زمرہ جات کے محفوظات: غزل

تب آنکھوں تلے میری اترتا ہے لہو سا

اکتوبر 6, 2015میر تقی میر،اساتذہ،غزلموسیٰ،چوسا،ساadmin

دیوان سوم غزل 1086

جب گل کہے ہے اپنے تئیں یار کے رو سا

تب آنکھوں تلے میری اترتا ہے لہو سا

تحقیق کروں کس سے حقیقت کے نشے کو

خضر آب اسے کہتا ہے آتش کہے موسیٰ

کیا دور ہے شربت پہ اگر قند کے تھوکے

ٹک جن نے ترے شربتی ان ہونٹوں کو چوسا

دم لا بہ کریں شیخ رکھیں شملے تو کیا ہے

ہونا مگر آسان ہے اس کے سگ کو سا

تعبیر جسے کرتے ہیں ہنگامۂ محشر

وہ یار کے کوچے کا ہے کچھ شور غلو سا

آرائش درویشی بھی اپنی نہیں بے لطف

ہے بوریے کا نقش مرے تن پہ اتو سا

کب کی ہے حدیث اس سے سخن کرنے کی میں نے

کیا میر سے بولے کوئی ہے بیہدہ گو سا

میر تقی میر

کبریت نمط جن نے لیا مجھ کو جلایا

اکتوبر 6, 2015میر تقی میر،اساتذہ،غزلقضایا،لگایا،کھلایا،آیا،اگایا،اٹھایا،جلایا،خدایا،دکھایا،رجھایاadmin

دیوان سوم غزل 1085

مجھ زار نے کیا گرمی بازار سے پایا

کبریت نمط جن نے لیا مجھ کو جلایا

بیتاب تہ تیغ ستم دیر رہا میں

جب تک نہ گئی جان مجھے صبر نہ آیا

جانا فلک دوں نے کہ سرسبز ہوا میں

گر خاک سے سبزہ کوئی پژمردہ اگایا

اس رخ نے بہت صورتیں لوگوں کی بگاڑیں

اس قد نے قیامت کا سا ہنگامہ اٹھایا

مت راہ سخن دے کہ پھر آپھی تو کہے گا

کیوں میں نے محبت کے عبث منھ کو کھلایا

ہر چند کہ تھی ریجھنے کی جاے ترے لب

پر گالیاں دیں اتنی انھوں سے کہ رجھایا

گردش میں رہا کرتے ہیں ہم دید میں ان کی

آنکھوں نے تری خوب سماں ہم کو دکھایا

کس روز یہ اندوہ جگر سوز تھا آگے

کب شب لب و یارب تھی مری یوں ہی خدایا

دن جی کے الجھنے کے ہی جھگڑے میں کٹے ہے

رات اس کے خیالات سے رہتے ہیں قضایا

کیا کہیے دماغ اس کا کہ گل گشت میں کل میر

گل شاخوں سے جھک آئے تھے پر منھ نہ لگایا

میر تقی میر

پیش جاتے کچھ نہ دیکھی چشم تر کر رہ گیا

اکتوبر 6, 2015میر تقی میر،اساتذہ،غزلمر،ور،ادھر،بھر،ترadmin

دیوان سوم غزل 1084

میر کل صحبت میں اس کی حرف سرکر رہ گیا

پیش جاتے کچھ نہ دیکھی چشم تر کر رہ گیا

خوبی اپنے طالع بد کی کہ شب وہ رشک ماہ

گھر مرے آنے کو تھا سو منھ ادھر کر رہ گیا

طنز و تعریض بتان بے وفا کے در جواب

میں بھی کچھ کہتا خدا سے اپنے ڈر کر رہ گیا

سرگذشت اپنی سبب ہے حیرت احباب کی

جس سے دل خالی کیا وہ آہ بھر کر رہ گیا

میر کو کتنے دنوں سے رہتی تھی بے طاقتی

رات دل تڑپا بہت شاید کہ مر کر رہ گیا

میر تقی میر

ہمیں عشق ہے تو اثر کر رہے گا

اکتوبر 6, 2015میر تقی میر،اساتذہ،غزلمر،نظر،اثرadmin

دیوان سوم غزل 1083

کبھو وہ توجہ ادھر کر رہے گا

ہمیں عشق ہے تو اثر کر رہے گا

ہمارا ہے احوال حیرت کی جاگہ

جو دیکھے گا وہ بھی نظر کر رہے گا

نہیں اس طرف میر جانے سے رہتا

رہے گا تو اودھر ہی مر کر رہے گا

میر تقی میر

آگے اس قد کے ہے سرو باغ بے اسلوب سا

اکتوبر 6, 2015میر تقی میر،اساتذہ،غزلمجذوب،محجوب،ایوب،اسلوب،خوبadmin

دیوان سوم غزل 1082

گل بھی ہے معشوق لیکن کب ہے اس محبوب سا

آگے اس قد کے ہے سرو باغ بے اسلوب سا

اس کے وعدے کی وفا تک وہ کوئی ہووے گا جو

ہو معمر نوحؑ سا صابر ہو پھر ایوبؑ سا

عشق سے کن نے مرے آگہ کیا اس شوخ کو

اب مرے آنے سے ہوجاتا ہے وہ محجوب سا

بعد مردن یہ غزل مطرب سے جن نے گوش کی

گور کے میری گلے جا لگ کے رویا خوب سا

عاقلانہ حرف زن ہو میر تو کریے بیاں

زیر لب کیا جانیے کہتا ہے کیا مجذوب سا

میر تقی میر

چلے آتے تھے چاروں اور سے پتھر جہاں میں تھا

اکتوبر 6, 2015میر تقی میر،اساتذہ،غزلکیکر،پتھر،پر،بستر،خنجر،دیگرadmin

دیوان سوم غزل 1081

جنوں میں ساتھ تھا کل لڑکوں کا لشکر جہاں میں تھا

چلے آتے تھے چاروں اور سے پتھر جہاں میں تھا

تجلی جلوہ اس رشک قمر کا قرب تھا مجھ کو

جلے جاتے تھے واں جائے ملک کے پر جہاں میں تھا

گلی میں اس کی میری رات کیا آرام سے گذری

یہی تھا سنگ بالیں خاک تھی بستر جہاں میں تھا

غضب کچھ شور تھا سر میں بلا بے طاقتی جی میں

قیامت لحظہ لحظہ تھی مرے دل پر جہاں میں تھا

چبھیں تھیں جی میں وے پلکیں لگیں تھیں دل کو وے بھوویں

یہی شمشیر چلتی تھی یہی خنجر جہاں میں تھا

خیال چشم و روے یار کا بھی طرفہ عالم ہے

نظر آیا ہے واں اک عالم دیگر جہاں میں تھا

عجب دن میر تھے دیوانگی میں دشت گردی کے

سر اوپر سایہ گستر ہوتے تھے کیکر جہاں میں تھا

میر تقی میر

کبھو مزاج میں اس کے ہمیں تصرف تھا

اکتوبر 6, 2015میر تقی میر،اساتذہ،غزلتوقف،تکلف،تاسف،تخلف،تصرفadmin

دیوان سوم غزل 1080

وفا تھی مہر تھی اخلاص تھا تلطف تھا

کبھو مزاج میں اس کے ہمیں تصرف تھا

جو خوب دیکھو تو ساری وہی حقیقت ہے

چھپانا چہرے کا عشاق سے تکلف تھا

اسیر عشق نہیں بازخواہ خوں رکھتے

ہمارے قتل میں اس کو عبث توقف تھا

نہ پوچھو خوب ہے بدعہدیوں کی مشق اس کو

ہزاروں عہد کیے پر وہی تخلف تھا

جہاں میں میر سے کاہے کو ہوتے ہیں پیدا

سنا یہ واقعہ جن نے اسے تاسف تھا

میر تقی میر

بلبل نے بھی نہ طور گلوں کا بیاں کیا

اکتوبر 6, 2015میر تقی میر،اساتذہ،غزلامتحاں،بیاں،بدزباں،جہاں،جاں،رواں،زیاںadmin

دیوان سوم غزل 1079

میں گلستاں میں آ کے عبث آشیاں کیا

بلبل نے بھی نہ طور گلوں کا بیاں کیا

پھر اس کے ابرواں کا خم و تاب ہے وہی

تلوار کے تلے بھی مرا امتحاں کیا

دوں کس کو دوش دشمن جانی تھی دوستی

اس سودے میں صریح میں نقصان جاں کیا

گالی ہے حرف یار قلم نے قضا کے ہائے

صورت نکالی خوب ولے بدزباں کیا

اس جنس خوش کے پیچھے کھپا میں چوائو کیا

میں نے کسو کا کیا کیا اپنا زیاں کیا

لڑکے جہان آباد کے یک شہر کرتے ناز

آجاتے ہیں بغل میں اشارہ جہاں کیا

میں منتظر جواب کا نامے کے مر گیا

ناچار میر جان کو اودھر رواں کیا

میر تقی میر

رات کا بھی کیا ہی مینھ آیا تھا پر جاتا رہا

اکتوبر 6, 2015میر تقی میر،اساتذہ،غزلچلاتا،ناتا،ڈولاتا،کھاتا،پاتا،جاتا،سمجھاتا،شرماتاadmin

دیوان سوم غزل 1078

یاد خط میں اس کے جی بھر آ کے گھبراتا رہا

رات کا بھی کیا ہی مینھ آیا تھا پر جاتا رہا

کیا قیامت ہوتی بے پردہ ہوئے کیا جانیے

مصلحت ہی ہو گی ہم سے وہ جو شرماتا رہا

قدموزوں یار کا خاطر سے جاتا ہی نہیں

میں اسی مصرع کو ساری عمر ڈولاتا رہا

کل مکل بیتاب دل سے آج کل کی کچھ نہیں

میں تو اس غم کش کو بے کل ہی سدا پاتا رہا

آگ کھا جاتی ہے خشک و تر جو اس کے منھ پڑے

میں تو جیسے شمع اپنے ہی تئیں کھاتا رہا

میری تیری چاہ منھ دیکھے کی ہے جوں آرسی

آنکھ پھیری جس گھڑی پھر کاہے کا ناتا رہا

ہو گئے ہم محتسب کی بے شعوری سے اسیر

شیخ میں کچھ ہوش تھا میخانے سے جاتا رہا

لوگ ہی اس کارواں کے حرف نشنو تھے تمام

راہ چلتے تو جرس ہر گام چلاتا رہا

میر دیوانہ ہے اچھا بات کیا سمجھے مری

یوں تو مجھ سے جب ملا میں اس کو سمجھاتا رہا

میر تقی میر

ہر زماں ملتے تھے باہم سو زمانہ ہو گیا

اکتوبر 6, 2015میر تقی میر،اساتذہ،غزلفسانہ،پرانا،آنا،بہانہ،جانا،دکھانا،زمانہadmin

دیوان سوم غزل 1077

ہجر کی اک آن میں دل کا ٹھکانا ہو گیا

ہر زماں ملتے تھے باہم سو زمانہ ہو گیا

واں تعلل ہی تجھے کرتے گئے شام و سحر

یاں ترے مشتاق کا مرنا بہانہ ہو گیا

شیب میں بھی ہے لباس جسم کا ظاہر قماش

پر اسے اب چھوڑیے جامہ پرانا ہو گیا

کہنے تو کہہ بیٹھے مہ بہتر ہے روے یار سے

شہر میں پھر ہم کو مشکل منھ دکھانا ہو گیا

صد سخن آئے تھے لب تک پر نہ کہنے پائے ایک

ناگہاں اس کی گلی سے اپنا جانا ہو گیا

رہنے کے قابل تو ہرگز تھی نہ یہ عبرت سرائے

اتفاقاً اس طرف اپنا بھی آنا ہو گیا

سینکڑوں افسوں دنوں کو پڑھتے تھے تس پر بھی میر

بیٹھنا راتوں کو باہم اب فسانہ ہو گیا

میر تقی میر

دل کے جانے کا بڑا ماتم ہوا

اکتوبر 6, 2015میر تقی میر،اساتذہ،غزلہم،ماتم،نم،کم،اودھم،برہم،عالمadmin

دیوان سوم غزل 1076

سینہ کوبی ہے طپش سے غم ہوا

دل کے جانے کا بڑا ماتم ہوا

آنکھیں دوڑیں خلق جا اودھر گری

اٹھ گیا پردہ کہاں اودھم ہوا

کیا لکھوں رویا جو لکھتے جوں قلم

سب مرے نامے کا کاغذ نم ہوا

ہم جو اس بن خوار ہیں حد سے زیاد

یار یاں تک آن کر کیا کم ہوا

آگیا یوں ہی خراماں وہ تو پھر

حشر کا ہنگامہ ہی برہم ہوا

درہمی سے برہمی سے دیکھیو

دونوں عالم کا عجب عالم ہوا

جسم خاکی کا جہاں پردہ اٹھا

ہم ہوئے وہ میر سب وہ ہم ہوا

میر تقی میر

سو بھی رہتا ہوں یہ کہتا ہائے دل نے کیا کیا

اکتوبر 6, 2015میر تقی میر،اساتذہ،غزلکیا،پردہ،اچھا،رسوا،سوداadmin

دیوان سوم غزل 1075

ضبط کرتے کرتے اب جو لب کو میں نے وا کیا

سو بھی رہتا ہوں یہ کہتا ہائے دل نے کیا کیا

آنکھ پڑتی تھی تمھارے منھ پہ جب تک چین تھا

کیا کیا تم نے کہ مجھ بیتاب سے پردہ کیا

گور ہی اس کو جھنکائی عشق جس کے ہاں گیا

اس طبیب بدشگوں نے کس کے تیں اچھا کیا

دیکھ خبطی مجھ کو رستے بند ہوجاتے ہیں اب

عشق نے کیا کوچہ و بازار میں رسوا کیا

لوگ دل دیتے سنے تھے میر دے گذرا ہے جی

لیک اپنے طور پر ان نے بھی اک سودا کیا

میر تقی میر

یک رمق جی تھا بدن میں سو بھی گھبرانے لگا

اکتوبر 6, 2015میر تقی میر،اساتذہ،غزلمرجھانے،کھانے،گھبرانے،پھیلانے،آنے،جھپکانے،جانے،دیوانے،شرمانےadmin

دیوان سوم غزل 1074

رات سے آنسو مری آنکھوں میں پھر آنے لگا

یک رمق جی تھا بدن میں سو بھی گھبرانے لگا

وہ لڑکپن سے نکل کر تیغ چمکانے لگا

خون کرنے کا خیال اب کچھ اسے آنے لگا

لعل جاں بخش اس کے تھے پوشیدہ جوں آب حیات

اب تو کوئی کوئی ان ہونٹوں پہ مر جانے لگا

حیف میں اس کے سخن پر ٹک نہ رکھا گوش کو

یوں تو ناصح نے کہا تھا دل نہ دیوانے لگا

حبس دم کے معتقد تم ہو گے شیخ شہر کے

یہ تو البتہ کہ سن کر لعن دم کھانے لگا

گرم ملنا اس گل نازک طبیعت سے نہ ہو

چاندنی میں رات بیٹھا تھا سو مرجھانے لگا

عاشقوں کی پائمالی میں اسے اصرار ہے

یعنی وہ محشر خرام اب پائوں پھیلانے لگا

چشمک اس مہ کی سی دلکش دید میں آئی نہیں

گو ستارہ صبح کا بھی آنکھ جھپکانے لگا

کیونکر اس آئینہ رو سے میر ملیے بے حجاب

وہ تو اپنے عکس سے بھی دیکھو شرمانے لگا

میر تقی میر

وہ دل کہ جس پہ اپنا بھروسا تھا خوں ہوا

اکتوبر 6, 2015میر تقی میر،اساتذہ،غزلخوں،رہنموں،زبوں،سکوں،شگوںadmin

دیوان سوم غزل 1073

اب کے جو گل کی فصل میں ہم کو جنوں ہوا

وہ دل کہ جس پہ اپنا بھروسا تھا خوں ہوا

ٹھہرا گیا ہو ٹک بھی تو تم سے بیاں کروں

آتے ہی اس کے رفتن صبر و سکوں ہوا

تھا شوق طوف تربت مجنوں مجھے بہت

اک گردباد دشت مرا رہنموں ہوا

سیلاب آگے آیا چلا جاتے دشت میں

بے اختیار رونے کا میرے شگوں ہوا

جان اس کی تیغ تیز سے رکھ کر دریغ میر

صید حرم ندان شکار زبوں ہوا

میر تقی میر

جد برسوں ہم نے سورئہ یوسفؑ کو دم کیا

اکتوبر 6, 2015میر تقی میر،اساتذہ،غزلقلم،کم،الم،بھسم،خم،دم،ستمadmin

دیوان سوم غزل 1072

تد اس بہشتی رو سے یہ خلطہ بہم کیا

جد برسوں ہم نے سورئہ یوسفؑ کو دم کیا

چہرے کو نوچ نوچ لیا چھاتی کوٹ لی

جانے کا دل کے ہم نے بہت غم الم کیا

مربوط اور لوگوں سے شاید کہ وے ہوئے

وہ ربط و رابطہ جو بہت ہم سے کم کیا

کیا کیا سخن زباں پہ مری آئے ہوکے قتل

مانند خامہ گوکہ مرا سر قلم کیا

کی ہم نے تب درونے کی سوزش سے عاقبت

سب تن بدن اس آگ نے اپنا بھسم کیا

یاں اپنے جسم زار پہ تلوار سی لگی

ان نے جو بے دماغی سے ابرو کو خم کیا

اس زندگی سے مارے ہی جانا بھلا تھا میر

رحم ان نے میرے حق میں کیا کیا ستم کیا

میر تقی میر

ٹک رنجہ قدم کر کر مجھ تک اسے آنا تھا

اکتوبر 6, 2015میر تقی میر،اساتذہ،غزلچھپانا،چھانا،کھانا،ٹھکانا،آنا،بچانا،جگانا،جانا،دکھاناadmin

دیوان سوم غزل 1071

سہل ایسا نہ تھا آخر جی سے مرا جانا تھا

ٹک رنجہ قدم کر کر مجھ تک اسے آنا تھا

کیا مو کی پریشانی کیا پردے میں پنہانی

منھ یار کو ہر صورت عاشق سے چھپانا تھا

لذت سے نہ تھا خالی جانا تہ تیغ اس کی

اے صید حرم تجھ کو اک زخم تو کھانا تھا

کیا صورتیں بگڑی ہیں مشتاقوں کی ہجراں میں

اس چہرے کو اے خالق ایسا نہ بنانا تھا

مت سہل ہمیں سمجھو پہنچے تھے بہم تب ہم

برسوں تئیں گردوں نے جب خاک کو چھانا تھا

کیا ظلم کیا بے جا مارا جیوں سے ان نے

کچھ ٹھور بھی تھی اس کی کچھ اس کا ٹھکانا تھا

اے شور قیامت اب وعدے سے قیامت ہے

خوابیدہ مرے خوں کو ظالم نہ جگانا تھا

ہو باغ و بہار آیا گل پھول کہیں پایا

جلوہ اسے یاں اپنا صدرنگ دکھانا تھا

کہتے نہ تھے ہم واں سے پھر آچکے جیتے تم

میر اس گلی میں تم کو زنہار نہ جانا تھا

میر تقی میر

اس جان کی جوکھوں کو اس وقت نہ جانا تھا

اکتوبر 6, 2015میر تقی میر،اساتذہ،غزلفسانہ،نہانا،نشانہ،پرانا،اٹھانا،بہانہ،جانا،دوانہ،زمانہ،سناناadmin

دیوان سوم غزل 1070

کیا کام کیا ہم نے دل یوں نہ لگانا تھا

اس جان کی جوکھوں کو اس وقت نہ جانا تھا

تھا جسم کا ترک اولیٰ ایام میں پیری کے

جاتا تھا چلا ہر دم جامہ بھی پرانا تھا

ہر آن تھی سرگوشی یا بات نہیں گاہے

اوقات ہے اک یہ بھی اک وہ بھی زمانہ تھا

پامالی عزیزوں کی رکھنی تھی نظر میں ٹک

اتنا بھی تمھیں آ کر یاں سر نہ اٹھانا تھا

اک محوتماشا ہیں اک گرم ہیں قصے کے

یاں آج جو کچھ دیکھا سو کل وہ فسانہ تھا

کیونکر گلی سے اس کی میں اٹھ کے چلا جاتا

یاں خاک میں ملنا تھا لوہو میں نہانا تھا

جو تیر چلا اس کا سو میری طرف آیا

اس عشق کے میداں میں میں ہی تو نشانہ تھا

جب تونے نظر پھیری تب جان گئی اس کی

مرنا ترے عاشق کا مرنا کہ بہانہ تھا

کہتا تھا کسو سے کچھ تکتا تھا کسو کا منھ

کل میر کھڑا تھا یاں سچ ہے کہ دوانہ تھا

کب اور غزل کہتا میں اس زمیں میں لیکن

پردے میں مجھے اپنا احوال سنانا تھا

میر تقی میر

آیا کبھو یاں دن کو بھی یوں تو غضب آیا

اکتوبر 6, 2015میر تقی میر،اساتذہ،غزللب،ڈھب،کب،اب،ادب،جب،سبب،عجب،غضبadmin

دیوان سوم غزل 1069

جس خشم سے وہ شوخ چلا آج شب آیا

آیا کبھو یاں دن کو بھی یوں تو غضب آیا

اس نرگس مستانہ کو کر یاد کڑھوں ہوں

کیا گریۂ سرشار مجھے بے سبب آیا

راہ اس سے ہوئی خلق کو کس طور سے یارب

ہم کو کبھی ملنے کا تو اس کے نہ ڈھب آیا

کیا پوچھتے ہو دب کے سخن منھ سے نہ نکلا

کچھ دیکھتے اس کو مجھے ایسا ادب آیا

کہتے تو ہیں میلان طبیعت ہے اسے بھی

یہ باتیں ہیں ایدھر کو مزاج اس کا کب آیا

خوں ہوتی رہی دل ہی میں آزردگی میری

کس روز گلہ اس کا مرے تابہ لب آیا

جی آنکھوں میں آیا ہے جگر منھ تئیں میرے

کیا فائدہ یاں چل کر اگر یار اب آیا

آتے ہوئے اس کے تو ہوئی بے خودی طاری

وہ یاں سے گیا اٹھ کے مجھے ہوش جب آیا

جاتا تھا چلا راہ عجب چال سے کل میر

دیکھا اسے جس شخص نے اس کو عجب آیا

میر تقی میر

مجھ پہ تودہ ہوا ہے طوفاں کا

اکتوبر 6, 2015میر تقی میر،اساتذہ،غزلمرجاں،مسلماں،ڈھان،گریباں،ایماں،جاں،طوفاںadmin

دیوان سوم غزل 1068

ہوں نشاں کیوں نہ تیر خوباں کا

مجھ پہ تودہ ہوا ہے طوفاں کا

ہاتھ زنجیر ہو جنوں میں رہا

اپنے زنجیرئہ گریباں کا

چپکے دیکھو جھمکتے وے لب سرخ

ذکر یاں کیا ہے لعل و مرجاں کا

ایک رہزن ہے اس کی کافر زلف

غم ہی رہتا ہے دین و ایماں کا

عمر آوارگی میں سب گذری

کچھ ٹھکانا نہیں دل و جاں کا

کافرستاں ہے خال و خط و زلف

وقر کیا ہے دل مسلماں کا

مر گیا میر نالہ کش بیکس

نَے نے ماتم میں اس کے منھ ڈھانکا

میر تقی میر

کیا ذکر یاں مسیح علیہ السلام کا

اکتوبر 6, 2015میر تقی میر،اساتذہ،غزلمقام،ناتمام،کلام،پیام،السلام،امام،سلام،شام،غلامadmin

دیوان سوم غزل 1067

اعجاز منھ تکے ہے ترے لب کے کام کا

کیا ذکر یاں مسیح علیہ السلام کا

رقعہ ہمیں جو آوے ہے سو تیر میں بندھا

کیا دیجیے جواب اجل کے پیام کا

کچھ سدھ سنبھالتے ہی رکھی ان نے پگڑی پھیر

ممنون میں نہیں ہوں جواب سلام کا

منھ دیکھو بدر کا کہ تری روکشی کرے

تو یوں ہی نام لے ہے کسو ناتمام کا

نوبت ہے اپنی جب سے یہی کوچ کاہے شور

بجنا سنا نہیں ہے کبھو یاں مقام کا

کنج لب اس کا دیکھ کے خاموش رہ گئے

یعنی کہ تھا مقام یہ ختم کلام کا

اس رو و مو کے محو کو کیا روزگار سے

جلوہ ہی کچھ جدا ہے مرے صبح و شام کا

صاحب ہو مار ڈالو مجھے تم وگرنہ کچھ

جز عاشقی گناہ نہیں ہے غلام کا

کب اقتدا ہو مجھ سے کسو کی سواے میر

بندہ ہوں دل سے میں اسی سید امام کا

میر تقی میر

کوئی دل کا بخار نکلے گا

اکتوبر 6, 2015میر تقی میر،اساتذہ،غزلیار،پار،اختیار،بہار،بخار،شکار،غبارadmin

دیوان سوم غزل 1066

چشم سے خوں ہزار نکلے گا

کوئی دل کا بخار نکلے گا

اس کی نخچیرگہ سے روح الامیں

ہو کے آخر شکار نکلے گا

آندھیوں سے سیاہ ہو گا چرخ

دل کا تب کچھ غبار نکلے گا

ہوئے رے لاگ تیر مژگاں کی

کس کے سینے کے پار نکلے گا

ناز خورشید کب تلک کھینچیں

گھر سے کب اپنے یار نکلے گا

خون ہی آئے گا تو آنکھوں سے

ایک سیل بہار نکلے گا

عزلت میر عشق میں کب تک

ہو کے بے اختیار نکلے گا

میر تقی میر

ہمیشہ رہے نام اللہ کا

اکتوبر 6, 2015میر تقی میر،اساتذہ،غزلہمراہ،ماہ،ناف،نظرگاہ،اللہ،آہ،بیگاہ،خونخواہ،درگاہadmin

دیوان سوم غزل 1065

گیا حسن خوبان بد راہ کا

ہمیشہ رہے نام اللہ کا

پشیماں ہوا دوستی کر کے میں

بہت مجھ کو ارمان تھا چاہ کا

جگر کی سپر پھوٹ جانے لگی

بلا توڑ ہے ناوک آہ کا

اسیری کا دیتا ہے مژدہ مجھے

مرا زمزمہ گاہ و بیگاہ کا

رہوں جا کے مر حضرت یار میں

یہی قصد ہے بندہ درگاہ کا

کہا ہو دم قتل کچھ تو کہے

جواب اس کو کیا میرے خونخواہ کا

عدم کو نہیں مل کے جاتے ہیں لوگ

غم اس راہ میں کیا ہے ہمراہ کا

نظر خواب میں اس کے منھ پر پڑی

بہت خوب ہے دیکھنا ماہ کا

لگونہی اگر آنکھ تیری ہو میر

تماشا کر اس کی نظرگاہ کا

میر تقی میر

مہر بت دگر سے طوفان کر کے مارا

اکتوبر 6, 2015میر تقی میر،اساتذہ،غزلپہچان،پیمان،احسان،جان،حیران،سامان،طوفانadmin

دیوان سوم غزل 1064

کیا رویئے ہمیں کو یوں آن کر کے مارا

مہر بت دگر سے طوفان کر کے مارا

تربت کا میری لوحہ آئینے سے کرے ہے

یعنی کہ ان نے مجھ کو حیران کر کے مارا

بیگانہ جان ان نے کیا چوٹ رات کو کی

منھ دیکھ دیکھ میرا پہچان کر کے مارا

پہلے گلے لگایا پھر دست جور اٹھایا

مارا تو ان نے لیکن احسان کر کے مارا

اس سست عہد نے کیا کی تھی قسم مجھی سے

بہتوں کو ان نے عہد و پیمان کر کے مارا

حاضر یراق ہونا کاہے کو چاہیے تھا

مجھ بے نوا کو کیا کیا سامان کر کے مارا

کہنے لگا کہ شب کو میرے تئیں نشہ تھا

مستانہ میر کو میں کیا جان کر کے مارا

میر تقی میر

پھول غیرت سے جل کے خاک ہوا

اکتوبر 6, 2015میر تقی میر،اساتذہ،غزلہلاک،چاک،پاک،تپاک،خاکadmin

دیوان سوم غزل 1063

وہ جو گلشن میں جلوہ ناک ہوا

پھول غیرت سے جل کے خاک ہوا

اس کے دامن تلک نہ پہنچا ہاتھ

تھا سر دست جیب چاک ہوا

کس قدر تھا خبیث شیخ شہر

اس کے مرنے سے شہر پاک ہوا

ڈریے اس رشک خور کی گرمی سے

کچھ تو ہے ہم سے جو تپاک ہوا

میر ہلکان ہو گیا تھا بہت

سو طلب ہی میں پھر ہلاک ہوا

میر تقی میر

یا لوہو اشک خونی سے منھ پر بہائے گا

اکتوبر 6, 2015میر تقی میر،اساتذہ،غزللائے،کھلائے،پائے،آئے،بہائے،بنائے،جائے،رجھائےadmin

دیوان سوم غزل 1062

وہ دل نہیں رہا ہے تعب جو اٹھائے گا

یا لوہو اشک خونی سے منھ پر بہائے گا

اب یہ نظر پڑے ہے کہ برگشتہ وہ مژہ

کاوش کرے گی ٹک بھی تو سنبھلا نہ جائے گا

کھینچا جو میں وہ ساعد سیمیں تو کہہ اٹھا

بس بس کہیں ہمیں ابھی صاحب غش آئے گا

ریجھے تو اس کے طور پہ مجلس میں شیخ جی

پھر بھی ملا تو خوب سا ان کو رجھائے گا

جلوے سے اس کے جل کے ہوئے خاک سنگ و خشت

بیتاب دل بہت ہے یہ کیا تاب لائے گا

ہم رہ چکے جو ایسے ہی غم میں کھپا کیے

معلوم جی کی چال سے ہوتا ہے جائے گا

اڑ کر لگے ہے پائوں میں زلف اس کی پیچ دار

بازی نہیں یہ سانپ جو کوئی کھلائے گا

اڑتی رہے گی خاک جنوں کرتی دشت دشت

کچھ دست اگر یہ بے سر و ساماں بھی پائے گا

درپے ہے اب وہ سادہ قراول پسر بہت

دیکھیں تو میر کے تئیں کوئی بچائے گا

میر تقی میر

دور ہی دور پھرے پاس ہمارا نہ کیا

اکتوبر 6, 2015میر تقی میر،اساتذہ،غزلہمارا،مارا،چارہ،کنارہ،گوارا،اشارہ،ساراadmin

دیوان سوم غزل 1061

چال یہ کیا تھی کہ ایدھر کو گذارا نہ کیا

دور ہی دور پھرے پاس ہمارا نہ کیا

اس کو منظور نہ تھی ہم سے مروت کرنی

ایک چشمک بھی نہ کی ایک اشارہ نہ کیا

بعد دشنام تھی بوسے کی توقع بھی ولے

تلخ سننے کے تئیں ہم نے گوارا نہ کیا

مرکے بے حوصلہ لوگوں میں کہا یافرہاد

چندے پتھر ہی سے سر اور بھی مارا نہ کیا

جی رہے ڈوبتے دریاے غم عشق میں لیک

بوالہوس کی سی طرح ہم نے کنارہ نہ کیا

نیم جاں صدقے کی اس پر نہ زیاں دیکھا نہ سود

ہم تو کچھ دوستی میں وارے کا سارا نہ کیا

لے گیا مٹی بھی دروازے کی ان کے میں میر

پر اطبا نے مرے درد کا چارہ نہ کیا

میر تقی میر

کر اک سلام پوچھنا صاحب کا نام کیا

اکتوبر 6, 2015میر تقی میر،اساتذہ،غزلمقام،نام،کلام،پیام،امام،تمام،خرام،سلام،شامadmin

دیوان سوم غزل 1060

ان دلبروں سے رابطہ کرنا ہے کام کیا

کر اک سلام پوچھنا صاحب کا نام کیا

حیرت ہے کھولیں چشم تماشا کہاں کہاں

حسن و جمال ویسا ہے اس کا خرام کیا

کی اک نگاہ گرم جہاں ان سے مل گئے

عاشق کو دلبروں سے سلام و پیام کیا

شکر خدا کہ سر نہ فرو لائے ہم کہیں

کیا جانیں سجدہ کہتے ہیں کس کو سلام کیا

اس کنج لب پہ چپکے ہوئے منھ کو رکھ کے ہم

دلچسپ اس مقام میں حرف و کلام کیا

جس جاے اس کے چہرے سے کرتے ہیں گفتگو

مرآت و ماہ و گل کا ہے اس جا مقام کیا

کہتا ہے کون بدر میں نقصان کچھ رہا

پر منھ کھلے پہ اس کے ہے ماہ تمام کیا

یہ جانوں ہوں کہ دل کو ہے اس رو ومو سے لاگ

کیا جانوں پیش آوے ہے اب صبح و شام کیا

تسبیح تک تو میر نے رکھا کلال کے

وقت نماز اب بھی ہوئے تھے امام کیا

میر تقی میر

ایسے ناداں دلربا کے ملنے کا حاصل ہے کیا

اکتوبر 6, 2015میر تقی میر،اساتذہ،غزلمقبل،منزل،مائل،محمل،مشکل،گھائل،باطل،بسمل،حاصل،شاملadmin

دیوان سوم غزل 1059

دل اگر کہتا ہوں تو کہتا ہے وہ یہ دل ہے کیا

ایسے ناداں دلربا کے ملنے کا حاصل ہے کیا

جاننا باطل کسو کو یہ قصور فہم ہے

حق اگر سمجھے تو سب کچھ حق ہے یاں باطل ہے کیا

یاں کوئی دن رات وقفہ کرکے قصد آگے کا کر

کارواں گاہ جہان رفتنی منزل ہے کیا

تک رہے ہیں اس کو سو ہم تک رہے ہیں ایک سے

دیدئہ حیراں ہمارا دیدئہ بسمل ہے کیا

وہ حقیقت ایک ہی ساری نہیں ہے سب میں تو

آب سا ہر رنگ میں یہ اور کچھ شامل ہے کیا

چوٹ میرے دل میں ایسی ہے کہ ہوں میں دم بخود

وہ کشندہ یوں ہی کہتا ہے کہ تو گھائل ہے کیا

کہتے ہیں ظاہر ہے اک ہی لیلی ہفت اقلیم میں

اس عبارت کا نہیں معلوم کچھ محمل ہے کیا

ہم تو سو سو بار مر رہتے ہیں ایک ایک آن میں

عشق میں اس کے گذرنا جان سے مشکل ہے کیا

شاخ پر گل یا نہال اودھر جھکے جاتے ہیں سب

قامت دلکش کا اس کی سرو ہی مائل ہے کیا

مرثیہ میرے بھی دل کا رقت آور ہے بلا

محتشمؔ کو میر میں کیا جانوں اور مقبلؔ ہے کیا

میر تقی میر

اک جمع لڑکوں کا بھی لے لے کے سنگ آیا

اکتوبر 6, 2015میر تقی میر،اساتذہ،غزلڈھنگ،پتنگ،تنگ،جنگ،رنگ،زنگ،سنگadmin

دیوان سوم غزل 1058

کرتا جنوں جہاں میں بے نام و ننگ آیا

اک جمع لڑکوں کا بھی لے لے کے سنگ آیا

شب شمع کی بھی جھپکی مجلس میں لگ گئی تھی

سرگرم شوق مردن جس دم پتنگ آیا

فتنے فساد اٹھیں گے گھر گھر میں خون ہوں گے

گر شہر میں خراماں وہ خانہ جنگ آیا

ہر سر نہیں ہے شایاں شور قلندری کا

گو شیخ شہر باندھے زنجیر و زنگ آیا

چسپاں ہے اس بدن سے پیراہن حریری

اتنی بھی تنگ پوشی جی اب تو تنگ آیا

باتیں ہماری ساری بے ڈھنگیاں ہیں وے ہی

بوڑھے ہوئے پہ ہم کو اب تک نہ ڈھنگ آیا

بشرے کی اپنے رونق اے میر عارضی ہے

جب دل کو خوں کیا تو چہرے پہ رنگ آیا

میر تقی میر

مجنوں کے دماغ میں خلل تھا

اکتوبر 6, 2015میر تقی میر،اساتذہ،غزلمبتذل،محل،بدل،بغل،خللadmin

دیوان سوم غزل 1057

میرا ہی مقلد عمل تھا

مجنوں کے دماغ میں خلل تھا

دل ٹوٹ گیا تو خوں نہ نکلا

شیشہ یہ بہت ہی کم بغل تھا

تھیں سب کی نظر میں اس کی بھوویں

افسوس یہ شعر مبتذل تھا

کیا قدر ہے ریختے کی گو میں

اس فن میں نظیرؔی کا بدل تھا

تھا نزع میں دست میر دل پر

شاید غم کا یہی محل تھا

میر تقی میر

یا محبت کہہ کے یہ بارگراں میں لے گیا

اکتوبر 6, 2015میر تقی میر،اساتذہ،غزلفشاں،مہرباں،آسماں،بارگراں،جہاں،جاں،داستاںadmin

دیوان سوم غزل 1056

دین و دل کے غم کو آساں ناتواں میں لے گیا

یا محبت کہہ کے یہ بارگراں میں لے گیا

خاک و خوں میں لوٹ کر رہ جانے ہی کا لطف ہے

جان کو کیا جو سلامت نیم جاں میں لے گیا

سرگذشت عشق کی تہ کو نہ پہنچا یاں کوئی

گرچہ پیش دوستاں یہ داستاں میں لے گیا

عرصۂ دشت قیامت باغ ہوجائے گا سب

اس طرح سے جو یہ چشم خوں فشاں میں لے گیا

ذکر دل جانے کا وہ پرکینہ سن کہنے لگا

یہ سناتے ہو کسے کیا مہرباں میں لے گیا

یک جہاں مہر و وفا کی جنس تھی میرے کنے

لیکن اس کو پھیر ہی لایا جہاں میں لے گیا

ریختہ کاہے کو تھا اس رتبۂ اعلیٰ میں میر

جو زمیں نکلی اسے تا آسماں میں لے گیا

میر تقی میر

خاک ناچیز تھا میں سو مجھے انسان کیا

اکتوبر 6, 2015میر تقی میر،اساتذہ،غزلویران،پریشان،انسان،دیوان،طوفانadmin

دیوان سوم غزل 1055

میرے مالک نے مرے حق میں یہ احسان کیا

خاک ناچیز تھا میں سو مجھے انسان کیا

اس سرے دل کی خرابی ہوئی اے عشق دریغ

تو نے کس خانۂ مطبوع کو ویران کیا

ضبط تھا جب تئیں چاہت نہ ہوئی تھی ظاہر

اشک نے بہ کے مرے چہرے پہ طوفان کیا

انتہا شوق کی دل کے جو صبا سے پوچھی

اک کف خاک کو لے ان نے پریشان کیا

مجھ کو شاعر نہ کہو میر کہ صاحب میں نے

درد و غم کتنے کیے جمع تو دیوان کیا

میر تقی میر

پردے میں چشم ڈھکنے دیوار و در بنے ہے

اکتوبر 6, 2015میر تقی میر،اساتذہ،غزلنظر،کدھر،گہر،پہر،پر،اگر،تر،خر،در،زر،سرadmin

دیوان دوم غزل 1054

عبرت سے دیکھ جس جا یاں کوئی گھر بنے ہے

پردے میں چشم ڈھکنے دیوار و در بنے ہے

ہیں دل گداز جن کے کچھ چیز مال وے ہیں

ہوتے ہیں ملتفت تو پھر خاک زر بنے ہے

شب جوش غم سے جس دم لگتا ہے دل تڑپنے

ہر زخم سینہ اس دم یک چشم تر بنے ہے

یاں ہر گھڑی ہماری صورت بگڑتی ہے گی

چہرہ ہی واں انھوں کا دو دو پہر بنے ہے

ٹک رک کے صاف طینت نکلے ہے اور کچھ ہو

پانی گرہ جو ہووے تو پھر گہر بنے ہے

ہے شعبدے کے فن میں کیا دست مے کشوں کو

زاہد انھوں میں جاکر آدم سے خر بنے ہے

نکلے ہے صبح بھی یاں صندل ملے جبیں کو

عالم میں کام کس کا بے درد سر بنے ہے

سارے دکھوں کی اے دل ہوجائے گی تلافی

صحبت ہماری اس کی ٹک بھی اگر بنے ہے

ہر اک سے ڈھب جدا ہے سارے زمانے کا بھی

بنتی ہے جس کسو کی یک طور پر بنے ہے

برسوں لگی رہے ہیں جب مہر و مہ کی آنکھیں

تب کوئی ہم سا صاحب صاحب نظر بنے ہے

یاران دیر و کعبہ دونوں بلا رہے ہیں

اب دیکھیں میر اپنا جانا کدھر بنے ہے

میر تقی میر

جیسے لوں چلتی مرے منھ سے ہوا نکلے ہے

اکتوبر 6, 2015میر تقی میر،اساتذہ،غزلہوا،لگا،چلا،نیا،چھپا،کیا،گتھا،پا،ا،ادا،جا،جدا،دوا،دعا،صباadmin

دیوان دوم غزل 1053

جل گیا دل مگر ایسے جوں بلا نکلے ہے

جیسے لوں چلتی مرے منھ سے ہوا نکلے ہے

لخت دل قطرئہ خوں ٹکڑے جگر ہو ہوکر

کیا کہوں میں کہ مری آنکھوں سے کیا نکلے ہے

میں جو ہر سو لگوں ہوں دیکھنے ہو کر مضطر

آنسو ہر میری نگہ ساتھ گتھا نکلے ہے

پارسائی دھری رہ جائے گی مسجد میں شیخ

جو وہ اس راہ کبھو مستی میں آ نکلے ہے

گوکہ پردہ کرے جوں ماہ شب ابر وہ شوخ

کب چھپا رہتا ہے ہرچند چھپا نکلے ہے

بھیڑیں ٹل جاتی ہیں آگے سے اس ابرو کے ہلے

سینکڑوں میں سے وہ تلوار چلا نکلے ہے

بنتی ہے سامنے اس کے کیے سجدہ ہی ولے

جی سمجھتا ہے جو اس بت میں ادا نکلے ہے

بد کہیں نالہ کشاں ہم ہیں کہ ہم سے ہر روز

شور و ہنگامے کا اک طور نیا نکلے ہے

اجر سے خالی نہیں عشق میں مارے جانا

دے ہے جو سر کوئی کچھ یاں سے بھی پا نکلے ہے

لگ چلی ہے مگر اس گیسوے عنبربو سے

ناز کرتی ہوئی اس راہ صبا نکلے ہے

کیا ہے اقبال کہ اس دشمن جاں کے آتے

منھ سے ہر ایک کے سو بار دعا نکلے ہے

سوز سینے کا بھی دلچسپ بلا ہے اپنا

داغ جو نکلے ہے چھاتی سے لگا نکلے ہے

سارے دیکھے ہوئے ہیں دلی کے عطار و طبیب

دل کی بیماری کی کس پاس دوا نکلے ہے

کیا فریبندہ ہے رفتار ہے کینے کی جدا

اور گفتار سے کچھ پیار جدا نکلے ہے

ویسا بے جا نہیں دل میر کا جو رہ نہ سکے

چلتا پھرتا کبھو اس پاس بھی جا نکلے ہے

میر تقی میر

کاہش اک روز مجھ کو شام سے ہے

اکتوبر 6, 2015میر تقی میر،اساتذہ،غزلمقام،نام،کام،امام،انتقام،احتلام،سلام،شام،عوام،غلامadmin

دیوان دوم غزل 1052

کار دل اس مہ تمام سے ہے

کاہش اک روز مجھ کو شام سے ہے

تم نہیں فتنہ ساز سچ صاحب

شہر پرشور اس غلام سے ہے

بوسہ لے کر سرک گیا کل میں

کچھ کہو کام اپنے کام سے ہے

کوئی تجھ سا بھی کاش تجھ کو ملے

مدعا ہم کو انتقام سے ہے

کب وہ مغرور ہم سے مل بیٹھا

ننگ جس کو ہمارے نام سے ہے

خوش سرانجام وے ہی ہیں جن کو

اقتدا اولیں امام سے ہے

شعر میرے ہیں سب خواص پسند

پر مجھے گفتگو عوام سے ہے

شیطنت سے نہیں ہے خالی شیخ

اس کی پیدائش احتلام سے ہے

سر جھکائوں تو اور ٹیڑھے ہو

کیا تمھیں چڑ مرے سلام سے ہے

سہل ہے میر کا سمجھنا کیا

ہر سخن اس کا اک مقام سے ہے

میر تقی میر

کیا کہوں میں آہ مجھ کو کام کس پتھر سے ہے

اکتوبر 6, 2015میر تقی میر،اساتذہ،غزلور،گوہر،گھر،پیغمبر،پتھر،پر،ایدھر،تر،خنجر،داورمحشر،در،زورآور،زرadmin

دیوان دوم غزل 1051

ربط دل کو اس بت بے مہر کینہ ور سے ہے

کیا کہوں میں آہ مجھ کو کام کس پتھر سے ہے

کس کو کہتے ہیں نہیں میں جانتا اسلام و کفر

دیر ہو یا کعبہ مطلب مجھ کو تیرے در سے ہے

کیوں نہ اے سید پسر دل کھینچے یہ موے دراز

اصل زلفوں کی تری گیسوے پیغمبرؐ سے ہے

کاغذ ابری پہ درد دل اسے لکھ بھیجیے

وہ بھی تو جانے کہ یاں آشوب چشم تر سے ہے

کیا کہیں دل کچھ کھنچے جاتے ہیں اودھر ہر گھڑی

کام ہم بے طاقتوں کو عشق زورآور سے ہے

رحم بھی دینا تھا تھوڑا ہائے اس خوبی کے ساتھ

تجھ سے کیا کل گفتگو یہ داورمحشر سے ہے

کیا کروں گا اب کے میں بے پر ہوس گلزار کی

لطف گل گشت اے نسیم صبح بال و پر سے ہے

مرنے کے اسباب پڑتے ہیں بہت عالم میں لیک

رشک اس پر ہے کہ جس کی موت اس خنجر سے ہے

ناز و خشم و بے دماغی اس طرف سے سب ہیں یہ

کچھ کسو بھی طور کی رنجش بھلا ایدھر سے ہے

دیکھ گل کو ٹک کہ ہر یک سر چڑھا لیتا ہے یاں

اس سے پیدا ہے کہ عزت اس چمن میں زر سے ہے

کانپتا ہوں میں تو تیرے ابروئوں کے خم ہوئے

قشعریرہ کیا مجھے تلوار کے کچھ ڈر سے ہے

اشک پے درپے چلے آتے تھے چشم زار سے

ہر نگہ کا تار مانا رشتۂ گوہر سے ہے

بادیے ہی میں پڑا پاتے ہیں جب تب تجھ کو میر

کیا خفا اے خانماں آباد کچھ تو گھر سے ہے

میر تقی میر

گاہے بکا کرے ہے گاہے دعا کرے ہے

اکتوبر 6, 2015میر تقی میر،اساتذہ،غزلہوا،لگا،ملا،چلا،چھپا،وفا،کہا،کڑھا،اٹھا،ادا،جلا،خدا،دوا،دعا،رہاadmin

دیوان دوم غزل 1050

کیا پوچھتے ہو عاشق راتوں کو کیا کرے ہے

گاہے بکا کرے ہے گاہے دعا کرے ہے

دانستہ اپنے جی پر کیوں تو جفا کرے ہے

اتنا بھی میرے پیارے کوئی کڑھا کرے ہے

فتنہ سپہر کیا کیا برپا کیا کرے ہے

سو خواب میں کبھو تو مجھ سے ملا کرے ہے

کس ایسے سادہ رو کا حیران حسن ہے یہ

مرآت گاہ بیگہ بھیچک رہا کرے ہے

ہم طور عشق سے تو واقف نہیں ہیں لیکن

سینے میں جیسے کوئی دل کو ملا کرے ہے

کیا کہیے داغ دل ہے ٹکڑے جگر ہے سارا

جانے وہی جو کوئی ظالم وفا کرے ہے

اس بت کی کیا شکایت راہ و روش کی کریے

پردے میں بدسلوکی ہم سے خدا کرے ہے

گرم آکر ایک دن وہ سینے سے لگ گیا تھا

تب سے ہماری چھاتی ہر شب جلا کرے ہے

کیا چال یہ نکالی ہوکر جوان تم نے

اب جب چلو ہو دل کو ٹھوکر لگا کرے ہے

دشمن ہو یار جیسا درپے ہے خوں کے میرے

ہے دوستی جہاں واں یوں ہی ہوا کرے ہے

سمجھا ہے یہ کہ مجھ کو خواہش ہے زندگی کی

کس ناز سے معالج میری دوا کرے ہے

حالت میں غش کی کس کو خط لکھنے کی ہے فرصت

اب جب نہ تب ادھر کو جی ہی چلا کرے ہے

سرکا ہے جب وہ برقع تب آپ سے گئے ہیں

منھ کھولنے سے اس کے اب جی چھپا کرے ہے

بیٹھے ہے یار آکر جس جا پہ ایک ساعت

ہنگامۂ قیامت واں سے اٹھا کرے ہے

سوراخ سینہ میرے رکھ ہاتھ بند مت کر

ان روزنوں سے دل ٹک کسب ہوا کرے ہے

کیا جانے کیا تمنا رکھتے ہیں یار سے ہم

اندوہ ایک جی کو اکثر رہا کرے ہے

گل ہی کی اور ہم بھی آنکھیں لگا رکھیں گے

ایک آدھ دن جو موسم اب کے وفا کرے ہے

گہ سرگذشت ان نے فرہاد کی نکالی

مجنوں کا گاہے قصہ بیٹھا کہا کرے ہے

ایک آفت زماں ہے یہ میر عشق پیشہ

پردے میں سارے مطلب اپنے ادا کرے ہے

میر تقی میر

کبھو قدرداں عشق پیدا کرے ہے

اکتوبر 6, 2015میر تقی میر،اساتذہ،غزلکیا،پیدا،پروا،پردہ،انشا،ایسا،برپا،دریا،سوداadmin

دیوان دوم غزل 1049

کہاں یاد قیس اب جو دنیا کرے ہے

کبھو قدرداں عشق پیدا کرے ہے

یہ طفلان بازار جی کے ہیں گاہک

وہی جانتا ہے جو سودا کرے ہے

چھپائیں ہوں آنکھیں ہی ان نے تو کہیے

وہ ہر بات کا ہم سے پردہ کرے ہے

جو رونا ہے راتوں کو اپنا یہی تو

کنارہ کوئی دن میں دریا کرے ہے

ٹھسک اس کے چلنے کی دیکھو تو جانو

قیامت ہی ہر گام برپا کرے ہے

مریں شوق پروازگلشن میں کیوں نہ

اسیروں کی یاں کون پروا کرے ہے

بنی صورتیں کیسی کیسی بگاڑیں

سمجھتے نہیں ہم فلک کیا کرے ہے

خط افشاں کیا خون دل سے تو بولا

بہت اب تو رنگین انشا کرے ہے

ہلاک آپ کو میر مت کر دوانے

کوئی ذی شعور آہ ایسا کرے ہے

میر تقی میر

شرم انکھڑیوں میں جس کی عیاری ہو گئی ہے

اکتوبر 6, 2015میر تقی میر،اساتذہ،غزلہمواری،ناچاری،ناداری،کاری،بیماری،بیزاری،باری،ساری،عیاری،عاریadmin

دیوان دوم غزل 1048

اس شوخ سے ہمیں بھی اب یاری ہو گئی ہے

شرم انکھڑیوں میں جس کی عیاری ہو گئی ہے

روتا پھرا ہوں برسوں لوہو چمن چمن میں

کوچے میں اس کے یکسر گل کاری ہو گئی ہے

یک جا اٹک کے رہنا ہے ناتمامی ورنہ

سب میں وہی حقیقت یاں ساری ہو گئی ہے

جب خاک کے برابر ہم کو کیا فلک نے

طبع خشن میں تب کچھ ہمواری ہو گئی ہے

مطلق اثر نہ دیکھا مدت کی آہ و زاری

اب نالہ و فغاں سے بیزاری ہو گئی ہے

اس سے دوچار ہونا آتا نہیں میسر

مرنے میں اس سے ہم کو ناچاری ہو گئی ہے

ہر بار ذکر محشر کیا یار کے در اوپر

ایسی تو یاں قیامت سو باری ہو گئی ہے

انداز شوخی اس کے آتے نہیں سمجھ میں

کچھ اپنی بھی طبیعت یاں عاری ہو گئی ہے

شاہی سے کم نہیں ہے درویشی اپنے ہاں تو

اب عیب کچھ جہاں میں ناداری ہو گئی ہے

ہم کو تو درد دل ہے تم زرد کیوں ہو ایسے

کیا میر جی تمھیں کچھ بیماری ہو گئی ہے

میر تقی میر

ہم نے کیا چوٹ دل پہ کھائی ہے

اکتوبر 6, 2015میر تقی میر،اساتذہ،غزللائی،ڈھائی،کھائی،پائی،آئی،آزمائی،آشنائی،بنائی،بڑھائی،جدائی،خودنمائیadmin

دیوان دوم غزل 1047

کوفت سے جان لب پہ آئی ہے

ہم نے کیا چوٹ دل پہ کھائی ہے

لکھتے رقعہ لکھے گئے دفتر

شوق نے بات کیا بڑھائی ہے

آرزو اس بلند و بالا کی

کیا بلا میرے سر پہ لائی ہے

دیدنی ہے شکستگی دل کی

کیا عمارت غموں نے ڈھائی ہے

ہے تصنع کہ لعل ہیں وے لب

یعنی اک بات سی بنائی ہے

دل سے نزدیک اور اتنا دور

کس سے اس کو کچھ آشنائی ہے

بے ستوں کیا ہے کوہکن کیسا

عشق کی زور آزمائی ہے

جس مرض میں کہ جان جاتی ہے

دلبروں ہی کی وہ جدائی ہے

یاں ہوئے خاک سے برابر ہم

واں وہی ناز و خودنمائی ہے

ایسا موتیٰ ہے زندئہ جاوید

رفتۂ یار تھا جب آئی ہے

مرگ مجنوں سے عقل گم ہے میر

کیا دوانے نے موت پائی ہے

میر تقی میر

سدھ اپنی نہیں ہم کو کچھ تم کو خبر بھی ہے

اکتوبر 6, 2015میر تقی میر،اساتذہ،غزلہنر،کسر،اثر،خبر،سفرadmin

دیوان دوم غزل 1046

آنکھیں نہیں یاں کھلتیں ایدھر کو نظر بھی ہے

سدھ اپنی نہیں ہم کو کچھ تم کو خبر بھی ہے

گو شکل ہوائی کی سر چرخ تئیں کھینچا

اے آہ شرر افشاں کچھ تجھ میں اثر بھی ہے

اس منزل دلکش کو منزل نہ سمجھیے گا

خاطر میں رہے یاں سے درپیش سفر بھی ہے

مجھ حال شکستہ کی تاچند یہ بے وقری

کچھ کسر میں اب میری اے شوخ کسر بھی ہے

یہ کیا ہے کہ منھ نوچے نے چاک کرے سینہ

کر عرض جو کچھ تجھ میں اے میر ہنر بھی ہے

میر تقی میر

ہر شاخ گل چمن میں بھیچک ہوئی کھڑی ہے

اکتوبر 6, 2015میر تقی میر،اساتذہ،غزللڑی،کھڑی،گھڑی،پڑی،بڑی،جڑی،جھڑیadmin

دیوان دوم غزل 1045

کس فتنہ قد کی ایسی دھوم آنے کی پڑی ہے

ہر شاخ گل چمن میں بھیچک ہوئی کھڑی ہے

واشد ہوئی نہ بلبل اپنی بہار میں بھی

کیا جانیے کہ جی میں یہ کیسی گل جھڑی ہے

نادیدنی دکھاوے کیونکر نہ عشق ہم کو

کس فتنۂ زماں سے آنکھ اپنی جا لڑی ہے

وے دن گئے کہ پہروں کرتے نہ ذکر اس کا

اب نام یار اپنے لب پر گھڑی گھڑی ہے

آتش سی پھک رہی ہے سارے بدن میں میرے

دل میں عجب طرح کی چنگاری آ پڑی ہے

کیا کچھ ہمیں کو اس کی تلوار کھا گئی ہے

ایسی ہی اک جڑی ہے اس نے جہاں جڑی ہے

کیا میر سر جھکاویں ہر کم بغل کے آگے

نام خدا انھوں کی عزت بہت بڑی ہے

میر تقی میر

وہ طبع تو نازک ہے کہانی یہ بڑی ہے

اکتوبر 6, 2015میر تقی میر،اساتذہ،غزللڑی،چھڑی،کڑی،کھڑی،گڑی،گھڑی،پڑی،اڑی،بڑی،جھڑیadmin

دیوان دوم غزل 1044

کیا حال بیاں کریے عجب طرح پڑی ہے

وہ طبع تو نازک ہے کہانی یہ بڑی ہے

کیا فکر کروں میں کہ ٹلے آگے سے گردوں

یہ گاڑی مری راہ میں بے ڈول اڑی ہے

ہے چشمک انجم طرف اس مہ کے اشارہ

دیکھو تو مری آنکھ کہاں جاکے لڑی ہے

کیا اپنی شررریزی کہیں پلکوں کی صف کی

ہم جانتے ہیں ہم پہ جو یہ باڑھ جھڑی ہے

وے دن گئے جو پہروں لگی رہتی تھیں آنکھیں

اب یاں ہمیں مہلت کوئی پل کوئی گھڑی ہے

ایسا نہ ہوا ہو گا کوئی واقعہ آگے

اک خواہش دل ساتھ مرے جیتی گڑی ہے

کیا نقش میں مجنوں ہی کے تھی رفتگی عشق

لیلیٰ کی بھی تصویر تو حیران کھڑی ہے

جاتے ہیں چلے متصل آنسو جو ہمارے

ہر تار نگہ آنکھوں میں موتی کی لڑی ہے

کھنچتا ہی نہیں ہم سے قدخم شدہ ہرگز

یہ سست کماں ہاتھ پر اب کتنی کڑی ہے

گل کھائے ہیں افراط سے میں عشق میں اس کے

اب ہاتھ مرا دیکھو تو پھولوں کی چھڑی ہے

وہ زلف نہیں منعکس دیدئہ تر میر

اس بحر میں تہ داری سے زنجیر پڑی ہے

میر تقی میر

سپاس ایزد کے کرجن نے کہ یہ ڈالی نوادی ہے

اکتوبر 6, 2015میر تقی میر،اساتذہ،غزلہادی،منادی،نوادی،بادی،دی،شادیadmin

دیوان دوم غزل 1043

نہ گلشن میں چمن پر ان نے بلبل تجھ کو جا دی ہے

سپاس ایزد کے کرجن نے کہ یہ ڈالی نوادی ہے

نہیں ٹک بیٹھنے دیتے تم اپنی بزم میں ہم کو

مروت رسم تھی مدت کی سو تم نے اٹھا دی ہے

رہائی چنگل باز فلک سے مجھ کو مشکل تھی

مری یہ بند چڑیا کی سی مولا نے چھڑا دی ہے

گلی میں اپنی قدغن کر رکھو آنے نہ پائوں میں

کہیں کیا اور بھی دل کے لگانے کی منادی ہے

طپش سے رنگ اڑا جاوے قلق سے جان گھبراوے

دیا ہے دل الٰہی ہم کو یا کوئی بلا دی ہے

درگلزار پیش از صبح وا اے باغباں مت کر

اڑا لیتی ہے مٹی بھی صبا اک چور بادی ہے

کوئی صورت نہیں اس گھر سے اب تیرے نکلنے کی

قیامت کی ہے جن نے آرسی تجھ کو دکھا دی ہے

مجھے منظور کیا ہے زلف و خال و خط خوباں سے

خدا نے دیکھنے کی لت سی آنکھوں کو لگا دی ہے

کجی ذہن اس وادی میں گمراہی کی ہے باعث

سلیم الطبع کو تو پائوں کا ہر نقش ہادی ہے

لگا رہتا ہے سینے ہی سے بیٹھا ہوں کہ سوتا ہوں

غرض چھاتی مری داغ جدائی نے جلا دی ہے

نہ چھوٹا دل میں کچھ اس کے گئے پر غارت غم سے

ہزار افسوس کیا بستی محبت نے لٹا دی ہے

نہ کٹتی ٹک نہ ہوتی گر فقیری ساتھ الفت کے

ہمیں جب ان نے گالی دی ہے تب ہم نے دعا دی ہے

ہوئی ہے دل کی محویت سے یکساں یاں غم و فرحت

نہ ماتم مرنے کا ہے میر نے جینے کی شادی ہے

میر تقی میر

کہ شکل صبح مری سب کو بھول جاتی ہے

اکتوبر 6, 2015میر تقی میر،اساتذہ،غزللگاتی،جلاتی،جاتی،رلاتیadmin

دیوان دوم غزل 1042

یہ رات ہجر کی یاں تک تو دکھ دکھاتی ہے

کہ شکل صبح مری سب کو بھول جاتی ہے

طپش کے دم ہی تئیں مجھ سے ہے یہ خوں گرمی

وگرنہ تیغ تری کب گلے لگاتی ہے

ہنسے ہے چاک قفس کھلکھلا کے مجھ اوپر

چمن کی یاد میں جب بے کلی رلاتی ہے

ہوا ہے میر سے روشن کہ کل جبھی ہے شمع

زباں ہلانے میں پروانے کو جلاتی ہے

میر تقی میر

کیا بدن کا رنگ ہے تہ جس کی پیراہن پہ ہے

اکتوبر 6, 2015میر تقی میر،اساتذہ،غزلچتون،گلخن،گردن،پلٹن،پیراہن،افگن،آہن،دامن،زن،شیونadmin

دیوان دوم غزل 1041

کیا تن نازک ہے جاں کو بھی حسد جس تن پہ ہے

کیا بدن کا رنگ ہے تہ جس کی پیراہن پہ ہے

گرد جب اٹھتی ہے اک حسرت سے رہ جاتے ہیں دیکھ

وحشیان دشت کی آنکھ اس شکار افگن پہ ہے

کثرت پیکاں سے تیرے ہو گئی ہیئت ہی اور

اب شرف دل کو ہمارے پارئہ آہن پہ ہے

کون یوں اے ترک رعنا زینت فتراک تھا

خوں سے گل کاری عجب اک زین کے دامن پہ ہے

سر اٹھانے کی نہیں ہے ہم کو فرصت عشق میں

ہر دم اک تیغ جفاے تازہ یاں گردن پہ ہے

نوحہ گر کر مجھ کو دکھلایا غم دل نے ندان

شیون اب موقوف یاروں کا مرے شیون پہ ہے

ہوچکا رہنا مرا بستی میں آخر کب تلک

نالۂ شب سے قیامت روز مرد و زن پہ ہے

خرمن گل سے لگیں ہیں دور سے کوڑوں کے ڈھیر

لوہو رونے سے ہمارے رنگ اک گلخن پہ ہے

وے پھری پلکیں الٹ دیتی ہیں صف اک آن میں

اب لڑائی ہند میں سب اس سیہ پلٹن پہ ہے

تو تو کہتا ہے کہ میں نے اس طرف دیکھا نہیں

خون ناحق میر کا یہ کس کی پھر چتون پہ ہے

میر تقی میر

ہشیاری کے برابر کوئی نشہ نہیں ہے

اکتوبر 6, 2015میر تقی میر،اساتذہ،غزلہوا،لگا،مدعا،نما،نشہ،انتہا،آشنا،جدا،دوا،رہاadmin

دیوان دوم غزل 1040

ہم مست ہو بھی دیکھا آخر مزہ نہیں ہے

ہشیاری کے برابر کوئی نشہ نہیں ہے

شوق وصال ہی میں جی کھپ گیا ہمارا

باآنکہ ایک دم وہ ہم سے جدا نہیں ہے

ہر صبح اٹھ کے تجھ سے مانگوں ہوں میں تجھی کو

تیرے سوائے میرا کچھ مدعا نہیں ہے

زیر فلک رکا ہے اب جی بہت ہمارا

اس بے فضا قفس میں مطلق ہوا نہیں ہے

آنکھیں ہماری دیکھیں لوگوں نے اشک افشاں

اب چاہ کا کسو کی پردہ رہا نہیں ہے

منھ جن نے میرا دیکھا ایک آہ دل سے کھینچی

اس درد عاشقی کی آیا دوا نہیں ہے

تھیں پیش از آشنائی کیا آشنا نگاہیں

اب آشنا ہوئے پر آنکھ آشنا نہیں ہے

کریے جو ابتدا تو تا حشر حال کہیے

عاشق کی گفتگو کو کچھ انتہا نہیں ہے

پردہ ہی ہم نے دیکھا چہرے پہ گاہ و بے گہ

اتنا بھی منھ چھپانا کچھ خوش نما نہیں ہے

میں روئوں تم ہنسو ہو کیا جانو میر صاحب

دل آپ کا کسو سے شاید لگا نہیں ہے

میر تقی میر

اس میں بھی جو سوچیے سخن ہے

اکتوبر 6, 2015میر تقی میر،اساتذہ،غزلچلن،چمن،وطن،کفن،پن،پیرہن،تن،سخن،شکنadmin

دیوان دوم غزل 1039

کیا کہیے کلی سا وہ دہن ہے

اس میں بھی جو سوچیے سخن ہے

اس گل کو لگے ہے شاخ گل کب

یہ شاخچہ بندی چمن ہے

وابستگی مجھ سے شیشہ جاں کی

اس سنگ سے ہے کہ دل شکن ہے

کیا سہل گذرتی ہے جنوں سے

تحفہ ہم لوگوں کا چلن ہے

لطف اس کے بدن کا کچھ نہ پوچھو

کیا جانیے جان ہے کہ تن ہے

وے بند قبا کھلے تھے شاید

صد چاک گلوں کا پیرہن ہے

گہ دیر میں ہیں گہے حرم میں

اپنا تو یہی دوانہ پن ہے

ہم کشتۂ عشق ہیں ہمارا

میدان کی خاک ہی کفن ہے

کر میر کے حال پر ترحم

وہ شہر غریب و بے وطن ہے

میر تقی میر

بے خود ہیں اس کی آنکھیں ان کو خبر کہاں ہے

اکتوبر 6, 2015میر تقی میر،اساتذہ،غزلقمر،گھر،گر،پہر،پر،ادھر،تر،خبر،زر،سفرadmin

دیوان دوم غزل 1038

مستی میں جا و بے جا مدنظر کہاں ہے

بے خود ہیں اس کی آنکھیں ان کو خبر کہاں ہے

شب چند روز سے میں دیکھا نہیں وہ چہرہ

کچھ سوچ کر منجم بارے قمر کہاں ہے

سیمیں تنوں کا ملنا چاہے ہے کچھ تمول

شاہدپرستیوں کا ہم پاس زر کہاں ہے

جوں آرسی کرے ہے منھ دیکھنے کی باتیں

دل کی توجہ اس کی ہمدم ادھر کہاں ہے

پانی ہو بہ گئے سب اجزا بدن کے لیکن

یوں بھی کہا نہ ان نے وہ چشم تر کہاں ہے

خضر و مسیح سب کو جیتے ہی موت آئی

اور اس مرض کا کوئی اب چارہ گر کہاں ہے

لے اس سرے سے یارو اجڑی ہے اس سرے تک

اقلیم عاشقی میں آباد گھر کہاں ہے

اٹھنے کی اک ہوس ہے ہم کو قفس سے ورنہ

شائستۂ پریدن بازو میں پر کہاں ہے

پیرانہ سر چلے ہیں اٹھ کر گلی سے اس کی

کیا پیش آوے دیکھیں وقت سفر کہاں ہے

جاتا نہیں اگر وہ مسجد سے میکدے کو

پھر میر جمعہ کی شب دو دو پہر کہاں ہے

میر تقی میر

چاک دل پلکوں سے مت سی کہ رفو نازک ہے

اکتوبر 6, 2015میر تقی میر،اساتذہ،غزلگلو،اتو،تو،خو،رفو،رو،سبوadmin

دیوان دوم غزل 1037

رشتہ کیا ٹھہرے گا یہ جیسے کہ مو نازک ہے

چاک دل پلکوں سے مت سی کہ رفو نازک ہے

شاخ گل کاہے کو اس لطف سے لچکے ہے کہیں

لاگ والا کوئی دیکھے تجھے تو نازک ہے

چشم انصاف سے برقع کو اٹھا دیکھو اسے

گل کے منھ سے تو کئی پردہ وہ رو نازک ہے

لطف کیا دیوے تمھیں نقش حصیر درویش

بوریا پوشوں سے پوچھو یہ اتو نازک ہے

بیڑے کھاتا ہے تو آتا ہے نظر پان کا رنگ

کس قدر ہائے رے وہ جلد گلو نازک ہے

گل سمجھ کر نہ کہیں بے کلی کرنے لگیو

بلبل اس لالۂ خوش رنگ کی خو نازک ہے

رکھے تاچند خیال اس سرپرشور کا میر

دل تو کانپا ہی کرے ہے کہ سبو نازک ہے

میر تقی میر

یاں تلف ہوتا ہے عالم واں سو عالم اور ہے

اکتوبر 6, 2015میر تقی میر،اساتذہ،غزلماتم،نم،دم،عالم،غمadmin

دیوان دوم غزل 1036

زلف ہی درہم نہیں ابرو بھی پرخم اور ہے

یاں تلف ہوتا ہے عالم واں سو عالم اور ہے

پیٹ لینا سر لیے دل کے شروع عشق تھا

سینہ کوبی متصل ہے اب یہ ماتم اور ہے

جوں کف دریا کو دریا سے ہے نسبت دور کی

ابر بھی ووں اور کچھ ہے دیدئہ نم اور ہے

رہتے رہتے منتظر آنکھوں میں جی آیا ندان

دم غنیمت جان اب مہلت کوئی دم اور ہے

جی تو جانے کا ہمیں اندوہ ہی ہے لیک میر

حشر کو اٹھنا پڑے گا پھر یہ اک غم اور ہے

میر تقی میر

جوانی دوانی ہے مشہور ہے

اکتوبر 6, 2015میر تقی میر،اساتذہ،غزلمقدور،منظور،مستور،مشہور،معمور،مغرور،چور،ناسور،دور،دستورadmin

دیوان دوم غزل 1035

جنوں کا عبث میرے مذکور ہے

جوانی دوانی ہے مشہور ہے

کہو چشم خوں بار کو چشم تم

خدا جانے کب کا یہ ناسور ہے

فلک پر جو مہ ہے تو روشن ہے یہ

کہ منھ سے ترے نسبت دور ہے

گدا شاہ دونوں ہیں دل باختہ

عجب عشق بازی کا دستور ہے

قیامت ہے ہو گا جو رفع حجاب

نہ بے مصلحت یار مستور ہے

ہم اب ناتوانوں کو مرنا ہے صرف

نہیں وہ کہ جینا بھی منظور ہے

ستم میں ہماری قسم ہے تمھیں

کرو صرف جتنا کہ مقدور ہے

نیاز اپنا جس مرتبے میں ہے یاں

اسی مرتبے میں وہ مغرور ہے

ہوا حال بندے کا گو کچھ خراب

خدائی ابھی اس کی معمور ہے

گیا شاید اس شمع رو کا خیال

کہ اب میر کے منھ پہ کچھ نور ہے

میر تقی میر

پر جانیں جو گئی ہیں سو رہ پر غبار ہے

اکتوبر 6, 2015میر تقی میر،اساتذہ،غزلقرار،مزار،ناپائدار،یار،انتظار،اعتبار،تقصیروار،خار،شکار،غبارadmin

دیوان دوم غزل 1034

جانے میں قتل گہ سے ترا اختیار ہے

پر جانیں جو گئی ہیں سو رہ پر غبار ہے

ہم آپ سے گئے سو الٰہی کہاں گئے

مدت ہوئی کہ اپنا ہمیں انتظار ہے

بس وعدئہ وصال سے کم دے مجھے فریب

آگے ہی مجھ کو تیرا بہت اعتبار ہے

سرتابی اس سے طائر قدسی نہ کر سکے

اس ترک صید بند کا وہ تو شکار ہے

مائل نہیں ہے سرو ہی تنہا تری طرف

گل کو بھی تیرے دیکھنے کا خار خار ہے

پیوند میں زمیں کا ہوا اس گلی میں لیک

یوں بھی کہا نہ ان نے یہ کس کا مزار ہے

کل سرو ناز باغ میں آیا نظر مجھے

میں نے فریب شوق سے جانا کہ یار ہے

اب دیکھ کر قرار کیا کر وصال کا

دل کو بغیر تیرے تنک بھی قرار ہے

مت فکر خانہ سازی میں منعم ہلاک ہو

بنیاد زندگانی کی ناپائدار ہے

کب تک ستم کبھو تو دلاسا بھی دیجیے

بالفرض میر ایسا ہی تقصیروار ہے

میر تقی میر

آنکھیں اگر یہی ہیں تو دریا بھی گرد ہے

اکتوبر 6, 2015میر تقی میر،اساتذہ،غزلفرد،لاجورد،مرد،نورد،گرد،درد،زردadmin

دیوان دوم غزل 1033

گرمی سے میری ابر کا ہنگامہ سرد ہے

آنکھیں اگر یہی ہیں تو دریا بھی گرد ہے

مجنوں کو مجھ سے کیا ہے جنوں میں مناسبت

میں شہر بند ہوں وہ بیاباں نورد ہے

کیا جانیے کہ عشق میں خوں ہو گیا کہ داغ

چھاتی میں اب تو دل کی جگہ ایک درد ہے

واصل بحق ہوئے نہ جو ہم جان سے گئے

غیرت ہو کچھ مزاج میں جس کے وہ مرد ہے

ممکن نہیں کہ وصف علیؓ کوئی کر سکے

تفرید کے جریدے میں وہ پہلی فرد ہے

ٹھہرے نہ چرخ نیلی پہ انجم کی چشم شوخ

اس قصر میں لگا جو ہے کیا لاجورد ہے

کس سے جدا ہوئے ہیں کہ ایسے ہیں دردمند

منھ میر جی کا آج نہایت ہی زرد ہے

میر تقی میر

رنج و حرماں کی یہ بدایت ہے

اکتوبر 6, 2015میر تقی میر،اساتذہ،غزلولایت،کفایت،کنایت،بدایت،حکایت،رعایت،سرایت،شکایت،عنایتadmin

دیوان دوم غزل 1032

دل مرا مضطرب نہایت ہے

رنج و حرماں کی یہ بدایت ہے

منھ ادھر کر کبھو نہ وہ سویا

کیا دعا شب کی بے سرایت ہے

اب وہ مہ اور ایک مہ سے ملا

چند در چند یہ حکایت ہے

ہر طرف بحث تجھ سے ہے اے عشق

شکر تیرا تری شکایت ہے

ایسے رنج و عنا میں اودھر سے

پرسش حال بھی عنایت ہے

دہر کا ہو گلہ کہ شکوئہ چرخ

اس ستمگر ہی سے کنایت ہے

مت مراعات غیر رکھ منظور

میرے حق میں یہی رعایت ہے

عاشق اب بڑھ گئے ہمیں چھانٹو

اس میں سرکار کی کفایت ہے

کب ملے میر ملک داروں سے

وہ گداے شہ ولایت ہے

میر تقی میر

دل ہاتھ جو نہ آوے اس کا خیال کیا ہے

اکتوبر 6, 2015میر تقی میر،اساتذہ،غزلمال،مآل،چال،کمال،ٹال،جمال،حال،خیال،سوال،سالadmin

دیوان دوم غزل 1031

باریک وہ کمر ہے ایسی کہ بال کیا ہے

دل ہاتھ جو نہ آوے اس کا خیال کیا ہے

جو بے کلی ہے ایسی چاہت گلوں کی اتنی

کیا جانے ہم صفیرو تو اب کے سال کیا ہے

پہنچا بہم علاقہ اے عزلتی کسو سے

کرنا معاش اکیلے اتنا کمال کیا ہے

آغاز تو یہ ہے کچھ روتے ہیں خون ہر دم

کیا جانے عاشقی کا یارو مآل کیا ہے

پامال راہ اس کے کیا کیا عزیز دیکھے

آئی نہ جب سمجھ میں گردوں کی چال کیا ہے

وہ سیم تن ہو ننگا تو لطف تن پر اس کے

سوجی گئے تھے صدقے اک جان و مال کیا ہے

سرگرم جلوہ اس کو دیکھے کوئی سو جانے

طرز خرام کیا ہے حسن و جمال کیا ہے

میں بے نوا اڑا تھا بوسے کو ان لبوں کے

ہر دم صدا یہی تھی دے گذرو ٹال کیا ہے

پر چپ ہی لگ گئی جب ان نے کہا کہ کوئی

پوچھو تو شاہ جی سے ان کا سوال کیا ہے

گہ آپ میں نہیں ہو گہ منتظر کہیں ہو

کچھ میرجی تمھارا ان روزوں حال کیا ہے

میر تقی میر

دل ساری رات جیسے کوئی ملا کیا ہے

اکتوبر 6, 2015میر تقی میر،اساتذہ،غزلہلا،ملا،چلا،پلا،پھلا،بھلا،جلا،رلا،علیadmin

دیوان دوم غزل 1030

کس غم میں مجھ کو یارب یہ مبتلا کیا ہے

دل ساری رات جیسے کوئی ملا کیا ہے

ان چار دن سے ہوں میں افسردہ کچھ وگرنہ

پھوڑا سا دل بغل میں برسوں جلا کیا ہے

اس گل کی اور اپنا تب منھ کیا ہے میں نے

جب آشنا لبوں سے صلِّ علیٰ کیا ہے

دل داغ کب نہ دیکھا جی بار کب نہ پایا

کیا کیا نہال خواہش پھولا پھلا کیا ہے

تڑپا ہے ایسا ایسا جو غش رہا ہے مجھ کو

دل اک بغل میں جی کا دشمن پلا کیا ہے

کیا خاک میں ہمیں کو ان نے نیا ملایا

ٹیڑھی ہی چال گردوں اکثر چلا کیا ہے

چلتا نہیں ہے دل پر کچھ اس کے بس وگرنہ

عرش آہ عاجزاں سے اکثر ہلا کیا ہے

ہم گو نہ ہوں جہاں میں آخر جہاں تو ہو گا

تونے بدی تو کی ہے ظالم بھلا کیا ہے

ہے منھ پہ میر کے کیا گرد ملال تازہ

یہ خاک میں ہمیشہ یوں ہی رلا کیا ہے

میر تقی میر

تب دل کے تئیں خوگر اندوہ کیا ہے

اکتوبر 6, 2015میر تقی میر،اساتذہ،غزللیا،کیا،جیا،دیا،سیاadmin

دیوان دوم غزل 1029

کئی برسوں جگر کا ہی لہو اپنا پیا ہے

تب دل کے تئیں خوگر اندوہ کیا ہے

ڈر کیوں نہ محلے میں رہے رونے سے میرے

سیلاب نے اس کوچے میں گھر مول لیا ہے

افسوس ہے نشمردہ قدم تم جو رکھو یاں

اس راہ میں سر یاروں نے ہر گام دیا ہے

کاہش ہے عبث تم کو مرے جینے کی خاطر

بیمار بھلا ایسا کوئی آگے جیا ہے

پلکوں سے رفو ان نے کیا چاک دل میر

کس زخم کو کس نازکی کے ساتھ سیا ہے

میر تقی میر

دخل عقل اس مقام میں کیا ہے

اکتوبر 6, 2015میر تقی میر،اساتذہ،غزلکیا،پیدا،برپا،تمنا،تماشا،تنہا،دریا،رعنا،سودا،صحراadmin

دیوان دوم غزل 1028

شور میرے جنوں کا جس جا ہے

دخل عقل اس مقام میں کیا ہے

دل میں پھرتے ہیں خال و خط و زلف

مجھ کو یک سر ہزار سودا ہے

شور بازار میں ہے یوسفؑ کا

وہ بھی آ نکلے تو تماشا ہے

برچھیوں میں کہیں نہ بٹ جاوے

دل صفوف مژہ میں تنہا ہے

نظر آئے تھے وے حنائی پا

آج تک فتنہ ایک برپا ہے

دل کھنچے جاتے ہیں اسی کی اور

سارے عالم کی وہ تمنا ہے

برسوں رکھا ہے دیدئہ تر پر

پاٹ دامن کا اپنے دریا ہے

ٹک گریباں میں سر کو ڈال کے دیکھ

دل بھی دامن وسیع صحرا ہے

دلکشی اس کے قد کی سی معلوم

سرو بھی اک جوان رعنا ہے

دست و پا گم کیے ہیں تو نے میر

پیری بے طاقتی سے پیدا ہے

میر تقی میر

جگر سب کھا گیا اب کیا رہا ہے

اکتوبر 6, 2015میر تقی میر،اساتذہ،غزلہوا،مدعا،وفا،کیا،کھلا،آشنا،ادا،بجا،جدا،خدا،دوا،رہا،سنا،سرپھراadmin

دیوان دوم غزل 1027

دل بیتاب آفت ہے بلا ہے

جگر سب کھا گیا اب کیا رہا ہے

ہمارا تو ہے اصل مدعا تو

خدا جانے ترا کیا مدعا ہے

محبت کشتہ ہیں ہم یاں کسو پاس

ہمارے درد کی بھی کچھ دوا ہے

حرم سے دیر اٹھ جانا نہیں عیب

اگر یاں ہے خدا واں بھی خدا ہے

نہیں ملتا سخن اپنا کسو سے

ہماری گفتگو کا ڈھب جدا ہے

کوئی ہے دل کھنچے جاتے ہیں اودھر

فضولی ہے تجسس یہ کہ کیا ہے

مروں میں اس میں یا رہ جائوں جیتا

یہی شیوہ مرا مہر و وفا ہے

صبا اودھر گل اودھر سرو اودھر

اسی کی باغ میں اب تو ہوا ہے

تماشا کردنی ہے داغ سینہ

یہ پھول اس تختے میں تازہ کھلا ہے

ہزاروں ان نے ایسی کیں ادائیں

قیامت جیسے اک اس کی ادا ہے

جگہ افسوس کی ہے بعد چندے

ابھی تو دل ہمارا بھی بجا ہے

جو چپکے ہوں کہے چپکے ہو کیوں تم

کہو جو کچھ تمھارا مدعا ہے

سخن کریے تو ہووے حرف زن یوں

بس اب منھ موندلے میں نے سنا ہے

کب اس بیگانہ خو کو سمجھے عالم

اگرچہ یار عالم آشنا ہے

نہ عالم میں ہے نے عالم سے باہر

پہ سب عالم سے عالم ہی جدا ہے

لگا میں گرد سر پھرنے تو بولا

تمھارا میر صاحب سرپھرا ہے

میر تقی میر

اک آگ سی رہے ہے کیا جانیے کہ کیا ہے

اکتوبر 6, 2015میر تقی میر،اساتذہ،غزللکھا،لگا،ملا،وفا،کیا،پھرا،آشنا،ادا،جدا،خدا،دہا،دواadmin

دیوان دوم غزل 1026

چھاتی جلا کرے ہے سوز دروں بلا ہے

اک آگ سی رہے ہے کیا جانیے کہ کیا ہے

میں اور تو ہیں دونوں مجبورطور اپنے

پیشہ ترا جفا ہے شیوہ مرا وفا ہے

روے سخن ہے کیدھر اہل جہاں کا یارب

سب متفق ہیں اس پر ہر ایک کا خدا ہے

کچھ بے سبب نہیں ہے خاطر مری پریشاں

دل کا الم جدا ہے غم جان کا جدا ہے

حسن ان بھی معنیوں کا تھا آپھی صورتوں میں

اس مرتبے سے آگے کوئی چلے تو کیا ہے

شادی سے غم جہاں میں دہ چند ہم نے پایا

ہے عید ایک دن تو دس روز یاں دہا ہے

ہے خصم جان عاشق وہ محو ناز لیکن

ہر لمحہ بے ادائی یہ بھی تو اک ادا ہے

ہو جائے یاس جس میں سو عاشقی ہے ورنہ

ہر رنج کو شفا ہے ہر درد کو دوا ہے

نایاب اس گہر کی کیا ہے تلاش آساں

جی ڈوبتا ہے اس کا جو تہ سے آشنا ہے

مشفق ملاذ و قبلہ کعبہ خدا پیمبر

جس خط میں شوق سے میں کیا کیا اسے لکھا ہے

تاثیر عشق دیکھو وہ نامہ واں پہنچ کر

جوں کاغذ ہوائی ہر سو اڑا پھرا ہے

ہے گرچہ طفل مکتب وہ شوخ ابھی تو لیکن

جس سے ملا ہے اس کا استاد ہو ملا ہے

پھرتے ہو میر صاحب سب سے جدے جدے تم

شاید کہیں تمھارا دل ان دنوں لگا ہے

میر تقی میر

نہیں ہے دل کوئی دشمن بغل میں پالا ہے

اکتوبر 6, 2015میر تقی میر،اساتذہ،غزلنکالا،نالا،نرالا،والا،ٹالا،پالا،اجالاadmin

دیوان دوم غزل 1025

طپش سے رات کی جوں توں کے جی سنبھالا ہے

نہیں ہے دل کوئی دشمن بغل میں پالا ہے

حنا سے یار کا پنجہ نہیں ہے گل کے رنگ

ہمارے ان نے کلیجوں میں ہاتھ ڈالا ہے

گیا ہے پیش لے اعجاز عشق سے فرہاد

وگرنہ خس نے کہیں بھی پہاڑ ٹالا ہے

سنا ہے گریۂ خونیں پہ یہ نہیں دیکھا

لہو کا ہر گھڑی آنکھوں کے آگے نالا ہے

رہے خیال نہ کیوں ایسے ماہ طلعت کا

اندھیرے گھر کا ہمارے وہی اجالا ہے

دلوں کو کہتے ہیں ہوتی ہے راہ آپس میں

طریق عشق بھی عالم سے کچھ نرالا ہے

ہزار بار گھڑی بھر میں میر مرتے ہیں

انھوں نے زندگی کا ڈھب نیا نکالا ہے

میر تقی میر

یا رنگ لالہ شوخ ترے رنگ پاں سا ہے

اکتوبر 6, 2015میر تقی میر،اساتذہ،غزلناتواں،نشاں،کماں،کارواں،پاں،آستاں،جواں،دھواں،سماںadmin

دیوان دوم غزل 1024

کچھ بات ہے کہ گل ترے رنگیں دہاں سا ہے

یا رنگ لالہ شوخ ترے رنگ پاں سا ہے

آیا ہے زیر زلف جو رخسار کا وہ سطح

یاں سانجھ کے تئیں بھی سحر کا سماں سا ہے

ہے جی کی لاگ اور کچھ اے فاختہ ولے

دیکھے نہ کوئی سرو چمن اس جواں سا ہے

کیا جانیے کہ چھاتی جلے ہے کہ داغ دل

اک آگ سی لگی ہے کہیں کچھ دھواں سا ہے

اس کی گلی کی اور تو ہم تیر سے گئے

گو قامت خمیدہ ہمارا کماں سا ہے

جو ہے سو اپنی فکر خروبار میں ہے یاں

سارا جہان راہ میں اک کارواں سا ہے

کعبے کی یہ بزرگی شرف سب بجا ہے لیک

دلکش جو پوچھیے تو کب اس آستاں سا ہے

عاشق کی گور پر بھی کبھو تو چلا کرو

کیا خاک واں رہا ہے یہی کچھ نشاں سا ہے

زور طبیعت اس کا سنیں اشتیاق تھا

آیا نظر جو میر تو کچھ ناتواں سا ہے

میر تقی میر

ایک سنّاہٹا گذر جا ہے

اکتوبر 6, 2015میر تقی میر،اساتذہ،غزلمکر،مر،کر،گذر،اتر،بکھر،خبرadmin

دیوان دوم غزل 1023

جب نسیم سحر ادھر جا ہے

ایک سنّاہٹا گذر جا ہے

کیا اس آئینہ رو سے کہیے ہائے

وہ زباں کر کے پھر مکر جا ہے

جب سے سمجھا کہ ہم چلائو ہیں

حال پرسی ٹک آ کے کر جا ہے

وہ کھلے بال سووے ہے شاید

رات کو جی مرا بکھر جا ہے

دور اگرچہ گیا ہوں میں جی سے

کب وطن میرے یہ خبر جا ہے

وہ اگر چت چڑھا رہا ایسا

آج کل جی سے مہ اتر جا ہے

جی نہیں میر میں نہ بولو تند

بات کہتے ابھی وہ مر جا ہے

میر تقی میر

کوئی ایسا ستم دنیا میں اے صیاد کرتا ہے

اکتوبر 6, 2015میر تقی میر،اساتذہ،غزلفرہاد،یاد،بنیاد،صیادadmin

دیوان دوم غزل 1022

چمن کو یاد کر مرغ قفس فریاد کرتا ہے

کوئی ایسا ستم دنیا میں اے صیاد کرتا ہے

ہوا خانہ خراب آنکھوں کا اشکوں سے تو برجا ہے

رہ سیلاب میں کوئی بھی گھر بنیاد کرتا ہے

ملایا خاک کر دامن سے اشکوں میں ڈبایا پھر

مرے ہاتھوں کی تردستی گریباں یاد کرتا ہے

ابھر اے نقش شیریں بے ستوں اوپر تماشا کر

کہ کارستانیاں تیرے لیے فرہاد کرتا ہے

میر تقی میر

خدا شاہد ہے اپنا تو کلیجا ٹوٹ جاتا ہے

اکتوبر 6, 2015میر تقی میر،اساتذہ،غزللوٹ،چھوٹ،ٹوٹ،پھوٹ،زوٹadmin

دیوان دوم غزل 1021

کبھو میر اس طرف آکر جو چھاتی کوٹ جاتا ہے

خدا شاہد ہے اپنا تو کلیجا ٹوٹ جاتا ہے

خرابی دل کی کیا انبوہ درد و غم سے پوچھو ہو

وہی حالت ہے جیسے شہر لشکر لوٹ جاتا ہے

شکست اس رنگ آئی بے خودی عشق میں دل پر

نشے میں مست سے جیسے کہ شیشہ پھوٹ جاتا ہے

نہ یوں ہووے کہ اٹھ جائوں کہ ہے افسوس کی جاگہ

جب ایسا طائر خوش لہجہ پھنس کر چھوٹ جاتا ہے

نہیں کچھ عقل میں آتا کہ دیوانہ سا میر ایدھر

کبھو آتا جو ہے کیدھر کو مارے زوٹ جاتا ہے

میر تقی میر

جان کو کوئی کھائے جاتا ہے

اکتوبر 6, 2015میر تقی میر،اساتذہ،غزلہائے،لگائے،ملائے،چھپائے،کھائے،آئے،اٹھائے،بنائے،بجائے،جھکائےadmin

دیوان دوم غزل 1020

شوق ہم کو کھپائے جاتا ہے

جان کو کوئی کھائے جاتا ہے

ہر کوئی اس مقام میں دس روز

اپنی نوبت بجائے جاتا ہے

کھل گئی بات تھی سو ایک اک پر

تو وہی منھ چھپائے جاتا ہے

یاں پلیتھن نکل گیا واں غیر

اپنی ٹکّی لگائے جاتا ہے

رویئے کیا دل و جگر کے تئیں

جی بھی یاں پر تو ہائے جاتا ہے

کیا کیا ہے فلک کا میں کہ مجھے

خاک ہی میں ملائے جاتا ہے

تہ جنھیں کچھ ہے ان کے تیں ہر گام

عرق شرم آئے جاتا ہے

جاے عبرت ہے خاکدان جہاں

تو کہاں منھ اٹھائے جاتا ہے

دیکھ سیلاب اس بیاباں کا

کیسا سر کو جھکائے جاتا ہے

وہ تو بگڑے ہے میر سے ہر دم

اپنی سی یہ بنائے جاتا ہے

میر تقی میر

بے دید و بے مروت و ناآشنا ہیں یے

اکتوبر 6, 2015میر تقی میر،اساتذہ،غزلہوا،مدعا،ناآشنا،کیا،بجا،بدبلا،خداadmin

دیوان دوم غزل 1019

ان دلبروں کو دیکھ لیا بے وفا ہیں یے

بے دید و بے مروت و ناآشنا ہیں یے

حالانکہ خصم جان ہیں پر دیکھیے جو خوب

ہیں آرزو دلوں کی بھی یہ مدعا ہیں یے

اب حوصلہ کرے ہے ہمارا بھی تنگیاں

جانے بھی دو بتوں کے تئیں کیا خدا ہیں یے

گل پھول اس چمن کے چلو صبح دیکھ لیں

شبنم کے رنگ پھر کوئی دم میں ہوا ہیں یے

کس دل میں خوبرویوں کی خالی نہیں جگہ

مغرور اپنی خوبی کے اوپر بجا ہیں یے

ہرچند ان سے برسوں چھپا ہم ملا کیے

ظاہر ولے نہ ہم پہ ہوا یہ کہ کیا ہیں یے

کیا جانو میر صاحب و قبلہ کے ڈھب کو تم

خوبی مسلم ان کی ولے بدبلا ہیں یے

میر تقی میر

زندگانی حیف ہے مر جایئے

اکتوبر 6, 2015میر تقی میر،اساتذہ،غزلمر،ور،کر،گھر،پرadmin

دیوان دوم غزل 1018

پر نہیں جو اڑ کے اس در جایئے

زندگانی حیف ہے مر جایئے

کچھ نہیں تو شعر ہی کی فکر کر

آئے ہیں جو یاں تو کچھ کر جایئے

قصد ہے کعبے کا لیکن سوچ ہے

کیا ہے منھ جو اس کے در پر جایئے

خانماں آباد جو ہے سو خراب

کس کے اٹھ کر شہر میں گھر جایئے

بیم مردن اس قدر یہ کیا ہے میر

عشق کریے اور پھر ڈر جایئے

میر تقی میر

پیکر نازک کو تیرے کیونکے بر میں لایئے

اکتوبر 6, 2015میر تقی میر،اساتذہ،غزلفرمایئے،لایئے،ڈھایئے،پایئے،آئیے،بہلایئے،جایئےadmin

دیوان دوم غزل 1017

ٹک ٹھہرنے دے تجھے شوخی تو کچھ ٹھہرایئے

پیکر نازک کو تیرے کیونکے بر میں لایئے

ساکن دیر و حرم دونوں تلاشی ہیں ترے

تو خدا جانے کہاں ہے کیونکے تجھ کو پایئے

دور ہی سے ہوش کھو دیتی ہے اس کی بوے خوش

آپ میں رہیے تو اس کے پاس بھی ٹک جایئے

ان دنوں رنگ اور کچھ ہے اس دل پرخون کا

حق میں میرے آپ ہی کچھ سوچ کر فرمایئے

جی ہی کھپ جاتا ہے طنز آمیز ایسے لطف سے

ہنس کے جب کہتا ہے سب میں آیئے جی آئیے

دل کے ویراں کرنے میں بیداد کی ہے تونے ہائے

خوش عمارت ایسے گھر کو اس طرح سے ڈھایئے

رات دن رخسار اس کے چت چڑھے رہتے ہیں میر

آفتاب و ماہ سے دل کب تلک بہلایئے

میر تقی میر

دریا کا پھیر پایئے تیرا نہ پایئے

اکتوبر 6, 2015میر تقی میر،اساتذہ،غزللگایئے،چھڑایئے،پایئے،آیئے،آزمایئے،اٹھایئے،سنایئےadmin

دیوان دوم غزل 1016

گرداب وار یار ترے صدقے جایئے

دریا کا پھیر پایئے تیرا نہ پایئے

سر مار مار بیٹھے تلف ہوجے کب تلک

ٹک اٹھ کے اب نصیبوں کو بھی آزمایئے

سو شکل سے ہم آئے گئے تیری بزم میں

طنزاً کہا نہ تو نے کبھو یوں کہ آیئے

آئے ہیں تنگ جان سے قیدحیات میں

اس بند سے ہمارے تئیں اب چھڑایئے

کہنے لگا کہ ٹیڑھے بہت ہو رہے ہو تم

دو چار سیدھی سیدھی تمھیں بھی سنایئے

ہے عزم جزم ترک و تجرد کا گر بنے

کیا اس جہان سفلہ سے دل کو لگایئے

تاثیر ہے دعا کو فقیروں کی میرجی

ٹک آپ بھی ہمارے لیے ہاتھ اٹھایئے

میر تقی میر

سو طرف جب دیکھ لیجے تب ٹک اودھر دیکھیے

اکتوبر 6, 2015میر تقی میر،اساتذہ،غزلمقرر،مضطر،گھر،پر،اودھر،ایدھر،تر،خنجرadmin

دیوان دوم غزل 1015

انکھڑیوں کو اس کی خاطر خواہ کیونکر دیکھیے

سو طرف جب دیکھ لیجے تب ٹک اودھر دیکھیے

گرچہ زردی رنگ کی بھی ہجر ہی سے ہے ولے

منھ مرا دیکھو ہو کیا یہ کوفت جی پر دیکھیے

اب کے گل ہم بے پروں کی اور چشمک زن ہے زور

اور دل اپنا بھی جلتا ہے بہت پر دیکھیے

آتے ہو جب جان یاں آنکھوں میں آ رہتی ہے آہ

دیکھیے ہم کو تو یوں بیمار و مضطر دیکھیے

اشک پر سرخی ابھی سے ہے تو آگے ہم نشیں

رنگ لاوے کیسے کیسے دیدئہ تر دیکھیے

دیر و کعبہ سے بھی ٹک جھپکی نہ چشم شوخ یار

شوق کی افراط سے تاچند گھر گھر دیکھیے

مر رہے یوں صیدگہ کی کنج میں تو حسن کیا

عشق جب ہے تب گلے کو زیر خنجر دیکھیے

برسوں گذرے خاک ملتے منھ پر آئینے کے طور

کیا غضب ہے آنکھ اٹھاکر ٹک تو ایدھر دیکھیے

دیدنی ہے وجد کرنا میر کا بازار میں

یہ تماشا بھی کسو دن تو مقرر دیکھیے

میر تقی میر

ایک دن تہ کر بساط ناز جایا چاہیے

اکتوبر 6, 2015میر تقی میر،اساتذہ،غزللگایا،لایا،چھپایا،ڈھایا،آیا،بنایا،جایا،دکھایا،سایہadmin

دیوان دوم غزل 1014

دل شتاب اس بزم عشرت سے اٹھایا چاہیے

ایک دن تہ کر بساط ناز جایا چاہیے

یہ قیامت اور جی پر کل گئی پائیز میں

دل خس و خاشاک گلشن سے لگایا چاہیے

خانہ ساز دیں جو ہے واعظ سو یہ خانہ خراب

اینٹ کی خاطر جسے مسجد کو ڈھایا چاہیے

کام کیا بال ہما سے چترشہ سے کیا غرض

سر پر اک دیوار ہی کا اس کی سایہ چاہیے

اتقا پر خانقہ والے بہت مغرور ہیں

مست ناز ایدھر اسے یک بار لایا چاہیے

کیاریوں ہی میں پڑے رہیے گا سائے کی روش

اپنے ہوتے اب کے موسم گل کا آیا چاہیے

یہ ستم تازہ کہ اپنی ناکسی پر کر نظر

جن سے بگڑا چاہیے ان سے بنایا چاہیے

جی نہیں رہتا ہے ٹک ناچار ہم کو اس کی اور

گرتے پڑتے ضعف میں بھی روز جایا چاہیے

گاہ برقع پوش ہو گہ مو پراگندہ کرو

تم کو ہم سے منھ بہر صورت چھپایا چاہیے

وہ بھی تو ٹک دست و تیغ اپنے کی جانے قدر میر

زخم سارے ایک دن اس کو دکھایا چاہیے

میر تقی میر

سو ہی بات آئی اٹھے اس پاس سے جاں سے گئے

اکتوبر 6, 2015میر تقی میر،اساتذہ،غزلقرآں،مہماں،گلستاں،پریشاں،ایماں،بیاباں،جاںadmin

دیوان دوم غزل 1013

ہم نہ کہتے تھے رہے گا ہم میں کیا یاں سے گئے

سو ہی بات آئی اٹھے اس پاس سے جاں سے گئے

کیا بخود رہنا ہمارا کچھ رکھے ہے اعتبار

آپ میں آئے کبھو اب ہم تو مہماں سے گئے

جب تلک رہنا بنا دل تنگ غنچے سے رہے

دیکھیے کیا گل کھلے گا اب گلستاں سے گئے

کیا غزالوں ہی کو ہم بن وحشت بسیار ہے

کوہ بھی نالاں رہے جب ہم بیاباں سے گئے

لائی آفت خانقاہ و مسجد اوپر وہ نگاہ

صوفیاں دیں سے گئے سب شیخ ایماں سے گئے

دور کر خط کو کیا چہرہ کتابی ان نے صاف

اب قیامت ہے کہ سارے حرف قرآں سے گئے

جی تو اس کی زلف میں دل کا کل پیچاں میں میر

جا بھی نکلے اس کنے تو ہم پریشاں سے گئے

میر تقی میر

کیسے کیسے ہائے اپنے دیکھتے موسم گئے

اکتوبر 6, 2015میر تقی میر،اساتذہ،غزلہم،موسم،ماتم،نم،نامحرم،پچھم،تھم،جم،خم،دم،شبنمadmin

دیوان دوم غزل 1012

گل گئے بوٹے گئے گلشن ہوئے برہم گئے

کیسے کیسے ہائے اپنے دیکھتے موسم گئے

ہنستے رہتے تھے جو اس گلزار میں شام و سحر

دیدئہ تر ساتھ لے وے لوگ جوں شبنم گئے

گر ہوا اس باغ کی ہے یہ تو اے بلبل نہ پھول

کوئی دن میں دیکھیو واں وے گئے یاں ہم گئے

کیا کم اس خورشیدرو کی جستجو یاروں نے کی

لوہو روتے جوں شفق پورب گئے پچھم گئے

جی گیا یاں بے دماغی سے انھوں کی اور واں

نے جبیں سے چیں گئی نے ابروئوں سے خم گئے

شاید اب ٹکڑوں نے دل کے قصد آنکھوں کا کیا

کچھ سبب تو ہے جو آنسو آتے آتے تھم گئے

گرچہ ہستی سے عدم تک اک مسافت تھی بعید

پر اٹھے جو ہم یہاں سے واں تلک اک دم گئے

کیا معاش اس غم کدے میں ہم نے دس دن کی بہم

اٹھ کے جس کے ہاں گئے دل کا لیے ماتم گئے

سبزہ و گل خوش نشینی اس چمن کی جن کو تھی

سو بھی تو دیکھا گریباں چاک و مژگاں نم گئے

مردم دنیا بھی ہوتے ہیں سمجھ کس مرتبہ

آن بیٹھے نائوں کو تو یاں نگیں سے جم گئے

ربط صاحب خانہ سے مطلق بہم پہنچا نہ میر

مدتوں سے ہم حرم میں تھے پہ نامحرم گئے

میر تقی میر

کارواں جاتا رہا ہم ہائے سوتے رہ گئے

اکتوبر 6, 2015میر تقی میر،اساتذہ،غزلکھوتے،سوتےadmin

دیوان دوم غزل 1011

جاگنا تھا ہم کو سو بیدار ہوتے رہ گئے

کارواں جاتا رہا ہم ہائے سوتے رہ گئے

بوے گل پیش از سحر گلزار سے رخصت ہوئی

ہم ستم کش روبرو اس کے تو سوتے رہ گئے

جی دیے بن وہ در مقصود کب پایا گیا

بے جگر تھے میر صاحب جان کھوتے رہ گئے

میر تقی میر

ہستی کے تئیں ہوتے عدم دیکھتے ہیں ہائے

اکتوبر 6, 2015میر تقی میر،اساتذہ،غزلہم،قدم،کم،بھسم،ستم،عدمadmin

دیوان دوم غزل 1010

اب اپنے قد راست کو خم دیکھتے ہیں ہائے

ہستی کے تئیں ہوتے عدم دیکھتے ہیں ہائے

سنتے تھے کہ جاتی ہے ترے دیکھنے سے جاں

اب جان چلی جاتی ہے ہم دیکھتے ہیں ہائے

کیا روتے ہیں یاران گذشتہ کے لیے ہم

جب راہ میں کچھ نقش قدم دیکھتے ہیں ہائے

کچھ عشق کی آتش کی لپٹ پہنچی ہمیں زور

سب تن بدن اپنے کو بھسم دیکھتے ہیں ہائے

دل چاک ہے جاں داغ جگر خوں ہے ہمارا

ان آنکھوں سے انواع ستم دیکھتے ہیں ہائے

مایوس نہ کس طور جہاں سے رہیں ہم میر

اب تاب بہت جان میں کم دیکھتے ہیں ہائے

میر تقی میر

گم کیا خود کے تیں خدا سمجھے

اکتوبر 6, 2015میر تقی میر،اساتذہ،غزللکھا،مدعا،کیا،آشنا،خدا،دغاadmin

دیوان دوم غزل 1009

اب سمجھ آئی مرتبہ سمجھے

گم کیا خود کے تیں خدا سمجھے

اس قدر جی میں ہے دغا اس کے

کہ دعا کریے تو دغا سمجھے

کچھ سمجھتے نہیں ہمارا حال

تم سے بھی اے بتاں خدا سمجھے

غلط اپنا کہ اس جفاجو کو

سادگی سے ہم آشنا سمجھے

نکتہ داں بھی خدا نے تم کو کیا

پر ہمارا نہ مدعا سمجھے

لکھے دفتر کتابیں کیں تصنیف

پر نہ طالع کا ہم لکھا سمجھے

میر صاحب کا ہر سخن ہے رمز

بے حقیقت ہے شیخ کیا سمجھے

میر تقی میر

جو چاہیں سو یوں کہہ لیں لوگ اپنی جگہ بیٹھے

اکتوبر 6, 2015میر تقی میر،اساتذہ،غزلوہ،کہہ،کلہ،گہ،تہ،جگہ،سررہadmin

دیوان دوم غزل 1008

ہے جنبش لب مشکل جب آن کے وہ بیٹھے

جو چاہیں سو یوں کہہ لیں لوگ اپنی جگہ بیٹھے

جی ڈوب گئے اپنے اندوہ کے دریا میں

وے جوش کہاں اب ہم مدت ہوئی وہ بیٹھے

کیا رنگ میں شوخی ہے اس کے تن نازک کی

پیراہن اگر پہنے تو اس پہ بھی تہ بیٹھے

سر گل نے اٹھایا تھا اس باغ میں سو دیکھا

کیا ناز سے یاں کوئی کج کرکے کلہ بیٹھے

مرتے ہوئے پر چاہت ظاہر نہ کی اگلوں نے

بے حوصلہ تھے ہم جو اس راز کو کہہ بیٹھے

کیا جانے کہ ایدھر کا کب قصد کرے گا وہ

پامال ہوئے ہم تو اس سے سررہ بیٹھے

جو ہاتھ چڑھا اس کے دل خوں ہی کیا اس کا

اس پنجۂ رنگیں کی اے میر نہ گہ بیٹھے

میر تقی میر

اس خصم جاں کے در پر تکیہ بنا کے بیٹھے

اکتوبر 6, 2015میر تقی میر،اساتذہ،غزللگا،چڑھا،چھپا،ا،بچھا،بنا،بڑھا،جلا،جھکا،جاadmin

دیوان دوم غزل 1007

اب ہم فقیر جی سے دل کو اٹھا کے بیٹھے

اس خصم جاں کے در پر تکیہ بنا کے بیٹھے

مرتے ہوئے بھی ہم کو صورت نہ آ دکھائی

وقت اخیر اچھا منھ کو چھپا کے بیٹھے

عزلت نشیں ہوئے جب دل داغ ہو گیا تب

یعنی کہ عاشقی میں ہم گھر جلا کے بیٹھے

جو کفر جانتے تھے عشق بتاں کو وہ ہی

مسجد کے آگے آخر قشقہ لگا کے بیٹھے

شور متاع خوبی اس شوخ کا بلا تھا

بازاری سب دکانیں اپنی بڑھا کے بیٹھے

کیا اپنی اور اس کی اب نقل کریے صحبت

مجلس سے اٹھ گیا وہ ٹک ہم جو آ کے بیٹھے

کیا جانے تیغ اس کی کب ہو بلند عاشق

یوں چاہیے کہ سر کو ہر دم جھکا کے بیٹھے

پھولوں کی سیج پر سے جو بے دماغ اٹھے

مسند پہ ناز کی جو تیوری چڑھا کے بیٹھے

کیا غم اسے زمیں پر بے برگ و ساز کوئی

خار و خسک ہی کیوں نہ برسوں بچھا کے بیٹھے

وادی قیس سے پھر آئے نہ میر صاحب

مرشد کے ڈھیر پر وے شاید کہ جا کے بیٹھے

میر تقی میر

یہ جان سے گئے سب بیمار ایسے ہی تھے

اکتوبر 6, 2015میر تقی میر،اساتذہ،غزلیار،کردار،آثار،بیمار،بار،بستار،خوار،درکار،رخسارadmin

دیوان دوم غزل 1006

مجنوں و کوہکن کو آزار ایسے ہی تھے

یہ جان سے گئے سب بیمار ایسے ہی تھے

شمس و قمر کے دیکھے جی اس میں جا رہے ہے

اس دل فروز کے بھی رخسار ایسے ہی تھے

دامن کے پاٹ سارے تختے ہوئے چمن کے

بس اے سرشک خونیں درکار ایسے ہی تھے

لوہو نہ کیوں رلائے ان کا گداز ہونا

یہ دل جگر ہمارے غم خوار ایسے ہی تھے

ہر دم جراحت آسا کب رہتے تھے ٹپکتے

یہ دیدئہ نمیں کیا خوں بار ایسے ہی تھے

آزاردہ دلوں کا جیسا کہ تو ہے ظالم

اگلے زمانے میں بھی کیا یار ایسے ہی تھے

ہو جائے کیوں نہ دوزخ باغ زمانہ ہم پر

ہم بے حقیقتوں کے کردار ایسے ہی تھے

دیوار سے پٹک سر میں جو موا تو بولا

کچھ اس ستم زدہ کے آثار ایسے ہی تھے

اک حرف کا بھی ان کو دفتر ہے کر دکھانا

کیا کہیے میر جی کے بستار ایسے ہی تھے

میر تقی میر

اور نہ تھی توفیق تمھیں تو بوسے کی ہمت رکھتے تھے

اکتوبر 6, 2015میر تقی میر،اساتذہ،غزلہمت،قدرت،منت،مت،محبت،مروت،وحشت،الفت،حرمت،خجلت،دولت،صورت،طاقتadmin

دیوان دوم غزل 1005

ایک سمیں تم ہم فقرا سے اکثر صحبت رکھتے تھے

اور نہ تھی توفیق تمھیں تو بوسے کی ہمت رکھتے تھے

آگے خط سے دماغ تمھارا عرش پہ تھا ہو وے ہی تم

پائوں زمیں پر رکھتے تھے تو خدا پر منت رکھتے تھے

اب تو ہم ہو چکتے ہیں ٹک تیرے ابرو خم ہوتے

کیا کیا رنج اٹھاتے تھے جب جی میں طاقت رکھتے تھے

چاہ کے سارے دیوانے پر آپ سے اکثر بیگانے

عاشق اس کے سیر کیے ہم سب سے جدی مت رکھتے تھے

ہم تو سزاے تیغ ہی تھے پر ظلم بے حد کیا معنی

اور بھی تجھ سے آگے ظالم اچھی صورت رکھتے تھے

آج غزال اک رہبر ہوکر لایا تربت مجنوں پر

قصد زیارت رکھتے تھے ہم جب سے وحشت رکھتے تھے

کس دن ہم نے سر نہ چڑھاکر ساغر مے کو نوش کیا

دور میں اپنے دختر رز کی ہم اک حرمت رکھتے تھے

کوہکن و مجنون و وامق کس کس کے لیں نام غرض

جی ہی سے جاتے آگے سنے وے لوگ جو الفت رکھتے تھے

چشم جہاں تک جاتی تھی گل دیکھتے تھے ہم سرخ و زرد

پھول چمن کے کس کے منھ سے ایسی خجلت رکھتے تھے

کام کرے کیا سعی و کوشش مطلب یاں ناپیدا تھا

دست و پا بہتیرے مارے جب تک قدرت رکھتے تھے

چتون کے کب ڈھب تھے ایسے چشمک کے تھے کب یہ ڈول

ہائے رے وے دن جن روزوں تم کچھ بھی مروت رکھتے تھے

لعل سے جب دل تھے یہ ہمارے مرجاں سے تھے اشک چشم

کیا کیا کچھ پاس اپنے ہم بھی عشق کی دولت رکھتے تھے

کل کہتے ہیں اس بستی میں میر جی مشتاقانہ موئے

تجھ سے کیا ہی جان کے دشمن وے بھی محبت رکھتے تھے

میر تقی میر

سو یوں رہے کہ جیسے کوئی میہماں رہے

اکتوبر 6, 2015میر تقی میر،اساتذہ،غزلمہرباں،میہماں،نہاں،نشاں،یاں،کہاں،آسماں،جہاں،جاں،درمیاں،رواں،زباں،سماںadmin

دیوان دوم غزل 1004

یاں ہم براے بیت جو بے خانماں رہے

سو یوں رہے کہ جیسے کوئی میہماں رہے

تھا ملک جن کے زیرنگیں صاف مٹ گئے

تم اس خیال میں ہو کہ نام و نشاں رہے

آنسو چلے ہی آنے لگے منھ پہ متصل

کیا کیجے اب کہ راز محبت نہاں رہے

ہم جب نظر پڑیں تو وہ ابرو کو خم کرے

تیغ اپنے اس کے کب تئیں یوں درمیاں رہے

کوئی بھی اپنے سر کو کٹاتا ہے یوں ولے

جوں شمع کیا کروں جو نہ میری زباں رہے

یہ دونوں چشمے خون سے بھر دوں تو خوب ہے

سیلاب میری آنکھوں سے کب تک رواں رہے

دیکھیں تو مصر حسن میں کیا خواریاں کھنچیں

اب تک تو ہم عزیز رہے ہیں جہاں رہے

مقصود گم کیا ہے تب ایسا ہے اضطراب

چکر میں ورنہ کاہے کو یوں آسماں رہے

کیا اپنی ان کی تم سے بیاں کیجیے معاش

کیں مدتوں رکھا جو تنک مہرباں رہے

گہ شام اس کے مو سے ہے گہ رو سے اس کے صبح

تم چاہو ہو کہ ایک سا ہی یاں سماں رہے

کیا نذر تیغ عشق سرِتیر میں کیا

اس معرکے میں کھیت بہت خستہ جاں رہے

اس تنگناے دہر میں تنگی نفس نے کی

جوں صبح ایک دم ہی رہے ہم جو یاں رہے

اک قافلے سے گرد ہماری نہ ٹک اٹھی

حیرت ہے میر اپنے تئیں ہم کہاں رہے

میر تقی میر

آخر کو پھوٹ پھوٹ بہے قہر کر رہے

اکتوبر 6, 2015میر تقی میر،اساتذہ،غزلمحتضر،مر،نفر،نظر،کر،گھر،گر،پر،اتر،اثر،بھر،خبرadmin

دیوان دوم غزل 1003

یک عمر دیدہ ہاے ستم دیدہ تر رہے

آخر کو پھوٹ پھوٹ بہے قہر کر رہے

ہم نے بھی نذر کی ہے پھریں گے چمن کے گرد

آنے تئیں بہار کے گر بال و پر رہے

کیا کہیے تیرے واسطے اے مایۂ حیات

کیا کیا عزیز اپنے تئیں مار مر رہے

مرتے بھی اپنے ہائے وہ حاضر نہ ہوسکا

ہم اشتیاق کش تو بہت محتضر رہے

مرغان باغ رہتے ہیں اب گھیرے یوں مجھے

ماتم زدوں کے حلقے میں جوں نوحہ گر رہے

آغوش اس سے خالی رہی شب تو تا سحر

جیب و کنار گریۂ خونیں سے بھر رہے

نقش قدم کے طور ترے ہم ہیں پائمال

غالب ہے یہ کہ دیر ہمارا اثر رہے

اب صبر و ہوش و عقل کی میرے یہ ہے معاش

جوں قافلہ لٹا کہیں آکر اتر رہے

لاکھوں ہمارے دیکھتے گھر بار سے گئے

کس خانماں خراب کے وے جا کے گھر رہے

آتا کبھو تو ناز سے دکھلائی دے بھی جا

دروازے ہی کی اور کہاں تک نظر رہے

رکھنا تمھارے پائوں کا کھوتا ہے سر سے ہوش

یہ چال ہے تو اپنی کسے پھر خبر رہے

کیا بدبلا ہے لاگ بھی دل کی کہ میر جی

دامن سوار لڑکوں کے ہو کر نفر رہے

میر تقی میر

جی رات دن جنھوں کے کھپیں ان میں کیا رہے

اکتوبر 6, 2015میر تقی میر،اساتذہ،غزلہوا،لگا،مزہ،چھپا،کیا،کھا،آشنا،بھلا،جاadmin

دیوان دوم غزل 1002

دوری میں اس کی گور کنارے ہم آرہے

جی رات دن جنھوں کے کھپیں ان میں کیا رہے

اس آفتاب حسن کے ہم داغ شرم ہیں

ایسے ظہور پر بھی وہ منھ کو چھپا رہے

اب جس کے حسن خلق پہ بھولے پھریں ہیں لوگ

اس بے وفا سے ہم بھی بہت آشنا رہے

مجروح ہم ہوئے تو نمک پاشیاں رہیں

ایسی معاش ہووے جہاں کیا مزہ رہے

مرغان باغ سے نہ ہوئی میری دم کشی

نالے کو سن کے وقت سحر دم ہی کھا رہے

چھاتی رکی رہے ہے جو کرتے نہیں ہیں آہ

یاں لطف تب تلک ہی ہے جب تک ہوا رہے

کشتے ہیں ہم تو ذوق شہیدان عشق کے

تیغ ستم کو دیر گلے سے لگا رہے

گاہے کراہتا ہے گہے چپ ہے گاہ سست

ممکن نہیں مریض محبت بھلا رہے

آتے کبھو جو واں سے تو یاں رہتے تھے اداس

آخر کو میر اس کی گلی ہی میں جا رہے

میر تقی میر

جو چاہنے والے کا ہر طور برا چاہے

اکتوبر 6, 2015میر تقی میر،اساتذہ،غزلہوا،لکھا،ملا،چلا،کہا،کیا،بہا،برا،خدا،رہاadmin

دیوان دوم غزل 1001

اس شوخ ستمگر کو کیا کوئی بھلا چاہے

جو چاہنے والے کا ہر طور برا چاہے

کعبے گئے کیا کوئی مقصد کو پہنچتا ہے

کیا سعی سے ہوتا ہے جب تک نہ خدا چاہے

سو رنگ کی جب خوبی پاتے ہو اسی گل میں

پھر اس سے کوئی اس بن کچھ چاہے تو کیا چاہے

ہم عجز سے پہنچے ہیں مقصود کی منزل کو

گہ خاک میں مل جاوے جو اس سے ملا چاہے

ہوسکتی ہیں سد رہ پلکیں کہیں رونے کی

تنکوں سے رکے ہے کب دریا جو بہا چاہے

جب تونے زباں چھوڑی تب کاہے کا صرفہ ہے

بے صرفہ کہے کیوں نہ جو کچھ کہ کہا چاہے

دل جاوے ہے جوں رو کے شبنم نے کہا گل سے

اب ہم تو چلے یاں سے رہ تو جو رہا چاہے

خط رسم زمانہ تھی ہم نے بھی لکھا اس کو

تہ دل کی لکھے کیونکر عاشق جو لکھا چاہے

رنگ گل و بوے گل ہوتے ہیں ہوا دونوں

کیا قافلہ جاتا ہے جو تو بھی چلا چاہے

ہم میر ترا مرنا کیا چاہتے تھے لیکن

رہتا ہے ہوئے بن کب جو کچھ کہ ہوا چاہے

میر تقی میر

مبادا عشق کی گرمی جگر میرا جلا دیوے

اکتوبر 6, 2015میر تقی میر،اساتذہ،غزللگا،لا،ملا،بنا،بتا،جلا،جزا،خدا،دعاadmin

دیوان دوم غزل 1000

درونے کو کوئی آہوں سے یوں کب تک ہوا دیوے

مبادا عشق کی گرمی جگر میرا جلا دیوے

کہاں تک یوں پڑے بستر پہ رہیے دور جاناں سے

کوئی کاش اس گلی میں ہم کو اک تکیہ بنا دیوے

ہوئے برسوں کہ وہ ظالم رہے ہے مجھ پہ کچھ ٹیڑھا

کوئی اس تیغ برکف کو گلے میرے ملا دیوے

وفا کی مزد میں ہم پر جفا و جور کیا کہیے

کسو سے دل لگے اس کا تو وہ اس کی جزا دیوے

کہیں کچھ تو برا مانو بھلا انصاف تو کریے

بدی کو بھی نہایت ہے تمھیں نیکی خدا دیوے

صنوبر آدمی ہو تو سراپا بار دل لاوے

کہاں سے کوئی تازہ دل اسے ہر روز لا دیوے

بہت گمراہ ہے وہ شوخ لگتا ہے کہے کس کے

کوئی کیا راہ کی بات اس جفاجو کو بتا دیوے

جگر سب جل گیا لیکن زباں ہلتی نہیں اپنی

مباد اس آتشیں خو کو مخالف کچھ لگا دیوے

کوئی بھی میر سے دل ریش سے یوں دور پھرتا ہے

ٹک اس درویش سے مل چل کہ تجھ کو کچھ دعا دیوے

میر تقی میر

یا ابر کوئی آوے اور آ کے برس جاوے

اکتوبر 6, 2015میر تقی میر،اساتذہ،غزلچس،ڈس،پھنس،بھلس،برس،جرس،عسسadmin

دیوان دوم غزل 999

یا بادئہ گلگوں کی خاطر سے ہوس جاوے

یا ابر کوئی آوے اور آ کے برس جاوے

شورش کدئہ عالم کہنے ہی کی جاگہ تھی

دل کیا کرے جو ایسے ہنگامے میں پھنس جاوے

دل ہے تو عبث نالاں یاران گذشتہ بن

ممکن نہیں اب ان تک آواز جرس جاوے

اس زلف سے لگ چلنا اک سانپ کھلانا ہے

یہ مارسیہ یارو ناگاہ نہ ڈس جاوے

میخانے میں آوے تو معلوم ہو کیفیت

یوں آگے ہو مسجد کے ہر روز عسس جاوے

چولی جہاں سے مسکی پھر آنکھیں وہیں چپکیں

جب پیرہن گل بھی اس خوبی سے چس جاوے

ہے میر عجب کوئی درویش برشتہ دل

بات اس کی سنو تم تو چھاتی بھی بھلس جاوے

میر تقی میر

جیسے چراغ کوئی مہتاب میں جلاوے

اکتوبر 6, 2015میر تقی میر،اساتذہ،غزللگاوے،لاوے،پاوے،اٹھاوے،بچھاوے،جلاوے،جاوے،دکھاوے،سماوےadmin

دیوان دوم غزل 998

ویسا ہے یہ جو یوسف شب تیرے ہوتے آوے

جیسے چراغ کوئی مہتاب میں جلاوے

کیا رفتگی سے میری تم گفتگو کرو ہو

کھویا گیا نہیں میں ایسا جو کوئی پاوے

چھاتی کے داغ یکسر آنکھوں سے کھل رہے ہیں

دیکھیں ابھی محبت کیا کیا ہمیں دکھاوے

ہیں پائوں اس کے نازک گل برگ سے بجا ہے

عاشق جو رہگذر میں آنکھوں کے تیں بچھاوے

یوں خاک منھ پہ مل کر کب تک پھرا کروں میں

یارب زمیں پھٹے تو یہ روسیہ سماوے

اے کاش قصہ میرا ہر فرد کو سنا دیں

تا دل کسو سے اپنا کوئی نہ یاں لگاوے

ترک بتاں کا مجھ سے لیتے ہیں قول یوں ہی

کیا ان سے ہاتھ اٹھائوں گو اس میں جان جاوے

عاشق کو مر گئے ہی بنتی ہے عاشقی میں

کیا جان جس کی خاطر شرمندگی اٹھاوے

جی میں بگڑ رہا ہے تب میر چپ ہے بیٹھا

چھیڑو ابھی تو کیا کیا باتیں بنا کے لاوے

میر تقی میر

ہمیں کھو دیا ہے تری جستجو نے

اکتوبر 6, 2015میر تقی میر،اساتذہ،غزلچپو،کسو،گفتگو،آرزو،بو،جستجو،خوبرو،دو،سوadmin

دیوان دوم غزل 997

الٰہی کہاں منھ چھپایا ہے تو نے

ہمیں کھو دیا ہے تری جستجو نے

جو خواہش نہ ہوتی تو کاہش نہ ہوتی

ہمیں جی سے مارا تری آرزو نے

نہ بھائیں تجھے میری باتیں وگرنہ

رکھی دھوم شہروں میں اس گفتگو نے

رقیبوں سے سر جوڑ بیٹھو ہو کیونکر

ہمیں تو نہیں دیتے ٹک پائوں چھونے

پھر اس سال سے پھول سونگھا نہ میں نے

دوانہ کیا تھا مجھے تیری بو نے

مداوا نہ کرنا تھا مشفق ہمارا

جراحت جگر کے لگے دکھنے دونے

کڑھایا کسو کو کھپایا کسو کو

برائی ہی کی سب سے اس خوبرو نے

وہ کسریٰ کہ ہے شور جس کا جہاں میں

پڑے ہیں گے اس کے محل آج سونے

تری چال ٹیڑھی تری بات روکھی

تجھے میر سمجھا ہے یاں کم کسو نے

میر تقی میر

الفت سے محبت سے مل بیٹھنا کیا جانے

اکتوبر 6, 2015میر تقی میر،اساتذہ،غزللکھا،لگا،مزہ،چھپا،کیا،بلا،بھلا،خدا،دوا،ستاadmin

دیوان دوم غزل 996

بے مہر و وفا ہے وہ کیا رسم وفا جانے

الفت سے محبت سے مل بیٹھنا کیا جانے

دل دھڑکے ہے جاتے کچھ بت خانے سے کعبے کو

اس راہ میں پیش آوے کیا ہم کو خدا جانے

ہے محو رخ اپنا تو آئینے میں ہر ساعت

صورت ہے جو کچھ دل کی سو تیری بلا جانے

کچھ اس کی بندھی مٹھی اس باغ میں گذرے ہے

جو زخم جگر اپنے جوں غنچہ چھپا جانے

کیا سینے کے جلنے کو ہنس ہنس کے اڑاتا ہوں

جب آگ کوئی گھر کو اس طور لگا جانے

میں مٹی بھی لے جائوں دروازے کی اس کے تو

اس درد محبت کی جو کوئی دوا جانے

اپنے تئیں بھی کھانا خالی نہیں لذت سے

کیا جانے ہوس پیشہ چکھے تو مزہ جانے

یوں شہر میں بہتیرے آزاردہندے ہیں

تب جانیے جب کوئی اس ڈھب سے ستا جانے

کیا جانوں رکھو روزے یا دارو پیو شب کو

کردار وہی اچھا تو جس کو بھلا جانے

آگاہ نہیں انساں اے میر نوشتے سے

کیا چاہیے ہے پھر جو طالع کا لکھا جانے

میر تقی میر

عید سی ہوجائے اپنے ہاں لگے جو تو گلے

اکتوبر 6, 2015میر تقی میر،اساتذہ،غزلہلے،لے،ملے،مرحلے،چلے،ولے،گلے،ٹلے،تلے،جلےadmin

دیوان دوم غزل 995

جیسے اندوہ محرم عشق کب تک دل ملے

عید سی ہوجائے اپنے ہاں لگے جو تو گلے

دین و مذہب عاشقوں کا قابل پرسش نہیں

یہ ادھر سجدہ کریں ابرو جدھر اس کی ہلے

یہ نہیں میں جانتا نسبت ہے کیا آپس میں لیک

آنکھیں ہوجاتی ہیں ٹھنڈی اس کے تلووں سے ملے

ہائے کس حسرت سے شبنم نے سحر رو کر کہا

خوش رہو اے ساکنان باغ اب تو ہم چلے

مردمان شہر خوبی پر کریں کیا دل کو عرض

ایسی جنس ناروا کو مفت کوئی واں نہ لے

کل جو ہم کو یاد آیا باغ میں قد یار کا

خوب روئے ہر نہال سبز کے سائے تلے

جمع کر خاطر مرے جینے سے مجھ کو خوب ہے

جی بچا تب جانیے جب سر سے یہ کلول ٹلے

گرچہ سب ہیں گے مہیاے طریق نیستی

طے بہت دشوار کی یہ رہگذر ہم نے ولے

ہر قدم پر جی سے جانا ہر دم اوپر بے دمی

لمحہ لمحہ آگے تھے کیا کیا قیامت مرحلے

جلنے کو جلتے ہیں سب کے اندرونے لیک میر

جب کسو کی اس وتیرے سے کہیں چھاتی جلے

میر تقی میر

یا اب کی وے ادائیں جو دل سے آہ نکلے

اکتوبر 6, 2015میر تقی میر،اساتذہ،غزلماہ،واہ!،گناہ،گواہ،آہ،بادشاہ،خواہ،روسیاہ،راہadmin

دیوان دوم غزل 994

یا پہلے وے نگاہیں جن سے کہ چاہ نکلے

یا اب کی وے ادائیں جو دل سے آہ نکلے

کیونکر نہ چپکے چپکے یوں جان سے گذریے

کہیے بتھا جو اس سے باتوں کی راہ نکلے

زردی رنگ و رونا دونوں دلیل کشتن

خوش طالعی سے میری کیا کیا گواہ نکلے

اے کام جاں ہے تو بھی کیا ریجھ کا پچائو

مر جایئے تو منھ سے تیرے نہ واہ نکلے

خوبی و دلکشی میں صدچند ہے تو اس سے

تیرے مقابلے کو کس منھ سے ماہ نکلے

یاں مہر تھی وفا تھی واں جور تھے ستم تھے

پھر نکلے بھی تو میرے یہ ہی گناہ نکلے

غیروں سے تو کہے ہے اچھی بری سب اپنی

اے یار کب کے تیرے یہ خیر خواہ نکلے

رکھتے تو ہو مکدر پر اس گھڑی سے ڈریو

جب خاک منھ پہ مل کر یہ روسیاہ نکلے

اک خلق میر کے اب ہوتی ہے آستاں پر

درویش نکلے ہے یوں جوں بادشاہ نکلے

میر تقی میر

چلتے اس کوچے سے ہم پر سینکڑوں پتھر چلے

اکتوبر 6, 2015میر تقی میر،اساتذہ،غزللشکر،مر،کیدھر،گھر،پتھر،پر،اجگر،بھر،خنجرadmin

دیوان دوم غزل 993

سختیاں کھینچیں سو کھینچیں پھر بھی جو اٹھ کر چلے

چلتے اس کوچے سے ہم پر سینکڑوں پتھر چلے

مارگیری سے زمانے کی نہ دل کو جمع رکھ

چال دھیمی اس کی ایسی ہے کہ جوں اجگر چلے

کیونکے ان کا کوئی وارفتہ بھلا ٹھہرا رہے

جنبش ان پلکوں کو ہوتی ہے کہ جوں خنجر چلے

اب جو وہ سرمایۂ جاں یاں تلک آیا تو کیا

راہ تکتے تکتے اس کی ہم تو آخر مر چلے

میں نہ کہتا تھا دم بسمل مرے مت آئیو

لوٹتے دامن کی اپنے زہ لہو میں بھر چلے

چھوڑ جانا جاں بہ لب ہم کو کہاں کا ہے سلوک

گھر کے گھر یاں بیٹھے جاتے ہیں تم اٹھ کر گھر چلے

صاف سارا شہر اس انبوہ خط میں لٹ گیا

کچھ نہیں رہتا ہے واں جس راہ ہو لشکر چلے

پائوں میں مارا ہے تیشہ میں نے راہ عشق میں

ہو سو ہو اب گوکہ آرا بھی مرے سر پر چلے

لائے تھے جاکر ابھی تو اس گلی میں سے پکار

چپکے چپکے میر جی تم اٹھ کے پھر کیدھر چلے

میر تقی میر

عاشق بے حال دونوں ہاتھ سے دل تھام لے

اکتوبر 6, 2015میر تقی میر،اساتذہ،غزلنام،کام،آرام،احرام،اعلام،تھام،جام،دام،شامadmin

دیوان دوم غزل 992

کب تلک احوال یہ جب کوئی تیرا نام لے

عاشق بے حال دونوں ہاتھ سے دل تھام لے

ناتوانی سے اگر مجھ میں نہیں ہے جی تو کیا

عشق جو چاہے تو مردے سے بھی اپنا کام لے

پہلوے عاشق نہ بستر سے لگے تو ہے بجا

دل سی آفت ہو بغل میں جس کے کیا آرام لے

اب دل نالاں پھر اس زلف سیہ میں جاچکا

آج یہ بیمار دیکھیں کس طرح سے شام لے

شاخ گل تیری طرف جھکتی جو ہے اے مست ناز

چاہتی ہے تو بھی میرے ہاتھ سے اک جام لے

دل کی آسائش نہیں امکان زلف یار میں

یہ شکار مضطرب ہے دم نہ زیر دام لے

عزت اے پیر مغاں کچھ حاجیوں کی ہے ضرور

آئے ہیں تیرے کنے ہم جامۂ احرام لے

کیا بلا مفتی کا لونڈا سر چڑھا ہے ان دنوں

آوے ہے گویا کہ مجھ پر قاضی کا اعلام لے

ہم نشیں کہہ مت بتوں کی میر کو تسبیح ہے

کام کیا اس ذکر سے ان کو خدا کا نام لے

میر تقی میر

اس لیے دیکھ رہا ہے کہ مجھے آگ لگے

اکتوبر 6, 2015میر تقی میر،اساتذہ،غزلناگ،ڈاگ،آگ،بھاگ،جھاگadmin

دیوان دوم غزل 991

غیر کو دیکھے ہے گرمی سے نہ کچھ لاگ لگے

اس لیے دیکھ رہا ہے کہ مجھے آگ لگے

آنکھ ہر ایک کی دوڑے ہے کفک پر تیرے

پائوں سے لگ کے ترے مہندی کو کچھ بھاگ لگے

ہو نہ دیوانہ جو اس گوہر خوش آب کا تو

لب دریا کے تئیں کیوں رہیں یوں جھاگ لگے

اب تو ان گیسوئوں کی یاد میں میں محو ہوا

گو قیامت کو مرے منھ سے ہوں دو ناگ لگے

لڑکے دلی کے ترے ہاتھ میں کب آئے میر

پیچھے ایک ایک کے سو سو پھریں ہیں ڈاگ لگے

میر تقی میر

کیا کیا نہال دیکھتے یاں پائوں آ لگے

اکتوبر 6, 2015میر تقی میر،اساتذہ،غزلہوا،مزہ،کیا،ا،بلا،بھلا،برا،جا،حنا،دعاadmin

دیوان دوم غزل 990

اس باغ بے ثبات میں کیا دل صبا لگے

کیا کیا نہال دیکھتے یاں پائوں آ لگے

حرص و ہوس سے باز رہے دل تو خوب ہے

ہے قہر اس کلی کے تئیں گر ہوا لگے

تلخ اب تو اپنے جی کو بھی لگتی ہے اس نمط

جیسے کسو کے زخم پہ تیر اک دو آ لگے

کس کو خبر ہے کشتی تباہوں کے حال کی

تختہ مگر کنارے کوئی بہ کے جا لگے

ایسے لگے پھرے ہیں بہت سائے کی روش

جانے دے ایسی حور پری سے بلا لگے

وہ بھی چمن فروز تو بلبل ہے سامنے

گل ایسے منھ کے آگے بھلا کیا بھلا لگے

پس جائیں یار آنکھ تری سرمگیں پڑے

دل خوں ہو تیرے پائوں میں بھر کر حنا لگے

بن ہڈیوں ہماری ہما کچھ نہ کھائے گا

ٹک چاشنی عشق کا اس کو مزہ لگے

خط مت رکھو کہ اس میں بہت ہیں قباحتیں

رکھیے تمھارے منھ پہ تو تم کو برا لگے

مقصود کے خیال میں بہتوں نے چھانی خاک

عالم تمام وہم ہے یاں ہاتھ کیا لگے

سب چاہتے ہیں دیر رہے میر دل زدہ

یارب کسو تو دوست کی اس کو دعا لگے

میر تقی میر

دل جو یہ ہے تو ہم آرام نہیں پانے کے

اکتوبر 6, 2015میر تقی میر،اساتذہ،غزللانے،میخانے،مرجانے،ویرانے،گلستانے،گھبرانے،پانے،آنے،دیوانے،دکھلانےadmin

دیوان دوم غزل 989

کتنے روزوں سے نہ سونے کے ہیں نے کھانے کے

دل جو یہ ہے تو ہم آرام نہیں پانے کے

ہائے کس خوبی سے آوارہ رہا ہے مجنوں

ہم بھی دیوانے ہیں اس طور کے دیوانے کے

عزم ہے جزم کہ اب کے حرکت شہر سے کر

ہوجے دل کھول کے ساکن کسو ویرانے کے

آہ کیا سہل گذر جاتے ہیں جی سے عاشق

ڈھب کوئی سیکھ لے ان لوگوں سے مرجانے کے

جمع کرتے ہو جو گیسوے پریشاں کو مگر

ہو تردد میں کوئی تازہ بلا لانے کے

کاہے کو آنکھ چھپاتے ہو یہی ہے گر چال

ایک دو دن میں نہیں ہم بھی نظر آنے کے

ہاتھ چڑھ جائیو اے شیخ کسو کے نہ کبھو

لونڈے سب تیرے خریدار ہیں میخانے کے

خاک سے چرخ تلک اب تو رکا جاتا ہے

ڈول اچھے نہیں کچھ جان کے گھبرانے کے

لے بھی اے غیرت خورشید کہیں منھ پہ نقاب

مقتضی دن نہیں اب منھ کے یہ دکھلانے کے

لالہ و گل ہی کے مصروف رہو ہو شب و روز

تم مگر میر جی سید ہو گلستانے کے

میر تقی میر

دیکھا نہ تم نے ایدھر صرفے سے اک نظر کے

اکتوبر 6, 2015میر تقی میر،اساتذہ،غزلچر،نظر،کمر،کدھر،تر،خبر،در،سفر،سرadmin

دیوان دوم غزل 988

دل خوں ہوا ہمارا ٹکڑے ہوئے جگر کے

دیکھا نہ تم نے ایدھر صرفے سے اک نظر کے

چشمے کہیں ہیں جوشاں جوئیں کہیں ہیں جاری

آثار اب تلک ہیں یاروں کی چشم تر کے

رہنے کی اپنے جا تو نے دیر ہے نہ کعبہ

اٹھیے جو اس کے در سے تو ہوجیے کدھر کے

اس شعر و شاعری پر اچھی بندھی نہ ہم سے

محوخیال شاعر یوں ہی ہیں اس کمر کے

دنیا میں ہے بسیرا یارو سرائے کا سا

یہ رہروان ہستی عازم ہیں سب سفر کے

وے یہ ہی چھاتیاں ہیں زخموں سے جو بھری ہیں

کیا ہے جو بوالہوس نے دوچار کھائے چرکے

تہ بے خودی کی اپنی کیا کچھ ورے دھری ہے

ہم بے خبر ہوئے ہیں پہنچے کسو خبر کے

اس آستاں کی دوری اس دل کی ناصبوری

کیا کہیے آہ غم سے گھر کے ہوئے نہ در کے

خاک ایسی عاشقی میں ٹھکرائے بھی گئے کل

پائوں کنے سے اس کے پر میر جی نہ سرکے

میر تقی میر

اس کی گلی کا ساکن ہرگز ادھر نہ جھانکے

اکتوبر 6, 2015میر تقی میر،اساتذہ،غزلڈھانکے،کے،ٹانکے،پھانکے،بانکے،جھانکےadmin

دیوان دوم غزل 987

خوبی کی اپنی جنت کیسی ہی ڈینگیں ہانکے

اس کی گلی کا ساکن ہرگز ادھر نہ جھانکے

ایک ایک بات اوپر ہیں پیچ و تاب سو سو

رہتے نہیں ہیں سیدھے یہ لونڈے ٹیڑھے بانکے

سر کو اس آستاں پر رکھے رہیں تو بہتر

اٹھیے جو اس کے در سے تو ہوجیے کہاں کے

گردش سے روسیہ کی کیا کیا بلائیں آئیں

جانے ہی کے ہیں لچھن سارے اس آسماں کے

مشتاق ہم جو ایسے سو ہم ہی سے ہے پردہ

جب اس طرف سے نکلے تب منھ کو اپنے ڈھانکے

ہے پرغبار عالم جانا ہی یاں سے اچھا

اس خاکداں میں رہ کر کیا کوئی خاک پھانکے

کل باغ میں گئے تھے روئے چمن چمن ہم

کچھ سرو میں جو پائے انداز اس جواں کے

جاناں کی رہ سے آنکھیں جس تس کی لگ رہی ہیں

رفتہ ہیں لوگ سارے ان پائوں کے نشاں کے

خمیازہ کش رہے ہے اے میر شوق سے تو

سینے کے زخم کے کہہ کیونکر رہیں گے ٹانکے

میر تقی میر

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: