ٹیگ کے محفوظات: تقاضا

کیوں میرے دردِ دل کا مُداوا کرے کوئی

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلمداوا،گوارا،پروا،تقاضاadmin

وعدوں کو اپنے کس لیے ایفا کرے کوئی

کیوں میرے دردِ دل کا مُداوا کرے کوئی

کس طرح ان کے جَور کا شِکوہ کرے کوئی

توہینِ عشق کیسے گوارا کرے کوئی

پہلو ہزار عیش کے نکلیں گے رنج میں

یہ شرط ہے کہ رنج گوارا کرے کوئی

اے چشمِ شوق یاد بھی ہے داستانِ طُور

جلووں کا ان سے کیسے تقاضا کرے کوئی

اپنی حدوں سے آج گزرتا ہے ذوقِ دید

اب ہو سکے، شکیبؔ، تو پروا کرے کوئی

شکیب جلالی

اب دیکھئے شکایتِ بیجا نہ کیجئے

مئی 20, 2021ضامن جعفری،غزلچھوڑا،پیما،آیا،بلایا،بیجا،تقاضا،تنہا،دلیرا،ستایاadmin

کس نے کہا تھا حسن کا دیوانہ کیجئے

اب دیکھئے شکایتِ بیجا نہ کیجئے

یا غیر سے بھی کیجئے محفل میں احتیاط

یا مجھ کو انجمن میں بلایا نہ کیجئے

ناکام ہو چکی رَوِشِ عجز و انکسار

اب اُن سے عرضِ حال دلیرانہ کیجئے

سرکار مانئے تو کٹھن ہے رہِ حیات

کافی سفر طویل ہے تنہا نہ کیجئے

اے دل نگاہِ ناز بڑی مہرباں ہے آج

کیوں انتظارِ ساقی و پیمانہ کیجئے

پوچھا تھا اُن سے ہجر میں کیونکر ہوئی بسر

مُنہ پھیر کر کہا کہ ستایا نہ کیجئے

چھُٹ جائے پھر نہ دامنِ صبر و رضا کہیں

گر ہو سکے تو خواب میں آیا نہ کیجئے

کمسن ہیں سنگ دل نہیں سمجھے نہ ہوں گے بات

دامانِ صبر ہاتھ سے چھوڑا نہ کیجئے

ضامنؔ وہ لے کے بھول گئے دل تو کیا ہُوا

ہے مقتضائے ظرف تقاضا نہ کیجئے

ضامن جعفری

اَب ذَوق نہیں ہے کہ تَماشا نہیں ہوتا

مئی 20, 2021ضامن جعفری،غزلمداوا،ایسا،تقاضا،تماشا،تنہا،رسواadmin

اے حُسنِ نَظَر کیوں تِرا چَرچا نہیں ہوتا

اَب ذَوق نہیں ہے کہ تَماشا نہیں ہوتا

تجسیمِ تصوّر کی کرامات تَو دیکھو

عاشق شبِ ہجراں میں بھی تَنہا نہیں ہوتا

کیا تَذکرۂ مہر و وفا بیٹھے ہو لے کر

پہلے کبھی ہوتا تھا اب ایسا نہیں ہوتا

یہ رَشک ہے دُنیا اِسے مانے کہ نہ مانے

رُسوا جِسے کہتے ہیں وہ رُسوا نہیں ہوتا

تُم دَردِ محبّت سے گُذَر لو تَو یقیں آئے

یہ دَرد ہے وہ جس کا مداوا نہیں ہوتا

ضامنؔ! اُنہیں اِصرار ہے جو چاہیں کہیَں ہم

اُور ہم سے سرِ بزم تقاضا نہیں ہوتا

ضامن جعفری

جو ہاتھ دل پہ تھا یدِ بیضا نہیں ہُوا

مئی 20, 2021ضامن جعفری،غزلملنا،کھٹکا،پرانا،اچھّا،بیضا،تقاضا،تنہا،سنبھالاadmin

اِتنا بھی تجھ سے سوزِ تمنّا نہیں ہُوا

جو ہاتھ دل پہ تھا یدِ بیضا نہیں ہُوا

بخشی وفا کو اُس نے یہ کہہ کر حیاتِ نَو

حیرت ہے کوئی زخم پُرانا نہیں ہُوا

تنہائی بولنے لگی، تم جب چلے گئے

وہ انہماک تھا کہ میں تنہا نہیں ہُوا

ہم بھی ملے تھے دل سے، جب اُن سے ملا تھا دل

لیکن پھر اُس کے بعد سے ملنا نہیں ہُوا

ایوانِ دل میں گونج رہا ہے سکوتِ مرگ

اِک عرصۂ دراز سے کھٹکا نہیں ہُوا

کیوں قَیسِ عامری اُنہَیں آیا ہے یاد؟ کیا؟

دشتِ جنوں کو ہم نے سنبھالا نہیں ہُوا؟

کم ظرفیوں کے دوَر میں جینا پڑا ہمیں

معیارِ ظرف کے لئے اچھّا نہیں ہُوا

ضامنؔ! مروّتیں بھی تھیں ، مجبوریاں بھی تھیں

وہ منتظر تھے، ہم سے تقاضا نہیں ہُوا

ضامن جعفری

باصرؔ تمہارے یار نے اچھا نہیں کیا

جولائی 24, 2018موجِ خیال،باصر کاظمی،غزلویسا،کنارا،گوارا،اچھا،ایسا،اشارہ،تقاضاadmin

چھوٹا سا ایک کام ہمارا نہیں کیا

باصرؔ تمہارے یار نے اچھا نہیں کیا

رہتی رہی ہے کوئی نہ کوئی کمی ضرور

ایسا نہیں کیا کبھی ویسا نہیں کیا

دو چار بار دیکھ لو خود جا کے اُس کے پاس

کچھ بے سبب تو ہم نے کنارا نہیں کیا

کہتے رہے ہو تم اُسے ہمدرد و غم گُسار

اور اُس نے بات کرنا گوارا نہیں کیا

گر تھیں نگاہ میں مِری کوتاہیاں تو ٹھیک

اغیار نے تو کوئی اشارہ نہیں کیا

حیراں ہوں لوگ کہتے ہیں کیوں اُس کو چارہ گر

جس نے کسی مریض کو اچھا نہیں کیا

دن رات ہم کو قرض چکانے کی فکر ہے

گو اُس نے واپسی کا تقاضا نہیں کیا

ہوتے جو آج اُن کی نگاہوں میں سرفراز

ہم نے تو کوئی کام بھی ایسا نہیں کیا

باصر کاظمی

گرتوں کے ساتھ گرنے کا کھٹکا ہمیں ہو کیوں

جولائی 31, 2017ماجد صدیقی،دِل دِل کرب کمان،غزلیارا،کھٹکا،گوارا،ایسا،تقاضا،خدشہ،دھوکاadmin

ماجد صدیقی ۔ غزل نمبر 56

پتّا گرے شجر سے تو لرزہ ہمیں ہو کیوں

گرتوں کے ساتھ گرنے کا کھٹکا ہمیں ہو کیوں

قارون ہیں جو، زر کی توقّع ہو اُن سے کیا

ایسوں پہ اِس قبیل کا دھوکا ہمیں ہو کیوں

بے فیض رہبروں سے مرتّب جو ہو چلی

احوال کی وہ شکل، گوارا ہمیں ہو کیوں

ملتی ہے کج روؤں کو نفاذِ ستم پہ جو

ایسی سزا کا ہو بھی تو خدشہ ہمیں ہو کیوں

رکھیں نمو کی آس بھلا کیوں چٹان سے

ایسوں سے اِس طرح کا تقاضا ہمیں ہو کیوں

ہم ہیں پھوار ابر کی بوچھاڑ ہم نہیں

سختی کریں کسی پہ، یہ یارا، ہمیں ہو کیوں

بِیجا ہے جو اُگے گا نہ وہ، کشتِ خیر میں!

ماجدؔ گماں جو ہو بھی تو ایسا ہمیں ہو کیوں

ماجد صدیقی

رہ گئے حیران مجھ کو سب خود آرا دیکھ کر

اکتوبر 25, 2015مصطفٰی خان شیفتہ،اساتذہ،غزلمینا،میرا،کلیجا،کا،کارفرما،آرا،احبا،تقاضا،تمنا،تنہا،جلتا،دریا،زیبا،شکیبا،صحرا،عقبیadmin

مصطفٰی خان شیفتہ ۔ غزل نمبر 51

شیفتہ آیا ہوں میں کس کا تماشا دیکھ کر

رہ گئے حیران مجھ کو سب خود آرا دیکھ کر

شوقِ خوباں اُڑ گیا حوروں کا جلوہ دیکھ کر

رنجِ دنیا مٹ گیا آرامِ عقبیٰ دیکھ کر

ہے وہ آتش جلوہ، اشک افشاں ہمارے شور سے

شمع رو دیتی ہے پروانے کو جلتا دیکھ کر

خیر جو گزری سو گزری پر یہی اچھا ہوا

خط دیا تھا نامہ بر نے اس کو تنہا دیکھ کر

سائلِ مبرم کی پھبتی مجھ پہ فرمانے لگے

آرزوئے شوق کو گرمِ تقاضا دیکھ کر

ہے وہاں سستی طلب میں ، جان یاں بھاری نہیں

کام کرتے ہیں مزاجِ کارفرما دیکھ کر

ہیں تو دونوں سخت لیکن کون سا ہے سخت تر

اپنے دل کو دیکھئے میرا کلیجا دیکھ کر

گاؤں بھی ہم کو غنیمت ہے کہ آبادی تو ہے

آئے ہیں ہم سخت پُر آشوب صحرا دیکھ کر

اب کسے لاؤں گواہی کے لئے روزِ جزا

میرے دشمن ہو گئے، اس کو احبا دیکھ کر

میں کمینِ توبہ میں ہوں آپ ، لیکن کیا کروں

منہ میں بھر آتا ہے پانی جام و مینا دیکھ کر

التماسِ وصل پر بگڑے تھے بے ڈھب رات کو

کچھ نہ بن آئی مگر جوشِ تمنا دیکھ کر

دوستی کرتے ہیں اربابِ غرض ہر ایک سے

میرے عاشق ہیں عدو اب ربط اس کا دیکھ کر

بے نقط مجھ کو سناؤ گے جو دیکھو گے ستم

آپ عاشق تو ہوئے ہیں شوق میرا دیکھ کر

پھر کہو گے اس کو دل، فرماؤ اے اربابِ دل

جو نہ ہو بے تاب و مضطر، روئے زیبا دیکھ کر

یار پہلو میں نہیں، مے جام و مینا میں نہیں

تم ہوئے حیران مجھ کو نا شکیبا دیکھ کر

ناگہاں بادِ موافق شیفتہ چلنے لگی

جان پر کل بن رہی تھی شورِ دریا دیکھ کر

مصطفٰی خان شیفتہ

تنہا گئے کیوں؟ اب رہو تنہا کوئی دن اور

اکتوبر 8, 2015مرزا اسد اللہ خان غالب،اساتذہ،غزلفرسا،مرتا،نقشا،گویا،گزارا،اچھا،تقاضا،تمنا،تماشا،تنہاadmin

دیوانِ غالب ۔ غزل نمبر 121

لازم تھا کہ دیکھو مرا رستہ کوئی دِن اور

تنہا گئے کیوں؟ اب رہو تنہا کوئی دن اور

مٹ جائےگا سَر ،گر، ترا پتھر نہ گھِسے گا

ہوں در پہ ترے ناصیہ فرسا کوئی دن اور

آئے ہو کل اور آج ہی کہتے ہو کہ ’جاؤں؟‘

مانا کہ ھمیشہ نہیں اچھا کوئی دن اور

جاتے ہوئے کہتے ہو ’قیامت کو ملیں گے‘

کیا خوب! قیامت کا ہے گویا کوئی دن اور

ہاں اے فلکِ پیر! جواں تھا ابھی عارف

کیا تیرا بگڑ تا جو نہ مرتا کوئی دن اور

تم ماہِ شبِ چار دہم تھے مرے گھر کے

پھر کیوں نہ رہا گھر کا وہ نقشا کوئی دن اور

تم کون سے ایسے تھے کھرے داد و ستد کے

کرتا ملکُ الموت تقاضا کوئی دن اور

مجھ سے تمہیں نفرت سہی، نیر سے لڑائی

بچوں کا بھی دیکھا نہ تماشا کوئی دن اور

گزری نہ بہرحال یہ مدت خوش و ناخوش

کرنا تھا جواں مرگ گزارا کوئی دن اور

ناداں ہو جو کہتے ہو کہ ’کیوں جیتے ہیں غالب‘

قسمت میں ہے مرنے کی تمنا کوئی دن اور

مرزا اسد اللہ خان غالب

گہر میں محو ہوا اضطراب دریا کا

اکتوبر 8, 2015مرزا اسد اللہ خان غالب،اساتذہ،غزلفرسا،کارفرما،بینا،تقاضا،جا،دنیا،دریاadmin

دیوانِ غالب ۔ غزل نمبر 87

گلہ ہے شوق کو دل میں بھی تنگئ جا کا

گہر میں محو ہوا اضطراب دریا کا

یہ جانتا ہوں کہ تو اور پاسخِ مکتوب!

مگر ستم زدہ ہوں ذوقِ خامہ فرسا کا

حنائے پائے خزاں ہے بہار اگر ہے یہی

دوامِ کلفتِ خاطر ہے عیش دنیا کا

غمِ فراق میں تکلیفِ سیرِ باغ نہ دو

مجھے دماغ نہیں خندہ@ ہائے بے جا کا

ہنوز محرمئ حسن کو ترستا ہوں

کرے ہے ہر بُنِ مو کام چشمِ بینا کا

دل اس کو، پہلے ہی ناز و ادا سے، دے بیٹھے

ہمیں دماغ کہاں حسن کے تقاضا کا

نہ کہہ کہ گریہ بہ مقدارِ حسرتِ دل ہے

مری نگاہ میں ہے جمع و خرچ دریا کا

فلک کو دیکھ کے کرتا ہوں اُس کو یاد اسدؔ

جفا میں اس کی ہے انداز کارفرما کا

@نسخۂ نظامی کی املا ہے ’خند ہائے‘

مرزا اسد اللہ خان غالب

سخن سرا کا نیا سفر

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: تقاضا

کیوں میرے دردِ دل کا مُداوا کرے کوئی

اب دیکھئے شکایتِ بیجا نہ کیجئے

اَب ذَوق نہیں ہے کہ تَماشا نہیں ہوتا

جو ہاتھ دل پہ تھا یدِ بیضا نہیں ہُوا

باصرؔ تمہارے یار نے اچھا نہیں کیا

گرتوں کے ساتھ گرنے کا کھٹکا ہمیں ہو کیوں

رہ گئے حیران مجھ کو سب خود آرا دیکھ کر

تنہا گئے کیوں؟ اب رہو تنہا کوئی دن اور

گہر میں محو ہوا اضطراب دریا کا

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: