زمرہ جات کے محفوظات: غزل

زندگی دشواریوں میں محو ہے

جولائی 19, 2018افتخار فلک،اذیت،غزلمکاریوں،الماریوں،بےچاریوں،خودداریوں،دلداریوں،درباریوں،دشواریوں،زاریوں،غداریوںadmin

موت کی تیاریوں میں محو ہے

زندگی دشواریوں میں محو ہے

بچنا بیلوں کا بہت مشکل ہے اب

لومڑی مکاریوں میں محو ہے

کیا بنے گا میرے پاکستان کا

ہر کوئی غداریوں میں محو ہے

بےغرض بےکار بیٹھا ہے یہاں

خود نما خودداریوں میں محو ہے

قصر ڈھایا جا چکا لیکن ابھی

بارشہ درباریوں میں محو ہے

مر گیا تو کیا ہوا مرنا ہی تھا!

کون آہ و زاریوں میں محو ہے؟؟

سُن! زمیں کرب و بلا بننے لگی

اور تو دلداریوں میں محو ہے!!

یا خدا ! چشمِ نفس کو کیا ہوا؟

کھڑکیوں الماریوں میں محو ہے

چھوڑ دے پیچھا فلک کا ، وہ اگر

عورتوں بےچاریوں میں محو ہے،

افتخار فلک

یہاں جتنی سہولت ہے اذیّت ہے

جولائی 18, 2018افتخار فلک،اذیت،غزلمحبّت،تمازت،سہولت،ضرورت،طبیعتadmin

انا زادوں سے نسبت ہے، اذیّت ہے

یہاں جتنی سہولت ہے اذیّت ہے

خردمندی اِسی میں ہے اُٹھا لے جا

تجھے میری ضرورت ہے اذیّت ہے

ترے پیچھے چلے جانا چلے آنا

بڑی کافر طبیعت ہے اذیّت ہے

بلا کا بدگُماں ہے وہ، مگر پھر بھی

مجھے اُس سے محبّت ہے اذیّت ہے

اُٹھا کر پھینک دے ساری کتابوں کو

اگر اُن میں نصیحت ہے ، اذیّت ہے

ابھی باہر پڑا رہنے دے سردی میں

ابھی مجھ میں تمازت ہے اذیّت ہے

فلک تجھ سے کہا تھا نا! محبّت میں

اذیّت ہے ۔ اذیّت ہے ۔ اذیّت ہے

افتخار فلک

مرے قد کو گھٹایا جا رہا ہے

جولائی 17, 2018افتخار فلک،اذیت،غزللڑایا،لگایا،لایا،نچایا،گھٹایا،پلایا،جلایاadmin

مجھے شیشہ دِکھایا جا رہا ہے

مرے قد کو گھٹایا جا رہا ہے

مرا ویران مے خانہ گِرا کر

مجھے مسجد میں لایا جا رہا ہے

میں باغی ہو گیا ہوں اس لیے بھی

مجھے پارا پِلایا جا رہا ہے

نہ جانے کس خوشی میں شہر کے سب

ملنگوں کو نچایا جا رہا ہے

بتا اے جوتشی! کس کس حسیں کو

مرے پیچھے لگایا جا رہا ہے

یہ کیسا فائدہ ہے جس کی خاطر

ہمیں خود سے لڑایا جا رہا ہے

چراغاں کا بہانہ کر کے یارو!

مرے گھر کو جلایا جا رہا ہے

افتخار فلک

چِراغِ شب طمانچے کھا رہا ہے

جولائی 16, 2018افتخار فلک،اذیت،غزلہوا،گیا،پڑا،التجا،جانتا،رہاadmin

ہوا نے سانحہ روکا ہوا ہے

چِراغِ شب طمانچے کھا رہا ہے

جسے میں یاد کر کے رو رہا ہوں

اُسے تیرا خدا بھی جانتا ہے

محبت انتقاماً مر گئی کیوں؟

دعاے مغفرت کی اِلتجا ہے

کوئی ظلِّ الٰہی کو بتائے

عدو، ملکہ کا دیوانہ ہوا ہے

نمازیں پڑھنے والوں کا رویّہ

محلّے کی مساجد میں پڑا ہے

فلکؔ زادوں کی نیندیں اُڑ رہی ہیں

مرے ہاتھوں میں سورج آ گیا ہے

افتخار فلک

اور عقل و آگہی پہ بار ہے

جولائی 15, 2018افتخار فلک،اذیت،غزلہار،یار،کردار،اظہار،اغیار،بیمار،بار،تلوارadmin

عشق رنگ و نور کا مینار ہے

اور عقل و آگہی پہ بار ہے

وصل تکمیلِ فغاں ہے دوستاں!

ہجر رقصِ نیزہ و تلوار ہے

آنکھ پردوں میں چھُپا قاتل کوئی

دل حریصِ بارگاہِ یار ہے

شور کا شر کھولتا گہرا کنواں

چپ دعاے بخت کا اظہار ہے

رات تہذیبِ نظر کی کافری

دن کہیں لیٹا ہوا بیمار ہے

جسم کاغذ پر لکھا حرفِ غلط

رُوح کوئی خارجی کردار ہے

زندگی سرسبز پیڑوں کی دھمال

موت سورج کے گلے کا ہار ہے

جیت جشنِ دل فریبی ہے فلکؔ!

ہار لوحِ تربتِ اغیار ہے

افتخار فلک

مرے کمرے میں گہری خامشی ہے

جولائی 14, 2018افتخار فلک،اذیت،غزللی،اٹھی،جانتی،خامشی،دوستی،رہیadmin

فضائے جان و دل بہتر ہوئی ہے

مرے کمرے میں گہری خامشی ہے

بہت سادہ، بہت معصوم ہے وہ

اسے میری محبت جانتی ہے

مرے پاؤں ہری شاخوں سے باندھو

مری آنکھوں نے دنیا دیکھ لی ہے

چراغوں کی صفیں سیدھی کراؤ

اندھیری شب ابھی سو کر اٹھی ہے

کسی طوفان کی آمد ہے پیارے

مجھے میری چھٹی حس کہہ رہی ہے

قد و قامت قیامت ہے سنا ہے

مجھے ملنے کی جلدی ہو رہی ہے

خدا، عورت، کتابیں گھر پرندے

مری پانچوں سے گہری دوستی ہے

افتخار فلک

جہاں ، جہاں ، جہاں کھُلا، صراطِ مُستقیم سے

جولائی 13, 2018افتخار فلک،اذیت،غزلفکاں،آسماں،ازاں،جہاں،جاں،دلبراںadmin

خدائے مہرباں کھُلا صراطِ مُستقیم سے

جہاں ، جہاں ، جہاں کھُلا، صراطِ مُستقیم سے

میں چل پڑا تو حد ہوئی، ہر اک جگہ مدد ہوئی

قدیم آسماں کھُلا صراطِ مُستقیم سے

نظر کی پیش گوئیاں ہیں آج بھی عُروج پر

عُروج، جاں بہ جاں کھُلا صراطِ مُستقیم سے

ترا حُصول انتہائے معرفت ہے یا خدا!

فرازِ کُن فکاں کھُلا، صراطِ مُستقیم سے

بسر کیا گیا یہاں حیاتِ بے ثبات کو

ثبات بعد ازاں کھُلا صراطِ مُستقیم سے

بُتوں کو چھوڑنا پڑا، مجھے یہ کھولنا پڑا

خدائے دِلبراں کھُلا صراطِ مُستقیم سے

افتخار فلک

مُسکرا کر ہمیں مِلا کیجے

جولائی 12, 2018افتخار فلک،اذیت،غزللیا،ملا،اڑا،بڑا،بھرا،دھنا،دعاadmin

آپ برہم نہ یوں ہوا کیجے

مُسکرا کر ہمیں مِلا کیجے

خوب صورت اگر دِکھائی دیں

ہم پہ پتھّر اُٹھا لیا کیجے

حُسن حیرت کا پیش خیمہ ہے

اِس عقیدے پہ سر دُھنا کیجے

ہم تکلّف کو بھول جاتے ہیں

آپ بھی دل ذرا بڑا کیجے

یہ ہے دنیا یہاں شکاری ہیں

اپنے اندر ہی اب اُڑا کیجے

سب درختوں پہ بُور آنے لگے

یار! ایسی کوئی دُعا کیجے

بات کرنا اگر نہیں آتا

خامشی کو ہرا بھرا کیجے

افتخار فلک

چور عہدِ سامری کے جل پری تک آ گئے

جولائی 11, 2018افتخار فلک،اذیت،غزلڈھولچی،گدگدی،پری،خودکشی،خودسری،سبزگی،سرخوشی،شاعریadmin

روشنی کی ڈور تھامے زندگی تک آ گئے

چور عہدِ سامری کے جل پری تک آ گئے

واعظانِ خوش ہوس کی جِھڑکیاں سُنتے ہوئے

لاشعوری طور پر ہم سرخوشی تک آ گئے

ڈھول پیٹا جا رہا تھا اور خالی پیٹ ہم

ہنستے گاتے تھاپ سنتے ڈھولچی تک آ گئے

واہموں کی ناتمامی کا علاقہ چھوڑ کر

کچھ پرندے ہاتھ باندھے سبزگی تک آ گئے

بھائی بہنوں کی محبت کا نشہ مت پوچھیے

بےتکلّف ہو گئے تو گُدگُدی تک آ گئے

چاکِ تُہمت پر گُھمایا جا رہا تھا عشق کو

جب ہمارے اشک خوابِ خودکُشی تک آ گئے

گالیاں بکنے لگے ، غُصّے ہوئے ، لڑنے لگے

رقص کرتے کرتے ہم بھی خودسری تک آ گئے

اے حسیں لڑکی! تمھارے حُسن کے لذّت پرست

کافری سے سر بچا کر شاعری تک آ گئے

افتخار فلک

فرازِ آدمیّت کا ستارا ہاتھ لگ جائے

جولائی 10, 2018افتخار فلک،اذیت،غزلہمارا،گارا،تمہارا،دوبارہ،سہارا،ستاراadmin

لگے ہاتھوں خدائی استعارہ ہاتھ لگ جائے

فرازِ آدمیّت کا ستارا ہاتھ لگ جائے

کئی عشّاق پیڑوں کی طبیعت صاف ہو جائے

پرندوں کے پروں کو گر ہمارا ہاتھ لگ جائے

مجھے کوزہ گری کا فن ودیعت ہو رہا ہو جب

دعا کیجے اُسی لمحے یہ گارا ہاتھ لگ جائے

غزل سے نعت کی جانب سفر آسان ہو جائے

وِلائے پنج تن کا گر سہارا ہاتھ لگ جائے

میں اک دم شاد ہو جاؤں نویدِ زندگی پاؤں

مجھے قسمت سے گر جاناں تمہارا ہاتھ لگ جائے

فلکؔ محجور ہونے تک حریمِ ناز کا نقشہ

مرے اک اک حواری کے دوبارہ ہاتھ لگ جائے

افتخار فلک

اے مرے رہ نما! پِلا پانی

جولائی 9, 2018افتخار فلک،اذیت،غزلکہا،گیا،پلا،بہا،بنا،بھرا،رہاadmin

آج تو زہر بھی لگا پانی

اے مرے رہ نما! پِلا پانی

گھر کے دالان سے گزرتے ہوئے

عکس اپنا گِرا گیا پانی

اب مرے چار سُو پرندے ہیں

آنکھ سے اِس قدر بہا پانی

جب کسی پیڑ نے دُہائی دی

دشت نے چیخ کر کہا، پانی!

ہاں مری آخری ضرورت ہے

ٹھنڈا، میٹھا، ہرا بھرا پانی

اب کوئی معجزہ نہیں ہو گا

کرتبی! شوق سے بنا پانی

خیمۂ تشنگی میں بچّوں کو

دور سے دیکھتا رہا، پانی

افتخار فلک

جڑیں کاٹتے ہیں وبال آسمانی

جولائی 8, 2018افتخار فلک،اذیت،غزلمثال،نکال،چال،وبال،برشگال،جلال،دھمالadmin

تہِ خاک خواب و خیال آسمانی

جڑیں کاٹتے ہیں وبال آسمانی

مرے من پہ طاری مرے تن پہ جاری

محبت زمینی، دھمال آسمانی

ہمیں گرمئ روز و شب سے بچا لے

زمیں پر بچھا! برشگال آسمانی

پریشان ہو کر نہ دیکھو مجھے تم

نہیں دے رہا میں مثال آسمانی

زمیں بوس ہونے کو تیار ہوں میں

کہاں تک چلے گا تو چال آسمانی؟

قدم ڈولنے تک خبرگیر لمحے

مرے دل سے کانٹا نکال آسمانی!

شبِ قدر کے قدرداں جانتے ہیں

فلک تیرا جاہ و جلال آسمانی

افتخار فلک

زہر کیسا لگا، ہو چکی خودکشی

جولائی 7, 2018افتخار فلک،اذیت،غزللی،مذہبی،چکی،کافری،کاغذی،گئی،آخری،جی،داخلیadmin

اے زمانے بتا، کیا ہوئی خودکشی

زہر کیسا لگا، ہو چکی خودکشی؟

سُرخروئی کے درجے کو پہنچی ہوئی

ہائے! ہائے! مری آخری خودکشی

ایک بھی کام دل سے نہیں ہو سکا

زندگی، شاعری، کافری، خودکشی

بھوک نے چاٹ لی وقفۂ شور میں

برتنوں میں سجائی گئی خودکشی

چار بچّوں کی ماں کیا کرے گی، جسے

کم سِنی میں ملی کاغذی خودکشی

سارہؔ، ثروتؔ، شکیبؔ اور میرے لیے

لا کوئی مدھ بھری مذہبی خودکشی

عشق نے جو کیا حال، مت پوچھیے

کر گئے ہوش میں شیخ جی خودکشی

روکنے ٹوکنے والا کوئی نہیں

روز کرتا ہوں میں داخلی خودکشی

پیڑ، پودے فلکؔ چیخنے لگ گئے

سب پرندوں نے جب سوچ لی خودکشی

افتخار فلک

صاحبا! خاک نشینوں کو فراغت کیسی

جولائی 6, 2018افتخار فلک،اذیت،غزلفراغت،وحشت،اجازت،حیرت،شہرت،عجلتadmin

کربلا نقش ہے سینوں میں ، اذیّت کیسی

صاحبا! خاک نشینوں کو فراغت کیسی

میں نہ یوسفؑ نہ مسیحائی کے فن میں یکتا

پھر یہ کم بخت مرے نام کی شہرت کیسی؟

میرؔ سے، جونؔ سے نسبت کا اثر ہے صاحب!

میں اگر شعر سناتا ہوں تو حیرت کیسی؟

اِس سے صحرا کی جلالت میں کمی آتی ہے

ساتھ لائے ہو مرے یار یہ وحشت کیسی؟

مذہبِ حُسن و محبت کے شفا خانوں پر

مے کشو! جام اُٹھانے کی اجازت کیسی؟

میں فلکؔ زاد، بلا نوش تری مرضی پر

آسماں چھوڑ کے آتا ہوں تو عجلت کیسی؟

افتخار فلک

جب گونگے اشجار ٹھکانے لگتے ہیں

جولائی 5, 2018افتخار فلک،اذیت،غزلیار،پار،انبار،اشجار،بےکارadmin

اسرار و آثار ٹھکانے لگتے ہیں

جب گونگے اشجار ٹھکانے لگتے ہیں

دیواروں کو خواب سنانے والے لوگ

آنکھوں کے اُس پار ٹھکانے لگتے ہیں

آزادی آسان کہاں ہے پہلے تو

لاشوں کے انبار ٹھکانے لگتے ہیں

ہائے محبت! تیری خاطر جیتے جی

کیسے کیسے یار ٹھکانے لگتے ہیں

لوگ تامّل میں مر جاتے ہیں لیکن

ھم ایسے بےکار ٹھکانے لگتے ہیں

افتخار فلک

یعنی روشن مزید ہوتے ہیں

جولائی 4, 2018افتخار فلک،اذیت،غزلمفید،مرید،مزید،یٙزید،پلید،جدید،خرید،رسید،سدید،شہید،شنید،شدیدadmin

آگ سے مُستفید ہوتے ہیں

یعنی روشن مزید ہوتے ہیں

سب روایت سے دُھل کے آتے ہیں

شعر جتنے جدید ہوتے ہیں

کیا یہ کم ہے کہ عشق کرنے پر

منھ پہ تھپڑ رسید ہوتے ہیں

یار! غازی نہیں ہوا کرتے

عشق میں سب شہید ہوتے ہیں

آپ کو دیکھ کر جو ہکلائیں

آپ کے زٙر خرید ہوتے ہیں

شعر کہنے میں احتیاط میاں!

لوگ انور سدید ہوتے ہیں

ہم تڑپتے ہیں اور وہ ہنس ہنس کر

محوِ گُفت و شُنید ہوتے ہیں

دیں بچاتے ہیں بیچ دیتے ہیں

مولوی بھی یٙزید ہوتے ہیں

یہ جو فتوا لگا ہے کافر کا

ایسے فتوے مُفید ہوتے ہیں

کچھ تو ہوتے ہیں پکّے پکّے مرد

اور کچھ رن مُرید ہوتے ہیں

وقت بھرتا ہے دھیرے دھیرے انھیں

زخم جتنے شدید ہوتے ہیں

ایسی سوچوں سے دور رہتے ہیں

ذہن جن سے پلید ہوتے ہیں

افتخار فلک

ایسی غفلت نہیں کروں گا میں

جولائی 3, 2018افتخار فلک،اذیت،غزلہجرت،منّت،محبّت،بیعت،تلاوت،رعایت،سیاست،شکایت،غفلت،غیبت،غیرتadmin

خواب رُخصت نہیں کروں گا میں

ایسی غفلت نہیں کروں گا میں

مُردہ بھائی کا گوشت اُف اللّہ!

یار! غِیبت نہیں کروں گا میں

اچھّے لوگوں سے معذرت میری

اب سیاست نہیں کروں گا میں

جان دے دوں گا اے یزیدِ وقت!

تیری بیعت نہیں کروں گا میں

جلتے خِیموں کا ذکر کرتے ہوئے

غم تِلاوت نہیں کروں گا میں

بات کیسے بڑھے گی بگڑے گی؟

جب شکایت نہیں کروں گا میں

لوگ مارے گئے اگر میرے

پھر رعایت نہیں کروں گا میں

کام سارے کروں گا مرضی کے

بس! محبّت نہیں کروں گا میں

دل سے چاہے نکال دو مجھ کو

دل سے ہجرت نہیں کروں گا میں

تجھ پہ مرتا ہوں بات سچّی ہے

پھر بھی مِنّت نہیں کروں گا میں

اُس نے میرے وطن کو گالی دی

کیسے غیرت نہیں کروں گا میں!!

افتخار فلک

ہم جو ناچار خودکشی کرلیں

جولائی 2, 2018افتخار فلک،اذیت،غزلقلمکار،ناچار،یار،کردار،بار،دار،سمجھدارadmin

در و دیوار خودکشی کرلیں

ہم جو ناچار خودکشی کرلیں

پھر نہ کہنا مذاق تھا پیارے!

واقعی! یار! خودکشی کرلیں؟؟

کام کرنا ہی شرط ہے تو پھر

کیوں نہ اس بار خودکشی کرلیں!

جن چراغوں کو موت کا ڈر ہے

وہ سرِ دار خودکشی کرلیں

اس سے پہلے کہ سامعیں سوئیں

اہم کردار خودکشی کرلیں

جو ہیں ناداں وہ زندگی جھیلیں

اور سمجھدار خودکشی کرلیں

میں تو کہتا ہوں "جوش” کی مانیں

سب قلمکار خودکشی کرلیں

افتخار فلک

دشت میں عشق کی ہچکیاں رہ گئیں

جولائی 1, 2018افتخار فلک،اذیت،غزلہچکیاں،لڑکیاں،مستیاں،ڈگریاں،بیٹیاں،برچھیاں،تیزیاں،عرضیاںadmin

قیس کے نام کی تختیاں رہ گئیں

دشت میں عشق کی ہچکیاں رہ گئیں

سب دکانوں پہ وحشت کی تجویز پر

تِیر، چاقو، تبر، برچھیاں رہ گئیں

میں میاں بخشؒ سے مل کے رویا بہت

میرے سینے میں کچھ عرضیاں رہ گئیں

روزِ اوّل سے میں خُوبرو تھا، مجھے

مصر میں ڈھونڈتی لڑکیاں رہ گئیں

فن قلندر بناتا رہا، مُرشدی!

عِلم کے ہاتھ میں ڈِگریاں رہ گئیں

خود پرستی کے متروک ابواب میں

تیرے قصّے، مری مستیاں رہ گئیں

کوئی بھی وقت پر گھر نہیں جا سکا

سب دھری کی دھری تیزیاں رہ گئیں

منہ پہ چیچک کے دانوں کی بہتات تھی

گھر میں محفوظ یوں بیٹیاں رہ گئیں

افتخار فلک

کہ کارِبےکار و بےقراری میں لگ گیا ہوں

جون 30, 2018افتخار فلک،اذیت،غزلیاری،اشکباری،بےقراری،خاکساری،شرمساریadmin

حضور! شہرت کی آب کاری میں لگ گیا ہوں

کہ کارِبےکار و بےقراری میں لگ گیا ہوں

میں نفسیاتی ضیافتوں کا شکار ہو کر

ترے تقرب کی آب یاری میں لگ گیا ہوں

یہ دنیاداری مجھے گوارا نہیں پرندو

مرے مریدو! میں خاکساری میں لگ گیا ہوں

زمیں کی ساری غلیظ رسموں سے ہاتھ کرکے

زہے فراغت کہ شرمساری میں لگ گیا ہوں

غریب ہوتی ہوئی محبت مجھے منا لے

برائے حجت میں اشکباری میں لگ گیا ہوں

افتخار فلک

اپنے چاند ستاروں میں آ بیٹھا ہوں

جون 29, 2018افتخار فلک،اذیت،غزلبیماروں،بازاروں،داروں،ستاروں،غاروںadmin

کچھ آوارہ یاروں میں آ بیٹھا ہوں

اپنے چاند ستاروں میں آ بیٹھا ہوں

آتے جاتے دیکھ رہے ہیں لوگ مجھے

بےزاری! بازاروں میں آ بیٹھا ہوں

سیکھ رہا ہوں سارے گُر مکّاری کے

کچھ دن سے زر داروں میں آ بیٹھا ہوں

دِل کی کالک دھُل جائے گی لمحوں میں

مولاؑ کے حُب داروں میں آ بیٹھا ہوں

موت مری تصویر اُٹھائے پِھرتی ہے

جب سے میں بیماروں میں آ بیٹھا ہوں

میں جنگل میں رہنے والا سبز نظر

عُریانی کے غاروں میں آ بیٹھا ہوں

افتخار فلک

میں ست رنگی پھول بنانے والا ہوں

جون 28, 2018افتخار فلک،اذیت،غزللانے،چلانے،اگانے،بنانے،بٹھانے،بتانےadmin

کوزہ گر کا ہاتھ بٹانے والا ہوں

میں ست رنگی پھول بنانے والا ہوں

دشمن کو بےکار سمجھنے والوں کو

دشمن کے اوصاف بتانے والا ہوں

چاک گریباں دیوانوں کی دعوت پر

وحشت کی تحریک چلانے والا ہوں

ایک اذیت زندہ رہنے والی ہے

میں جس کو تحریر میں لانے والا ہوں

گھر کی دیواروں سے کہنا سو جائیں

میں پہرے پر خواب بٹھانے والا ہوں

ہے کوئی ایسا جو میری امداد کرے

میں شہروں میں امن اگانے والا ہوں

افتخار فلک

سکوتِ شب کو کھٹک رہا ہوں، بہت برا ہوں

جون 27, 2018افتخار فلک،اذیت،غزلہوا،لاپتہ،مٹا،پڑا،برا،تھوکتا،رہاadmin

میں خود پسندی میں مبتلا ہوں، بہت برا ہوں

سکوتِ شب کو کھٹک رہا ہوں، بہت برا ہوں

مرے تعاقب میں نامرادی کا جِن لگا ہے

ہزار سالوں سے گھر پڑا ہوں، بہت برا ہوں

کئی حسینوں نے معذرت کے خطوط بھیجے

مگر میں پھر بھی لگا ہوا ہوں، بہت برا ہوں

نمک حرامی کروں گا دنیا کو چھوڑ دوں گا

تری محبت پر تھوکتا ہوں، بہت برا ہوں

تمام حوریں مری محبت سے باز آئیں

میں جنّتی ہوں مگر برا ہوں، بہت برا ہوں

مرے حواری، مری محبت کو عام کریو

میں ربِ غربت پہ مر مٹا ہوں، بہت برا ہوں

فلک نے رستہ دکھا دیا تو چلے چلیں گے

اسی بہانے تو لاپتہ ہوں، بہت برا ہوں

افتخار فلک

میں اک پاؤں پہ پورا ناچتا ہوں

جون 26, 2018افتخار فلک،اذیت،غزلکیسا،پورا،اچھا،ایسا،اکیلاadmin

پکڑ کر ہاتھ تیرا ناچتا ہوں

میں اک پاؤں پہ پورا ناچتا ہوں

خدائےحسن کو چھونے سے پہلے

میں کمرے میں اکیلا ناچتا ہوں

فرشتے آسماں سے جھانکتے ہیں

میں رنج و غم میں ایسا ناچتا ہوں

خدا جانے میں کتنا تھک چکا ہوں؟

خدا جانے میں کیسا ناچتا ہوں؟؟

مرا بھی ذکر محفل میں ہوا تھا

تو کیا اب میں بھی اچھا ناچتا ہوں!!!

افتخار فلک

یا کہیں بیٹھ کے رو لوں تو ہرا ہو جاؤں

جون 25, 2018افتخار فلک،اذیت،غزللوں،لیٹوں،ناچوں،گزاروں،پہنوں،بیٹھوںadmin

روشنی آنکھوں پہ باندھوں تو ہرا ہو جاؤں

یا کہیں بیٹھ کے رو لوں تو ہرا ہو جاؤں

دشت کی دست درازی سے پریشاں ہو کر

پیڑ کے سائے میں بیٹھوں تو ہرا ہو جاؤں

سبز تعویز اتارے ہوئے مدت گزری

اب ترے حکم سے پہنوں تو ہرا ہو جاؤں

رات آفات کے جنگل میں گزاری میں نے

دن ترے ساتھ گزاروں تو ہرا ہو جاؤں

ہجر میں اور تو کچھ بھی نہیں ہوتا مجھ سے

میں تری یاد میں ناچوں تو ہرا ہو جاؤں

موت کی مشق مشقت سے مبرا ہے فلک

بسترِ مرگ پہ لیٹوں تو ہرا ہو جاؤں

افتخار فلک

دل ابھی پائمال مت کریو

جون 24, 2018افتخار فلک،اذیت،غزلپائمال،انتقال،بحال،دھمال،سوالadmin

وقفِ رنج و ملال مت کریو

دل ابھی پائمال مت کریو!

زخم دامن سمیٹ لیتے ھیں

دیکھیو! تم دھمال مت کریو!

کریو دشمن کو لاجواب تو یوں

اس سے کوئی سوال مت کریو!

میں ابھی بزدلوں میں بیٹھا ہوں

میرا گریہ بحال مت کریو!

دھیرے دھیرے ہی چھوڑیو ھم کو

ایک دم انتقال مت کریو!!!

افتخار فلک

آپ کو نوکری مُبارک ہو

جون 23, 2018افتخار فلک،اذیت،غزلنوکری،پیشگی،دوستی،رہبری،علیadmin

دشت کی سروری مُبارک ہو

آپ کو نوکری مُبارک ہو

خوف کھاویں گے اب تو دشمن بھی

سانپ سے دوستی مُبارک ہو

قافلہ آسماں سے گزرے گا

رہ نما! رہبری مُبارک ہو

یار! کیا دِل رُبا خبر دی ہے

خیر ہو! پیشگی مُبارک ہو

مشکلیں ٹل گئیں قرینے سے

المدد یا علیؑ مُبارک ہو

افتخار فلک

آخ تھو! اس قدر بےبسی! آخ تھو

جون 22, 2018افتخار فلک،اذیت،غزلمولوی،بےبسی،جی،خودکشی،دشمنی،شاعری،عاشقیadmin

مسئلوں میں گھری زندگی، آخ تھو

آخ تھو! اس قدر بےبسی! آخ تھو

بھائیو! صبر سے، ہوش سے کام لو

اور مل کر کہو! عاشقی! آخ تھو

دوستوں کی محبت بڑی چیز ہے

دوستوں سے دغا! دشمنی! آخ تھو

چھوڑنے کا نہیں چاہے دنیا کہے

دل بری آخ تھو! شاعری آخ تھو!

بک گیا چار پیسوں کے لالچ میں تو

تجھ پہ مذہب شکن مولوی، آخ تھو!

اتنی آساں نہیں جتنی لگتی ہے یہ

چاہے آساں بھی ہو، خودکشی؟ آخ تھو

منھ بھی کڑوا ہوا، دل بھی میلا ہوا

باتیں سن کے تری شیخ جی! آخ تھو

افتخار فلک

کہ دشتِ سود و زیاں سے آگے اُتار مجھ کو

جون 21, 2018افتخار فلک،اذیت،غزلنشاں،وشاں،کہکشاں،گراں،دشمناں،زیاںadmin

بساطِ خورشیدِ جاں سے آگے اُتار مجھ کو

کہ دشتِ سود و زیاں سے آگے اُتار مجھ کو

پڑاؤ میرا یہیں کہیں ہے میں جانتا ہوں

سو بے نشاں کے نشاں سے آگے اُتار مجھ کو

کسے خبر ہے کہاں کہاں سے یہ چھیل ڈالے

بدن کے کوہِ گراں سے آگے اُتار مجھ کو

میں ارتقا کی اک ایک حد کو پھلانگ جاؤں

کبھی تو اِس کہکشاں سے آگے اُتار مجھ کو

عجب نہیں ہے کہ عشق کی موت مارا جاؤں

تُو کوچۂ مہ وشاں سے آگے اُتار مجھ کو

میں دوستوں کی عنایتوں سے ڈرا ہوا ہوں

فلکؔ صفِ دشمناں سے آگے اُتار مجھ کو

افتخار فلک

عالمِ غیب سے ہوتا ہے اشارہ مجھ کو

جون 20, 2018افتخار فلک،اذیت،غزلکھینچا،گھمایا،اندھا،اشارہ،بوڑھا،سلانا،سیاناadmin

دستِ خالی سے اڑانا ہے پرندہ مجھ کو

عالمِ غیب سے ہوتا ہے اشارہ مجھ کو

چابکِ آہ و فغاں راس نہیں آیا تا

رخشِ احساس نے کر دینا ہے بوڑھا مجھ کو

آج اک پل کو لگا، یوسفِ دوراں ہوں میں

اجنبی ہاتھ نے پیچھے سے جو کھینچا مجھ کو

مر تو سکتا ہوں مگر بھاگ نہیں سکتا میں

کر دیا آگ نے اس درجہ سیانا مجھ کو

میں وہیں خاک ہوا، خاک سے پھر خاک ہوا

کوزہ گر نے جہاں جلدی میں گھمایا مجھ کو

اے درختانِ ثمر بار اگر بار نہ ہو

میں مروں تو ہرے پتوں پہ سلانا مجھ کو

کون ؟ وہ خواجہ سرا؟؟ یار انہیں رہنے دو

سب تماشائی سمجھتے رہے اندھا مجھ کو

افتخار فلک

کروں گا داستاں کوئی نئی رقم، برادرم

جون 19, 2018افتخار فلک،اذیت،غزلقلم،برادرم،جنم،رقم،علمadmin

روا روی میں اٹھ گیا مرا قلم، برادرم

کروں گا داستاں کوئی نئی رقم، برادرم

جلوسِ دلبراں چلا، زمین کانپنے لگی

شعورِ عشق نے کہا، اٹھا علم، برادرم

خدا کرے زمین پر زمین زاد خوش رہیں

خدا کرے خدا کا ہو نیا جنم، برادرم

بے ہیں بےضمیر ہیں۔۔ یہی کہا ناں! آپ نے؟

تو پھر اٹھیں کریں ہمارا سر قلم، برادرم

گلہ ضرور کیجیے، مگر خفا نہ جایئے

ہماری بات تو سنیں، برادرم، برادرم!

افتخار فلک

اے مرے دِل رُبا! عشق کی بات کر

جون 18, 2018افتخار فلک،اذیت،غزلمری،نئی،وہی،کہی،کی،پری،اجنبیadmin

دِل پریشان ہے چل کوئی بات کر!

اے مرے دِل رُبا! عشق کی بات کر!

آج مجھ میں سما! میری بانہوں میں آ!

میں اکیلا ہوں نیلم پری! بات کر!

بات کرتے ہوئے آج اُس نے کہا

چھوڑ رنجش پُرانی نئی بات کر!

میں چلا جاؤں گا یہ نگر چھوڑ کر

مختصر ہی سہی اجنبی! بات کر!

آخری بار میری طرف دیکھ لے

آخری بار مجھ سے مِری بات کر!

یوں نہ باتیں بنا دُشمنِ جان و دل

تیرے دِل میں ہے جو ، بس وہی بات کر!

میں براے سخن! آگیا ہوں یہاں

سُن مِری ان سُنی! ان کہی بات کر!

افتخار فلک

جسے ضروری نہیں ہے کوئی اداے حیرت

جون 17, 2018افتخار فلک،اذیت،غزلفضاے،ابتداے،اداے،براے،دواے،دعاے،رداےadmin

ہماری حیرت وہ آئنہ ہے خداے حیرت

جسے ضروری نہیں ہے کوئی اداے حیرت

دھمال کرنے کو تم عقیدت سمجھ رہے ہو

نہیں او بھائی نہیں ، یہ ہے ابتداے حیرت

اگر کہیں تو تماش بینوں میں بانٹ دیں ہم

ہمارے کشکول میں پڑی ہے دواے حیرت

شگفتگی نامراد ٹھہرے تو نوچ ڈالیں

مرے قبیلے کے پست فطرت رداے حیرت

سنا ہے مجھ سے کلام کرنے کو آ رہے ہیں

درخت سارے ، پرند بوڑھے براےحیرت

نمودِ شامِ وصال تیری نزاکتوں سے

مہک رہی ہے کئی دنوں سے فضاے حیرت

جنہیں قدامت پسند ہونے پہ فخر ہے وہ

بتاؤ ، کیسے کریں گے آخر دعاے حیرت؟؟

افتخار فلک

ہم سے ہو گا نہیں یہ سِتم ، معذرت

جون 16, 2018افتخار فلک،اذیت،غزلقلم،قدم،محترم،نٙم،الم،دم،ستمadmin

دم بہ دم دل لگی دم بہ دم معذرت!

ہم سے ہو گا نہیں یہ سِتم ، معذرت!

رقص فرما ہیں یاں شیخ بھی، رِند بھی

اے خُدا! اے خُدا! مُحترم ، معذرت!

ہاتھ باندھے ہوئے تھے انا نے اگر

کیسے لکھتا مِرا پھر قلم ، معذرت!

سر پِھرے عشق سے سامنا ہے مِرا

زندگی تجھ سے اب ہر قدم معذرت!

صاحبا! دلبرا! اِک نظر اِس طرف

اب نہ ہو گی مِری آنکھ نٙم، معذرت!

چال کوئی بھی جب کارگر نہ ہوئی

یاد آئی مجھے ایک دم معذرت!

شب بہ خیر آج کوئی نہ بولے مجھے

آج کی رات ہے پُر الم، معذرت!!

سب مداری ہیں کوئی معزّز نہیں

حاکم و اہلِ دیں یک قلم معذرت!

افتخار فلک

پلکیں بھگو رہے تھے مرے سامنے درخت

جون 15, 2018افتخار فلک،اذیت،غزلہو،کھو،بھگو،رو،سوadmin

سرسبز ہو رہے تھے مرے سامنے درخت

پلکیں بھگو رہے تھے مرے سامنے درخت

گلشن بہار و بخت سے مہکا دیا گیا

جب ہوش کھو رہے تھے مرے سامنے درخت

دیکھا ہے میں نے آج بڑے انہماک سے

بیدار ہو رہے تھے مرے سامنے درخت

اِس خوابِ دل گداز کی تعبیر تو بتا

کل شام رو رہے تھے مرے سامنے درخت

پنچھی تمام رات مجھے گھورتے رہے

جنگل میں سو رہے تھے مرے سامنے درخت

افتخار فلک

سخی! محبت زدہ عقیدہ تری محبت

جون 14, 2018افتخار فلک،اذیت،غزلبقا،ترا،جڑا،جدا،زدہadmin

مرا تصوّف، مرا عقیدہ، تری محبت

سخی! محبت زدہ عقیدہ تری محبت

نمازِ مغرب قضا ہوئی تو ضمیر بولا!

کہ ہائے غافل! ترا عقیدہ، تری محبت

مری عقیدت سبھی عقیدوں سے ایک جیسی

مگر ہے سب سے جُدا عقیدہ تری محبت

تری قسم دے کے کہہ رہا ہوں مرے لئے تو

فنا صدی کا بقا عقیدہ، تری محبت

تری عطا پہ میں خوش ہوں میرے کریم مولا!

ہے لا اِلٰہ جڑا عقیدہ تری محبت

ذلیل دنیا نے ساتھ چھوڑا تو کام آئے

قدم، قدم پر ترا عقیدہ تری محبت

افتخار فلک

فوج کا سالار پاؤں پڑ گیا

جون 13, 2018افتخار فلک،اذیت،غزلآخرکار،اغیار،بےکار،تلوار،دنیادار،سالار،سردارadmin

مرکزی کردار پاؤں پڑ گیا

فوج کا سالار پاؤں پڑ گیا

میں اُسے حیراں کھڑا تکتا رہا

جب وہ دُنیادار پاؤں پڑ گیا

میں غلط تھا اِس لیے پاؤں پڑا

اور وہ بےکار پاؤں پڑ گیا!

جب ٹھکانے لگ گئی عقلِ سلیم

لشکرِ اغیار پاؤں پڑ گیا

ایک نٙو سرباز موقع ملتے ہی

کھینچ کر تلوار ، پاؤں پڑ گیا!

یار! یہ ممکن نہیں سچ سچ بتا

واقعی!! سردار پاؤں پڑ گیا؟؟؟

کل مجھے خاطر میں جو لاتا نہ تھا

وہ بھی آخرکار پاؤں پڑ گیا

افتخار فلک

میرا مطلب ہے جھوٹا خدا بچ گیا

جون 12, 2018افتخار فلک،اذیت،غزلفرا،لیا،نما،پا،آسرا،خداadmin

اک خُدا مر گیا دوسرا بچ گیا

میرا مطلب ہے جھوٹا خدا بچ گیا

سات رنگوں سے بنتا رہا یہ جہاں

رنگ آخر میں صرف اک ہرا بچ گیا

بچ بچاؤ میں کچھ بھی نہیں بچ سکا

کارواں لُٹ گیا رہ نُما بچ گیا

میں مصیبت میں تھا دوستو! دشمنو!

نام مُرشد کا جونہی لیا، بچ گیا

میری تدفین میں دیر مت کیجیو!

میرے پیچھے مرا نقشِ پا بچ گیا

معجزہ یہ نہیں جان بخشی ہوئی

سچ تو یہ ہے ترا آسرا بچ گیا

افتخار فلک

سمجھ لو اضطراب سے نکل گیا

جون 11, 2018افتخار فلک،اذیت،غزلآب،اضطراب،بوتراب،جناب،حجاب،رکابadmin

اگر میں دشتِ خواب سے نکل گیا

سمجھ لو اضطراب سے نکل گیا

بری خبر سناؤں؟ سن سکو گے تم؟

میں حلقۂ جناب سے نکل گیا

رموزیں چھانٹنے لگا فضول میں

ارے میں کیوں حجاب سے نکل گیا!

نکل گیا وہ سایۂ امان سے

جو عشقِ بوتراب سے نکل گیا

شکست ہو گئی مرے رقیب کو

کہ پاؤں جب رکاب سے نکل گیا

خوشی منا!گلے لگا کہ آج میں

حجابِ خاک و آب سے نکل گیا

افتخار فلک

ذکر میرا شاعروں میں آ گیا

جون 10, 2018افتخار فلک،اذیت،غزلقاتلوں،کھڑکیوں،کالجوں،پاگلوں،شاعروں،عاشقوںadmin

کافروں اور باغیوں میں آ گیا

ذکر میرا شاعروں میں آ گیا

روکتے ہیں یار مجھ کو عشق سے

میں یہ کیسے پاگلوں میں آ گیا؟

زخم کھاتا، خاک اُڑاتا ایک دن

میں بھی تیرے عاشقوں میں آ گیا

تُو نے میری سمت دیکھا اور پھر

نام تیرا قاتلوں میں آ گیا

یار! مجنوں کو اچانک کیا ہوا؟

چائے پینے کالجوں میں آ گیا!!

امن کا اجلاس جاری تھا ابھی

خوف اُڑ کر کِھڑکیوں میں آ گیا

افتخار فلک

میں اُسے بےفائدہ چکھتا رہا

جون 9, 2018افتخار فلک،اذیت،غزلقافیہ،معجزہ،آئنہ،بےفائدہ،تٙخلیہ،حادثہ،عارضہadmin

زندگی کا ذائقہ چکھتا رہا

میں اُسے بےفائدہ چکھتا رہا

اپنے کمرے میں اکیلا بیٹھ کر

رات بھر میں تٙخلیہ چکھتا رہا

شعر کہنے کی ہوس میں دوستو!

میں ردیف و قافیہ چکھتا رہا

تیرے پاؤں کے نِشاں رہبر بنے

کارواں یہ مُعجزہ چکھتا رہا

بال کھولے تُو سنورتی رہ گئی

تیری صُورت آئنہ چکھتا رہا

ماں تمہاری یاد میں بوڑھی ہوئی

باپ پیہم عارضہ چکھتا رہا

قہقہوں کے شور میں اِک مسخرہ

منھ چُھپائے حادثہ چکھتا رہا

افتخار فلک

میں پتھر کے پان بنانے والا تھا

جون 8, 2018افتخار فلک،اذیت،غزلنان،ناران،یونان،کان،پان،پاکستان،تان،سلطان،شیطانadmin

ہر مشکل آسان بنانے والا تھا

میں پتھر کے پان بنانے والا تھا

خوابوں کی تاویل سمجھ سے باہر تھی

جب میں پاکستان بنانے والا تھا

میری موت نے رستہ روکا ورنہ میں

لیّہ کو یونان بنانے والا تھا

حق باہو، حق باہو کہہ کر ایک فقیر

باہو کو سلطان بنانے والا تھا

مجھ ایسا بہلول کہاں سے لاؤ گے

نار سے جو ناران بنانے والا تھا

شہزادی نے جس کی خاطر زہر پیا

اک دیہاتی، نان بنانے والا تھا

آپ نے میرا ہاتھ نہ تھاما ہوتا تو

میں خود کو شیطان بنانے والا تھا

دروازوں کی شاکھ بچانے کی خاطر

دیواروں کے کان بنانے والا تھا

آپ کی اک اک بات غزل میں ڈھال کے میں

آن کی آن میں تان بنانے والا تھا

افتخار فلک

پھر اُس کے بعد پرندے نے گھر بنایا تھا

جون 7, 2018افتخار فلک،اذیت،غزلورغلایا،کھایا،اڑایا،اٹھایا،بنایا،جھکایا،جتایا،سایہadmin

شبیہِ حُجرۂ وحشت بنا کے لایا تھا

پھر اُس کے بعد پرندے نے گھر بنایا تھا

لہو کا رنگ یقینا” سفید ہے بھائی!

کہ اُس ذلیل نے ماں پر بھی ہاتھ اُٹھایا تھا

ہوا سے باندھ کے بن میں گھسیٹ لایا ہوں

مرے چِراغ نے تیرا مذاق اُڑایا تھا

میں سینہ تان کے نکلا تھا جانبِ مقتل

کئی ہزار دعاؤں کا مجھ پہ سایہ تھا

یہاں پہ رقص کا مطلب ہے زندگی پیارے!

کہ اس جگہ مرے مُرشد نے سر جھُکایا تھا

مرے پڑوس میں رہتی ہے وہ پری پیکر

سُنا ہے جس نے محبت میں زہر کھایا تھا

حیا فروش محلّے کی عورتوں نے مجھے

تمھارے نام سے چھیڑا تھا ، ورغلایا تھا

مجھے تو آج بھی لگتا ہے میں پرندہ ہوں

کہ مجھ پہ بانجھ درختوں نے حق جتایا تھا

افتخار فلک

اچّھا نہیں ہے خواب کا منظر رکھا ہوا

جون 6, 2018افتخار فلک،اذیت،غزلمنظر،پتھّر،اندر،اوپر،خنجرadmin

دل کے نگار خانہ سے باہر رکھا ہوا

اچّھا نہیں ہے خواب کا منظر رکھا ہوا

بے رنگ ہو کے گر پڑا فوراً چراغِ حُسن

تھا میں نے عشق ہاتھ کے اوپر رکھا ہوا

خطرہ ہے جم نہ جائے کہیں ضبط کا غبار

ہے دل کو ہم نے اس لیے اندر رکھا ہوا

کب ہو گئے فگار مرے ہاتھ کیا خبر

پہلو میں اُس نے تھا کہیں خنجر رکھا ہوا

اِس احتیاط سے تمہیں چاہا کہ اے فلکؔ!

اب تک زباں پہ چپ کا ہے پتھّر رکھا ہوا

افتخار فلک

حیراں ہوئے بغیر اِسے مت عبورنا

جون 5, 2018افتخار فلک،اذیت،غزلمہلت،مت،محبّت،تہمت،حضرت،شہوتadmin

آساں نہیں ہے جادۂ حیرت عبورنا

حیراں ہوئے بغیر اِسے مت عبورنا

میرے خلاف کوئی بھی بکتا رہے مگر

سیکھا ہے میں نے سرحدِ تُہمت عبورنا

صد آفریں! خیال تو اچّھا ہے واقعی

آنکھوں کو بند کرکے محبّت عبورنا

آوارگانِ عشق! ذرا احتیاط سے

وحشت کے بعد لذّتِ شہوت عبورنا!!

تعمیرِ ماہ و سال میں تاخیر کے بغیر

کس کو روا ہے عرصۂ مُہلت عبورنا؟

جُزوِ بدن بنے گا تو باہر بھی آئے گا

یہ زخم تھوڑی دیر سے حضرت! عبورنا

افتخار فلک

گونگا بہرا خالی کمرا

جون 4, 2018افتخار فلک،اذیت،غزلمیرا،کھولا،کرتا،بہرا،بھرتا،تنہا،تیراadmin

خالی گھر کا خالی کمرا

گونگا بہرا خالی کمرا

زندانوں سے بھی بدتر ہے

تیرا میرا خالی کمرا

ایک عزیز بچا ہے میرا

وہ بھی تنہا خالی کمرا

تیری یاد نے چوما مجھ کو

جب بھی کھولا خالی کمرا

تم کو اکثر یاد آئے گا

باتیں کرتا خالی کمرا

مجھ سے لپٹا روہا گھنٹوں

آہیں بھرتا خالی کمرا

دونوں اک جیسے لگتے ہیں

میں اور میرا خالی کمرا

یار فلک! اک بات کہیں میں

خوب ہے تیرا خالی کمرا

افتخار فلک

یہ عشق چاک گھماتے ہوئے نہیں ڈرتا

جون 3, 2018افتخار فلک،اذیت،غزللڑاتے،ملاتے،چباتے،کھاتے،گھماتے،سناتےadmin

نئے چراغ بناتے ہوئے نہیں ڈرتا

یہ عشق چاک گھماتے ہوئے نہیں ڈرتا

مرے وسیلے سے جتنے بھی پیڑ روئے ہیں

انہیں میں ہِیر سناتے ہوئے نہیں ڈرتا

حضور! آپ ہی روکیں کہ میں تو پاگل ہوں

کسی سے ہاتھ ملاتے ہوئے نہیں ڈرتا

ہزار بار بتایا کہ بد شگونی ہے!

مگر وہ ہونٹ چباتے ہوئے نہیں ڈرتا

میں پیٹ کاٹ کے زندہ ہوں اور ڈرتا ہوں

تُو فن کو بیچ کے کھاتے ہوئے نہیں ڈرتا؟

عجیب شوقِ طبیعت ہے افتخار فلکؔ

کوئی بھی آنکھ لڑاتے ہوئے نہیں ڈرتا

افتخار فلک

ہوا کا ہاتھ بٹاتا ہے کھا نہیں جاتا

جون 2, 2018افتخار فلک،اذیت،غزلنچاتا،ڈراتا،کھلاتا،اڑاتا،اٹھاتا،بہاتا،بٹاتاadmin

چراغ وقت بچاتا ہے کھا نہیں جاتا

ہوا کا ہاتھ بٹاتا ہے کھا نہیں جاتا

بزرگ پیڑ کی چھاؤں سے دور مت بیٹھو

یہ صرف ہاتھ اٹھاتا ہے کھا نہیں جاتا

یہ میرا باپ مرا آخری سہارا ہے

کما کے سب کو کھلاتا ہے کھا نہیں جاتا

چبا چبا کے نہ باتیں کرو ذرا تو کھلو

وہ سب کے درد بٹاتا ہے کھا نہیں جاتا

یہ عشق ہے سو شرارت سے کام لیتا ہے

بڑے بڑوں کو نچاتا ہے کھا نہیں جاتا

وہ سیر چشم ہے ایسا کہ بھوک لگنے پر

جنوں میں خاک اڑاتا ہے کھا نہیں جاتا

خیالِ یار کا دریا چڑھا ہوا ہے مگر

گلے لگا کے بہاتا ہے کھا نہیں جاتا

تم اس خدا پہ ہنسو گے جو روزإ اول سے

ڈرے ہوؤں کو ڈراتا ہے کھا نہیں جاتا

افتخار فلک

مِرے رقیبوں کو ڈھونڈ لاؤ ، نئے خُداؤ

جون 1, 2018افتخار فلک،اذیت،غزللاؤ،چناؤ،چھڑاؤ،ناؤ،کماؤ،پڑاؤ،سناؤadmin

میں بُھول جاؤں نہ رکھ رکھاؤ ، نئے خُداؤ!

مِرے رقیبوں کو ڈھونڈ لاؤ ، نئے خُداؤ!

مِری حِماقت پہ قہقہے کیوں لگا رہے ہو؟

قفس ہے اپنا نیا پڑاؤ ، نئے خُداؤ!

میں کُوفیوں کی طرح نہیں ہوں کہ چھوڑ جاؤں

مِری محبّت ہے سبز ناؤ! نئے خُداؤ!

غریبِ شہرِ اجل کی خاطر نئے سُروں میں

بھجن پُرانا کوئی سُناؤ ، نئے خُداؤ!

خُدا پرستوں کو بیچنے میں بقا ہے سب کی

ہمیں بھی بیچو ، شرف کماؤ ، نئے خُداؤ!

نئے خُداؤں کا اِنتخاب آج ہو رہا ہے

بتاؤ کیسے کریں چناؤ؟ نئے خُداؤ!!

میں اِس سے پہلے کہ خُودکُشی کو حیات بخشوں

مِری، محبّت سے جاں چُھڑاؤ ، نئے خُداؤ!

افتخار فلک

ہم جنہوں نے آنکھ کھولی جابروں کے درمیاں

اکتوبر 1, 2017ماجِد نشان،ماجد صدیقی،غزلقافلوں،مسجدوں،گھروں،جابروں،سرپھروں،شاطروںadmin

ماجد صدیقی ۔ غزل نمبر 1

ہو چکے جاگیر سی پیرون شہوں کے درمیاں

ہم جنہوں نے آنکھ کھولی جابروں کے درمیاں

یوں تو دیواریں ہیں اِن ساروں باہم متّصل

فاصلے بڑھنے لگے۔۔لیکن گھروں کے درمیاں

جس جگہ اہلِ نظر کو وہ نظر آیا کیا

وہ جگہ ہے منروں کے مسجدوں کے درمیاں

رہ بہ رہ جیسے خبر ہو گرم آدم خور کی

ایک سی ہے کھلبلی سب قافلوں کے درمیاں

رہبروں کے جال میں یوں خلق ہے صیدِ ہوس

مغویہ جیسے گھری ہو شاطروں کے درمیاں

فیصلہ کرنے کو ماجِد کون منصف آئے گا

مسئلہ اُلجھا ہوا ہے سَرپِھروں کے درمیاں

ماجد صدیقی

نظر کیونکر نہ رکھیں اُس پہ جو رت بھی سہانی ہے

اکتوبر 1, 2017ماجِد نشان،ماجد صدیقی،غزلنشانی،کہانی،گلفشانی،آسمانی،روانی،سہانیadmin

ماجد صدیقی ۔ غزل نمبر 2

ہمیں کاہے کو ہر پل پت جھڑوں سے بدگمانی ہے

نظر کیونکر نہ رکھیں اُس پہ جو رت بھی سہانی ہے

تعفّن آشنا ٹھہرے نہ ہو نابُود نظروں سے

وہ پانی خاک پر جس کو بہم پیہم روانی ہے

سحر کا دوپہر کا اور زوالِ شام کا منظر

تری ہو یا مری سب کی بس ایسی ہی کہانی ہے

حضور اپنے جو ہم جنسوں سے نت سجدے کراتا ہے

زمینی مت کہو اُس کو وہ حضرت آسمانی ہے

کسی کے جھوٹ کو تم جھوٹ ثابت کرکے دیکھو تو

سنو پھر اس سے کیا کیا پاس اُس کے گلفشانی ہے

وہ کنجشک و کبوتر ہو کہ ماجِد فاختہ اُس کے

پر و بازو میں لرزہ امن خواہی کی نشانی ہے

ماجد صدیقی

کوئی ہے ڈھب کا ٹھکانہ کہاں ہم ایسوں کا

اکتوبر 1, 2017ماجِد نشان،ماجد صدیقی،غزلکہاں،رواںadmin

ماجد صدیقی ۔ غزل نمبر 3

نہ فرشِ خاک نہ باغِ جناں ہم ایسوں کا

کوئی ہے ڈھب کا ٹھکانہ کہاں ہم ایسوں کا

نہ پُختگی ہو جو عزم و عمل میں تو ماجِد

کوئی بھی کام ہو کیونکر رواں ہم ایسوں کا

ماجد صدیقی

میں تِیرہ بخت ہوں ،دے، آفتاب دے مُجھ کو

اکتوبر 1, 2017ماجِد نشان،ماجد صدیقی،غزلآفتاب،جواب،خواب،خطاب،سحاب،شراب،عذابadmin

ماجد صدیقی ۔ غزل نمبر 4

نئی رُتوں،نئی فصلوں کی تاب دے مُجھ کو

میں تِیرہ بخت ہوں ،دے، آفتاب دے مُجھ کو

جو مُجھ کو حوصلہ، جِینے کا حوصلہ دے دیں

اُڑوں میں جِن کے سہارے وُہ خواب دے مُجھ کو

یہ تُو جو خود ہی کرے شاد، پِھر کرے ناشاد

یہ کیا مذاق ہے بس یہ جواب دے مُجھ کو

مری بساط بھی دیکھ اے خُدا! خُدا ہے جو تُو

میں جِن کا اہل ہوں ایسے عذاب دے مُجھ کو

ہُوا جو مجھ پہ ہر اُس ظلم کی تلافی ہو

مرے زماں!کوئی ایسا خطاب دے مُجھ کو

مجھے جو دے تو کوئی نعمتِ فراواں دے

تووں سا تپنے لگا ہُوں سحاب دے مُجھ کو

لہو کے بیچ سے جو حِدّتِ سکوں بخشے

رگوں سے خِلق ہو جو وُہ شراب دے مُجھ کو

ماجد صدیقی

اُس کی نیّت ہو چلی تھی بھیگے موسم کی طرح

اکتوبر 1, 2017ماجِد نشان،ماجد صدیقی،غزلموسم،پیہم،آدم،خم،سم،شبنمadmin

ماجد صدیقی ۔ غزل نمبر 5

مُڑنے والی تھی وُہ ساحل کی طرف یم کی طرح

اُس کی نیّت ہو چلی تھی بھیگے موسم کی طرح

اُس کی انگڑائی میں دعوت تھی بہ اندازِ دگر

ابروؤں میں آنے والے دلنشیں خم کی طرح

پیش قدمی میں عجب امرت تھا پھیلا چار سُو

اُس کا ہر ہٹتا قدم لگنے لگا سم کی طرح

کہہ رہا تھا مجھ سے جیسے اُس کا فردوسِ بدن

دیکھنا رہ سے بھٹک جانا نہ آدم کی طرح

نشّۂ دیدار اُس کا اب کے تھا کُچھ اور ہی

آنکھ میں اُتری لگی وُہ کیفِ پیہم کی طرح

یہ بدن ماجِد سحرآثار ہو جانے لگا

اس سے ملنے کا اثر تھا گل پہ شبنم کی طرح

ماجد صدیقی

ٹھکانہ تھا جہاں اب وُہ شجر ،اچّھا نہیں لگتا

اکتوبر 1, 2017ماجِد نشان،ماجد صدیقی،غزلہنر،نگر،بر،زر،سفر،سحر،سر،شجرadmin

ماجد صدیقی ۔ غزل نمبر 6

مری صورت ہے جو بے بال و پر ، اچّھا نہیں لگتا

ٹھکانہ تھا جہاں اب وُہ شجر ،اچّھا نہیں لگتا

ذرا سا بھی جو چہرے کو تکدّر آشنا کردے

اُنہیں ہم سا کوئی شوریدہ سر اچّھا نہیں لگتا

بہت کم گھر نفاذِ جبر پر چُپ تھے، سو اچّھے تھے

مگر یوں ہے کہ اب سارا نگر اچّھا نہیں لگتا

قدم بے سمت ہیں اور رہنما منصب سے بیگانہ

ہمیں درپیش ہے جو وُہ سفر اچّھا نہیں لگتا

مثالِ کودکاں بہلائے رکھنا بالغوں تک کو

ہنر اچُھا ہے لیکن یہ ہنر اچّھا نہیں لگتا

چہکنا شام کو چڑیوں کا ماتم ہے گئے دن کا

مگر ماتم یہ ہنگامِ سحر اچّھا نہیں لگتا

گلوں نے جن رُتوں سے ہیئتِ پیغام بدلی ہے

غضب یہ ہے ہَوا سا نامہ بر اچّھا نہیں لگتا

کہیں کیونکر نہ ماجِد زر سے ہی جب سُرخیٔ خوں ہے

نہیں لگتا ہمیں فقدانِ زر، اچّھا نہیں لگتا

ماجد صدیقی

وہ جو پُر لطف تھے روزوشب موڑ دے

اکتوبر 1, 2017ماجِد نشان،ماجد صدیقی،غزللب،اب،تب،تعب،روزوشب،سب،طربadmin

ماجد صدیقی ۔ غزل نمبر 7

مجھ سے جو چھن گئے،میرے رب موڑ دے

وہ جو پُر لطف تھے روزوشب موڑ دے

فاختاؤں کے حق میں خلافِ ستم

رگ بہ رگ تھا جو رنج و تعب موڑ دے

ساتھ اپنے ہی جس میں سخن اور تھے

خلوتوں کی وہ بزمِ طرب موڑ دے

جس سے مُکھ تھا انگاروں سا دہکا ہوا

مُو بہ مُو تھی جو وہ تاب و تب موڑ دے

الجھنوں کا تھا جن پر نہ سایہ تلک

ہاں وہ لمحاتِ خندہ بہ لب موڑ دے

نام اوروں کے جتنے شرف ہیں مرے

مجھ کو موڑے نہ تھے جو، وہ اب موڑ دے

رنج جو بھی ملے ،عفو کی شکل میں

دینے والوں کو ماجِد وہ سب موڑ دے

ماجد صدیقی

بیوگاں سی گُنگ تنہائی لگے

اکتوبر 1, 2017ماجِد نشان،ماجد صدیقی،غزلمہنگائی،کھائی،بھرّائی،تنہائی،دارائی،سودائی،شہنائیadmin

ماجد صدیقی ۔ غزل نمبر 8

لب بہ لب جو ہر کہیں چھائی لگے

بیوگاں سی گُنگ تنہائی لگے

ناتواں کی سمت میزائل کی کاٹ

جابروں کو صَوتِ شہنائی لگے

اسلحہ چھینے نوالے خلق کے

اور روزافزوں یہ مہنگائی لگے

سُو بہ سُو پھیلے ہیں پھندے حرص کے

ہر قدم پر سامنے کھائی لگے

امن کی جانب توجّہ چاہتی

جو صدا بھی ہے وُہ بھرّائی لگے

ہم سخن کی سلطنت کے شاہ ہیں

ہاں ہمیں زیبا یہ دارائی لگے

گُم شدہ محمل جو ڈھونڈے دشت میں

اپنا ماجِد بھی وُہ سَودائی لگے

ماجد صدیقی

بے دم ہے پیڑ پیڑ چمن کا چِتاؤں میں

اکتوبر 1, 2017ماجِد نشان،ماجد صدیقی،غزلہواؤں،چھاؤں،چتاؤں،گپھاؤں،گاؤں،صداؤںadmin

ماجد صدیقی ۔ غزل نمبر 9

گھرنے لگے ہم آپ یہ کیسی خزاؤں میں

بے دم ہے پیڑ پیڑ چمن کا چِتاؤں میں

کچھ دودو گردوشور ہی نقصاں رساں نہیں

خبروں کا زہر بھی تو ملا ہے ہواؤں میں

دھن دھونس دھاندلی کے مسلسل داباؤ سے

لرزہ سنائی دینے لگا ہے صداؤں میں

گوشہ کوئی کہ جس میں درندوں سے ہو اماں

ہر شخص چل پڑا ہے پلٹ کر گُپھاؤں میں

اللہ اس کو اور نمو اور تاب دے

یاور وہ پیڑ ہم ہیں مگن جس کی چھاؤں میں

پینچوں کے بل پہ شہ تو ہوا اور مقتدر

ماجِد غلامیوں کے چلن پھر ہیں گاؤں میں

ماجد صدیقی

حرف در حرف نئے پُھول کِھلائے ہم نے

اکتوبر 1, 2017ماجِد نشان،ماجد صدیقی،غزلہلائے،کھلائے،کھائے،بٹھائے،جلائے،سلائے،سجائےadmin

ماجد صدیقی ۔ غزل نمبر 10

گُن سخن میں وُہ رُخِ یار کے لائے ہم نے

حرف در حرف نئے پُھول کِھلائے ہم نے

نزد اِن کے بھی کسی شہ کی سواری اُترے

اِس گماں پر بھی در و بام سجائے ہم نے

جن کی تنویر میں کام آیا ہم ایسوں کا لہو

آنگنوں آنگنوں وُہ دِیپ جلائے ہم نے

ہاں رسا ہونے نہ پائی کوئی فریاد و دُعا

عرش کے پائے بھی کیا کیا نہ ہِلائے ہم نے

جھڑکیوں سے کہیں،افیون سے وعدوں کی کہیں

شاہ کہتے کہ ’’یُوں لوگ سُلائے ہم نے’‘

عقل سے شکل سے جِن جِن کی، نحوست ٹپکے

ایسے بُودم بھی سر آنکھوں پہ بِٹھائے ہم نے

کسی انساں کی دولتّی سے لگیں جو ماجِد

جانتے بُوجھتے وُہ زخم بھی کھائے ہم نے

ماجد صدیقی

مہ کا اثر بھی مہر کی ضَو پر پڑ سکتا ہے

اکتوبر 1, 2017ماجِد نشان،ماجد صدیقی،غزلگڑ،پڑ،اڑ،اکھڑ،اجڑ،جکڑ،جھڑadmin

ماجد صدیقی ۔ غزل نمبر 11

کم اوقات بھی زور آور سے اکڑ سکتا ہے

مہ کا اثر بھی مہر کی ضَو پر پڑ سکتا ہے

بے غیرت کو اپنے کیے پہ ملال کہاں کا

غیرت مند ہی شرم سے خاک میں گڑ سکتا ہے

سُوکھ کے برگِ گلاب بھی نوکیلا ہو جائے

ہونٹوں میں جو، اُلجھ سکتا ہے، اَڑ سکتا ہے

کام میں لانے کی تنظیم کی بات ہے ساری

دام کا دھاگا شیر تلک کو جکڑسکتا ہے

کرتا ہے فریاد کی لَے وُہ سپرد ہَوا کے

پتّا ورنہ بِن لرزے بھی جھڑ سکتا ہے

آب میں اُترا چاند کسی سے نہ ساکن ٹھہرے

اور پہاڑ بھی اپنی جگہ سے اُکھڑ سکتا ہے

شرط اگر ہے تو وہ مالی کی نااہلی

ماجِد جس سے باغ کا باغ اُجڑ سکتا ہے

ماجد صدیقی

دیکھ کے کیا پلٹا ہے کچھ تو بتا او یار!

اکتوبر 1, 2017ماجِد نشان،ماجد صدیقی،غزلہوا،لا،چتا،کیا،بپا،بتا،دکھا،زاadmin

ماجد صدیقی ۔ غزل نمبر 12

شاہ نگر سے وہ کہ ہے شہرِ ریا او یار!

دیکھ کے کیا پلٹا ہے کچھ تو بتا او یار!

کب تک اور ہمیں بے دم ٹھہرائے گی

ذکر سے شاہوں کے مسموم ہوا او یار!

اپنا مقدّر جنیں یا آفت سمجھیں

جس میں گھرے ہیں ہم وہ حبس ہے کیا او یار!

زورآور خوشبو بردار بتائیں جسے

کیوں وہ صبا لگتی ہے تعفّن زا او یار!

ذہن میں در آئے ہیں یہ کون سے اندیشے

بستر تک کیوں لگنے لگا ہے چِتا او یار!

جبر نے کونسا اور اب طیش دکھایا ہے

عدل کے حجلوں میں بھی شور بپا او یار!

رُخ پہ سرِ میداں نہ یہ کالک مَل اپنے

ماجِد تجھ سے کہے مت پیٹھ دکھا او یار!

ماجِد جبر کی رُت میں سخن کو دھیما رکھ

دھیان میں اپنے پیری بھی کچھ لا او یار!

ماجد صدیقی

یعنی مرگ و فنا کا نامہ بر ٹھہروں

اکتوبر 1, 2017ماجِد نشان،ماجد صدیقی،غزلہمسر،گر،پیغمبر،بر،زر،شرadmin

ماجد صدیقی ۔ غزل نمبر 13

سُوکھا پتّا یا میں اُڑتا پر ٹھہروں

یعنی مرگ و فنا کا نامہ بر ٹھہروں

اپنے آپ میں رہنا ہی کیا ٹھیک نہیں

آسمان کا میں کیوں کر ہمسر ٹھہروں

کُوچۂ حرص میں اپنی خیر منانے کو

خیر کا مدِمقابل ٹھہروں، شر ٹھہروں

خبر خبر ہیں چَوکھٹے نت نت ماتم کے

سوچتا ہوں کس کس کا نوحہ گر ٹھہروں

مثلِ صبا اپنا جی بھی بس چاہے یہی

غنچہ غنچہ چٹکوں، پیغمبر ٹھہروں

کسے خبر کل نطق کے ناطے نگر نگر

میں بے قیمت بھی گنجینۂ زر ٹھہروں

ماجد صدیقی

رات گئے تک نیند نہ مجھ کو آئے گی

اکتوبر 1, 2017ماجِد نشان،ماجد صدیقی،غزلگنوائے،آئے،اترائے،بنائے،جائے،سہلائےadmin

ماجد صدیقی ۔ غزل نمبر 14

سوچ بدن میں زہر نیا پھیلائے گی

رات گئے تک نیند نہ مجھ کو آئے گی

بار بار جو اُگ آتی ہے راہوں میں

کس کس سے دیوار یہ چاٹی جائے گی

ڈال ڈال کر کوسنے پھیلی جھولی میں

بُڑھیا دیر تلک اب تن سہلائے گی

آگ سے جس نے اپنا ناطہ جوڑ لیا

وُہ رسّی کیا اپنا آپ بچائے گی

لطف و سکوں کا جھونکا تک جو پا نہ سکی

قوم مری کس موسم پر اِترائے گی

ابکے آب میں جال بِچھا جو چَوطرفہ

مچھلی مچھلی اُس میں جان گنوائے گی

ماجِد کُود کے دیکھ تو عزم کے دریا میں

بعد کی صورت بعد میں دیکھی جائے گی

ماجد صدیقی

زخم دے گئے دل کو خار پھر زبانوں کے

اکتوبر 1, 2017ماجِد نشان،ماجد صدیقی،غزلمہربانوں،مچانوں،جانوں،زبانوںadmin

ماجد صدیقی ۔ غزل نمبر 15

ذِلّتوں کی بستی سے پھر نئے پیام آئے

زخم دے گئے دل کو خار پھر زبانوں کے

سامنے کی باتیں تو سامنے کی باتیں ہیں

اور بھی کچھ اِحساں ہیں ہم پہ مہربانوں کے

جبر نے دکھایا ہے پھر کہیں کمال اپنا

لوتھڑے فضا میں ہیں کچھ نحیف جانوں کے

شیر کے در آنے کے اشتباہ پر ماجدؔ

اہتمام کیا کیا تھے دشت میں مچانوں کے

ماجد صدیقی

میں سر سبز شجر جو پل پل اِیندھن بنتا جاؤں

اکتوبر 1, 2017ماجِد نشان،ماجد صدیقی،غزلمسکاؤں،چمکاؤں،پاؤں،اُٹھاؤں،اِتراؤں،جُھلاؤں،جاؤںadmin

ماجد صدیقی ۔ غزل نمبر 16

دے کر چھِیننے والے تیری دین کو کیا ٹھہراؤں

میں سر سبز شجر جو پل پل اِیندھن بنتا جاؤں

تیری سماعت کے در پر ہے بس یہ دستک میری

چندرماں ایسا گھٹتا بڑھتا میں راتیں چمکاؤں

اور بھی کِھل کِھل اُٹھیں میرے ہونٹ گُلابوں جیسے

حرفوں حرفوں اور بھی چیت رُتوں تک میں مسکاؤں

لہرائیں، رنگ لائیں میرے دل کی سب آشائیں

میں نے جو بِیجائیاں کی ہیں،اُن کی فصل اُٹھاؤں

ان کی مہک، ان کی شیرینی، لُطف دِکھائیں اپنے

پُھولنے پھلنے والی اپنی شاخوں پر اِتراؤں

اِیقان و فیضان سے میرے جو سرچشمہ پُھوٹا

اُس کی نم کی یاوری سے اِک اور جنم میں پاؤں

جس کا اُنس ہے، جس کی قرابت، ماجِد! دم خَم میرا

اورفرازوں، اُس سے اپنے قُرب کی پینگ جُھلاؤں

ماجد صدیقی

اور ترا ہجر، ترا دھیان زیادہ چاہے

اکتوبر 1, 2017ماجِد نشان،ماجد صدیقی،غزللبادہ،ارادہ،بادہ،جادہ،زیادہ،سادہadmin

ماجد صدیقی ۔ غزل نمبر 17

دل کی جو بھی ہو طلب،تجھ سے اعادہ چاہے

اور ترا ہجر، ترا دھیان زیادہ چاہے

تیری آنکھوں کے سوا مستیاں چھلکیں نہ کہیں

جسم کا جام ترے قرب کا بادہ چاہے

سچ وہ سورج کی کرن ہے جو چھپائے نہ چھپے

مکر جیسا بھی ہو ہر آن لبادہ چاہے

گانٹھ کیسی ہو وہ اس سے کبھی کھولے نہ کھلے

حسن چاہت کی کوئی بات ہو سادہ چاہے

چاند جذبوں کی صداقت سے پہنچ کو پہنچے

کوہ کھدنے کو بڑا سخت ارادہ چاہے

تجھ سے ملنے کو پروبال بھی درکار ہیں اب

اب تو ماجِد بھی ہوا پر کوئی جادہ چاہے

ماجد صدیقی

خُود اُجڑنا اور ہر منظر اُجڑتے دیکھنا

اکتوبر 1, 2017ماجِد نشان،ماجد صدیقی،غزلپڑتے،اکھڑتے،اجڑتے،ادھڑتے،جھڑتےadmin

ماجد صدیقی ۔ غزل نمبر 18

دمبدم طبعِ رسا اپنی بگڑتے دیکھنا

خُود اُجڑنا اور ہر منظر اُجڑتے دیکھنا

پالنا پیڑوں کو اپنی کاوشوں سے اور پِھر

ٹہنیوں سے زرد رُو پتّوں کو جھڑتے دیکھنا

دیکھنا کھیتوں پہ پالنہار بُوندوں کا نزول

فصل کو ژالوں سے پِٹتے اور اُکھڑتے دیکھنا

دیکھنا چندا پنپتے تا بہ نصفِ مہ سدا

اور اُسے پھر تیسویں تک ماند پڑتے دیکھنا

ایک دن آئے گا، کوڑا وقت کا لپکے گا اور

کھال اپنی بھی میاں ماجِد اُدھڑتے دیکھنا

ماجد صدیقی

فیض یہ اب پڑھائیوں کے ہیں

اکتوبر 1, 2017ماجِد نشان،ماجد صدیقی،غزلقصائیوں،لکھائیوں،کھائیوں،پڑھائیوں،بھائیوں،جدائیوں،دائیوںadmin

ماجد صدیقی ۔ غزل نمبر 19

دِن ہیں جو بِن کمائیوں کے ہیں

فیض یہ اب پڑھائیوں کے ہیں

پیڑ پر، لوحِ بخت پر، انداز

اپنے اپنے لکھائیوں کے ہیں

درد جھیلے ہیں کتنے ماؤں نے

راز یہ پاس دائیوں کے ہیں

زرد پتّے یہی کہیں باہم

اگلے موسم جدائیوں کے ہیں

یُوسف آسا ہر اِک گُنی جانے

کیسے برتاؤ بھائیوں کے ہیں

رہنما کب کہیں کہ اُن سب کے

جو چلن ہیں قصائیوں کے ہیں

ہم کہ ٹھہرے فراز جُو ماجِد

یہ کرم ہم پہ کھائیوں کے ہیں

ماجد صدیقی

اور معالج بہم عطائی مجھے

اکتوبر 1, 2017ماجِد نشان،ماجد صدیقی،غزلہوائی،برائی،خدائی،سجھائی،عطائیadmin

ماجد صدیقی ۔ غزل نمبر 20

دی نہیں کرب سے رہائی مجھے

اور معالج بہم عطائی مجھے

ہاں وہی تو ہے حیثیت میری

تھی جو ابلس نے سُجھائی مجھے

ابنِ آدم ہوں مَیں صدف تو نہیں

رزق بخشا ہے کیوں ہوائی مجھے

اُس خدا تک کا میں ہوا منکر

جس نے دی خلق پر خدائی مجھے

گھر کے بد خصلتوں میں بھی ماجِد!

کرنی آئی نہیں بُرائی مجھے

ماجد صدیقی

کچھ نہ کر اور بس فساد اُٹھا

اکتوبر 1, 2017ماجِد نشان،ماجد صدیقی،غزلاُٹھ،اُٹھاadmin

ماجد صدیقی ۔ غزل نمبر 21

دہر کا خود سے اعتماد اٹھا

کچھ نہ کر اور بس فساد اُٹھا

بارِ تشویش تیرے ذہن میں ہے

کم اُٹھا چاہے تو زیاد اُٹھا

دیکھ تجھ پاس حرفِ نرم تو ہے

در سے سائل کو بامراد اُٹھ

دور ہے آسماں زمیں ہی پہ رہ

ہاں اُٹھا نازِ خاک زاد اُٹھا

بزم میں لب نہ اپنے کھینچ کے رکھ

نطقِ خوش کُن پہ حرفِ داد اُٹھا

بانٹ ماجِد سکونِ دل ہر سو

واہموں کے نہ کردباد اُٹھا

ماجد صدیقی

خوں میں وہ جوشِ اشتیاق کہاں

اکتوبر 1, 2017ماجِد نشان،ماجد صدیقی،غزلنفاق،اشتیاق،شاق،طاق،عاقadmin

ماجد صدیقی ۔ غزل نمبر 22

جی سے جانے کا اتفاق کہاں

خوں میں وہ جوشِ اشتیاق کہاں

سادہ لوحی میں حضرتِ آدم

طاق ہوں گے پہ ہم سے طاق کہاں

ہم کہ یک جہتیوں کے داعی ہیں

خلق میں ہم سا ہے نفاق کہاں

آئنے میں ذرا سا بال آیا

بات گزری ہے دل پہ شاق کہاں

کیا خبر کہہ کے ناخلف ماجدؔ

وقت کر دے ہمیں بھی عاق کہاں

ماجد صدیقی

آخر کو رُسوائی اُس کا رخت ہُوا

اکتوبر 1, 2017ماجِد نشان،ماجد صدیقی،غزللخت،کرخت،بخت،رخت،سختadmin

ماجد صدیقی ۔ غزل نمبر 23

جو بھی بہ زور و مکر ہے والیٔ تخت ہُوا

آخر کو رُسوائی اُس کا رخت ہُوا

اِک آمر ایسا بھی ہمِیں نے دیکھا جو

خبطِ مسیحائی کے سبب صد لخت ہُوا

مجبوروں نے جبر سہا تو جابر کا

ہوتے ہوتے اور رویّہ سخت ہُوا

ہم ٹھہرے مُحتاج تو برق و رعد ایسا

موسم کا لہجہ کُچھ اور کرخت ہُوا

خود ہی نکلے ہر مشکل ہر علّت سے

ماجد ہم سوں کا شافی کب بخت ہُوا

ماجد صدیقی

ماجِد جو لطف دیں وُہ ہوائیں تلاش کر

اکتوبر 1, 2017ماجِد نشان،ماجد صدیقی،غزلہوائیں،فضائیں،قبائیں،مائیں،چتائیں،دعائیں،صدائیںadmin

ماجد صدیقی ۔ غزل نمبر 24

تازہ مہک کی لِپٹیں، رِدائیں تلاش کر

ماجِد جو لطف دیں وُہ ہوائیں تلاش کر

جن کا مزہ ہو دیکھے مناظر سے بھی سوا

چھب جن کی اور ہو وُہ فضائیں تلاش کر

ہونٹوں سے تیرے نام پہ خُوشبو سی جو اُٹھیں

اور ہوں رسا جو ایسی دُعائیں تلاش کر

خوشامدوں پہ ہو جو بہم کام پر نہیں

اوروں سا تُو بھی ایسی قبائیں تلاش کر

جو کھو چکے ہیں نقش، خط و حرف میں وُہ ڈھال

جو دُور جا چکیں وُہ صدائیں تلاش کر

ایسی کہ فیض و غالب و منٹو جو دے گئیں

ایسی کہ پِھر نہ آئیں وُہ مائیں تلاش کر

ہو کے بھسم سِدھائیں جو بگڑوں کو جِیتے جی

ہاں بہرِ گُمرہاں وُہ چِتائیں تلاش کر

ماجد صدیقی

مگر فن ہے مرا موجود تو کب میں نہیں ہوں گا

اکتوبر 1, 2017ماجِد نشان،ماجد صدیقی،غزللب،منصب،ڈھب،کوکب،کب،تب،سبadmin

ماجد صدیقی ۔ غزل نمبر 25

بہت یاد آؤں گا ہر شخص کو جب میں نہیں ہوں گا

مگر فن ہے مرا موجود تو کب میں نہیں ہوں گا

مری قامت نہیں تسلیم جن بَونوں کو اب، وہ بھی

دلائیں گے مجھے کیا کیا نہ منصب، میں نہیں ہوں گا

سحر پھوٹے گی آخر جگنوؤں سے میرے حرفوں کے

یہ ہو گا پر ہُوا جب اس طرح تب میں نہیں ہوں گا

نہ جانیں گے خمیر اِس کا اٹھا کن تلخیوں سے تھا

مرا شیریں سخن دہرائیں گے سب میں نہیں ہوں گا

یقیں ہے انتقاماً جب مجھے ظلمت نگل لے گی

مرے فکر و نظر ٹھہریں گے کوکب میں نہیں ہوں گا

جتانے کو مری بے چینیاں آتے زمانوں تک

پسِ ہر حرف دھڑکیں گے مرے لب میں نہیں ہوں گا

ملا جو صرف، فن ہو کر مجھے اظہار کا ، ماجِد

سبھی ترسیں گے اپنانے کو وہ ڈھب میں نہیں ہوں گا

ماجد صدیقی

شاخ پر کِھل کے گلابوں نے بکھر جانا ہے

اکتوبر 1, 2017ماجِد نشان،ماجد صدیقی،غزلنکھر،ور،کدھر،بکھر،شجرadmin

ماجد صدیقی ۔ غزل نمبر 26

بیٹیاں دھن ہے پرایا اِنہیں گھر جانا ہے

شاخ پر کِھل کے گلابوں نے بکھر جانا ہے

ہم کہ ہیں باغ میں پت جھڑ کے بکھرتے پتّے

کون یہ جانتا ہے کس کو کدھر جانا ہے

ڈھل بھی سکتا ہے جو سورج ہے سروں پر سُکھ کا

کانپ کانپ اُٹھنا ہے،یہ سوچ کے ڈر جانا ہے

گرد ہی لکھی ہے پیڑوں کے نصیبوں میں جنہیں

پل دو پل موسمِ باراں میں نکھر جانا ہے

آخرِ کار دکھائی نہ وُہ دے بُھوت ہمیں

ہم نے جس شخص کو رستے کا شجر جانا ہے

ماجد صدیقی

ستم شعار دُعاؤں سے کب ٹھکانے لگے

اکتوبر 1, 2017ماجِد نشان،ماجد صدیقی،غزلچہچہانے،ٹھکانے،تازیانے،دکھانے،زمانےadmin

ماجد صدیقی ۔ غزل نمبر 27

بدل کے روپ نئے، اور دندنانے لگے

ستم شعار دُعاؤں سے کب ٹھکانے لگے

سنا جو قطعِ شبِ رُوسیہ کا مژدہ

چٹک چٹک کے شگوفے بھی چہچہانے لگے

عتابِ ابر تو لمحوں سے مستزاد نہ تھا

شجر کو ڈھانپتے اپنا بدن زمانے لگے

بجے ہیں روز ہتھوڑے نئے سماعت پر

بجا کہ تن پہ ہمارے نہ تازیانے لگے

جو اُن کے نام تھا کوتاہ قامتی کے سبب

اُچھل اُچھل کے سقم خود ہی وہ دکھانے لگے

ہُوا کچھ ایسے کہ زینے تہہِ قدم لا کر

جو پست قد ہیں وہ نیچا ہمیں دکھانے لگے

ماجد صدیقی

وقت سمٹا تو ہمیں کام بہت یاد آئے

اکتوبر 1, 2017ماجِد نشان،ماجد صدیقی،غزلکہرام،کام،گام،اصنام،دام،سرشامadmin

ماجد صدیقی ۔ غزل نمبر 28

ایک آغاز تھا انجام بہت یاد آئے

وقت سمٹا تو ہمیں کام بہت یاد آئے

کچھ تو ایسے تھے جنہیں بھول کے تسکین ملی

اور کچھ لوگ بہ ہر گام بہت یاد آئے

وہ نہ جو ٹوہ میں روزی کی نکل کر لوٹے

چہچہے اُن کے سرِشام بہت یاد آئے

مول جب اپنا پڑا شہر کے بازاروں میں

وہ جو یوسف کے لگے دام، بہت یاد آئے

خود ہی نکلے تھے نکالے نہ گئے جو اُس سے

کعبۂ دِل کو وہ اصنام بہت یاد آئے

دیکھ کر ندّیاں جذبوں کی اترتی ماجِد

تھے کبھی دل میں جو کہرام، بہت یاد آئے

ماجد صدیقی

واماندگی ہے ورثۂ اجداد کیا کہیں

اکتوبر 1, 2017ماجِد نشان،ماجد صدیقی،غزلفرہاد،نقّاد،آباد،آزاد،اجداد،زادadmin

ماجد صدیقی ۔ غزل نمبر 29

اِک اِک قدم پہ ہے نئی ایجاد کیا کہیں

واماندگی ہے ورثۂ اجداد کیا کہیں

صحرا میں جیسے کوئی بگولہ ہو بے مُہار

ہم آپ ہیں کُچھ ایسے ہی آزاد کیا کہیں

ہم مطمئن ہیں جس طرح اینٹوں کو جوڑ کر

یوں بھی کبھی ہوئے نگر آباد کیا کہیں

ہم نے تو کوہِ جُہل و کسالت کیا ہے زیر

کہتے ہیں لوگ کیوں ہمیں فرہاد کیا کہیں

باٹوں سے تولتے ہیں جو پھولوں کی پتّیاں

حق میں ہمارے فن کے وہ نقّاد کیا کہیں

ہم جنس اوجِ تخت سے لگتے ہیں کیوں حقیر

ماجِد یہ ہم کہ جو نہیں شہ زاد کیا کہیں

ماجد صدیقی

الجھن میں ہمِیں کیوں پڑ جائیں

اکتوبر 1, 2017ماجِد نشان،ماجد صدیقی،غزلپڑ،اڑ،اکھڑ،اجڑ،ادھڑ،بچھڑ،جھڑadmin

ماجد صدیقی ۔ غزل نمبر 30

احوال ذرا جو بگڑ جائیں

الجھن میں ہمِیں کیوں پڑ جائیں

اچکے کیوں چرخ ہمیں ہی ھلا

کیوں پَیر زمیں سے اُکھڑ جائیں

کیونکر فرمان پہ شاہوں کے

کھالیں جسموں سے اُدھڑ جائیں

طوفاں میں جلالِ ستمگر کے

انگیں کاہے کو اُجڑ جائیں

کیوں کشتی عمر کنارے پر

پہنچے تو لوگ بچھڑ جائیں

موسم کی تُند مزاجی سے

پتّے کیوں پیڑ سے جھڑ جائیں

ماجِد کیوں پینچ وہی ٹھہریں

جو اپنے کہے پر اڑ جائیں

ماجد صدیقی

خدا کے گھر میں بھی جوتوں کی خود حفاظت کر

اکتوبر 1, 2017ماجِد نشان،ماجد صدیقی،غزلقیادت،نیابت،حفاظت،ریاضت،عیادت،عجلتadmin

ماجد صدیقی ۔ غزل نمبر 31

ادائے فرض سے غافل نہ ہو عبادت کر

خدا کے گھر میں بھی جوتوں کی خود حفاظت کر

بس اِس غرض کو کہ کل تیرے کام آئے گا

اُٹھا یہ رنج بھی بیمار کی عیادت کر

جو زیردست ہو ہم جنس، پی لہو اُس کا

تہہِ سپہر خُداوند کی نیابت کر

وہ رزقِ خاص کہ ہاتھ آئے جو خیانت سے

وہ رزق کام میں لا قوم کی قیادت کر

صدائے خلق بنامِ ریا صدا میں مِلا

یہ کاج عیب چھپائے گااِس میں عجلت کر

اتار دھڑکنیں ماجِد سخن کی رگ رگ میں

یہ سُر نِکھار ابھی اور بھی ریاضت کر

ماجد صدیقی

زورآور نے مدِ مقابل کو محصور ہی رکھنا ہے

اکتوبر 1, 2017ماجِد نشان،ماجد صدیقی،غزلمنصور،مجبور،محصور،چور،دور،رنجورadmin

ماجد صدیقی ۔ غزل نمبر 32

اِٹھلانے کچھ کر دکھلانے سے معذور ہی رکھنا ہے

زورآور نے مدِ مقابل کو محصور ہی رکھنا ہے

ہم ایسوں کو جو بے سمت بھی ہیں اور غافل و کاہل بھی

جبر نے اپنا ہاتھ دکھانا ہے مجبور ہی رکھنا ہے

جو بھی ہے صاحبِ قامت اُسکو شاہ کے مصاحب بَونوں نے

دھج اپنی قائم رکھنے کو شاہ سے دُور ہی رکھنا ہے

ظلمتِ شب میں کرمکِ شب بھی جس کے لبوں پر چمکا ہے

دن چڑھنے پر نام اُس نے اپنا منصور ہی رکھنا ہے

اِس مقصد کو سر نہ کہیں وہ اُٹھائیں تازہ بدن ہو کر

مزدوروں کو آجر نے ہر حال میں چُور ہی رکھنا ہے

ماجِد ہم نے یہی دیکھا ہے مشفق ماؤں تک نے بھی

جو بھی کوئی سوتیلا ہو اُس کو رنجور ہی رکھنا ہے

ماجد صدیقی

وقت سے پہلے خوشیوں کا اسقاط ہمارے نام لگا

اکتوبر 1, 2017ماجِد نشان،ماجد صدیقی،غزلنام،کہرام،انعام،جام،خام،دام،شامadmin

ماجد صدیقی ۔ غزل نمبر 33

شاخِ شجر پر پھل پکنے کا ہر حیلہ ناکام لگا

وقت سے پہلے خوشیوں کا اسقاط ہمارے نام لگا

آنے والے وقت کے تیور اِس میں وہ پڑھ لیتا ہے

اب بھی شاہ کے ہاتھ میں ہے جو وہ جمشیدی جام لگا

ہم جس کی کوڑی لائے تھے ہم نے جو کچھ سوچا تھا

اس کا ہونا ہی کیونکر اب کے بھی خیال خام لگا

ضبط کے ہاتھوں پھٹی پھٹی لگتی تھیں جتنی آنکھیں تھیں

اور سکوت لبوں کا سینے سینے کا کہرام لگا

ا چّھی قدروں کو اپنانا بات گئے وقتوں کی ہے

آج تو جس میں بھی ہے اُس کو سفلہ پن انعام لگا

وقت نہ پھر ہاتھ آئے گا ایسا اے صاحبِ بینائی

بول کوئی بولی اور ہم سارے اندھوں کے دام لگا

ہم کہ پیادہ پیا ہیں ماجدؔ جانیں یہ احوال ہمِیں

کن کن حیلوں دن کا سورج جا کے کنارِ شام لگا

ماجد صدیقی

جُگ بیتے وہ شخص نہیں ہے دیکھا جیسے

اکتوبر 1, 2017ماجِد نشان،ماجد صدیقی،غزلچندا،اونچا،تمنّا،دیکھا،سنّاٹاadmin

ماجد صدیقی ۔ غزل نمبر 34

آنکھوں میں آباد ہے ویرانہ سا جیسے

جُگ بیتے وہ شخص نہیں ہے دیکھا جیسے

کوئی چکور نہیں آتا ہے اُڑ کر ہم تک

ہم تنہا ہیں آسمان پر چندا جیسے

جب سے باغ نے ابر سے ہم آغوشی چاہی

اُڑنے لگا وہ اور بھی، اور بھی اُونچا جیسے

چھنی سماعت سے جب سے بُوندوں کی آہٹ

چاروں اور ہے ہیبت زا سنّاٹا جیسے

جب سے ماجِد عمر کی پت جھڑ زوروں پر ہے

گرد آلود ہُوئی ہر ایک تمنّا جیسے

ماجد صدیقی

انگناں اُترا پُورا چندا آتی شب گھٹ جائے گا

اکتوبر 1, 2017ماجِد نشان،ماجد صدیقی،غزلکھائے،پچتائے،آئے،جائےadmin

ماجد صدیقی ۔ غزل نمبر 35

آج کے دن کا لطف اُٹھا لے، آج نہیں پِھر آئے گا

انگناں اُترا پُورا چندا آتی شب گھٹ جائے گا

انساں گِدھ یا زاغ نہیں ہے اُس سے مرے کب اُس کا ضمیر

چال چلے یا ظلم کرے وُہ،آخر کو پچتائے گا

اچّھا کر اور اچّھا کرکے،اُس کے انت کی فکر نہ کر

خَیر کے بِیج سے دیکھنا اِک دِن پَودا اُگ ہی آئے گا

ماجِداپنے سُخن کی ضَو پرپڑتے چھینٹوں کو یہ بتا

چاند پہ جو بھی تُھوکے گا آخر کو منہ کی کھائے گا

ماجد صدیقی

ہاں سانس یہی خُدا نُما ہے

اکتوبر 1, 2017ماجِد نشان،ماجد صدیقی،غزلہوا،منچلا،چلا،نما،کھلا،جلاadmin

ماجد صدیقی ۔ غزل نمبر 36

یہ سانس عطّیۂ خُدا ہے

ہاں سانس یہی خُدا نُما ہے

قربت میں بھی فاصلہ ہے لازم

یہ راز اِک عمر میں کُھلا ہے

پِھرپنکھ کسی کے پھڑپھڑائے

ہاں گھونسلا پھر کوئی جلا ہے

ہونٹوں پِہ سجی ہے بات دل کی

غنچہ سرِ شاخ کِھل چلا ہے

آئی ہے تری گلی سے ہو کر

سرمست وگرنہ کیوں ہوا ہے

ماجِد یہ شریر موسمِ گلُ

تیری ہی طرح کا منچلا ہے

ماجد صدیقی

جو سیر کر دے رُوح کو ایسا کوئی منظر نہیں

اکتوبر 1, 2017ماجِد نشان،ماجد صدیقی،غزلمنظر،ازبر،بر،دانشور،رہبر،شرadmin

ماجد صدیقی ۔ غزل نمبر 37

یادوں کا نقشِ دلنشیں دِل میں کوئی کیونکر نہیں

جو سیر کر دے رُوح کو ایسا کوئی منظر نہیں

وُہ جس جگہ ہے اُس جگہ جانا کسی کا سہل کب

تُجھ بِن صبا! اپنا کوئی اب اور نامہ بر نہیں

ہم آپ تو ہیں دمبخود،ہم سے ملے جو وہ کہے

تُم لوگ ہو جس جَیش میں اُس کا کوئی رہبر نہیں

ہے کس جگہ چلنا ہمیں رُکنا کہاں بِچھنا کہاں

ہے درس ایسا کون سا وُہ جو ہمیں ازبر نہیں

جو دب گیا وُہ صید ہے،چڑھ دوڑتا صیّاد ہے

ابنائے آدم ہیں جہاں،بالائے خیر و شر نہیں

کُچھ یہ کہیں کُچھ وہ کہیں ہم کیاکہیں کیا ٹھیک ہے

ماجِد ہی ذی دانش یہاں، ماجِد ہی دانشور نہیں

ماجد صدیقی

ہاں وجود اپنا جتا اور رقص کر

اکتوبر 1, 2017ماجِد نشان،ماجد صدیقی،غزلکہا،آزما،اٹھا،بنا،جتا،سماadmin

ماجد صدیقی ۔ غزل نمبر 38

ہے اگر زندہ تو آ اور رقص کر

ہاں وجود اپنا جتا اور رقص کر

خود کو پودوں، اور گُلوں میں ڈھال لے

آنکھ میں رُت کی سما اور رقص کر

فرش سے تا عرش یُوں بھی لَو لگا

چاہتوں کے پر بنا اور رقص کر

مُحتسب کی آنکھ سے بچ کر کبھی

مان لے تن کا کہا اور رقص کر

ہے اگر اِک یہ بھی اندازِ حیات

ہاتھ میں ساغر اُٹھا اور رقص کر

دیکھ یُوں بھی اپنے ماجِد کو کبھی

ظرف اِس کا آزما اور رقص کر

ماجد صدیقی

دریا میں وفور آب کا ہے

اکتوبر 1, 2017ماجِد نشان،ماجد صدیقی،غزلکھنچا،کا،پلا،دعا،صبا،ضیاadmin

ماجد صدیقی ۔ غزل نمبر 39

ہر سُو جو چھلک چھلک چلا ہے

دریا میں وفور آب کا ہے

چُوزوں ہی پہ چِیل چِیل جِھپٹے

مظلوم ہی دار پر کِھنچا ہے

اب تک نہ لگا کسی کنارے

لب پر جو سفینۂ دُعا ہے

ذرّے مجھے مہر دیں دکھائی

قدموں میں لگے ،بِچھی ضیا ہے

چندا میں ہے اُس کا چاند چہرہ

اور ایلچی اُس کی یہ صبا ہے

مُونس ہے ہر اِک لُٹے پُٹے کا

ماجِد کہ نِعَم میں خود پلا ہے

ماجد صدیقی

رُت اپنے نگر کی اور کیا ہے

اکتوبر 1, 2017ماجِد نشان،ماجد صدیقی،غزلچہچہا،ڈھلا،کیا،پڑا،اٹھا،بلاadmin

ماجد صدیقی ۔ غزل نمبر 40

ہر جسم پہ گرد کی ردا ہے

رُت اپنے نگر کی اور کیا ہے

وُہ دوستی ہو کہ دُشمنی ہو

اِک کرب ہے دُوسری بلا ہے

دیتا ہے افق افق دکھائی

اک شخص کہ چاند سا ڈھلا ہے

کیا درس دِلا رہا ہے دیکھو!

پانی پہ جو بُلبُلہ اُٹھا ہے

بدلی نئی رُت نے اور کروٹ

پِھر شاخ پہ تازہ چہچہا ہے

پہچان کب اس کی جانے ہو گی

ماجِد کہ جو کُنج میں پڑا ہے

ماجد صدیقی

کیا اور نجانے دیکھنا ہے

اکتوبر 1, 2017ماجِد نشان،ماجد صدیقی،غزلچلا،کیا،بسا،دیکھنا،سلا،سوچناadmin

ماجد صدیقی ۔ غزل نمبر 41

ہر سمت ہی حشر اِک بپا ہے

کیا اور نجانے دیکھنا ہے

نِت اپنی جھلک دکھانے آئے

وُہ بُوم کہ بام پر بسا ہے

اِک اور کی ڈور سے وُہ دیکھو

اِک اور پتنگ لُٹ چلا ہے

جارِح کو گئے تھے جو دکھانے

وُہ زخم تو پھر بھی اَن سِلا ہے

گر دِل نہ رکاوٹوں کو مانے

مشکل ہو کوئی بھی سو وُہ کیا ہے

دِن کتنے ہیں اور کام کتنے

ماجِد تُجھے یہ بھی سوچنا ہے

ماجد صدیقی

ارماں پسِ چشم جو رُکا ہے

اکتوبر 1, 2017ماجِد نشان،ماجد صدیقی،غزلمدّعا،نیا،آئنہ،آزما،رکا،سواadmin

ماجد صدیقی ۔ غزل نمبر 42

ہر آن بدن پہ بوجھ سا ہے

ارماں پسِ چشم جو رُکا ہے

جس میں نیا رنج روز اُترے

دِل ایسا ہی فرد آئنہ ہے

ہر سمت شروع میں سفر کے

دیکھا ہے جِدھر بھنور نیا ہے

رفعت کا ہے جو بھی اگلا زینہ

لاریب وُہ قوّت آزما ہے

اعصاب پڑے ہیں ماند جب سے

ہر تازہ سفر کٹھن سَوا ہے

بارش کو ترستا مُرغِ گِریاں

ماجِد! ترا حرفِ مُدّعا ہے

ماجد صدیقی

صحرا میں یہ موجۂ صبا ہے

اکتوبر 1, 2017ماجِد نشان،ماجد صدیقی،غزلہوا،بڑا،بجا،دھرا،سنا،صباadmin

ماجد صدیقی ۔ غزل نمبر 43

ہونٹوں پہ جو بول پیار کا ہے

صحرا میں یہ موجۂ صبا ہے

پُونجی کسی بُلبُلے کی جیسے

اِس زیست میں اور کیا دھرا ہے

باز آئے نہ لوٹنے سے سورج

دیکھاہے یہی، یہی سُنا ہے

بندھنی ہے جو آتے موسموں میں

اپنے ہی سخن کی وُہ ہوا ہے

ہر میمنہ گُرگ سے کہے یہ

جو آپ کہیں وُہی بجا ہے

سہہ جائے تُو تُند و تُرش کیا کیا

ماجِد ترا حوصلہ بڑا ہے

ماجد صدیقی

ایم سی ایس اک اور بھی آپ نے کرنا ہو گا

اکتوبر 1, 2017ماجِد نشان،ماجد صدیقی،غزلنکھرنا،ڈرنا،کرنا،ابھرنا،اترنا،بھرنا،توٹھہرناadmin

ماجد صدیقی ۔ غزل نمبر 44

نرم روی اپنا کے اور سُدھرنا ہو گا

ایم سی ایس اک اور بھی آپ نے کرنا ہو گا

اندر کی ٹھنڈک سے رکھ کے پروں کو سلامت

پار بکھیڑوں کے صحرا سے اترنا ہو گا

تازہ عزم و عمل اپنا کے گُن دکھلاکے

جیون میں اک رنگ نیا نت بھرنا ہو گا

شام کی گرد میں کھو کے اور پھر تازہ ہو کے

وادیٔ شب سے مثل گلوں کے ابھرنا ہو گا

رکھنا ہو گا پاس سدا ننھوں کی رضا کا

آپ سے ننھوں کو ہرگز نہیں ڈرنا ہو گا

جینے کے فن سے لے کر تخلیقِ سخن تک

اک اک میں کھو جانا اور نکھرنا ہو گا

آپ کا جیون سہل ہوا گر یاور بیٹے

آسودہ ماجِد نے بھی توٹھہرنا ہو گا

ماجد صدیقی

زمین کیا ہے، فضا کیا ہے، آسماں کیا ہے

اکتوبر 1, 2017ماجِد نشان،ماجد صدیقی،غزلکہکشاں،آسماں،امتحاں،خزاں،رفتگاں،سگاںadmin

ماجد صدیقی ۔ غزل نمبر 45

نگاہ میں ہے جو منظر بہ جُز گماں کیا ہے

زمین کیا ہے، فضا کیا ہے، آسماں کیا ہے

یہ جانتے ہیں مسافر فقط اندھیروں کے

ستارۂ سحری کیا ہے، کہکشاں کیا ہے

نظر میں لا کے تنِ برگِ زرد کا لرزہ

کُھلا یہ ہم پہ کہ اندیشۂ خزاں کیا ہے

گدا گدا ہے سو کُتّوں کا سامنا ہے اُسے

غنی کے واسطے آوازۂ سگاں کیا ہے

زوالِ عمر تلک ہم نہ سُرخرو ٹھہرے

حیات!تُجھ سا کوئی اور امتحاں کیا ہے

کوئی رہا ہے نہ ماجِد کسی نے رہنا ہے

تو پھر یہ مضحکۂ رنجِ رفتگاں کیا ہے

ماجد صدیقی

جہان دیکھتا اپنا سلوک کیا ہوتا

اکتوبر 1, 2017ماجِد نشان،ماجد صدیقی،غزلکیا،کا،خداadmin

ماجد صدیقی ۔ غزل نمبر 46

ملا نہ تخت ہمیں اور اگر ملا ہوتا

جہان دیکھتا اپنا سلوک کیا ہوتا

کھلے کی دھوپ میں کوئی تو آسرا ہوتا

وہ چاہے سایہ کسی گرد باد کا ہوتا

نظامِ دہر نجانے سنبھالتا کیسے

ہُوا بہشت بدر جو اگر خدا ہوتا

ماجد صدیقی

جابر کی یہی تو اِک ادا ہے

اکتوبر 1, 2017ماجِد نشان،ماجد صدیقی،غزلقبا،گھلا،ادا،دعا،ریاadmin

ماجد صدیقی ۔ غزل نمبر 47

کہہ دے جو وُہ ہوتے دیکھتا ہے

جابر کی یہی تو اِک ادا ہے

لے عفو سے کام ،لے سکے گر

ہاں ہاں یہی وصفِ بے ریا ہے

اُجلا ہے تو دامنِ بداں ہے

تر خوں سے مری تری قبا ہے

رکھ تازگی تُو مری سلامت

مولا یہی اِک مری دُعا ہے

پنپی ہے یہ کس کی نیّتِ بد

ماحول میں زہر سا گُھلا ہے

ماجد صدیقی

ہے اگر مہلت تو کُچھ آرام کر

اکتوبر 1, 2017ماجِد نشان،ماجد صدیقی،غزلنام،کہرام،آرام،جام،رامadmin

ماجد صدیقی ۔ غزل نمبر 48

کھینچتے ہر صبح کی مت شام کر

ہے اگر مہلت تو کُچھ آرام کر

اے کہ تُو چاہے کرے شیروں کو زیر

اولاً چڑیاں چمن کی رام کر

جس طرف تیرا گزر ہو اے کلرک!

اُس سڑک کی کُل ٹریفک جام کر

اے دلِ نادان!سب کچھ جاں پہ سہہ

مت مچا تُو شور،مت کُہرام کر

جو بھی دے ماجِد جنم وُہ ہے عظیم

ہو سکے تو دیس کو خوش نام کر

ماجد صدیقی

اُس پہ کوئی نظم پِھر لکھ لایئے

اکتوبر 1, 2017ماجِد نشان،ماجد صدیقی،غزلللچایئے،لایئے،لائیے،چھایئے،گِنوایئے،جایئے،دُہرائیےadmin

ماجد صدیقی ۔ غزل نمبر 49

کرب کوئی سوچ کر سو جایئے

اُس پہ کوئی نظم پِھر لکھ لایئے

آپ بِن چاہے جو طوطے بن گئے

اِک سبق ہی زیست بھر دُہرائیے

لا کے پنجوں میں کہاں چھوڑے گا باز

یہ رعایت ذہن میں مت لائیے

پُوری کشتی ہو شکنجے میں تو پھر

کُود کر گرداب ہی میں جایئے

پھیلئے تو مثلِ خُوشبو پھیلئے

چھایئے تو ابر بن کر چھایئے

آپ سے بہتر ہو گر نسل آپ کی

اور کسی حاصل کو مت للچایئے

تُم کہ ماجِد ابکے امریکہ میں ہو

گُن کُچھ اپنے بھی یہاں گِنوایئے

ماجد صدیقی

ذلیل کرتا ہے، بے حد خراب کرتا ہے

اکتوبر 1, 2017ماجِد نشان،ماجد صدیقی،غزللاجواب،نقاب،انتخاب،اجتناب،خرابadmin

ماجد صدیقی ۔ غزل نمبر 50

کرے تو اور ہی وہ احتساب کرتا ہے

ذلیل کرتا ہے، بے حد خراب کرتا ہے

سنان و تیر و کماں توڑ دے اُسی پر وہ

ستم کشی کو جسے انتخاب کرتا ہے

دمکتا اور جھلکتا ہے برگِ سبز سے کیوں؟

وہ برگِ زرد سے کیوں اجتناب کرتا ہے

بھلے جھلک نہ دکھائے وہ اپنے پیاروں کو

بُلا کے طُور پہ کیوں لاجواب کرتا ہے

گلوں میں عکس وہ ماجد دکھائے خود اپنے

کلی کلی کو وہی بے نقاب کرتا ہے

ماجد صدیقی

یہ ایک شمعِ سخن ہم نے جو جلائی ہے

اکتوبر 1, 2017ماجِد نشان،ماجد صدیقی،غزلچڑھائی،کمائی،اٹھائی،بھائی،جلائی،دہائیadmin

ماجد صدیقی ۔ غزل نمبر 51

ضیائے دہر، اندھیروں میں کھینچ لائی ہے

یہ ایک شمعِ سخن ہم نے جو جلائی ہے

کوئی کوئی ہے خُلیفہ خُدا کا ایسا بھی

تمام خلق میں جس کے سبب دُہائی ہے

مِلا ہے زاغ کو ٹُکڑا کہیں سے روٹی کا

اور ایک جُھنڈ کی اُس ایک پر چڑھائی ہے

بہ حقِ ہم نفساں ہے جو شر، یہ انساں ہے

کہ کل بھی جس نے قیامت نئی اُٹھائی ہے

نجانے کتنے دھڑوں میں ہے منقسم ٹھہری

وُہ نسل، روزِ ازل سے جو بھائی بھائی ہے

لگا رہا ہے تُو کیوں اِس کو داؤ پر ماجِد!

یہ آن ہی تو تری زیست کی کمائی ہے

ماجد صدیقی

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: