زمرہ جات کے محفوظات: منصور آفاق

تم نے میری طرف نہیں ہونا

دسمبر 1, 2007منصور آفاق،شعراء،غزلبکف،باشرف،حزف،رہ،صدف،طرفadmin

منصور آفاق ۔ غزل نمبر 47

فائروں کا ہدف نہیں ہونا

تم نے میری طرف نہیں ہونا

نام میرا مٹا دے ہر شے سے

میں نے دل سے حزف نہیں ہونا

ایک موتی ہی پاس ہے اس کے

مجھ سے خالی صدف نہیں ہونا

تم پیو گے تو میں بھی پی لوں گا

یونہی ساغر بکف نہیں ہونا

دیکھتی کیا ہو سوٹ کھدرکا

میں نے اندر سے رف نہیں ہونا

عشق کرنا خیال سے منصور

حسن نے باشرف نہیں ہونا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

عکس میں متصف نہیں ہونا

دسمبر 1, 2007منصور آفاق،شعراء،غزلمنکشف،منحرف،متصف،مختلف،معتکف،معترفadmin

منصور آفاق ۔ غزل نمبر 46

دیکھنا منکسف نہیں ہونا

عکس میں متصف نہیں ہونا

شہر میں معتبر تو ہونا ہے

شہر سے مختلف نہیں ہونا

وقت نے دیکھنا ہے آنکھوں سے

بس یونہی معترف نہیں ہونا

دل میں بس اعتکاف کرنا ہے

کعبہ میں معتکف نہیں ہونا

ہر طرف سولیاں سجی ہونگی

وقت پر منکشف نہیں ہونا

چوم لینی ہے دار بھی منصور

بات سے منحرف نہیں ہونا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

مگر کچھ اس کے مسائل کا بھی پتہ کرنا

دسمبر 1, 2007منصور آفاق،شعراء،غزلفیصلہ،فریفتہ،مکالمہ،مصافحہ،مطالعہ،معانقہ،پتہ،تبادلہ،تبصرہ،تجربہ،خاتمہ،رابطہadmin

منصور آفاق ۔ غزل نمبر 45

بجا ہے دوستو منصور کا گلہ کرنا

مگر کچھ اس کے مسائل کا بھی پتہ کرنا

بڑا ضروری ہے عشقِ مجاز میں منصور

خود اپنے آپ پہ خود کو فریفتہ کرنا

نگارِ لوح و قلم کا ہے مشورہ منصور

ہر ایک شے کا مکمل مطالعہ کرنا

بھلا دیا ہے فروغِ شعور نے منصور

لبوں سے قوسِ قزح کا تبادلہ کرنا

بس اپنی آنکھ سے اک بار دیکھنا منصور

پھر اس کے حسنِ مکمل پہ تبصرہ کرنا

یہ عمر ایک ہی پہلو میں کاٹ دے منصور

غلط ہے روز تعلق کا تجربہ کرنا

بس ایک کام نہیں آسکا مجھے منصور

شبِ فراقِ مسلسل کا خاتمہ کرنا

پھر اس کے بعد بدلنا اسے عجب منصور

تمام عمر میں بس ایک فیصلہ کرنا

جلا کے راکھ نہ کر دے کہیں تجھے منصور

یہ برقِ طور سے شب بھر معانقہ کرنا

مرے رسول کی سنت مرے لیے منصور

زمیں پہ رہ کے فلک سے مکالمہ کرنا

جنابِ شیخ کو اچھا نہیں لگا منصور

خدا کی ذات سے اپنا مصافحہ کرنا

یہ پانچ وقت جماعت کہے مجھے منصور

نماز کیا ہے زمانے سے رابطہ کرنا

یہ کیا کہ وہ جو دھڑکتا بدن میں ہے منصور

اس ایک شخص کا ہر شخص سے پتہ کرنا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

ہے لاج تمہیں اے ابرِ کرم دو بوندیں تو برسا جانا

دسمبر 1, 2007منصور آفاق،شعراء،غزللہرا،لگا،گھبرا،پتھرا،بکھرا،برسا،دھراadmin

منصور آفاق ۔ غزل نمبر 44

کچھ پھول کھلانا خوشبو کے، کچھ نورکے رنگ گرا جانا

ہے لاج تمہیں اے ابرِ کرم دو بوندیں تو برسا جانا

باطل کی یہ وحشت سامانی مرعوب کرے حق بازوں کو

یہ رسم نہیں پروانوں کی یوں شعلوں سے گھبرا جانا

منجدھار ہے اور طوفانِ بلا،ساحل کا تصور ڈوب چلا

بس آس تمہاری ہے آقا اب نیا پار لگا جانا

ہر بے بس کی فریاد رسی ہر بے کس دل کی چارہ گری

تائیدِ محمد صل علیٰ وہ ریت ذرا دھرا جانا

مقصود نہیں ہے عیش و طرب ہلکا سا تموج کافی ہے

ہے شوق یہی دیوانوں کو کچھ پی کے ذرا لہرا جانا

جب شہرِ مدنیہ آجائے جب گنبدِ خضرا سامنے ہو

اے خوابِ تخیل رک جانا اے چشمِ طلب پتھرا جانا

منصور مدنیہ کے سپنے پلکوں پہ اٹھائے پھرتا ہے

خوشبو کی طرح اے بادصبا ہر سمت اسے بکھرا جانا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

ہر مرد گفتگو میں تلخی پہن کے نکلا

دسمبر 1, 2007منصور آفاق،شعراء،غزلمٹی،چھتری،وسکی،تلخیadmin

منصور آفاق ۔ غزل نمبر 43

کیسا یہ ’’ گے ادب ‘‘ کا اِفتی مباحثہ تھا

ہر مرد گفتگو میں تلخی پہن کے نکلا

لندن کے اک کلب سے بلی کی کج روی پر

ساقی کے ساتھ میں بھی وسکی پہن کے نکلا

تم جس کو دیکھتے ہو کھلتے ہوئے ، وہ چہرہ

افلاک سے نمو کی مٹی پہن کے نکلا

کہتے ہیں چشم و لب کی بارش میں وسوسے ہیں

منصور دوپہر میں چھتری پہن کے نکلا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

پھر اسی باغ سے یہ میرا دبستاں نکلا

دسمبر 1, 2007منصور آفاق،شعراء،غزلفروزاں،گلستاں،گریباں،گریزاں،پریشاں،افشاں،امکاں،حیراں،دبستاں،ساماں،عریاںadmin

منصور آفاق ۔ غزل نمبر 42

پیڑ پر شام کھلی، شاخ سے ہجراں نکلا

پھر اسی باغ سے یہ میرا دبستاں نکلا

رات نکلی ہیں پرانی کئی چیزیں اس کی

اور کچھ خواب کے کمرے سے بھی ساماں نکلا

نقش پا دشت میں ہیں میرے علاوہ کس کے

کیا کوئی شہر سے پھر چاک گریباں نکلا

خال و خد اتنے مکمل تھے کسی چہرے کے

رنگ بھی پیکرِ تصویر سے حیراں نکلا

لے گیا چھین کے ہر شخص کا ملبوس مگر

والیء شہر پناہ ، بام پہ عریاں نکلا

صبح ہوتے ہی نکل آئے گھروں سے پھر لوگ

جانے کس کھوج میں پھر شہرِ پریشاں نکلا

وہ جسے رکھا ہے سینے میں چھپا کر میں نے

اک وہی آدمی بس مجھ سے گریزاں نکلا

زخمِ دل بھرنے کی صورت نہیں کوئی لیکن

چاکِ دامن کے رفو کا ذرا امکاں نکلا

تیرے آنے سے کوئی شہر بسا ہے دل میں

یہ خرابہ تو مری جان ! گلستاں نکلا

زخم کیا داد وہاں تنگیء دل کی دیتا

تیر خود دامنِ ترکش سے پُر افشاں نکلا

رتجگے اوڑھ کے گلیوں کو پہن کے منصور

جو شبِ تار سے نکلا وہ فروزاں نکلا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

ورنہ ہر زخم نصیبِ سر مژگاں نکلا

دسمبر 1, 2007منصور آفاق،شعراء،غزلمژگاں،ناداں،احساں،درخشاں،ساماں،عنواںadmin

منصور آفاق ۔ غزل نمبر 41

آپ کا غم ہی علاجِ غم دوراں نکلا

ورنہ ہر زخم نصیبِ سر مژگاں نکلا

اور کیا چیز مرے نامہء اعمال میں تھی

آپ کا نام تھا بخشش کا جو ساماں نکلا

محشرِ نور کی طلعت ہے، ذرا حشر ٹھہر

آج مغرب سے مرا مہر درخشاں نکلا

آپ کی جنبشِ لب دہر کی تقدیر بنی

چشم و ابرو کا چلن زیست کا عنواں نکلا

ظن و تخمینِ خرد اور مقاماتِ حضور؟

شیخ کم بخت بھی کس درجہ ہے ناداں نکلا

جب بھی اٹھی کہیں تحریک سحر کی منصور

غور کرنے پہ وہی آپﷺ کا احساں نکلا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

ایک جیسا کر دے مولا

دسمبر 1, 2007منصور آفاق،شعراء،غزلمنظر،ور،کر،گھر،گر،اندر،بہتر،بوزر،در،زیور،سر،صرصرadmin

منصور آفاق ۔ غزل نمبر 40

روشنی سے بھر دے مولا

ایک جیسا کر دے مولا

بے سہاروں ، بے کسوں کو

زندگی بہتر دے مولا

اچھی روٹی ،اچھے کپڑے

سب کو اچھے گھر دے مولا

ہرطرف دوزخ ہیں شر کے

خیر کے منظر دے مولا

بچے جتنے بھی ہیں ان کو

علم کا زیور دے مولا

ارتکازِ زر کے آگے

ہمتِ بوزر دے مولا

اِس معاشرتی گھٹن کو

نغمہِ صرصر دے مولا

نام پر اپنے نبیؐ کے

کٹنے والا سر دے مولا

شکل اچھی دی ہے لیکن

خوبرو اندر دے مولا

بس مدنیے کی گلی میں

نیکیوں کا در دے مولا

میرے پاکستان کو بھی

کوئی چارہ گر دے مولا

جان لوں منصور کو میں

چشمِ دیدہ ور دے مولا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

مجھے سوال کا کیسا حسیں جواب ملا

دسمبر 1, 2007منصور آفاق،شعراء،غزلکتاب،آفتاب،تاب،ثواب،جواب،حساب،خراب،شراب،غیابadmin

منصور آفاق ۔ غزل نمبر 39

سفید طشت میں اک کاسنی گلاب ملا

مجھے سوال کا کیسا حسیں جواب ملا

ملی شرابِ کرم ہم گناہگاروں کو

جنابِ شیخ کو بس وعدۂ شراب ملا

یہ آنکھیں لیں جو دیکھنا نہیں ممکن

کسی مقام پہ سر چشمۂ غیاب ملا

میں سرخ سرخ رتوں سے بڑا الرجک ہوں

مجھے ہمیشہ لہو رنگ آفتاب ملا

مجھے چراغ کی خواہش ذرا زیادہ ہے

وہ رات ہوں جسے کوئی نہ ماہ تاب ملا

علوم وصل سے میرا بھی کچھ تعارف ہو

کوئی بیاض دکھا دے کوئی کتاب ملا

سلگ اٹھی ہے تہجد میں وصل کی خواہش

خدائے پاک مجھے منزلِ ثواب ملا

تُو ہار جائے گی غم کا مقابلہ پگلی

شمارِ شامِ محرم سے نہ حساب ملا

ہزار ٹیکس دئیے روڈ کے مگر منصور

میں جس طرف بھی مڑا راستہ خراب ملا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

تیرا فیضان بے قیاس ملا

دسمبر 1, 2007منصور آفاق،شعراء،غزلقیاس،لباس،نواس،گلاس،پاس،اداس،خاص،شناسadmin

منصور آفاق ۔ غزل نمبر 38

جب مجھے حسنِ التماس ملا

تیرا فیضان بے قیاس ملا

گھر میں صحرا دکھائی دیتا ہے

شیلف سے کیا ابو نواس ملا

جب بھی کعبہ کو ڈھونڈنا چاہا

تیرے قدموں کے آس پاس ملا

تیری رحمت تڑپ تڑپ اٹھی

جب کہیں کوئی بھی اداس ملا

تیری توصیف رب پہ چھوڑی ہے

بس وہی مرتبہ شناس ملا

یوں بدن میں سلام لہرایا

جیسے کوثر کا اک گلاس ملا

تیری کملی کی روشنائی سے

زندگی کو حسیں لباس ملا

ابنِ عربی کی بزم میں منصور

کیوں مجھے احترامِ خاص ملا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

عمر بھرپھڑپھڑاتے بدن کے قفس میں تڑپنا ملا

دسمبر 1, 2007منصور آفاق،شعراء،غزلپنپنا،اپنا،تڑپنا،تپنا،جپناadmin

منصور آفاق ۔ غزل نمبر 37

ایسی بے رحم خواہش ملی ایسا سفاک سپنا ملا

عمر بھرپھڑپھڑاتے بدن کے قفس میں تڑپنا ملا

وہ چراغوں سے کیسے تعلق رکھیں کیسے ہم سے ملیں

وہ جنہیں دستِ تقدیر سے تیرگی میں پنپنا ملا

کس کی آغوش کے ہیں الاؤ کہانی میں پھیلے ہوئے

برف جیسی شبوں کوکہاں سے بھلا دن کا تپنا ملا

وہ دوبارہ لے آیا ہمیں پُر سکوں پستیوں کی طرف

اک پہاڑی سفر میں عجب خیراندیش اپنا ملا

ان بزرگوں کے نقشِ کفِ پا پہ آنکھیں رکھوں چوموں انہیں

جن بزرگوں سے ورثے میں اسمِ محمدﷺ کو جپنا ملا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

آسماں کے مگر ہے پاس ملا

دسمبر 1, 2007منصور آفاق،شعراء،غزلقصاص،ماس،یاس،کپاس،کراس،پاس،انعکاس،حواس،خلاصadmin

منصور آفاق ۔ غزل نمبر 36

خاک کا ایک اقتباس ملا

آسماں کے مگر ہے پاس ملا

اپنی تاریخ کے وہ ہیرو ہیں

جن کو وکٹوریہ کراس ملا

دیکھتے کیا ہو زر کہ یہ مجھ کو

اپنے ہی قتل کا قصاص ملا

جلوہ بس آئینے نے دیکھا ہے

ہم کو تو حسنِ انعکاس ملا

میز پر اہلِ علم و دانش کی

اپنے بھائی کا صرف ماس ملا

کتنے جلدی پلٹ کے آئے ہو

کیا نگر کا نگر خلاص ملا

اس میں خود میں سما نہیں سکتا

کیسا یہ دامنِ حواس ملا

چاند پر رات بھی بسر کی ہے

ہر طرف آسمانِ یاس ملا

زخم چنگاریوں بھرا منصور

وہ جو چنتے ہوئے کپاس ملا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

اپنے لہجے میں کچھ مٹھاس ملا

دسمبر 1, 2007منصور آفاق،شعراء،غزلہراس،مٹھاس،گھاس،پیاس،آس،باس،سپاسadmin

منصور آفاق ۔ غزل نمبر 35

شہد ٹپکا، ذرا سپاس ملا

اپنے لہجے میں کچھ مٹھاس ملا

سوکھ جائیں گی اس کی آنکھیں بھی

جا کے دریا میں میری پیاس ملا

خشک پتے مرا قبیلہ ہیں

دل جلوں میں نہ سبز گھاس ملا

آخری حد پہ ہوں ذرا سا اور

بس مرے خوف میں ہراس ملا

آ، مرے راستے معطر کر

آ، ہوا میں تُو اپنی باس ملا

نسخہء دل بنا مگر پہلے

اس میں امید ڈال آس ملا

ہے خداوند کے لیے منصور

سو غزل میں ذرا سپاس ملا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

میں نہیں دیر تلک تلخیاں رکھنے والا

دسمبر 1, 2007منصور آفاق،شعراء،غزلمرغابیاں،کھڑکیاں،پٹیاں،انگلیاں،تلخیاں،تتلیاںadmin

منصور آفاق ۔ غزل نمبر 34

یاد کے طاقچہ میں بجلیاں رکھنے والا

میں نہیں دیر تلک تلخیاں رکھنے والا

مجھ کو اس وقت بھی ہے تیز بہت تیز بخار

اورمرا کوئی نہیں پٹیاں رکھنے والا

چیرتا جاتا ہے خود آپ کنارے اپنے

ساحلوں پہ وہی مرغابیاں رکھنے والا

دھول سے کیسے بچا سکتا ہے اپنی چیزیں

دل کے کمرے میں کئی کھڑکیاں رکھنے والا

پال بیٹھا ہے پرندوں کی رہائی کا جنون

جار میں اپنے لئے تتلیاں رکھنے والا

بزم میں آیا نہیں کتنے دنوں سے منصور

وہ پیانو پہ حسیں انگلیاں رکھنے والا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

دشتِکُن میں چشمۂ حمد و ثنا احمد رضا

دسمبر 1, 2007منصور آفاق،شعراء،غزلفلسفہ،ماجرا،مصطفی،نما،نوا،نگہ،نابغہ،کہا،الہ،الضحی،انتہا،آشنا،ادا،بادصبا،ترجمہ،ثنا،خدا،دیا،راستہ،زائچہ،سلسلہ،سوا،سرا،صفا،صدا،ضیا،عربیہ،عزوعطاadmin

منصور آفاق ۔ غزل نمبر 33

صبح دم شہرِ مدنیہ کی ہوا احمد رضا

دشتِکُن میں چشمۂ حمد و ثنا احمد رضا

حمد کی بہتی کرن وہ نعت کی اجلی شعاع

مدحتوں کے باغ کی بادِصبا احمد رضا

زندہ و جاوید رکھتا ہے انہیں عشقِ رسول

عشق کی بابت فنا نا آشنا احمد رضا

یہ سرِ فہرست عشاقِ محمدمیں ہے کون ؟

پوچھنے والے نے پھر خود ہی کہا احمد رضا

خانہ ء تاریک میں بھر دے اجالے لفظ سے

فیض کا سر چشمۂ صدق و صفا احمد رضا

کنزالایماں سے منور صحنِ اردو ہو گیا

آیتوں کا اختتامِ ترجمہ احمد رضا

روک دیتے ہیں بہارِ حکمت و عرفان سے

بد عقیدہ موسموں کا سلسلہ احمد رضا

آسماں کی بے کراں چھاتی پہ روز حشر تک

صبح نے کرنوں سے اپنی، لکھ دیا، احمد رضا

جل اٹھے ان سے سبھی علمِ عقائد کے چراغ

راستی کا روشنی کا راستہ احمد رضا

صاحبِ علم الکلام و حاملِ علم شعور

حاصلِ عہد علومِ فلسفہ احمد رضا

عالمِ علم لدنی ، عاملِ تسخیرِ ذات

روح و جاں میں قربِ احساسِ خدا احمد رضا

وہ صفاتِ حرف کی رو سے مخارج کے امیں

محرمِ احکامِ تجوید و نوا احمد رضا

بابتِ تفسیر قرآں جانتے تھے ایک ایک

معنی و تفہیمِ الہامِ الہ احمد رضا

وہ روایت اور درایت آشنا شیخ الحدیث

علمِ احوالِ نبی کے نابغہ احمد رضا

مالکی وشافعی ہوں یا کہ حنفی حنبلی

فقہ اربعہ پہ حرف انتہا احمد رضا

علمِ استخراجیہ ہویا کہ استقرائیہ

دیدہ ء منطق میں ہے چہرہ نما احمد رضا

علم ہندسہ و ریاضی کے نئے ادوار میں

موئے اقلیدس کی اشکال و ادا احمد رضا

علم جامع و جفر کی ہر ریاضت گاہ میں

جو ہرِ اعداد کی صوت و صدا احمد رضا

وہ بروج فلکیہ میں انتقال شمس ہیں

صاحبِعلمِ نجوم و زائچہ احمد رضا

وقت کی تاریخ ان کے ہاتھ پر تحریر ہے

جانتے ہیں سرگزشتِ ماجرا احمد رضا

روشنی علمِ تصوف کی انہی کی ذات سے

کثرتِ جاں میں لبِ وحدت سرا احمد رضا

حرفِ آخر تھے وہی عربی ادب پر ہند میں

والی ء تختِ علوم عربیہ احمد رضا

علمِ جاں ، علمِ فضائلِ علمِ لغت ،علم سیر

در علومِ خیرتجسیمِ ضیا احمد رضا

آسمانِ معرفت ، علمِ سلوک وکشف میں

منظرِبدرالدجیٰ ، شمس الضحیٰ احمد رضا

صبحِ عرفانِ الہی ، عابد شب زندہ دار

مسجدِ یاد خدا و مصطفی احمد رضا

عجز کا پندار ہے میرے قلم کی آنکھ میں

جو کچھ لکھا میں نے، کہیں اُس سے سوا احمد رضا

ٹوٹے پھوٹے لفظ تیری بارگاہ میں پیش ہیں

گرقبول افتدزہے عزوعطا احمد رضا

اعلی حضرت اہلِ سنت کے امام و پیشوا

اک نگہ مجھ پہ کرم کی اک نگہ احمد رضا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

آئینہ دیکھیں تو لگتا ہے تمہارے جیسا

دسمبر 1, 2007منصور آفاق،شعراء،غزلمارے،کنارے،تمہارے،خسارے،ستارے،غبارے،غرارےadmin

منصور آفاق ۔ غزل نمبر 32

ہم میں رہتا ہے کوئی شخص ہمارے جیسا

آئینہ دیکھیں تو لگتا ہے تمہارے جیسا

بجھ بجھا جاتا ہے یہ بجھتی ہوئی رات کے ساتھ

دل ہمارا بھی ہے قسمت کے ستارے جیسا

شام کا وقت فقط بھاری نہیں ہے ہم پر

پھول کا چہرہ بھی ہے درد کے مارے جیسا

لے گئی ساتھ اڑا کر جسے ساحل کی ہوا

ایک دن تھا کسی بچے کے غبارے جیسا

قوس در قوس کوئی گھوم رہا ہے کیا ہے

رقص کرتی کسی لڑکی کے غرارے جیسا

شکر ہے ہم نے کما لی تھی اداسی ورنہ

ہے محبت میں منافع تو خسارے جیسا

کشتیاں بیچ میں چلتی ہی نہیں ہیں منصور

اک تعلق ہے کنارے سے کنارے جیسا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

اک تغیر موسموں میں لا رہا ہے نور سا

دسمبر 1, 2007منصور آفاق،شعراء،غزللا،گا،ا،جا،دہکاadmin

منصور آفاق ۔ غزل نمبر 31

روشنی آئندہ میں پھیلا رہا ہے نور سا

اک تغیر موسموں میں لا رہا ہے نور سا

دے رہا ہے موت کے قیدی کو شاید حوصلہ

ایک روزن سے ابھی تک آرہا ہے نور سا

دیکھتا ہوں اپنی امی کے قدم اٹھتے ہوئے

چل رہی ہیں وہ یا چلتا جا رہا ہے نور سا

شام ڈھلتی جارہی ہے اک جنازے کے قریب

موت کے دربار میں کچھ گا رہا ہے نور سا

برف کے منصور طوفاں میں کرم کا گرم غار

لکڑیوں سے آگ بھی دہکا رہا ہے نور سا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

قریب آیا ہے میرے وہ یار تھوڑا سا

دسمبر 1, 2007منصور آفاق،شعراء،غزلیار،گزار،انتظار،انحصار،اختیار،اختصار،خوشگوارadmin

منصور آفاق ۔ غزل نمبر 30

ہے اضطراب زیادہ ، قرار تھوڑاسا

قریب آیا ہے میرے وہ یار تھوڑا سا

میں جانتا ہوں کہ مصروف ہے کوئی کچھ دن

مگر یہ ہوتا نہیں انتظار تھوڑا سا

اُسی نے دست درازی کی تیری قدرت پر

جسے بھی تُونے دیا اختیار تھوڑا سا

الرجی ہے نا تجھے خاک کے مسائل سے

تُو آسماں پہ زمانہ گزار تھوڑا سا

اُسی نے روشنی لے کراُسے بجھایا ہے

دئیے نے جس پہ کیا انحصار تھوڑا سا

نمی بھی پونچھ لی قرب و جوارِدیدہ سے

اب اور کیسے کروں اختصار تھوڑا سا

وہ مسکرائی مرے التماس پر منصور

نگارِ شہر ہوا خوشگوار تھوڑا سا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

ہے بہاروں بھرا اک مہینہ مرا

دسمبر 1, 2007منصور آفاق،شعراء،غزلقرینہ،مہینہ،مدنیہ،پسینہ،خزنیہ،سینہadmin

منصور آفاق ۔ غزل نمبر 29

جس سے شاداب رہتا ہے جینا مرا

ہے بہاروں بھرا اک مہینہ مرا

اس کی خوشنودیوں کی کہانی رہے

ہر عمل ہر ادا ہر قرینہ مرا

کعبہِ اسمِ کن کے کہیں آس پاس

آسمانو! زمیں پر خزنیہ مرا

جسم درجسم بس بھیڑیوں کی طرح

کس نے پنجوں سے چیرا ہے سینہ مرا

کس نے پھانسی چڑھایامرے خواب کی

کون ہے جس نے لوٹا مدنیہ مرا

حیف منصور !حاصل سے محروم ہے

خون کی طرح بہتا پسینہ مرا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

اک نئی کائنات سے گزرا

دسمبر 1, 2007منصور آفاق،شعراء،غزلہاتھ،منات،نفسیات،واقعات،کائنات،ثبات،حیات،حادثات،رات،سومناتadmin

منصور آفاق ۔ غزل نمبر 28

جب بھی میں کشفِ ذات سے گزرا

اک نئی کائنات سے گزرا

ہاتھ میں لالٹین لے کر میں

جبر کی کالی رات سے گزرا

آتی جاتی ہوئی کہانی میں

کیا کہوں کتنے ہاتھ سے گزرا

موت کی دلکشی زیادہ ہے

میں مقامِ ثبات سے گزرا

جستہ جستہ دلِ تباہ مرا

جسم کی نفسیات سے گزرا

لمحہ بھر ہی وہاں رہا لیکن

میں بڑے واقعات سے گزرا

لفظ میرا ترے تعاقب میں

حوضِ آبِ حیات سے گزرا

ایک تُو ہی نہیں ہے غم کا سبب

دل کئی حادثات سے گزرا

یہ بھی اِنکار کی تجلی ہے

ذہن لات و منات سے گزرا

دستِ اقبال تھام کر منصور

کعبہ و سومنات سے گزرا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

روح کے اختلاط سے گزرا

دسمبر 1, 2007منصور آفاق،شعراء،غزلقراط،نقاط،نشاط،انبساط،احتیاط،اختلاط،بساط،رباط،صراطadmin

منصور آفاق ۔ غزل نمبر 27

رنگ اپنے محاط سے گزرا

روح کے اختلاط سے گزرا

عشق ڈھائیں قیامتیں کیا کیا

دل کئی پل صراط سے گزرا

روزمحشر بھی اسکے پہلو سے

میں بڑی احتیاط سے گزرا

ہر جگہ نقشِ پا ہیں کیوں میرے

کب میں شہرِ رباط سے گزرا

پھول سے قمقمے تھے پانی میں

جب میں نہرِ نشاط سے گزرا

نور کی پتیوں کی بارش میں

دل شبِ انبساط سے گزرا

میں الف کی شبیہ بنانے میں

بے کے کتنے نقاط سے گزرا

ہائے وہ جو تراشنے کے بعد

ایک سو دس قراط سے گزرا

شب گزرتی ہے جیسے یوں منصور

زندگی کی بساط سے گزرا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

خواب میں بھی ہراس سے گزرا

دسمبر 1, 2007منصور آفاق،شعراء،غزلہراس،ناشناس،کراس،پیاس،پاس،اقتباس،التماس،خاص،سپاسadmin

منصور آفاق ۔ غزل نمبر 26

کیسے وہم و قیاس سے گزرا

خواب میں بھی ہراس سے گزرا

ہر عمارت بہار بستہ ہے

کون چیرنگ کراس سے گزرا

رات اک کم سخن بدن کے میں

لہجہ ء پُر سپاس سے گزرا

پھر بھی صرفِ نظر کیا اس نے

میں کئی بار پاس سے گزرا

رو پڑی داستاں گلے لگ کر

جب میں دیوانِ خاص سے گزرا

عمر بھر عشق ،حسن والوں کی

صبحتِ ناشناس سے گزرا

کیا کتابِ وفا تھی میں جس کے

ایک ہی اقتباس سے گزرا

مثلِ دریا ہزاروں بار بدن

اک سمندر کی پیاس سے گزرا

ہجر کے خارزار میں منصور

وصل کی التماس سے گزرا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

نیند آتی تو کوئی خواب دکھائی دیتا

دسمبر 1, 2007منصور آفاق،شعراء،غزلکمخواب،گرداب،باب،برفاب،تالاب،خواب،شادابadmin

منصور آفاق ۔ غزل نمبر 25

کوئی چہرہ کوئی مہتاب دکھائی دیتا

نیند آتی تو کوئی خواب دکھائی دیتا

خواہشیں خالی گھڑے سر پہ اٹھا لائی ہیں

کوئی دریا کوئی تالاب دکھائی دیتا

ڈوبنے کو نہ سمندر نہ کوئی چشمِ سیہ

جام ہی میں کوئی گرداب دکھائی دیتا

تُو وہ ریشم کہ مرا ٹاٹ کا معمولی بدن

تیرے پیوند سے کمخواب دکھائی دیتا

دوستو آگ بھری رات کہاں لے جاؤں

کوئی خس خانہ و برفاب دکھائی دیتا

میرا کردار کہانی میں جہاں ہیرو ہے

تیرے ناول کا وہی باب دکھائی دیتا

دل میں چونا پھری قبروں کی شبہیں منصور

کیسے میں زندہ و شاداب دکھائی دیتا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

کیا اس کی اجازت بھی اسلام نہیں دیتا

دسمبر 1, 2007منصور آفاق،شعراء،غزلنام،کام،الزام،انجام،آم،آرام،اسلام،دام،شامadmin

منصور آفاق ۔ غزل نمبر 24

وہ بات نہیں کرتا، دشنام نہیں دیتا

کیا اس کی اجازت بھی اسلام نہیں دیتا

بندوق کے دستے پر تحریر تھا امریکا

میں قتل کا بھائی کو الزام نہیں دیتا

کچھ ایسے بھی اندھے ہیں کہتے ہیں خدا اپنا

پیشانی پہ سورج کی کیوں نام نہیں دیتا

رستے پہ بقا کے بس قائم ہے منافع بخش

اْس پیڑ نے کٹنا ہے جو آم نہیں دیتا

اب سامنے سورج کے برسات نہیں ہوتی

دکھ آنکھ نہیں بھرتے غم کام نہیں دیتا

موتی میری پلکوں کے بازار میں رُلتے ہیں

کوئی بھی جواہر کے اب دام نہیں دیتا

اوراقِ گل و لالہ لکھے ہوئے لے جائے

جو صبحِ غزل جیسی اک شام نہیں دیتا

کرداروں کے چہروں پر چھریاں ہیں ابھر آئیں

پھر بھی وہ کہانی کو انجام نہیں دیتا

بیڈ اپنا بدل لینا منصور ضروری ہے

یہ خواب دکھاتا ہے، آرام نہیں دیتا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

میں لوٹ کے آؤں گا وہ جاتے ہوئے کہتا

دسمبر 1, 2007منصور آفاق،شعراء،غزلہلاتے،لگاتے،ملاتے،بہاتے،بناتے،بتاتے،جلاتے،جگاتے،جاتےadmin

منصور آفاق ۔ غزل نمبر 23

اتنا تو تعلق کو نبھاتے ہوئے کہتا

میں لوٹ کے آؤں گا وہ جاتے ہوئے کہتا

پہچانو مجھے، میں وہی سورج ہوں تمہارا

کیسے بھلا لوگوں کو جگاتے ہوئے کہتا

یہ صرف پرندوں کے بسیرے کے لیے ہے

آنگن میں کوئی پیڑ لگاتے ہوئے کہتا

ہر شخص مرے ساتھ ’’انا الحق‘‘ سرِ منزل

آواز سے آواز ملاتے ہوئے کہتا

اک موجِ مسلسل کی طرح نقش ہیں میرے

پتھر پہ میں اشکال بناتے ہوئے کہتا

اتنا بھی بہت تھا مری مایوس نظر کو

وہ دور سے کچھ ہاتھ ہلاتے ہوئے کہتا

یہ تیرے عطا کردہ تحائف ہیں میں کیسے

تفصیل مصائب کی بتاتے ہوئے کہتا

موسم کے علاوہ بھی ہو موجوں میں روانی

دریا میں کوئی نظم بہاتے ہوئے کہتا

عادت ہے چراغ اپنے بجھانے کی ہوا کو

کیا اس سے کوئی شمع جلاتے ہوئے کہتا

میں اپنی محبت کا فسانہ اسے منصور

محفل میں کہاں ہاتھ ملاتے ہوئے کہتا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

میں پیاز ایسی کہیں صفت نہیں چاہتا

دسمبر 1, 2007منصور آفاق،شعراء،غزلمنافقت،معذرت،خط،سلطنت،صفت،غلطadmin

منصور آفاق ۔ غزل نمبر 22

تری ہر پرت میں کوئی پرت نہیں چاہتا

میں پیاز ایسی کہیں صفت نہیں چاہتا

اسے رقص گاہ میں دیکھنا کبھی مست مست

مرے دوستو میں اسے غلط نہیں چاہتا

کسی ذہن میں ، کسی خاک پر یا کتاب میں

میں یزید کی کہیں سلطنت نہیں چاہتا

مرے چشم و لب میں کرختگی ہے شعور کی

میں سدھارتھا، ترے خال و خط نہیں چاہتا

فقط ایک جام پہ گفتگو مری شان میں

سرِ شام ایسی منافقت نہیں چاہتا

مرے ساتھ شہر نے جو کیا مجھے یاد ہے

میں کسی کی کوئی بھی معذرت نہیں چاہتا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

مگر اب فریب کی سلطنت نہیں چاہتا

دسمبر 1, 2007منصور آفاق،شعراء،غزلمفاہمت،مناسبت،مباشرت،مخالفت،مراجعت،مشاورت،مصالحت،مطابقت،پت،سلطنتadmin

منصور آفاق ۔ غزل نمبر 21

میں جنابِ صدر ملازمت نہیں چاہتا

مگر اب فریب کی سلطنت نہیں چاہتا

مرا دین صبح کی روشنی مری موت تک

میں شبوں سے کوئی مصالحت نہیں چاہتا

میں حریصِ جاہ و حشم نہیں اِسے پاس رکھ

یہ ضمیر زر سے مباشرت نہیں چاہتا

کرے آ کے گفت و شنید مجھ سے کوئی چراغ

کسی شب زدہ کی مشاورت نہیں چاہتا

میں کنارِ آب رواں نہیں شبِ یاد میں

کسی چاندنی سے مناسبت نہیں چاہتا

مجھے موت تیرے محاصرے میں قبول ہے

میں عدو سے کوئی مفاہمت نہیں چاہتا

شبِ ظلم سے میں لڑوں گا آخری وار تک

کوئی ظالموں سے مطابقت نہیں چاہتا

مجھے جلتی کشتیاں دیکھنے کی طلب نہیں

میں مزاحمت میں مراجعت نہیں چاہتا

مرے پاس اب کوئی راستہ نہیں صلح کا

مجھے علم ہے تُو مخالفت نہیں چاہتا

انہیں ’بھوربن‘ کی شکار گاہ عزیز ہے

ترا لشکری کوئی پانی پت نہیں چاہتا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

میرے سر پہ کوئی آسماں کیوں نہیں ، میں نہیں جانتا

دسمبر 1, 2007منصور آفاق،شعراء،غزلنہیں،نشیں،یقیں،کہیں،آستیں،بریںadmin

منصور آفاق ۔ غزل نمبر 20

کھینچ لی میرے پاؤں سے کس نے زمیں ، میں نہیں جانتا

میرے سر پہ کوئی آسماں کیوں نہیں ، میں نہیں جانتا

کیوں نہیں کانپتا بے یقینی سے پانی پہ چلتے ہوئے

کس لیے تجھ پہ اتنا ہے میرا یقیں ، میں نہیں جانتا

ایک خنجر تو تھا میرے ٹوٹے ہوئے خواب کے ہاتھ میں

خون میں تر ہوئی کس طرح آستیں ، میں نہیں جانتا

کچھ بتاتی ہیں بندوقیں سڑکوں پہ چلتی ہوئی شہر میں

کس طرح، کب ہوا، کون مسند نشیں ، میں نہیں جانتا

لمحہ بھر کی رفاقت میں ہم لمس ہونے کی کوشش نہ کر

تیرے بستر کا ماضی ہے کیا میں نہیں ، میں نہیں جانتا

اس کے بے مہر دوزخ میں اپنی تو گزری ہیں تنہائیاں

اُس مبارک گلی کا بہشتِ بریں ، میں نہیں جانتا

کیا مرے ساتھ منصور چلتے ہوئے راستے تھک گئے

کس لیے ایک گھر چاہتا ہوں کہیں ، میں نہیں جانتا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

رستہ کوئی جا تیری گلی سے نہیں ملتا

دسمبر 1, 2007منصور آفاق،شعراء،غزلندی،ڈری،کسی،گلی،گھڑی،اسی،خوشیadmin

منصور آفاق ۔ غزل نمبر 19

اے چاند پتہ تیرا کسی سے نہیں ملتا

رستہ کوئی جا تیری گلی سے نہیں ملتا

او پچھلے پہر رات کے، جا نیند سے کہہ دے

اب خواب میں بھی کوئی کسی سے نہیں ملتا

کیوں وقتِ مقرر پہ ٹرام آتی نہیں ہے

کیوں وقت ترا میری گھڑی سے نہیں ملتا

میں جس کے لیے عمر گزار آیا ہوں غم میں

افسوس مجھے وہ بھی خوشی سے نہیں ملتا

یہ ایک ریاضت ہے خموشی کی گپھا میں

یہ بختِ ہنر نام وری سے نہیں ملتا

وہ تجھ میں کسی روز ضرور آ کے گرے گی

دریا تو کبھی جا کے ندی سے نہیں ملتا

دہلیز پہ رکھ جاتی ہے ہر شام جو آنکھیں

منصور عجب ہے کہ اسی سے نہیں ملتا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

اے سمندر ! مرے آباد جزیروں میں نہ آ

دسمبر 1, 2007منصور آفاق،شعراء،غزلفقیروں،ہیروں،اسیروں،تیروں،جزیروںadmin

منصور آفاق ۔ غزل نمبر 18

موج بن کر کہیں ہاتھوں کی لکیروں میں نہ آ

اے سمندر ! مرے آباد جزیروں میں نہ آ

خاک میں تجھ کوملادے گی کوئی تیز نظر

بادشاہوں کی طرح دیکھ فقیروں میں نہ آ

بند کردے گی تجوری میں تجھے تیری چمک

کنکروں میں کہیں رہ،قیمتی ہیروں میں نہ آ

جنگ شطرنج ہے ، چالوں کا سلیقہ ہے فقط

ہوش کر ، دیکھ برستے ہوئے تیروں میں نہ آ

عمر منصور اڑانوں میں فقط اپنی گزار

دام پہچان شکاری کے، اسیروں میں نہ آ

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

چاند ہے تُو رات کے اسباب سے باہر نہ آ

دسمبر 1, 2007منصور آفاق،شعراء،غزلمہتاب،محراب،گرداب،اسباب،برفاب،خواب،شادابadmin

منصور آفاق ۔ غزل نمبر 17

پانیوں میں رقص کر، تالاب سے باہر نہ آ

چاند ہے تُو رات کے اسباب سے باہر نہ آ

سرسراتے سانپ ہیں گہری سنہری گھاس میں

جنگلوں میں پابرہنہ خواب سے باہر نہ آ

ہجر کے تاریک منظر میں یہی امکان گاہ

چاندنی سے قریہ ء مہتاب سے باہر نہ آ

اک وہی رہنے دے اپنی آنکھ میں تصویر بس

ساعتِ بھرپور سے شاداب سے باہر نہ آ

آگ دوزخ کی ہے سورج کی نگاہِ ناز میں

اور کچھ دن حجلہ ء برفاب سے باہر نہ آ

لاکھ دے دشنام شیخِ بدنسب کے کام کو

زندگی تُو ، منبر و محراب سے باہر نہ آ

ذات کی پاتال میں ہو گی بلندی عرش کی

ڈوب جا منصور کے گرداب سے باہر نہ آ

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

آدمی ہو گئے ہیں کیوں سستے

دسمبر 1, 2007منصور آفاق،شعراء،غزلہنستے،کستے،گلدستے،بستے،جستے،خستے،دستے،رستے،سستےadmin

منصور آفاق ۔ غزل نمبر 16

اے با انوار خویش سر مستے

آدمی ہو گئے ہیں کیوں سستے

سنگ پڑتے نہ خوش دماغوں پر

کاش تیری گلی میں جا بستے

تیرے ہی گلستاں سے لائے ہیں

دہر کے گل فروش، گلدستے

تیرے ہی در پہ ختم ہوتے ہیں

آزمائے ہیں ہم نے سب رستے

تیرے رحم و کرم پہ زندہ ہیں

جاں شکستے دل و جگر خستے

تیری رحمت بھری نظر ہوتی

ہم غریبوں پہ لوگ کیوں ہنستے

دشت کی ریت یاد آتی ہے

ہم بھی اپنی کبھی کمر کستے

تیرے عشاق کی تلاش میں ہیں

پھر مسلمان فوج کے دستے

میں نے منصور دار دیکھی ہے

عشق پراں بود بیک جستے

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

اک مستقل فراق کے پہلو میں کیوں رہوں

دسمبر 1, 2007منصور آفاق،شعراء،غزلہوں،فسوں،کیوں،پڑوں،جنوں،دوں،رہوںadmin

منصور آفاق ۔ غزل نمبر 15

میرا خیال ہے کوئی پردہ اٹھا ہی دوں

اک مستقل فراق کے پہلو میں کیوں رہوں

مے خانۂ حیات میں محرم کوئی نہیں

شاید میں کائنات کا پہلا شعور ہوں

سورج کو میری آنکھ بجھا ہی نہ دے کہیں

پروردگارِ دشت ہوں پیغمبرِ جنوں

دن بھر تلاش کرتا ہوں تعبیر کس لیے

ہر رات ایک خواب کے ہوتا ہوں ساتھ کیوں

بستی سے جا رہی ہے پرندوں بھری ٹرام

تُو ساتھ دے اگر تو کہیں میں بھی چل پڑوں

کیوں آنکھ میں سجا کے سمندر کے ولولے

حیرت سے دیکھتا ہوں کسی چاند کا فسوں

کوئی نشانی میری کسی ہاتھ میں تو ہو

منصور کس کو جا کے میں سونے کا رِنگ دوں

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

چلتا رہوں سڑک پہ ابھی یا کہیں رکوں

دسمبر 1, 2007منصور آفاق،شعراء،غزللوں،کہوں،دوں،رہوں،رکوں،رکھوں،سکوںadmin

منصور آفاق ۔ غزل نمبر 14

کوئی نہیں مجھے جو بتائے میں کیا کروں

چلتا رہوں سڑک پہ ابھی یا کہیں رکوں

ممکن نہیں ہے اس سے کوئی بات ہو سکے

ممکن نہیں ہے اس کا کہیں نام لے سکوں

اس شہرناشناس میں کوئی نہیں مرا

دستک کہاں پہ دوں میں کسے جا کے کچھ کہوں

کب تک امیدرکھوں کہ اترے گا وہ ابھی

کب تک میں آسماں کی طرف دیکھتا رہوں

آنچل شبِ فراق کا اب کاٹنے لگا

میرا خیال ہے یہ ستارے میں نوچ لوں

بارش ہوا کے دوش پہ کمروں تک آگئی

گملے برآمدے کے چھپا کر کہاں رکھوں

منصور مشورہ یہی بہتر ہے دھوپ کا

اب شامِ انتظار اٹھا کرمیں پھینک دوں

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

سن رہا ہوں شب کی تیرہ ساعتوں کی سسکیاں

دسمبر 1, 2007منصور آفاق،شعراء،غزلہچکیاں،گستاخیاں،تلخیاں،تابیاں،درمیاں،رعنائیاں،سسکیاںadmin

منصور آفاق ۔ غزل نمبر 13

ہیں کسی تکلیف کی کیا خوبرو تبدیلیاں

سن رہا ہوں شب کی تیرہ ساعتوں کی سسکیاں

چھڑ گئے ہیں پھر مسائل ایک کالی رات کے

آرہی ہیں یاد پھر سے زندگی کی تلخیاں

میں نے مصرع کی کلائی کو نئے کنگن دئیے

شانِ دوشیزہ سخن میں ہو گئیں گستاخیاں

آخری تاریکیاں ہیں قریہء امکان میں

گن رہا ہوں ہچکیاں پچھلے پہر کی ہچکیاں

اک اشارہ چاہئے حرفِ کرم کا صبح کو

دیدۂ تقویم میں ہیں وقت کی بے تابیاں

امتِ مرحومہ کو پھر بخش دے روحِ حیات

سربکف تیرے لئے ہے ظالموں کے درمیاں

میں نے جو منصور لکھا اُس پہ شرمندہ نہیں

مجھ سے پائندہ ہوئی ہیں حرف کی رعنائیاں

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

ہے علم مجھے میں کون

دسمبر 1, 2007منصور آفاق،شعراء،غزلکوچ،پون،آواگون،بھون،جون،عونadmin

منصور آفاق ۔ غزل نمبر 12

میں موسیٰ میں فرعون

ہے علم مجھے میں کون

میں ازلوں سے موجود

میں کُن کا آواگون

میں آپ خداکا ہاتھ

میں آپ الہی عون

پوری کب کوئی چیز

ہر ایک حقیقت پون

لیکھ بھوانی جنگشن

وقت پرانا بھون

شاعر ہوسکتا تھا

بدقسمت بھائی جون

میں بلھا میں منصور

میں کون سنو میں کون

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

کیا جانے کس اور گئے ہیں خوابوں کے مہمان

دسمبر 1, 2007منصور آفاق،شعراء،غزلمہمان،پہچان،پاکستان،دھان،دانadmin

منصور آفاق ۔ غزل نمبر 11

نکھری صبحیں ، بکھری شامیں ، راتیں ہیں سنسان

کیا جانے کس اور گئے ہیں خوابوں کے مہمان

سرمایہ ہیں تیرے سپنے ، حاصل تیرے خواب

تیری یاد کا چہرہ میری ذات کی ہے پہچان

کاش کوئی آ،تاپے اپنی نرم و ملائم شام

روح میں جلتا دیکھوں دن بھر غم کا آتش دان

کس کا چہرہ جنس زدہ ہے ، کس کا جسم غلیظ

کون زمیں کی پیٹھ پہ پھوڑا تُو یا پاکستان

تیس برس کی اک لڑکی کا جیسے کومل جسم

دوبالشت جب ہوجائے منصور سنہری دھان

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

چہرے کے ڈوبتے ہوئے فردوس کو اجال

دسمبر 1, 2007منصور آفاق،شعراء،غزلملال،چال،گال،اجال،بال،خال،سوالadmin

منصور آفاق ۔ غزل نمبر 10

اے میری نرم گرم بہشتِ جوان سال

چہرے کے ڈوبتے ہوئے فردوس کو اجال

ہنزہ کے نور سیبو ! دسمبر کی نرم دھوپ

نارنجی کر رہی ہے تمہارے سفید گال

کچھ فیض قربتوں کے بھی ہوتے تو ہیں مگر

ہے بند پارٹنر سے ابھی تک تو بول چال

لب پر ہیں قہقہے کسی ناکام ضبط کے

دل میں بھرا ہوا ہے قیامت کا اک ملال

ہر چند گفتگو ہے توسط سے فون کے

لیکن نگاہ میں ہیں خیالوں کے خدو خال

کیا کھولتی ہو پوٹلی ان پڑھ فقیر کی

بازار سے خرید کے لایا ہوں کچھ سوال

منصور احتیاط سے چاہت کے بول، بول

لڑکوں سے اس کے کام ہیں مردوں سے اس کے بال

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

احتیاط و احتیاط

دسمبر 1, 2007منصور آفاق،شعراء،غزلمحاط،نقاط،نشاط،احتیاط،اختلاط،بساط،صراطadmin

منصور آفاق ۔ غزل نمبر 9

اس قدر یہ انبساط

احتیاط و احتیاط

دو گھروں کے درمیاں

تیغ تیور پل صراط

شیشہء جاں پھوڑ کر

بہہ گیا آبِ نشاط

آ گرے ہیں سین پر

شین کے تینوں نقاط

دوست امریکا کا وہ

اور کیا میری بساط

بڑھ رہا ہے باغ میں

موسموں کا اختلاط

وہ شکاری وہ محیط

میں گرفتہ میں محاط

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

اے حادثاتِ وقت کے خالق گزار خیر

دسمبر 1, 2007منصور آفاق،شعراء،غزلبیر،تیر،خیر،دیر،سیر،غیرadmin

منصور آفاق ۔ غزل نمبر 8

پاؤں سے دھرتی نکلی تو رکھے فلک پہ پیر

اے حادثاتِ وقت کے خالق گزار خیر

ہم لوگ ہیں زمیں پہ مسلسل کھڑی نماز

ہم نے رکھا نہیں ہے کبھی آسماں سے بیر

اس کرۂ کشش کے طلسمات توڑ دے

اے دجلۂ زمیں کے شناور ، خلا میں تیر

دنیا میں مال و زر کے سجودو رکوع سے

مسلم گزیدہ کعبہ ہے کافر گزیدہ دیر

وہ جانتے ہیں رات کی ساری کہا نیاں

سانسوں کے پل صراط پر دن بھر کریں جو سیر

منصور کہہ رہے ہیں عمل سے فلک شناس

ابلیس رشتہ دار ہمارا ، خدا ہے غیر

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

آنکھوں سے گرپڑے کئی نیلم کے آبشار

دسمبر 1, 2007منصور آفاق،شعراء،غزلقرار،پکار،انتظار،آبشار،اشکبار،بہار،دار،داغدار،زار،سوار،شکارadmin

منصور آفاق ۔ غزل نمبر 7

میں جا رہا تھا دیکھنے فرودسِ بے کنار

آنکھوں سے گرپڑے کئی نیلم کے آبشار

شادابیوں کی آخری حد، وادئ گریز

پاؤں کے انتظار میں صدیوں سے اشکبار

ہلمت کی بے پناہ بلندی پہ تیز آب

پھرتا ہے بادلوں کے دریچوں میں بے قرار

لاکھوں برس قدیم گھنے جنگلوں کا کیل

اور اس کے بیچ زندگی باردو کا شکار

کیوں صحنِ شاردا میں ہوئی بدھ کی آتما

کتنے کروڑ لوگوں کے اشکوں سے داغدار

معصوم داؤکھن کی مقدس سفیدیاں

اک دورِ جاھلاں میں رسولوں میں انتظار

شمشہ بری کے پیچھے چناروں کا سرخ روپ

بادل بھری شعاعوں کامقتل پسِ بہار

اڑتے ہیں دھیر کوٹ کی گلیوں میں برگ و بار

جیسے بدلنے لگتی ہے تہذیبِ برف زار

شبنم کے موتیوں سے بھرا راولہ کا کوٹ

ہر سنگ میں دکھاتا ہے اک چشمِ آب دار

بنجوسہ جیسے آب درختوں کے تھال میں

بس گھومتی ہے روح میں خاموش سی پکار

دریائے تند سو گئے منگلا کی گود میں

منصور ڈھونڈتا رہا کشمیر کے سوار

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

پانیوں پر گر رہا تھا گھنٹیوں کا آبشار

دسمبر 1, 2007منصور آفاق،شعراء،غزلکار،انتظار،آبشار،اتار،خوشگوارadmin

منصور آفاق ۔ غزل نمبر 6

پار دریا کر رہی تھی سبز اونٹوں کی قطار

پانیوں پر گر رہا تھا گھنٹیوں کا آبشار

دور تک کالی سڑک تھی اور پگھلتی تارکول

چل رہی تھی ٹائروں کا دکھ پہن کر ایک کار

رات ہجراں کی، سلو موشن میں صدیوں پر محیط

دن جدائی کا کہیں ، جیسے ابد کا انتظار

کعبہء عشقِ محمد ابرہوں کی زد میں ہے

پھر ابابیلوں کا لشکر آسمانوں سے اتار

سندھ کی موجوں کے بوسے مضطرب ہیں دیر سے

کر رہا ہے تیرے نقشِ پا کا ساحل انتظار

دور تک منصور بستر سی وصال انگیز ریت

ایک گیلی رات،میں ،اور تھل کا حسنِ خوشگوار

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

دیکھا نہ مگر اس نے ہمارا گل و گلزار

دسمبر 1, 2007منصور آفاق،شعراء،غزلمار،مسمار،گلزار،گار،انکار،اسرار،اظہار،بیدار،بار،بازار،دیوار،دستار،رفتار،سیارadmin

منصور آفاق ۔ غزل نمبر 5

کچھ زخم دھنک خیز ہیں کچھ زخم لہو بار

دیکھا نہ مگر اس نے ہمارا گل و گلزار

کیا مانگنے آ سکتے ہیں پھر تیری گلی میں

ہم آخرِ شب، آخری سگریٹ کے طلب گار

یہ فلسفہ ہے یا کہ خرابی ہے خرد کی

ہونے سے بھی انکار ، نہ ہونے سے بھی انکار

اک زاویہ در زاویہ جذبوں کی ریاضی

اک لمس بھری قوسِ قزح ، بسترِ بیدار

رکھ ہاتھ نہ زانو پہ اے دہکے ہوئے موسم

اس وقت زیادہ ہے بہت کار کی رفتار

نازک ہے بہت، داغ نہ پڑ جائیں بدن پر

اُس حسنِ گنہ خیز کو مسواک سے مت مار

آنکھوں سے لپکتے ہیں یہاں برف کے طوفاں

ہرچند کہ مصنوعی نہیں گرمیِ بازار

بنیاد میں رکھا گیا تھا جس کو مکاں کی

منصور ہوا پھر اسی بھونچال سے مسمار

وحدت کے ازل زار یہ کثرت کے ابد زار

ہم ہی سے دھنک رنگ ہیں ہم ہی سے کرم بار

ہم عالمِ لاہوت کی خوش بخت سحر ہیں

ہم حرکتِ افلاک ہیں ہم ثابت و سیار

ہم حسنِ نزاکت کی چہکتی ہوئی تاریخ

ہم قرطبہ اور تاج محل کے در و دیوار

ہم کاسہء مجذوب ہیں ہم دھجیاں دھج کی

ہم روند کے پاؤں سے نکل آئے ہیں دستار

ہم کُن کی صدا ہیں ہمی لولاک کا نغمہ

ہم وقت کے گنبد ہمی بازیچہء اسرار

ہم لوگ سراپا ہیں کرامت کوئی منصور

ہم قربِ خداوندی کے احساس کا اظہار

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

پانیوں کے جسم پر تھا یخ ہوا کا نرم ہات

دسمبر 1, 2007منصور آفاق،شعراء،غزلہات،گھات،پات،بات،براتadmin

منصور آفاق ۔ غزل نمبر 4

سندھ کے دریا میں گم تھی سانولی مہتاب رات

پانیوں کے جسم پر تھا یخ ہوا کا نرم ہات

یہ خزاں زادے کہیں کیا گل رتوں کے مرثیے

یونہی بے مقصدکریں پرواز سارے خشک پات

کالے کاجل بادلو! روکو نہ اس کا راستہ

ایک دولہا آرہاہے لے لے تاروں کی برات

چاندنی! کیا روگ تھا اس موتیے کے پھول کو

رات بھر وہ جاگتا تھا سوچتا تھا کوئی بات

کوبرے کے روپ میں منصور بل کھاتی ہوئی

ساحلوں کو کاٹتی پھرتی ہے ندیا گھات گھات

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

میں خدا اور کائنات

دسمبر 1, 2007منصور آفاق،شعراء،غزلہاتھ،فرات،قنات،لغات،ممکنات،وفات،واقعات،وات،واردات،کائنات،کات،پات،بات،برات،ثبات،جہات،ذات،راتadmin

منصور آفاق ۔ غزل نمبر 3

چل رہے ہیں ایک ساتھ

میں خدا اور کائنات

عرش پر بس بیٹھ کر

کن فکاں کا چرخہ کات

مرد و زن کا اجتماع

بیچ صدیوں کی قنات

دو وجودوں میں جلی

سردیوں کی ایک رات

بند ذرے میں کوئی

کائناتی واردات

آسیا میں قطب کی

سو گئیں سولہ جہات

پانیوں پر قرض ہے

فدیۂ نہر فرات

تُو پگھلتی تارکول

میں سڑک کا خشک پات

تیرا چہرہ جاوداں

تیری زلفوں کو ثبات

رحمتِ کن کا فروغ

جشن ہائے شب برات

شب تھی خالی چاند سے

دل رہا اندیشوں وات

نت نئے مفہوم دے

تیری آنکھوں کی لغات

آنکھ سے لکھا گیا

قصۂ نا ممکنات

گر پڑی ہے آنکھ سے

اک قیامت خیز بات

تیرے میرے درد کا

ایک شجرہ، ایک ذات

کٹ گئے ہیں روڈ پر

دو ہوا بازوں کے ہاتھ

لکھ دی اک دیوار پر

دل کی تاریخِ وفات

موت تک محدود ہیں

ڈائری کے واقعات

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

لیکن اٹھی نہیں کوئی چشمِ سوالیا

دسمبر 1, 2007منصور آفاق،شعراء،غزللیا،مرثیہ،کیا،جیا،دیا،سوالیاadmin

منصور آفاق ۔ غزل نمبر 2

مدت کے بعد گاؤں میں آیا ہے ڈاکیا

لیکن اٹھی نہیں کوئی چشمِ سوالیا

رہنے کو آئی تھی کوئی زہرہ جبیں مگر

دل کا مکان درد نے خالی نہیں کیا

جو زندگی کی آخری ہچکی پہ گل ہوئی

اک شخص انتظار کی اس رات تک جیا

پوچھی گئی کسی سے جب اس کی کوئی پسند

آہستگی سے اس نے مرا نام لے لیا

تارے بجھے تمام، ہوئی رات راکھ راکھ

لیکن مزارِ چشم پہ جلتا رہا دیا

تکیے پہ بُن رہا ہے ترا شاعرِ فراق

منصور موتیوں سے محبت کا مرثیہ

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

شام ہے لالی شگنوں والی، رات ہے کالی ماتا

دسمبر 1, 2007منصور آفاق،شعراء،غزللگاتا،لاتا،ماتا،ناتا،کاتا،گاتا،آتا،بہکاتا،بچھاتا،بناتا،جاتا،سمجھاتاadmin

منصور آفاق ۔ غزل نمبر 1

درد مرا شہباز قلندر، دکھ ہے میرا داتا

شام ہے لالی شگنوں والی، رات ہے کالی ماتا

اک پگلی مٹیار نے قطرہ قطرہ سرخ پلک سے

ہجر کے کالے چرخِ کہن پر شب بھر سورج کاتا

پچھلی گلی میں چھوڑ آیا ہوں کروٹ کروٹ یادیں

اک بستر کی سندر شکنیں کون اٹھا کر لاتا

شہرِ تعلق میں اپنے دو ناممکن رستے تھے

بھول اسے میں جاتا یا پھر یاد اسے میں آتا

ہجرت کر آیا ہے ایک دھڑکتا دل شاعر کا

پاکستان میں کب تک خوف کو لکھتا موت کو گاتا

مادھو لال حسین مرا دل، ہر دھڑکن منصوری

ایک اضافی چیز ہوں میں یہ کون مجھے سمجھاتا

وارث شاہ کا وہ رانجھا ہوں ہیر نہیں ہے جس کی

کیسے دوہے بُنتا کیسے میں تصویر بناتا

ہار گیا میں بھولا بھالا ایک ٹھگوں کے ٹھگ سے

بلھے شاہ سا ایک شرابی شہر کو کیا بہکاتا

میری سمجھ میں آ جاتا گر حرف الف سے پہلا

باہو کی میں بے کا نقطہ بن بن کر مٹ جاتا

ذات محمد بخش ہے میری۔۔۔ شجرہ شعر ہے میرا

اذن نہیں ہے ورنہ ڈیرہ قبرستان لگاتا

میں موہن جو داڑو، مجھ میں تہذبیوں کی چیخیں

ظلم بھری تاریخیں مجھ میں ، مجھ سے وقت کا ناتا

ایک اکیلا میں منصور آفاق کہاں تک آخر

شہرِ وفا کے ہر کونے میں تیری یاد بچھاتا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔