زمرہ جات کے محفوظات: اصناف

منہ پر ترے یہ قصّۂ کرب و بلا ہے کیا

فروری 27, 2017ماجد صدیقی،سخناب،غزلچلا،کھلا،گھونسلا،بلا،بپا،دھراadmin

ماجد صدیقی ۔ غزل نمبر 126

پھر اور سانحہ کوئی ماجدؔ ہُوا ہے کیا

منہ پر ترے یہ قصّۂ کرب و بلا ہے کیا

مرغانِ خوش نوا کی صدا کیوں بدل گئی

دیکھو تو در قفس کا کسی پر کھُلا ہے کیا

داغی تفنگ کس نے پرندوں کے درمیاں

شورش سی پھر یہ صحنِ چمن میں بپا ہے کیا

دیکھو تو سیلِ آب سے اُکھڑے درخت پر

رہ دیکھتا کسی کی کوئی گھونسلا ہے کیا

ملتا ہے اِس سے زخمِ دروں کو لباسِ حرف

تخلیق میں سخن کی وگرنہ دھرا ہے کیا

دھڑکن لہو کی بانگِ جرس ہو گئی ہے کیوں

پلکوں سے قافلہ کوئی ماجدؔ چلا ہے کیا

ماجد صدیقی

ہمیں اُس نے بہ چشمِ تر نہ دیکھا

فروری 27, 2017ماجد صدیقی،سخناب،غزلپر،آذر،اژدر،ابتر،تر،دوبھر،درadmin

ماجد صدیقی ۔ غزل نمبر 127

تلاطم بحر کا آ کر نہ دیکھا

ہمیں اُس نے بہ چشمِ تر نہ دیکھا

کسی کے ہجر کا اب ہے جو، ایسا

کوئی بھی مرحلہ دُوبھر نہ دیکھا

ملا جیسے وہ اب کے، جان و دل پر

کھُلا جنّت کا ایسا در نہ دیکھا

نگل لیتا ہے جاں جس آن چاہے

زمانے سا کوئی اژدر نہ دیکھا

کبھی تھے چہچہے جس گھونسلے میں

ہُوا پھر یُوں، وہاں اِک پر نہ دیکھا

گھِرا ہے اَب کے یہ ژالوں میں جیسے

چمن کا حال یوں ابتر نہ دیکھا

خود اُس پر ختم ہے ماجدؔ ہنر یہ

گیا جس سے فنِ آذر نہ دیکھا

ماجد صدیقی

اور بھید میں کائنات کا ہوں

فروری 27, 2017ماجد صدیقی،سخناب،غزللگا،کا،تیرتا،جلا،خدا،سلسلہ،سجاadmin

ماجد صدیقی ۔ غزل نمبر 128

پانی یہ حباب سا اٹھا ہوں

اور بھید میں کائنات کا ہوں

خلوت میں وہ چاند دیکھنے کو

اشکوں میں کنول سا تیرتا ہوں

پانے کو فراز چاہتوں کا

مَیں دار پہ بارہا سجا ہوں

کیوں ہجر قبول کرکے اُس کا

پھر آگ میں کُودنے لگا ہوں

ہو کچھ بھی جو اختیار حاصل

خود وقت ہوں خود ہی مَیں خدا ہوں

کندن ہی مجھے کہو کہ لوگو!

مَیں دہر کی آگ میں جلا ہوں

رُکنے کا نہ ہو کہیں جو ماجدؔ

فریاد کا مَیں وہ سلسلہ ہوں

ماجد صدیقی

یہ کیسا ستم اب کے ہم دیکھتے ہیں

فروری 27, 2017ماجد صدیقی،سخناب،غزلہم،قلم،کم،بہم،جنم،رمadmin

ماجد صدیقی ۔ غزل نمبر 129

پیالوں میں امرت کے سم دیکھتے ہیں

یہ کیسا ستم اب کے ہم دیکھتے ہیں

کرشمہ یہ کس حرص کے گھاٹ کا ہے

کہ شیر اور بکری بہم دیکھتے ہیں

یہ کیا دور ہے جس کے پہلو میں ہم تم

ہر اک آن تازہ جنم دیکھتے ہیں

لٹی نم زباں کی تو کس عاجزی سے

فضاؤں کی جانب قلم دیکھتے ہیں

چلیں تیر کھانے پہ بھی ناز سے جو

ہم ان ہی غزالوں کا رم دیکھتے ہیں

جدھر بے بسی کے مناظر ہوں ماجدؔ!

خداوند اُس سمت کم دیکھتے ہیں

ماجد صدیقی

پیڑ کوئی لگا پھر ٹھکانے

فروری 27, 2017ماجد صدیقی،سخناب،غزلنے،ٹھکانے،پرانے،جانے،زمانے،سجانےadmin

ماجد صدیقی ۔ غزل نمبر 130

پھر دکھائی ہے شوخی ہوا نے

پیڑ کوئی لگا پھر ٹھکانے

کس توقّع پہ نوکِ مژہ پر

آنکھ موتی لگی ہے سجانے

میری جنّت ہے سب سامنے کی

سینت رکھوں نہ میں پل پرانے

جی سنبھلتا ہو جس سے کسی کا

بات ایسی یہ خلقت نہ جانے

یُوں تو بچھڑا ہے کل ہی وہ لیکن

دل یہ کہتا ہے گزرے زمانے

دَین سمجھو اِنہیں بھی اُسی کی

غم بھی ماجدؔ دئیے ہیں خدا نے

ماجد صدیقی

مگر وُہ بھید مجھ پر کھُل چکا ہے

فروری 27, 2017ماجد صدیقی،سخناب،غزللگا،چکا،ڈھلا،کیا،گیا،گرا،رہاadmin

ماجد صدیقی ۔ غزل نمبر 131

بدن اُس شوخ کا اِک بھید سا ہے

مگر وُہ بھید مجھ پر کھُل چکا ہے

ہوا میں اَب کے وُہ بّرش ہے جیسے

کوئی آرا سرِ جاں چل رہا ہے

یہ کس کے قرب کا لمحہ گل آسا

سر شاخِ نظر کھلنے لگا ہے

سماعت پر وُہ حرفِ تند اُس کا

کہ جیسے سنگ شیشے پر گرا ہے

یہ سورج کون سے سفّاک دن کا

مرے صحنِ نظر میں آ ڈھلا ہے

پرندہ ہانپتے اُترا تھا جس پر

وُہ دانہ چونچ ہی میں رہ گیا ہے

نہیں گر زہرِ خاموشی تو ماجدؔ!

لبوں پر پھر یہ نیلاہٹ سی کیا ہے

ماجد صدیقی

جو ناروا ہے تم اُس کو بھی اَب روا کہنا

فروری 27, 2017ماجد صدیقی،سخناب،غزلکیا،آشنا،برملا،برا،دوا،روا،سواadmin

ماجد صدیقی ۔ غزل نمبر 132

بنے نہ بات تو بندوں کو بھی خُدا کہنا

جو ناروا ہے تم اُس کو بھی اَب روا کہنا

نہیں ہے کچھ بھی کسی پر گر آسماں ٹوٹے

جو اپنی جان پہ گزرے اُسے سَوا کہنا

کوئی طبیب ہو رکھتا ہے وہ عزیز ہمیں

کہ آ گیا ہے ہمیں درد کو دوا کہنا

نہیں نصیب میں جب حرف کے پذیرائی

تو دل میں کرب ہے جو بھی کسی سے کیا کہنا

کسی کا درد ہو آئے نظر وُہ سوتیلا

ہے آشنا کو بھی مشکل اب آشنا کہنا

ہے حرفِ حق کا تقاضا کہ دل میں ہو تو اُسے

کھلِے گلاب کی مانند برملا کہنا

تمیز، فہم سے اَب یہ اُٹھا ہی دو ماجدؔ!

کہ جو بُرا ہے اُسے بھی نہیں بُرا کہنا

ماجد صدیقی

جس کے رخ پر گرد کی چادر نہیں

فروری 27, 2017ماجد صدیقی،سخناب،غزلچادر،پتّھر،بنجر،بوذر،باور،خنجرadmin

ماجد صدیقی ۔ غزل نمبر 133

باغ میں ایسا کوئی منظر نہیں

جس کے رخ پر گرد کی چادر نہیں

ہونٹ باہر کی ہوا سے خشک ہیں

دل وگرنہ اِس قدر بنجر نہیں

اُس کا ہونا اور نہ ہونا ایک ہے

جس قبیلے میں کوئی بُوذر نہیں

جب سے دیوانہ مرا ہے شہر میں

پاس بچوں کے کوئی پتّھر نہیں

کم نہیں کچھ اُس کی خُو کا دبدبہ

ہاتھ میں قاتل کے گو خنجر نہیں

بے حسی ماجدؔ! یہ چھَٹ جائے گی کیا

آپ کہہ لیں پر ہمیں باور نہیں

ماجد صدیقی

کوئی موسم ہو مرا دل ہی دکھانے آئے

فروری 27, 2017ماجد صدیقی،سخناب،غزلچھپانے،گھٹانے،اٹھانے،بنانے،جلانے،دکھانے،زمانےadmin

ماجد صدیقی ۔ غزل نمبر 134

برگ و گل نوچنے، اثمار گرانے آئے

کوئی موسم ہو مرا دل ہی دکھانے آئے

کچھ بتانے سے اگر بادِصبا عاری ہے

بادِ صرصر ہی سماعت کو جلانے آئے

جس پہ جاں وارنے والا ہے زمانہ سارا

وُہ ہم ایسوں کے کہاں ناز اُٹھانے آئے

نام لکھتے تھے سرِ لوحِ شجر جب اُس کا

لوٹ کر پھر نہ وُہ نادان زمانے آئے

آس بھی دشت میں بس ٹُنڈ شجر ہی نکلی

اوٹ میں جس کی بدن ہم تھے چھپانے آئے

کیا کہوں اُن کی نظر بھی تو مرے رخت پہ تھی

تھے بھنور سے جو مری جان بچانے آئے

کر گئے اور ہرے زخم، قفس میں ماجدؔ!

جتنے جھونکے مرا اندوہ گھٹانے آئے

ماجد صدیقی

اُسی سے رشتہ مرا بھی کچھ دُور پار کا ہے

فروری 27, 2017ماجد صدیقی،سخناب،غزلوار،پار،اختیار،بار،دھار،سوارadmin

ماجد صدیقی ۔ غزل نمبر 135

بہ کشتِ غیراں جو شوخ موسم بہار کا ہے

اُسی سے رشتہ مرا بھی کچھ دُور پار کا ہے

ہم اپنی شاخوں سے زمزمے جھاڑنے لگے ہیں

کہ اب تو کھٹکا تباہیٔ برگ و بار کا ہے

بھٹکنے والا اَڑا کے پیروں میں باگ اپنی

نجانے گھوڑا یہ کس لُٹے شہ سوار کا ہے

ہَوا بھی آئے تو کاٹنے سی لگے بدن کو

وہ خوف، زنداں میں تیغِ قاتل کی دھار کا ہے

بلا سے صیّاد راہ میں گر کماں بکف ہے

ہمیں تو اُڑنا ہے رُخ جدھر اپنی ڈار کا ہے

ہَوا پہ جیسی گرفت ماجدؔ حباب کو ہو

ہمیں بھی زعم اُس پہ بس وہی اختیار کا ہے

ماجد صدیقی

ہَوا اسیر ہے لیکن ابھی حباب میں ہے

فروری 27, 2017ماجد صدیقی،سخناب،غزلناب،کتاب،اضطراب،حباب،خواب،سحاب،عذابadmin

ماجد صدیقی ۔ غزل نمبر 136

بجا کہ زور بہت کچھ گرفتِ آب میں ہے

ہَوا اسیر ہے لیکن ابھی حباب میں ہے

کرم کے ساتھ غضب بھی ہے اُس سے وابستہ

اگر ہے آب تو پھر برق بھی سحاب میں ہے

نہ بے زباں ہے نہ قادر ہے نطق پر اپنے

ہر ایک شخص مسلسل اِسی عذاب میں ہے

نہاں بھی ہے تو کہاں تک رہے گا پوشیدہ

جو حرف وقت کی تعزیّتی کتاب میں ہے

کوئی تو معجزہ دکھلائے گا فراق اُس کا

ہر ایک رگ میں لہو جس سے اضطراب میں ہے

سبھی رُتوں کی طرف سے اُسے سلام کہ جو

کھِلے گلاب کی مانند کشتِ خواب میں ہے

بنی ہے شہر میں جو خارِ ہر زباں ماجد!ؔ

وہ ساری بات ترے ایک شعر ناب میں ہے

ماجد صدیقی

ہم سے بچھڑا تو پھر نہ آیا وُہ

فروری 27, 2017ماجد صدیقی،سخناب،غزللایا،نہایا،چھایا،پرایا،آیا،بھایا،سمایاadmin

ماجد صدیقی ۔ غزل نمبر 137

بن کے ابرِ رواں کا سایا وُہ

ہم سے بچھڑا تو پھر نہ آیا وُہ

اُڑنے والا ہوا پہ خُوشبو سا

دیکھتے ہی لگا پرایا وُہ

جبر میں، لطف میں، تغافل میں

کیا ادا ہے نہ جس میں بھایا وُہ

جیسے پانی میں رنگ گھُل جائے

میرے خوابوں میں یُوں سمایا وُہ

مَیں کہ تھا اِک شجر تمّنا کا

برگ بن بن کے مجھ پہ چھایا وُہ

تیرتا ہے نظر میں شبنم سا

صبحدم نُور میں نہایا وُہ

آزمانے ہماری جاں ماجدؔ

کرب کیا کیا نہ ساتھ لایا وُہ

ماجد صدیقی

سچ لٹکتا ہے ہمیشہ دار سے

فروری 27, 2017ماجد صدیقی،سخناب،غزلمنجدھار،یلغار،اوتار،بار،تلوار،دیوار،دارadmin

ماجد صدیقی ۔ غزل نمبر 138

بچ نہیں سکتا رِیا کے وار سے

سچ لٹکتا ہے ہمیشہ دار سے

دُور کرنے راہ چلتوں کی تھکن

جھانکتی ہے بیل اِک دیوار سے

ڈھل گیا آخر تناؤ شاخ کا

عجز کے سجدوں میں، برگ و بار سے

جس میں ہو تاب و تواں ایقان کی

وُہ بدن کٹتا نہیں تلوار سے

کس نے آنا تھا بھلا لینے ہمیں

سر اٹھاتے بھی تو کیا منجدھار سے

دل مرا چڑیا کے بچّے کی طرح

دم بخود ہے حرص کی یلغار سے

سر جُھکے ماجدؔ دعا کو کس قدر

پوچھ لو یہ بھی کسی اوتار سے

ماجد صدیقی

ہونٹ اچھے لگے ہمیں سِل کے

فروری 27, 2017ماجد صدیقی،سخناب،غزلمل،منزل،کھل،بل،سل،ساحلadmin

ماجد صدیقی ۔ غزل نمبر 139

بھید کھولیں گے اب نہ یہ دل کے

ہونٹ اچھے لگے ہمیں سِل کے

مجھ سے مِلنا ترا دکھایا ہے

آسماں نے زمین سے مِل کے

بِس کی پُڑیاں تھیں گھُورتی آنکھیں

مُنہ نمونے تھے سانپ کی بِل کے

شرط ہی جب بِدی تھی کچھوؤں سے

خواب کیا دیکھنے تھے منزل کے

وہ بھنور کا غرور کیا جانے

سُکھ جسے مِل گئے ہوں ساحل کے

خوش تھے نامِ صباؔ و سِپراؔ پر

جتنے مزدور بھی ملے مِل کے

دیکھ ماجدؔ! دیا کلی نے ابھی

درس جینے کا شاخ پر کھِل کے

ماجد صدیقی

پیڑ اُکھڑے تو آشیاں کیسا

فروری 27, 2017ماجد صدیقی،سخناب،غزلکماں،کارواں،آشیاں،زیاں،زباں،سماںadmin

ماجد صدیقی ۔ غزل نمبر 140

بعدِ طوفاں کوئی نشاں کیسا

پیڑ اُکھڑے تو آشیاں کیسا

اُن پہ گزرا ہے جو گراں اِتنا

لفظ اُترا سرِ زباں کیسا

پا بہ زنجیر کر دیا جس نے

سُست رَو ہے یہ کارواں کیسا

ہے پرندوں سی بُود و باش اپنی

فائدہ کیا ہے اور زیاں کیسا

بچھنے والی نظر کے ایواں میں

ہاتھ دِکھلا گئی کماں کیسا

چاند پھر بادلوں میں اُترا ہے

دیکھ ماجدؔ وہ ہے سماں کیسا

ماجد صدیقی

گمرہی تھی عجب اُڑانوں میں

فروری 27, 2017ماجد صدیقی،سخناب،غزلمچانوں،کمانوں،اڑانوں،دہانوں،زبانوںadmin

ماجد صدیقی ۔ غزل نمبر 141

برق اُتری جب آشیانوں میں

گمرہی تھی عجب اُڑانوں میں

مرحلے پر مری صفائی کے

لکنتیں آ گئیں زبانوں میں

دھاڑ ہی شیر کی کُچھ ایسی تھی

شل تھے صّیاد سب مچانوں میں

غار کے بطن کی سیاہی نے

دیو درباں کیے دہانوں میں

جانے موزوں نہ کیوں ہوئے ماجدؔ

تیر جتنے چڑھے کمانوں میں

ماجد صدیقی

مگر ماجدؔ یہ سکّہ چام سا ہے

فروری 27, 2017ماجد صدیقی،سخناب،غزلنام،کہرام،آرام،الزام،دام،دشنامadmin

ماجد صدیقی ۔ غزل نمبر 142

بظاہر تو وہ ہم سے رام سا ہے

مگر ماجدؔ یہ سکّہ چام سا ہے

چمن پر کس نے پھر شب خون مارا

بپا شاخوں میں پھر کہرام سا ہے

بچیں کیوں کر نہ اُس عیّار سے ہم

کہ جس کا دیکھنا بھی دام سا ہے

ہماری برتری یہ ہے کہ ہم پر

کسی کی چاہ کا الزام سا ہے

ہمیں کیا یاد رکھیں گے وہ جن کو

ہمارا نام بھی دشنام سا ہے

نکل کر حلقۂ دامِ ہوس سے

زیاں ہے گو مگر آرام سا ہے

ماجد صدیقی

ہم پہ ممنوع پھر وہ گلی ہو گئی

فروری 27, 2017ماجد صدیقی،سخناب،غزلہری،کھری،گلی،بری،جلی،ساحری،سرسریadmin

ماجد صدیقی ۔ غزل نمبر 143

بات ڈرتے تھے جس سے وُہی ہو گئی

ہم پہ ممنوع پھر وہ گلی ہو گئی

جب سے اُس سے معنون ہوئی شاعری

چیز کھوٹی تھی لیکن کھری ہو گئی

میرے حرفوں میں جب سے اُترنے لگی

اور بھی ہے وُہ صورت جلی ہو گئی

چاند بھی عکس اُس کا دکھائے نہ اب

یہ ملاقات بھی سرسری ہو گئی

پھر صبا نے جگائے بُجھے ولولے

شاخ اندوہ کی پھر ہری ہو گئی

وہ ستم گر بھی مانگے ہے دادِ ستم

لو شقاوت بھی اَب ساحری ہو گئی

ہوتے ہوتے زمانے کی تحریک پر

اپنی نیّت بھی ماجدؔ بُری ہو گئی

ماجد صدیقی

لاتے ہیں ایک قبر کی چادر بھی سات ہم

فروری 27, 2017ماجد صدیقی،سخناب،غزلنکات،نجات،پات،بات،سومنات،ساتadmin

ماجد صدیقی ۔ غزل نمبر 144

بازار سے ہر عید سے پہلے کی رات ہم

لاتے ہیں ایک قبر کی چادر بھی سات ہم

تاریخ نے دئیے ہیں ہمیں نام کیا سے کیا

کرنے گئے جو زیرِ نگیں سومنات ہم

تیور ہی اہلِعدل کے کچھ اس طرح کے تھے

پلٹے ہیں حلق ہی میں لیے اپنی بات ہم

لینے دیا جو تنُدیٔ موسم نے دم کبھی

نکلیں گے ڈھونڈنے کو کہیں پھول پات ہم

اپنے سفر کی سمت ہی الٹی ہے جب توکیوں

کرتے پھریں تلاش نہ راہِ نجات ہم

دربار میں نزاکت احساس کب روا

ماجدؔ کسے سُجھائیں نظر کے نکات ہم

ماجد صدیقی

عہد اُس نے کیا نہ آنے کا

فروری 27, 2017ماجد صدیقی،سخناب،غزلنشانے،پرانے،آنے،تازیانے،ترانےadmin

ماجد صدیقی ۔ غزل نمبر 145

اور عنواں ہو کیا فسانے کا

عہد اُس نے کیا نہ آنے کا

ہم نے اُس حُسن کو مقام دیا

ارضِ جاں کے مدھر ترانے کا

کچھ ہِمیں تاک حفظِ جاں میں نہ تھے

علم اُس کو بھی تھا نشانے کا

دھار تلوار کی نگاہ میں ہے

شور سر پر ہے تازیانے کا

وقت خود ہی سُجھانے لگتا ہے

فرق ماجدؔ نئے پرانے کا

ماجد صدیقی

اِک مدّت سے جسم ہمارا بوجھل ہے

فروری 27, 2017ماجد صدیقی،سخناب،غزلہلچل،پل،پیدل،پاگل،بوجھل،تھلadmin

ماجد صدیقی ۔ غزل نمبر 146

اِس میں جانے کس کے ہجر کا کَس بل ہے

اِک مدّت سے جسم ہمارا بوجھل ہے

منفی ہے پر اُس کی بھی اک دنیا ہے

وہ جو نظر میں اہلِ نظر کی پاگل ہے

بات ہے ساری یہ تقلید کے جذبے کی

چرواہا بھی اِس کارن ہی پیدل ہے

جھپٹا ہے پھر سانپ کسی کاشانے پر

رات گئے شاخوں میں کیا یہ ہلچل ہے

پتھر ہے جو اس کو کیا پرواہ بھلا

شیشے ہی کو جان کا کھٹکا پل پل ہے

اب دریا کی سیر کو کم کم جاتا ہے

ماجدؔ جس کا اپنا چہرہ جل تھل ہے

ماجد صدیقی

ہنسی ہنسی میں مری بات پھر وہ ٹال گیا

فروری 27, 2017ماجد صدیقی،سخناب،غزلکھال،ٹال،بال،جمال،سالadmin

ماجد صدیقی ۔ غزل نمبر 147

اِک اور بار بھی غارت مرا سوال گیا

ہنسی ہنسی میں مری بات پھر وہ ٹال گیا

بحال کتنا ہی چہرہ ہو دیکھنے میں مگر

جو آئنے میں تھا دل کے نہیں وہ بال گیا

چہک رہا تھا کہ شاخوں میں سرسراہٹ سے

مرے سَرُور کا یک بارگی جمال گیا

لپک تھی جس کو دکھانے کی چال کا جادو

ہرن وہ آج اُدھڑوا کے اپنی کھال گیا

کھلا حساب خسارے کا پھر نیا ماجدؔ

شمارِ کرب و الم میں اک اور سال گیا

ماجد صدیقی

تھا مگر وہ سرگراں ایسا نہ تھا

فروری 27, 2017ماجد صدیقی،سخناب،غزلنشاں،آشیاں،دھواں،سماں،سرگراںadmin

ماجد صدیقی ۔ غزل نمبر 148

اُس پہ جو اب ہے، گماں ایسا نہ تھا

تھا مگر وہ سرگراں ایسا نہ تھا

بھُولنے والا ہو آسانی سے جو

اُس کے جانے کا سماں ایسا نہ تھا

لرزشوں میں ہو نہ جو پیہم گھِرا

باغ میں اِک آشیاں ایسا نہ تھا

ہر کہیں اب وجہ رُسوائی ہے جو

اپنے ماتھوں پر نشاں ایسا نہ تھا

اَب کے جو ماجدؔ نشیمن سے اُٹھا

پیڑ پر پہلے دُھواں ایسا نہ تھا

ماجد صدیقی

جان لیجے کہ وہ جہاں سے گیا

فروری 27, 2017ماجد صدیقی،سخناب،غزلکماں،گلستاں،گماں،جہاں،دوستاں،درمیاں،سواںadmin

ماجد صدیقی ۔ غزل نمبر 149

اُٹھ کے جو اُس کے آستاں سے گیا

جان لیجے کہ وہ جہاں سے گیا

چھیڑتے کیوں ہو تذکرے اس کے

جو مرے وہم سے گماں سے گیا

یوں مری داستاں سے نکلا وہ

باب جیسے ہو درمیاں سے گیا

اب یہ آنکھیں اُسے نہ دیکھیں گی

حسن جو ابکے گلستاں سے گیا

آنے پایا نہ اختیار میں وہ

تیر اک بار جو کماں سے گیا

کیا وہ من موہنا خزانہ تھا

شخص جو ہند میں سواں سے گیا

بن کے بندہ غرض کا ماجدؔ بھی

دیکھ لو بزمِ دوستاں سے گیا

ماجد صدیقی

گرد آئے جہاں غبار آئے

فروری 27, 2017ماجد صدیقی،سخناب،غزلقرار،گزار،اعتبار،بہار،بخار،دار،غبارadmin

ماجد صدیقی ۔ غزل نمبر 150

اُس چمن پر کہاں نکھار آئے

گرد آئے جہاں غبار آئے

ہم ہیں محصور اُس گلستاں میں

عمر گزری جہاں بہار آئے

کس کو اپنی غرض عزیز نہیں

کس کی باتوں پہ اعتبار آئے

ایسا بگڑا نظام اعضا کا

نت کُمک کو ہمیں بخار آئے

رن میں آئین تھا وفا کا یہی

جو بھی مشکل پڑی گزار آئے

ہم ہیں وہ لوگ جو کہ شانوں پر

سر کے ہمراہ لے کے دار آئے

چھِن گئے جن سے پیرہن ماجدؔ

ایسی شاخوں کو کیا قرار آئے

ماجد صدیقی

جن کی پرسش میں بھی دل آزاری ہے

فروری 27, 2017ماجد صدیقی،سخناب،غزللاچاری،آزاری،بھاری،تمہاری،طاری،غدّاریadmin

ماجد صدیقی ۔ غزل نمبر 151

اُن لوگوں سے اب کے سانجھ ہماری ہے

جن کی پرسش میں بھی دل آزاری ہے

جو بولے در کھولے خود پر پھندوں کا

کچھ کہنے میں ایک یہی لاچاری ہے

اپنا اک اک سانس بھنور ہے دریا کا

اپنا اک اک پل صدیوں پر بھاری ہے

اوّل اوّل شور دھماکے پر تھا بہت

دشت میں اُس کے بعد خموشی طاری ہے

طوفاں سے ٹکرانا بِن اندازے کے

یہ تو اپنے آپ سے بھی غدّاری ہے

ہر مشکل کے آگے ہو فرہاد تمہی

ماجِدؔ صدّیقی کیا بات تمہاری ہے

ماجد صدیقی

اُس ناری کے رنگ چُرائے ہم نے بھی

فروری 27, 2017ماجد صدیقی،سخناب،غزلچرائے،اگائے،ترسائے،دلائے،دکھائے،سائے،سجائےadmin

ماجد صدیقی ۔ غزل نمبر 152

اِن ہونٹوں پر پھول کھِلائے ہم نے بھی

اُس ناری کے رنگ چُرائے ہم نے بھی

ہم بھی لائے اِن تک زہر تمّنا کا

امرت کو یہ لب ترسائے ہم نے بھی

لوٹ کے رنجش اور بھی اپنے آپ سے تھی

اہل حشم کو زخم دکھائے ہم نے بھی

سنگ بھگوئے پہلے اوس سے آنکھوں کی

اور پھر اُن میں بیج اُگائے ہم نے بھی

دے کے ہمیں پھر خود ہی زمیں نے چاٹ لئے

پھیلائے تھے کیا کچھ سائے ہم نے بھی

اچّھے دنوں کی یاد کے اُجلے پھولوں سے

دیکھ تو، کیا گلدان سجائے ہم نے بھی

چہرے پر آیات سجا کر اشکوں کی

ماجدؔ کیا کیا درس دلائے ہم نے بھی

ماجد صدیقی

آنکھ میں اک نمی سی اُبھرنے لگی

فروری 27, 2017ماجد صدیقی،سخناب،غزلمرنے،ڈرنے،کرنے،ابھرنے،اترنے،بکھرنے،دھرنےadmin

ماجد صدیقی ۔ غزل نمبر 153

اب کے اُمید یُوں بھی نکھرنے لگی

آنکھ میں اک نمی سی اُبھرنے لگی

یہ اثر بھی ہے شاید مری آہ کا

آسماں سے بھی ہے آگ اُترنے لگی

خود تو اُجڑا مگر جس پہ تھا گھونسلا

شاخ تک وہ شجر پر بکھرنے لگی

نسلِ آدم ہوئی سنگ دل اور بھی

جب سے پاؤں سرِ ماہ دھرنے لگی

پیڑ کو جو سزا بھی ہوئی، ہو گئی

رُت کہاں اُس میں تخفیف کرنے لگی

کچھ دنوں سے ہے وہ سہم سا رُوح میں

سانپ سے جیسے چڑیا ہو ڈرنے لگی

یہ بھی دن ہیں کہ اَب اُس کے دیدار کی

بھوک بھی جیسے ماجدؔ ہے مرنے لگی

ماجد صدیقی

مجرم ہمیں ہی ایک نہ ٹھہرانا چاہئے

فروری 27, 2017ماجد صدیقی،سخناب،غزلچاہیے،چاہئےadmin

ماجد صدیقی ۔ غزل نمبر 154

اپنے کیے پہ بھی اُنہیں پچھتانا چاہیے

مجرم ہمیں ہی ایک نہ ٹھہرانا چاہئے

ممنوع جو بھی ہے اسُے جرأت سے دیکھنا

آدم کی رِیت ہے اِسے دہرانا چاہیے

شاخوں کے درمیاں ہے جہاں حُسن کی نمو

اُس سمت بھی نظر کو کبھی جانا چاہیے

بندش سے جس کی خوں میں گرہ سی پڑی لگے

وہ لفظ بھی زباں پہ کبھی لانا چاہیے

ماجدؔ کرم وُہ جس سے بٹے کرچیوں میں دل

ہم پر کرم وُہ اُن کو، نہ فرمانا چاہیے

ماجد صدیقی

مظہر ہے چمن کی تشنگی کا

فروری 27, 2017ماجد صدیقی،سخناب،غزلولی،ڈھلی،گلی،پلی،تشنگیadmin

ماجد صدیقی ۔ غزل نمبر 155

اُترا ہے جو منہ کلی کلی کا

مظہر ہے چمن کی تشنگی کا

پھٹنے کو ہے کیا کوئی پٹاخہ

کیوں شور تھما لگے گلی کا

اوہام فنا نظر میں رقصاں

تحفہ ہے یہ عمر ادھ ڈھلی کا

دیکھا کوئی گُل تو یاد آیا

ہنسنا کسی ناز کی پلی کا

اس شوخ کا جسم ہے کہ ماجدؔ

موزوں کوئی شعر ہے ولیؔ کا

ماجد صدیقی

رنج کا اور بھی سبب نکلا

فروری 27, 2017ماجد صدیقی،سخناب،غزللب،اب،تب،تعب،سب،سببadmin

ماجد صدیقی ۔ غزل نمبر 156

اک تغافل ہی اُس کا کب نکلا

رنج کا اور بھی سبب نکلا

غیر بھی ہم سے جب ہُوا رسوا

دل میں کانٹا تھا جو وہ تب نکلا

آپ کچھ کہہ کے مطمئن تو ہوئے

شکر ہے آپ کا تعب نکلا

بات جب چھڑ گئی شقاوت کی

دل میں جو تھا غبار سب نکلا

پنجۂ موجِ درد سے مَیں بھی

بچ گیا گرچہ جاں بہ لب نکلا

کیا مسافت کرے گا طے ماجدؔ

دن چڑھے تُو جو گھر سے اَب نکلا

ماجد صدیقی

پھر یاد گئے زمانے آئے

فروری 27, 2017ماجد صدیقی،سخناب،غزلاڑانے،بہانے،بندھانے،بجھانے،تھپتھپانے،دکھانے،زمانےadmin

ماجد صدیقی ۔ غزل نمبر 157

آنکھوں میں شرر سجانے آئے

پھر یاد گئے زمانے آئے

نخوت ہی بھلے جتانے آئے

آئے وہ کسی بہانے آئے

وہ لکّۂ ابر اِس بدن کی

کب پیاس بھلا بجھُانے آئے

احباب جتا کے عجز اپنا

دل اور مرا دکھانے آئے

تھا چارۂ درد جن کے بس میں

ڈھارس بھی نہ وہ بندھانے آئے

چھُوتے ہی سرِ شجر ثمر کو

ہر شخص ہمیں اُڑانے آئے

بالک سے، تمہارے دل کو ماجدؔ!

ہے کون جو تھپتھپانے آئے

ماجد صدیقی

لاحق ہونے کو ہے کیا آزار مجھے

فروری 27, 2017ماجد صدیقی،سخناب،غزلمنجدھار،آزار،بار،تار،دربارadmin

ماجد صدیقی ۔ غزل نمبر 158

آگ نظر آتا ہے ہر گلزار مجھے

لاحق ہونے کو ہے کیا آزار مجھے

شاید یوں تن کی عریانی ڈھانپ سکوں

بُننے ہیں اس پر ریشم کے تار مجھے

گرد کی چادر، زخم بریدہ شاخوں کے

موسم نے کیا برگ دئیے کیا بار مجھے

سیکھا مَیں نے جب سے فن تیراکی کا

روز پکارے ساحل سے منجدھار مجھے

ماجدؔ میرا روگ ہے رفعت ماتھے کی

راس نہیں آتا کوئی دربار مجھے

ماجد صدیقی

دیکھ سارے شہر کا نقشہ بدل جانے لگا

فروری 27, 2017ماجد صدیقی،سخناب،غزلچل،نگل،اچھل،بدل،جلadmin

ماجد صدیقی ۔ غزل نمبر 159

آنگنوں سے چاند پھر آگے نکل جانے لگا

دیکھ سارے شہر کا نقشہ بدل جانے لگا

ہم بھلا تصویر کیا کھینچیں گرفتِ وقت کی

سانپ چڑیا کو سلامت ہی نِگل جانے لگا

دل تمّنا کے بر آنے پر ہے یُوں مسرور سا

جس طرح سِکّہ کوئی کھوٹا ہو چل جانے لگا

زور وُہ اب کے دکھایا ہے ہمیں امواج نے

تختۂ جاں تک بدن سے ہے اچھل جانے لگا

چرخ سے وُہ حدّتیں برسیں کہ اَب ایسا لگے

چاندنی سے بھی بدن جیسے ہو جل جانے لگا

چیونٹیوں سا تو بھلا درپے ہے کیوں اِس کوہ کے

کب مزاجِ دہر ہے ماجدؔ بدل جانے لگا

ماجد صدیقی

اُس پر کیا لکھا جانا ہے

فروری 27, 2017ماجد صدیقی،سخناب،غزلہوا،ہوتا،فرا،لہراتا،لیا،لیتا،لکھا،لگا،لگتا،لٹکا،ملا،ملتا،مکرا،مٹتا،چلا،نکلا،چکا،چھنتا،چبھتا،چتا،چرچا،ڈھلتا،ڈرتا،کہتا،کیا،کھلواتا،کھلا،کھڑا،کرتا،گیا،ٹوٹا،ٹھہرا،ٹپکا،ٹھٹکا،پیا،پڑا،پایا،آتا،الجھا،اچّھا،اڑا،اگا،اٹکا،اٹھتا،اپنا،بچھا،بنا،بکتا،بپا،بھرا،بھرتا،بانٹا،تلتا،جلتا،جیسا،جھڑتا،جھپٹا،جانا،خدا،دہرایا،دیکھا،دیا،دیتا،رہا،رکھا،رستہ،رستا،سہا،سیکھا،سا،سجاadmin

ماجد صدیقی ۔ غزل نمبر 160

کورا کاغذ سوچ رہا ہے

اُس پر کیا لکھا جانا ہے

نرخ نہیں گو ایک سے لیکن

ہر انسان یہاں بِکتا ہے

کون ہے گالی سُن کر جس کے

ہونٹوں سے امرت ٹپکا ہے

دشتِ طلب میں بِن کُتّوں کے

کس کے ہاتھ شکار لگا ہے

اپنی چال سلامت رکھنے

شیر ہرن پر ٹوٹ پڑا ہے

کُود کے جلتی آگ میں دیکھو

پروانہ گلزار بنا ہے

ٹھیک ہے گر بیٹا یہ سوچے

اُس نے باپ سے کیا پایا ہے

پکڑا جانے والا ہی کیوں

تنہا دم مجرم ٹھہرا ہے

جس نے بھی جاں بچتی دیکھی

تنکوں تک پر وہ اٹکا ہے

مجرم نے پچھلی پیشی پر

جو بھی کہا اُس سے مُکرا ہے

خالق اپنی خلق سے کھنچ کر

عرش پہ جانے کیا کرتا ہے

بہلانے مجھ بچّے کو وہ

جنت کا لالچ دیتا ہے

پیڑ زبانوں کو لٹکائے

دشت سے جانے کیا کہتا ہے

دیواروں سے ڈرتا ہو گا

کہنے والا کیوں ٹھٹکا ہے

موجِ الم نے کھول کے بازو

مجھ کو جیسے بھنچ لیا ہے

اُتنا ہی قد کاٹھ ہے اُس کا

جتنا جس کو ظرف ملا ہے

کس کو اَب لوٹانے جائیں

گردن میں جو طوق پڑا ہے

ٹہنی عاق کرے خود اُس کو

پھول وگرنہ کب جھڑتا ہے

جینے والا جانے کیونکر

موت کے در پر آن کھڑا ہے

صحرا کی بے درد ہوا نے

بادل کو کب رُکنے دیا ہے

دیکھوں اور بس دیکھو اُس کو

جانے اُس تصویر میں کیا ہے

کہنے کی باتیں ہیں ساری

زخمِ رگِ جاں کب بھرتا ہے

رُت کی خرمستی یہ جانے

پودا کیسے پیڑ بنا ہے

برق اور رعد کے لطف و کرم سے

گلشن کو کب فیض ملا ہے

لوٹایا اِک ڈنک میں سارا

سانپ نے جتنا دُودھ پیا ہے

ربط نہیں اُس سے اتنا بھی

شہر میں جتنا کچھ چرچا ہے

بند کلی چُپ رہنا اُس کا

لب کھولے تو پھولوں سا ہے

برگ و ثمر آنے سے پہلے

شاخ نے کیا کیا جبر سہا ہے

گُل برساتا ہے اوروں پر

وُہ جو زخم مجھے دیتا ہے

کوہِ قاف سے اِس جانب وہ

ڈھونڈوں بھی تو کب ملتا ہے

اُس کی دو رنگی مت پُوچھو

کالر پر جو پھول سجا ہے

رسّی کی شِشکار ہے پیچھے

کھیت کنارے جال بِچھا ہے

ڈس لیتا ہے سانپ جسے بھی

رَسّی تک سے وہ ڈرتا ہے

قبرپہ جل مرنے والے کی

ایک دیا اب تک جلتا ہے

بانس انار سے آنکھ ملائے

اپنی قامت ناپ رہا ہے

موسیٰ ہر فرعون کی خاطر

مشکل سے نت نت آتا ہے

سارے ہونٹ سلے ہیں پھر بھی

گلیوں میں اک حشر بپا ہے

دھڑکن دھرکن ساز جدا ہیں

کس نے کس کا دُکھ بانٹا ہے

کرنا آئے مکر جسے بھی

زر کے ساتھ وُہی تُلتا ہے

خون میں زہر نہیں اُترا تو

آنکھوں سے پھر کیا رِستا ہے

ہم اُس سے منہ موڑ نہ پائے

پیار سے جس نے بھی دیکھا ہے

کون ہے وہ جو محرومی کی

تہمت اپنے سر لیتا ہے

کھُلتی ہے ہر آنکھ اُسی پر

غنچہ جب سے پھول بنا ہے

انساں اپنا زور جتانے

چاند تلک پر جا نکلا ہے

دل نے پھر گُل کھِل اُٹھنے پر

نام کسی کا دہرایا ہے

وقت صفائی مانگ کے ہم سے

کاہے کو مُنہ کھُلواتا ہے

ہم شبنم کے قطروں پرہی

سورج داتا کیوں جھپٹا ہے

فصلِ سکوں پر بُغض یہ کس کا

مکڑی بن کر آ ٹوٹا ہے

دل تتلی کا پیچھا کرتے

کن کانٹوں میں جا اُلجھا ہے

زخم اگر بھر جائے بھی تو

نقش کہاں اُس کا مٹتا ہے

انجانوں سا مجھ سے وُہ پوچھے

اُس سے مرا دل مانگتا کیاہے

پھول جھڑیں یا پتے سُوکھیں

موسم نے یہ کب دیکھا ہے

اَب تو دل کی بات اٹھاتے

لفظ بھی چھلنی سے چھنتاہے

تجھ بن جو منظر بھی دیکھیں

آنکھ میں کانٹوں سا چُبھتا ہے

کانوں کے دَر کھُل جائیں تو

پتھر تک گویا لگتا ہے

آنکھوں کی اِس جھیل میں جانے

کون کنول سا لہراتا ہے

دور فلک پر کاہکشاں کا

رنگ ترے سپنوں جیسا ہے

گلشن والے کب جانیں یہ

پنجرے میں دن کب ڈھلتا ہے

صبح اُسی کے صحن میں اُتری

جس کا دامن چاک ملا ہے

جانے کس خرمن پر پہنچے

تابہ اُفق جو کھیت ہرا ہے

مَیں وہ غار تمّنا کا ہوں

سورج جس سے رُوٹھ گیا ہے

جانے کیا کیا زہر نہ پی کر

انساں نے جینا سیکھا ہے

بحر پہ پُورے چاند کے ہوتے

پانی کیوں ٹھہرا ٹھہرا ہے

وہ کب سایہ سینت کے رکھے

رستے میں جو پیڑ اُگا ہے

اُس کا حسن برابر ہو تو

حرف زباں پر کب آتا ہے

دیکھنے پر اُس آئنہ رُو کے

پھولوں کا بھی رنگ اُڑا ہے

پھل اُترا جس ٹہنی پر بھی

پتھر اُس پر آن پڑا ہے

کب اوراق پُرانے پلٹے

وُہ کہ مجھے جو بھول چکا ہے

اپنی اپنی قبر ہے سب کی

کون کسی کے ساتھ چلا ہے

اَب تو اُس تک جانے والا

گستاخی کا ہی رستہ ہے

اُونٹ چلے ڈھلوان پہ جیسے

ایسا ہی کچھ حال اپنا ہے

لُٹ کے کہے یہ شہد کی مکھی

محنت میں بھی کیا رکھا ہے

کس نے آتا دیکھ کے مجھ کو

بارش میں در بھینچ لیا ہے

اُس سے حرفِ محبت کہنے

ہم نے کیا کیا کچھ لکھا ہے

دامن سے اُس شوخ نے مجھ کو

گرد سمجھ کر جھاڑ دیا ہے

فرق ہے کیوں انسانوں میں جب

سانس کا رشتہ اِک جیسا ہے

فرصت ہی کب پاس کسی کے

کون رُلانے بھی آتا ہے

یادوں کے اک ایک ورق پر

وُہ کلیوں سا کھِل اُٹھتا ہے

شیر بھی صید ہُوا تو آخر

دیواروں پر آ لٹکا ہے

نُچنے سے اِک برگ کے دیکھو

پیڑ ابھی تک کانپ رہا ہے

ایک ذرا سی چنگاری نے

سارا جنگل پھونک دیا ہے

لفظ سے پاگل سا برتاؤ

ساگر ناؤ سے کرتا ہے

بہلا ہے دل درد سے جیسے

بچہ کانچ سے کھیل رہا ہے

کڑوے پھل دینے والے کا

رشتہ باغ سے کب ملتا ہے

خدشوں میں پلنے والوں نے

سوچا ہے جو، وُہی دیکھا ہے

اپنے اپنے انت کو پانے

جس کو دیکھو دوڑ رہا ہے

زور آور سبزے نے دیکھو

بادل سے حق مانگ لیا ہے

کس رُت کے چھننے سے جانے

صحنِ گلستاں دشت ہوا ہے

ہونٹ گواہی دیں نہ کچھ اُس کی

دل میں جتنا زہر بھرا ہے

لفظ کے تیشے سے ابھرے جو

زخم وہی گہرا ہوتا ہے

آنکھ ٹھہرتی ہے جس پر بھی

منظر وُہ چھالوں جیسا ہے

بن کر کالی رات وہ دیکھو

کّوا چڑیا پر جھپٹا ہے

جتنا اپنے ساتھ ہے کوئی

اُتنا اُس کے ساتھ خُدا ہے

اونچی کر دے لو زخموں کی

پرسش وُہ بے رحم چِتا ہے

ساکت کر دے جو قدموں کو

جیون وُہ آسیب ہُوا ہے

دشت تھا اُس کا ہجر پہ ہم نے

یہ صحرا بھی پاٹ لیا ہے

مجھ سے اُس کا ذکر نہ چھیڑو

وہ جیسا بھی ہے اچّھا ہے

ساتھ ہمارے ہے وہ جب سے

اور بھی اُس کا رنگ کھُلا ہے

شاہی بھی قربان ہو اُس پر

ماجدؔ کو جو فقر ملا ہے

ماجد صدیقی

تھاموں قلم تو سادہ ورق بھی حسیں لگے

دسمبر 31, 2016ماجد صدیقی،تمازتیں،غزلنازنیں،آتشیں،انگبیں،جبیں،حسیں،زمیں،شبنمیںadmin

ماجد صدیقی ۔ غزل نمبر 1

ہر حرف تُجھ بدن کا نظر کے قریں لگے

تھاموں قلم تو سادہ ورق بھی حسیں لگے

آتا ہو چھُو کے جیسے ترے ہی جمال کو

اب کے تو ہر خیال مجھے شبنمیں لگے

چھایا ہے وُہ خمار تری صبحِ یاد کا

جو موجۂ صبا ہے مے و انگبیں لگے

شعلے تمام اس میں تری دید ہی کے ہیں

میری نگاہ کیوں نہ بھلا آتشیں لگے

انوار اور بھی تو پہنچ میں ہیں اب مری

کیوں کریہ ایک چاند ہی تیری جبیں لگے

میرے لُہو کا حسُن بھی جھلکے بہ حرف و صوت

ہاں اپنے ہاتھ تُجھ سا اگر نازنیں لگے

خوشبُو ہے اس میں رنگ ہیں، ندرت ہے تہ بہ تہ

ماجدؔ کا شعر تیرے بدن کی زمیں لگے

ماجد صدیقی

ہم اِک اُسی کی جستجو لئے نگر نگر گئے

دسمبر 31, 2016ماجد صدیقی،تمازتیں،غزلنکھر،نگر،کدھر،پر،جدھر،سحرadmin

ماجد صدیقی ۔ غزل نمبر 2

وُہ جس کے نین نقش اپنے ذہن میں اُتر گئے

ہم اِک اُسی کی جستجو لئے نگر نگر گئے

خیال قُرب اُسی کا سر پہ ابر سا جھُکا رہا

میانِ دشتِ روزگار ہم جدھر جدھر گئے

تھیں اُس کے مُڑ کے دیکھنے میں بھی عجب مسافتیں

حدوں سے شب کی ہم نکل کے جانبِ سحر گئے

دُھلے فلک پہ جس طرح شب سیہ کی چشمکیں

پسِ وصال ہم بھی کچھ اِسی طرح نکھر گئے

اُسی کی دید سے ہمیں تھے حوصلے اُڑان کے

گیا جو وہ تو جانئے کہ اپنے بال و پر گئے

وُہ جن کے چوکھٹوں میں عکس تھے مرے حبیب کے

وُہ ساعتیں کہاں گئیں وہ روز و شب کدھر گئے

ماجد صدیقی

لہو میں تلخیٔ شیریں دمِ وصال کی تھی

دسمبر 31, 2016ماجد صدیقی،تمازتیں،غزلمآل،ڈھال،وصال،گال،جال،زوال،سوالadmin

ماجد صدیقی ۔ غزل نمبر 3

نظر میں تازگی عُریانیٔ جمال کی تھی

لہو میں تلخیٔ شیریں دمِ وصال کی تھی

طلوع میں بھی مرے شوخیاں تو تھیں لیکن

مزہ تھا اُس میں جو ساعت مرے زوال کی تھی

وگرنہ تجھ سا طرحدار مانتا کب تھا

جو تھی تو اس میں کرامت مرے سوال کی تھی

بدستِ شوق فقط میں ہی تیغِ تیز نہ تھا

حیا کے ہاتھ میں صُورت تری بھی ڈھال کی تھی

فروِغ نُور تھا جس سے شبِ طلُوعِ بدن

سرِ چراغ وُہ سُرخی ترے ہی گال کی تھی

کنارِ شوق تلک شغلِ کسبِ لُطف گیا

کوئی بھی فکر نہ جیسے ہمیں مآل کی تھی

نہ جس سے تھی کبھی درکار مخلصی ماجدؔ

گرفت مجھ پہ وہ کرنوں کے نرم جال کی تھی

ماجد صدیقی

آؤ کہ جسم و جاں کے شگوفے کھلائیں ہم

دسمبر 31, 2016ماجد صدیقی،تمازتیں،غزلکھلائیں،گنگنائیں،آئیں،اٹھائیں،جلائیں،جائیں،دکھائیںadmin

ماجد صدیقی ۔ غزل نمبر 4

نِکھری رُتوں کا حسن‘ فضا سے چرائیں ہم

آؤ کہ جسم و جاں کے شگوفے کھلائیں ہم

بیدار جس سے خُفتہ لُہو ہو ترنگ میں

ایسا بھی کوئی گیت کبھی گنگنائیں ہم

رچتی ہے جیسے پھوُل کی خوشبُو ہواؤں میں

اِک دُوسرے میں یُوں بھی کبھی تو دَر آئیں ہم

اِخفا سہی پہ کچھ تو سپُردِ قلم بھی ہو

دیکھا ہے آنکھ سے جو سبھی کو دکھائیں ہم

ہو تُجھ سا مدّعائے نظر سامنے تو پھر

ساحل پہ کشتیوں کو نہ کیونکر جلائیں ہم

منصف ہے گر تو دل سے طلب کر یہ فیصلہ

تُجھ سے بچھڑ کے کون سے زنداں میں جائیں ہم

ایسا نہ ہو کہ پھر کبھی فرصت نہ مل سکے

ماجدؔ چلو کہ فصلِ تمّنا اٹھائیں ہم

ماجد صدیقی

پھرفکر و نظر میں زلزلہ ہے

دسمبر 31, 2016ماجد صدیقی،تمازتیں،غزلکھلا،ادا،بجھا،دیا،روا،زلزلہ،صداadmin

ماجد صدیقی ۔ غزل نمبر 5

مجھ سے وُہ بچھڑ کے پھر چلا ہے

پھرفکر و نظر میں زلزلہ ہے

بے نطق نہیں نگاہ اپنی

بے تاب لُہو کی یہ صدا ہے

میں آگ تھا پر سُخن نے اُس کے

گلزار مجھے بنا دیا ہے

شیریں ہے ہر ایک بات اُس کی

وہ جو بھی کہے اُسے روا ہے

یہ دل کہ حزیں ہے مدّتوں سے

پُوچھا نہ کسی نے کیوں بُجھا ہے

ممکن نہیں اُس تلک رسائی

اُس شخص کی اور ہی ادا ہے

لکھا ہے یہ اُس کا نام ماجِد

یا پھول سرِورق کھلا ہے

ماجد صدیقی

کسی پہلو تو ذکرِ گل رُخاں ہو

دسمبر 31, 2016ماجد صدیقی،تمازتیں،غزلپرنیاں،جاں،رواں،رخاں،زباں،ضوفشاںadmin

ماجد صدیقی ۔ غزل نمبر 6

مہک ہو یا میانِ لب فغاں ہو

کسی پہلو تو ذکرِ گل رُخاں ہو

زباں سے کُچھ سوا لطفِ بدن ہے

سراپا تم حریر و پرنیاں ہو

تمہارے حق میں کیا جانوں کہوں کیا

سُرورِ چشم ہو تم لطفِ جاں ہو

لپک کر لیں جسے پانی کی لہریں

کنارِ آب وہ سروِ رواں ہو

مرے افکار کی بنیادِ محکم

مرے جذبات کی ناطق زباں ہو

کبھی ماجدؔ کے حرفوں میں بھی اُترو

بڑی مُدّت سے تنہا ضوفشاں ہو

ماجد صدیقی

لُہو میں اِک تلاطم نِت اُٹھانا

دسمبر 31, 2016ماجد صدیقی،تمازتیں،غزللانا،چہچہانا،چھپانا،اُٹھانا،اڑانا،سمانا،سکھاناadmin

ماجد صدیقی ۔ غزل نمبر 7

مچلنا، مُسکرانا، رُوٹھ جانا

لُہو میں اِک تلاطم نِت اُٹھانا

وُہی جس کی ہمیں پیہم لپک ہے

وُہی منظر نگاہوں سے چھپانا

ترستی ہے جسے اپنی سماعت

وُہی اک حرف ہونٹوں پر نہ لانا

تمہیں آتا ہے مرغِ آرزُو کے

پروں کو نوچ کر ہر سُو اڑانا

ٹھِٹھکنا قُرب سے فرمائشوں کی

سلیقے بُعد کے ہم کو سکھانا

جو کھنچنا تو رُتوں کو مات کرنا

قریب آنا تو رَگ رَگ میں سمانا

پتہ دیتا ہے ماجدؔ کو ترا ہی

یہ مرغانِ نفس کا چہچہانا

ماجد صدیقی

رگوں میں مچلتی تمازت کبھی تو زباں پر بھی لاؤ

دسمبر 31, 2016ماجد صدیقی،تمازتیں،غزللاؤ،کھاؤ،اُٹھاؤ،سناؤ،سجاؤ،سراؤ‘‘admin

ماجد صدیقی ۔ غزل نمبر 8

لبوں کے اُفق پر دمکتا ہُوا کوئی سورج اُگاؤ

رگوں میں مچلتی تمازت کبھی تو زباں پر بھی لاؤ

ہواؤں میں اپنی مہک کب تلک یوں بکھرنے نہ دو گے

حجاب اِس طرح کے ہیں جتنے بھی وہ درمیاں سے اُٹھاؤ

تمہیں کتنی حسرت سے کہتی ہے میری یہ تشنہ سماعت

بھنچے ہیں جو لب تو نگاہوں سے ہی کوئی نغمہ سناؤ

وہی جو گرہ ہے تمہارے مرے عہدِ وابستگی کی

وہ انگشتری بھی کبھی وقت کی انگلیوں میں سجاؤ

یہ تنہا روی ترک کر دو کہ اِس میں فقط ٹھوکریں ہیں

مکّرر جسے جسم چاہے کوئی ضرب ایسی بھی کھاؤ

بُلاتی ہے خود ابر کو دیکھ لو اپنی جانب یہ کھیتی

تمہارا بدن کہہ رہا ہے ’’لُہو میں مرے سر سراؤ‘‘

بُہت سینچ بیٹھے ہو ماجدؔغزل کو نمِ دردِ جاں سے

اگر ہو سکے تو ذرا اِس میں من کے تقاضے بھی لاؤ

ماجد صدیقی

پھُول کھِل کھِل کے مجھے یاد دلائیں تیری

دسمبر 31, 2016ماجد صدیقی،تمازتیں،غزلہوائیں،قبائیں،مسائیں،ادائیں،بلائیں،دلائیں،صدائیںadmin

ماجد صدیقی ۔ غزل نمبر 9

لے کے پھرتی ہیں رُتیں شوخ ادائیں تیری

پھُول کھِل کھِل کے مجھے یاد دلائیں تیری

تیرے پیکر کا گماں یُوں ہے فضا پر جیسے

پالکی تھام کے پھرتی ہوں ہوائیں تیری

دَھج ترے حُسن کی جادو نہ جگائے کیونکر

رنگ کرنوں کا ہے خوشبُو کی قبائیں تیری

دل کی دھڑکن کو بھی آہنگ دلائیں تازہ

یہ کھنکتی سی لپکتی سی صدائیں تیری

یہ الگ بات کہ تُو مجھ کو نہ پہچان سکے

ہیں تمنّائیں مری ہی تو ادائیں تیری

میرے جذبات کہ رقصاں ہیں بہ چشم و لب و دل

دیکھ یہ مور بھی لیتے ہیں بلائیں تیری

دُور رہ سکتی ہیں ماجدؔ کے قلم سے کیسے

نقشِ چغتائی سی صبحیں یہ مسائیں تیری

ماجد صدیقی

لفظ مُنہ پر کوئی تو آنے دو

دسمبر 31, 2016ماجد صدیقی،تمازتیں،غزلآنے،بچھانے،بنانے،بجانے،جگمگانے،دلانے،سمانےadmin

ماجد صدیقی ۔ غزل نمبر 10

گنگُ جذبوں کو چہچہانے دو

لفظ مُنہ پر کوئی تو آنے دو

پھینک کر اب کے آخری پتّا

کھیل کو رُخ نیا دلانے دو

سیج پر شاخِ آرزُو سے گری

پتّیاں تُم مجھے بچھانے دو

وقت کے جلترنگ سے نہ ڈرو

اِس کو یہ ساز اب بجانے دو

جن پہ سُورج کبھی نہیں اُبھرا

وُہ اُفق اب کے جگمگانے دو

یہ اعادہ ہی بچپنے کا سہی

کُچھ گھروندے مگر بنانے دو

اشک دے گا پتہ ضرور اپنا

خاک میں یہ نمی سمانے دو

ماجد صدیقی

پگھلے بدن کے ساتھ مجھے تُو کہے گا کیا

دسمبر 31, 2016ماجد صدیقی،تمازتیں،غزلملے،ڈھلے،کہے،کھلے،اٹھے،رہےadmin

ماجد صدیقی ۔ غزل نمبر 11

گھِر کر بہ سحرِ قُرب بھلا اب کھنچے گا کیا

پگھلے بدن کے ساتھ مجھے تُو کہے گا کیا

خاموش کیوں ہے دے بھی مُجھے اِذنِ سوختن

شُعلہ نظر سے اور بھی کوئی اُٹھے گا کیا

یہ ولولہ مرا کہ ضیا بار تُجھ پہ ہَے

سُورج ہے گر تو میرے اُفق سے ڈھلے گا کیا

خواہش کا چاند آ ہی گیا جب سرِ اُفق

باقی کوئی حجاب بھلا اب رہے گا کیا

یہ لطفِ دید، یہ ترا پیکر الاؤ سا

منظر نگاہ پر کوئی ایسا کھُلے گا کیا

کرتا ہے کیُوں سخن میں عبث نقش کاریاں

ماجدؔ صلہ بھی کوئی تُجھے کچھ ملے گا کیا

ماجد صدیقی

دیکھو تو بدن ہم دونوں کے کیسے باہم دوچار ہوئے

دسمبر 31, 2016ماجد صدیقی،تمازتیں،غزلچار،پراسرار،آزار،بار،دوچار،غمخوارadmin

ماجد صدیقی ۔ غزل نمبر 12

کس اَن ہونی کے ہونے سے یُوں مطلعِٔ صدا انورا ہوئے

دیکھو تو بدن ہم دونوں کے کیسے باہم دوچار ہوئے

کمیاب تھی ساعتِ قرب تری کیا کُچھ نہ ہُوا جب دَر آئی

ہم چاند بنے ہم مہر ہوئے ہم نُور بنے ہم نار ہوئے

سادہ سا وُہ حرفِ اذن ترا اور مہلت پھر یکجائی کی

فرصت تو فقط اِک شب کی تھی پر دور بڑے آزار ہوئے

باوصفِ کرم، جو الجھن تھی وُہ اور کسی ڈھب جا نہ سکی

آخر کچھ وحشی جذبے ہی ہم دونوں کے غمخوار ہوئے

کیا چیت کی رُت اور کیا ساون جب سے دیکھا ہے اساڑھ ترا

سُونا ہے نگاہوں کا آنگن سب موسم اِس پر بار ہوئے

مُدّت سے ترستے تھے دِل میں جو لذّتِ یکدم کو ماجدؔ

تسکین ملے پر وُہ جذبے آخر کیُوں پُراسرار ہوئے

ماجد صدیقی

یوں بھی ہم تُم کبھی مِلا کرتے

دسمبر 31, 2016ماجد صدیقی،تمازتیں،غزلملا،وار،کھلا،ادا،بجھا،دعا،سناadmin

ماجد صدیقی ۔ غزل نمبر 13

کُھل کے اظہارِ مدّعا کرتے

یوں بھی ہم تُم کبھی مِلا کرتے

مانگتے گر کبھی خُدا سے تمہیں

لُطف آتا ہمیں دُعا کرتے

سج کے اک دُوسرے کے ہونٹوں پر

ہم بھی غنچہ صفت کھِلا کرتے

ہم پئے لُطف چھیڑ کر تُجھ کو

جو نہ سُننا تھا وُہ سُنا کرتے

جگنوؤں سا بہ سطحِ یاد کبھی

ٹمٹماتے، جلا بُجھا کرتے

بہر تسکینِ دیدہ و دل و جاں

رسمِ ناگفتنی ادا کرتے

پُھول کھِلتے سرِ فضا ماجدؔ

ہونٹ بہرِ سخن جو وار کرتے

ماجد صدیقی

جو حرفِ لطف ہے وہی کنجِ دہن میں ہے

دسمبر 31, 2016ماجد صدیقی،تمازتیں،غزلپیرہن،ختن،دہن،دمن،دبن،زقن،سخنadmin

ماجد صدیقی ۔ غزل نمبر 14

کس مہر کا ہے عکس کہ تیرے بدن میں ہے

جو حرفِ لطف ہے وہی کنجِ دہن میں ہے

دیکھے سے جس کے سِحر زدہ ہو ہر اک نگاہ

سربستگی سی کیا یہ ترے پیرہن میں ہے

رنگینیاں تجھی میں چمن کے جمال کی

اور سادگی وہی کہ جو کوہ و دمن میں ہے

ہر اوجِ آرزُو ہے نثار اِس نشیب پر

رفعت نہ جانے کیا ترے چاہِ زقن میں ہے

خنکی تو خیر جسم کی رشکِ چمن سہی

حدّت بھی اس طرح کہ کہاں دشت دبن میں ہے

حسرت سے دیکھتی ہیں سوالی رُتیں تجھے

کیا تازگی یہ تیری نظر کے ختن میں ہے

اُمڈے ہے حرف حرف میں کس شہ پہ اِن دنوں

ماجدؔ یہ لطفِ خاص جو تیرے سخن میں ہے

ماجد صدیقی

کمیاب ہے لعلِ ناب سا وُہ

دسمبر 31, 2016ماجد صدیقی،تمازتیں،غزلنقاب،ناب،گلاب،آب،حباب،خواب،سراب،طناب،عتابadmin

ماجد صدیقی ۔ غزل نمبر 15

سر سے تا پا حجاب سا وُہ

کمیاب ہے لعلِ ناب سا وُہ

اُبھرے بھی جو سطحِ آرزُو پر

رُوکے نہ رُکے حباب سا وُہ

خوشبُو سا خیال میں دَر آئے

آنکھوں میں بسے گلاب سا وُہ

سب تلخ حقیقتوں پہ حاوی

رہتا ہے نظر میں خواب سا وُہ

حاصل ہے سرشکِ لالہ رُو کا

محجوب سا‘ دُرِّ آب سا وُہ

چھایا ہے بہ لُطف ہر ادا سے

خواہش پہ مری نقاب سا وُہ

ہُوں جیسے، اُسی کے دم سے قائم

تھامے ہے مجھے طناب سا وُہ

بارانِ کرم مرے لئے ہے

غیروں کے لئے عتاب سا وُہ

ماجدؔ ہو یہ جسُتجو مُبارک

ہاتھ آ ہی گیا سراب سا وُہ

ماجد صدیقی

آغوش سے چاند بن کے ڈھلنا

دسمبر 31, 2016ماجد صدیقی،تمازتیں،غزلمسلنا،نکلنا،ڈھلنا،اُچھلنا،اُگلنا،بدلنا،سنبھلناadmin

ماجد صدیقی ۔ غزل نمبر 16

سورج سا نگاہ میں مچلنا

آغوش سے چاند بن کے ڈھلنا

چھپنا پسِ ابر چاند جیسا

لہروں سا سرِ نظر اُچھلنا

ہیں شاخِ نظر کے یہ تقاضے

یہ برگ نہ ہاتھ سے مسلنا

انمول ہیں سب گِلے یہ تیرے

یہ لعل لبوں سے پھر اُگلنا

مشکل ہے بغیرِ قرب تیرے

اِس رُوح و بدن کا اب سنبھلنا

یہ اذنِ طرب ترے لبوں پر

خوشبو کا کلی سے ہے نکلنا

موزوں ہے سخن تجھے یہ ماجدؔ

پہلو کوئی اور مت بدلنا

ماجد صدیقی

تُجھ سے ملے تو ابرِ گہر بار ہو گئے

دسمبر 31, 2016ماجد صدیقی،تمازتیں،غزلپرستار،انوار،اظہار،بار،ثمردار،جگردارadmin

ماجد صدیقی ۔ غزل نمبر 17

سب سرحدوں سے شوق کی ہم پار ہو گئے

تُجھ سے ملے تو ابرِ گہر بار ہو گئے

ہر جنبشِ بدن کے تقاضے تھے مختلف

جذبے تمام مائلِ اظہار ہو گئے

زندہ رہے جو تُجھ سے بچھڑ کر بھی مُدّتوں

ہم لوگ کس قدر تھے جگردار ہو گئے

اپنے بدن کے لمس کی تبلیغ دیکھنا

ہم سحرِ آذری کے پرستار ہو گئے

دو وقت، دو بدن تھے، کہ جانیں تھیں دو بہم

رستے تمام مطلعِٔ انوار ہو گئے

ماجد ہے کس کا فیضِ قرابت کہ اِن دنوں

پودے سبھی سخن کے ثمردار ہو گئے

ماجد صدیقی

چھب جو بھی ہے اُس کی آتشیں ہے

دسمبر 31, 2016ماجد صدیقی،تمازتیں،غزلنگیں،نشیں،وہیں،آتشیں،آستیں،حسیں،سرزمیںadmin

ماجد صدیقی ۔ غزل نمبر 18

زہر اب ہے، مے ہے، انگبیں ہے

چھب جو بھی ہے اُس کی آتشیں ہے

انوار ہی پھُوٹتے ہیں اُس سے

زرخیز بڑی وُہ سرزمیں ہے

جو ناز کرے اُسے روا ہے

وُہ شوخ ہے، شنگ ہے، حسیں ہے

ہالہ ہے کہ اُس کا ہے گریباں

مطلع ہے کہ اُس کی آستیں ہے

کیا ذکر ہو اُس کے آستاں کا

جو لطف ہے جانئے وہیں ہے

نسبت ہے یہی اب اُس سے اپنی

ہم خاتمِ چشم، وہ نگیں ہے

حرفوں سے جو منعکس ہے ماجدؔ

یہ بھی تو جمالِ ہم نشیں ہے

ماجد صدیقی

دل میں کچھ ہو تو اب سُجھاؤں تُجھے

دسمبر 31, 2016ماجد صدیقی،تمازتیں،غزلگنگناؤں،گدگداؤں،بساؤں،دلاؤں،سناؤں،سجھاؤں،سجاؤںadmin

ماجد صدیقی ۔ غزل نمبر 19

راکھ ہی راکھ کیا دکھاؤں تُجھے

دل میں کچھ ہو تو اب سُجھاؤں تُجھے

ہو میّسر کبھی جو قرب ترا

ہر رگِ جاں سے گنگناؤں تُجھے

شوخیٔ لب سے طیش میں لاؤں

اِن نگاہوں سے گدگداؤں تُجھے

تو کہ عنواں ہے چاہتوں کا مری

آ، بہ شاخِ نظر سجاؤں تُجھے

لطف اِن رفعتوں کا لے تو کبھی

آ، دل و چشم میں بساؤں تُجھے

تُو ہے خوشبو تو میں ہوں موجِ صبا

آ، ترا مرتبہ دلاؤں تُجھے

آ، کہ لکھا ہے جو لُہو میں مرے

قصّۂ دردِ جاں سناؤں تُجھے

ماجد صدیقی

پلکوں پہ وُہ جھلمل سے سارے، مری توبہ

دسمبر 31, 2016ماجد صدیقی،تمازتیں،غزلکنارے،آرے،اشارے،تمہارے،دھارے،سارےadmin

ماجد صدیقی ۔ غزل نمبر 20

رنجش میں پسِ چشم اشارے، مری توبہ

پلکوں پہ وُہ جھلمل سے سارے، مری توبہ

کس درجہ سبکسار کیا، جذبِ جنوں کو

محفل سے وُہ رخصت کیا اِشارے، مری توبہ

اظہارِ تمّنا ہی کیا تھا مگر اُس پر

انداز عتابی وہ تمہارے، مری توبہ

سُرخی سی لب و چشم میں وہ طیش و حیا کی

بپھرے ہوئے دریا کے کنارے، مری توبہ

اک شور سا رَگ رَگ میں، تمازت دل و جاں میں

آثار قیامت کے وُہ سارے، مری توبہ

جو پیکرِ اُمید تھا دل میں وُہی شق تھا

تھیں شوخ نگاہیں کہ وُہ آرے، مری توبہ

ماجدؔ سرِ اغیار جو گزری وُہی لکھے

کیا رُوپ قلم نے ترے دھارے، مری توبہ

ماجد صدیقی

وُہ مہرباں تھا تو کیں ہم نے وحشتیں کیا کیا

دسمبر 31, 2016ماجد صدیقی،تمازتیں،غزلقباحتیں،لذّتیں،مہلتیں،وحشتیں،کونپلیں،تمازتیں،خواہشیںadmin

ماجد صدیقی ۔ غزل نمبر 21

دمِ وصال پھلانگی گئیں حدیں کیا کیا

وُہ مہرباں تھا تو کیں ہم نے وحشتیں کیا کیا

ہر اِک کے نفس تھا کوئی موجۂ صبا جیسے

لبوں کے بیچ در آئی تھیں کونپلیں کیا کیا

رُوئیں رُوئیں کو زباں بحش دی تھی اُس نے مگر

وضاحتوں میں تھیں پھر بھی قباحتیں کیا کیا

لہُو میں آگ، شرارے نظر میں تھے اپنی

مچل اُٹھی تھیں بدن میں تمازتیں کیا کیا

یہ تن کہ جیسے چٹخنے کو جامِ مے ہو کوئی

لب و نگاہ میں رقصاں تھیں خواہشیں کیا کیا

ہُوا مباح ہمیں جو بھی کچھ کہ تھا ممنوع

ملیں بہ جنبشِ اَبُرد دُہ مہُلتیں کیا کیا

دل و نظر میں ابھی تک ہیں خنکیاں ماجدؔ

نجانے قرب میں تھیں اُس کے لذّتیں کیا کیا

ماجد صدیقی

چاہتی ہے نظر ہر سماں دیکھنا

دسمبر 31, 2016ماجد صدیقی،تمازتیں،غزلنشاں،پرنیاں،آسماں،بدگماں،جہاں،جاں،دھواں،زباں،سماںadmin

ماجد صدیقی ۔ غزل نمبر 22

حُسن اُس کا بحّدِ نہاں دیکھنا

چاہتی ہے نظر ہر سماں دیکھنا

کیُوں نہ ہم اِس ادا پر ہی مرتے رہیں

چھیڑنا اور اُسے بدگماں دیکھنا

کنجِ لب جیسے کھڑکی کُھلے خُلد کی

قامت و قد کو طوبیٰ نشاں دیکھنا

ہائے وُہ ہاتھ جن کی ہے تحریر وُہ

حرف در حرف مخفی جہاں دیکھنا

اُس کے رُخ پرنظر کا نہ ٹِکنا تو پھر

دفعتاً جانبِ آسماں دیکھنا

اُس کے پیکر سے اپنی یہ وابستگی

گنگُ لمحوں کے منہ میں زباں دیکھنا

آنکھ سے تو شراروں کا جھڑنا بجا

لمس تک سے بھی اُٹھتے دُھواں دیکھنا

نازکی اُس کی اور تشنگی شوق کی

نوک پر خار کی پرنیاں دیکھنا

اس بیاں پر نہ معتوب ٹھہرو کہیں

دیکھنا ماجدِ خستہ جاں دیکھنا

ماجد صدیقی

حشر اِس دل میں اُٹھائے کیا کیا

دسمبر 31, 2016ماجد صدیقی،تمازتیں،غزلکھلائے،گنوائے،اٹھائے،جلائے،جگائے،دکھائے،سجائےadmin

ماجد صدیقی ۔ غزل نمبر 23

خود کو ہم سے وُہ چھپائے کیا کیا

حشر اِس دل میں اُٹھائے کیا کیا

دمبدم اُس کی نظر کا شعلہ

مشعلیں خوں میں جلائے کیا کیا

ہم نے اُس کے نہ اشارے سمجھے

لعل ہاتھوں سے گنوائے کیا کیا

گلُ بہ گلُ اُس کے فسانے لکھ کر

درد موسم نے جگائے کیا کیا

لفظ اُس شوخ کے عشووں جیسے

ہم نے شعروں میں سجائے کیا کیا

حرف در حرف شگوفے ہم نے

اُس کے پیکر کے، کھلائے کیا کیا

لُطف کے سارے مناظر ماجدؔ

جو بھی دیکھے تھے دکھائے کیا کیا

ماجد صدیقی

دِل میں جو بات ہے ہونٹوں پہ بھی لایا کیجے

دسمبر 31, 2016ماجد صدیقی،تمازتیں،غزللایا،چلایا،اڑایا،جگایا،دکھایا،سنایاadmin

ماجد صدیقی ۔ غزل نمبر 24

حدّتِ خوں کے تقاضے نہ چھپایا کیجے

دِل میں جو بات ہے ہونٹوں پہ بھی لایا کیجے

سرد مہری سا بُرا وار نہ کیجے ہم پر

جانبِ غیر ہی یہ تِیر چلایا کیجے

یہ جنہیں مطلعِٔ انوار سمجھتے ہیں سبھی

ان لبوں سے کوئی مژدہ بھی سُنایا کیجے

حاصلِ عمر ہے یہ حرف، میانِ لب و چشم

خواہش قرب نہ باتوں میں اُڑایا کیجے

تشنگی جس سے کبھی دیدۂ باطن کی مِٹے

ایسا منظر بھی کبھی کوئی دکھایا کیجے

سامنا پھر نہ کسی لمحۂ گُستاخ سے ہو

دل میں سوئے ہوئے ارماں نہ جگایا کیجے

ہم مصوّر تجھے ٹھہرائیں کہ شاعر ماجدؔ

عکسِ جاناں ہی بہ ہر حرف نہ لایا کیجے

ماجد صدیقی

رات بھر ہم نکھرتے سنورتے رہے

دسمبر 31, 2016ماجد صدیقی،تمازتیں،غزلمرتے،نکھرتے،گزرتے،ابھرتے،اترتے،بکھرتے،سنورتےadmin

ماجد صدیقی ۔ غزل نمبر 25

چاہتوں میں نئے رنگ بھرتے رہے

رات بھر ہم نکھرتے سنورتے رہے

اُس سے نسبت تھی جیسے شب و ماہ سی

نِت نئے طور سے ہم نکھرتے رہے

تن بدن اُس کا اِک لوح تھا جس پہ ہم

حرفِ تازہ بنے نِت اُبھرتے رہے

جیسے اُس کی مہک ہی سے سرشار تھے

پاس سے جو بھی جھونکے گزرتے رہے

ہم کو یک جا کیا اُس زرِ خاص نے

ہم کہ سیماب آسا بکھرتے رہے

نشۂ قرب سے جیسے باہم دگر

جان و دل میں، رگوں میں اُترتے رہے

اَب تو اپنا ہے ماجدؔ وُہ جس کے لئے

ہم بصد آرزُو روز مرتے رہے

ماجد صدیقی

ہو ترا کرم اَب کے

دسمبر 31, 2016ماجد صدیقی،تمازتیں،غزلنم،کم،کرم،بہم،خم،دمadmin

ماجد صدیقی ۔ غزل نمبر 26

چاہتے ہیں ہم اَب کے

ہو ترا کرم اَب کے

لُوٹنے کو جی چاہے

لطفِ کیف و کم اَب کے

حبس وُہ لُہو میں ہے

گھُٹ رہا ہے دم اَب کے

مثلِ ماہ و شب ہم بھی

کیوں نہ ہوں بہم اَب کے

کُچھ تو محو ہونے دے

ابروؤں کے خم اَب کے

پوچھتی ہے کیا ماجدؔ

موسموں کی نم اَب کے

ماجد صدیقی

نہ سہی پہ کُچھ تو ترا جواب ہے سامنے

دسمبر 31, 2016ماجد صدیقی،تمازتیں،غزلکتاب،گلاب،اضطراب،جواب،خواب،سحاب،طنابadmin

ماجد صدیقی ۔ غزل نمبر 27

جو نہیں ہے تُو، تو یہ ماہتاب ہے سامنے

نہ سہی پہ کُچھ تو ترا جواب ہے سامنے

ہے رواں لُہو میں ترے ہی لمس کا ذائقہ

شب و روز اک یہی عکسِ خواب ہے سامنے

وُہی جس کی آس مشامِ جاں کو رہی سدا

سرِ شاخِ شب وُہ کھِلا گلاب ہے سامنے

تری دید ہے کہ نظر میں حرف سُرور کے

ترا قرب ہے کہ کھُلی کتاب ہے سامنے

یہی شے تو وجہِ قیام خیمۂ لُطف ہے

یہ جو دو حدوں میں تنی طناب ہے سامنے

ہے تجھی سی پیاس اِسے بھی لختِ زمین جاںِ

یہی جو نظر میں تری سحاب ہے سامنے

وُہی کھو گئی تھی جو تُجھ سے ماجدِ ؔ بے سکوں

وُہی دیکھ! ساعتِ اضطراب ہے سامنے

ماجد صدیقی

مَیں بدن کا ترے کھُلتا ہوا منظر دیکھوں

دسمبر 31, 2016ماجد صدیقی،تمازتیں،غزلمنظر،محشر،پر،اودھر،اژدر،اخگر،برابر،درadmin

ماجد صدیقی ۔ غزل نمبر 28

جب بھی دیکھوں یہ فلک، اَبر ہٹا کر دیکھوں

مَیں بدن کا ترے کھُلتا ہوا منظر دیکھوں

گلشنِ حُسن پہ ہو راج اِسی کا جیسے

ان دنوں مرغِ طلب کو وُہ لگے پر دیکھوں

اوج کے لمس سے پہنچوں بہ سرِ چشمۂ لُطف

پر جو اِیدھر سے اُتر پاؤں تو اُودھر دیکھوں

میری حیرت سے کھلے تُجھ پہ ترا حُسن مگر

آئنوں سا میں جبھی تُجھ کو برابر دیکھوں

لب پہ رقصاں ہے مرے، ہے جو پسِ چشم اُدھر

اِس شرارت میں بپا کتنے ہی محشر دیکھوں

بِین سا سامنے جس کے ترا پیکر گونجے

خواب میں بھی ترے آنگن میں وہ اژدر دیکھوں

شعبدہ ہے، کہ تقاضا یہ تری دید کا ہے

ہر بُنِ مُو میں سمائے ہوئے اخگر دیکھوں

اِک لب و چشم تو کیا اِن کے سوا بھی ماجدؔ

جذبۂ شوق کے کیا کیا نہ کھلے در دیکھوں

ماجد صدیقی

نظر میں کیا یہ الاؤ جلا دئیے تُو نے

دسمبر 31, 2016ماجد صدیقی،تمازتیں،غزلہلا،منا،کھلا،اٹھا،بھلا،جلا،سکھاadmin

ماجد صدیقی ۔ غزل نمبر 29

جو سو چکے تھے وُہ جذبے جگا دئیے تُو نے

نظر میں کیا یہ الاؤ جلا دئیے تُو نے

شگفتِ تن سے، طلوعِ نگاہِ روشن سے

تمام رنگ رُتوں کے بھلا دئیے تُو نے

تھا پور پور میں دیپک چھُپا کہ لمس ترا

چراغ سے رگ و پے میں جلا دئیے تُو نے

لباسِ ابر بھی اُترا مِہ بدن سے ترے

حجاب جو بھی تھے حائل اُٹھا دئیے تُو نے

ذرا سے ایک اشارے سے یخ بدن کو مرے

روانیوں کے چلن سب سِکھا دئیے تُو نے

کسی بھی پل پہ گماں اب فراق کا نہ رہا

خیال و خواب میں وہ گُل کھلا دئیے تُو نے

جنم جنم کے تھے سُرتال جن میں خوابیدہ

کُچھ ایسے تار بھی اب کے ہلا دئیے تُو نے

سخن میں لُطفِ حقائق سمو کے اے ماجدؔ

یہ کس طرح کے تہلکے مچا دئیے تُو نے

ماجد صدیقی

رُوح میں تُجھ کو سمایا دیکھوں

دسمبر 31, 2016ماجد صدیقی،تمازتیں،غزلماتھا،چکھا،کیا،اترا،رستہ،سمایاadmin

ماجد صدیقی ۔ غزل نمبر 30

تن بدن لُطف سے نِکھرا دیکھوں

رُوح میں تُجھ کو سمایا دیکھوں

اشک در اشک ہوں عنواں تیرے

آئنوں میں تجھے اُترا دیکھوں

فیصلہ یہ بھی سُنا دے مجھ کو

مَیں ٹھہر جاؤں کہ رستہ دیکھوں

دیکھ کر چاند اُفق پر اُبھرا

تُجھ کو دیکھوں ترا ماتھا دیکھوں

ہاتھ پر لمس کی تحریر تری

ان لبوں سے تُجھے چکھا دیکھوں

کیسا موسم ہے یہ دِل پر ماجدؔ

تہ بہ تہ رنگ یہ کیا کیا دیکھوں

ماجد صدیقی

آئنہ جیسے ریگ زاروں میں

دسمبر 31, 2016ماجد صدیقی،تمازتیں،غزلہزاروں،چناروں،اشاروں،بہاروں،زاروں،شراروںadmin

ماجد صدیقی ۔ غزل نمبر 31

تو نمایاں ہے یُوں نگاروں میں

آئنہ جیسے ریگ زاروں میں

حُسن سارا وُہ اِک تجھی میں ہے

ڈھونڈتا ہُوں جسے ہزاروں میں

جب سے مہکا ہے تن بدن تیرا

کھلبلی سی ہے اِک بہاروں میں

عالمِ خواب ہے کہ قُرب تِرا

گھر گیا ہوں عجب شراروں میں

پھُوٹتی ہے جو کنجِ لب سے ترے

آگ ایسی کہاں چناروں میں

روز تفسیرِ لطفِ جاں دیکھوں

تیرے مبہم سے اِن اشاروں میں

لہلہاتا ہے مثلِ گلُ تُو ہی

فکرِ ماجدؔ کے کشت زاروں میں

ماجد صدیقی

یہ رنگ بھی آ، تجھے دکھاؤں

دسمبر 31, 2016ماجد صدیقی،تمازتیں،غزلمناؤں،گنگناؤں،گاؤں،اُٹھاؤں،بتاؤں،دکھاؤں،سجاؤںadmin

ماجد صدیقی ۔ غزل نمبر 32

تن میں ترے مشعلیں جلاؤں

یہ رنگ بھی آ، تجھے دکھاؤں

چاہت کا وہِسحر تُجھ پہ پھونکوں

رگ رگ میں قیامتیں مچاؤں

تکمیل کروں کبھی تو اپنی

تجھ کو سرِ جسم و جاں سجاؤں

مخفی پسِ لب کلی کلی کے

جو راز ہے، وُہ تجھے بتاؤں

مَیں خود ہی جواب جن کا ٹھہروں

ایسے بھی سوال کُچھ اُٹھاؤں

غنچوں کی چٹک ہو جس پہ شیدا

وُہ زمزمہ اَب کے گنگناؤں

ہر لُطف ہے اِس میں ہر مزہ ہے

ماجدؔ کی غزل ہے کیوں نہ گاؤں

ماجد صدیقی

پر نمایاں تری آمد کے نہ آثار ہوئے

دسمبر 31, 2016ماجد صدیقی،تمازتیں،غزلگنہگار،آثار،آزار،انوار،بیدار،بیزار،بارadmin

ماجد صدیقی ۔ غزل نمبر 33

پھُول انوار بہ لب، ابر گہر بار ہوئے

پر نمایاں تری آمد کے نہ آثار ہوئے

کچھ سزا اِس کی بھی گرہے تو بچیں گے کیسے

ہم کہ جو تُجھ سے تغافل کے گنہگار ہوئے

ہونٹ بے رنگ ہیں، آنکھیں ہیں کھنڈر ہوں جیسے

مُدّتیں بِیت گئیں جسم کو بیدار ہوئے

وُہ جنہیں قرب سے تیرے بھی نہ کچھ ہاتھ لگا

وُہی جذبات ہیں پھر درپئے آزار ہوئے

جب بھی لب پر کسی خواہش کا ستارا اُبھرا

جانے کیا کیا ہیں اُفق مطلعٔ انوار ہوئے

اب تو وا ہو کسی پہلو ترے دیدار کا در

یہ حجابات تو اب سخت گراں بار ہوئے

چھیڑ کر بیٹھ رہے قصّۂ جاناں ماجدؔ

جب بھی ہم زیست کے ہاتھوں کبھی بیزار ہوئے

ماجد صدیقی

رُتوں کے رنگ سبھی ساتھ لیتے جاؤ گے

دسمبر 31, 2016ماجد صدیقی،تمازتیں،غزللاؤ،چھڑاؤ،چھپاؤ،جلاؤ،جھلملاؤ،جاؤ،ستاؤadmin

ماجد صدیقی ۔ غزل نمبر 34

بچھڑ چلے ہو تو کیا پھرکبھی نہ آؤ گے

رُتوں کے رنگ سبھی ساتھ لیتے جاؤ گے

بھٹکنے دو گے نہ کب تک اِسے قریب اپنے

مرے خیال کے پر کب تلک جلاؤ گے

فلک پہ قوسِ قزح جس طرح پسِ باراں

افق پہ کیا مرے، تم یوں نہ جھلملاؤ گے

نہ رہ سکیں گے چھپے یہ خطوط لُطف، جنہیں

بہ احتیاط تہ پیرہن چھپاؤ گے

وُہ جس سے جسم میں چنچل رُتوں کے در وا ہوں

وُہ اِذنِ خاص زباں پر کبھی تو لاؤ گے

پسِ خیال لئے شوخیٔ گریز اپنی

ہوئی ہے شام تو اب رات بھر ستاؤ گے

گمان و وہم کی دلدل سے جانے کب ماجدؔ

ہماری جانِ گرفتہ کو تم چھڑاؤ گے

ماجد صدیقی

پھول ہو تم کلی نہ بن جاؤ

دسمبر 31, 2016ماجد صدیقی،تمازتیں،غزللہراؤ،گہناؤ،گرماؤ،ٹھہراؤ،آؤ،جاؤ،سہلاؤadmin

ماجد صدیقی ۔ غزل نمبر 35

بات سمجھو نہ اور ترساؤ

پھول ہو تم کلی نہ بن جاؤ

چاند سے اِس رُخِ منّور کو

حرفِ انکار سے نہ گہناؤ

ہم سمجھتے ہیں چشم و دل کی زباں

اتنا ناداں ہمیں نہ ٹھہراؤ

مثلِ خوشبُو در آؤ ہر در سے

مثلِ گُل اِس نظر میں لہراؤ

مسکنِ درد ہے یہ تن اِس کو

لمس و لطفِ نظر سے سہلاؤ

یخ ہیں پہلو مرے کبھی اِن کو

حدتِ جسم و جاں سے گرماؤ

ہو مزّین تمہی سے اپنا بدن

اِس کے صفحوں پہ یُوں اُتر آؤ

ماجد صدیقی

کبھی ملو کہ خیابانِ تن میں پھُول کِھلیں

دسمبر 31, 2016ماجد صدیقی،تمازتیں،غزلملیں،کہیں،کِھلیں،کھُلیں،بھریں،تہیں،جلیںadmin

ماجد صدیقی ۔ غزل نمبر 36

بفیضِ قرب پھریں مستیٔ نظر کی رُتیں

کبھی ملو کہ خیابانِ تن میں پھُول کِھلیں

یہی حجاب تو ہیں وجہِ خامشی، ورنہ

سُنیں تمہاری بھی، کچھ اپنے دل کی بات کہیں

یہ حرفِ گرم، تہِ حلق رُک گیا کیسا

سُلگ اُٹھی ہیں یہ کیونکر لب و زباں کی تہیں

کسی اُفق کو تو ہم تُم بھی دیں جنم آخر

یہ آسمان و زمیں بھی کسی جگہ تو ملیں

کبھی تو دیجئے آ کر اِنہیں بھی اِذنِ کشود

پڑی ہیں خوں میں جو گرہیں کسی طرح تو کھُلیں

یہ شُعلہ ہائے بدن اپنے سامنے پا کر

چراغ کیوں نہ لُہو کے بچشمِ شوق جلیں

وہ دِن بھی آئیں کہ بالطفِ دید ہم ماجدؔ

نظر کے حُسن سے باہم فضا میں رنگ بھریں

ماجد صدیقی

موسم سے یہ خراج کسی دم تو پائیں ہم

دسمبر 31, 2016ماجد صدیقی،تمازتیں،غزلہلائیں،ملائیں،منائیں،مٹائیں،پائیں،جگمگائیں،سجائیںadmin

ماجد صدیقی ۔ غزل نمبر 37

باہم طراوتِ شبِ راحت لٹائیں ہم

موسم سے یہ خراج کسی دم تو پائیں ہم

معراج ہے بدن کی یہ ساعت ملاپ کی

ہے پیاس جس قدر بھی نہ کیونکر مٹائیں ہم

جذبوں کی مشعلیں ہوں فروزاں سرِزباں

محفل دل و نگاہ کی یوں بھی سجائیں ہم

دیکھے بہ رشک چاند ہمیں جھانک جھانک کر

یوں بھی بہ لطفِ خاص کبھی جگمگائیں ہم

بپھری رُتوں کے رنگ سبھی دِل میں سینت لیں

تقریب اِس طرح کی بھی کوئی منائیں ہم

کیونکر پئے حُصولِ ثمر مثلِ کودکاں

شاخِ سُرور کو نہ بعجلت ہلائیں ہم

ماجدؔ کبھی تو رشتۂ جاں ہو یہ اُستوار

قوسیں یہ بازوؤں کی کبھی تو ملائیں ہم

ماجد صدیقی

ورنہ ازبر ہیں ہوا کو بھی فسانے میرے

دسمبر 31, 2016ماجد صدیقی،تمازتیں،غزلفسانے،ٹھکانے،اٹھانے،بجھانے،خانے،دانے،زمانےadmin

ماجد صدیقی ۔ غزل نمبر 38

ایک وُہ شخص ہی احوال نہ جانے میرے

ورنہ ازبر ہیں ہوا کو بھی فسانے میرے

مَیں نہ خوشبُو نہ کرن، رنگِ سحر ہوں نہ صبا

کون آتا ہے بھلا ناز اُٹھانے میرے

ہاں وُہی دن کہ مرے حکم میں تھا تیرا بدن

جانے کب لوٹ کے آئیں وُہ زمانے میرے

چشم و رُخسار، وہ چہرہ، وہ نظرتاب اُبھار

ہیں وُہی شوق کی تسبیح کے دانے میرے

ضرب کس ہاتھ کی جانے یہ پڑی ہے اِن پر

چُور ہیں لُطف کے سب آئنہ خانے میرے

اُس نے تو آگ دکھا کر مجھے پُوچھا بھی نہ پھر

آیا ہوتا وہ الاؤ ہی بجھانے میرے

جب سے کھویا ہے وُہ مہتاب سا پیکر ماجدؔ

سخت سُونے میں نگاہوں کے ٹھکانے میرے

ماجد صدیقی

آ ۔۔۔ اور مری تشنگیٔ جاں میں اُتر جا

دسمبر 31, 2016ماجد صدیقی،تمازتیں،غزلنکھر،ور،گزر،ٹھہر،اتر،ترadmin

ماجد صدیقی ۔ غزل نمبر 39

اک بار تو ایسی بھی جسارت کبھی کر جا

آ ۔۔۔ اور مری تشنگیٔ جاں میں اُتر جا

ویرانیٔ دل پر کبھی اتنا تو کرم کر

اِس راہگزر سے نمِ موسم سا گُزر جا

طُرفہ ہیں بُہت میرے دل و جاں کی پھواریں

اس بزم میں آ اور مثالِ گُلِ تر جا

دیکھوں میں طلُوعِ رُخِ انور ترا یُوں بھی

آ ۔۔۔ مثل سحر لمس کی شبنم سے نکھر جا

رہنے دے کسی پل تو یہ اندازِ شہابی

مختار ہے تو ۔۔۔ پھر بھی کوئی دم تو ٹھہر جا

پڑتا ہے رہِ شوق میں کچھ اور بھی سہنا

ماجدؔ نہ فقط خدشۂ رسوائی سے ڈر جا

ماجد صدیقی

میانِ قامت و رُخ جُوں سجے ہیں گال ترے

دسمبر 31, 2016ماجد صدیقی،تمازتیں،غزلچھال،ڈال،گال،خیال،خال،سال،غزالadmin

ماجد صدیقی ۔ غزل نمبر 40

افق پہ ذہن کے موزوں ہیں یُوں خیال ترے

میانِ قامت و رُخ جُوں سجے ہیں گال ترے

یہ دشتِ دید ترستا ہے کیوں نظر کو تری

بہ قیدِ چشم ہیں کیوں کر ابھی غزال ترے

گمان‘ برگ و ثمر پر ترا ہی صبح و مسا

خطوطِ حُسن ہویدا ہیں‘ ڈال ڈال ترے

ہرا بھرا ترے دم سے ہے گُلستانِ خیال

بہ کشتِ یاد فسانے ہیں چھال چھال ترے

اُسی سے رقص میں ہے شاخِ آرزوئے وصال

ہیں جس ہوا سے شگفتہ یہ ماہ و سال ترے

نکلنے دیں گے کہاں حلقۂ ضیا سے مُجھے

سحر نما یہ کرشمے ترے، خیال ترے

کبھی یہ شعر بھی ماجدؔ کے دیکھنا تو سہی

نقوش اِن میں بھی اُترے ہیں خال خال ترے

ماجد صدیقی

یہ مشعلیں بھی جلا کے دیکھو

دسمبر 31, 2016ماجد صدیقی،تمازتیں،غزلہلا،فضا،آزما،اٹھا،بڑھا،بجا،جلا،جگا،سجاadmin

ماجد صدیقی ۔ غزل نمبر 41

آنکھوں میں مری سما کے دیکھو

یہ مشعلیں بھی جلا کے دیکھو

ہے جسم سے جسم کا سخن کیا

یہ بزم کبھی سجا کے دیکھو

پیراک ہوں بحرِ لطفِ جاں کا

ہاں ہاں مجھے آزما کے دیکھو

اُترو بھی لہُو کی دھڑکنوں میں

کیا رنگ ہیں اِس فضا کے دیکھو

مخفی ہے جو خوں کی حِدتّوں میں

وہ حشر کبھی اٹُھا کے دیکھو

بے رنگ ہیں فرطِ خواب سے جو

لمحے وہ کبھی جگا کے دیکھو

بہلاؤ نہ محض گفتگو سے

یہ ربط ذرا بڑھا کے دیکھو

ملہار کے سُر ہیں جس میں پنہاں

وُہ سازِ طرب بجا کے دیکھو

طُرفہ ہے بہت نگاہِ ماجدؔ

یہ شاخ کبھی ہلا کے دیکھو

ماجد صدیقی

کچھ اس طلب میں خسارے کا بھی حساب کریں

نومبر 30, 2016ہوا کا تخت،ماجد صدیقی،غزلاجتناب،جناب،حباب،حساب،عتابadmin

ماجد صدیقی ۔ غزل نمبر 1

یونہی نہ ہم بھی تمنّائے لعلِ نابِ کریں

کچھ اس طلب میں خسارے کا بھی حساب کریں

تنے بھی خیر سے زد میں اِسی ہوا کی ہیں

شکست شاخ سے اندازۂ عتاب کریں

لکھے ہیں شعر تو چھپوا کے بیچئے بھی انہیں

یہ کاروبار بھی اب خیر سے جناب کریں

بدل گیا ہے جو مفہوم ہی مروّت کا

تو کیوں نہ ایسی برائی سے اجتناب کریں

ٹھہر سکیں تو ٹھہر جائیں اب کہیں ماجدؔ

ہمِیں نہ پیروئِ جنبشِ حباب کریں

ماجد صدیقی

مرے خدا یہ مجھی پر عتاب سا کیا ہے

نومبر 30, 2016ہوا کا تخت،ماجد صدیقی،غزلاجتناب،تاب،حباب،حجاب،خواب،عتابadmin

ماجد صدیقی ۔ غزل نمبر 2

یہ روز و شب مرے سر ہی عذاب سا کیا ہے

مرے خدا یہ مجھی پر عتاب سا کیا ہے

یہی متاع‘ یہی آرزو ہے دان ترا

یہ میری سطح پہ پھٹتا حباب سا کیا ہے

کہوں نہ کیوں ترے منہ پر جو مجھ پہ گزرے ہے

مجھے یہ باک سا تجھ سے حجاب سا کیا ہے

ہوئی نہ سیر کہیں بھی مری عمق نظری

مری نظر سے گزرتا یہ خواب سا کیا ہے

ملا ہے جو بھی رُتوں سے، پڑے گا لوٹانا

نمو طلب تھے تو اب سے پیچ و تاب سا کیا ہے

قرارِ جاں ہے تو ماجدؔ اُسے تلاش بھی کر

حصولِ یار سے یہ اجتناب سا کیا ہے

ماجد صدیقی

وسعتِ فکر کچھ ایسی ہے کہ تنہا ٹھہرے

نومبر 30, 2016ہوا کا تخت،ماجد صدیقی،غزلکاسا،پتّا،اشارہ،تنہا،سایہ،شناساadmin

ماجد صدیقی ۔ غزل نمبر 3

یوں تو ہم اِس کے سبب دُنیا میں یکتا ٹھہرے

وسعتِ فکر کچھ ایسی ہے کہ تنہا ٹھہرے

تو کہ تھا موسمِ گُل ہم سے کھنچا ہے کب کا

شاخ اُمید پہ اب کیا کوئی پتّا ٹھہرے

سایۂ ابر تھے یا موجِ ہوا تھے، کیا تھے

ہائے وہ لوگ کہ تھے ہم سے شناسا ٹھہرے

کچھ تو ہو گرد ہی بر دوشِ ہوا ہو چاہے

سر پہ مجھ دشت کے راہی کے بھی سایہ ٹھہرے

پھُول باوصفِ زباں حال نہ پوچھیں میرا

خامشی اِن کی بھی تیرا نہ اشارہ ٹھہرے

نہ ہر اک سمت بڑھا دستِ تمنا ماجدؔ

یہ بھی آخر کو گدائی کا نہ کاسا ٹھہرے

ماجد صدیقی

نظر میں جو بھی ہو منظر نشے میں چُور ملے

نومبر 30, 2016ہوا کا تخت،ماجد صدیقی،غزلفتور،مسور،چور،طورadmin

ماجد صدیقی ۔ غزل نمبر 4

ہر ایک لمحۂ بے کیف کو سُرور ملے

نظر میں جو بھی ہو منظر نشے میں چُور ملے

کہیں تو کس سے کہ تھوتھا چنا گھنا باجے

ہمیں تو اپنے بھی دل میں یہی فُتور ملے

طلب کو چاہئے آخر فراخئِ دل بھی

یہ منہ رہا تو نہ کھانے کو پھر مسُور ملے

شعُور ہو تو پسِ شاخ، برگ و گُل ہیں بہت

ہر ایک سنگ میں دیکھو تو عکسِ طور ملے

ماجد صدیقی

اچھا ہے نہ پوچھو ابھی احوال سفر کا

نومبر 30, 2016ہوا کا تخت،ماجد صدیقی،غزلنظر،گہر،تر،سفر،سحر،شجرadmin

ماجد صدیقی ۔ غزل نمبر 5

ہو جائے گا کچھ اور ہرا زخم، نظر کا

اچھا ہے نہ پوچھو ابھی احوال سفر کا

مجھ کو بھی تمازت کی جو پہچان ہوئی ہے

احساں ہے تری راہ کے اک ایک شجر کا

لمحے مجھے صدیاں ہیں، برس ثانیے تجھ کو

کہتے ہیں یہی فرق ہے اندازِ نظر کا

سنتا ہوں تہہِ خاک سے غنچوں کی چٹک بھی

آتا ہے نظر عکس جو قطرے میں گہر کا

شامل ہوئی کس شب کی سیاہی مرے خوں میں

آتا ہی نہیں لب پہ کبھی نام سحر کا

ماجد کہیں اس شہر میں ٹھکرائے نہ جاؤ

تحفہ لئے پھرتے ہو کہاں دیدۂ تر کا

ماجد صدیقی

سحر نما ہے مجھے جو بھی کچھ کہا ہے مرا

نومبر 30, 2016ہوا کا تخت،ماجد صدیقی،غزلکہا،اٹھا،بہا،برا،سلسلہadmin

ماجد صدیقی ۔ غزل نمبر 6

ہر ایک حرفِ غزل حرفِ مدّعا ہے مرا

سحر نما ہے مجھے جو بھی کچھ کہا ہے مرا

جو بعدِ قتل مرے، خوش ہے تُو، تو کیا کہنے

ترے لبوں کا تبسّم ہی خوں بہا ہے مرا

مرے سوال سے تیرا بھرم نہ کُھل جائے

ترے حضور بھی اب ہاتھ تو اُٹھا ہے مرا

بھلائی جب مرے ہاتھوں نہیں مرے حق میں

کہو گے جو بھی اُسی بات میں برا ہے مرا

کہیں تو خاک بسر ہوں،کہیں ہوں ماہ بدست

بڑا عجیب طلب کا یہ سلسلہ ہے مرا

ماجد صدیقی

کشیدِ اشک ہے آنکھوں سے جابجا اب کے

نومبر 30, 2016ہوا کا تخت،ماجد صدیقی،غزلہے،فضا،چلا،کھڑا،اٹھا،جابجا،دعاadmin

ماجد صدیقی ۔ غزل نمبر 7

ہوا وہ جبر دبانے کو مدعّا اب کے

کشیدِ اشک ہے آنکھوں سے جابجا اب کے

وہ کیسا حبس تھا مہریں لبوں پہ تھیں جس سے

یہ کیسا شور ہے در در سے جو اُٹھا ہے اب کے

دَہن دَہن کی کماں اِس طرح تنی نہ کبھی،

بچا نہ تیر کوئی جو نہیں چلا اَب کے

شجر کے ہاتھ سے سایہ تلک کھسکنے لگا

وہ سنگ بارئِ طفلاں کی ہے فضا اب کے

خلاف ظلم سبھی کاوشیں بجا لیکن

سرِ غرور تو کچھ اور بھی اُٹھا اب کے

کوئی یہ وقت سے پوچھے کہ آخرش کیونکر

ہے آبِ نیل تلک بھی رُکا کھڑا اب کے

لبوں پہ خوف سے اِک تھرتھری سی ہے ماجدؔ

دبک گیا ہے کہیں کلمۂ دُعا اَب کے

ماجد صدیقی

کسی پہ راز ہمارا ابھی کھُلا ہی نہیں

نومبر 30, 2016ہوا کا تخت،ماجد صدیقی،غزلمدّعا،کھلا،گیا،ٹوٹتا،سکا،صداadmin

ماجد صدیقی ۔ غزل نمبر 8

ہیں لب کشا بھی مگر جیسے کچھ کہا ہی نہیں

کسی پہ راز ہمارا ابھی کھُلا ہی نہیں

بھنور بھی جھاگ سی بس سطحِ آب پر لایا

جو تہہ میں ہے وُہ ابھی تک اُبھر سکا ہی نہیں

ہمیں جو ہوش میں لائے تو زلزلہ ہی کوئی

وہ بے حسی کا نشہ ہے کہ ٹوٹتا ہی نہیں

یہ کیسا عام ہے اعلانِ صحتِ یاراں

ہمیں جو روگ تھا وہ تو ابھی گیا ہی نہیں

شکستِ دل بھی شکستِ حباب تھی جیسے

فضائے دہر میں اُٹھی کوئی صدا ہی نہیں

کسی پہ حال ہمارا عیاں ہو کیا ماجدؔ

کھُلا کسی پہ کبھی حرفِ مدّعا ہی نہیں

ماجد صدیقی

دام کے زیرِ قدم ہونے کا اندازہ نہ تھا

نومبر 30, 2016ہوا کا تخت،ماجد صدیقی،غزلآوازہ،اندازہ،خمیازہ،شیرازہ،غازہadmin

ماجد صدیقی ۔ غزل نمبر 9

وار تو حالات نے جو بھی کیا تازہ نہ تھا

دام کے زیرِ قدم ہونے کا اندازہ نہ تھا

کچھ نہ کچھِاس میں کرشمہ ناز کا بھی تھا ضرور

منہ کی کھانا خام فکری ہی کا خمیازہ نہ تھا

چہرہ چہرہ عکس سا سمجھا گیا جو پیار کا

وہ تمازت تھی اُبلتے خون کی غازہ نہ تھا

آ گئے ہوتے مثالِ خس نہ یوں گرداب میں

سیل جو اب کے اُٹھا اُس کا کچھ آوازہ نہ تھا

پل میں جو ماجدؔ بدل کر دھجّیوں میں رہ گئی

اُس کتابِ فکر کا ایسا تو شیرازہ نہ تھا

ماجد صدیقی

لپک کے موج کناروں کو جیسے چھُو آئے

نومبر 30, 2016ہوا کا تخت،ماجد صدیقی،غزلچپو،کبھو،آرزو،تو،روبروadmin

ماجد صدیقی ۔ غزل نمبر 10

وُہ حسن پاس مرے یوں پئے نمو آئے

لپک کے موج کناروں کو جیسے چھُو آئے

درِ سکون پہ جوں قرض خواہ کی دستک

کبھی جو آئے تو یوں دل میں آرزو آئے

نہیں ضرور کہ الفاظ دل کا ساتھ بھی دیں

یہ ذائقہ تو سخن میں کبھو کبھو آئے

نہیں ہے اہل ترے، میری خانہ ویرانی

خدا کرے مرے گھرمیں کبھی نہ تو آئے

بھنور میں جیسے ہم آئے مثالِ خس ماجدؔ

کوئی نہ یوں کسی آفت کے روبرُو آئے

ماجد صدیقی

بنی ہے تتلی مری خواہشوں کے پھولوں کی

نومبر 30, 2016ہوا کا تخت،ماجد صدیقی،غزللوگوں،گھروندوں،پھولوں،رستوں،سرسوں،شہروں،صدیوںadmin

ماجد صدیقی ۔ غزل نمبر 11

وہی کہ جس کی مجھے جستجو تھی برسوں کی

بنی ہے تتلی مری خواہشوں کے پھولوں کی

سفر میں گرچہ دُعائیں بھی کچھ تھیں شاملِ حال

نگاہِ بد بھی ہمِیں پر لگی تھی لوگوں کی

بھگوئے رکھتے ہیں یوں ریگِ آرزو ہم بھی

کہ جیسے شغل ہی تعمیر ہو گھروندوں کی

پڑاؤ ہو تو کہیں ہم بھی تازہ دم ہو لیں

ہُوا لباس ہی جیسے یہ گرد رستوں کی

ملے گا اب کسی طوفاں کے بعد ٹھہراؤ

بہت دنوں سے مکّدر فضا ہے شہروں کی

کچھ ایسے رُک سا گیا عہدِ بے بسی جیسے

جمی ہے لمحوں کے چہروں پہ گرد صدیوں کی

بیان کیا ہو کہ ماجدؔ جھلک تھی کیا اس کی

وہ تازگی تھی کہ کھیتی ہو جیسے سرسوں کی

ماجد صدیقی

جانے کس کے جبر کا چرچا کرتا ہوں

نومبر 30, 2016ہوا کا تخت،ماجد صدیقی،غزلمرتا،نکھرتا،ڈرتا،کرتا،ابھرتا،بھرتا،دھرتاadmin

ماجد صدیقی ۔ غزل نمبر 12

نِت یکجا ہوتا ہوں، روز بکھرتا ہوں

جانے کس کے جبر کا چرچا کرتا ہوں

استعمال سے اِن کے پھل بھی پاتا ہوں

میں جھولی میں پہلے کنکر بھرتا ہوں

سچ بھی جیسے اک ناجائز بچّہ ہے

میں جس کے اظہار سے ابتک ڈرتا ہوں

دہ چندا ہو ابر ہو یا ہو موجۂ مے

جو دم توڑے ساتھ اُسی کے مرتا ہوں

سوچُوں تو اک یہ صورت بھی ہے میری

میں سورج کے ساتھ بھی روز ابھرتا ہوں

باہم شکل بدلتے تخم و شجر سا میں

ہر پچیس برس کے بعد نکھرتا ہوں

دیکھ تو لُوں ماجدؔ ہے مقابل کون مرے

جور و جفا کی تہمت کس پر دھرتا ہوں

ماجد صدیقی

پہچان موسموں کے دئیے پیرہن سے ہے

نومبر 30, 2016ہوا کا تخت،ماجد صدیقی،غزلمحن،پیرہن،بدن،تن،سخنadmin

ماجد صدیقی ۔ غزل نمبر 13

نسبت شجر شجر کو اگرچہ چمن سے ہے

پہچان موسموں کے دئیے پیرہن سے ہے

پہلو میں میرے جس کی طراوت ہے موج موج

یہ لب شگفتگی اُسی تازہ بدن سے ہے

ہر آن اشک اشک جھلکتی رہی تھی جو

دبکی ہوئی وہ آگ بھڑکنے کو تن سے ہے

کھٹکا ہی کیا بھنور کا، گُہرجُو ہوئے تو پھر

اب نت کا واسطہ اِسی رنج و محن سے ہے

تیرا رقیب ہو تو کوئی بس اِسی سے ہو

ماجدؔ تجھے جو ربط نگارِ سخن سے ہے

ماجد صدیقی

گرفت کون سے لمحے پہ اپنی جتلائیں

نومبر 30, 2016ہوا کا تخت،ماجد صدیقی،غزللہرائیں،لٹکائیں،چٹخائیں،اِترائیں،جائیں،جتلائیں،شرمائیںadmin

ماجد صدیقی ۔ غزل نمبر 14

نفس نفس ہے رہینِ الم کدھر جائیں

گرفت کون سے لمحے پہ اپنی جتلائیں

ہمیں ملی ہیں یہ کیا کامرانیاں اب کے

کہ جن کا ذکر بھی چھیڑیں تو خود ہی شرمائیں

جب اپنے نام کی سب چاہتیں دلائیں اُنہیں

تو غیر مات پہ کیونکر نہ اپنی اِترائیں

جو فرق عکسِ شباہت میں ہے انہی سے ہے

بہ ضربِ طیش اِنہی آئنوں کو چٹخائیں

وہی بعجز و ندامت ہیں نسبتیں جس کی

چلو کہ طوق وہی پھر گلے میں لٹکائیں

جو وُوں نہیں تو یہ اعزاز یوں بھی ممکن ہے

حماقتوں کے عَلَم شہر شہر لہرائیں

کسی بھی حرف کی ماجدؔ نہیں جو شنوائی

تو پھر یہ ہاتھ دُعا کے ہی کیوں نہ کٹ جائیں

ماجد صدیقی

گھرے ہیں لوگ طلسماتِ آرزو میں ابھی

نومبر 30, 2016ہوا کا تخت،ماجد صدیقی،غزلہو،لہو،گلو،آبجو،آبرو،آرزو،بوadmin

ماجد صدیقی ۔ غزل نمبر 15

نظر نظر ہے مرادوں کی جستجو میں ابھی

گھرے ہیں لوگ طلسماتِ آرزو میں ابھی

وہ بات جس کو جھلکنا تھا ہر جبیں سے یہاں

رکی ہے پھانس سی بن کر گلو گلو میں ابھی

ابھی لبوں پہ کہاں حرفِ مدّعا کے نشاں

دبی ہے اصل صدا دل کی ہاؤ ہُو میں ابھی

عجب نہیں کوئی بادل اسی پہ گھر آئے

نمی سی ہے جو یہ اک ریگِ آبجو میں ابھی

کبھی جو تجھ پہ زبان و نگاہ سے نہ کھلی

مچل رہی ہے شرارت وہی لہو میں ابھی

دل و نظر ہی پہ کچھ بس نہیں ہے لطفِ بہار

تہیں بہت ہیں پلٹنے کو رنگ و بو میں ابھی

کتابِ زیست مکمل ہو، جانے کب ماجدؔ

ہے انتشار سا اوراقِ آبرو میں ابھی

ماجد صدیقی

بجائے زمزمہ بیرونِ لب زباں نکلے

نومبر 30, 2016ہوا کا تخت،ماجد صدیقی،غزلہاں،گراں،خزاں،دھواں،درمیان،زباںadmin

ماجد صدیقی ۔ غزل نمبر 16

نہ باز آئے یہ لُو اور نہ تن سے جاں نکلے

بجائے زمزمہ بیرونِ لب زباں نکلے

ہمیں بہار کے ہونٹوں کی نرمیوں کے امیں

ہمیں وہ برگ کہ پیغمبرِ خزاں نکلے

جہاں گلاب سخن کے سجائے تھے ہم نے

شرر بھی کچھ اُنہی حرفوں کے درمیان نکلے

زخستگی لبِ اظہار کا تو ذکر ہی کیا

کشش سے جیسے قلم کی بھی اب دھواں نکلے

ہمارا حال جبیں سے ہی جاننا اچھا

زباں سے کیا کوئی اب کلمۂ گراں نکلے

حضورِ یار ہیں وہ جاں سپار ہم ماجدؔ

ہو حکمِ قتل بھی اپنا تو منہ سے ہاں نکلے

ماجد صدیقی

کچھ کہہ نہ سکے جو بھی میں اُس کی زباں ٹھہروں

نومبر 30, 2016ہوا کا تخت،ماجد صدیقی،غزلکہاں،بیاں،جہاں،جاں،رواں،زباںadmin

ماجد صدیقی ۔ غزل نمبر 17

نسبت وہ سخن سے ہو اِک نطق رواں ٹھہروں

کچھ کہہ نہ سکے جو بھی میں اُس کی زباں ٹھہروں

ایسا بھی کوئی منظر دکھلائیں تو دُنیا کو

تو گل بکنارِ جو، میں آبِ رواں ٹھہروں

اتنی تو مجھے آخر، اظہار کی فرصت دے

تو راز ہو سربستہ، میں تیرا بیاں ٹھہروں

ہر دم‘ دمِ عیسٰی ہے اپنا بھی، جو پہچانوں

ہوں عہد نئے پیدا، پل بھر کو جہاں ٹھہروں

یہ شہر تو اب جیسے اک شہرِ خموشاں ہے

کس در سے گزر جاؤں، ٹھہروں تو کہاں ٹھہروں

صورت مرے جینے کی ماجدؔ ہو صبا جیسی

نس نس میں گُلوں کی مَیں، اُتری ہوئی جاں ٹھہروں

ماجد صدیقی

بھلا لگتا ہے کیوں ہر حادثے سے بے خبر ہونا

نومبر 30, 2016ہوا کا تخت،ماجد صدیقی،غزلنظر،باہنر،باثمر،تر،خبرadmin

ماجد صدیقی ۔ غزل نمبر 18

نہیں اچّھا فنا کا اِس قدر بھی دل میں ڈر ہونا

بھلا لگتا ہے کیوں ہر حادثے سے بے خبر ہونا

سرِ راہ کے شجر تھے سنگباری ہم پہ لازم تھی

نہفتہ کس طرح رہتا ہمارا باثمر ہونا

بنامِ تازگی تاراج کیا کیا کچھ نہ کر ڈالا،

کسے حاصل ہے مانندِ ہوا یوں باہنر ہونا

سراغِ راہِ منزل تو کبھی کا ہم لگا لیتے

لئے بیٹھا ہے اپنے ہمرہوں کا کم نظر ہونا

دُھلی نظروں سے اُس کی دید ہم پر فرض تھی گویا

پسند آیا اِسی خاطر ہمیں با چشمِ تر ہونا

پسِ خوشبو بھی مرگِ گل کا منظر دیکھتے ہیں ہم

بہت مہنگا پڑا ماجدؔ ہمیں اہلِ نظر ہونا

ماجد صدیقی

نظر میں اہلِ ہوس کی گناہ کرتے رہے

نومبر 30, 2016ہوا کا تخت،ماجد صدیقی،غزلواہ!،گناہ،گواہ،جاہ،خواہ،راہ،شاہadmin

ماجد صدیقی ۔ غزل نمبر 19

نگاہ ہم پہ جو وہ گاہ گاہ کرتے رہے

نظر میں اہلِ ہوس کی گناہ کرتے رہے

تھے اُن کے ناز نظر میں، نیاز تھے اپنے

بیاں حکایتِ محتاج و شاہ کرتے رہے

بھٹکنے دی نہ نگہ تک کسی کی پاس اپنے

یہی وہ جبر تھا جو اہلِ جاہ کرتے رہے

ہر ایک شب نے دئیے زخم جو ہمیں، اُن پر

ستارۂ سحری کو گواہ کرتے رہے

ہمیں سے پوچھئے اِس ربط میں مزے کیا ہیں

کہ رفعتوں سے ہمیں رسم و راہ کرتے رہے

چمن میں برق نے پھر کی ہے کوئی صنّاعی

ہوا کے ہونٹ جبھی واہ واہ کرتے رہے

کرم غیاب میں کچھ اُس سے تھا جُدا ماجدؔ

ہمارے سامنے جو خیر خواہ کرتے رہے

ماجد صدیقی

چَپک کے رہ گئے ہونٹوں سے سب سوال اپنے

نومبر 30, 2016ہوا کا تخت،ماجد صدیقی،غزلنکال،ڈھال،کمال،اچھال،جال،سوال،سالadmin

ماجد صدیقی ۔ غزل نمبر 20

نظر میں رنج ہے سہلا رہا ہوں گال اپنے

چَپک کے رہ گئے ہونٹوں سے سب سوال اپنے

اجُڑ گئے کسی بیوہ کے گیسوؤں کی طرح

وہ جن پہ ناز تھا، ہاں ہاں وہ ماہ و سال اپنے

ہوا کی کاٹ بھی دیکھ اور اپنی جان بھی دیکھ

جنوں کے مُرغ! نہ تو بال و پر پر نکال اپنے

اِدھر تو کاہِ نشیمن نہ چونچ تک پہنچا

اُٹھا کے دوش پہ نکلے اُدھر وہ جال اپنے

اُڑان ہی سے تھے فیضان سارے وابستہ

پروں کے ساتھ سمٹتے گئے کمال اپنے

دبا نہ اور ابھی تُو گلوئے ہم جِنساں

یہ سارے بوجھ خلاؤں میں اب اُچھال اپنے

بہ شاخِ نطق ہیں پہرے اگر یہی ماجدؔ

کوئی خیال نہ لفظوں میں تو بھی ڈھال اپنے

ماجد صدیقی

وُہ آئنہ ہوں کہ جُڑ جُڑ کے نِت بکھرتا ہُوں

نومبر 30, 2016ہوا کا تخت،ماجد صدیقی،غزلنکھرتا،ڈرتا،کرتا،ابھرتا،اترتا،بکھرتا،دھرتاadmin

ماجد صدیقی ۔ غزل نمبر 21

نہ پُوچھ مجُھ سے بھَلا میں کہاں سُنورتا ہُوں

وُہ آئنہ ہوں کہ جُڑ جُڑ کے نِت بکھرتا ہُوں

نظر ملے تو کبھی سُوئے اوج بھی دیکھوں

میں کور چشم نشیبوں میں ہی اُترتا ہُوں

بہ ایں بساط روانی کہاں مرے بس میں

کنارِ آب فقط جھاگ سا اُبھرتا ہُوں

ہوائے زرد وہیں مجھ کو آن لیتی ہے

رُتوں کے لُطف سے جَب بھی کبھی نکھرتا ہُوں

جو فرق فہم میں اپنے ہے اُس سے مُنکر ہُوں

نہ جانے تہمتیں کیوں دوسروں پہ دھرتا ہُوں

عجیب شخص ہُوں شہ رگ کٹے پہ بھی اکثر

بطرزِ خاص سرِ عام رقص کرتا ہُوں

لبوں پہ کرب اُمڈتا ہے اِس قدر ماجدؔ

چھپی رہے نہ وُہی بات جس سے ڈرتا ہوں

ماجد صدیقی

ملے جو ہم تو لبوں پر سوال کیا کیا تھے

نومبر 30, 2016ہوا کا تخت،ماجد صدیقی،غزلمحال،چھال،ڈال،وبال،وسال،کمال،زوال،سوالadmin

ماجد صدیقی ۔ غزل نمبر 22

نظر میں واہمے، دل میں خیال کیا کیا تھے

ملے جو ہم تو لبوں پر سوال کیا کیا تھے

وُہ کرکے وار چلے تو غرور سے لیکن

قدم اُنہیں بھی اُٹھانے محال کیا کیا تھے

زمیں اجاڑ، فضا پُر شرر، فلک عریاں

پئے عذاب نظر کو وبال کیا کیا تھے

مہک ہماری لگی بھی تو ہاتھ صرصر کے

کسے جتائیں کہ اپنے کمال کیا کیا تھے

چٹک گلوں کی کہیں دُھول کا سکوت کہیں

رُتوں کے رنگ سجے ڈال ڈال کیا کیا تھے

بہ شکلِ خواب تھا امکانِ وصلِ یار سدا

عُروج کیا تھے ہمارے زوال کیا کیا تھے

رُتوں نے عہد سبھی محو کر دئیے، ورنہ

حروفِ ربط لکھے چھال چھال کیا کیا تھے

تھا ابتدا سے یہی حبس، ہے جو اَب ماجدؔ

نہ پوچھ مجھ سے مرے ماہ وسال کیا کیا تھے

ماجد صدیقی

بیٹھا ہوں میں بھی تاک لگائے مچان پر

نومبر 30, 2016ہوا کا تخت،ماجد صدیقی،غزلمچان،مکان،چٹان،کمان،گمان،آسمان،زبانadmin

ماجد صدیقی ۔ غزل نمبر 23

مجھ پر بنے گی گر نہ بنی اُس کی جان پر

بیٹھا ہوں میں بھی تاک لگائے مچان پر

حیراں ہوں کس ہوا کا دباؤ لبوں پہ ہے

کیسی گرہ یہ آ کے پڑی ہے زبان پر

کیا سوچ کر اُکھڑ سا گیا ہوں زمیں سے میں

اُڑتی پتنگ ہی تو گری ہے مکان پر

اُس سے کسے چمن میں توقع امان کی

رہتا ہے جس کا ہاتھ ہمیشہ کمان پر

شامل صدا میں وار کے پڑتے ہی جو ہُوا

چھینٹے اُسی لہو کے گئے آسمان پر

پنجوں میں اپنے چیختی چڑیا لئے عقاب

بیٹھا ہے کس سکون سے دیکھو چٹان پر

کیونکر لگا وہ مارِ سیہ معتبر مجھے

ماجدؔ خطا یہ مجھ سے ہوئی کس گمان پر

ماجد صدیقی

عہدِ طفلی سا بغل کے بیچ پھر بستہ ہوا

نومبر 30, 2016ہوا کا تخت،ماجد صدیقی،غزللکھا،چھایا،پہنا،برسا،بستہ،ترشاadmin

ماجد صدیقی ۔ غزل نمبر 24

مکتبِ تخلیقِ فن میں حال یہ اپنا ہوا

عہدِ طفلی سا بغل کے بیچ پھر بستہ ہوا

بہرِ ردِ عذر ہے بادِ خنک لایا ضرور

ابر کشتِ خشک تک پہنچا ہے پر برسا ہُوا

سرو سا اُس کا سراپا ہے الف اظہار کا

ہے جبینِ خامشی پر جو مری لکھا ہُوا

رنگ میں ڈوبا ہوا ہر دائرہ اُس جسم کا

پیرہن خوشبو کا ہے ہر شاخ نے پہنا ہوا

ہر نظر شاخِ سخن ہے پھول پتّوں سے لدی

ہے خمارِ آرزُو کچھ اِس طرح چھایا ہُوا

تجھ پہ بھی پڑنے کو ہے ماجدؔ نگاہِ انتخاب

ہے ترا ہر لفظ بھی اُس جسم سا ترشا ہُوا

ماجد صدیقی

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: