زمرہ جات کے محفوظات: اساتذہ

لے گیا رنگ اس کے دل سے تیر یار

اکتوبر 6, 2015میر تقی میر،اساتذہ،غزلتقصیر،تیر،تصویر،زنجیر،شمشیرadmin

دیوان سوم غزل 1136

صاف غلطاں خوں میں ہے نخچیر یار

لے گیا رنگ اس کے دل سے تیر یار

کوتہی کی میرے طول عمر نے

جور میں تو کچھ نہ تھی تقصیر یار

آ کڑوں کے پائوں میں بیڑی ہوئی

ہاتھ میں سونے کی وہ زنجیر یار

ہے کشیدہ جیسے تیغ آفتاب

میان میں رہتی نہیں شمشیر یار

میر ہم تو ناز ہی کھینچا کیے

کیونکے کوئی کھینچے ہے تصویر یار

میر تقی میر

کھلے بند مرغ چمن سے ملا کر

اکتوبر 6, 2015میر تقی میر،اساتذہ،غزللگا،ملا،چھپا،ا،بلا،بنا،جھکاadmin

دیوان سوم غزل 1135

سحر گوش گل میں کہا میں نے جا کر

کھلے بند مرغ چمن سے ملا کر

لگا کہنے فرصت ہے یاں یک تبسم

سو وہ بھی گریباں میں منھ کو چھپا کر

تناسب پہ اعضا کے اتنا تبختر

بگاڑا تجھے خوب صورت بنا کر

قیامت رہا اضطراب اس کے غم میں

جگر پھر گیا رات ہونٹوں پہ آ کر

اسی آرزو میں گئے ہم جہاں سے

نہ پوچھا کبھو لطف سے ٹک بلا کر

کھنچی تیغ اس کی تو یاں نیم جاں تھے

خجالت سے ہم رہ گئے سر جھکا کر

مبارک تمھیں میر ہو عشق کرنا

بہت ہم تو پچھتائے دل کو لگا کر

میر تقی میر

سو جی گئے تھے صدقے اس شوخ کے بدن پر

اکتوبر 6, 2015میر تقی میر،اساتذہ،غزلچلن،چمن،یاسمن،کفن،پن،پیرہن،بدن،سخنadmin

دیوان سوم غزل 1134

پڑتی ہے آنکھ ہر دم جا کر صفاے تن پر

سو جی گئے تھے صدقے اس شوخ کے بدن پر

نام خدا نکالے کیا پائوں رفتہ رفتہ

تلواریں چلتیاں ہیں اس کے تو اب چلن پر

تو بھی تو ایک دن چل گلشن میں ساتھ میرے

کرتی ہے کیا تبختر بلبل گل چمن پر

دل جو بجا نہیں ہے وحشی سا میں پھروں ہوں

تم جائیو نہ ہرگز میرے دوانے پن پر

درکار عاشقوں کو کیا ہے جو اب نامہ

یک نام یار بس ہے لکھنا مرے کفن پر

تب ہی بھلے تھے جب تک حرف آشنا نہ تھے تم

لینے لگے لڑائی اب تو سخن سخن پر

گرد رخ اس کے پیدا خط کا غبار یوں ہے

گرد اک تنک سی بیٹھے جس رنگ یاسمن پر

کس طرح میرجی کا ہم توبہ کرنا مانیں

کل تک بھی داغ مے تھے سب ان کے پیرہن پر

میر تقی میر

کس رنگ سے کرے ہے باتیں چبا چبا کر

اکتوبر 6, 2015میر تقی میر،اساتذہ،غزللگا،چھپا،چبا،ا،اٹھا،جا،دعاadmin

دیوان سوم غزل 1133

جب ہم کلام ہم سے ہوتا ہے پان کھا کر

کس رنگ سے کرے ہے باتیں چبا چبا کر

تھی جملہ تن لطافت عالم میں جاں کے ہم تو

مٹی میں اٹ گئے ہیں اس خاکداں میں آ کر

سعی و طلب بہت کی مطلب کے تیں نہ پہنچے

ناچار اب جہاں سے بیٹھے ہیں ہاتھ اٹھا کر

غیرت یہ تھی کہ آیا اس سے جو میں خفا ہو

مرتے موا پہ ہرگز اودھر پھرا نہ جا کر

قدرت خدا کی سب میں خلع العذار آئو

بیٹھو جو مجھ کنے تو پردے میں منھ چھپا کر

ارمان ہے جنھوں کو وے اب کریں محبت

ہم تو ہوئے پشیماں دل کے تئیں لگا کر

میں میر ترک لے کر دنیا سے ہاتھ اٹھایا

درویش تو بھی تو ہے حق میں مرے دعا کر

میر تقی میر

دم کھینچ تہ دل سے کوئی ٹکڑے جگر کر

اکتوبر 6, 2015میر تقی میر،اساتذہ،غزلہنر،مر،نظر،ور،کر،اتر،بسر،جگر،خبرadmin

دیوان سوم غزل 1132

اے مرغ چمن صبح ہوئی زمزمہ سر کر

دم کھینچ تہ دل سے کوئی ٹکڑے جگر کر

وہ آئینہ رو باغ کے پھولوں میں جو دیکھا

ہم رہ گئے حیران اسی منھ پہ نظر کر

ہے بے خبری مجھ کو ترے دیکھے سے ساقی

ہر لحظہ مری جان مجھے میری خبر کر

جس جاے سراپا میں نظر جاتی ہے اس کے

آتا ہے مرے جی میں یہیں عمر بسر کر

فرہاد سے پتھر پہ ہوئیں صنعتیں کیا کیا

دل جا کے جگرکاوی میں کچھ تو بھی ہنر کر

پڑتے نگہ اس شوخ کی ہوتا ہے وہ احوال

رہ جاوے ہے جیسے کہ کوئی بجلی سے ڈر کر

معشوق کا کیا وصل ورے ایسا دھرا ہے

تاشمع پتنگا بھی جو پہنچے ہے تو مر کر

یک شب طرف اس چہرئہ تاباں سے ہوا تھا

پھر چاند نظر ہی نہ چڑھا جی سے اتر کر

کسب اور کیا ہوتا عوض ریختے کے کاش

پچھتائے بہت میر ہم اس کام کو کر کر

میر تقی میر

کیا اجاڑا اس نگر کو لوٹ کر

اکتوبر 6, 2015میر تقی میر،اساتذہ،غزللوٹ،چھوٹ،پھوٹadmin

دیوان سوم غزل 1131

پیس مارا دل غموں نے کوٹ کر

کیا اجاڑا اس نگر کو لوٹ کر

ابر سے آشوب ایسا کب اٹھا

خوب روئے دیدئہ تر پھوٹ کر

کیوں گریباں کو پھروں پھاڑے نہ میر

دامن اس کا تو گیا ہے چھوٹ کر

میر تقی میر

شعلہ ہے شمع ساں یاں ہر یک سخن زباں پر

اکتوبر 6, 2015میر تقی میر،اساتذہ،غزلپاں،آسماں،آشیاں،تواں،دہاں،داستاں،زیاں،زباںadmin

دیوان سوم غزل 1130

گرمی سے گفتگو کی کرلے قیاس جاں پر

شعلہ ہے شمع ساں یاں ہر یک سخن زباں پر

دیکھ اس کے خط کی خوبی لگ جاتی ہے چپ ایسی

گویا کہ مہر کی ہے ان نے مرے دہاں پر

ہوں خاک مجھ کو ان سے نسبت حساب کیا ہے

میں گنتی میں نہیں ہوں وے ہفتم آسماں پر

گھر باغ میں بنایا پر ہم نے یہ نہ جانا

بجلی سے بھی پڑے گا پھول آ کے آشیاں پر

روتے ہیں دوست اکثر سن سرگذشت عاشق

تو بھی تو گوش وا کر ٹک میری داستاں پر

کیا بات میں تب اس کی جاوے کسو سے بولا

ہونے لگے ہوں خوں جب ہونٹوں کے رنگ پاں پر

تڑپے ہے دل گھڑی بھر تو پہروں غش رہے ہے

کیا جانوں آفت آئی کیا طاقت و تواں پر

سودا بنے جو اس سے تو میر منفعت ہے

اپنی نظر نہیں ہے پھر جان کے زیاں پر

میر تقی میر

اٹھے گی مری خاک سے گرد زرد

اکتوبر 6, 2015میر تقی میر،اساتذہ،غزلفرد،گرد،زردadmin

دیوان سوم غزل 1129

بہت ہے تن درد پرورد زرد

اٹھے گی مری خاک سے گرد زرد

وہ بیمار گو تو نہ جانے مجھے

مرا نامہ لکھنے کو ہو فرد زرد

گذرتی ہے کیا میر دل پر ترے

تو ہوتا ہے ہر لحظہ کچھ زرد زرد

میر تقی میر

پھول میری خاک سے نکلیں گے بھی تو زرد زرد

اکتوبر 6, 2015میر تقی میر،اساتذہ،غزلفرد،مرد،گرد،زرد،سردadmin

دیوان سوم غزل 1128

عشق لوہو پی گیا سب تن میں ہے سو درد درد

پھول میری خاک سے نکلیں گے بھی تو زرد زرد

کب مری شب کو سحر ہے ایک بدحالی کے بیچ

جانتا ہوں صبح ہے ہوتا ہوں جب میں سرد سرد

کارواں در کارواں یاں سے چلے جاتے ہیں لوگ

ہر طرف اس خاکداں میں دیکھتے ہیں گرد گرد

مرد و زن سب ہیں نہ پیر دیر و دخت تاک سے

یہ غلط فہمی ہے ہر زن زن ہے یا ہر مرد مرد

دفتر اعمال میرا بھول جاویں میر کاش

ہے قیامت اس جریدے کو جو دیکھیں فرد فرد

میر تقی میر

زبان سرخ سرِسبز دیتی ہے برباد

اکتوبر 6, 2015میر تقی میر،اساتذہ،غزلفرہاد،فریاد،ناشاد،ایجاد،آزاد،استاد،بنیاد،بیداد،برباد،جلاد،زیاد،صیادadmin

دیوان سوم غزل 1127

ہماری بات کو اے شمع بزم کریو یاد

زبان سرخ سرِسبز دیتی ہے برباد

ہمیں اسیر تو ہونا ہے اپنا اچھا یاد

کشش نہ دام کی دیکھی نہ کوشش صیاد

نہ دردمندی سے یہ راہ تم چلے ورنہ

قدم قدم پہ تھی یاں جاے نالہ و فریاد

ہزار فاختہ گردن میں طوق پہنے پھرے

اسے خیال نہیں کچھ وہ سرو ہے آزاد

جہاں میں اتنے ہی آشوب کیا رہیں گے بس

ابھی پڑے گا مرے خون بے گنہ سے زیاد

چمن میں اٹھتے ہیں سنّاہٹے سے اے بلبل

جگرخراش یہ نالے ہیں تیرے منھ سے زیاد

ثبات قصر و در و بام و خشت و گل کتنا

عمارت دل درویش کی رکھو بنیاد

چمن میں یار ہمیں لے گئے تھے وا نہ ہوئے

ہمارے ساتھ یہی غم یہی دل ناشاد

ہمیں تو مرنے کا طور اس کے خوش بہت آیا

طواف کریے جو ہو نخل ماتم فرہاد

نظر نہ کرنی طرف صید کے دم بسمل

یہ ظلم تازہ ہوا اس کشندے سے ایجاد

چلے نہ تیغ اگر ہم نگاہ عجز کریں

ہماری اور نہ دیکھے خدا کرے جلاد

کب ان نے دل میں کر انصاف ہم پہ لطف کیا

وہی ہے خشم وہی یاں سے جا وہی بیداد

تمام ریجھ پچائو ہیں اب تو پھر پس مرگ

کہا کنھوں نے تو کیا عزّاسمہٗ استاد

اگرچہ گنج بھی ہے پر خرابیاں ہیں بہت

نہ پھر خرابے میں اے میر خانماں برباد

میر تقی میر

بہت تڑپا کیا جوں مرغ پربند

اکتوبر 6, 2015میر تقی میر،اساتذہ،غزلپربند،بند،شکربندadmin

دیوان سوم غزل 1126

زمیں پر میں جو پھینکا خط کو کر بند

بہت تڑپا کیا جوں مرغ پربند

گرفت دل سے ناچاری ہے یعنی

رہا ہوں بیٹھ میں بھی کر کے گھر بند

پھنسا دل زلف و کاکل میں نہ پوچھو

پڑا ہے ناگہ آکر بند پر بند

سب اس کی چشم پرنیرنگ کے محو

مگر کی ان نے عالم کی نظر بند

چمن میں کیونکے ہم پربستہ جاویں

بلند ازبس کہ ہے دیوار و در بند

بہت پیکان تیر یار ٹوٹے

تمام آہن ہے اب میرا جگر بند

ہوئیں رونے کی مانع میری پلکیں

بندھا خاشاک سے سیلاب پر بند

کہا کیا جائے ان ہونٹوں کے آگے

ہماری لب گزی ہے یہ شکربند

کھلے بندوں نہ آیا یاں وہ اوباش

پھرا مونڈھے پہ ڈالے بیشتر بند

یہی اوقات ہے گی دید کی یاں

رکھ اپنی چشم کو شام و سحر بند

نچا رہتا تھا چہرہ جس سے سو اب

گریباں میں ہے وہ دست ہنر بند

فن اشعار میں ہوں پہلواں میر

مجھے ہے یاد اس کشتی کا ہر بند

میر تقی میر

کچھ آگئی تھی سرو چمن میں کسو کی طرح

اکتوبر 6, 2015میر تقی میر،اساتذہ،غزلنمو،وضو،کبھو،کسو،گفتگو،اتو،تندخو،جستجو،رفو،رو،سبوadmin

دیوان سوم غزل 1125

یاد آگیا تو بہنے لگیں آنکھیں جو کی طرح

کچھ آگئی تھی سرو چمن میں کسو کی طرح

چسپاں قبا وہ شوخ سدا غصے ہی رہا

چین جبیں سے اس کی اٹھائی اتو کی طرح

گالی لڑائی آگے تو تم جانتے نہ تھے

اب یہ نکالی تم نے نئی گفتگو کی طرح

ہم جانتے تھے تازہ بناے جہاں کو لیک

یہ منزل خراب ہوئی ہے کبھو کی طرح

سرسبز ہم ہوئے نہ تھے جو زرد ہو چلے

اس کشت میں پڑی یہ ہمارے نمو کی طرح

وے دن کہاں کہ مست سرانداز خم میں تھے

سر اب تو جھوجھرا ہے شکستہ سبو کی طرح

تسکین دل کی کب ہوئی سیرچمن کیے

گو پھول دل میں آگئے کچھ اس کے رو کی طرح

آخر کو اس کی راہ میں ہم آپ گم ہوئے

مدت میں پائی یار کی یہ جستجو کی طرح

کیا لوگ یوں ہی آتش سوزاں میں جا پڑے

کچھ ہو گی جلتی آگ میں اس تندخو کی طرح

ڈرتا ہوں چاک دل کو مرے پلکوں سے سیے

نازک نظر پڑی ہے بہت اس رفو کی طرح

دھوتے ہیں اشک خونی سے دست و دہن کو میر

طورنماز کیا ہے جو یہ ہے وضو کی طرح

میر تقی میر

دانستہ جا پڑے ہے کوئی بھی بلا کے بیچ

اکتوبر 6, 2015میر تقی میر،اساتذہ،غزلہوا،وفا،آشنا،ابتدا،بلا،جفا،دعاadmin

دیوان سوم غزل 1124

جانا نہ دل کو تھا تری زلف رسا کے بیچ

دانستہ جا پڑے ہے کوئی بھی بلا کے بیچ

فرہاد و قیس جس سے مجھے چاہو پوچھ لو

مشہور ہے فقیر بھی اہل وفا کے بیچ

آخر تو میں نے طول دیا بحث عشق کو

کوتاہی تم بھی مت کرو جور و جفا کے بیچ

آئی جو لب پہ آہ تو میں اٹھ کھڑا ہوا

بیٹھا گیا نہ مجھ سے تو ایسی ہوا کے بیچ

اقبال دیکھ اس ستم و ظلم و جور پر

دیکھوں ہوں جس کو ہے وہ اسی کی دعا کے بیچ

دل اس چمن میں بہتوں سے میرا لگا ولے

بوے وفا نہ پائی کسو آشنا کے بیچ

جوش و خروش میر کے جاتے رہے نہ سب

ہوتا ہے شور چاہنے کی ابتدا کے بیچ

میر تقی میر

اس کی سی بو نہ آئی گل و یاسمن کے بیچ

اکتوبر 6, 2015میر تقی میر،اساتذہ،غزلوطن،یاسمن،کفن،بدن،تن،دہن،زدنadmin

دیوان سوم غزل 1123

کل لے گئے تھے یار ہمیں بھی چمن کے بیچ

اس کی سی بو نہ آئی گل و یاسمن کے بیچ

کشتہ ہوں میں تو شیریں زبانی یار کا

اے کاش وہ زبان ہو میرے دہن کے بیچ

اس بحر میں رہا مجھے چکر بھنور کے طور

سر گشتگی میں عمر گئی سب وطن کے بیچ

گر دل جلا بھنا یہی ہم ساتھ لے گئے

تو آگ لگ اٹھے گی ہمارے کفن کے بیچ

تنگی جامہ ظلم ہے اے باعث حیات

پاتے ہیں لطف جان کا ہم تیرے تن کے بیچ

نازک بہت ہے تو کہیں افسردگی نہ آئے

چسپانی لباس سے پیارے بدن کے بیچ

ہے قہر وہ جو دیکھے نظر بھر کے جن نے میر

برہم کیا جہاں مژہ برہم زدن کے بیچ

میر تقی میر

حال رہتا ہی نہیں عشق کے بیمار کے بیچ

اکتوبر 6, 2015میر تقی میر،اساتذہ،غزلگلزار،بیمار،تلوار،دیوار،رخسار،زنار،سرکارadmin

دیوان سوم غزل 1122

حال کہنے کی کسے تاب اس آزار کے بیچ

حال رہتا ہی نہیں عشق کے بیمار کے بیچ

آرزومند ہے خورشید میسر ہے کہاں

کہ تنک ٹھہرے ترے سایۂ دیوار کے بیچ

کیا کہیں ہم کہ گلے ڈالے پھریں مستی میں

دانے سبحہ کے پرو رشتۂ زنار کے بیچ

رشک خوبی کا اسی کے جگرمہ میں ہے داغ

یہ جو اک خال پڑا ہے ترے رخسار کے بیچ

مل گیا پھولوں میں اس رنگ سے کرتے ہوئے سیر

کہ تامل کیے پایا اسے گلزار کے بیچ

قدر گو تم نہ کرو میری متاع دل کی

جنس لگ جاوے گی یہ بھی کسو سرکار کے بیچ

گرد سررفتہ ہیں اے میر ہم اس کشتے کے

رہ گیا یار کی جو ایک ہی تلوار کے بیچ

میر تقی میر

یہ کوشش گنہگار کی ہے عبث

اکتوبر 6, 2015میر تقی میر،اساتذہ،غزلہموار،گنہگار،دستارadmin

دیوان سوم غزل 1121

تری جستجو یار کی ہے عبث

یہ کوشش گنہگار کی ہے عبث

تو پیدا ہے لیکن ہویدا نہیں

یہ تصدیع ہموار کی ہے عبث

نہ ہاتھ آئی اے میر کچھ وجہ مے

گرو میں نے دستار کی ہے عبث

میر تقی میر

دل لیں ہیں یوں کہ ہرگز ہوتی نہیں ہے آہٹ

اکتوبر 6, 2015میر تقی میر،اساتذہ،غزلہٹ،لٹ،چٹ،کروٹ،پٹ،پھپٹ،آہٹ،جمگھٹ،جھرمٹadmin

دیوان سوم غزل 1120

کیا لڑکے دلی کے ہیں عیار اور نٹ کھٹ

دل لیں ہیں یوں کہ ہرگز ہوتی نہیں ہے آہٹ

ہم عاشقوں کو مرتے کیا دیر کچھ لگے ہے

چٹ جن نے دل پہ کھائی وہ ہو گیا ہے چٹ پٹ

دل ہے جدھر کو اودھر کچھ آگ سی لگی تھی

اس پہلو ہم جو لیٹے جل جل گئی ہے کروٹ

کلیوں کو تونے چٹ چٹ اے باغباں جو توڑا

بلبل کے دل جگر کو ظالم لگی ہے کیا چٹ

جی ہی ہٹے نہ میرا تو اس کو کیا کروں میں

ہر چند بیٹھتا ہوں مجلس میں اس سے ہٹ ہٹ

دیتی ہے طول بلبل کیا نالہ و فغاں کو

دل کے الجھنے سے ہیں یہ عاشقوں کی پھپٹ

مردے نہ تھے ہم ایسے دریا پہ جب تھا تکیہ

اس گھاٹ گاہ و بیگہ رہنے لگا تھا جمگھٹ

رک رک کے دل ہمارا بیتاب کیوں نہ ہووے

کثرت سے درد و غم کی رہتا ہے اس پہ جھرمٹ

شب میر سے ملے ہم اک وہم رہ گیا ہے

اس کے خیال مو میں اب تو گیا بہت لٹ

میر تقی میر

اجل تو ہے دل کے مرض کی بدایت

اکتوبر 6, 2015میر تقی میر،اساتذہ،غزلبدایت،حکایت،سرایت،شکایت،عنایتadmin

دیوان سوم غزل 1119

خدا جانیے ہووے گی کیا نہایت

اجل تو ہے دل کے مرض کی بدایت

سخن غم سے آغشتہ خوں ہے ولیکن

نہیں لب مرے آشناے شکایت

نہیں یہ گنہگار ملنے کے قابل

کرم کریے تو مہربانی عنایت

گیا آسماں پر جو نالہ تو کیا ہے

نہیں یار کے دل میں کرتا سرایت

ہمیں عشق میں میر چپ لگ گئی ہے

نہ شکر و شکایت نہ حرف و حکایت

میر تقی میر

کیا کریں ہم چاہتا تھا جی بہت

اکتوبر 6, 2015میر تقی میر،اساتذہ،غزللی،کشتی،پی،بھی،تھی،جی،دی،سیadmin

دیوان سوم غزل 1118

کوشش اپنی تھی عبث پر کی بہت

کیا کریں ہم چاہتا تھا جی بہت

کعبۂ مقصود کو پہنچے نہ ہائے

سعی کی اے شیخ ہم نے بھی بہت

سب ترے محو دعاے جان ہیں

آرزو اپنی بھی ہے تو جی بہت

رک رہا ہے دیر سے تڑپا نہیں

عشق نے کیوں دل کو مہلت دی بہت

کیوں نہ ہوں دوری میں ہم نزدیک مرگ

دل کو اس کے ساتھ الفت تھی بہت

وہ نہ چاہے جب تئیں ہوتا ہے کیا

جہد کی ملنے میں اپنی سی بہت

کب سنا حرف شگون وصل یار

یوں تو فال گوش ہم نے لی بہت

تھا قوی آخر ملے ہم خاک میں

آسماں سے یوں رہی کشتی بہت

آج درہم کرتے تھے کچھ گفتگو

میر نے شاید کہ دارو پی بہت

میر تقی میر

دل لگا کر ہم تو پچھتائے بہت

اکتوبر 6, 2015میر تقی میر،اساتذہ،غزلہمسائے،لائے،مرجھائے،پچھتائے،آئے،بھائے،شرمائےadmin

دیوان سوم غزل 1117

زخم جھیلے داغ بھی کھائے بہت

دل لگا کر ہم تو پچھتائے بہت

جب نہ تب جاگہ سے تم جایا کیے

ہم تو اپنی اور سے آئے بہت

دیر سے سوے حرم آیا نہ ٹک

ہم مزاج اپنا ادھر لائے بہت

پھول گل شمس و قمر سارے ہی تھے

پر ہمیں ان میں تمھیں بھائے بہت

گر بکا اس شور سے شب کو ہے تو

روویں گے سونے کو ہمسائے بہت

وہ جو نکلا صبح جیسے آفتاب

رشک سے گل پھول مرجھائے بہت

میر سے پوچھا جو میں عاشق ہو تم

ہوکے کچھ چپکے سے شرمائے بہت

میر تقی میر

مر چلے ہجر میں ہی یا قسمت

اکتوبر 6, 2015میر تقی میر،اساتذہ،غزللڑا،یا،کیا،تھا،جداadmin

دیوان سوم غزل 1116

وصل دلبر نہ ٹک ہوا قسمت

مر چلے ہجر میں ہی یا قسمت

ایک بوسے پہ بھی نہ صلح ہوئی

ہم نے دیکھی بہت لڑا قسمت

شیخ جنت تجھے مجھے دیدار

واں بھی ہر اک کی ہے جدا قسمت

پھول جن ہاتھوں سے سبھوں کو دیے

زخم تیغ ان سے اپنی تھا قسمت

کیا ازل میں ملا نہ لوگوں کو

تھی ہماری بھی میر کیا قسمت

میر تقی میر

ویسی دیکھی نہ ایک جا صورت

اکتوبر 6, 2015میر تقی میر،اساتذہ،غزللا،کیا،آشنا،بلا،بنا،جا،دکھاadmin

دیوان سوم غزل 1115

سیر کی ہم نے اٹھ کے تا صورت

ویسی دیکھی نہ ایک جا صورت

منھ لگانا تو درکنار ان نے

نہ کہا ہے یہ آشنا صورت

منھ دکھاتی ہے آرسی ہر صبح

تو بھی اپنی تو ٹک دکھا صورت

خوب ہے چہرئہ پری لیکن

آگے اس کے ہے کیا بلا صورت

کب تلک کوئی جیسے صورت باز

آوے پیاری بنا بنا صورت

ایک دن تو یہ کہہ کہ ملنے کی

تو بھی ٹھہرا کے کوئی لا صورت

حلقے آنکھوں میں پڑ گئے منھ زرد

ہو گئی میر تیری کیا صورت

میر تقی میر

ٹک سوچ بھی ہزار ہیں دشمن ہزار دوست

اکتوبر 6, 2015میر تقی میر،اساتذہ،غزلہوشیار،ہزار،قرار،چار،یار،روزگار،شکارadmin

دیوان سوم غزل 1114

مانند مرغ دوست نہ کہہ بار بار دوست

ٹک سوچ بھی ہزار ہیں دشمن ہزار دوست

کھڑکے ہے پات بھی تو لگا بیٹھتا ہے چوٹ

رم خوردہ وہ غزال بہت ہے شکار دوست

سب کو ہے رشک مجھ میں جو تجھ میں ہے اختلاط

دشمن ہوئے ہیں دوستی سے تیری یار دوست

تجھ سے ہزار ان نے بنا کر دیے بگاڑ

مت جان سادگی سے کہ ہے روزگار دوست

یہ تو کچھ آگے دشمن جانی سے بھی چلا

میں جانتا تھا ہو گا دل بے قرار دوست

بیگانگی خلق جہاں جاے خوف ہے

سو دشمنوں میں کیا ہے جو نکلے بھی چار دوست

مجھ بے نوا کی یاد رہے میر یہ صدا

اس میکدے میں رہیو بہت ہوشیار دوست

میر تقی میر

سنتا نہیں ہے کوئی کلی کے دہاں کی بات

اکتوبر 6, 2015میر تقی میر،اساتذہ،غزلمہرباں،مکاں،یاں،کہاں،آسماں،بان،بدزباں،جہاں،دہاںadmin

دیوان سوم غزل 1113

جب سے چلی چمن میں ترے رنگ پاں کی بات

سنتا نہیں ہے کوئی کلی کے دہاں کی بات

یاں شہر حسن میں تو کہیں ذکر بھی نہیں

کیا جانیے کہ مہر و وفا ہے کہاں کی بات

اختر شناس کو بھی خلل ہے دماغ کا

پوچھو اگر زمیں سے کہیں آسماں کی بات

ایسا خدا ہی جانے کہ ہو عرش یا نہ ہو

دل بولنے کی جا نہیں کیا اس مکاں کی بات

کیا لطف جو سنو اسے کہتے پھرا کرو

یوں چاہیے کہ بھول وہیں ہو جہاں کی بات

لے شام سے جہاں میں ہے تاصبح ایک شور

اپنی سمجھ میں کچھ بھی نہیں آتی یاں کی بات

اوباش کس کو پوچھتے ہیں التفات سے

سیدھی کبھو سنی نہیں اس بدزباں کی بات

ہر حرف میں ہے ایک کجی ہر سخن میں پیچ

پنہاں رہے ہے کب کسو کی ٹیڑھی بانکی بات

کینے سے کچھ کہا ہی کیا زیرلب مجھے

کیا پوچھتے ہو میر مرے مہرباں کی بات

میر تقی میر

سنا نہیں ہے مگر یہ کہ جوگی کس کے میت

اکتوبر 6, 2015میر تقی میر،اساتذہ،غزلمیت،مبیت،مسیت،نیت،گیت،پلیت،اتیت،بھیت،جیتadmin

دیوان سوم غزل 1112

عجب نہیں ہے نہ جانے جو میر چاہ کی ریت

سنا نہیں ہے مگر یہ کہ جوگی کس کے میت

مت ان نمازیوں کو خانہ ساز دیں جانو

کہ ایک اینٹ کی خاطر یہ ڈھاتے ہیں گے مسیت

غم زمانہ سے فارغ ہیں مایہ باختگاں

قمارخانۂ آفاق میں ہے ہار ہی جیت

ہزار شانہ و مسواک و غسل شیخ کرے

ہمارے عندیے میں تو ہے وہ خبیث پلیت

کسو کے بستر و سنجاب و قصر سے کیا کام

ہماری گور کے بھی ڈھیر میں مکاں ہے مبیت

ہوئے ہیں سوکھ کے عاشق طنبورے کے سے تار

رقیب دیکھو تو گاتے ہیں بیٹھے اور ہی گیت

شفق سے ہیں در و دیوار زرد شام و سحر

ہوا ہے لکھنؤ اس رہگذر میں پیلی بھیت

کہا تھا ہم نے بہت بولنا نہیں ہے خوب

ہمارے یار کو سو اب ہمیں سے بات نہ چیت

ملے تھے میر سے ہم کل کنار دریا پر

فتیلہ مو وہ جگر سوختہ ہے جیسے اتیت

میر تقی میر

مرثیے نے دل کے میرے بھی رلایا ہے بہت

اکتوبر 6, 2015میر تقی میر،اساتذہ،غزلپایا،آیا،اٹھایا،رلایا،ستایاadmin

دیوان سوم غزل 1111

شعر کے پردے میں میں نے غم سنایا ہے بہت

مرثیے نے دل کے میرے بھی رلایا ہے بہت

بے سبب آتا نہیں اب دم بہ دم عاشق کو غش

درد کھینچا ہے نہایت رنج اٹھایا ہے بہت

وادی و کہسار میں روتا ہوں ڈاڑھیں مار مار

دلبران شہر نے مجھ کو ستایا ہے بہت

وا نہیں ہوتا کسو سے دل گرفتہ عشق کا

ظاہراً غمگیں اسے رہنا خوش آیا ہے بہت

میر گم گشتہ کا ملنا اتفاقی امر ہے

جب کبھو پایا ہے خواہش مند پایا ہے بہت

میر تقی میر

رہا ہے کیا دل بے تاب میں اب

اکتوبر 6, 2015میر تقی میر،اساتذہ،غزلوتاب،آب،اسباب،باب،تاب،خواب،شابadmin

دیوان سوم غزل 1110

پڑا ہے فرق خورد و خواب میں اب

رہا ہے کیا دل بے تاب میں اب

جنوں میں اب کے نے دامن ہے نے جیب

کمی آئی بہت اسباب میں اب

ہوا ہے خواب ملنا اس سے شب کا

کبھو آتا ہے وہ مہ خواب میں اب

گدائی لی ہے میں نے اس کے در کی

کہے کیا دیکھوں میرے باب میں اب

گلے لگنے بن اس کے اتنا روئے

کہ ہم ہیں گے گلے تک آب میں اب

کہاں بل کھائے بال اس کے کہاں یہ

عبث سنبل ہے پیچ وتاب میں اب

بلا چرچا ہے میرے عشق کا میر

یہی ہے ذکر شیخ و شاب میں اب

میر تقی میر

بے صرفہ کرے صرف نہ کیوں دیدئہ تر آب

اکتوبر 6, 2015میر تقی میر،اساتذہ،غزلمگر،نظر،کمر،کر،اگر،اتر،ادھر،بر،بسر،تر،شکرadmin

دیوان سوم غزل 1109

سب آتش سو زندئہ دل سے ہے جگر آب

بے صرفہ کرے صرف نہ کیوں دیدئہ تر آب

پھرتی ہے اڑی خاک بھی مشتاق کسو کی

سر مار کے کرتا ہے پہاڑوں میں بسر آب

کیا کریے اسے آگ سا بھڑکایا ہے جن نے

نزدیک تر اب اس کو کرے غرق مگر آب

دل میں تو لگی دوں سی بھریں چشمے سی آنکھیں

کیا اپنے تئیں روئوں ادھر آگ ادھر آب

کس طور سے بھر آنکھ کوئی یار کو دیکھے

اس آتشیں رخسار سے ہوتی ہے نظر آب

ہم ڈرتے شکررنجی سے کہتے نہیں یہ بھی

خجلت سے ترے ہونٹوں کی ہیں شہد و شکر آب

کس شکل سے اک رنگ پہ رہنا ہو جہاں کا

رہتی ہیں کوئی صورتیں یہ نقش ہیں بر آب

شعلے جو مرے دل سے اٹھیں ہیں سو نہ بیٹھیں

برسوں تئیں چھڑکا کرو تم ان پہ اگر آب

استادہ ہو دریا تو خطرناکی بہت ہے

آ اپنے کھلے بالوں سے زنجیر نہ کر آب

شب روئوں ہوں ایسا کہ جدھر یار کا گھر ہے

جاتا ہوں گلے چھاتی تک اودھر کو اتر آب

اس دشت سے ہو میر ترا کیونکے گذارا

تا زانو ترے گل ہے تری تا بہ کمر آب

میر تقی میر

اب کیا مرے جنوں کی تدبیر میرصاحب

اکتوبر 6, 2015میر تقی میر،اساتذہ،غزلپیر،تقریر،تقصیر،تیر،تدبیرadmin

دیوان سوم غزل 1108

شیون میں شب کے ٹوٹی زنجیر میرصاحب

اب کیا مرے جنوں کی تدبیر میرصاحب

ہم سر بکھیرتے تو وہ تیغ کھنچ نہ سکتی

اپنا گناہ اپنی تقصیر میرصاحب

کھنچتی نہیں کماں اب ہم سے ہواے گل کی

بادسحر لگے ہے جوں تیر میرصاحب

کب ہیں جوانی کے سے اشعار شورآور

شاید کہ کچھ ہوئے ہیں اب پیر میرصاحب

تم کس خیال میں ہو تصویر سے جو چپ ہو

کرتے ہیں لوگ کیا کیا تقریر میرصاحب

میر تقی میر

ہر دم بھری رہے ہے لوہو سے چشم تر سب

اکتوبر 6, 2015میر تقی میر،اساتذہ،غزلنظر،پیشتر،ادھر،بسر،تر،خبر،سفرadmin

دیوان سوم غزل 1107

دل پر تو چوٹ تھی ہی زخمی ہوا جگر سب

ہر دم بھری رہے ہے لوہو سے چشم تر سب

حیف اس سے حال میرا کہتا نہیں ہے کوئی

نالوں سے شب کے میرے رکھتے تو ہیں خبر سب

بجلی سی اک تجلی آئی تھی آسماں سے

آنکھیں لگا رہے ہیں اہل نظر ادھر سب

اس ماہ بن تو اپنی دکھ میں بسر ہوئی تھی

کل رات آگیا تو وہ دکھ گیا بسر سب

کیا فہم کیا فراست ذوق و بصر سماعت

تاب و توان و طاقت یہ کر گئے سفر سب

منزل کو مرگ کی تھا آخر مجھے پہنچنا

بھیجا ہے میں نے اپنا اسباب پیشتر سب

دنیا میں حسن و خوبی میر اک عجیب شے ہے

رندان و پارسا یاں جس پر رکھیں نظر سب

میر تقی میر

آنا ہوا کہاں سے کہیے فقیرصاحب

اکتوبر 6, 2015میر تقی میر،اساتذہ،غزلفقیرصاحب،صاحبadmin

دیوان سوم غزل 1106

بولا جو موپریشاں آ نکلے میرصاحب

آنا ہوا کہاں سے کہیے فقیرصاحب

ہر لحظہ اک شرارت ہر دم ہے یک اشارت

اس عمر میں قیامت تم ہو شریر صاحب

بندے پہ اب نوازش کیجے تو کیجے ورنہ

کیا لطف ہے جو آئے وقت اخیر صاحب

دل کا الجھنا اپنے ایسا نہیں کہ سلجھے

ہیں دام زلف میں ہم اس کے اسیر صاحب

فکرجگر رہے ہے اس دم غلام کو بھی

جس دم لگو ہو کرنے تم مشق تیر صاحب

میر تقی میر

گویا کہ جان جسم میں سارے نہیں ہے اب

اکتوبر 6, 2015میر تقی میر،اساتذہ،غزلمارے،پیارے،پکارے،بارے،سارےadmin

دیوان سوم غزل 1105

طاقت تعب کی غم میں تمھارے نہیں ہے اب

گویا کہ جان جسم میں سارے نہیں ہے اب

کل کچھ صبا ہوئی تھی گل افشاں قفس میں بھی

وہ بے کلی تو جان کو بارے نہیں ہے اب

جیتے تو لاگ پلکوں کی اس کی کہیں گے ہم

کچھ ہوش ہم کو چھڑیوں کے مارے نہیں ہے اب

زردی چہرہ اب تو سفیدی کو کھنچ گئی

وہ رنگ آگے کا سا پیارے نہیں ہے اب

مسکن جہاں تھا دل زدہ مسکیں کا ہم تو واں

کل دیر میر میر پکارے نہیں ہے اب

میر تقی میر

جا بیٹھیں میکدے میں مسجد سے اٹھ کے صاف اب

اکتوبر 6, 2015میر تقی میر،اساتذہ،غزلمعاف،انحراف،اختلاف،اعتراف،سنجاف،صاف،طوافadmin

دیوان سوم غزل 1104

ماہ صیام آیا ہے قصد اعتکاف اب

جا بیٹھیں میکدے میں مسجد سے اٹھ کے صاف اب

مسلم ہیں رفتہ رو کے کافر ہیں خستہ مو کے

یہ بیچ سے اٹھے گا کس طور اختلاف اب

جو حرف ہیں سو ٹیڑھے خط میں لکھے ہیں شاید

اس کے مزاج میں ہے کچھ ہم سے انحراف اب

مجرم ٹھہر گئے ہم پھرنے سے ساتھ تیرے

بہتر ہے جو رکھے تو اس سے ہمیں معاف اب

گو لگ گیا گلے میں مت کھینچ تیغ مجھ پر

اپنے گنہ کا میں تو کرتا ہوں اعتراف اب

کیا خاک میں ملاکر اپنے تئیں موا ہے

پیدا ہو گورمجنوں تو کیجیے طواف اب

کھنچتے ہیں جامے خوں میں کن کن کے میر دیکھیں

لگتی ہے سرخ اس کے دامن کے تیں سنجاف اب

میر تقی میر

جی دل کے اضطراب سے بے تاب تھا سو تھا

اکتوبر 6, 2015میر تقی میر،اساتذہ،غزلنایاب،ناب،آب،اسباب،تاب،خواب،سیرابadmin

دیوان سوم غزل 1103

آنکھوں میں اپنی رات کو خوناب تھا سو تھا

جی دل کے اضطراب سے بے تاب تھا سو تھا

آکر کھڑا ہوا تھا بہ صدحسن جلوہ ناک

اپنی نظر میں وہ در نایاب تھا سو تھا

ساون ہرے نہ بھادوں میں ہم سوکھے اہل درد

سبزہ ہماری پلکوں کا سیراب تھا سو تھا

درویش کچھ گھٹا نہ بڑھا ملک شاہ سے

خرقہ کلاہ پاس جو اسباب تھا سو تھا

کیا بھاری بھاری قافلے یاں سے چلے گئے

تجھ کو وہی خیال گراں خواب تھا سو تھا

برسوں سے ہے تلاوت و سجادہ و نماز

پر میل دل جو سوے مئے ناب تھا سو تھا

ہم خشک لب جو روتے رہے جوئیں بہ چلیں

پر میر دشت عشق کا بے آب تھا سو تھا

میر تقی میر

پھروں ہوں چور زخمی اس کی تیغ کم نگاہی کا

اکتوبر 6, 2015میر تقی میر،اساتذہ،غزلنگاہی،کاہی،گاہی،الٰہی،تباہی،روسیاہی،شاہیadmin

دیوان سوم غزل 1102

کیا ہے عشق جب سے میں نے اس ترک سپاہی کا

پھروں ہوں چور زخمی اس کی تیغ کم نگاہی کا

اگر ہم قطعۂ شب سا لیے چہرہ چلے آئے

قیامت شور ہو گا حشر کے دن روسیاہی کا

ہوا ہے عارفان شہر کو عرفان بھی اوندھا

کہ ہر درویش ہے مارا ہوا شوق الٰہی کا

ہمیشہ التفات اس کا کسو کے بخت سے ہو گا

نہیں شرمندہ میں تو اس کے لطف گاہ گاہی کا

برنگ کہربائی شمع اس کا رنگ جھمکے ہے

دماغ سیر اس کو کب ہے میرے رنگ کاہی کا

بڑھیں گے عہد کے درویش اس سے اور کیا یارو

کیا ہے لڑکوں نے دینا انھوں کو تاج شاہی کا

خراب احوال کچھ بکتا پھرے ہے دیر و کعبے میں

سخن کیا معتبر ہے میر سے واہی تباہی کا

میر تقی میر

طرحیں بدل گئیں پر ان نے ادھر نہ دیکھا

اکتوبر 6, 2015میر تقی میر،اساتذہ،غزلنگر،نظر،کر،گہر،گھر،ادھر،جگرadmin

دیوان سوم غزل 1101

چاہت کے طرح کش ہو کچھ بھی اثر نہ دیکھا

طرحیں بدل گئیں پر ان نے ادھر نہ دیکھا

خالی بدن جیوں سے یاں ہو گئے ولیکن

اس شوخ نے ادھر کو بھر کر نظر نہ دیکھا

کس دن سرشک خونیں منھ پر نہ بہ کر آئے

کس شب پلک کے اوپر لخت جگر نہ دیکھا

یاں شہر شہر بستی اوجڑ ہی ہوتے پائی

اقلیم عاشقی میں بستا نگر نہ دیکھا

اب کیا کریں کہ آیا آنکھوں میں جی ہمارا

افسوس پہلے ہم نے ٹک سوچ کر نہ دیکھا

لاتے نہیں فرو سر ہرگز بتاں خدا سے

آنکھوں سے اپنی تم نے ان کا گہر نہ دیکھا

سوجھا نہ چاہ میں کچھ برباد کر چکے دل

میر اندھے ہو رہے تھے اپنا بھی گھر نہ دیکھا

میر تقی میر

خونبار میری آنکھوں سے کیا جانوں کیا گرا

اکتوبر 6, 2015میر تقی میر،اساتذہ،غزلکیا،کا،پڑا،جلا،جا،رہگرا،سرپھراadmin

دیوان سوم غزل 1100

کل رات رو کے صبح تلک میں رہا گرا

خونبار میری آنکھوں سے کیا جانوں کیا گرا

اب شہر خوش عمارت دل کا ہے کیا خیال

ناگاہ آ کے عشق نے مارا جلا گرا

کیا طے ہو راہ عشق کی عاشق غریب ہے

مشکل گذر طریق ہے یاں رہگرا گرا

لازم پڑی ہے کسل دلی کو فتادگی

بیمار عشق رہتا ہے اکثر پڑا گرا

ٹھہرے نہ اس کے عشق کا سرگشتہ و ضعیف

ٹھوکر کہیں لگی کہ رہا سرپھرا گرا

دے مارنے کو تکیہ سے سر ٹک اٹھا تو کیا

بستر سے کب اٹھے ہے غم عشق کا گرا

پھرتا تھا میر غم زدہ یک عمر سے خراب

اب شکر ہے کہ بارے کسی در پہ جا گرا

میر تقی میر

ہاتھ ملنا کام ہے اب عاشق بدنام کا

اکتوبر 6, 2015میر تقی میر،اساتذہ،غزلنام،ایام،آرام،بدنام،شامadmin

دیوان سوم غزل 1099

سطح جو ہاتھوں میں تھا اس کے رخ گلفام کا

ہاتھ ملنا کام ہے اب عاشق بدنام کا

کچھ نہیں عنقا صفت پر شہرئہ آفاق ہوں

سیر کے قابل ہے ہونا پہن میرے نام کا

ہجر کی راتیں بڑی چھوٹی جو ٹک ہوتیں کہیں

اس میں کچھ نقصان ہوتا تھا مگر ایام کا

روئوں یاد زلف میں اس کی تو پھر روتا رہوں

صبح تک جاتا نہیں ہے مینھ آیا شام کا

تاب کس کو اپنا کچا سوت کچھ الجھا ہے میر

گم ہے سررشتہ ہمارے خواب اور آرام کا

میر تقی میر

کیا حال محبت کے آزار کشیدوں کا

اکتوبر 6, 2015میر تقی میر،اساتذہ،غزلکشیدوں،دمیدوں،دیدوں،دریدوں،رمیدوں،شہیدوں،عیدوںadmin

دیوان سوم غزل 1098

احوال نہ پوچھو کچھ ہم ظلم رسیدوں کا

کیا حال محبت کے آزار کشیدوں کا

دیوانگی عاشق کی سمجھو نہ لباسی ہے

صد پارہ جگر بھی ہے ہم جامہ دریدوں کا

عاشق ہے دل اپنا تو گل گشت گلستاں میں

جدول کے کنارے کے نوباوہ دمیدوں کا

ناچار گئے مارے میدان محبت میں

پایا نہ گیا چارہ کچھ اس کے شہیدوں کا

پتے کے کھڑکنے سے ہوتی ہے ہمیں وحشت

کیا طور ہے ہم اپنے سائے سے رمیدوں کا

کیا کیا نہ گیا اس بن صبر اور دماغ و دل

رونق گئی بشرے سے پھر نور بھی دیدوں کا

کرتے ہیں پس از سالے دل شاد گلے لگ کر

سو میر وہ ملنا بھی اب ترک ہے عیدوں کا

میر تقی میر

لوٹا مارا ہے حسن والوں کا

اکتوبر 6, 2015میر تقی میر،اساتذہ،غزلوالوں،کالوں،بالوں،حالوں،سوالوںadmin

دیوان سوم غزل 1097

دل عجب شہر تھا خیالوں کا

لوٹا مارا ہے حسن والوں کا

جی کو جنجال دل کو ہے الجھائو

یار کے حلقہ حلقہ بالوں کا

موے دلبر سے مشک بو ہے نسیم

حال خوش اس کے خستہ حالوں کا

نہ کہا کچھ نہ آ پھرا نہ ملا

کیا جواب ان مرے سوالوں کا

دم نہ لے اس کی زلفوں کا مارا

میر کاٹا جیے نہ کالوں کا

میر تقی میر

کیا کروں گر نہ کروں چاک گریباں اپنا

اکتوبر 6, 2015میر تقی میر،اساتذہ،غزلویراں،گریباں،پنہاں،پریشاں،آساں،جاناں،ساماںadmin

دیوان سوم غزل 1096

ان نے کھینچا ہے مرے ہاتھ سے داماں اپنا

کیا کروں گر نہ کروں چاک گریباں اپنا

بارہا جاں لب جاں بخش سے دی جن نے ہمیں

دشمن جانی ہوا اب وہی جاناں اپنا

خلطے یاد آتے ہیں وے جب کہ بدلتے کپڑے

مجھ کو پہناتے تھے رعنائی کا ساماں اپنا

کیا ہوئی یکجہتی وہ کہ طرف تھے میرے

اب یہ طرفہ ہے کہ منھ کرتے ہیں پنہاں اپنا

جس طرح شاخ پراگندہ نظر آتے ہیں بید

تھا جنوں میں کبھو سر مو سے پریشاں اپنا

مشکلیں سینکڑوں چاہت میں ہمیں آئیں پیش

کام ہو دیکھیے کس طور سے آساں اپنا

دل فقیری سے نہیں میر کسو کا ناساز

خوش ہوا کتنا ہے یہ خانۂ ویراں اپنا

میر تقی میر

دنبالہ گرد چشم سیاہ غزال تھا

اکتوبر 6, 2015میر تقی میر،اساتذہ،غزلمال،نہال،کمال،برشکال،حال،خیال،غزالadmin

دیوان سوم غزل 1095

کیا میر دل شکستہ بھی وحشی مثال تھا

دنبالہ گرد چشم سیاہ غزال تھا

آخر کو خواب مرگ ہمیں جا سے لے گئی

جی دیتے تک بھی سر میں اسی کا خیال تھا

میں جو کہا کہ دل کو تو تم نے ہرا دیا

بولا کہ ذوق اپنا ہمارا ہی مال تھا

سرو اس طرف کو جیسے گنہگار تھا کھڑا

اودھر جو آب جو کے وہ نازک نہال تھا

کیا میرے روزگار کے اہل سخن کی بات

ہر ناقص اپنے زعم میں صاحب کمال تھا

کیا کیا ہوائیں دیدئہ تر سے نظر پڑیں

جب رونے بیٹھ جاتے تھے تب برشکال تھا

کہتے تھے ہم تباہ ہے اب حال میر کا

دیکھا نہ تم نے اس میں بھلا کچھ بھی حال تھا

میر تقی میر

دل نہ اپنا ہے محبت میں نہ دلبر اپنا

اکتوبر 6, 2015میر تقی میر،اساتذہ،غزلمقرر،مکدر،معطر،کیدھر،کبوتر،گھر،پتھر،پر،بستر،دلبرadmin

دیوان سوم غزل 1094

کیا کہے حال کہیں دل زدہ جاکر اپنا

دل نہ اپنا ہے محبت میں نہ دلبر اپنا

دوری یار میں ہے حال دل ابتر اپنا

ہم کو سو کوس سے آتا ہے نظر گھر اپنا

یک گھڑی صاف نہیں ہم سے ہوا یار کبھی

دل بھی جوں شیشۂ ساعت ہے مکدر اپنا

ہر طرف آئینہ داری میں ہے اس کے رو کی

شوق سے دیکھیے منھ ہووے ہے کیدھر اپنا

لب پہ لب رکھ کے نہ اس گل کے کبھو ہم سوئے

یہ بساط خسک و خار ہے بستر اپنا

کس طرح حرف ہو ناصح کا موثر ہم میں

سختیاں کھینچتے ہی دل ہوا پتھر اپنا

کیسی رسوائی ہوئی عشق میں کیا نقل کریں

شہر و قصبات میں مذکور ہے گھر گھر اپنا

اس گل تر کی قبا کے کہیں کھولے تھے بند

رنگوں گل برگ کے ناخن ہے معطر اپنا

تجھ سے بے مہر کے لگ لگنے نہ دیتے ہرگز

زور چلتا کچھ اگر چاہ میں دل پر اپنا

پیش کچھ آئو یہیں ہم تو ہیں ہر صورت سے

مثل آئینہ نہیں چھوڑتے ہم گھر اپنا

دل بہت کھینچتی ہے یار کے کوچے کی زمیں

لوہو اس خاک پہ گرنا ہے مقرر اپنا

میر خط بھیجے پر اب رنگ اڑا جاتا ہے

کہ کہاں بیٹھے کدھر جاوے کبوتر اپنا

میر تقی میر

جوش غم سے جی جو بولایا سو دیوانہ ہوا

اکتوبر 6, 2015میر تقی میر،اساتذہ،غزلچھانا،افسانہ،آنا،جانا،دیوانہadmin

دیوان سوم غزل 1093

دل عجب چرچے کی جاگہ تھی سو ویرانہ ہوا

جوش غم سے جی جو بولایا سو دیوانہ ہوا

بزم عشرت پر جہاں کی گوش وا کر جاے چشم

آج یاں دیکھا گیا جو کچھ کل افسانہ ہوا

دیر میں جو میں گدایانہ گیا اودھر کہا

شاہ جی کہیے کدھر سے آپ کا آنا ہوا

کیا کہیں حسرت لیے جیسے جہاں سے کوئی جائے

یار کے کوچے سے اپنا اس طرح جانا ہوا

میر تیر ان جورکیشوں کے جو کھائے بے شمار

چھاتی اب چھلنی ہے میری ہے جگر چھانا ہوا

میر تقی میر

پھر صبر بن اور کیا ہے چارا

اکتوبر 6, 2015میر تقی میر،اساتذہ،غزلہمارا،مارا،چکارا،چارا،گذارا،پکارا،اجارا،سارا،ستاراadmin

دیوان سوم غزل 1092

ہے عشق میں صبر ناگوارا

پھر صبر بن اور کیا ہے چارا

ان بالوں سے مشک مت خجل ہو

عنبر تو عرق عرق ہے سارا

یوں بات کرے ہے میرے خوں سے

گویا نہیں ان نے مجھ کو مارا

دیکھو ہو تو دور بھاگتے ہو

کچھ پاس نہیں تمھیں ہمارا

تھا کس کو دماغ باغ اس بن

بلبل نے بہت مجھے پکارا

رخسار کے پاس وہ در گوش

ہے پہلوے ماہ میں ستارا

ہوتے ہیں فرشتے صید آکر

آہوے حرم ہیں یاں چکارا

پھولی مجھے دیکھ کر گلوں میں

بلبل کا ہے باغ میں اجارا

جب جی سے گذر گئے ہم اے میر

اس کوچے میں تب ہوا گذارا

میر تقی میر

بھاری پتھر تھا چوم کر چھوڑا

اکتوبر 6, 2015میر تقی میر،اساتذہ،غزلچھوڑا،گھوڑا،پھوڑا،توڑا،تھوڑاadmin

دیوان سوم غزل 1091

بوسہ اس بت کا لے کے منھ موڑا

بھاری پتھر تھا چوم کر چھوڑا

ہوکے دیوانے ہم ہوئے زنجیر

دیکھ کر اس کے پائوں کا توڑا

دل نے کیا کیا نہ درد رات دیے

جیسے پکتا رہے کوئی پھوڑا

گرم رفتن ہے کیا سمند عمر

نہ لگے جس کو بائو کا گھوڑا

کیا کرے بخت مدعی تھے بلند

کوہکن نے تو سر بہت پھوڑا

دل ہی مرغ چمن کا ٹوٹ گیا

پھول گل چیں نے ہائے کیوں توڑا

ہے لب بام آفتاب عمر

کریے سو کیا ہے میر دن تھوڑا

میر تقی میر

ہرچند چاہتا ہوں پر جی نہیں سنبھلتا

اکتوبر 6, 2015میر تقی میر،اساتذہ،غزلچلتا،نکلتا،پگھلتا،ابلتا،بہلتا،جلتا،سنبھلتاadmin

دیوان سوم غزل 1090

دل رات دن رہے ہے سینے میں عشق ملتا

ہرچند چاہتا ہوں پر جی نہیں سنبھلتا

اب تو بدن میں سارے اک پھنک رہی ہے آتش

وہ مہ گلے سے لگتا تو یوں جگر نہ جلتا

شب ماہ چاردہ تھا کس حسن سے نمایاں

ہوتا بڑا تماشا جو یار بھی نکلتا

اے رشک شمع گویا تو موم کا بنا ہے

مہتاب میں تجھی کو دیکھا ہے یوں پگھلتا

تکلیف باغ ہم کو یاروں نے کی وگرنہ

گل پھول سے کوئی دم اپنا بھی دل بہلتا

رونے کا جوش ویسا آنکھوں کو ہے بعینہ

جیسے ہو رود کوئی برسات میں ابلتا

کرتا ہے وے سلوک اب جس سے کہ جان جاوے

ہم میر یوں نہ مرتے اس پر جو دل نہ چلتا

میر تقی میر

حال رکھا تھا کچھ بھی ہم نے عشق نے آخر مار رکھا

اکتوبر 6, 2015میر تقی میر،اساتذہ،غزلمار،یار،پیار،خونبار،خوارadmin

دیوان سوم غزل 1089

زار رکھا بے حال رکھا بے تاب رکھا بیمار رکھا

حال رکھا تھا کچھ بھی ہم نے عشق نے آخر مار رکھا

میلان اس کا تھا کاہے کو جانب الفت کیشوں کے

اپنی طرف سے ہم نے اب تک اس ظالم سے پیار رکھا

عشق بھی ہم میں ہائے تصرف کیسے کیسے کرتا ہے

دل کو چاک جگر کو زخمی آنکھوں کو خونبار رکھا

کیا پوچھو ہودیں کے اکابر فاضل کامل صابر رنج

عزت والے کیا لوگوں کو گلیوں میں ان نے خوار رکھا

کام اس سے اک طور پہ لیتے بے طور اس کو ہونے نہ دیتے

حیف ہے میر سپہر دوں نے ہم سے اس کو نہ یار رکھا

میر تقی میر

جو کوئی اس کو چاہے ظاہر ہے حال اس کا

اکتوبر 6, 2015میر تقی میر،اساتذہ،غزلمال،نکال،گال،بال،جمال،حال،خیال،خالadmin

دیوان سوم غزل 1088

وہ کم نما و دل ہے شائق کمال اس کا

جو کوئی اس کو چاہے ظاہر ہے حال اس کا

ہم کیا کریں علاقہ جس کو بہت ہے اس سے

رکھ دیتے ہیں گلے پر خنجر نکال اس کا

بس ہو تو وام کر بھی اس پر نثار کریے

یک نقد دل رکھے ہیں سو تو ہے مال اس کا

یہ جانتا تو اس سے ہم خواب میں نہ ہوتا

پکا خیال جی کا ایسا خیال اس کا

ان زلفوں سے نہ لگ کر چل اے نسیم ظالم

تاریک ہے جہاں پھر بکا جو بال اس کا

جس داغ سے کہ عالم ہے مبتلا بلا میں

سو داغ جان عاشق منھ پر ہے خال اس کا

مستانہ ساتھ میرے روتی پھرے ہے بلبل

گل سے جو دل لگا ہے ابتر ہے حال اس کا

میری طرح جھکے ہیں بے خود ہو سرو و گل بھی

دیکھا کہیں چمن میں شاید جمال اس کا

کیا تم کو پیار سے وہ اے میر منھ لگاوے

پہلے ہی چومے تم تو کاٹو ہو گال اس کا

میر تقی میر

تو رک کے منھ تئیں کاہے کو شب جگر آتا

اکتوبر 6, 2015میر تقی میر،اساتذہ،غزلہنر،نظر،گھر،بسر،جگرadmin

دیوان سوم غزل 1087

اگر وہ ماہ نکل گھر سے ٹک ادھر آتا

تو رک کے منھ تئیں کاہے کو شب جگر آتا

مرید پیرمغاں صدق سے نہ ہم ہوتے

جو حق شناس کوئی اور بھی نظر آتا

نہ پتھروں سے جو سر کو دو پارہ میں کرتا

زمانہ غم کا مرے کس طرح بسر آتا

کسو ہنر سے تو ملتے تھے باہم اگلے لوگ

ہمیں بھی کاشکے ایسا کوئی ہنر آتا

شراب خانے میں شب مست ہو رہا شاید

جو میر ہوش میں ہوتا تو اپنے گھر آتا

میر تقی میر

تب آنکھوں تلے میری اترتا ہے لہو سا

اکتوبر 6, 2015میر تقی میر،اساتذہ،غزلموسیٰ،چوسا،ساadmin

دیوان سوم غزل 1086

جب گل کہے ہے اپنے تئیں یار کے رو سا

تب آنکھوں تلے میری اترتا ہے لہو سا

تحقیق کروں کس سے حقیقت کے نشے کو

خضر آب اسے کہتا ہے آتش کہے موسیٰ

کیا دور ہے شربت پہ اگر قند کے تھوکے

ٹک جن نے ترے شربتی ان ہونٹوں کو چوسا

دم لا بہ کریں شیخ رکھیں شملے تو کیا ہے

ہونا مگر آسان ہے اس کے سگ کو سا

تعبیر جسے کرتے ہیں ہنگامۂ محشر

وہ یار کے کوچے کا ہے کچھ شور غلو سا

آرائش درویشی بھی اپنی نہیں بے لطف

ہے بوریے کا نقش مرے تن پہ اتو سا

کب کی ہے حدیث اس سے سخن کرنے کی میں نے

کیا میر سے بولے کوئی ہے بیہدہ گو سا

میر تقی میر

کبریت نمط جن نے لیا مجھ کو جلایا

اکتوبر 6, 2015میر تقی میر،اساتذہ،غزلقضایا،لگایا،کھلایا،آیا،اگایا،اٹھایا،جلایا،خدایا،دکھایا،رجھایاadmin

دیوان سوم غزل 1085

مجھ زار نے کیا گرمی بازار سے پایا

کبریت نمط جن نے لیا مجھ کو جلایا

بیتاب تہ تیغ ستم دیر رہا میں

جب تک نہ گئی جان مجھے صبر نہ آیا

جانا فلک دوں نے کہ سرسبز ہوا میں

گر خاک سے سبزہ کوئی پژمردہ اگایا

اس رخ نے بہت صورتیں لوگوں کی بگاڑیں

اس قد نے قیامت کا سا ہنگامہ اٹھایا

مت راہ سخن دے کہ پھر آپھی تو کہے گا

کیوں میں نے محبت کے عبث منھ کو کھلایا

ہر چند کہ تھی ریجھنے کی جاے ترے لب

پر گالیاں دیں اتنی انھوں سے کہ رجھایا

گردش میں رہا کرتے ہیں ہم دید میں ان کی

آنکھوں نے تری خوب سماں ہم کو دکھایا

کس روز یہ اندوہ جگر سوز تھا آگے

کب شب لب و یارب تھی مری یوں ہی خدایا

دن جی کے الجھنے کے ہی جھگڑے میں کٹے ہے

رات اس کے خیالات سے رہتے ہیں قضایا

کیا کہیے دماغ اس کا کہ گل گشت میں کل میر

گل شاخوں سے جھک آئے تھے پر منھ نہ لگایا

میر تقی میر

پیش جاتے کچھ نہ دیکھی چشم تر کر رہ گیا

اکتوبر 6, 2015میر تقی میر،اساتذہ،غزلمر،ور،ادھر،بھر،ترadmin

دیوان سوم غزل 1084

میر کل صحبت میں اس کی حرف سرکر رہ گیا

پیش جاتے کچھ نہ دیکھی چشم تر کر رہ گیا

خوبی اپنے طالع بد کی کہ شب وہ رشک ماہ

گھر مرے آنے کو تھا سو منھ ادھر کر رہ گیا

طنز و تعریض بتان بے وفا کے در جواب

میں بھی کچھ کہتا خدا سے اپنے ڈر کر رہ گیا

سرگذشت اپنی سبب ہے حیرت احباب کی

جس سے دل خالی کیا وہ آہ بھر کر رہ گیا

میر کو کتنے دنوں سے رہتی تھی بے طاقتی

رات دل تڑپا بہت شاید کہ مر کر رہ گیا

میر تقی میر

ہمیں عشق ہے تو اثر کر رہے گا

اکتوبر 6, 2015میر تقی میر،اساتذہ،غزلمر،نظر،اثرadmin

دیوان سوم غزل 1083

کبھو وہ توجہ ادھر کر رہے گا

ہمیں عشق ہے تو اثر کر رہے گا

ہمارا ہے احوال حیرت کی جاگہ

جو دیکھے گا وہ بھی نظر کر رہے گا

نہیں اس طرف میر جانے سے رہتا

رہے گا تو اودھر ہی مر کر رہے گا

میر تقی میر

آگے اس قد کے ہے سرو باغ بے اسلوب سا

اکتوبر 6, 2015میر تقی میر،اساتذہ،غزلمجذوب،محجوب،ایوب،اسلوب،خوبadmin

دیوان سوم غزل 1082

گل بھی ہے معشوق لیکن کب ہے اس محبوب سا

آگے اس قد کے ہے سرو باغ بے اسلوب سا

اس کے وعدے کی وفا تک وہ کوئی ہووے گا جو

ہو معمر نوحؑ سا صابر ہو پھر ایوبؑ سا

عشق سے کن نے مرے آگہ کیا اس شوخ کو

اب مرے آنے سے ہوجاتا ہے وہ محجوب سا

بعد مردن یہ غزل مطرب سے جن نے گوش کی

گور کے میری گلے جا لگ کے رویا خوب سا

عاقلانہ حرف زن ہو میر تو کریے بیاں

زیر لب کیا جانیے کہتا ہے کیا مجذوب سا

میر تقی میر

چلے آتے تھے چاروں اور سے پتھر جہاں میں تھا

اکتوبر 6, 2015میر تقی میر،اساتذہ،غزلکیکر،پتھر،پر،بستر،خنجر،دیگرadmin

دیوان سوم غزل 1081

جنوں میں ساتھ تھا کل لڑکوں کا لشکر جہاں میں تھا

چلے آتے تھے چاروں اور سے پتھر جہاں میں تھا

تجلی جلوہ اس رشک قمر کا قرب تھا مجھ کو

جلے جاتے تھے واں جائے ملک کے پر جہاں میں تھا

گلی میں اس کی میری رات کیا آرام سے گذری

یہی تھا سنگ بالیں خاک تھی بستر جہاں میں تھا

غضب کچھ شور تھا سر میں بلا بے طاقتی جی میں

قیامت لحظہ لحظہ تھی مرے دل پر جہاں میں تھا

چبھیں تھیں جی میں وے پلکیں لگیں تھیں دل کو وے بھوویں

یہی شمشیر چلتی تھی یہی خنجر جہاں میں تھا

خیال چشم و روے یار کا بھی طرفہ عالم ہے

نظر آیا ہے واں اک عالم دیگر جہاں میں تھا

عجب دن میر تھے دیوانگی میں دشت گردی کے

سر اوپر سایہ گستر ہوتے تھے کیکر جہاں میں تھا

میر تقی میر

کبھو مزاج میں اس کے ہمیں تصرف تھا

اکتوبر 6, 2015میر تقی میر،اساتذہ،غزلتوقف،تکلف،تاسف،تخلف،تصرفadmin

دیوان سوم غزل 1080

وفا تھی مہر تھی اخلاص تھا تلطف تھا

کبھو مزاج میں اس کے ہمیں تصرف تھا

جو خوب دیکھو تو ساری وہی حقیقت ہے

چھپانا چہرے کا عشاق سے تکلف تھا

اسیر عشق نہیں بازخواہ خوں رکھتے

ہمارے قتل میں اس کو عبث توقف تھا

نہ پوچھو خوب ہے بدعہدیوں کی مشق اس کو

ہزاروں عہد کیے پر وہی تخلف تھا

جہاں میں میر سے کاہے کو ہوتے ہیں پیدا

سنا یہ واقعہ جن نے اسے تاسف تھا

میر تقی میر

بلبل نے بھی نہ طور گلوں کا بیاں کیا

اکتوبر 6, 2015میر تقی میر،اساتذہ،غزلامتحاں،بیاں،بدزباں،جہاں،جاں،رواں،زیاںadmin

دیوان سوم غزل 1079

میں گلستاں میں آ کے عبث آشیاں کیا

بلبل نے بھی نہ طور گلوں کا بیاں کیا

پھر اس کے ابرواں کا خم و تاب ہے وہی

تلوار کے تلے بھی مرا امتحاں کیا

دوں کس کو دوش دشمن جانی تھی دوستی

اس سودے میں صریح میں نقصان جاں کیا

گالی ہے حرف یار قلم نے قضا کے ہائے

صورت نکالی خوب ولے بدزباں کیا

اس جنس خوش کے پیچھے کھپا میں چوائو کیا

میں نے کسو کا کیا کیا اپنا زیاں کیا

لڑکے جہان آباد کے یک شہر کرتے ناز

آجاتے ہیں بغل میں اشارہ جہاں کیا

میں منتظر جواب کا نامے کے مر گیا

ناچار میر جان کو اودھر رواں کیا

میر تقی میر

رات کا بھی کیا ہی مینھ آیا تھا پر جاتا رہا

اکتوبر 6, 2015میر تقی میر،اساتذہ،غزلچلاتا،ناتا،ڈولاتا،کھاتا،پاتا،جاتا،سمجھاتا،شرماتاadmin

دیوان سوم غزل 1078

یاد خط میں اس کے جی بھر آ کے گھبراتا رہا

رات کا بھی کیا ہی مینھ آیا تھا پر جاتا رہا

کیا قیامت ہوتی بے پردہ ہوئے کیا جانیے

مصلحت ہی ہو گی ہم سے وہ جو شرماتا رہا

قدموزوں یار کا خاطر سے جاتا ہی نہیں

میں اسی مصرع کو ساری عمر ڈولاتا رہا

کل مکل بیتاب دل سے آج کل کی کچھ نہیں

میں تو اس غم کش کو بے کل ہی سدا پاتا رہا

آگ کھا جاتی ہے خشک و تر جو اس کے منھ پڑے

میں تو جیسے شمع اپنے ہی تئیں کھاتا رہا

میری تیری چاہ منھ دیکھے کی ہے جوں آرسی

آنکھ پھیری جس گھڑی پھر کاہے کا ناتا رہا

ہو گئے ہم محتسب کی بے شعوری سے اسیر

شیخ میں کچھ ہوش تھا میخانے سے جاتا رہا

لوگ ہی اس کارواں کے حرف نشنو تھے تمام

راہ چلتے تو جرس ہر گام چلاتا رہا

میر دیوانہ ہے اچھا بات کیا سمجھے مری

یوں تو مجھ سے جب ملا میں اس کو سمجھاتا رہا

میر تقی میر

ہر زماں ملتے تھے باہم سو زمانہ ہو گیا

اکتوبر 6, 2015میر تقی میر،اساتذہ،غزلفسانہ،پرانا،آنا،بہانہ،جانا،دکھانا،زمانہadmin

دیوان سوم غزل 1077

ہجر کی اک آن میں دل کا ٹھکانا ہو گیا

ہر زماں ملتے تھے باہم سو زمانہ ہو گیا

واں تعلل ہی تجھے کرتے گئے شام و سحر

یاں ترے مشتاق کا مرنا بہانہ ہو گیا

شیب میں بھی ہے لباس جسم کا ظاہر قماش

پر اسے اب چھوڑیے جامہ پرانا ہو گیا

کہنے تو کہہ بیٹھے مہ بہتر ہے روے یار سے

شہر میں پھر ہم کو مشکل منھ دکھانا ہو گیا

صد سخن آئے تھے لب تک پر نہ کہنے پائے ایک

ناگہاں اس کی گلی سے اپنا جانا ہو گیا

رہنے کے قابل تو ہرگز تھی نہ یہ عبرت سرائے

اتفاقاً اس طرف اپنا بھی آنا ہو گیا

سینکڑوں افسوں دنوں کو پڑھتے تھے تس پر بھی میر

بیٹھنا راتوں کو باہم اب فسانہ ہو گیا

میر تقی میر

دل کے جانے کا بڑا ماتم ہوا

اکتوبر 6, 2015میر تقی میر،اساتذہ،غزلہم،ماتم،نم،کم،اودھم،برہم،عالمadmin

دیوان سوم غزل 1076

سینہ کوبی ہے طپش سے غم ہوا

دل کے جانے کا بڑا ماتم ہوا

آنکھیں دوڑیں خلق جا اودھر گری

اٹھ گیا پردہ کہاں اودھم ہوا

کیا لکھوں رویا جو لکھتے جوں قلم

سب مرے نامے کا کاغذ نم ہوا

ہم جو اس بن خوار ہیں حد سے زیاد

یار یاں تک آن کر کیا کم ہوا

آگیا یوں ہی خراماں وہ تو پھر

حشر کا ہنگامہ ہی برہم ہوا

درہمی سے برہمی سے دیکھیو

دونوں عالم کا عجب عالم ہوا

جسم خاکی کا جہاں پردہ اٹھا

ہم ہوئے وہ میر سب وہ ہم ہوا

میر تقی میر

سو بھی رہتا ہوں یہ کہتا ہائے دل نے کیا کیا

اکتوبر 6, 2015میر تقی میر،اساتذہ،غزلکیا،پردہ،اچھا،رسوا،سوداadmin

دیوان سوم غزل 1075

ضبط کرتے کرتے اب جو لب کو میں نے وا کیا

سو بھی رہتا ہوں یہ کہتا ہائے دل نے کیا کیا

آنکھ پڑتی تھی تمھارے منھ پہ جب تک چین تھا

کیا کیا تم نے کہ مجھ بیتاب سے پردہ کیا

گور ہی اس کو جھنکائی عشق جس کے ہاں گیا

اس طبیب بدشگوں نے کس کے تیں اچھا کیا

دیکھ خبطی مجھ کو رستے بند ہوجاتے ہیں اب

عشق نے کیا کوچہ و بازار میں رسوا کیا

لوگ دل دیتے سنے تھے میر دے گذرا ہے جی

لیک اپنے طور پر ان نے بھی اک سودا کیا

میر تقی میر

یک رمق جی تھا بدن میں سو بھی گھبرانے لگا

اکتوبر 6, 2015میر تقی میر،اساتذہ،غزلمرجھانے،کھانے،گھبرانے،پھیلانے،آنے،جھپکانے،جانے،دیوانے،شرمانےadmin

دیوان سوم غزل 1074

رات سے آنسو مری آنکھوں میں پھر آنے لگا

یک رمق جی تھا بدن میں سو بھی گھبرانے لگا

وہ لڑکپن سے نکل کر تیغ چمکانے لگا

خون کرنے کا خیال اب کچھ اسے آنے لگا

لعل جاں بخش اس کے تھے پوشیدہ جوں آب حیات

اب تو کوئی کوئی ان ہونٹوں پہ مر جانے لگا

حیف میں اس کے سخن پر ٹک نہ رکھا گوش کو

یوں تو ناصح نے کہا تھا دل نہ دیوانے لگا

حبس دم کے معتقد تم ہو گے شیخ شہر کے

یہ تو البتہ کہ سن کر لعن دم کھانے لگا

گرم ملنا اس گل نازک طبیعت سے نہ ہو

چاندنی میں رات بیٹھا تھا سو مرجھانے لگا

عاشقوں کی پائمالی میں اسے اصرار ہے

یعنی وہ محشر خرام اب پائوں پھیلانے لگا

چشمک اس مہ کی سی دلکش دید میں آئی نہیں

گو ستارہ صبح کا بھی آنکھ جھپکانے لگا

کیونکر اس آئینہ رو سے میر ملیے بے حجاب

وہ تو اپنے عکس سے بھی دیکھو شرمانے لگا

میر تقی میر

وہ دل کہ جس پہ اپنا بھروسا تھا خوں ہوا

اکتوبر 6, 2015میر تقی میر،اساتذہ،غزلخوں،رہنموں،زبوں،سکوں،شگوںadmin

دیوان سوم غزل 1073

اب کے جو گل کی فصل میں ہم کو جنوں ہوا

وہ دل کہ جس پہ اپنا بھروسا تھا خوں ہوا

ٹھہرا گیا ہو ٹک بھی تو تم سے بیاں کروں

آتے ہی اس کے رفتن صبر و سکوں ہوا

تھا شوق طوف تربت مجنوں مجھے بہت

اک گردباد دشت مرا رہنموں ہوا

سیلاب آگے آیا چلا جاتے دشت میں

بے اختیار رونے کا میرے شگوں ہوا

جان اس کی تیغ تیز سے رکھ کر دریغ میر

صید حرم ندان شکار زبوں ہوا

میر تقی میر

جد برسوں ہم نے سورئہ یوسفؑ کو دم کیا

اکتوبر 6, 2015میر تقی میر،اساتذہ،غزلقلم،کم،الم،بھسم،خم،دم،ستمadmin

دیوان سوم غزل 1072

تد اس بہشتی رو سے یہ خلطہ بہم کیا

جد برسوں ہم نے سورئہ یوسفؑ کو دم کیا

چہرے کو نوچ نوچ لیا چھاتی کوٹ لی

جانے کا دل کے ہم نے بہت غم الم کیا

مربوط اور لوگوں سے شاید کہ وے ہوئے

وہ ربط و رابطہ جو بہت ہم سے کم کیا

کیا کیا سخن زباں پہ مری آئے ہوکے قتل

مانند خامہ گوکہ مرا سر قلم کیا

کی ہم نے تب درونے کی سوزش سے عاقبت

سب تن بدن اس آگ نے اپنا بھسم کیا

یاں اپنے جسم زار پہ تلوار سی لگی

ان نے جو بے دماغی سے ابرو کو خم کیا

اس زندگی سے مارے ہی جانا بھلا تھا میر

رحم ان نے میرے حق میں کیا کیا ستم کیا

میر تقی میر

ٹک رنجہ قدم کر کر مجھ تک اسے آنا تھا

اکتوبر 6, 2015میر تقی میر،اساتذہ،غزلچھپانا،چھانا،کھانا،ٹھکانا،آنا،بچانا،جگانا،جانا،دکھاناadmin

دیوان سوم غزل 1071

سہل ایسا نہ تھا آخر جی سے مرا جانا تھا

ٹک رنجہ قدم کر کر مجھ تک اسے آنا تھا

کیا مو کی پریشانی کیا پردے میں پنہانی

منھ یار کو ہر صورت عاشق سے چھپانا تھا

لذت سے نہ تھا خالی جانا تہ تیغ اس کی

اے صید حرم تجھ کو اک زخم تو کھانا تھا

کیا صورتیں بگڑی ہیں مشتاقوں کی ہجراں میں

اس چہرے کو اے خالق ایسا نہ بنانا تھا

مت سہل ہمیں سمجھو پہنچے تھے بہم تب ہم

برسوں تئیں گردوں نے جب خاک کو چھانا تھا

کیا ظلم کیا بے جا مارا جیوں سے ان نے

کچھ ٹھور بھی تھی اس کی کچھ اس کا ٹھکانا تھا

اے شور قیامت اب وعدے سے قیامت ہے

خوابیدہ مرے خوں کو ظالم نہ جگانا تھا

ہو باغ و بہار آیا گل پھول کہیں پایا

جلوہ اسے یاں اپنا صدرنگ دکھانا تھا

کہتے نہ تھے ہم واں سے پھر آچکے جیتے تم

میر اس گلی میں تم کو زنہار نہ جانا تھا

میر تقی میر

اس جان کی جوکھوں کو اس وقت نہ جانا تھا

اکتوبر 6, 2015میر تقی میر،اساتذہ،غزلفسانہ،نہانا،نشانہ،پرانا،اٹھانا،بہانہ،جانا،دوانہ،زمانہ،سناناadmin

دیوان سوم غزل 1070

کیا کام کیا ہم نے دل یوں نہ لگانا تھا

اس جان کی جوکھوں کو اس وقت نہ جانا تھا

تھا جسم کا ترک اولیٰ ایام میں پیری کے

جاتا تھا چلا ہر دم جامہ بھی پرانا تھا

ہر آن تھی سرگوشی یا بات نہیں گاہے

اوقات ہے اک یہ بھی اک وہ بھی زمانہ تھا

پامالی عزیزوں کی رکھنی تھی نظر میں ٹک

اتنا بھی تمھیں آ کر یاں سر نہ اٹھانا تھا

اک محوتماشا ہیں اک گرم ہیں قصے کے

یاں آج جو کچھ دیکھا سو کل وہ فسانہ تھا

کیونکر گلی سے اس کی میں اٹھ کے چلا جاتا

یاں خاک میں ملنا تھا لوہو میں نہانا تھا

جو تیر چلا اس کا سو میری طرف آیا

اس عشق کے میداں میں میں ہی تو نشانہ تھا

جب تونے نظر پھیری تب جان گئی اس کی

مرنا ترے عاشق کا مرنا کہ بہانہ تھا

کہتا تھا کسو سے کچھ تکتا تھا کسو کا منھ

کل میر کھڑا تھا یاں سچ ہے کہ دوانہ تھا

کب اور غزل کہتا میں اس زمیں میں لیکن

پردے میں مجھے اپنا احوال سنانا تھا

میر تقی میر

آیا کبھو یاں دن کو بھی یوں تو غضب آیا

اکتوبر 6, 2015میر تقی میر،اساتذہ،غزللب،ڈھب،کب،اب،ادب،جب،سبب،عجب،غضبadmin

دیوان سوم غزل 1069

جس خشم سے وہ شوخ چلا آج شب آیا

آیا کبھو یاں دن کو بھی یوں تو غضب آیا

اس نرگس مستانہ کو کر یاد کڑھوں ہوں

کیا گریۂ سرشار مجھے بے سبب آیا

راہ اس سے ہوئی خلق کو کس طور سے یارب

ہم کو کبھی ملنے کا تو اس کے نہ ڈھب آیا

کیا پوچھتے ہو دب کے سخن منھ سے نہ نکلا

کچھ دیکھتے اس کو مجھے ایسا ادب آیا

کہتے تو ہیں میلان طبیعت ہے اسے بھی

یہ باتیں ہیں ایدھر کو مزاج اس کا کب آیا

خوں ہوتی رہی دل ہی میں آزردگی میری

کس روز گلہ اس کا مرے تابہ لب آیا

جی آنکھوں میں آیا ہے جگر منھ تئیں میرے

کیا فائدہ یاں چل کر اگر یار اب آیا

آتے ہوئے اس کے تو ہوئی بے خودی طاری

وہ یاں سے گیا اٹھ کے مجھے ہوش جب آیا

جاتا تھا چلا راہ عجب چال سے کل میر

دیکھا اسے جس شخص نے اس کو عجب آیا

میر تقی میر

مجھ پہ تودہ ہوا ہے طوفاں کا

اکتوبر 6, 2015میر تقی میر،اساتذہ،غزلمرجاں،مسلماں،ڈھان،گریباں،ایماں،جاں،طوفاںadmin

دیوان سوم غزل 1068

ہوں نشاں کیوں نہ تیر خوباں کا

مجھ پہ تودہ ہوا ہے طوفاں کا

ہاتھ زنجیر ہو جنوں میں رہا

اپنے زنجیرئہ گریباں کا

چپکے دیکھو جھمکتے وے لب سرخ

ذکر یاں کیا ہے لعل و مرجاں کا

ایک رہزن ہے اس کی کافر زلف

غم ہی رہتا ہے دین و ایماں کا

عمر آوارگی میں سب گذری

کچھ ٹھکانا نہیں دل و جاں کا

کافرستاں ہے خال و خط و زلف

وقر کیا ہے دل مسلماں کا

مر گیا میر نالہ کش بیکس

نَے نے ماتم میں اس کے منھ ڈھانکا

میر تقی میر

کیا ذکر یاں مسیح علیہ السلام کا

اکتوبر 6, 2015میر تقی میر،اساتذہ،غزلمقام،ناتمام،کلام،پیام،السلام،امام،سلام،شام،غلامadmin

دیوان سوم غزل 1067

اعجاز منھ تکے ہے ترے لب کے کام کا

کیا ذکر یاں مسیح علیہ السلام کا

رقعہ ہمیں جو آوے ہے سو تیر میں بندھا

کیا دیجیے جواب اجل کے پیام کا

کچھ سدھ سنبھالتے ہی رکھی ان نے پگڑی پھیر

ممنون میں نہیں ہوں جواب سلام کا

منھ دیکھو بدر کا کہ تری روکشی کرے

تو یوں ہی نام لے ہے کسو ناتمام کا

نوبت ہے اپنی جب سے یہی کوچ کاہے شور

بجنا سنا نہیں ہے کبھو یاں مقام کا

کنج لب اس کا دیکھ کے خاموش رہ گئے

یعنی کہ تھا مقام یہ ختم کلام کا

اس رو و مو کے محو کو کیا روزگار سے

جلوہ ہی کچھ جدا ہے مرے صبح و شام کا

صاحب ہو مار ڈالو مجھے تم وگرنہ کچھ

جز عاشقی گناہ نہیں ہے غلام کا

کب اقتدا ہو مجھ سے کسو کی سواے میر

بندہ ہوں دل سے میں اسی سید امام کا

میر تقی میر

کوئی دل کا بخار نکلے گا

اکتوبر 6, 2015میر تقی میر،اساتذہ،غزلیار،پار،اختیار،بہار،بخار،شکار،غبارadmin

دیوان سوم غزل 1066

چشم سے خوں ہزار نکلے گا

کوئی دل کا بخار نکلے گا

اس کی نخچیرگہ سے روح الامیں

ہو کے آخر شکار نکلے گا

آندھیوں سے سیاہ ہو گا چرخ

دل کا تب کچھ غبار نکلے گا

ہوئے رے لاگ تیر مژگاں کی

کس کے سینے کے پار نکلے گا

ناز خورشید کب تلک کھینچیں

گھر سے کب اپنے یار نکلے گا

خون ہی آئے گا تو آنکھوں سے

ایک سیل بہار نکلے گا

عزلت میر عشق میں کب تک

ہو کے بے اختیار نکلے گا

میر تقی میر

ہمیشہ رہے نام اللہ کا

اکتوبر 6, 2015میر تقی میر،اساتذہ،غزلہمراہ،ماہ،ناف،نظرگاہ،اللہ،آہ،بیگاہ،خونخواہ،درگاہadmin

دیوان سوم غزل 1065

گیا حسن خوبان بد راہ کا

ہمیشہ رہے نام اللہ کا

پشیماں ہوا دوستی کر کے میں

بہت مجھ کو ارمان تھا چاہ کا

جگر کی سپر پھوٹ جانے لگی

بلا توڑ ہے ناوک آہ کا

اسیری کا دیتا ہے مژدہ مجھے

مرا زمزمہ گاہ و بیگاہ کا

رہوں جا کے مر حضرت یار میں

یہی قصد ہے بندہ درگاہ کا

کہا ہو دم قتل کچھ تو کہے

جواب اس کو کیا میرے خونخواہ کا

عدم کو نہیں مل کے جاتے ہیں لوگ

غم اس راہ میں کیا ہے ہمراہ کا

نظر خواب میں اس کے منھ پر پڑی

بہت خوب ہے دیکھنا ماہ کا

لگونہی اگر آنکھ تیری ہو میر

تماشا کر اس کی نظرگاہ کا

میر تقی میر

مہر بت دگر سے طوفان کر کے مارا

اکتوبر 6, 2015میر تقی میر،اساتذہ،غزلپہچان،پیمان،احسان،جان،حیران،سامان،طوفانadmin

دیوان سوم غزل 1064

کیا رویئے ہمیں کو یوں آن کر کے مارا

مہر بت دگر سے طوفان کر کے مارا

تربت کا میری لوحہ آئینے سے کرے ہے

یعنی کہ ان نے مجھ کو حیران کر کے مارا

بیگانہ جان ان نے کیا چوٹ رات کو کی

منھ دیکھ دیکھ میرا پہچان کر کے مارا

پہلے گلے لگایا پھر دست جور اٹھایا

مارا تو ان نے لیکن احسان کر کے مارا

اس سست عہد نے کیا کی تھی قسم مجھی سے

بہتوں کو ان نے عہد و پیمان کر کے مارا

حاضر یراق ہونا کاہے کو چاہیے تھا

مجھ بے نوا کو کیا کیا سامان کر کے مارا

کہنے لگا کہ شب کو میرے تئیں نشہ تھا

مستانہ میر کو میں کیا جان کر کے مارا

میر تقی میر

پھول غیرت سے جل کے خاک ہوا

اکتوبر 6, 2015میر تقی میر،اساتذہ،غزلہلاک،چاک،پاک،تپاک،خاکadmin

دیوان سوم غزل 1063

وہ جو گلشن میں جلوہ ناک ہوا

پھول غیرت سے جل کے خاک ہوا

اس کے دامن تلک نہ پہنچا ہاتھ

تھا سر دست جیب چاک ہوا

کس قدر تھا خبیث شیخ شہر

اس کے مرنے سے شہر پاک ہوا

ڈریے اس رشک خور کی گرمی سے

کچھ تو ہے ہم سے جو تپاک ہوا

میر ہلکان ہو گیا تھا بہت

سو طلب ہی میں پھر ہلاک ہوا

میر تقی میر

یا لوہو اشک خونی سے منھ پر بہائے گا

اکتوبر 6, 2015میر تقی میر،اساتذہ،غزللائے،کھلائے،پائے،آئے،بہائے،بنائے،جائے،رجھائےadmin

دیوان سوم غزل 1062

وہ دل نہیں رہا ہے تعب جو اٹھائے گا

یا لوہو اشک خونی سے منھ پر بہائے گا

اب یہ نظر پڑے ہے کہ برگشتہ وہ مژہ

کاوش کرے گی ٹک بھی تو سنبھلا نہ جائے گا

کھینچا جو میں وہ ساعد سیمیں تو کہہ اٹھا

بس بس کہیں ہمیں ابھی صاحب غش آئے گا

ریجھے تو اس کے طور پہ مجلس میں شیخ جی

پھر بھی ملا تو خوب سا ان کو رجھائے گا

جلوے سے اس کے جل کے ہوئے خاک سنگ و خشت

بیتاب دل بہت ہے یہ کیا تاب لائے گا

ہم رہ چکے جو ایسے ہی غم میں کھپا کیے

معلوم جی کی چال سے ہوتا ہے جائے گا

اڑ کر لگے ہے پائوں میں زلف اس کی پیچ دار

بازی نہیں یہ سانپ جو کوئی کھلائے گا

اڑتی رہے گی خاک جنوں کرتی دشت دشت

کچھ دست اگر یہ بے سر و ساماں بھی پائے گا

درپے ہے اب وہ سادہ قراول پسر بہت

دیکھیں تو میر کے تئیں کوئی بچائے گا

میر تقی میر

دور ہی دور پھرے پاس ہمارا نہ کیا

اکتوبر 6, 2015میر تقی میر،اساتذہ،غزلہمارا،مارا،چارہ،کنارہ،گوارا،اشارہ،ساراadmin

دیوان سوم غزل 1061

چال یہ کیا تھی کہ ایدھر کو گذارا نہ کیا

دور ہی دور پھرے پاس ہمارا نہ کیا

اس کو منظور نہ تھی ہم سے مروت کرنی

ایک چشمک بھی نہ کی ایک اشارہ نہ کیا

بعد دشنام تھی بوسے کی توقع بھی ولے

تلخ سننے کے تئیں ہم نے گوارا نہ کیا

مرکے بے حوصلہ لوگوں میں کہا یافرہاد

چندے پتھر ہی سے سر اور بھی مارا نہ کیا

جی رہے ڈوبتے دریاے غم عشق میں لیک

بوالہوس کی سی طرح ہم نے کنارہ نہ کیا

نیم جاں صدقے کی اس پر نہ زیاں دیکھا نہ سود

ہم تو کچھ دوستی میں وارے کا سارا نہ کیا

لے گیا مٹی بھی دروازے کی ان کے میں میر

پر اطبا نے مرے درد کا چارہ نہ کیا

میر تقی میر

کر اک سلام پوچھنا صاحب کا نام کیا

اکتوبر 6, 2015میر تقی میر،اساتذہ،غزلمقام،نام،کلام،پیام،امام،تمام،خرام،سلام،شامadmin

دیوان سوم غزل 1060

ان دلبروں سے رابطہ کرنا ہے کام کیا

کر اک سلام پوچھنا صاحب کا نام کیا

حیرت ہے کھولیں چشم تماشا کہاں کہاں

حسن و جمال ویسا ہے اس کا خرام کیا

کی اک نگاہ گرم جہاں ان سے مل گئے

عاشق کو دلبروں سے سلام و پیام کیا

شکر خدا کہ سر نہ فرو لائے ہم کہیں

کیا جانیں سجدہ کہتے ہیں کس کو سلام کیا

اس کنج لب پہ چپکے ہوئے منھ کو رکھ کے ہم

دلچسپ اس مقام میں حرف و کلام کیا

جس جاے اس کے چہرے سے کرتے ہیں گفتگو

مرآت و ماہ و گل کا ہے اس جا مقام کیا

کہتا ہے کون بدر میں نقصان کچھ رہا

پر منھ کھلے پہ اس کے ہے ماہ تمام کیا

یہ جانوں ہوں کہ دل کو ہے اس رو ومو سے لاگ

کیا جانوں پیش آوے ہے اب صبح و شام کیا

تسبیح تک تو میر نے رکھا کلال کے

وقت نماز اب بھی ہوئے تھے امام کیا

میر تقی میر

ایسے ناداں دلربا کے ملنے کا حاصل ہے کیا

اکتوبر 6, 2015میر تقی میر،اساتذہ،غزلمقبل،منزل،مائل،محمل،مشکل،گھائل،باطل،بسمل،حاصل،شاملadmin

دیوان سوم غزل 1059

دل اگر کہتا ہوں تو کہتا ہے وہ یہ دل ہے کیا

ایسے ناداں دلربا کے ملنے کا حاصل ہے کیا

جاننا باطل کسو کو یہ قصور فہم ہے

حق اگر سمجھے تو سب کچھ حق ہے یاں باطل ہے کیا

یاں کوئی دن رات وقفہ کرکے قصد آگے کا کر

کارواں گاہ جہان رفتنی منزل ہے کیا

تک رہے ہیں اس کو سو ہم تک رہے ہیں ایک سے

دیدئہ حیراں ہمارا دیدئہ بسمل ہے کیا

وہ حقیقت ایک ہی ساری نہیں ہے سب میں تو

آب سا ہر رنگ میں یہ اور کچھ شامل ہے کیا

چوٹ میرے دل میں ایسی ہے کہ ہوں میں دم بخود

وہ کشندہ یوں ہی کہتا ہے کہ تو گھائل ہے کیا

کہتے ہیں ظاہر ہے اک ہی لیلی ہفت اقلیم میں

اس عبارت کا نہیں معلوم کچھ محمل ہے کیا

ہم تو سو سو بار مر رہتے ہیں ایک ایک آن میں

عشق میں اس کے گذرنا جان سے مشکل ہے کیا

شاخ پر گل یا نہال اودھر جھکے جاتے ہیں سب

قامت دلکش کا اس کی سرو ہی مائل ہے کیا

مرثیہ میرے بھی دل کا رقت آور ہے بلا

محتشمؔ کو میر میں کیا جانوں اور مقبلؔ ہے کیا

میر تقی میر

اک جمع لڑکوں کا بھی لے لے کے سنگ آیا

اکتوبر 6, 2015میر تقی میر،اساتذہ،غزلڈھنگ،پتنگ،تنگ،جنگ،رنگ،زنگ،سنگadmin

دیوان سوم غزل 1058

کرتا جنوں جہاں میں بے نام و ننگ آیا

اک جمع لڑکوں کا بھی لے لے کے سنگ آیا

شب شمع کی بھی جھپکی مجلس میں لگ گئی تھی

سرگرم شوق مردن جس دم پتنگ آیا

فتنے فساد اٹھیں گے گھر گھر میں خون ہوں گے

گر شہر میں خراماں وہ خانہ جنگ آیا

ہر سر نہیں ہے شایاں شور قلندری کا

گو شیخ شہر باندھے زنجیر و زنگ آیا

چسپاں ہے اس بدن سے پیراہن حریری

اتنی بھی تنگ پوشی جی اب تو تنگ آیا

باتیں ہماری ساری بے ڈھنگیاں ہیں وے ہی

بوڑھے ہوئے پہ ہم کو اب تک نہ ڈھنگ آیا

بشرے کی اپنے رونق اے میر عارضی ہے

جب دل کو خوں کیا تو چہرے پہ رنگ آیا

میر تقی میر

مجنوں کے دماغ میں خلل تھا

اکتوبر 6, 2015میر تقی میر،اساتذہ،غزلمبتذل،محل،بدل،بغل،خللadmin

دیوان سوم غزل 1057

میرا ہی مقلد عمل تھا

مجنوں کے دماغ میں خلل تھا

دل ٹوٹ گیا تو خوں نہ نکلا

شیشہ یہ بہت ہی کم بغل تھا

تھیں سب کی نظر میں اس کی بھوویں

افسوس یہ شعر مبتذل تھا

کیا قدر ہے ریختے کی گو میں

اس فن میں نظیرؔی کا بدل تھا

تھا نزع میں دست میر دل پر

شاید غم کا یہی محل تھا

میر تقی میر

یا محبت کہہ کے یہ بارگراں میں لے گیا

اکتوبر 6, 2015میر تقی میر،اساتذہ،غزلفشاں،مہرباں،آسماں،بارگراں،جہاں،جاں،داستاںadmin

دیوان سوم غزل 1056

دین و دل کے غم کو آساں ناتواں میں لے گیا

یا محبت کہہ کے یہ بارگراں میں لے گیا

خاک و خوں میں لوٹ کر رہ جانے ہی کا لطف ہے

جان کو کیا جو سلامت نیم جاں میں لے گیا

سرگذشت عشق کی تہ کو نہ پہنچا یاں کوئی

گرچہ پیش دوستاں یہ داستاں میں لے گیا

عرصۂ دشت قیامت باغ ہوجائے گا سب

اس طرح سے جو یہ چشم خوں فشاں میں لے گیا

ذکر دل جانے کا وہ پرکینہ سن کہنے لگا

یہ سناتے ہو کسے کیا مہرباں میں لے گیا

یک جہاں مہر و وفا کی جنس تھی میرے کنے

لیکن اس کو پھیر ہی لایا جہاں میں لے گیا

ریختہ کاہے کو تھا اس رتبۂ اعلیٰ میں میر

جو زمیں نکلی اسے تا آسماں میں لے گیا

میر تقی میر

خاک ناچیز تھا میں سو مجھے انسان کیا

اکتوبر 6, 2015میر تقی میر،اساتذہ،غزلویران،پریشان،انسان،دیوان،طوفانadmin

دیوان سوم غزل 1055

میرے مالک نے مرے حق میں یہ احسان کیا

خاک ناچیز تھا میں سو مجھے انسان کیا

اس سرے دل کی خرابی ہوئی اے عشق دریغ

تو نے کس خانۂ مطبوع کو ویران کیا

ضبط تھا جب تئیں چاہت نہ ہوئی تھی ظاہر

اشک نے بہ کے مرے چہرے پہ طوفان کیا

انتہا شوق کی دل کے جو صبا سے پوچھی

اک کف خاک کو لے ان نے پریشان کیا

مجھ کو شاعر نہ کہو میر کہ صاحب میں نے

درد و غم کتنے کیے جمع تو دیوان کیا

میر تقی میر

پردے میں چشم ڈھکنے دیوار و در بنے ہے

اکتوبر 6, 2015میر تقی میر،اساتذہ،غزلنظر،کدھر،گہر،پہر،پر،اگر،تر،خر،در،زر،سرadmin

دیوان دوم غزل 1054

عبرت سے دیکھ جس جا یاں کوئی گھر بنے ہے

پردے میں چشم ڈھکنے دیوار و در بنے ہے

ہیں دل گداز جن کے کچھ چیز مال وے ہیں

ہوتے ہیں ملتفت تو پھر خاک زر بنے ہے

شب جوش غم سے جس دم لگتا ہے دل تڑپنے

ہر زخم سینہ اس دم یک چشم تر بنے ہے

یاں ہر گھڑی ہماری صورت بگڑتی ہے گی

چہرہ ہی واں انھوں کا دو دو پہر بنے ہے

ٹک رک کے صاف طینت نکلے ہے اور کچھ ہو

پانی گرہ جو ہووے تو پھر گہر بنے ہے

ہے شعبدے کے فن میں کیا دست مے کشوں کو

زاہد انھوں میں جاکر آدم سے خر بنے ہے

نکلے ہے صبح بھی یاں صندل ملے جبیں کو

عالم میں کام کس کا بے درد سر بنے ہے

سارے دکھوں کی اے دل ہوجائے گی تلافی

صحبت ہماری اس کی ٹک بھی اگر بنے ہے

ہر اک سے ڈھب جدا ہے سارے زمانے کا بھی

بنتی ہے جس کسو کی یک طور پر بنے ہے

برسوں لگی رہے ہیں جب مہر و مہ کی آنکھیں

تب کوئی ہم سا صاحب صاحب نظر بنے ہے

یاران دیر و کعبہ دونوں بلا رہے ہیں

اب دیکھیں میر اپنا جانا کدھر بنے ہے

میر تقی میر

جیسے لوں چلتی مرے منھ سے ہوا نکلے ہے

اکتوبر 6, 2015میر تقی میر،اساتذہ،غزلہوا،لگا،چلا،نیا،چھپا،کیا،گتھا،پا،ا،ادا،جا،جدا،دوا،دعا،صباadmin

دیوان دوم غزل 1053

جل گیا دل مگر ایسے جوں بلا نکلے ہے

جیسے لوں چلتی مرے منھ سے ہوا نکلے ہے

لخت دل قطرئہ خوں ٹکڑے جگر ہو ہوکر

کیا کہوں میں کہ مری آنکھوں سے کیا نکلے ہے

میں جو ہر سو لگوں ہوں دیکھنے ہو کر مضطر

آنسو ہر میری نگہ ساتھ گتھا نکلے ہے

پارسائی دھری رہ جائے گی مسجد میں شیخ

جو وہ اس راہ کبھو مستی میں آ نکلے ہے

گوکہ پردہ کرے جوں ماہ شب ابر وہ شوخ

کب چھپا رہتا ہے ہرچند چھپا نکلے ہے

بھیڑیں ٹل جاتی ہیں آگے سے اس ابرو کے ہلے

سینکڑوں میں سے وہ تلوار چلا نکلے ہے

بنتی ہے سامنے اس کے کیے سجدہ ہی ولے

جی سمجھتا ہے جو اس بت میں ادا نکلے ہے

بد کہیں نالہ کشاں ہم ہیں کہ ہم سے ہر روز

شور و ہنگامے کا اک طور نیا نکلے ہے

اجر سے خالی نہیں عشق میں مارے جانا

دے ہے جو سر کوئی کچھ یاں سے بھی پا نکلے ہے

لگ چلی ہے مگر اس گیسوے عنبربو سے

ناز کرتی ہوئی اس راہ صبا نکلے ہے

کیا ہے اقبال کہ اس دشمن جاں کے آتے

منھ سے ہر ایک کے سو بار دعا نکلے ہے

سوز سینے کا بھی دلچسپ بلا ہے اپنا

داغ جو نکلے ہے چھاتی سے لگا نکلے ہے

سارے دیکھے ہوئے ہیں دلی کے عطار و طبیب

دل کی بیماری کی کس پاس دوا نکلے ہے

کیا فریبندہ ہے رفتار ہے کینے کی جدا

اور گفتار سے کچھ پیار جدا نکلے ہے

ویسا بے جا نہیں دل میر کا جو رہ نہ سکے

چلتا پھرتا کبھو اس پاس بھی جا نکلے ہے

میر تقی میر

کاہش اک روز مجھ کو شام سے ہے

اکتوبر 6, 2015میر تقی میر،اساتذہ،غزلمقام،نام،کام،امام،انتقام،احتلام،سلام،شام،عوام،غلامadmin

دیوان دوم غزل 1052

کار دل اس مہ تمام سے ہے

کاہش اک روز مجھ کو شام سے ہے

تم نہیں فتنہ ساز سچ صاحب

شہر پرشور اس غلام سے ہے

بوسہ لے کر سرک گیا کل میں

کچھ کہو کام اپنے کام سے ہے

کوئی تجھ سا بھی کاش تجھ کو ملے

مدعا ہم کو انتقام سے ہے

کب وہ مغرور ہم سے مل بیٹھا

ننگ جس کو ہمارے نام سے ہے

خوش سرانجام وے ہی ہیں جن کو

اقتدا اولیں امام سے ہے

شعر میرے ہیں سب خواص پسند

پر مجھے گفتگو عوام سے ہے

شیطنت سے نہیں ہے خالی شیخ

اس کی پیدائش احتلام سے ہے

سر جھکائوں تو اور ٹیڑھے ہو

کیا تمھیں چڑ مرے سلام سے ہے

سہل ہے میر کا سمجھنا کیا

ہر سخن اس کا اک مقام سے ہے

میر تقی میر

کیا کہوں میں آہ مجھ کو کام کس پتھر سے ہے

اکتوبر 6, 2015میر تقی میر،اساتذہ،غزلور،گوہر،گھر،پیغمبر،پتھر،پر،ایدھر،تر،خنجر،داورمحشر،در،زورآور،زرadmin

دیوان دوم غزل 1051

ربط دل کو اس بت بے مہر کینہ ور سے ہے

کیا کہوں میں آہ مجھ کو کام کس پتھر سے ہے

کس کو کہتے ہیں نہیں میں جانتا اسلام و کفر

دیر ہو یا کعبہ مطلب مجھ کو تیرے در سے ہے

کیوں نہ اے سید پسر دل کھینچے یہ موے دراز

اصل زلفوں کی تری گیسوے پیغمبرؐ سے ہے

کاغذ ابری پہ درد دل اسے لکھ بھیجیے

وہ بھی تو جانے کہ یاں آشوب چشم تر سے ہے

کیا کہیں دل کچھ کھنچے جاتے ہیں اودھر ہر گھڑی

کام ہم بے طاقتوں کو عشق زورآور سے ہے

رحم بھی دینا تھا تھوڑا ہائے اس خوبی کے ساتھ

تجھ سے کیا کل گفتگو یہ داورمحشر سے ہے

کیا کروں گا اب کے میں بے پر ہوس گلزار کی

لطف گل گشت اے نسیم صبح بال و پر سے ہے

مرنے کے اسباب پڑتے ہیں بہت عالم میں لیک

رشک اس پر ہے کہ جس کی موت اس خنجر سے ہے

ناز و خشم و بے دماغی اس طرف سے سب ہیں یہ

کچھ کسو بھی طور کی رنجش بھلا ایدھر سے ہے

دیکھ گل کو ٹک کہ ہر یک سر چڑھا لیتا ہے یاں

اس سے پیدا ہے کہ عزت اس چمن میں زر سے ہے

کانپتا ہوں میں تو تیرے ابروئوں کے خم ہوئے

قشعریرہ کیا مجھے تلوار کے کچھ ڈر سے ہے

اشک پے درپے چلے آتے تھے چشم زار سے

ہر نگہ کا تار مانا رشتۂ گوہر سے ہے

بادیے ہی میں پڑا پاتے ہیں جب تب تجھ کو میر

کیا خفا اے خانماں آباد کچھ تو گھر سے ہے

میر تقی میر

گاہے بکا کرے ہے گاہے دعا کرے ہے

اکتوبر 6, 2015میر تقی میر،اساتذہ،غزلہوا،لگا،ملا،چلا،چھپا،وفا،کہا،کڑھا،اٹھا،ادا،جلا،خدا،دوا،دعا،رہاadmin

دیوان دوم غزل 1050

کیا پوچھتے ہو عاشق راتوں کو کیا کرے ہے

گاہے بکا کرے ہے گاہے دعا کرے ہے

دانستہ اپنے جی پر کیوں تو جفا کرے ہے

اتنا بھی میرے پیارے کوئی کڑھا کرے ہے

فتنہ سپہر کیا کیا برپا کیا کرے ہے

سو خواب میں کبھو تو مجھ سے ملا کرے ہے

کس ایسے سادہ رو کا حیران حسن ہے یہ

مرآت گاہ بیگہ بھیچک رہا کرے ہے

ہم طور عشق سے تو واقف نہیں ہیں لیکن

سینے میں جیسے کوئی دل کو ملا کرے ہے

کیا کہیے داغ دل ہے ٹکڑے جگر ہے سارا

جانے وہی جو کوئی ظالم وفا کرے ہے

اس بت کی کیا شکایت راہ و روش کی کریے

پردے میں بدسلوکی ہم سے خدا کرے ہے

گرم آکر ایک دن وہ سینے سے لگ گیا تھا

تب سے ہماری چھاتی ہر شب جلا کرے ہے

کیا چال یہ نکالی ہوکر جوان تم نے

اب جب چلو ہو دل کو ٹھوکر لگا کرے ہے

دشمن ہو یار جیسا درپے ہے خوں کے میرے

ہے دوستی جہاں واں یوں ہی ہوا کرے ہے

سمجھا ہے یہ کہ مجھ کو خواہش ہے زندگی کی

کس ناز سے معالج میری دوا کرے ہے

حالت میں غش کی کس کو خط لکھنے کی ہے فرصت

اب جب نہ تب ادھر کو جی ہی چلا کرے ہے

سرکا ہے جب وہ برقع تب آپ سے گئے ہیں

منھ کھولنے سے اس کے اب جی چھپا کرے ہے

بیٹھے ہے یار آکر جس جا پہ ایک ساعت

ہنگامۂ قیامت واں سے اٹھا کرے ہے

سوراخ سینہ میرے رکھ ہاتھ بند مت کر

ان روزنوں سے دل ٹک کسب ہوا کرے ہے

کیا جانے کیا تمنا رکھتے ہیں یار سے ہم

اندوہ ایک جی کو اکثر رہا کرے ہے

گل ہی کی اور ہم بھی آنکھیں لگا رکھیں گے

ایک آدھ دن جو موسم اب کے وفا کرے ہے

گہ سرگذشت ان نے فرہاد کی نکالی

مجنوں کا گاہے قصہ بیٹھا کہا کرے ہے

ایک آفت زماں ہے یہ میر عشق پیشہ

پردے میں سارے مطلب اپنے ادا کرے ہے

میر تقی میر

کبھو قدرداں عشق پیدا کرے ہے

اکتوبر 6, 2015میر تقی میر،اساتذہ،غزلکیا،پیدا،پروا،پردہ،انشا،ایسا،برپا،دریا،سوداadmin

دیوان دوم غزل 1049

کہاں یاد قیس اب جو دنیا کرے ہے

کبھو قدرداں عشق پیدا کرے ہے

یہ طفلان بازار جی کے ہیں گاہک

وہی جانتا ہے جو سودا کرے ہے

چھپائیں ہوں آنکھیں ہی ان نے تو کہیے

وہ ہر بات کا ہم سے پردہ کرے ہے

جو رونا ہے راتوں کو اپنا یہی تو

کنارہ کوئی دن میں دریا کرے ہے

ٹھسک اس کے چلنے کی دیکھو تو جانو

قیامت ہی ہر گام برپا کرے ہے

مریں شوق پروازگلشن میں کیوں نہ

اسیروں کی یاں کون پروا کرے ہے

بنی صورتیں کیسی کیسی بگاڑیں

سمجھتے نہیں ہم فلک کیا کرے ہے

خط افشاں کیا خون دل سے تو بولا

بہت اب تو رنگین انشا کرے ہے

ہلاک آپ کو میر مت کر دوانے

کوئی ذی شعور آہ ایسا کرے ہے

میر تقی میر

شرم انکھڑیوں میں جس کی عیاری ہو گئی ہے

اکتوبر 6, 2015میر تقی میر،اساتذہ،غزلہمواری،ناچاری،ناداری،کاری،بیماری،بیزاری،باری،ساری،عیاری،عاریadmin

دیوان دوم غزل 1048

اس شوخ سے ہمیں بھی اب یاری ہو گئی ہے

شرم انکھڑیوں میں جس کی عیاری ہو گئی ہے

روتا پھرا ہوں برسوں لوہو چمن چمن میں

کوچے میں اس کے یکسر گل کاری ہو گئی ہے

یک جا اٹک کے رہنا ہے ناتمامی ورنہ

سب میں وہی حقیقت یاں ساری ہو گئی ہے

جب خاک کے برابر ہم کو کیا فلک نے

طبع خشن میں تب کچھ ہمواری ہو گئی ہے

مطلق اثر نہ دیکھا مدت کی آہ و زاری

اب نالہ و فغاں سے بیزاری ہو گئی ہے

اس سے دوچار ہونا آتا نہیں میسر

مرنے میں اس سے ہم کو ناچاری ہو گئی ہے

ہر بار ذکر محشر کیا یار کے در اوپر

ایسی تو یاں قیامت سو باری ہو گئی ہے

انداز شوخی اس کے آتے نہیں سمجھ میں

کچھ اپنی بھی طبیعت یاں عاری ہو گئی ہے

شاہی سے کم نہیں ہے درویشی اپنے ہاں تو

اب عیب کچھ جہاں میں ناداری ہو گئی ہے

ہم کو تو درد دل ہے تم زرد کیوں ہو ایسے

کیا میر جی تمھیں کچھ بیماری ہو گئی ہے

میر تقی میر

ہم نے کیا چوٹ دل پہ کھائی ہے

اکتوبر 6, 2015میر تقی میر،اساتذہ،غزللائی،ڈھائی،کھائی،پائی،آئی،آزمائی،آشنائی،بنائی،بڑھائی،جدائی،خودنمائیadmin

دیوان دوم غزل 1047

کوفت سے جان لب پہ آئی ہے

ہم نے کیا چوٹ دل پہ کھائی ہے

لکھتے رقعہ لکھے گئے دفتر

شوق نے بات کیا بڑھائی ہے

آرزو اس بلند و بالا کی

کیا بلا میرے سر پہ لائی ہے

دیدنی ہے شکستگی دل کی

کیا عمارت غموں نے ڈھائی ہے

ہے تصنع کہ لعل ہیں وے لب

یعنی اک بات سی بنائی ہے

دل سے نزدیک اور اتنا دور

کس سے اس کو کچھ آشنائی ہے

بے ستوں کیا ہے کوہکن کیسا

عشق کی زور آزمائی ہے

جس مرض میں کہ جان جاتی ہے

دلبروں ہی کی وہ جدائی ہے

یاں ہوئے خاک سے برابر ہم

واں وہی ناز و خودنمائی ہے

ایسا موتیٰ ہے زندئہ جاوید

رفتۂ یار تھا جب آئی ہے

مرگ مجنوں سے عقل گم ہے میر

کیا دوانے نے موت پائی ہے

میر تقی میر

سدھ اپنی نہیں ہم کو کچھ تم کو خبر بھی ہے

اکتوبر 6, 2015میر تقی میر،اساتذہ،غزلہنر،کسر،اثر،خبر،سفرadmin

دیوان دوم غزل 1046

آنکھیں نہیں یاں کھلتیں ایدھر کو نظر بھی ہے

سدھ اپنی نہیں ہم کو کچھ تم کو خبر بھی ہے

گو شکل ہوائی کی سر چرخ تئیں کھینچا

اے آہ شرر افشاں کچھ تجھ میں اثر بھی ہے

اس منزل دلکش کو منزل نہ سمجھیے گا

خاطر میں رہے یاں سے درپیش سفر بھی ہے

مجھ حال شکستہ کی تاچند یہ بے وقری

کچھ کسر میں اب میری اے شوخ کسر بھی ہے

یہ کیا ہے کہ منھ نوچے نے چاک کرے سینہ

کر عرض جو کچھ تجھ میں اے میر ہنر بھی ہے

میر تقی میر

ہر شاخ گل چمن میں بھیچک ہوئی کھڑی ہے

اکتوبر 6, 2015میر تقی میر،اساتذہ،غزللڑی،کھڑی،گھڑی،پڑی،بڑی،جڑی،جھڑیadmin

دیوان دوم غزل 1045

کس فتنہ قد کی ایسی دھوم آنے کی پڑی ہے

ہر شاخ گل چمن میں بھیچک ہوئی کھڑی ہے

واشد ہوئی نہ بلبل اپنی بہار میں بھی

کیا جانیے کہ جی میں یہ کیسی گل جھڑی ہے

نادیدنی دکھاوے کیونکر نہ عشق ہم کو

کس فتنۂ زماں سے آنکھ اپنی جا لڑی ہے

وے دن گئے کہ پہروں کرتے نہ ذکر اس کا

اب نام یار اپنے لب پر گھڑی گھڑی ہے

آتش سی پھک رہی ہے سارے بدن میں میرے

دل میں عجب طرح کی چنگاری آ پڑی ہے

کیا کچھ ہمیں کو اس کی تلوار کھا گئی ہے

ایسی ہی اک جڑی ہے اس نے جہاں جڑی ہے

کیا میر سر جھکاویں ہر کم بغل کے آگے

نام خدا انھوں کی عزت بہت بڑی ہے

میر تقی میر

وہ طبع تو نازک ہے کہانی یہ بڑی ہے

اکتوبر 6, 2015میر تقی میر،اساتذہ،غزللڑی،چھڑی،کڑی،کھڑی،گڑی،گھڑی،پڑی،اڑی،بڑی،جھڑیadmin

دیوان دوم غزل 1044

کیا حال بیاں کریے عجب طرح پڑی ہے

وہ طبع تو نازک ہے کہانی یہ بڑی ہے

کیا فکر کروں میں کہ ٹلے آگے سے گردوں

یہ گاڑی مری راہ میں بے ڈول اڑی ہے

ہے چشمک انجم طرف اس مہ کے اشارہ

دیکھو تو مری آنکھ کہاں جاکے لڑی ہے

کیا اپنی شررریزی کہیں پلکوں کی صف کی

ہم جانتے ہیں ہم پہ جو یہ باڑھ جھڑی ہے

وے دن گئے جو پہروں لگی رہتی تھیں آنکھیں

اب یاں ہمیں مہلت کوئی پل کوئی گھڑی ہے

ایسا نہ ہوا ہو گا کوئی واقعہ آگے

اک خواہش دل ساتھ مرے جیتی گڑی ہے

کیا نقش میں مجنوں ہی کے تھی رفتگی عشق

لیلیٰ کی بھی تصویر تو حیران کھڑی ہے

جاتے ہیں چلے متصل آنسو جو ہمارے

ہر تار نگہ آنکھوں میں موتی کی لڑی ہے

کھنچتا ہی نہیں ہم سے قدخم شدہ ہرگز

یہ سست کماں ہاتھ پر اب کتنی کڑی ہے

گل کھائے ہیں افراط سے میں عشق میں اس کے

اب ہاتھ مرا دیکھو تو پھولوں کی چھڑی ہے

وہ زلف نہیں منعکس دیدئہ تر میر

اس بحر میں تہ داری سے زنجیر پڑی ہے

میر تقی میر

سپاس ایزد کے کرجن نے کہ یہ ڈالی نوادی ہے

اکتوبر 6, 2015میر تقی میر،اساتذہ،غزلہادی،منادی،نوادی،بادی،دی،شادیadmin

دیوان دوم غزل 1043

نہ گلشن میں چمن پر ان نے بلبل تجھ کو جا دی ہے

سپاس ایزد کے کرجن نے کہ یہ ڈالی نوادی ہے

نہیں ٹک بیٹھنے دیتے تم اپنی بزم میں ہم کو

مروت رسم تھی مدت کی سو تم نے اٹھا دی ہے

رہائی چنگل باز فلک سے مجھ کو مشکل تھی

مری یہ بند چڑیا کی سی مولا نے چھڑا دی ہے

گلی میں اپنی قدغن کر رکھو آنے نہ پائوں میں

کہیں کیا اور بھی دل کے لگانے کی منادی ہے

طپش سے رنگ اڑا جاوے قلق سے جان گھبراوے

دیا ہے دل الٰہی ہم کو یا کوئی بلا دی ہے

درگلزار پیش از صبح وا اے باغباں مت کر

اڑا لیتی ہے مٹی بھی صبا اک چور بادی ہے

کوئی صورت نہیں اس گھر سے اب تیرے نکلنے کی

قیامت کی ہے جن نے آرسی تجھ کو دکھا دی ہے

مجھے منظور کیا ہے زلف و خال و خط خوباں سے

خدا نے دیکھنے کی لت سی آنکھوں کو لگا دی ہے

کجی ذہن اس وادی میں گمراہی کی ہے باعث

سلیم الطبع کو تو پائوں کا ہر نقش ہادی ہے

لگا رہتا ہے سینے ہی سے بیٹھا ہوں کہ سوتا ہوں

غرض چھاتی مری داغ جدائی نے جلا دی ہے

نہ چھوٹا دل میں کچھ اس کے گئے پر غارت غم سے

ہزار افسوس کیا بستی محبت نے لٹا دی ہے

نہ کٹتی ٹک نہ ہوتی گر فقیری ساتھ الفت کے

ہمیں جب ان نے گالی دی ہے تب ہم نے دعا دی ہے

ہوئی ہے دل کی محویت سے یکساں یاں غم و فرحت

نہ ماتم مرنے کا ہے میر نے جینے کی شادی ہے

میر تقی میر

کہ شکل صبح مری سب کو بھول جاتی ہے

اکتوبر 6, 2015میر تقی میر،اساتذہ،غزللگاتی،جلاتی،جاتی،رلاتیadmin

دیوان دوم غزل 1042

یہ رات ہجر کی یاں تک تو دکھ دکھاتی ہے

کہ شکل صبح مری سب کو بھول جاتی ہے

طپش کے دم ہی تئیں مجھ سے ہے یہ خوں گرمی

وگرنہ تیغ تری کب گلے لگاتی ہے

ہنسے ہے چاک قفس کھلکھلا کے مجھ اوپر

چمن کی یاد میں جب بے کلی رلاتی ہے

ہوا ہے میر سے روشن کہ کل جبھی ہے شمع

زباں ہلانے میں پروانے کو جلاتی ہے

میر تقی میر

کیا بدن کا رنگ ہے تہ جس کی پیراہن پہ ہے

اکتوبر 6, 2015میر تقی میر،اساتذہ،غزلچتون،گلخن،گردن،پلٹن،پیراہن،افگن،آہن،دامن،زن،شیونadmin

دیوان دوم غزل 1041

کیا تن نازک ہے جاں کو بھی حسد جس تن پہ ہے

کیا بدن کا رنگ ہے تہ جس کی پیراہن پہ ہے

گرد جب اٹھتی ہے اک حسرت سے رہ جاتے ہیں دیکھ

وحشیان دشت کی آنکھ اس شکار افگن پہ ہے

کثرت پیکاں سے تیرے ہو گئی ہیئت ہی اور

اب شرف دل کو ہمارے پارئہ آہن پہ ہے

کون یوں اے ترک رعنا زینت فتراک تھا

خوں سے گل کاری عجب اک زین کے دامن پہ ہے

سر اٹھانے کی نہیں ہے ہم کو فرصت عشق میں

ہر دم اک تیغ جفاے تازہ یاں گردن پہ ہے

نوحہ گر کر مجھ کو دکھلایا غم دل نے ندان

شیون اب موقوف یاروں کا مرے شیون پہ ہے

ہوچکا رہنا مرا بستی میں آخر کب تلک

نالۂ شب سے قیامت روز مرد و زن پہ ہے

خرمن گل سے لگیں ہیں دور سے کوڑوں کے ڈھیر

لوہو رونے سے ہمارے رنگ اک گلخن پہ ہے

وے پھری پلکیں الٹ دیتی ہیں صف اک آن میں

اب لڑائی ہند میں سب اس سیہ پلٹن پہ ہے

تو تو کہتا ہے کہ میں نے اس طرف دیکھا نہیں

خون ناحق میر کا یہ کس کی پھر چتون پہ ہے

میر تقی میر

ہشیاری کے برابر کوئی نشہ نہیں ہے

اکتوبر 6, 2015میر تقی میر،اساتذہ،غزلہوا،لگا،مدعا،نما،نشہ،انتہا،آشنا،جدا،دوا،رہاadmin

دیوان دوم غزل 1040

ہم مست ہو بھی دیکھا آخر مزہ نہیں ہے

ہشیاری کے برابر کوئی نشہ نہیں ہے

شوق وصال ہی میں جی کھپ گیا ہمارا

باآنکہ ایک دم وہ ہم سے جدا نہیں ہے

ہر صبح اٹھ کے تجھ سے مانگوں ہوں میں تجھی کو

تیرے سوائے میرا کچھ مدعا نہیں ہے

زیر فلک رکا ہے اب جی بہت ہمارا

اس بے فضا قفس میں مطلق ہوا نہیں ہے

آنکھیں ہماری دیکھیں لوگوں نے اشک افشاں

اب چاہ کا کسو کی پردہ رہا نہیں ہے

منھ جن نے میرا دیکھا ایک آہ دل سے کھینچی

اس درد عاشقی کی آیا دوا نہیں ہے

تھیں پیش از آشنائی کیا آشنا نگاہیں

اب آشنا ہوئے پر آنکھ آشنا نہیں ہے

کریے جو ابتدا تو تا حشر حال کہیے

عاشق کی گفتگو کو کچھ انتہا نہیں ہے

پردہ ہی ہم نے دیکھا چہرے پہ گاہ و بے گہ

اتنا بھی منھ چھپانا کچھ خوش نما نہیں ہے

میں روئوں تم ہنسو ہو کیا جانو میر صاحب

دل آپ کا کسو سے شاید لگا نہیں ہے

میر تقی میر

اس میں بھی جو سوچیے سخن ہے

اکتوبر 6, 2015میر تقی میر،اساتذہ،غزلچلن،چمن،وطن،کفن،پن،پیرہن،تن،سخن،شکنadmin

دیوان دوم غزل 1039

کیا کہیے کلی سا وہ دہن ہے

اس میں بھی جو سوچیے سخن ہے

اس گل کو لگے ہے شاخ گل کب

یہ شاخچہ بندی چمن ہے

وابستگی مجھ سے شیشہ جاں کی

اس سنگ سے ہے کہ دل شکن ہے

کیا سہل گذرتی ہے جنوں سے

تحفہ ہم لوگوں کا چلن ہے

لطف اس کے بدن کا کچھ نہ پوچھو

کیا جانیے جان ہے کہ تن ہے

وے بند قبا کھلے تھے شاید

صد چاک گلوں کا پیرہن ہے

گہ دیر میں ہیں گہے حرم میں

اپنا تو یہی دوانہ پن ہے

ہم کشتۂ عشق ہیں ہمارا

میدان کی خاک ہی کفن ہے

کر میر کے حال پر ترحم

وہ شہر غریب و بے وطن ہے

میر تقی میر

بے خود ہیں اس کی آنکھیں ان کو خبر کہاں ہے

اکتوبر 6, 2015میر تقی میر،اساتذہ،غزلقمر،گھر،گر،پہر،پر،ادھر،تر،خبر،زر،سفرadmin

دیوان دوم غزل 1038

مستی میں جا و بے جا مدنظر کہاں ہے

بے خود ہیں اس کی آنکھیں ان کو خبر کہاں ہے

شب چند روز سے میں دیکھا نہیں وہ چہرہ

کچھ سوچ کر منجم بارے قمر کہاں ہے

سیمیں تنوں کا ملنا چاہے ہے کچھ تمول

شاہدپرستیوں کا ہم پاس زر کہاں ہے

جوں آرسی کرے ہے منھ دیکھنے کی باتیں

دل کی توجہ اس کی ہمدم ادھر کہاں ہے

پانی ہو بہ گئے سب اجزا بدن کے لیکن

یوں بھی کہا نہ ان نے وہ چشم تر کہاں ہے

خضر و مسیح سب کو جیتے ہی موت آئی

اور اس مرض کا کوئی اب چارہ گر کہاں ہے

لے اس سرے سے یارو اجڑی ہے اس سرے تک

اقلیم عاشقی میں آباد گھر کہاں ہے

اٹھنے کی اک ہوس ہے ہم کو قفس سے ورنہ

شائستۂ پریدن بازو میں پر کہاں ہے

پیرانہ سر چلے ہیں اٹھ کر گلی سے اس کی

کیا پیش آوے دیکھیں وقت سفر کہاں ہے

جاتا نہیں اگر وہ مسجد سے میکدے کو

پھر میر جمعہ کی شب دو دو پہر کہاں ہے

میر تقی میر

چاک دل پلکوں سے مت سی کہ رفو نازک ہے

اکتوبر 6, 2015میر تقی میر،اساتذہ،غزلگلو،اتو،تو،خو،رفو،رو،سبوadmin

دیوان دوم غزل 1037

رشتہ کیا ٹھہرے گا یہ جیسے کہ مو نازک ہے

چاک دل پلکوں سے مت سی کہ رفو نازک ہے

شاخ گل کاہے کو اس لطف سے لچکے ہے کہیں

لاگ والا کوئی دیکھے تجھے تو نازک ہے

چشم انصاف سے برقع کو اٹھا دیکھو اسے

گل کے منھ سے تو کئی پردہ وہ رو نازک ہے

لطف کیا دیوے تمھیں نقش حصیر درویش

بوریا پوشوں سے پوچھو یہ اتو نازک ہے

بیڑے کھاتا ہے تو آتا ہے نظر پان کا رنگ

کس قدر ہائے رے وہ جلد گلو نازک ہے

گل سمجھ کر نہ کہیں بے کلی کرنے لگیو

بلبل اس لالۂ خوش رنگ کی خو نازک ہے

رکھے تاچند خیال اس سرپرشور کا میر

دل تو کانپا ہی کرے ہے کہ سبو نازک ہے

میر تقی میر

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: