دیوان ششم غزل 1909

کیا طرح ہے یاں جو آئے ہو تو شرمائے ہوئے

بات مخفی کہتے ہو غصے سے جھنجھلائے ہوئے

اس مرے نوباوئہ گلزار خوبی کے حضور

اور خوباں جوں خزاں کے گل ہیں مرجھائے ہوئے

چھپ کے دیکھا ہمرہاں نے اس کو سو غش آگیا

حیف بیخود ہو گئے ہم پھر بخود آئے ہوئے

ہر زماں لے لے اٹھو ہو تیغ بیٹھا مجھ کو دیکھ

آئے ہو مستانہ کس دشمن کے بہکائے ہوئے

گھر میں جی لگتا نہیں اس بن تو ہم ہوکر اداس

دور جاتے ہیں نکل ہجراں سے گھبرائے ہوئے

ایک دن موے دراز اس کے کہیں دیکھے تھے میں

ہیں گلے کے ہار اب وے بال بل کھائے ہوئے

دشمنی سے سایۂ عاشق کو جو مارے ہے تیر

اس کماں ابرو کے جاکر میر ہمسائے ہوئے

میر تقی میر