زمرہ جات کے محفوظات: غزل

وہ جو بے رو اس طرف ٹک رو کرے

اکتوبر 6, 2015میر تقی میر،اساتذہ،غزلہو،لوہو،بو،تو،خو،رو،سوadmin

دیوان سوم غزل 1286

کوئی ساحر اس کو کچھ جادو کرے

وہ جو بے رو اس طرف ٹک رو کرے

دور سے ٹک ملتفت ہوتے رہو

جب تلک دوری سے کوئی خو کرے

دم میں ہو آئینۂ عالم سیاہ

ایک اگر عاشق قلندر ہو کرے

کس سے تیری چاہیے داد ستم

کاش انصاف اپنے دل میں تو کرے

غنچہ پیشانی چمن میں میں رہا

بے دماغ عشق گل کیا بو کرے

لوہو پانی ایک کر دیتا ہے عشق

پانی کردے چشم دل لوہو کرے

اب جنوں میں میر سوے دشت جائے

کار وحشت کے تئیں یک سو کرے

میر تقی میر

اس عشق و محبت نے کیا خانہ خرابی کی

اکتوبر 6, 2015میر تقی میر،اساتذہ،غزلکبابی،گلابی،آبی،خرابی،شرابیadmin

دیوان سوم غزل 1285

خوش طرح مکاں دل کے ڈھانے میں شتابی کی

اس عشق و محبت نے کیا خانہ خرابی کی

سسکے ہے دل ایدھرکو بہتا ہے جگر اودھر

چھاتی ہوئی ہے میری دکان کبابی کی

وہ نرگس مستانہ باتیں کرے ہے درہم

تم دیکھو نہ کچھ بولو کیا بات شرابی کی

بے سدھ ہوئے ہم آئی اک بو جو گلستاں سے

پرزور تھی مے کتنی غنچوں کی گلابی کی

رونے سے دل شب کے تر میر کے کپڑے ہیں

پر قدر نہیں اس کو اس جامۂ آبی کی

میر تقی میر

جوں ہم جلا کریں ہیں بھلا جلتے کب ہیں یے

اکتوبر 6, 2015میر تقی میر،اساتذہ،غزلکڈھب،کب،اب،ادب،سبب،عجب،غضبadmin

دیوان سوم غزل 1284

برق و شرار و شعلہ و پروانہ سب ہیں یے

جوں ہم جلا کریں ہیں بھلا جلتے کب ہیں یے

لے موے سر سے ناخن پا تک بھری ہے آگ

جلتے ہیں دردمند پہ جلتے کڈھب ہیں یے

ہوتا ہے دل کا حال عجب غم سے اس گھڑی

کہتا ہے جب وہ طنز سے ہم کو عجب ہیں یے

آتی ہے گرم باد صبا اس کی اور سے

اپنے جگر کے جلنے کے بارے سبب ہیں یے

غربت پہ مہرباں ہوئے میری سو یہ کہا

ان کو غریب کوئی نہ سمجھے غضب ہیں یے

فرہاد و قیس کے گئے کہتے ہیں اب یہ لوگ

رکھے خدا سلامت انھوں کو کہ اب ہیں یے

سید ہیں میر صاحب و درویش و دردمند

سر رکھیے ان کے پائوں پہ جاے ادب ہیں یے

میر تقی میر

افسوس ہے کہ آکر یوں مینھ ٹک نہ برسے

اکتوبر 6, 2015میر تقی میر،اساتذہ،غزلبرسے،ترسے،سےadmin

دیوان سوم غزل 1283

کل جوش غم میں آنسو ٹپکے نہ چشم تر سے

افسوس ہے کہ آکر یوں مینھ ٹک نہ برسے

کیا ہے نمود مردم جو کہیے دیکھیو تم

مژگاں بہم زدن میں جاتی رہی نظر سے

ہم سا شکستہ خاطر اس بستی میں نہ ہو گا

برسے ہے عشق اپنے دیوار اور در سے

معلوم اگلی سی تو جرأت الم کشی میں

کیا کام نکلے گا اب ٹکڑے ہوئے جگر سے

آئینہ دار اسی کے پاتے ہیں شش جہت کو

دیکھیں تو منھ دکھاوے وہ کام جاں کدھر سے

مت رنج کھینچ مل کر ہشیار مردماں سے

اس کی خبر ملے گی اک آدھ بے خبر سے

جب گوش زد ہو اس کے تب بے دماغ ہو وہ

بس ہوچکی توقع اب نالۂ سحر سے

اے رشک مہ کبھو تو آ چاند سا نکل کر

منھ دیکھنے کو تیرا تا چند کوئی ترسے

چاہت بری بلا ہے کل میر نالہ کش بھی

ہمراہ نے سواراں دوڑے پھرے نفر سے

میر تقی میر

پر یہ کہا نہ ظالم اس کی نہیں سہی ہے

اکتوبر 6, 2015میر تقی میر،اساتذہ،غزلوہی،کہی،کوتہی،افسرشہی،بہی،تہی،رہی،سہیadmin

دیوان سوم غزل 1282

صدگونہ عاشقی میں ہم نے جفا سہی ہے

پر یہ کہا نہ ظالم اس کی نہیں سہی ہے

کرتی پھری ہے رسوا سارے چمن میں مجھ کو

گر کوئی بات دل کی بلبل سے میں کہی ہے

ہے صبح کا سا عرصہ پیری کا اس میں کیا ہو

باقی ہے وقت کتنا فرصت کہاں رہی ہے

درویش جب ہوئے ہم تب ہے ہمیں برابر

کشکول بازگوں ہے یا افسرشہی ہے

جیتے رہے بہت ہم جو یہ ستم اٹھائے

عمر دراز کی سب تقصیر و کوتہی ہے

رونے میں متصل ہے ہونٹوں پہ آہ میری

جاتا نہیں ہے سمجھا یہ بائو کیا بہی ہے

آزار عاشقی میں کاہے کی پھر توقع

ہوجائے یاس جس سے سو رنج یہ وہی ہے

روتا ہمیں نظر کر رہنا کیے کنارہ

چڑھنا ہمارے منھ پہ دریا کی بے تہی ہے

چلاہٹ اس طرح کی جز میر کس سے ہووے

باور نہ ہو تو دیکھو یہ ہو نہ ہو وہی ہے

میر تقی میر

لے زمیں سے تا فلک فریاد و زاری کیجیے

اکتوبر 6, 2015میر تقی میر،اساتذہ،غزلہماری،یاری،گذاری،بردباری،تیمارداری،جاری،دستکاری،زاری،ساریadmin

دیوان سوم غزل 1281

شب اگر دل خواہ اپنے بے قراری کیجیے

لے زمیں سے تا فلک فریاد و زاری کیجیے

ایک دن ہو تو کریں احوال گیری دل کی آہ

مر گئے ہم کب تلک تیمارداری کیجیے

نوچیے ناخن سے منھ یا چاک کریے سب جگر

جی میں ہے آگے ترے کچھ دستکاری کیجیے

جایئے اس شہر ہی سے اب گریباں پھاڑ کر

کیجیے کیا غم سے یوں ماتم گذاری کیجیے

یوں بنے کب تک کہ بے لعل لب اس کے ہر گھڑی

چشمہ چشمہ خون دل آنکھوں سے جاری کیجیے

کنج لب اس شوخ کا بھی ریجھنے کی جاے ہے

صرف کیجے عمر تو اس جاے ساری کیجیے

کوہ غم سر پر اٹھا لیجے نہ کہیے منھ سے کچھ

عشق میں جوں کوہکن کچھ بردباری کیجیے

گرچہ جی کب چاہتا ہے آپ کا آنے کو یاں

پر کبھو تو آئیے خاطر ہماری کیجیے

آشنا ہو اس سے ہم مر مر گئے آئندہ میر

جیتے رہیے تو کسو سے اب نہ یاری کیجیے

میر تقی میر

کیا قیامت کا قیامت شور ہے

اکتوبر 6, 2015میر تقی میر،اساتذہ،غزلچور،ڈور،گور،زور،شورadmin

دیوان سوم غزل 1280

گوش ہر یک کا اسی کی اور ہے

کیا قیامت کا قیامت شور ہے

پوچھنا اس ناتواں کا خوب تھا

پر نہ پوچھا ان نے وہ بھی زور ہے

صندل درد سر مہر و وفا

عاقبت دیکھا تو خاک گور ہے

رشتۂ الفت تو نازک ہے بہت

کیا سمجھ کر خلق اس پر ڈور ہے

ناکسی سے میر اس کوچے کے بیچ

اس طرح نکلے ہے جیسے چور ہے

میر تقی میر

عجب مرحلہ ہم کو درپیش ہے

اکتوبر 6, 2015میر تقی میر،اساتذہ،غزلنیش،کیش،اندیش،درویش،درپیشadmin

دیوان سوم غزل 1279

غم مرگ سے دل جگر ریش ہے

عجب مرحلہ ہم کو درپیش ہے

بلا ہے اسے شوق تیر و کماں

یہیں سے ہے پیدا ستم کیش ہے

دلا اس کے ظاہر پہ مت جائیو

وہ خوش رو تو ہے پر بد اندیش ہے

بہت خوب ہے لعل نوشین یار

ولیکن خط پشت لب نیش ہے

ہمیں کیا جو ہے میر بیہوش سا

خدا جانے یہ کیا ہی درویش ہے

میر تقی میر

اک ایک کو نہیں پھر غیرت سے دیکھ سکتے

اکتوبر 6, 2015میر تقی میر،اساتذہ،غزللچکتے،لپکتے،ڈھلکتے،کھٹکتے،بہکتے،بکتے،جھمکتے،دھڑکتے،سکتےadmin

دیوان سوم غزل 1278

دو دیدئہ تر اپنے جو یار کو ہیں تکتے

اک ایک کو نہیں پھر غیرت سے دیکھ سکتے

حرکت دلوں کی اپنے مذبوحی سی رہے ہے

اب وہ نہیں کہ دھڑ دھڑ رہتے ہیں دل دھڑکتے

پلکوں کی اس کی جنبش جاتی نہیں نظر سے

کانٹے سے اپنے دل میں رہتے ہیں کچھ کھٹکتے

ہوتا تھا گاہ گاہے محسوس درد آگے

اب دل جگر ہمارے پھوڑے سے ہیں لپکتے

پڑتی ہیں ایدھر اودھر وے سرخ آنکھیں ایسی

دو ترک مست جیسے ہوں راہ میں بہکتے

شعلوں کے ڈانک گویا لعلوں تلے دھرے ہیں

چہروں کے رنگ ہم نے دیکھے ہیں کیا جھمکتے

یاں بات راہ کی تو سنتا نہیں ہے کوئی

جاتے ہیں ہم جرس سے اس قافلے میں بکتے

جاگہ سے لے گئے ہیں نازاں جب آگئے ہیں

نوباوگان خوبی جوں شاخ گل لچکتے

اس حسن سے کہاں ہے غلطانی موتیوں کی

جس خوبصورتی سے میر اشک ہیں ڈھلکتے

میر تقی میر

سبزی بہت لگی ہے منھ سے پیارے تیرے

اکتوبر 6, 2015میر تقی میر،اساتذہ،غزلمارے،پیارے،پارے،بارے،سارےadmin

دیوان سوم غزل 1277

اے نوخط ایک دن ہے جھگڑا ہمارے تیرے

سبزی بہت لگی ہے منھ سے پیارے تیرے

حیران حال عاشق ہو گی اجل پہنچ کر

کیا حال یاں رہا ہے ظلموں کے مارے تیرے

ہر بار دیکھے ہے تو ایدھر ہی آہ شب نے

کچھ تو اثر کیا ہے جی میں بھی بارے تیرے

باغ و بہار و نکہت گل پھول سب ہی تو ہے

یاروں کی ہیں نظر میں یہ رنگ سارے تیرے

الماس میر تجھ کو کیا عشق نے دیا ہے

لخت جگر گرے ہیں جوں لعل پارے تیرے

میر تقی میر

تو میاں مجنوں بیاباں سے گئے

اکتوبر 6, 2015میر تقی میر،اساتذہ،غزلپریشاں،ایماں،بیاباں،جاں،سانadmin

دیوان سوم غزل 1276

یوں جنوں کرتے جو ہم یاں سے گئے

تو میاں مجنوں بیاباں سے گئے

مر گئے دم کب تلک رکتے رہیں

بارے جی کے ساتھ سب سانسے گئے

کیا بدن دیکھا چسی چولی سے ہائے

مارے حسرت کے ہی ہم جاں سے گئے

جانب مسجد تھی وہ کافر نگاہ

شیخ صاحب دین و ایماں سے گئے

پیچ میں آئے کسو کی زلف کے

میر اس رستے پریشاں سے گئے

میر تقی میر

رات دن ہم امیدوار رہے

اکتوبر 6, 2015میر تقی میر،اساتذہ،غزلہوشیار،قرار،امیدوار،اختیار،خار،درکنار،شکارadmin

دیوان سوم غزل 1275

برسوں تک جی کو مار مار رہے

رات دن ہم امیدوار رہے

موسم گل تلک رہے گا کون

چبھتے ہی دل کو خار خار رہے

وصل یا ہجر کچھ ٹھہر جاوے

دل کو اپنے اگر قرار رہے

خوش نوا کیسے کیسے طائر قدس

اس جفا پیشہ کے شکار رہے

اس کی آنکھوں کی مستی سے عاشق

چاہیے یوں کہ ہوشیار رہے

دل لگے پر رہا نہیں جاتا

رہیے اپنا جو اختیار رہے

کم ہے کیا لذت ہم آغوشی

سب مزے میر درکنار رہے

میر تقی میر

مرا دامن بنے تو باندھ دو گل کے گریباں سے

اکتوبر 6, 2015میر تقی میر،اساتذہ،غزلمہماں،گریاں،گریباں،پریشاں،جاں،حیراں،ساماںadmin

دیوان سوم غزل 1274

بہار آئی نکالو مت مجھے اب کے گلستاں سے

مرا دامن بنے تو باندھ دو گل کے گریباں سے

نہ ٹک واشد ہوئی دل کو نہ جی کی لاگ کچھ پائی

رہے دس دن جو اپنی عمر کے یاں ہم سو مہماں سے

غم ہجراں نے شاید آگ دی اس ماہ بن دل کو

شرارے تب تو نکلے ہیں ہماری چشم گریاں سے

سبب آشفتہ طبعی کا ہماری رہتے ہیں دونوں

نہ دل جمعی ہے اس کے خط سے نے زلف پریشاں سے

ادھر زنجیر کے غل ہیں ادھر ہنگامے لڑکوں کے

جنوں اس دشت میں ہم نے کیا ہے کیسے ساماں سے

محبت میں کسو کی رنج و محنت سے گئے دونوں

رہی شرمندگی ہی عمر بھر مجھ کو دل و جاں سے

خدا جانے کہ دل کس خانہ آباداں کو دے بیٹھے

کھڑے تھے میر صاحب گھر کے دروازے پہ حیراں سے

میر تقی میر

منھ پھیرے وہ تو ہم کو پھر کون منھ لگاوے

اکتوبر 6, 2015میر تقی میر،اساتذہ،غزللگاوے،لاوے،پاوے،آوے،اٹھاوے،بناوے،جگاوے،جاوے،دکھاوےadmin

دیوان سوم غزل 1273

ہوں خاک پا جو اس کی ہر کوئی سر چڑھاوے

منھ پھیرے وہ تو ہم کو پھر کون منھ لگاوے

ان دو ہی صورتوں میں شکل اب نباہ کی ہے

یا صبر ہم کو آوے یا رحم اس کو آوے

اس مہ بغیر عالم آنکھوں میں سب سیہ ہے

دیکھیں تو عشق کیا کیا ہم کو سمیں دکھاوے

کچھ زخم کھل چلے ہیں کچھ داغ کھل رہے ہیں

اب کے بہار دیکھیں کیا کیا شگوفے لاوے

جوں لیلیٰ اور مجنوں تا نقش کچھ رہے یاں

اس کی مری بھی صورت یک جا کوئی بناوے

یہ طرح دار لڑکے دیں بیٹھنے تب اس کو

جب جی سے اپنے کوئی ہر طرح دل اٹھاوے

ہم جس زمیں پہ آئے واں آسماں یہی تھا

یارب جو کوئی جاوے تو کس طرف کو جاوے

شب سنتے حال میرا لیتا ہے موند آنکھیں

مچلے سے میں کہوں کیا سوتا ہو تو جگاوے

طاعت کا محو تب ہے جب ڈھب نہیں بتوں سے

چھوڑے نماز واجب گر میر وقت پاوے

میر تقی میر

یہ بات اک بے خودی میں منھ پر آئی

اکتوبر 6, 2015میر تقی میر،اساتذہ،غزلہوائی،لگائی،لائی،وفائی،پائی،اوائی،آئی،آشنائی،جدائی،خودنمائی،رہائی،زورآزمائیadmin

دیوان سوم غزل 1272

کہی میں ان لبوں کی جاں فزائی

یہ بات اک بے خودی میں منھ پر آئی

تعارف کیا رہا اہل چمن سے

ہوئی اک عمر میں اپنی رہائی

کہاں کا بے ستوں فرہاد کیسا

یہ سب تھی عشق کی زورآزمائی

جفا اٹھتی وفا جو عمر کرتی

سو کی اس رفتنی نے بے وفائی

کہیں سو کیا کہیں سر پر ہمارے

قیامت شامت اعمال لائی

گیا اس ترک کی آمد کو سن جی

تھمی ہم سے نہ اک دم بھی اوائی

موافق ٹک ہو تو تو پھر جہاں میں

مثل ہو میری تیری آشنائی

بغیر از چہرئہ مہتابی یار

ہمارے منھ پہ چھوٹے ہے ہوائی

گئی ٹکڑے ہو دل کی آرسی تو

ہوئی صدچند اس کی خودنمائی

فراق یار کو آساں نہ سمجھو

کہ جان و تن کی مشکل ہے جدائی

پھر آنا کعبے سے اپنا نہ ہو گا

اب اس کے گھر کی ہم نے راہ پائی

ہوئے ہیں درد دل سے میر کے تنگ

پھر اس جوگی نے یاں دھونی لگائی

میر تقی میر

عاشق کہاں ہوئے کہ گنہگار ہم ہوئے

اکتوبر 6, 2015میر تقی میر،اساتذہ،غزلگنہگار،گرفتار،بیمار،خبردار،خریدار،سزاوار،طلبگارadmin

دیوان سوم غزل 1271

شائستۂ غم و ستم یار ہم ہوئے

عاشق کہاں ہوئے کہ گنہگار ہم ہوئے

کی عرض جو متاع امانت ازل کے بیچ

سب اور لے سکے نہ خریدار ہم ہوئے

جی کھنچ گیا اسیرقفس کی فغاں کی اور

تھی چوٹ اپنے دل کو گرفتار ہم ہوئے

پامال یوں کیا کہ برابر ہیں خاک کے

کیا ظلم ہو گیا جو طلبگار ہم ہوئے

ہوتا نہیں ہے بے خبری کا مآل خوب

افسوس ہے کہ دیر خبردار ہم ہوئے

وصل اس طبیب زادے کا جی چاہتا رہا

آخر اس آرزو ہی میں بیمار ہم ہوئے

پھل ہے یہ میر عشق کا اس نوبہار کے

آخر جو کشت و خوں کے سزاوار ہم ہوئے

میر تقی میر

ہم کو یہ تیر ماہ جاتا ہے

اکتوبر 6, 2015میر تقی میر،اساتذہ،غزلملاتا،چھپاتا،کھاتا،اٹھاتا،بناتا،بھاتا،جاتاadmin

دیوان سوم غزل 1270

تیر جوڑے وہ ماہ آتا ہے

ہم کو یہ تیر ماہ جاتا ہے

گل کو سر پر رکھیں سبھی لیکن

اب دماغ اپنا کب اٹھاتا ہے

اپنا اپنا ہے ذائقہ ہم کو

بوسۂ کنج لب ہی بھاتا ہے

آتش عشق جس کے دل کو لگے

شمع ساں آپ ہی کو کھاتا ہے

دیکھنا ہے تو ہے بہم پر وہ

ہم سے آنکھوں کو کب ملاتا ہے

میری تو ہے پلک سے چھوٹی نگاہ

اور وہ اس پہ منھ چھپاتا ہے

میر صناع ہے ملو اس سے

دیکھو تو باتیں کیا بناتا ہے

میر تقی میر

خبر ہوتے ہی ہوتے دل جگر دونوں جلا دیوے

اکتوبر 6, 2015میر تقی میر،اساتذہ،غزلہوا،ملا،بتا،جلا،جھکا،جا،خداadmin

دیوان سوم غزل 1269

کہیں آگ آہ سوزندہ نہ چھاتی میں لگا دیوے

خبر ہوتے ہی ہوتے دل جگر دونوں جلا دیوے

بہت روئے ہمارے دیدئہ تر اب نہیں کھلتے

متاع آب دیدہ ہے کوئی اس کو ہوا دیوے

تمھارے پائوں گھر جانے کو عاشق کے نہیں اٹھتے

تم آئو تو تمھیں آنکھوں پہ سر پر اپنے جا دیوے

دلیل گم رہی ہے خضر جو ملتا ہے جنگل میں

پھرے ہے آپھی بھولا کیا ہمیں رستہ بتا دیوے

گئے ہی جی کے فیصل ہو نیاز و ناز کا جھگڑا

کہیں وہ تیغ کھینچے بھی کہ بندہ سر جھکا دیوے

لڑائی ہی رہی روزوں میں باہم بے دماغی سے

گلے سے اس کے ہم کو عید اب شاید ملا دیوے

ہوا میں میر جو اس بت سے سائل بوسۂ لب کا

لگا کہنے ظرافت سے کہ شہ صاحب خدا دیوے

میر تقی میر

ہے وہی بات جس میں ہو تہ بھی

اکتوبر 6, 2015میر تقی میر،اساتذہ،غزلمہ،وہ،یہ،گہ،بہ،تہ،رہadmin

دیوان سوم غزل 1268

جی کے لگنے کی میر کچھ کہہ بھی

ہے وہی بات جس میں ہو تہ بھی

حسن اے رشک مہ نہیں رہتا

چار دن کی ہے چاندنی یہ بھی

شور شیریں تو ہے جہاں میں ولے

ہے حلاوت زمانے کی وہ بھی

اس کے پنجے سے دل نکل نہ سکا

زور بیٹھی ہی یار کی گہ بھی

اس زمیں گرد میرے مہ سا نہیں

آسماں پر اگرچہ ہے مہ بھی

کیا کہوں اس کی زلف بن رو رو

میں پراگندہ دل گیا بہ بھی

مضطرب ہو جو ہمرہی کی میر

پھر کے بولا کہ بس کہیں رہ بھی

میر تقی میر

ہرچند کہ گل شگفتہ پیشانی ہے

اکتوبر 6, 2015میر تقی میر،اساتذہ،غزلمانی،نادانی،پیشانی،افشانی،حیرانی،روحانی،سیلانیadmin

دیوان سوم غزل 1267

سب شرم جبین یار سے پانی ہے

ہرچند کہ گل شگفتہ پیشانی ہے

سمجھے نہ کہ بازیچۂ اطفال ہوئے

لڑکوں سے ملاقات ہی نادانی ہے

جوں آئینہ سامنے کھڑا ہوں یعنی

خوبی سے ترے چہرے کی حیرانی ہے

خط لکھتے جو خوں فشاں تھے ہم ان نے کہا

کاغذ جو لکھے ہے اب سو افشانی ہے

دوزخ میں ہوں جلتی جو رہے ہے چھاتی

دل سوختگی عذاب روحانی ہے

منت کی بہت تو ان نے دو حرف کہے

سو برسوں میں اک بات مری مانی ہے

کل سیل سا جوشاں جو ادھر آیا میر

سب بولے کہ یہ فقیر سیلانی ہے

میر تقی میر

اچھے ہوتے نہیں جگر خستے

اکتوبر 6, 2015میر تقی میر،اساتذہ،غزلہنستے،چستے،بستے،خستے،دستے،رستے،سستےadmin

دیوان سوم غزل 1266

ہم پہ رہتے ہو کیا کمر کستے

اچھے ہوتے نہیں جگر خستے

ہنستے کھینچا نہ کیجیے تلوار

ہم نہ مر جائیں ہنستے ہی ہنستے

شوق لکھنے قلم جو ہاتھ آئی

لکھے کاغذ کے دستے کے دستے

سیر قابل ہیں تنگ پوش اب کے

کہنیاں پھٹتے چولیاں چستے

رنگ لیتی ہے سب ہوا اس کا

اس سے باغ و بہار ہیں رستے

اک نگہ کر کے ان نے مول لیا

بک گئے آہ ہم بھی کیا سستے

میر جنگل پڑے ہیں آج جہاں

لوگ کیا کیا نہیں تھے کل بستے

میر تقی میر

کر نہیں بنتی کسو سے جو بنے

اکتوبر 6, 2015میر تقی میر،اساتذہ،غزلچھنے،کنے،ٹھنے،بنے،جنےadmin

دیوان سوم غزل 1265

میر کیوں رہتے ہیں اکثر ان منے

کر نہیں بنتی کسو سے جو بنے

خون ہو کر بہ گیا مدت ہوئی

دل جو ڈھونڈو ہو سو کیسا کس کنے

ہے تو کل جب سے ہم درویش ہیں

کر ہی چکتے ہیں جو کچھ دل میں ٹھنے

عالم خاکی بھی بسمل گاہ ہے

ہو رہے ہیں ڈھیر یاں سو سو جنے

اس شکارافگن کے ہم بھی صید ہیں

خاک و خوں میں لوٹتے چھاتی چھنے

میر تقی میر

آخر کو روتے روتے پریشاں ہو بہ گئے

اکتوبر 6, 2015میر تقی میر،اساتذہ،غزلڈھہ،کہہ،بہ،رہ،سہadmin

دیوان سوم غزل 1264

آنکھوں سے راہ عشق کی ہم جوں نگہ گئے

آخر کو روتے روتے پریشاں ہو بہ گئے

اس عرصے سے گیا ہو کہیں کوئی تو کہیں

چل پھر کے لوگ یاں کے یہیں سارے رہ گئے

کیا کیا ہوئے ہیں اہل زماں ڈھیر خاک کے

کیا کیا مکان دیکھتے ناگاہ ڈھہ گئے

ان دلبروں سے کیا کہیں مظلوم عشق ہم

ناچار ظلم و جور و ستم ان کے سہ گئے

تسبیحیں ٹوٹیں خرقے مصلے پھٹے جلے

کیا جانے خانقاہ میں کیا میر کہہ گئے

میر تقی میر

طوفان سا شہروں میں ہے اک شور دریا پر بھی ہے

اکتوبر 6, 2015میر تقی میر،اساتذہ،غزلپیدا،ادنی،دنیا،دریا،سوداadmin

دیوان سوم غزل 1263

آشوب چشم چشمہ زا اب کوہ و صحرا پر بھی ہے

طوفان سا شہروں میں ہے اک شور دریا پر بھی ہے

گو چشم بندی شیخ کی ہو آخرت کے واسطے

لیکن نظر اعمیٰ نمط پردے میں دنیا پر بھی ہے

نے دست مزد بندگی نے قدر سرافگندگی

جو مکرمت ہم پر ہوئی اب جلف و ادنیٰ پر بھی ہے

تنگ آن کر گم ہو گئے مقصود جو مقصود تھا

ہم خرج رہ کیونکر نہ ہوں پیدا ہی پیدا پر بھی ہے

ہیں خوبیاں ہی خوبیاں وحشی طبیعت میر میں

پر انس کم ہم سے دلیل اب کے یہ سودا پر بھی ہے

میر تقی میر

دل اپنا تو بجھا سا دیا ہے جان چراغ مضطر ہے

اکتوبر 6, 2015میر تقی میر،اساتذہ،غزلقلندر،مضطر،کیدھر،ٹکر،پتھر،بہترadmin

دیوان سوم غزل 1262

دیکھیے کیا ہو سانجھ تلک احوال ہمارا ابتر ہے

دل اپنا تو بجھا سا دیا ہے جان چراغ مضطر ہے

خاطر اپنی اتنی پریشاں آنکھیں پھریں ہیں اس بن حیراں

تم نے کہا دل چاہے تو بیٹھو دل کیا جانے کیدھر ہے

تاب و تواں کا حال وہی ہے آج تنک ہم چیتے ہیں

تم پوچھو تو اور کہیں کیا نسبت کل کی بہتر ہے

اس بے مہر صنم کی خاطر سختی سی سختی کھینچی ہم

جی پگھلے کیا اس کا ہم پر رحم کہاں وہ پتھر ہے

سر نہ بڑے کے چڑھیے اس میں ہرگز زیاں ہے سر ہی کا

سمجھے نہ سمجھے کوئی اسے یہ پہاڑ کی آخر ٹکر ہے

جب سے ملا اس آئینہ رو سے خوش کی ان نے نمد پوشی

پانی بھی دے ہے پھینک شبوں کو میر فقیر قلندر ہے

میر تقی میر

نکہت گل سے آشنا نہ ہوئے

اکتوبر 6, 2015میر تقی میر،اساتذہ،غزلکیا،آشنا،ادا،خدا،رہاadmin

دیوان سوم غزل 1261

ہم چمن میں گئے تھے وا نہ ہوئے

نکہت گل سے آشنا نہ ہوئے

سر کسو سے فرو نہیں آتا

حیف بندے ہوئے خدا نہ ہوئے

خوار و زار و ذلیل و بے رویت

عاشق اس کے ہوئے سو کیا نہ ہوئے

کیسا کیسا قفس سے سر مارا

موسم گل میں ہم رہا نہ ہوئے

میں نہ گردن کٹائی جب تک میر

عشق کے مجھ سے حق ادا نہ ہوئے

میر تقی میر

ٹھنڈا دل اب ہے ایسا جیسے بجھا دیا ہے

اکتوبر 6, 2015میر تقی میر،اساتذہ،غزلبادیہ،دیاadmin

دیوان سوم غزل 1260

سوز دروں نے آخر جی ہی کھپا دیا ہے

ٹھنڈا دل اب ہے ایسا جیسے بجھا دیا ہے

اب نیند کیونکے آوے گرمی نے عاشقی کی

دل ہے جدھر وہ پہلو سارا جلا دیا ہے

حرف غلط تھے کیا ہم صفحے پہ زندگی کے

جو صاف یوں قضا نے ہم کو مٹا دیا ہے

کڑھتے ہمیشہ رہنا ہم کو بغیر اس کے

کیا روگ دوستی نے جی کو لگا دیا ہے

اچرج ہے یہ کہ ہے وہ میرا چراغ تربت

کتنوں کا ورنہ خوں کر ان نے دبا دیا ہے

آنکھوں کی کچھ حیا تھی سو موند لیں ادھر سے

پردہ جو رہ گیا تھا وہ بھی اٹھا دیا ہے

ہم دل زدہ رہے ہیں انواع تلخ سنتے

ان شکریں لبوں نے ہم کو رجھا دیا ہے

جب طول میں دیا ہے نامے کو شوق کے تب

جوں کاغذ ہوائی ان نے اڑا دیا ہے

مرنے ہی کا مہیا اپنے رہا کیا ہوں

واں تیغ اٹھائی ان نے یاں سر جھکا دیا ہے

کیا بے نمک ہوا ہے پروانہ راکھ جل کر

رہ رہ کے ہم جلے تو ہم کو مزہ دیا ہے

تھے جوں چراغ مفلس مضطر نہ ترک تھا جب

بارے فقیری نے تو آرام سا دیا ہے

شہروں کے تنگ کوچے کاہے کو گوں ہیں اپنی

ہم وحشیوں کے قابل رہنے کے بادیہ ہے

نادردمند بلبل نالاں ہے بے تہی سے

دل ہم کو بھی خدا نے دردآشنا دیا ہے

کیا نامہ بر ہمارا ہے صاف بے مروت

خط نانوشتہ ہم کو اودھر سے لا دیا ہے

عالم شکار ہے وہ اس سن میں میر اس کو

ڈھب جان مارنے کا کن نے بتا دیا ہے

میر تقی میر

سب لوگوں میں ہیں لاگیں یاں محض فقیری ہے

اکتوبر 6, 2015میر تقی میر،اساتذہ،غزلفقیری،چیری،پذیری،امیری،اسیری،دھیری،ضمیریadmin

دیوان سوم غزل 1259

اب تک تو نبھی اچھی اب دیکھیے پیری ہے

سب لوگوں میں ہیں لاگیں یاں محض فقیری ہے

کیا دھیر بندھے اس کی جو عشق کا رسوا ہو

نکلے تو کہیں لڑکے دھیری ہے بے دھیری ہے

خوں عشق کی گرمی سے سوکھا جگر و دل میں

اک بوند تھی لوہو کی اب چھاتی جو چیری ہے

ہم طائر نوپر ہیں وے جن کو بہاراں میں

گل گشت گلستاں کا ہے شوق و اسیری ہے

اس دلبر بدظن سے خوش گذرے ہے عاشق کی

نے رحم ہے خاطر میں نے عذر پذیری ہے

ہم مرثیہ دل ہی کا اکثر کہا کرتے ہیں

اب کریے تخلص تو شائستہ ضمیریؔ ہے

کیا اہل دول سے ہے اے میر مجھے نسبت

یاں عجز و فقیری ہے واں ناز امیری ہے

میر تقی میر

دور سے دیکھ لیا اس کو تو جی مار رہے

اکتوبر 6, 2015میر تقی میر،اساتذہ،غزلہار،مار،یار،آزار،بیزارadmin

دیوان سوم غزل 1258

برسوں گذرے ہیں ملے کب تئیں یوں پیار رہے

دور سے دیکھ لیا اس کو تو جی مار رہے

وہ مودت کہ جو قلبی ہو اسے سو معلوم

چار دن کہنے کو اس شوخ سے ہم یار رہے

مرگ کے حال جدائی میں جئیں یوں کب تک

جان بیتاب رہے دل کو اک آزار رہے

وجہ یہ تھی کہ ترے ساتھ لڑی آنکھ اس کی

ہم جو صورت سے تھے آئینے کی بیزار رہے

دین و دنیا کا زیاں کار کہو ہم کو میر

دو جہاں داونخستیں ہی میں ہم ہار رہے

میر تقی میر

تصویر چیں کی روبرو اس کے ذلیل ہے

اکتوبر 6, 2015میر تقی میر،اساتذہ،غزلفیل،قلیل،قیل،ڈھیل،کریل،جمیل،جھیل،دلیل،دخیل،ذلیل،سبیلadmin

دیوان سوم غزل 1257

ناز و ادا کے ساتھ وہ دلبر شکیل ہے

تصویر چیں کی روبرو اس کے ذلیل ہے

ہم خاک منھ کو مل کے نہ جوں آرسی پھرے

یاں پاس قرط آب اگر ہے سبیل ہے

جنگل میں خضرؑ و کعبہ کا ہونا مری طرح

دونوں کی نارسائی کے اوپر دلیل ہے

آگے جنوں سے چھائوں میں تھے سرو و گل کی ہم

سر پر ہمارے سایہ فگن اب کریل ہے

کچھ چیز و مال ہو تو خریدار ہو کوئی

دنیا کی قدر کیا کہ متاع قلیل ہے

کیا روئوں اشک آتے ہیں آنکھوں سے سیل سیل

پل مارنے میں پیش نظر ایک جھیل ہے

آتے نہیں نظر میں مری ہاتھی کے سوار

کانوں میں جو فسانۂ اصحاب فیل ہے

ہو صبر اس جو یوسف ثانی کے بے جمال

تو مصحف مجید میں صبر جمیل ہے

شکر و گلہ سے عشق کے لبریز ہے جہاں

کریے جہاں نگاہ یہی قال و قیل ہے

ہم دیر سے ہیں منتظر قدکشی یار

کچھ شامت عمل سے قیامت میں ڈھیل ہے

جب دیکھتے ہیں میر تمھیں بے دماغ ہو

کاہے کو ناز عشق میں صاحب دخیل ہے

میر تقی میر

نوگل جیسے جلوہ کرے اس رشک بہار کو دیکھا ہے

اکتوبر 6, 2015میر تقی میر،اساتذہ،غزلہزار،نہار،بہار،بیمار،زنار،سردار،شکارadmin

دیوان سوم غزل 1256

کیسے ناز و تبختر سے ہم اپنے یار کو دیکھا ہے

نوگل جیسے جلوہ کرے اس رشک بہار کو دیکھا ہے

چال زمانے کی ہے نظر میں شام و سحر کس کو ہے قیام

نووارد ہم یاں کے ہیں پر لیل و نہار کو دیکھا ہے

ایک نہ آیا دید میں اپنی دلکش دلچسپ اس کے رنگ

ان آنکھوں سے اس گلشن میں یوں تو ہزار کو دیکھا ہے

قدرکفر اسلام سے زائد جانی سبحہ فروشی سے

بکتے کہیں بازار میں تونے گہ زنار کو دیکھا ہے

قلب و دماغ و جگر کے گئے پر ضعف ہے جی کی غارت میں

کیا جانے یہ قلقچی ان نے کس سردار کو دیکھا ہے

بائو سے بھی گر پتا کھڑکے چوٹ چلے ہے ظالم کی

ہم نے دام گہوں میں اس کے ذوق شکار کو دیکھا ہے

جمع کرو دل میر سے تم بھی بیتابی تھی دل کو بہت

اچھے کچھ آثار نہ تھے میں اس بیمار کو دیکھا ہے

میر تقی میر

دھوم رہی ہے سر پر میرے رنج و عتاب و کلفت کی

اکتوبر 6, 2015میر تقی میر،اساتذہ،غزلفرصت،قیامت،قسمت،منت،مدت،مروت،کلفت،دولت،رخصت،صحبت،عزتadmin

دیوان سوم غزل 1255

کیسے نحس دنوں میں یارب میں نے اس سے محبت کی

دھوم رہی ہے سر پر میرے رنج و عتاب و کلفت کی

میں تو سرو و شاخ گل کی قطع ہی کا دیوانہ تھا

یار نے قد قامت دکھلاکر سر پر میرے قیامت کی

قسمت میں جو کچھ کہ بدا ہو دیتے ہیں وہ ہی انساں کو

غم غصہ ہی ہم کو ملا ہے خوبی اپنی قسمت کی

خلوت یار ہے عالم عالم ایک نہیں ہے ہم کو بار

در پر جاکر پھر آتے ہیں خوب ہماری عزت کی

اک گردن سے سو حق باندھے کیا کیا کریے ہوں جو ادا

مدت اس پر ایک نفس جوں صبح ہماری فرصت کی

شیوہ اس کا قہر و غضب ہے ناز و خشم و ستم وے سب

کوئی نگاہ لطف اگر کی ان نے ہم سے مروت کی

بے پروائی درویشی کی تھوڑی تھوڑی تب آئی

جب کہ فقیری کے اوپر میں خرچ بڑی سی دولت کی

ناز و خشم کا رتبہ کیسا ہٹ کس اعلیٰ درجے میں

بات ہماری ایک نہ مانی برسوں ہم نے منت کی

دکھن پورب پچھم سے لوگ آکر مجھ کو دیکھیں ہیں

حیف کہ پروا تم کو نہیں ہے مطلق میری صحبت کی

دوستی یاری الفت باہم عہد میں اس کے رسم نہیں

یہ جانے ہیں مہر و وفا اک بات ہے گویا مدت کی

آب حسرت آنکھوں میں اس کی نومیدانہ پھرتا تھا

میر نے شاید خواہش دل کی آج کوئی پھر رخصت کی

میر تقی میر

طاقت دل کی تمام ہوئی ہے جی کی چال کڈھب سی ہے

اکتوبر 6, 2015میر تقی میر،اساتذہ،غزللب،کڈھب،اب،دب،طلب،عجب،غضبadmin

دیوان سوم غزل 1254

سوزدروں سے آگ لگی ہے سارے بدن میں تب سی ہے

طاقت دل کی تمام ہوئی ہے جی کی چال کڈھب سی ہے

سینے کے زخم نمایاں رہتے چاک کیے سو پردئہ در

مدت سے یہ رخنے پڑے تھے چھاتی پھٹی میں اب سی ہے

پرسش حال کبھو کرتے ہیں ناز و چشم اشارت سے

ان کی عنایت حال پہ میرے کیا پوچھو ہو غضب سی ہے

گود میں میری رکھ دیتا ہے پائوں حنائی دبنے کو

یوں پامال جو میں ہوتا ہوں مجھ کو بھی تو دب سی ہے

لطف کہاں وہ بات کیے پر پھول سے جھڑنے لگ جاویں

سرخ کلی بھی گل کی اگرچہ یار کے لعل لب سی ہے

خانہ خراب ہو خواہش دل کا آہ نہایت اس کو نہیں

جان لبوں پر آئی ہے پر تو بھی گرم طلب سی ہے

تم کہتے ہو بوسہ طلب تھے شاید شوخی کرتے ہوں

میر تو چپ تصویر سے تھے یہ بات انھوں سے عجب سی ہے

میر تقی میر

آہ و فغاں کے طور سے میرے لوگ مجھے پہچان گئے

اکتوبر 6, 2015میر تقی میر،اساتذہ،غزلمہمان،چھان،پہچان،انجان،اوسان،ارمان،دھیانadmin

دیوان سوم غزل 1253

شور کیا جو اس کی گلی میں رات کو ہیں سب جان گئے

آہ و فغاں کے طور سے میرے لوگ مجھے پہچان گئے

عہد میں اس کی یاری کے خوں دل میں ہوئے ہیں کیا کیا چائو

خاک میں آخر ساتھ ہی میرے سب میرے ارمان گئے

موت جو آئے سر پر انساں دست و پا گم کرتا ہے

دیکھتے ہی شمشیر بکف کچھ آج اسے اوسان گئے

مہلت عمر دوروزہ کتنی کریے فضولی کاہے پر

آئے جو ہیں دنیا میں ہم تو جیسے کہیں مہمان گئے

ہاتھ لگا وہ گوہر مقصد جیسا ہے معلوم ہمیں

محو طلب ہو اہل طلب سب خاک بھی یاں کی چھان گئے

کہیے سلوک انھوں کے کیا کیا چھیڑ تجاہل کی ہے نئی

نکلے تھے اس رستے سو وے جان کے بھی انجان گئے

میر نظر کی دل کی طرف کی عرش کی جانب فکر بہت

تھی جو طلب مطلوب کی ہم کو کیدھر کیدھر دھیان گئے

میر تقی میر

جنگل میں نکل آئے کچھ واں بھی نہ بن آئی

اکتوبر 6, 2015میر تقی میر،اساتذہ،غزلمرزائی،گنجائی،پائی،آئی،بالائی،رسوائی،رعنائی،سودائیadmin

دیوان سوم غزل 1252

تدبیر غم دل کی بستی میں نہ ٹھہرائی

جنگل میں نکل آئے کچھ واں بھی نہ بن آئی

خواہش ہو جسے دل کی دل دوں اسے اور سر بھی

میں نے تو اسی دل سے تصدیع بہت پائی

بے پردہ نہ ہونا تھا اسرار محبت کو

عاشق کشی ہے جب سے ہے عشق کی رسوائی

گھر دل کا بہت چھوٹا پر جاے تعجب ہے

عالم کو تمام اس میں کس طرح ہے گنجائی

گھر بار لٹایا جب تب وہ سہی قد آیا

مفلوک ہوئے اب ہم کر خرچ یہ بالائی

خوبی سے ندان اس کی سب صورتیں یاں بگڑیں

وہ زلف بنی دیکھی سب بن گئے سودائی

کیا عہدہ برآئی ہو اس گل کی دورنگی سے

ہر لحظہ ہے خودرائی ہر آن ہے رعنائی

عاشق کی جسے ہووے کچھ قدر نہیں پیدا

جیتا نہ رہا اب تک مجنوں ہی کو موت آئی

آزار بہت کھینچے اب میر توکل ہے

کھینچی نہ گئی ہم سے ہر ایک کی مرزائی

میر تقی میر

اور مجلس میں جو رہیے دیکھ تو شرمائے وہ

اکتوبر 6, 2015میر تقی میر،اساتذہ،غزلہائے،وائے،پائے،آئے،آجائے،بہلائے،شرمائےadmin

دیوان سوم غزل 1251

کیا کریں نیچی نظر کرنے سے غصہ کھائے وہ

اور مجلس میں جو رہیے دیکھ تو شرمائے وہ

کس طرح تڑپے ہے کیا کیا جی گھٹا جاتا ہے ہائے

ساتھ اس کے دل لگا ہو جس کسو کا وائے وہ

کیا سلوک اس بے وفا کے نقل کریے ہم نشیں

منتیں کریے تو یاں تک گھر سے چل کر آئے وہ

لطف سے لبریز ہے اس کام جاں کا سب بدن

مختلط ہوجائے ہم سے جو کبھو تو ہائے وہ

بے خودی ہے جی چلا جاتا ہے ہوں صاحب فراش

بے خبر اے کاش بالیں پر مری آجائے وہ

ہم نہیں ملتے وگرنہ یار ہے تا قتل ساتھ

لوہو پی جاوے ہمارا ہم کو اب جو پائے وہ

میر کو واشد نہیں ہے مقصد اس کا اور ہے

عشق سے لڑکوں کے دل کو کب تلک بہلائے وہ

میر تقی میر

نہ تیر روے ترکش یوں چلا بیٹھ

اکتوبر 6, 2015میر تقی میر،اساتذہ،غزللگا،چلا،ا،اٹھا،جدا،رہا،سناadmin

دیوان سوم غزل 1250

ادھر مت کر نگاہ تیز جا بیٹھ

نہ تیر روے ترکش یوں چلا بیٹھ

اثر ہوتا تو کب کا ہو بھی چکتا

دعاے صبح سے اب ہاتھ اٹھا بیٹھ

پھرے گا ہم سے کب تک دور ظالم

کبھو تو گھر سے اٹھ کر پاس آ بیٹھ

نہ کر دیوار کا مجلس میں تکیہ

ہمارے مونڈھے سے مونڈھا لگا بیٹھ

بہت پھرتے ہیں ٹیڑھے ٹیڑھے دشمن

انھیں دو سیدھیاں تو بھی سنا بیٹھ

تلاش اپنی نہ کم تھی جو وہ ملتا

بہت میں دیکھ کر آخر رہا بیٹھ

مخالف سے نہ مل بیٹھا کر اتنا

کہیں لے میر صاحب کو جدا بیٹھ

میر تقی میر

ضائع ہے جیب و دامن جوں جنس آب دیدہ

اکتوبر 6, 2015میر تقی میر،اساتذہ،غزلآب،باب،خواب،خراب،عذابadmin

دیوان سوم غزل 1249

کب تک رہیں گے یارب ہر دم ہم آبدیدہ

ضائع ہے جیب و دامن جوں جنس آب دیدہ

اس حور سے شبوں کا ملنا گیا سو چپ ہوں

جاتا نہیں کہا کچھ جوں گنگ خواب دیدہ

راز محبت اپنا رسوا نہ اس قدر ہو

گر ہو نہ اشک افشاں خانہ خراب دیدہ

جب دیکھو لگ رہا ہے در کی طرف اسی کے

ہے جیسے کہیے ویسے ذلت کا باب دیدہ

دوزخ میں میر ہوں میں یار بہشت رو بن

جاں ہے ستم رسیدہ دل ہے عذاب دیدہ

میر تقی میر

مری زیست ہے مہربانی کے ساتھ

اکتوبر 6, 2015میر تقی میر،اساتذہ،غزلفشانی،مہربانی،ناتوانی،کہانی،پانی،جوانی،روانیadmin

دیوان سوم غزل 1248

نہ باتیں کرو سرگرانی کے ساتھ

مری زیست ہے مہربانی کے ساتھ

نہ اٹھ کر در یار سے جاسکے

یہ کم لطف ہے ناتوانی کے ساتھ

فرو درد آنسو پیے کچھ ہوا

دوا جیسے پیتے ہیں پانی کے ساتھ

کہے میں نے اشعار ہر بحر میں

ولیکن قیامت روانی کے ساتھ

شتابی گئی اس روش فصل گل

کہ جوں رفتگی ہو جوانی کے ساتھ

بکھیرے ہے جوں لخت دل آہ صبح

ہوا کب ہے اس گل فشانی کے ساتھ

جلا جی بہت قصۂ میر سن

بلا سوز تھا اس کہانی کے ساتھ

میر تقی میر

لطف سے حرف و سخن تھے نگہ اک پیار کے ساتھ

اکتوبر 6, 2015میر تقی میر،اساتذہ،غزلپیار،بیمار،تلوار،دیوار،دیدار،سزاوار،عارadmin

دیوان سوم غزل 1247

وے دن اب سالتے ہیں جن میں پھرے یار کے ساتھ

لطف سے حرف و سخن تھے نگہ اک پیار کے ساتھ

رو بہ پس یار کے کوچے سے جو خورشید گیا

عشق تھا اس کے مگر سایۂ دیوار کے ساتھ

دستے نرگس کے رکھیں گور پہ میری وارث

تا یہ جانیں کہ گیا میں غم دیدار کے ساتھ

واں کھنچی میان سے یاں سر کو جھکایا میں نے

گردن اپنی ہے بندھی یار کی تلوار کے ساتھ

عشق کے زار سے بولا نہ خشونت سے کرو

لطف سے بات کوئی کرتے ہیں بیمار کے ساتھ

تہمت عشق سے آبادی بھی وادی ہے ہمیں

کون صحبت رکھے ہے خوں کے سزاوار کے ساتھ

اب خوشامد انھیں کی آٹھ پہر کرتے ہیں

گفتگو میر کو جن لوگوں سے تھی عار کے ساتھ

میر تقی میر

بالذات ہے جہاں میں وہ موجود ہر جگہ

اکتوبر 6, 2015میر تقی میر،اساتذہ،غزلموجود،مسجود،مسدود،نابود،کود،دود،سودadmin

دیوان سوم غزل 1246

آنکھیں جو ہوں تو عین ہے مقصود ہر جگہ

بالذات ہے جہاں میں وہ موجود ہر جگہ

واقف ہو شان بندگی سے قیدقبلہ کیا

سر ہر کہیں جھکا کہ ہے مسجود ہر جگہ

مو تن پہ ہم نہ سوختہ جانوں کے ہیں نمود

ہے سوزش دروں سے بروں دود ہر جگہ

دلی کے لکھنؤ کے خوش اندام خوب لیک

راہ وفا و مہر ہے مسدود ہر جگہ

پھرتی ہے اپنے ساتھ لگی متصل فنا

آب رواں سے ہم ہوئے نابود ہر جگہ

شہرہ رکھے ہے تیری خریت جہاں میں شیخ

مجلس ہو یا کہ دشت اچھل کود ہر جگہ

سوداے عاشقی میں تو جی کا زیان ہے

پھرتے ہیں میر ڈھونڈتے ہی سود ہر جگہ

میر تقی میر

حال کچھ بھی تجھ میں ہے اے میر اپنا حال دیکھ

اکتوبر 6, 2015میر تقی میر،اساتذہ،غزلفال،چال،ڈال،بال،جنجال،حال،سالadmin

دیوان سوم غزل 1245

جانے دے مت اس قدر اب زلف و خط و خال دیکھ

حال کچھ بھی تجھ میں ہے اے میر اپنا حال دیکھ

کیا مری طول پریشانی کی حیرت ہم نفس

آنکھیں تو دی ہیں خدا نے اس کے لپٹے بال دیکھ

دامن صحرا میں کیا وسعت ہے جو دل میں نہیں

موند کر آنکھیں گریباں میں بھی ٹک سر ڈال دیکھ

چشم و دل کا اس سے لگ جانا تو تھا جس تس طرح

جی بھی ان بالوں میں الجھا اور یہ جنجال دیکھ

گرچہ اس مہ کی جدائی میں مجھے برسوں ہوئے

لیکن اے اخترشناس اب کا ہے کیسا سال دیکھ

کب نظر میری پڑے گی اس کے روے خوب پر

ہم نشیں ٹک تو بھی مصحف کھول کر تو فال دیکھ

ٹھوکریں دل کو لگے ہیں جب چلے ہے راہ تو

یہ خرام ناز ہے ظالم ٹک اپنی چال دیکھ

میر تقی میر

جان ہی جائے گی آخر کو اس ارمان کے ساتھ

اکتوبر 6, 2015میر تقی میر،اساتذہ،غزلقرآن،مہمان،مسلمان،نادان،پیکان،انسان،ایمان،احسان،ارمانadmin

دیوان سوم غزل 1244

ہے تمناے وصال اس کی مری جان کے ساتھ

جان ہی جائے گی آخر کو اس ارمان کے ساتھ

کیا فقط توڑ کے چھاتی ہی گیا تیر اس کا

لے گیا صاف مرے دل کو بھی پیکان کے ساتھ

دین و دل ہی کے رہا میرے وہ کافر درپے

خصمی قاطبہ اس کو ہے مسلمان کے ساتھ

بحر پر نہر پہ برسے ہے برابر ہی ابر

پیش ہر اک سے کریم آتے ہیں احسان کے ساتھ

سطرزلف آئی ہے اس روے مخطط پہ نظر

یہ عبارت نئی لاحق ہوئی قرآن کے ساتھ

تیر اس کا جو گذر دل سے چلا جی بھی چلا

رسم تعظیم سے ہو لیتے ہیں مہمان کے ساتھ

میں تو لڑکا نہیں جو بالے بتائو مجھ کو

یہ فریبندگی کریے کسو نادان کے ساتھ

خون مسلم کو تو واجب یہ بتاں جانے ہیں

ہوجے کافر کہ اماں یاں نہیں ایمان کے ساتھ

آدمیت سے تمھیں میر ہو کیونکر بہرہ

تم نے صحبت نہیں رکھی کسو انسان کے ساتھ

میر تقی میر

یار تک پھر تو کس قدر ہے راہ

اکتوبر 6, 2015میر تقی میر،اساتذہ،غزلہمراہ،نگاہ،ناف،اللہ،راہ،سیاہadmin

دیوان سوم غزل 1243

رستے سے چاک دل کے ہو آگاہ

یار تک پھر تو کس قدر ہے راہ

رہتی ہے خلق آہ شب سے تنگ

وے نہیں سنتے میری بات اللہ

آنکھ اس منھ پہ کس طرح کھولوں

جوں پلک جل رہی ہے میری نگاہ

خط مرا دیکھ دیکھ کہنے لگا

ہائے کیا کیا لکھے ہے نامہ سیاہ

ہیں مسلمان ان بتوں سے ہمیں

عشق ہے لا الٰہ الا اللہ

پلکیں اس طور روتے روتے گئیں

سبزہ ہوتا ہے جس طرح لب چاہ

میر کعبے سے قصد دیر کیا

جائو پیارے بھلا خدا ہمراہ

میر تقی میر

پر جی اسی کو اپنا ڈھونڈے ہے ڈھب نہیں کچھ

اکتوبر 6, 2015میر تقی میر،اساتذہ،غزلڈھب،اب،ادب،جب،سب،سبب،عجبadmin

دیوان سوم غزل 1242

کہتے تو ہیں کہ ہم کو اس کی طلب نہیں کچھ

پر جی اسی کو اپنا ڈھونڈے ہے ڈھب نہیں کچھ

اخلاص و ربط اس سے ہوتا تو شور اٹھاتے

لب تشنہ اپنے تب ہیں دلبر سے جب نہیں کچھ

یاں اعتبار کریے جو کچھ وہی ہے ظاہر

یہ کائنات اپنی آنکھوں میں سب نہیں کچھ

رکھ منھ کو گل کے منھ پر کیا غنچہ ہو کے سوئے

ہے شوخ چشم شبنم اس کو ادب نہیں کچھ

دل خوں نہ ہووے کیونکر یکسروراے الفت

یا سابقے بہت تھے یا اس سے اب نہیں کچھ

یہ حال بے سبب تو ہوتا نہیں ہے لیکن

رونے کا لمحہ لمحہ ظاہر سبب نہیں کچھ

کر عشق میر اس کا مارے کہیں نہ جاویں

جلدی مزاج میں ہے اس سے عجب نہیں کچھ

میر تقی میر

کچھ تو الم ہے دل کی جگہ اور غم ہے کچھ

اکتوبر 6, 2015میر تقی میر،اساتذہ،غزلبھرم،دہم،دم،ستم،غمadmin

دیوان سوم غزل 1241

میں کیا کہوں جگر میں لہو میرے کم ہے کچھ

کچھ تو الم ہے دل کی جگہ اور غم ہے کچھ

پوشیدہ تو نہیں ہے کہ ہم ناتواں نہیں

کپڑوں میں یوں ہی تم کو ہمارا بھرم ہے کچھ

کیا اپنے دل دھڑکنے سے ہوں میں ہی دم بخود

جو دیکھتا ہے میرے تئیں سو دہم ہے کچھ

جب سے کھلی ہے نرگس مست اس کی ظلم ہے

کیا آج کل سے یار کو میل ستم ہے کچھ

بلبل میں گل میں کیا خفگی آگئی ہے میر

آمدشد نسیم سحر دم بہ دم ہے کچھ

میر تقی میر

دل نہ رہے جو ہاتھ رکھے تو سماجت ات گت مت کریو

اکتوبر 6, 2015میر تقی میر،اساتذہ،غزلمنت،مروت،گت،الفت،تربت،رخصت،ضربتadmin

دیوان سوم غزل 1240

آج ہمارا جی بے کل ہے تم بھی غفلت مت کریو

دل نہ رہے جو ہاتھ رکھے تو سماجت ات گت مت کریو

ڈھیری رہے اک خاک کی تو کیا ایسے خاک برابر کی

مجھ کو زمیں میں گاڑوگے تو نشان تربت مت کریو

ایسی جان کہاں ہے ہم میں رنج نہ دینا ہاتھوں کو

ایک ہی وار میں ہو چکیے گا دوسری ضربت مت کریو

ہم کو تو مارا عشق نے آخر پر یہ وصیت یاد رہے

دیر جہاں میں تم جو ہو تو کسو سے الفت مت کریو

میری طرف کی یارو اس سے بات کوئی کہتے ہو کہو

مانے نہ مانے وہ جانے پھر تم بھی منت مت کریو

کہیے سو کیا اب چپکے دیکھو گو میں اس میں مر جائوں

تم کو قسم ہے حرف و سخن کی مجھ سے مروت مت کریو

ہوش نہیں اپنا تو ہمیں ٹک میر آئے ہیں پرسش کو

جانے سے آگے ان کو ہمارے پیارے رخصت مت کریو

میر تقی میر

آنکھ کا لگنا نہ ہو تو اشک کیوں خوناب ہو

اکتوبر 6, 2015میر تقی میر،اساتذہ،غزلآب،اسباب،تالاب،خوناب،خواب،سیماب،سیرابadmin

دیوان سوم غزل 1239

دل کہے میں ہوں تو کاہے کو کوئی بیتاب ہو

آنکھ کا لگنا نہ ہو تو اشک کیوں خوناب ہو

وہ نہیں چھڑکائو سا میں اشک ریزی سے کروں

اب جو رونے بیٹھ جائوں جھیل ہو تالاب ہو

جلد کھینچے تیغ بیتابی کریں جو ہم تو پھر

مارنا مشکل ہمارا تم کو جوں سیماب ہو

شہر میں زیر درختاں کیا رہوں میں برگ بند

ہو نہ صحرا نے مری گنجائش اسباب ہو

بے تصرف عشق کے ہوتا ہے ایسا حال کب

دل ہمارا خون ہو سب چشم یکسر آب ہو

لطف سے اے ابر رحمت ایک دو بارش ادھر

کشت زرد ناامیداں بھی تو ٹک سیراب ہو

بخت خفتہ سوویں پر ٹک چونکتے سوویں کہ میر

ایک شب ہم دل زدوں سے وہ پری ہم خواب ہو

میر تقی میر

کہتے ہیں اپنی ٹوپی سے بھی مشورت کرو

اکتوبر 6, 2015میر تقی میر،اساتذہ،غزلمشورت،صفتadmin

دیوان سوم غزل 1238

گر قصدترک سر ہے کہو شرم مت کرو

کہتے ہیں اپنی ٹوپی سے بھی مشورت کرو

اچھی ہے اس کی تیغ تو باندھو گلے سے میر

مرتا ہوں میں تو آگے مرے مت صفت کرو

میر تقی میر

ہم سینہ خستہ لوگوں سے بس آنکھ مت لگائو

اکتوبر 6, 2015میر تقی میر،اساتذہ،غزللگائو،لائو،چائو،ڈبائو،اٹھائو،بہائو،بتائو،تائو،دبائوadmin

دیوان سوم غزل 1237

سب کھا گئے جگر تری پلکوں کے کاو کاو

ہم سینہ خستہ لوگوں سے بس آنکھ مت لگائو

آنکھوں کا جھڑ برسنے سے ہتھیا کے کم نہیں

پل مارتے ہے پیش نظر ہاتھی کا ڈبائو

کشتی چشم ڈوبی رہی بحر اشک میں

آئی نہ پار ہوتی نظر عاشقوں کی نائو

سینے کے اپنے زخم سے خاطر ہو جمع کیا

دل ہی کی اور پاتے ہیں سب لوہو کا بہائو

بیتابی دل افعی خامہ نے کیا لکھی

کاغذ کو شکل مار سراسر ہے پیچ تائو

ہرچند جانیں جاتی ہیں پر تیغ جور سے

تم کو ہمارے سر کی سوں تم ہاتھ مت اٹھائو

سر نیچے ہو تو پاؤں ترا دابیں ہم کبھی

دبتا وہی ہے جس کے تئیں کچھ بھی ہو دبائو

چاک قفس سے آنکھیں لگیں کب تلک رہیں

اک برگ گل نسیم ہماری طرف بھی لائو

غیرت کا عشق کی ہے طریقہ ہی کچھ جدا

اس کی گلی کی خضرؑ کو بھی راہ مت بتائو

ظاہر ہیں دیکھنے سے گنہ کیونکہ تیرے سب

چھپتے ہیں میر کوئی دلوں کے کہیں لگائو

میر تقی میر

جیسے مصاحب ابر کی ہوتی ہے کوئی بائو

اکتوبر 6, 2015میر تقی میر،اساتذہ،غزلچڑھائو،چائو،گھائو،آئو،بنائو،بڑھائو،بائو،جمائو،جائو،دکھائوadmin

دیوان سوم غزل 1236

رہتا ہے پیش دیدئہ تر آہ کا سبھائو

جیسے مصاحب ابر کی ہوتی ہے کوئی بائو

برسے گی برف عرصۂ محشر میں دشت دشت

گر میری سرد آہوں کا واں ہو گیا جمائو

حاصل کوئی امید ہوئی ہو تو میں کہوں

خوں ہی ہوا کیے ہیں مرے دل میں سارے چائو

آنکھوں کے آگے رونے سے میرے محیط ہے

ابروں سے جا کہے کوئی پانی پیو تو آئو

رہتی تھی اشک خونیں میں ڈوبی سب آستیں

اس چشم بحرخوں کے کبھو دیکھے ہیں چڑھائو

اظہار درد اگرچہ بہت بے نمک ہے پر

ٹک بیٹھو تو دکھاویں تمھیں چھاتیوں کے گھائو

آ عاشقوں کی آنکھوں میں ٹک اے بہ دل قریب

ان منظروں سے بھی ہے بہت دور تک دکھائو

صحبت جو اس سے رہتی ہے کیا نقل کریے ہائے

جب آگئے ہیں ہم تو کہا ان نے یاں سے جائو

صد چاک اپنے دل سے تو بگڑا ہی کی وہ زلف

افسوں کیا ہے شانے نے جو اس سے ہے بنائو

اس ہی زمیں میں میر غزل اور ایک کہہ

گو خوش نہ آوے سامعوں کو بات کا بڑھائو

میر تقی میر

کھلانا کھولنا مشکل بہت ہے ایسے کالوں کو

اکتوبر 6, 2015میر تقی میر،اساتذہ،غزلنہالوں،چھالوں،والوں،کالوں،جمالوں،حالوں،خوردسالوں،خیالوں،غزالوںadmin

دیوان سوم غزل 1235

رکھو مت سر چڑھائے دلبروں کے گوندھے بالوں کو

کھلانا کھولنا مشکل بہت ہے ایسے کالوں کو

اڑایا غم نے ان کے سوکھے پتوں کی روش ہم کو

الٰہی سبز رکھیو باغ خوبی کے نہالوں کو

جہاں دیکھو کہا کرتے ہیں اس کے عشق کے غم میں

نہ ہم دوچار بیٹھے دل شکستے اپنے حالوں کو

نہ چشم کم سے مجھ درویش کی آوارگی دیکھو

تبرک کرتے ہیں کانٹے مرے پائوں کے چھالوں کو

کرے ہے جس پہ بلبل غش سو یہ اس جنس کی قیمت

نہیں افسوس آنکھیں بے حقیقت پھول والوں کو

دل عاشق کو رو کیا جانوں خوباں کیوں نہیں دیتے

بہت آئینے سے تو ربط ہے صاحب جمالوں کو

یہی کچھ وہم سی ہے سہل کب آئے قیاسوں میں

تفکر اس کمر کا کھا گیا نازک خیالوں کو

نہ ایسی طرز دیدن ہے نہ ہرنوں کی یہ چتون ہے

کبھو جنگل میں لے چلیے گا ان شہری غزالوں کو

کوئی بھی اس طرح سے اپنے جی پر کھیل جاتا ہے

مگر بازیچہ سمجھے میر عشق خوردسالوں کو

میر تقی میر

ایسا تو رو کہ رونے پہ تیرے ہنسی نہ ہو

اکتوبر 6, 2015میر تقی میر،اساتذہ،غزلہو،ہوسو،لو،کھو،گومگو،تو،دو،دبو،شوadmin

دیوان سوم غزل 1234

کہتا ہے کون میر کہ بے اختیار رو

ایسا تو رو کہ رونے پہ تیرے ہنسی نہ ہو

پایا گیا وہ گوہر نایاب سہل کب

نکلا ہے اس کو ڈھونڈنے تو پہلے جان کھو

کام اس کے لب سے ہے مجھے بنت العنب سے کیا

ہے آب زندگی بھی تو لے جائے مردہ شو

سنتے نہیں کہے جو نہ کہیے تو دم رکے

کچھ پوچھیے نہ قصہ ہمارا ہے گومگو

مشعر ہے بے دماغی پہ مطلق نہ بولنا

ہم دیں تمھیں دعا ہمیں تم گالیاں تو دو

کرنا جگر ضرور ہے دل دادگاں کو بھی

وہ بولتا نہیں تو تم آپھی سے چھیڑ لو

اے غافلان دہر یہ کچھ راہ کی ہے بات

چلنے کو قافلے ہیں یہاں تم رہے ہوسو

گردش میں جو کوئی ہو رکھے اس سے کیا امید

دن رات آپھی چرخ میں ہے آسمان تو

جب دیکھتے ہیں پائوں ہی دابو ہو اس کے میر

کیوں ہوتے ہو ذلیل تم اتنا تو مت دبو

میر تقی میر

جی الجھتا ہے بہت مت بال سلجھایا کرو

اکتوبر 6, 2015میر تقی میر،اساتذہ،غزلفرمایا،آیا،بہلایا،بندھوایا،جایا،سلجھایا،سایہadmin

دیوان سوم غزل 1233

سر پہ عاشق کے نہ یہ روز سیہ لایا کرو

جی الجھتا ہے بہت مت بال سلجھایا کرو

تاب مہ کی تاب کب ہے نازکی سے یار کو

چاندنی میں آفتابی کا مگر سایہ کرو

گرچہ شان کفر ارفع ہے ولے اے راہباں

ایک دو ہم سوں کو بھی زنار بندھوایا کرو

شوق سے دیدار کے بھی آنکھوں میں کھنچ آیا جی

اس سمیں میں دیکھنے ہم کو بہت آیا کرو

کوہکن کی ہے قدم گاہ آخر اے اہل وفاق

طوف کرنے بے ستوں کا بھی کبھی جایا کرو

فرق یار و غیر میں بھی اے بتاں کچھ چاہیے

اتنی ہٹ دھرمی بھی کیا انصاف فرمایا کرو

کب میسر اس کے منھ کا دیکھنا آتا ہے میر

پھول گل سے اپنے دل کو تم بھی بہلایا کرو

میر تقی میر

دل کو مزے سے بھی تو تنک آشنا کرو

اکتوبر 6, 2015میر تقی میر،اساتذہ،غزلوفا،وا،پا،آشنا،جدا،دوا،دعاadmin

دیوان سوم غزل 1232

زخموں پہ اپنے لون چھڑکتے رہا کرو

دل کو مزے سے بھی تو تنک آشنا کرو

کیا آنکھ بند کرکے مراقب ہوئے ہو تم

جاتے ہیں کیسے کیسے سمیں چشم وا کرو

موقوف ہرزہ گردی نہیں کچھ قلندری

زنجیر سر اتار کے زنجیر پا کرو

ہر چند اس متاع کی اب قدر کچھ نہیں

پر جس کسو کے ساتھ رہو تم وفا کرو

تدبیر کو مزاج محبت میں دخل کیا

جانکاہ اس مرض کی نہ کوئی دوا کرو

طفلی سے تم نے لطف و غضب مختلط کیے

ٹک مہر کو جدا کرو غصہ جدا کرو

بیٹھے ہو میر ہو کے درکعبہ پر فقیر

اس روسیہ کے باب میں بھی کچھ دعا کرو

میر تقی میر

یہ بات ایسی کیا ہے جس پر الجھ پڑے ہو

اکتوبر 6, 2015میر تقی میر،اساتذہ،غزللڑے،کڑے،گڑے،پڑے،بڑےadmin

دیوان سوم غزل 1231

زلفوں کو میں چھوا سو غصے ہوئے کھڑے ہو

یہ بات ایسی کیا ہے جس پر الجھ پڑے ہو

منھ پھیر پھیر لو ہو ہر بات میں ادھر سے

یاں کس ستم زدہ سے آزردہ ہو لڑے ہو

نرمی مخالفوں سے سختی موافقوں سے

واں موم سے بنے ہو یاں لوہے سے کڑے ہو

مل جائو مغبچوں سے تو داڑھی ہو تبرک

ہر چند شیخ صاحب تم بوڑھے ہو بڑے ہو

ہوتے ہیں خاک رہ بھی لیکن نہ میر ایسے

رستے میں آدھے دھڑ تک مٹی میں تم گڑے ہو

میر تقی میر

ایسا کچھ کرکے چلو یاں کہ بہت یاد رہو

اکتوبر 6, 2015میر تقی میر،اساتذہ،غزلفرہاد،فریاد،یاد،آباد،آزادadmin

دیوان سوم غزل 1230

بارے دنیا میں رہو غم زدہ یا شاد رہو

ایسا کچھ کرکے چلو یاں کہ بہت یاد رہو

عشق پیچے کی طرح حسن گرفتاری ہے

لطف کیا سرو کی مانند گر آزاد رہو

ہم کو دیوانگی شہروں ہی میں خوش آتی ہے

دشت میں قیس رہو کوہ میں فرہاد رہو

وہ گراں خواب جو ہے ناز کا اپنے سو ہے

داد بے داد رہو شب کو کہ فریاد رہو

میر ہم مل کے بہت خوش ہوئے تم سے پیارے

اس خرابے میں مری جان تم آباد رہو

میر تقی میر

ہوا جی زلف و کاکل کے لیے جنجال مت پوچھو

اکتوبر 6, 2015میر تقی میر،اساتذہ،غزلمالامال،وصّال،بال،جنجال،دھمالadmin

دیوان سوم غزل 1229

غریب شہر خوباں ہوں مرا کچھ حال مت پوچھو

ہوا جی زلف و کاکل کے لیے جنجال مت پوچھو

دل صد پارہ کو پیوند کرتا ہوں جدائی میں

کرے ہے کہنہ نسخہ وصل جوں وصّال مت پوچھو

جگر جل کر ہوا ہے کوئلہ بیتاب تو بھی ہوں

طپش سے دل کی میرے سر پہ ہے دھمال مت پوچھو

تعجب ہے کہ دل اس گنج سرگشتہ میں رہتا ہے

خرابے جس سے یہ پاتے ہیں مالامال مت پوچھو

لگا جی اس کی زلفوں سے بہت ہم میر پچھتائے

ہوا ہے مدعی ایک ایک اپنا بال مت پوچھو

میر تقی میر

وقف اولاد ہے وہ باغ تو غم کاہے کو

اکتوبر 6, 2015میر تقی میر،اساتذہ،غزلہم،قلم،قدم،قسم،کرم،حرم،ستم،علم،غمadmin

دیوان سوم غزل 1228

بہرفردوس ہو آدم کو الم کاہے کو

وقف اولاد ہے وہ باغ تو غم کاہے کو

کہتے ہیں آوے گا ایدھر وہ قیامت رفتار

چلتے پھرتے رہیں گے تب تئیں ہم کاہے کو

یہ بھی اک ڈھب ہے نہ ایذا نہ کسو کو راحت

رحم موقوف کیا ہے تو ستم کاہے کو

نرگس ان آنکھوں کو جو لکھ گئے نابینا تھے

اپنے نزدیک ہیں وے دست قلم کاہے کو

اس کی تلوار سے گر جان کو رکھتے نہ عزیز

مرتے اس خواری سے تو صید حرم کاہے کو

چشم پوشی کا مری جان تمھیں لپکا ہے

کھاتے ہو دیدہ درائی سے قسم کاہے کو

میری آنکھوں پہ رکھو پائوں جو آئو لیکن

رکھتے ہو ایسی جگہ تم تو قدم کاہے کو

دل کو کہتے ہیں کہ اس گنج رواں کا گھر ہے

اس خرابے میں کرے ہے وہ کرم کاہے کو

شور نے نام خدا ان کے بلا سر کھینچا

میر سا ہے کوئی عالم میں علم کاہے کو

میر تقی میر

تب کسی ناآشناے مہر سے الفت کرو

اکتوبر 6, 2015میر تقی میر،اساتذہ،غزلمنت،مت،محنت،وحشت،الفت،رخصت،صورتadmin

دیوان سوم غزل 1227

کھینچنا رنج و تعب کا دوستاں عادت کرو

تب کسی ناآشناے مہر سے الفت کرو

روٹھ کر منتا نہیں وہ شوخ یوں کیوں نہ کوئی

عذر چاہو دیر تک مدت تلک منت کرو

کب تک اے صورت گراں حیراں پھروں بے روے یار

نقش اس کا کھینچ رکھنے کی کوئی صورت کرو

انس اگر ان نوخطان شہر سے منظور ہے

اپنی پرچھائیں سے بھی جوں خامہ تم وحشت کرو

کچھ نہ پوچھو صحبت دیروزہ کی کم فرصتی

جوں ہی جا بیٹھے لگا کہنے انھیں رخصت کرو

عشق میں کیا دخل ہے نازک مزاجی کے تئیں

کوہکن کے طور سے جی توڑ کر محنت کرو

پہلے دیوانے ہوئے پھر میر آخر ہو گئے

ہم نہ کہتے تھے کہ صاحب عاشقی تم مت کرو

میر تقی میر

کب ہے ویسی مواجہہ کرلو

اکتوبر 6, 2015میر تقی میر،اساتذہ،غزللو،مرلو،کرلو،بھرلوadmin

دیوان سوم غزل 1226

آرسی اس کے سامنے دھرلو

کب ہے ویسی مواجہہ کرلو

اس کی تیغ ستم بلند ہوئی

جی ہے مرنے کو تو چلو مرلو

درپئے خوں ہیں میرے خورد و کلاں

یہ وبال اپنے کوئی سر پر لو

کچھ طرح ہو کہ بے طرح ہو حال

عمر کے دن کسو طرح بھرلو

کیا بلاخیز جا ہے کوچۂ عشق

تم بھی یاں میر مول اک گھر لو

میر تقی میر

پامال ہے سب خلق جہاں ناز تو دیکھو

اکتوبر 6, 2015میر تقی میر،اساتذہ،غزلناز،پرواز،پرداز،آواز،اعزاز،باز،سازadmin

دیوان سوم غزل 1225

سر کاٹ کے ڈلوا دیے انداز تو دیکھو

پامال ہے سب خلق جہاں ناز تو دیکھو

کچھ سوجھ نہیں پڑتی تمھیں بے خبری سے

ٹک ہوش کی آنکھوں کو کرو باز تو دیکھو

اس بت سے نہیں جب تئیں صحبت تو نہیں ہے

یہ ڈول جو ہوتا ہے خدا ساز تو دیکھو

شب آنکھ مری لگنے نہیں دیتی ہے بلبل

اس مرغ کی بیتابی آواز تو دیکھو

دل ایک تڑپنے میں پرے عرش کے پایا

اس طائر بے بال کی پرواز تو دیکھو

کی زلف و خط و خال نے ایک اور قیامت

تصویر سے چہرے پہ یہ پرداز تو دیکھو

سب میر کو دیتے ہیں جگہ آنکھوں پر اپنی

اس خاک رہ عشق کا اعزاز تو دیکھو

میر تقی میر

بے وقر جانتے ہیں دل بے گداز کو

اکتوبر 6, 2015میر تقی میر،اساتذہ،غزلنماز،نواز،ناز،گداز،باز،دراز،رازadmin

دیوان سوم غزل 1224

کرنا شعار خوب ہے عجز و نیاز کو

بے وقر جانتے ہیں دل بے گداز کو

ہجراں کی سرگذشت مری گفتنی نہیں

کیا کہیے تم سے قصۂ دور و دراز کو

جوں شمع سر کٹے ہے بیاں حال کا کیے

لانا زباں پہ خوب نہیں دل کے راز کو

حیران ہو رہو گے جو ہم ہو چکے کبھی

دیکھا نہیں ہے مرتے کسو عشق باز کو

جانکاہ و دل خراش ہیں سارے ترے سلوک

دل ہم تو دیتے کاش کسو دل نواز کو

صوفی کی پارسائی کی ہے خانقہ میں دھوم

لے چلیے گا کبھو ادھر اس مست ناز کو

ہے دور ادب سے تم کھڑے میں پاکشیدہ ہوں

مت آئیو جنازے کی میرے نماز کو

میر تقی میر

ہم نے کردی ہے خبر تم کو خبردار رہو

اکتوبر 6, 2015میر تقی میر،اساتذہ،غزلمار،گرفتار،خبردار،خریدار،طلبگارadmin

دیوان سوم غزل 1223

یہ سرا سونے کی جاگہ نہیں بیدار رہو

ہم نے کردی ہے خبر تم کو خبردار رہو

آپ تو ایسے بنے اب کہ جلے جی سب کا

ہم کو کہتے ہیں کہ تم جی کے تئیں مار رہو

لاگ اگر دل کو نہیں لطف نہیں جینے کا

الجھے سلجھے کسو کاکل کے گرفتار رہو

گرچہ وہ گوہرتر ہاتھ نہیں لگتا لیک

دم میں دم جب تئیں ہے اس کے طلبگار رہو

سارے بازار جہاں کا ہے یہی مول اے میر

جان کو بیچ کے بھی دل کے خریدار رہو

میر تقی میر

یہ کیا روش ہے آئو چلے ٹک ادھر کبھو

اکتوبر 6, 2015میر تقی میر،اساتذہ،غزلمگر،مختصر،گذر،پر،ادھر،تر،خبرadmin

دیوان سوم غزل 1222

تم بن چمن کے گل نہیں چڑھتے نظر کبھو

یہ کیا روش ہے آئو چلے ٹک ادھر کبھو

دریا سی آنکھیں بہتی ہی رہتی تھیں سو کہاں

ہوتی ہے کوئی کوئی پلک اب تو تر کبھو

جی جانے ہے جو اپنے پہ ہوتی ہے مار مار

جاتے ہیں اس گلی میں کہاں ہم مگر کبھو

آنکھیں سفید ہو چلی ہیں راہ دیکھتے

یارب انھوں کا ہو گا ادھر بھی گذر کبھو

مدت ہوئی ہے نامہ کبوتر کو لے گئے

آجاتی ہے کچھ اڑتی سی ہم تک خبر کبھو

ہم جستجو میں ان کی کیے دست و پا بھی گم

افسوس ہے کہ آئے نہ وہ راہ پر کبھو

غم کو تمھارے دل کے نہایت نہیں ہے میر

اس قصے کو کروگے بھی تم مختصر کبھو

میر تقی میر

خوں کیا ہے مدتوں اس میں غم بسیار کو

اکتوبر 6, 2015میر تقی میر،اساتذہ،غزلیار،آزار،اظہار،بسیار،دیوار،دیدار،دستارadmin

دیوان سوم غزل 1221

دوست رکھتا ہوں بہت اپنے دل بیمار کو

خوں کیا ہے مدتوں اس میں غم بسیار کو

جز عزیز از جاں نہیں یوسف کو لکھتا یہ کبھو

کیا غرور میرزائی ہے ہمارے یار کو

جب کبھو ایدھر سے نکلے ہے تو اک حسرت کے ساتھ

دیکھے ہے خورشید اس کے سایۂ دیوار کو

بوجھ تو اچھا تھا پر آخر گرو رکھتے ہوئے

وجہ جام مے نہ پایا خرقہ و دستار کو

خوں چکاں شکوے ہیں دل سے تا زباں میری ولے

سی لیا ہے تو کہے میں نے لب اظہار کو

تصفیے سے دل میں میرے منھ نظر آتا ہے لیک

کیا کروں آئینہ ساں میں حسرت دیدار کو

عاشقی وہ روگ ہے جس میں کہ ہوجاتی ہے یاس

اچھے ہوتے کم سنا ہے میر اس آزار کو

میر تقی میر

دانت سنا ہے جھمکیں ہیں اس کے موتی کے سے دانے دو

اکتوبر 6, 2015میر تقی میر،اساتذہ،غزلمیخانے،مانے،نشانے،ویرانے،کھانے،پہچانے،پروانے،بہانے،دیوانے،دانےadmin

دیوان سوم غزل 1220

گردش میں وے مست آنکھیں ہیں جیسے بھرے پیمانے دو

دانت سنا ہے جھمکیں ہیں اس کے موتی کے سے دانے دو

خوب نہیں اے شمع کی غیرت ساتھ رہیں بیگانے دو

کب فرمان پہ تیرے ہوئے یہ بازو کے پروانے دو

ایسے بہانہ طلب سے ہم بھی روز گذاری کرتے ہیں

کب وعدے کی شب آئی جو ان نے کیے نہ بہانے دو

تیرستم اس دشمن جاں کا تا دو کماں پر ہو نہ کہیں

دل سے اور جگر سے اپنے ہم نے رکھیں ہیں نشانے دو

کس کو دماغ رہا ہے یاں اب ضدیں اس کی اٹھانے کا

چار پہر جب منت کریے تب وہ باتیں مانے دو

غم کھاویں یا غصہ کھاویں یوں اوقات گذرتی ہے

قسمت میں کیا خستہ دلوں کی یہ ہی لکھے تھے کھانے دو

خال سیاہ و خط سیاہ ایمان و دل کے رہزن تھے

اک مدت میں ہم نے بارے چوٹٹے یہ پہچانے دو

عشق کی صنعت مت پوچھو جوں نیچے بھوئوں کے چشم بتاں

دیکھیں جہاں محرابیں ان نے طرح کیے میخانے دو

رونے سے تو پھوٹیں آنکھیں دل کو غموں نے خراب کیا

دیکھنے قابل اس کے ہوئے ہیں اب تو یہ ویرانے دو

دشت و کوہ میں میر پھرو تم لیکن ایک ادب کے ساتھ

کوہکن و مجنوں بھی تھے اس ناحیے میں دیوانے دو

میر تقی میر

جان سے بھی ہم جاتے رہے ہیں تم بھی آئو جانے دو

اکتوبر 6, 2015میر تقی میر،اساتذہ،غزللانے،ملانے،منانے،کھانے،پانے،آنے،بکانے،جانے،سمجھانےadmin

دیوان سوم غزل 1219

قتل کیے پر غصہ کیا ہے لاش مری اٹھوانے دو

جان سے بھی ہم جاتے رہے ہیں تم بھی آئو جانے دو

جان سلامت لے کر جاوے کعبہ میں تو سلام کریں

ایک جراحت ان ہاتھوں کا صید حرم کو کھانے دو

اس کی گلی کی خاک سبھوں کے دامن دل کو کھینچے ہے

ایک اگر جی لے بھی گیا تو آتے ہیں مر جانے دو

کرتے ہو تم نیچی نظریں یہ بھی کوئی مروت ہے

برسوں سے پھرتے ہیں جدا ہم آنکھ سے آنکھ ملانے دو

کیا کیا اپنے لوہو پئیں گے دم میں مریں گے دم میں جئیں گے

دل جو بغل میں رہ نہیں سکتا اس کو کسو سے بکانے دو

اب کے بہت ہے شور بہاراں ہم کو مت زنجیر کرو

دل کی ہوس ٹک ہم بھی نکالیں دھومیں ہم کو مچانے دو

عرصہ کتنا سارے جہاں کا وحشت پر جو آجاویں

پائوں تو ہم پھیلاویں گے پر فرصت ہم کو پانے دو

کیا جاتا ہے اس میں ہمارا چپکے ہم تو بیٹھے ہیں

دل جو سمجھنا تھا سو سمجھا ناصح کو سمجھانے دو

ضعف بہت ہے میر تمھیں کچھ اس کی گلی میں مت جائو

صبر کرو کچھ اور بھی صاحب طاقت جی میں آنے دو

بات بنانا مشکل سا ہے شعر سبھی یاں کہتے ہیں

فکر بلند سے یاروں کو ایک ایسی غزل کہہ لانے دو

میر تقی میر

درویش کتنے ماتم باہم کیا کریں ہیں

اکتوبر 6, 2015میر تقی میر،اساتذہ،غزلماتم،کم،باہم،دم،درہمadmin

دیوان سوم غزل 1218

تکیے میں اپنے دل کا ہم غم کیا کریں ہیں

درویش کتنے ماتم باہم کیا کریں ہیں

جب نام دل کا کوئی لے بیٹھتا ہے ناگہ

منھ دیکھ ہم دگر کا ماتم کیا کریں ہیں

مستوں کی بات کیا ہے جو کوئی اس پہ جاوے

ہم گفتگو نشے میں درہم کیا کریں ہیں

حکم فسانہ سازی پیدا کریں ہیں شب کو

افسوں ہم اس کے اوپر جو دم کیا کریں ہیں

کچھ چال میر جی کی آتی نہیں سمجھ میں

ہم بھی سلوک ان سے اب کم کیا کریں ہیں

میر تقی میر

اب جی میں ہے کہ شہر سے اس کے سفر کریں

اکتوبر 6, 2015میر تقی میر،اساتذہ،غزلہنر،نظر،بسر،تر،سفر،سحر،سرadmin

دیوان سوم غزل 1217

تاچند وہ ستم کرے ہم درگذر کریں

اب جی میں ہے کہ شہر سے اس کے سفر کریں

بے رو سے ایسی بات کے کرنے کا لطف کیا

وہ منھ کو پھیر پھیر لے ہم حرف سر کریں

کب تک ہم انتظار میں ہر لحظہ بے قرار

گھر سے نکل نکل کے گلی میں نظر کریں

فرہاد و قیس کوہکن و دشت گرد تھے

منھ نوچیں چھاتی کوٹیں یہی ہم ہنر کریں

سختی مسلم اس سے جدا رہنے میں ولے

سر سنگ سے نہ ماریں تو کیوں کر بسر کریں

وہ تو نہیں کہ دیکھیں اس آئینہ رو کو صبح

ہم کس امید پر شب غم کو سحر کریں

لاویں کہاں سے خون دل اتنا کہ میر ہم

جس وقت بات کرنے لگیں چشم تر کریں

میر تقی میر

کس خوش سلیقگی سے جگر خوں کروں ہوں میں

اکتوبر 6, 2015میر تقی میر،اساتذہ،غزلہوں،مجنوں،گردوں،افسوں،خوںadmin

دیوان سوم غزل 1216

مصرع کوئی کوئی کبھو موزوں کروں ہوں میں

کس خوش سلیقگی سے جگر خوں کروں ہوں میں

بات اپنے ڈھب کی کوئی کرے وہ تو کچھ کہوں

بیٹھا خموش سامنے ہوں ہوں کروں ہوں میں

اس بن نظر زمین سے سی دی ہے تو کہے

کاہے کو چشم جانب گردوں کروں ہوں میں

اٹھتا ہے بے دماغ ہی ہرچند رات کو

افسانہ کہتے سینکڑوں افسوں کروں ہوں میں

کب بے دماغی شہر سے دیتی ہے اٹھنے میر

یوں تو خیال وادی مجنوں کروں ہوں میں

میر تقی میر

جاتی رہے گی جان اسی رہگذر سے یاں

اکتوبر 6, 2015میر تقی میر،اساتذہ،غزلہنر،نظر،کدھر،تر،جگر،خبر،رہگذرadmin

دیوان سوم غزل 1215

مدت ہوئی کہ کوئی نہ آیا ادھر سے یاں

جاتی رہے گی جان اسی رہگذر سے یاں

وہ آپ چل کے آوے تو شاید کہ جی رہے

ہوتی نہیں تسلی دل اب خبر سے یاں

پوچھے کوئی تو سینہ خراشی دکھایئے

سو تو نہیں ہے حرف و حکایت ہنر سے یاں

آگے تو اشک پانی سے آجاتے تھے کبھو

اب آگ ہی نکلنے لگی ہے جگر سے یاں

ٹپکا کریں ہیں پلکوں سے بے فاصلہ سرشک

برسات کی ہوا ہے سدا چشم تر سے یاں

اے بت گرسنہ چشم ہیں مردم نہ ان سے مل

دیکھیں ہیں ہم نے پھوٹتے پتھر نظر سے یاں

راہ و روش کا ہووے ٹھکانہ تو کچھ کہیں

کیا جانے میر آگئے تھے کل کدھر سے یاں

میر تقی میر

لگ گیا ڈھب تو اسی شوخ سے ڈھب کرتے ہیں

اکتوبر 6, 2015میر تقی میر،اساتذہ،غزلڈھب،اب،ادب،سب،عجب،غضبadmin

دیوان سوم غزل 1214

ہجر تاچند ہم اب وصل طلب کرتے ہیں

لگ گیا ڈھب تو اسی شوخ سے ڈھب کرتے ہیں

روز اک ظلم نیا کرتے ہیں یہ دلبر اور

روز کہتے ہیں ستم ترک ہم اب کرتے ہیں

لاگ ہے جی کے تئیں اپنے اسی یار سے ایک

اور سب یاروں کا ہم لوگ تو سب کرتے ہیں

تم کبھو میر کو چاہو سو کہ چاہیں ہیں تمھیں

اور ہم لوگ تو سب ان کا ادب کرتے ہیں

ہوں جو بے حال اس اعجوبۂ عالم کے لیے

حال سن سن کے مرا لوگ عجب کرتے ہیں

میر سے بحث یہ تھی کچھ جو نہ تھے حرف شناس

اب سخن کرتے ہیں کوئی تو غضب کرتے ہیں

میر تقی میر

میں جوں نسیم باد فروش چمن نہیں

اکتوبر 6, 2015میر تقی میر،اساتذہ،غزلچلن،چمن،وطن،کفن،دہن،سخنadmin

دیوان سوم غزل 1213

مجھ کو دماغ وصف گل و یاسمن نہیں

میں جوں نسیم باد فروش چمن نہیں

کہنے لگا کہ لب سے ترے لعل خوب ہے

اس رنگ ڈھنگ سے تو ہمارا سخن نہیں

پہنچا نہ ہو گا منزل مقصود کے تئیں

خاک رہ اس کی جس کا عبیر کفن نہیں

ہم کو خرام ناز سے مت خاک میں ملا

دل سے ہے جن کو راہ یہ ان کا چلن نہیں

گل کام آوے ہے ترے منھ کے نثار کے

صحبت رکھے جو تجھ سے یہ اس کا دہن نہیں

کل جا کے ہم نے میر کے ہاں یہ سنا جواب

مدت ہوئی کہ یاں تو وہ غربت وطن نہیں

میر تقی میر

ہو تخت کچھ دماغ تو ہم پادشاہ ہیں

اکتوبر 6, 2015میر تقی میر،اساتذہ،غزلماہ،نگاہ،گناہ،پادشاہ،راہadmin

دیوان سوم غزل 1212

افیوں ہی کے تو دل شدہ ہم رو سیاہ ہیں

ہو تخت کچھ دماغ تو ہم پادشاہ ہیں

یاں جیسے شمع بزم اقامت نہ کر خیال

ہم دل کباب پردے میں سرگرم راہ ہیں

کہنا نہ کچھ کبھو کھڑے حسرت سے دیکھنا

ہم کشتنی ہیں واقعی گر بے گناہ ہیں

گہ مہرباں ہوں دور سے گہ آنکھیں پھیر لیں

معشوق آفتاب ہیں عشاق ماہ ہیں

آنکھیں ہماری پائوں تلے کیوں نہ وہ ملے

ہم بھی تو میر کشتۂ طرز نگاہ ہیں

میر تقی میر

سوراخ پڑ گئے جگر عندلیب میں

اکتوبر 6, 2015میر تقی میر،اساتذہ،غزلنصیب،طبیب،عندلیب،عجیب،غریبadmin

دیوان سوم غزل 1211

میں نالہ کش تھا صبح کو یادحبیب میں

سوراخ پڑ گئے جگر عندلیب میں

سر مارتے ہیں سنگ سے فرہاد کے سے رنگ

دیکھیں تو ہم بھی کیا ہے ہمارے نصیب میں

جانے کو سوے دوست مسافر ہوئے ہیں ہم

ڈر ہر قدم ہے عشق کی راہ غریب میں

کیا رفتگاں کے ہاتھ سے ہو کتنے ان کے پائوں

اکثر جنھوں کا ہاتھ ہے دست طبیب میں

دل خستہ چشم بستہ و رو زرد تس پہ گرد

حیرت ہے ہم کو میر کے حال عجیب میں

میر تقی میر

بارے سب روزے تو گذرے مجھے میخانے میں

اکتوبر 6, 2015میر تقی میر،اساتذہ،غزلمیخانے،گھبرانے،پھیلانے،آنے،آجانےadmin

دیوان سوم غزل 1210

اب کے ماہ رمضاں دیکھا تھا پیمانے میں

بارے سب روزے تو گذرے مجھے میخانے میں

جیسے بجلی کے چمکنے سے کسو کی سدھ جائے

بے خودی آئی اچانک ترے آجانے میں

وہ تو بالیں تئیں آیا تھا ہماری لیکن

سدھ بھی کچھ ہم کو نہ تھی جانے کے گھبرانے میں

آج سنتے ہیں کہ فردا وہ قدآرا ہو گا

دیر کچھ اتنی قیامت کے نہیں آنے میں

حق جو چاہے تو بندھی مٹھی چلا جائوں میر

مصلحت دیکھی نہ میں ہاتھ کے پھیلانے میں

میر تقی میر

خدا نُہ نہ دے ان کو جو سر کھجائیں

اکتوبر 6, 2015میر تقی میر،اساتذہ،غزللگائیں،کھجائیں،اٹھائیں،بنائیں،جائیں،دکھائیں،سائیںadmin

دیوان سوم غزل 1209

نچیں جبہے عاشق اگر دست پائیں

خدا نُہ نہ دے ان کو جو سر کھجائیں

جھمکنے لگا خوں تو جاے سرشک

ابھی دیکھیں آنکھیں ہمیں کیا دکھائیں

رہیں کس کو سانسے کہ اب ضعف سے

مرا جی ہی کرنے لگا سائیں سائیں

خدا ساز تھا آزر بت تراش

ہم اپنے تئیں آدمی تو بنائیں

چلا یار کی اور جاتا ہے جی

جو ہو اختیاری تو اودھر نہ جائیں

جگر سوز ہیں اس کے لعل خموش

طلب کریے بوسہ تو باتیں بنائیں

ہمیں بے نیازی نے بٹھلا دیا

کہاں اتنی طاقت کہ منت اٹھائیں

کہیں دیکھے وہ بید مجنوں کہ ہم

فراموش کار اپنے کو تا دکھائیں

کہیں میر عشق مجازی ہے بد

حقیقت ہو معلوم گر دل لگائیں

میر تقی میر

لگ اٹھتی آگ سب جوِّ سما میں

اکتوبر 6, 2015میر تقی میر،اساتذہ،غزلفنا،ہوا،وفا،ادا،بہا،بلا،جفا،جا،خدا،سما،صباadmin

دیوان سوم غزل 1208

اثر ہوتا ہماری گر دعا میں

لگ اٹھتی آگ سب جوِّ سما میں

نہ اٹکا ہائے ٹک یوسفؑ کا مالک

وگرنہ مصر سب ملتا بہا میں

قصور اپنے ہی طول عمر کا تھا

نہ کی تقصیر ان نے تو جفا میں

سخن مشتاق ہیں بندے کے سب لوگ

سر و دل کس کو ہے عشق خدا میں

کفن کیا عشق میں میں نے ہی پہنا

کھنچے لوہو میں بہتیروں کے جامیں

پیام اس گل کو اس کے ہاتھ دیتے

سبک پائی نہ ہوتی گر صبا میں

جیو خوش یا کوئی ناخوش ہمیں کیا

ہم اپنے محو ہیں ذوق فنا میں

ہمیں فرہاد و مجنوں جس سے چاہو

تم آکر پوچھ لو شہر وفا میں

سراپا ہی ادا و ناز ہے یار

قیامت آتی ہے اس کی ادا میں

بلا زلف سیاہ اس کی ہے پرپیچ

وطن دل نے کیا ہے کس بلا میں

ضعیف و زار تنگی سے ہیں ہرچند

ولیکن میر اڑتے ہیں ہوا میں

میر تقی میر

لگی ہے آگ اک میرے جگر میں

اکتوبر 6, 2015میر تقی میر،اساتذہ،غزلنظر،کمر،گھر،جگر،سفر،سحر،شرadmin

دیوان سوم غزل 1207

شرر سے اشک ہیں اب چشم تر میں

لگی ہے آگ اک میرے جگر میں

نگین عاشق و معشوق کے رنگ

جدا رہتے ہیں ہم وے ایک گھر میں

بلا ہنگامہ تھا کل اس کے در پر

قیامت گم ہوئی اس شور و شر میں

بگولے کی روش وحشت زدہ ہم

رہے برچیدہ دامن اس سفر میں

سماں یاں سانجھ کا سا ہو نہ جاتا

اثر ہوتا اگر آہ سحر میں

لچکنے ہی نے ہم کو مار رکھا

کٹاری تو نہ تھی اس کی کمر میں

رہا تھا دیکھ اودھر میر چلتے

عجب اک ناامیدی تھی نظر میں

میر تقی میر

ہجراں میں اس کے ہم کو بہتیرے مشغلے ہیں

اکتوبر 6, 2015میر تقی میر،اساتذہ،غزلہلے،ملے،مرحلے،مشغلے،چلے،بلے،بھلے،تلے،زلزلےadmin

دیوان سوم غزل 1206

روتے ہیں نالہ کش ہیں یا رات دن جلے ہیں

ہجراں میں اس کے ہم کو بہتیرے مشغلے ہیں

جوں دود عمر گذری سب پیچ و تاب ہی میں

اتنا ستا نہ ظالم ہم بھی جلے بلے ہیں

مرنا ہے خاک ہونا ہو خاک اڑتے پھرنا

اس راہ میں ابھی تو درپیش مرحلے ہیں

کس دن چمن میں یارب ہو گی صبا گل افشاں

کتنے شکستہ پر ہم دیوار کے تلے ہیں

جب یاد آگئے ہیں پاے حنائی اس کے

افسوس سے تب اپنے ہم ہاتھ ہی ملے ہیں

تھا جو مزاج اپنا سو تو کہاں رہا ہے

پر نسبت اگلی تو بھی ہم ان دنوں بھلے ہیں

کچھ وہ جو کھنچ رہا ہے ہم کانپتے ہیں ڈر سے

یاں جوں کمان گھر میں ہر وقت زلزلے ہیں

اک شور ہی رہا ہے دیوان پن میں اپنے

زنجیر سے ہلے ہیں گر کچھ بھی ہم ہلے ہیں

پست و بلند دیکھیں کیا میر پیش آئے

اس دشت سے ہم اب تو سیلاب سے چلے ہیں

میر تقی میر

مدت ہوئی اٹھا دیں تم نے یہ ساری رسمیں

اکتوبر 6, 2015میر تقی میر،اساتذہ،غزلمیں،رسمیںadmin

دیوان سوم غزل 1205

کیسی وفا و الفت کھاتے عبث ہو قسمیں

مدت ہوئی اٹھا دیں تم نے یہ ساری رسمیں

ساون تو اب کے ایسا برسا نہیں جو کہیے

روتا رہا ہوں میں ہی دن رات اس برس میں

گھبرا کے یوں لگے ہے سینے میں دل تڑپنے

جیسے اسیر تازہ بیتاب ہو قفس میں

جانکاہ ایسے نالے لوہے سے تو نہ ہوویں

بیتاب دل کسو کا رکھا ہے کیا جرس میں

اب لاغری سے دیں ہیں ساری رگیں دکھائی

پر عشق بھر رہا ہے ایک ایک میری نس میں

اے ابر ہم بھی برسوں روتے پھرا کیے ہیں

دریا بندھے پڑے ہیں وادی کے خار و خس میں

کیا میر بس کرے ہے اب زاری آہ شب کی

دل آگیا ہے اس کا ظالم کسو کے بس میں

میر تقی میر

دن آج کا بھی سانجھ ہوا انتظار میں

اکتوبر 6, 2015میر تقی میر،اساتذہ،غزلقرار،یار،کنار،پیار،انتظار،بہار،دیار،رہگذار،شکارadmin

دیوان سوم غزل 1204

دور اس سے جی چکے ہیں ہم اس روزگار میں

دن آج کا بھی سانجھ ہوا انتظار میں

داغوں سے بھر گیا ہے مرا سینۂ فگار

گل پھول زور زور کھلے اس بہار میں

کیا اعتبار طائر دل کی تڑپ کا اب

مذبوحی سی ہے کچھ حرکت اس شکار میں

بوسہ لبوں کا مانگتے ہی تم بگڑ گئے

بہتیری باتیں ہوتی ہیں اخلاص پیار میں

دل پھر کے ہم سے خانۂ زنجیر کے قریب

ٹک پہنچتا ہی ہے شکن زلف یار میں

اس بحرحسن پاس نہ خنجر تھا کل نہ تیغ

میں جان دی ہے حسرت بوس و کنار میں

چلتا ہے ٹک تو دیکھ کے چل پائوں ہر نفس

آنکھیں ہی بچھ گئی ہیں ترے رہگذار میں

کس کس ادا سے ریختے میں نے کہے ولے

سمجھا نہ کوئی میری زبان اس دیار میں

تڑپے ہے متصل وہ کہاں ایسے روز و شب

ہے فرق میر برق و دل بے قرار میں

میر تقی میر

دل کلیجا نکال لیتے ہیں

اکتوبر 6, 2015میر تقی میر،اساتذہ،غزلمال،نکال،ڈھال،ڈال،وبال،سنبھال،سوالadmin

دیوان سوم غزل 1203

جس کا خوباں خیال لیتے ہیں

دل کلیجا نکال لیتے ہیں

کیا نظرگاہ ہے کہ شرم سے گل

سر گریباں میں ڈال لیتے ہیں

دیکھ اسے ہو ملک سے بھی لغزش

ہم تو دل کو سنبھال لیتے ہیں

کھول کر بال سادہ رو لڑکے

خلق کا کیوں وبال لیتے ہیں

تیغ کھینچے ہیں جب یہ خوش ظاہر

ماہ و خور منھ پہ ڈھال لیتے ہیں

دلبراں نقد دل کو عاشق کے

جان کر اپنا مال لیتے ہیں

ہیں گدا میر بھی ولے دوجہاں

کرکے اک ہی سوال لیتے ہیں

میر تقی میر

ایسی جنت گئی جہنم میں

اکتوبر 6, 2015میر تقی میر،اساتذہ،غزلہم،موسم،ماتم،کم،جہنم،دم،عالمadmin

دیوان سوم غزل 1202

جائے ہے جی نجات کے غم میں

ایسی جنت گئی جہنم میں

نزع میں میرے ایک دم ٹھہرو

دم ابھی ہیں ہزار اک دم میں

نعل ہم چھاتیوں پہ جڑ کے پھرے

اپنے خوں گشتہ دل کے ماتم میں

ہے بہت جیب چاکی ہی جوں صبح

کیا کیا جائے فرصت کم میں

پرکے تھی بے کلی قفس میں بہت

دیکھیے اب کے گل کے موسم میں

آپ میں ہم نہیں تو کیا ہے عجب

دور اس سے رہا ہے کیا ہم میں

بے خودی پر نہ میر کی جائو

تم نے دیکھا ہے اور عالم میں

میر تقی میر

دیدنی ہے پہ بہت کم نظر آتا ہے میاں

اکتوبر 6, 2015میر تقی میر،اساتذہ،غزلپلاتا،پاتا،آتا،اٹھاتا،بناتا،جلاتا،جاتاadmin

دیوان سوم غزل 1201

شہروں ملکوں میں جو یہ میر کہاتا ہے میاں

دیدنی ہے پہ بہت کم نظر آتا ہے میاں

عالم آئینہ ہے جس کا وہ مصور بے مثل

ہائے کیا صورتیں پردے میں بناتا ہے میاں

قسمت اس بزم میں لائی کہ جہاں کا ساقی

دے ہے مے سب کو ہمیں زہر پلاتا ہے میاں

ہوکے عاشق ترے جان و دل و دیں کھو بیٹھے

جیسا کرتا ہے کوئی ویسا ہی پاتا ہے میاں

حسن یک چیز ہے ہم ہوویں کہ تو ہو ناصح

ایسی شے سے کوئی بھی ہاتھ اٹھاتا ہے میاں

جھکّڑ اس حادثے کا کوہ گراں سنگ کو بھی

جوں پر کاہ اڑائے لیے جاتا ہے میاں

کیا پری خواں ہے جو راتوں کو جگاوے ہے میر

شام سے دل جگر و جان جلاتا ہے میاں

میر تقی میر

جھلک سی مارتی ہے کچھ سیاہی داغ سودا میں

اکتوبر 6, 2015میر تقی میر،اساتذہ،غزلپا،تمنا،ثریا،جا،دنیا،دریا،سوداadmin

دیوان سوم غزل 1200

بہار آئی کھلے گل پھول شاید باغ و صحرا میں

جھلک سی مارتی ہے کچھ سیاہی داغ سودا میں

نفاق مردماں عاجز سے ہے زعم تکبر پر

کہوں کیا اتفاق ایسا بھی ہوجاتا ہے دنیا میں

نموداری ہماری بے کلی سے ایک چشمک ہے

ٹھہرنا برق سا اپنا ہے ہوچکنا اسی جا میں

سخن دس پانچ یاں ہیں جمع کس حسن لطافت سے

تفاوت ہے مرے مجموعہ و عقد ثریا میں

کنواں دیکھا نہ کوئی غار میں نے شوق کے مارے

بعینہ راہ اندھا سا چلا اس کی تمنا میں

بہت تھا شور وحشت سر میں میرے سوچ نے تیری

لکھی تصویر تو زنجیر پہلے کھینچ لی پا میں

جدائی کے تعب کھینچے نہیں ہیں میر راضی ہوں

جلاویں آگ میں یا مجھ کو پھینکیں قعر دریا میں

میر تقی میر

رونے سے تب تو میری کچھ آنکھیں جلتیاں ہیں

اکتوبر 6, 2015میر تقی میر،اساتذہ،غزلملتیاں،چلتیاں،نکلتیاں،جلتیاں،سنبھلتیاںadmin

دیوان سوم غزل 1199

چنگاریاں گرے ہیں جب پلکیں ہلتیاں ہیں

رونے سے تب تو میری کچھ آنکھیں جلتیاں ہیں

آنکھیں ملا کے اس سے ٹک دیکھو حال دل کا

وے انکھڑیاں جیوں کو اپنے تو ملتیاں ہیں

ہم تو بھی فصل گل میں چل ٹک تو پاس بیٹھیں

سر جوڑ جوڑ کیسی کلیاں نکلتیاں ہیں

مذکور دخت رز کا کیا شیخ رہگذر میں

اس سے ابھی ہماری باتیں ہی چلتیاں ہیں

دیکھیں تو میر کیا ہو بے طاقتی سے حالت

اب دیر دیر جانیں اپنی سنبھلتیاں ہیں

میر تقی میر

خاک سی منھ پر مرے اس وقت اڑ جاتی ہے میاں

اکتوبر 6, 2015میر تقی میر،اساتذہ،غزللاتی،چھاتی،کھاتی،گھبراتی،گاتی،باغاتی،جاتی،ذاتی،شرماتیadmin

دیوان سوم غزل 1198

جوش غم اٹھنے سے اک آندھی چلی آتی ہے میاں

خاک سی منھ پر مرے اس وقت اڑ جاتی ہے میاں

پڑ گئے سوراخ دل کے غم میں سینے کوٹتے

سل تو پتھر کی نہیں آخر مری چھاتی ہے میاں

میں حیا والا ہوا رسواے عالم عشق میں

آنکھ میری اس سبب لوگوں سے شرماتی ہے میاں

رشک اس کے چہرئہ پرنور کا ہے جاں گداز

شمع مجلس میں کھڑی اپنے تئیں کھاتی ہے میاں

آگ غیرت سے قفس کو دوں ہوں چاروں اور سے

ایک دو گلبرگ جب بادسحر لاتی ہے میاں

ہے حزیں نالیدن اس کا نغمۂ طنبور سا

خوش نوا مرغ گلستاں رند باغاتی ہے میاں

کیا کہوں منھ تک جگر آتا ہے جب رکتا ہے دل

جان میری تن میں کیسی کیسی گھبراتی ہے میاں

اس کے ابروے کشیدہ خم ہی رہتے ہیں سدا

یہ کجی اس تیغ کی تو جوہر ذاتی ہے میاں

گات اس اوباش کی لیں کیونکے بر میں میر ہم

ایک جھرمٹ شال کا اک شال کی گاتی ہے میاں

میر تقی میر

کسو سے شہر میں کچھ اختلاط مجھ کو نہیں

اکتوبر 6, 2015میر تقی میر،اساتذہ،غزلنشاط،انبساط،احتیاط،اختلاط،صراطadmin

دیوان سوم غزل 1197

گرفتہ دل ہوں سر ارتباط مجھ کو نہیں

کسو سے شہر میں کچھ اختلاط مجھ کو نہیں

جہاں ہو تیغ بکف کوئی سادہ جا لگنا

اب اپنی جان کا کچھ احتیاط مجھ کو نہیں

کرے گا کون قیامت کو ریسماں بازی

دل و دماغ گذار صراط مجھ کو نہیں

جسے ہو مرگ سا پیش استحالہ کیوں نہ کڑھے

اس اپنے جینے سے کچھ انبساط مجھ کو نہیں

ہوا ہوں فرط اذیت سے میں تو سن اے میر

تمیز رنج و خیال نشاط مجھ کو نہیں

میر تقی میر

جس سے دل آگ و چشم آب ہے میاں

اکتوبر 6, 2015میر تقی میر،اساتذہ،غزلکتاب،انقلاب،آب،اضطراب،تاب،جواب،حجاب،حساب،خواب،شراب،عتابadmin

دیوان سوم غزل 1196

عشق وہ خانماں خراب ہے میاں

جس سے دل آگ و چشم آب ہے میاں

تن میں جب تک ہے جاں تکلف ہے

ہم میں اس میں ابھی حجاب ہے میاں

گو نہیں میں کسو شمار میں یاں

عاقبت ایک دن حساب ہے میاں

کو دماغ و جگر کہاں وہ قلب

یاں عجب ایک انقلاب ہے میاں

زلف بل کھا رہی ہے گو اس کی

دل کو اپنے تو پیچ و تاب ہے میاں

لطف و مہر و وفا وہ کیا جانے

ناز ہے خشم ہے عتاب ہے میاں

لوہو اپنا پیوں ہوں چپکا ہوں

کس کو اس بن سر شراب ہے میاں

چشم وا یاں کی چشم بسمل ہے

جاگنا یہ نہیں ہے خواب ہے میاں

منھ سے کچھ بولتا نہیں قاصد

شاید اودھر سے اب جواب ہے میاں

دل ہی اپنا نہیں فقط بے چین

جی کو بھی زور اضطراب ہے میاں

چاہیے وہ کہے سو لکھ رکھیں

ہر سخن میر کا کتاب ہے میاں

میر تقی میر

بھروسا کیا ہے میرا میں چراغ زیر داماں ہوں

اکتوبر 6, 2015میر تقی میر،اساتذہ،غزلناداں،گریاں،پریشاں،انساں،حیراں،داماں،طوفاںadmin

دیوان سوم غزل 1195

جلا از بس تمھارے طور سے اے جامہ زیباں ہوں

بھروسا کیا ہے میرا میں چراغ زیر داماں ہوں

سر حرف و سخن کس کو خیال زلف میں اس کے

تنک میں جو بکھر جاتا ہوں میں خاطر پریشاں ہوں

کہن سالی میں شاہد بازیاں کاہے کو زیبا تھیں

دیا لڑکوں کو دل میں نے قیامت میں بھی ناداں ہوں

کبھو خورشید و مہ کو دیکھ رہتا ہوں کبھو گل کو

مرے انداز سے ظاہر ہے میں اس رو کا حیراں ہوں

کسو کی یاد رو میں اشک آنکھوں سے نہیں تھمتے

برنگ ابر قبلہ آج میں شدت سے گریاں ہوں

بکا جب تک نہیں کرتا ہوں تب تک خیر ہے ورنہ

بلا ہوں فتنہ ہوں آشوب ہوں آفت ہوں طوفاں ہوں

بحال سگ پھرا کب تک کروں یوں اس کے کوچے میں

خجالت کھینچتا ہوں میر آخر میں بھی انساں ہوں

میر تقی میر

سو آئینہ سا صورت دیوار ہوا میں

اکتوبر 6, 2015میر تقی میر،اساتذہ،غزلہموار،یار،گرفتار،بیمار،بیدار،تیار،خوار،خبردار،خریدار،دیوارadmin

دیوان سوم غزل 1194

تھا شوق مجھے طالب دیدار ہوا میں

سو آئینہ سا صورت دیوار ہوا میں

جب دور گیا قافلہ تب چشم ہوئی باز

کیا پوچھتے ہو دیر خبردار ہوا میں

اب پست و بلند ایک ہے جوں نقش قدم یاں

پامال ہوا خوب تو ہموار ہوا میں

کب ناز سے شمشیر ستم ان نے نہ کھینچی

کب ذوق سے مرنے کو نہ تیار ہوا میں

بازار وفا میں سرسودا تھا سبھوں کو

پر بیچ کے جی ایک خریدار ہوا میں

ہشیار تھے سب دام میں آئے نہ ہم آواز

تھی رفتگی سی مجھ کو گرفتار ہوا میں

کیا چیتنے کا فائدہ جو شیب میں چیتا

سونے کا سماں آیا تو بیدار ہوا میں

تم اپنی کہو عشق میں کیا پوچھو ہو میری

عزت گئی رسوائی ہوئی خوار ہوا میں

اس نرگس مستانہ کو دیکھے ہوئے برسوں

افراط سے اندوہ کی بیمار ہوا میں

رہتا ہوں سدا مرنے کے نزدیک ہی اب میر

اس جان کے دشمن سے بھلا یار ہوا میں

میر تقی میر

برسنا مینھ کا داخل ہے اس بن تیر باراں میں

اکتوبر 6, 2015میر تقی میر،اساتذہ،غزلمیداں،یوسفستاں،گلستاں،پیکاں،ایماں،بیاباں،باراں،جاں،حیراں،دیواں،داماںadmin

دیوان سوم غزل 1193

چمکنا برق کا کرتا ہے کار تیغ ہجراں میں

برسنا مینھ کا داخل ہے اس بن تیر باراں میں

بھرے رہتے ہیں سارے پھول ہی جس کے گریباں میں

وہ کیا جانے کہ ٹکڑے ہیں جگر کے میرے داماں میں

کہیں شام و سحر رویا تھا مجنوں عشق لیلیٰ میں

ہنوز آشوب دونوں وقت رہتا ہے بیاباں میں

خیال یار میں آگے ہے یک مہ پارہ یاں ہر دم

اگر ہجراں میں زندانی ہوں پر ہوں یوسفستاں میں

رکھا عرصہ جنوں پر تنگ مشتاقوں کی دوری سے

کسے مارا ہے اس گھتیے نے سنمکھ ہوکے میداں میں

جہاں سے دیکھیے اک شعر شور انگیز نکلے ہے

قیامت کا سا ہنگامہ ہے ہر جا میرے دیواں میں

جو دیکھو تو نہیں یہ حال اپنا حسن سے خالی

دمک الماس کی سی ہے ہماری چشم حیراں میں

خرابی آگئی دینوں میں ملت گئی اسے دیکھے

ملے سے اس کے رخنے پڑ گئے لوگوں کے ایماں میں

نکل آتا ہے گھر سے ہر گھڑی ننگے بدن باہر

برا یہ آپڑا ہے عیب اس آسائش جاں میں

ستم کے تیر اس کے میرے سینے میں بہت ٹوٹے

کیا جاتا ہے مشکل فرق اب دل اور پیکاں میں

ہواے ابر میں کیا میر ہنستا باغ میں وہ تھا

گری پڑتی ہے بجلی آج کچھ صحن گلستاں میں

میر تقی میر

وے بہا سہل جو دیتے ہیں خریدار نہیں

اکتوبر 6, 2015میر تقی میر،اساتذہ،غزلمار،گرفتار،پیار،تکرار،خریدار،سزاوار،عارadmin

دیوان سوم غزل 1192

دل عجب جنس گراں قدر ہے بازار نہیں

وے بہا سہل جو دیتے ہیں خریدار نہیں

کچھ تمھیں ملنے سے بیزار ہو میرے ورنہ

دوستی ننگ نہیں عیب نہیں عار نہیں

ایک دو بات کبھو ہم سے کہو یا نہ کہو

قدر کیا اپنی ہمیں اس لیے تکرار نہیں

ناز و انداز و ادا عشوہ و اغماض و حیا

آب و گل میں ترے سب کچھ ہے یہی پیار نہیں

صورت آئینے میں ٹک دیکھ تو کیا صورت ہے

بدزبانی تجھے اس منھ پہ سزاوار نہیں

دل کے الجھائو کو کیا تجھ سے کہوں اے ناصح

تو کسو زلف کے پھندے میں گرفتار نہیں

اس کے کاکل کی پہیلی کہو تم بوجھے میر

کیا ہے زنجیر نہیں دام نہیں مار نہیں

میر تقی میر

ہم کنج قفس میں ہیں دل سینوں میں جلتے ہیں

اکتوبر 6, 2015میر تقی میر،اساتذہ،غزلملتے،چلتے،گلتے،پگھلتے،اگلتے،ابلتے،بہلتے،جلتے،سنبھلتےadmin

دیوان سوم غزل 1191

کہتے ہیں بہار آئی گل پھول نکلتے ہیں

ہم کنج قفس میں ہیں دل سینوں میں جلتے ہیں

اب ایک سی بیہوشی رہتی نہیں ہے ہم کو

کچھ دل بھی سنبھلتے ہیں پر دیر سنبھلتے ہیں

وہ تو نہیں اک چھینٹا رونے کا ہوا گاہے

اب دیدئہ تر اکثر دریا سے ابلتے ہیں

ان پائوں کو آنکھوں سے ہم ملتے رہے جیسا

افسوس سے ہاتھوں کو اب ویسا ہی ملتے ہیں

کیا کہیے کہ اعضا سب پانی ہوئے ہیں اپنے

ہم آتش ہجراں میں یوں ہی پڑے گلتے ہیں

کرتے ہیں صفت جب ہم لعل لب جاناں کی

تب کوئی ہمیں دیکھے کیا لعل اگلتے ہیں

گل پھول سے بھی اپنے دل تو نہیں لگتے ٹک

جی لوگوں کے بے جاناں کس طور بہلتے ہیں

ہیں نرم صنم گونہ کہنے کے تئیں ورنہ

پتھر ہیں انھوں کے دل کاہے کو پگھلتے ہیں

اے گرم سفر یاراں جو ہے سو سر رہ ہے

جو رہ سکو رہ جائو اب میر بھی چلتے ہیں

میر تقی میر

ظل ممدود چمن میں ہوں مگر زنجیر میں

اکتوبر 6, 2015میر تقی میر،اساتذہ،غزلمیر،پیر،تقریر،تقصیر،تاثیر،تصویر،زنجیرadmin

دیوان سوم غزل 1190

کیا کروں سودائی اس کی زلف کی تدبیر میں

ظل ممدود چمن میں ہوں مگر زنجیر میں

گل تو مجھ حیران کی خاطر بہت کرتا ہے لیک

وا نہیں ہوتا برنگ غنچۂ تصویر میں

روبرو اس کے گئے خاموش ہوجاتا ہوں کچھ

کس سے اپنے چپکے رہنے کی کروں تقریر میں

تن بدن میں دل کی گرمی نے لگا رکھی ہے آگ

عشق کی تو ہے جوانی ہو گیا گو پیر میں

ہو اگر خونریز کا اپنے سبب تو کچھ کہو

وہ ستمگر ہے مقرر اور بے تقصیر میں

بے دماغی شور شب سے یار کو دونی ہوئی

دیکھی بس اس بے سرایت نالے کی تاثیر میں

کچھ نہیں پوچھا ہے مجھ سے جز حدیث روے یار

ہاتھ بلبل کے لگا ہوں باغ میں جب میر میں

میر تقی میر

نہیں آتیں کیا تجھ کو آنے کی باتیں

اکتوبر 6, 2015میر تقی میر،اساتذہ،غزللگانے،کھانے،آنے،آستانے،بنانے،دوانے،دکھانے،زمانے،سیانےadmin

دیوان سوم غزل 1189

نہ کر شوق کشتوں سے جانے کی باتیں

نہیں آتیں کیا تجھ کو آنے کی باتیں

سماجت جو کی بوس لب پر تو بولا

نہیں خوب یہ مار کھانے کی باتیں

زبانیں بدلتے ہیں ہر آن خوباں

یہ سب کچھ ہیں بگڑے زمانے کی باتیں

نظر جب کرو زیر لب کچھ کہے ہے

کہو یار کے آستانے کی باتیں

سہی جائے گالی اگر دوستی ہو

بری بھی بھلی ہیں لگانے کی باتیں

ہمیں دیر و کعبے سے کیا گفتگو ہے

چلی جاتی ہیں یہ سیانے کی باتیں

بگڑ بھی چکے یار سے ہم تو یارو

کرو کچھ اب اس سے بنانے کی باتیں

کیا سیر کل میں نے دیوان مجنوں

خوش آئیں بہت اس دوانے کی باتیں

بہت ہرزہ گوئی کی یاں میر صاحب

کرو واں کے کچھ منھ دکھانے کی باتیں

میر تقی میر

یہ کانٹے کھٹکتے جگر میں بھی ہیں

اکتوبر 6, 2015میر تقی میر،اساتذہ،غزلنظر،کمر،گہر،گھر،جگر،سفرadmin

دیوان سوم غزل 1188

تری پلکیں چبھتی نظر میں بھی ہیں

یہ کانٹے کھٹکتے جگر میں بھی ہیں

رہے پھرتے دریا میں گرداب سے

وطن میں بھی ہیں ہم سفر میں بھی ہیں

کہاں سے کہ مجنوں بھی ہم سا ہی تھا

غلط کے شوائب نظر میں بھی ہیں

نہ بھولو نزاکت لچک ہی نہیں

چھپے خنجر اس کی کمر میں بھی ہیں

جھمک سطح رخ کی سی اس کے کہاں

صفا و ضیا تو گہر میں بھی ہیں

دل و دلی دونوں اگر ہیں خراب

پہ کچھ لطف اس اجڑے گھر میں بھی ہیں

چلو میر کے تو تجسس کے بعد

کہ وے وحشی تو اپنے گھر میں بھی ہیں

میر تقی میر

عاشق زار کو مار رکھے ہے ایک ابرو کی اشارت میں

اکتوبر 6, 2015میر تقی میر،اساتذہ،غزلاشارت،بصارت،حقارت،زیارت،سفارت،شرارت،عمارتadmin

دیوان سوم غزل 1187

تیغ کی نوبت کب پہنچے ہے اپنے جی کی غارت میں

عاشق زار کو مار رکھے ہے ایک ابرو کی اشارت میں

گذرے گر دل میں ہوکر تو ایک نگاہ ضروری ہے

کچھ کچھ تیرے غم نے لکھا ہے آکر واں کی عمارت میں

سوکھ کے میں تو عشق کے غم میں خس کی مثال حقیر ہوا

وہ تقصیر نہیں کرتا ہے اب تک میری حقارت میں

ایک بگولا ساتھ مجھے بھی تربت قیس پہ لے آیا

کتنے غزال نظر واں آئے تھے مشغول زیارت میں

دل کو آگ اک دم میں دے دی اشک ہوئے چنگاری سے

کیا ہی شریر ہے شوخی برق ملائی ان نے شرارت میں

شیخ جو تھا دیدار بتاں کا منکر ایسا تھا معذور

دل کو بصیرت تھی نہ اس کے بے نوری تھی بصارت میں

خط و کتابت ایک طرف ہے دفتر لکھ لکھ بھیجے میر

کہیے کچھ جو صریر قلم کی کوتاہی ہو سفارت میں

میر تقی میر

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: