زمرہ جات کے محفوظات: مرزا اسد اللہ خان غالب

فلک کا دیکھنا تقریب تیرے یاد آنے کی

اکتوبر 8, 2015مرزا اسد اللہ خان غالب،اساتذہ،غزلنی،چھپانے،آنے،اٹھانے،بہانے،جلانے،جانےadmin

دیوانِ غالب ۔ غزل نمبر 193

غمِ دنیا سے گر پائی بھی فرصت سر اٹھانے کی

فلک کا دیکھنا تقریب تیرے یاد آنے کی

کھلےگا کس طرح مضموں مرے مکتوب کا یا رب

قسم کھائی ہے اس کافر نے کاغذ کے جلانے کی

لپٹنا پرنیاں میں شعلۂ آتش کا آساں ہے

ولے مشکل ہے حکمت دل میں سوزِ غم چھپانے کی

انہیں منظور اپنے زخمیوں کا دیکھ آنا تھا

اٹھے تھے سیرِ گل کو، دیکھنا شوخی بہانے کی

ہماری سادگی تھی التفاتِ ناز پر مرنا

ترا آنا نہ تھا ظالم مگر تمہید جانے کی

لکد کوبِ حوادث کا تحمّل کر نہیں سکتی

مری طاقت کہ ضامن تھی بتوں کے ناز اٹھانے کی

کہوں کیا خوبیِ اوضاعِ ابنائے زماں غالب

بدی کی اس نے جس سے ہم نے کی تھی بارہا نیکی

مرزا اسد اللہ خان غالب

اور پھر وہ بھی زبانی میری

اکتوبر 8, 2015مرزا اسد اللہ خان غالب،اساتذہ،غزلفشانی،مدانی،نشانی،گرانی،بیانی،بانی،جوانی،روانی،زبانیadmin

دیوانِ غالب ۔ غزل نمبر 192

کب وہ سنتا ہے کہانی میری

اور پھر وہ بھی زبانی میری

خلشِ غمزۂ خوں ریز نہ پوچھ

دیکھ خوں نابہ فشانی میری

کیا بیاں کر کے مرا روئیں گے یار

مگر آشفتہ بیانی میری

ہوں ز خود رفتۂ بیدائے خیال

بھول جانا ہے نشانی میری

متقابل ہے مقابل میرا

رک گیا دیکھ روانی میری

قدرِ سنگِ سرِ رہ رکھتا ہوں

سخت ارزاں ہے گرانی میری

گرد بادِ رہِ بیتابی ہوں

صرصرِ شوق ہے بانی میری

دہن اس کا جو نہ معلوم ہوا

کھل گئی ہیچ مدانی میری

کر دیا ضعف نے عاجز غالب

ننگِ پیری ہے جوانی میری

مرزا اسد اللہ خان غالب

کوئی صورت نظر نہیں آتی

اکتوبر 8, 2015مرزا اسد اللہ خان غالب،اساتذہ،غزلمگر،نظر،کر،گر،پر،ادھر،بھر،خبرadmin

دیوانِ غالب ۔ غزل نمبر 191

کوئی امّید بر نہیں آتی

کوئی صورت نظر نہیں آتی

موت کا ایک دن معین ھے

نیند کیوں رات بھر نہیں آتی؟

آگے آتی تھی حال دل پہ ہنسی

اب کسی بات پر نہیں آتی

جانتا ہوں ثوابِ طاعت و زہد

پر طبیعت ادھر نہیں آتی

ہے کچھ ایسی ہی بات جو چپ ہوں

ورنہ کیا بات کر نہیں آتی

کیوں نہ چیخوں کہ یاد کرتے ہیں

میری آواز گر نہیں آتی

داغِ دل گر نظر نہیں آتا

بو بھی اے چارہ گر نہیں آتی

ہم وہاں ہیں جہاں سے ہم کو بھی

کچھ ہماری خبر نہیں آتی

مرتے ہیں آرزو میں مرنے کی

موت آتی ہے پر نہیں آتی

کعبے کس منہ سے جاؤ گے غالب

شرم تم کو مگر نہیں آتی

مرزا اسد اللہ خان غالب

دونوں کو اک ادا میں رضامند کر گئی

اکتوبر 8, 2015مرزا اسد اللہ خان غالب،اساتذہ،غزلنظر،کتر،کدھر،کر،گزر،پر،بکھر،جگر،سحرadmin

دیوانِ غالب ۔ غزل نمبر 190

دل سے تری نگاہ جگر تک اتر گئی

دونوں کو اک ادا میں رضامند کر گئی

شق ہو گیا ہے سینہ، خوشا لذّتِ فراغ

تکلیفِ پردہ داریِ زخمِ جگر گئی

وہ بادۂ شبانہ کی سر مستیاں کہاں

اٹھیے بس اب کہ لذّتِ خوابِ سحر گئی

اڑتی پھرے ہے خاک مری کوئے یار میں

بارے اب اے ہوا! ہوسِ بال و پر گئی

دیکھو تو دل فریبـئ اندازِ نقشِ پا

موجِ خرامِ یار بھی کیا گل کتر گئی

ہر بوالہوس نے حسن پرستی شعار کی

اب آبروئے شیوہ اہلِ نظر گئی

نظّارے نے بھی کام کِیا واں نقاب کا

مستی سے ہر نگہ ترے رخ پر بکھر گئی

فردا و دی کا تفرِقہ یک بار مٹ گیا

کل تم گئے کہ ہم پہ قیامت گزر گئی

مارا زمانے نے اسدؔاللہ خاں تمہیں

وہ ولولے کہاں وہ جوانی کدھر گئی

مرزا اسد اللہ خان غالب

میرے دکھ کی دوا کرے کوئی

اکتوبر 8, 2015مرزا اسد اللہ خان غالب،اساتذہ،غزلکیا،گلہ،برا،جا،خدا،خطا،دوا،رہنما،روا،سناadmin

دیوانِ غالب ۔ غزل نمبر 189

ابنِ مریم ہوا کرے کوئی

میرے دکھ کی دوا کرے کوئی

شرع و آئین پر مدار سہی

ایسے قاتل کا کیا کرے کوئی

چال جیسے کڑی کمان کا تیر

دل میں ایسے کے جا کرے کوئی

بات پر واں زبان کٹتی ہے

وہ کہیں اور سنا کرے کوئی

بک رہا ہوں جنوں میں کیا کیا کچھ

کچھ نہ سمجھے خدا کرے کوئی

نہ سنو اگر برا کہے کوئی

نہ کہو گر برا کرے کوئی

روک لو گر غلط چلے کوئی

بخش دو گر خطا کرے کوئی

کون ہے جو نہیں ہے حاجت مند

کس کی حاجت روا کرے کوئی

کیا کیا خضر نے سکندر سے

اب کسے رہنما کرے کوئی

جب توقع ہی اٹھ گئی غالبٓ

کیوں کسی کا گلہ کرے کوئی

مرزا اسد اللہ خان غالب

مشکل کہ تجھ سے راہِ سخن وا کرے کوئی

اکتوبر 8, 2015مرزا اسد اللہ خان غالب،اساتذہ،غزللیلی،وا،کیا،پیدا،تمنّا،تماشا،جا،رسوا،سودا،صحراadmin

دیوانِ غالب ۔ غزل نمبر 188

جب تک دہانِ زخم نہ پیدا کرے کوئی

مشکل کہ تجھ سے راہِ سخن وا کرے کوئی

عالم غُبارِ وحشتِ مجنوں ہے سر بسر

کب تک خیالِ طرّۂ لیلیٰ کرے کوئی

افسردگی نہیں طرب انشائے التفات

ہاں درد بن کے دل میں مگر جا کرے کوئی

رونے سے اے ندیم ملامت نہ کر مجھے

آخر کبھی تو عُقدۂ دل وا کرے کوئی

چاکِ جگر سے جب رہِ پرسش نہ وا ہوئی

کیا فائدہ کہ جَیب کو رسوا کرے کوئی

لختِ جگر سے ہے رگِ ہر خار شاخِ گل

تا چند باغبانئِ صحرا کرے کوئی

ناکامئِ نگاہ ہے برقِ نظارہ سوز

تو وہ نہیں کہ تجھ کو تماشا کرے کوئی

ہر سنگ و خشت ہے صدفِ گوہرِ شکست

نقصاں نہیں جنوں سے جو سودا کرے کوئی

سَر بَر ہوئی نہ وعدۂ صبر آزما سے عُمر

فُرصت کہاں کہ تیری تمنّا کرے کوئی

ہے وحشتِ طبیعتِ ایجاد یاس خیز

یہ درد وہ نہیں کہ نہ پیدا کرے کوئی@

بیکارئ جنوں کو ہے سر پیٹنے کا شغل

جب ہاتھ ٹوٹ جائیں تو پھر کیا کرے کوئی

حسنِ فروغِ شمعِ سُخن دور ہے اسدؔ

پہلے دلِ گداختہ پیدا کرے کوئی

@ نوٹ: یہ مصرعہ مختلف نسخوں میں مختلف ہے۔ نسخۂ مہر: یہ درد وہ نہیں ہےکہ پیدا کرے کوئی۔ نسخۂ طاہر: یہ درد وہ نہیں ہے جو پیدا کرے کوئی نسخۂ آسی: یہ درد وہ نہیں کہ نہ پیدا کرے کوئی نسخۂ حمیدیہ: یہ درد وہ نہیں کہ نہ پیدا کرے کوئی

مرزا اسد اللہ خان غالب

ہوا ہے موجبِ آرامِ جان و تن تکیہ

اکتوبر 8, 2015مرزا اسد اللہ خان غالب،اساتذہ،غزلمن،نسترن،کفن،کوہکن،گلبدن،پُرشکن،پرن،انجمن،تن،دمن،سخنadmin

دیوانِ غالب ۔ غزل نمبر 187

شبِ وصال میں مونس گیا ہے بَن تکیہ

ہوا ہے موجبِ آرامِ جان و تن تکیہ

خراج بادشہِ چیں سے کیوں نہ مانگوں آج؟

کہ بن گیا ہے خمِ جعدِ@ پُرشکن تکیہ

بنا ہے تختۂ گل ہائے یاسمیں بستر

ہوا ہے دستۂ نسرین و نسترن تکیہ

فروغِ حسن سے روشن ہے خوابگاہ تمام

جو رختِ خواب ہے پرویں، تو ہے پرن تکیہ

مزا ملے کہو کیا خاک ساتھ سونے کا

رکھے جو بیچ میں وہ شوخِ سیم تن تکیہ

اگرچہ تھا یہ ارادہ مگر خدا کا شکر

اٹھا سکا نہ نزاکت سے گلبدن تکیہ

ہوا ہے کاٹ کے چادر کو ناگہاں غائب

اگر چہ زانوئے نل پر رکھے دمن تکیہ

بضربِ تیشہ وہ اس واسطے ہلاک ہوا

کہ ضربِ تیشہ پہ رکھتا تھا کوہکن تکیہ

یہ رات بھر کا ہے ہنگامہ صبح ہونے تک

رکھو نہ شمع پر اے اہلِ انجمن تکیہ

اگرچہ پھینک دیا تم نے دور سے لیکن

اٹھائے کیوں کہ یہ رنجورِ خستہ تن تکیہ

غش آ گیا جو پس از قتل میرے قاتل کو

ہوئی ہے اس کو مری نعشِ بے کفن تکیہ

شبِ فراق میں یہ حال ہے اذیّت کا

کہ سانپ فرش ہے اور سانپ کا ہے من تکیہ

روارکھونہ رکھو، تھاجو لفظ تکیہ کلام

اب اس کو کہتے ہیں اہلِ سخن "سخن تکیہ”

ہم اور تم فلکِ پیر جس کو کہتے ہیں

فقیر غالب مسکیں کا ہے کہن تکیہ

@ نسخۂ مہر میں دال پر جزم ہے۔

مرزا اسد اللہ خان غالب

جس کی بہار یہ ہو پھر اس کی خزاں نہ پوچھ

اکتوبر 8, 2015مرزا اسد اللہ خان غالب،اساتذہ،غزلہمرہاں،خزاںadmin

دیوانِ غالب ۔ غزل نمبر 186

ہے سبزہ زار ہر در و دیوارِ غم کدہ

جس کی بہار یہ ہو پھر اس کی خزاں نہ پوچھ

ناچار بیکسی کی بھی حسرت اٹھائیے

دشوارئِ رہ و ستمِ ہمرہاں نہ پوچھ

مرزا اسد اللہ خان غالب

جاہ و جلال عہدِ وصالِ بتاں نہ پوچھ

اکتوبر 8, 2015مرزا اسد اللہ خان غالب،اساتذہ،غزلامتحاں،بتاںadmin

دیوانِ غالب ۔ غزل نمبر 185

ہندوستان سایۂ گل پائے تخت تھا

جاہ و جلال عہدِ وصالِ بتاں نہ پوچھ

ہر داغِ تازہ یک دلِ داغ انتظار ہے

عرضِ فضائے سینۂ درد امتحاں نہ پوچھ

مرزا اسد اللہ خان غالب

لبوں پہ جان بھی آجاۓ گی جواب کے ساتھ

اکتوبر 8, 2015مرزا اسد اللہ خان غالب،اساتذہ،غزلجواب،حباب،حجاب،خواب،شبابadmin

دیوانِ غالب ۔ غزل نمبر 184

نہ پوچھ حال اس انداز اس عتاب کے ساتھ

لبوں پہ جان بھی آجاۓ گی جواب کے ساتھ

مجھے بھی تاکہ تمنّا سے ہو نہ مایوسی

ملو رقیب سے لیکن ذرا حجاب کے ساتھ

نـہ ہو بـہ ہـرزہ روادارِ سـعـئ بـے ہـودہ

کہ دورِ عیش ہے مانا خیال و خواب کے ساتھ

بـہ ہر نـمـط غـمِ دل باعـثِ مسـرّت ہے

نموۓ حیرتِ دل ہے ترے شباب کے ساتھ

لـگاؤ اس کا ہـے بـاعـث قــیامِ مسـتی کا

ہَوا کو لاگ بھی ہے کچھ مگر حباب کے ساتھ

ہـزار حـیف کـہ اتنـا نـہیں کـوئ غالب

کہ جاگنے کو ملا دے وے آکے خواب کے ساتھ

نوٹ از مولانا مہر: یہ غزل مولانا عبد الباری آسی کی کتاب سے منقول ہے لیکن اہلِ نظر مجموعۂ آسی میں میں شائع شدہ پورے غیر مطبوعہ کلام کا انتساب صحیح نہیں سمجھتے

مرزا اسد اللہ خان غالب

یعنی ہمارے جیب میں اک تار بھی نہیں

اکتوبر 8, 2015مرزا اسد اللہ خان غالب،اساتذہ،غزلہشیار،یار،گرفتار،آزار،تلوار،تار،خار،دیوار،دیدار،دشوارadmin

دیوانِ غالب ۔ غزل نمبر 183

دیوانگی سے دوش پہ زنّار بھی نہیں

یعنی ہمارے@ جیب میں اک تار بھی نہیں

دل کو نیازِ حسرتِ دیدار کر چکے

دیکھا تو ہم میں طاقتِ دیدار بھی نہیں

ملنا ترا اگر نہیں آساں تو سہل ہے

دشوار تو یہی ہے کہ دشوار بھی نہیں

بے عشق عُمر کٹ نہیں سکتی ہے اور یاں

طاقت بہ قدرِلذّتِ آزار بھی نہیں

شوریدگی کے ہاتھ سے سر ہے وبالِ دوش

صحرا میں اے خدا کوئی دیوار بھی نہیں

گنجائشِ عداوتِ اغیار اک طرف

یاں دل میں ضعف سے ہوسِ یار بھی نہیں

ڈر نالہ ہائے زار سے میرے، خُدا کو مان

آخر نوائے مرغِ گرفتار بھی نہیں

دل میں ہے یار کی صفِ مژگاں سے روکشی

حالانکہ طاقتِ خلشِ خار بھی نہیں

اس سادگی پہ کوں نہ مر جائے اے خُدا!

لڑتے ہیں اور ہاتھ میں تلوار بھی نہیں

دیکھا اسدؔ کو خلوت و جلوت میں بارہا

دیوانہ گر نہیں ہے تو ہشیار بھی نہیں

@ جَیب، جیم پر فتح (زبر) مذکّر ہے، بمعنی گریبان۔ اردو میں جیب، جیم پر کسرہ (زیر) کے ساتھ، بمعنی کیسہ (Pocket) استعمال میں زیادہ ہے، یہ لفظ مؤنث ہےاس باعث اکثر نسخوں میں ’ہماری‘ ہے۔ قدیم املا میں یائے معروف ہی یائے مجہول (بڑی ے)کی جگہ بھی استعمال کی جاتی تھی اس لئے یہ غلط فہمی مزید بڑھ گئی۔

مرزا اسد اللہ خان غالب

ہے گریبان ننگِ پیراہن جو دامن میں نہیں

اکتوبر 8, 2015مرزا اسد اللہ خان غالب،اساتذہ،غزلمدفن،گلخن،گردن،تن،خرمن،دامن،روزن،سوزنadmin

دیوانِ غالب ۔ غزل نمبر 182

آبرو کیا خاک اُس گُل کی، کہ گلشن میں نہیں

ہے گریبان ننگِ پیراہن جو دامن میں نہیں

ضعف سے اے گریہ کچھ باقی مرے تن میں نہیں

رنگ ہو کر اڑ گیا، جو خوں کہ دامن میں نہیں

ہو گئے ہیں جمع اجزائے نگاہِ آفتاب

ذرّے اُس کے گھر کی دیواروں کے روزن میں نہیں

کیا کہوں تاریکئِ زندانِ غم اندھیر ہے

پنبہ نورِ صبح سے کم جس کے روزن میں نہیں

رونقِ ہستی ہے عشقِ خانہ ویراں ساز سے

انجمن بے شمع ہے گر برق خرمن میں نہیں

زخم سِلوانے سے مجھ پر چارہ جوئی کا ہے طعن

غیر سمجھا ہے کہ لذّت زخمِ سوزن میں نہیں

بس کہ ہیں ہم@ اک بہارِ ناز کے مارے ہوُے

جلوۂ گُل کے سِوا گرد اپنے مدفن میں نہیں

قطرہ قطرہ اک ہیولیٰ ہے نئے ناسور کا

خُوں بھی ذوقِ درد سے، فارغ مرے تن میں نہیں

لے گئی ساقی کی نخوت قلزم آشامی مری

موجِ مے کی آج رگ، مینا کی گردن میں نہیں

ہو فشارِ ضعف میں کیا نا توانی کی نمود؟

قد کے جھکنے کی بھی گنجائش مرے تن میں نہیں

تھی وطن میں شان کیا غالب کہ ہو غربت میں قدر

بے تکلّف، ہوں وہ مشتِ خس کہ گلخن میں نہیں

@ نسخۂ مہر اور آسی میں ” ہم ہیں” درج ہے۔

مرزا اسد اللہ خان غالب

سوائے خونِ جگر، سو جگر میں خاک نہیں

اکتوبر 8, 2015مرزا اسد اللہ خان غالب،اساتذہ،غزلہُنر،گھر،گزر،پر،اثر،جگر،درadmin

دیوانِ غالب ۔ غزل نمبر 181

مزے جہان کے اپنی نظر میں خاک نہیں

سوائے خونِ جگر، سو جگر میں خاک نہیں

مگر غبار ہُوے پر ہَوا اُڑا لے جائے

وگرنہ تاب و تواں بال و پر میں خاک نہیں

یہ کس بہشت شمائل کی آمد آمد ہے؟

کہ غیرِ جلوۂ گُل رہ گزر میں خاک نہیں

بھلا اُسے نہ سہی، کچھ مجھی کو رحم آتا

اثر مرے نفسِ بے اثر میں خاک نہیں

خیالِ جلوۂ گُل سے خراب ہیں میکش

شراب خانے کے دیوار و در میں خاک نہیں

ہُوا ہوں عشق کی غارت گری سے شرمندہ

سوائے حسرتِ تعمیر، گھر میں خاک نہیں

ہمارے شعر ہیں اب صرف دل لگی کے اسدؔ

کُھلا، کہ فائدہ عرضِ ہُنر میں خاک نہیں

مرزا اسد اللہ خان غالب

انہیں ہنساکے رلانا بھی کوئ بات نہیں

اکتوبر 8, 2015مرزا اسد اللہ خان غالب،اساتذہ،غزلکائنات،بات،رات،صفاتadmin

دیوانِ غالب ۔ غزل نمبر 180

کرم ہی کچھ سببِ لطف و التفات نہیں

انہیں ہنساکے رلانا بھی کوئ بات نہیں

کہاں سے لاکے دکھاۓ گی عمرِ کم مایہ

سیہ نصیب کو وہ دن کہ جس میں رات نہیں

زبان حمد کی خوگر ہوئ تو کیا حاصل

کہ تیری ذات میں شامل تری صفات نہیں

خوشی، خوشی کو نہ کہہ، غم کو غم نہ جان اسدؔ

قرار داخلِ اجزاۓ کائنات نہیں

مرزا اسد اللہ خان غالب

ایک چکّر ہے مرے پاؤں میں زنجیر نہیں

اکتوبر 8, 2015مرزا اسد اللہ خان غالب،اساتذہ،غزلمیر،تقریر،تقصیر،تاثیر،تصویر،زنجیر،شمشیرadmin

دیوانِ غالب ۔ غزل نمبر 179

مانع دشت نوردی کوئی تدبیر نہیں

ایک چکّر ہے مرے پاؤں میں زنجیر نہیں

شوق اس دشت میں دوڑائے ہے مجھ کو،کہ جہاں

جادہ غیر از نگہِ دیدۂِ تصویر نہیں

حسرتِ لذّتِ آزار رہی جاتی ہے

جادۂ راہِ وفا جز دمِ شمشیر نہیں

رنجِ نو میدیِ جاوید گوارا رہیو

خوش ہوں گر نالہ زبونی کشِ تاثیر نہیں

سر کھجاتا ہے جہاں زخمِ سر اچھا ہو جائے

لذّتِ سنگ بہ اندازۂِ تقریر نہیں

جب کرم رخصتِ بیباکی و گستاخی دے

کوئی تقصیر بجُز خجلتِ تقصیر نہیں

غالب اپنا یہ عقیدہ ہے بقولِ ناسخ

’آپ بے بہرہ ہے جو معتقدِ میر نہیں‘

مرزا اسد اللہ خان غالب

اِک چھیڑ ہے وگرنہ مراد امتحاں نہیں

اکتوبر 8, 2015مرزا اسد اللہ خان غالب،اساتذہ،غزلفشاں،مہرباں،نشاں،گراں،الاَماں،امتحاں،تواں،جاں،خونچکاں،دہاں،درمیاں،زباںadmin

دیوانِ غالب ۔ غزل نمبر 178

ہم پر جفا سے ترکِ وفا کا گماں نہیں

اِک چھیڑ ہے وگرنہ مراد امتحاں نہیں

کس منہ سے شکر کیجئے اس لطف خاص کا

پرسش ہے اور پائے سخن درمیاں نہیں

ہم کو ستم عزیز، ستم گر کو ہم عزیز

نا مہرباں نہیں ہے اگر مہرباں نہیں

بوسہ نہیں، نہ دیجیے دشنام ہی سہی

آخر زباں تو رکھتے ہو تم، گر دہاں نہیں

ہر چند جاں گدازئِ قہروعتاب ہے

ہر چند پشت گرمئِ تاب و تواں نہیں

جاں مطربِ ترانہ ھَل مِن مَزِید ہے

لب پر دہ سنجِ زمزمۂِ الاَماں نہیں

خنجر سے چیر سینہ اگر دل نہ ہو دو نیم

دل میں چُھری چبھو مژہ گر خونچکاں نہیں

ہے ننگِ سینہ دل اگر آتش کدہ نہ ہو

ہے عارِدل نفس اگر آذر فشاں نہیں

نقصاں نہیں جنوں میں بلا سے ہو گھر خراب

سو گز زمیں کے بدلے بیاباں گراں نہیں

کہتے ہو “ کیا لکھا ہے تری سرنوشت میں“

گویا جبیں پہ سجدۂ بت کا نشاں نہیں

پاتا ہوں اس سے داد کچھ اپنے کلام کی

رُوح القُدُس اگرچہ مرا ہم زباں نہیں

جاں ہے بہائے بوسہ ولے کیوں کہے ابھی

غالب کو جانتا ہے کہ وہ نیم جاں نہیں

مرزا اسد اللہ خان غالب

جاں سپاری شجرِ بید نہیں

اکتوبر 8, 2015مرزا اسد اللہ خان غالب،اساتذہ،غزلامّید،بید،بھید،جمشید،جاوید،خورشیدadmin

دیوانِ غالب ۔ غزل نمبر 177

عشق تاثیر سے نومید نہیں

جاں سپاری شجرِ بید نہیں

سلطنت دست بَدَست آئی ہے

جامِ مے خاتمِ جمشید نہیں

ہے تجلی تری سامانِ وجود

ذرّہ بے پر توِ خورشید نہیں

رازِ معشوق نہ رسوا ہو جائے

ورنہ مر جانے میں کچھ بھید نہیں

گردشِ رنگِ طرب سے ڈر ہے

غمِ محرومئ جاوید نہیں

کہتے ہیں جیتے ہیں اُمّید پہ لوگ

ہم کو جینے کی بھی امّید نہیں

مرزا اسد اللہ خان غالب

ہوتی آئی ہے کہ اچھوں کو برا کہتے ہیں

اکتوبر 8, 2015مرزا اسد اللہ خان غالب،اساتذہ،غزلہَوا،نما،نوا،کیا،گیا،برا،خدا،رُبا،رساadmin

دیوانِ غالب ۔ غزل نمبر 176

کی وفا ہم سے تو غیر اس کو جفا کہتے ہیں

ہوتی آئی ہے کہ اچھوں کو برا کہتے ہیں

آج ہم اپنی پریشانئِ خاطر ان سے

کہنے جاتے تو ہیں، پر دیکھئے کیا کہتے ہیں

اگلے وقتوں کے ہیں یہ لوگ، انہیں کچھ نہ کہو

جو مے و نغمہ کو اندوہ رُبا کہتے ہیں

دل میں آ جائے ہے، ہوتی ہے جو فرصت غش سے

اور پھر کون سے نالے کو رسا کہتے ہیں

ہے پرے سرحدِ ادراک سے اپنا مسجود

قبلے کو اہلِ نظر قبلہ نما کہتے ہیں

پائے افگار پہ جب سے تجھے رحم آیا ہے

خارِ رہ کو ترے ہم مہرِ گیا کہتے ہیں

اک شرر دل میں ہے اُس سے کوئی گھبرائے گا کیا

آگ مطلوب ہے ہم کو ،جو ہَوا کہتے ہیں

دیکھیے لاتی ہے اُس شوخ کی نخوت کیا رنگ

اُس کی ہر بات پہ ہم ’نامِ خدا‘ کہتے ہیں

وحشت و شیفتہ اب مرثیہ کہویں شاید

مر گیا غالب آشفتہ نوا، کہتے ہیں

مرزا اسد اللہ خان غالب

کبھی صبا کو کبھی نامہ بر کو دیکھتے ہیں

اکتوبر 8, 2015مرزا اسد اللہ خان غالب،اساتذہ،غزلگہر،گھر،بر،جگرadmin

دیوانِ غالب ۔ غزل نمبر 175

یہ ہم جو ہجر میں دیوار و در کو دیکھتے ہیں

کبھی صبا کو کبھی نامہ بر کو دیکھتے ہیں

وہ آئیں@ گھر میں ہمارے خدا کی قدرت ہے

کبھی ہم ان کو کبھی اپنے گھر کو دیکھتے ہیں

نظر لگے نہ کہیں اُس کے دست و بازو کو

یہ لوگ کیوں مرے زخمِ جگر کو دیکھتے ہیں

ترے جواہرِ طرفِ کُلہ کو کیا دیکھیں

ہم اوجِ طالعِ لعل و گہر کو دیکھتے ہیں

@نسخۂ نظامی میں ’آئے‘

مرزا اسد اللہ خان غالب

خیاباں خیاباں اِرم دیکھتے ہیں

اکتوبر 8, 2015مرزا اسد اللہ خان غالب،اساتذہ،غزلہم،قدم،کم،کرم،اِرم،عدمadmin

دیوانِ غالب ۔ غزل نمبر 174

جہاں تیرا نقشِ قدم دیکھتے ہیں

خیاباں خیاباں اِرم دیکھتے ہیں

دل آشفتگاں خالِ کنجِ دہن کے

سویدا میں سیرِ عدم دیکھتے ہیں

ترے سروِ قامت سے اک قدِ آدم

قیامت کے فتنے کو کم دیکھتے ہیں

تماشا کر اے محوِ آئینہ داری

تجھے کس تمنّا سے ہم دیکھتے ہیں

سراغِ تُفِ نالہ لے داغِ دل سے

کہ شب رَو کا نقشِ قدم دیکھتے ہیں

بنا کر فقیروں کا ہم بھیس غالب

تماشائے اہلِ کرم دیکھتے ہیں

مرزا اسد اللہ خان غالب

ہم بھی مضموں کی ہَوا باندھتے ہیں

اکتوبر 8, 2015مرزا اسد اللہ خان غالب،اساتذہ،غزلہوا،ہَوا،قبا،وفا،حنا،رسا،سروپاadmin

دیوانِ غالب ۔ غزل نمبر 173

تیرے توسن کو صبا باندھتے ہیں

ہم بھی مضموں کی ہَوا باندھتے ہیں

آہ کا کس نے اثر دیکھا ہے

ہم بھی اک اپنی ہوا باندھتے ہیں

تیری فرصت کے مقابل اے عُمر!

برق کو پابہ حنا باندھتے ہیں

قیدِ ہستی سے رہائی معلوم!

اشک کو بے سروپا باندھتے ہیں

نشۂ رنگ سے ہے واشُدِ گل

مست کب بندِ قبا باندھتے ہیں

غلطی ہائے مضامیں مت پُوچھ

لوگ نالے کو رسا باندھتے ہیں

اہلِ تدبیر کی واماندگیاں

آبلوں پر بھی حنا باندھتے ہیں

سادہ پُرکار ہیں خوباں غالب

ہم سے پیمانِ وفا باندھتے ہیں

مرزا اسد اللہ خان غالب

اُور اس کے سواکچھ نہیں معلوم کہ کیا ہیں

اکتوبر 8, 2015مرزا اسد اللہ خان غالب،اساتذہ،غزلفنا،نما،کیا،پا،بقا،بپا،جدا،سا،صداadmin

دیوانِ غالب ۔ غزل نمبر 172

جوں شمع ہم اک سوختہ سامانِ وفا ہیں

اُور اس کے سواکچھ نہیں معلوم کہ کیا ہیں

اک سرحدِ معدوم میں ہستی ہے ہماری

سازِ دل بشکستہ کی بیکار صدا ہیں

جس رخ پہ ہوں ہم، سجدہ اسی رخ پہ ہے واجب

گو قبلہ نہیں ہیں مگر اک قبلہ نما ہیں

مت ہوجیو اے سیلِ فنا ان سے مقابل

جانبازِ الم نقش بہ دامانِ بقا ہیں

پائ ہے جگہ ناصیۂ بادِ صبا پر

خاکستر پروانۂ جانبازِ فنا ہیں

ہر حال میں ہیں مرضئ صیّاد کے تابع

ہم طائرِ پر سوختہ رشتہ بہ پا ہیں

اے وہم طرازانِ مجازی و حقیقی

عشّاق فریبِ حق و باطل سے جدا ہیں

ہم بے خودئ شوق میں کرلیتے ہیں سجدے

یہ ہم سے نہ پوچھو کہ کہاں ناصیہ سا ہیں

اب منتظرِ شوقِ قیامت نہیں غالب

دنیا کے ہر ذرّے میں سو حشر بپا ہیں

مرزا اسد اللہ خان غالب

تعجّب سے وہ بولا یوں بھی ہوتا ہے زمانے میں

اکتوبر 8, 2015مرزا اسد اللہ خان غالب،اساتذہ،غزلہے،آadmin

دیوانِ غالب ۔ غزل نمبر 171

قیامت ہے کہ سن لیلیٰ کا دشتِ قیس میں آنا

تعجّب سے وہ بولا ’یوں بھی ہوتا ہے زمانے میں؟‘

دلِ نازک پہ اس کے رحم آتا ہے مجھے غالب

نہ کر سرگرم اس کافر کو اُلفت آزمانے میں

مرزا اسد اللہ خان غالب

خاک ایسی زندگی پہ کہ پتھر نہیں ہُوں میں

اکتوبر 8, 2015مرزا اسد اللہ خان غالب،اساتذہ،غزلمکرّر،نوکر،کمتر،کافَر،گوھر،پتھر،برابر،ساغرadmin

دیوانِ غالب ۔ غزل نمبر 170

دائم پڑا ہُوا ترے در پر نہیں ہُوں میں

خاک ایسی زندگی پہ کہ پتھر نہیں ہُوں میں

کیوں گردشِ مدام سے گبھرا نہ جائے دل

انسان ہوں پیالہ و ساغر نہیں ہُوں میں

یا رب، زمانہ مجھ کو مٹاتا ہے کس لیے؟

لوحِ جہاں پہ حرفِ مکرّر نہیں ہُوں میں

حد چاہیے سزا میں عقوبت کے واسطے

آخر گناہگار ہُوں کافَر نہیں ہُوں میں

کس واسطے عزیز نہیں جانتے مجھے؟

لعل و زمرّد و زر و گوھر نہیں ہُوں میں

رکھتے ہو تم قدم مری آنکھوں سے کیوں دریغ؟

رتبے میں مہر و ماہ سے کمتر نہیں ہُوں میں؟

کرتے ہو مجھ کو منعِ قدم بوس کس لیے؟

کیا آسمان کے بھی برابر نہیں ہُوں میں؟

غالب وظیفہ خوار ہو دو شاہ کو دعا

وہ دن گئے کہ@ کہتے تھے نوکر نہیں ہُوں میں

@ کچھ نسخوں میں ’جو‘، @ ’ مہر نے پانچویں۔ چھٹے اور ساتویں شعر کو نعتیہ اشعار میں شمار کیا ہے۔‘

مرزا اسد اللہ خان غالب

یہ سُوء ظن ہے ساقئ کوثر کے باب میں

اکتوبر 8, 2015مرزا اسد اللہ خان غالب،اساتذہ،غزلنقاب،باب،تاب،تراب،جناب،حباب،حجاب،حساب،خواب،رکاب،ربابadmin

دیوانِ غالب ۔ غزل نمبر 169

کل کے لئے کر آج نہ خسّت شراب میں

یہ سُوء ظن ہے ساقئ کوثر کے باب میں

ہیں آج کیوں ذلیل کہ کل تک نہ تھی پسند

گستاخئ فرشتہ ہماری جناب میں

جاں کیوں نکلنے لگتی ہے تن سے دمِ سماع

گر وہ صدا سمائی ہے چنگ و رباب میں

رَو میں ہے رخشِ عمر، کہاں دیکھیے تھمے

نے ہاتھ باگ پر ہے نہ پا ہے رکاب میں

اتنا ہی مجھ کو اپنی حقیقت سے بُعد ہے

جتنا کہ وہمِ غیر سے ہُوں پیچ و تاب میں

اصلِ شہود و شاہد و مشہود ایک ہے

حیراں ہوں پھر مشاہدہ ہے کس حساب میں

ہے مشتمل نمُودِ صُوَر پر وجودِ بحر

یاں کیا دھرا ہے قطرہ و موج و حباب میں

شرم اک ادائے ناز ہے اپنے ہی سے سہی

ہیں کتنے بے حجاب کہ ہیں یُوں حجاب میں

آرائشِ جمال سے فارغ نہیں ہنوز

پیشِ نظر ہے آئینہ دائم نقاب میں

ہے غیبِ غیب جس کو سمجھتے ہیں ہم شہود

ہیں خواب میں ہنوز، جو جاگے ہیں خواب میں

غالب ندیمِ دوست سے آتی ہے بوئے دوست

مشغولِ حق ہوں، بندگئ بُو تراب میں

مرزا اسد اللہ خان غالب

شب ہائے ہجر کو بھی رکھوں گر حساب میں

اکتوبر 8, 2015مرزا اسد اللہ خان غالب،اساتذہ،غزلماہتاب،نقاب،آفتاب،اضطراب،باب،تاب،جواب،حساب،خواب،سراب،شراب،عتاب،عزابadmin

دیوانِ غالب ۔ غزل نمبر 168

کب سے ہُوں، کیا بتاؤں جہانِ خراب میں

شب ہائے ہجر کو بھی رکھوں گر حساب میں

ملتی ہے خُوئے یار سے نار التہاب میں

کافر ہوں گر نہ ملتی ہو راحت عزاب میں

تا پھر نہ انتظار میں نیند آئے عمر بھر

آنے کا عہد کر گئے آئے جو خواب میں

قاصد کے آتے آتے خط اک اور لکھ رکھوں

میں جانتا ہوں جو وہ لکھیں گے جواب میں

مجھ تک کب ان کی بزم میں آتا تھا دورِ جام

ساقی نے کچھ ملا نہ دیا ہو شراب میں

جو منکرِ وفا ہو فریب اس پہ کیا چلے

کیوں بدگماں ہوں دوست سے دشمن کے باب میں

میں مضطرب ہُوں وصل میں خوفِ رقیب سے

ڈالا ہے تم کو وہم نے کس پیچ و تاب میں

میں اور حظِّ وصل خدا ساز بات ہے

جاں نذر دینی بھول گیا اضطراب میں

ہے تیوری چڑھی ہوئی اندر نقاب کے

ہے اک شکن پڑی ہوئی طرفِ نقاب میں

لاکھوں لگاؤ ایک چُرانا نگاہ کا

لاکھوں بناؤ ایک بگڑنا عتاب میں

وہ نالہ دل میں خس کے برابر جگہ نہ پائے

جس نالے سے شگاف پڑے آفتاب میں

وہ سحر مدعا طلبی میں کام نہ آئے

جس سِحر سے سفینہ رواں ہو سراب میں

غالب چُھٹی شراب پر اب بھی کبھی کبھی

پیتا ہوں روزِ ابر و شبِ ماہتاب میں

مرزا اسد اللہ خان غالب

ہُوا ہے تارِ اشکِ یاس، رشتہ چشمِ سوزن میں

اکتوبر 8, 2015مرزا اسد اللہ خان غالب،اساتذہ،غزلگلشن،گردن،تن،دامن،روزن،سوزنadmin

دیوانِ غالب ۔ غزل نمبر 167

نہیں ہے رخم کوئی بخیے کے درخُور مرے تن میں

ہُوا ہے تارِ اشکِ یاس، رشتہ چشمِ سوزن میں

ہُوئی ہے مانعِ ذوقِ تماشا، خانہ ویرانی

کفِ سیلاب باقی ہے برنگِ پنبہ روزن میں

ودیعت خانۂ بے دادِ کاوش ہائے مژگاں ہوں

نگینِ نامِ شاہد ہے مرا ہر قطرہ خوں تن میں

بیاں کس سے ہو ظلمت گستری میرے شبستاں کی

شبِ مہ ہو جو رکھ دیں پنبہ دیواروں کے روزن میں

نکو ہش مانعِ بے ربطئ شورِ جنوں آئی

ہُوا ہے خندہ احباب بخیہ جَیب و دامن میں

ہوئے اُس مِہر وَش کے جلوۂ تمثال کے آگے

پَرافشاں جوہرآئینے میں مثلِ ذرّہ روزن میں

نہ جانوں نیک ہُوں یا بد ہُوں، پر صحبت مخالف ہے

جو گُل ہُوں تو ہُوں گلخن میں جو خس ہُوں تو ہُوں گلشن میں

ہزاروں دل دیئے جوشِ جنونِ عشق نے مجھ کو

سیہ ہو کر سویدا ہو گیا ہر قطرہ خوں تن میں

اسدؔ زندانئ تاثیرِ الفت ہائے خوباں ہُوں

خمِ دستِ نوازش ہو گیا ہے طوق گردن میں

مرزا اسد اللہ خان غالب

یاں آ پڑی یہ شرم کہ تکرار کیا کریں

اکتوبر 8, 2015مرزا اسد اللہ خان غالب،اساتذہ،غزلناچار،تکرار،خوارadmin

دیوانِ غالب ۔ غزل نمبر 166

دونوں جہان دے کے وہ سمجھے یہ خوش رہا

یاں آ پڑی یہ شرم کہ تکرار کیا کریں

تھک تھک کے ہر مقام پہ دو چار رہ گئے

تیرا پتہ نہ پائیں تو ناچار کیا کریں؟

کیا شمع کے نہیں ہیں ہوا خواہ اہلِ بزم؟

ہو غم ہی جاں گداز تو غم خوار کیا کریں؟

مرزا اسد اللہ خان غالب

روئیں گے ہم ہزار بار، کوئی ہمیں ستائے کیوں

اکتوبر 8, 2015مرزا اسد اللہ خان غالب،اساتذہ،غزلہائے،چھپائے،پائے،آئے،آزمائے،اُٹھائے،بلائے،جائے،ستائےadmin

دیوانِ غالب ۔ غزل نمبر 165

دل ہی تو ہے نہ سنگ و خشت، درد سے بھر نہ آئے کیوں؟

روئیں گے ہم ہزار بار، کوئی ہمیں ستائے کیوں؟

دَیر نہیں، حرم نہیں، در نہیں، آستاں نہیں

بیٹھے ہیں رہ گزر پہ ہم، غیر @ ہمیں اُٹھائے کیوں؟

جب وہ جمالِ دل فروز، صورتِ مہرِ نیم روز

آپ ہی ہو نظارہ سوز، پردے میں منہ چھپائے کیوں؟

دشنۂ غمزہ جاں ستاں، ناوکِ ناز بے پناہ

تیرا ہی عکس رُخ سہی، سامنے تیرے آئے کیوں؟

قیدِ حیات و بندِ غم اصل میں دونوں ایک ہیں

موت سے پہلے آدمی غم سے نجات پائے کیوں؟

حسن اور اس پہ حسنِ ظن، رہ گئی بوالہوس کی شرم

اپنے پہ اعتماد ہے غیر کو آزمائے کیوں؟

واں وہ غرورِ عزّ و ناز، یاں یہ حجابِ پاس وضع

راہ میں ہم ملیں کہاں، بزم میں وہ بلائے کیوں؟

ہاں وہ نہیں خدا پرست، جاؤ وہ بے وفا سہی

جس کو ہوں دین و دل عزیز اس کی گلی میں جائے کیوں؟

غالب خستہ کے بغیر کون سے کام بند ہیں

روئیے زار زار کیا؟ کیجئے ہائے ہائے کیوں؟

@ کوئی۔ نسخۂ مہر

مرزا اسد اللہ خان غالب

ہے حیا مانعِ اظہار، کہوں یا نہ کہوں

اکتوبر 8, 2015مرزا اسد اللہ خان غالب،اساتذہ،غزلگرفتار،اسرار،اشعار،اظہار،بیزار،خوار،دیوارadmin

دیوانِ غالب ۔ غزل نمبر 164

اپنا احوالِ دلِ زار کہوں یا نہ کہوں

ہے حیا مانعِ اظہار، کہوں یا نہ کہوں

نہیں کرنے کا میں تقریر ادب سے باہر

میں بھی ہوں واقفِ اسرار، کہوں یا نہ کہوں

شکوہ سمجھو اسے یا کوئی شکایت سمجھو

اپنی ہستی سے ہوں بیزار، کہوں یا نہ کہوں

اپنے دل ہی سے میں احوالِ گرفتارئِ دل

جب نہ پاؤں کوئی غم خوار کہوں یا نہ کہوں

دل کے ہاتھوں سے، کہ ہے دشمنِ جانی اپنا

ہوں اک آفت میں گرفتار، کہوں یا نہ کہوں

میں تو دیوانہ ہوں اور ایک جہاں ہے غمّاز

گوش ہیں در پسِ دیوار کہوں یا نہ کہوں

آپ سے وہ مرا احوال نہ پوچھے تو اسدؔ

حسبِ حال اپنے پھر اشعار کہوں یا نہ کہوں

مرزا اسد اللہ خان غالب

گراک ادا ہو تو اُسے اپنی قضا کہوں

اکتوبر 8, 2015مرزا اسد اللہ خان غالب،اساتذہ،غزلقضا،وفا،کیا،ساadmin

دیوانِ غالب ۔ غزل نمبر 163

عہدے سے مدِحناز کے باہر نہ آ سکا

گراک ادا ہو تو اُسے اپنی قضا کہوں

حلقے ہیں چشم ہائے کشادہ بسوئے دل

ہر تارِ زلف کو نگہِ سُرمہ سا کہوں

میں، اور صد ہزار نوائے جگر خراش

تو، اور ایک وہ نہ شنیدن کہ کیا کہوں

ظالم مرے گماں سے مجھے منفعل نہ چاہ

ہَے ہَے خُدا نہ کردہ، تجھے بے وفا کہوں

مرزا اسد اللہ خان غالب

میں دشتِ غم میں آہوئے صیّاد دیدہ ہوں

اکتوبر 8, 2015مرزا اسد اللہ خان غالب،اساتذہ،غزلچیدہ،چکیدہ،ناشنیدہ،چشیدہ،گزیدہ،آفریدہ،بریدہ،برگزیدہ،خریدہ،دیدہadmin

دیوانِ غالب ۔ غزل نمبر 162

ممکن نہیں کہ بھول کے بھی آرمیدہ ہوں

میں دشتِ غم میں آہوئے صیّاد دیدہ ہوں

ہوں دردمند، جبر ہو یا اختیار ہو

گہ نالۂ کشیدہ، گہ اشکِ چکیدہ ہوں

نے سُبحہ سے علاقہ نہ ساغر سے رابطہ@

میں معرضِ مثال میں دستِ بریدہ ہوں

ہوں خاکسار پر نہ کسی سے ہو مجھ کو لاگ

نے دانۂ فتادہ ہوں ،نے دامِ چیدہ ہوں

جو چاہئے، نہیں وہ مری قدر و منزلت

میں یوسفِ بہ قیمتِ اوّل خریدہ ہوں

ہر گز کسی کے دل میں نہیں ہے مری جگہ

ہوں میں کلامِ نُغز، ولے ناشنیدہ ہوں

اہلِ وَرَع کے حلقے میں ہر چند ہوں ذلیل

پر عاصیوں کے زمرے@ میں مَیں برگزیدہ ہوں

ہوں گرمئ نشاطِ تصوّر سے نغمہ سنج

میں عندلیبِ گلشنِ نا آفریدہ ہوں@

جاں لب پہ آئی تو بھی نہ شیریں ہوا دہن

از بسکہ تلخئِ غمِ ہجراں چشیدہ ہوں@

ظاہر ہیں میری شکل سے افسوس کے نشاں

خارِ الم سے پشت بہ دنداں گزیدہ ہوں @

پانی سے سگ گزیدہ ڈرے جس طرح اسدؔ

ڈرتا ہوں آئینے سے کہ مردم گزیدہ ہوں

@ واسطہ۔ نسخۂ مہر @ کچھ نسخوں میں ‘فرقے’ @ مشہور شعر مگر نسخۂ مہر میں درج نہیں@ یہ شعر بھی نسخۂ مہر میں درج نہیں

مرزا اسد اللہ خان غالب

میں گیا وقت نہیں ہوں کہ پھر آ بھی نہ سکوں

اکتوبر 8, 2015مرزا اسد اللہ خان غالب،اساتذہ،غزلکھا،آ،اٹھاadmin

دیوانِ غالب ۔ غزل نمبر 161

مہرباں ہو کے بلالو مجھے، چاہو جس وقت

میں گیا وقت نہیں ہوں کہ پھر آ بھی نہ سکوں

ضعف میں طعنۂ اغیار کا شکوہ کیا ہے

بات کچھ سَر تو نہیں ہے کہ اٹھا بھی نہ سکوں

زہر ملتا ہی نہیں مجھ کو ستمگر، ورنہ

کیا قسم ہے ترے ملنے کی کہ کھا بھی نہ سکوں

مرزا اسد اللہ خان غالب

بوسے کو پُوچھتا ہوں مَیں، منہ سےمجھے بتا کہ یُوں

اکتوبر 8, 2015مرزا اسد اللہ خان غالب،اساتذہ،غزلہوا،مدّعا،کرے،پا،ادا،بتا،دیکھنا،دیا،سُناadmin

دیوانِ غالب ۔ غزل نمبر 160

غنچۂ ناشگفتہ کو دور سے مت دکھا، کہ یُوں

بوسے کو پُوچھتا ہوں مَیں، منہ سےمجھے بتا کہ یُوں

پُرسشِ طرزِ دلبری کیجئے کیا؟ کہ بن کہے

اُس کے ہر اک اشارے سے نکلے ہے یہ ادا کہ یُوں

رات کے وقت مَے پیے ساتھ رقیب کو لیے

آئے وہ یاں خدا کرے، پر نہ خدا کرے کہ یُوں

’غیر سے رات کیا بنی‘ یہ جو کہا تو دیکھیے

سامنے آن بیٹھنا، اور یہ دیکھنا کہ یُوں

بزم میں اُس کے روبرو کیوں نہ خموش بیٹھیے

اُس کی تو خامُشی میں بھی ہے یہی مدّعا کہ یُوں

میں نے کہا کہ “ بزمِ ناز چاہیے غیر سے تہی“

سُن کر ستم ظریف نے مجھ کو اُٹھا دیا کہ یُوں ؟

مجھ سے کہا جو یار نے ’جاتے ہیں ہوش کس طرح‘

دیکھ کے میری بیخودی، چلنے لگی ہوا کہ یُوں

کب مجھے کوئے یار میں رہنے کی وضع یاد تھی

آئینہ دار بن گئی حیرتِ نقشِ پا کہ یُوں

گر ترے دل میں ہو خیال، وصل میں شوق کا زوال

موجِ محیطِ آب میں مارے ہے دست و پا کہ یُوں

جو یہ کہے کہ ریختہ کیوں کر@ ہو رشکِ فارسی

گفتۂ غالب ایک بار پڑھ کے اُسے سُنا کہ یُوں

@ نسخۂ مہر میں ‘کہ’

مرزا اسد اللہ خان غالب

یہ بھی اے چرخِ ستمگار! کروں یا نہ کروں

اکتوبر 8, 2015مرزا اسد اللہ خان غالب،اساتذہ،غزلاقرار،ستمگار،سرکارadmin

دیوانِ غالب ۔ غزل نمبر 159

نالے دل کھول کے دو چار کروں یا نہ کروں

یہ بھی اے چرخِ ستمگار! کروں یا نہ کروں

مجھ کو یہ وہم کہ انکار نہ ہو جاۓ کہیں

ان کو یہ فکر کہ اقرار کروں یا نہ کروں

لطف جب ہو کہ کروں غیر کو بھی میں بدنام

کہیۓ کیا حکم ہے سرکار! کروں یا نہ کروں

مرزا اسد اللہ خان غالب

بارے اپنی بے کسی کی ہم نے پائی داد، یاں

اکتوبر 8, 2015مرزا اسد اللہ خان غالب،اساتذہ،غزلباد،دادadmin

دیوانِ غالب ۔ غزل نمبر 158

دل لگا کر لگ گیا اُن کو بھی تنہا بیٹھنا

بارے اپنی بے کسی کی ہم نے پائی داد، یاں

ہیں زوال آمادہ اجزا آفرینش کے تمام

مہرِ گردوں ہے چراغِ رہگزارِ باد، یاں

مرزا اسد اللہ خان غالب

وہ شب و روز و ماہ و سال کہاں

اکتوبر 8, 2015مرزا اسد اللہ خان غالب،اساتذہ،غزلمال،وبال،اعتدال،جمال،حال،خیال،خال،سالadmin

دیوانِ غالب ۔ غزل نمبر 157

وہ فراق اور وہ وصال کہاں

وہ شب و روز و ماہ و سال کہاں

فرصتِ کاروبارِ شوق کسے

ذوقِ نظارۂ جمال کہاں

دل تو دل وہ دماغ بھی نہ رہا

شورِ سودائے خطّ و خال کہاں

تھی وہ اک شخص کے تصّور سے

اب وہ رعنائیِ خیال کہاں

ایسا آساں نہیں لہو رونا

دل میں طاقت، جگر میں حال کہاں

ہم سے چھوٹا "قمار خانۂ عشق”

واں جو جاویں، گرہ میں مال کہاں

فکر دنیا میں سر کھپاتا ہوں

میں کہاں اور یہ وبال کہاں

مضمحل ہو گئے قویٰ غالب

وہ عناصر میں اعتدال کہاں

مرزا اسد اللہ خان غالب

رکھتا ہے ضد سے کھینچ کے باہر لگن کے پاؤں

اکتوبر 8, 2015مرزا اسد اللہ خان غالب،اساتذہ،غزللگن،چمن،کفن،بدن،تن،زن،سخنadmin

دیوانِ غالب ۔ غزل نمبر 156

دھوتا ہوں جب میں پینے کو اس سیم تن کے پاؤں

رکھتا ہے ضد سے کھینچ کے باہر لگن کے پاؤں

دی سادگی سے جان پڑوں کوہکن کے پاؤں

ہیہات کیوں نہ ٹوٹ گیے پیر زن کے پاؤں

بھاگے تھے ہم بہت، سو، اسی کی سزا ہے یہ

ہو کر اسیر دابتے ہیں راہ زن کے پاؤں

مرہم کی جستجو میں پھرا ہوں جو دور دور

تن سے سوا فِگار ہیں اس خستہ تن کے پاؤں

اللہ رے ذوقِ دشت نوردی کہ بعدِ مرگ

ہلتے ہیں خود بہ خود مرے، اندر کفن کے، پاؤں

ہے جوشِ گل بہار میں یاں تک کہ ہر طرف

اڑتے ہوئے الجھتے ہیں مرغِ چمن کے پاؤں

شب کو کسی کے خواب میں آیا نہ ہو کہیں

دکھتے ہیں آج اس بتِ نازک بدن کے پاؤں

غالب مرے کلام میں کیوں کر مزہ نہ ہو

پیتا ہوں دھو کے خسروِ شیریں سخن کے پاؤں

مرزا اسد اللہ خان غالب

یعنی، بغیر یک دلِ بے مُدعا نہ مانگ

اکتوبر 8, 2015مرزا اسد اللہ خان غالب،اساتذہ،غزلمُدعا،خداadmin

دیوانِ غالب ۔ غزل نمبر 155

گر تُجھ کو ہے یقینِ اجابت ، دُعا نہ مانگ

یعنی، بغیر یک دلِ بے مُدعا نہ مانگ

آتا ہے داغِ حسرتِ دل کا شمار یاد

مُجھ سے مرے گُنہ کا حساب ، اے خدا! نہ مانگ

مرزا اسد اللہ خان غالب

وضع میں گو ہوئی دو سر، تیغ ہے ذوالفقار ایک

اکتوبر 8, 2015مرزا اسد اللہ خان غالب،اساتذہ،غزلمزار،نامدار،چار،یادگار،اعتبار،بار،تار،خمار،خاکسار،ذوالفقار،روزگارadmin

دیوانِ غالب ۔ غزل نمبر 154

دیکھنے میں ہیں گرچہ دو، پر ہیں یہ دونوں یار ایک

وضع میں گو ہوئی دو سر، تیغ ہے ذوالفقار ایک

ہم سخن اور ہم زباں، حضرتِ قاسسم و طباں

ایک تپش@ کا جانشین، درد کی یادگار ایک

نقدِ سخن کے واسطے ایک عیارِ آگہی

شعر کے فن کے واسطے، مایۂ اعتبار ایک

ایک وفا و مہر میں تازگئِ بساطِ دہر

لطف و کرم کے باب میں زینتِ روزگار ایک

گُلکدۂ تلاش کو، ایک ہے رنگ، اک ہے بو

ریختہ کے قماش کو، پود ہے ایک، تار ایک

مملکتِ کمال میں ایک امیرِ نامور

عرصۂ قیل و قال میں، خسروِ نامدار ایک

گلشنِ اتّفاق میں ایک بہارِ بے خزاں

مے کدۂ وفاق میں بادۂ بے خمار ایک

زندۂ شوقِ شعر کو ایک چراغِ انجمن

کُشتۂ ذوقِ شعر کو شمعِ سرِ مزار ایک

دونوں کے دل حق آشنا، دونوں رسول (ص) پر فِدا

ایک مُحبِّ چار یار، عاشقِ ہشت و چار ایک

جانِ وفا پرست کو ایک شمیمِ نو بہار

فرقِ ستیزہ مست کو، ابرِ تگرگِ بار ایک

لایا ہے کہہ کے یہ غزل، شائبۂ رِیا سے دور

کر کے دل و زبان کو غالب خاکسار ایک

@نسخے میں اگرچہ ‘طپش’ ہے لیکن صحیح تپش ہی درست ہونا چاہئے

مرزا اسد اللہ خان غالب

کیا مزا ہوتا ، اگر پتھر میں بھی ہوتا نمک

اکتوبر 8, 2015مرزا اسد اللہ خان غالب،اساتذہ،غزلہوتا،کا،پیدا،پا،اعضا،تھا،جا،دریاadmin

دیوانِ غالب ۔ غزل نمبر 153

زخم پر چھڑکیں کہاں طفلانِ بے پروا نمک

کیا مزا ہوتا ، اگر پتھر میں بھی ہوتا نمک

گردِ راہِ یار ہے سامانِ نازِ زخمِ دل

ورنہ ہوتا ہے جہاں میں کس قدر پیدا نمک

مجھ کو ارزانی رہے ، تجھ کو مبارک ہو جیو

نالۂ بُلبُل کا درد اور خندۂ گُل کا نمک

شورِ جولاں تھا کنارِ بحر پر کس کا کہ آج

گِردِ ساحل ہے بہ زخمِ موجۂ دریا نمک

داد دیتا ہے مرے زخمِ جگر کی ، واہ واہ !

یاد کرتا ہے مجھے ، دیکھے ہے وہ جس جا نمک

چھوڑ کر جانا تنِ مجروحِ عاشق حیف ہے

دل طلب کرتا ہے زخم اور مانگے ہیں اعضا نمک

غیر کی منت نہ کھینچوں گا پَے توفیرِ درد

زخم ، مثلِ خندۂ قاتل ہے سر تا پا نمک

یاد ہیں غالب ! تُجھے وہ دن کہ وجدِ ذوق میں

زخم سے گرتا ، تو میں پلکوں سے چُنتا تھا نمک

مرزا اسد اللہ خان غالب

کون جیتا ہے تری زُلف کے سر ہونے تک

اکتوبر 8, 2015مرزا اسد اللہ خان غالب،اساتذہ،غزلہونےadmin

دیوانِ غالب ۔ غزل نمبر 152

آہ کو چاہیے اِک عُمر اثر ہونے@ تک

کون جیتا ہے تری زُلف کے سر ہونے تک

دامِ ہر موج میں ہے حلقۂ صد کامِ نہنگ

دیکھیں کیا گُزرے ہے قطرے پہ گُہر ہونے تک

عاشقی صبر طلب ، اور تمنّا بیتاب

دل کا کیا رنگ کروں خونِ جگر ہونےتک

ہم نے مانا کہ تغافل نہ کرو گے ، لیکن

خاک ہوجائیں گے ہم، تم کو خبر ہونے تک

پرتوِ خُور سے ، ہے شبنم کو فنا کی تعلیم

میں بھی ہوں ، ایک عنایت کی نظر ہونے تک

یک نظر بیش نہیں فُرصتِ ہستی غافل !

گرمئِ بزم ہے اِک رقصِ شرر ہونے تک

غمِ ہستی کا ، اسدؔ ! کس سے ہو جُز مرگ ، علاج

شمع ہر رنگ میں جلتی ہے سحر ہونے تک

@ اکثر قدیم نسخوں میں ’ہوتے تک‘ ردیف ہے۔ نسخۂ نظامی میں بھی لیکن کیوں کہ نسخۂ حمیدیہ میں مروج قرأت ’ہونے تک‘ ہی دی گئی ہے اس لئے اسی کو قابلِ ترجیح قرار دیا گیا ہے۔

مرزا اسد اللہ خان غالب

اگر شراب نہیں انتظارِ ساغر کھینچ

اکتوبر 8, 2015مرزا اسد اللہ خان غالب،اساتذہ،غزلبستر،جوہر،خنجر،سمندر،ساغرadmin

دیوانِ غالب ۔ غزل نمبر 151

نفَس نہ انجمنِ آرزو سے باہر کھینچ

اگر شراب نہیں انتظارِ ساغر کھینچ

"کمالِ گرمئ سعئ تلاشِ دید” نہ پوچھ

بہ رنگِ خار مرے آئینہ سے جوہر کھینچ

تجھے بہانۂ راحت ہے انتظار اے دل!

کیا ہے کس نے اشارہ کہ نازِ بسترکھینچ

تری طرف ہے بہ حسرت نظارۂ نرگس

بہ کورئ دل و چشمِ رقیب ساغر کھینچ

بہ نیم غمزہ ادا کر حقِ ودیعتِ ناز

نیامِ پردۂ زخمِ جگر سے خنجر کھینچ

مرے قدح میں ہے صہبائے آتشِ پنہاں

بروئے سفرہ کبابِ دلِ سمندر کھینچ

مرزا اسد اللہ خان غالب

یعنی یہ میری آہ کی تاثیر سے نہ ہو

اکتوبر 8, 2015مرزا اسد اللہ خان غالب،اساتذہ،غزلنخچیر،تاثیرadmin

دیوانِ غالب ۔ غزل نمبر 150

واں اس کو ہولِ دل ہے تو یاں میں ہوں شرمسار

یعنی یہ میری آہ کی تاثیر سے نہ ہو

اپنے کو دیکھتا نہیں ذوقِ ستم کو دیکھ

آئینہ تاکہ دیدۂ نخچیر سے نہ ہو

مرزا اسد اللہ خان غالب

ہم سخن کوئی نہ ہو اور ہم زباں کوئی نہ ہو

اکتوبر 8, 2015مرزا اسد اللہ خان غالب،اساتذہ،غزلپاسباں،خواں،زباںadmin

دیوانِ غالب ۔ غزل نمبر 149

رہیے اب ایسی جگہ چل کر جہاں کوئی نہ ہو

ہم سخن کوئی نہ ہو اور ہم زباں کوئی نہ ہو

بے در و دیوار سا اک گھر بنایا چاہیے

کوئی ہم سایہ نہ ہو اور پاسباں کوئی نہ ہو

پڑیے گر بیمار تو کوئی نہ ہو بیمار دار @

اور اگر مر جائیے تو نوحہ خواں کوئی نہ ہو

@قدیم لفظ ’بیماردار‘ ہی تھا بعد میں لفظ ’تیماردار‘ استعمال کیا جانے لگا توجدید نسخوں میں اس لفظ کو تیماردار لکھا گیا۔

مرزا اسد اللہ خان غالب

کیجے ہمارے ساتھ، عداوت ہی کیوں نہ ہو

اکتوبر 8, 2015مرزا اسد اللہ خان غالب،اساتذہ،غزلقیامت،محبّت،وحشت،الفت،خلوت،خجالت،شکایت،عبادت،عبرت،عداوتadmin

دیوانِ غالب ۔ غزل نمبر 148

وارستہ اس سے ہیں کہ محبّت ہی کیوں نہ ہو

کیجے ہمارے ساتھ، عداوت ہی کیوں نہ ہو

چھوڑا نہ مجھ میں ضعف نے رنگ اختلاط کا

ہے دل پہ بار، نقشِ محبّت ہی کیوں نہ ہو

ہے مجھ کو تجھ سے تذکرۂ غیر کا گلہ

ہر چند بر سبیلِ شکایت ہی کیوں نہ ہو

پیدا ہوئی ہے، کہتے ہیں، ہر درد کی دوا

یوں ہو تو چارۂ غمِ الفت ہی کیوں نہ ہو

ڈالا نہ بیکسی نے کسی سے معاملہ

اپنے سے کھینچتا ہوں خجالت ہی کیوں نہ ہو

ہے آدمی بجائے خود اک محشرِ خیال

ہم انجمن سمجھتے ہیں خلوت ہی کیوں نہ ہو

ہنگامۂ زبونئِ ہمّت ہے، انفعال

حاصل نہ کیجے دہر سے، عبرت ہی کیوں نہ ہو

وارستگی بہانۂ بیگانگی نہیں

اپنے سے کر، نہ غیر سے، وحشت ہی کیوں نہ ہو

مٹتا ہے فوتِ فرصتِ ہستی کا غم کوئی ؟

عمرِ عزیز صَرفِ عبادت ہی کیوں نہ ہو

اس فتنہ خو کے در سے اب اٹھتے نہیں اسدؔ

اس میں ہمارے سر پہ قیامت ہی کیوں نہ ہو

مرزا اسد اللہ خان غالب

گر کمیں گاہِ نظر میں دل تماشائ نہ ہو

اکتوبر 8, 2015مرزا اسد اللہ خان غالب،اساتذہ،غزلگیرائ،تماشائ،تنہائ،رسوائ،شکیبائadmin

دیوانِ غالب ۔ غزل نمبر 147

حسنِ بے پروا گرفتارِ خود آرائ نہ ہو

گر کمیں گاہِ نظر میں دل تماشائ نہ ہو

ہیچ ہے تاثیرِ عالم گیرئ ناز و ادا

ذوقِ عاشق گر اسیرِ دامِ گیرائ نہ ہو

خود گدازِ شمع آغازِ فروغِ شمع ہے

سوزشِ غم درپۓ ذوقِ شکیبائ نہ ہو

تار تارِ پیرہن ہے اک رگِ جانِ جنوں

عقلِ غیرت پیشہ حیرت سے تماشائ نہ ہو

بزمِ کثرت عالمِ وحدت ہے بینا کے لۓ

بے نیازِ عشق اسیرِ زورِ تنہائ نہ ہو

ہے محبت رہزنِ ناموسِ انساں اے اسدؔ

قامتِ عاشق پہ کیوں ملبوسِ رسوائ نہ ہو

مرزا اسد اللہ خان غالب

نہ ہو جب دل ہی سینے میں تو پھر منہ میں زباں کیوں ہو

اکتوبر 8, 2015مرزا اسد اللہ خان غالب،اساتذہ،غزلہاں،مہرباں،نہاں،گراں،آسماں،آستاں،آشیاں،امتحاں،داں،درمیاں،زباںadmin

دیوانِ غالب ۔ غزل نمبر 146

کسی کو دے کے دل کوئی نوا سنجِ فغاں کیوں ہو

نہ ہو جب دل ہی سینے میں تو پھر منہ میں زباں کیوں ہو

وہ اپنی خو نہ چھوڑیں گے ہم اپنی وضع کیوں چھوڑیں@

سبک سر بن کے کیا پوچھیں کہ ہم سے سر گراں کیوں ہو

کِیا غم خوار نے رسوا، لگے آگ اس محبّت کو

نہ لاوے تاب جو غم کی، وہ میرا راز داں کیوں ہو

وفا کیسی کہاں کا عشق جب سر پھوڑنا ٹھہرا

تو پھر اے سنگ دل تیرا ہی سنگِ آستاں کیوں ہو

قفس میں مجھ سے رودادِ چمن کہتے نہ ڈر ہمدم

گری ہے جس پہ کل بجلی وہ میرا آشیاں کیوں ہو

یہ کہہ سکتے ہو "ہم دل میں نہیں ہیں” پر یہ بتلاؤ

کہ جب دل میں تمہیں تم ہو تو آنکھوں سے نہاں کیوں ہو

غلط ہے جذبِ دل کا شکوہ دیکھو جرم کس کا ہے

نہ کھینچو گر تم اپنے کو، کشاکش درمیاں کیوں ہو

یہ فتنہ آدمی کی خانہ ویرانی کو کیا کم ہے

ہوئے تم دوست جس کے، دشمن اس کا آسماں کیوں ہو

یہی ہے آزمانا تو ستانا کس کو کہتے ہیں

عدو کے ہو لیے جب تم تو میرا امتحاں کیوں ہو

کہا تم نے کہ کیوں ہو غیر کے ملنے میں رسوائی

بجا کہتے ہو، سچ کہتے ہو، پھر کہیو کہ ہاں کیوں ہو

نکالا چاہتا ہے کام کیا طعنوں سے تُو غالب

ترے بے مہر کہنے سے وہ تجھ پر مہرباں کیوں ہو

@ کچھ نسخوں میں ’وضع کیوں بدلیں‘ ہے۔

مرزا اسد اللہ خان غالب

کہے سے کچھ نہ ہوا، پھر کہو تو کیوں کر ہو

اکتوبر 8, 2015مرزا اسد اللہ خان غالب،اساتذہ،غزلہو،فِرو،وو،کہو،کو،گومگو،جو،خو،دوadmin

دیوانِ غالب ۔ غزل نمبر 145

گئی وہ بات کہ ہو گفتگو تو کیوں کر ہو

کہے سے کچھ نہ ہوا، پھر کہو تو کیوں کر ہو

ہمارے ذہن میں اس فکر کا ہے نام وصال

کہ گر نہ ہو تو کہاں جائیں؟ ہو تو کیوں کر ہو

ادب ہے اور یہی کشمکش، تو کیا کیجے

حیا ہے اور یہی گومگو تو کیوں کر ہو

تمہیں کہو کہ گزارا صنم پرستوں کا

بتوں کی ہو اگر ایسی ہی خو تو کیوں کر ہو

الجھتے ہو تم اگر دیکھتے ہو آئینہ

جو تم سے شہر میں ہوں ایک دو تو کیوں کر ہو

جسے نصیب ہو روزِ سیاہ میرا سا

وہ شخص دن نہ کہے رات کو تو کیوں کر ہو

ہمیں پھر ان سے امید، اور انہیں ہماری قدر

ہماری بات ہی پوچھیں نہ وو تو کیوں کر ہو

غلط نہ تھا ہمیں خط پر گماں تسلّی کا

نہ مانے دیدۂ دیدار جو، تو کیوں کر ہو

بتاؤ اس مژہ کو دیکھ کر کہ مجھ کو قرار

یہ نیش ہو رگِ جاں میں فِرو تو کیوں کر ہو

مجھے جنوں نہیں غالب ولے بہ قولِ حضور@

’فراقِ یار میں تسکین ہو تو کیوں کر ہو‘

@حضور: بہادر شاہ ظفر، اگلا مصرعہ ظفر کا ہی ہے جس کی طرح میں غالب نے درباری مشاعرے کے لئے یہ غزل کہی تھی۔

مرزا اسد اللہ خان غالب

مجھ کو بھی پوچھتے رہو تو کیا گناہ ہو

اکتوبر 8, 2015مرزا اسد اللہ خان غالب،اساتذہ،غزلماہ،نگاہ،گناہ،گواہ،گاہ،بادشاہ،خانقاہadmin

دیوانِ غالب ۔ غزل نمبر 144

تم جانو، تم کو غیر سے جو رسم و راہ ہو

مجھ کو بھی پوچھتے رہو تو کیا گناہ ہو

بچتے نہیں مواخذۂ روزِ حشر سے

قاتل اگر رقیب ہے تو تم گواہ ہو

کیا وہ بھی بے گنہ کش و حق نا شناس@ ہیں

مانا کہ تم بشر نہیں خورشید و ماہ ہو

ابھرا ہوا نقاب میں ہے ان کے ایک تار

مرتا ہوں میں کہ یہ نہ کسی کی نگاہ ہو

جب مے کدہ چھٹا تو پھر اب کیا جگہ کی قید

مسجد ہو، مدرسہ ہو، کوئی خانقاہ ہو

سنتے ہیں جو بہشت کی تعریف، سب درست

لیکن خدا کرے وہ ترا جلوہ گاہ ہو

غالب بھی گر نہ ہو تو کچھ ایسا ضرر نہیں

دنیا ہو یا رب اور مرا بادشاہ ہو

@حق ناسپاس نسخۂ نظامی میں ہےٍ، حق نا شناس۔ حسرت، مہراور عرشی میں۔ ’ناسپاس‘ کتابت کی غلطی بھی ممکن ہے۔

مرزا اسد اللہ خان غالب

کہ چشمِ تنگ شاید کثرتِ نظّارہ سے وا ہو

اکتوبر 8, 2015مرزا اسد اللہ خان غالب،اساتذہ،غزلفرسا،وا،دریاadmin

دیوانِ غالب ۔ غزل نمبر 143

حسد سے دل اگر افسردہ ہے، گرمِ تماشا ہو

کہ چشمِ تنگ شاید کثرتِ نظّارہ سے وا ہو

بہ قدرِ حسرتِ دل چاہیے ذوقِ معاصی بھی

بھروں یک گوشۂ دامن گر آبِ ہفت دریا ہو

اگر وہ سرو قد گرمِ خرامِ ناز آ جاوے

کفِ ہر خاکِ گلشن، شکلِ قمری، نالہ فرسا ہو

مرزا اسد اللہ خان غالب

صد رہ آہنگِ زمیں بوسِ قدم ہے ہم کو

اکتوبر 8, 2015مرزا اسد اللہ خان غالب،اساتذہ،غزلہم،قدم،قسم،کم،کرم،اہم،حرم،دم،رم،سَم،ستمadmin

دیوانِ غالب ۔ غزل نمبر 142

واں پہنچ کر جو غش آتا پئے ہم ہے ہم کو

صد رہ آہنگِ زمیں بوسِ قدم ہے ہم کو

دل کو میں اور مجھے دل محوِ وفا رکھتا ہے

کس قدر ذوقِ گرفتاریِ ہم ہے ہم کو

ضعف سے نقشِ پئے مور، ہے طوقِ گردن

ترے کوچے سے کہاں طاقتِ رم ہے ہم کو

جان کر کیجے تغافل کہ کچھ امّید بھی ہو

یہ نگاہِ غلط انداز تو سَم ہے ہم کو

رشکِ ہم طرحی و دردِ اثرِ بانگِ حزیں

نالۂ مرغِ سحر تیغِ دو دم ہے ہم کو

سر اڑانے کے جو وعدے کو مکرّر چاہا

ہنس کے بولے کہ ’ترے سر کی قسم ہے ہم کو!‘

دل کے خوں کرنے کی کیا وجہ؟ ولیکن ناچار

پاسِ بے رونقیِ دیدہ اہم ہے ہم کو

تم وہ نازک کہ خموشی کو فغاں کہتے ہو

ہم وہ عاجز کہ تغافل بھی ستم ہے ہم کو

لکھنؤ آنے کا باعث نہیں کھلتا یعنی

ہوسِ سیر و تماشا، سو وہ کم ہے ہم کو

مقطعِ سلسلۂ شوق نہیں ہے یہ شہر

عزمِ سیرِ نجف و طوفِ حرم ہے ہم کو

لیے جاتی ہے کہیں ایک توقّع غالب

جادۂ رہ کششِ کافِ کرم ہے ہم کو

مرزا اسد اللہ خان غالب

ہو گۓ سب ستم و جَور گوارا ہم کو

اکتوبر 8, 2015مرزا اسد اللہ خان غالب،اساتذہ،غزلکنارا،گوارا،پکارا،ابھارا،اشارہ،دوباراadmin

دیوانِ غالب ۔ غزل نمبر 141

وضعِ نیرنگئ آفاق نے مارا ہم کو

ہو گۓ سب ستم و جَور گوارا ہم کو

دشتِ وحشت میں نہ پایا کسی صورت سے سراغ

گردِ جولانِ جنوں تک نے پکارا ہم کو

عجز ہی اصل میں تھا حاملِ صد رنگِ عروج

ذوقِ پستـئ مصیبت نے ابھارا ہم کو

ضعف مشغول ہے بیکار بہ سعئ بیجا

کرچکا جوشِ جنوں اب تو اشارہ ہم کو

صورِ محشر کی صدا میں ہے افسونِ امّید

خواہشِ زیست ہوئ آج دوبارا ہم کو

تختۂ گور سفینے کے مماثل ہے اسدؔ

بحرِ غم کا نظر آتا ہے کنارا ہم کو

مرزا اسد اللہ خان غالب

مرا ہونا برا کیا ہے نوا سنجانِ گلشن کو

اکتوبر 8, 2015مرزا اسد اللہ خان غالب،اساتذہ،غزلمعدن،گلشن،گردن،آہن،بہمن،برہمن،توسن،خرمن،دامن،دشمن،رہزن،سوزنadmin

دیوانِ غالب ۔ غزل نمبر 140

قفس میں ہوں گر اچّھا بھی نہ جانیں میرے شیون کو

مرا ہونا برا کیا ہے نوا سنجانِ گلشن کو

نہیں گر ہمدمی آساں، نہ ہو، یہ رشک کیا کم ہے

نہ دی ہوتی خدا یا آرزوئے دوست، دشمن کو

نہ نکلا آنکھ سے تیری اک آنسو اس جراحت پر

کیا سینے میں جس نے خوں چکاں مژگانِ سوزن کو

خدا شرمائے ہاتھوں کو کہ رکھتے ہیں کشاکش میں

کبھی میرے گریباں کو کبھی جاناں کے دامن کو

ابھی ہم قتل گہ کا دیکھنا آساں سمجھتے ہیں

نہیں دیکھا شناور جوئے خوں میں تیرے توسن کو

ہوا چرچا جو میرے پاؤں کی زنجیر بننے کا

کیا بیتاب کاں میں جنبشِ جوہر نے آہن کو

خوشی کیا، کھیت پر میرے، اگر سو بار ابر آوے

سمجھتا ہوں کہ ڈھونڈے ہے ابھی سے برق خرمن کو

وفاداری بہ شرطِ استواری اصلِ ایماں ہے

مَرے بت خانے میں تو کعبے میں گاڑو برہمن کو

شہادت تھی مری قسمت میں جو دی تھی یہ خو مجھ کو

جہاں تلوار کو دیکھا، جھکا دیتا تھا گردن کو

نہ لٹتا دن کو تو کب رات کو یوں بے خبر سوتا

رہا کھٹکا نہ چوری کا دعا دیتا ہوں رہزن کو

سخن کیا کہہ نہیں سکتے کہ جویا ہوں جواہر کے

جگر کیا ہم نہیں رکھتے کہ کھودیں جا کے معدن کو

مرے شاہ سلیماں جاہ سے نسبت نہیں غالب

فریدون و جم و کیخسرو و داراب و بہمن کو

مرزا اسد اللہ خان غالب

بھولا ہوں حقِّ صحبتِ اہلِ کُنِشت کو

اکتوبر 8, 2015مرزا اسد اللہ خان غالب،اساتذہ،غزلکُنِشت،کشت،بہشت،سرنوشتadmin

دیوانِ غالب ۔ غزل نمبر 139

کعبے میں جا رہا، تو نہ دو طعنہ، کیا کہیں

بھولا ہوں حقِّ صحبتِ اہلِ کُنِشت کو

طاعت میں تا رہے نہ مے و انگبیں کی لاگ

دوزخ میں ڈال دو کوئی لے کر بہشت کو

ہوں منحرف نہ کیوں رہ و رسمِ ثواب سے

ٹیڑھا لگا ہے قط قلمِ سرنوشت کو

غالب کچھ اپنی سعی سے لہنا@ نہیں مجھے

خرمن جلے اگر نہ مَلخ کھائے کشت کو

مرزا اسد اللہ خان غالب

بناۓ خندۂ عشرت ہے بر بِناۓ چمن

اکتوبر 8, 2015مرزا اسد اللہ خان غالب،اساتذہ،غزلفضاۓ،ماجراۓ،گداۓ،پاۓ،بہاۓ،بِناۓ،صداۓadmin

دیوانِ غالب ۔ غزل نمبر 138

خزینہ دارِ محبت ہوئ ہواۓ چمن

بناۓ خندۂ عشرت ہے بر بِناۓ چمن

بہ ہرزہ سنجئ گلچیں نہ کھا فریبِ نظر

ترے خیال کی وسعت میں ہے فضاۓ چمن

یہ نغمۂ سنجئ بلبل متاعِ زحمت ہے

کہ گوشِ گل کو نہ راس آۓ گی صداۓ چمن

صداۓ خندۂ گل تا قفس پہنچتی ہے

نسیمِ صبح سے سنتا ہوں ماجراۓ چمن

گل ایک کاسۂ دریـوزۂ مسرّت ہے

کہ عندلیبِ نواسنج ہے گداۓ چمن

حریفِ نالۂ پرورد ہے، تو ہو، پھر بھی

ہے اک تبسّمِ پنہاں ترا بہاۓ چمن

بـہـار راہ رو جـادۂ فنـا ہـے اسدؔ

گلِ شگفتہ ہیں گویا کہ نقشِ پاۓ چمن

مرزا اسد اللہ خان غالب

کھِل گئی ماندِ گلُ سوَ جا سے دیوارِ چمن

اکتوبر 8, 2015مرزا اسد اللہ خان غالب،اساتذہ،غزلگرفتار،دیوارadmin

دیوانِ غالب ۔ غزل نمبر 137

برشکالِ@ گریۂ عاشق ہے@ دیکھا چاہئے

کھِل گئی ماندِ گلُ سوَ جا سے دیوارِ چمن

اُلفتِ گل سے غلط ہے دعوئ وارستگی

سرو ہے باوصفِ آزادی گرفتارِ چمن

ہے نزاکت بس کہ فصلِ گل میں معمارِ چمن

قالبِ گل میں ڈھلی ہے خشتِ دیوارِ چمن

@ ’طباطبائ میں ہے کی جگہ ’بھی‘ ہے۔

مرزا اسد اللہ خان غالب

ورنہ ہم چھیڑیں گے رکھ کر عُذرِ مستی ایک دن

اکتوبر 8, 2015مرزا اسد اللہ خان غالب،اساتذہ،غزلمستی،پستی،دستی،زندگیadmin

دیوانِ غالب ۔ غزل نمبر 136

ہم سے کھل جاؤ بوقتِ مے پرستی ایک دن

ورنہ ہم چھیڑیں گے رکھ کر عُذرِ مستی ایک دن

غرّۂِ اوجِ بِنائے عالمِ امکاں نہ ہو

اِس بلندی کے نصیبوں میں ہے پستی ایک دن

قرض کی پیتے تھے مے لیکن سمجھتے تھے کہ ہاں

رنگ لائے گی ہماری فاقہ مستی ایک دن

نغمہ ہائے غم کو ہی اے دل غنیمت جانیے

بے صدا ہو جائے گا یہ سازِ زندگی ایک دن

دَھول دَھپّا اُس سراپا ناز کا شیوہ نہیں

ہم ہی کر بیٹھے تھے غالب پیش دستی ایک دن

مرزا اسد اللہ خان غالب

عبث محفل آرائے رفتار ہیں ہم

اکتوبر 8, 2015مرزا اسد اللہ خان غالب،اساتذہ،غزللاچار،گار،خار،رفتارadmin

دیوانِ غالب ۔ غزل نمبر 135

رسیدن گلِ باغ واماندگی ہے

عبث محفل آرائے رفتار ہیں ہم

تماشائے گلشن تماشائے چیدن

بہار آفرینا! گنہ گار ہیں ہم

نہ ذوقِ گریباں، نہ پروائے داماں

نگاہ آشنائے گل و خار ہیں ہم

اسدؔ شکوہ کفرِ دعا ناسپاسی

ہجومِ تمنّا سے لاچار ہیں ہم

مرزا اسد اللہ خان غالب

برق سے کرتے ہیں روشن، شمعِ ماتم خانہ ہم

اکتوبر 8, 2015مرزا اسد اللہ خان غالب،اساتذہ،غزلمردانہ،پروانہ،خانہadmin

دیوانِ غالب ۔ غزل نمبر 134

غم نہیں ہوتا ہے آزادوں کو بیش از یک نفس

برق سے کرتے ہیں روشن، شمعِ ماتم خانہ ہم

محفلیں برہم کرے ہے گنجفہ بازِ خیال

ہیں ورق گردانــئ نیرنگِ یک بت خانہ ہم

باوجودِ یک جہاں ہنگامہ پیرا ہی نہیں

ہیں "چراغانِ شبستانِ دلِ پروانہ” ہم

ضعف سے ہے، نے قناعت سے یہ ترکِ جستجو

ہیں "وبالِ تکیہ گاہِ ہِمّتِ مردانہ” ہم

دائم الحبس اس میں ہیں لاکھوں تمنّائیں اسدؔ

جانتے ہیں سینۂ پُر خوں کو زنداں خانہ ہم

مرزا اسد اللہ خان غالب

رکھ لی مرے خدا نے مری بےکسی کی شرم

اکتوبر 8, 2015مرزا اسد اللہ خان غالب،اساتذہ،غزلوارستگی،بےکسیadmin

دیوانِ غالب ۔ غزل نمبر 133

مجھ کو دیارِ غیر میں مارا، وطن سے دور

رکھ لی مرے خدا نے مری بےکسی کی شرم

وہ حلقۂ ہائے زلف، کمیں میں ہیں اے خدا

رکھ لیجو میرے دعوۂ وارستگی کی شرم

مرزا اسد اللہ خان غالب

بُلبُل کے کاروبارپہ ہیں خندہ ہائے گُل

اکتوبر 8, 2015مرزا اسد اللہ خان غالب،اساتذہ،غزلہوائے،ہائے،قفائے،قبائے،نوائے،پائے،ادائے،سائےadmin

دیوانِ غالب ۔ غزل نمبر 132

ہے کس قدر ہلاکِ فریبِ وفائے گُل

بُلبُل کے کاروبارپہ ہیں خندہ ہائے گُل

آزادئ نسـیم مبارک کہ ہـر طـرف

ٹوٹے پڑے ہیں حلقۂ دامِ ہوائے گُل

جو تھا ، سو موجِ رنگ کے دھوکے میں مر گیا

اے وائے ، نالۂ لبِ خونیں نوائے گُل !

خوش حال اُس حریفِ سیہ مست کا، کہ جو

رکھتا ہو مثلِ سایۂ گُل ، سر بہ پائے گُل

ایجاد کرتی ہے اُسے تیرے لیے بہار

میرا رقیب ہے نَفَسِ عطر سائے گُل

شرمندہ رکھتے ہیں مجھے بادِ بہار سے

مینائے بے شراب و دلِ بے ہوائے گُل

سطوت سے تیرے جلوۂ حُسنِ غیور کی

خوں ہے مری نگاہ میں رنگِ ادائے گُل

تیرے ہی جلوے کا ہے یہ دھوکا کہ آج تک

بے اختیار دوڑے ہے گُل در قفائے گُل

غالب ! مجھے ہے اُس سے ہم آغوشی آرزو

جس کا خیال ہے گُلِ جیبِ قبائے گُل

مرزا اسد اللہ خان غالب

مجبور یاں تلک ہوئے اے اختیار ، حیف

اکتوبر 8, 2015مرزا اسد اللہ خان غالب،اساتذہ،غزلاختیار،بارadmin

دیوانِ غالب ۔ غزل نمبر 131

بیمِ رقیب سے نہیں کرتے وداعِ ہوش

مجبور یاں تلک ہوئے اے اختیار ، حیف !

جلتا ہے دل کہ کیوں نہ ہم اِک بار جل گئے

اے ناتمامیِ نَفَسِ شعلہ بار حیف !

مرزا اسد اللہ خان غالب

ہوئی ہے آتشِ گُل آبِ زندگانیِ شمع

اکتوبر 8, 2015مرزا اسد اللہ خان غالب،اساتذہ،غزلناتوانی،پرفشانی،بدگمانی،خوانی،خزانی،زندگانی،زبانیadmin

دیوانِ غالب ۔ غزل نمبر 130

رُخِ نگار سے ہے سوزِ جاودانیِ شمع

ہوئی ہے آتشِ گُل آبِ زندگانیِ شمع

زبانِ اہلِ زباں میں ہے مرگِ خاموشی

یہ بات بزم میں روشن ہوئی زبانیِ شمع

کرے ہے صِرف بہ ایمائے شعلہ قصہ تمام

بہ طرزِ اہلِ فنا ہے فسانہ خوانیِ شمع

غم اُس کو حسرتِ پروانہ کا ہے اے شعلہ@

ترے لرزنے سے ظاہر ہے ناتوانیِ شمع

ترے خیال سے رُوح اہتــزاز کرتی ہے

بہ جلوہ ریـزئ باد و بہ پرفشانیِ شمع

نشاطِ داغِ غمِ عشق کی بہار نہ پُوچھ

شگفتگی ہے شہیدِ گُلِ خزانیِ شمع

جلے ہے ، دیکھ کے بالینِ یار پر مجھ کو

نہ کیوں ہو دل پہ مرے داغِ بدگمانیِ شمع

@ نسخۂ مہر میں” شعلہ” ، نسخہ آسی میں شعلے۔ شعلہ زیادہ صحیح ہے

مرزا اسد اللہ خان غالب

دامِ خالی ، قفَسِ مُرغِ گِرفتار کے پاس

اکتوبر 8, 2015مرزا اسد اللہ خان غالب،اساتذہ،غزلگِرفتار،آزار،بیمار،خار،دِیوار،دستار،غمخوارadmin

دیوانِ غالب ۔ غزل نمبر 129

مُژدہ ، اے ذَوقِ اسیری ! کہ نظر آتا ہے

دامِ خالی ، قفَسِ مُرغِ گِرفتار کے پاس

جگرِ تشنۂ آزار ، تسلی نہ ہوا

جُوئے خُوں ہم نے بہائی بُنِ ہر خار کے پاس

مُند گئیں کھولتے ہی کھولتے آنکھیں ہَے ہَے!

خُوب وقت آئے تم اِس عاشقِ بیمار کے پاس

مَیں بھی رُک رُک کے نہ مرتا ، جو زباں کے بدلے

دشنہ اِک تیز سا ہوتا مِرے غمخوار کے پاس

دَہَنِ شیر میں جا بیٹھیے ، لیکن اے دل

نہ کھڑے ہوجیے خُوبانِ دل آزار کے پاس

دیکھ کر تجھ کو ، چمن بسکہ نُمو کرتا ہے

خُود بخود پہنچے ہے گُل گوشۂ دستار کے پاس

مر گیا پھوڑ کے سر غالب وحشی ، ہَے ہَے !

بیٹھنا اُس کا وہ ، آ کر ، تری دِیوار کے پاس

مرزا اسد اللہ خان غالب

کیا نہیں ہے مجھے ایمان عزیز

اکتوبر 8, 2015مرزا اسد اللہ خان غالب،اساتذہ،غزلپیکان،ایمان،جانadmin

دیوانِ غالب ۔ غزل نمبر 128

کیوں کر اس بت سے رکھوں جان عزیز!

کیا نہیں ہے مجھے ایمان عزیز!

دل سے نکلا، پہ نہ نکلا دل سے

ہے ترے تیر کا پیکان عزیز

تاب لاتے ہی بنے گی غالب

واقعہ سخت ہے اور جان عزیز

مرزا اسد اللہ خان غالب

ہے داغِ عشق، زینتِ جیبِ کفن ہنوز

اکتوبر 8, 2015مرزا اسد اللہ خان غالب،اساتذہ،غزلفن،کفنadmin

دیوانِ غالب ۔ غزل نمبر 127

فارغ مجھے نہ جان کہ مانندِ صبح و مہر

ہے داغِ عشق، زینتِ جیبِ کفن ہنوز

ہے نازِ مفلساں "زرِ ا ز دست رفتہ” پر

ہوں "گل فروِشِ شوخئ داغِ کہن” ہنوز

مے خانۂ جگر میں یہاں خاک بھی نہیں

خمیازہ کھینچے ہے بتِ بیدادِ فن ہنوز

مرزا اسد اللہ خان غالب

گزرے ہے آبلہ پا ابرِ گہربار ہنوز

اکتوبر 8, 2015مرزا اسد اللہ خان غالب،اساتذہ،غزلگہربار،رفتارadmin

دیوانِ غالب ۔ غزل نمبر 126

وسعتِ سعیِ کرم دیکھ کہ سر تا سرِ خاک

گزرے ہے آبلہ پا ابرِ گہربار ہنوز

یک قلم کاغذِ آتش زدہ ہے صفحۂ دشت

نقشِ پا میں ہے تپِ گرمئ رفتار ہنوز

مرزا اسد اللہ خان غالب

جانے گا اب بھی تو نہ مرا گھر کہے بغیر

اکتوبر 8, 2015مرزا اسد اللہ خان غالب،اساتذہ،غزلمکرّر،کیونکر،کافَر،گھر،گر،پر،خنجر،ساغرadmin

دیوانِ غالب ۔ غزل نمبر 125

گھر جب بنا لیا ترے در پر کہے بغیر

جانے گا اب بھی تو نہ مرا گھر کہے بغیر؟

کہتے ہیں جب رہی نہ مجھے طاقتِ سخن

’جانوں کسی کے دل کی میں کیونکر کہے بغیر‘

کام اس سے آ پڑا ہے کہ جس کا جہان میں

لیوے نہ کوئی نام ستم گر کہے بغیر

جی میں ہی کچھ نہیں ہے ہمارے وگرنہ ہم

سر جائے یا رہے، نہ رہیں پر کہے بغیر

چھوڑوں گا میں نہ اس بتِ کافر کا پوجنا

چھوڑے نہ خلق گو مجھے کافَر کہے بغیر

مقصد ہے ناز و غمزہ ولے گفتگو میں کام

چلتا نہیں ہے دُشنہ و خنجر کہے بغیر

ہر چند ہو مشاہدۂ حق کی گفتگو

بنتی نہیں ہے بادہ و ساغر کہے بغیر

بہرا ہوں میں، تو چاہیئے، دونا ہوں التفات

سنتا نہیں ہوں بات مکرّر کہے بغیر

غالب نہ کر حضور میں تو بار بار عرض

ظاہر ہے تیرا حال سب اُن پر کہے بغیر

مرزا اسد اللہ خان غالب

جلتا ہوں اپنی طاقتِ دیدار دیکھ کر

اکتوبر 8, 2015مرزا اسد اللہ خان غالب،اساتذہ،غزلہموار،آزار،تلوار،خوار،خار،خریدار،دیوار،دیدار،رفتار،زنگار،شرربارadmin

دیوانِ غالب ۔ غزل نمبر 124

کیوں جل گیا نہ، تابِ رخِ یار دیکھ کر

جلتا ہوں اپنی طاقتِ دیدار دیکھ کر

آتش پرست کہتے ہیں اہلَ جہاں مجھے

سرگرمِ نالہ ہائے شرربار دیکھ کر

کیا آبروئے عشق، جہاں عام ہو جفا

رکتا ہوں تم کو بے سبب آزار دیکھ کر

آتا ہے میرے قتل کو پَر جوشِ رشک سے

مرتا ہوں اس کے ہاتھ میں تلوار دیکھ کر

ثابت ہوا ہے گردنِ مینا پہ خونِ خلق

لرزے ہے موجِ مے تری رفتار دیکھ کر

وا حسرتا کہ یار نے کھینچا ستم سے ہاتھ

ہم کو حریصِ لذّتِ آزار دیکھ کر

بِک جاتے ہیں ہم آپ، متاعِ سخن کے ساتھ

لیکن عیارِ طبعِ خریدار دیکھ کر

زُنّار باندھ، سبحۂ صد دانہ توڑ ڈال

رہرو چلے ہے راہ کو ہموار دیکھ کر

ان آبلوں سے پاؤں کے گھبرا گیا تھا میں

جی خوش ہوا ہے راہ کو پُر خار دیکھ کر

کیا بد گماں ہے مجھ سے، کہ آئینے میں مرے

طوطی کا عکس سمجھے ہے زنگار دیکھ کر

گرنی تھی ہم پہ برقِ تجلّی، نہ طو ر پر

دیتے ہیں بادہ’ ظرفِ قدح خوار’ دیکھ کر

سر پھوڑنا وہ! ‘غالب شوریدہ حال’ کا

یاد آگیا مجھے تری دیوار دیکھ کر

مرزا اسد اللہ خان غالب

گریباں چاک کا حق ہو گیا ہے میری گردن پر

اکتوبر 8, 2015مرزا اسد اللہ خان غالب،اساتذہ،غزلگلخن،گردن،تپیدن،رہزن،روزنadmin

دیوانِ غالب ۔ غزل نمبر 123

جنوں کی دست گیری کس سے ہو گر ہو نہ عریانی

گریباں چاک کا حق ہو گیا ہے میری گردن پر

بہ رنگِ کاغذِ آتش زدہ نیرنگِ بے تابی

ہزار آئینہ دل باندھے ہے بالِ یک تپیدن پر

فلک سے ہم کو عیشِ رفتہ کا کیا کیا تقاضا ہے

متاعِ بُردہ کو سمجھے ہوئے ہیں قرض رہزن پر

ہم اور وہ بے سبب "رنج آشنا دشمن” کہ رکھتا ہے

شعاعِ مہر سے تُہمت نگہ کی چشمِ روزن پر

فنا کو سونپ گر مشتاق ہے اپنی حقیقت کا

فروغِ طالعِ خاشاک ہے موقوف گلخن پر

اسدؔ بسمل ہے کس انداز کا، قاتل سے کہتا ہے

’تو مشقِ ناز کر، خونِ دو عالم میری گردن پر‘

مرزا اسد اللہ خان غالب

میں ہوں وہ قطرۂ شبنم کہ ہو خارِ بیاباں پر

اکتوبر 8, 2015مرزا اسد اللہ خان غالب،اساتذہ،غزلگلِستاں،گریباں،بیاباں،داں،دبستاں،زنداں،شہیداں،عنواںadmin

دیوانِ غالب ۔ غزل نمبر 122

لرزتا ہے مرا دل زحمتِ مہرِ درخشاں پر

میں ہوں وہ قطرۂ شبنم کہ ہو خارِ بیاباں پر

نہ چھوڑی حضرتِ یوسف نے یاں بھی خانہ آرائی

سفیدی دیدۂ یعقوب کی پھرتی ہے زنداں پر

فنا "تعلیمِ درسِ بے خودی” ہوں اُس زمانے سے

کہ مجنوں لام الف لکھتا تھا دیوارِ دبستاں پر

فراغت کس قدر رہتی مجھے تشویش مرہم سے

بہم گر صلح کرتے پارہ ہائے دل نمک داں پر

نہیں اقلیم الفت میں کوئی طومارِ ناز ایسا

کہ پشتِ چشم سے جس کی نہ ہووے مُہر عنواں پر

مجھے اب دیکھ کر ابرِ شفق آلودہ یاد آیا

کہ فرقت میں تری آتش برستی تھی گلِستاں پر

بجُز پروازِ شوقِ ناز کیا باقی رہا ہو گا

قیامت اِک ہوائے تند ہے خاکِ شہیداں پر

نہ لڑ ناصح سے، غالب، کیا ہوا گر اس نے شدّت کی

ہمارا بھی تو آخر زور چلتا ہے گریباں پر

مرزا اسد اللہ خان غالب

تنہا گئے کیوں؟ اب رہو تنہا کوئی دن اور

اکتوبر 8, 2015مرزا اسد اللہ خان غالب،اساتذہ،غزلفرسا،مرتا،نقشا،گویا،گزارا،اچھا،تقاضا،تمنا،تماشا،تنہاadmin

دیوانِ غالب ۔ غزل نمبر 121

لازم تھا کہ دیکھو مرا رستہ کوئی دِن اور

تنہا گئے کیوں؟ اب رہو تنہا کوئی دن اور

مٹ جائےگا سَر ،گر، ترا پتھر نہ گھِسے گا

ہوں در پہ ترے ناصیہ فرسا کوئی دن اور

آئے ہو کل اور آج ہی کہتے ہو کہ ’جاؤں؟‘

مانا کہ ھمیشہ نہیں اچھا کوئی دن اور

جاتے ہوئے کہتے ہو ’قیامت کو ملیں گے‘

کیا خوب! قیامت کا ہے گویا کوئی دن اور

ہاں اے فلکِ پیر! جواں تھا ابھی عارف

کیا تیرا بگڑ تا جو نہ مرتا کوئی دن اور

تم ماہِ شبِ چار دہم تھے مرے گھر کے

پھر کیوں نہ رہا گھر کا وہ نقشا کوئی دن اور

تم کون سے ایسے تھے کھرے داد و ستد کے

کرتا ملکُ الموت تقاضا کوئی دن اور

مجھ سے تمہیں نفرت سہی، نیر سے لڑائی

بچوں کا بھی دیکھا نہ تماشا کوئی دن اور

گزری نہ بہرحال یہ مدت خوش و ناخوش

کرنا تھا جواں مرگ گزارا کوئی دن اور

ناداں ہو جو کہتے ہو کہ ’کیوں جیتے ہیں غالب‘

قسمت میں ہے مرنے کی تمنا کوئی دن اور

مرزا اسد اللہ خان غالب

کرتے ہیں مَحبّت تو گزرتا ہے گماں اور

اکتوبر 8, 2015مرزا اسد اللہ خان غالب،اساتذہ،غزلہاں،فشاں،فغاں،نہاں،کماں،گماں،گراں،بیاں،جاں،رواں،زباںadmin

دیوانِ غالب ۔ غزل نمبر 120

ہے بس کہ ہر اک ان کے اشارے میں نشاں اور

کرتے ہیں مَحبّت تو گزرتا ہے گماں اور

یارب وہ نہ سمجھے ہیں نہ سمجھیں گے مری بات

دے اور دل ان کو، جو نہ دے مجھ کو زباں اور

ابرو سے ہے کیا اس نگہِ ناز کو پیوند

ہے تیر مقرّر مگر اس کی ہے کماں اور

تم شہر میں ہو تو ہمیں کیا غم، جب اٹھیں گے

لے آئیں گے بازار سے جا کر دل و جاں اور

ہر چند سُبُک دست ہوئے بت شکنی میں

ہم ہیں، تو ابھی راہ میں ہیں سنگِ گراں اور

ہے خوںِ جگر جوش میں دل کھول کے روتا

ہوتے جو کئی دیدۂ خو نبانہ فشاں اور

مرتا ہوں اس آواز پہ ہر چند سر اڑ جائے

جلاّد کو لیکن وہ کہے جائیں کہ ’ہاں اور‘

لوگوں کو ہے خورشیدِ جہاں تاب کا دھوکا

ہر روز دکھاتا ہوں میں اک داغِ نہاں اور

لیتا، نہ اگر دل تمھیں دیتا، کوئی دم چین

کرتا، جو نہ مرتا، کوئی دن آہ و فغاں اور

پاتے نہیں جب راہ تو چڑھ جاتے ہیں نالے

رُکتی ہے مری طبع، تو ہوتی ہے رواں اور

ہیں اور بھی دنیا میں سخنور بہت اچھّے

کہتے ہیں کہ غالب کا ہے اندازِ بیاں اور

مرزا اسد اللہ خان غالب

تغیر ” آبِ برجا ماندہ” کا پاتا ہے رنگ آخر

اکتوبر 8, 2015مرزا اسد اللہ خان غالب،اساتذہ،غزلپِلنگ،رنگadmin

دیوانِ غالب ۔ غزل نمبر 119

صفائے حیرت آئینہ ہے سامانِ زنگ آخر

تغیر ” آبِ برجا ماندہ” کا پاتا ہے رنگ آخر

نہ کی سامانِ عیش و جاہ نے تدبیر وحشت کی

ہوا جامِ زُمرّد بھی مجھے داغ پِلنگ آخر

مرزا اسد اللہ خان غالب

نگاہِ شوق کو ہیں بال و پر در و دیوار

اکتوبر 8, 2015مرزا اسد اللہ خان غالب،اساتذہ،غزلہر،مگر،نظر،کر،پیشتر،پر،بسر،درadmin

دیوانِ غالب ۔ غزل نمبر 118

بلا سے ہیں جو یہ پیشِ نظر در و دیوار

نگاہِ شوق کو ہیں بال و پر در و دیوار

وفورِ عشق نے کاشانہ کا کیا یہ رنگ

کہ ہو گئے مرے دیوار و در در و دیوار

نہیں ہے سایہ، کہ سن کر نوید مَقدمِ یار

گئے ہیں چند قدم پیشتر در و دیوار

ہوئی ہے کس قدر ارزانئ مئے جلوہ

کہ مست ہے ترے کوچے میں ہر در و دیوار

جو ہے تجھے سرِ سودائے انتظار، تو آ

کہ ہیں دکانِ متاعِ نظر در و دیوار

ہجومِ گریہ کا سامان کب کیا میں نے

کہ گر پڑے نہ مرے پاؤں پر در و دیوار

وہ آ رہا مرے ہم سایہ میں، تو سائے سے

ہوئے فدا در و دیوار پر در و دیوار

نظر میں کھٹکے ہے بِن تیرے گھر کی آبادی

ہمیشہ روتے ہیں ہم دیکھ کر در و دیوار

نہ پوچھ بے خودئِ عیشِ مَقدمِ سیلاب

کہ ناچتے ہیں پڑے سر بسر در و دیوار

نہ کہہ کسی سے کہ غالب نہیں زمانے میں

حریف رازِ محبت مگر در و دیوار

مرزا اسد اللہ خان غالب

بارے آرام سے ہیں اہلِ جفا میرے بعد

اکتوبر 8, 2015مرزا اسد اللہ خان غالب،اساتذہ،غزلہوا،وفا،ادا،بلا،جفا،جدا،حنا،خفا،صلاadmin

دیوانِ غالب ۔ غزل نمبر 117

حسن غمزے کی کشاکش سے چھٹا میرے بعد

بارے آرام سے ہیں اہلِ جفا میرے بعد

منصبِ شیفتگی کے کوئی قابل نہ رہا

ہوئی معزولئ انداز و ادا میرے بعد

شمع بجھتی ہے تو اس میں سے دھواں اٹھتا ہے

شعلۂ عشق سیہ پوش ہوا میرے بعد

خوں ہے دل خاک میں احوالِ بتاں پر، یعنی

ان کے ناخن ہوئے محتاجِ حنا میرے بعد

درخورِ عرض نہیں جوہرِ بیداد کو جا

نگہِ ناز ہے سرمے سے خفا میرے بعد

ہے جنوں اہلِ جنوں کے لئے آغوشِ وداع

چاک ہوتا ہے گریباں سے جدا میرے بعد

کون ہوتا ہے حریفِ مئے مرد افگنِ عشق

ہے مکّرر لبِ ساقی میں صلا@ میرے بعد

غم سے مرتا ہوں کہ اتنا نہیں دنیا میں کوئی

کہ کرے تعزیتِ مہر و وفا میرے بعد

آئے ہے بے کسئ عشق پہ رونا غالب

کس کے گھر جائے گا سیلابِ بلا میرے بعد

@نسخۂ حمیدیہ میں ہے ’لبِ ساقی پہ‘۔ اکثر نسخوں میں بعد میں یہی املا ہے۔ @ نسخۂ مہر، آسی اور باقی نسخوں میں لفظ ‘پہ’ ہے۔

مرزا اسد اللہ خان غالب

قمری کا طوق حلقۂ بیرونِ در ہے آج

اکتوبر 8, 2015مرزا اسد اللہ خان غالب،اساتذہ،غزلاثر،درadmin

دیوانِ غالب ۔ غزل نمبر 116

گلشن میں بند وبست بہ رنگِ دگر ہے آج

قمری کا طوق حلقۂ بیرونِ در ہے آج

آتا ہے ایک پارۂ دل ہر فغاں کے ساتھ

تارِ نفس کمندِ شکارِ اثر ہے آج

اے عافیت! کنارہ کر، اے انتظام! چل

سیلابِ گریہ در پےِ دیوار و در ہے آج

مرزا اسد اللہ خان غالب

پھر اک روز مرنا ہے حضرت سلامت

اکتوبر 8, 2015مرزا اسد اللہ خان غالب،اساتذہ،غزلنعمت،حضرت،سلامت،صورتadmin

دیوانِ غالب ۔ غزل نمبر 115

رہا گر کوئی تا قیامت سلامت

پھر اک روز مرنا ہے حضرت سلامت

جگر کو مرے عشقِ خوں نابہ مشرب

لکھے ہے ’خداوندِ نعمت سلامت‘

علی اللّرغمِ دشمن، شہیدِ وفا ہوں

مبارک مبارک سلامت سلامت

نہیں گر سر و برگِ ادراک معنی

تماشائے نیرنگ صورت سلامت

مرزا اسد اللہ خان غالب

جن لوگوں کی تھی درخورِ عقدِ گہر انگشت

اکتوبر 8, 2015مرزا اسد اللہ خان غالب،اساتذہ،غزلگہر،پر،سفرadmin

دیوانِ غالب ۔ غزل نمبر 114

افسوس کہ دنداں@ کا کیا رزق فلک نے

جن لوگوں کی تھی درخورِ عقدِ گہر انگشت

کافی ہے نشانی تری چھلّے کا نہ دینا

خالی مجھے دکھلا کے بوقتِ سفر انگشت

لکھتا ہوں اسدؔ سوزشِ دل سے سخنِ گرم

تا رکھ نہ سکے کوئی مرے حرف پر انگشت

@نسخۂ نظامی میں اگرچہ ’دیداں‘ ہے لیکن معانی کے لحاظ سے ’دنداں‘ مناسب ہے، دیداں سہوِ کتابت ممکن ہے۔ دیداں دودہ کا جمع ہے اس سے مراد کیڑے ہیں۔ تب اس کا مطلب بنتا ہے کہ انگلیوں کو قبر کی کیڑوں کا خوراک بنا دیا۔ نسخۂ مہر اور نسخہ علامہ آسی میں لفظ دیداں ہی آیا ہے ہاں البتہ نسخہ حمیدیہ میں لفظ دندان آیا ہے

مرزا اسد اللہ خان غالب

دودِ شمعِ کشتہ تھا شاید خطِ رخسارِ دوست

اکتوبر 8, 2015مرزا اسد اللہ خان غالب،اساتذہ،غزلگفتار،آزار،بیمار،بار،تکرار،خوار،دیدار،رفتار،رخسار،سرشارadmin

دیوانِ غالب ۔ غزل نمبر 113

آمدِ خط سے ہوا ہے سرد جو بازارِ دوست

دودِ شمعِ کشتہ تھا شاید خطِ رخسارِ دوست

اے دلِ ناعاقبت اندیش! ضبطِ شوق کر

کون لا سکتا ہے تابِ جلوۂ دیدارِ دوست

خانہ ویراں سازئ حیرت! تماشا کیجیئے

صورتِ نقشِ قدم ہوں رفتۂ رفتارِ دوست

عشق میں بیدادِ رشکِ غیر نے مارا مجھے

کُشتۂ دشمن ہوں آخر، گرچہ تھا بیمارِ دوست

چشمِ ما روشن، کہ اس بے درد کا دل شاد ہے

دیدۂ پر خوں ہمارا ساغرِ سرشارِ دوست

غیر یوں کرتا ہے میری پرسش اس کے ہجر میں

بے تکلّف دوست ہو جیسے کوئی غم خوارِ دوست

تاکہ میں جانوں کہ ہے اس کی رسائی واں تلک

مجھ کو دیتا ہے پیامِ وعدۂ دیدارِ دوست

جب کہ میں کرتا ہوں اپنا شکوۂ ضعفِ دماغ

سَر کرے ہے وہ حدیثِ زلفِ عنبر بارِ دوست

چپکے چپکے مجھ کو روتے دیکھ پاتا ہے اگر

ہنس کے کرتا ہے بیانِ شوخئ گفتارِ دوست

مہربانی ہائے دشمن کی شکایت کیجیئے

یا بیاں کیجے سپاسِ لذّتِ آزارِ دوست

یہ غزل اپنی، مجھے جی سے پسند آتی ہےآپ

ہے ردیف شعر میں غالب! ز بس تکرارِ دوست

مرزا اسد اللہ خان غالب

دے بطِ مے کو دل و دستِ شنا موجِ شراب

اکتوبر 8, 2015مرزا اسد اللہ خان غالب،اساتذہ،غزلہما،ہوا،ہَوا،نما،کُشا،کشا،بقا،تا،خوشا،شنا،صباadmin

دیوانِ غالب ۔ غزل نمبر 112

پھر ہوا وقت کہ ہو بال کُشا موجِ شراب

دے بطِ مے کو دل و دستِ شنا موجِ شراب

پوچھ مت وجہ سیہ مستئِ اربابِ چمن

سایۂ تاک میں ہوتی ہے ہَوا موجِ شراب

جو ہوا غرقۂ مے بختِ رسا رکھتا ہے

سر پہ گزرے پہ بھی ہے بالِ ہما موجِ شراب

ہے یہ برسات وہ موسم کہ عجب کیا ہے اگر

موجِ ہستی کو کرے فیضِ ہوا موجِ شراب

چار موج اٹھتی ہے طوفانِ طرب سے ہر سو

موجِ گل، موجِ شفق، موجِ صبا، موجِ شراب

جس قدر روح نباتی ہے جگر تشنۂ ناز

دے ہے تسکیں بَدَمِ آبِ بقا موجِ شراب

بس کہ دوڑے ہے رگِ تاک میں خوں ہوہوکر

شہپرِ رنگ سے ہے بال کشا موجِ شراب

موجۂ گل سے چراغاں ہے گزرگاہِ خیال

ہے تصوّر میں ز بس جلوہ نما موجِ شراب

نشّے کے پردے میں ہے محوِ تماشائے دماغ

بس کہ رکھتی ہے سرِ نشو و نما موجِ شراب

ایک عالم پہ ہیں طوفانئِ کیفیّتِ فصل

موجۂ سبزۂ نوخیز سے تا موجِ شراب

شرحِ ہنگامۂ مستی ہے، زہے! موسمِ گل

رہبرِ قطرہ بہ دریا ہے، خوشا موجِ شراب

ہوش اڑتے ہیں مرے، جلوۂ گل دیکھ، اسدؔ

پھر ہوا وقت، کہ ہو بال کُشا موجِ شراب

مرزا اسد اللہ خان غالب

آتش خاموش کی مانند، گویا جل گیا

اکتوبر 8, 2015مرزا اسد اللہ خان غالب،اساتذہ،غزلکارفرما،گویا،تھا،دنیا،صحرا،عنقاadmin

دیوانِ غالب ۔ غزل نمبر 111

دل میرا سوزِنہاں سے بے محابا جل گیا

آتش خاموش کی مانند، گویا جل گیا

دل میں ذوقِ وصل و یادِ یار تک باقی نہیں

آگ اس گھر میں لگی ایسی کہ جو تھا جل گیا

میں عدم سے بھی پرے ہوں، ورنہ غافل! بارہا

میری آہِ آتشیں سے بالِ عنقا جل گیا

عرض کیجئے جوہرِ اندیشہ کی گرمی کہاں؟

کچھ خیال آیا تھا وحشت کا، کہ صحرا جل گیا

دل نہیں، تجھ کو دکھاتا ورنہ، داغوں کی بہار

اِس چراغاں کا کروں کیا، کارفرما جل گیا

میں ہوں اور افسردگی کی آرزو، غالب! کہ دل

دیکھ کر طرزِ تپاکِ اہلِ دنیا جل گیا

مرزا اسد اللہ خان غالب

زخم کے بھرنے تلک ناخن نہ بڑھ جائیں گے کیا

اکتوبر 8, 2015مرزا اسد اللہ خان غالب،اساتذہ،غزللائیں،کھائیں،گھبرائیں،جائیں،سمجھائیںadmin

دیوانِ غالب ۔ غزل نمبر 110

دوست غمخواری میں میری سعی فرمائیں گے کیا

زخم کے بھرنے تلک ناخن نہ بڑھ جائیں گے کیا

بے نیازی حد سے گزری بندہ پرور، کب تلک

ہم کہیں گے حالِ دل، اور آپ فرمائیں گے ‘کیا’؟

حضرتِ ناصح گر آئیں، دیدہ و دل فرشِ راہ

کوئی مجھ کو یہ تو سمجھا دو کہ سمجھائیں گے کیا؟

آج واں تیغ و کفن باندھے ہوئے جاتا ہوں میں

عذر میرے قتل کرنے میں وہ اب لائیں گے کیا

گر کیا ناصح نے ہم کو قید، اچھا یوں سہی

یہ جنونِ عشق کے انداز چھٹ جائیں گے کیا

خانہ زادِ زلف ہیں، زنجیر سے بھاگیں گے کیوں

ہیں گرفتارِ وفا، زنداں سے گھبرائیں گے کیا

ہے اب اس معمورے میں قحطِ غمِ الفت اسدؔ

ہم نے یہ مانا کہ دلّی میں رہیں، کھائیں گے کیا؟

مرزا اسد اللہ خان غالب

نہ ہو مرنا تو جینے کا مزا کیا

اکتوبر 8, 2015مرزا اسد اللہ خان غالب،اساتذہ،غزلمزا،وفا،کیا،گلا،پوچھنا،آزما،ادا،بہا،بھلا،ربا،صبا،صداadmin

دیوانِ غالب ۔ غزل نمبر 109

ہوس کو ہے نشاطِ کار کیا کیا

نہ ہو مرنا تو جینے کا مزا کیا

تجاہل پیشگی سے مدعا کیا

کہاں تک اے سراپا ناز کیا کیا؟

نوازش ہائے بے جا دیکھتا ہوں

شکایت ہائے رنگیں کا گلا کیا

نگاہِ بے محابا چاہتا ہوں

تغافل ہائے تمکیں آزما کیا

فروغِ شعلۂ خس یک نفَس ہے

ہوس کو پاسِ ناموسِ وفا کیا

نفس موجِ محیطِ بیخودی ہے

تغافل ہائے ساقی کا گلا کیا

دماغِ عطر پیراہن نہیں ہے

غمِ آوارگی ہائے صبا کیا

دلِ ہر قطرہ ہے سازِ ’انا البحر‘

ہم اس کے ہیں، ہمارا پوچھنا کیا

محابا کیا ہے، مَیں ضامن، اِدھر دیکھ

شہیدانِ نگہ کا خوں بہا کیا

سن اے غارت گرِ جنسِ وفا، سن

شکستِ قیمتِ دل کی صدا کیا

کیا کس نے جگرداری کا دعویٰ؟

شکیبِ خاطرِ عاشق بھلا کیا

یہ قاتل وعدۂ صبر آزما کیوں؟

یہ کافر فتنۂ طاقت ربا کیا؟

بلائے جاں ہے غالب اس کی ہر بات

عبارت کیا، اشارت کیا، ادا کیا!

مرزا اسد اللہ خان غالب

کہتے ہیں ہم تجھ کو منہ دکھلائیں کیا

اکتوبر 8, 2015مرزا اسد اللہ خان غالب،اساتذہ،غزلکھائیں،گھبرائیں،پہنچائیں،بتلائیں،جائیں،دکھلائیںadmin

دیوانِ غالب ۔ غزل نمبر 108

جور سے باز آئے پر باز آئیں کیا

کہتے ہیں ہم تجھ کو منہ دکھلائیں کیا

رات دن گردش میں ہیں سات آسماں

ہو رہے گا کچھ نہ کچھ گھبرائیں کیا

لاگ ہو تو اس کو ہم سمجھیں لگاؤ

جب نہ ہو کچھ بھی تو دھوکا کھائیں کیا

ہو لیے کیوں نامہ بر کے ساتھ ساتھ

یا رب اپنے خط کو ہم پہنچائیں کیا

موجِ خوں سر سے گزر ہی کیوں نہ جائے

آستانِ یار سے اٹھ جائیں کیا

عمر بھر دیکھا کیے مرنے کی راہ

مر گیے پر دیکھیے دکھلائیں کیا

پوچھتے ہیں وہ کہ غالب کون ہے

کوئی بتلاؤ کہ ہم بتلائیں کیا

مرزا اسد اللہ خان غالب

دل کہاں کہ گم کیجیے؟ ہم نے مدعا پایا

اکتوبر 8, 2015مرزا اسد اللہ خان غالب،اساتذہ،غزلہوا،مدعا،مزا،نارسا،آزما،بارہا،دواadmin

دیوانِ غالب ۔ غزل نمبر 107

کہتے ہو نہ دیں گے ہم دل اگر پڑا پایا

دل کہاں کہ گم کیجیے؟ ہم نے مدعا پایا

عشق سے طبیعت نے زیست کا مزا پایا

درد کی دوا پائی، درد بے دوا پایا

دوست دارِ دشمن ہے! اعتمادِ دل معلوم

آہ بے اثر دیکھی، نالہ نارسا پایا

سادگی و پرکاری، بے خودی و ہشیاری

حسن کو تغافل میں جرأت آزما پایا

غنچہ پھر لگا کھلنے، آج ہم نے اپنا دل

خوں کیا ہوا دیکھا، گم کیا ہوا پایا

حال دل نہیں معلوم، لیکن اس قدر یعنی

ہم نے بار ہا ڈھونڈھا، تم نے بارہا پایا

شورِ پندِ ناصح نے زخم پر نمک چھڑکا

آپ سے کوئی پوچھے تم نے کیا مزا پایا

مرزا اسد اللہ خان غالب

تماشائے بہ یک کف بُردنِ صد دل، پسند آیا

اکتوبر 8, 2015مرزا اسد اللہ خان غالب،اساتذہ،غزلمشکل،بسمل،دلadmin

دیوانِ غالب ۔ غزل نمبر 106

شمار سبحہ،” مرغوبِ بتِ مشکل” پسند آیا

تماشائے بہ یک کف بُردنِ صد دل، پسند آیا

بہ فیضِ بے دلی، نومیدئ جاوید آساں ہے

کشائش کو ہمارا عقدۂ مشکل پسند آیا

ہوائے سیرِگل، آئینۂ بے مہرئ قاتل

کہ اندازِ بخوں غلطیدن @ بسمل پسند آیا

اصل نسخۂ نظامی میں ’غلتیدن‘ ہے جو سہوِ کتابت ہے

مرزا اسد اللہ خان غالب

دل، جگر تشنۂ فریاد آیا

اکتوبر 8, 2015مرزا اسد اللہ خان غالب،اساتذہ،غزلفریاد،یادadmin

دیوانِ غالب ۔ غزل نمبر 105

پھر مجھے دیدۂ تر یاد آیا

دل، جگر تشنۂ فریاد آیا

دم لیا تھا نہ قیامت نے ہنوز

پھر ترا وقتِ سفر یاد آیا

سادگی ہائے تمنا، یعنی

پھر وہ نیرنگِ نظر یاد آیا

عذرِ واماندگی، اے حسرتِ دل!

نالہ کرتا تھا، جگر یاد آیا

زندگی یوں بھی گزر ہی جاتی

کیوں ترا راہ گزر یاد آیا

کیا ہی رضواں سے لڑائی ہو گی

گھر ترا خلد میں گر یاد آیا

آہ وہ جرأتِ فریاد کہاں

دل سے تنگ آکے جگر یاد آیا

پھر تیرے کوچے کو جاتا ہے خیال

دلِ گم گشتہ، مگر، یاد آیا

کوئی ویرانی سی ویرانی ہے

دشت کو دیکھ کے گھر یاد آیا

میں نے مجنوں پہ لڑکپن میں اسدؔ

سنگ اٹھایا تھا کہ سر یاد آیا

مرزا اسد اللہ خان غالب

جس دل پہ ناز تھا مجھے وہ دل نہیں رہا

اکتوبر 8, 2015مرزا اسد اللہ خان غالب،اساتذہ،غزلقاتل،محفل،کامل،حائل،حاصل،دل،غافلadmin

دیوانِ غالب ۔ غزل نمبر 104

عرضِ نیازِ عشق کے قابل نہیں رہا

جس دل پہ ناز تھا مجھے وہ دل نہیں رہا

جاتا ہوں داغِ حسرتِ ہستی لیے ہوئے

ہوں شمعِ کشتہ درخورِ محفل نہیں رہا

مرنے کی اے دل اور ہی تدبیر کر کہ میں

شایانِ دست و خنجرِ قاتل نہیں رہا

بر روئے شش جہت درِ آئینہ باز ہے

یاں امتیازِ ناقص و کامل نہیں رہا

وا کر دیے ہیں شوق نے بندِ نقابِ حسن

غیر از نگاہ اب کوئی حائل نہیں رہا

گو میں رہا رہینِ ستم ہاے روزگار

لیکن ترے خیال سے غافل نہیں رہا

دل سے ہوائے کشتِ وفا مٹ گئی کہ واں

حاصل سواے حسرتِ حاصل نہیں رہا

بیدادِ عشق سے نہیں ڈرتا مگر اسدؔ

جس دل پہ ناز تھا مجھے وہ دل نہیں رہا

مرزا اسد اللہ خان غالب

تپشِ شوق نے ہر ذرّے پہ اک دل باندھا

اکتوبر 8, 2015مرزا اسد اللہ خان غالب،اساتذہ،غزلبسمل،دل،سائل،ساحلadmin

دیوانِ غالب ۔ غزل نمبر 103

جب بہ تقریبِ سفر یار نے محمل باندھا

تپشِ شوق نے ہر ذرّے پہ اک دل باندھا

اہل بینش نے بہ حیرت کدۂ شوخئ ناز

جوہرِ آئینہ کو طوطئ بسمل باندھا

یاس و امید نے اک عرَبدہ میداں مانگا

عجزِ ہمت نے طِلِسمِ دلِ سائل باندھا

نہ بندھے تِشنگئ ذوق کے مضموں، غالب

گرچہ دل کھول کے دریا کو بھی ساحل باندھا

مرزا اسد اللہ خان غالب

رازِ مکتوب بہ بے ربطئِ عنواں سمجھا

اکتوبر 8, 2015مرزا اسد اللہ خان غالب،اساتذہ،غزلمسلماں،گریباں،آساں،حیراں،زنداں،سوزاں،شبستان،عنواںadmin

دیوانِ غالب ۔ غزل نمبر 102

وہ میری چینِ جبیں سے غمِ پنہاں سمجھا

رازِ مکتوب بہ بے ربطئِ عنواں سمجھا

یک الِف بیش نہیں صقیلِ آئینہ ہنوز

چاک کرتا ہوں میں جب سے کہ گریباں سمجھا

شرحِ اسبابِ گرفتارئِ خاطر مت پوچھ

اس قدر تنگ ہوا دل کہ میں زنداں سمجھا

بدگمانی نے نہ چاہا اسے سرگرمِ خرام

رخ پہ ہر قطرہ عرق دیدۂ حیراں سمجھا

عجزسے اپنے یہ جانا کہ وہ بد خو ہو گا

نبضِ خس سے تپشِ شعلۂ سوزاں سمجھا

سفرِ عشق میں کی ضعف نے راحت طلبی

ہر قدم سائے کو میں اپنے شبستان سمجھا

تھا گریزاں مژۂ یار سے دل تا دمِ مرگ

دفعِ پیکانِ قضا اِس قدر آساں سمجھا

دل دیا جان کے کیوں اس کو وفادار، اسدؔ

غلطی کی کہ جو کافر کو مسلماں سمجھا

مرزا اسد اللہ خان غالب

آپ آتے تھے، مگر کوئی عناں گیر بھی تھا

اکتوبر 8, 2015مرزا اسد اللہ خان غالب،اساتذہ،غزلمیر،نخچیر،گیر،تقدیر،تقریر،تیر،تاثیر،تحریر،تعزیر،زنجیرadmin

دیوانِ غالب ۔ غزل نمبر 101

ہوئی تاخیر تو کچھ باعثِ تاخیر بھی تھا

آپ آتے تھے، مگر کوئی عناں گیر بھی تھا

تم سے بے جا ہے مجھے اپنی تباہی کا گلہ

اس میں کچھ شائبۂ خوبیِ تقدیر بھی تھا

تو مجھے بھول گیا ہو تو پتا بتلا دوں؟

کبھی فتراک میں تیرے کوئی نخچیر بھی تھا

قید میں ہے ترے وحشی کو وہی زلف کی یاد

ہاں! کچھ اک رنجِ گرانباریِ زنجیر بھی تھا

بجلی اک کوند گئی آنکھوں کے آگے تو کیا!

بات کرتے، کہ میں لب تشنۂ تقریر بھی تھا

یوسف اس کو کہوں اور کچھ نہ کہے، خیر ہوئی

گر بگڑ بیٹھے تو میں لائقِ تعزیر بھی تھا

دیکھ کر غیر کو ہو کیوں نہ کلیجا ٹھنڈا

نالہ کرتا تھا، ولے طالبِ تاثیر بھی تھا

پیشے میں عیب نہیں، رکھیے نہ فرہاد کو نام

ہم ہی آشفتہ سروں میں وہ جواں میر بھی تھا

ہم تھے مرنے کو کھڑے، پاس نہ آیا، نہ سہی

آخر اُس شوخ کے ترکش میں کوئی تیر بھی تھا

پکڑے جاتے ہیں فرشتوں کے لکھے پر ناحق

آدمی کوئی ہماراَدمِ تحریر بھی تھا؟

ریختے کے تمہیں استاد نہیں ہو غالب

کہتے ہیں اگلے زمانے میں کوئی میر بھی تھا

مرزا اسد اللہ خان غالب

اوروں پہ ہے وہ ظلم کہ مجھ پر نہ ہوا تھا

اکتوبر 8, 2015مرزا اسد اللہ خان غالب،اساتذہ،غزلمکرّر،محشر،گوہر،پر،برابر،تر،سَمَندرadmin

دیوانِ غالب ۔ غزل نمبر 100

تو دوست کسی کا بھی، ستمگر! نہ ہوا تھا

اوروں پہ ہے وہ ظلم کہ مجھ پر نہ ہوا تھا

چھوڑا مہِ نخشب کی طرح دستِ قضا نے

خورشید ہنوز اس کے برابر نہ ہوا تھا

توفیق بہ اندازۂ ہمت ہے ازل سے

آنکھوں میں ہے وہ قطرہ کہ گوہر نہ ہوا تھا

جب تک کہ نہ دیکھا تھا قدِ یار کا عالم

میں معتقدِ فتنۂ محشر نہ ہوا تھا

میں سادہ دل، آزردگیِ یار سے خوش ہوں

یعنی سبقِ شوقِ مکرّر نہ ہوا تھا

دریائے معاصیُتنک آبی سے ہوا خشک

میرا سرِ دامن بھی ابھی تر نہ ہوا تھا

جاری تھی اسدؔ! داغِ جگر سے مری تحصیل

آ تشکدہ جاگیرِ سَمَندر نہ ہوا تھا

مرزا اسد اللہ خان غالب

خونِ جگر ودیعتِ مژگانِ یار تھا

اکتوبر 8, 2015مرزا اسد اللہ خان غالب،اساتذہ،غزلیار،دار،رہگزار،روزگارadmin

دیوانِ غالب ۔ غزل نمبر 99

ایک ایک قطرے کا مجھے دینا پڑا حساب

خونِ جگر ودیعتِ مژگانِ یار تھا

اب میں ہوں اور ماتمِ یک شہرِ آرزو

توڑا جو تو نے آئینہ، تمثال دار تھا

گلیوں میں میری نعش کو کھینچے پھرو، کہ میں

جاں دادۂ ہوائے سرِ رہگزار تھا

موجِ سرابِ دشتِ وفا کا نہ پوچھ حال

ہر ذرہ، مثلِ جوہرِ تیغ، آب دار تھا

کم جانتے تھے ہم بھی غمِ عشق کو، پر اب

دیکھا تو کم ہوئے پہ غمِ روزگار تھا

مرزا اسد اللہ خان غالب

شوخئِ وحشت سے افسانہ فسونِ خواب تھا

اکتوبر 8, 2015مرزا اسد اللہ خان غالب،اساتذہ،غزلمضراب،خوابadmin

دیوانِ غالب ۔ غزل نمبر 98

شب کہ ذوقِ گفتگو سے تیرے، دل بے تاب تھا

شوخئِ وحشت سے افسانہ فسونِ خواب تھا

واں ہجومِ نغمہ ہائے سازِ عشرت تھا اسدؔ

ناخنِ غم یاں سرِ تارِ نفس مضراب تھا

مرزا اسد اللہ خان غالب

رشتۂٴ ہر شمع خارِ کِسوتِ فانوس تھا

اکتوبر 8, 2015مرزا اسد اللہ خان غالب،اساتذہ،غزلفانوس،کیموس،پابوس،افسوسadmin

دیوانِ غالب ۔ غزل نمبر 97

شب کہ وہ مجلس فروزِ خلوتِ ناموس تھا

رشتۂٴ ہر شمع خارِ کِسوتِ فانوس تھا

مشہدِ عاشق سے کوسوں تک جو اُگتی ہے حنا

کس قدر یا رب! ہلاکِ حسرتِ پابوس تھا

حاصلِ الفت نہ دیکھا جز شکستِ آرزو

دل بہ دل پیوستہ، گویا، یک لبِ افسوس تھا

کیا کروں بیمارئِ غم کی فراغت کا بیاں

جو کہ کھایا خونِ دل، بے منتِ کیموس تھا

مرزا اسد اللہ خان غالب

عشقِ نبرد پیشہ طلبگارِ مرد تھا

اکتوبر 8, 2015مرزا اسد اللہ خان غالب،اساتذہ،غزلفرد،مرد،نورد،گرد،درد،زردadmin

دیوانِ غالب ۔ غزل نمبر 96

دھمکی میں مر گیا، جو نہ بابِ نبرد تھا

عشقِ نبرد پیشہ طلبگارِ مرد تھا

تھا زندگی میں مرگ کا کھٹکا لگا ہوا

اڑنے سے پیشتر بھی، مرا رنگ زرد تھا

تالیفِ نسخہ ہائے وفا کر رہا تھا میں

مجموعۂ خیال ابھی فرد فرد تھا

دل تاجگر، کہ ساحلِ دریائے خوں ہے اب

اس رہ گزر میں جلوۂ گل، آگے گرد تھا

جاتی ہے کوئی کشمکش اندوہِ عشق کی !

دل بھی اگر گیا، تو وُہی دل کا درد تھا

احباب چارہ سازئ وحشت نہ کر سکے

زنداں میں بھی خیال، بیاباں نورد تھا

یہ لاشِ بے کفن اسدؔ خستہ جاں کی ہے

حق مغفرت کرے عجب آزاد مرد تھا

مرزا اسد اللہ خان غالب

صاحب کو دل نہ دینے پہ کتنا غرور تھا

اکتوبر 8, 2015مرزا اسد اللہ خان غالب،اساتذہ،غزلقصور،غرورadmin

دیوانِ غالب ۔ غزل نمبر 95

آئینہ دیکھ، اپنا سا منہ لے کے رہ گئے

صاحب کو دل نہ دینے پہ کتنا غرور تھا

قاصد کو اپنے ہاتھ سے گردن نہ ماریے

اس کی خطا نہیں ہے یہ میرا قصور تھا

مرزا اسد اللہ خان غالب

تھا سپندِبزمِ وصلِ غیر ، گو بیتاب تھا

اکتوبر 8, 2015مرزا اسد اللہ خان غالب،اساتذہ،غزلآب،بیتاب،بیخواب،باب،تاب،سنجاب،سیلابadmin

دیوانِ غالب ۔ غزل نمبر 94

نالۂ دل میں شب اندازِ اثر نایاب تھا

تھا سپندِبزمِ وصلِ غیر ، گو بیتاب تھا

مَقدمِ سیلاب سے دل کیا نشاط آہنگ ہے !

خانۂ عاشق مگر سازِ صدائے آب تھا

نازشِ ایّامِ خاکستر نشینی ، کیا کہوں

پہلوئے اندیشہ ، وقفِ بسترِ سنجاب تھا

کچھ نہ کی اپنے جُنونِ نارسا نے ، ورنہ یاں

ذرّہ ذرّہ روکشِ خُرشیدِ عالم تاب تھا

آج کیوں پروا نہیں اپنے اسیروں کی تجھے ؟

کل تلک تیرا بھی دل مہرووفا کا باب تھا

یاد کر وہ دن کہ ہر یک حلقہ تیرے دام کا

انتظارِ صید میں اِک دیدۂ بیخواب تھا

میں نے روکا رات غالب کو ، وگرنہ دیکھتے

اُس کے سیلِ گریہ میں ، گردُوں کفِ سیلاب تھا

مرزا اسد اللہ خان غالب

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: