زمرہ جات کے محفوظات: غزل

نجانے کیوں تجھے جڑ سے اکھڑ جانے کی جلدی تھی

دسمبر 1, 2007منصور آفاق،شعراء،غزلاکھڑ،اجڑ،ادھڑ،بچھڑ،بگڑ،جھڑ،سکڑadmin

منصور آفاق ۔ غزل نمبر 489

قیامت خیز طوفانوں سے لڑ جانے کی جلدی تھی

نجانے کیوں تجھے جڑ سے اکھڑ جانے کی جلدی تھی

ابھی تو ہم ملے ہی تھے ابھی تو گل کھلے ہی تھے

تجھے کیا اس قدر جاناں بچھڑ جانے کی جلدی تھی

نئی رُت سے بہت پہلے فقظ تُو ہی نہیں بدلی

یہاں پر تو درختوں کو بھی جھڑ جانے کی جلدی تھی

مجھے تو ہجر میں رہنے کی عادت تھی مگر جاناں

تجھے بھی ایسا لگتا ہے اجڑ جانے کی جلدی تھی

بجا ہے ہاتھ کو میرے تمنا تیری تھی لیکن

ترے دامن کو بھی شاید ادھڑ جانے کی جلدی تھی

فقط دوچار لمحوں میں سمت آئی ہتھیلی پر

زمیں کے وسعتوں کو بھی سکڑ جانے کی جلدی تھی

ابھی تو اس نے بدلا تھا لباسِ جسم ہی منصور

مری قسمت کو بھی کتنی بگڑ جانے کی جلدی تھی

منصور آفاق

جانے کیوں میری بے گناہی کی پھر بھی بستی گواہی دیتی تھی

دسمبر 1, 2007منصور آفاق،شعراء،غزلکلائی،گواہی،پناہی،رہائی،رسائی،سنائی،صراحیadmin

منصور آفاق ۔ غزل نمبر 488

ساری پوشاک خون سے تر تھی، دور سے بھی دکھائی دیتی تھی

جانے کیوں میری بے گناہی کی پھر بھی بستی گواہی دیتی تھی

دن نکلتے ہی بجنے لگتا تھا ایک ڈھولک کا کیروا مجھ میں

رات بھر وائلن کے ہونٹوں سے بھیرویں سی سنائی دیتی تھی

ایک ہوتی تھی تجھ سی شہزادی ا لف لیلیٰ کی داستانوں میں

جو گرفتاریوں کے موسم میں قیدیوں کو رہائی دیتی تھی

ایک امید مجھ میں ہوتی تھی، خواب بوتی تھی پھول کھلتے تھے

تیلیاں توڑتی قفس کی تھی آسماں تک رسائی دیتی تھی

کیا کہوں کھو گئی کہاں مجھ سے شام ہوتے ہی جو بڑے دل سے

موتیے کے سفید گجروں کو اپنی نازک کلائی دیتی تھی

ایک کیفیتِ عدم جس میں جنتِ خواب کے خزانے تھے

روح کل کی شراب سے بھر کر وہ بدن کی صراحی دیتی تھی

ایک ٹوٹے ہوئے کوارٹر میں وہ تمنا بھی مر گئی آخر

وہ جو منصور کے تخیل کو شوقِ عالم پناہی دیتی تھی

منصور آفاق

آنکھ کھلی تو فیری ساحل چھوڑ گئی تھی

دسمبر 1, 2007منصور آفاق،شعراء،غزلمل،محفل،مسائل،دل،ساحلadmin

منصور آفاق ۔ غزل نمبر 487

سونی سونی پورٹ کی جھلمل چھوڑ گئی تھی

آنکھ کھلی تو فیری ساحل چھوڑ گئی تھی

فلم کا ہیرو دیکھ کے بھولی بھالی لڑکی

سینما ہال کی کرسی پر دل چھوڑ گئی تھی

شاید ملک سے باہر ننگ زیادہ تھا کچھ

مزدوروں کو کپڑے کی مل چھوڑ گئی تھی

اس نے میرے ہاتھ پہ رکھا تھا اک وعدہ

جاتے ہوئے کچھ اور مسائل چھوڑ گئی تھی

میں نے اپنے جسم سے پردہ کھنچ لیا تھا

اور مجھے پھر ساری محفل چھوڑ گئی تھی

منصور آفاق

میری ایسی کبھی دھرتی تو نہ تھی

دسمبر 1, 2007منصور آفاق،شعراء،غزلمرتی،ابھرتی،اترتی،بھرتی،دھرتیadmin

منصور آفاق ۔ غزل نمبر 486

خون سے اتنی سنورتی تو نہ تھی

میری ایسی کبھی دھرتی تو نہ تھی

چاند کھڑکی سے نکل آتا تھا

رات سیڑھی سے اترتی تو نہ تھی

موج ٹکراتی تھی ساحل سے مگر

ایسے سینے سے ابھرتی تو نہ تھی

یہ درِ یار پہ کیسا تھاہجوم

نئے عشاق کی بھرتی تو نہ تھی

لوگ کہتے ہیں محبت پہلے

اتنی آسانی سے مرتی تو نہ تھی

منصور آفاق

کمرے میں اندھیرا تھا روشنی سڑک پر تھی

دسمبر 1, 2007منصور آفاق،شعراء،غزلہنسی،ناچتی،ٹاہلی،پڑی،بھی،روشنی،رکی،سنسنیadmin

منصور آفاق ۔ غزل نمبر 485

کھڑکیوں کے شیشوں سے دیکھتی سڑک پر تھی

کمرے میں اندھیرا تھا روشنی سڑک پر تھی

قمقموں کی آنکھیں تھیں جھلملاتی کاروں میں

قہقہے تھے پیڑوں پر اک ہنسی سڑک پر تھی

سائرن بجاتی تھیں گاڑیاں قطاروں میں

فائروں کی گونجیں تھیں سنسنی سڑک پر تھی

آتے جاتے لوگوں پر موسمِ بہارا ں تھا

منتظر پرندوں کی ،ٹاہلی سڑک پر تھی

روڈ پر سپاہی بھی پھینکتے تھے آنسو گیس

احتجاجی ریلی بھی ناچتی سڑک پر تھی

سرخ سے اشارے پر چیختے سلنسر تھے

اور دھواں کے پہلو میں دھول بھی سڑک پر تھی

ہیرہ منڈی جانا تھا کچھ عرب سفیروں نے

کس قدر ٹریفک اُس اک رکی سڑک پر تھی

جمع ایک دنیا تھی دیکھتی تھی کیا منصور

ایک چھوٹی سی بچی گر پڑی سڑک پر تھی

منصور آفاق

ندی کو کچھ پرانے کوہساروں سے شکایت تھی

دسمبر 1, 2007منصور آفاق،شعراء،غزلکوہساروں،پکاروں،بہاروں،تاروں،زاروں،سواروںadmin

منصور آفاق ۔ غزل نمبر 484

خموشی سے گلہ تھا اور قراروں سے شکایت تھی

ندی کو کچھ پرانے کوہساروں سے شکایت تھی

کہاں بادِ خزاں کی بادشاہی جانے والی ہے

یونہی گلزاروں کو آتی بہاروں سے شکایت تھی

لہو برسا دیا ہے مسجدِ اقصیٰ کے سجدوں پر

جنہیں آزاد جیون کی پکاروں سے شکایت تھی

کوئی قاتل بلایاہے شبِ غم کے مغنی نے

اسے تیور سروں کی بجتی تاروں سے شکایت تھی

ہمیں توکربلا کے ریگ زاروں سے شکایت ہے

ہمیں توکربلا کے ریگ زاروں سے شکایت تھی

ابھی تک اشہبِ دوراں کی خالی پیٹھ ہے منصور

گذشتہ کو بھی مشرق کے سواروں سے شکایت تھی

منصور آفاق

مجھ سے موسیٰ کو ملاقات کی خواہش کیا تھی

دسمبر 1, 2007منصور آفاق،شعراء،غزلنمائش،بارش،خواہش،دانش،سازشadmin

منصور آفاق ۔ غزل نمبر 483

ایک ٹوٹی ہوئی مسجد میں رہائش کیا تھی

مجھ سے موسیٰ کو ملاقات کی خواہش کیا تھی

شامیانوں سے نگر ڈھانپ رہی تھی دنیا

حاکمِ شہر کی جادو بھری بارش کیا تھی

اپنے خالق کی بھی تفہیم وہ رکھ سکتا تھا

مجھ سے مت پوچھ کہ روبوٹ کی دانش کیا تھی

ناچتی پھرتی تھی اک نیم برہنہ ماڈل

خالی بوتیک تھا کپڑوں کی نمائش کیا تھی

جل گئی تھی مری آغوش گلوں سے منصور

رات وہ بوسۂ سرگرم کی سازش کیا تھی

منصور آفاق

ہے یاد مجھے رنگوں بھری سات مئی تھی

دسمبر 1, 2007منصور آفاق،شعراء،غزلمئی،نئی،گئی،بہی،رہیadmin

منصور آفاق ۔ غزل نمبر 482

اک شخص نے ہونٹوں سے کوئی نظم کہی تھی

ہے یاد مجھے رنگوں بھری سات مئی تھی

میں انگلیاں بالوں میں یونہی پھیر رہا تھا

وہ کمرے کی کھڑکی سے مجھے دیکھ رہی تھی

اس شخص کے گھر وہی حالت تھی مگر اب

بِڈ روم کی دیوار پہ تصور نئی تھی

آئی ہے پلٹ کر کئی صدیوں کے سفر سے

اس گیٹ کے اندر جو ابھی کار گئی تھی

موسم کے تغیر نے لکھا مرثیہ اس کا

منصور ندی مل کے جو دریا سے بہی تھی

منصور آفاق

شہر میں رات کی جھڑی ہے ابھی

دسمبر 1, 2007منصور آفاق،شعراء،غزلہتھکڑی،لڑی،چھڑی،کڑی،گڑی،گھڑی،پنکھڑی،پڑی،بڑی،جڑی،جھڑی،سڑیadmin

منصور آفاق ۔ غزل نمبر 481

روشنی سائے میں کھڑی ہے ابھی

شہر میں رات کی جھڑی ہے ابھی

دیکھنا ہے اسے مگر اپنی

آنکھ دیوار میں گڑی ہے ابھی

آسماں بھی مرا مخالف ہے

ایک مشکل بہت بڑی ہے ابھی

ایک بجھتے ہوئے تعلق میں

شام کی آخری گھڑی ہے ابھی

ہم سے مایوس آسماں کیا ہو

موتیوں سے زمیں جڑی ہے ابھی

ایک ٹوٹے ہوئے ستارے کی

میرے ہاتھوں میں ہتھکڑی ہے ابھی

موسمِ گل ہے میرے گلشن میں

شاخ پر ایک پنکھڑی ہے ابھی

وہ کھلی ہے گلاب کی کونپل

میری قسمت کہاں سڑی ہے ابھی

سایہء زلف کی تمازت ہے

رات کی دوپہر کڑی ہے ابھی

اس میں بچپن سے رہ رہا ہوں میں

آنکھ جس خواب سے لڑی ہے ابھی

میں کھڑا ہوں کہ میرے ہاتھوں میں

ایک دیمک زدہ چھڑی ہے ابھی

آگ دہکا نصیب میں منصور

برف خاصی گری پڑی ہے ابھی

منصور آفاق

بچا جو دیس میں تھوڑا بہت ہے بانٹ ابھی

دسمبر 1, 2007منصور آفاق،شعراء،غزلچھانٹ،گانٹھ،پلانٹ،بانٹ،جھانٹ،خرانٹadmin

منصور آفاق ۔ غزل نمبر 480

پہنچنے والی ہے انگریز کی گرانٹ ابھی

بچا جو دیس میں تھوڑا بہت ہے بانٹ ابھی

میں تیری فونڈری بیچوں گا وقت آنے پر

تُو میرے بیج دے اسٹیل کے پلانٹ ابھی

تجھے کلاس کے کچھ چور مل بھی سکتے ہیں

فریب کار بہت ہیں کچھ اور چھانٹ ابھی

او بادشاہِ ٹھگاں ! میں ترا مخالف ہوں

اکھیڑ نی ہے جومیری اکھیڑ جھانٹ ابھی

امیرِ شہر نے امپوٹ کھالیں کردی ہیں

غریبِ شہروہی اپنے جوتے گانٹھ ابھی

نئے چراغ جلا صبح کیلئے منصور

ہے تیرے ملک پہ قابض وہی خرانٹ ابھی

منصور آفاق

تُو سرد رہنے دے اپنے بدن کی آنچ ابھی

دسمبر 1, 2007منصور آفاق،شعراء،غزلقلانچ،لانچ،ڈھانچ،کھانچ،کانچ،پانچ،آنچ،برانچ،خوانچ،سانچadmin

منصور آفاق ۔ غزل نمبر 479

ابھی پرکھ اسے کچھ دن، ہوا کو جانچ ابھی

تُو سرد رہنے دے اپنے بدن کی آنچ ابھی

او دل کو توڑنے والی ذرا خیال سے چل

چٹخ رہا ہے مری کرچیوں کا کانچ ابھی

جنہیں وسیلہ بناتا ہوں میں یقین کے ساتھ

ہیں مہربان مری ذات پر وہ پانچ ابھی

وہاں سے دور مرے زاویے کی اونچائی

جہاں نصیب کی جاری ہے کھینچ کھانچ ابھی

سجا کے ٹوٹی ہوئی چوڑیوں کے افسانے

اٹھائے پھرتی ہے تہذیب اپنا خوانچ ابھی

خراب سمت نما نے کنارے چھین لیے

بھٹک رہی ہے سمندر میں اپنی لانچ ابھی

مرے غزال یہ منظر سمیٹ لینے دے

نہ بھر زقند ابھی تُو، نہ بھر قلانچ ابھی

بڑے سکون سے بستی میں لوگ رہتے تھے

کھلی نہیں تھی کسی بنک کی برانچ ابھی

نئی غزل کا زمانہ ابھی نہیں آیا

ڈھا رہے ہیں پرانی غزل کا ڈھانچ ابھی

کسی کا وصل مکمل نہ کر سکا منصور

ادھوری ہے مرے جلتے بدن کی سانچ ابھی

منصور آفاق

کہ خالی بھیج دیا عید کاڈ اُس نے بھی

دسمبر 1, 2007منصور آفاق،شعراء،غزللاڈ،واڈ،کاڈ،گاڈ،گراڈ،اکاڈ،راڈadmin

منصور آفاق ۔ غزل نمبر 478

مری طرح سے کیا ہے فراڈ اُس نے بھی

کہ خالی بھیج دیا عید کاڈ اُس نے بھی

مجھے بھی ضد ہے مسیحا کے دل میں رہنے کی

تہی رکھا ہے مریضوں سے واڈ اُس نے بھی

پہن لی جسم پہ میں نے بھی کھال چیتے کی

سیاہ فام رکھا باڈی گاڈ اُس نے بھی

مجھے بھی شوق ہے نخروں کا چانج کرنے کا

ہزار دیکھے ہیں بچپن میں لاڈ اُس نے بھی

مجھے بھی بیچنا آزادی کا مجسمہ ہے

فروخت کرنا ہے لینن گراڈ اُس نے بھی

نکل گیا تھا بڑھا کے سپیڈ میں جس پر

خرید لی وہی ہنڈا اکاڈ اُس نے بھی

گھری تھی غنڈوں میں رضیہ وہاں مگر منصور

بس اندھا دھند گھمائی تھی راڈ اُس نے بھی

منصور آفاق

مری طرح سے اٹھائے بتاشے اُس نے بھی

دسمبر 1, 2007منصور آفاق،شعراء،غزلفراشے،لاشے،مہاشے،ماشے،معاشے،بتاشے،بشاشے،تماشے،تراشے،خراشےadmin

منصور آفاق ۔ غزل نمبر 477

قریب ہونے کے رستے تلاشے اُس نے بھی

مری طرح سے اٹھائے بتاشے اُس نے بھی

مجھے بھی اپنی وجاہت کے زعم نے روکا

تمام رات بہانے تراشے اُس نے بھی

مری بھی پیٹھ پہ رکھی ہے حسرتوں کی صلیب

اٹھائے اپنی تمنا کے لاشے اُس نے بھی

سناہے میری طرح رات رات دیکھے ہیں

شکست و ریخت کے وحشی تماشے اُس نے بھی

اگرچہ عشق ہے مجرم مگر بنائے ہیں

دیارِ ہجرکے اجڑے مہاشے اُس نے بھی

حساب درد کا جس رات کر رہا تھا میں

شماراپنے کئے تولے ماشے اُس نے بھی

نکل سکی نہ اداسی مزاج سے میرے

اگرچہ خواب ہشاشے بشاشے اُس نے بھی

پلٹ کے دشت سے آئی نہ میری تنہائی

نگاہِ ناز کے ریشم فراشے اُس نے بھی

میں خوش دماغوں کی بستی کو ساتھ لایا تھا

بلا رکھے تھے کئی خوش معاشے اُس نے بھی

مجھے بھی چیخ سنائی دی لمس کی منصور

خیال میں مرے شانے خراشے اُس نے بھی

منصور آفاق

میں وہاں سو رہا تھا ویسے بھی

دسمبر 1, 2007منصور آفاق،شعراء،غزلنیا،وفا،کہا،کھڑا،کا،گیا،پوجتا،رہاadmin

منصور آفاق ۔ غزل نمبر 476

میں نے کیا دیکھنا تھا ویسے بھی

میں وہاں سو رہا تھا ویسے بھی

اس کی آنکھیں بدلنے والی تھیں

اور میں بے وفا تھا ویسے بھی

اس نے مجھ کو پڑھانا چھوڑ دیا

میں بڑا ہو گیا تھا ویسے بھی

کچھ مزاج آشنا نہ تھی دنیا

کچھ تعلق نیا تھا ویسے بھی

کچھ ضروری نہیں تھے درد و الم

میں اسے پوجتا تھا ویسے بھی

چاند شامل ہوا صفِ شب میں

دن اکیلا کھڑا تھا ویسے بھی

ذکر چل نکلا خوبروئی کا

یاد وہ آ رہا تھا ویسے بھی

میں اکیلا کبھی نہیں سویا

میں نے اس کو کہا تھا ویسے بھی

اس نے چاہا نہیں مجھے منصور

میں کسی اور کا تھا ویسے بھی

منصور آفاق

اسے تھا مسئلہ محفل کے اہتمام پہ بھی

دسمبر 1, 2007منصور آفاق،شعراء،غزللگام،مقام،نام،نظام،کلام،اہتمام،دوام،شامadmin

منصور آفاق ۔ غزل نمبر 475

کسی کے ساتھ چلا آیا اختتام پہ بھی

اسے تھا مسئلہ محفل کے اہتمام پہ بھی

اثر پذیری کے قصے میں کتنی باتیں ہیں

کلام پہ بھی ہے موقوف ہم کلام پہ بھی

دورد آیتِ الہام پہ کروڑوں ہوں

سلامتی ہو مرے مصرعِ دوام پہ بھی

مرے وجود میں مدغم وجود کیا کرتا

وہ میرے ساتھ جھگڑتا رہا ہے نام پہ بھی

رواں ہے اشہبِ دوراں خدا کی مرضی سے

ہیں پا رکاب میں اور ہاتھ ہیں لگام پہ بھی

ہے جنگ فلسفۂ فکر کے پہاڑوں پر

تصادم ایک نئے عالمی نظام پہ بھی

بپا ہے وادئ تاریخ میں بھی آویزش

لڑائی محنت و سرمایہ کے مقام پہ بھی

وطن بھی میرے ملالوں کی داستاں منصور

اداسیوں کی حکومت خرامِ شام پہ بھی

منصور آفاق

ہے اعتراض فلسطین کے مکین پہ بھی

دسمبر 1, 2007منصور آفاق،شعراء،غزلمکین،متین،بہترین،دین،زمینadmin

منصور آفاق ۔ غزل نمبر 474

حجاب پہ بھی ہے اور چادرِ مہین پہ بھی

ہے اعتراض فلسطین کے مکین پہ بھی

جدال ایک نظامِ معاش پر بھی ہے

جہاد قضیۂ ملکیتِ زمین پہ بھی

ہے پیداوار کے سرچشموں پہ بھی ٹکراؤ

ہے ایک غزوہ جہاں میں فروغِ دین پہ بھی

وہ کور چشم مرے عہد کے خدا جن کو

دکھائی داغ دئیے صبحِ بہترین پہ بھی

مرے لئے تو وہ پیشانیاں سیہ منصور

شکن شکن ہوئیں جو لہجۂ متین پہ بھی

منصور آفاق

قیام روشنی کرتی رہی صدف میں بھی

دسمبر 1, 2007منصور آفاق،شعراء،غزلہدف،نجف،حلف،صدف،طرفadmin

منصور آفاق ۔ غزل نمبر 473

مقیم صبح مری چاند کے شرف میں بھی

قیام روشنی کرتی رہی صدف میں بھی

میں تیرا ساتھ صداقت کو چھوڑ کر دونگا

کہا نہیں ہے یہ میں نے کسی حلف میں بھی

لڑائی ایک صلیب و ہلال میں بھی ہے

ہے اس طرف میں بھی پیکار اس طرف میں بھی

ہے گولہ باری مسلسل غزہ کی پٹی میں

بپا ہے معرکۂ خیر و شر نجف میں بھی

تمام عمر کی خود پہ ہی فائرنگ منصور

قیام میرا رہا ہے مرے ہدف میں بھی

منصور آفاق

پھر اس کے بعد کسی دن بدل گئے ہم بھی

دسمبر 1, 2007منصور آفاق،شعراء،غزللگے،کے،گئے،پڑے،بھرے،تھے،رہےadmin

منصور آفاق ۔ غزل نمبر 472

اسے بدلتے ہوئے دیکھتے رہے ہم بھی

پھر اس کے بعد کسی دن بدل گئے ہم بھی

اکیلے رہنے کی عادت نہ تھی سو عرصے تک

بغیر اس کے پریشاں بہت رہے ہم بھی

سمیٹ رکھے تھے بارش کے اشک پتوں نے

کچھ ایسا پارک کا موسم تھا رو پڑے ہم بھی

لپیٹ رکھی ہے پت چھڑ کی شال برسوں سے

کبھی بہارمیں ہوتے ہرے بھرے ہم بھی

قریب ہوتے گئے ایک خالی رستے پر

ملول وہ بھی بہت تھی اداس تھے ہم بھی

اسے بھی نیند سے شاید کوئی عداوت تھی

پرانے جاگنے والے تھے رات کے ہم بھی

وہ آتے جاتے ہمیں دیکھنے لگی منصور

پھر اس کے بارے میں کچھ سوچنے لگے ہم بھی

منصور آفاق

اچھی مجھے اداسی شروعات میں لگی

دسمبر 1, 2007منصور آفاق،شعراء،غزللباسی،پیاسی،اداسی،باسی،بدحواسی،خداسی،داسی،سی،عباسیadmin

منصور آفاق ۔ غزل نمبر 471

معصوم ،دلرباسی شروعات میں لگی

اچھی مجھے اداسی شروعات میں لگی

چاروں طرف سیاہ سمندر تھا بعد میں

بھیگی ہوئی ہوا سی شروعات میں لگی

پھر ڈر گیا چڑیل کی بدروح دیکھ کر

اچھی وہ خوش لباسی شروعات میں لگی

پھر جھرجھری سی آگئی سایوں کے خوف سے

تنہائی کچھ خداسی شروعات میں لگی

پھر ہو گئی سموتھ سمندر سی کیفیت

جذبوں کو بدحواسی شروعات میں لگی

پھر اپنی تشنگی کا مجھے آ گیا خیال

صحرا کی ریت پیاسی شروعات میں لگی

کچھ دیر میں میڈونا کی تصویر بن گئی

وہ ناصرہ عباسی شروعات میں لگی

پھر یوں ہوا کہ مجھ کو پجاری بنا دیا

وہ مجھ کو دیو داسی شروعات میں لگی

خانہ بدوش تھی کوئی منصور زندگی

وہ بستیوں کی باسی شروعات میں لگی

منصور آفاق

یعنی ہے ایک کوچۂ ماتم میں زندگی

دسمبر 1, 2007منصور آفاق،شعراء،غزلہم،موسم،ماتم،دم،عالم،غمadmin

منصور آفاق ۔ غزل نمبر 470

گزری تمام ماہِ محرم میں زندگی

یعنی ہے ایک کوچۂ ماتم میں زندگی

کیسا عجب تھا اس کی اچٹتی نظر کا فیض

ساری بدل گئی ہے مری دم میں زندگی

صحرا کی دو پہر سے مسلسل میں ہم کلام

پھرتی ہے دشت دشت شبِ غم میں زندگی

کچھ کچھ سرکتی ہے کوئی ٹوٹی ہوئی چٹان

چلتی نہیں فراق کے موسم میں زندگی

ہرشام ایک مرثیہ ہر صبح ایک بین

اک چیخ ہے شعور کے عالم میں زندگی

منصور دوگھروں میں ہے آباد ایک جسم

تقسیم آدھی آدھی ہوئی ہم میں زندگی

منصور آفاق

پھر وہی قوسِ قزح جیسی مصیبت ہو گی

دسمبر 1, 2007منصور آفاق،شعراء،غزلمصیبت،آفت،حکومت،رحمت،ضیافتadmin

منصور آفاق ۔ غزل نمبر 469

دستکیں کہتی ہیں پھر وہی قیامت ہو گی

پھر وہی قوسِ قزح جیسی مصیبت ہو گی

اگلا پھر بے بسی کا ہو گا وزیرِ اعظم

اگلی پھر بے کسی کی کوئی حکومت ہو گی

پھر غلط بول پڑے اپنے ذرائع ابلاغ

میڈیا والوں کی پھر ایک ضیافت ہو گی

پھر ہمیں فول بنائیں گے ہمارے ہیرو

پھر نیا قصہ ء غم پھرنئی آفت ہو گی

ریٹ ڈالر کا بڑھا دیں گے فرشتے منصور

پھر کسی کوٹھی پہ اللہ کی رحمت ہو گی

منصور آفاق

یہ لکڑی بھی گیلی ہو گی

دسمبر 1, 2007منصور آفاق،شعراء،غزللجیلی،نوکیلی،نیلی،نشیلی،گیلی،بخیلی،برفیلی،تفصیلی،تیلی،تبدیلی،سریلی،سردیلی،شرمیلیadmin

منصور آفاق ۔ غزل نمبر 468

عمر دھویں سے پیلی ہو گی

یہ لکڑی بھی گیلی ہو گی

موت مرا معمول رہے گا

کوئی کہاں تبدیلی ہو گی

پھیل رہا ہے سرد رویہ

رات بڑی برفیلی ہو گی

ہجر کا اپنا ایک نشہ ہے

غم کی شام نشیلی ہو گی

میں نے سگریٹ سلگانا ہے

ماچس میں اک تیلی ہو گی

غالب کے قہوہ خانے میں

بات ذرا تفصیلی ہو گی

اچھی طرح سے بال سکھا لے

تیز ہوا سردیلی ہو گی

ہفتوں بعد ہے نکلا سورج

دھوپ بہت نوکیلی ہو گی

کال آئی ہے امریکہ سے

موسم میں تبدیلی ہو گی

گرم دسمبر کے پہلو میں

جسم کی آگ لجیلی ہو گی

نوٹ پیانو کے سُن سُن کر

رم جھم اور سریلی ہو گی

دن بھی ہو گا آگ بگولا

رات بھی کالی نیلی ہو گی

اک اتوار ملے گی مجھ سے

اور بڑی شرمیلی ہو گی

شعر بنانا چھوڑ دے لیکن

یہ منصور بخیلی ہو گی

منصور آفاق

یہ رات چاند رات ہے کم آن سائیکی

دسمبر 1, 2007منصور آفاق،شعراء،غزلہیجان،نروان،وجدان،کپتان،پہچان،پریشان،امکان،آن،دیوان،دالان،رومان،سنسان،سامان،سرطان،طوفانadmin

منصور آفاق ۔ غزل نمبر 467

پہلو میں آ کہ اپنا ہو عرفان سائیکی

یہ رات چاند رات ہے کم آن سائیکی

میرے سگار میں رہے جلتے تمام عمر

احساس، خواب، آگہی، وجدان، سائیکی

اٹکا ہوا ہے خوف کے دھڑ میں مرا دماغ

وحشت زدہ خیال، پریشان سائیکی

باہر مرے حریمِ حرم سے نکل کے آ

اپنے چراغِ طور کو پہچان سائیکی

رستہ نجات کا ترے لاکٹ میں بند ہے

باہر کہیں نہیں کوئی نروان سائیکی

لاکھوں بلیک ہول ہیں مجھ میں چھپے ہوئے

میری خلاؤں سے بھی ہے سنسان سائیکی

کیا تُو برہنہ پھرتی ہے میری رگوں کے بیچ

میرے بدن میں کیسا ہے ہیجان سائیکی

خالی ہے دیکھ یاد کی کرسی پڑی ہوئی

سونا پڑا ہے شام کا دالان سائیکی

دریا نکل بھی سکتا ہے صحرائے چشم سے

تجھ میں دھڑکتا ہے کوئی طوفان سائیکی

یہ گیت یہ بہار یہ دستک یہ آہٹیں

یہ کیا کسی کا رہ گیا سامان سائیکی

یہ حسرتیں یہ روگ یہ ارماں یہ درد و غم

کرتی ہو جمع میر کا دیوان، سائیکی

شاخوں سے بر گ و بارکی امید کیا کروں

پہنچا ہوا جڑوں میں ہے سرطان سائیکی

ممکن ہے تجھ سے اپنی ملاقات ہوکبھی

موجود ہیں بڑے ابھی امکان سائیکی

گرداب کھینچ سکتے ہیں پاتال کی طرف

کوئی جہاز کا نہیں کپتان سائیکی

پھر ڈھونڈتا ہے تیرے خدو خال روح میں

منصور کا ہے پھر نیا رومان سائیکی

منصور آفاق

یعنی اُس یارِ طرح دار کے کھل جانے کی

دسمبر 1, 2007منصور آفاق،شعراء،غزلگرفتار،بازار،دیوار،دار،دستارadmin

منصور آفاق ۔ غزل نمبر 466

ہے توقع درِ انکار کے کھل جانے کی

یعنی اُس یارِ طرح دار کے کھل جانے کی

چلنا ہے بادِ محبت کی بلاخیزی میں

ہم کو پروانہیں دستار کے کھل جانے کی

ہم معاشرتی شبِ جبر میں کیا لکھیں گے

بات ہے دستِ گرفتار کے کھل جانے کی

شعلہ ء گل کا ابھی رقص دکھاتی ہوں تجھے

اک ذرادیر ہے بازار کے کھل جانے کی

لوگ منصور پلٹ جاتے ہیں دروازوں سے

ہم کو امید ہے دیوار کے کھل جانے کی

منصور آفاق

پھر ایک پوری دیانت سے رات پوری کی

دسمبر 1, 2007منصور آفاق،شعراء،غزلفرات،واردات،کائنات،انبساط،احتیاط،بات،برات،حیات،ذات،راتadmin

منصور آفاق ۔ غزل نمبر 465

اک ایک سایہ ء ہجراں کے ساتھ پوری کی

پھر ایک پوری دیانت سے رات پوری کی

میں ایک کُن کی صدا تھا سو عمر بھر میں نے

ادھوری جو تھی پڑی کائنات پوری کی

عجیب عالمِ وحشت، عجیب دانائی

کبھی بکھیرا، کبھی اپنی ذات پوری کی

تھلوں کی ریت میں بو بو کے پیاس کے کربل

پھر آبِ سندھ نے رسمِ فرات پوری کی

پلک پلک پہ ستارے رکھے سہاگ کی رات

نہ پوچھ چاند کی کیسے برات پوری کی

کئی برس سے ادھوری پڑی تھی، سو میں نے

یہ مانگ تانگ کے سانسیں ، حیات پوری کی

یہ اور بات کہ دل میں اتر گیا پھر بھی

کسی سے ملتے ہوئے احتیاط پوری کی

یہ اور بات کہ آنسو ورق ورق پہ رکھے

کتابِ فلسفہء انبساط پوری کی

یہ اور بات کہ کام آ گئی کوئی نیکی

اُس اجنبی نے مگر واردات پوری کی

ہزار کہہ کے بھی میں کچھ نہ کہہ سکا منصور

کہا نہ کچھ بھی مگر اس نے بات پوری کی

منصور آفاق

بہنے لگی رگوں میں کرن اشتعال کی

دسمبر 1, 2007منصور آفاق،شعراء،غزلملال،وصال،اشتعال،دھمال،زوالadmin

منصور آفاق ۔ غزل نمبر 464

تشریف آوری تھی چراغِ خیال کی

بہنے لگی رگوں میں کرن اشتعال کی

شاید جنم جنم کی اداسی ہے میرے ساتھ

صدیاں پڑی ہیں صحن میں شامِ ملال کی

میں نے تمام عمر گزاری شبِ فراق

میں شکل جانتا نہیں صبحِ وصال کی

ہے کوئی مادھولال میرے انتظارمیں

آواز آرہی ہے کہیں سے دھمال کی

پچھلے پہر میں گزری ہے منصور زندگی

میری شریکِ عمر ہے ساعت زوال کی

منصور آفاق

کھلے گلے کی پہن کر قمیض ململ کی

دسمبر 1, 2007منصور آفاق،شعراء،غزلململ،منگل،چھل،چاول،ڈھل،کمبل،کاجل،پیتل،تھل،جنگلadmin

منصور آفاق ۔ غزل نمبر 463

گرا کے پھول اٹھائے کوئی کڑی تھل کی

کھلے گلے کی پہن کر قمیض ململ کی

ابھی تو پاؤں میں باقی ہے ہجر کا ہفتہ

پڑی ہے راہ ابھی ایک اور منگل کی

حنائی ہاتھ پہ شاید پلیٹ رکھی تھی

ہوا کے جسم سے خوشبو اٹھی تھی چاول کی

بچھی ہوئی ہیں سحر خیزیوں تلک آنکھیں

ملی ہوئی ہے شبوں سے لکیر کاجل کی

لیا ہے شام کا شاور ابھی ابھی کس نے

گلی میں آئی ہے خوشبو کہاں سے جل تھل کی

شفق کے لان میں صدیوں سے شام کی لڑکی

بجا رہی ہے مسلسل پرات پیتل کی

نکھر نکھر گیا کمرے میں رنگ کا موسم

ذرا جو شال بدن کے گلاب سے ڈھلکی

کسی کو فتح کیا میں نے پیاس کی رت میں

اڑے جو کارک تو شمپین جسم پر چھلکی

چھتوں پہ لوگ اٹھائے ہوئے تھے بندوقیں

تمام شہر پہ اتری تھی رات جنگل کی

جھلس گیا تھا دسمبر کی رات میں منصور

وہ سرسراتی ہوئی آگ تیرے کمبل کی

منصور آفاق

وہ جان دے کے اپنی کسی نے ہے عید کی

دسمبر 1, 2007منصور آفاق،شعراء،غزلفرید،یزید،کشید،پلید،امید،بعید،خرید،عیدadmin

منصور آفاق ۔ غزل نمبر 462

قربانی کر قبول، اے مولا شہید کی

وہ جان دے کے اپنی کسی نے ہے عید کی

اب تو معاف امتِ وسطی کا جرم کر

کر دے جہاں میں ختم حکومت یزید کی

روہی کی ایک صبح کا درشن سا ہو گیا

میں سن رہا تھا رات کو کافی فرید کی

آتی ہوئی رتوں کا کسی کو نہیں خیال

کرتے ہیں گفتگو سبھی ماضی بعید کی

لعنت ہزار ایسی حکومت پہ بار بار

جمہوریت کی اس نے ہے مٹی پلید کیٍ

لے کر ہوا اڑے گی کسی روز تو اسے

میں نے تمام عمر جو خوشبو کشید کی

میں پڑھ رہا ہوں پچھلے زمانے کی سرگزشت

میں نے مگرکتاب غزل کی خرید کی

منصور بے چراغ مکانوں کی سمت دیکھ

وہ سو گئی ہے آخری بستی امید کی

منصور آفاق

تاریک مکانوں میں جتنی کہیں حیثیت دیوار کے روزن کی

دسمبر 1, 2007منصور آفاق،شعراء،غزلمومن،تمدن،توازن،جیون،روزنadmin

منصور آفاق ۔ غزل نمبر 461

تحقیق کہ دنیا میں بس وسعتیں اتنی ہیں ادراک کے دامن کی

تاریک مکانوں میں جتنی کہیں حیثیت دیوار کے روزن کی

میں شکل بناتا ہوں تعمیری رویوں کی کیوں اسکی وساطت سے

صحرائی بگولوں میں جو گھومتی رہتی ہے اک آنکھ توازن کی

سفاک پہاڑوں پراگتی ہوئی بھیڑوں سے جو اون نکلتی ہے

تقویم کے چرخے پرمیں اس سے بناتا ہوں اک شال تمدن کی

پھر ہاتھ میں دل لے کرٹکراتا ہو ں ممکن سے موجود کے کمرے میں

تقدیر کے فرغل سے بس موت دکھائی دے تصویر میں جیون کی

تہذیبِ محمدﷺکی کرتا ہوں نگہبانی اقراء کی علامت سے

منصور جہاں بھی ہے یہ حرف کا سرمایہ میراث ہے مومن کی

منصور آفاق

چلتی ہے کتنے پہر کسی ذات کی گھڑی

دسمبر 1, 2007منصور آفاق،شعراء،غزلفتوحات،ملاقات،مناجات،مکافات،مدارات،اوقات،آیات،حوالات،حالات،ذات،سماواتadmin

منصور آفاق ۔ غزل نمبر 460

کچھ کہہ رہی ہے مجھ سے ترے ہاتھ کی گھڑی

چلتی ہے کتنے پہر کسی ذات کی گھڑی

لیکن میں روک سکتانہیں رات کی گھڑی

دیوار پر لگادی ہے اوقات کی گھڑی

باہر سے لوٹ جائے وہ مہتاب کی کرن

اب ختم ہوچکی ہے ملاقات کی گھڑی

اچھی ہیں یار کی متلون مزاجیاں

ممکن ہے پھر وہ آئے مدارات کی گھڑی

بہتا ہے میرے سینے میں اک چشمۂ دعا

ٹھہری ہوئی ہے مجھ میں مناجات کی گھڑی

یہ اور بات دیکھ کے پہچانتے نہیں

آتی ہے روز، روزِ مکافات کی گھڑی

دیکھو ازل نژاد ہے چلتی ہوئی ہوا

سمجھو ابد خرام ہے آیات کی گھڑی

اب ختم ہورہی ہے مشقت نصیب کی

چلنے پہ آگئی ہے حوالات کی گھڑی

گھڑیال مسجدوں کے بتاتے ہیں اور وقت

کچھ اور کہہ رہی ہے سماوات کی گھڑی

اعمال دیکھ کر مرے آقائے لوح نے

امت سے چھین لی ہے فتوحات کی گھڑی

منصور بہہ رہا ہے مرے وقت سے لہو

چلتی سدا ہے زخم میں حالات کی گھڑی

منصور آفاق

پھر زندگی کی شہر میں تحریک چل پڑی

دسمبر 1, 2007منصور آفاق،شعراء،غزلٹھیک،تاریک،تبریک،تحریک،تشکیکadmin

منصور آفاق ۔ غزل نمبر 459

جب اُس جمالِ صبح کی بوتیک چل پڑی

پھر زندگی کی شہر میں تحریک چل پڑی

اُس دلنواز شخص کی آمد کے ساتھ ساتھ

میرے مکان سے شبِ تاریک چل پڑی

نکلا بس ایک اسم افق کی کتاب سے

تاویلیں سب سمیٹ کے تشکیک چل پڑی

جس کیلئے سڑک پہ لڑا تھا میں وقت سے

بس بھیج کے وہ ہدیہ ء تبریک چل پڑی

منصور بس اتر کے گیا تھا وہ کج نہاد

گاڑی پھر اس کے بعد مری ٹھیک چل پڑی

منصور آفاق

یہ عجب تم نے نکالی ہے شریعت اپنی

دسمبر 1, 2007منصور آفاق،شعراء،غزلمثالی،نکالی،نرالی،والی،بلالیadmin

منصور آفاق ۔ غزل نمبر 458

ذبح خانے سی بنالی ہے شریعت اپنی

یہ عجب تم نے نکالی ہے شریعت اپنی

قتل منسون ،دھماکے جائز، تاوان حلال

ان دنوں دیکھنے والی ہے شریعت اپنی

کعبۂ دل کی ہے بس فرض مسلسل صلوات

عشق میں کیسی مثالی ہے شریعت اپنی

ہم غلامانِ محمدﷺ ہیں ، علی کے بھی غلام

بس طریقت میں بلالی ہے شریعت اپنی

کون مسجد میں در آیا ہے ہماری منصور

کس نے منبر سے چرالی ہے شریعت اپنی

منصور آفاق

یعنی کہ میں اکیلا ہوں درویش آدمی

دسمبر 1, 2007منصور آفاق،شعراء،غزلاپدیش،بیش،خویش،درویش،درپیشadmin

منصور آفاق ۔ غزل نمبر 457

اس عہدِ بے شرف میں شرف کیش آدمی

یعنی کہ میں اکیلا ہوں درویش آدمی

مانا ہیں آسماں سے مراسم رکھے ہوئے

میرا قبیلہ خاک ، مرا خویش آدمی

جو کاٹتا رہا ہے مجھے سانپ کی طرح

لگتا تھا آنکھ سے تو کم و بیش آدمی

اس کو خبر نہیں ہے حیات و ممات کی

جو کائنات کے نہیں درپیش آدمی

کچھ بول اس شعور کی اندھی گپھا میں

منصور کوئی دیتا ہے اپدیش آدمی

منصور آفاق

پڑھ کے کلامِ فیض جو پھونکا شفا ملی

دسمبر 1, 2007منصور آفاق،شعراء،غزلواسطہ،ابتدا،بقا،تجربہ،دعا،شفا،صباadmin

منصور آفاق ۔ غزل نمبر 456

اک حبس کے مریض کو تازہ ہوا ملی

پڑھ کے کلامِ فیض جو پھونکا شفا ملی

کل رات باغ میں مجھے پتوں کے دکھ ملے

لیکن وہاں سے نکلا توبادِ صبا ملی

کیسے کروں وسیلے کی عظمت سے انحراف

مجھ کو خدا کی ذات بھی بل واسطہ ملی

اک دن ملا بہار میں ہنستا ہوا مجھے

اک شام غم کا کرتی ہوئی تجربہ ملی

بولیں گے جبرائیل بھی میرے وجود میں

مجھ کو کسی فقیر سے جس دن دعا ملی

شہرِ ابد نژاد ابھی کتنا دور ہے

پوچھوں گا کائنات کی جو ابتدا ملی

منصور میں نے بانٹ دی خستہ حروف میں

مجھ کو جو آسماں سے شرابِ بقا ملی

منصور آفاق

اٹھ گئے ہم کہ کوئی بات تھی ہونے والی

دسمبر 1, 2007منصور آفاق،شعراء،غزلمفاجات،ملاقات،مناجات،مات،مدارات،بات،برسات،جنسجمادات،حالات،خیرات،رات،سماوات،ساتھadmin

منصور آفاق ۔ غزل نمبر 455

اک تعلق کی شروعات تھی ہونے والی

اٹھ گئے ہم کہ کوئی بات تھی ہونے والی

لوح پر دیکھ لیا مشرق و مغرب کا نصیب

بس کہیں صبح ، کہیں رات تھی ہونے والی

دیکھنے والا تھا، پھر مڑکے، کوئی ایک نظر

کیا ہوا ، دید کی خیرات تھی ہونے والی

اپنے قہوے کا سماوار ابھی ٹھنڈا تھا

اور مسجد میں مناجات تھی ہونے والی

لینے آئے ہوئے تھے رومی و اقبال ہمیں

اپنی باہو سے ملاقات تھی ہونے والی

کیا ہوا ، وقت بدلنے کی خبر آئی تھی

وا کہیں چشمِ سماوات تھی ہونے والی

تم نہ ملتے تو یہاں سے بھی ہمیں جانا تھا

ایسی کچھ صورتِ حالات تھی ہونے والی

اب جہاں دھوپ نکل آئی ہے کنجِ لب سے

کچھ ہی پہلے یہاں برسات تھی ہونے والی

اس کے کہنے پہ بدل آئے ہیں رستہ اپنا

جب محبت میں اسے مات تھی ہونے والی

ہم چلے آئے ہیں اُس حسن کے دستر خواں سے

جب ہماری بھی مدارات تھی ہونے والی

قتل نامہ تھا کہ جلاد نے ڈھاڑیں ماریں

کیسی اک مرگِ مفاجات تھی ہونے والی

ارتقاء آخری منزل پہ تھا میرا اُس وقت

خلق جب جنسِجمادات تھی ہونے والی

میں پلٹ آیا ہوں منصور ’’مقامِ ہو‘‘ سے

اک عجب بات مرے ساتھ تھی ہونے والی

منصور آفاق

ہر ایک لمس پہ اتریں مصیبتیں کیسی

دسمبر 1, 2007منصور آفاق،شعراء،غزلمحبتیں،مصیبتیں،نزاکتیں،اجازتیں،رفاقتیں،رقابتیں،راحتیں،صحبتیںadmin

منصور آفاق ۔ غزل نمبر 454

پڑاؤ کیسے بدن کے مسافتیں کیسی

ہر ایک لمس پہ اتریں مصیبتیں کیسی

مخالفین میں لختِ جگر بھی شامل ہیں

مرے نصیب میں آئیں رقابتیں کیسی

کسی کو بیٹھنے اٹھنے کا کیا سلیقہ ہے

یہ گفتگو میں کسی کی نزاکتیں کیسی

نگار خانہ جاں کے فراق سے پہلے

میں کہہ رہا تھا کسی سے محبتیں کیسی

بس اک فریب سے بہلا رہا ہوں چشم ولب

ترے بغیر جہاں بھر کی راحتیں کیسی

اگر ہے جرم، تجھے چھو کے دیکھ لینا بھی

تو ساتھ رہنے کی مجھ کو اجازتیں کیسی

جلو میں گھومتی پھرتی ہے نازنینوں کے

مری غزل کی پری چہرہ صحبتیں کیسی

کسی مقام پہ رکتا نہیں کوئی منصور

تعلقات ہیں کیسے رفاقتیں کیسی

منصور آفاق

محبت ہے تو ہو کنفرم تھوڑی سی

دسمبر 1, 2007منصور آفاق،شعراء،غزلنرم،کنفرم،گرم،پرم،دھرم،سرگرمadmin

منصور آفاق ۔ غزل نمبر 453

اتاریں اب بدن کی شرم تھوڑی سی

محبت ہے تو ہو کنفرم تھوڑی سی

ضروری ہے لہو میں آگ بھی لیکن

سبک اندام تھوڑی، نرم تھوڑی سی

چل اپنے سادہ و معصوم سے دل پر

چڑھا لے بھیڑے کی چرم تھوڑی سی

اب اپنا قتل کرنا چاہتا ہوں میں

اجازت دے مجھے اے دھرم تھوڑی سی

’بیا جاناں بصد سامانِ رسوائی ‘

خموشی ہے، خبر ہو گرم تھوڑی سی

کسی کے نرم و نازک جسم سے مل کر

ہوئی ہے آتما بھی پرم تھوڑی سی

سکوتِ شام جیسی ایک دوشیزہ

محبت میں ہوئی سرگرم تھوڑی سی

منصور آفاق

اُس جیسی ایک اور قیامت دکھائی دی

دسمبر 1, 2007منصور آفاق،شعراء،غزلقیامت،قامت،قدامت،ندامت،کرامت،سلامت،علامتadmin

منصور آفاق ۔ غزل نمبر 452

آب رواں میں پھر نئی شامت دکھائی دی

اُس جیسی ایک اور قیامت دکھائی دی

اس کے خیال بھی تھے پرانے ، بہت قدیم

اس کے لباس میں بھی قدامت دکھائی دی

تقریبِ گل میں سرو کئی آئے تھے مگر

ہر سمت تیری رونقء قامت دکھائی دی

پہلے بدن کا معجزہ دیکھا نگاہ نے

پھر گفتگو میں ایک کرامت دکھائی دی

میں نے بھلا دیں ساری گذشتہ کی تلخیاں

تھوڑی سی اُس نظر میں ندامت دکھائی دی

جاری ہے ٹوٹ پھوٹ وجود و شہود میں

کوئی کہیں بھی شے نہ سلامت دکھائی دی

منصور چپ کھڑی تھی کہیں شام کی کرن

چھیڑا توزندگی کی علامت دکھائی دی

منصور آفاق

جاں لباس مجاز میں رکھ دی

دسمبر 1, 2007منصور آفاق،شعراء،غزللحاظ،مجاز،محاذ،نماز،نواز،نیاز،گداز،بیاض،باز،جواز،دراز،راز،ساز،سرفراز،عکاظadmin

منصور آفاق ۔ غزل نمبر 451

بس کسی اعتراض میں رکھ دی

جاں لباس مجاز میں رکھ دی

رات کھولے تھے کچھ پرانے خط

پھر محبت دراز میں رکھ دی

یادِ یاراں نے پھر وہ چنگاری

ایک مردہ محاذ میں رکھ دی

یوں تو سب کچھ کہا مگر اس نے

راز کی بات راز میں رکھ دی

تان لی تھی رقیب پر بندوق

ربطِ جاں کے لحاظ میں رکھ دی

کس نے تیرے خیال کی دھڑکن

دست طبلہ نواز میں رکھ دی

شرٹ ہینگر پہ ٹانک دی میں نے

اور لڑکی بیاض میں رکھ دی

اس نے پستی گناہ کی لیکن

ساعتِ سرفراز میں رکھ دی

مرنے والا نشے میں لگتا تھا

کیسی مستی نماز میں رکھ دی

رات آتش فشاں پہاڑوں کی

اپنے سوز و گداز میں رکھ دی

کس نے سورج مثال تنہائی

میری چشم نیاز میں رکھ دی

داستاں اور اک نئی اس نے

میرے غم کے جواز میں رکھ دی

مسجدوں میں دھمال پڑتی ہے

کیفیت ایسی ساز میں رکھ دی

پھر ترے شاعرِ عجم نے کوئی

نظم صحنِ عکاظ میں رکھ دی

کس نے پہچان حسن کی منصور

دیدۂ عشق باز میں رکھ دی

منصور آفاق

بمباری نے کرنوں بھری تاریخ بجھا دی

دسمبر 1, 2007منصور آفاق،شعراء،غزللگا،ملا،منا،وا،بہا،بجھاadmin

منصور آفاق ۔ غزل نمبر 450

آثارِ قدیمہ ، مری تہذیب مٹا دی

بمباری نے کرنوں بھری تاریخ بجھا دی

وہ بھی تو درِ کعبہ پہ سجاآتے تھے نظمیں

میں نے بھی اباسین میں اک نظم بہادی

جو علم کے معروف سمندر ہیں انہوں نے

اک آگ کتب خانۂ دجلہ میں لگادی

اطلاع کی کوئی بیل نہ بجی خانۂ دل میں

اخبار بھی کرتے رہے تصویری منادی

یہ ڈیڑھ ارب بھوک زدہ آدمی کیوں ہیں

کچھ بول چناروں بھری کشمیر کی وادی

پھر رات کی چادر پہ ابھر آئے ستارے

پھر روشنی منصور اندھیرے میں ملادی

منصور آفاق

چاندکی شمع آخر بجھائی گئی

دسمبر 1, 2007منصور آفاق،شعراء،غزللگائی،چلائی،گائی،بجھائی،جلائی،خدائی،سنائیadmin

منصور آفاق ۔ غزل نمبر 449

ایک امید کھڑکی سے آئی ، گئی

چاندکی شمع آخر بجھائی گئی

اپنے اندر ہی روتے سمندر رہے

کب کہانی کسی کو سنائی گئی

اس کے جانے پہ احساس کچھ یوں ہوا

اپنے پہلو سے اٹھ کر خدائی گئی

اپنے مژگاں میں آنسو پروتا رہا

یوں غزل بزم میں رات گائی گئی

تم یہود و نصاریٰ کی زرگاہ میں

بک گئے جب بھی بولی لگائی گئی

تم کرائے کے قاتل ہو حاکم نہیں

تم سے اپنوں پہ گولی چلائی گئی

آگ تھی غم کی منصور کافر نژاد

اس سے مسلم کی میت جلائی گئی

منصور آفاق

سفید آگ سیہ جین سے نکل آئی

دسمبر 1, 2007منصور آفاق،شعراء،غزلقالین،یاسین،اباسین،تلقین،توہین،تدفین،جین،دین،سین،طواسینadmin

منصور آفاق ۔ غزل نمبر 448

کلی لبادۂ تزئین سے نکل آئی

سفید آگ سیہ جین سے نکل آئی

دکھائی فلم کسی نے وصال کی پہلے

پھر اس کے بعد وہی سین سے نکل آئی

مرے خدا کی بھی قربان گاہ مٹی تھی

بہار پھول کی تدفین سے نکل آئی

اسے خرید لیا مولوی کفایت نے

جو نیکی سیٹھ کرم دین سے نکل آئی

چراغ لے کے میں بیٹھا ہی تھا کہ صبحِ ازل

خرامِ آبِ اباسین سے نکل آئی

مریدِ خاص ہوئی تخلیے کی آخرکار

خرد نصیحت و تلقین سے نکل آئی

حروف وردِ انا الحق پہ کرتے تھے مجبور

سو میری آنکھ طواسین سے نکل آئی

مجھے جگایا کسی نے یوں حسنِ قرات سے

کہ صبح سورۃ یاسین سے نکل آئی

گریزاں یار بھی تکرار سے ہوا کچھ کچھ

طبعیت اپنی بھی توہین سے نکل آئی

گزر ہوا ہے جہاں سے بھی فوج کا منصور

زمین گھاس کے قالین سے نکل آئی

منصور آفاق

کہ اوس اوس کلی بے لباسیوں سے ہوئی

دسمبر 1, 2007منصور آفاق،شعراء،غزللباسیوں،پیاسیوں،اداسیوں،حواسیوں،شناسیوںadmin

منصور آفاق ۔ غزل نمبر 447

وہ بر گزیدہ خطا رات عاصیوں سے ہوئی

کہ اوس اوس کلی بے لباسیوں سے ہوئی

ہر ایک صبح منور ہوئی ترے غم سے

ہر ایک شام فروزاں اداسیوں سے ہوئی

میں کھوجنے کے عمل میں شکار اپنا ہوا

مری اکیلگی چہرہ شناسیوں سے ہوئی

لپک کے بھاگ بھری نے کسی کو چوم لیا

گھٹا کی بات جو روہی کی پیاسیوں سے ہوئی

بہت سے داغ اجالوں کے رہ گئے منصور

جہاں میں رات عجب بد حواسیوں سے ہوئی

منصور آفاق

نیندوں کی بستیوں پہ مصیبت بنی ہوئی

دسمبر 1, 2007منصور آفاق،شعراء،غزلمحبت،مصیبت،برکت،صورت،ضرورت،عبرت،عزتadmin

منصور آفاق ۔ غزل نمبر 446

اس کی حرافہ یاد ہے آفت بنی ہوئی

نیندوں کی بستیوں پہ مصیبت بنی ہوئی

جلتی جہاں تھی آگ وہاں دیکھ تو سہی

اڑتی ہے راکھ، نوحۂ عبرت بنی ہوئی

وہ جمع لوگ ہیں کسی پاگل کے آس پاس

کوئی ہے انقلاب کی صورت بنی ہوئی

لگتا ہے تم ملاؤ گی اس کو بھی خاک میں

تھوڑی سی جو ہے شہر میں عزت بنی ہوئی

وہ اپنی خواہشوں کی ہے تکمیل کا چلن

جو چیز ہے جہاں میں محبت بنی ہوئی

ہر رات نظمِ تازہ اترتی ہے صحن میں

کیاہے جدائی باعثِ برکت بنی ہوئی

منصور رکھ د یا ہے اٹھا کرسٹور میں

پھرتی تھی وہ جو میری ضرورت بنی ہوئی

منصور آفاق

اک سیہ مورت سے مل کے صبح شرمندہ ہوئی

دسمبر 1, 2007منصور آفاق،شعراء،غزلمل،کھل،گل،پل،تل،دل،سل،ظلadmin

منصور آفاق ۔ غزل نمبر 445

کالکیں چہرے سے چھل کے صبح شرمندہ ہوئی

اک سیہ مورت سے مل کے صبح شرمندہ ہوئی

جس کی نس نس میں اندھیرے تھے تبسم آفریں

اس کلی کے ساتھ کھل کے صبح شرمندہ ہوئی

وہ مجسم رات وہ کالی صراحی کے خطوط

دامنِ خوباں میں سل کے صبح شرمندہ ہوئی

حسرتوں کی ٹھیکرے تھے، ڈھیر تھے افسوس کے

پھر کھنڈر میں آ کے دل کے صبح شرمندہ ہوئی

اس نے زلفوں کو بکھیرا اور سورج بجھ گیا

سامنے لہراتے ظل کے صبح شرمندہ ہوئی

ہر نمو مٹی کی کالی قبر سے آباد تھی

بیچ شہرِآب و گل کے صبح شرمندہ ہوئی

یار کے رخسار پر ہے اک عجب کالا گلاب

پھر مقابل ایک تل کے صبح شرمندہ ہوئی

کنجِ لب سے ہی نکلتی یار کے تو بات تھی

بس افق کے پاس کھل کے صبح شرمندہ ہوئی

جھانک سکتی ہی نہیں مٹی کے اندر روشنی

خاک پہ منصور پل کے صبح شرمندہ ہوئی

منصور آفاق

کچھ کہو وہ رت بدلنے پر پلٹ جانے کی عادت کیا ہوئی

دسمبر 1, 2007منصور آفاق،شعراء،غزلہجرت،قیامت،حرارت،روایت،عمارت،عادتadmin

منصور آفاق ۔ غزل نمبر 444

آب و دانہ کے لئے آئے پرندویہ سکونت کیا ہوئی

کچھ کہو وہ رت بدلنے پر پلٹ جانے کی عادت کیا ہوئی

چند دن وہ ساحلوں پر رکنے والے کیا ہوئے بحری جہاز

دور دیسوں کے سفر سے لوٹ آنے کی روایت کیا ہوئی

دیکھنے آئے تھے ہم کافر تو حسنِ کافرانہ کو مگر

اس گنہ آباد بستی میں مسلمانوں کی ہجرت کیا ہوئی

ساحلوں پر ڈوبتے سورج پہ اتری ہے کوئی پیتل کی کونج

سیپیاں چنتی ہوئی سر گرم کرنوں کی حرارت کیا ہوئی

ہو گئی بچی کی چھاتی تو سلگتے سگریٹوں سے داغ داغ

وہ جو آنی تھی زمیں پر آسمانوں سے قیامت کیا ہوئی

کیا ہوا وہ جنگ سے اجڑاہوابچوں بھرا منصورپارک

وہ کتابوں سے بھری تہذیب کی روشن عمارت کیا ہوئی

منصور آفاق

سب کچھ بدل کے رہ گیا تقصیر کیا ہوئی

دسمبر 1, 2007منصور آفاق،شعراء،غزلتقدیر،تقصیر،تحریر،تصویر،تعمیر،زنجیرadmin

منصور آفاق ۔ غزل نمبر 443

گھر لوٹنے میں اک ذرا تاخیر کیا ہوئی

سب کچھ بدل کے رہ گیا تقصیر کیا ہوئی

کمرے میں سن رہا ہوں کوئی اجنبی سی چاپ

دروازے پر لگی ہوئی زنجیر کیا ہوئی

وہ درد کیا ہوئے جنہیں رکھا تھا دل کے پاس

وہ میز پر پڑی ہوئی تصویر کیا ہوئی

جو گیت لا زوال تھے وہ گیت کیا ہوئے

وہ ریت پر وصال کی تحریر کیا ہوئی

ہر صبح دیکھتا ہوں میں کھڑکی سے موت کو

گرتے ہوئے مکان کی تعمیر کیا ہوئی

منصور اختیار کی وحشت کے سامنے

یہ جبرِ کائنات یہ تقدیر کیا ہوئی

منصور آفاق

جس کی جیب سے سگریٹ نکلے اس کے نام حشیش ہوئی

دسمبر 1, 2007منصور آفاق،شعراء،غزلبخشیش،تشویش،حشیش،ریش،شیشadmin

منصور آفاق ۔ غزل نمبر 442

پکڑے گئے ہم محشر میں اور ایسی غلط تفتیش ہوئی

جس کی جیب سے سگریٹ نکلے اس کے نام حشیش ہوئی

جاتے جاتے اس نے مڑ کرمیری جانب دیکھا تھا

گھنٹہ بھر تقریب تھی لیکن ایک نظر بخشیش ہوئی

دیواروں میں دیکھ کے اپنی شکل کے اتنے زیادہ عکس

اک بھولی بھالی سی ناگن شیش محل میں شیش ہوئی

دیوانے پن کے جنگل میں آنکھ کھلی تو علم ہوا

کپڑے لیراں لیراں اور بے ہنگھم اپنی ریش ہوئی

کس کی حکومت آئی ہے یہ کالک کیسی ہے منصور

آدھے دن تک رات جو دیکھی سورج کو تشویش ہوئی

منصور آفاق

پھر مری مجذوبیت افلاک کی گاہک ہوئی

دسمبر 1, 2007منصور آفاق،شعراء،غزلمسلک،کالک،گاہک،بالک،حدتک،زیرک،شکadmin

منصور آفاق ۔ غزل نمبر 441

نیلگوں دیوار پر اک بے صدا دستک ہوئی

پھر مری مجذوبیت افلاک کی گاہک ہوئی

پھر مجھے ابدال ہونے کا یقیں ہونے لگا

جب تلاش اپنی مکمل عرش کی حدتک ہوئی

میری چیخیں اپنی دھڑکن میں چھپا لیتی رہی

کس قدر اپنی سلگتی خامشی زیرک ہوئی

چاند تارے حسنِ فطرت کے تحائف ہو گئے

آسماں پر جب مکمل رات کی کالک ہوئی

میں نے جب سوچا، نہیں کوئی نہیں اسکا شریک

وہم ٹھہرا جسم اپنا جاں سراپا شک ہوئی

جس کے چاروں سمت ڈھلوانیں ہوں منہ کھولے ہوئے

زندگی اپنی وہی وحشت زدہ بالک ہوئی

ہم نفس میرے رہے منصور سقراط و حسین

روشنی مذہب ہوا اور چاندنی مسلک ہوئی

منصور آفاق

صحن میں اک چنبلی کی بوٹی ہوئی

دسمبر 1, 2007منصور آفاق،شعراء،غزللوٹی،ٹوٹی،بوٹی،جھوٹی،روٹھیadmin

منصور آفاق ۔ غزل نمبر 440

جاگ اٹھی جو قسمت تھی پھوٹی ہوئی

صحن میں اک چنبلی کی بوٹی ہوئی

صحنِ باغِ ارم کی ہیں رہداریاں

ہاتھیوں کے پڑاؤ سے ٹوٹی ہوئی

ہر طرف ہیں کھجوروں کے زخمی درخت

بستیاں ہیں مدینے کی لوٹی ہوئی

آسماں ہو گیا مہرباں خاک پر

لوٹ آئی ہے رُت کوئی روٹھی ہوئی

دل میں منصور خودکُش دھماکہ ہوا

اور پھر اپنی بن اطلاع جھوٹی ہوئی

منصور آفاق

دل کے قہوہ خانے میں بحث بھی بڑی ہوئی

دسمبر 1, 2007منصور آفاق،شعراء،غزللڑی،کھڑی،گڑی،گھڑی،پنکھڑی،اڑی،بڑی،جھڑیadmin

منصور آفاق ۔ غزل نمبر 439

یاد کے فلور پرچائے ہے پڑی ہوئی

دل کے قہوہ خانے میں بحث بھی بڑی ہوئی

پھانسیوں پہ جھولتی اک خبرہے موت کی

اپنی اپنی طے شدہ سوچ میں گڑی ہوئی

بدمزاج وقت ہے کچھ ملال خیز سا

اختتامِ سال سے شام ہے لڑی ہوئی

آتے جاتے دیکھ کر درد کچھ مرے ہوئے

اک الست مست کی ذات میں جھڑی ہوئی

بولتے تھے عادتاً کم بھرے ہوئے دماغ

دانش و شعور کی شوخ پنکھڑی ہوئی

آتی جاتی گاڑیاں موڑ کاٹنے لگیں

چلتے چلتے وہ گلی روڈ پر کھڑی ہوئی

چلنے والا تار پرمسخروں میں کھو گیا

جب صراطِ وقت پر آخری گھڑی ہوئی

آدمی کے گوشت کی ریشہ رشہ داستاں

صدرِ امن گاہ کے دانت میں اڑی ہوئی

منصور آفاق

روہی دو فرلانگ ہوئی

دسمبر 1, 2007منصور آفاق،شعراء،غزلفرلانگ،مانگ،چھلانگ،تانگ،رانگ،سوانگ،سانگadmin

منصور آفاق ۔ غزل نمبر 438

پیر فرید کی بانگ ہوئی

روہی دو فرلانگ ہوئی

آنکھ سے دیکھا باہو کی

دنیا ایک سوانگ ہوئی

شاہ حسین کی بستی میں

مادھولال کی مانگ ہوئی

بول وہ بلھا بول گیا

پار جگر کے سانگ ہوئی

اربوں سال کی تنہائی

اپنی ایک چھلانگ ہوئی

بات ہوئی بس اوروں سے

کال ہمیشہ رانگ ہوئی

کوئی کہاں منصور ملا

عمر سراپا تانگ ہوئی

منصور آفاق

پھر آنسوئوں کا وہ اسراف کر رہا ہے کوئی

دسمبر 1, 2007منصور آفاق،شعراء،غزلانصاف،اوصاف،آہ،اسراف،اصراف،صافadmin

منصور آفاق ۔ غزل نمبر 437

دریچے یاد کے شفاف کر رہا ہے کوئی

پھر آنسوئوں کا وہ اسراف کر رہا ہے کوئی

نکھرتی جاتی ہے شبنم اداس آنکھوں میں

کسی گلاب کو سی آف کر رہا ہے کوئی

گرا رہے ہیں در و بام چند بلڈوزر

سنا ہے شہر مرا ، صاف کر رہا ہے کوئی

بتا رہا ہے بدن کی نزاکتوں کا ناپ

بیان حسن کے اوصاف کر رہا ہے کوئی

بڑھا رہا ہے سرِشام وصل کی خواہش

وہ روشنی کا سوئچ آف کر رہا ہے کوئی

وہ لکھ رہا ہے کہ کرنا ہے رات کو کیا کیا

شبِفراق کا اصراف کر رہا ہے کوئی

بڑھارہا ہے محبت کے وائرس منصور

شبِ وصال سے انصاف کر رہا ہے کوئی

منصور آفاق

عشق فرمائے جہاں میں ہوں وہیں ہے کوئی

دسمبر 1, 2007منصور آفاق،شعراء،غزلنہیں،وہیں،کہیں،جبیں،زمیںadmin

منصور آفاق ۔ غزل نمبر 436

شیخ صاحب کہے افلاک نشیں ہے کوئی

عشق فرمائے جہاں میں ہوں وہیں ہے کوئی

پاؤں پڑتی ہے ازل کی صبح انوار فروش

چہرۂ برقِ تجلیٰ کی جبیں ہے کوئی

جانتا ہوں میں محمدﷺکے وسیلے سے اسے

مجھ کو محسوس نہیں ہوتا کہیں ہے کوئی

ذرے ذرے میں دھڑ کتا ہے وہ مشعوقِ ازل

کرسی و عرش و سموات و زمیں ہے کوئی

کیسی یکتائی کا احساس مجھے ہے منصور

ایک بس اس کے سوا میرا نہیں ہے کوئی

منصور آفاق

ہے مرے تعاقب میں ، نیند کے بس سٹاپ سے کوئی

دسمبر 1, 2007منصور آفاق،شعراء،غزلالاپ،آپ،بھاپ،تھاپ،سٹاپ،شاپadmin

منصور آفاق ۔ غزل نمبر 435

آشنا سا لگتا ہے اپنی پُر خواب چاپ سے کوئی

ہے مرے تعاقب میں ، نیند کے بس سٹاپ سے کوئی

موسمِ جدائی کی تنگ تھا زرد سی طوالت سے

رُت خرید لایا ہے وصل کی، لمس شاپ سے کوئی

قوس قوس آوازیں دور تک دائرے بناتی تھیں

لکھ رہا تھا کمرے میں گیت سا کیا الاپ سے کوئی

رقص کے الاؤ میں ڈوب کر پاؤں سے کلائی تک

جل اٹھا تھا ڈھولک کی نرم سی تیز تھاپ سے کوئی

سردیوں کی برفانی صبح میں گرم گرم سے بوسے

پھینکتا تھا ہونٹوں کی برف سی سرد بھاپ سے کوئی

جو کہیں نہیں موجود، روح کے آس پاس میں منصور

پوچھتا رہا اس کا، دیر تک اپنے آپ سے کوئی

منصور آفاق

آنکھ میں گلستاں کھلے کوئی

دسمبر 1, 2007منصور آفاق،شعراء،غزلقافلے،لے،ولولے،کھلے،گلے،بلے،حوصلے،سلسلےadmin

منصور آفاق ۔ غزل نمبر 434

چاہتا ہوں کہیں ملے کوئی

آنکھ میں گلستاں کھلے کوئی

رکھ گیا ہاتھ کی لکیروں میں

راستوں کے یہ سلسلے کوئی

میرے دل کا بھی بوجھ ہلکا ہو

میرے بھی تو سنے گلے کوئی

اس لئے میں بھٹکتا پھرتا ہوں

مجھ کو گلیوں میں ڈھونڈھ لے کوئی

کیا کروں ہجر کے جزیرے میں

لے گیا ساتھ حوصلے کوئی

اس کے آنے کی صرف افواہ پر

دیکھتا دل کے ولولے کوئی

یار آتا میرے علاقے میں

خیمہ زن ہوتے قافلے کوئی

گرمیٔ لمس کے مجھے منصور

بخش دے پھر سے آ بلے کوئی

منصور آفاق

نہیں ہے اور کہ میرا نہیں بدل کوئی

دسمبر 1, 2007منصور آفاق،شعراء،غزلمحل،پنل،اجل،بیربل،بدل،حل،خلل،عمل،غزلadmin

منصور آفاق ۔ غزل نمبر 433

مجھ ایسا غیر پسندیدہ بے محل کوئی

نہیں ہے اور کہ میرا نہیں بدل کوئی

گزار اعمرنہ سنجیدگی کے صحرا میں

ضروری ہے تری محفل میں بیربل کوئی

پھٹی ہوئی کسی چادر سے ڈھانپ دیتے ہیں

تلاش کرتے نہیں مسئلے کا حل کوئی

فنانژاد علاقہ ہے میری مٹی کا

نکال سکتا نہیں خاک سے اجل کوئی

یہ پوچھتا تھا کوئی اور بھی ہے میرے سوا

ملاتھا دشتِ جنوں میں مجھے پنل کوئی

اسی جریدۂ کون و مکاں کی سطروں میں

چھپی ہوئی ہے مرے واسطے غزل کوئی

نجانے کون شہادت سے سرفراز ہوا

کنارِ چشمۂ کوثر بنا محل کوئی

ٹھہر گیا ہے ستم ناک وقت میرے لئے

یا کائنات کی گردش میں ہے خلل کوئی

مری شکست کے اسباب پوچھتے کیا ہو

ہے کھیل ہی کے قواعد گیا بدل کوئی

اجل حیات کا پہلا سرا نہیں منصور

مراجعت کی مسافت کا ہے عمل کوئی

منصور آفاق

سرِ کہسار مسافت کا پڑاؤ کوئی

دسمبر 1, 2007منصور آفاق،شعراء،غزلناؤ،کٹاؤ،گھاؤ،گاؤ،پڑاؤ،بہاؤ،جھکاؤ،داؤadmin

منصور آفاق ۔ غزل نمبر 432

رات کے پچھلے پہر ، دور الاؤ کوئی

سرِ کہسار مسافت کا پڑاؤ کوئی

ہار جاؤں گا تو دنیاسے بھی اٹھ جاؤں گا

بس لگانا ہے مجھے آخری داؤ کوئی

ٹوٹ جانے میں بھلا کونسی اچھائی ہے

نرمگی کوئی، سرِ شاخ جھکاؤ کوئی

لوگ کہتے ہیں کہ باہو کے ہے دوہوں میں شفا

بیٹھ کے میرے سرہانے ذرا گاؤ کوئی

چاند کے روپ میں اک طنزِ مسلسل کی طرح

سینہ ء شب میں سلگتا ہوا گھاؤ کوئی

لوگ مرجاتے ہیں ساحل کی تمنا لے کر

اور سمندر میں چلی جاتی ہے ناؤ کوئی

کاش بچپن کی بہشتوں سے نہ باہر آؤں

روک لے عمر کے دریا کا کٹاؤ کوئی

لڑکھڑانا ہے نشیبوں میں ہمیشہ منصور

روک سکتا نہیں پانی کا بہاؤ کوئی

منصور آفاق

ذرا سے شہر میں ہے بے شمار تنہائی

دسمبر 1, 2007منصور آفاق،شعراء،غزلنگار،نثار،کنار،گزار،پکار،پار،پروردگار،انتظار،انحصار،اشکبار،بار،دار،سوگوار،شمار،شکار،غمگسارadmin

منصور آفاق ۔ غزل نمبر 431

بڑی اداس بڑی بے قرار تنہائی

ذرا سے شہر میں ہے بے شمار تنہائی

مجھے اداسیاں بچپن سے اچھی لگتی ہیں

مجھے عزیز مری اشکبار تنہائی

فراق یہ کہ وہ آغوش سے نکل جائے

وصال یہ کرے بوس و کنار تنہائی

پلٹ پلٹ کے مرے پاس آئی وحشت سے

کسی کو دیکھتے ہی بار بار تنہائی

مرے مزاج سے اس کا مزاج ملتا ہے

میں سوگوار … تو ہے سوگوار تنہائی

کوئی قریب سے گزرے تو جاگ اٹھتی ہے

شبِ سیہ میں مری جاں نثار تنہائی

مجھے ہے خوف کہیں قتل ہی نہ ہو جائے

یہ میرے غم کی فسانہ نگار تنہائی

نواح جاں میں ہمیشہ قیام اس کا تھا

دیارِ غم میں رہی غمگسار تنہائی

ترے علاوہ کوئی اور ہم نفس ہی نہیں

ذرا ذرا مجھے گھر میں گزار تنہائی

یونہی یہ شہر میں کیا سائیں سائیں کرتی ہے

ذرا سے دھیمے سروں میں پکار تنہائی

نہ کوئی نام نہ چہرہ نہ رابطہ نہ فراق

کسی کا پھر بھی مجھے انتظار، تنہائی

جو وجہ وصل ہوئی سنگسار تنہائی

تھی برگزیدہ ، تہجد گزار تنہائی

مری طرح کوئی تنہا اُدھر بھی رہتا ہے

بڑی جمیل، افق کے بھی پار تنہائی

کسی سوار کی آمد کا خوف ہے، کیا ہے

بڑی سکوت بھری، کوئے دار، تنہائی

دکھا رہی ہے تماشے خیال میں کیا کیا

یہ اضطراب و خلل کا شکار تنہائی

بفیضِ خلق یہی زندگی کی دیوی ہے

کہ آفتاب کا بھی انحصار تنہائی

اگرچہ زعم ہے منصور کو مگر کیسا

تمام تجھ پہ ہے پروردگار تنہائی

منصور آفاق

تخلیہ اے زندگانی تخلیہ

دسمبر 1, 2007منصور آفاق،شعراء،غزلفکانی،فشانی،مہربانی،میزبانی،یعنی،بنانی،بڑھانی،ترانی،جوانی،زندگانی،سائبانی،شادمانی،شبانیadmin

منصور آفاق ۔ غزل نمبر 430

دھڑکنوں کی بدزبانی تخلیہ

تخلیہ اے زندگانی تخلیہ

ظلِ سبحانی ہیں آئے درد کے

اے کنیزِ شادمانی تخلیہ

آرہا ہے وہ چراغِ صبح پا

چاند تارو ، مہربانی ، تخلیہ

مہ وشو!اب یاسمن کے باغ کی

دیکھتے ہیں گل فشانی ، تخلیہ

بجلیو! موسیٰ کلیم اللہ سے میں

سن رہاہوں لن ترانی تخلیہ

بارگاہِ دل میں شرمندہ نہ کر

لمس کی اندھی جوانی تخلیہ

ہے دمِ عارف نسیمِ صبح دم

اے کلیمی اے شبانی تخلیہ

زندگی سے بھر گیا دل حسرتو!

اب کہانی کیا بڑھانی تخلیہ

واہ ، آئی ہے کئی صدیوں کے بعد

پھر صدائے کن فکانی تخلیہ

جائیے کہ آئینے کے سامنے

شکلِ ہستی ہے بنانی تخلیہ

جارہا ہوں میں عدم کے باغ میں

موسموں کی میزبانی تخلیہ

آرہا ہے مجھ سے ملنے آفتاب

بادلوں کی سائبانی تخلیہ

ملنا ہے منصور نے منصور سے

گم کرو اب شکل یعنی تخلیہ

منصور آفاق

میں جا رہا ہوں شہر سے باہر کسی جگہ

دسمبر 1, 2007منصور آفاق،شعراء،غزلمنظر،کر،پر،اندر،باہرadmin

منصور آفاق ۔ غزل نمبر 429

مل جاؤ تھوڑی دیر تو آ کر کسی جگہ

میں جا رہا ہوں شہر سے باہر کسی جگہ

میں روزنامچہ ہوں تری صبح و شام کا

مجھ کو چھپا دے شیلف کے اندر کسی جگہ

جادو گری حواس کی پھیلی ہوئی ہے بس

ہوتا نہیں ہے کوئی بھی منظر کسی جگہ

کچھ دن گزارتا ہوں پرندوں کے آس پاس

جنگل میں چھت بناتا ہوں جا کر کسی جگہ

منصور اس گلی میں تو آتی نہیں ہے دھوپ

گھر ڈھونڈ کوئی مین سڑک پر کسی جگہ

منصور آفاق

آئینہ میں دیکھتا ہوں اور نظر آتا ہے وہ

دسمبر 1, 2007منصور آفاق،شعراء،غزلہنر،نظر،کر،گزر،پر،سرadmin

منصور آفاق ۔ غزل نمبر 428

اور اب تو میرے چہرے سے ابھر آتا ہے وہ

آئینہ میں دیکھتا ہوں اور نظر آتا ہے وہ

حالِ دل کہنے کو بارش کی ضرورت ہے مجھے

اور میرے گھر ہوا کے دوش پر آتا ہے وہ

رات بھر دل سے کوئی آواز آتی ہے مجھے

جسم کی دیوار سے کیسے گزر آتا ہے وہ

وقت کا احساس کھو جاتا تھا میری بزم میں

اپنے بازو پر گھڑی اب باندھ کر آتا ہے وہ

میں ہوا کی گفتگو لکھتا ہوں برگِ شام پر

جو کسی کو بھی نہیں آتا ہنر آتا ہے وہ

سر بریدوں کو تنک کر رات سورج نے کہا

اور جب شانوں پہ رکھ کر اپنا سر آتا ہے وہ

منصور آفاق

بم گراتا رہا خود اپنی ہی دہلیز پہ وہ

دسمبر 1, 2007منصور آفاق،شعراء،غزللیز،چیز،تفویض،تقریظ،تجہیز،تعویز،دہلیزadmin

منصور آفاق ۔ غزل نمبر 427

عالمی بنک کے اک وفد کی تجویز پہ وہ

بم گراتا رہا خود اپنی ہی دہلیز پہ وہ

کیا بتاتا کہ مرا اس سے تعلق کیا تھا

رو بھی سکتا نہ تھا تکفین پہ تجہیز پہ وہ

کھوجنی پڑتی ہے ماتھے سے وہ قیمت لیکن

ایک لیبل سا لگا دیتا ہے ہر چیز پہ وہ

ہو نہیں سکتا شب و روز کا مالک کوئی

عمر ہر شخص کو دیتا ہے فقط لیز پہ وہ

جانے کیا دیکھ کے کل شام کتابِ دل میں

خامشی چھوڑ گیا صفحۂ تقریظ پہ وہ

خوش تھی مٹی کہ مجھے مل گئے صدیوں کے خطوط

چیخ اٹھی تھی مگر ذہن کی تفویض پہ وہ

اس نئے دور کا منصور عجب عامل ہے

نام خود اپنا ہی لکھ دیتا ہے تعویز پہ وہ

منصور آفاق

سحر جب مسکرائے تو کہے ہر پھول بسم اللہ

دسمبر 1, 2007منصور آفاق،شعراء،غزلمسکرائے،کھائے،گنگنائے،گائے،آئے،سنائے،سرسرائےadmin

منصور آفاق ۔ غزل نمبر 426

صبا طیبہ سے آئے تو کہے ہر پھول بسم اللہ

سحر جب مسکرائے تو کہے ہر پھول بسم اللہ

قدم لینے لگے سبزہ ، شجر بھیجیں سلام اس پر

وہ گلشن میں جو آئے تو کہے ہر پھول بسم اللہ

کبھی ساون کے میٹھے انتظار انگیز لمحوں میں

ہوا ہولے سے گائے تو کہے ہر پھول بسم اللہ

کشادہ رکھتے ہیں اتنا درِ دل ہم چمن والے

کہ سایہ سرسرائے تو کہے ہر پھول بسم اللہ

محبت کے بلکتے چیختے بے چین موسم میں

جو بلبل گنگنائے تو کہے ہر پھول بسم اللہ

پہاڑی راگ کی بہتی ہوئی لے میں کہیں کوئی

ندی جب دکھ سنائے تو کہے ہر پھول بسم اللہ

یہ انکا رنگِ فطرت ہے ، یہ انکا ظرف ہے منصور

کہ کانٹا زخم کھائے تو کہے ہر پھول بسم اللہ

منصور آفاق

آ انتظار کے اک اور سال بسم اللہ

دسمبر 1, 2007منصور آفاق،شعراء،غزلملال،ڈھال،وبال،وصال،المثال،جال،حال،خیال،ذوالجلال،سوال،سال،شال،غزالadmin

منصور آفاق ۔ غزل نمبر 425

پرانے غم کے نئے احتمال بسم اللہ

آ انتظار کے اک اور سال بسم اللہ

بس ایک تیری کمی تھی جنوں کے صحرا میں

خوش آمدید اے میرے غزال، بسم اللہ

آ دیکھ زخم ترو تازہ ہیں مہکتے ہیں

آ مجھ سے پوچھنے پرسانِ حال بسم اللہ

اندھیرے کروٹیں لیتے ہیں مجھ میں پہلے بھی

بہ سرو چشم شبِ ذوالجلال بسم اللہ

سنا ہے آج اکیلا ہے اپنے کمرے میں

چل اس کے پاس دلِ خوش خیال بسم اللہ

لگی تھی آنکھ ذرا ہجر کی تھکاوٹ سے

میں اٹھ گیا میرے دشتِ ملال بسم اللہ

یہ کیسے خانۂ درویش یاد آیا ہے

بچھاؤں آنکھیں ؟ اے خوابِ وصال بسم اللہ

پھر اپنے زخم چھپانے کی رُت پلٹ آئی

شجر نے اوڑھ لی پتوں کی شال بسم اللہ

کھنچا ہوا ترا ناوک نہ جان ضائع ہو

ہے جان پہلے بھی جاں کا وبال بسم اللہ

یہ تیرے وار تو تمغے ہیں میری چھاتی کے

لو میں نے پھینک دی خود آپ ڈھال بسم اللہ

یہ لگ رہا ہے کہ اپنے بھی بخت جاگے ہیں

کسی نے مجھ پہ بھی پھینکا ہے جال بسم اللہ

نہیں کچھ اور تو امید رکھ ہتھیلی پر

دراز ہے مرا دستِ سوال بسم اللہ

کسی فقیر کی انگلی سے میرے سینے پر

لکھا ہوا ہے فقید المثال بسم اللہ

منصور آفاق

ہے لام حرکتِ لا ، لا الہ الا اللہ

دسمبر 1, 2007منصور آفاق،شعراء،غزللکھا،لا،کہا،کیا،پڑھا،بادصبا،دعا،سوا،صداadmin

منصور آفاق ۔ غزل نمبر 424

الف ہے حرفِ الہ، لا الہ الا اللہ

ہے لام حرکتِ لا ، لا الہ الا اللہ

یہ میم ،میمِ محمد رسول اللہ ہے

یہی خدا نے کہا،لا الہ الا اللہ

یہی ہے برقِ تجلی،یہی چراغ طور

یہی زمیں کی صدا،لا الہ الا اللہ

کرن کرن میں مچلتی ہے خوشبوئے لولاک

خرامِ بادصبا،لا الہ الا اللہ

نگارِ قوسِ قزح کے جمیل رنگوں سے

وہ بادلوں نے لکھا،لا الہ الا اللہ

سنائی دے یہی غنچوں کے بھی چٹکنے سے

کھلے ہیں دستِ دعا،لا الہ الا اللہ

وہی وجودہے واحد،وہی اکیلا ہے

کوئی نہ اُس کے سوا ،لا الہ الا اللہ

وہ کس کے قربِ مقدس کی دلربائی تھی

تھاکنکروں نے پڑھا ،لا الہ الا اللہ

ہر ایک دل کے غلافِ مہین پر منصور

کشید کس نے کیا ، لا الہ الا اللہ

منصور آفاق

کلیدِ باغِ جناں لا الہ الا اللہ

دسمبر 1, 2007منصور آفاق،شعراء،غزلنہاں،اماں،جہاں،جناں،عیاںadmin

منصور آفاق ۔ غزل نمبر 423

نجاتِ خلقتِ جاں لا الہ الا اللہ

کلیدِ باغِ جناں لا الہ الا اللہ

یہ خوفِ آتشِ دوزخ یہ خطرۂ ابلیس

وہاں کہاں کہ جہاں لا الہ الا اللہ

بگاڑ سکتی ہے کیا اس کا چرخ کی گردش

ہے جس کی جائے اماں لا الہ الا اللہ

یہ جائیدادِ جہاں کچھ نہیں ہے اُس کے لئے

ہے جس کے دل میں نہاں لا الہ الا اللہ

یہ کائنات یہ عالم نہیں وہاں باہو

جہاں جہاں پہ عیاں لا الہ الا اللہ

سلطان باہو کی فارسی غزل کا ترجمہ

منصور آفاق

مت پوچھ ایک پل کی طوالت کا واقعہ

دسمبر 1, 2007منصور آفاق،شعراء،غزلہدایت،قیامت،محبت،وحشت،خباثت،طوالت،عنایتadmin

منصور آفاق ۔ غزل نمبر 422

صدیوں پہ ہے محیط سکونت کا واقعہ

مت پوچھ ایک پل کی طوالت کا واقعہ

ممکن نہیں ہے صبحِ ازل پھر اسے لکھے

جیسا تھا بزمِ شمعِ ہدایت کا واقعہ

ہم اہلِ عشق ہیں سو بڑے جلد باز تھے

عجلت میں ہم نے لکھا محبت کا واقعہ

وہ دلنواز چیخ مری گود میں گری

یہ کاکروچ کی ہے خباثت کا واقعہ

جا خانۂ وراق پہ آواز دے کے دیکھ

مت پوچھ مجھ سے اس کی عنایت کا واقعہ

پاؤں رکھا جہاں پہ وہیں پھول کھل اٹھے

پھیلا ہے سارے دشت میں وحشت کا واقعہ

منصور اعتقاد ضروری سہی مگر

ہونا نہیں ہے کوئی قیامت کا واقعہ

منصور آفاق

یعنی کہیں پانی میں ترا خواب ہمیشہ

دسمبر 1, 2007منصور آفاق،شعراء،غزلاسباب،برفاب،تالاب،خواب،شادابadmin

منصور آفاق ۔ غزل نمبر 421

میں دیکھتا ہوں جھیل میں مہتاب ہمیشہ

یعنی کہیں پانی میں ترا خواب ہمیشہ

برسات کے موسم نے دعا دی مرے غم کو

آباد پرندوں سے ہو تالاب ہمیشہ

اجڑے ہوئے لوگوں کی دعا ہے کہ تمہارا

یہ تازہ تعلق رہے شاداب ہمیشہ

جاں سوختہ ہو جائے بھلے آگ میں میری

تجھ کو ملے خسخانہ و برفاب ہمیشہ

منصور شبِ غم کے سیہ پوش سفر میں

یادیں رہیں سرچشمۂ اسباب ہمیشہ

منصور آفاق

مرے سرمد کی رعنائی ، مرے منصور کا چہرہ

دسمبر 1, 2007منصور آفاق،شعراء،غزلمنصور،مزدور،چور،حور،دیجور،دستور،عاشورadmin

منصور آفاق ۔ غزل نمبر 420

دکھائی دے نگاہوں کو چراغِ طور کا چہرہ

مرے سرمد کی رعنائی ، مرے منصور کا چہرہ

مسلسل ابر وباراں میں کئی صدیاں گزار آئیں

دمشقِ صبح کی آنکھیں ، فراتِ نور کا چہرہ

جنابِ شیخ کو غلمان کی آنکھیں پسند آئیں

مجھے اچھا لگا اک کھکھلاتی حور کا چہرہ

مری تہذیب کا نغمہ ، اذاں میرے تمدن کی

یہی میلاد کی آنکھیں یہی عاشور کا چہرہ

اندھیری رات سے اُس زلف کوتشبیہ کیسے دوں

بھرا ہے غم کی کالک سے شبِ دیجور کا چہرہ

سنو جنت کے پھولوں سے کہیں بڑھ کر ہے پاکیزہ

کڑکتی دھوپ میں کھلتا ہوا مزدور کا چہرہ

ستم ہے لوگ پاکستان کہتے ہیں اسے منصور

بدلتاہے جہاں اقدار کا دستور کا چہرہ

منصور آفاق

آیا ہے نکل کر یہ سمندر سے ستارہ

دسمبر 1, 2007منصور آفاق،شعراء،غزلپتھر،بھر،برابر،دسمبر،سمندر،صنوبرadmin

منصور آفاق ۔ غزل نمبر 419

اجلا ہے بہت شام کے منظر سے ستارہ

آیا ہے نکل کر یہ سمندر سے ستارہ

یک لخت نگاہوں میں کئی رنگ ہیں آئے

گزرا ہے ابھی میرے برابر سے ستارہ

قسمت کہیں یخ بستہ رویوں میں جمی ہے

نکلا ہی نہیں اپنا دسمبر سے ستارہ

ہر شام نکلتا تھا کسی شاخِ حسیں سے

رکھتا تھا تعلق وہ صنوبر سے ستارہ

تم اندھی جوانی کی کرامات نہ پوچھو

وہ توڑدیا کرتی تھی پتھر سے ستارہ

میں کس طرح لے جاؤں اسے اپنی گلی میں

منصور شناسا ہے جہاں بھر سے ستارہ

منصور آفاق

نقشِ پا اپنے کہیں پر کھوجنا بے فائدہ

دسمبر 1, 2007منصور آفاق،شعراء،غزلناپنا،ڈھالنا،ڈالنا،کھولنا،کھوجنا،گھومنا،پھوٹنا،بولنا،بیٹھنا،بھیگنا،جاگنا،دیکھنا،سوچنا،سامناadmin

منصور آفاق ۔ غزل نمبر 418

اپنے بارے میں کسی سے پوچھنا بے فائدہ

نقشِ پا اپنے کہیں پر کھوجنا بے فائدہ

جا کہیں دفنا دے گزرے موسموں کی میتیں

دیکھ مردہ مسئلوں پر سوچنا بے فائدہ

جب نظر میں صبحِ دوشیزہ کا ہو حسنِ خرام

چاند کی گردن میں باہیں ڈالنا بے فائدہ

کیا تعلق کی لحد پر فاتحہ خوانی کروں

ایک پتھر کے بدن سے بولنا بے فائدہ

اب یہی بہتر ہے دونوں بھول جائیں گزرے دن

اب کہیں کچھ دیر مل کر بیٹھنا بے فائدہ

ہیر کو منصور کھیڑے لے گئے ہیں اپنے ساتھ

آنسوئوں سے اب ستارے ڈھالنا بے فائدہ

تیری خوشبوئے بدن سے ساونی کے رنگ ہیں

تُو نہ ہو تو بارشوں میں بھیگنا بے فائدہ

صبح کے یخ بستہ خالی صحن میں تیرے بغیر

نرم و نازک دھوپ کے پر کھولنا بے فائدہ

جز ترے کیا موجِ دریا، جز ترے کیابادِ شام

تُو نہ ہو تو ساحلوں پر گھومنابے فائدہ

تیرے بن کیا عکس اپنا، تیرے بن تمثال کیا

تُو نہیں تو پانیوں میں دیکھنا بے فائدہ

تیرے ہونے سے یہ گندم کی سنہری بالیاں

ورنہ بیجوں کا تہوں سے پھوٹنا بے فائدہ

تُو نہ ہو توکیا درختوں سے ہوا کی گفتگو

شاخِ گل پہ کونپلوں کا جاگنا بے فائدہ

تُونہ ہو تو راستوں میں بھولنے کا لطف کیا

اب مرا پگڈنڈیوں کو ناپنا بے فائدہ

جز ترے سندر رتیں بے کار ،بے مصرف تمام

تُو نہیں تو موسموں کا سامنا بے فائدہ

منصور آفاق

دل میں ہو غیر تو سجدہِ خاک بے فائدہ

دسمبر 1, 2007منصور آفاق،شعراء،غزلچاک،پوشاک،پیچاک،المناک،ادراک،خاکadmin

منصور آفاق ۔ غزل نمبر 417

جسم نا پاک پر جامہء پاک بے فائدہ

دل میں ہو غیر تو سجدہِ خاک بے فائدہ

صاحبِ فہم ہو توتمہیں اک الف کافی ہے

یہ کتابوں بھرا عقل و ادراک بے فائدہ

آدمی آخری حد ہے تشکیل و تخلیق کی

گردشِ وقت کا گھومتا چاک بے فائدہ

اس کی ساری توجہ رہی اپنی تلوار کی دھار پر

میں نے پہنی ہے زخموں کی پوشاک بے فائدہ

اِس دماغِ شرر خیز میں جھوٹ کے ڈھیر ہیں

تیری دستار کے اتنے پیچاک بے فائدہ

کون سا ا س نے منصور کمرے میں آ جانا ہے

گریۂ شب کا شورِ المناک بے فائدہ

منصور آفاق

روشنی اے روشنی اے روشنی چشم توجہ

دسمبر 1, 2007منصور آفاق،شعراء،غزلکی،گئی،پڑی،بھری،تھی،روشنی،سرسریadmin

منصور آفاق ۔ غزل نمبر 416

قبر سے تاریک تر جیون گلی چشم توجہ

روشنی اے روشنی اے روشنی چشم توجہ

چھپ نہیں سکتا خدا اگلی صدی تک آدمی سے

ہے ابھی افلاک پر کچھ سرسری چشم توجہ

وقتِ رخصت دیر تک جاتی ہوئی بس کا تعاقب

دھول میں پھر کھو گئی اشکوں بھری چشم توجہ

آپ جیسی ایک لڑکی پر لکھی ہے نظم میں نے

اک ذرا سی چاہیے بس آپ کی چشم توجہ

وہ اندھیرا تھا کہ میلوں دور چلتی گاڑیوں کی

روشنی کے ساتھ فوراً چل پڑی چشمِ توجہ

بیل بجی مدھم سروں میں در ہوا وا دھیرے دھیرے

اس کو دیکھا اور پھر پتھرا گئی چشمِ توجہ

اپنے چہرے پر سیاہی تھوپ دے منصور صاحب

اس کی ساری نیگرو کی سمت تھی چشم توجہ

منصور آفاق

جیپ جنگل میں بناتی جا رہی ہے راستہ

دسمبر 1, 2007منصور آفاق،شعراء،غزلملاتی،گراتی،اڑاتی،بناتی،بڑھاتی،بتاتیadmin

منصور آفاق ۔ غزل نمبر 415

پاؤں کی وحشت بچھاتی جا رہی ہے راستہ

جیپ جنگل میں بناتی جا رہی ہے راستہ

احتراماً چل رہا ہوں میں سڑک کے ساتھ ساتھ

اور سڑک ہے کہ بڑھاتی جا رہی ہے راستہ

اک بڑی اونچی پہاڑی رفتہ رفتہ ہاتھ سے

میرے پاؤں میں گراتی جا رہی ہے راستہ

سوچتا ہوں میری پُر آشوب بستی کس لیے

اپنا دریا سے ملاتی جا رہی ہے راستہ

پیچھے پیچھے پاؤں اٹھتے جا رہے ہیں شوق میں

آگے آگے وہ بتاتی جا رہی ہے راستہ

رہ بناتا جا رہا ہوں وقت میں منصور میں

عمر کی آندھی اڑاتی جا رہی ہے راستہ

منصور آفاق

دور تک ہے عزت و ناموس کی قربان گاہ

دسمبر 1, 2007منصور آفاق،شعراء،غزلفانوس،ملبوس،منحوس،مایوس،محسوس،مخصوص،معکوس،ناموس،سوسadmin

منصور آفاق ۔ غزل نمبر 414

ہے محیطِ جاں شبِ محبوس کی قربان گاہ

دور تک ہے عزت و ناموس کی قربان گاہ

بہہ رہا ہے مقتلِ احساس سے تازہ لہو

زندگی ہے عالم محسوس کی قربان گاہ

آ مجھے دے زخم پھر سے ، آ چلا تیغِ ادا

سرخ کر میرے دلِ مایوس کی قربان گاہ

پاؤں پر مہندی لگاسکتی ہے خوں کی ہم نفس

کرچیاں ہوتے ہوئے فانوس کی قربان گاہ

چل رہے ہیں الٹے پاؤں راستوں پرسارے لوگ

یہ نگر ہے منزل معکوس کی قربان گاہ

خوبصورت لوگ بھی اور خوبصورت پھول بھی

خوشبوئوں کے دلربا ملبوس کی قربان گاہ

سعد پل آیا نہیں کوئی کہیں بھی راہ میں

ہر گھڑی ہے ساعتِ منحوس کی قربان گاہ

وہ لگا دی شیخ نے سیدھی جہنم میں چھلانگ

حسن بھی تھامحشرِ مخصوص کی قربان گاہ

پھر انا الحق کی صدائے دلربا تجسیم کر

ڈھونڈھ پھرمنصور دشتِ سوس کی قربان گاہ

منصور آفاق

فوٹو گراف ہوتی ہوئی بات کے بھی دیکھ

دسمبر 1, 2007منصور آفاق،شعراء،غزلملاقات،بات،برسات،حالات،راتadmin

منصور آفاق ۔ غزل نمبر 413

انداز گفتگو کے، مدارات کے بھی دیکھ

فوٹو گراف ہوتی ہوئی بات کے بھی دیکھ

ممکن نہیں ہے قید میں رکھنا چراغ کو

یہ اضطراب اپنی سیہ رات کے بھی دیکھ

بادل پہن لیے ہیں درختوں کے جسم نے

یہ معجزے پہاڑ پہ برسات کے بھی دیکھ

اک آخری امید تھی مٹی میں مل گئی

کچھ روز اب تُو سختیِ حالات کے بھی دیکھ

قربت کی انتہا پہ ہیں صدیوں کے فاصلے

منصور سلسلے یہ ملاقات کے بھی دیکھ

منصور آفاق

صبحِ فلک پہ اب مجھے چلتے ہوئے بھی دیکھ

دسمبر 1, 2007منصور آفاق،شعراء،غزلمچلتے،چلتے،ڈھلتے،پگھلتے،اچھلتے،بدلتے،جلتے،سنبھلتےadmin

منصور آفاق ۔ غزل نمبر 412

جلتی ہوئی چتا سے نکلتے ہوئے بھی دیکھ

صبحِ فلک پہ اب مجھے چلتے ہوئے بھی دیکھ

جس کو بلا کا زعم تھا اپنے مزاج پر

وہ آہنی چٹان پگھلتے ہوئے بھی دیکھ

چھو کر کسی گلاب کو موجِ بدن کے رنگ

بہتی ہوئی ندی میں مچلتے ہوئے بھی دیکھ

اے بادِ تندِ یار تجھے اور کیا کہوں

بجھتے ہوئے چراغ کو جلتے ہوئے بھی دیکھ

پاگل سا ہو گیا تھا جسے دیکھ کر کبھی

اس چودھویں کے چاند کو ڈھلتے ہوئے بھی دیکھ

مجھ کو گرا دیا تھا زمیں پر تو کیا ہوا

سطحِ زمیں سے گیند اچھلتے ہوئے بھی دیکھ

وہ بھی تو ایک پیڑ تھا اپنے نصیب کا

موسم کے ساتھ اس کو بدلتے ہوئے بھی دیکھ

منصور پھر کھڑا ہے خود اپنے ہی پاؤں پر

جو گر گیا تھا اس کو سنبھلتے ہوئے بھی دیکھ

منصور آفاق

مہکے ہوئے بدن کے ذرا حاشیے بھی دیکھ

دسمبر 1, 2007منصور آفاق،شعراء،غزلہوئے،قمقمے،مجھے،مرحلے،کدے،بلبلے،حوصلے،حاشیے،زاویے،سرےadmin

منصور آفاق ۔ غزل نمبر 411

قوسِ قزح کے لکھے ہوئے تبصرے بھی دیکھ

مہکے ہوئے بدن کے ذرا حاشیے بھی دیکھ

رنگوں بھرے لباس کی مہکار پر نہ جا

میرے خیال و خواب کے ویراں کدے بھی دیکھ

تْو نے گرا دیا تھا فلک سے تو اب مجھے

بادِ صبا کے رنگ پہ چلتے ہوئے بھی دیکھ

دونوں طرف وجود ترا ہی کہیں نہ ہو

گردن ذرا گھما کے تُو کُن کے سرے بھی دیکھ

بے شک گلے لگا کے سمندر کو، رو مگر

ساحل کے پاس بنتے ہوئے بلبلے بھی دیکھ

ہر چند تارکول ہے پگھلی ہوئی تمام

میں بھی تو چل رہا ہوں سڑک پر، مجھے بھی دیکھ

سورج مرے قدم ہیں ستارے ہیں میری گرد

تسخیر کائنات کے یہ مرحلے بھی دیکھ

اک دلنواز خواب کی آمد کے آس پاس

آنکھوں میں جھلملاتے ہوئے قمقمے بھی دیکھ

کھینچی ہیں تم نے صرف لکیریں ہوا کے بیچ

بنتے ہوئے خطوط کے یہ زاویے بھی دیکھ

میں جل رہا ہوں تیز ہواؤں کے سامنے

اے شہرِ شب نژاد مرے حوصلے بھی دیکھ

منصور آفاق

ہے ساتھ ساتھ کوئی ہمسفر تسلی رکھ

دسمبر 1, 2007منصور آفاق،شعراء،غزلہمسفر،مختصر،نظر،کر،پر،رہگزرadmin

منصور آفاق ۔ غزل نمبر 410

طویل و تیرہ سہی شب مگر تسلی رکھ

ہے ساتھ ساتھ کوئی ہمسفر تسلی رکھ

اسے گزرنا انہی پتھروں سے ہے آخر

اومیری شوق بھری رہگزر تسلی رکھ

ابھی سے صبحِ جدائی کا خوف کیا کرنا

ہے مہتاب ابھی بام پر تسلی رکھ

کسی کا ساتھ گھڑی دو گھڑی بھی کافی ہے

او زندگی کی رہِ مختصر تسلی رکھ

نہیں نکلتی ترے منظروں سے بینائی

یہیں کہیں ہے ، گرفتِ نظر تسلی رکھ

شکست عشق میں ہوتی نہیں کبھی منصور

یہ ہار ، ہار نہیں ، ہار کر تسلی رکھ

منصور آفاق

یا مجھے اپنے ڈرائنگ روم تک محدود رکھ

دسمبر 1, 2007منصور آفاق،شعراء،غزلچہک،نمک،کھنک،تک،دھمک،دھنکadmin

منصور آفاق ۔ غزل نمبر 409

یا بدن کے سرخ گجروں کی مہک محدود رکھ

یا مجھے اپنے ڈرائنگ روم تک محدود رکھ

دھن کوئی کومل سی بس ترتیب کے لمحے میں ہے

اے محافظ کالے بوٹوں کی دھمک محدود رکھ

سو رہا ہے تیرے پہلو میں کوئی غمگین شخص

چوڑیوں کی رنگ پروردہ کھنک محدود رکھ

باغباں ہر شاخ سے لپٹے ہوئے ہیں زرد سانپ

گھونسلوں تک اپنی چڑیوں کی چہک محدود رکھ

جاگنے لگتے ہیں گلیوں میں غلط فہمی کے خواب

آئینے تک اپنی آنکھوں کی چمک محدود رکھ

لوگ چلنے لگتے ہیں قوسِ قزح کی شال پر

اپنے آسودہ تبسم کی دھنک محدود رکھ

منصور آفاق

یونہی رات رات غزل میں رو، یونہی شعر شعر سسک کے پڑھ

دسمبر 1, 2007منصور آفاق،شعراء،غزلفلک،لہک،مہک،کھنک،کسک،پلک،اٹک،بہک،دھنک،سڑک،سسکadmin

منصور آفاق ۔ غزل نمبر 408

یہی تیرے غم کا کِتھارسس، یونہی چشمِ نم سے ٹپک کے پڑھ

یونہی رات رات غزل میں رو، یونہی شعر شعر سسک کے پڑھ

جو اکائی میں نہیں ذہن کی اسے سوچنے کا کمال کر

یہ شعور نامۂ خاک سن، یہ درود لوحِ فلک کے پڑھ

یہی رتجگوں کی امانتیں ہیں بیاضِ جاں میں رکھی ہوئی

جو لکھے نہیں ہیں نصیب میں وہ ملن پلک سے پلک کے پڑھ

مرے کینوس پہ شفق بھری نہ لکیریں کھینچ ملال کی

کوئی نظم قوسِ قزح کی لکھ کوئی رنگ ونگ دھنک کے پڑھ

ترے نرم سر کا خرام ہو مری روح کے کسی راگ میں

مجھے انگ انگ میں گنگنا، مرا لمس لمس لہک کے پڑھ

یہ بجھا دے بلب امید کے، یہ بہشتِ دیدِ سعید کے

ابھی آسمان کے بورڈ پر وہی زخم اپنی کسک کے پڑھ

او ڈرائیور مرے دیس کے او جہاں نما مری سمت کے

یہ پہنچ گئے ہیں کہاں پہ ہم، ذرا سنگ میل سڑک کے پڑھ

کوئی پرفیوم خرید لا، کوئی پہن گجرا کلائی میں

نئے موسموں کا مشاعرہ کسی مشکبو میں مہک کے پڑھ

ہے کتابِ جاں کا ربن کھلا کسی واڈکا بھری شام میں

یہی افتتاحیہ رات ہے ذرا لڑکھڑا کے، بہک کے پڑھ

یہ ہے ایک رات کا ناولٹ، یہ ہے ایک شام کی سرگزشت

یہ فسانہ تیرے کرم کا ہے، اسے اتنا بھی نہ اٹک کے پڑھ

کئی فاختاؤں کی ہڈیاں تُو گلے میں اپنے پہن کے جا

وہ جو عہد نامۂ امن تھا اسے بزم شب میں کھنک کے پڑھ

منصور آفاق

قرار دیں ہمیں کافر روایتیں پڑھ پڑھ

دسمبر 1, 2007منصور آفاق،شعراء،غزلہدایتیں،نہایتیں،کفایتیں،حمایتیں،حکایتیں،روایتیں،رعایتیں،شکایتیں،عنایتیں،غایتیںadmin

منصور آفاق ۔ غزل نمبر 407

وہ جھوٹ بولتے پھرتے ہیں آیتیں پڑھ پڑھ

قرار دیں ہمیں کافر روایتیں پڑھ پڑھ

یہ چاہتے ہیں کہ کچھ دن گزاریں مرضی سے

جی تھک گیا ہے فلک کی ہدایتیں پڑھ پڑھ

شکار ہونا ہے احساسِ کمتری کا ہمیں

عجائباتِ جہاں کی حکایتیں پڑھ پڑھ

یہ لگ رہا ہے کہ جبریل اپنے اندر ہے

ورق ورق پہ اترتی عنایتیں پڑھ پڑھ

یہ ارتقاء کا تماشا ابھی ادھورا ہے

خیال آتا ہے ہستی کی غایتیں پڑھ پڑھ

یہ سوچتے ہیں ازل کتنا خوبصورت تھا

تباہ حال ابد کی نہایتیں پڑھ پڑھ

خزاں رسیدہ ہواکے خلاف ہونا تھا

گرے ہوئے کی مسلسل شکایتیں پڑھ پڑھ

حسابِ خرچۂ تدفین کر رہے ہیں ہم

بنک کاروں کی بھیجی کفایتیں پڑھ پڑھ

اے اہل کوفہ ہمیں یاد کربلا آئے

خطوط میں یہ ہزاروں حمایتیں پڑھ پڑھ

بڑھا سکے ہیں نہ قوت خرید کی منصور

ہر ایک چیز پہ اتنی رعایتیں پڑھ پڑھ

منصور آفاق

پڑا ہے شیخ کا پھر گنبدِ ہوس پہ وہ ہاتھ

دسمبر 1, 2007منصور آفاق،شعراء،غزلہوس،قفس،قصص،میٹرس،چس،کارنس،برسadmin

منصور آفاق ۔ غزل نمبر 406

جو پھیرتا تھا تہجد کے کینوس پہ وہ ہاتھ

پڑا ہے شیخ کا پھر گنبدِ ہوس پہ وہ ہاتھ

بنا رہا ہے جو قوسِ قزح کی تصویریں

دکھائی دے مجھے بادل کے کارنس پہ وہ ہاتھ

نگار خانۂ جاں کی نمائشِ کُن میں

لکیر کھینچ رہا ہے برس برس پہ وہ ہاتھ

یہ سوچتے ہوئے میری کہاں علامت ہے

کبھی پروں پہ رکھے وہ ،کبھی قفس پہ وہ ہاتھ

کسی کو خواب میں شایدپکڑ رکھا تھا کہیں

جمے ہوئے تھے مسہری کے میٹرس پہ وہ ہاتھ

عجیب بجلیاں بھر دیں ، عجیب کیف دیا

بنامِ زندگی ،ہائے اک ایک نس پہ وہ ہاتھ

نئے وصال دکھاتی ہے رات بھر منصور

کچھ ایسے رکھتی ہے گزرے ہوئے قصص پہ وہ ہاتھ

منصور آفاق

پھر بھی میں ہوں جلتی بجھتی روشنی کے ساتھ ساتھ

دسمبر 1, 2007منصور آفاق،شعراء،غزلپات،برسات،حالات،ذات،ساتھadmin

منصور آفاق ۔ غزل نمبر 405

چل رہی ہے زندگی کی اک بھیانک رات ساتھ

پھر بھی میں ہوں جلتی بجھتی روشنی کے ساتھ ساتھ

میں نے سوچا کیا کہیں گے میرے بچپن کے رفیق

اور پھر رختِ سفر میں رکھ لیے حالات ساتھ

میں اکیلا رونے والا تو نہیں ہوں دھوپ میں

دے رہی ہے کتنے برسوں سے مرا برسات ساتھ

چاہیے تھا صرف تعویذِ فروغِ کُن مجھے

دے دیا درویش نے اذنِ شعورِ ذات ساتھ

یہ خزاں زادے کہیں کیا گل رتوں کے مرثیے

یونہی بے مقصد ہواؤں کے ہیں سوکھے پات ساتھ

ایک بچھڑے یار کی پرسوز یادوں میں مگن

کوئی بگلا چل رہا تھا پانیوں کے ساتھ ساتھ

منصور آفاق

روشنی سے بنی کوئی شے تھی کہیں

دسمبر 1, 2007منصور آفاق،شعراء،غزللے،نے،کی،پی،شے،طےadmin

منصور آفاق ۔ غزل نمبر 404

آگ تھی رنگ تھے اور مے تھی کہیں

روشنی سے بنی کوئی شے تھی کہیں

سو گئی رات کے سائے گنتی ہوئی

جو ملاقات گلیوں میں طے تھی کہیں

میرے جیسا کوئی اور بیلے میں تھا

بانسری کی فسردہ سی لے تھی کہیں

شور تھا شہر میں عشق کاہر طرف

کوئی تازہ محبت کی نے تھی کہیں

اس کے اندر اترنا ہے گہرائی تک

سیکھتا جا کے ہوں ٹیلی پیتھی کہیں

جگمگاتی پھرے عشقِ منصور میں

کوئی سیتی کہیں کوئی کیتھی کہیں

منصور آفاق

تری گلی سے جو نکلے تو پھر رہے نہ کہیں

دسمبر 1, 2007منصور آفاق،شعراء،غزللے،مقبرے،ملے،مراسلے،ڈوبتے،کہے،کے،کرے،گئے،تبصرے،دوسرے،دے،رہے،رکے،سلسلےadmin

منصور آفاق ۔ غزل نمبر 403

کسی کے جسم سے مل کر کبھی بہے نہ کہیں

تری گلی سے جو نکلے تو پھر رہے نہ کہیں

عجیب رابطہ اپنے وجود رکھتے تھے

نکل کے تجھ سے تو خود میں بھی ہم رہے نہ کہیں

اسے تو پردے کے پیچھے بھی خوف ہے کہ مری

نظر نقاب پہ چہرہ لکیر لے نہ کہیں

بس اس خیال سے منزل پہن لی پاؤں نے

ہمارے غم میں زمانہ سفر کرے نہ کہیں

تمام عمر نہ دیکھا بری نظر سے اسے

یہ سوچتے ہوئے دنیا برا کہے نہ کہیں

اے آسمان! ذرا دیکھنا کہ دوزخ میں

گرے پڑے ہوں زمیں کے مراسلے نہ کہیں

ڈرا دیا کسی خودکُش خیال نے اتنا

ٹکٹ خرید رکھے تھے مگر گئے نہ کہیں

کئی دنوں سے اداسی ہے اپنے پہلو میں

ہمارے بیچ چلے آئیں دوسرے نہ کہیں

ہر اک مقام پہ بہکی ضرور ہیں نظریں

تری گلی کے علاوہ قدم رکے نہ کہیں

ہم اپنی اپنی جگہ پر سہی اکائی ہیں

ندی کے دونوں کنارے کبھی ملے نہ کہیں

ترے جمال پہ حق ہی نہیں تھا سو ہم نے

کیے گلاب کے پھولوں پہ تبصرے نہ کہیں

کبھی کبھار ملاقات خود سے ہوتی ہے

تعلقات کے پہلے سے سلسلے نہ کہیں

ہر ایک آنکھ ہمیں کھینچتی تھی پانی میں

بھلا یہ کیسے تھا ممکن کہ ڈوبتے نہ کہیں

اداس چاندنی ہم سے کہیں زیادہ تھی

کھلے دریچے ترے انتظار کے نہ کہیں

بس ایک زندہ سخن کی ہمیں تمنا ہے

بنائے ہم نے کتابوں کے مقبرے نہ کہیں

بدن کو راس کچھ اتنی ہے بے گھری اپنی

کئی رہائشیں آئیں مگر رہے نہ کہیں

دھواں اتار بدن میں حشیش کا منصور

یہ غم کا بھیڑیا سینہ ہی چیر دے نہ کہیں

منصور آفاق

کوئی اپنے دئیے جلائے کہیں

دسمبر 1, 2007منصور آفاق،شعراء،غزلآئے،آزمائے،جلائے،جائے،سرائے،سرسرائےadmin

منصور آفاق ۔ غزل نمبر 402

شب کہیں اور شب کے سائے کہیں

کوئی اپنے دئیے جلائے کہیں

ہے کہیں انتظارِ گاہِ حیات

اور ہے موت کی سرائے کہیں

کانچ سے بھی زیادہ نازک ہے

سنگ دل ، دل تو آزمائے کہیں

شخصیت کا یہ خول رہنے دے

میری رائے بدل نہ جائے کہیں

ہرطرف راستے ہیں گلیاں ہیں

گھر کوئی بھی نظر نہ آئے کہیں

جاگ اٹھیں نہ رات کی آنکھیں

کوئی سایہ سا سرسرائے کہیں

دونوں عالم کو خوف ہے منصور

خاک کا دل نہ ٹوٹ جائے کہیں

منصور آفاق

ایک سناٹا ہے گھر میں اور تو کچھ بھی نہیں

دسمبر 1, 2007منصور آفاق،شعراء،غزلمعتبر،نگر،گھر،بھر،جگر،دوپہر،سفر،سحرadmin

منصور آفاق ۔ غزل نمبر 401

خوف سا ہے بام و در میں اور تو کچھ بھی نہیں

ایک سناٹا ہے گھر میں اور تو کچھ بھی نہیں

کچھ نمک ہے زخم کا ، کچھ روشنی ہے یاد کی

چشمِ غم کی بوند بھر میں اور تو کچھ بھی نہیں

یاد کا ہے سائباں اور زندگی کی دھوپ ہے

اس ستم گر دوپہر میں اور تو کچھ بھی نہیں

ان کی رخشاں مسکراہٹ حاملِ صد مہر و مہ

ایک سورج ہے سحر میں اور تو کچھ بھی نہیں

ان سے رک سکتے ہیں کب دیوانگانِکوئے یار

کچھ بلائیں ہیں سفر میں اور تو کچھ بھی نہیں

ان کی چاہت کے سوا تاریک ہے فردِ عمل

داغ ہیں قلب و جگر میں اور تو کچھ بھی نہیں

گنبدِ خضرا کا ہر ذرہ بہشت آباد ہے

دہر کے دوزخ نگر میں اور تو کچھ بھی نہیں

نازشِ تخلیق ہے آفاق میں بس ایک ذات

میری فکرِ معتبر میں اور تو کچھ بھی نہیں

منصور آفاق

اور کرنوں کی طرح ہاتھ میں آئے بھی نہیں

دسمبر 1, 2007منصور آفاق،شعراء،غزلآئے،بنائے،جلائے،جگائے،سائےadmin

منصور آفاق ۔ غزل نمبر 400

وہ بدن کون ہے کچھ اپنا بتائے بھی نہیں

اور کرنوں کی طرح ہاتھ میں آئے بھی نہیں

دور تک برف بھری رات کے سناٹے ہیں

شہر میں یادکے ڈھلتے ہوئے سائے بھی نہیں

وصل خاموش بھی پُرشوربھی اپنے اندر

آگ محسوس بھی ہو اور جلائے بھی نہیں

کینوس میں مرے رنگوں کو رکھے قید کوئی

اورتصویر تعلق کی بنائے بھی نہیں

کوئی منصورمرے بسترِ آباد کے بیچ

مجھ کو بھی سونے بھی نہ دے اور جگائے بھی نہیں

منصور آفاق

پہلے تُو تھا مگر اب کوئی نہیں

دسمبر 1, 2007منصور آفاق،شعراء،غزلاب،بلب،جب،رب،شب،طلب،عجبadmin

منصور آفاق ۔ غزل نمبر 399

اور جینے کا سبب کوئی نہیں

پہلے تُو تھا مگر اب کوئی نہیں

صرف اک جاں سے گزرنا ہے مجھے

مجھ سا بھی سہل طلب کوئی نہیں

خواہشِ رزق درندوں کی طرح

جیسے اس شہر کا رب کوئی نہیں

وقت کیفیتِ برزخ میں ہے

کوئی سورج، کوئی شب، کوئی نہیں

ایک تعزیتی خاموشی ہے

شہر میں مہر بلب کوئی نہیں

وصل کی رات بھی تنہا میں تھا

میرے جیسا بھی عجب کوئی نہیں

کیوں گزرتا ہوں وہاں سے منصور

اس گلی میں مرا جب کوئی نہیں

منصور آفاق

تُو جہاں ہے کوئی موجود وہاں ہے کہ نہیں

دسمبر 1, 2007منصور آفاق،شعراء،غزلنہاں،وہاں،یہاں،کہاں،جہاں،دھاںadmin

منصور آفاق ۔ غزل نمبر 398

آسماں ! بول کہ اُس پار جہاں ہے کہ نہیں

تُو جہاں ہے کوئی موجود وہاں ہے کہ نہیں

اس خلاباز کی آواز میں سناٹے تھے

چاند پر جس نے کہا ’کوئی یہاں ہے کہ نہیں

مجھ میں موجود ہے کیسے ،یہ سمجھنا ہے ابھی

یہ سوال اور ہے ذرہ میں کہاں ہے کہ نہیں

کوئی لوٹا ہی نہیں روح کے تہہ خانے سے

کیسے معلوم ہو وہ مجھ میں نہاں ہے کہ نہیں

سو گئی تھی جو زرِ فاحشہ کے بستر میں

وہ سپہ آج کفِ شعلہ دھاں ہے کہ نہیں

پھر نکل عرشِ محبت کے سفر پر منصور

پہلے یہ دیکھ وہاں جان جہاں ہے کہ نہیں

منصور آفاق

اس جہنم میں کوئی باغ جناں ہے کہ نہیں

دسمبر 1, 2007منصور آفاق،شعراء،غزلمکاں،نشاں،کنواں،بارگراں،جناں،دھواںadmin

منصور آفاق ۔ غزل نمبر 397

اپنی بستی میں کہیں امن و اماں ہے کہ نہیں

اس جہنم میں کوئی باغ جناں ہے کہ نہیں

حلقہ زن ہوکے درِ دل پہ پکارے کوئی

زندگی تیرے لئے بارگراں ہے کہ نہیں

جس میں شہزادیاں سوئی تھیں بوقت تقسیم

اب وہ بستی میں تری اندھا کنواں ہے کہ نہیں

جو کسی کو بھی برہنہ نہیں ہونے دیتا

آسماں پر وہ سیہ پوش دھواں ہے کہ نہیں

خانۂ خاک تو آباد بتانِ زر سے

آسماں پر بھی کہیں تیرا مکاں ہے کہ نہیں

میرے جیسوں کو بتاتا ہے جو رستے کا پتہ

اُس ستارے کا کہیں نام و نشاں ہے کہ نہیں

منصور آفاق

یہ عمل تو پارسائی میں نہیں

دسمبر 1, 2007منصور آفاق،شعراء،غزلکلائی،گدائی،پارسائی،اکائی،خدائی،رسائیadmin

منصور آفاق ۔ غزل نمبر 396

درد کیوں چہرہ نمائی میں نہیں

یہ عمل تو پارسائی میں نہیں

آسماں ہیں میرے اندر ہی کہیں

ہاں مگر میری رسائی میں نہیں

فاقہ مستی کائناتوں پر محیط

معجزہ کوئی گدائی میں نہیں

میرے بنجاروں تمہاری خیر ہو

ایک بھی چوڑی کلائی میں نہیں

وقت میری وحدتوں میں ہے مقیم

میں زمانے کی اکائی میں نہیں

صرف میں منصور اک موجود ہوں

کوئی بھی پوری خدائی میں نہیں

منصور آفاق

میں ہجومِ ریشم و کمخواب میں رہتا نہیں

دسمبر 1, 2007منصور آفاق،شعراء،غزلمہتاب،کمخواب،آداب،اسباب،شادابadmin

منصور آفاق ۔ غزل نمبر 395

دھوپ میں پھرتا ہوں دن بھر خواب میں رہتا نہیں

میں ہجومِ ریشم و کمخواب میں رہتا نہیں

ہے مناسب بے کسی کی کوٹھری میرے لئے

غم پہن کر میں شبِ مہتاب میں رہتا نہیں

کھل کے روتا ہوں ہمیشہ بادلوں کے ساتھ میں

یونہی ہجراں کے ادب آداب میں رہتا نہیں

ایک صحرا ہے مرے چاروں طرف پھیلا ہوا

میں مری جاں ! قریۂ شاداب میں رہتا نہیں

ہر طرف بکھری ہوئی منصور ویرانی سی ہے

میں مکاں کے عالمِ اسباب میں رہتا نہیں

منصور آفاق

بندوق کے سلوٹ کوئی دیکھتا نہیں

دسمبر 1, 2007منصور آفاق،شعراء،غزلپھوٹ،بوٹ،جھوٹ،روٹ،سلوٹ،سوٹadmin

منصور آفاق ۔ غزل نمبر 394

تاریخ ساز ’’لوٹ‘‘ کوئی دیکھتا نہیں

بندوق کے سلوٹ کوئی دیکھتا نہیں

رقصاں ہیں ایڑیوں کی دھنوں پر تمام لوگ

کالے سیاہ بوٹ کوئی دیکھتا نہیں

انصاف گاہ ! تیرے ترازو کے آس پاس

اتنا سفید جھوٹ کوئی دیکھتا نہیں

چکلالہ چھاؤنی کی طرف ہے تمام رش

اسلام آباد روٹ کوئی دیکھتا نہیں

طاقت کے آس پاس حسیناؤں کا ہجوم

میرا عوامی سوٹ کوئی دیکھتا نہیں

سب دیکھتے ہیں میری نئی کار کی طرف

چہرے کی ٹوٹ پھوٹ کوئی دیکھتا نہیں

منصور آفاق

کوئی تمہیدِ انقلاب نہیں

دسمبر 1, 2007منصور آفاق،شعراء،غزلکتاب،انقلاب،ثواب،جواب،حجاب،خواب،خرابadmin

منصور آفاق ۔ غزل نمبر 393

اپنی نیندوں میں کوئی خواب نہیں

کوئی تمہیدِ انقلاب نہیں

ساحلوں پر برہنہ جوڑے ہیں

پر کوئی آنکھ بے حجاب نہیں

ہم سفر احتیاط، میرا بدن

نیکیوں کی کوئی کتاب نہیں

کچھ دنوں سے بجا ہے شب کا ایک

اور گھڑیال بھی خراب نہیں

عمر گزری ہے ایک کمرے میں

پھر بھی ہم رنگ اپنے خواب نہیں

کس لیے ذہن میں در آتے ہیں

جن سوالات کے جواب نہیں

آنکھ بھی خالی ہو گئی منصور

اور گٹھڑی میں بھی ثواب نہیں

منصور آفاق

ہو بھی جاؤ جو کسی اورکا ہونا ہے تمہیں

دسمبر 1, 2007منصور آفاق،شعراء،غزلہونا،چبھونا،ڈبونا،کونا،کھونا،کاکھلونا،پرونا،بچھونا،بونا،بھگونا،دھونا،سمونا،سوچاadmin

منصور آفاق ۔ غزل نمبر 392

یہی دوچار برس آنکھ نے رونا ہے تمہیں

ہو بھی جاؤ جو کسی اورکا ہونا ہے تمہیں

آخری بات کہ کس وقت ملیں گے کل ہم

مجھ کو معلوم ہے اب رات ہے ، سونا ہے تمہیں

یاد رکھنا کہ تمہیں چارہ گری کرنی ہے

زخم سینے ہیں مرے ،چاک پرونا ہے تمہیں

کیا گزاروگے اسی خیمہ ء افلاک میں رات

کیا بنانا یہی فٹ پاتھ بچھونا ہے تمہیں

کوئی خودکُش سا دھماکہ بھی ضروری ہے وہاں

جلدی سے جائے وقوعہ کو بھی دھونا ہے تمہیں

تم سے پہلوں نے جہاں اپنے قدم رکھے تھے

اسی آسیب زدہ غار میں کھونا ہے تمہیں

روح تک دیکھنے کی تم میں بصارت ہی نہیں

صرف کافی یہی مٹی کاکھلونا ہے تمہیں

سرخ فوارہ کی دھاروں کے دمادم کی قسم

رات کی چھاتی میں بس تیر چبھونا ہے تمہیں

دیکھنے ہیں مجھے جذبوں کی صراحی کے خطوط

میں نے وہسکی سے کسی روز بھگونا ہے تمہیں

صرف ہم نصف کے مالک ہیں بحکمِ ربی

فصل بھی کاٹنی ہے بیج بھی بونا ہے تمہیں

میری باہو سے ملاقات ہے ہونے والی

زندگی !’’ ہو‘‘ کے سمندر میں ڈبونا ہے تمہیں

تم پرندے ہو کسی وقت بھی اڑسکتے ہو

ساتھ رکھنے کے لئے جاں میں سمونا ہے تمہیں

جس میں چلتی چلی جاتی ہے قیامت منصور

اُس دوپٹے کا پکڑنا کوئی کونا ہے تمہیں

منصور آفاق

خوف دونوں طرف ایک لمحے کی تا خیر کے ہیں

دسمبر 1, 2007منصور آفاق،شعراء،غزلتحریر،تصویر،تعمیر،خیر،زنجیرadmin

منصور آفاق ۔ غزل نمبر 391

ایٹمی جنگ میں سوختہ خواب تسخیر کے ہیں

خوف دونوں طرف ایک لمحے کی تا خیر کے ہیں

وقت کی گیلری میں مکمل ہزاروں کی شکلیں

صرف ٹوٹے ہوئے خال و خد میری تصویر کے ہیں

شہر بمبار طیارے مسمار کرتے رہیں گے

شوق دنیا کو تازہ مکانوں کی تعمیر کے ہیں

ایک مقصد بھری زندگی وقت کی قید میں ہے

پاؤں پابند صدیوں سے منزل کی زنجیر کے ہیں

ایک آواز منصور کاغذ پہ پھیلی ہوئی ہے

میرے سناٹے میں شور خاموش تحریر کے ہیں

منصور آفاق

یہ بغیر تاروں کے بلب آن کیسے ہیں

دسمبر 1, 2007منصور آفاق،شعراء،غزلمکان،نشان،کان،گمان،آن،آسمان،خان،زبان،سائبان،ساربانadmin

منصور آفاق ۔ غزل نمبر 390

تیرا چہرہ کیسا ہے میرے دھیان کیسے ہیں

یہ بغیر تاروں کے بلب آن کیسے ہیں

خواب میں اسے ملنے کھیت میں گئے تھے ہم

کارپٹ پہ جوتوں کے یہ نشان کیسے ہیں

بولتی نہیں ہے جو وہ زبان کیسی ہے

یہ جو سنتے رہتے ہیں میرے کان کیسے ہیں

روکتے ہیں دنیا کو میری بات سننے سے

لوگ میرے بارے میں بد گمان کیسے ہیں

کیا ابھی نکلتا ہے ماہ تاب گلیوں میں

کچھ کہو میانوالی آسمان کیسے ہیں

کیا ابھی محبت کے گیت ریت گاتی ہے

تھل کی سسی کیسی ہے پنوں خان کیسے ہیں

کیا قطار اونٹوں کی چل رہی ہے صحرا میں

گھنٹیاں سی بجتی ہیں ، ساربان کیسے ہیں

چمنیوں کے ہونٹوں سے کیا دھواں نکلتا ہے

خالی خالی برسوں کے وہ مکان کیسے ہیں

دیکھتا تھا رم جھم سی بیٹھ کر جہاں تنہا

لان میں وہ رنگوں کے سائبان کیسے ہیں

اب بھی وہ پرندوں کو کیا ڈراتے ہیں منصور

کھیت کھیت لکڑی کے بے زبان کیسے ہیں

منصور آفاق

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: