ٹیگ کے محفوظات: بہار

چلا ہوں پاؤں میں عمر بھر کےغبار باندھے

جون 1, 2021یاور ماجد،آنکھ بھر آسمان،غزلہزار،قطار،کےغبار،اتار،بہار،حصار،خمارadmin

میں رختِ دل میں وجود کے سب فشار باندھے

چلا ہوں پاؤں میں عمر بھر کےغبار باندھے

نہیں سے ہاں سے کبھی تعلق نہ ٹوٹ پایا

ہیں عہد خود سے ہزار توڑے، ہزار باندھے

دھنک بہاروں کی گلستاں میں جو آ نہ پائی

تو ابر کرنوں پہ پل پڑے ہیں، حصار باندھے

تبسمِ گُل بھی دل کا غنچہ نہ کھول پایا

تو اور کتنا حسین منظر، بہار باندھے؟

جنون دل کا، نہ جستجو ہے نظر کی باقی

یہ بار سر سے ہیں میں نے کب کے اتار باندھے

فلک پہ جائے نماز افق کی بچھا کے، ۔۔ دیکھو

نکل پڑے ہیں پرند سارے قطار باندھے

جنم جنم سے میں اس جنوں کی تلاش میں ہوں

جو ہوش نظروں کا توڑ دے جو، خمار باندھے

یاور ماجد

آنکھ بھر آسمان ۔ فہرست

خلافِ حُسنِ توقع بہار گزری ہے

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلناگوار،وار،انتشار،بہارadmin

کسی کے پاے شکستہ پہ بار گزری ہے

خلافِ حُسنِ توقع بہار گزری ہے

وقارِ حسن بہ تمثیلِ برق کیوں ہے آج

صداے درد تھی سیماب وار گزری ہے

خزاں کا عکس ہی دیکھا ہے صبحِ گلشن میں

بشکلِ آینہ موجِ بہار گزری ہے

یہ جَاں بلب سے شگوفے یہ مُردہ رنگ کنول

یہاں سے رحمتِ ابرِ بہار گزری ہے!

رِداے حسن کے ٹکڑے فضا میں پھیلے ہیں

مری نگاہ بصد انتشار گزری ہے

شکیبؔ! فرطِ عقیدت میں کہہ گئے ہیں وہ بات

جو آگہی پہ بہت ناگوار گزری ہے

شکیب جلالی

زخمی نظر سے چُوم لیا خار خار کو

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلکار،انتظار،اعتبار،بہار،خار،روزگار،شاہکارadmin

یوں بھی دیا خراجِ عقیدت بہار کو

زخمی نظر سے چُوم لیا خار خار کو

دنیا اسی کو تنگ نظر کہہ رہی ہے آج

جس نے پناہ دی ہے ترے اعتبار کو

کیسے کہیں کہ ہم سے ہے توقیرِ رنگ و بُو

اب تک چھپا رہے ہیں وہ رازِ بہار کو

منزل پہ آ کے خواہشِ منزل بدل گئی

پھر کوئی جستجو ہے مرے جذبِ کار کو

بروقت آگیا ہے کوئی وعدہ کوش آج

اک دن چُھپا لیا تھا غمِ انتظار کو

تسلیم وہ حَسیں ہیں مگر میرے ذوق نے

تشکیل دی ہے ایک نئے شاہکار کو

کرنے لگا ہے چھیڑ، غمِ عشق سے، شکیبؔ

یہ حوصلہ ہوا ہے غمِ روزگار کو

شکیب جلالی

ہم غمِ بے کنار کھو بیٹھے

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلقرار،وقار،کنار،گسار،انتظار،اعتبار،بہارadmin

آپ کی یادگار کھو بیٹھے

ہم غمِ بے کنار کھو بیٹھے

اب بہاریں ہوں لاکھ جلوہ کناں

جوہرِ اعتبار کھو بیٹھے

ان کے جلووں کو زندگی کہہ کر

ہم نظر کا وقار کھو بیٹھے

آپ سے مل کے ہم نے کیا پایا

اپنے دل کا قرار کھو بیٹھے

خارزاروں سے اس طرح اُلجھے

ہم خلوصِ بہار کھو بیٹھے

غم کی تشنہ لَبی تو قائم ہے

آپ سا غم گُسار کھو بیٹھے

ان سے ہم اس قدر قریب ہوئے

زندگی کا وقار کھو بیٹھے

ہر حقیقت فریب لگتی ہے

جب کوئی اعتبار کھو بیٹھے

جس پہ نازاں ہیں قُربتیں بھی، شکیبؔ

وہ شبِ انتظار کھو بیٹھے

شکیب جلالی

وہ چار پھول کہ جو حاصلِ بہار رہے

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلقرار،وقار،کار،پائدار،بہار،بار،دار،سازگارadmin

کلی کلی کی نگاہوں میں مثلِ خار رہے

وہ چار پھول کہ جو حاصلِ بہار رہے

وہ جھرمٹوں میں ستاروں کے جلوہ گر ہیں آج

بَلا سے ان کی اگر کوئی اشک بار رہے

طِلسم اثر ہے فضا، چاندنی فسوں انداز

حضورِ دوست یہ ممکن نہیں قرار رہے

سیاہیوں کے بگولے چراغِ رَہ بن جائیں

جو حوصلہ شبِ غربت میں پختہ کار رہے

اب انتہاے اَلَم بھی گراں نہیں دل پر

مگر وہ غم جو ترے رُخ پہ جلوہ بار رہے

وہ بات کیا تھی ہمیں خود بھی اب تو یاد نہیں

نہ پوچھ ہم ترے کس درجہ راز دار رہے

خلوصِ عشق کے جذبات عام کرنا ہیں

کچھ اور دن یہ فضا مجھ کو سازگار رہے

یہ کشمکش، یہ بھلاوے حیات پرور ہیں

کسی کے دل میں اگر عشق کا وقار رہے

کسی کا قُرب اگر قُربِ عارضی ہے، شکیبؔ

فراقِ دوست کی لذّت ہی پائدار رہے

شکیب جلالی

حسن کے راز دار ہیں ہم لوگ

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلنہار،کار،گزار،اختیار،بہار،دار،روزگارadmin

عشق کے غم گُسا ر ہیں ہم لوگ

حسن کے راز دار ہیں ہم لوگ

دستِ قدرت کو ناز ہے ہم پر

وقت کے شاہ کار ہیں ہم لوگ

ہم سے قائم ہے گُلستاں کا بھرَم

آبروئے بہار ہیں ہم لوگ

منزلیں ہیں ہمارے قدموں میں

حاصلِ رہ گزار ہیں ہم لوگ

ہم سے تنظیم ہے زمانے کی

محورِ روزگار ہیں ہم لوگ

ہم جو چاہیں گے اب وہی ہو گا

صاحبِ اختیار ہیں ہم لوگ

ہم سے روشن ہے کائنات، شکیبؔ

اصلِ لیل و نہار ہیں ہم لوگ

شکیب جلالی

جلوے کسی کے، میری نظر نے سنوار کے

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلنکھار،اعتبار،بہار،سنوارadmin

آئینہِ جمال دکھایا نکھار کے

جلوے کسی کے، میری نظر نے سنوار کے

میں اوجِ کہکشاں سے بھی آگے نکل گیا

کچھ حوصلے بڑھے تھے مرے اعتبار کے

دیتا ہے ذرّہ ذرّہ چمن کا سبق ہمیں

شبنم مِٹی مگر گُل و ریحاں نکھار کے

گُل کو، چمن کو، سبزے کو، کہہ کر جُدا جُدا

انساں نے کردیے کئی ٹکڑے بہار کے

رنگینیِ حیات کا کیا تذکرہ، شکیبؔ

دُھندلے سے ہیں نقوش فریبِ بہار کے

شکیب جلالی

رنج و غم کی شکار ہے دنیا

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلانتشار،بہار،تار،دار،شکارadmin

مُفلسوں کی پُکار ہے دنیا

رنج و غم کی شکار ہے دنیا

کیا بتاؤں کہ اپنی حالت کی

خود ہی آئینہ دار ہے دنیا

حالِ باطن کسی کو کیا معلوم

ظاہراً دوست دار ہے دنیا

کہہ رہی ہے خزاں کی مایوسی

اک فریبِ بہار ہے دنیا

اُنس و الفت، خلوص و غیرت کا

دامنِ تار تار ہے دنیا

اک زمانہ ہے صد اَلَم بر دوش

جانے کس کی بہار ہے دنیا

ذرہ ذرہ، شکیبؔ، ہے بے چین

قلب کا انتشار ہے دنیا

شکیب جلالی

بس اک نگاہِ کرم کا اُمیدوار ہوں میں

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلقرار،گار،امیدوار،انتظار،بہار،دار،شاہکارadmin

تمھارے عشق میں مجبور و بے قرار ہوں میں

بس اک نگاہِ کرم کا اُمیدوار ہوں میں

مسرّتیں ہیں زمانے کو، اور الَم مجھ کو

کسی نرالے مصوّر کا شاہکار ہوں میں

کسی کی شانِ کریمی کی لاج رہ تو گئی

گُنَہ نہ کرنے کا بے شک گناہ گار ہوں میں

ستم ظریفیِ دوراں، ارے معاذ اللہ

گُلوں کی طرح سے اک قلبِ داغ دار ہوں میں

تری نگاہِ کرم نے شگفتگی دے دی

وگرنہ دیر کی اُجڑی ہوئی بہار ہوں میں

چلے بھی آئیں خدارا کہ وقتِ آخر ہے

ازل سے آپ کی تصویرِ انتظار ہوں میں

نہ جانے لوگ مجھے کیوں شکیبؔ کہتے ہیں

کسی کی یاد میں ہر وقت بے قرار ہوں میں

شکیب جلالی

اے حُکمِ شہریار، کہاں آگیا ہُوں میَں

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلکار،اعتبار،بہار،سوگوار،شہریار،غبارadmin

یہ جھاڑیاں ، یہ خار، کہاں آگیا ہُوں مَیں

اے حُکمِ شہریار، کہاں آگیا ہُوں میَں

ہر عندلیب مرگِ تبسّم پہ نوحہ خواں

ہر پھول سوگوار، کہاں آگیا ہُوں میَں

کیا واقعی نہیں ہے یہ موسیقیوں کا شہر

کیوں چُپ ہیں نغمہ کار، کہاں آگیا ہُوں مَیں

پُھولوں کی سرزمیں ہے نہ خوشبو کی رَہ گزر

اے حسرتِ بہار، کہاں آگیا ہُوں مَیں

جا تو رہا تھا چشمہِ آبِ حیات پر

یہ دُھول، یہ غبار، کہاں آگیا ہُوں مَیں

رَہ زَن مُجھی سے پوچھ رہے ہیں مرا پتا

اے حُسنِ اعتبار! کہاں آگیا ہُوں مَیں

شکیب جلالی

یہاں بھی ہوتا تھا ایک موسم بہار کر کے

مئی 30, 2021عرفان ستار،غزلقرار،نہار،نثار،پار،انحصار،اختیار،ادھار،بہار،حصار،غبارadmin

کہاں نجانے چلا گیا انتظار کر کے

یہاں بھی ہوتا تھا ایک موسم بہار کر کے

جو ہم پہ ایسا نہ کارِ دنیا کا جبر ہوتا

تو ہم بھی رہتے یہاں جنوں اختیار کر کے

نجانے کس سمت جا بسی بادِ یاد پرور

ہمارے اطراف خوشبوئوں کا حصار کر کے

کٹیں گی کس دن مدار و محور کی یہ طنابیں

کہ تھک گئے ہم حسابِ لیل و نہار کر کے

تری حقیقت پسند دنیا میں آ بسے ہیں

ہم اپنے خوابوں کی ساری رونق نثار کر کے

یہ دل تو سینے میں کس قرینے سے گونجتا تھا

عجیب ہنگامہ کر دیا بے قرار کر کے

ہر ایک منظر ہر ایک خلوت گنوا چکے ہیں

ہم ایک محفل کی یاد پر انحصار کر کے

تمام لمحے وضاحتوں میں گزر گئے ہیں

ہماری آنکھوں میں اک سخن کو غبار کر کے

یہ اب کھلا ہے کہ اس میں موتی بھی ڈھونڈنے تھے

کہ ہم تو بس آ گئے ہیں دریا کو پار کر کے

بقدرِ خوابِ طلب لہو ہے نہ زندگی ہے

ادا کرو گے کہاں سے اتنا ادھار کر کے

عرفان ستار

جبر کے اختیار میں، عمر گزار دی گئی

مئی 30, 2021عرفان ستار،غزلمدار،یار،کنار،گزار،انتظار،اختیار،اعتبار،بہار،بار،تار،خار،غبارadmin

کاوشِ روزگار میں، عمر گزار دی گئی

جبر کے اختیار میں، عمر گزار دی گئی

لمحۂ تازہ پھر کوئی آنے نہیں دیا گیا

ساعتِ انتظار میں، عمر گزار دی گئی

سوزنِ چشمِ یار سے، شوق رفو گری کا تھا

جامۂ تار تار میں، عمر گزار دی گئی

بامِ خیال پر اُسے دیکھا گیا تھا ایک شب

پھر اُسی رہ گزار میں، عمر گزار دی گئی

کھینچ رہی تھی کوئی شے ہم کو ہر ایک سمت سے

گردشِ بے مدار میں، عمر گزار دی گئی

رکھا گیا کسی سے یوں، ایک نفس کا فاصلہ

سایۂ مشک بار میں، عمر گزار دی گئی

زخمِ امید کا علاج، کوئی نہیں کیا گیا

پرسشِ نوکِ خار میں، عمر گزار دی گئی

دھول نظر میں رہ گئی، اُس کو وداع کر دیا

اور اُسی غبار میں، عمر گزار دی گئی

ساری حقیقتوں سے ہم، صرفِ نظر کیے رہے

خواب کے اعتبار میں، عمر گزار دی گئی

آیا نہیں خیال تک، شوق کے اختتام کا

خواہشِ بے کنار میں، عمر گزار دی گئی

صحبتِ تازہ کار کی، نغمہ گری تھی رایگاں

شورِ سکوتِ یار میں، عمر گزار دی گئی

وہ جو گیا تو ساتھ ہی، وقت بھی کالعدم ہوا

لمحۂ پُر بہار میں، عمر گزار دی گئی

عرفان ستار

میں جو اک شعلہ نژاد تھا ہوسِ قرار میں بجھ گیا

مئی 30, 2021عرفان ستار،غزلقرار،قطار،اعتبار،بہار،دارadmin

وہ چراغِ جاں کہ چراغ تھا کہیں رہ گزار میں بجھ گیا

میں جو اک شعلہ نژاد تھا ہوسِ قرار میں بجھ گیا

مجھے کیا خبر تھی تری جبیں کی وہ روشنی مرے دم سے تھی

میں عجیب سادہ مزاج تھا ترے اعتبار میں بجھ گیا

مجھے رنج ہے کہ میں موسموں کی توقعات سے کم رہا

مری لَو کو جس میں اماں ملی میں اُسی بہار میں بجھ گیا

وہ جو لمس میری طلب رہا وہ جھلس گیا مری کھوج میں

سو میں اُس کی تاب نہ لا سکا کفِ داغ دار میں بجھ گیا

جنہیں روشنی کا لحاظ تھا جنہیں اپنے خواب پہ ناز تھا

میں اُنہی کی صف میں جلا کِیا میں اُسی قطار میں بجھ گیا

عرفان ستار

سوچیے! وجہِ اضطرار ہے کیا؟

مئی 20, 2021ضامن جعفری،غزلنکھار،آشکار،اضطرار،اعتبار،بہار،داغدارadmin

کچھ نہیں ہو گا انتظار ہے کیا؟

سوچیے! وجہِ اضطرار ہے کیا؟

باقی پہلو نکھر چکے ہیں سب؟

صرف کردار داغدار ہے کیا؟

منزل، اسبابِ رَاہ، عزمِ سفَر

کسی چہرے سے آشکار ہے کیا؟

میں تَو ناقابلِ بَھروسا ہُوں

آپ کو اپنا اعتبار ہے کیا؟

اپنے آئینہِ ضمیر سے پُوچھ

فکر میں کوئی بھی نکھار ہے کیا؟

جو ہیں پَروَردَہِ خزاں ضامنؔ

اُن کو کیا عِلم کہ بہار ہے کیا

ضامن جعفری

یہ رنگِ خوں ہے گلوں پر نکھار اگر ہے بھی

اگست 4, 2018ناصر کاظمی،دیوانِ ناصر،غزلکاروبار،گزار،اختیار،ادھار،بہار،تار،سازگارadmin

یہ رنگِ خوں ہے گلوں پر نکھار اگر ہے بھی

’’حنائے پائے خزاں ہے بہار اگر ہے بھی‘‘

یہ پیش خیمہِ بیدادِ تازہ ہو نہ کہیں

بدل رہی ہے ہوا سازگار اگر ہے بھی

لہو کی شمعیں جلاؤ قدم بڑھائے چلو

سروں پہ سایہِ شب ہائے تار اگر ہے بھی

ابھی تو گرم ہے میخانہ جام کھنکاؤ

بلا سے سر پہ کسی کا ادھار اگر ہے بھی

حیاتِ درد کو آلودئہ نشاط نہ کر

یہ کاروبار کوئی کاروبار اگر ہے بھی

یہ امیتازِ من و تو خدا کے بندوں سے

وہ آدمی نہیں طاعت گزار اگر ہے بھی

نہ پوچھ کیسے گزرتی ہے زِندگی ناصر

بس ایک جبر ہے یہ اختیار اگر ہے بھی

ناصر کاظمی

بھرپور رہی بہار کچھ دیر

اگست 4, 2018ناصر کاظمی،برگِ نے،غزلقرار،مشکبار،کوہسار،اشکبار،بہار،خمار،خوشگوار،دیار،روزگار،سازگارadmin

ٹھہرا تھا وہ گلعذار کچھ دیر

بھرپور رہی بہار کچھ دیر

اک دُھوم رہی گلی گلی میں

آباد رہے دیار کچھ دیر

پھر جھوم کے بستیوں پہ برسا

ابرِ سرِ کوہسار کچھ دیر

پھر لالہ و گل کے میکدوں میں

چھلکی مئے مشکبار کچھ دیر

پھر نغمہ و مے کی صحبتوں کا

آنکھوں میں رہا خمار کچھ دیر

پھر شامِ وصالِ یار آئی

بہلا غمِ روزگار کچھ دیر

پھر جاگ اُٹھے خوشی کے آنسو

پھر دل کو ملا قرار کچھ دیر

پھر ایک نشاطِ بے خودی میں

آنکھیں رہیں اشکبار کچھ دیر

پھر ایک طویل ہجر کے بعد

صحبت رہی خوشگوار کچھ دیر

پھر ایک نگاہ کے سہارے

دنیا رہی سازگار کچھ دیر

ناصر کاظمی

ہوتا اگر اختیار کچھ دیر

اگست 4, 2018ناصر کاظمی،برگِ نے،غزلقرار،یادگار،یار،انتظار،اختیار،اعتبار،بہارadmin

کرتا اُسے بے قرار کچھ دیر

ہوتا اگر اختیار کچھ دیر

کیا روئیں فریبِ آسماں کو

اپنا نہیں اعتبار کچھ دیر

آنکھوں میں کٹی پہاڑ سی رات

سو جا دلِ بے قرار کچھ دیر

اے شہرِ طرب کو جانے والو

کرنا مرا انتظار کچھ دیر

بے کیفیٔ روز و شب مسلسل

سرمستیٔ انتظار کچھ دیر

تکلیفِ غمِ فراق دائم

تقریبِ وصالِ یار کچھ دیر

یہ غنچہ و گل ہیں سب مسافر

ہے قافلۂ بہار کچھ دیر

دنیا تو سدا رہے گی ناصر

ہم لوگ ہیں یادگار کچھ دیر

ناصر کاظمی

کیا نہ اُس نے مرا انتطار ایک منٹ

جولائی 24, 2018ہوائے طرب،باصر کاظمی،غزلہزار،انتطار،اعتبار،بہار،بار،غبارadmin

ہزار کہتا رہا میں کہ یار ایک منٹ

کیا نہ اُس نے مرا انتطار ایک منٹ

میں جانتا ہوں کہ ہے یہ خمار ایک منٹ

اِدھر بھی آئی تھی موجِ بہار ایک منٹ

پتا چلے کہ ہمیں کون کون چھوڑ گیا

ذرا چھٹے تو یہ گرد و غبار ایک منٹ

ابد تلک ہوئے ہم اُس کے وسوسوں کے اسیر

کیا تھا جس پہ کبھی اعتبار ایک منٹ

اگرچہ کچھ نہیں اوقات ایک ہفتے کی

جو سوچئے تو ہیں یہ دس ہزار ایک منٹ

پھر آج کام سے تاخیر ہو گئی باصِرؔ

کسی نے ہم سے کہا بار بار ایک منٹ

باصر کاظمی

کسی گنتی کسی شمار میں تھے

جولائی 24, 2018ہوائے طرب،باصر کاظمی،غزلچار،انتظار،بہار،حصار،شمارadmin

گو کہ پیچھے بہت قطار میں تھے

کسی گنتی کسی شمار میں تھے

سو بلاؤں سے ہم رہے محفوظ

اک پُراسرار سے حصار میں تھے

خوش ہوا ہوں غموں سے مل کے یوں

جیسے یہ میرے انتظار میں تھے

تین میں ہیں نہ اب وہ تیرہ میں

جو کبھی پہلے تین چار میں تھے

اب وہ سارے خزاں میں ہیں باصِرؔ

رنگ جتنے کبھی بہار میں تھے

باصر کاظمی

ہے خزاں بھی بہار میں مصروف

جولائی 24, 2018چمن کوئی بھی ہو،باصر کاظمی،غزلمدار،کاروبار،انتظار،بہار،بیقرار،سنگھارadmin

سازشِ انتشار میں مصروف

ہے خزاں بھی بہار میں مصروف

ہم نے رکھا کئی طرح خود کو

فرصتِ انتظار میں مصروف

مثلِ سیاّرگاں بنی آدم

اپنے اپنے مدار میں مصروف

عشق روتا ہے آٹھ آٹھ آنسو

حُسن سولہ سِنگھار میں مصروف

آہ وہ وقت جب لہو میرا

تھا دلِ بیقرار میں مصروف

زندگی کٹ رہی ہے باصرِؔ کی

بے ثمر کاروبار میں مصروف

باصر کاظمی

مرے پاس بھی کوئی گلبدن تھا بہار سا

اگست 31, 2017ماجد صدیقی،اَکھیاں بیچ الاؤ،غزلقرار،نکھار،بہار،تار،خمارadmin

ماجد صدیقی ۔ غزل نمبر 7

وہ کہ لمس میں تھا حریر، رنگ میں نار سا

مرے پاس بھی کوئی گلبدن تھا بہار سا

کبھی بارشوں میں بھی پھر دکھائی نہ دے سکا

اُسے دیکھنے سے فضا میں تھا جو نکھار سا

مری چاہ کو اُسے چاندنی کی قبائیں دیں

مرا بخت کس نے بنا دیا شبِ تار سا

کوئی آنکھ جیسے کھُلی ہو اِن پہ بھی مدھ بھری

ہے دل و نظر پہ عجب طرح کا خمار سا

لگے پیش خیمۂ قربِ یار گھڑی گھڑی

مری دھڑکنوں میں جو آ چلا ہے، قرار سا

ماجد صدیقی

زوالِ عمر کے دن، ٹُوٹتے خمار کے دن

اگست 31, 2017ماجد صدیقی،اَکھیاں بیچ الاؤ،غزلنکھار،انتظار،اختیار،بہار،خمار،شمار،غبارadmin

ماجد صدیقی ۔ غزل نمبر 56

پڑے ہیں دیکھنے کیا کربِ آشکار کے دن

زوالِ عمر کے دن، ٹُوٹتے خمار کے دن

بنامِ کم نظراں، لطفِ لمحۂ گزراں

ہمارے نام نئی رُت کے انتظار کے دن

بدن سے گردِ شرافت نہ جھاڑ دیں ہم بھی

لپک کے چھین نہ لیں ہم بھی کچھ نکھار کے دن

طویل ہوں بھی تو آخر کو مختصر ٹھہریں

چمن پہ رنگ پہ، خوشبو پہ اختیار کے دن

نئے دنوں میں وہ پہلا سا رس نہیں شاید

کہ یاد آنے لگے ہیں گئی بہار کے دن

فلک کی اوس سے ہوں گے نم آشنا کیسے

زمین پر جو دھوئیں کے ہیں اور غبار کے دن

یہ وقت بٹنے لگا ناپ تول میں کیونکر

یہ کس طرح کے ہیں ماجدؔ گِنَت شُمار کے دن

ماجد صدیقی

کہ جیسے چاندنی چھاجوں برستی نار کے بعد

اپریل 30, 2017ماجد صدیقی،آنگن آنگن رات،غزلچار،اقتدار،انتشار،بہار،دارadmin

ماجد صدیقی ۔ غزل نمبر 23

ملا وُہ خطّۂ جاں دشتِ انتظار کے بعد

کہ جیسے چاندنی چھاجوں برستی نار کے بعد

بہم وُہ لُطف ہُوا قربِ یار سے اَب کے

درونِ ملک سکوں، جیسے انتشار کے بعد

سروں نے کھنچ کے بدن سے کہا، بنامِ وطن

کوئی فراز نہیں ہے فرازِ دار کے بعد

نِکل کے کوچۂ جاناں سے ہم بھی دیکھ آئے

سبک سری جو ملے دورِ اقتدار کے بعد

پچھڑ کے موسمِ گُل سے یہی ہُوا ماجدؔ

کھِلا ہے غنچۂ دل ہر گئی بہار کے بعد

ماجد صدیقی

خزاں کے دور میں ذکرِ بہار کیا کرنا

فروری 27, 2017ماجد صدیقی،سخناب،غزلوار،انتظار،اعتبار،بہار،بار،شمارadmin

ماجد صدیقی ۔ غزل نمبر 41

لب و زبان کو ماجدؔ! فگار کیا کرنا

خزاں کے دور میں ذکرِ بہار کیا کرنا

جسے ترستے بجھی ہیں بصارتیں اپنی

اب اُس سحر کا ہمیں انتظار کیا کرنا

نہ کوئی مدّ مقابل ہو جب برابر کا

تو رن میں ایسی شجاعت شمار کیا کرنا

یہ سر خجل ہے ٹھہرتا نہیں ہے شانوں پر

اِسے کچھ اور بھی اب زیر بار کیا کرنا

نہاں نہیں ہے نگاہوں سے جب کِیا اُس کا

کہے پہ اُس کے ہمیں اعتبار کیا کرنا

سبک سری میں جوہم پر کیا ہے دُشمن نے

جواب میں ہمیں ایسا ہی وار کیا کرنا

ماجد صدیقی

گرد آئے جہاں غبار آئے

فروری 27, 2017ماجد صدیقی،سخناب،غزلقرار،گزار،اعتبار،بہار،بخار،دار،غبارadmin

ماجد صدیقی ۔ غزل نمبر 150

اُس چمن پر کہاں نکھار آئے

گرد آئے جہاں غبار آئے

ہم ہیں محصور اُس گلستاں میں

عمر گزری جہاں بہار آئے

کس کو اپنی غرض عزیز نہیں

کس کی باتوں پہ اعتبار آئے

ایسا بگڑا نظام اعضا کا

نت کُمک کو ہمیں بخار آئے

رن میں آئین تھا وفا کا یہی

جو بھی مشکل پڑی گزار آئے

ہم ہیں وہ لوگ جو کہ شانوں پر

سر کے ہمراہ لے کے دار آئے

چھِن گئے جن سے پیرہن ماجدؔ

ایسی شاخوں کو کیا قرار آئے

ماجد صدیقی

دیا ہے بادِصبا نے مزہ خمار آسا

نومبر 30, 2016ہوا کا تخت،ماجد صدیقی،غزلہار،انتظار،بہار،خمار،خار،غبارadmin

ماجد صدیقی ۔ غزل نمبر 34

کرن کرن ہے سحر کی نگاہِ یار آسا

دیا ہے بادِصبا نے مزہ خمار آسا

بہ نطق و فکر ہے وہ لطفِ تازگی پیدا

نفس نفس ہے مرا اِن دنوں بہار آسا

مرے وجود سے پھوٹی وہ خَیر کی خوشبو

کہ چبھ رہا ہوں دلِ شیطنت میں خار آسا

وہ ابر ہوں کہ کھڑا ہوں تُلا برسنے کو

ہر ایک درد ہے اب سامنے غبار آسا

میں اس میں اور وہ مجھ میں ہے جسکا سودا تھا

نہیں ہے روگ کوئی دل کو انتظار آسا

سخن سے طے یہی نسبت ہے اب تری ماجدؔ

کہ ہو گیا تجھے موزوں گلے میں ہار آسا

ماجد صدیقی

کشیدہ رُو ہے ہمِیں سے بہار کیا کہئے

نومبر 30, 2016ہوا کا تخت،ماجد صدیقی،غزلفگار،اختیار،بہار،تاجدار،سنگسار،شاخسارadmin

ماجد صدیقی ۔ غزل نمبر 66

چمن چمن ہے یہاں زر نگار کیا کہئے

کشیدہ رُو ہے ہمِیں سے بہار کیا کہئے

لگی ہے ضربِ عدو تو پسِ نگاہ مگر

ہیں چشم و گوش و زباں سب فگار کیا کہئے

وہ جن کے عیش کو مرہون ہو گئے ہم تُم

کہاں گئے ہیں وہ سب تاجدار کیا کہئے

شجر درونِ چمن باور ہوا جو بھی

کیا گیا ہے وہی سنگسار کیا کہئے

ہوا کا تخت ملا عاق ہو کے شاخوں سے

یہ جبر کس نے کیا اختیار کیا کہئے

لبوں کے بیچ نئی کونپلیں ہیں نت ماجدؔ

سخن کہیں کہ اِسے شاخسار، کیا کہئے

ماجد صدیقی

دل درد سے ہمکنار بھی ہے

اکتوبر 31, 2016ماجد صدیقی،آغاز،غزلہمکنار،ناگوار،یادگار،بہار،روزگارadmin

ماجد صدیقی ۔ غزل نمبر 80

آنکھوں میں ترا دیار بھی ہے

دل درد سے ہمکنار بھی ہے

پت جھڑ کا سکوت ہے لبوں پر

ہمراہ مرے بہار بھی ہے

تو میری نظر میں اجنبی بھی

مِلنا ترا یادگار بھی ہے

مَیں تیرے لئے ہوں مانتا ہوں

مجھ کو غمِ روزگار بھی ہے

جیتا ہوں کہ جی رہا ہوں ماجدؔ

جینا ہے کہ ناگوار بھی ہے

ماجد صدیقی

یہاں بھی ہوتا تھا ایک موسم بہار کر کے

اکتوبر 26, 2015شعراء،عرفان ستار،غزلقرار،نہار،نثار،پار،انحصار،اختیار،ادھار،بہار،حصار،غبارadmin

عرفان ستار ۔ غزل نمبر 72

کہاں نجانے چلا گیا انتظار کر کے

یہاں بھی ہوتا تھا ایک موسم بہار کر کے

جو ہم پہ ایسا نہ کارِ دنیا کا جبر ہوتا

تو ہم بھی رہتے یہاں جنوں اختیار کر کے

نجانے کس سمت جا بسی بادِ یاد پرور

ہمارے اطراف خوشبوئوں کا حصار کر کے

کٹیں گی کس دن مدار و محور کی یہ طنابیں

کہ تھک گئے ہم حسابِ لیل و نہار کر کے

تری حقیقت پسند دنیا میں آ بسے ہیں

ہم اپنے خوابوں کی ساری رونق نثار کر کے

یہ دل تو سینے میں کس قرینے سے گونجتا تھا

عجیب ہنگامہ کر دیا بے قرار کر کے

ہر ایک منظر ہر ایک خلوت گنوا چکے ہیں

ہم ایک محفل کی یاد پر انحصار کر کے

تمام لمحے وضاحتوں میں گزر گئے ہیں

ہماری آنکھوں میں اک سخن کو غبار کر کے

یہ اب کھلا ہے کہ اس میں موتی بھی ڈھونڈنے تھے

کہ ہم تو بس آ گئے ہیں دریا کو پار کر کے

بقدرِ خوابِ طلب لہو ہے نہ زندگی ہے

ادا کرو گے کہاں سے اتنا ادھار کر کے

عرفان ستار

جبر کے اختیار میں، عمر گزار دی گئی

اکتوبر 26, 2015شعراء،عرفان ستار،غزلمدار،یار،کنار،گزار،انتظار،اختیار،اعتبار،بہار،بار،تار،خار،غبارadmin

عرفان ستار ۔ غزل نمبر 55

کاوشِ روزگار میں، عمر گزار دی گئی

جبر کے اختیار میں، عمر گزار دی گئی

لمحۂ تازہ پھر کوئی آنے نہیں دیا گیا

ساعتِ انتظار میں، عمر گزار دی گئی

سوزنِ چشمِ یار سے، شوق رفو گری کا تھا

جامۂ تار تار میں، عمر گزار دی گئی

بامِ خیال پر اُسے دیکھا گیا تھا ایک شب

پھر اُسی رہ گزار میں، عمر گزار دی گئی

کھینچ رہی تھی کوئی شے ہم کو ہر ایک سمت سے

گردشِ بے مدار میں، عمر گزار دی گئی

رکھا گیا کسی سے یوں، ایک نفس کا فاصلہ

سایۂ مشک بار میں، عمر گزار دی گئی

زخمِ امید کا علاج، کوئی نہیں کیا گیا

پرسشِ نوکِ خار میں، عمر گزار دی گئی

دھول نظر میں رہ گئی، اُس کو وداع کر دیا

اور اُسی غبار میں، عمر گزار دی گئی

ساری حقیقتوں سے ہم، صرفِ نظر کیے رہے

خواب کے اعتبار میں، عمر گزار دی گئی

آیا نہیں خیال تک، شوق کے اختتام کا

خواہشِ بے کنار میں، عمر گزار دی گئی

صحبتِ تازہ کار کی، نغمہ گری تھی رایگاں

شورِ سکوتِ یار میں، عمر گزار دی گئی

وہ جو گیا تو ساتھ ہی، وقت بھی کالعدم ہوا

لمحۂ پُر بہار میں، عمر گزار دی گئی

عرفان ستار

میں جو اک شعلہ نژاد تھا ہوسِ قرار میں بجھ گیا

اکتوبر 26, 2015شعراء،عرفان ستار،غزلقرار،قطار،اعتبار،بہار،دارadmin

عرفان ستار ۔ غزل نمبر 19

وہ چراغِ جاں کہ چراغ تھا کہیں رہ گزار میں بجھ گیا

میں جو اک شعلہ نژاد تھا ہوسِ قرار میں بجھ گیا

مجھے کیا خبر تھی تری جبیں کی وہ روشنی مرے دم سے تھی

میں عجیب سادہ مزاج تھا ترے اعتبار میں بجھ گیا

مجھے رنج ہے کہ میں موسموں کی توقعات سے کم رہا

مری لَو کو جس میں اماں ملی میں اُسی بہار میں بجھ گیا

وہ جو لمس میری طلب رہا وہ جھلس گیا مری کھوج میں

سو میں اُس کی تاب نہ لا سکا کفِ داغ دار میں بجھ گیا

جنہیں روشنی کا لحاظ تھا جنہیں اپنے خواب پہ ناز تھا

میں اُنہی کی صف میں جلا کِیا میں اُسی قطار میں بجھ گیا

عرفان ستار

بچھڑ گیا تری صُورت، بہار کا موسم

اکتوبر 25, 2015پروین شاکر،شعراء،غزلہار،چنار،نکھار،یار،پکار،پھوار،انتظار،اختیار،اعتبار،بہار،دارadmin

پروین شاکر ۔ غزل نمبر 41

خیال و خواب ہُوا برگ و بار کا موسم

بچھڑ گیا تری صُورت، بہار کا موسم

کئی رُتوں سے مرے نیم وا دریچوں میں

ٹھہر گیا ہے ترے انتظار کا موسم

وہ نرم لہجے میں کچھ تو کہے کہ لَوٹ آئے

سماعتوں کی زمیں پر پھوار کا موسم

پیام آیا ہے پھر ایک سروقامت کا

مرے وجود کو کھینچے ہے دار کا موسم

وہ آگ ہے کہ مری پور پور جلتی ہے

مرے بدن کو مِلا ہے چنار کا موسم

رفاقتوں کے نئے خواب خُوشنما ہیں مگر

گُزر چکا ہے ترے اعتبار کا موسم

ہَوا چلی تو نئی بارشیں بھی ساتھ آئیں

زمیں کے چہرے پہ آیا نکھار کا موسم

وہ میرا نام لیے جائے اور میں اُس کا نام

لہو میں گُونج رہا ہے پکار کا موسم

قدم رکھے مری خُوشبو کہ گھر کو لَوٹ آئے

کوئی بتائے مُجھے کوئے یار کا موسم

وہ روز آ کے مجھے اپنا پیار پہنائے

مرا غرور ہے بیلے کے ہار کا موسم

ترے طریقِ محبت پہ با رہا سوچا

یہ جبر تھا کہ ترے اختیار کا موسم

پروین شاکر

میں تو تہِ مزار ہوں تم تو ہو مزار پر

اکتوبر 25, 2015قمر جلالوی،شعراء،غزلقرار،مزار،بہار،بار،تار،شکارadmin

قمر جلالوی ۔ غزل نمبر 44

کیونکر رکھو گے ہاتھ دلِ بے قرار پر

میں تو تہِ مزار ہوں تم تو ہو مزار پر

یہ دیکھنے، قفس میں بنی کیا ہزار پر

نکہت چلی ہے دوشِ نسیم بہار پر

گر یہ ہی جور و ظلم رہے خاکسار پر

منہ ڈھک کے روئے گا تو کسی دن مزار پر

ابرو چڑھے ہوئے ہیں دلِ بے قرار پر

دو دو کھنچی ہوئی ہیں کمانیں شکار پر

رہ رہ گئی ہیں ضعف سے وحشت میں حسرتیں

رک رک گیا ہے دستِ جنوں تار تار پر

شاید چمن میں فصلِ بہاری قریب ہے

گرتے ہیں بازوؤں سے مرے بار بار پر

یاد آئے تم کو اور پھر آئے مری وفا

تم آؤ رونے اور پھر آؤ مزار پر

کس نے کئے یہ جور، حضور آپ نے کئے

کس پر ہوئے یہ جور، دلِ بے قرار پر

سمجھا تھا اے قمر یہ تجلی انھیں کی ہے

میں چونک اٹھا جو چاندنی آئی مزار پر

قمر جلالوی

شمع روشن ہو گئی پھولوں کا ہار آ ہی گیا

اکتوبر 25, 2015قمر جلالوی،شعراء،غزلہار،کردگار،پیار،اختیار،اعتبار،بہار،دارadmin

قمر جلالوی ۔ غزل نمبر 35

تم چلے آئے تو رونق پر مزار آ ہی گیا

شمع روشن ہو گئی پھولوں کا ہار آ ہی گیا

ہم نہ کہتے تھے ہنسی میں غیر سے وعدہ نہ کر

دیکھنے والوں کو آخر اعتبار آ ہی گیا

کہتے تھے اہلِ قفس گلشن کا اب لیں گے نہ نام

باتوں باتوں میں مگر ذکرِ بہار آ ہی گیا

کتنا سمجھایا تھا تجھ کو دیکھ بڑھ جائے گی بات

فیصلہ آخر کو پیشِ کردگار آ ہی گیا

گو بظاہر میرے افسانے پہ وہ ہنستے رہے

آنکھ میں آنسو مگر بے اختیار آ ہی گیا

گو مری صورت سے نفرت تھی مگر مرنے کے بعد

جب مری تصویر دیکھی ان کو پیار آ ہی گیا

اے قمر قسمت چمک اٹھی اندھیری رات میں

چاندنی چھپتے ہی کوئی پردہ دار آ ہی گیا

قمر جلالوی

مجھ پر گلہ رہا ستمِ روزگار کا

اکتوبر 25, 2015مصطفٰی خان شیفتہ،اساتذہ،غزلقرار،مزار،امیدوار،اختیار،بہار،بار،دار،روزگار،عذارadmin

مصطفٰی خان شیفتہ ۔ غزل نمبر 11

سب حوصلہ جو صرف ہوا جورِ یار کا

مجھ پر گلہ رہا ستمِ روزگار کا

تھا کیا ہجوم بہرِ زیارت ہزار کا

گل ہو گیا چراغ ہمارے مزار کا

جور و جفا بھی غیر پر اے یارِ دل شکن

کچھ بھی خیال ہے دلِ امیدوار کا

کھلنے لگے ہیں از سرِ نو غنچہائے زخم

یہ فیض ہے صبا کے دمِ مشک بار کا

گر چاہتے ہو جامہ نہ ہو چاک ناصحو

منگوا دو پیرہن مجھے اس گل عذار کا

ہر کوچہ میں کھلی ہے جو دکانِ مے فروش

کیا فصل ہے شراب کی، موسم بہار کا؟

گھبرا کے اور غیر کے پہلو سے لگ گئے

دیکھا اثر یہ نالۂ بے اختیار کا

وہ آتے آتے غیر کے کہنے سے تھم گئے

اب کیا کروں علاج دلِ بے قرار کا

آزاد ہے عذابِ دو عالم سے شیفتہ

جو ہے اسیر سلسلۂ تاب دار کا!

مصطفٰی خان شیفتہ

خزاں سے کچھ نہیں ہوتا ، بہار دل میں رہے

اکتوبر 23, 2015Jaun Elia،جون ایلیا،شعراء،غزلنگار،وار،انتظار،بہار،خار،غبارadmin

جون ایلیا ۔ غزل نمبر 235

فراق کیا ہے اگر ، یادِ یار دل میں رہے

خزاں سے کچھ نہیں ہوتا ، بہار دل میں رہے

گزار روز و شبِ وصل اک نگار کے ساتھ

وہ ہے ایک شبِ انتظار ،دل میں رہے

تو اپنی ذات کے باہر نہ بکھریو زنہار

فضا کو صاف رکھیو ، غبار دل میں رہے

نہ ہو اگر نہیں دیوار ہائے نقش و نگار

خیالِ پرتوِ نقش و نگار ، دل میں رہے

لبوں کا یہ ہے کہ رشتہ سبھی سے ہے انکا

بنے نہ جس سے لبوں کی وہ خار دل میں رہے

تو بیچ دے سرِ بازار ہوش دل اپنا

ہو اک خیال جو دیوانہ وار دل میں رہے

جون ایلیا

بیقراری قرار ہے اماں ہاں

اکتوبر 23, 2015Jaun Elia،جون ایلیا،شعراء،غزلفگار،قرار،یار،کار،انتظار،بہار،خوار،سوارadmin

جون ایلیا ۔ غزل نمبر 87

جبر پُر اختیار ہے اماں ہاں

بیقراری قرار ہے اماں ہاں

ایزدِ ایزداں ہے تیرا انداز

اہرمن دل فگار ہے اماں ہاں

میرے آغوش میں جو ہے اُس کا

دَم بہ دَم انتظار ہے اماں ہاں

ہے رقیب اُس کا دوسرا عاشق

وہی اِک اپنا یار ہے اماں ہاں

یار زردی ہے رنگ پر اپنے

سو خزاں تو بہار ہے اماں ہاں

لب و پستان و ناف اس کے نہ پوچھ

ایک آشوبِ کار ہے اماں ہاں

سنگ در کے ہوں یا ہوں دار کے لوگ

سب پہ شہوت سوار ہے اماں ہاں

اب تو انساں کے معجزے ہیں عام

اور انسان خوار ہے اماں ہاں

جون ایلیا

طاقتِ بیدادِ انتظار نہیں ہے

اکتوبر 8, 2015مرزا اسد اللہ خان غالب،اساتذہ،غزلانتظار،اختیار،استوار،اعتبار،بہار،خمار،غبارadmin

دیوانِ غالب ۔ غزل نمبر 279

آ، کہ مری جان کو قرار نہیں ہے

طاقتِ بیدادِ انتظار نہیں ہے

دیتے ہیں جنّت حیاتِ دہر کے بدلے

نشّہ بہ اندازۂ خمار نہیں ہے

گِریہ نکالے ہے تیری بزم سے مجھ کو

ہائے کہ رونے پہ اختیار نہیں ہے

ہم سے عبث ہے گمانِ رنجشِ خاطر

خاک میں عشّاق کی غبار نہیں ہے

دل سے اٹھا لطفِ جلوہہائے معانی

غیرِ گل آئینۂ بہار نہیں ہے

قتل کا میرے کیا ہے عہد تو بارے

وائے اگر عہد استوار نہیں ہے

تو نے قسم مے کشی کی کھائی ہے غالب

تیری قسم کا کچھ اعتبار نہیں ہے

مرزا اسد اللہ خان غالب

نافہ دماغِ آہوئے دشتِ تتار ہے

اکتوبر 8, 2015مرزا اسد اللہ خان غالب،اساتذہ،غزلقرار،انتظار،بہار،تتار،دار،روبکار،شکارadmin

دیوانِ غالب ۔ غزل نمبر 259

جس جا نسیم شانہ کشِ زلفِ یار ہے

نافہ دماغِ آہوئے دشتِ تتار ہے

کس کا سرا غِ جلوہ ہے حیرت کو اے خدا

آیئنہ فرشِ شش جہتِ انتظار ہے

ہے ذرہ ذرہ تنگئِ جا سے غبارِ شوق

گردام یہ ہے و سعتِ صحرا شکار ہے

دل مدّعی و دیدہ بنا مدّعا علیہ

نظارے کا مقدّمہ پھر روبکار ہے

چھڑکے ہے شبنم آئینۂ برگِ گل پر آب

اے عندلیب وقتِ ود اعِ بہار ہے

پچ آپڑی ہے وعدۂ دلدار کی مجھے

وہ آئے یا نہ آئے پہ یاں انتظار ہے

بے پردہ سوئے وادئِ مجنوں گزر نہ کر

ہر ذرّے کے نقاب میں دل بے قرار ہے

اے عندلیب یک کفِ خس بہرِ آشیاں

طوفانِ آمد آمدِ فصلِ بہار ہے

دل مت گنوا، خبر نہ سہی سیر ہی سہی

اے بے دماغ آئینہ تمثال دار ہے

غفلت کفیلِ عمر و اسدؔ ضامنِ نشاط

اے مر گِ ناگہاں تجھے کیا انتظار ہے

مرزا اسد اللہ خان غالب

حیراں کیے ہوئے ہیں دلِ بے قرار کے

اکتوبر 8, 2015مرزا اسد اللہ خان غالب،اساتذہ،غزلقرار،بہارadmin

دیوانِ غالب ۔ غزل نمبر 231

سیماب پشت گرمیِ آئینہ دے ہے ہم

حیراں کیے ہوئے ہیں دلِ بے قرار کے

آغوشِ گل کشودہ برائے وداع ہے

اے عندلیب چل! کہ چلے دن بہار کے

مرزا اسد اللہ خان غالب

اترائے کیوں نہ خاک سرِ رہگزار کی

اکتوبر 8, 2015مرزا اسد اللہ خان غالب،اساتذہ،غزلبہار،رہگزار،زارadmin

دیوانِ غالب ۔ غزل نمبر 197

روندی ہوئی ہے کوکبہ شہریار کی

اترائے کیوں نہ خاک سرِ رہگزار کی

جب اس کے دیکھنے کے لیے آئیں بادشاہ

لوگوں میں کیوں نمود نہ ہو لالہ زار کی

بُھوکے نہیں ہیں سیرِ گلستان کے ہم ولے

کیوں کر نہ کھائیے کہ ہوا ہے بہار کی

مرزا اسد اللہ خان غالب

وہی جی مارے جس کو پیار کرے

اکتوبر 7, 2015میر تقی میر،اساتذہ،غزلہار،یار،پیار،انتظار،اعتبار،بہار،شکارadmin

دیوان ششم غزل 1913

عشق کیا کوئی اختیار کرے

وہی جی مارے جس کو پیار کرے

غنچہ ہے سر پہ داغ سودا کا

دیکھیں کب تک یہ گل بہار کرے

آنکھیں پتھرائیں چھاتی پتھر ہے

وہ ہی جانے جو انتظار کرے

سہل وہ آشنا نہیں ہوتا

دیر میں کوئی اس کو یار کرے

کنج میں دامگہ کے ہوں شاید

صید لاغر کو بھی شکار کرے

کبھو سچے بھی ہو کوئی کب تک

جھوٹے وعدوں کو اعتبار کرے

پھول کیا میر جی کو وہ محبوب

سر چڑھاوے گلے کا ہار کرے

میر تقی میر

ایسی طرح روزگار دیکھیے کب تک رہے

اکتوبر 7, 2015میر تقی میر،اساتذہ،غزلہار،قرار،نہار،یار،انتظار،اضطرار،بہار،بار،روزگار،شعارadmin

دیوان ششم غزل 1910

چرخ پر اپنا مدار دیکھیے کب تک رہے

ایسی طرح روزگار دیکھیے کب تک رہے

سہرے کہاں تک پڑیں آنسوئوں کے چہرے پر

گریہ گلے ہی کا ہار دیکھیے کب تک رہے

ضعف سے آنکھیں مندیں کھل نہ گئیں پھر شتاب

غش یہ ہمیں اب کی بار دیکھیے کب تک رہے

لب پہ مرے آن کر بارہا پھر پھر گئی

جان کو یہ اضطرار دیکھیے کب تک رہے

اس سے تو عہد و قرار کچھ بھی نہیں درمیاں

دل ہے مرا بے قرار دیکھیے کب تک رہے

اس سرے سے اس سرے داغ ہی ہیں صدر میں

ان بھی گلوں کی بہار دیکھیے کب تک رہے

آنکھیں تو پتھرا گئیں تکتے ہوئے اس کی راہ

شام و سحر انتظار دیکھیے کب تک رہے

آنکھ ملاتا نہیں ان دنوں وہ شوخ ٹک

بے مزہ ہے ہم سے یار دیکھیے کب تک رہے

روے سخن سب کا ہے میری غزل کی طرف

شعر ہی میرا شعار دیکھیے کب تک رہے

گیسو و رخسار یار آنکھوں ہی میں پھرتے ہیں

میر یہ لیل و نہار دیکھیے کب تک رہے

میر تقی میر

کہ دیکھا جب تجھے تب جی کو مار مار رہے

اکتوبر 7, 2015میر تقی میر،اساتذہ،غزلقرار،مار،یادگار،یار،پکار،انتظار،اختیار،بہار،خار،غبارadmin

دیوان ششم غزل 1883

کہو تو کب تئیں یوں ساتھ تیرے پیار رہے

کہ دیکھا جب تجھے تب جی کو مار مار رہے

ادا و ناز سے دل لے چلا تو ہنس کے کہا

کہ میرے پاس تمھارا بھی یادگار رہے

ہم آپ سے جو گئے ہیں گئے ہیں مدت کے

الٰہی اپنا ہمیں کب تک انتظار رہے

ہوس اسیروں کے ٹک دل کی نکلے کچھ شاید

کوئی دن اور اگر موسم بہار رہے

اٹھا جو باغ سے میں بے دماغ تو نہ پھرا

ہزار مرغ گلستاں مجھے پکار رہے

لیا تو جاوے بھلا نام منھ سے یاری کا

جو ہم ستم زدوں سے یار کچھ بھی یار رہے

وصال ہجر ٹھہر جاوے کچھ نہ کچھ آخر

جو بیقرار مرے دل کو بھی قرار رہے

کریں گے چھاتی کو گلزار ہم جلاکر داغ

جو گل کے سینے میں ایسا ہی خار خار رہے

تکوں ہوں ایک سا میں گرد راہ کو اس کی

نہ کیونکے دونوں مری آنکھوں میں غبار رہے

نہ کریے گریۂ بے اختیار ہرگز میر

جو عشق کرنے میں دل پر کچھ اختیار رہے

میر تقی میر

تو کیا رہیں گے جیتے ہم اس روزگار میں

اکتوبر 7, 2015میر تقی میر،اساتذہ،غزلقرار،قطار،مزار،چار،انتظار،اختیار،بہار،دیار،روزگار،شمار،شکار،غبارadmin

دیوان ششم غزل 1856

گر روزگار ہے یہی ہجران یار میں

تو کیا رہیں گے جیتے ہم اس روزگار میں

کچھ ڈر نہیں جو داغ جنوں ہو گئے سیاہ

ڈر دل کے اضطراب کا ہے اس بہار میں

کیا بیقرار دل کی تسلی کرے کوئی

کچھ بھی ثبات ہے ترے عہد و قرار میں

بیتاب دل نہ دفن ہو اے کاش میرے ساتھ

رہنے نہ دے گا لاش کوئی دن مزار میں

وہ سنگ دل نہ آیا بہت دیکھی اس کی راہ

پتھرا چلی ہیں آنکھیں مری انتظار میں

تھمتا نہیں ہے رونا علی الاتصال کا

کیا اختیار گریۂ بے اختیار میں

مربوط کیسے کیسے کہے ریختے ولے

سمجھا نہ کوئی میری زباں اس دیار میں

تھی بزم شعر رات کو شاعر بہت تھے جمع

دو باتیں ہم نے ایسے نہ کیں چار چار میں

دنبالہ گردی قیس نے بہتیری کی ولے

آیا نظر نہ محمل لیلیٰ غبار میں

اب ذوق صید اس کو نہیں ورنہ پیش ازیں

اودھم تھا وحش و طیر سے اس کے شکار میں

منھ چاہیے جو کوئی کسو سے حساب لے

ناکس سے گفتگو نہیں روز شمار میں

گنتی کے لوگوں کی وہاں صف ہووے گی کھڑی

تو میر کس شمار میں ہے کس قطار میں

میر تقی میر

نیند آتی ہے دل جمعی میں سو تو دل کو قرار نہیں

اکتوبر 7, 2015میر تقی میر،اساتذہ،غزلقرار،مار،نہار،یار،گذار،بہار،شکارadmin

دیوان ششم غزل 1852

آنکھ لگی ہے جب سے اس سے آنکھ لگی زنہار نہیں

نیند آتی ہے دل جمعی میں سو تو دل کو قرار نہیں

وصل میں اس کے روز و شب کیا خوب گذرتی تھی اپنی

ہجراں کا کچھ اور سماں ہے اب وہ لیل و نہار نہیں

خالی پڑے ہیں دام کہیں یا صید دشتی صید ہوئے

یا جس صید افگن کے لیے تھے اس کو ذوق شکار نہیں

سبزہ خط کا گرد گل رو بڑھ کانوں کے پار ہوا

دل کی لاگ اب اپنی ہو کیونکر وہ اس منھ پہ بہار نہیں

لطف عمیم اس کا ہی ہمدم کیوں نہ غنیمت جانیں ہم

ربط خاص کسو سے اسے ہو یہ تو طور یار نہیں

عشق میں اس بے چشم و رو کے طرفہ رویت پیدا کی

کس دن اودھر سے اب ہم پر گالی جھڑکی مار نہیں

مشتاق اس کے راہ گذر پر برسوں کیوں نہ بیٹھیں میر

ان نے راہ اب اور نکالی ایدھر اس کا گذار نہیں

میر تقی میر

یک جرعہ ہمدم اور پلا پھر بہار دیکھ

اکتوبر 6, 2015میر تقی میر،اساتذہ،غزلمار،یار،کنار،پکار،پسار،بہار،بارadmin

دیوان پنجم غزل 1722

گل گل شگفتہ مے سے ہوا ہے نگار دیکھ

یک جرعہ ہمدم اور پلا پھر بہار دیکھ

اب وہ نہیں کرم کہ بھرن پڑنے لگ گئی

جوں ابر آگے لوگوں کے دامن پسار دیکھ

آنکھوں کو تیری عین کیا سب نے دیدنی

تو سب سے ٹک تو پھیر لے آنکھوں کو یار دیکھ

محتاج گل نہیں ہے گریبان غم کشاں

گلزار اشک خونیں سے جیب و کنار دیکھ

آنکھیں ادھر سے موند لیں ہیں اب تو شرط ہے

پھر دیکھیو نہ میری طرف ایک بار دیکھ

خالی پڑا ہے خانۂ دولت وزیر کا

باور نہیں تو آصف آصف پکار دیکھ

خواہش نہ ہووے دل کی جو حاصل تو موت ہے

احوال میر دیکھ نہیں جی تو مار دیکھ

میر تقی میر

جان عزیز گئی ہوتی کاش اب کے سال بہار کے ساتھ

اکتوبر 6, 2015میر تقی میر،اساتذہ،غزلہار،یار،کنار،پیار،آزار،بہار،بیمار،دیوار،غبارadmin

دیوان پنجم غزل 1718

ہائے ستم ناچار معیشت کرنی پڑی ہر خار کے ساتھ

جان عزیز گئی ہوتی کاش اب کے سال بہار کے ساتھ

کس آوارئہ عشق و جنوں کی اک مٹھی اب خاک اڑی

اڑتی پھرے ہے پس محمل جو راہ کے گرد و غبار کے ساتھ

وہ لحظہ نہیں جاتا جی سے آنکھ لڑی تھی جب اس سے

چاہ نکلتی تھی باتوں سے چتون بھی تھی پیار کے ساتھ

جی مارے شب مہ میں ہمارے قہر کیا مشاطہ نے

بل کھائے بالوں کو دیے بل اس کے گلے کے ہار کے ساتھ

کیا دن تھے جو ہم کو تنہا کہیں کہیں مل جاتا تھا

اب تو لگے ہی رہتے ہیں اغیار ہمارے یار کے ساتھ

ہم ہیں مریض عشق و جنوں سختی سے دل کو مت توڑو

نرم کرے ہیں حرف و حکایت اہل خرد بیمار کے ساتھ

دیدئہ تر سے چشمۂ جوشاں ہیں جو قریب اپنے واقع

تو ہی رود چلے جاتے ہیں لگ کر جیب و کنار کے ساتھ

دیر سے ہیں بیمار محبت ہم سے قطع امید کرو

جانیں ہی جاتی دیکھی ہیں ہم نے آخر اس آزار کے ساتھ

رونے سے سب سر بر آئے خاک ہمارے سر پر میر

مدت میں ہم ٹک لگ بیٹھے تھے اس کی دیوار کے ساتھ

میر تقی میر

دل جو کھلا فسردہ تو جوں بے بہار گل

اکتوبر 6, 2015میر تقی میر،اساتذہ،غزلبہار،خارadmin

دیوان پنجم غزل 1670

آئی بہار نکلے چمن میں ہزار گل

دل جو کھلا فسردہ تو جوں بے بہار گل

بستر سے اس کے پھول تر و تازہ رکھ کے دور

سوکھے ہے دیر رہ کے تو ہوتا ہے خار گل

دیکھا کبھو نہ ہم نے سنا ہے فگندہ میر

داغ جنوں ہے سر پہ ہمیشہ بہار گل

میر تقی میر

کرتے ہیں دوڑ نت ہی تماشاے یار الگ

اکتوبر 6, 2015میر تقی میر،اساتذہ،غزلہزار،مزار،یار،کنار،بہار،شکار،غبارadmin

دیوان پنجم غزل 1667

رہتے ہیں اس سے لاگ پہ ہم بے قرار الگ

کرتے ہیں دوڑ نت ہی تماشاے یار الگ

تھا گرد بوے گل سے بھی دامن ہوا کا پاک

کیا اب کے اس چمن سے گئی ہے بہار الگ

پاس اس کا بعد مرگ ہے آداب عشق سے

بیٹھا ہے میری خاک سے اٹھ کر غبار الگ

ناگاہ اس نگاہ سے میں بھی ہوا نہاں

جاتا ہے جوں نکل کے کسو کا شکار الگ

خونباری سے نہیں پڑی لوہو کی چھینٹ بھی

اب تک تو بارے اپنے ہیں جیب و کنار الگ

تا جانیں لوگ کشتۂ ہجراں ہیں یہ غریب

کریو تمام گوروں سے میری مزار الگ

بچتے نہیں ہیں بوزدگی سے گلوں کی میر

گو طائران خستہ جگر ہوں ہزار الگ

میر تقی میر

اس کا ہو جاتا دل شکار اے کاش

اکتوبر 6, 2015میر تقی میر،اساتذہ،غزلقرار،مزار،وار،پیار،انتظار،بہار،شکارadmin

دیوان پنجم غزل 1637

ادھر آتا بھی وہ سوار اے کاش

اس کا ہو جاتا دل شکار اے کاش

زیر دیوار خانہ باغ اس کے

ہم کو جا ملتی خانہ وار اے کاش

کب تلک بے قرار رہیے گا

کچھ تو ملنے کا ہو قرار اے کاش

راہ تکتے تو پھٹ گئیں آنکھیں

اس کا کرتے نہ انتظار اے کاش

اس کی پامالی سرفرازی ہے

راہ میں ہو مری مزار اے کاش

پھول گل کچھ نہ تھے کھلی جب چشم

اور بھی رہتی اک بہار اے کاش

اب وہی میر جی کھپانا ہے

ہم کو ہوتا نہ اس سے پیار اے کاش

میر تقی میر

وہ گھر سے نہیں اپنے نکلتا دم بھر بھی تلوار بغیر

اکتوبر 6, 2015میر تقی میر،اساتذہ،غزلہار،بہار،تلوار،دیدار،شکارadmin

دیوان پنجم غزل 1618

عشق ہمارا خون کرے ہے جی نہیں رہتا یار بغیر

وہ گھر سے نہیں اپنے نکلتا دم بھر بھی تلوار بغیر

جان عزیز کی جاں بھی گئے پر آنکھیں کھلی رہ جائیں گی

یعنی کشتۂ حیرت تھا میں آئینہ سا دیدار بغیر

گوندھے گئے سو تازہ رہے جو سبد میں تھے سوملالت سے

سوکھ کے کانٹا پھول ہوئے وے اس کے گلے کے ہار بغیر

پھولوں کا موسم کا شکے ہو پردے سے ہوا کے چشمک زن

گل کھائے ہیں ہزار خزاں میں مرغ چمن نے بہار بغیر

وحشی وطیر سے دشت بھرے تھے صیادی تھی یار کی جب

خالی پڑے ہیں دام کہیں میر اس کے ذوق شکار بغیر

میر تقی میر

جو اس چمن میں یہ اک طرفہ انتشار ہے آج

اکتوبر 6, 2015میر تقی میر،اساتذہ،غزلمدار،انتشار،انتظار،اعتبار،بہار،بخار،خوار،شکار،غبارadmin

دیوان پنجم غزل 1592

کہوں سو کیا کہوں نے صبر نے قرار ہے آج

جو اس چمن میں یہ اک طرفہ انتشار ہے آج

سر اپنا عشق میں ہم نے بھی یوں تو پھوڑا تھا

پر اس کو کیا کریں اوروں کا اعتبار ہے آج

گیا ہے جانب وادی سوار ہوکر یار

غبار گرد پھرے ہے بہت شکار ہے آج

جہاں کے لوگوں میں جس کی تھی کل تئیں عزت

اسی عزیز کو دیکھا ذلیل و خوار ہے آج

سحر سواد میں چل زور پھولی ہے سرسوں

ہوا ہے عشق سے کل زرد کیا بہار ہے آج

سواری اس کی ہے سرگرم گشت دشت مگر

کہ خیرہ تیرہ نمودار یک غبار ہے آج

سپہر چھڑیوں میں کل تک پھرے تھا ساتھ اپنے

عجب ہے سب کا اسی سفلے پر مدار ہے آج

بخار دل کا نکالا تھا درد دل کہہ کر

سو درد سر ہے بدن گرم ہے بخار ہے آج

کسو کے آنے سے کیا اب کہ غش ہے کل دن سے

ہمیں تو اپنا ہی اے میر انتظار ہے آج

میر تقی میر

دشتی وحش وطیر اس کے سر تیزی ہی میں شکار ہے آج

اکتوبر 6, 2015میر تقی میر،اساتذہ،غزلہار،قرار،مہار،نثار،یار،کنار،بہار،خمار،سرکار،شکارadmin

دیوان پنجم غزل 1590

شہر سے یار سوار ہوا جو سواد میں خوب غبار ہے آج

دشتی وحش وطیر اس کے سر تیزی ہی میں شکار ہے آج

برافروختہ رخ ہے اس کا کس خوبی سے مستی میں

پی کے شراب شگفتہ ہوا ہے اس نو گل پہ بہار ہے آج

اس کا بحرحسن سراسر اوج و موج و تلاطم ہے

شوق کی اپنے نگاہ جہاں تک جاوے بوس و کنار ہے آج

آنکھیں اس کی لال ہوئیں ہیں اور چلے جاتے ہیں سر

رات کو دارو پی سویا تھا اس کا صبح خمار ہے آج

گھر آئے ہو فقیروں کے تو آئو بیٹھو لطف کرو

کیا ہے جان بن اپنے کنے سو ان قدموں پہ نثار ہے آج

کیا پوچھو ہو سانجھ تلک پہلو میں کیا کیا تڑپا ہے

کل کی نسبت دل کو ہمارے بارے کچھ تو قرار ہے آج

مت چوکو اس جنس گراں کو دل کی وہیں لے جائو تم

ہندستان میں ہندوبچوں کی بہت بڑی سرکار ہے آج

خوب جو آنکھیں کھول کے دیکھا شاخ گل سا نظر آیا

ان رنگوں پھولوں میں ملا کچھ محوجلوئہ یار ہے آج

جذب عشق جدھر چاہے لے جائے ہے محمل لیلیٰ کا

یعنی ہاتھ میں مجنوں کے ناقے کی اس کے مہار ہے آج

رات کا پہنا ہار جو اب تک دن کو اتارا ان نے نہیں

شاید میر جمال گل بھی اس کے گلے کا ہار ہے آج

میر تقی میر

یاں کام جا چکا ہے اب اختیار سے بھی

اکتوبر 6, 2015میر تقی میر،اساتذہ،غزلمزار،کنار،پیار،انار،انتظار،اختیار،بہارadmin

دیوان چہارم غزل 1489

اے کاش کوئی جاکر کہہ آوے یار سے بھی

یاں کام جا چکا ہے اب اختیار سے بھی

تاچند بے دماغی کب تک سخن خشن ہو

کوئی تو بات کریے اخلاص پیار سے بھی

یک معنی شگفتہ سو رنگ بندھ گئے ہیں

الوان گل ہیں ہر سو اب کے بہار سے بھی

کیا جیب و آستیں ہی سیلاب خیز ہے یاں

دریا بہا کریں ہیں میرے کنار سے بھی

باغ وفا سے ہم نے پایا سو پھل یہ پایا

سینے میں چاک تر ہے دل اب انار سے بھی

راہ اس کی برسوں دیکھی آنکھیں غبار لائیں

نکلا نہ کام اپنا اس انتظار سے بھی

جان و جہاں سے گذرا میں میر جن کی خاطر

بچ کر نکلتے ہیں وے میرے مزار سے بھی

میر تقی میر

یا تجھ کو دل شکستوں سے اخلاص پیار ہو

اکتوبر 6, 2015میر تقی میر،اساتذہ،غزلقرار،مار،پیار،پار،اختیار،بہار،دار،شکار،غبارadmin

دیوان چہارم غزل 1471

تو وہ نہیں کسو کا تہ دل سے یار ہو

یا تجھ کو دل شکستوں سے اخلاص پیار ہو

کیا فکر میں ہو اپنی طرحداری ہی کی تم

ہم دردمند لوگوں کے بیمار دار ہو

مصروف احتیاط رہا کرتے رات دن

دینے میں دل کے اپنا جو کچھ اختیار ہو

دل میں کدر سے آندھی سی اٹھنے لگی ہے اب

نکلے گلے کی راہ تو رفع غبار ہو

کھا زہر مر رہیں کہیں کیا زندگی ہے یہ

زلفیں تنک چھوئیں تو ہمیں مار مار ہو

اے آہوان کعبہ نہ اینڈو حرم کے گرد

کھائو کسو کی تیغ کسو کے شکار ہو

منھ سے لگی گلابی ہوا کچھ شگفتہ تو

تھوڑی شراب اور بھی پی جو بہار ہو

بہتی ہے تیز جدول تیغ جفاے یار

یعنی کہ اک ہی وار لگے کام پار ہو

چھڑیوں سے کر قرار مدار اس کو لایئے

جو میر پھر لڑا نہ کریں بے قرار ہو

میر تقی میر

دیوانہ دل بلا زدہ دل بے قرار دل

اکتوبر 6, 2015میر تقی میر،اساتذہ،غزلقرار،مار،بہار،بار،درکنارadmin

دیوان چہارم غزل 1429

کھنچتا ہے اس طرف ہی کو بے اختیار دل

دیوانہ دل بلا زدہ دل بے قرار دل

سمجھا بھی تو کہ دل کسے کہتے ہیں دل ہے کیا

آتا ہے جو زباں پہ تری بار بار دل

آزردہ خاطری کا ہماری نہ کر عجب

اک عمر ہم رہا کیے ہیں مار مار دل

واشد فسردگی سے تری اس چمن میں ہے

دل جو کھلا تو جیسے گل بے بہار دل

میر اس کے اشتیاق ہم آغوشی میں نہ پوچھ

جاتا ہے اب تو جی ہی رہا درکنار دل

میر تقی میر

منھ کرے ٹک ادھر بہار اے کاش

اکتوبر 6, 2015میر تقی میر،اساتذہ،غزلقرار،کنار،پیار،بہار،تار،روزگار،شعارadmin

دیوان چہارم غزل 1403

نکلے پردے سے روے یار اے کاش

منھ کرے ٹک ادھر بہار اے کاش

کچھ وسیلہ نہیں جو اس سے ملوں

شعر ہو یار کا شعار اے کاش

کہیں اس بحر حسن سے بھر جائے

موج ساں میری بھی کنار اے کاش

برق ساں ہو چکوں تڑپ کر میں

یوں ہی آوے مجھے قرار اے کاش

اعتمادی نہیں ہے یاری غیر

یار سے ہم سے ہووے پیار اے کاش

آوے سررشتۂ جنوں کچھ ہاتھ

ہو گریبان تار تار اے کاش

میر جنگل تمام بس جاوے

بن پڑے ہم سے روزگار اے کاش

میر تقی میر

کہ زندگی تو کروں جب تلک کہ یار آوے

اکتوبر 6, 2015میر تقی میر،اساتذہ،غزلیار،پیار،اعتبار،بہار،بار،شکار،غبارadmin

دیوان سوم غزل 1305

خدا کرے مرے دل کو ٹک اک قرار آوے

کہ زندگی تو کروں جب تلک کہ یار آوے

کمانیں اس کی بھووں کی چڑھی ہی رہتی ہیں

نہ جب تلک سرتیرستم شکار آوے

ہمیں تو ایک گھڑی گل بغیر دوبھر ہے

خدا ہی جانے کہ اب کب تلک بہار آوے

اٹھی بھی گرد رہ اس کی کہیں تو لطف ہے کیا

جب انتظار میں آنکھوں ہی پر غبار آوے

ہر ایک شے کا ہے موسم نہ جانے تھا منصور

کہ نخل دار میں حلق بریدہ بار آوے

تمھارے جوروں سے اب حال جاے عبرت ہے

کسو سے کہیے تو اس کو نہ اعتبار آوے

نہیں ہے چاہ بھلی اتنی بھی دعا کر میر

کہ اب جو دیکھوں اسے میں بہت نہ پیار آوے

میر تقی میر

نوگل جیسے جلوہ کرے اس رشک بہار کو دیکھا ہے

اکتوبر 6, 2015میر تقی میر،اساتذہ،غزلہزار،نہار،بہار،بیمار،زنار،سردار،شکارadmin

دیوان سوم غزل 1256

کیسے ناز و تبختر سے ہم اپنے یار کو دیکھا ہے

نوگل جیسے جلوہ کرے اس رشک بہار کو دیکھا ہے

چال زمانے کی ہے نظر میں شام و سحر کس کو ہے قیام

نووارد ہم یاں کے ہیں پر لیل و نہار کو دیکھا ہے

ایک نہ آیا دید میں اپنی دلکش دلچسپ اس کے رنگ

ان آنکھوں سے اس گلشن میں یوں تو ہزار کو دیکھا ہے

قدرکفر اسلام سے زائد جانی سبحہ فروشی سے

بکتے کہیں بازار میں تونے گہ زنار کو دیکھا ہے

قلب و دماغ و جگر کے گئے پر ضعف ہے جی کی غارت میں

کیا جانے یہ قلقچی ان نے کس سردار کو دیکھا ہے

بائو سے بھی گر پتا کھڑکے چوٹ چلے ہے ظالم کی

ہم نے دام گہوں میں اس کے ذوق شکار کو دیکھا ہے

جمع کرو دل میر سے تم بھی بیتابی تھی دل کو بہت

اچھے کچھ آثار نہ تھے میں اس بیمار کو دیکھا ہے

میر تقی میر

دن آج کا بھی سانجھ ہوا انتظار میں

اکتوبر 6, 2015میر تقی میر،اساتذہ،غزلقرار،یار،کنار،پیار،انتظار،بہار،دیار،رہگذار،شکارadmin

دیوان سوم غزل 1204

دور اس سے جی چکے ہیں ہم اس روزگار میں

دن آج کا بھی سانجھ ہوا انتظار میں

داغوں سے بھر گیا ہے مرا سینۂ فگار

گل پھول زور زور کھلے اس بہار میں

کیا اعتبار طائر دل کی تڑپ کا اب

مذبوحی سی ہے کچھ حرکت اس شکار میں

بوسہ لبوں کا مانگتے ہی تم بگڑ گئے

بہتیری باتیں ہوتی ہیں اخلاص پیار میں

دل پھر کے ہم سے خانۂ زنجیر کے قریب

ٹک پہنچتا ہی ہے شکن زلف یار میں

اس بحرحسن پاس نہ خنجر تھا کل نہ تیغ

میں جان دی ہے حسرت بوس و کنار میں

چلتا ہے ٹک تو دیکھ کے چل پائوں ہر نفس

آنکھیں ہی بچھ گئی ہیں ترے رہگذار میں

کس کس ادا سے ریختے میں نے کہے ولے

سمجھا نہ کوئی میری زبان اس دیار میں

تڑپے ہے متصل وہ کہاں ایسے روز و شب

ہے فرق میر برق و دل بے قرار میں

میر تقی میر

چشم پرخوں فگار کے سے رنگ

اکتوبر 6, 2015میر تقی میر،اساتذہ،غزلفگار،قرار،نگار،یار،بہار،دار،روزگار،شکار،غبارadmin

دیوان سوم غزل 1162

چاک دل ہے انار کے سے رنگ

چشم پرخوں فگار کے سے رنگ

کام میں ہے ہواے گل کی موج

تیغ خوں ریز یار کے سے رنگ

تاب ہی میں رہے ہے اس کی زلف

افعی پیچ دار کے سے رنگ

کیا جو افسردگی کے ساتھ کھلا

دل گل بے بہار کے سے رنگ

برق ابر بہار نے بھی لیے

اب دل بے قرار کے سے رنگ

کنج نخچیرگہ میں ہیں مامون

ہم بھی لاغر شکار کے سے رنگ

عمر کا بھی سرنگ جاتا ہے

ابلق روزگار کے سے رنگ

برگ گل میں نہ دل کشی ہو گی

کف پاے نگار کے سے رنگ

اس بیاباں میں میر محو ہوئے

ناتواں اک غبار کے سے رنگ

میر تقی میر

کوئی دل کا بخار نکلے گا

اکتوبر 6, 2015میر تقی میر،اساتذہ،غزلیار،پار،اختیار،بہار،بخار،شکار،غبارadmin

دیوان سوم غزل 1066

چشم سے خوں ہزار نکلے گا

کوئی دل کا بخار نکلے گا

اس کی نخچیرگہ سے روح الامیں

ہو کے آخر شکار نکلے گا

آندھیوں سے سیاہ ہو گا چرخ

دل کا تب کچھ غبار نکلے گا

ہوئے رے لاگ تیر مژگاں کی

کس کے سینے کے پار نکلے گا

ناز خورشید کب تلک کھینچیں

گھر سے کب اپنے یار نکلے گا

خون ہی آئے گا تو آنکھوں سے

ایک سیل بہار نکلے گا

عزلت میر عشق میں کب تک

ہو کے بے اختیار نکلے گا

میر تقی میر

اس تختے نے بھی اب کے قیامت بہار کی

اکتوبر 6, 2015میر تقی میر،اساتذہ،غزلنثار،یار،کنار،گذار،پیار،پار،بہار،خار،شکارadmin

دیوان دوم غزل 950

کی سیر ہم نے سینۂ یکسر فگار کی

اس تختے نے بھی اب کے قیامت بہار کی

دریاے حسن یار تلاطم کرے کہیں

خواہش ہے اپنے جی میں بھی بوس و کنار کی

اپنا بھی جی اسیر تھا آواز عندلیب

دل میں چبھا کی رات کو جوں نوک خار کی

آنکھیں غبار لائیں مری انتظار میں

دیکھوں تو گرد کب اٹھے اس رہ گذار کی

مقدور تک تو ضبط کروں ہوں پہ کیا کروں

منھ سے نکل ہی جاتی ہے اک بات پیار کی

اب گرد سر پھروں ترے ہوں میں فقیر محض

رکھتا تھا ایک جان سو تجھ پر نثار کی

کیا صید کی تڑپ کو اٹھائے دماغ یار

نازک بہت ہے طبع مرے دل شکار کی

رکھتا نہیں طریق وفا میں کبھو قدم

ہم کچھ نہ سمجھے راہ و روش اپنے یار کی

کیا جانوں چشم تر سے ادھر دل پہ کیا ہوا

کس کو خبر ہے میر سمندر کے پار کی

میر تقی میر

لیلیٰ کا ایک ناقہ سو کس قطار میں یاں

اکتوبر 6, 2015میر تقی میر،اساتذہ،غزلقرار،قطار،مزار،کنار،بہار،تار،شمارadmin

دیوان دوم غزل 886

محمل نشیں ہیں کتنے خدام یار میں یاں

لیلیٰ کا ایک ناقہ سو کس قطار میں یاں

سن شور کل قفس میں دل داغ سب ہوا ہے

کیا پھول گل کھلے ہیں اب کے بہارمیں یاں

کب روشنی ہو میرے رونے میں ابر تجھ سے

دریا بھرے ہیں ایک اک دامن کے تار میں یاں

تم تو گئے دکھاکر ٹک برق کے سے جھمکے

آیا بہت تفاوت صبر و قرار میں یاں

ہم مر گئے ولیکن سوز دروں وہی ہے

ایک آگ لگ اٹھی ہے کنج مزار میں یاں

ہجراں کی ہر گھڑی ہے سو سو برس تعب سے

روز شمار یارو ہے کس شمار میں یاں

جن راتوں میر ہم کو رونے کا مشغلہ تھا

رہتا تھا بحر اعظم سو تو کنار میں یاں

میر تقی میر

اب جو کھلا سو جیسے گل بے بہار دل

اکتوبر 6, 2015میر تقی میر،اساتذہ،غزلفگار،ہزار،قرار،مار،یار،امیدوار،انار،اختیار،بہار،بار،درکنار،غبارadmin

دیوان دوم غزل 852

مدت تو وا ہوا ہی نہ یہ غنچہ وار دل

اب جو کھلا سو جیسے گل بے بہار دل

ہے غم میں یاد کس کو فراموش کار دل

اب آ بنی ہے جی پہ رہا درکنار دل

دشوار ہے ثبات بہت ہجر یار میں

یاں چاہیے ہے دل سو کہاں میرے یار دل

وہ کون سی امید برآئی ہے عشق میں

رہتا ہے کس امید پہ امیدوار دل

ظالم بہت ضرور ہے ان بیکسوں کا پاس

ناچار اپنے رہتے ہیں جو مار مار دل

تم پر تو صاف میری کدورت کھلی ہے آج

مدت سے ہے ملال کے زیر غبار دل

مائل ادھر کے ہونے میں مجبور ہیں سبھی

کھنچتا ہے اس کی اور کو بے اختیار دل

حد ہے گی دلبری کی بھی اے غیرت چمن

ہو آدمی صنوبر اگر لاوے بار دل

داخل یہ اضطراب تنک آبیوں میں ہے

رکھتی نہیں ہے برق ہی کچھ بے قرار دل

کیا ہیں گرسنہ چشم دل اب کے یہ دلبراں

تسکین ان کی ہو نہ جو لیویں ہزار دل

جوں سیب ہیں ذقن کے چمن زار حسن میں

یوں باغ حسن میں بھی ہیں رنگیں انار دل

ہم سے جو عشق کشتہ جئیں تو عجب ہے میر

چھاتی ہے داغ ٹکڑے جگر کے فگار دل

میر تقی میر

یک جان و صد تمنا یک دل ہزار خواہش

اکتوبر 6, 2015میر تقی میر،اساتذہ،غزلہزار،قرار،کنار،کار،امیدوار،اختیار،بہار،بار،دیار،شعارadmin

دیوان دوم غزل 826

کیا کہیے کیا رکھیں ہیں ہم تجھ سے یار خواہش

یک جان و صد تمنا یک دل ہزار خواہش

لے ہاتھ میں قفس ٹک صیاد چل چمن تک

مدت سے ہے ہمیں بھی سیر بہار خواہش

نے کچھ گنہ ہے دل کا نے جرم چشم اس میں

رکھتی ہے ہم کو اتنا بے اختیار خواہش

حالانکہ عمر ساری مایوس گذری تس پر

کیا کیا رکھیں ہیں اس کے امیدوار خواہش

غیرت سے دوستی کی کس کس سے ہوجے دشمن

رکھتا ہے یاری ہی کی سارا دیار خواہش

ہم مہرورز کیونکر خالی ہوں آرزو سے

شیوہ یہی تمنا فن و شعار خواہش

اٹھتی ہے موج ہر یک آغوش ہی کی صورت

دریا کو ہے یہ کس کا بوس و کنار خواہش

صد رنگ جلوہ گر ہے ہر جادہ غیرت گل

عاشق کی ایک پاوے کیونکر قرار خواہش

یک بار بر نہ آئی اس سے امید دل کی

اظہار کرتے کب تک یوں بار بار خواہش

کرتے ہیں سب تمنا پر میر جی نہ اتنی

رکھے گی مار تم کو پایان کار خواہش

میر تقی میر

رہتی ایک آدھ دن بہار اے کاش

اکتوبر 6, 2015میر تقی میر،اساتذہ،غزلمزار،نثار،یار،گوردار،اختیار،بہار،بار،دوچار،شمار،شعارadmin

دیوان دوم غزل 825

گل کو ہوتا صبا قرار اے کاش

رہتی ایک آدھ دن بہار اے کاش

یہ جو دو آنکھیں مند گئیں میری

اس پہ وا ہوتیں ایک بار اے کاش

کن نے اپنی مصیبتیں نہ گنیں

رکھتے میرے بھی غم شمار اے کاش

جان آخر تو جانے والی تھی

اس پہ کی ہوتی میں نثار اے کاش

اس میں راہ سخن نکلتی تھی

شعر ہوتا ترا شعار اے کاش

خاک بھی وہ تو دیوے گا برباد

نہ بناویں مرا مزار اے کاش

شش جہت اب تو تنگ ہے ہم پر

اس سے ہوتے نہ ہم دوچار اے کاش

مرتے بھی تو ترے ہی کوچے میں

ملتی یاں جاے گوردار اے کاش

ان لبوں کے گلے سے دل ہے بھرا

چل پڑے بات پیش یار اے کاش

بے اجل میر اب پڑا مرنا

عشق کرتے نہ اختیار اے کاش

میر تقی میر

تصدیع کھینچی ہم نے یہ کام اختیار کر

اکتوبر 6, 2015میر تقی میر،اساتذہ،غزلہار،قرار،مار،پکار،انتظار،اختیار،بہار،بار،دوچار،شکارadmin

دیوان دوم غزل 813

آخر دکھائی عشق نے چھاتی فگار کر

تصدیع کھینچی ہم نے یہ کام اختیار کر

اس باعث حیات سے کیا کیا ہیں خواہشیں

پر دم بخود ہی رہتے ہیں ہم جی کو مار کر

ٹک سامنے ہوا کہ نہ ایماں نہ دین و دل

کافر کو بھی نہ اس سے الٰہی دوچار کر

جا شوق پر نہ جا تن زار و نزار پر

اے ترک صید پیشہ ہمیں بھی شکار کر

وہ سخت باز دائو میں آتا نہیں ہے ہائے

کس طور جی کو ہم نہ لگا بیٹھیں ہار کر

ہم آپ سے گئے تو گئے پر بسان نقش

بیٹھا تو روز حشر تئیں انتظار کر

کن آنکھوں دیکھیں رنگ خزاں کے کہ باغ سے

گل سب چلے ہیں رخت سفر اپنا بار کر

جل تھل بھریں نہ جب تئیں دم تب تئیں نہ لیں

ہم اور ابر آج اٹھے ہیں قرار کر

اک صبح میری چھاتی کے داغوں کو دیکھ تو

یہ پھول گل بھی زور رہے ہیں بہار کر

مرتے ہیں میر سب پہ نہ اس بیکسی کے ساتھ

ماتم میں تیرے کوئی نہ رویا پکار کر

میر تقی میر

کہیو ہم صحرانوردوں کا تمامی حال زار

اکتوبر 6, 2015میر تقی میر،اساتذہ،غزلفگار،ہزار،قرار،ناگوار،نابکار،نثار،وقار،وار،یار،کار،پیار،افتخار،انار،انتظار،آشکار،استوار،اشتہار،اعتبار،بہار،بار،خاکسار،خارخار،دیار،داغدار،درکنار،روزگار،زار،شمار،شاخسار،شعار،عار،غبارadmin

دیوان دوم غزل 804

اے صبا گر شہر کے لوگوں میں ہو تیرا گذار

کہیو ہم صحرانوردوں کا تمامی حال زار

خاک دہلی سے جدا ہم کو کیا یک بارگی

آسماں کو تھی کدورت سو نکالا یوں غبار

منصب بلبل غزل خوانی تھا سو تو ہے اسیر

شاعری زاغ و زغن کا کیوں نہ ہووے اب شعار

طائر خوش زمزمہ کنج قفس میں ہے خموش

چہچہے چہیاں کریں ہیں صحن گلشن میں ہزار

برگ گل سے بھی کیا نہ ایک نے ٹک ہم کو یاد

نامہ و پیغام و پرسش بے مراتب درکنار

بے خلش کیونکر نہ ہو گرم سخن گلزار میں

میں قفس میں ہوں کہ میرا تھا دلوں میں خارخار

بلبل خوش لہجہ کے جائے پہ گو غوغائیاں

طرح غوغا کی چمن میں ڈالیں پر کیا اعتبار

طائران خوش لب و لہجہ نہیں رہتے چھپے

شور سے ان کے بھرے ہیں قریہ و شہر و دیار

شہر کے کیا ایک دو کوچوں میں تھی شہرت رہی

شہروں شہروں ملکوں ملکوں ہے انھوں کا اشتہار

کیا کہوں سوے چمن ہوتا جو میں سرگرم گشت

پھول گل جب کھلنے لگتے جوش زن ہوتی بہار

شور سن سن کر غزل خوانی کا میری ہم صفیر

غنچہ ہو آتے جو ہوتا آب و رنگ شاخسار

خوش نوائی کا جنھیں دعویٰ تھا رہ جاتے خموش

جن کو میں کرتا مخاطب ان کو ہوتا افتخار

بعضوں کو رشک قبول خاطر و لطف سخن

بعضوں کا سینہ فگار و بعضوں کا دل داغدار

ایکوں کے ہونٹوں کے اوپر آفریں استاد تھا

ایک کہتے تھے رسوخ دل ہے اپنا استوار

ربط کا دعویٰ تھا جن کو کہتے تھے مخلص ہیں ہم

جانتے ہیں ذات سامی ہی کو ہم سب خاکسار

نقل کرتے کیا یہ صحبت منعقد جب ہوتی بزم

بیٹھ کر کہتے تھے منھ پر میرے بعضے بعضے یار

بندگی ہے خدمت عالی میں ہم کو دیر سے

کر رکھی ہے جان اپنی ہم نے حضرت پر نثار

سو نہ خط ان کا نہ کوئی پرچہ پہنچا مجھ تلک

واہ وا ہے رابطہ رحمت ہے یہ اخلاص و پیار

رفتہ رفتہ ہو گئیں آنکھیں مری دونوں سفید

بسکہ نامے کا کیا یاروں کے میں نے انتظار

لکھتے گر دو حرف لطف آمیز بعد از چند روز

تو بھی ہوتا اس دل بے تاب و طاقت کو قرار

سو تو یک ننوشتہ کاغذ بھی نہ آیا میرے پاس

ان ہم آوازوں سے جن کا میں کیا ربط آشکار

خط کتابت سے یہ کہتے تھے نہ بھولیں گے تجھے

آویں گے گھر بار کی تیرے خبر کو بار بار

جب گیا میں یاد سے تب کس کا گھر کاہے کا پاس

آفریں صد آفریں اے مردمان روزگار

اب بیاباں در بیاباں ہے مرا شور و فغاں

گو چمن میں خوش کی تم نے میری جاے نالہ وار

ہے مثل مشہور یہ عمر سفر کوتاہ ہے

طالع برگشتہ بھی کرتے ہیں اب امداد کار

اک پر افشانی میں بھی ہے یہ وطن گلزار سا

سامعوں کی چھاتیاں نالوں سے ہوویں گی فگار

منھ پہ آویں گے سخن آلودئہ خون جگر

کیونکہ یاران زماں سے چاک ہے دل جوں انار

لب سے لے کر تا سخن ہیں خونچکاں شکوے بھرے

لیک ہے اظہار ہر ناکس سے اپنا ننگ و عار

چپ بھلی گو تلخ کامی کھینچنی اس میں پڑے

بیت بحثی طبع نازک پر ہے اپنی ناگوار

آج سے کچھ بے حسابی جور کن مردم نہیں

ان سے اہل دل سدا کھینچے ہیں رنج بے شمار

بس قلم رکھ ہاتھ سے جانے بھی دے یہ حرف میر

کاہ کے چاہے نہیں کہسار ہوتے بے وقار

کام کے جو لوگ صاحب فن ہیں سو محسود ہیں

بے تہی کرتے رہیں گے حاسدان نابکار

میر تقی میر

چاک ہے دل انار کے مانند

اکتوبر 6, 2015میر تقی میر،اساتذہ،غزلفگار،ہار،قرار،یار،انار،آبدار،بہار،داغدار،شکار،شرار،غبارadmin

دیوان دوم غزل 797

تجھ بن اے نوبہار کے مانند

چاک ہے دل انار کے مانند

پہنچی شاید جگر تک آتش عشق

اشک ہیں سب شرار کے مانند

کو دماغ اس کی رہ سے اٹھنے کا

بیٹھے اب ہم غبار کے مانند

کوئی نکلے کلی تو لالے کی

اس دل داغدار کے مانند

سرو کو دیکھ غش کیا ہم نے

تھا چمن میں وہ یار کے مانند

ہار کر شب گلے پڑے اس کے

ہم بھی پھولوں کے ہار کے مانند

برق تڑپی بہت ولے نہ ہوئی

اس دل بے قرار کے مانند

ان نے کھینچی تھی صیدگہ میں تیغ

برق ابر بہار کے مانند

اس کے گھوڑے کے آگے سے نہ ٹلے

ہم بھی دبلے شکار کے مانند

زخم کھا بیٹھیو جگر پر مت

تو بھی مجھ دل فگار کے مانند

اس کی سرتیز ہر پلک ہے میر

خنجر آبدار کے مانند

میر تقی میر

اس وہم کی نمود کا ہے اعتبار کیا

اکتوبر 6, 2015میر تقی میر،اساتذہ،غزلقرار،پیار،انار،انتظار،اختیار،اعتبار،بہار،خار،روزگار،زار،شمار،شکار،غبارadmin

دیوان دوم غزل 698

پھرتا ہے زندگی کے لیے آہ خوار کیا

اس وہم کی نمود کا ہے اعتبار کیا

کیا جانیں ہم اسیر قفس زاد اے نسیم

گل کیسے باغ کہتے ہیں کس کو بہار کیا

آنکھیں برنگ نقش قدم ہو گئیں سفید

پھر اور کوئی اس کا کرے انتظار کیا

سیکھی ہے طرح سینہ فگاری کی سب مری

لائے تھے ساتھ چاک دل ایسا انار کیا

سرکش کسو سے ایسی کدورت رکھے وہ شوخ

ہم اس کی خاک راہ ہیں ہم سے غبار کیا

نے وہ نگہ چبھی ہے نہ وے پلکیں گڑ گئیں

کیا جانیے کہ دل کو ہے یہ خار خار کیا

لیتا ہے ابر اب تئیں اس ناحیے سے آب

روئے ہیں ہم بھی برسوں تئیں زار زار کیا

عاشق کے دل سے رکھ نہ تسلی کی چشم داشت

ہے برق پارہ یہ اسے آوے قرار کیا

صحبت رہی بگڑتی ہی اس کینہ ور سے آہ

ہم جانتے نہیں ہیں کہ ہوتا ہے پیار کیا

مارا ہو ایک دو کو تو ہو مدعی کوئی

کشتوں کا اس کے روز جزا میں شمار کیا

مدت سے جرگہ جرگہ سرتیر ہیں غزال

کم ہو گیا ہے یاروں کا ذوق شکار کیا

پاتے ہیں اپنے حال میں مجبور سب کو ہم

کہنے کو اختیار ہے پر اختیار کیا

آخر زمانہ سازی سے کھویا نہ وقر میر

یہ اختیار تم نے کیا روزگار کیا

میر تقی میر

دل کی معاملت ہے کیا کوئی خوار ہووے

اکتوبر 6, 2015میر تقی میر،اساتذہ،غزلمدار،مزار،چمار،یار،بہار،خوار،شکارadmin

دیوان اول غزل 579

وعدہ وعید پیارے کچھ تو قرار ہووے

دل کی معاملت ہے کیا کوئی خوار ہووے

فتراک سے نہ باندھے دیکھے نہ تو تڑپنا

کس آرزو پہ کوئی تیرا شکار ہووے

از بس لہو پیا ہے میں تیرے غم میں گل رو

تربت سے میری شاید حشر بہار ہووے

مرنا بھلا ہے ظالم اس زندگی بد سے

یوں چاہیے کہ کوئی تجھ سے نہ یار ہووے

میں مست مرگیا ہوں کرنا عجب نہ ساقی

گر سنگ شیشہ میرا سنگ مزار ہووے

وابست آسماں کا ملتا ہے خاک ہی میں

اس بے مدار اوپر کس کا مدار ہووے

اے غیر میر تجھ کو گر جوتیاں نہ مارے

سید نہ ہووے پھر تو کوئی چمار ہووے

میر تقی میر

بیٹھ جا چلنے ہار ہیں ہم بھی

اکتوبر 6, 2015میر تقی میر،اساتذہ،غزلہار،یادگار،یار،کنار،اختیار،بہار،دار،روزگار،شکارadmin

دیوان اول غزل 465

آج کل بے قرار ہیں ہم بھی

بیٹھ جا چلنے ہار ہیں ہم بھی

آن میں کچھ ہیں آن میں کچھ ہیں

تحفۂ روزگار ہیں ہم بھی

منع گریہ نہ کر تو اے ناصح

اس میں بے اختیار ہیں ہم بھی

درپئے جان ہے قراول مرگ

کسو کے تو شکار ہیں ہم بھی

نالے کریو سمجھ کے اے بلبل

باغ میں یک کنار ہیں ہم بھی

مدعی کو شراب ہم کو زہر

عاقبت دوست دار ہیں ہم بھی

مضطرب گریہ ناک ہے یہ گل

برق ابر بہار ہیں ہم بھی

گر زخود رفتہ ہیں ترے نزدیک

اپنے تو یادگار ہیں ہم بھی

میر نام اک جواں سنا ہو گا

اسی عاشق کے یار ہیں ہم بھی

میر تقی میر

آہ افسوس صد ہزار افسوس

اکتوبر 6, 2015میر تقی میر،اساتذہ،غزلہزار،قرار،یار،اقتدار،بہار،بار،روزگارadmin

دیوان اول غزل 238

مر گیا میں ملا نہ یار افسوس

آہ افسوس صد ہزار افسوس

ہم تو ملتے تھے جب اہا ہاہا

نہ رہا ووہیں روزگار افسوس

یوں گنواتا ہے دل کوئی مجھ کو

یہی آتا ہے بار بار افسوس

قتل کر تو ہمیں کرے گا خوشی

یہ توقع تھی تجھ سے یار افسوس

رخصت سیر باغ تک نہ ہوئی

یوں ہی جاتی رہی بہار افسوس

خوب بدعہد تو نہ مل لیکن

میرے تیرے تھا یہ قرار افسوس

خاک پر میر تیری ہوتا ولے

نہ ہوا اتنا اقتدار افسوس

میر تقی میر

ہاتھ سے جائے گا سررشتۂ کار آخرکار

اکتوبر 6, 2015میر تقی میر،اساتذہ،غزلقرار،مار،مزار،یار،کار،بہار،غبارadmin

دیوان اول غزل 221

رہنے کا پاس نہیں ایک بھی تار آخرکار

ہاتھ سے جائے گا سررشتۂ کار آخرکار

لوح تربت پہ مری پہلے یہ لکھیو کہ اسے

یار دشمن ہو گیا جان سے مار آخرکار

مشت خاک اپنی جو پامال ہے یاں اس پہ نہ جا

سر کو کھینچے گا فلک تک یہ غبار آخرکار

سیر کر کثرت عالم کی مری جان کہ پھر

تن تنہا ہے تو اور کنج مزار آخرکار

چشم وا دیکھ کے اس باغ میں کیجو نرگس

آنکھوں سے جاتی رہے گی یہ بہار آخرکار

ابتدا ہی میں محبت کی ہوئے ہم تو تمام

ہوتا ہو گا یہی کچھ عشق میں یار آخرکار

اول کار محبت تو بہت سہل ہے میر

جی سے جاتا ہے ولے صبر و قرار آخرکار

میر تقی میر

کام آئے فراق میں اے یار

اکتوبر 6, 2015میر تقی میر،اساتذہ،غزلہشیار،مختار،ناچار،یار،گفتار،پکار،آزار،اظہار،بہار،بیمار،بیدار،بیزار،بازار،تلوار،تار،خمار،خار،دیدار،درکار،دستار،دشوار،سردار،شعارadmin

دیوان اول غزل 211

دل دماغ و جگر یہ سب اک بار

کام آئے فراق میں اے یار

کیوں نہ ہو ضعف غالب اعضا پر

مر گئے ہیں قشون کے سردار

گل پژمردہ کا نہیں ممنون

ہم اسیروں کا گوشۂ دستار

مت نکل گھر سے ہم بھی راضی ہیں

دیکھ لیں گے کبھو سر بازار

سینکڑوں حرف ہیں گرہ دل میں

پر کہاں پایئے لب اظہار

سیر کر دشت عشق کا گلشن

غنچے ہو ہورہے ہیں سو سو خار

روز محشر ہے رات ہجراں کی

ایسی ہم زندگی سے ہیں بیزار

بحث نالہ بھی کیجیو بلبل

پہلے پیدا تو کر لب گفتار

چاک دل پر ہیں چشم صد خوباں

کیا کروں یک انار و صد بیمار

شکر کر داغ دل کا اے غافل

کس کو دیتے ہیں دیدئہ بیدار

گو غزل ہو گئی قصیدہ سی

عاشقوں کا ہے طول حرف شعار

ہر سحر لگ چلی تو ہے تو نسیم

اے سیہ مست ناز ٹک ہشیار

شاخسانے ہزار نکلیں گے

جو گیا اس کی زلف کا اک تار

واجب القتل اس قدر تو ہوں

کہ مجھے دیکھ کر کہے ہے پکار

یہ تو آیا نہ سامنے میرے

لائو میری میاں سپر تلوار

آ زیارت کو قبر عاشق پر

اک طرح کا ہے یاں بھی جوش بہار

نکلے ہے میری خاک سے نرگس

یعنی اب تک ہے حسرت دیدار

میر صاحب زمانہ نازک ہے

دونوں ہاتھوں سے تھامیے دستار

سہل سی زندگی پہ کام کے تیں

اپنے اوپر نہ کیجیے دشوار

چار دن کا ہے مجہلہ یہ سب

سب سے رکھیے سلوک ہی ناچار

کوئی ایسا گناہ اور نہیں

یہ کہ کیجے ستم کسی پر یار

واں جہاں خاک کے برابر ہے

قدر ہفت آسمان ظلم شعار

یہی درخواست پاس دل کی ہے

نہیں روزہ نماز کچھ درکار

در مسجد پہ حلقہ زن ہو تم

کہ رہو بیٹھ خانۂ خمار

جی میں آوے سو کیجیو پیارے

لیک ہوجو نہ درپئے آزار

حاصل دو جہان ہے یک حرف

ہو مری جان آگے تم مختار

میر تقی میر

اے انتظار تجھ کو کسی کا ہو انتظار

اکتوبر 6, 2015میر تقی میر،اساتذہ،غزلمزار،انتظار،بہار،بار،خمار،خار،غبارadmin

دیوان اول غزل 207

دیکھوں میں اپنی آنکھوں سے آوے مجھے قرار

اے انتظار تجھ کو کسی کا ہو انتظار

ساقی تو ایک بار تو توبہ مری تڑا

توبہ کروں جو پھر تو ہے توبہ ہزار بار

کیا زمزمہ کروں ہوں خوشی تجھ سے ہم صفیر

آیا جو میں چمن میں تو جاتی رہی بہار

کس ڈھب سے راہ عشق چلوں ہے یہ ڈر مجھے

پھوٹیں کہیں نہ آبلے ٹوٹیں کہیں نہ خار

کوچے کی اس کے راہ نہ بتلائی بعد مرگ

دل میں صبا رکھے تھی مری خاک سے غبار

اے پاے خم کہ گردش ساغر ہو دستگیر

مرہون درد سر ہو کہاں تک مرا خمار

وسعت جہاں کی چھوڑ جو آرام چاہے میر

آسودگی رکھے ہے بہت گوشۂ مزار

میر تقی میر

جیتوں نہ جیت سے کبھی ہاروں نہ ہار سے

نومبر 18, 2013آفتاب اقبال شمیمہار،انتشار،انتظار،اختیار،بہار،سوارadmin

آفتاب اقبال شمیم ۔ غزل نمبر 101

اِس درجہ ہو گیا ہوں سبک غم کے بار سے

جیتوں نہ جیت سے کبھی ہاروں نہ ہار سے

جب چاہے جس کو پھینک دے، منہ زور ہے بہت

وہ دیکھو! زین ہو گئی خالی سوار سے

خوش ہوں کہ تجھ سے ایک تعلق بنا رہا

ٹوٹا کبھی نہ ربط مرا انتظار سے

بیکار ہی سہی ولے شعروں کے شغل نے

مجھ کو بچا لیا ہے مرے انتشار سے

قربت کے ساتھ خواہشِ دیگر بھی چاہئے

باہر ہے لطفِ لمس مرے اختیار سے

خوشبوئیں لڑکیوں کی طرح گھومتی پھریں

کیا مشورہ ہے، آؤ نا پوچھیں بہار سے

آفتاب اقبال شمیم

جیسے خوشبوئے زلفِ بہار آگئی، جیسے پیغامِ دیدارِ یار آگیا

اپریل 4, 2012فیض احمد فیض،دستِ تہِ سنگ،غزلنکھار،یار،پیار،اعتبار،بہار،دارadmin

فیض احمد فیض ۔ غزل نمبر 26

آج یوں موج در موج غم تھم گیا، اس طرح غم زدوں کو قرار آگیا

جیسے خوشبوئے زلفِ بہار آگئی، جیسے پیغامِ دیدارِ یار آگیا

جس کی دید و طلب وہم سمجھے تھے ہم، رُو بُرو پھر سرِ رہگزار آگیا

صبحِ فردا کو پھر دل ترسنے لگا ، عمرِ رفتہ ترا اعتبار آگیا

رُت بدلنے لگی رنگِ دل دیکھنا ، رنگِ گلشن سے اب حال کھلتا نہیں

زخم چھلکا کوئی یا کوئی گُل کِھلا ، اشک اُمڈے کہ ابرِ بہار آگیا

خونِ عُشاق سے جام بھرنے لگے ، دل سُلگنے لگے ، داغ جلنے لگے

محفلِ درد پھر رنگ پر آگئی ، پھر شبِ آرزُو پر نکھار آگیا

سر فروشی کے انداز بدلے گئے ، دعوتِ قتل پر مقتل شہر میں

ڈال کر کوئی گردن میں طوق آگیا ، لاد کر کوئی کاندھے پہ دار آگیا

فیض کیا جانیے یار کس آس پر ، منتظر ہیں کہ لائے گا کوئی خبر

میکشوں پر ہُوا محتسب مہرباں ، دل فگاروں پہ قاتل کو پیار آگیا

فیض احمد فیض

تلاش میں ہے سحر، بار بار گزری ہے

اپریل 2, 2012فیض احمد فیض،دستِ صبا،غزلہزار،قرار،ناگوار،یار،بہار،بارadmin

فیض احمد فیض ۔ غزل نمبر 15

تم آئے ہو، نہ شبِ انتظار گزری ہے

تلاش میں ہے سحر، بار بار گزری ہے

جنوں میں جتنی بھی گزری، بکار گزری ہے

اگرچہ دل پہ خرابی ہزار گزری ہے

ہوئی ہے حضرتِ ناصح سے گفتگو جس شب

وہ شب ضرور سرِ کوئے یار گزری ہے

وہ بات سارے فسانے میں جس کا ذکر نہ تھا

وہ بات اُن کو بہت ناگوار گزری ہے

نہ گل کھلے ہیں، نہ اُن سے ملے، نہ مے پی ہے

عجیب رنگ میں اب کے بہار گزری ہے

چمن میں غارتِ گلچیں سے جانے کیا گزری

قفس سے آج صبا بے قرار گزری ہے

فیض احمد فیض

فیض احمد فیض ۔ قطعات

اپریل 1, 2012فیض احمد فیض،نقش فریادی،غزلہے،فغاں،قرار،کہاں،گزرتی،پاس،اترتی،اداس،بہارadmin

فیض احمد فیض ۔ قطعات

رات یوں دل میں تری کھوئی ہوئی یاد آئی

جیسے ویرانے میں چپکے سے بہار آجائے

جیسے صحراؤں میں ہولے سے چلے باد نسیم

جیسے بیمار کو بے وجہ قرار آجائے

دل رہین غم جہاں ہے آج

ہر نفس تشنۂ فغاں ہے آج

سخت ویراں ہے محفل ہستی

اے غم دوست! تو کہاں ہے آج

وقف حرمان و یاس رہتا ہے

دل ہے اکثر اداس رہتا ہے

تم تو غم دے کے بھول جاتے ہو

مجھ کو احساں کا پاس رہتا ہے

فضائے دل پر اداسی بکھرتی جاتی ہے

فسردگی ہے کہ جاں تک اترتی جاتی ہے

فریب زیست سے قدرت کا مدعا معلوم

یہ ہوش ہے کہ جوانی گزرتی جاتی ہے

متفرق اشعار

فیض احمد فیض

وہ جارہا ہے کوئی شب غم گزار کے

اپریل 1, 2012فیض احمد فیض،نقش فریادی،غزلکار،گزار،پروردگار،بہار،روزگارadmin

فیض احمد فیض ۔ غزل نمبر 25

دونوں جہان تیری محبت میں ہار کے

وہ جارہا ہے کوئی شب غم گزار کے

ویراں ہے میکدہ، خم و ساغر اداس ہیں

تم کیا گئے کہ روٹھ گئے دن بہار کے

اک فرصت گناہ ملی وہ بھی چار دن

دیکھے ہیں ہم نے حوصلے پروردگار کے

دنیا نے تیری یاد سے بے گانہ کردیا

تجھ سے بھی دلفریب ہیں غم روزگار کے

بھولے سے مسکرا تو دیے تھے وہ آج فیض

مت پوچھ ولولے دل ناکردہ کار کے

فیض احمد فیض

حسن مجبور انتظار نہیں

اپریل 1, 2012فیض احمد فیض،نقش فریادی،غزلپیار،انتظار،استوار،بہار،خمار،شمار،شعارadmin

فیض احمد فیض ۔ غزل نمبر 5

عشق منت کش قرار نہیں

حسن مجبور انتظار نہیں

تیری رنجش کی انتہا معلوم

حسرتوں کا مری شمار نہیں

اپنی نظریں بکھیر دے ساقی

مے باندازۂ خمار نہیں

زیر لب ہے ابھی تبسم دوست

منتشر جلوۂ بہار نہیں

اپنی تکمیل کررہا ہوں میں

ورنہ تجھ سے تو مجھ کو پیار نہیں

چارۂ انتظار کون کرے

تیری نفرت بھی استوار نہیں

فیض زندہ رہیں وہ ہیں تو سہی

کیا ہوا گر وفا شعار نہیں

فیض احمد فیض

بہار

مارچ 3, 2012مجید امجد،نظم،امروزبہارadmin

ہر بار، اسی طرح سے دنیا

سونے کی ڈلی سے ڈھالتی ہے

سرسوں کی کلی کی زرد مورت

تھاما ہے جسے خمِ ہوا نے

ہر بار، اسی طرح سے شاخیں

کھلتی ہوئی کونپلیں اٹھائے

رستوں کے سلاخچوں سے لگ کر

کیا سوچتی ہیں؟ یہ کون جانے

ہر بار، اسی طرح سے بوندیں

رنگوں بھری بدلیوں سے چھن کر

آتی ہیں مسافتوں پہ پھیلے

تانبے کے ورق کو ٹھنٹھنانے

ہر سال، اسی طرح کا موسم

ہر بار، یہی مہکتی دوری

ہر صبح، یہی کٹھور آنسو

رونے کے کب آئیں گے زمانے

مجید امجد

دم گھٹ رہا ہے سایۂ ابرِ بہار میں

مارچ 2, 2012مجید امجد،روزِ رفتہ،غزلانتظار،بہار،دیار،رہگزارadmin

مجید امجد ۔ غزل نمبر 82

دن کٹ رہے ہیں کشمکشِ روزگار میں

دم گھٹ رہا ہے سایۂ ابرِ بہار میں

آتی ہے اپنے جسم کے جلنے کی بو مجھے

لٹتے ہیں نکہتوں کے سبو جب بہار میں

گزرا ادھر سے جب کوئی جھونکا تو چونک کر

دل نے کہا: یہ آ گئے ہم کس دیار میں؟

اے کنجِ عافیت، تجھے پا کر پتہ چلا

کیا ہمہمے تھے گردِ سرِ رہگزار میں

میں ایک پل کے رنجِ فراواں میں کھو گیا

مرجھا گئے زمانے مرے انتظار میں

مجید امجد

مطرب، کوئی ترانہ بیادِ بہار چھیڑ

مارچ 2, 2012مجید امجد،روزِ رفتہ،غزلبہار،درکنار،روزگار،زار،ستارadmin

مجید امجد ۔ غزل نمبر 58

آ، سازِ گلستاں کو بہ مضرابِ خار چھیڑ

مطرب، کوئی ترانہ بیادِ بہار چھیڑ

سوئے ہوئے سکوتِ چمن کو ذرا جگا

کچھ تو نواطرازِ غمِ روزگار چھیڑ

کل یہ جگہ تھی وادیِ نکہت، رباب اٹھا

کل یاں ہجومِ گل تھا، سرودِ بہار چھیڑ

قصہ کوئی بہ ماتمِ جام و سبو سنا

نغمہ کوئی بہ تعزیتِ سبزہ زار چھیڑ

کچھ بھی نہ ہو، خزاں تو ہے، اک راگنی الاپ

ہر خس ہے ایک سازِ نوا درکنار، چھیڑ

شاید پلٹ کے آ نہ سکے اب بہار، گا

پژمردہ شاخسار پہ جھک کر ستار چھیڑ

مجید امجد

بھر گیا ہے مری آنکھوں میں غبار دنیا

جنوری 3, 2012عرفان صدیقی،غزلکار،گزار،بہار،بار،شرار،غبارadmin

عرفان صدیقی ۔ غزل نمبر 69

اب کہیں اور چل اے ناقہ سوار دنیا

بھر گیا ہے مری آنکھوں میں غبار دنیا

مجھ کو مل جائے اگر سلطنت تکیہ دل

میں تو پل بھر نہ رہوں باج گزار دنیا

بے دلی پھر ہوس تازہ میں ڈھل جاتی ہے

ختم ہونے ہی میں آتا نہیں کار دنیا

اکثر اکثر نظر آجاتا ہے مہتاب کا کھیل

چھپ گیا ہے مری مٹی میں شرار دنیا

ایسا لگتا ہے کہ سینے میں اُٹھی ہے کوئی

آج اسی لہر میں پھینک آتا ہوں بار دنیا

عادت سیر و تماشا نہیں جانے والی

دور سے دیکھتا رہتا ہوں بہار دنیا

عرفان صدیقی

اب کسی پر کوئی اعتبار نہیں ہے

دسمبر 1, 2007منصور آفاق،شعراء،غزلقرار،مار،کنار،کوہسار،کاروبار،انتظار،آبشار،اختصار،اشکبار،اعتبار،بہار،دیار،دار،رہگزار،شمار،غمگسار،غبارadmin

منصور آفاق ۔ غزل نمبر 624

مان لیا وہ بھی میرا یار نہیں ہے

اب کسی پر کوئی اعتبار نہیں ہے

جاگ رہا ہوں میں کتنے سال ہوئے ہیں

کیسے کہوں اس کا انتظار نہیں ہے

ٹوٹ گئے ہیں دو پھر امید بھرے دل

ٹکڑے ہیں اتنے کہ کچھ شمار نہیں ہے

میرا بدن برف ہے یا تیرِ نظر میں

پہلے پہل والی اب کے مار نہیں ہے

عہدِ خزاں میں ہے میرا باغ کہ جیسے

دامنِ تقدیر میں بہار نہیں ہے

سنگ اچھالے ہیں اس نے بام سے مجھ پر

جیسے گلی اس کی رہگزار نہیں ہے

ایک دعا بس ہے میرے پاس عشاء کی

رات! مرا کوئی غمگسار نہیں ہے

صرف گھٹا ہے جو دل میں روئے برس کے

اور کوئی چشمِ اشکبار نہیں ہے

سرخ ہے بے شک نمود چہرئہ تاریخ

دامنِ تہذیب داغ دار نہیں ہے

سنگ زدہ اس کے رنگ ڈھنگ ہیں لیکن

آدمی ہے کوئی کوہسار نہیں ہے

پار کروں گا میں اپنی آگ کا دریا

دیکھ رہا ہوں یہ بے کنار نہیں ہے

وقت نہیں آج اس کے پاس ذرا بھی

اور یہاں رنگِ اختصار نہیں ہے

مست ہوائیں بھی ماہتاب بھی لیکن

رات بھری زلفِ آبشار نہیں ہے

گھوم رہا ہوں فصیلِ ذات کے باہر

کوئی بھی دروازئہ دیار نہیں ہے

ایک نہیں قحط عشق صرف یہاں پر

شہر میں کوئی بھی کاروبار نہیں ہے

پھیر ہی جا مجھ پہ اپنا دستِ کرامت

آ کہ مری جان کو قرار نہیں ہے”

درج ہے نیلی بہشتِ خواب کا منظر

آنکھ میں منصور کی غبار نہیں ہے

بنام غالب

منصور آفاق

ترے خیال پہ تھو تیرے انتظار پہ تف

دسمبر 1, 2007منصور آفاق،شعراء،غزلفگار،قمار،قطار،مار،وقار،یار،پکار،اقتدار،انتظار،اختیار،اشکبار،اعتبار،بہار،حصار،خار،دار،سنوار،شمار،غمگسار،غبارadmin

منصور آفاق ۔ غزل نمبر 207

شبِ وصال پہ لعنت شبِ قرار پہ تف

ترے خیال پہ تھو تیرے انتظار پہ تف

وہ پاؤں سو گئے جو بے ارادہ اٹھتے تھے

طواف کوچہء جاناں پہ، کوئے یار پہ تف

تجھ ایسے پھول کی خواہش پہ بار ہا لعنت

بجائے خون کے رکھتا ہوں نوکِ خار پہ تف

دلِ تباہ کو تجھ سے بڑی شکایت ہے

اے میرے حسنِ نظر ! تیرے اعتبار پہ تف

پہنچ سکا نہیں اس تک جو میرے زخم کا نور

چراغ خون پہ تھو سینہء فگار پہ تف

ہیں برگِ خشک سی شکنیں خزاں بکف بستر

مرے مکان میں ٹھہری ہوئی بہار پہ تف

کسی فریب سے نکلا ہے جا مٹھائی بانٹ

ترے ملالِ تری چشم اشکبار پہ تف

تجھے خبر ہی نہیں ہے کہ مرگیا ہوں میں

اے میرے دوست ترے جیسے غمگسار پہ تف

یونہی بکھیرتا رہتا ہے دھول آنکھوں میں

ہوائے تیز کے اڑتے ہوئے غبار پہ تف

خود آپ چل کے مرے پاس آئے گا کعبہ

مقامِ فیض پہ بنتی ہوئی قطار پہ تف

حیات قیمتی ہے خواب کے دریچوں سے

رہِ صلیب پہ لعنت، فراز دار پہ تف

صدا ہو صوتِ سرافیل تو مزہ بھی ہے

گلے کے بیچ میں اٹکی ہوئی پکار پہ تف

جسے خبر ہی نہیں ہے پڑوسی کیسے ہیں

نمازِ شام کی اُس عاقبت سنوار پہ تف

مری گلی میں اندھیرا ہے کتنے برسوں سے

امیرِ شہر! ترے عہدِ اقتدار پہ تف

ترے سفید محل سے جو پے بہ پے ابھرے

ہزار بار انہی زلزلوں کی مار پہ تف

ترے لباس نے دنیا برہنہ تن کر دی

ترے ضمیر پہ تھو، تیرے اختیار پہ تف

سنا ہے چادرِ زہرا کو بیچ آیا ہے

جناب شیخ کی دستارِ بد قمار پہ تف

تُو ماں کی لاش سے اونچا دکھائی دیتا ہے

ترے مقام پہ لعنت ترے وقار پہ تف

مرے گھرانے کی سنت یہی غریبی ہے

ترے خزانے پہ تھو مالِ بے شمار پہ تف

یہی دعا ہے ترا سانپ پر قدم آئے

ہزار ہا ترے کردارِ داغ دار پہ تف

کسی بھی اسم سے یہ ٹوٹتا نہیں منصور

فسردگی کے سلگتے ہوئے حصار پہ تف

منصور آفاق

ہے بوسہ زن بہار محمدﷺ کے نام پر

دسمبر 1, 2007منصور آفاق،شعراء،غزلناگوار،نثار،وقار،گار،بہار،بارadmin

منصور آفاق ۔ غزل نمبر 168

تہذیب کانکھار محمدﷺ کے نام پر

ہے بوسہ زن بہار محمدﷺ کے نام پر

بے عیب شاہکار ہے ربِ کریم کا

نقطہ بھی ناگوار محمدﷺ کے نام پر

لمحے اسی کے فیض کی زندہ امانتیں

یہ روز وشب نثار محمدﷺ کے نام پر

چودہ سو سال سے گل و گلزار کے تمام

موسم ہیں ساز گار محمدﷺ کے نام پر

ذرے ہوں مہر و ماہ اسی اسم کے طفیل

ذی حس ہوں ذی وقار محمدﷺ کے نام پر

منصور ان کے نام پہ مرنا عروجِ بخت

قرباں میں بار بار محمدﷺ کے نام پر

منصور آفاق

دیکھتا جسے بھی تھا کوہسار لگتا تھا

دسمبر 1, 2007منصور آفاق،شعراء،غزلوار،یار،کوہسار،اقتدار،انتظار،آبشار،بہار،بار،غمگسارadmin

منصور آفاق ۔ غزل نمبر 82

عرش تک میانوالی بے کنار لگتا تھا

دیکھتا جسے بھی تھا کوہسار لگتا تھا

بارشوں کے موسم میں جب ہوا اترتی تھی

اپنے گھر کا پرنالا آبشار لگتا تھا

منچلوں کی گلیوں میں رات جب مچلتی تھی

کوچہء رقیباں بھی کوئے یار لگتا تھا

ایک چائے خانہ تھا یاد کے سٹیشن پر

بھیگتے اندھیرے میں غمگسار لگتا تھا

ایک نہر پانی کی شہر سے گزرتی تھی

اس کا یخ رویہ بھی دل بہار لگتا تھا

ادھ جلے سے سگریٹ کے ایک ایک ٹکڑے میں

لاکھ لاکھ سالوں کا انتظار لگتا تھا

قید اک رگ و پے میں روشنی کی دیوی تھی

جسم کوئی شیشے کا جار وار لگتا تھا

باتھ روم میں کوئی بوند سی ٹپکتی تھی

ذہن پر ہتھوڑا سا بار بار لگتا تھا

ہمسفر جوانی تھی ہم سخن خدا منصور

اپنا ہی زمانے پر اقتدار لگتا تھا

منصور آفاق

آنکھوں سے گرپڑے کئی نیلم کے آبشار

دسمبر 1, 2007منصور آفاق،شعراء،غزلقرار،پکار،انتظار،آبشار،اشکبار،بہار،دار،داغدار،زار،سوار،شکارadmin

منصور آفاق ۔ غزل نمبر 7

میں جا رہا تھا دیکھنے فرودسِ بے کنار

آنکھوں سے گرپڑے کئی نیلم کے آبشار

شادابیوں کی آخری حد، وادئ گریز

پاؤں کے انتظار میں صدیوں سے اشکبار

ہلمت کی بے پناہ بلندی پہ تیز آب

پھرتا ہے بادلوں کے دریچوں میں بے قرار

لاکھوں برس قدیم گھنے جنگلوں کا کیل

اور اس کے بیچ زندگی باردو کا شکار

کیوں صحنِ شاردا میں ہوئی بدھ کی آتما

کتنے کروڑ لوگوں کے اشکوں سے داغدار

معصوم داؤکھن کی مقدس سفیدیاں

اک دورِ جاھلاں میں رسولوں میں انتظار

شمشہ بری کے پیچھے چناروں کا سرخ روپ

بادل بھری شعاعوں کامقتل پسِ بہار

اڑتے ہیں دھیر کوٹ کی گلیوں میں برگ و بار

جیسے بدلنے لگتی ہے تہذیبِ برف زار

شبنم کے موتیوں سے بھرا راولہ کا کوٹ

ہر سنگ میں دکھاتا ہے اک چشمِ آب دار

بنجوسہ جیسے آب درختوں کے تھال میں

بس گھومتی ہے روح میں خاموش سی پکار

دریائے تند سو گئے منگلا کی گود میں

منصور ڈھونڈتا رہا کشمیر کے سوار

منصور آفاق

غم سے بے اختیار سا ہے کچھ

نومبر 20, 2005امیر مینائی،غزلقرار،مزار،مستعار،پار،اختیار،بہار،خمار،غبارadmin

امیر مینائی ۔ غزل نمبر 35

دل جو سینے میں زار سا ہے کچھ

غم سے بے اختیار سا ہے کچھ

رخت ہستی بدن پہ ٹھیک نہیں

جامۂ مستعار سا ہے کچھ

چشم نرگس کہاں وہ چشم کہاں

نشہ کیسا خمار سا ہے کچھ

نخل اُمید میں نہ پھول نہ پھل

شجرِ بے بہار سا ہے کچھ

ساقیا ہجر میں یہ ابر نہیں

آسمان پر غبار سا ہے کچھ

کل تو آفت تھی دل کی بیتابی

آج بھی بے قرار سا ہے کچھ

مردہ ہے دل تو گور ہے سینہ

داغ شمع مزار سا ہے کچھ

اِس کو دنیا کی اُس کو خلد کی حرص

رند ہے کچھ نہ پارسا ہے کچھ

پہلے اس سے تھا ہوشیار امیر

اب بے اختیار سا ہے کچھ

امیر مینائی

روئی صبا لپٹ کے ہر اک شاخسار سے

جنوری 8, 1972باقی صدیقی،شعراء،غزلمزار،بہار،شاخسار،شرارadmin

باقی صدیقی ۔ غزل نمبر 207

اٹھا نقاب جب رُخ صبح بہار سے

روئی صبا لپٹ کے ہر اک شاخسار سے

شاخوں میں تھی دبی ہوئی شاید خزاں کی آگ

گلشن بھڑک اٹھا ہے نسیم بہار سے

گزرے ہوئے دنوں کے تصور سے فائدہ

کیا روشنی ملے گی چراغ مزار سے

روداد گلستاں کو نیا رنگ دے گیا

رستا رہا ہے خون جو زخم بہار سے

باقیؔ کبھی جلی تھیں محبت کی بستیاں

راہوں میں اڑ رہے ہیں ابھی تک شرار سے

باقی صدیقی

ہے چیز کون سی جو تیرا شاہکار نہیں

جنوری 8, 1972باقی صدیقی،شعراء،غزلآشکار،بہار،سازگار،شمار،شاہکارadmin

باقی صدیقی ۔ غزل نمبر 136

یہ گل نہیں یہ شگوفے نہیں یہ خار نہیں

ہے چیز کون سی جو تیرا شاہکار نہیں

خیال تیری طرف ہو تو غم بھی بار نہیں

یہ کیا گلہ ہے کہ ماحول سازگار نہیں

چمن کو دیکھ کے دیکھو بنانے والے کو

مقام فکر بھی ہے صرف یہ بہار نہیں

تری نگاہ کرم کی امید ہے ورنہ

میرے گناہوں کا یا رب کوئی شمار نہیں

زمانہ راز ہے تو راز ہی رہے باقیؔ

اسی میں اپنا بھرم ہے کہ آشکار نہیں

باقی صدیقی

ہنس پڑی دیکھ کر بہار ہمیں

جنوری 8, 1972باقی صدیقی،شعراء،غزلپکار،اختیار،اعتبار،بہار،سنوار،شرار،غمگسارadmin

باقی صدیقی ۔ غزل نمبر 117

تھا میسر نہ ایک تار ہمیں

ہنس پڑی دیکھ کر بہار ہمیں

اتنا خود پر بھی اعتبار نہیں

جتنا تجھ پر ہے اعتبار ہمیں

اب محبت کا یہ تقاضا ہے

کاکلوں کی طرح سنوار ہمیں

زخم دل دیکھ کر خیال آیا

تجھ پہ کتنا تھا اعتبار ہمیں

تیری نظروں پہ حرف آتا ہے

ورنہ دل پر ہے اختیار ہمیں

غیر سے اس طرح ملے جیسے

مل گیا کوئی غمگسار ہمیں

دلِ پُر درد کا تقاضا ہے

دوستوں کی طرح پکار ہمیں

بارہا وقت نے دئیے باقیؔ

پھول کے رنگ میں شرار ہمیں

باقی صدیقی

کوسنا رنگ اختیار کریں

جنوری 8, 1972باقی صدیقی،شعراء،غزلانتظار،اختیار،اعتبار،بہار،غمگسارadmin

باقی صدیقی ۔ غزل نمبر 109

تجھ پہ یا خود پہ اعتبار کریں

کوسنا رنگ اختیار کریں

تجربے کا یہی تقاضا ہے

آپ پر بھی نہ اعتبار کریں

پرسش غم نہیں ہے غم کا علاج

یہ تکلف نہ غمگسار کریں

حد نہیں انتظار کی کوئی

آگے ہم جتنا انتظار کریں

پتا پتا ہے مضمحل باقیؔ

ہم کہاں تک غم بہار کریں

باقی صدیقی

ملا ہے جو اختیار اس اختیار پر غور کر رہا ہوں

جنوری 8, 1972باقی صدیقی،شعراء،غزلاختیار،اعتبار،بہار،روزگار،غبارadmin

باقی صدیقی ۔ غزل نمبر 105

ہجوم رنج و الم میں صبر و قرار پر غور کر رہا ہوں

ملا ہے جو اختیار اس اختیار پر غور کر رہا ہوں

نظر کے سائے ذرا ہٹا لو کہ عقل کی سانس گھٹ رہی ہے

ہٹو ہٹو میں کشاکش روزگار پر غور کر رہا ہوں

بھٹک رہا ہے خیال سود و زیاں کے پر پیچ راستوں میں

کہاں کی منزل ابھی تو گردو غبار پر غور کر رہا ہوں

میں کتنا بیباک ہو گیا ہوں مجھے سزا دو چمن پرستو!

بہار کہتے ہو تم جسے اس بہار پر غور کر رہا ہوں

بدل رہا ہے کچھ اس طرح ان کے عہد و پیماں کا رنگ باقیؔ

کیا تھا کل اعتبار آج اعتبار پر غور کر رہا ہوں

باقی صدیقی

بے سدھ پڑا ہوں آخری پتھر بھی مار لو

جنوری 8, 1972باقی صدیقی،شعراء،غزلمار،گزار،پیار،ادھار،بہار،شاہکار،غمگسارadmin

باقی صدیقی ۔ غزل نمبر 90

حسرت ہے جو نکال لو غصہ اتار لو

بے سدھ پڑا ہوں آخری پتھر بھی مار لو

دنیا ہے نام موت کا عقبِ حیات کا

آگے خوشی تمہاری خزاں لو بہار لو

دنیا تو اپنی بات کبھی چھوڑتی نہیں

جس طرح تم گزار سکو دن گزار لو

کچھ دیر اور بزم میں ان کی چلے گی بات

کچھ آ گئے ہیں اور مرے غمگسار لو

لے کر بیاض کیوں نہ پکاروں گلی گلی

میرا لہو خریدو، مرے شاہکار لو

باقیؔ تمہیں حیات کا ساماں تو مل گیا

اک لمحے کی خوشی بھی کسی سے ادھار لو

باقی صدیقی

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں: