زمرہ جات کے محفوظات: غزل

مجنوں کی محنتیں سب میں خاک میں ملائوں

اکتوبر 6, 2015میر تقی میر،اساتذہ،غزللائوں،ملائوں،چلائوں،چھپائوں،پائوں،اٹھائوں،بجھائوں،جلائوں،جگائوں،دکھائوں،رلائوںadmin

دیوان اول غزل 286

وحشت میں ہوں بلا گر وادی پر اپنی آئوں

مجنوں کی محنتیں سب میں خاک میں ملائوں

ہنس کر کبھو بلایا تو برسوں تک رلایا

اس کی ستم ظریفی کس کے تئیں دکھائوں

فریادی ہوں تو ٹپکے لوہو مری زباں سے

نالے کو بلبلوں کے خاطر میں بھی نہ لائوں

پوچھو نہ دل کے غم کو ایسا نہ ہووے یاراں

مانند روضہ خواں کے مجلس کے تیں رلائوں

لگتی ہے آگ تن میں دیکھے سے داغ اس کے

اس دل جلے ہوئے پہ کتنا ہی جی جلائوں

اک دم تو چونک بھی پڑ شور و فغاں سے میرے

اے بخت خفتہ کب تک تیرے تئیں جگائوں

از خویش رفتہ ہر دم فکر وصال میں ہوں

کتنا میں کھویا جائوں یارب کہ تجھ کو پائوں

عریاں تنی کی شوخی وحشت میں کیا بلا تھی

تہ گرد کی نہ بیٹھی تا تن کے تیں چھپائوں

اگلے خطوں نے میرے مطلق اثر نہ بخشا

قاصد کے بدلے اب کے جادو مگر چلائوں

دل تفتگی نے مارا مجھ کو کہاں مژہ دے

اک قطرہ آب تا میں اس آگ کو بجھائوں

آسودگی تو معلوم اے میر جیتے جی یاں

آرام تب ہی پائوں جب جی سے ہاتھ اٹھائوں

میر تقی میر

ایک مدت سے وہ مزاج نہیں

اکتوبر 6, 2015میر تقی میر،اساتذہ،غزلمزاج،احتیاج،رواج،علاجadmin

دیوان اول غزل 285

بے کلی بے خودی کچھ آج نہیں

ایک مدت سے وہ مزاج نہیں

درد اگر یہ ہے تو مجھے بس ہے

اب دوا کی کچھ احتیاج نہیں

ہم نے اپنی سی کی بہت لیکن

مرض عشق کا علاج نہیں

شہر خوبی کو خوب دیکھا میر

جنس دل کا کہیں رواج نہیں

میر تقی میر

لڑنے لگے ہیں ہجر میں اس کے ہوا سے ہم

اکتوبر 6, 2015میر تقی میر،اساتذہ،غزلہوا،وفا،ادا،بلا،جفا،حیا،دعاadmin

دیوان اول غزل 284

کرتے ہیں گفتگو سحر اٹھ کر صبا سے ہم

لڑنے لگے ہیں ہجر میں اس کے ہوا سے ہم

ہوتا نہ دل کا تا یہ سرانجام عشق میں

لگتے ہی جی کے مر گئے ہوتے بلا سے ہم

چھوٹا نہ اس کا دیکھنا ہم سے کسو طرح

پایان کار مارے گئے اس ادا سے ہم

داغوں ہی سے بھری رہی چھاتی تمام عمر

یہ پھول گل چنا کیے باغ وفا سے ہم

غافل نہ اپنی دیدہ درائی سے ہم کو جان

سب دیکھتے ہیں پر نہیں کہتے حیا سے ہم

دو چار دن تو اور بھی آ تو کراہتہً

اب ہوچکے ہیں روز کی تیری جفا سے ہم

آئینے کی مثال پس از صد شکست میر

کھینچا بغل میں یار کو دست دعا سے ہم

میر تقی میر

ہمیشہ آگ ہی برسے ہے یاں ہوا ہے گرم

اکتوبر 6, 2015میر تقی میر،اساتذہ،غزلہوا،جا،دوا،رکھاadmin

دیوان اول غزل 283

حذر کہ آہ جگر تفتگاں بلا ہے گرم

ہمیشہ آگ ہی برسے ہے یاں ہوا ہے گرم

ہزار حیف کہ درگیر صحبت اس سے نہیں

جگر کی آگ نے ہنگامہ کر رکھا ہے گرم

کہاں ہے تیغ و سپر آفتاب کی بارے

وہ سرد مہر ہمارا بھی اب ہوا ہے گرم

نہ اتنی دارو پی ظالم کہ اس خمار میں ہوں

مزاج گرم ہے پھر اور یہ دوا ہے گرم

گیا جہان سے خورشید ساں اگرچہ میر

ولیک مجلس دنیا میں اس کی جا ہے گرم

میر تقی میر

لیک لگ چلنے میں بلا ہیں ہم

اکتوبر 6, 2015میر تقی میر،اساتذہ،غزلمیرزا،چنا،ناروا،وفا،کیا،گدا،آشنا،بلا،خفا،خداadmin

دیوان اول غزل 282

گرچہ آوارہ جوں صبا ہیں ہم

لیک لگ چلنے میں بلا ہیں ہم

کام کیا آتے ہیں گے معلومات

یہ تو سمجھے ہی نہ کہ کیا ہیں ہم

تم ہی بیگانگی کرو نہ کرو

دلبرو وے ہی آشنا ہیں ہم

اے بتاں اس قدر جفا ہم پر

عاقبت بندئہ خدا ہیں ہم

سرمہ آلودہ مت رکھا کر چشم

دیکھ اس وضع سے خفا ہیں ہم

ہے نمک سود سب تن مجروح

تیرے کشتوں میں میرزا ہیں ہم

تیرے کوچے میں تا بہ مرگ رکھا

کشتۂ منت وفا ہیں ہم

خوف ہم کو نہیں جنوں سے کچھ

یوں تو مجنوں کے بھی چچا ہیں ہم

آستاں پر ترے ہی گذری عمر

اسی دروازے کے گدا ہیں ہم

ڈرتے ہیں تیری بے دماغی سے

کیونکہ پھر یار جی بلا ہیں ہم

کوئی خواہاں نہیں ہمارا میر

گوئیا جنس ناروا ہیں ہم

میر تقی میر

گئے گذرے خضر علیہ السلام

اکتوبر 6, 2015میر تقی میر،اساتذہ،غزلقیام،نام،کلام،السلام،تمام،خرام،شامadmin

دیوان اول غزل 281

اگر راہ میں اس کی رکھا ہے گام

گئے گذرے خضر علیہ السلام

دہن یار کا دیکھ چپ لگ گئی

سخن یاں ہوا ختم حاصل کلام

مجھے دیکھ منھ پر پریشاں کی زلف

غرض یہ کہ جا تو ہوئی اب تو شام

سر شام سے رہتی ہیں کاہشیں

ہمیں شوق اس ماہ کا ہے تمام

قیامت ہی یاں چشم و دل سے رہی

چلے بس تو واں جا کے کریے قیام

نہ دیکھے جہاں کوئی آنکھوں کی اور

نہ لیوے کوئی جس جگہ دل کا نام

جہاں میر زیر و زبر ہو گیا

خراماں ہوا تھا وہ محشر خرام

میر تقی میر

گئے گذرے ہیں آخر ایسے کیا ہم

اکتوبر 6, 2015میر تقی میر،اساتذہ،غزلفرا،لگا،مدعا،وفا،کیا،با،جھکا،جدا،دوا،رہاadmin

دیوان اول غزل 280

نہ پھر رکھیں گے تیری رہ میں پا ہم

گئے گذرے ہیں آخر ایسے کیا ہم

کھنچے گی کب وہ تیغ ناز یارب

رہے ہیں دیر سے سر کو جھکا ہم

نہ جانا یہ کہ کہتے ہیں کسے پیار

رہیں بے لطفیاں ہی یاں تو باہم

بنے کیا خال و زلف و خط سے دیکھیں

ہوئے ہیں کتنے یہ کافر فراہم

مرض ہی عشق کا بے ڈول ہے کچھ

بہت کرتے ہیں اپنی سی دوا ہم

کہیں پیوند ہوں یارب زمیں کے

پھریں گے اس سے یوں کب تک جدا ہم

ہوس تھی عشق کرنے میں ولیکن

بہت نادم ہوئے دل کو لگا ہم

کب آگے کوئی مرتا تھا کسی پر

جہاں میں کر گئے رسم وفا ہم

تعارف کیا رہا اہل چمن سے

ہوئے اک عمر کے پیچھے رہا ہم

موا جس کے لئے اس کو نہ دیکھا

نہ سمجھے میر کا کچھ مدعا ہم

میر تقی میر

نزدیک اپنے کب کے ہوئے ہیں ہلاک ہم

اکتوبر 6, 2015میر تقی میر،اساتذہ،غزلہلاک،چاک،پاک،تپاک،تاک،خاکadmin

دیوان اول غزل 279

کرتے نہیں ہیں دوری سے اب اس کی باک ہم

نزدیک اپنے کب کے ہوئے ہیں ہلاک ہم

بیٹھے ہم اپنے طور پہ مستوں میں جب اٹھے

جوں ابرتر لیے اٹھے دامن کو پاک ہم

آہستہ اے نسیم کہ اطراف باغ کے

مشتاق پر فشانی ہیں اک مشت خاک ہم

شمع و چراغ و شعلہ و آتش شرار و برق

رکھتے ہیں دل جلے یہ بہم سب تپاک ہم

مستی میں ہم کو ہوش نہیں نشأتین کا

گلشن میں اینڈتے ہیں پڑے زیر تاک ہم

جوں برق تیرے کوچے سے ہنستے نہیں گئے

مانند ابر جب اٹھے تب گریہ ناک ہم

مدت ہوئی کہ چاک قفس ہی سے اب تو میر

دکھلا رہے ہیں گل کو دل چاک چاک ہم

میر تقی میر

پر مل چلا کرو بھی کسو خستہ جاں سے تم

اکتوبر 6, 2015میر تقی میر،اساتذہ،غزلمکاں،کہاں،پاسباں،امتحاں،جہاں،جاں،داستاں،رواں،زباںadmin

دیوان اول غزل 278

جانا کہ شغل رکھتے ہو تیر و کماں سے تم

پر مل چلا کرو بھی کسو خستہ جاں سے تم

ہم اپنی چاک جیب کو سی رہتے یا نہیں

پھاٹے میں پائوں دینے کو آئے کہاں سے تم

اب دیکھتے ہیں خوب تو وہ بات ہی نہیں

کیا کیا وگرنہ کہتے تھے اپنی زباں سے تم

تنکے بھی تم ٹھہرتے کہیں دیکھے ہیں تنک

چشم وفا رکھو نہ خسان جہاں سے تم

جائو نہ دل سے منظر تن میں ہے جا یہی

پچھتائوگے اٹھوگے اگر اس مکاں سے تم

قصہ مرا سنوگے تو جاتی رہے گی نیند

آرام چشم مت رکھو اس داستاں سے تم

کھل جائیں گی پھر آنکھیں جو مر جائے گا کوئی

آتے نہیں ہو باز مرے امتحاں سے تم

جتنے تھے کل تم آج نہیں پاتے اتنا ہم

ہر دم چلے ہی جاتے ہو آب رواں سے تم

رہتے نہیں ہو بن گئے میر اس گلی میں رات

کچھ راہ بھی نکالو سگ و پاسباں سے تم

میر تقی میر

ایسا نہ ہو کہ میرے جی کا ضرر کرو تم

اکتوبر 6, 2015میر تقی میر،اساتذہ،غزلنظر،گھر،ادھر،تر،خبر،درگذر،سفر،سحر،ضررadmin

دیوان اول غزل 277

آئے تو ہو طبیباں تدبیر گر کرو تم

ایسا نہ ہو کہ میرے جی کا ضرر کرو تم

رنگ شکستہ میرا بے لطف بھی نہیں ہے

ایک آدھ رات کو تو یاں بھی سحر کرو تم

تھی چشم داشت مجھ کو اے دلبراں یہ تم سے

دل کو مرے اڑاکر آنکھوں میں گھر کرو تم

اس بزم خوش کے محرم ناآشنا ہیں سارے

کس کو کہوں کہ واں تک میری خبر کرو تم

ہے پیچ دار از بس راہ وصال و ہجراں

ان دو ہی منزلوں میں برسوں سفر کرو تم

یہ ظلم ہے تو ہم بھی اس زندگی سے گذرے

سوگند ہے تمھیں اب جو درگذر کرو تم

روے سخن کہاں تک غیروں کی اور آخر

ہم بھی تو آدمی ہیں ٹک منھ ادھر کرو تم

ہو عاشقوں میں اس کے تو آئو میر صاحب

گردن کو اپنی مو سے باریک تر کرو تم

کیا لطف ہے وگرنہ جس دم وہ تیغ کھینچے

سینہ سپر کریں ہم قطع نظر کرو تم

میر تقی میر

گل کب رکھے ہے ٹکڑے جگر اس قدر کہ ہم

اکتوبر 6, 2015میر تقی میر،اساتذہ،غزلقدر،مر،پر،تر،جگر،خبر،در،درگذرadmin

دیوان اول غزل 276

کیا بلبل اسیر ہے بے بال و پر کہ ہم

گل کب رکھے ہے ٹکڑے جگر اس قدر کہ ہم

خورشید صبح نکلے ہے اس نور سے کہ تو

شبنم گرہ میں رکھتی ہے یہ چشم تر کہ ہم

جیتے ہیں تو دکھادیں گے دعواے عندلیب

گل بن خزاں میں اب کے وہ رہتی ہے مر کہ ہم

یہ تیغ ہے یہ طشت ہے یہ ہم ہیں کشتنی

کھیلے ہے کون ایسی طرح جان پر کہ ہم

تلواریں تم لگاتے ہو ہم ہیں گے دم بخود

دنیا میں یہ کرے ہے کوئی درگذر کہ ہم

اس جستجو میں اور خرابی تو کیا کہیں

اتنی نہیں ہوئی ہے صبا در بہ در کہ ہم

جب جا پھنسا کہیں تو ہمیں یاں ہوئی خبر

رکھتا ہے کون دل تری اتنی خبر کہ ہم

جیتے ہیں اور روتے ہیں لخت جگر ہے میر

کرتے سنا ہے یوں کوئی قیمہ جگر کہ ہم

میر تقی میر

تجھ کو بالیں پر نہ دیکھا کھولی سو سو بار چشم

اکتوبر 6, 2015میر تقی میر،اساتذہ،غزلچار،یار،بار،تار،دیوارadmin

دیوان اول غزل 275

کیا کہوں کیا رکھتے تھے تجھ سے ترے بیمار چشم

تجھ کو بالیں پر نہ دیکھا کھولی سو سو بار چشم

ہجر میں پاتا نہیں گریے کے سر رشتے کو میں

ہر سحر اٹھ باندھ دے ہے آنسوئوں کا تار چشم

گوئیا ناسور زخم دل تھی یہ اے ہم نشیں

پیش ازیں کیا کیا سمیں دکھلاتی تھی خوں بار چشم

سینکڑوں ہوں کشتنی تو لاویں کچھ تاب نگاہ

ایک دو کا کام کب ہے اس سے ہونا چار چشم

جرم کیا غیروں کا طالع چشم پوشی کرتے ہیں

دیکھ کر احوال میرا موند لے ہے یار چشم

روز و شب وا رہنے سے پیدا ہے میر آثار شوق

ہے کسو نظارگی کا رخنۂ دیوار چشم

میر تقی میر

سارے گلبن تھے تو کہے بے اصل

اکتوبر 6, 2015میر تقی میر،اساتذہ،غزلاصلadmin

دیوان اول غزل 274

لٹ گئی اس کو دیکھ گل کی فصل

سارے گلبن تھے تو کہے بے اصل

میر تقی میر

وہ بھی ہے گا گلاب کا سا پھول

اکتوبر 6, 2015میر تقی میر،اساتذہ،غزلپھولadmin

دیوان اول غزل 273

تو گل باغ پر نہ بلبل پھول

وہ بھی ہے گا گلاب کا سا پھول

میر تقی میر

آزردہ دل ستم زدہ دل بے قرار دل

اکتوبر 6, 2015میر تقی میر،اساتذہ،غزلدلadmin

دیوان اول غزل 272

رہتا نہیں ہے کوئی گھڑی اب تو یار دل

آزردہ دل ستم زدہ دل بے قرار دل

میر تقی میر

مثل مشہور ہے یہ تو کہ ہے دنیا میں دلبر دل

اکتوبر 6, 2015میر تقی میر،اساتذہ،غزلدلبر،درadmin

دیوان اول غزل 271

کرو تم یاد گر ہم کو رہے تم میں بھی اکثر دل

مثل مشہور ہے یہ تو کہ ہے دنیا میں دلبر دل

بھلا تم نقد دل لے کر ہمیں دشمن گنو اب تو

کبھو کچھ ہم بھی کرلیں گے حساب دوستاں در دل

میر تقی میر

لگتا نہیں ہے دل کا خریدار آج کل

اکتوبر 6, 2015میر تقی میر،اساتذہ،غزلیار،کار،آزار،بیمار،بار،خمار،خبردار،خریدار،دستار،رفتار،طلبگارadmin

دیوان اول غزل 270

مندا ہے اختلاط کا بازار آج کل

لگتا نہیں ہے دل کا خریدار آج کل

اس مہلت دو روزہ میں خطرے ہزار ہیں

اچھا ہے رہ سکو جو خبردار آج کل

اوباشوں ہی کے گھر تجھے پانے لگے ہیں روز

مارا پڑے گا کوئی طلبگار آج کل

ملنے کی رات داخل ایام کیا نہیں

برسوں ہوئے کہاں تئیں اے یار آج کل

گلزار ہورہے ہے مرے دم سے کوے یار

اک رنگ پر ہے دیدئہ خوں بار آج کل

تاشام اپنا کام کھنچے کیونکے دیکھیے

پڑتی نہیں ہے جی کو جفا کار آج کل

کعبے تلک تو سنتے ہیں ویرانہ و خراب

آباد ہے سو خانۂ خمار آج کل

ٹھوکر دلوں کو لگنے لگی ہے خرام میں

لاوے گی اک بلا تری رفتار آج کل

ایسا ہی مغبچوں میں جو آنا ہے شیخ جی

تو جارہے ہیں جبہ و دستار آج کل

حیران میں ہی حال کی تدبیر میں نہیں

ہر اک کو شہر میں ہے یہ آزار آج کل

اچھا نہیں ہے میر کا احوال ان دنوں

غالب کہ ہو چکے گا یہ بیمار آج کل

میر تقی میر

صبح گہ اٹھتے ہی عالم کو ڈبوویں گے کل

اکتوبر 6, 2015میر تقی میر،اساتذہ،غزلہوویں،ڈبوویں،سوویںadmin

دیوان اول غزل 269

شرط یہ ابر میں ہم میں ہے کہ روویں گے کل

صبح گہ اٹھتے ہی عالم کو ڈبوویں گے کل

آج آوارہ ہو اے بال اسیران قفس

یہ گل و باغ و خیابان نہ ہوویں گے کل

وعدئہ وصل رہا ہے شب آئندہ پہ میر

بخت خوابیدہ جو ٹک جاگتے سوویں گے کل

میر تقی میر

اے رشک حور آدمیوں کی سی چال چل

اکتوبر 6, 2015میر تقی میر،اساتذہ،غزلنکال،چال،ڈال،انتقال،بالadmin

دیوان اول غزل 268

جانیں ہیں فرش رہ تری مت حال حال چل

اے رشک حور آدمیوں کی سی چال چل

اک آن میں بدلتی ہے صورت جہان کی

جلد اس نگارخانے سے کر انتقال چل

سالک بہر طریق بدن ہے وبال جاں

یہ بوجھ تیرے ساتھ جو ہے اس کو ڈال چل

آوارہ میرے ہونے کا باعث وہ زلف ہے

کافر ہوں اس میں ہووے اگر ایک بال چل

دنیا ہے میر حادثہ گاہ مقرری

یاں سے تو اپنا پائوں شتابی نکال چل

میر تقی میر

ہیں پریشاں چمن میں کچھ پر و بال

اکتوبر 6, 2015میر تقی میر،اساتذہ،غزلچال،وصال،پامال،پرسال،بال،بحال،رومال،شالadmin

دیوان اول غزل 267

سیر کر عندلیب کا احوال

ہیں پریشاں چمن میں کچھ پر و بال

تب غم تو گئی طبیب ولے

پھر نہ آیا کبھو مزاج بحال

سبزہ نورستہ رہگذار کا ہوں

سر اٹھایا کہ ہو گیا پامال

کیوں نہ دیکھوں چمن کو حسرت سے

آشیاں تھا مرا بھی یاں پرسال

سرد مہری کی بسکہ گل رو نے

اوڑھی ابر بہار نے بھی شال

ہجر کی شب کو یاں تئیں تڑپا

کہ ہوا صبح ہوتے میرا وصال

ہم تو سہ گذرے کج روی تیری

نہ نبھے گی پر اے فلک یہ چال

دیدئہ تر پہ شب رکھا تھا میر

لکۂ ابر ہے مرا رومال

میر تقی میر

پرواز خواب ہو گئی ہے بال و پر خیال

اکتوبر 6, 2015میر تقی میر،اساتذہ،غزلکمر،کر،گہر،پر،بیشترadmin

دیوان اول غزل 266

کیسا چمن اسیری میں کس کو ادھر خیال

پرواز خواب ہو گئی ہے بال و پر خیال

مشکل ہے مٹ گئے ہوئے نقشوں کی پھر نمود

جو صورتیں بگڑ گئیں ان کا نہ کر خیال

مو کو عبث ہے تاب کلی یوں ہی تنگ ہے

اس کا دہن ہے وہم و گمان و کمر خیال

رخسار پر ہمارے ڈھلکنے کو اشک کے

دیکھے ہے جو کوئی سو کرے ہے گہر خیال

کس کو دماغ شعر و سخن ضعف میں کہ میر

اپنا رہے ہے اب تو ہمیں بیشتر خیال

میر تقی میر

یک مشت پر پڑے ہیں گلشن میں جاے بلبل

اکتوبر 6, 2015میر تقی میر،اساتذہ،غزلنواے،نالہاے،پاے،جاے،دعاے،صداےadmin

دیوان اول غزل 265

گل کی جفا بھی جانی دیکھی وفاے بلبل

یک مشت پر پڑے ہیں گلشن میں جاے بلبل

کر سیر جذب الفت گل چیں نے کل چمن میں

توڑا تھا شاخ گل کو نکلی صداے بلبل

کھٹکے ہیں خار ہوکر ہر شب دل چمن میں

اتنے لب و دہن پر یہ نالہاے بلبل

یک رنگیوں کی راہیں طے کرکے مر گیا ہے

گل میں رگیں نہیں یہ ہیں نقش پاے بلبل

آئی بہار و گلشن گل سے بھرا ہے لیکن

ہر گوشۂ چمن میں خالی ہے جاے بلبل

پیغام بے غرض بھی سنتے نہیں ہیں خوباں

پہنچی نہ گوش گل تک آخر دعاے بلبل

یہ دل خراش نالے ہر شب کے میر تیرے

کر دیں گے بے نمک ہی شور نواے بلبل

میر تقی میر

چھانی چمن کی خاک نہ تھا نقش پاے گل

اکتوبر 6, 2015میر تقی میر،اساتذہ،غزلہواے،ہاے،ہائے،کھائے،پاے،بہاے،بچھائے،سواے،صفاےadmin

دیوان اول غزل 264

فصل خزاں میں سیر جو کی ہم نے جاے گل

چھانی چمن کی خاک نہ تھا نقش پاے گل

اللہ رے عندلیب کی آواز دل خراش

جی ہی نکل گیا جو کہا ان نے ہائے گل

مقدور تک شراب سے رکھ انکھڑیوں میں رنگ

یہ چشمک پیالہ ہے ساقی ہواے گل

یہ دیکھ سینہ داغ سے رشک چمن ہے یاں

بلبل ستم ہوا نہ جو تونے بھی کھائے گل

بلبل ہزار جی سے خریدار اس کی ہے

اے گل فروش کریو سمجھ کر بہاے گل

نکلا ہے ایسی خاک سے کس سادہ رو کی یہ

قابل درود بھیجنے کے ہے صفاے گل

بارے سرشک سرخ کے داغوں سے رات کو

بستر پر اپنے سوتے تھے ہم بھی بچھائے گل

آ عندلیب صلح کریں جنگ ہوچکی

لے اے زباں دراز تو سب کچھ سواے گل

گل چیں سمجھ کے چنیو کہ گلشن میں میر کے

لخت جگر پڑے ہیں نہیں برگ ہاے گل

میر تقی میر

تب سے لٹتی ہے ہند چاروں دانگ

اکتوبر 6, 2015میر تقی میر،اساتذہ،غزلمانگ،ڈانگ،ٹانگ،پٹانگ،پھلانگ،بھانگ،بانگ،دانگ،رانگ،سانگadmin

دیوان اول غزل 263

جب سے خط ہے سیاہ خال کی تھانگ

تب سے لٹتی ہے ہند چاروں دانگ

بات امل کی چلی ہی جاتی ہے

ہے مگر عوج بن عنق کی ٹانگ

بن جو کچھ بن سکے جوانی میں

رات تو تھوڑی ہے بہت ہے سانگ

عشق کا شور کوئی چھپتا ہے

نالۂ عندلیب ہے گل بانگ

اس ذقن میں بھی سبزی ہے خط کی

دیکھو جیدھر کنوئیں پڑی ہے بھانگ

کس طرح ان سے کوئی گرم ملے

سیم تن پگھلے جاتے ہیں جوں رانگ

چلی جاتی ہے حسب قدر بلند

دور تک اس پہاڑ کی ہے ڈانگ

تفرہ باطل تھا طور پر اپنے

ورنہ جاتے یہ دوڑ ہم بھی پھلانگ

میں نے کیا اس غزل کو سہل کیا

قافیے ہی تھے اس کے اوٹ پٹانگ

میر بندوں سے کام کب نکلا

مانگنا ہے جو کچھ خدا سے مانگ

میر تقی میر

رسوائیاں گئی ہیں عقیق یمن تلک

اکتوبر 6, 2015میر تقی میر،اساتذہ،غزلچمن،وطن،یمن،کفن،ختنadmin

دیوان اول غزل 262

کب دسترس ہے لعل کو تیرے سخن تلک

رسوائیاں گئی ہیں عقیق یمن تلک

آزادگی یہ چھوڑ قفس ہم نہ جاسکے

حسن سلوک ضعف سے صحن چمن تلک

تردستیاں ہوں دست و گریبان ہاتھ کی

زیر زمیں بھی پہنچیں گی چاک کفن تلک

روتا ہوں آہوئوں میں تری چشم یاد کر

طوفاں کیے ہیں سینکڑوں دشت ختن تلک

مارا گیا خرام بتاں پر سفر میں میر

اے کبک کہتا جائیو اس کے وطن تلک

میر تقی میر

طوفاں ہے میرے اشک ندامت سے یاں تلک

اکتوبر 6, 2015میر تقی میر،اساتذہ،غزلیاں،کہاں،آشیاں،باغباں،زباںadmin

دیوان اول غزل 261

جاتے ہیں لے خرابی کو سیل آسماں تلک

طوفاں ہے میرے اشک ندامت سے یاں تلک

شاید کہ دیوے رخصت گلشن ہوں بے قرار

میرے قفس کو لے تو چلو باغباں تلک

قید قفس سے چھوٹ کے دیکھا جلا ہوا

پہنچے نہ ہوتے کاشکے ہم آشیاں تلک

اتنا ہوں ناتواں کہ در دل سے اب گلہ

آتا ہے ایک عمر میں میری زباں تلک

میں ترک عشق کرکے ہوا گوشہ گیر میر

ہوتا پھروں خراب جہاں میں کہاں تلک

میر تقی میر

ہاتھ پہنچا نہ پاے قاتل تک

اکتوبر 6, 2015میر تقی میر،اساتذہ،غزلقاتل،منزل،محفل،دل،ساحلadmin

دیوان اول غزل 260

دست و پا مارے وقت بسمل تک

ہاتھ پہنچا نہ پاے قاتل تک

کعبہ پہنچا تو کیا ہوا اے شیخ

سعی کر ٹک پہنچ کسی دل تک

درپئے محمل اس کے جیسے جرس

میں بھی نالاں ہوں ساتھ منزل تک

بجھ گئے ہم چراغ سے باہر

کہیو اے باد شمع محفل تک

نہ گیا میر اپنی کشتی سے

ایک بھی تختہ پارہ ساحل تک

میر تقی میر

کہ پہنچا شمع ساں داغ اب جگر تک

اکتوبر 6, 2015میر تقی میر،اساتذہ،غزلکمر،گھر،گر،پر،ادھر،تر،جگر،در،درتر،سحرadmin

دیوان اول غزل 259

کہیں پہنچو بھی مجھ بے پا و سر تک

کہ پہنچا شمع ساں داغ اب جگر تک

کچھ اپنی آنکھ میں یاں کا نہ آیا

خزف سے لے کے دیکھا درتر تک

جسے شب آگ سا دیکھا سلگتے

اسے پھر خاک ہی پایا سحر تک

ترا منھ چاند سا دیکھا ہے شاید

کہ انجم رہتے ہیں ہر شب ادھر تک

جب آیا آہ تب اپنے ہی سر پر

گیا یہ ہاتھ کب اس کی کمر تک

ہم آوازوں کو سیر اب کی مبارک

پر و بال اپنے بھی ایسے تھے پر تک

کھنچی کیا کیا خرابی زیر دیوار

ولے آیا نہ وہ ٹک گھر سے در تک

گلی تک تیری لایا تھا ہمیں شوق

کہاں طاقت کہ اب پھر جائیں گھر تک

یہی دردجدائی ہے جو اس شب

تو آتا ہے جگر مژگان تر تک

دکھائی دیں گے ہم میت کے رنگوں

اگر رہ جائیں گے جیتے سحر تک

کہاں پھر شور شیون جب گیا میر

یہ ہنگامہ ہے اس ہی نوحہ گر تک

میر تقی میر

دوری رہ ہے راہ بر نزدیک

اکتوبر 6, 2015میر تقی میر،اساتذہ،غزلمگر،کر،بیشتر،بر،تر،جگر،خبر،سفر،سحرadmin

دیوان اول غزل 258

شوق ہے تو ہے اس کا گھر نزدیک

دوری رہ ہے راہ بر نزدیک

آہ کرنے میں دم کو سادھے رہ

کہتے ہیں دل سے ہے جگر نزدیک

دور والوں کو بھی نہ پہنچے ہم

یہی نہ تم سے ہیں مگر نزدیک

ڈوبیں دریا و کوہ و شہر و دشت

تجھ سے سب کچھ ہے چشم تر نزدیک

حرف دوری ہے گرچہ انشا لیک

دیجو خط جا کے نامہ بر نزدیک

دور اب بیٹھتے ہیں مجلس میں

ہم جو تم سے تھے بیشتر نزدیک

خبر آتی ہے سو بھی دور سے یاں

آئو یک بار بے خبر نزدیک

توشۂ آخرت کا فکر رہے

جی سے جانے کا ہے سفر نزدیک

دور پھرنے کا ہم سے وقت گیا

پوچھ کچھ حال بیٹھ کر نزدیک

مر بھی رہ میر شب بہت رویا

ہے مری جان اب سحر نزدیک

میر تقی میر

کر جائوں گا سفر ہی میں دنیا سے تب تلک

اکتوبر 6, 2015میر تقی میر،اساتذہ،غزللب،کب،اب،تب،شبadmin

دیوان اول غزل 257

بالیں پہ میری آوے گا تو گھر سے جب تلک

کر جائوں گا سفر ہی میں دنیا سے تب تلک

اتنا دن اور دل سے طپش کرلے کاوشیں

یہ مجہلہ تمام ہی ہے آج شب تلک

نقاش کیونکے کھینچ چکا تو شبیہ یار

کھینچوں ہوں ایک ناز ہی اس کا میں اب تلک

شب کوتہ اور قصہ مری جان کا دراز

القصہ اب کہا کروں تجھ سے میں کب تلک

باقی یہ داستان ہے اور کل کی رات ہے

گر جان میری میر نہ آپہنچے لب تلک

میر تقی میر

جس کی لے دام سے تاگوش گل آواز ہے ایک

اکتوبر 6, 2015میر تقی میر،اساتذہ،غزلپرواز،انداز،آواز،باز،سازadmin

دیوان اول غزل 256

میر گم کردہ چمن زمزمہ پرداز ہے ایک

جس کی لے دام سے تاگوش گل آواز ہے ایک

کچھ ہو اے مرغ قفس لطف نہ جاوے اس سے

نوحہ یا نالہ ہر اک بات کا انداز ہے ایک

ناتوانی سے نہیں بال فشانی کا دماغ

ورنہ تا باغ قفس سے مری پرواز ہے ایک

گوش کو ہوش کے ٹک کھول کے سن شور جہاں

سب کی آواز کے پردے میں سخن ساز ہے ایک

چاہے جس شکل سے تمثال صفت اس میں درآ

عالم آئینے کے مانند در باز ہے ایک

میر تقی میر

سوکھا نہیں لوہو در و دیوار سے اب تک

اکتوبر 6, 2015میر تقی میر،اساتذہ،غزلیار،گرفتار،پیار،اسرار،تلوار،خونخوار،دیوار،دیدار،دار،رخسار،زار،سرکارadmin

دیوان اول غزل 255

ہیں بعد مرے مرگ کے آثار سے اب تک

سوکھا نہیں لوہو در و دیوار سے اب تک

رنگینی عشق اس کے ملے پر ہوئی معلوم

صحبت نہ ہوئی تھی کسی خونخوار سے اب تک

کب سے متحمل ہے جفائوں کا دل زار

زنہار وفا ہو نہ سکی یار سے اب تک

ابرو ہی کی جنبش نے یہ ستھرائو کیے ہیں

مارا نہیں ان نے کوئی تلوار سے اب تک

وعدہ بھی قیامت کا بھلا کوئی ہے وعدہ

پر دل نہیں خالی غم دیدار سے اب تک

مدت ہوئی گھٹ گھٹ کے ہمیں شہر میں مرتے

واقف نہ ہوا کوئی اس اسرار سے اب تک

برسوں ہوئے دل سوختہ بلبل کو موئے لیک

اک دود سا اٹھتا ہے چمن زار سے اب تک

کیا جانیے ہوتے ہیں سخن لطف کے کیسے

پوچھا نہیں ان نے تو ہمیں پیار سے اب تک

اس باغ میں اغلب ہے کہ سرزد نہ ہوا ہو

یوں نالہ کسو مرغ گرفتار سے اب تک

خط آئے پہ بھی دن ہے سیہ تم سے ہمارا

جاتا نہیں اندھیر یہ سرکار سے اب تک

نکلا تھا کہیں وہ گل نازک شب مہ میں

سو کوفت نہیں جاتی ہے رخسار سے اب تک

دیکھا تھا کہیں سایہ ترے قد کا چمن میں

ہیں میر جی آوارہ پری دار سے اب تک

میر تقی میر

آشوب نالہ اب تو پہنچا ہے لامکاں تک

اکتوبر 6, 2015میر تقی میر،اساتذہ،غزللامکاں،واں،کہاں،آستاں،آشیاں،استخواں،جہاں،جاں،زباںadmin

دیوان اول غزل 254

اب وہ نہیں کہ شورش رہتی تھی آسماں تک

آشوب نالہ اب تو پہنچا ہے لامکاں تک

بہ بھی گیا بدن کا سب ہوکے گوشت پانی

اب کارد اے عزیزاں پہنچی ہے استخواں تک

تصویر کی سی شمعیں خاموش جلتے ہیں ہم

سوز دروں ہمارا آتا نہیں زباں تک

روتے پھرے ہیں لوہو یک عمر اس گلی میں

باغ و بہار ہی ہے جاوے نظر جہاں تک

آنکھیں جو روتے روتے جاتی رہیں بجا ہے

انصاف کر کہ کوئی دیکھے ستم کہاں تک

بے لطف تیرے کیونکر تجھ تک پہنچ سکیں ہم

ہیں سنگ راہ اپنی کتنے یہاں سے واں تک

ہم بے نصیب سر کو پتھر سے کیوں نہ پھوڑیں

پہنچا کبھو نہ جبہہ اس سنگ آستاں تک

مانند طیر نوپر اٹھے جہاں گئے ہم

دشوار ہے ہمارا آنا پھر آشیاں تک

تن کام میں ہمارے دیتا نہیں وہی کچھ

حاضر ہیں میر ہم تو اپنی طرف سے جاں تک

میر تقی میر

چھاتی پہ بعد مرگ بھی دل جم ہے زیر خاک

اکتوبر 6, 2015میر تقی میر،اساتذہ،غزلزیرadmin

دیوان اول غزل 253

بے چین مجھ کو چاہتا ہر دم ہے زیر خاک

چھاتی پہ بعد مرگ بھی دل جم ہے زیر خاک

آسودگی جو چاہے تو مرنے پہ دل کو رکھ

آشفتگی طبع بہت کم ہے زیرخاک

تنہا تو اپنی گور میں رہنے پہ بعد مرگ

مت اضطراب کریو کہ عالم ہے زیر خاک

مجنوں نہ تھا کہ جس کے تئیں سونپ کر مروں

آشفتگی کا مجھ کو نپٹ غم ہے زیر خاک

رویا تھا نزع میں میں اسے یاد کر بہت

اب تک مری ہر ایک مژہ نم ہے زیر خاک

کیا آسماں پہ کھینچے کوئی میر آپ کو

جانا جہاں سے سب کو مسلم ہے زیر خاک

میر تقی میر

شیخ کیا جانے تو کہ کیا ہے عشق

اکتوبر 6, 2015میر تقی میر،اساتذہ،غزلکیا،خداadmin

دیوان اول غزل 252

درد ہی خود ہے خود دوا ہے عشق

شیخ کیا جانے تو کہ کیا ہے عشق

تو نہ ہووے تو نظم کل اٹھ جائے

سچے ہیں شاعراں خدا ہے عشق

میر تقی میر

تو مائل نہ ہو پھر گہر کی طرف

اکتوبر 6, 2015میر تقی میر،اساتذہ،غزلقمر،نگر،کمر،گہر،گھر،گر،تر،جگر،سفر،سحر،ضررadmin

دیوان اول غزل 251

جو دیکھو مرے شعر تر کی طرف

تو مائل نہ ہو پھر گہر کی طرف

کوئی داد دل آہ کس سے کرے

ہر اک ہے سو اس فتنہ گر کی طرف

محبت نے شاید کہ دی دل کو آگ

دھواں سا ہے کچھ اس نگر کی طرف

لگیں ہیں ہزاروں ہی آنکھیں ادھر

اک آشوب ہے اس کے گھر کی طرف

بہت رنگ ملتا ہے دیکھو کبھو

ہماری طرف سے سحر کی طرف

بخود کس کو اس تاب رخ نے رکھا

کرے کون شمس و قمر کی طرف

نہ سمجھا گیا ابر کیا دیکھ کر

ہوا تھا مری چشم تر کی طرف

ٹپکتا ہے پلکوں سے خوں متصل

نہیں دیکھتے ہم جگر کی طرف

مناسب نہیں حال عاشق سے صبر

رکھے ہے یہ دارو ضرر کی طرف

کسے منزل دلکش دہر میں

نہیں میل خاطر سفر کی طرف

رگ جاں کب آتی ہے آنکھوں میں میر

گئے ہیں مزاج اس کمر کی طرف

میر تقی میر

ہر خوں گرفتہ جائے ہے جلاد کی طرف

اکتوبر 6, 2015میر تقی میر،اساتذہ،غزلفرہاد،فریاد،جلاد،شمشاد،صیادadmin

دیوان اول غزل 250

غالب ہے تیرے عہد میں بیداد کی طرف

ہر خوں گرفتہ جائے ہے جلاد کی طرف

کن نے لیا ہے تم سے مچلکا کہ داد دو

ٹک کان ہی رکھا کرو فریاد کی طرف

ہر تار زلف قیمت فردوس ہے ترا

کرتا ہے کون طرئہ شمشاد کی طرف

ہم نے تو پرفشانی نہ جانی کہ ایک بار

پرواز کی چمن سے سو صیاد کی طرف

حیران کار عشق ہے شیریں کا نقش میر

کچھ یوں ہی دیکھتا نہیں فرہاد کی طرف

میر تقی میر

راستی یہ ہے کہ وعدے ہیں تمھارے سب خلاف

اکتوبر 6, 2015میر تقی میر،اساتذہ،غزللاف،مصاف،ناف،خلاف،شگاف،صاف،غلافadmin

دیوان اول غزل 249

آج کل کاہے کو بتلاتے ہو گستاخی معاف

راستی یہ ہے کہ وعدے ہیں تمھارے سب خلاف

آہ برچھی سی لگی تھی تیر سی دل کی طپش

ہجر کی شب مجھ پہ گذری غیرت روز مصاف

ایک دن میں نے لکھا تھا اس کو اپنا درد دل

آج تک جاتا نہیں سینے سے خامے کے شگاف

پائوں پر سے اپنے میرا سر اٹھانے مت جھکو

تیغ باندھی ہے میاں تم نے کمر میں خوش غلاف

صف الٹ جا عاشقوں کی گر ترے ابرو ہلیں

ایک دم تلوار کے چلنے میں ہووے ملک صاف

شیخ مت روکش ہو مستوں کا تو اس جبے اپر

لیتے استنجے کو ڈھیلا تیری ٹل جاتی ہے ناف

عشق کے بازار میں سودا نہ کیجو تو تو میر

سر کو جب واں بیچ چکتے ہیں تو یہ ہے دست لاف

میر تقی میر

جائیں گے گر وفا کرے گا دماغ

اکتوبر 6, 2015میر تقی میر،اساتذہ،غزلدماغadmin

دیوان اول غزل 248

شیخ سچ خوب ہے بہشت کا باغ

جائیں گے گر وفا کرے گا دماغ

میر تقی میر

کہاں دماغ ہمیں اس قدر دروغ دروغ

اکتوبر 6, 2015میر تقی میر،اساتذہ،غزلقدر،نظر،خبر،دگر،سحرadmin

دیوان اول غزل 247

ہم اور تیری گلی سے سفر دروغ دروغ

کہاں دماغ ہمیں اس قدر دروغ دروغ

تم اور ہم سے محبت تمھیں خلاف خلاف

ہم اور الفت خوب دگر دروغ دروغ

غلط غلط کہ رہیں تم سے ہم تنک غافل

تم اور پوچھو ہماری خبر دروغ دروغ

فروغ کچھ نہیں دعوے کو صبح صادق کے

شب فراق کو کب ہے سحر دروغ دروغ

کسو کے کہنے سے مت بدگماں ہو میر سے تو

وہ اور اس کو کسو پر نظر دروغ دروغ

میر تقی میر

واہ وا رے آتش جاں سوز پھر تاثیر شمع

اکتوبر 6, 2015میر تقی میر،اساتذہ،غزلشمعadmin

دیوان اول غزل 246

یوں جلا ڈالا کہ کچھ روشن نہ ہوئی تقریر شمع

واہ وا رے آتش جاں سوز پھر تاثیر شمع

میر تقی میر

اس بھبھوکے سے کو بیٹھا دیکھ جل جاتی ہے شمع

اکتوبر 6, 2015میر تقی میر،اساتذہ،غزلشمعadmin

دیوان اول غزل 245

سب پہ روشن ہے کہ شب مجلس میں جب آتی ہے شمع

اس بھبھوکے سے کو بیٹھا دیکھ جل جاتی ہے شمع

میر تقی میر

تجھ سے ملتے ہیں رہتے ہیں محظوظ

اکتوبر 6, 2015میر تقی میر،اساتذہ،غزلمحظوظadmin

دیوان اول غزل 244

غیر مجھ کو جو کہتے ہیں محظوظ

تجھ سے ملتے ہیں رہتے ہیں محظوظ

میر تقی میر

ہوتے ہیں یہ لوگ بھی کتنے پریشاں اختلاط

اکتوبر 6, 2015میر تقی میر،اساتذہ،غزلچسپاں،پریشاںadmin

دیوان اول غزل 243

سب سے آئینہ نمط رکھتے ہیں خوباں اختلاط

ہوتے ہیں یہ لوگ بھی کتنے پریشاں اختلاط

تنگ آیا ہوں میں رشک تنگ پوشی سے تری

اس تن نازک سے یہ جامے کو چسپاں اختلاط

میر تقی میر

چشم نم دیدہ سے عاشق کی سدا جاری ہے فیض

اکتوبر 6, 2015میر تقی میر،اساتذہ،غزلفیضadmin

دیوان اول غزل 242

سال میں ابر بہاری تجھ سے اک باری ہے فیض

چشم نم دیدہ سے عاشق کی سدا جاری ہے فیض

میر تقی میر

کیوں نہ القاص لایحب القاص

اکتوبر 6, 2015میر تقی میر،اساتذہ،غزلالقاصadmin

دیوان اول غزل 241

شیخ ہو دشمن زن رقاص

کیوں نہ القاص لایحب القاص

میر تقی میر

اک مصیبت ہے میرے تیں درپیش

اکتوبر 6, 2015میر تقی میر،اساتذہ،غزلہمیش،اندیش،درویش،درپیشadmin

دیوان اول غزل 240

دل تو افگار ہے جگر ہے ریش

اک مصیبت ہے میرے تیں درپیش

پان تو لیتا جا فقیروں کے

برگ سبز است تحفۂ درویش

ایک دم مہر برسوں تک کینہ

یوں ہی گذری ہے اپنی اس کی ہمیش

فکر کر زاد آخرت کا بھی

میر اگر تو ہے عاقبت اندیش

میر تقی میر

کس کا ہے راز بحر میں یارب کہ یہ ہیں جوش

اکتوبر 6, 2015میر تقی میر،اساتذہ،غزلہوش،فروش،نوش،کوش،گوش،پوش،بدوش،جوش،خموش!،سبوبدوشadmin

دیوان اول غزل 239

ہر جزر و مد سے دست و بغل اٹھتے ہیں خروش

کس کا ہے راز بحر میں یارب کہ یہ ہیں جوش

ابروے کج ہے موج کوئی چشم ہے حباب

موتی کسی کی بات ہے سیپی کسی کا گوش

ان مغبچوں کے کوچے ہی سے میں کیا سلام

کیا مجھ کو طوف کعبہ سے میں رند درد نوش

حیرت سے ہووے پرتو مہ نور آئینہ

تو چاندنی میں نکلے اگر ہو سفید پوش

کل ہم نے سیر باغ میں دل ہاتھ سے دیا

اک سادہ گل فروش کا آکر سبد بدوش

جاتا رہا نگاہ سے جوں موسم بہار

آج اس بغیر داغ جگر ہیں سیاہ پوش

شب اس دل گرفتہ کو وا کر بزور مے

بیٹھے تھے شیرہ خانے میں ہم کتنے ہرزہ کوش

آئی صدا کہ یاد کرو دور رفتہ کو

عبرت بھی ہے ضرور ٹک اے جمع تیز ہوش

جمشید جس نے وضع کیا جام کیا ہوا

وے صحبیتں کہاں گئیں کیدھر وے ناو نوش

جزلالہ اس کے جام سے پاتے نہیں نشاں

ہے کوکنار اس کی جگہ اب سبوبدوش

جھومے ہے بید جاے جوانان مے گسار

بالاے خم ہے خشت سر پیر مے فروش

میر اس غزل کو خوب کہا تھا ضمیر نے

پر اے زباں دراز بہت ہوچکی خموش

میر تقی میر

آہ افسوس صد ہزار افسوس

اکتوبر 6, 2015میر تقی میر،اساتذہ،غزلہزار،قرار،یار،اقتدار،بہار،بار،روزگارadmin

دیوان اول غزل 238

مر گیا میں ملا نہ یار افسوس

آہ افسوس صد ہزار افسوس

ہم تو ملتے تھے جب اہا ہاہا

نہ رہا ووہیں روزگار افسوس

یوں گنواتا ہے دل کوئی مجھ کو

یہی آتا ہے بار بار افسوس

قتل کر تو ہمیں کرے گا خوشی

یہ توقع تھی تجھ سے یار افسوس

رخصت سیر باغ تک نہ ہوئی

یوں ہی جاتی رہی بہار افسوس

خوب بدعہد تو نہ مل لیکن

میرے تیرے تھا یہ قرار افسوس

خاک پر میر تیری ہوتا ولے

نہ ہوا اتنا اقتدار افسوس

میر تقی میر

آ کے ڈوبی جاتی ہے کشتی مری ساحل کے پاس

اکتوبر 6, 2015میر تقی میر،اساتذہ،غزلقاتل،محمل،گھائل،بسمل،دل،ساحلadmin

دیوان اول غزل 237

کیونکے نکلا جائے بحر غم سے مجھ بے دل کے پاس

آ کے ڈوبی جاتی ہے کشتی مری ساحل کے پاس

ہے پریشاں دشت میں کس کا غبار ناتواں

گرد کچھ گستاخ آتی ہے چلی محمل کے پاس

گرم ہو گا حشر کو ہنگامۂ دعویٰ بہت

کاشکے مجھ کو نہ لے جاویں مرے قاتل کے پاس

دور اس سے جوں ہوا دل پر بلا ہے مضطرب

اس طرح تڑپا نہیں جاتا کسو بسمل کے پاس

بوے خوں آتی ہے باد صبح گاہی سے مجھے

نکلی ہے بے درد شاید ہو کسو گھائل کے پاس

آہ نالے مت کیا کر اس قدر بیتاب ہو

اے ستم کش میر ظالم ہے جگر بھی دل کے پاس

میر تقی میر

اس ملک میں ہماری ہے یہ چشم تر ہی بس

اکتوبر 6, 2015میر تقی میر،اساتذہ،غزلہنس،قفس،نفس،بس،جرس،خس،دسadmin

دیوان اول غزل 236

اے ابر تر تو اور کسی سمت کو برس

اس ملک میں ہماری ہے یہ چشم تر ہی بس

حرماں تو دیکھ پھول بکھیرے تھی کل صبا

اک برگ گل گرا نہ جہاں تھا مرا قفس

مژگاں بھی بہ گئیں مرے رونے سے چشم کی

سیلاب موج مارے تو ٹھہرے ہے کوئی خس

مجنوں کا دل ہوں محمل لیلیٰ سے ہوں جدا

تنہا پھروں ہوں دشت میں جوں نالۂ جرس

اے گریہ اس کے دل میں اثر خوب ہی کیا

روتا ہوں جب میں سامنے اس کے تودے ہے ہنس

اس کی زباں کے عہدے سے کیونکر نکل سکوں

کہتا ہوں ایک میں تو سناتا ہے مجھ کو دس

حیراں ہوں میر نزع میں اب کیا کروں بھلا

احوال دل بہت ہے مجھے فرصت اک نفس

میر تقی میر

ہیں مژہ دستور سابق ہی یہ میری نم ہنوز

اکتوبر 6, 2015میر تقی میر،اساتذہ،غزلماتم،نم،خم،عالم،غمadmin

دیوان اول غزل 235

ہوچکا خون جگر رونا نہیں کچھ کم ہنوز

ہیں مژہ دستور سابق ہی یہ میری نم ہنوز

دل جلوں پر روتے ہیں جن کو ہے کچھ سوز جگر

شمع رکھتی ہے ہماری گور پر ماتم ہنوز

وضع یکساں اس زمانے میں نہیں رہتی کہیں

قد ترا چوگاں رہا ہے کس طرح سے خم ہنوز

آرہا ہے جی مرا آنکھوں میں اک پل اور ہوں

پر نہیں جاتا کسی کے دیکھنے کا غم ہنوز

وہ جو عالم اس کے اوپر تھا سو خط نے کھو دیا

مبتلا ہے اس بلا میں میر اک عالم ہنوز

میر تقی میر

ہوچکے حشر میں پھرتا ہوں جگر چاک ہنوز

اکتوبر 6, 2015میر تقی میر،اساتذہ،غزلچاک،پاک،بیباک،خاکadmin

دیوان اول غزل 234

مجھ کو پوچھا بھی نہ یہ کون ہے غم ناک ہنوز

ہوچکے حشر میں پھرتا ہوں جگر چاک ہنوز

اشک کی لغزش مستانہ پہ مت کیجو نظر

دامن دیدئہ گریاں ہے مرا پاک ہنوز

ایک بھی تار گریبان کفن بیچ نہیں

جم ہوئی بیٹھی ہے چھاتی پہ مری خاک ہنوز

بھر نظر دیکھنے پاتا نہیں میں نزع میں بھی

منھ کے تیں پھیرے ہی لیتا ہے وہ بیباک ہنوز

بعد مرنے کے بھی آرام نہیں میر مجھے

اس کے کوچے میں ہے پامال مری خاک ہنوز

میر تقی میر

تر ہیں سب سرکے لہو سے در و دیوار ہنوز

اکتوبر 6, 2015میر تقی میر،اساتذہ،غزلہوادار،ناچار،یار،گفتار،گنہگار،گرفتار،آزار،اظہار،بیمار،بار،تلوار،خار،دیوار،دیدار،رفتارadmin

دیوان اول غزل 233

مر گیا میں پہ مرے باقی ہیں آثار ہنوز

تر ہیں سب سرکے لہو سے در و دیوار ہنوز

دل بھی پر داغ چمن ہے پر اسے کیا کیجے

جی سے جاتی ہی نہیں حسرت دیدار ہنوز

بہ کیے عمر ہوئی ابر بہاری کو ولے

لہو برسا رہے ہیں دیدئہ خوں بار ہنوز

بد نہ لے جائیو پوچھوں ہوں تجھی سے یہ طبیب

بہ ہوا کوئی بھی اس درد کا بیمار ہنوز

نا امیدی میں تو مر گئے پہ نہیں یہ معلوم

جیتے ہیں کون سی امید پہ ناچار ہنوز

بارہا چل چکی تلوار تری چال پہ شوخ

تو نہیں چھوڑتا اس طرز کی رفتار ہنوز

ایک دن بال فشاں ٹک ہوئے تھے خوش ہوکر

ہیں غم دل کی اسیری میں گرفتار ہنوز

کوئی تو آبلہ پا دشت جنوں سے گذرا

ڈوبا ہی جائے ہے لوہو میں سر خار ہنوز

منتظر قتل کے وعدے کا ہوں اپنے یعنی

جیتا مرنے کو رہا ہے یہ گنہگار ہنوز

اڑ گئے خاک ہو کتنے ہی ترے کوچے سے

باز آتے نہیں پر تیرے ہوادار ہنوز

ایک بھی زخم کی جا جس کے نہ ہو تن پہ کہیں

کوئی دیتا ہے سنا ویسے کو آزار ہنوز

ٹک تو انصاف کر اے دشمن جان عاشق

میان سے نکلی پڑے ہے تری تلوار ہنوز

میر کو ضعف میں میں دیکھ کہا کچھ کہیے

ہے تجھے کوئی گھڑی قوت گفتار ہنوز

ابھی اک دم میں زباں چلنے سے رہ جاتی ہے

درد دل کیوں نہیں کرتا ہے تو اظہار ہنوز

آنسو بھر لا کے بہت حزن سے یہ کہنے لگا

کیا کہوں تجھ کو سمجھ اس پہ نہیں یار ہنوز

آنکھوں میں آن رہا جی جو نکلتا ہی نہیں

دل میں میرے ہے گرہ حسرت دیدار ہنوز

میر تقی میر

ہے گریبان پارہ پارہ ہنوز

اکتوبر 6, 2015میر تقی میر،اساتذہ،غزلچارہ،گاہوارہ،پارہ،اشارہ،خوارہ،دوبارہ،ستارہ،شرارہadmin

دیوان اول غزل 232

ضبط کرتا نہیں کنارہ ہنوز

ہے گریبان پارہ پارہ ہنوز

آتش دل نہیں بجھی شاید

قطرئہ اشک ہے شرارہ ہنوز

خاک میں ہے وہ طفل اشک اس بن

چشم ہے جس کا گاہوارہ ہنوز

اشک جھمکا ہے جب نہ نکلا تھا

چرخ پر صبح کا ستارہ ہنوز

ایک بار آ کے پھر نہیں آیا

عمر کی طرح وہ دوبارہ ہنوز

لب پہ آئی ہے جان کب کی ہے

اس کی موقوف یک اشارہ ہنوز

کب کی توبہ کی میر نے لیکن

ہے بتر از شراب خوارہ ہنوز

عمر گذری دوائیں کرتے میر

درد دل کا ہوا نہ چارہ ہنوز

میر تقی میر

بسمل پڑی ہے چرخ پہ میری دعا ہنوز

اکتوبر 6, 2015میر تقی میر،اساتذہ،غزلہوا،نارسا،وا،کیا،تا،جابجا،حنا،دعا،صفا،صبا،صداadmin

دیوان اول غزل 231

ہوتا نہیں ہے باب اجابت کا وا ہنوز

بسمل پڑی ہے چرخ پہ میری دعا ہنوز

باقی نہیں ہے دل میں یہ غم ہے بجا ہنوز

ٹپکے ہے خون دم بہ دم آنکھوں سے تا ہنوز

دن رات کو کھنچا ہے قیامت کا اور میں

پھرتا ہوں منھ پہ خاک ملے جابجا ہنوز

خط کاڑھ لا کے تم تو منڈا بھی چلے ولے

ہوتی نہیں ہماری تمھاری صفا ہنوز

غنچے چمن چمن کھلے اس باغ دہر میں

دل ہی مرا ہے جو نہیں ہوتا ہے وا ہنوز

گذری نہ پار عرش کہ تسکین ہو مجھے

افسوس میری آہ رہی نارسا ہنوز

احوال نامہ بر سے مرا سن کے کہہ اٹھا

جیتا ہے وہ ستم زدہ مہجور کیا ہنوز

غنچہ نہ بوجھ دل ہے کسی مجھ سے زار کا

کھلتا نہیں جو سعی سے تیری صبا ہنوز

توڑا تھا کس کا شیشۂ دل تونے سنگ دل

ہے دل خراش کوچے میں تیرے صدا ہنوز

چلو میں اس کے میرا لہو تھا سو پی چکا

اڑتا نہیں ہے طائر رنگ حنا ہنوز

بے بال و پر اسیر ہوں کنج قفس میں میر

جاتی نہیں ہے سر سے چمن کی ہوا ہنوز

میر تقی میر

پلکوں کی صف سے بھیڑیں گئیں منھ کو موڑ موڑ

اکتوبر 6, 2015میر تقی میر،اساتذہ،غزلموڑ،مروڑ،نچوڑ،چھوڑ،کڑوڑ،پھوڑ،توڑadmin

دیوان اول غزل 230

آشوب دیکھ چشم تری سر رہے ہیں جوڑ

پلکوں کی صف سے بھیڑیں گئیں منھ کو موڑ موڑ

لاکھوں جتن کیے نہ ہوا ضبط گریہ لیک

سنتے ہی نام آنکھ سے آنسو گرے کڑوڑ

زخم دروں سے میرے نہ ٹک بے خبر رہو

اب ضبط گریہ سے ہے ادھر ہی کو سب نچوڑ

گرمی سے بر شگال کی پروا ہے کیا ہمیں

برسوں رہی ہے جان کے رکنے کی یاں مروڑ

بلبل کی اور چشم مروت سے دیکھ ٹک

بے درد یوں چمن میں کسو پھول کو نہ توڑ

کچھ کوہکن ہی سے نہیں تازہ ہوا یہ کام

بہتیرے عاشقی میں موئے سر کو پھوڑ پھوڑ

بے طاقتی سے میر لگے چھوٹنے پران

ظالم خیال دیکھنے کا اس کے اب تو چھوڑ

میر تقی میر

رہ گیا ہوں چراغ سا بجھ کر

اکتوبر 6, 2015میر تقی میر،اساتذہ،غزلکرadmin

دیوان اول غزل 229

بس نہ لگ چل نسیم مجھ سے کہ میں

رہ گیا ہوں چراغ سا بجھ کر

میر تقی میر

ہوئے پانی پانی در شاہوار

اکتوبر 6, 2015میر تقی میر،اساتذہ،غزلشاہوارadmin

دیوان اول غزل 228

نظر کرکے وہ سلک دندان یار

ہوئے پانی پانی در شاہوار

میر تقی میر

جی لے گئے یہ کانٹے دل میں کھٹک کھٹک کر

اکتوبر 6, 2015میر تقی میر،اساتذہ،غزللٹک،مٹک،چھٹک،کھٹک،ٹ،پٹک،اٹک،بھٹک،جھٹک،سٹکadmin

دیوان اول غزل 227

آزار دیکھے کیا کیا ان پلکوں سے اٹک کر

جی لے گئے یہ کانٹے دل میں کھٹک کھٹک کر

سرو و تدرو دونوں پھر آپ میں نہ آئے

گلزار میں چلا تھا وہ شوخ ٹک لٹک کر

کب آنکھ کھول دیکھا تیرے تئیں سرہانے

ناچار مر گئے ہم سر کو پٹک پٹک کر

حاصل بجز کدورت اس خاکداں سے کیا ہے

خوش وہ کہ اٹھ گئے ہیں داماں جھٹک جھٹک کر

یہ مشت خاک یعنی انسان ہی ہے روکش

ورنہ اٹھائی کن نے اس آسماں کی ٹکر

دل کام چاہتا ہے اب اس کے گیسوئوں سے

واں مر گئے ہیں کتنے برسوں اٹک اٹک کر

ٹک منھ سے اس کے دی شب برقع سرک گیا تھا

جاتی رہی نظر سے مہتاب سی چھٹک کر

دھولا چکے تھے مل کر کل لونڈے میکدے کے

پر سرگراں ہو واعظ جاتا رہا سٹک کر

کل رقص شیخ مطلق دل کو لگا نہ میرے

آیا وہ حیز شرعی کتنا مٹک مٹک کر

منزل کی میر اس کی کب راہ تجھ سے نکلے

یاں خضر سے ہزاروں مر مر گئے بھٹک کر

میر تقی میر

انجان اتنے کیوں ہوئے جاتے ہو جان کر

اکتوبر 6, 2015میر تقی میر،اساتذہ،غزلمہربان،مان،چھان،نشان،امتحان،تان،جان،زبان،سانadmin

دیوان اول غزل 226

جھوٹے بھی پوچھتے نہیں ٹک حال آن کر

انجان اتنے کیوں ہوئے جاتے ہو جان کر

وے لوگ تم نے ایک ہی شوخی میں کھو دیے

پیدا کیے تھے چرخ نے جو خاک چھان کر

جھمکے دکھاکے باعث ہنگامہ ہی رہے

پر گھر سے در پہ آئے نہ تم بات مان کر

کہتے نہ تھے کہ جان سے جاتے رہیں گے ہم

اچھا نہیں ہے آ نہ ہمیں امتحان کر

کم گو جو ہم ہوئے تو ستم کچھ نہ ہو گیا

اچھی نہیں یہ بات مت اتنی زبان کر

ہم وے ہیں جن کے خوں سے تری راہ سب ہے گل

مت کر خراب ہم کو تو اوروں میں سان کر

تا کشتۂ وفا مجھے جانے تمام خلق

تربت پہ میری خون سے میرے نشان کر

ناز و عتاب و خشم کہاں تک اٹھایئے

یارب کبھو تو ہم پہ اسے مہربان کر

افسانے ما و من کے سنیں میر کب تلک

چل اب کہ سوویں منھ پہ دوپٹے کو تان کر

میر تقی میر

زخم پڑ پڑ گیا مرے پا پر

اکتوبر 6, 2015میر تقی میر،اساتذہ،غزلمینا،مسیحا،پا،بینا،تمنا،دریا،صہبا،صحراadmin

دیوان اول غزل 225

پشت پا ماری بسکہ دنیا پر

زخم پڑ پڑ گیا مرے پا پر

ڈوبے اچھلے ہے آفتاب ہنوز

کہیں دیکھا تھا تجھ کو دریا پر

گرو مے ہوں آئو شیخ شہر

ابر جھوما ہی جا ہے صحرا پر

دل پر خوں تو تھا گلابی شراب

جی ہی اپنا چلا نہ صہبا پر

یاں جہاں میں کہ شہر کوراں ہے

سات پردے ہیں چشم بینا پر

فرصت عیش اپنی یوں گذری

کہ مصیبت پڑی تمنا پر

طارم تاک سے لہو ٹپکا

سنگ باراں ہوا ہے مینا پر

میر کیا بات اس کے ہونٹوں کی

جینا دوبھر ہوا مسیحا پر

میر تقی میر

بگلا شکار ہووے تو لگتے ہیں ہاتھ پر

اکتوبر 6, 2015میر تقی میر،اساتذہ،غزلکمر،پر،تر،خبر،سحرadmin

دیوان اول غزل 224

داڑھی سفید شیخ کی تو مت نظر میں کر

بگلا شکار ہووے تو لگتے ہیں ہاتھ پر

اے ابر خشک مغز سمندر کا منھ نہ دیکھ

سیراب تیرے ہونے کو کافی ہے چشم تر

آخر عدم سے کچھ بھی نہ اکھڑا مرا میاں

مجھ کو تھا دست غیب پکڑ لی تری کمر

ہجراں کی شب سے مجھ کو گلہ نئیں کہ ان نے بھی

دیکھی نہیں ہے خواب میں آنکھوں کبھی سحر

سوتا تھا بے خبر تو نشے میں جو رات کو

سو بار میر نے تری اٹھ اٹھ کے لی خبر

میر تقی میر

دستۂ داغ و فوج غم لے کر

اکتوبر 6, 2015میر تقی میر،اساتذہ،غزلہم،قلم،قسم،الم،حرم،دم،رقم،علم،غمadmin

دیوان اول غزل 223

ہم بھی پھرتے ہیں یک حشم لے کر

دستۂ داغ و فوج غم لے کر

دست کش نالہ پیش رو گریہ

آہ چلتی ہے یاں علم لے کر

مرگ اک ماندگی کا وقفہ ہے

یعنی آگے چلیں گے دم لے کر

اس کے اوپر کہ دل سے تھا نزدیک

غم دوری چلے ہیں ہم لے کر

تیری وضع ستم سے اے بے درد

ایک عالم گیا الم لے کر

بارہا صید گہ سے اس کی گئے

داغ یاس آہوے حرم لے کر

ضعف یاں تک کھنچا کہ صورت گر

رہ گئے ہاتھ میں قلم لے کر

دل پہ کب اکتفا کرے ہے عشق

جائے گا جان بھی یہ غم لے کر

شوق اگر ہے یہی تو اے قاصد

ہم بھی آتے ہیں اب رقم لے کر

میر صاحب ہی چوکے اے بد عہد

ورنہ دینا تھا دل قسم لے کر

میر تقی میر

موتی گویا جڑے ہیں مینے پر

اکتوبر 6, 2015میر تقی میر،اساتذہ،غزلمینے،پینے،آبگینے،جینے،سینےadmin

دیوان اول غزل 222

خط میں ہے کیا سماں پسینے پر

موتی گویا جڑے ہیں مینے پر

کوئی ہوتا ہے دل طپش سے برا

ایک دم کے لہو نہ پینے پر

دل سے میرے شکستیں الجھی ہیں

سنگ باراں ہے آبگینے پر

چاک سینے سے کھل گئے ٹانکے

کیا رفو کم ہوا ہے سینے پر

جور دلبر سے کیا ہوں آزردہ

میر اس چار دن کے جینے پر

میر تقی میر

ہاتھ سے جائے گا سررشتۂ کار آخرکار

اکتوبر 6, 2015میر تقی میر،اساتذہ،غزلقرار،مار،مزار،یار،کار،بہار،غبارadmin

دیوان اول غزل 221

رہنے کا پاس نہیں ایک بھی تار آخرکار

ہاتھ سے جائے گا سررشتۂ کار آخرکار

لوح تربت پہ مری پہلے یہ لکھیو کہ اسے

یار دشمن ہو گیا جان سے مار آخرکار

مشت خاک اپنی جو پامال ہے یاں اس پہ نہ جا

سر کو کھینچے گا فلک تک یہ غبار آخرکار

سیر کر کثرت عالم کی مری جان کہ پھر

تن تنہا ہے تو اور کنج مزار آخرکار

چشم وا دیکھ کے اس باغ میں کیجو نرگس

آنکھوں سے جاتی رہے گی یہ بہار آخرکار

ابتدا ہی میں محبت کی ہوئے ہم تو تمام

ہوتا ہو گا یہی کچھ عشق میں یار آخرکار

اول کار محبت تو بہت سہل ہے میر

جی سے جاتا ہے ولے صبر و قرار آخرکار

میر تقی میر

خاطر سے ہی مجھ مست کی تائید دور جام کر

اکتوبر 6, 2015میر تقی میر،اساتذہ،غزلنام،آرام،بادام،جام،شامadmin

دیوان اول غزل 220

ہو آدمی اے چرخ ترک گردش ایام کر

خاطر سے ہی مجھ مست کی تائید دور جام کر

دنیا ہے بے صرفہ نہ ہو رونے میں یا کڑھنے میں تو

نالے کو ذکر صبح کر گریے کو ورد شام کر

مست جنوں رہ روز و شب شہرہ ہو شہر ودشت میں

مجلس میں اپنی نقل خوش زنجیر کا بادام کر

جتنی ہو ذلت خلق میں اتنی ہے عزت عشق میں

ناموس سے آ درگذر بے ننگ ہوکر نام کر

مر رہ کہیں بھی میر جا سرگشتہ پھرنا تا کجا

ظالم کسو کا سن کہا کوئی گھڑی آرام کر

میر تقی میر

غیرت سے رہ گئے ہم یک سو کباب ہوکر

اکتوبر 6, 2015میر تقی میر،اساتذہ،غزلنقاب،ناب،کباب،آب،حجاب،خواب،خرابadmin

دیوان اول غزل 219

غیروں سے مل چلے تم مست شراب ہوکر

غیرت سے رہ گئے ہم یک سو کباب ہوکر

اس روے آتشیں سے برقع سرک گیا تھا

گل بہ گیا چمن میں خجلت سے آب ہوکر

کل رات مند گئی تھیں بہتوں کی آنکھیں غش سے

دیکھا کیا نہ کر تو سرمست خواب ہوکر

پردہ رہے گا کیونکر خورشید خاوری کا

نکلے ہے صبح وہ بھی اب بے نقاب ہوکر

یک قطرہ آب میں نے اس دور میں پیا ہے

نکلا ہے چشم تر سے وہ خون ناب ہوکر

آ بیٹھتا تھا صوفی ہر صبح میکدے میں

شکر خدا کہ نکلا واں سے خراب ہوکر

شرم و حیا کہاں تک ہیں میر کوئی دن کے

اب تو ملا کرو تم ٹک بے حجاب ہوکر

میر تقی میر

ضبط گریہ سے پڑ گئے ناسور

اکتوبر 6, 2015میر تقی میر،اساتذہ،غزلمور،مغرور،ناسور،کافور،دورadmin

دیوان اول غزل 218

دل جو اپنا ہوا تھا زخمی چور

ضبط گریہ سے پڑ گئے ناسور

صبح اس سرد مہر کے آگے

قرص خورشید ہو گیا کافور

ہم ضعیفوں کو پائمال نہ کر

دولت حسن پر نہ ہو مغرور

عرش پر بیٹھتا ہے کہتے ہیں

گر اٹھے ہے غبار خاطر مور

شکوئہ آبلہ ابھی سے میر

ہے پیارے ہنوز دلی دور

میر تقی میر

حال ہے اور قال ہے کچھ اور

اکتوبر 6, 2015میر تقی میر،اساتذہ،غزلقال،چال،ڈھال،وصال،احتمال،بال،حال،خیالadmin

دیوان اول غزل 217

شیخی کا اب کمال ہے کچھ اور

حال ہے اور قال ہے کچھ اور

وعدے برسوں کے کن نے دیکھے ہیں

دم میں عاشق کا حال ہے کچھ اور

سہل مت بوجھ یہ طلسم جہاں

ہر جگہ یاں خیال ہے کچھ اور

تو رگ جاں سمجھتی ہو گی نسیم

اس کے گیسو کا بال ہے کچھ اور

نہ ملیں گو کہ ہجر میں مر جائیں

عاشقوں کا وصال ہے کچھ اور

کوزپشتی پہ شیخ کی مت جائو

اس پہ بھی احتمال ہے کچھ اور

اس میں اس میں بڑا تفاوت ہے

کبک کی چال ڈھال ہے کچھ اور

میر تلوار چلتی ہے تو چلے

خوش خراموں کی چال ہے کچھ اور

میر تقی میر

پر ہوسکے جو پیارے دل میں بھی ٹک جگہ کر

اکتوبر 6, 2015میر تقی میر،اساتذہ،غزلنگہ،ڈھہ،کہہ،گنہ،بہ،تہ،جگہ،رہ،سہadmin

دیوان اول غزل 216

کہتا ہے کون تجھ کو یاں یہ نہ کر تو وہ کر

پر ہوسکے جو پیارے دل میں بھی ٹک جگہ کر

وہ تنگ پوش اک دن دامن کشاں گیا تھا

رکھی ہیں جانمازیں اہل ورع نے تہ کر

کیا قصر دل کی تم سے ویرانی نقل کریے

ہو ہو گئے ہیں ٹیلے سارے مکان ڈھہ کر

ہم اپنی آنکھوں کب تک یہ رنگ عشق دیکھیں

آنے لگا ہے لوہو رخسار پر تو بہ کر

رنگ شکستہ اپنا بے لطف بھی نہیں ہے

یاں کی تو صبح دیکھے اک آدھ رات رہ کر

برسوں عذاب دیکھے قرنوں تعب اٹھائے

یہ دل حزیں ہوا ہے کیا کیا جفائیں سہ کر

ایکوں کی کھال کھینچی ایکوں کو دار کھینچا

اسرار عاشقی کا پچھتائے یار کہہ کر

طاعت کوئی کرے ہے جب ابر زور جھومے

گر ہوسکے تو زاہد اس وقت میں گنہ کر

کیوں تو نے آخر آخر اس وقت منھ دکھایا

دی جان میر نے جو حسرت سے اک نگہ کر

میر تقی میر

ٹھہرے ہے آرسی بھی دانتوں زمیں پکڑ کر

اکتوبر 6, 2015میر تقی میر،اساتذہ،غزللڑ،گڑ،گھسڑ،پڑ،پکڑ،اڑ،اکڑ،بچھڑ،بگڑ،جڑ،رگڑadmin

دیوان اول غزل 215

دیکھ اس کو ہنستے سب کے دم سے گئے اکھڑ کر

ٹھہرے ہے آرسی بھی دانتوں زمیں پکڑ کر

کیا کیا نیاز طینت اے ناز پیشہ تجھ بن

مرتے ہیں خاک رہ سے گوڑے رگڑ رگڑ کر

قد کش چمن کے اپنی خوبی کو نیو چلے ہیں

پایا پھل اس سے آخر کیا سرو نے اکڑ کر

وہ سر چڑھا ہے اتنا اپنی فروتنی سے

کھویا ہمیں نے اس کو ہر لحظہ پائوں پڑ کر

پاے ثبات بھی ہے نام آوری کو لازم

مشہور ہے نگیں جو بیٹھا ہے گھر میں گڑ کر

دوری میں دلبروں کی کٹتی ہے کیونکے سب کی

آدھا نہیں رہا ہوں تجھ سے تو میں بچھڑ کر

اب کیسا زہد و تقویٰ دارو ہے اور ہم ہیں

بنت العنب کے اپنا سب کچھ گیا گھسڑ کر

دیکھو نہ چشم کم سے معمورئہ جہاں کو

بنتا ہے ایک گھر یاں سو صورتیں بگڑ کر

اس پشت لب کے اوپر دانے عرق کے یوں ہیں

یاقوت سے رکھے ہیں جوں موتیوں کو جڑ کر

ناسازگاری اپنے طالع کی کیا کہیں ہم

آیا کبھو نہ یاں ٹک غیروں سے یار لڑ کر

اپنے مزاج میں بھی ہے میر ضد نہایت

پھر مر ہی کے اٹھیں گے بیٹھیں گے ہم جو اڑ کر

میر تقی میر

جاتے ہیں جی سے کس قدر آزار دیکھ کر

اکتوبر 6, 2015میر تقی میر،اساتذہ،غزلناچار،یار،کار،آزار،اسرار،بار،دیوار،دیدار،ستمگارadmin

دیوان اول غزل 214

مرتے ہیں تیری نرگس بیمار دیکھ کر

جاتے ہیں جی سے کس قدر آزار دیکھ کر

افسوس وے کہ منتظر اک عمر تک رہے

پھر مر گئے ترے تئیں یک بار دیکھ کر

ناخواندہ خط شوق لگے چاک کرنے تو

قاصد تو کہیو ٹک کہ جفا کار دیکھ کر

کوئی جو دم رہا ہے سو آنکھوں میں ہے پھر اب

کریو ٹک ایک وعدئہ دیدار دیکھ کر

دیکھیں جدھر وہ رشک پری پیش چشم ہے

حیران رہ گئے ہیں یہ اسرار دیکھ کر

جاتا ہے آسماں لیے کوچے سے یار کے

آتا ہے جی بھرا در و دیوار دیکھ کر

تیرے خرام ناز پہ جاتے ہیں جی چلے

رکھ ٹک قدم زمیں پہ ستمگار دیکھ کر

طالع نے چشم پوشی کی یاں تک کہ ہم نشیں

چھپتا ہے مجھ کو دور سے اب یار دیکھ کر

جی میں تھا اس سے ملیے تو کیا کیا نہ کہیے میر

پر جب ملے تو رہ گئے ناچار دیکھ کر

میر تقی میر

جاتے رہیں گے ہم بھی گریبان پھاڑ کر

اکتوبر 6, 2015میر تقی میر،اساتذہ،غزلگاڑ،پہاڑ،پچھاڑ،پھاڑ،اکھاڑ،اجاڑ،تاڑadmin

دیوان اول غزل 213

غصے سے اٹھ چلے ہو تو دامن کو جھاڑ کر

جاتے رہیں گے ہم بھی گریبان پھاڑ کر

دل وہ نگر نہیں کہ پھر آباد ہوسکے

پچھتائوگے سنو ہو یہ بستی اجاڑ کر

یارب رہ طلب میں کوئی کب تلک پھرے

تسکین دے کہ بیٹھ رہوں پائوں گاڑ کر

منظور ہو نہ پاس ہمارا تو حیف ہے

آئے ہیں آج دور سے ہم تجھ کو تاڑ کر

غالب کہ دیوے قوت دل اس ضعیف کو

تنکے کو جو دکھادے ہے پل میں پہاڑ کر

نکلیں گے کام دل کے کچھ اب اہل ریش سے

کچھ ڈھیر کرچکے ہیں یہ آگے اکھاڑ کر

اس فن کے پہلوانوں سے کشتی رہی ہے میر

بہتوں کو ہم نے زیر کیا ہے پچھاڑ کر

میر تقی میر

جلا ہی پڑا ہے ہمارا تو گھر بار

اکتوبر 6, 2015میر تقی میر،اساتذہ،غزلہر،نظر،کر،گہر،گھر،جگر،خر،در،سر،شکر،شجرadmin

دیوان اول غزل 212

لبوں پر ہے ہر لحظہ آہ شرر بار

جلا ہی پڑا ہے ہمارا تو گھر بار

ہوئیں کس ستم دیدہ کے پاس یک جا

نگاہیں شرر ریز پلکیں جگر بار

کہو کوئی دیکھے اسے سیر کیونکر

کہ ہے اس تن نازک اوپر نظر بار

حلاوت سے اپنی جو آگاہ ہوں تو

چپک جائیں باہم وے لعل شکر بار

سبک کر دیا دل کی بے طاقتی نے

نہ جانا تھا اس کی طرف ہم کو ہر بار

گدھا سا لدا پھرتا ہے شیخ ہر سو

کہ جبہ ہے یک بار و عمامہ سر بار

مرے نخل ماتم پہ ہے سنگ باراں

نہایت کو لایا عجب یہ شجر بار

ہمیں بار اس درپہ کثرت سے کیا ہو

لگا ہی رہے ہے سدا واں تو دربار

یہ آنکھیں گئیں ایسی ہوکر در افشاں

کہ دیکھے سے آیا تر ابر گہربار

کب اس عمر میں آدمی شیخ ہو گا

کتابیں رکھیں ساتھ گو ایک خربار

جہاں میر رہنے کی جاگہ نہیں ہے

چلا چاہیے یاں سے اسباب کر بار

میر تقی میر

کام آئے فراق میں اے یار

اکتوبر 6, 2015میر تقی میر،اساتذہ،غزلہشیار،مختار،ناچار،یار،گفتار،پکار،آزار،اظہار،بہار،بیمار،بیدار،بیزار،بازار،تلوار،تار،خمار،خار،دیدار،درکار،دستار،دشوار،سردار،شعارadmin

دیوان اول غزل 211

دل دماغ و جگر یہ سب اک بار

کام آئے فراق میں اے یار

کیوں نہ ہو ضعف غالب اعضا پر

مر گئے ہیں قشون کے سردار

گل پژمردہ کا نہیں ممنون

ہم اسیروں کا گوشۂ دستار

مت نکل گھر سے ہم بھی راضی ہیں

دیکھ لیں گے کبھو سر بازار

سینکڑوں حرف ہیں گرہ دل میں

پر کہاں پایئے لب اظہار

سیر کر دشت عشق کا گلشن

غنچے ہو ہورہے ہیں سو سو خار

روز محشر ہے رات ہجراں کی

ایسی ہم زندگی سے ہیں بیزار

بحث نالہ بھی کیجیو بلبل

پہلے پیدا تو کر لب گفتار

چاک دل پر ہیں چشم صد خوباں

کیا کروں یک انار و صد بیمار

شکر کر داغ دل کا اے غافل

کس کو دیتے ہیں دیدئہ بیدار

گو غزل ہو گئی قصیدہ سی

عاشقوں کا ہے طول حرف شعار

ہر سحر لگ چلی تو ہے تو نسیم

اے سیہ مست ناز ٹک ہشیار

شاخسانے ہزار نکلیں گے

جو گیا اس کی زلف کا اک تار

واجب القتل اس قدر تو ہوں

کہ مجھے دیکھ کر کہے ہے پکار

یہ تو آیا نہ سامنے میرے

لائو میری میاں سپر تلوار

آ زیارت کو قبر عاشق پر

اک طرح کا ہے یاں بھی جوش بہار

نکلے ہے میری خاک سے نرگس

یعنی اب تک ہے حسرت دیدار

میر صاحب زمانہ نازک ہے

دونوں ہاتھوں سے تھامیے دستار

سہل سی زندگی پہ کام کے تیں

اپنے اوپر نہ کیجیے دشوار

چار دن کا ہے مجہلہ یہ سب

سب سے رکھیے سلوک ہی ناچار

کوئی ایسا گناہ اور نہیں

یہ کہ کیجے ستم کسی پر یار

واں جہاں خاک کے برابر ہے

قدر ہفت آسمان ظلم شعار

یہی درخواست پاس دل کی ہے

نہیں روزہ نماز کچھ درکار

در مسجد پہ حلقہ زن ہو تم

کہ رہو بیٹھ خانۂ خمار

جی میں آوے سو کیجیو پیارے

لیک ہوجو نہ درپئے آزار

حاصل دو جہان ہے یک حرف

ہو مری جان آگے تم مختار

میر تقی میر

کہ تلواریں چلیں ابرو کی چیں پر

اکتوبر 6, 2015میر تقی میر،اساتذہ،غزلہفتمیں،مہروکیں،نہیں،چیں،نشیں،واپسیں،اولیں،آستیں،زمیںadmin

دیوان اول غزل 210

قیامت تھا سماں اس خشمگیں پر

کہ تلواریں چلیں ابرو کی چیں پر

نہ دیکھا آخر اس آئینہ رو نے

نظر سے بھی نگاہ واپسیں پر

گئے دن عجز و نالہ کے کہ اب ہے

دماغ نالہ چرخ ہفتمیں پر

ہوا ہے ہاتھ گلدستہ ہمارا

کہ داغ خوں بہت ہے آستیں پر

خدا جانے کہ کیا خواہش ہے جی کو

نظر اپنی نہیں ہے مہروکیں پر

پر افشانی قفس ہی کی بہت ہے

کہ پرواز چمن قابل نہیں پر

جگر میں اپنے باقی روتے روتے

اگرچہ کچھ نہیں اے ہم نشیں پر

کبھو جو آنکھ سے چلتے ہیں آنسو

تو بھر جاتا ہے پانی سب زمیں پر

قدم دشت محبت میں نہ رکھ میر

کہ سر جاتا ہے گام اولیں پر

میر تقی میر

یک سینہ خنجر سینکڑوں یک جان و آزار اس قدر

اکتوبر 6, 2015میر تقی میر،اساتذہ،غزلگرفتار،پرخار،آزار،اغیار،بیمار،بیزارadmin

دیوان اول غزل 209

کر رحم ٹک کب تک ستم مجھ پر جفا کار اس قدر

یک سینہ خنجر سینکڑوں یک جان و آزار اس قدر

بھاگے مری صورت سے وہ عاشق میں اس کی شکل پر

میں اس کا خواہاں یاں تلک وہ مجھ سے بیزار اس قدر

منزل پہنچنا یک طرف نے صبر ہے نے ہے سکوں

یکسر قدم میں آبلے پھر راہ پرخار اس قدر

ہے جاے ہر دل میں تری آ درگذر کر بے وفا

کر رحم ٹک اپنے اپرمت ہو دل آزار اس قدر

جز کشمکش ہووے تو کیا عالم سے ہم کو فائدہ

یہ بے فضا ہے اک قفس ہم ہیں گرفتار اس قدر

غیر اور بغل گیری تری عید اور ہم سے بھاگنا

ہم یار ہوں یوں غم زدے خوش ہوئیں اغیار اس قدر

طاقت نہیں ہے بات کی کہتا تھا نعرہ ماریے

کیا جانتا تھا میر ہوجاوے گا بیمار اس قدر

میر تقی میر

اگرچہ جان جاتی ہے چلی لیکن تغافل کر

اکتوبر 6, 2015میر تقی میر،اساتذہ،غزلڈھل،کھل،گل،گھل،بلبل،تامل،تحمل،تغافل،غلadmin

دیوان اول غزل 208

یہ عشق بے اجل کش ہے بس اے دل اب توکل کر

اگرچہ جان جاتی ہے چلی لیکن تغافل کر

سفر ہستی کا مت کر سرسری جوں باد اے رہرو

یہ سب خاک آدمی تھے ہر قدم پر ٹک تامل کر

سن اے بے درد گلچیں غارت گلشن مبارک ہے

پہ ٹک گوش مروت جانب فریاد بلبل کر

نہ وعدہ تیرے آنے کا نہ کچھ امید طالع سے

دل بیتاب کو کس منھ سے کہیے ٹک تحمل کر

یہ کیا جانوں کہ کیوں رونے لگا رونے سے رہ کر میں

مگر یہ جانتا ہوں مینھ گھر آتا ہے پھر کھل کر

مرے پاس اس کی خاک پا کو بیماری میں رکھا تھا

نہ آیا سر مرا بالیں پہ اودھر جو گیا ڈھل کر

تجلی جلوہ ہیں کچھ بام و در غم خانے کے میرے

وہ رشک ماہ آیا ہم نشیں بس اب دیا گل کر

تری خاموشی سے قمری ہوا شور جنوں رسوا

ہلاٹک طوق گردن کو بھی ظالم باغ میں غل کر

گداز عاشقی کا میر کے شب ذکر آیا تھا

جو دیکھا شمع مجلس کو تو پانی ہو گئی گھل کر

میر تقی میر

اے انتظار تجھ کو کسی کا ہو انتظار

اکتوبر 6, 2015میر تقی میر،اساتذہ،غزلمزار،انتظار،بہار،بار،خمار،خار،غبارadmin

دیوان اول غزل 207

دیکھوں میں اپنی آنکھوں سے آوے مجھے قرار

اے انتظار تجھ کو کسی کا ہو انتظار

ساقی تو ایک بار تو توبہ مری تڑا

توبہ کروں جو پھر تو ہے توبہ ہزار بار

کیا زمزمہ کروں ہوں خوشی تجھ سے ہم صفیر

آیا جو میں چمن میں تو جاتی رہی بہار

کس ڈھب سے راہ عشق چلوں ہے یہ ڈر مجھے

پھوٹیں کہیں نہ آبلے ٹوٹیں کہیں نہ خار

کوچے کی اس کے راہ نہ بتلائی بعد مرگ

دل میں صبا رکھے تھی مری خاک سے غبار

اے پاے خم کہ گردش ساغر ہو دستگیر

مرہون درد سر ہو کہاں تک مرا خمار

وسعت جہاں کی چھوڑ جو آرام چاہے میر

آسودگی رکھے ہے بہت گوشۂ مزار

میر تقی میر

نہیں اس قافلے میں اہل دل ضبط نفس بہتر

اکتوبر 6, 2015میر تقی میر،اساتذہ،غزلقفس،نفس،بوالہوس،برس،بس،خس،دسترسadmin

دیوان اول غزل 206

نہ ہو ہرزہ درا اتنا خموشی اے جرس بہتر

نہیں اس قافلے میں اہل دل ضبط نفس بہتر

نہ ہونا ہی بھلا تھا سامنے اس چشم گریاں کے

نظر اے ابر تر آپھی نہ آوے گا برس بہتر

سدا ہو خار خار باغباں گل کا جہاں مانع

سمجھ اے عندلیب اس باغ سے کنج قفس بہتر

برا ہے امتحاں لیکن نہ سمجھے تو تو کیا کریے

شہادت گاہ میں لے چل سب اپنے بوالہوس بہتر

سیہ کر دوں گا گلشن دود دل سے باغباں میں بھی

جلا آتش میں میرے آشیاں کے خار و خس بہتر

کیا داغوں سے رشک باغ اے صد آفریں الفت

یہ سینہ ہم کو بھی ایسا ہی تھا درکار بس بہتر

قدم تیرے چھوئے تھے جن نے اب وہ ہاتھ ہی سر ہے

مرے حق میں نہ ہونا ہی تھا یاں تک دسترس بہتر

عبث پوچھے ہے مجھ سے میر میں صحرا کو جاتا ہوں

خرابی ہی پہ دل رکھا ہے جو تونے تو بس بہتر

میر تقی میر

پھر دیکھنا ادھر کو آنکھیں ملا ملاکر

اکتوبر 6, 2015میر تقی میر،اساتذہ،غزللگاکر،لٹاکر،ملاکر،چباکر،کر،بناکر،جلاکر،دکھاکر،سلاکرadmin

دیوان اول غزل 205

غیروں سے وے اشارے ہم سے چھپا چھپاکر

پھر دیکھنا ادھر کو آنکھیں ملا ملاکر

ہر گام سد رہ تھی بتخانے کی محبت

کعبے تلک تو پہنچے لیکن خدا خدا کر

نخچیرگہ میں تجھ سے جو نیم کشتہ چھوٹا

حسرت نے اس کو آخر مارا لٹا لٹاکر

اک لطف کی نگہ بھی ہم نے نہ چاہی اس سے

رکھا ہمیں تو ان نے آنکھیں دکھا دکھاکر

ناصح مرے جنوں سے آگہ نہ تھا کہ ناحق

گودڑ کیا گریباں سارا سلا سلاکر

اک رنگ پاں ہی اس کا دل خوں کن جہاں ہے

پھبتا ہے اس کو کرنا باتیں چبا چباکر

جوں شمع صبح گاہی یک بار بجھ گئے ہم

اس شعلہ خو نے ہم کو مارا جلا جلاکر

اس حرف ناشنو سے صحبت بگڑ ہی جا ہے

ہر چند لاتے ہیں ہم باتیں بنا بناکر

میں منع میر تجھ کو کرتا نہ تھا ہمیشہ

کھوئی نہ جان تونے دل کو لگا لگاکر

میر تقی میر

اے آہ پھر اثر تو ہے برچھی کی چوٹ پر

اکتوبر 6, 2015میر تقی میر،اساتذہ،غزلنظر،کدھر،پر،اگر،تر،جگر،خبر،خطر،سحرadmin

دیوان اول غزل 204

اودھر تلک ہی چرخ کے مشکل ہے ٹک گذر

اے آہ پھر اثر تو ہے برچھی کی چوٹ پر

دھڑکا تھا دل طپیدن شب سے سو آج صبح

دیکھا وہی کہ آنسوئوں میں چو پڑا جگر

ہم تو اسیر کنج قفس ہوکے مرچلے

اے اشتیاق سیر چمن تیری کیا خبر

مت عیب کر جو ڈھونڈوں میں اس کو کہ مدعی

یہ جی بھی یوں ہی جائے گا رہتا ہے تو کدھر

آتی ہی بوجھیو تو بلا اپنے سر صبا

وے مشک فام زلفیں پریشاں ہوئیں اگر

جاتی نہیں ہے دل سے تری یاد زلف و رو

روتے ہی مجھ کو گذرے ہے کیا شام کیا سحر

کیا جانوں کس کے تیں لب خنداں کہے ہے خلق

میں نے جو آنکھیں کھول کے دیکھیں سو چشم تر

اے سیل ٹک سنبھل کے قدم بادیے میں رکھ

ہر سمت کو ہے تشنہ لبی کا مری خطر

کرتا ہے کون منع کہ سج اپنی تو نہ دیکھ

لیکن کبھی تو میر کے کر حال پر نظر

میر تقی میر

رکھ کے تیشہ کہے ہے یا استاد

اکتوبر 6, 2015میر تقی میر،اساتذہ،غزلفریاد،مراد،معتاد،ناشاد،یاد،امداد،ایجاد،آباد،آزاد،ارشاد،استاد،بہزاد،بنیاد،برباد،صیادadmin

دیوان اول غزل 203

میرے سنگ مزار پر فرہاد

رکھ کے تیشہ کہے ہے یا استاد

ہم سے بن مرگ کیا جدا ہو ملال

جان کے ساتھ ہے دل ناشاد

موند آنکھیں سفر عدم کا کر

بس ہے دیکھا نہ عالم ایجاد

فکر تعمیر میں نہ رہ منعم

زندگانی کی کچھ بھی ہے بنیاد

خاک بھی سر پہ ڈالنے کو نہیں

کس خرابے میں ہم ہوئے آباد

سنتے ہو ٹک سنو کہ پھر مجھ بعد

نہ سنوگے یہ نالہ و فریاد

لگتی ہے کچھ سموم سی تو نسیم

خاک کس دل جلے کی دی برباد

بھولا جا ہے غم بتاں میں جی

غرض آتا ہے پھر خدا ہی یاد

تیرے قید قفس کا کیا شکوہ

نالے اپنے سے اپنے سے فریاد

ہر طرف ہیں اسیر ہم آواز

باغ ہے گھر ترا تو اے صیاد

ہم کو مرنا یہ ہے کہ کب ہوں کہیں

اپنی قید حیات سے آزاد

ایسا وہ شوخ ہے کہ اٹھتے صبح

جانا سو جاے اس کی ہے معتاد

نہیں صورت پذیر نقش اس کا

یوں ہی تصدیع کھینچے ہے بہزاد

خوب ہے خاک سے بزرگوں کی

چاہنا تو مرے تئیں امداد

پر مروت کہاں کی ہے اے میر

تو ہی مجھ دل جلے کو کر ارشاد

نامرادی ہو جس پہ پروانہ

وہ جلاتا پھرے چراغ مراد

میر تقی میر

چمن کی صبح کوئی دم کو شام ہے صیاد

اکتوبر 6, 2015میر تقی میر،اساتذہ،غزلکام،تمام،رام،شامadmin

دیوان اول غزل 202

قفس تو یاں سے گئے پر مدام ہے صیاد

چمن کی صبح کوئی دم کو شام ہے صیاد

بہت ہیں ہاتھ ہی تیرے نہ کر قفس کی فکر

مرا تو کام انھیں میں تمام ہے صیاد

یہی گلوں کو تنک دیکھوں اتنی مہلت ہو

چمن میں اور تو کیا مجھ کو کام ہے صیاد

ابھی کہ وحشی ہے اس کشمکش کے بیچ ہے میر

خدا ہی اس کا ہے جو تیرا رام ہے صیاد

میر تقی میر

ہے تو کس آفریدہ کے مانند

اکتوبر 6, 2015میر تقی میر،اساتذہ،غزلچیدہ،کشیدہ،آفریدہ،بریدہ،دمیدہ،دیدہ،رمیدہ،زرخریدہ،طپیدہadmin

دیوان اول غزل 201

اے گل نو دمیدہ کے مانند

ہے تو کس آفریدہ کے مانند

ہم امید وفا پہ تیری ہوئے

غنچۂ دیر چیدہ کے مانند

خاک کو میری سیر کرکے پھرا

وہ غزال رمیدہ کے مانند

سر اٹھاتے ہی ہو گئے پامال

سبزئہ نو دمیدہ کے مانند

نہ کٹے رات ہجر کی جو نہ ہو

نالہ تیغ کشیدہ کے مانند

ہم گرفتار حال ہیں اپنے

طائر پر بریدہ کے مانند

دل تڑپتا ہے اشک خونیں میں

صید درخوں طپیدہ کے مانند

تجھ سے یوسف کو کیونکے نسبت دیں

کب شنیدہ ہو دیدہ کے مانند

میر صاحب بھی اس کے ہاں تھے لیک

بندئہ زرخریدہ کے مانند

میر تقی میر

اڑتی ہے خاک میری باد صبا ہے شاہد

اکتوبر 6, 2015میر تقی میر،اساتذہ،غزلکیا،خدا،درا،دعا،صباadmin

دیوان اول غزل 200

ہوں رہگذر میں تیرے ہر نقش پا ہے شاہد

اڑتی ہے خاک میری باد صبا ہے شاہد

طوف حرم میں بھی میں بھولا نہ تجھ کو اے بت

آتا ہے یاد تو ہی میرا خدا ہے شاہد

شرمندئہ اثر کچھ باطن مرا نہیں ہے

وقت سحر ہے شاہد دست دعا ہے شاہد

نالے میں اپنے پنہاں میں بھی ہوں ساتھ تیرے

شاہد ہے گرد محمل شور درا ہے شاہد

ایذا ہے میر پر جو وہ تو کہوں ہی گا میں

بارے یہ کہہ کہ تیری خاطر میں کیا ہے شاہد

میر تقی میر

آخرکار کیا کہا قاصد

اکتوبر 6, 2015میر تقی میر،اساتذہ،غزللکھا،ماجرا،نیا،نارسا،کہا،گیا،بھلا،جا،رہا،سالہاadmin

دیوان اول غزل 199

نہ پڑھا خط کو یا پڑھا قاصد

آخرکار کیا کہا قاصد

کوئی پہنچا نہ خط مرا اس تک

میرے طالع ہیں نارسا قاصد

سر نوشت زبوں سے زر ہو خاک

راہ کھوٹی نہ کر تو جا قاصد

گر پڑا خط تو تجھ پہ حرف نہیں

یہ بھی میرا ہی تھا لکھا قاصد

یہ تو رونا ہمیشہ ہے تجھ کو

پھر کبھو پھر کبھو بھلا قاصد

اب غرض خامشی ہی بہتر ہے

کیا کہوں تجھ سے ماجرا قاصد

شب کتابت کے وقت گریے میں

جو لکھا تھا سو بہ گیا قاصد

کہنہ قصہ لکھا کروں تاکے

بھیجا کب تک کروں نیا قاصد

ہے طلسمات اس کا کوچہ تو

جو گیا سو وہیں رہا قاصد

باد پر ہے برات جس کا جواب

اس کو گذرے ہیں سالہا قاصد

نامۂ میر کو اڑاتا ہے

کاغذ باد گر گیا قاصد

میر تقی میر

ابھریں گے عشق دل سے ترے راز میرے بعد

اکتوبر 6, 2015میر تقی میر،اساتذہ،غزلناز،ناساز،پرواز،آواز،باز،جانباز،رازadmin

دیوان اول غزل 198

آوے گی میری قبر سے آواز میرے بعد

ابھریں گے عشق دل سے ترے راز میرے بعد

جینا مرا تو تجھ کو غنیمت ہے ناسمجھ

کھینچے گا کون پھر یہ ترے ناز میرے بعد

شمع مزار اور یہ سوز جگر مرا

ہر شب کریں گے زندگی ناساز میرے بعد

حسرت ہے اس کے دیکھنے کی دل میں بے قیاس

اغلب کہ میری آنکھیں رہیں باز میرے بعد

کرتا ہوں میں جو نالے سر انجام باغ میں

منھ دیکھو پھر کریں گے ہم آواز میرے بعد

بن گل موا ہی میں تو پہ تو جا کے لوٹیو

صحن چمن میں اے پر پرواز میرے بعد

بیٹھا ہوں میر مرنے کو اپنے میں مستعد

پیدا نہ ہوں گے مجھ سے بھی جانباز میرے بعد

میر تقی میر

یا بگولا جو کوئی سر کھینچے ہے صحرا نورد

اکتوبر 6, 2015میر تقی میر،اساتذہ،غزلنورد،گرد،پیرمرد،درد،سردadmin

دیوان اول غزل 197

کیا ہے یہ جو گاہے آجاتی ہے آندھی کوئی زرد

یا بگولا جو کوئی سر کھینچے ہے صحرا نورد

شوق میں یہ محمل لیلیٰ کے ہو کر بے قرار

اک نہاد وادی مجنوں سے اٹھ چلتی ہے گرد

وجہ دم سردی نہیں میں جانتا رونے کے بعد

مینھ برسا ہے کہیں شاید ہوا آتی ہے سرد

مار رکھا باطن پیر مغاں نے شیخ کو

مل گیا اس پیر زن کو غیب سے ایک پیرمرد

ایک شب پہلو کیا تھا گرم ان نے تیرے ساتھ

رات کو رہتا ہے اکثر میر کے پہلو میں درد

میر تقی میر

ان دنوں کچھ ہے مہرباں وہ شوخ

اکتوبر 6, 2015میر تقی میر،اساتذہ،غزلشوخadmin

دیوان اول غزل 196

ہے نہیں دشمن جہاں وہ شوخ

ان دنوں کچھ ہے مہرباں وہ شوخ

میر تقی میر

کرتا ہے چرخ مجھ سے نئے یار ایک طرح

اکتوبر 6, 2015میر تقی میر،اساتذہ،غزلناچار،یار،گنہگار،گرفتار،افگار،بیمار،بازار،خوار،دیدار،طرحدار،عیارadmin

دیوان اول غزل 195

خاطر کرے ہے جمع وہ ہر بار ایک طرح

کرتا ہے چرخ مجھ سے نئے یار ایک طرح

میں اور قیس و کوہکن اب جو زباں پہ ہیں

مارے گئے ہیں سب یہ گنہگار ایک طرح

منظور اس کو پردے میں ہیں بے حجابیاں

کس سے ہوا دوچار وہ عیار ایک طرح

سب طرحیں اس کی اپنی نظر میں تھیں کیا کہیں

پر ہم بھی ہو گئے ہیں گرفتار ایک طرح

گھر اس کے جاکے آتے ہیں پامال ہوکے ہم

کریے مکاں ہی اب سر بازار ایک طرح

گہ گل ہے گاہ رنگ گہے باغ کی ہے بو

آتا نہیں نظر وہ طرحدار ایک طرح

نیرنگ حسن دوست سے کر آنکھیں آشنا

ممکن نہیں وگرنہ ہو دیدار ایک طرح

سو طرح طرح دیکھ طبیبوں نے یہ کہا

صحت پذیر ہوئے یہ بیمار ایک طرح

سو بھی ہزار طرح سے ٹھہراوتے ہیں ہم

تسکین کے لیے تری ناچار ایک طرح

بن جی دیے ہو کوئی طرح فائدہ نہیں

گر ہے تو یہ ہے اے جگر افگار ایک طرح

ہر طرح تو ذلیل ہی رکھتا ہے میر کو

ہوتا ہے عاشقی میں کوئی خوار ایک طرح

میر تقی میر

رہنے لگا ہے دل کو اب آزار بے طرح

اکتوبر 6, 2015میر تقی میر،اساتذہ،غزلآزار،تلوار،خونبار،دیدار،ستمگارadmin

دیوان اول غزل 194

ہونے لگا گذار غم یار بے طرح

رہنے لگا ہے دل کو اب آزار بے طرح

اب کچھ طرح نہیں ہے کہ ہم غم زدے ہوں شاد

کہنے لگا ہے منھ سے ستمگار بے طرح

جاں بر تمھارے ہاتھ سے ہو گا نہ اب کوئی

رکھنے لگے ہو ہاتھ میں تلوار بے طرح

فتنہ اٹھے گا ورنہ نکل گھر سے تو شتاب

بیٹھے ہیں آ کے طالب دیدار بے طرح

لوہو میں شور بور ہے دامان و جیب میر

بپھرا ہے آج دیدئہ خونبار بے طرح

میر تقی میر

باز خواہ خوں ہے میرا گو اسی بستی کے بیچ

اکتوبر 6, 2015میر تقی میر،اساتذہ،غزلمستی،پستی،بستیadmin

دیوان اول غزل 193

ساتھ ہو اک بے کسی کے عالم ہستی کے بیچ

باز خواہ خوں ہے میرا گو اسی بستی کے بیچ

عرش پر ہے ہم نمد پوشان الفت کا دماغ

اوج دولت کا سا ہے یاں فقر کی پستی کے بیچ

ہم سیہ کاروں کا ہنسنا وہ ہے میخانے کی اور

آگئے ہیں میر مسجد میں چلے مستی کے بیچ

میر تقی میر

دن نہ پھر جائیں گے عشاق کے اک رات کے بیچ

اکتوبر 6, 2015میر تقی میر،اساتذہ،غزلہات،مساوات،گھات،اوقات،آفات،بات،خرابات،راتadmin

دیوان اول غزل 192

کر نہ تاخیر تو اک شب کی ملاقات کے بیچ

دن نہ پھر جائیں گے عشاق کے اک رات کے بیچ

حرف زن مت ہو کسی سے تو کہ اے آفت شہر

جاتے رہتے ہیں ہزاروں کے سر اک بات کے بیچ

میری طاعت کو قبول آہ کہاں تک ہو گا

سبحہ اک ہاتھ میں ہے جام ہے اک ہات کے بیچ

سرمگیں چشم پہ اس شوخ کی زنہار نہ جا

ہے سیاہی مژہ میں وہ نگہ گھات کے بیچ

بیٹھیں ہم اس کے سگ کو کے برابر کیوں کر

کرتے ہیں ایسی معیشت تو مساوات کے بیچ

تاب و طاقت کو تو رخصت ہوئے مدت گذری

پندگو یوں ہی نہ کر اب خلل اوقات کے بیچ

زندگی کس کے بھروسے پہ محبت میں کروں

ایک دل غم زدہ ہے سو بھی ہے آفات کے بیچ

بے مے و مغبچہ اک دم نہ رہا تھا کہ رہا

اب تلک میر کا تکیہ ہے خرابات کے بیچ

میر تقی میر

بھیج دے کیوں نہ زلیخا اسے کنعان کے بیچ

اکتوبر 6, 2015میر تقی میر،اساتذہ،غزلمژگان،کنعان،کان،گریان،گریبان،پان،آن،جان،شانadmin

دیوان اول غزل 191

فائدہ مصر میں یوسفؑ رہے زندان کے بیچ

بھیج دے کیوں نہ زلیخا اسے کنعان کے بیچ

تو نہ تھا مردن دشوار میں عاشق کے آہ

حسرتیں کتنی گرہ تھیں رمق اک جان کے بیچ

چشم بد دور کہ کچھ رنگ ہے اب گریہ پر

خون جھمکے ہے پڑا دیدئہ گریان کے بیچ

حال گلزار زمانہ کا ہے جیسے کہ شفق

رنگ کچھ اور ہی ہوجائے ہے اک آن کے بیچ

تاک کی چھائوں میں جوں مست پڑے سوتے ہوں

اینڈتی ہیں نگہیں سایۂ مژگان کے بیچ

جی لیا بوسۂ رخسار مخطط دے کر

عاقبت ان نے ہمیں زہر دیا پان کے بیچ

دعوی خوش دہنی اس سے اسی منھ پر گل

سر تو ٹک ڈال کے دیکھ اپنے گریبان کے بیچ

کرتے ململ کے پہن آتے تو ہو رندوں میں

شیخ صاحب نہ کہیں جفتے پڑیں شان کے بیچ

کان رکھ رکھ کے بہت درد دل میر کو تم

سنتے تو ہو پہ کہیں درد نہ ہو کان کے بیچ

میر تقی میر

ہوں جو رحمت کے سزاواروں کے بیچ

اکتوبر 6, 2015میر تقی میر،اساتذہ،غزلچاروں،یاروں،انگاروں،آزاروں،بازاروں،تلواروں،تاروں،خاروں،دیواروں،سزاواروںadmin

دیوان اول غزل 190

کاش اٹھیں ہم بھی گنہگاروں کے بیچ

ہوں جو رحمت کے سزاواروں کے بیچ

جی سدا ان ابروؤں ہی میں رہا

کی بسر ہم عمر تلواروں کے بیچ

چشم ہو تو آئینہ خانہ ہے دہر

منھ نظر آتا ہے دیواروں کے بیچ

ہیں عناصر کی یہ صورت بازیاں

شعبدے کیا کیا ہیں ان چاروں کے بیچ

جب سے لے نکلا ہے تو یہ جنس حسن

پڑ گئی ہے دھوم بازاروں کے بیچ

عاشقی و بے کسی و رفتگی

جی رہا کب ایسے آزاروں کے بیچ

جو سرشک اس ماہ بن جھمکے ہے شب

وہ چمک کاہے کو ہے تاروں کے بیچ

اس کے آتش ناک رخساروں بغیر

لوٹیے یوں کب تک انگاروں کے بیچ

بیٹھنا غیروں میں کب ہے ننگ یار

پھول گل ہوتے ہی ہیں خاروں کے بیچ

یارو مت اس کا فریب مہر کھائو

میر بھی تھے اس کے ہی یاروں کے بیچ

میر تقی میر

شاید بگڑ گئی ہے کچھ اس بے وفا سے آج

اکتوبر 6, 2015میر تقی میر،اساتذہ،غزلہوا،وفا،حیا،خدا،دعاadmin

دیوان اول غزل 189

آئے ہیں میر منھ کو بنائے خفا سے آج

شاید بگڑ گئی ہے کچھ اس بے وفا سے آج

واشد ہوئی نہ دل کو فقیروں کے بھی ملے

کھلتی نہیں گرہ یہ کسو کی دعا سے آج

جینے میں اختیار نہیں ورنہ ہم نشیں

ہم چاہتے ہیں موت تو اپنی خدا سے آج

ساقی ٹک ایک موسم گل کی طرف بھی دیکھ

ٹپکا پڑے ہے رنگ چمن میں ہوا سے آج

تھا جی میں اس سے ملیے تو کیا کیا نہ کہیے میر

پر کچھ کہا گیا نہ غم دل حیا سے آج

میر تقی میر

کسو کی زلف ڈھونڈی مو بہ مو کا کل کو سب لٹ لٹ

اکتوبر 6, 2015میر تقی میر،اساتذہ،غزللٹ،چٹ،کھٹ،کروٹadmin

دیوان اول غزل 188

نہ پایا دل ہوا روز سیہ سے جس کا جا لٹ پٹ

کسو کی زلف ڈھونڈی مو بہ مو کا کل کو سب لٹ لٹ

تو کن نیندوں پڑا سوتا تھا دروازے کو موندے شب

میں چوکھٹ پر تری کرتا رہا سر کو پٹک کھٹ کھٹ

چٹیں لگتی ہیں دل پر بلبلوں کے باغباں تو جو

چمن میں توڑتا ہے ہر سحر کلیوں کے تیں چٹ چٹ

ترے ہجراں کی بیماری میں میر ناتواں کو شب

ہوا ہے خواب سونا آہ اس کروٹ سے اس کروٹ

میر تقی میر

تو بھی مری دعا سے ملتی نہیں اجابت

اکتوبر 6, 2015میر تقی میر،اساتذہ،غزلکتابت،اجابت،بابتadmin

دیوان اول غزل 187

ہر صبح دم کروں ہوں الحاح با انابت

تو بھی مری دعا سے ملتی نہیں اجابت

مت لے حساب طاقت اے ضعف مجھ سے ظالم

لائق نہیں ہے تیرے یہ کون سی ہے بابت

کیا کیا لکھا ہے میں نے وہ میر کیا کہے گا

گم ہووے نامہ بر سے یارب مری کتابت

میر تقی میر

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: