زمرہ جات کے محفوظات: غزل

دل کو میرے ہے اضطراب بہت

اکتوبر 6, 2015میر تقی میر،اساتذہ،غزلکباب،گلاب،اضطراب،تاب،جناب،حجاب،حساب،خراب،شتاب،عتابadmin

دیوان پنجم غزل 1586

چشم رہتی ہے اب پرآب بہت

دل کو میرے ہے اضطراب بہت

دیکھیے رفتہ رفتہ کیا ہووے

تاب دل کم ہے پیچ و تاب بہت

دیر افسوس کرتے رہیے گا

عمر جاتی رہی شتاب بہت

مہر و لطف و کرم عنایت کم

ناز و خشم و جفا عتاب بہت

بے تفاوت ہے فرق آپس میں

وے مقدس ہیں میں خراب بہت

پشت پا پر ہے چشم شوخ اس کی

ہائے رے ہم سے ہے حجاب بہت

دختر رز سے رہتے ہیں محشور

شیخ صاحب ہیں کُس کباب بہت

آویں محشر میں کیوں نہ پاے حساب

ہم یہی کرتے ہیں حساب بہت

واں تک اپنی دعا پہنچتی نہیں

عالی رتبہ ہے وہ جناب بہت

گل کے دیکھے کا غش گیا ہی نہ میر

منھ پہ چھڑکا مرے گلاب بہت

میر تقی میر

تیغ نے اس کی کیا ہے قسمت یہ بھی ہے قسمت کی بات

اکتوبر 6, 2015میر تقی میر،اساتذہ،غزلفرصت،قسمت،مدت،رخصت،طاقتadmin

دیوان پنجم غزل 1585

چپکے کھڑا ٹکڑے ہوتا ہوں ساری ہے الفت کی بات

تیغ نے اس کی کیا ہے قسمت یہ بھی ہے قسمت کی بات

جان مسافر ہو جائے گی لب پر ہے موقوف آہ

سب کچھ کہیو جاتے ہوئے تم مت کہیو رخصت کی بات

کہہ کے فسانہ عشق و وفا کا لوگ محبت کرتے تھے

اب وہ ناز کہانی ان کی گویا ہے مدت کی بات

درد و غم کی گرفتاری سے مہلت ہو تو کچھ کہیے

حرف زدن اشعار شعاری یہ سب ہے فرصت کی بات

کس کو دماغ جواب رہا ہے ضعف سے اب خاموش رہے

پہروں بکتا نصیحت گر سے میر یہ ہے طاقت کی بات

میر تقی میر

عشق کی گرمی دل کو پہنچی کہتے ہی آزار بہت

اکتوبر 6, 2015میر تقی میر،اساتذہ،غزلہموار،ہشیار،پیار،آزار،بیمار،خونبار،دارadmin

دیوان پنجم غزل 1584

زرد ہیں چہرے سوکھ گئے ہیں یعنی ہیں بیمار بہت

عشق کی گرمی دل کو پہنچی کہتے ہی آزار بہت

نالہ و زاری سے عاشق کی کیا ابر بہاری طرف ہو گا

دل ہے نالاں حد سے زیادہ آنکھیں ہیں خونبار بہت

برسوں ہوئے اب ہم لوگوں سے آنکھ انھوں کی نہیں ملتی

برسوں تک آپس میں رہا ہے اپنے جنھوں کے پیار بہت

ارض و سما کی پستی بلندی اب تو ہم کو برابر ہے

یعنی نشیب و فراز جو دیکھے طبع ہوئی ہموار بہت

سو غیروں میں ہو عاشق تو ایک اسی سے شرماویں

اس مستی میں آنکھیں اس کی رہتی ہیں ہشیار بہت

کم ہے ہمیں امید بہی سے اتنی نزاری پر اس کی

پچھلے دنوں دیکھا تھا ہم نے عاشق تھے بیمار بہت

میر نہ ایسا ہووے کہیں پردے ہی پر وہ مار مرے

ڈر لگتا ہے اس سے ہم کو ہے وہ ظاہر دار بہت

میر تقی میر

اس لب و لہجے پر بلبل کو اس کے آگے نہ آئی بات

اکتوبر 6, 2015میر تقی میر،اساتذہ،غزللگائی،چھپائی،آئی،بنائی،بڑھائیadmin

دیوان پنجم غزل 1583

باد صبا نے اہل چمن میں اس چہرے کی چلائی بات

اس لب و لہجے پر بلبل کو اس کے آگے نہ آئی بات

دور تلک قاصد کے پیچھے کچھ کہتا میں جاتا تھا

شوق ستم کش ظالم نے کیا رفتہ رفتہ بڑھائی بات

آگ ہوا آتے ہی میرے لال آنکھیں کر گھور رہا

کیا جانوں سرگوشی میں کیا غیر نے اس سے لگائی بات

لعل کو نسبت ان ہونٹوں سے دینا سب کا تصنع تھا

کچھ بن آئی جب نہ کسو سے تب یہ ایک بنائی بات

غیر سے کچھ کچھ کہتا تھا سو سامنے سے میر آیا میں

پھیر لیا منھ میری طرف سے یعنی مجھ سے چھپائی بات

میر تقی میر

انچھر ہیں تو عشق کے دوہی لیکن ہے بستار بہت

اکتوبر 6, 2015میر تقی میر،اساتذہ،غزلپیار،آزار،اصرار،بیمار،بستار،زنار،عارadmin

دیوان پنجم غزل 1582

دل کی تہ کی کہی نہیں جاتی نازک ہے اسرار بہت

انچھر ہیں تو عشق کے دوہی لیکن ہے بستار بہت

کافر مسلم دونوں ہوئے پر نسبت اس سے کچھ نہ ہوئی

بہت لیے تسبیح پھرے ہم پہنا ہے زنار بہت

ہجر نے جی ہی مارا ہمارا کیا کہیے کیا مشکل ہے

اس سے جدا رہنا ہوتا ہے جس سے ہمیں ہے پیار بہت

منھ کی زردی تن کی نزاری چشم تر پر چھائی ہے

عشق میں اس کے یعنی ہم نے کھینچے ہیں آزار بہت

کہہ کے تغافل ان نے کیا تھا لیکن تقصیر اپنی ہے

کام کھنچا جو تیغ تک اس کی ہم نے کیا اصرار بہت

حرف و سخن اب تنگ ہوا ہے ان لوگوں کا ساتھ اپنے

منھ کرنے سے جن کی طرف آتی تھی ہم کو عار بہت

رات سے شہرت اس بستی میں میر کے اٹھ جانے کی ہے

جنگل میں جو جلد بسا جا شاید تھا بیمار بہت

میر تقی میر

کون ایسے محروم غمیں کا ہم راز و محرم ہے اب

اکتوبر 6, 2015میر تقی میر،اساتذہ،غزلماتم،محرم،کم،دم،درہم،عالم،غمadmin

دیوان پنجم غزل 1581

دل کے گئے بیکس کہلائے ایسا کہاں ہمدم ہے اب

کون ایسے محروم غمیں کا ہم راز و محرم ہے اب

سینہ زنی سے غم زدگی ہے سر دھننا ہے رونا ہے

دل جو ہمارا خون ہوا ہے اس سے بلا ماتم ہے اب

سن کر حال کسو کے دل کا رونا ہی مجھ کو آتا تھا

یعنی کبھو جو کڑھتا تھا میں وہ رونا ہر دم ہے اب

زردی چہرہ تن کی نزاری بیماری پھر چاہت ہے

دل میں غم ہے مژگاں نم ہیں حال بہت درہم ہے اب

دیکھیں دن کٹتے ہیں کیونکر راتیں کیونکے گذرتی ہیں

بیتابی ہے زیادہ زیادہ صبر بہت کم کم ہے اب

عشق ہمارا آہ نہ پوچھو کیا کیا رنگ بدلتا ہے

خون ہوا دل داغ ہوا پھر درد ہوا پھر غم ہے اب

ملنے والو پھر ملیے گا ہے وہ عالم دیگر میں

میر فقیر کو سکر ہے یعنی مستی کا عالم ہے اب

میر تقی میر

اب کم بہت ہے ہم پہ عنایات کیا سبب

اکتوبر 6, 2015میر تقی میر،اساتذہ،غزلمساوات،بات،خرابات،رات،عنایاتadmin

دیوان پنجم غزل 1580

باہم ہوئی ہے ترک ملاقات کیا سبب

اب کم بہت ہے ہم پہ عنایات کیا سبب

ہم تو تمھارے حسن کی حیرت سے ہیں خموش

تم ہم سے کوئی کرتے نہیں بات کیا سبب

ہم تیرہ روز آپ سے تم بن سحر گئے

آئے نہ تم ہمارے کنے رات کیا سبب

اس کی نگاہ مست تو اودھر نہیں پڑی

مسجد جو ہو گئی ہے خرابات کیا سبب

تھا مرتبہ ہمیشہ سگ یار کا بلند

ہے میر سے سلوک مساوات کیا سبب

میر تقی میر

سیدھی نظر جو اس کی نہیں ہے یاس ہے اپنی نظر میں اب

اکتوبر 6, 2015میر تقی میر،اساتذہ،غزلنظر،کمر،گھر،تر،سفرadmin

دیوان پنجم غزل 1579

کاوش سے ان پلکوں کی رہتی ہے خلش سی جگر میں اب

سیدھی نظر جو اس کی نہیں ہے یاس ہے اپنی نظر میں اب

موسم گل کا شاید آیا داغ جنوں کے سیاہ ہوئے

دل کھنچتا ہے جانب صحرا جی نہیں لگتا گھر میں اب

نقش نہیں پانی میں ابھرتا یہ تو کوئی اچنبھا ہے

صورت خوب اس کی ہے پھرتی اکثر چشم تر میں اب

ایک جگہ پر جیسے بھنور ہیں لیکن چکر رہتا ہے

یعنی وطن دریا ہے اس میں چار طرف ہیں سفر میں اب

حسرت نے ملنے کی آیا میر تمھارا خون پیا

تیغ و تبر اس ترک بچے ظالم کی نہیں ہے کمر میں اب

میر تقی میر

زرد و زار و زبوں جو ہم ہیں چاہت کے بیمار ہیں سب

اکتوبر 6, 2015میر تقی میر،اساتذہ،غزلناچار،یار،بیمار،تیار،دارadmin

دیوان پنجم غزل 1578

سادے جتنے نظر آتے ہیں دیکھو تو عیار ہیں سب

زرد و زار و زبوں جو ہم ہیں چاہت کے بیمار ہیں سب

سیل سے ہلکے عاشق ہوں تو جوش و خروش بھریں آویں

تہ پائی نہیں جاتی ان کی دریا سے تہ دار ہیں سب

ایک پریشاں طرفہ جماعت دیکھی چاہنے والوں کی

جینے کے خواہان نہیں ہیں مرنے کو تیار ہیں سب

کیا کیا خواہش بے کس بے بس مشتاق اس سے رکھتے ہیں

لیکن دیکھ کے رہ جاتے ہیں چپکے سے ناچار ہیں سب

عشق جنھوں کا پیشہ ہووے سینکڑوں ہوں تو ایک ہی ہیں

کوہکن و مجنوں و وامق میر ہمارے یار ہیں سب

میر تقی میر

یعنی سفر ہے دور کا آگے اور اپنی رخصت ہے اب

اکتوبر 6, 2015میر تقی میر،اساتذہ،غزلفرصت،منت،دولت،رخصت،صحبتadmin

دیوان پنجم غزل 1577

تاب عشق نہیں ہے دل کو جی بھی بے طاقت ہے اب

یعنی سفر ہے دور کا آگے اور اپنی رخصت ہے اب

وصل میں کیا کیا صحبتیں رنگیں کس کس عیش میں دن گذرے

تنہا بیٹھ رہے ہیں یک سو ہجر میں یہ صحبت ہے اب

جب سے بناے صبح ہستی دو دم پر یاں ٹھہرائی

کیا کیا کریے اس مہلت میں کچھ بھی ہمیں فرصت ہے اب

چور اچکے سکّھ مرہٹے شاہ و گدا زرخواہاں ہیں

چین سے ہیں جو کچھ نہیں رکھتے فقر بھی اک دولت ہے اب

پائوں پہ سر رکھنے کی مجھ کو رخصت دی تھی میر ان نے

کیا پوچھو ہو سر پر میرے منت سی منت ہے اب

میر تقی میر

زنجیر ہے مناسب شمشیر ہے مناسب

اکتوبر 6, 2015میر تقی میر،اساتذہ،غزلمیر،تکفیر،تاخیر،تحریر،تشہیر،تعمیر،تعبیر،درگیر،شمشیرadmin

دیوان پنجم غزل 1576

عشق و جنوں کی کیا اب تدبیر ہے مناسب

زنجیر ہے مناسب شمشیر ہے مناسب

دوری شعلہ خویاں آخر جلا رکھے گی

صحبت جو ایسی ہووے درگیر ہے مناسب

جلدی نہ قتل میں کر پچھتاوے گا بہت تو

خوں ریزی میں ہماری تاخیر ہے مناسب

رسواے شہر ہونا عزت ہے عاشقی میں

احوال کی ہمارے تشہیر ہے مناسب

دل کی خرابی کے تو درپے ہے اے صنم کیوں

اس خانۂ خدا کی تعمیر ہے مناسب

شب اس کو میں نے دیکھا سوتے بغل میں اپنی

اس خواب کی نہ کرنی تعبیر ہے مناسب

رحم آشنا کسو کو اس بستی میں نہ پایا

اسلامیوں کی یاں کے تکفیر ہے مناسب

ہے سرگذشت اپنی ننوشتنی ہی بہتر

گذری سو گذری کیا اب تحریر ہے مناسب

دنیا میں کوئی پھر پھر آیا نہیں ہے صاحب

اک بار تم کو مرنا اے میر ہے مناسب

میر تقی میر

خوں بستہ رہتیاں تھیں پلکیں سو اب ہیں تر سب

اکتوبر 6, 2015میر تقی میر،اساتذہ،غزلنفر،نگر،گھر،تر،خبرadmin

دیوان پنجم غزل 1575

دل خوں ہوا تھا یکسر پانی ہوا جگر سب

خوں بستہ رہتیاں تھیں پلکیں سو اب ہیں تر سب

یارب کدھر گئے وے جو آدمی روش تھے

اوجڑ دکھائی دے ہیں شہر و دہ و نگر سب

حرف وسخن سے مطلق یاں گفتگو نہیں ہے

پیادے سوار ہم کو آئے نظر نفر سب

عالم کے لوگوں کا ہے تصویر کا سا عالم

ظاہر کھلی ہیں آنکھیں لیکن ہیں بے خبر سب

میر اس خرابے میں کیا آباد ہووے کوئی

دیوار و در گرے ہیں ویراں پڑے ہیں گھر سب

میر تقی میر

ناز و نیاز کا جھگڑا ایسا کس کے کنے لے جاوے اب

اکتوبر 6, 2015میر تقی میر،اساتذہ،غزللاوے،کھاوے،آوے،اٹھاوے،جاوے،دکھاوےadmin

دیوان پنجم غزل 1574

کب سے صحبت بگڑ رہی ہے کیونکر کوئی بناوے اب

ناز و نیاز کا جھگڑا ایسا کس کے کنے لے جاوے اب

سوچتّے آتے ہیں جی میں پگڑی پر گل رکھے سے

کس کو دماغ رہا ہے اس کے جو حرف خشن اٹھاوے اب

تیغ بلند ہوئی ہے اس کی قسمت ہوں گے زخم رسا

مرد اگر ہے صیدحرم تو کوئی جراحت کھاوے اب

داغ سر و سینے کے میرے حسرت آگیں چشم ہوئے

دیکھیں کیا کیا عشق ستم کش ہم لوگوں کو دکھاوے اب

دم دو دم گھبراہٹ ہوتو ہوسکتا ہے تدارک بھی

جی کی چال سے پیدا ہے سو کوئی گھڑی میں جاوے اب

دل کے داغ بھی گل ہیں لیکن دل کی تسلی ہوتی نہیں

کاشکے دو گلبرگ ادھر سے بائو اڑا کر لاوے اب

اس کے کفک کی پامالی میں دل جو گیا تھا شاید میر

یار ادھر ہو مائل ٹک تو وہ رفتہ ہاتھ آوے اب

میر تقی میر

پاس ہمارا گو نہ کرو تم پاس ہی اب سے رہیے گا

اکتوبر 6, 2015میر تقی میر،اساتذہ،غزلگاadmin

دیوان پنجم غزل 1573

یہ تو جدائی جوں توں کٹی ہے ملیے گا تو کہیے گا

پاس ہمارا گو نہ کرو تم پاس ہی اب سے رہیے گا

میر تقی میر

کیوں رنگ پھرا سا ہے ترے سیب ذقن کا

اکتوبر 6, 2015میر تقی میر،اساتذہ،غزلوطن،کفن،ذقن،سخنadmin

دیوان پنجم غزل 1572

گلچیں نہیں جو کوئی بھی اس تازہ چمن کا

کیوں رنگ پھرا سا ہے ترے سیب ذقن کا

غربت ہے دل آویز بہت شہر کی اس کے

آیا نہ کبھو ہم کو خیال اپنے وطن کا

جب زمزمہ کرتی ہے صدا چبھتی ہے دل میں

بلبل سے کوئی سیکھ لے انداز سخن کا

کب مشت نمک سے ہوئی تسکین جراحت

لب چش ہے نمک سار مرے زخم کہن کا

جو چاک گریبان کہ دامن کی ہو زہ تک

قربان کیا میر اسے چاک کفن کا

میر تقی میر

آٹھ پہر رہتا ہے رونا اس کی دوری کے غم کا

اکتوبر 6, 2015میر تقی میر،اساتذہ،غزلماتم،محرم،اودھم،دم،رستم،عالم،غمadmin

دیوان پنجم غزل 1571

کچھ اندیشہ ہم کو نہیں ہے اپنے حال درہم کا

آٹھ پہر رہتا ہے رونا اس کی دوری کے غم کا

روتے کڑھتے خاک میں ملتے جیتے رہے ہم دنیا میں

دس دن اپنی عمر کے گویا عشرہ تھا یہ محرم کا

کشتی ہماری عشق میں کیا تھی ہاتھ ملاتے پاک ہوئی

پاے ثبات نہ ٹھہرا دم بھر اس میدان میں رستم کا

عالم نیستی کیا عالم تھا غم دنیا و دیں کا نہ تھا

ہوش آیا ہے جب سے سر میں شوق رہا اس عالم کا

یاں واجب ہے ہم کو تم کو دم لیویں تو شمردہ لیں

دینا ہو گا حساب کسو کو یک دم ہی میں دم دم کا

چھاتی کوٹی منھ نوچا سر دے دے مارا پتھر پر

دل کے خوں ہونے میں ہمارا یہی طریق ہے ماتم کا

لڑکے شوخ بہت ہیں لیکن ویسا میر نہیں کوئی

دھوم قیامت کی سی ہے ہنگامہ اس کے اودھم کا

میر تقی میر

تھا وہ برندہ زخموں پہ میں زخم کھا گیا

اکتوبر 6, 2015میر تقی میر،اساتذہ،غزللگا،چلا،کھا،بہا،بھلا،جدا،دکھاadmin

دیوان پنجم غزل 1570

آیا سو آب تیغ ہی مجھ کو چٹا گیا

تھا وہ برندہ زخموں پہ میں زخم کھا گیا

کیا شہر خوش عمارت دل سے ہے گفتگو

لشکر نے غم کے آن کے مارا چلا گیا

موقوف یار غیر جلانا مرا نہیں

جو کوئی اس کے کان لگا کچھ لگا گیا

تنہائی بیکسی مری یک دست تھی کہ میں

جیسے جرس کا نالہ جرس سے جدا گیا

کیا تم سے اپنے دل کی پریشانی میں کہوں

دریاے گریہ جوش زناں تھا بہا گیا

روزانہ اب تو اپنے تئیں سوجھتا نہیں

آخر کو رونا راتوں کا ہی دن دکھا گیا

سررفتگی بدی مری ننوشتنی ہے میر

قاصد جو لے کے نامہ گیا سو بھلا گیا

میر تقی میر

کیسے رکتے تھے خفگی سے آخرکار جنون ہوا

اکتوبر 6, 2015میر تقی میر،اساتذہ،غزلجنون،زبون،شگونadmin

دیوان پنجم غزل 1569

کیا کیا عشق میں رنج اٹھائے دل اپنا سب خون ہوا

کیسے رکتے تھے خفگی سے آخرکار جنون ہوا

تڑپا ہے پہلو میں اب جب طاقت جی میں کچھ نہ رہی

جسم غم فرسودہ ہمارا زرد و زار و زبون ہوا

جنگل میں میں رونے چلا تھا دل جو بھرا تھا میر بہت

آیا سیل آگے سے چلا کیا بخت سے مجھ کو شگون ہوا

میر تقی میر

کاشکے آہوچشم اپنا آنکھوں کو پائوں سے مل جاتا

اکتوبر 6, 2015میر تقی میر،اساتذہ،غزلمل،چھل،ٹل،بدل،جل،دہل،سنبھلadmin

دیوان پنجم غزل 1568

ایک نہ خواہش بر آئی تا جی کا غبار نکل جاتا

کاشکے آہوچشم اپنا آنکھوں کو پائوں سے مل جاتا

آتش دل کی لپٹوں کا ہے یارو کچھ عالم ہی جدا

لائحہ کوئی کھینچتا سر تو سارا عالم جل جاتا

نعرہ کرنا عاشق کا ہے ساتھ اک ہیبت کے یعنی

سن آواز اس شیرنر کی سیل بلا سے دہل جاتا

اہل زمیں تو کیا ہیں ان کا سہل تھا راہ سے لے جانا

چرخ پہ ہوتا وہ جو چھلاوا خیل ملک کو چھل جاتا

کشتی زبردستوں کی اس سے پاک ہوئی تو کیا ہے عجب

رستم سامنے ہوجاتا تو راہ بچا کر ٹل جاتا

غم سے ہو گر زرد سراسر صورت ساری خزاں کی سی

آن نکلتے سوے چمن تو رنگ ہوا کا بدل جاتا

ڈھلتے ڈھلتے ضعف سے آئے میر سو ان نے منھ پھیرا

یاقوتی سے بوسۂ لب کی جی شاید کہ سنبھل جاتا

میر تقی میر

لوہو لگا کے وہ بھی شہیدوں میں مل گیا

اکتوبر 6, 2015میر تقی میر،اساتذہ،غزلہل،مل،نگل،کھل،پل،خجل،دلadmin

دیوان پنجم غزل 1567

ناخن سے بوالہوس کا گلا یوں ہی چھل گیا

لوہو لگا کے وہ بھی شہیدوں میں مل گیا

دل جمع تھا جو غنچہ کے رنگوں خزاں میں تھا

اے کیا کہوں بہار گل زخم کھل گیا

بے دل ہوئے پہ کرتے تدارک جو رہتا ہوش

ہم آپ ہی میں آئے نہیں جب سے دل گیا

دیکھا نہیں پہاڑ گراں سنگ یا سبک

زوروں چڑھا تھا عشق میں فرہاد پل گیا

شبنم کی سی نمود سے تھا میں عرق عرق

یعنی کہ ہستی ننگ عدم تھی خجل گیا

غم کھینچتے ہلا نہیں جاگہ سے کیا کروں

دل جا لگے ہے دم بہ دم اودھر ہی ہل گیا

صورت نہ دیکھی ویسی کشادہ جبیں کہیں

میں میر اس تلاش میں چین و چگل گیا

میر تقی میر

جیدھر ہو وہ مہ نکلا اس راہ نہ ہم کو جانا تھا

اکتوبر 6, 2015میر تقی میر،اساتذہ،غزلپروانہ،آنا،بیگانہ،جانا،دیوانہadmin

دیوان پنجم غزل 1566

عشق کیے پچھتائے ہم تو دل نہ کسو سے لگانا تھا

جیدھر ہو وہ مہ نکلا اس راہ نہ ہم کو جانا تھا

غیریت کی اس کی شکایت یار عبث اب کرتے ہیں

طور اس شوخ ستم پیشہ کا طفلی سے بیگانہ تھا

بزم عیش کی شب کا یاں دن ہوتے ہی یہ رنگ ہوا

شمع کی جاگہ دود تنک تھا خاکستر پروانہ تھا

دخل مروت عشق میں تھا تو دروازے سے تھوڑی دور

ہمرہ نعش عاشق کے اس ظالم کو بھی آنا تھا

طرفہ خیال کیا کرتا تھا عشق و جنوں میں روز و شب

روتے روتے ہنسنے لگا یہ میر عجب دیوانہ تھا

میر تقی میر

سینہ کوبی سخت ماتم کب سے تھا

اکتوبر 6, 2015میر تقی میر،اساتذہ،غزلڈھب،کب،تب،جب،سبadmin

دیوان پنجم غزل 1565

دل کے خوں ہونے کا غم کیا اب سے تھا

سینہ کوبی سخت ماتم کب سے تھا

اس کی مقتولی کا ہم کو رشک ہے

دو قدم جو کشتہ آگے سب سے تھا

کون مل سکتا ہے اس اوباش سے

اختلاط اس سے ہمیں اک ڈھب سے تھا

گرم ملنے والے دیکھے یار کے

ایک ٹھنڈا ہو گیا اک تب سے تھا

چپ سی مجھ کو لگ گئی تھی تب سے میر

شور ان شیریں لبوں کا جب سے تھا

میر تقی میر

اس عشق کی وادی میں ہر نوع بسر کرنا

اکتوبر 6, 2015میر تقی میر،اساتذہ،غزلاثر،بسر،خبرadmin

دیوان پنجم غزل 1564

سر مارنا پتھر سے یا ٹکڑے جگر کرنا

اس عشق کی وادی میں ہر نوع بسر کرنا

کہتے ہیں ادھر منھ کر وہ رات کو سوتا ہے

اے آہ سحرگاہی ٹک تو بھی اثر کرنا

دیواروں سے سر مارا تب رات سحر کی ہے

اے صاحب سنگیں دل اب میری خبر کرنا

میر تقی میر

کہ مٹی کوڑے کا اب ہے بچھونا

اکتوبر 6, 2015میر تقی میر،اساتذہ،غزلکھونا،بچھونا،سلوناadmin

دیوان پنجم غزل 1563

جدا اس سیم تن سے کیسا سونا

کہ مٹی کوڑے کا اب ہے بچھونا

بہت کی جستجو اس کی نہ پایا

ہمیں درپیش ہے اب جی کا کھونا

جگر کے زخم شاید ہیں نمک بند

مزہ کچھ آنسوئوں کا ہے سلونا

میر تقی میر

آج تو کشتہ کوئی کیا زینت فتراک تھا

اکتوبر 6, 2015میر تقی میر،اساتذہ،غزلفتراک،چاک،پوشاک،ادراک،بیباک،تریاک،خاک،خاشاک،سفاک،غمناکadmin

دیوان پنجم غزل 1562

کل تلک داغوں سے خوں کے دامن زیں پاک تھا

آج تو کشتہ کوئی کیا زینت فتراک تھا

کیا جنوں کو روئوں تردستی سے اس کی گل نمط

لے گریباں سے زہ دامن تک اک ہی چاک تھا

رو جو آئی رونے کی مژگاں نہ ٹھہری ایک پل

راہ میں اس رود کی گویا خس و خاشاک تھا

اک ہی شمع شعلہ خو کے لائحے میں جل بجھا

جب تلک پہنچے کوئی پروانہ عاشق خاک تھا

بادشاہ وقت تھا میں تخت تھا میرا دماغ

جی کے چاروں اور اک جوش گل تریاک تھا

ڈھال تلوار اس جواں کے ساتھ اب رہتی نہیں

وہ جفا آئیں شلائیں لڑکا ہی بیباک تھا

تنگ پوشی تنگ درزی اس کی جی میں کھب گئی

کیا ہی وہ محبوب خوش ترکیب خوش پوشاک تھا

بات ہے جی مارنا بازیچہ قتل عام ہے

اب تو ہے صدچند اگر دہ چند وہ سفاک تھا

غنچۂ دل وا ہوا نہ باغوں باغوں میں پھرا

اب بھی ہے ویسا ہی جیسا پیشتر غمناک تھا

درک کیا اس درس گہ میں میر عقل و فہم کو

کس کے تیں ان صورتوں میں معنی کا ادراک تھا

میر تقی میر

عاشقی کی تو کچھ ستم نہ ہوا

اکتوبر 6, 2015میر تقی میر،اساتذہ،غزلقلم،خم،دم،ستم،غمadmin

دیوان پنجم غزل 1561

چاہ میں جور ہم پہ کم نہ ہوا

عاشقی کی تو کچھ ستم نہ ہوا

فائدہ کیا نماز مسجد کا

قد ہی محراب سا جو خم نہ ہوا

یار ہمراہ نعش جس دم تھا

وائے مردے میں میرے دم نہ ہوا

نہ گیا اس طرف کا خط لکھنا

ہاتھ جب تک مرا قلم نہ ہوا

بے دلی میں ہے میر خوش اس سے

دل کے جانے کا حیف غم نہ ہوا

میر تقی میر

پاک ہوئی کشتی عالم کی آگے کن نے دم مارا

اکتوبر 6, 2015میر تقی میر،اساتذہ،غزلقلم،قدم،برہم،دم،رستم،ستم،صیدحرمadmin

دیوان پنجم غزل 1560

عشق بلا پرشور و شر نے جب میدان میں خم مارا

پاک ہوئی کشتی عالم کی آگے کن نے دم مارا

بود نبود کی اپنی حقیقت لکھنے کے شائستہ نہ تھی

باطل صفحۂ ہستی پر میں خط کھینچا قلم مارا

غیر کے میرے مرجانے میں تفاوت ارض و سما کا ہے

مارا ان نے دونوں کو لیکن مجھ کو کرکے ستم مارا

ان بالوں سے طلسم جہاں کا در بستہ تھا گویا سب

زلفوں کو درہم ان نے کیا سو عالم کو برہم مارا

دور اس قبلہ رو سے مجھ کو جلد رقیب نے مار رکھا

قہر کیا اس کتے نے کیا دوڑ کے صیدحرم مارا

کاٹ کے سر عاجز کا ان نے اور بھی پگڑی پھیر رکھی

فخر کی کون سی جاگہ تھی یاں ایسا کیا رستم مارا

جس مضمار میں رستم کی بھی راہ نہ نکلی میر کبھو

اس میداں کی خاک پہ ہم نے جرأت کرکے قدم مارا

میر تقی میر

مرنا عاشق کا بہانہ ہو گیا

اکتوبر 6, 2015میر تقی میر،اساتذہ،غزللگانا،ٹھکانا،آنا،بہانہ،دوانہ،دکھانا،سیاناadmin

دیوان پنجم غزل 1559

بات کہتے جی کا جانا ہو گیا

مرنا عاشق کا بہانہ ہو گیا

جاے بودن تو نہ تھی دنیاے دوں

اتفاقاً اپنا آنا ہو گیا

ماہ اس کو کہہ کے سارے شہر میں

مجھ کو مشکل منھ دکھانا ہو گیا

کر رکھا تعویذ طفلی میں جسے

اب سو وہ لڑکا سیانا ہو گیا

اس بلا سے آہ میں غافل رہا

یک بہ یک دل کا لگانا ہو گیا

کنج لب سے یار کے اچٹا نہ ٹک

الغرض دل کا ٹھکانا ہو گیا

رفتہ رفتہ اس پری کے عشق میں

میر سا دانا دوانہ ہو گیا

میر تقی میر

آسماں پر گیا ہے ماہ تو کیا

اکتوبر 6, 2015میر تقی میر،اساتذہ،غزلماہ،نگاہ،گاہ،الٰہ،اشتباہ،بادشاہ،روبراہ،سیاہ،عذرخواہadmin

دیوان پنجم غزل 1558

اس کی سی جو چلے ہے راہ تو کیا

آسماں پر گیا ہے ماہ تو کیا

لڑ کے ملنا ہے آپ سے بے لطف

یار ہووے نہ عذرخواہ تو کیا

کب رخ بدر روشن ایسا ہے

ایک شب کا ہے اشتباہ تو کیا

بے خرد خانقہ میں ہیں گو مست

وہ کرے مست یک نگاہ تو کیا

اس کے پرپیچ گیسو کے آگے

ہووے کالا کوئی سیاہ تو کیا

حسن والے ہیں کج روش سارے

ہوئے دو چار روبراہ تو کیا

دل رہے وصل جو مدام رہے

مل گئے اس سے گاہ گاہ تو کیا

ایک اللہ کا بہت ہے نام

جمع باطل ہوں سو الٰہ تو کیا

میر کیا ہے فقیر مستغنی

آوے اس پاس بادشاہ تو کیا

میر تقی میر

ہرگز نہ ایدھر آئیں گے خلق خدا ملک خدا

اکتوبر 6, 2015میر تقی میر،اساتذہ،غزلفرمائیں،لائیں،کھائیں،ٹھہرائیں،پہنچائیں،پائیں،آئیںadmin

دیوان پنجم غزل 1557

اب یاں سے ہم اٹھ جائیں گے خلق خدا ملک خدا

ہرگز نہ ایدھر آئیں گے خلق خدا ملک خدا

مطلب اگر یاں گم ہوا اندیشے کی جاگہ نہیں

جاکر کہیں کچھ پائیں گے خلق خدا ملک خدا

دل میں نہ جانے یہ کوئی ہم کھانے کو دیں ہیں انھیں

جو ہے مقدر کھائیں گے خلق خدا ملک خدا

گو لکھنؤ ویراں ہوا ہم اور آبادی میں جا

مقسوم اپنا لائیں گے خلق خدا ملک خدا

اب دی پری گذری گئی ہم آجکل بے خانماں

کیا غیر ازیں ٹھہرائیں گے خلق خدا ملک خدا

اس بستی سے اٹھ جائیں گے درویشوں کی کیا مشورت

وے بھی یہی فرمائیں گے خلق خدا ملک خدا

تو میر ہووے گا جہاں امرقضا کے تابعاں

روزی تجھے پہنچائیں گے خلق خدا ملک خدا

میر تقی میر

شکر خدا کا کریے کہاں تک عہد فراق بسر آیا

اکتوبر 6, 2015میر تقی میر،اساتذہ،غزلہنر،نظر،کدھر،بھر،بر،بسر،ترadmin

دیوان پنجم غزل 1556

جاذبہ میرا تھا کامل سو بندے کے وہ گھر آیا

شکر خدا کا کریے کہاں تک عہد فراق بسر آیا

بجلی سا وہ چمک گیا آنکھوں سے پھوئیں پڑنے لگیں

ابر نمط خفگی سے اس بن جی بھی رندھا دل بھر آیا

گل تھے سو سو رنگ پر ایسا شورطیور بلند نہ تھا

اس کے رنگ چمن میں کوئی شاید پھول نظر آیا

سیل بلا جوشاں تھا لیکن پانی پانی شرم سے تھا

ساحل دریا خشک لبی دیکھے سے میری تر آیا

کیا ہی خوش پرکار ہے دلبر نوچہ کشتی گیر اپنا

کوئی زبردست اس سے لڑ کر عہدے سے کب بر آیا

صنعت گریاں بہتیری کیں لیک دریغ ہزار دریغ

جس سے یار بھی ملتا ہم سے ایسا وہ نہ ہنر آیا

میر پریشاں خاطر آکر رات رہا بت خانے میں

راہ رہی کعبے کی اودھر یہ سودائی کدھر آیا

میر تقی میر

مجنوں مجنوں لوگ کہے ہیں مجنوں کیا ہم سا ہو گا

اکتوبر 6, 2015میر تقی میر،اساتذہ،غزلاچھا،آتا،بیجا،برپا،دریا،رسوا،ساadmin

دیوان پنجم غزل 1555

دل تڑپے ہے جان کھپے ہے حال جگر کا کیا ہو گا

مجنوں مجنوں لوگ کہے ہیں مجنوں کیا ہم سا ہو گا

دیدئہ تر کو سمجھ کر اپنا ہم نے کیا کیا حفاظت کی

آہ نہ جانا روتے روتے یہ چشمہ دریا ہو گا

کیا جانیں آشفتہ دلاں کچھ ان سے ہم کو بحث نہیں

وہ جانے گا حال ہمارا جس کا دل بیجا ہو گا

پائوں حنائی اس کے لے آنکھوں پر اپنی ہم نے رکھے

یہ دیکھا نہ رنگ کفک پر ہنگامہ کیا برپا ہو گا

جاگہ سے بے تہ جاتے ہیں دعوے وے ہی کرتے ہیں

ان کو غرور و ناز نہ ہو گا جن کو کچھ آتا ہو گا

روبہ بہی اب لاہی چکے ہیں ہم سے قطع امید کرو

روگ لگا ہے عشق کا جس کو وہ اب کیا اچھا ہو گا

دل کی لاگ کہیں جو ہو تو میر چھپائے اس کو رکھ

یعنی عشق ہوا ظاہر تو لوگوں میں رسوا ہو گا

میر تقی میر

تازہ کیا پیمان صنم سے دین گیا ایمان گیا

اکتوبر 6, 2015میر تقی میر،اساتذہ،غزلچھان،گیان،پہچان،ایمان،ایران،احسان،دھیانadmin

دیوان پنجم غزل 1554

عشق صمد میں جان چلی وہ چاہت کا ارمان گیا

تازہ کیا پیمان صنم سے دین گیا ایمان گیا

میں جو گدایانہ چلایا در پر اس کے نصف شب

گوش زد آگے تھے نالے سو شور مرا پہچان گیا

آگے عالم عین تھا اس کا اب عین عالم ہے وہ

اس وحدت سے یہ کثرت ہے یاں میرا سب گیان گیا

مطلب کا سررشتہ گم ہے کوشش کی کوتاہی نہیں

جو طالب اس راہ سے آیا خاک بھی یاں کی چھان گیا

خاک سے آدم کر دکھلایا یہ منت کیا تھوڑی ہے

اب سر خاک بھی ہوجاوے تو سر سے کیا احسان گیا

ترک بچے سے عشق کیا تھا ریختے کیا کیا میں نے کہے

رفتہ رفتہ ہندستاں سے شعر مرا ایران گیا

کیونکے جہت ہو دل کو اس سے میر مقام حیرت ہے

چاروں اور نہیں ہے کوئی یاں واں یوں ہی دھیان گیا

میر تقی میر

دیکھ آنکھیں وہ سرمہ گیں میں پھردنبالہ گرد ہوا

اکتوبر 6, 2015میر تقی میر،اساتذہ،غزلگرد،درد،زرد،سردadmin

دیوان پنجم غزل 1553

پھرتے پھرتے اس کے لیے میں آخر دشت نورد ہوا

دیکھ آنکھیں وہ سرمہ گیں میں پھردنبالہ گرد ہوا

جیتے جی میت کے رنگوں لوگ مجھے اب پاتے ہیں

جوش بہار عشق میں یعنی سرتا پا میں زرد ہوا

گرم مزاج رہا نہیں اپنا ویسے اس کے ہجراں میں

ہوتے ہوتے افسردہ دیکھوگے اک دن سرد ہوا

میر نہ اپنے درد دل کو مجھ سے کہا کر روز وشب

صبح جو گوش دل سے سنا تھا دل میں میرے درد ہوا

میر تقی میر

سہل آگے اس کے مردن دشوار ہو گیا

اکتوبر 6, 2015میر تقی میر،اساتذہ،غزلہشیار،گرفتار،بیمار،بیزار،خریدار،دشوار،سزاوارadmin

دیوان پنجم غزل 1552

ناگاہ جس کو عشق کا آزار ہو گیا

سہل آگے اس کے مردن دشوار ہو گیا

ہے حسن کیا متاع کہ جس کو نظر پڑی

وہ جان بیچ کر بھی خریدار ہو گیا

برسوں تئیں جہان میں کیوں کر رہا ہے خضر

میں چار دن میں جینے سے بیزار ہو گیا

ہم بستری بن اس کی میں صاحب فراش ہوں

ہجراں میں کڑھتے کڑھتے ہی بیمار ہو گیا

ہم دام تھے سو چھٹ گئے سب دام کے اٹھے

تھی دل کو میرے چوٹ گرفتار ہو گیا

اس کی نگاہ مست کا کھایا ہی تھا فریب

پر شیخ طرز دیکھ کے ہشیار ہو گیا

کیا متقی تھا میر پر آئین عشق میں

مجرم سا کشت و خوں کا سزاوار ہو گیا

میر تقی میر

درد آگیں انداز کی باتیں اکثر پڑھ پڑھ رووے گا

اکتوبر 6, 2015میر تقی میر،اساتذہ،غزلکھووے،رووے،سووےadmin

دیوان پنجم غزل 1551

بعد ہمارے اس فن کا جو کوئی ماہر ہووے گا

درد آگیں انداز کی باتیں اکثر پڑھ پڑھ رووے گا

چشم تماشا وا ہووے تو دیکھا بھالی غنیمت ہے

مت موندے آنکھوں کو غافل دیر تلک پھر سووے گا

جست و جو بھی اس کی کریے جس کا نشاں کچھ پیدا ہو

پانا اس کا میر ہے مشکل جی تو یوں ہی کھووے گا

میر تقی میر

کیا کیا چرخ نے چکر مارے پیس کے مجھ کو خاک کیا

اکتوبر 6, 2015میر تقی میر،اساتذہ،غزلچاک،پاک،خاک،خاشاک،غمناکadmin

دیوان پنجم غزل 1550

کیسی سعی حوادث نے کی آخرکار ہلاک کیا

کیا کیا چرخ نے چکر مارے پیس کے مجھ کو خاک کیا

ایسا پلید آلودئہ دنیا خلق نہ آگے ہوا ہو گا

شیخ شہر موا کہتے ہیں شہر خدا نے پاک کیا

قدرت حق میں کیا قدرت جو دخل کسو کی فضولی کرے

اس کو کیا پرکالۂ آتش مجھ کو خس و خاشاک کیا

آہ سے تھے رخنے چھاتی میں پھیلنا ان کا یہ سہل نہ تھا

دو دو ہاتھ تڑپ کر دل نے سینۂ عاشق چاک کیا

خوگر ہونا حزن و بکا سے میر ہمارا یوں ہی نہیں

برسوں روتے کڑھتے رہے ہم تب دل کو غمناک کیا

میر تقی میر

تا بت خانہ ہر قدم اوپر سجدہ کرتا جائوں گا

اکتوبر 6, 2015میر تقی میر،اساتذہ،غزللائوں،نہائوں،کہائوں،بندھائوں،بھلائوں،جائوںadmin

دیوان پنجم غزل 1549

شیخ حرم سے لڑکے چلا ہوں اب کعبے میں نہ آئوں گا

تا بت خانہ ہر قدم اوپر سجدہ کرتا جائوں گا

بہر پرستش پیش صنم ہاتھوں سے قسیس رہباں کے

رشتہ سبحہ تڑائوں گا زنار گلے سے بندھائوں گا

رود دیر کے پانی سے یا آب چاہ سے اس جا کے

واسطے طاعت کفر کے میں دونوں وقت نہائوں گا

طائف رستہ کعبے کا جو کوئی مجھ سے پوچھے گا

جانب دیر اشارت کر میں راہ ادھر کی بھلائوں گا

بے دیں اب جو ہوا سو ہوا ہوں طوف حرم سے کیا مجھ کو

غیر از سوے صنم خانہ میں رو نہ ادھر کو لائوں گا

آگے مسافر میر عرب میں اور عجم میں کہتے ہیں

اب شہروں میں ہندستاں کے کافر میر کہائوں گا

میر تقی میر

یا کہ نوشتہ ان ہاتھوں کا قاصد ہم تک لاوے گا

اکتوبر 6, 2015میر تقی میر،اساتذہ،غزللگاوے،لاوے،پچھتاوے،پاوے،بناوے،بتلاوے،جگاوے،دکھاوے،سجھاوےadmin

دیوان پنجم غزل 1548

آج ہمارا دل تڑپے ہے کوئی ادھر سے آوے گا

یا کہ نوشتہ ان ہاتھوں کا قاصد ہم تک لاوے گا

ہم نہیں لکھتے اس لیے اس کو شوخ بہت ہے وہ لڑکا

خط کا کاغذ بادی کرے گا بائو کا رخ بتلاوے گا

رنج بہت کھینچے تھے ہم نے طاقت جی کی تمام ہوئی

اپنے کیے پر یاد رہے یہ وہ بھی بہت پچھتاوے گا

اندھے سے ہم چاہ میں اس کی گو اے ناصح پھرتے ہیں

سوجھتا بھی کچھ کر آئیں گے کیا تو ہم کو سجھاوے گا

عاشق ہووے وہ بھی یارب تا کچھ اس سے کہا جاوے

یعنی حال سنے گا دل سے دل جو کسی سے لگاوے گا

عاشق کی دلجوئی کی بھی راہ و رسم سے واقف رہ

ہو جو ایسا گم شدہ اپنا اس کو نہ تو پھر پاوے گا

آنکھیں موندے یہ دلبر جو سوتے رہیں تو بہتر ہے

چشمک کرنا ایک انھوں کا سو سو فتنے جگاوے گا

کیا صورت ہے کیا قامت ہے دست و پاکیا نازک ہیں

ایسے پتلے منھ دیکھو جو کوئی کلال بناوے گا

چتون بے ڈھب آنکھیں پھریں ہیں پلکوں سے بھی نظر چھوٹی

عشق ابھی کیا جانیے ہم کو کیا کیا میر دکھاوے گا

میر تقی میر

جز درد اب نہیں ہے پہلونشیں ہمارا

اکتوبر 6, 2015میر تقی میر،اساتذہ،غزلنہیں،واپسیں،کہیں،کیں،پہلونشیں،اندوہگیں،دیں،دُرثمیں،زمیںadmin

دیوان پنجم غزل 1547

پہلو سے اٹھ گیا ہے وہ نازنیں ہمارا

جز درد اب نہیں ہے پہلونشیں ہمارا

ہوں کیوں نہ سبز اپنے حرف غزل کہ ہے یہ

وے زرع سیرحاصل قطعہ زمیں ہمارا

کیسا کیا جگر خوں آزار کیسے کھینچے

آساں نہیں ہوا دل اندوہگیں ہمارا

حرف و سخن تھے اپنے یا داستاں جہاں میں

مذکور بھی نہیں ہے یا اب کہیں ہمارا

کیا رائیگاں بتوں کو دے کر ہوئے ہیں کافر

ارث پدر جو اب تھا یہ کہنہ دیں ہمارا

لخت جگر بھی اپنا یاقوت ناب سا ہے

قطرہ سرشک کا ہے دُرثمیں ہمارا

کیا خاک میں ملایا ہم کو سپہر دوں نے

ڈھونڈا نشان تربت پاتے نہیں ہمارا

حالت ہے نزع کی یاں آئو کہ جاتے ہیں ہم

آنکھوں میں منتظر ہے دم واپسیں ہمارا

اک عمر مہر ورزی جن کے سبب سے کی تھی

پاتے ہیں میر ان کو سرگرم کیں ہمارا

میر تقی میر

تیری گلی میں لائی صبا تو بجا ہوا

اکتوبر 6, 2015میر تقی میر،اساتذہ،غزلوا،کیا،بجاadmin

دیوان پنجم غزل 1546

ہر جا پھرا غبار ہمارا اڑا ہوا

تیری گلی میں لائی صبا تو بجا ہوا

آہ سحر نے دل کی نہ کھولی گرہ کبھی

آخر نسیم سے بھی یہ غنچہ نہ وا ہوا

وے میر اثر جو شورش دل میں تھے ہیں کہاں

نالے کیے جرس نے بہت سے تو کیا ہوا

میر تقی میر

تیغ قاتل کو سر چڑھائوں گا

اکتوبر 6, 2015میر تقی میر،اساتذہ،غزلچڑھائوں،کھائوں،پائوں،جائوں،دکھائوںadmin

دیوان پنجم غزل 1545

طوف مشہد کو کل جو جائوں گا

تیغ قاتل کو سر چڑھائوں گا

وصل میں رنگ اڑ گیا میرا

کیا جدائی کو منھ دکھائوں گا

چھانتا ہوں کسی گلی کی خاک

دل کو اپنے کبھو تو پائوں گا

اس کے در پر گئے ہیں تاب و تواں

گھر تلک اپنے کیوں کے جائوں گا

لوٹتا ہے بہار منھ کی خط

میر میں اس پہ زہر کھائوں گا

میر تقی میر

جی کا جانا ٹھہر رہا ہے صبح گیا یا شام گیا

اکتوبر 6, 2015میر تقی میر،اساتذہ،غزلہنگام،ناکام،پیغام،آرام،اکرام،بدنام،شامadmin

دیوان پنجم غزل 1544

عشق ہمارے خیال پڑا ہے خواب گئی آرام گیا

جی کا جانا ٹھہر رہا ہے صبح گیا یا شام گیا

عشق کیا سو دین گیا ایمان گیا اسلام گیا

دل نے ایسا کام کیا کچھ جس سے میں ناکام گیا

کس کس اپنی کل کو رووے ہجراں میں بے کل اس کا

خواب گئی ہے تاب گئی ہے چین گیا آرام گیا

آیا یاں سے جانا ہی تو جی کا چھپانا کیا حاصل

آج گیا یا کل جاوے گا صبح گیا یا شام گیا

ہائے جوانی کیا کیا کہیے شور سروں میں رکھتے تھے

اب کیا ہے وہ عہد گیا وہ موسم وہ ہنگام گیا

گالی جھڑکی خشم و خشونت یہ تو سردست اکثر ہیں

لطف گیا احسان گیا انعام گیا اکرام گیا

لکھنا کہنا ترک ہوا تھا آپس میں تو مدت سے

اب جو قرار کیا ہے دل سے خط بھی گیا پیغام گیا

نالۂ میر سواد میں ہم تک دوشیں شب سے نہیں آیا

شاید شہر سے اس ظالم کے عاشق وہ بدنام گیا

میر تقی میر

لاگ جی کی جس سے ہو دشمن ہے اپنی جان کا

اکتوبر 6, 2015میر تقی میر،اساتذہ،غزلمیدان،نادان،یرقان،کان،پان،آن،احسان،جان،دیوانadmin

دیوان پنجم غزل 1543

عشق ہو حیوان کا یا انس ہو انسان کا

لاگ جی کی جس سے ہو دشمن ہے اپنی جان کا

عاشق و معشوق کی میں طرفہ صحبت سیر کی

ایک جی مارے ہے مرہون ایک ہے احسان کا

میں خردگم عشق میں اس لڑکے کے آخر ہوا

یہ ثمر لایا نہ دیکھا چاہنا نادان کا

مرنا اس کے عشق میں خالی نہیں ہے حسن سے

رشک کے قابل ہے جو کشتہ ہے اس میدان کا

گر پڑیں گے ٹوٹ کر اکثر ستارے چرخ سے

ہل گیا جو صبح کو گوہر کسی کے کان کا

ہر ورق ہر صفحے میں اک شعرشورانگیز ہے

عرصۂ محشر ہے عرصہ میرے بھی دیوان کا

کیا ملاوے آنکھ نرگس اس کی چشم سرخ سے

زرد اس غم دیدہ کو آزار ہے یرقان کا

بات کرتے جائے ہے منھ تک مخاطب کے جھلک

اس کا لعل لب نہیں محتاج رنگ پان کا

کیا کہوں سارا زمانہ کشتہ و مردہ ہے میر

اس کے اک انداز کا اک ناز کا اک آن کا

میر تقی میر

عشق کیا ناکام رہا آخر کو کام تمام کیا

اکتوبر 6, 2015میر تقی میر،اساتذہ،غزلہنگام،کام،گام،پیغام،اکرام،ارقام،بسرام،تمام،سلامadmin

دیوان پنجم غزل 1542

کیا پوچھو ہو کیا کہیے میاں دل نے بھی کیا کام کیا

عشق کیا ناکام رہا آخر کو کام تمام کیا

عجز کیا سو اس مفسد نے قدر ہماری یہ کچھ کی

تیوری چڑھائی غصہ کیا جب ہم نے جھک کے سلام کیا

کہنے کی بھی لکھنے کی بھی ہم تو قسم کھا بیٹھے تھے

آخر دل کی بیتابی سے خط بھیجا پیغام کیا

عشق کی تہمت جب نہ ہوئی تھی کاہے کو شہرت ایسی تھی

شہر میں اب رسوا ہیں یعنی بدنامی سے کام کیا

ریگستاں میں جاکے رہیں یا سنگستاں میں ہم جوگی

رات ہوئی جس جاگہ ہم کو ہم نے وہیں بسرام کیا

خط و کتابت لکھنا اس کو ترک کیا تھا اس ہی لیے

حرف و سخن سے ٹپکا لوہو اب جو کچھ ارقام کیا

تلخ اس کا تو شہد و شکر ہے ذوق میں ہم ناکاموں کے

لوگوں میں لیکن پوچ کہا یہ لطف بے ہنگام کیا

جیسے کوئی جہاں سے جاوے رخصت اس حسرت سے ہوئے

اس کوچے سے نکل کر ہم نے روبہ قفا ہر گام کیا

میر جو ان نے منھ کو ادھر کر ہم سے کوئی بات کہی

لطف کیا احسان کیا انعام کیا اکرام کیا

میر تقی میر

غنیمت ہے جہاں میں دم ہمارا

اکتوبر 6, 2015میر تقی میر،اساتذہ،غزلکم،برہم،دم،عالم،غمadmin

دیوان پنجم غزل 1541

سخن مشتاق ہے عالم ہمارا

غنیمت ہے جہاں میں دم ہمارا

رہے ہم عالم مستی میں اکثر

رہا کچھ اور ہی عالم ہمارا

بہت ہی دور ہم سے بھاگتے ہو

کرو ہو پاس کچھ تو کم ہمارا

بکھر جاتے ہیں کچھ گیسو تمھارے

ہوا ہے کام دل برہم ہمارا

رکھے رہتے ہیں دل پر ہاتھ اے میر

یہیں شاید کہ ہے سب غم ہمارا

میر تقی میر

ہمیں عشق ہے تو اثر کر رہے گا

اکتوبر 6, 2015میر تقی میر،اساتذہ،غزلہنر،گھر،اثر،جگر،خبرadmin

دیوان پنجم غزل 1540

منھ اپنا کبھو وہ ادھر کر رہے گا

ہمیں عشق ہے تو اثر کر رہے گا

جو دلبر ہے ایسا تو دل جا چکا ہے

کسو روز آنکھوں میں گھر کر رہے گا

ہر اک کام موقوف ہے وقت پر ہی

دل خوں شدہ بھی جگر کر رہے گا

نہ ہوں گو خبر مردماں حال بد سے

مرا نالہ سب کو خبر کر رہے گا

فن شعر میں میر صناع ہے وہ

دل اس کا کوئی تو ہنر کر رہے گا

میر تقی میر

کیا خاک میں ملا ہے افسوس فن ہمارا

اکتوبر 6, 2015میر تقی میر،اساتذہ،غزلفن،چمن،وطن،کفن،دہنadmin

دیوان پنجم غزل 1539

رسواے شہر ہے یاں حرف و سخن ہمارا

کیا خاک میں ملا ہے افسوس فن ہمارا

دل خون ہو گیا تھا غم لکھتے سو رہے ہے

شنگرف کے قلم سا پرخوں دہن ہمارا

ظل ریاض میں شب مہتاب کے نہیں گل

انگاروں سے بھرا ہے اس بن چمن ہمارا

میدان عشق میں تو قیمہ بدن ہوا ہے

تہ کرکے خاک ہی میں رکھ دیں کفن ہمارا

میر اس کی آنکھیں دیکھیں ہم نے سفر کو جاتے

عین بلا ہوا ہے سو اب وطن ہمارا

میر تقی میر

تو بلبل آشیاں تیرا ہی میں پھولوں سے چھائوں گا

اکتوبر 6, 2015میر تقی میر،اساتذہ،غزللائوں،منائوں،چھائوں،آئوں،اٹھائوں،جھکائوں،جائوںadmin

دیوان پنجم غزل 1538

اگر ہنستا اسے سیرچمن میں اب کے پائوں گا

تو بلبل آشیاں تیرا ہی میں پھولوں سے چھائوں گا

مجھے گل اس کے آگے خوش نہیں آتا کچھ اس پر بھی

جو تو آزردہ ہوتی ہے گلستاں میں نہ آئوں گا

بشارت اے صبا دیجو اسیران قفس کو بھی

تسلی کو تمھاری سر پہ رکھ دو پھول لائوں گا

دماغ نازبرداری نہیں ہے کم دماغی سے

کہاں تک ہر گھڑی کے روٹھے کو پہروں منائوں گا

خشونت بدسلوکی خشمگینی کس لیے اتنی

نہ منھ کو پھیریے پھر یاں نہ آئوں گا جو جائوں گا

ابھی ہوں منتظر جاتی ہے چشم شوق ہر جانب

بلند اس تیغ کو ہونے تو دو سر بھی جھکائوں گا

بلائیں زیر سر ہوں کاش افتادہ رہوں یوں ہی

اٹھا سر خاک سے تو میر ہنگامے اٹھائوں گا

میر تقی میر

وحشت کرنا شیوہ ہے کیا اچھی آنکھوں والوں کا

اکتوبر 6, 2015میر تقی میر،اساتذہ،غزلچھالوں،نالوں،والوں،بالوں،بدحالوں،خیالوںadmin

دیوان پنجم غزل 1537

دور بہت بھاگو ہو ہم سے سیکھے طریق غزالوں کا

وحشت کرنا شیوہ ہے کیا اچھی آنکھوں والوں کا

صورت گر کی پریشانی نے طول نہایت کھینچا ہے

ہم نے کیوں بستار کیا تھا اس کے لمبے بالوں کا

بہت کیا تو پتھر میں سوراخ کیے ہیں در فشوں نے

چھید جگر میں کر دینا یہ کام ہے محزوں نالوں کا

سرو لب جو لالہ و گل نسرین و سمن ہیں شگوفہ ہے

دیکھو جدھر اک باغ لگا ہے اپنے رنگیں خیالوں کا

غنچہ ہوا ہے خار بیاباں بعد زیارت کرنے کے

پانی تبرک کرتے ہیں سب پائوں کے میرے چھالوں کا

پہلے تدارک کچھ ہوتا تو نفع بھی ہوتا سو تو میر

کام ہے آخر عشق میں اس کے بیماروں بدحالوں کا

میر تقی میر

میل دلی اس خودسر سے ہے جو پایہ ہے خدائی کا

اکتوبر 6, 2015میر تقی میر،اساتذہ،غزلپائی،پروائی،جدائی،حنائی،خدائی،دکھلائی،صفائیadmin

دیوان پنجم غزل 1536

عشق تو بن رسوائی عالم باعث ہے رسوائی کا

میل دلی اس خودسر سے ہے جو پایہ ہے خدائی کا

ہے جو سیاہی جرم قمر میں اس کے سوا کچھ اور نہیں

داغ ہے مہ کا آئینہ اس سطح رخ کی صفائی کا

نزع میں میری حاضر تھا پر آنکھ نہ ایدھر اس کی پڑی

داغ چلا ہوں اس سے جہاں میں یار کی بے پروائی کا

کوشش میں سر مارا لیکن در پہ کسی کے جا نہ سکا

تن پہ زبان شکر ہے ہر مو اپنی شکستہ پائی کا

رنگ سراپا اس کا ہوا لے آگے دل خوں کرتی رہی

اب ہے جگر یک لخت افسردہ اس کے رنگ حنائی کا

آنا سن ناداری سے ہم نے جی دینا ٹھہرایا ہے

کیا کہیے اندیشہ بڑا تھا اس کی منھ دکھلائی کا

کوفت میں ہے ہر عضو اس کا جوں عضو از جا رفتہ میر

جو کشتہ ہے ظلم رسیدہ اس کے درد جدائی کا

میر تقی میر

یعنی خیال سر میں ہے نعت رسولؐ کا

اکتوبر 6, 2015میر تقی میر،اساتذہ،غزلوصول،پھول،بوالفضول،حصول،دھول،رسول،عقولadmin

دیوان پنجم غزل 1535

ہے حرف خامہ دل زدہ حسن قبول کا

یعنی خیال سر میں ہے نعت رسولؐ کا

رہ پیروی میں اس کی کہ گام نخست میں

ظاہر اثر ہے مقصد دل کے وصول کا

وہ مقتداے خلق جہاں اب نہیں ہوا

پہلے ہی تھا امام نفوس و عقول کا

سرمہ کیا ہے وضع پئے چشم اہل قدس

احمدؐ کے رہگذار کی خاک اور دھول کا

ہے متحد نبیؐ و علیؓ و وصی کی ذات

یاں حرف معتبر نہیں ہر بوالفضول کا

دھو منھ ہزار پانی سے سو بار پڑھ درود

تب نام لے تو اس چمنستاں کے پھول کا

حاصل ہے میر دوستی اہل بیت اگر

تو غم ہے کیا نجات کے اپنی حصول کا

میر تقی میر

مستجمع جمیع صفات و کمال کا

اکتوبر 6, 2015میر تقی میر،اساتذہ،غزلقال،وصال،کمال،جمال،خیالadmin

دیوان پنجم غزل 1534

دل رفتۂ جمال ہے اس ذوالجلال کا

مستجمع جمیع صفات و کمال کا

ادراک کو ہے ذات مقدس میں دخل کیا

اودھر نہیں گذار گمان و خیال کا

حیرت سے عارفوں کو نہیں راہ معرفت

حال اور کچھ ہے یاں انھوں کے حال و قال کا

ہے قسمت زمین و فلک سے غرض نمود

جلوہ وگرنہ سب میں ہے اس کے جمال کا

مرنے کا بھی خیال رہے میر اگر تجھے

ہے اشتیاق جان جہاں کے وصال کا

میر تقی میر

چاروں اور نگہ کرنے میں عالم عالم حسرت تھی

اکتوبر 6, 2015میر تقی میر،اساتذہ،غزلالفت،تہمت،تربت،حسرت،دولت،طاقت،عادتadmin

دیوان چہارم غزل 1533

آج ہمیں بیتابی سی ہے صبر کی دل سے رخصت تھی

چاروں اور نگہ کرنے میں عالم عالم حسرت تھی

کس محنت سے محبت کی تھی کس خواری سے یاری کی

رنج ہی ساری عمر اٹھایا کلفت تھی یا الفت تھی

بدنامی کیا عشق کی کہیے رسوائی سی رسوائی ہے

صحرا صحرا وحشت بھی تھی دنیا دنیا تہمت تھی

راہ کی کوئی سنتا نہ تھا یاں رستے میں مانند جرس

شور سا کرتے جاتے تھے ہم بات کی کس کو طاقت تھی

عہد ہمارا تیرا ہے یہ جس میں گم ہے مہر و وفا

اگلے زمانے میں تو یہی لوگوں کی رسم و عادت تھی

خالی ہاتھ سیہ رو ایسے کاہے کو تھے گریہ کناں

جن روزوں درویش ہوئے تھے پاس ہمارے دولت تھی

جو اٹھتا ہے یاں سے بگولا ہم سا ہے آوارہ کوئی

اس وادی میں میر مگر سرگشتہ کسو کی تربت تھی

میر تقی میر

شاخوں سمیت پھول نہالوں کے جھک گئے

اکتوبر 6, 2015میر تقی میر،اساتذہ،غزلٹک،پھک،جھکadmin

دیوان چہارم غزل 1532

پھر اب چلو چمن میں کھلے غنچے رک گئے

شاخوں سمیت پھول نہالوں کے جھک گئے

چندیں ہزار دیدئہ گل رہ گئے کھلے

افسوس ہے چمن کی طرف تم نہ ٹک گئے

بھڑکی تھی جب کہ آتش گل پھول پڑ گیا

بال و پر طیور چمن میر پھک گئے

میر تقی میر

جب سے کلاہ سر پہ رکھی در بہ در رہے

اکتوبر 6, 2015میر تقی میر،اساتذہ،غزلہنر،مر،ور،کدھر،اتر،تر،خبر،درadmin

دیوان چہارم غزل 1531

اب ترک کر لباس توکل ہی کر رہے

جب سے کلاہ سر پہ رکھی در بہ در رہے

اس دشت سے غبار ہمارا نہ ٹک اٹھا

ہم خانماں خراب نہ جانا کدھر رہے

آنے سے اس طرف کے ترے میں نے غش کیا

شکوہ بھی اس سے کیجیے جس کو خبر رہے

دونوں طرف سے دیدہ درائی نہیں ہے خوب

اس چاہ کا ہے لطف جو آپس میں ڈر رہے

جب تک ہو خون دل میں جگر میں مژہ ہوں نم

تہ کچھ بھی جو نہ ہووے تو کیا چشم تر رہے

رہنا گلی میں اس کی نہ جیتے جی ہوسکا

ناچار ہوکے واں جو گئے اب سو مر رہے

عاشق خراب حال ترے ہیں گرے پڑے

جوں لشکر شکستہ پریشاں اتر رہے

عیب آدمی کا ہے جو رہے اس دیار میں

مطلق جہاں نہ میر رواج ہنر رہے

میر تقی میر

پنجہ خورشید کا گہا بھی جائے

اکتوبر 6, 2015میر تقی میر،اساتذہ،غزلنہا،کہا،گہا،بہا،رہاadmin

دیوان چہارم غزل 1530

یارب اس کا ستم سہا بھی جائے

پنجہ خورشید کا گہا بھی جائے

دیکھ رہیے خرام ناز اس کا

پر کسو پا سے گر رہا بھی جائے

درد دل طول سے کہے عاشق

روبرو اس کے جو کہا بھی جائے

حیرت گل سے آب جو ٹھٹھکا

بہے بہتیرا ہی بہا بھی جائے

کیا کوئی اس گلی میں آوے میر

آوے تو لوہو میں نہا بھی جائے

میر تقی میر

آنکھیں اس سے لگیں سو خواب گئی

اکتوبر 6, 2015میر تقی میر،اساتذہ،غزلآب،خواب،خراب،شتاب،شرابadmin

دیوان چہارم غزل 1529

خواہش دل سے جی کی تاب گئی

آنکھیں اس سے لگیں سو خواب گئی

پھول سے بھی تھی خوب دخترتاک

مغبچوں میں رہی خراب گئی

گر کر اس کی گلی کی خاک میں مفت

اشک کی موتی کی سی آب گئی

بوے گل یا نواے بلبل تھی

عمر افسوس کیا شتاب گئی

نمک حسن سبز سے اے میر

ساری کیفیت شراب گئی

میر تقی میر

ان ہی دیدئہ نم دیدوں سے کیا کیا ہم نے ستم دیکھے

اکتوبر 6, 2015میر تقی میر،اساتذہ،غزلقدم،پیہم،اودھم،ستم،عالمadmin

دیوان چہارم غزل 1528

جب سے آنکھیں کھلی ہیں اپنی درد و رنج و غم دیکھے

ان ہی دیدئہ نم دیدوں سے کیا کیا ہم نے ستم دیکھے

سر جانے کی اور اپنے زنہار نگاہ نہ کی ہم نے

اٹھ کے اندھا دھند آئے چلے ہی اس ظالم کے قدم دیکھے

عالم ہیئت مجموعی سے ایک عجیب مرقع ہے

ہر صفحے میں ورق میں اس کے دیکھے تو عالم دیکھے

زخم نہ ہوویں کیونکر غائر چھاتی میں دل خستوں کی

تیرنگاہ یار جگر پر لگتے ہوئے پیہم دیکھے

یار کے در پر ذکر ہے کیا ہنگامۂ روزمحشر کا

اس کوچے میں قیامت سے تو میر بہت اودھم دیکھے

میر تقی میر

رفتہ وارفتہ اس کا مر گذرے

اکتوبر 6, 2015میر تقی میر،اساتذہ،غزلمگر،مر،نظر،کر،پہر،پر،درadmin

دیوان چہارم غزل 1527

رنج کی اس کے جو خبر گذرے

رفتہ وارفتہ اس کا مر گذرے

ایک پل بھی نہ اس سے آنسو پنچھے

روتے مجھ کو پہر پہر گذرے

جوے خوں آنکھوں سے بہی شاید

خون سے میرے بھی وے درگذرے

راہ جاناں سے ہے گذر مشکل

جان ہی سے کوئی مگر گذرے

مارے غیروں کو یا مرے عاشق

کچھ نہ کچھ چاہیے کہ کر گذرے

غنچہ ہو شرم سے ان آنکھوں کی

گل نرگس اگر نظر گذرے

سر کا جانا ہی ہر قدم ہے میر

کیا کوئی اس کی راہ پر گذرے

میر تقی میر

دو دن جوں توں جیتے رہے سو مرنے ہی کے مہیا تھے

اکتوبر 6, 2015میر تقی میر،اساتذہ،غزلمہیا،کیا،تنہا،جا،رسواadmin

دیوان چہارم غزل 1526

کیا کیا ہم نے رنج اٹھائے کیا کیا ہم بھی شکیبا تھے

دو دن جوں توں جیتے رہے سو مرنے ہی کے مہیا تھے

عشق کیا سو باتیں بنائیں یعنی شعر شعار ہوا

بیتیں جو وے مشہور ہوئیں تو شہروں شہروں رسوا تھے

کیا پگڑی کو پھیر کے رکھتے کیا سر نیچے نہ ہوتا تھا

لطف نہیں اب کیا کہیے کچھ آگے ہم بھی کیا کیا تھے

اب کے وصال قرار دیا ہے ہجر ہی کی سی حالت ہے

ایک سمیں میں دل بے جا تھا تو بھی ہم وے یک جا تھے

کیا ہوتا جو پاس اپنے اے میر کبھو وے آجاتے

عاشق تھے درویش تھے آخر بیکس بھی تھے تنہا تھے

میر تقی میر

درویشی و کم پائی بے صبری و تنہائی

اکتوبر 6, 2015میر تقی میر،اساتذہ،غزللائی،کھائی،آئی،تنہائی،سائیadmin

دیوان چہارم غزل 1525

میں اس کی جدائی میں تصدیع بہت پائی

درویشی و کم پائی بے صبری و تنہائی

اس رفتہ کی جاں بخشی ٹک آتے ہوئی اس کے

رکھتے ہی قدم مجھ میں پھر جان گئی آئی

تھا صبر و سکوں جب تک رہتا تھا مجھے غش سا

بیتابی دل سر پر ایک اور بلا لائی

اس میری جراحت پر کل داور محشر بھی

ڈرتا ہوں کہے ریجھا کیا تیغ ستم کھائی

اے میر کسے دیں ہیں جب تک نہ نصیبہ ہو

کر شکر ملی ہے جو اس در کی جبیں سائی

میر تقی میر

تو دل کہ قفل سا بستہ ہے کیسا کھل جاوے

اکتوبر 6, 2015میر تقی میر،اساتذہ،غزللاوے،پاوے،جاوےadmin

دیوان چہارم غزل 1524

کلید پیچ اگر رقعہ یار کا آوے

تو دل کہ قفل سا بستہ ہے کیسا کھل جاوے

ہماری جان لبوں پر سے سوے گوش گئی

کہ اس کے آنے کی سن گن کچھ اب بھی یاں پاوے

بہار لوٹے ہیں میر اب کے طائر آزاد

نسیم کیا ہے دو گل برگ اگر ادھر لاوے

میر تقی میر

حال اگر ہے ایسا ہی تو جی سے جانا جانا ہے

اکتوبر 6, 2015میر تقی میر،اساتذہ،غزلنشانہ،پہچانا،افسانہ،آنا،جھکانا،جانا،دیوانہ،زمانہadmin

دیوان چہارم غزل 1523

دل کی بات کہی نہیں جاتی چپکے رہنا ٹھانا ہے

حال اگر ہے ایسا ہی تو جی سے جانا جانا ہے

اس کی نگاہ تیز ہے میرے دوش و بر پر ان روزوں

یعنی دل پہلو میں میرے تیرستم کا نشانہ ہے

دل جو رہے تو پائوں کو بھی دامن میں ہم کھینچ رکھیں

صبح سے لے کر سانجھ تلک اودھر ہی جانا آنا ہے

سرخ کبھو آنسو ہیں ہوتے زرد کبھو ہے منھ میرا

کیا کیا رنگ محبت کے ہیں یہ بھی ایک زمانہ ہے

اس نومیدی بے غایت پر کس مقدار کڑھا کریے

دو دم جیتے رہنا ہے تو قیامت تک مر جانا ہے

فرصت کم ہے یاں رہنے کی بات نہیں کچھ کہنے کی

آنکھیں کھول کے کان جو کھولو بزم جہاں افسانہ ہے

فائدہ ہو گا کیا مترتب ناصح ہرزہ درائی سے

کس کی نصیحت کون سنے ہے عاشق تو دیوانہ ہے

تیغ تلے ہی اس کے کیوں نہ گردن ڈال کے جا بیٹھیں

سر تو آخرکار ہمیں بھی خاک کی اور جھکانا ہے

آنکھوں کی یہ مردم داری دل کو کسو دلبر سے ہے

طرزنگہ طراری ساری میر تمھیں پہچانا ہے

میر تقی میر

سہل نہیں ہے جی کا ڈھہنا کیسی خانہ خرابی ہے

اکتوبر 6, 2015میر تقی میر،اساتذہ،غزلمہتابی،نایابی،بابی،خوابی،خرابی،دابی،سیرابیadmin

دیوان چہارم غزل 1522

صبر کیا جاتا نہیں ہم سے ضعف بھی ہے بیتابی ہے

سہل نہیں ہے جی کا ڈھہنا کیسی خانہ خرابی ہے

آگے ایسا نکھرا نکھرا کاہے کو میں پھرتا تھا

جب سے آنکھ لگی اس مہ سے رنگ مرا مہتابی ہے

کس سے سبب میں پوچھوں یارب اپنی سوزش سینے کا

چھاتی جو جلتی رہتی ہے ات گت آگ مگر یاں دابی ہے

رنج و محن نے عشق کے مجھ کو راحت سے مایوس کیا

دل کے تئیں بیتابی ہے میری آنکھوں کو بے خوابی ہے

ابر کوئی رویا ہے شاید برسوں وادی لیلیٰ میں

سیر کیا وہ قطعہ زمیں کا اب تک بھی سیرابی ہے

شہر حسن عجب بستی ہے ڈھونڈے پیدا مہر نہیں

ہے تو متاع گراں قیمت پھر اس کی بلا نایابی ہے

در بدر و رسوا و عاشق شاعر شاغل کامل میر

گہ کعبے میں دیر میں گاہے کیا کافر ہر بابی ہے

میر تقی میر

چپ ہیں کچھ کہہ سکتے نہیں پر جی میں ہمارے کیا کیا ہے

اکتوبر 6, 2015میر تقی میر،اساتذہ،غزلکیا،کیسا،اچھاadmin

دیوان چہارم غزل 1521

خواہش دل کی کس سے کہیے محرم تو ناپیدا ہے

چپ ہیں کچھ کہہ سکتے نہیں پر جی میں ہمارے کیا کیا ہے

ہیں متوقع پرسش اس کے ہم جو گرے ہیں بستر پر

رہنا اس بدحالی ہی سے اپنے حق میں اچھا ہے

میر جی کی بیماری دل کو کب سے ہم سب سنتے ہیں

پوچھے کوئی مزاج کو اس کے ان روزوں میں کیسا ہے

میر تقی میر

دل تڑپا جو اس مہ رو بن سر کو ہمارے دھمکا ہے

اکتوبر 6, 2015میر تقی میر،اساتذہ،غزلکا،جھمکا،دھمکاadmin

دیوان چہارم غزل 1520

جب سے ستارہ صبح کا نکلا تب سے آنسو جھمکا ہے

دل تڑپا جو اس مہ رو بن سر کو ہمارے دھمکا ہے

آمد ورفت دم کے اوپر ہم نے بناے زیست رکھی

دم سو ہوا ہے آوے نہ آوے کس کو بھروسا دم کا ہے

گہ صوفی چل میخانے میں لطف نہیں اب مسجد میں

ابر ہے باراں بائو ہے نرمک رنگ بدن میں جھمکا ہے

کیا امید رہائی رکھے ہم سا رفتہ وارفتہ

دل اپنا تو زنجیری اس زلف خم در خم کا ہے

دل کی نہیں بیماری ایسی جس میں ہو امیدبہی

کیا سنبھلے گا میر ستم کش وہ تو مارا غم کا ہے

میر تقی میر

اشک کی سرخی زردی چہرہ کیا کیا رنگ بدلتا ہے

اکتوبر 6, 2015میر تقی میر،اساتذہ،غزلچلتا،نکلتا،ٹلتا،بلتا،بدلتا،جلتا،سنبھلتاadmin

دیوان چہارم غزل 1519

عشق کیا ہے جب سے ہم نے دل کو کوئی ملتا ہے

اشک کی سرخی زردی چہرہ کیا کیا رنگ بدلتا ہے

روز وداع لگا چھاتی سے وہ جو خوش پرکار گیا

دل تڑپے ہے جان کھپے ہے سینہ سارا جلتا ہے

گور بغیر آرام گہ اس کو دنیا میں پھر کوئی نہیں

عشق کا مارا آوارہ جو گھر سے اپنے نکلتا ہے

ضعف دماغی جس کو ہووے عشق کے رنج و محنت سے

جی بھی سنبھلتا ہے اس کا پر بعد از دیر سنبھلتا ہے

شورجرس شب گیر کا غافل تیاری کا تنبہ ہے

یعنی آنکھ نہ لگنے پاوے قافلہ صبح کو چلتا ہے

بال نہیں عاشق کے بدن پر ہربن مو سے نکلا دود

بل کر اس کو جلاتے کیا ہو آپھی جلتا بلتا ہے

میرستم کشتہ کی سماجت ہے مشہور زمانے کی

جان دیے بن آگے سے اس کے کب وہ ظالم ٹلتا ہے

میر تقی میر

تسکیں نہیں ہے جان کو آب رواں سے بھی

اکتوبر 6, 2015میر تقی میر،اساتذہ،غزلیاں،پیرمغاں،آسماں،جہاں،جاں،رواں،زباںadmin

دیوان چہارم غزل 1518

ہوتی نہیں تسلی دل گلستاں سے بھی

تسکیں نہیں ہے جان کو آب رواں سے بھی

تا یہ گرفتہ وا ہو کہاں لے کے جائیے

آئے ہیں اس کی غنچگی میں تنگ جاں سے بھی

آگے تھی شوخی ہم سے کنایوں میں چپ تھے ہم

مشکل ہے اب برا لگے کہنے زباں سے بھی

ہر چند دست بیع جواناں ہوں میں ولے

اک اعتقاد رکھتا ہوں پیرمغاں سے بھی

جھنجھلاہٹ اور غصے میں ہجران یار کے

جھگڑا ہمیں رہے ہے زمیں آسماں سے بھی

دنیا سے درگذر کہ گذرگہ عجب ہے یہ

درپیش یعنی میر ہے جانا جہاں سے بھی

لشکر میں ہے مبیت اسی بات کے لیے

کہتے ہیں لوگ کوچ ہے کل صبح یاں سے بھی

میر تقی میر

پہ فرط شوق سے مجھ کو ملال خاطر ہے

اکتوبر 6, 2015میر تقی میر،اساتذہ،غزلقادر،قاصر،چادر،خاطر،شاطرadmin

دیوان چہارم غزل 1517

جو بحث جی سے وفا میں ہے سو تو حاضر ہے

پہ فرط شوق سے مجھ کو ملال خاطر ہے

وصال ہووے تو قدرت نما ہے قدرت کا

نہ ہم کو قدر نہ قدرت خدا ہی قادر ہے

مسافرانہ ملے تو کہا شرارت سے

غریب کہتے ہیں لوگ ان کو یہ بھی نادر ہے

کسو سیاق سے تحریر طول شوق نہ ہو

زبان خامۂ لسّان اس میں قاصر ہے

بہم رکھا کرو شطرنج ہی کی بازی کاش

نہ میر بار ہے خاطر کا یار شاطر ہے

میر تقی میر

یعنی آنسو پی پی گئے سو زخم جگر ناسور ہوئے

اکتوبر 6, 2015میر تقی میر،اساتذہ،غزلمقدور،مشہور،مغرور،چور،ناسور،دورadmin

دیوان چہارم غزل 1516

عشق چھپاکر پچھتائے ہم سوکھ گئے رنجور ہوئے

یعنی آنسو پی پی گئے سو زخم جگر ناسور ہوئے

ہم جو گئے سرمست محبت اس اوباش کے کوچے میں

کھائیں کھڑی تلواریں اس کی زخمی نشے میں چور ہوئے

کوئی نہ ہم کو جانے تھا ہم ایسے تھے گمنام آگے

یمن عشق سے رسوا ہوکر شہروں میں مشہور ہوئے

کیا باطل ناچیز یہ لونڈے قدر پر اپنی نازاں ہیں

قدرت حق کے کھیل تو دیکھو عاشق بے مقدور ہوئے

سر عاشق کا کاٹ کے ان کو سربگریباں رہنا تھا

سو تو پگڑی پھیر رکھی ہے اور بھی وے مغرور ہوئے

زرد و زبون و زار ہوئے ہیں لطف ہے کیا اس جینے کا

مردے سے بھی برسوں کے ہم ہجراں میں بے نور ہوئے

پاس ہی رہنا اکثر اس کے میر سبب تھا جینے کا

پہنچ گئے مرنے کے نزدیک اس سے جو ٹک دور ہوئے

میر تقی میر

آن رہے ہیں آج دموں پر کل تک کیونکے رہا جاوے

اکتوبر 6, 2015میر تقی میر،اساتذہ،غزلنہا،بہا،رہاadmin

دیوان چہارم غزل 1515

حال رہا ہو ہم میں کچھ تو حال کسو سے کہا جاوے

آن رہے ہیں آج دموں پر کل تک کیونکے رہا جاوے

اس کی گلی وہ ظلم کدہ ہے آ نکلے جو کوئی وہاں

گرد رہ عشق آلودہ تو لوہو میں اپنے نہا جاوے

آنکھوں کی خوننابہ فشانی دیکھیں میر کہاں تک یہ

زرد ہمارے رخساروں پر ہر دم خون بہا جاوے

میر تقی میر

قصہ ہمارا اس کا یارو شنیدنی ہے

اکتوبر 6, 2015میر تقی میر،اساتذہ،غزلکشیدنی،گزیدنی،بریدنی،خمیدنی،شنیدنیadmin

دیوان چہارم غزل 1514

افسانہ خواں کا لڑکا کیا کہیے دیدنی ہے

قصہ ہمارا اس کا یارو شنیدنی ہے

اپنا تو دست کوتہ زہ تک بھی ٹک نہ پہنچا

نقاش سے کہیں وہ دامن کشیدنی ہے

پروانہ مر مٹا ہے جل کر نہ کچھ کہا تو

اے شمع یہ زباں تو ظالم بریدنی ہے

حسرت سے عاشقی کی پیری میں کیا کہیں ہم

دنداں نہیں ہیں منھ میں وہ لب گزیدنی ہے

ہے راست میر صاحب کس کس کا حیف کریے

سر ہے فگندنی ہے قد ہے خمیدنی ہے

میر تقی میر

ورنہ کیا جانے کیا خطاب کرے

اکتوبر 6, 2015میر تقی میر،اساتذہ،غزلآب،اضطراب،جواب،خواب،خراب،خطاب،شتابadmin

دیوان چہارم غزل 1513

صبر کر رہ جو وہ عتاب کرے

ورنہ کیا جانے کیا خطاب کرے

عشق میں دل بہت ہے بے آرام

چین دیوے تو کوئی خواب کرے

وقت یاں کم ہے چاہیے آدم

کرنا جو کچھ ہو سو شتاب کرے

پھاڑ کر خط کو ان نے پھینک دیا

نامہ بر اس کا کیا جواب کرے

ہے برافروختہ جو خشم سے وہ

آتش شعلہ زن کو آب کرے

ہے تو یک قطرہ خون ہی لیکن

قہر ہے دل جو اضطراب کرے

میر اٹھ بت کدے سے کعبے گیا

کیا کرے جو خدا خراب کرے

میر تقی میر

دروں میں آگ اک لگا گیا ہے بروں کو یکسر جلا گیا ہے

اکتوبر 6, 2015میر تقی میر،اساتذہ،غزلبنا،جلا،رہاadmin

دیوان چہارم غزل 1512

کہو سو کریے فراق اس کا تو جی کو میرے کھپا گیا ہے

دروں میں آگ اک لگا گیا ہے بروں کو یکسر جلا گیا ہے

اگرچہ مارا بگڑ کے مجھ کو و لیک لطف و کرم سے پھر بھی

نشان میرے مزار کا وہ سررہ اپنی بنا گیا ہے

خرام شوخی کے ہمرہ اس کے ہزار جانیں چلی گئی ہیں

رکھا ہے رہ میں قدم جو ان نے تو میر کس سے رہا گیا ہے

میر تقی میر

رخصت میں لگ گلے سے چھاتی جلا گیا ہے

اکتوبر 6, 2015میر تقی میر،اساتذہ،غزلکہا،ا،اٹھا،بجا،جلا،رہا،رجھاadmin

دیوان چہارم غزل 1511

اب کے سفر کو ہم سے وہ مہ جدا گیا ہے

رخصت میں لگ گلے سے چھاتی جلا گیا ہے

فرہاد و قیس گذرے اب شور ہے ہمارا

ہر کوئی اپنی نوبت دو دن بجا گیا ہے

ضعف دماغ سے میں بھر کر نظر نہ دیکھا

کیا دیر میں پلک سے میری اٹھا گیا ہے

بے جا ہوئے بہت دل رفتار دیکھ اس کی

عزلت گزینوں سے بھی کم ہی رہا گیا ہے

رسوا خراب و غم کش دل باختہ محبت

عاشق کو تیرے غم میں کیا کیا کہا گیا ہے

اے میر شعر کہنا کیا ہے کمال انساں

یہ بھی خیال سا کچھ خاطر میں آ گیا ہے

شاعر نہیں جو دیکھا تو تو ہے کوئی ساحر

دو چار شعر پڑھ کر سب کو رجھا گیا ہے

میر تقی میر

قدر ہماری کچھ جانوگے دل کو کہیں جو لگائوگے

اکتوبر 6, 2015میر تقی میر،اساتذہ،غزللگائوگے،کھائوگے،آئوگے،اٹھائوگے،بنائوگے،بتائوگے،بجھائوگے،جلائوگے،جائوگےadmin

دیوان چہارم غزل 1510

عشق میں کھوئے جائوگے تو بات کی تہ بھی پائوگے

قدر ہماری کچھ جانوگے دل کو کہیں جو لگائوگے

صبر کہاں بیتابی دل سے چین کہاں بے خوابی سے

سو سو بار گلی میں تکتے گھر سے باہر آئوگے

شوق کمال کو پہنچا تو ہیں خط و کتابت حرف و سخن

قاصد کے محتاج نہ ہو گے آپھی دوڑے جائوگے

صنعت گریاں صاحب بندہ دل کے لگے کب پیش گئیں

ایک نہیں وہ سننے کا تم باتیں بہت بنائوگے

چاہ کیے درویش ہوئے تو آب و خورش کی فکر نہیں

لوہو پیوگے اپنا ہر دم غم غصہ ہی کھائوگے

رنگ محبت کے ہیں کتنے کوئی تمھیں خوش آوے گا

خون کروگے یا دل کو یا داغ جگر پہ جلائوگے

رہتے ہیں مبہوت الفت ہیں گم گشتہ کلفت میں

بھولے بھولے آپھی پھروگے کس کو راہ بتائوگے

اشک تو پانی سے ہیں لیکن جلتے جلتے آویں گے

دل کے لگے حیران ہوں صاحب کس ڈھب مل کے بجھائوگے

چاہت میر سبھی کرتے ہیں رنج و تعب میں رہتے ہیں

تم جو ابھی بیتاب ہو ایسے جی سے ہاتھ اٹھائوگے

میر تقی میر

محل رحم ہوویں کس طرح مظلوم ہم تیرے

اکتوبر 6, 2015میر تقی میر،اساتذہ،غزلہم،کرم،خمadmin

دیوان چہارم غزل 1509

نہ خاطر پر الم تیرے نہ دل پر کچھ ستم تیرے

محل رحم ہوویں کس طرح مظلوم ہم تیرے

جو ٹک بھی سایہ گستر ہو گا تو اس خشک مزرع پر

بہت ہم ہوں گے احساں مند اے ابر کرم تیرے

انھیں کی طبع جان میر مائل ہو گی سنبل کی

نہیں دیکھے جنھوں نے گیسوے پرپیچ و خم تیرے

میر تقی میر

ہزار سابقوں سے سابق ایک یاری ہے

اکتوبر 6, 2015میر تقی میر،اساتذہ،غزلیاری،پیاری،اضطراری،باری،تمھاری،ساری،شرمساریadmin

دیوان چہارم غزل 1508

ہماری تیری مودت ہے دوست داری ہے

ہزار سابقوں سے سابق ایک یاری ہے

گئی وہ نوبت مجنوں کہ نام باجے تھا

ہمارا شور جنوں اب ہے اپنی باری ہے

کریں تو جاکے گدایانہ اس طرف آواز

اگر صدا کوئی پہچانے شرمساری ہے

مسافران رہ عشق ہیں شکیب سے چپ

وگرنہ حال ہمارا تو اضطراری ہے

خرابی حال کی دل خواہ جو تمھارے تھی

سو خطرے میں نہیں خاطر ہمیں تمھاری ہے

ہمیں ہی عشق میں جینے کا کچھ خیال نہیں

وگرنہ سب کے تئیں جان اپنی پیاری ہے

نگاہ غور سے کر میر سارے عالم میں

کہ ہووے عین حقیقت وہی تو ساری ہے

میر تقی میر

پودے چمن میں پھولوں سے دیکھے بھرے بھرے

اکتوبر 6, 2015میر تقی میر،اساتذہ،غزلورے،پرے،ارے،بھرے،دھرےadmin

دیوان چہارم غزل 1507

موسم ہے نکلے شاخوں سے پتے ہرے ہرے

پودے چمن میں پھولوں سے دیکھے بھرے بھرے

آگے کسو کے کیا کریں دست طمع دراز

وہ ہاتھ سو گیا ہے سرہانے دھرے دھرے

کیا سمجھے اس کے رتبۂ عالی کو اہل خاک

پھرتے ہیں جوں سپہر بہت ہم ورے ورے

مرتا تھا میں تو باز رکھا مرنے سے مجھے

یہ کہہ کے کوئی ایسا کرے ہے ارے ارے

گلشن میں آگ لگ رہی تھی رنگ گل سے میر

بلبل پکاری دیکھ کے صاحب پرے پرے

میر تقی میر

آخر اس اوباش نے مارا رہتی نہیں ہے آئی ہوئی

اکتوبر 6, 2015میر تقی میر،اساتذہ،غزللگائی،چھپائی،گھبرائی،آئی،رسوائی،سودائی،شرمائیadmin

دیوان چہارم غزل 1506

کب وعدے کی رات وہ آئی جو آپس میں نہ لڑائی ہوئی

آخر اس اوباش نے مارا رہتی نہیں ہے آئی ہوئی

چاہ میں اس بے الفت کی گھبراہٹ دل ہی کو تو نہیں

سارے حواسوں میں ہے تشتت جان بھی ہے گھبرائی ہوئی

گرچہ نظر ہے پشت پا پر لیکن قہر قیامت ہے

گڑ جاتی ہے دل میں ہمارے آنکھ اس کی شرمائی ہوئی

جنگل جنگل شوق کے مارے ناقہ سوار پھرا کی ہے

مجنوں جو صحرائی ہوا تو لیلیٰ بھی سودائی ہوئی

دود دل سوزان محبت محو جو ہو تو عرش پہ ہو

یعنی دور بجھے گی جا کر عشق کی آگ لگائی ہوئی

چتون کے انداز سے ظالم ترک مروت پیدا ہے

اہل نظر سے چھپتی نہیں ہے آنکھ کسو کی چھپائی ہوئی

میر کا حال نہ پوچھو کچھ تم کہنہ رباط سے پیری میں

رقص کناں بازار تک آئے عالم میں رسوائی ہوئی

میر تقی میر

تعب ایسی گذری کہ مر مر گئے

اکتوبر 6, 2015میر تقی میر،اساتذہ،غزلمر،کیدھر،کر،بھر،باہرadmin

دیوان چہارم غزل 1505

ہم اس مرتبہ پھر بھی لشکر گئے

تعب ایسی گذری کہ مر مر گئے

نظر اک سپاہی پسر سے لڑی

قریب اس کے تلوار کر کر گئے

بہم مہر ورزی کے سرگرم تھے

خدا جانے وہ لوگ کیدھر گئے

لہو میری آنکھوں میں آتا نہیں

جگر کے مگر زخم سب بھر گئے

رباط کہن میں نہیں میرجی

ہوا جو لگی وے بھی باہر گئے

میر تقی میر

پات ہرے ہیں پھول کھلے ہیں کم کم باد و باراں ہے

اکتوبر 6, 2015میر تقی میر،اساتذہ،غزلکارگذاراں،گساراں،باراں،داراں،عذاراںadmin

دیوان چہارم غزل 1504

چلتے ہو تو چمن کو چلیے کہتے ہیں کہ بہاراں ہے

پات ہرے ہیں پھول کھلے ہیں کم کم باد و باراں ہے

رنگ ہوا سے یوں ٹپکے ہے جیسے شراب چواتے ہیں

آگے ہو میخانے کے نکلو عہد بادہ گساراں ہے

عشق کے میداں داروں میں بھی مرنے کا ہے وصف بہت

یعنی مصیبت ایسی اٹھانا کار کارگذاراں ہے

دل ہے داغ جگر ہے ٹکڑے آنسو سارے خون ہوئے

لوہو پانی ایک کرے یہ عشق لالہ عذاراں ہے

کوہکن و مجنوں کی خاطر دشت و کوہ میں ہم نہ گئے

عشق میں ہم کو میر نہایت پاس عزت داراں ہے

میر تقی میر

سنی گرچہ جاتی نہیں یہ کہانی

اکتوبر 6, 2015میر تقی میر،اساتذہ،غزلمہربانی،مانی،نشانی،کہانی،آسمانی،بانی،جوانی،جانیadmin

دیوان چہارم غزل 1503

سنو سرگذشت اب ہماری زبانی

سنی گرچہ جاتی نہیں یہ کہانی

بہت نذریں مانیں کہ مانے گا کہنا

ولیکن مری بات ہرگز نہ مانی

بہت مو پریشاں کھپے اس کے غم میں

خدا جانے ہے بید کس کی نشانی

گیا بھول جی شیب میں جو ہمارا

بہت یاد آئی گئی وہ جوانی

توقع نہیں یاں تک آنے کی ان سے

اگر لطف مجھ پر کریں مہربانی

گری ضبط گریہ سے دل کی عمارت

ہوئی چشم تر اس خرابی کی بانی

ملا دیتی ہے خاک میں آدمی کو

محبت ہے کوئی بلا آسمانی

گرامی گہر میر جی تھا ہمارا

ولے عشق میں قدر ہم نے نہ جانی

میر تقی میر

طیور ہی سے بَکا کریں گے گلوں کے آگے بُکا کریں گے

اکتوبر 6, 2015میر تقی میر،اساتذہ،غزللکھا،چلا،وفا،پھرا،بُکا،جدا،دواadmin

دیوان چہارم غزل 1502

چلو چمن میں جو دل کھلے ٹک بہم غم دل کہا کریں گے

طیور ہی سے بَکا کریں گے گلوں کے آگے بُکا کریں گے

قرار دل سے کیا ہے اب کے کہ رک کے گھر میں نہ مریئے گا یوں

بہار آئی جو اپنے جیتے تو سیر کرنے چلا کریں گے

ہلاک ہونا مقرری ہے مرض سے دل کے پہ تم کڑھو ہو

مزاج صاحب اگر ادھر ہے تو ہم بھی اپنی دوا کریں گے

برا ہے دل کا ہمارے لگنا لگانا غصے سے عاشقی کے

نچی جبیں سے گلی میں اس کی خراب و خستہ پھرا کریں گے

وصال خوباں نہ کر تمنا کہ زہر شیریں لبی ہے ان کی

خراب و رسوا جدا کریں گے ہلاک مل کر جدا کریں گے

اگر وہ رشک بہار سمجھے کہ رنگ اپنا بھی ہے اب ایسا

ورق خزاں میں جو زرد ہوں گے غم دل ان پر لکھا کریں گے

غم محبت میں میر ہم کو ہمیشہ جلنا ہمیشہ مرنا

صعوبت ایسی دماغ رفتہ کہاں تلک اب وفا کریں گے

میر تقی میر

اب کب گئی اٹھائی ہے زور ناتوانی

اکتوبر 6, 2015میر تقی میر،اساتذہ،غزلناتوانی،کہانی،پانی،جوانی،جانی،زبانی،زعفرانیadmin

دیوان چہارم غزل 1501

اکثر کی بے دماغی ہر دم کی سرگرانی

اب کب گئی اٹھائی ہے زور ناتوانی

تم دل کو دیتے ہو تو بے دل سمجھ کے ہوجو

ہم نے تو قدر دل کی افسوس کچھ نہ جانی

عہد شباب کی تو فرصت تھی ایک چشمک

مژگاں بہم زدن میں جاتی رہی جوانی

حسرت سے دیکھ رہیو اے نامہ بر منھ اس کا

بس اور کچھ نہ کہیو ہرگز مری زبانی

اس غیرت قمر کی خجلت سے تاب رخ کی

آئینہ تو سراسر ہوتا ہے پانی پانی

مرزائی فقر میں بھی دل سے گئی نہ میرے

چہرے کے رنگ اپنے چادر کی زعفرانی

یوں میر تو غم اپنا برسوں کہا کریں گے

اب رات کم ہے سوئو بس ہو چکی کہانی

میر تقی میر

صاحب ہی نے ہمارے یہ بندہ پروری کی

اکتوبر 6, 2015میر تقی میر،اساتذہ،غزلیاوری،کھری،گری،پروری،پری،بہتری،خودسری،دلبری،سرسریadmin

دیوان چہارم غزل 1500

جنگل میں چشم کس سے بستی کی رہبری کی

صاحب ہی نے ہمارے یہ بندہ پروری کی

شب سن کے شور میرا کچھ کی نہ بے دماغی

اس کی گلی کے سگ نے کیا آدمی گری کی

کرتے نہیں ہیں دل خوں اس رنگ سے کسو کا

ہم دل شدوں کی ان نے کیا خوب دلبری کی

اللہ رے کیا نمک ہے آدم کے حسن میں بھی

اچھی لگی نہ ہم کو خوش صورتی پری کی

ہے اپنی مہرورزی جانکاہ و دل گدازاں

اس رنج میں نہیں ہے امید بہتری کی

رفتار ناز کا ہے پامال ایک عالم

اس خودنما نے کیسی خودرائی خودسری کی

اے کاش اب نہ چھوڑے صیاد قیدیوں کو

جی ہی سے مارتی ہے آزادی بے پری کی

اس رشک مہ سے ہر شب ہے غیر سے لڑائی

بخت سیہ نے بارے ان روزوں یاوری کی

کھٹ پچریاں ہی کی ہیں صراف کے نے ہم سے

پیسے دے بیروئی کی پھر لے گئے کھری کی

گذرے بسان صرصر عالم سے بے تامل

افسوس میر تم نے کیا سیر سرسری کی

میر تقی میر

لے خاک کی کوئی چٹکی اکسیر بنا دیں گے

اکتوبر 6, 2015میر تقی میر،اساتذہ،غزللگا،لٹا،نوا،بنا،بتا،جلا،جزاadmin

دیوان چہارم غزل 1499

مل اہل بصیرت سے کچھ وے ہی دکھا دیں گے

لے خاک کی کوئی چٹکی اکسیر بنا دیں گے

پانی کی سی بوندیں تھیں سب اشک نہ میں جانا

کپڑوں پہ گریں گے تو وے آگ جلا دیں گے

سرگشتہ سا پھرتا ہے کہتے ہیں بیاباں میں

گر خضر ملے گا تو ہم راہ بتا دیں گے

اے کاش قیامت میں دیویں اسے عاشق کو

گر حسن عمل کی واں لوگوں کو جزا دیں گے

حاصل کڑی ہونے کا ابرو کی کمان اس کی

دیکھیں گے چڑھی جس دم ہم سر کو نوا دیں گے

ایدھر نہیں آتا وہ آوے تو تصدق کر

جی جامہ اٹھا دیں گے گھر بار لٹا دیں گے

معشوقوں کی گرمی بھی اے میر قیامت ہے

چھاتی میں گلے لگ کر ٹک آگ لگا دیں گے

میر تقی میر

غم حرماں کا کب تک کھینچیں شاد کرو تو بہتر ہے

اکتوبر 6, 2015میر تقی میر،اساتذہ،غزلفریاد،ایجاد،آزاد،بیداد،شادadmin

دیوان چہارم غزل 1498

دیر سے ہم کو بھول گئے ہو یاد کرو تو بہتر ہے

غم حرماں کا کب تک کھینچیں شاد کرو تو بہتر ہے

پہنچا ہوں میں دوری سے مرنے کے نزدیک آخر تو

قیدحیات سے بندے کو آزاد کرو تو بہتر ہے

جو کریے گا حق میں میرے خوبی ہے میری اس ہی میں

داد کرو تو بہتر ہے بیداد کرو تو بہتر ہے

زخم دامن دار جگر سے جامہ گذاری ہو نہ گئی

ظلم نمایاں اب کوئی جو ایجاد کرو تو بہتر ہے

عشق میں دم مارا نہ کبھو تم چپکے چپکے میر کھپے

لوہو منھ سے مل کر اب فریاد کرو تو بہتر ہے

میر تقی میر

میں نے ناخن بندی اپنی عشق میں کی ہے ابھی

اکتوبر 6, 2015میر تقی میر،اساتذہ،غزللی،کی،پی،جی،دی،سی،سیکھیadmin

دیوان چہارم غزل 1497

ان حنائی دست و پا سے دل لگی سی ہے ابھی

میں نے ناخن بندی اپنی عشق میں کی ہے ابھی

ہاتھ دل پر زور سے اپنے نہ رکھا چاہیے

چاک کی چھاتی مری جراح نے سی ہے ابھی

ایک دم دکھلائی دیتا بھی تو مرتے آ کہیں

شوق سے آنکھوں میں کوئی دم مرا جی ہے ابھی

دیکھیں اک دو دم میں کیونکر تیغ اس کی ہو بلند

کوئی خوں ریز ان نے اپنی میان سے لی ہے ابھی

کس طرح ہوں معتقد ہم اتقاے شیخ کے

صبح کو رسم صبوحی سے تو مے پی ہے ابھی

آگے کب کب اٹھتے تھے سنّاہٹے سے باغ میں

طرز میرے نالے کی بلبل نے سیکھی ہے ابھی

زیر دیوار اس کے کس امید پر تو میر ہے

ایک دو نے جان اس دروازے پر دی ہے ابھی

میر تقی میر

کچھ چیز مال ہو تو خریدار ہو کوئی

اکتوبر 6, 2015میر تقی میر،اساتذہ،غزلہموار،گنہگار،گرفتار،اسرار،بیمار،بیزار،خریدار،دیوار،سردارadmin

دیوان چہارم غزل 1496

دنیا کی قدر کیا جو طلبگار ہو کوئی

کچھ چیز مال ہو تو خریدار ہو کوئی

کیا ابررحمت اب کے برستا ہے لطف سے

طاعت گزیں جو ہو سو گنہگار ہو کوئی

کیا ضعف تن میں ہے جگر و دل دماغ بن

پوچھے جو اس قشون میں سردار ہو کوئی

ہم عاشقان زرد و زبون و نزار سے

مت کر ادائیں ایسی کہ بیزار ہو کوئی

چپکے ہیں ہم تو حیرت حالات عشق سے

کریے بیاں جو واقف اسرار ہو کوئی

یکساں ہوئے ہیں خاک سے پامال ہو کے ہم

کیا اور اس کی راہ میں ہموار ہو کوئی

وہ رہ سکے ہے دل زدہ کچھ منتظر کھڑا

حیرت سے اس کے در پہ جو دیوار ہو کوئی

اک نسخۂ عجیب ہے لڑکا طبیب کا

کچھ غم نہیں ہے اس کو جو بیمار ہو کوئی

کیا اضطراب دل سے کہے میر سرعشق

یہ حال سمجھے وہ جو گرفتار ہو کوئی

میر تقی میر

یار گیا مجلس سے دیکھیں کس کس کی اب آئی ہے

اکتوبر 6, 2015میر تقی میر،اساتذہ،غزللگائی،چلائی،پائی،پروائی،آئی،بنائی،تنہائی،سودائی،صحرائیadmin

دیوان چہارم غزل 1495

حال نہیں ہے دل میں مطلق شور و فغاں رسوائی ہے

یار گیا مجلس سے دیکھیں کس کس کی اب آئی ہے

آنکھیں مل کر کھولیں ان نے عالم میں آشوب اٹھا

بال کھلے دکھلائی دیا سو ہر کوئی سودائی ہے

ڈول بیاں کیا کوئی کرے اس وعدہ خلاف کی دیہی کا

ڈھال کے سانچے میں صانع نے وہ ترکیب بنائی ہے

نسبت کیا ان لوگوں سے ہم کو شہری ہیں دیوانے ہم

ہے فرہاد اک آدم کوہی مجنوں اک صحرائی ہے

ہے پتھر سا چھاتی میں میری کثرت غم کی حیرت سے

کیا کہیے پہلو سے دل کے سخت اذیت پائی ہے

باغ میں جاکر ہم جور ہے سو اور دماغ آشفتہ ہوا

کیا کیا سر پہ ہمارے آ کر بلبل شب چلائی ہے

کیسا کیسا عجز ہے اپنا کیسے خاک میں ملتے ہیں

کیا کیا ناز و غرور اس کو ہے کیا کیا بے پروائی ہے

قصہ ہم غربت زدگاں کا کہنے کے شائستہ نہیں

بے صبری کم پائی ہے پھر دور اس سے تنہائی ہے

چشمک چتون نیچی نگاہیں چاہ کی تیری مشعر ہیں

میر عبث مکرے ہے ہم سے آنکھ کہیں تو لگائی ہے

میر تقی میر

روش آب رواں پھیلے پھرا کرتے تھے

اکتوبر 6, 2015میر تقی میر،اساتذہ،غزلوفا،کہا،پھرا،اٹھا،جلا،حیا،دوا،رہاadmin

دیوان چہارم غزل 1494

باغ میں سیر کبھو ہم بھی کیا کرتے تھے

روش آب رواں پھیلے پھرا کرتے تھے

غیرت عشق کسو وقت بلا تھی ہم کو

تھوڑی آزردگی میں ترک وفا کرتے تھے

دل کی بیماری سے خاطر تو ہماری تھی جمع

لوگ کچھ یوں ہی محبت سے دوا کرتے تھے

جب تلک شرم رہی مانع شوخی اس کی

تب تلک ہم بھی ستم دیدہ حیا کرتے تھے

مائل کفر جوانی میں بہت تھے ہم لوگ

دیر میں مسجدوں میں دیر رہا کرتے تھے

آتش عشق جہاں سوز کی لپٹیں تھیں قہر

دل جگر جان درونے میں جلا کرتے تھے

اب تو بیتابی دل نے ہمیں بٹھلا ہی دیا

آگے رنج و تعب عشق اٹھا کرتے تھے

اٹھ گئے پر مرے تکیے کو کہیں گے یاں میر

درد دل بیٹھے کہانی سی کہا کرتے تھے

میر تقی میر

بے کس ہوئے بے بس ہوئے بے کل ہوئے بے گت ہوئے

اکتوبر 6, 2015میر تقی میر،اساتذہ،غزلمیت،کلفت،گت،پت،پربت،حضرت،رخصتadmin

دیوان چہارم غزل 1493

بے دل ہوئے بے دیں ہوئے بے وقر ہم ات گت ہوئے

بے کس ہوئے بے بس ہوئے بے کل ہوئے بے گت ہوئے

ہم عشق میں کیا کیا ہوئے اب آخر آخر ہوچکے

بے مت ہوئے بے ست ہوئے بے خود ہوئے میت ہوئے

الفت جو کی کہتا ہے جی حالت نہیں عزت نہیں

ہم بابت ذلت ہوئے شائستۂ کلفت ہوئے

گر کوہ غم ایسا گراں ہم سے اٹھے پس دوستاں

سوکھے سے ہم دینت ہوئے تنکے سے ہم پربت ہوئے

کیا رویئے قیدی ہیں اب رویت بھی بن گل کچھ نہیں

بے پر ہوئے بے گھر ہوئے بے زر ہوئے بے پت ہوئے

آنکھیں بھر آئیں جی رندھا کہیے سو کیا چپکے سے تھے

جی چاہتا مطلق نہ تھا ناچار ہم رخصت ہوئے

یامست درگا ہوں میں شب کرتے تھے شاہد بازیاں

تسبیح لے کر ہاتھ میں یا میر اب حضرت ہوئے

میر تقی میر

گوش زد اک دن ہوویں کہیں تو بے لطفی سے زبان کرے

اکتوبر 6, 2015میر تقی میر،اساتذہ،غزلنقصان،آسان،احسان،ارمان،دیوان،دھیان،زبانadmin

دیوان چہارم غزل 1492

لطف ہے کیا انواع ستم جو اس کے کوئی بیان کرے

گوش زد اک دن ہوویں کہیں تو بے لطفی سے زبان کرے

ہم تو چاہ کر اس پتھر کو سخت ندامت کھینچی ہے

چاہ کرے اب وہ کوئی جو چاہت کا ارمان کرے

سودے میں دل کے نفع جو چاہے خام طمع سودائی ہے

وارا سارا عشق میں کیسا جی کا بھی نقصان کرے

حشر کے ہنگامے میں چاہیں دادعشق تو حسن نہیں

کاشکے یاں وہ ظالم اپنے دل ہی میں دیوان کرے

آتش خو مغرور سے ویسے عہدہ برآ کیا عاشق ہو

دل کو جلاوے منت رکھے جی مارے احسان کرے

یمن عشق غم افزا سے کام نہایت مشکل ہے

اب بھی نہیں نومیدی دل کو شاید عشق آسان کرے

کہنے میں یہ بات آتی نہیں ہو سیر خدا کی قدرت کی

موند کر آنکھیں میر اگر تو دل کی طرف ٹک دھیان کرے

میر تقی میر

ہم نے کھینچی کمان رستم بھی

اکتوبر 6, 2015میر تقی میر،اساتذہ،غزلماتم،محرم،اودھم،دم،رستم،عالم،غمadmin

دیوان چہارم غزل 1491

زورکش ہیں گے عشق کے ہم بھی

ہم نے کھینچی کمان رستم بھی

ہے بلا دھوم دل تڑپنے کی

ایسا ہوتا نہیں ہے اودھم بھی

کچھ نہیں اور دیکھیں ہیں کیا کیا

خواب کا سا ہے یاں کا عالم بھی

حیف دل جاتے پڑ گئی جی کی

ورنہ غم کرتے لیتے ماتم بھی

حرم کعبہ کا نہ پایا بھید

نہ ملا واں کا ایک محرم بھی

خشک نے سا تھا شیخ حیف موا

یوں تو یار اس کو دیتے تھے دم بھی

کھپ ہی جاتا ہے آدمی اے میر

آفت جاں ہے عشق کا غم بھی

میر تقی میر

کیا کیا ان نے سلوک کیے ہیں شہر کے عزت داروں سے

اکتوبر 6, 2015میر تقی میر،اساتذہ،غزلفگاروں،ماروں،یاروں،انگاروں،آواروں،تلواروں،تکراروں،تاروں،داروںadmin

دیوان چہارم غزل 1490

خوار پھرایا گلیوں گلیوں سر مارے دیواروں سے

کیا کیا ان نے سلوک کیے ہیں شہر کے عزت داروں سے

دور اس سے تو اپنے بھائیں آگ لگی ہے گلستاں میں

آنکھیں نہیں پڑتی ہیں گل پر سینکتے ہیں انگاروں سے

شور کیا جو میں نے شبانگہ بیتابی سے دل کی بہت

کہنے لگا جی تنگ آیا ان مہر و وفا کے ماروں سے

وہ جو ماہ زمیں گرد اپنا دوپہری ہے ان روزوں

شوق میں ہر شب حرف و سخن ہے ہم کو فلک کے تاروں سے

حرف شنو ساتھ اپنے نہیں ہیں ورنہ دراے قافلہ ساں

راہ میں باتیں کس کس ڈھب کی کرتے ہیں ہم یاروں سے

خستہ ہو اپنا کیسا ہی کوئی پھر بھی گلے سے لگاتے ہیں

وحشت ایک تمھیں کو دیکھی اپنے سینہ فگاروں سے

داغ جگرداری ہیں اپنے کشتے ثبات دل کے ہیں

ہم نہ گئے جاگہ سے ہرگز قیمہ ہوئے تلواروں سے

حرف کی پہچان اس کو نہ تھی تو سادہ ہی کچھ اچھا تھا

بات اگر مانے ہے کوئی سو سو اب تکراروں سے

کوہکن و مجنوں یہ دونوں دشت و کوہ میں سرماریں

شوق نہیں ملنے کا ہم کو میر ایسے آواروں سے

میر تقی میر

یاں کام جا چکا ہے اب اختیار سے بھی

اکتوبر 6, 2015میر تقی میر،اساتذہ،غزلمزار،کنار،پیار،انار،انتظار،اختیار،بہارadmin

دیوان چہارم غزل 1489

اے کاش کوئی جاکر کہہ آوے یار سے بھی

یاں کام جا چکا ہے اب اختیار سے بھی

تاچند بے دماغی کب تک سخن خشن ہو

کوئی تو بات کریے اخلاص پیار سے بھی

یک معنی شگفتہ سو رنگ بندھ گئے ہیں

الوان گل ہیں ہر سو اب کے بہار سے بھی

کیا جیب و آستیں ہی سیلاب خیز ہے یاں

دریا بہا کریں ہیں میرے کنار سے بھی

باغ وفا سے ہم نے پایا سو پھل یہ پایا

سینے میں چاک تر ہے دل اب انار سے بھی

راہ اس کی برسوں دیکھی آنکھیں غبار لائیں

نکلا نہ کام اپنا اس انتظار سے بھی

جان و جہاں سے گذرا میں میر جن کی خاطر

بچ کر نکلتے ہیں وے میرے مزار سے بھی

میر تقی میر

کارواں جاتا رہا ہم خواب ہی میں مر گئے

اکتوبر 6, 2015میر تقی میر،اساتذہ،غزلمر،گھر،پرadmin

دیوان چہارم غزل 1488

نقد دل غفلت سے کھویا راہ کھوٹی کر گئے

کارواں جاتا رہا ہم خواب ہی میں مر گئے

کیا کہیں ان نے جو پھیرا اپنے در پر سے ہمیں

مر گئے غیرت سے ہم بھی پر نہ اس کے گھر گئے

واعظ ناکس کی باتوں پر کوئی جاتا ہے میر

آئو میخانے چلو تم کس کے کہنے پر گئے

میر تقی میر

ناز و غرور بہت ہے اس کا لطف نہیں ہے کم کم بھی

اکتوبر 6, 2015میر تقی میر،اساتذہ،غزلہم،موسم،ماتم،محرم،مرہم،کم،عالمadmin

دیوان چہارم غزل 1487

میں تو تنک صبری سے اپنی رہ نہیں سکتا اک دم بھی

ناز و غرور بہت ہے اس کا لطف نہیں ہے کم کم بھی

جامۂ احرام آخر تہ کر دل کی اور توجہ کی

در پہ حرم کے اس لیے تھے ہم کوئی ملے گا محرم بھی

دیکھ ہوا کو طائر گلشن کس حسرت سے کہتے تھے

گل ہی چلے جاتے نہیں یاں سے چلنے کو بیٹھے ہیں ہم بھی

کیا کیا میں بیتاب رہا ہوں رنج و الم سے محبت کے

ہے عالم کچھ اور ہی میرے دل کے مرض کا عالم بھی

پنبہ و داغ کیا ہے کیا کیا اچھے ہونے والے نہ تھے

زخموں پر چھاتی کے میری رکھ دیکھو نہ مرہم بھی

گرم ہوا ہے ہو گا جوہر سیر چمن کی کر لیجے

پھول بکھرتے جاتے ہیں کچھ آخر ہے اب موسم بھی

نعل جڑے سینے کو کوٹا چہرے نچے پر خاک ملی

میر کیا ہے میں نے نہایت دل جانے کا ماتم بھی

میر تقی میر

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: