح ہیں

منصور آفاق

یہ برگزیدہ لوگ بھی پتھر پرست ہیں

دسمبر 1, 2007منصور آفاق،شعراء،غزلمقدر،ڈالر،پتھر،اختر،سمندر،سرadmin

منصور آفاق ۔ غزل نمبر 361

قرباں جواہرات پہ ہیں ، زر پرست ہیں

یہ برگزیدہ لوگ بھی پتھر پرست ہیں

کچھ ہیں اسیرِ عشوہِحسنِ سفید فام

باقی جو اہلِ زرہیں وہ ڈالر پرست ہیں

تجھ سے معاملہ نہیں اپنا، ہوائے شام

پانی ہیں ہم ، ازل سے سمندر پرست ہیں

ہم دوپہر میں مانتے سورج کو ہیں خدا

صحرا کی سرد رات میں اختر پرست ہیں

الٹا ئیں جن کا نام تو لکھیں وہاب ہم

تنظیمِ اسم ذات کے وہ سرپرست ہیں

منصور جبر و قدر کی ممکن نہیں ہے بحث

ہم بولتے نہیں ہیں ، مقدر پرست ہیں

منصور آفاق

نگر زنبیلِ ظلمت رُو میں محو استراحت ہیں

دسمبر 1, 2007منصور آفاق،شعراء،غزلپہلو،آنسو،تالو،جگنو،خوشبو،دارو!،روadmin

منصور آفاق ۔ غزل نمبر 360

طلسمِ مرگ کے جادومیں محوِ استراحت ہیں

نگر زنبیلِ ظلمت رُو میں محو استراحت ہیں

شبیں چنگاریوں کے بستروں میں خواب بنتی ہیں

اندھیرے راکھ کے پہلو میں محوِ استراحت ہیں

خموشی کا بدن ہے چادرِ باردو کے نیچے

کراہیں درد کے تالو میں محوِ استراحت ہیں

پہن کر سرسراہٹ موت کی ، پاگل ہوا چپ ہے

فضائیں خون کی خوشبو میں محوِ استراحت ہیں

کہیں سویا ہواہے زخم کے تلچھٹ میں پچھلا چاند

ستارے آخری آنسو میں محوِ استراحت ہیں

ابھی ہو گا شعاعوں کے لہو سے آئینہ خانہ

ابھی شیرِ خدا دارو میں محوِ استراحت ہیں

ابھی ابھریں گے بامِ صبحِ مشرق پر ابھی منصور

مرے سورج ابھی جگنو میں محو استراحت ہیں

منصور آفاق

وہ راہ کے ہرہر کاٹنے پر کچھ خونِجگر ٹپکاتے ہیں

دسمبر 1, 2007منصور آفاق،شعراء،غزللاتے،ٹپکاتے،پاتے،جاتے،دھراتےadmin

منصور آفاق ۔ غزل نمبر 359

یہ راہِ محبت ہے ساتھی اس راہ پہ جو بھی آتے ہیں

وہ راہ کے ہرہر کاٹنے پر کچھ خونِجگر ٹپکاتے ہیں

اس دور کا ہم سرمایہ ہیں ہم اہل جنوں ہم اہل وفا

ہم کرب میں ڈوبی دنیا کو پھر کرب و بلا میں لاتے ہیں

تم لوگ فرازِ منبر سے شبیر پہ بس تقریر کرو

ہم رند اُتر کر میداں میں پھررسم وہی دھراتے ہیں

تاریخ کا یہ دوراھا ہے اک سمت وفا اک سمت جفا

کچھ جاہ و حشم کے راہی ہیں ،، کچھ دارورسن کو جاتے ہیں

یہ لوح و قلم کے مفتی کا منصورازل سے فتویٰ ہے

جو زخمِ جگر کو بوسے دیں وہ لوگ مرادیں پاتے ہیں

منصور آفاق

بس بدلتے نمازوں کے اوقات ہیں

دسمبر 1, 2007منصور آفاق،شعراء،غزلفتوحات،مضافات،اوقات،آیات،خیالات،سوالات،ساتھ،عنایاتadmin

منصور آفاق ۔ غزل نمبر 358

وقت ساکت ہے ،جامد یہ حالات ہیں

بس بدلتے نمازوں کے اوقات ہیں

میری رائے پہ اے زندگی رحم کر

تیرے بارے میں اچھے خیالات ہیں

دے رہاہے مرا چہرہ سب کے جواب

تیری آنکھوں میں جتنے سوالات ہیں

پاؤں آگے بڑھا ، دار پر وار کر

موت کے کھیل میں ہم ترے ساتھ ہیں

گھاس کھاتے رہو بم بناتے رہو

اپنی باقی ابھی کچھ فتوحات ہیں

تیری زلفوں کی کرنیں تلاوت کریں

تیرے چہرے کی آنکھوں میں آیات ہیں

آتے جاتے ہیں اکثرشبِ تار میں

یہ ستارے تو اپنے مضافات ہیں

غم ہے تنہائی ہے ، ہجر ہے رات ہے

ہم پہ منصور کیا کیا عنایات ہیں

منصور آفاق

رنگوں کے ہم ہیں عاشق ، خوشبو کو چاہتے ہیں

دسمبر 1, 2007منصور آفاق،شعراء،غزلچاہتے،نباہتے،کراہتے،بساہتے،جماہتےadmin

منصور آفاق ۔ غزل نمبر 357

کھلتی ہوئی کلی کودل سے سراہتے ہیں

رنگوں کے ہم ہیں عاشق ، خوشبو کو چاہتے ہیں

ہم چھوڑتے نہیں ہیں چلتے ہوئے کسی کو

ممکن جہاں تلک ہورشتہ نباہتے ہیں

لگتا ہے میری جاں سے اٹھتی ہیں یہ صدائیں

پت چھڑ کی جب رتوں میں پتے کراہتے ہیں

ہو جاتی ہے خبرکہ اکتا گئے ہیں ہم سے

محفل میں اپنی ساجن جب بھی جماہتے ہیں

منصور تازہ روگ سے خود کو تباہتے ہیں

جی کو مثالِ میر ذرا ہم بساہتے ہیں

منصور آفاق

گرہ میں اعترافِ جرم ہے اور ہاتھ خالی ہیں

دسمبر 1, 2007منصور آفاق،شعراء،غزللی،نکالی،نرالی،والی،بھالی،جمالی،خالیadmin

منصور آفاق ۔ غزل نمبر 356

یہی بس چار نعتیں تھیں جو سینے پر سجالی ہیں

گرہ میں اعترافِ جرم ہے اور ہاتھ خالی ہیں

وہی تیرا تمدن ہے بنو ہاشم کی گلیوں میں

امیہ کے نسب نے تازہ تہذیبیں بنا لی ہیں

ترؐے مذہب میں گنجائش نہیں تھی زرکی سو ہم نے

گھروں سے اشرفیاں ، شام سے پہلے نکالی ہیں

مجھے محسوس ہوتا ہے مدینہ آنے والا ہے

لبوں پر کپکپاہٹ ہے یہ آنکھیں رونے والی ہیں

نگاہیں دیکھتی تھیں کتنے سچے خواب یثرب کے

یہ پہچانے ہوئے گھر ہیں یہ گلیاں دیکھی بھالی ہیں

وہی لاہوتی کیفیت اترتی ہے رگ و پے میں

وہی نوری فضائیں ہیں وہی صبحیں نرالی ہیں

کوئی قوسِ قزح سی بھر گئی منصور آنکھوں میں

حریمِ رحمتِ عالم کے کیا رنگِ جمالی ہیں

منصور آفاق

وہی تمسخر کا اب ہدف ہیں سحر کو جن سے عقیدتیں ہیں

دسمبر 1, 2007منصور آفاق،شعراء،غزلچاہتیں،تلاوتیں،حکومتیں،روایتیں،عقیدتیں،عنایتیںadmin

منصور آفاق ۔ غزل نمبر 355

میں سوچتا ہوں کہ شہرِ شب کو ملامتوں سے رفاقتیں ہیں

وہی تمسخر کا اب ہدف ہیں سحر کو جن سے عقیدتیں ہیں

نظر کی رنگیں مسافتوں کا نہ پوچھ انجام کیا رہا ہے

جنوں کے پُرسوزرتجگوں میں کتابِ دل کی تلاوتیں ہیں

بہکتی راتوں کی چاندنی سے بہلتی زرپوش زندگی ہے

قزح کے رقاص شیش محلوں کو صرف شاموں کی چاہتیں ہیں

خزاں کی سرکش جسارتوں نے مرے وطن کی بہار یں لوٹیں

چمن کی خود ساختہ رُتوں میں منافقت کی حکومتیں ہیں

درندگی کی یہ فکرِ تازہ یہ پاگلوں کے قتالِخود کُش

خرد کے پرہول فیصلے ہیں ستم کی اندھی روایتیں ہیں

وفاکے منصور معبدوں میں دکھوں کی آتش بجھی نہیں ہے

تری نوازش کے سلسلے ہیں تری نظر کی عنایتیں ہیں

منصور آفاق

ڈرائیں گی یہ غمِ ذوالجلال کی آنکھیں

دسمبر 1, 2007منصور آفاق،شعراء،غزلچھال،وصال،ذوالجلال،زوال،سوال،سالadmin

منصور آفاق ۔ غزل نمبر 354

پلیز جمع کرومت ملال کی آنکھیں

ڈرائیں گی یہ غمِ ذوالجلال کی آنکھیں

جواب دو کہ فریضہ یہی تمہارا ہے

ہیں انتظار میں ، میرے سوال کی آنکھیں

بڑا ہے شوق مسافر نوازیوں کا انہیں

بچھا رہے ہیں شجر اپنی چھال کی آنکھیں

مرا خیال ہے تارے نہیں یہ آنکھیں ہیں

شبِ فراق میں صبحِ وصال کی آنکھیں

حنوط کرنا پڑے گا چراغِ شام مجھے

کھلی ہوئی افق پر زوال کی آنکھیں

کٹا ہوا یہ کوئی کیک تو نہیں منصور

پڑی ہیں تھال میں اک اور سال کی آنکھیں

منصور آفاق

نکل آئی ہیں ہرگل سے کئی امید کی آنکھیں

دسمبر 1, 2007منصور آفاق،شعراء،غزلناہید،امید،تمہید،تردید،عیدadmin

منصور آفاق ۔ غزل نمبر 353

پڑی ہیں ہر طرف وابستگانِ دید کی آنکھیں

نکل آئی ہیں ہرگل سے کئی امید کی آنکھیں

مکمل ہو چکا ہے آخری پیراگراف اپنا

ابھر آئی ہیں کاغذ پر نئی تمہید کی آنکھیں

خدا جانے تجھے کیسی بڑی مجبوری لاحق تھی

مسلسل کھاتی تھیں چغلی تری تردید کی آنکھیں

ستاروں سے صدائیں آتی تھی سبحان اللہ کی

لپکتی تھیں عجب اُس غیرتِ ناہید کی آنکھیں

پلٹ آتی ہیں باغوں کی بہاریں تو مگرمنصور

بھری رہتی ہیں اشکوں سے ہر آتی عید کی آنکھیں

منصور آفاق

اب تو کرتیں ہی نہیں خواب کا وعدہ آنکھیں

دسمبر 1, 2007منصور آفاق،شعراء،غزلوعدہ،کشادہ،ارادہ،زیادہ،سادہ،ستادہadmin

منصور آفاق ۔ غزل نمبر 352

اوڑھ لیتی ہیں ستاروں کا لبادہ آنکھیں

اب تو کرتیں ہی نہیں خواب کا وعدہ آنکھیں

کوئی گستاخ اشارہ نہ کوئی شوخ نگہ

اپنے چہرے پہ لیے پھرتا ہوں سادہ آنکھیں

دھوپ کا کرب لیے کوئی افق پر ابھرا

اپنی پلکوں میں سمٹ آئیں کشادہ آنکھیں

ایک دہلیز پہ رکھا ہے ازل سے ماتھا

ایک کھڑکی میں زمانوں سے ستادہ آنکھیں

آنکھ بھر کے تجھے دیکھیں گے کبھی سوچا تھا

اب بدلتی ہی نہیں اپنا ارادہ آنکھیں

شہر کا شہر مجھے دیکھ رہا ہے منصور

کم تماشا ہے بہت اور زیادہ آنکھیں

منصور آفاق

عجیب تھا ان پہ سونے والاکہ پاؤں میں کل خدائیاں تھیں

دسمبر 1, 2007منصور آفاق،شعراء،غزلنمائیاں،کلائیاں،بھلائیاں،خدائیاں،رائیاںadmin

منصور آفاق ۔ غزل نمبر 351

نشاں بناتی تھیں پشت پر جووہی پرانی چٹائیاں تھیں

عجیب تھا ان پہ سونے والاکہ پاؤں میں کل خدائیاں تھیں

شبِ برگزیدہ دراز گیسو،ہمہ آفتاب نگاہ اس کی

چراغ ایسے تھے ہاتھ اس کے ، بہار ایسی کلائیاں تھیں

رتوں نے قوسِ قزح پہن لی تھی رنگ خوشبوسے مل گئے تھے

زمین پھولوں سے بھر گئی تھی کچھ ایسی چہرہ نمائیاں تھیں

جو لفظ مچلے زبانِ کُن پر،جو بات نکلی لبِ کرم سے

لکھوک ہا اس میں فائدے تھے کروڑ وں اس میں بھلائیاں تھیں

غلام شاہِ جہاں ہوئے ہیں جو خاک تھے آسماں ہوئے ہیں

پہاڑ اس کے ہوئیں کرم سے وہی جو محکوم رائیاں تھیں

منصور آفاق

قریۂ خوں ریزہے ادراک کی جلتی زمیں

دسمبر 1, 2007منصور آفاق،شعراء،غزلچاک،پاک،افلاک،ادراک،خاکadmin

منصور آفاق ۔ غزل نمبر 350

زندگی ہے دیدۂ سفاک کی جلتی زمیں

قریۂ خوں ریزہے ادراک کی جلتی زمیں

ٹوٹتے جاتے ہیں قسمت کے ستارے ان دنوں

گر رہی ہے خاک پر افلاک کی جلتی زمیں

ہر طرف خودکُش دھماکے ہر طرف ظالم فساد

مانگتی ہے رحم ارضِ پاک کی جلتی زمیں

بند کمرے میں در آئی ہے کسی دیوار سے

ہجر میں دشتِ گریباں چاک کی جلتی زمیں

دیکھتا ہوں خواب میں منصور بمباری کے بعد

سوختہ شہروں سے اڑتی خاک کی جلتی زمیں

منصور آفاق

ملتا خود سے بھی تھا اکڑ کے میں

دسمبر 1, 2007منصور آفاق،شعراء،غزللڑ،پکڑ،اکڑ،اکھڑ،اجڑ،بچھڑ،بڑ،تڑ،دھڑ،سکڑadmin

منصور آفاق ۔ غزل نمبر 349

اتفاقات سے بگڑ کے میں

ملتا خود سے بھی تھا اکڑ کے میں

طشت میں سر بھی اپنا رکھتا تھا

رقص بھی دیکھتا تھا دھڑ کے میں

حل کروں کیسے عقل مندی سے

مسئلے پاگلوں کی بڑ کے میں

کہہ رہا تھا یہ چہرہ لڑکی کا

زندگی ہے بلا کی لڑکے میں

ہجر کی کیفیت ابھی تک تھی

بولتا تھا اکھڑ اکھڑ کے میں

سانس تو لکڑیاں بھی لیتی ہیں

جی رہا ہوں کہاں بچھڑ کے میں

سایوں کے بیچ گزرا کرتا تھا

اُس گلی سے سکڑ سکڑ کے میں

اٹھ کھڑا تھاکسی کی آمد پر

اپنی دیوار کو پکڑ کے میں

دل دھڑکتا تھا ایک دنیا کا

جڑ گیا ہوں کہیں ،اجڑ کے میں

کیسے منصور خالی بستر تھا

لوٹ آیا تھا تڑکے تڑکے میں

اپنے بیٹوں صاحب منصور اور عادل منصور کیلئے

منصور آفاق

مری مجذوب خاموشی کو افسانہ بنانے میں

دسمبر 1, 2007منصور آفاق،شعراء،غزلقہوہ،لمحہ،لرزیدہ،مصرعہ،چہرہ،چشمہ،ویرانہ،کمرہ،کوفہ،پیچیدہ،افسانہ،حصہ،خانہ،دیدہ،رنجیدہ،رستہ،زینہ،سنجیدہ،سایہadmin

منصور آفاق ۔ غزل نمبر 348

زمانہ… تجھ کو کیا حاصل ہوا قصہ بنانے میں

مری مجذوب خاموشی کو افسانہ بنانے میں

غزل کہنا پڑی ایسے سخن آباد میں مجھ کو

خدا مصلوب ہوتے ہیں جہاں مصرعہ بنانے میں

نجانے کون سے دکھ کی اداسی کا تعلق ہے

مری اس سائیکی کو اتنا رنجیدہ بنانے میں

تجھے دل نے کسی بہتر توقع پر بلایا تھا

لگے ہو تم مسائل اور پیچیدہ بنانے میں

اگر آ ہی گئے ہو تو چلو آؤ یہاں بیٹھو

ذرا سی دیر لگنی ہے مجھے قہوہ بنانے میں

کسے معلوم کیا کیا کر دیا قربان آنکھوں نے

یہ تنہائی کی آبادی، یہ ویرانہ بنانے میں

مری صبح منور کی جسے تمہید بننا تھا

کئی صدیاں لگا دی ہیں وہ اک لمحہ بنانے میں

کہاں سے آ گئی اتنی لطافت جسم میں میرے

شبیں ناکام پھرتی ہیں مرا سایہ بنانے میں

کھڑا ہے لاش پر میری وہ کیسی تمکنت کے ساتھ

جسے تکلیف ہوتی تھی مجھے زینہ بنانے میں

مرے منزل بکف جن پہ تُو طعنہ زن دکھائی دے

یہ پاؤں کام آئے ہیں ترا رستہ بنانے میں

مجھ ایسے آسماں کو گھر سے باہر پھینکنے والو

ضرورت چھت کی پڑتی ہے کوئی کمرہ بنانے میں

کہیں رہ جاتی تھیں آنکھیں کہیں لب بھول جاتا تھا

بڑی دشواریاں آئیں مجھے چہرہ بنانے میں

پلٹ کر دیکھتے کیا ہو۔ صفِ دشمن میں یاروں کو

بڑے ماہر ہیں اپنے دل کو یہ کوفہ بنانے میں

کسی کرچی کے اندر کھو گیا میرا بدن مجھ سے

جہانِ ذات کو اک آئینہ خانہ بنانے میں

مٹھاس ایسے نہیں آئی مرے الفاظِ تازہ میں

لگی ہے عمر مجھ کو دودھ کا چشمہ بنانے میں

بڑا دل پھینک ہے یہ دل بڑی آوارہ آنکھیں ہیں

کوئی عجلت ہوئی شاید دل و دیدہ بنانے میں

کسی ہجرِ مسلسل کا بڑا کردار ہے منصور

محبت کی کہانی اتنی سنجیدہ بنانے میں

انا الحق کی صداؤں میں کہیں گم ہو گیا میں بھی

اسے منصور اپنی ذات کا حصہ بنانے میں

مرے ہمزاد اپنا آپ نادیدہ بنانے میں

تجھے کیا مل گیا آنکھوں کو لرزیدہ بنانے میں

منصور آفاق

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: