admin کی تمام پوسٹیں

تبرا مردہ، مخنث امامتوں پر بھیج

دسمبر 1, 2007منصور آفاق،شعراء،غزلقیامتوں،قامتوں،قدامتوں،ملامتوں،ندامتوں،کرامتوں،امامتوں،سلامتوں،شامتوں،ضخامتوں،علامتوںadmin

منصور آفاق ۔ غزل نمبر 147

نصابِ درسِ حرم کی نظامتوں پر بھیج

تبرا مردہ، مخنث امامتوں پر بھیج

نماز پڑھ کے رسولِ زمیں کے کہنے پر

دو حرف زر کی فلک گیر قامتوں پر بھیج

جناب شیخ جو اتریں فقط غریبوں پر

ہزار لعنتیں ایسی قیامتوں پر بھیج

خبر نکال کوئی غیب کے اندھیرے سے

کوئی سراغ رساں تُو قدامتوں پر بھیج

یہی تو چیز بناتی ہے خوبرو دل کو

سلامتی کی دعائیں ، ندامتوں پر بھیج

وہی جو سنتِ نبوی پہ چلنے سے نکلیں

درود ایسی مقدس کرامتوں پر بھیج

دکھا جہاں کو مدنیہ کی امن زا تہذیب

بہار اپنی منور علامتوں پر بھیج

خود آپ چیر دے تاریک موسموں کی قبا

نوید صبح شبوں کی ضخامتوں پر بھیج

بدل دے لوح پہ لکھا مدینے کے صدقے

کرم شعور کا امت کی شامتوں پر بھیج

تُو آسمان سے رحمت کی پتیوں کے ڈھیر

شہیدوں پہ مرے زندہ سلامتوں پر بھیج

جو بھر دے روشنی روحِ سیاہ میں منصور

سلام ایسی مبارک ملامتوں پر بھیج

منصور آفاق

جواب اپنا زمیں کی شکاتیوں پر بھیج

دسمبر 1, 2007منصور آفاق،شعراء،غزلہدایتوں،کفایتوں،آیتوں،حمایتوں،حکایتوں،روایتوں،سرایتوں،شکاتیوں،عنایتوں،غایتوںadmin

منصور آفاق ۔ غزل نمبر 146

یہی پیام فلک کی نہایتوں پر بھیج

جواب اپنا زمیں کی شکاتیوں پر بھیج

خطوطِ وصل کے اسباق یاد کرنے ہیں

کوئی کتاب بدن کی حکایتوں پر بھیج

تلاش لیتی ہیں ہر رات جو نیا کمرا

تف ایسی صبح سراپا عنایتوں پر بھیج

اخذ کروں میں ہوا کی تلاوتوں سے کیا

شعورِ ابر ، سمندر کی آیتوں پر بھیج

دیارِ میر کی آرائشیں سلامت رکھ

بہار ، حسنِ سخن کی روایتوں پر بھیج

کوئی اشارہ کوئی روشنی کوئی سگنل

کوئی سروش تو ہم بے ہدایتوں پر بھیج

یہ فتح مند نہ مظلوم ہوں کہیں تیرے

کمک تُو بھیج ستم کی حمایتوں پر بھیج

کوئی صحیفہ ء گل ، کوئی رنگ خیز نمو

درختِ جاں میں خزاں کی سرایتوں پر بھیج

ہزار مرتبہ بھیگی ہوئی نظر کے خطوط

بلند بام چراغوں کی غایتوں پر بھیج

پرندوں کی طرح اپنے گزار دن منصور

بچت کو چھوڑ دے لعنت کفایتوں پر بھیج

منصور آفاق

ابھی دیکھا تھا اپنی روشنی کے ساتھ تھا سورج

دسمبر 1, 2007منصور آفاق،شعراء،غزلہوا،وفا،ڈوبتا،کا،گیا،پڑا،پھرا،بھرا،بجھا،بجا،تھا،تبصرہ،جاگتا،دوسرا،رہا،سوچتاadmin

منصور آفاق ۔ غزل نمبر 145

کسی نے کچھ کہا ہے کیا، کہاں یہ چل دیا سورج

ابھی دیکھا تھا اپنی روشنی کے ساتھ تھا سورج

اسے معلوم تھی شاید مری راتوں کی برفابی

مری آنکھوں کے بالکل سامنے دن بھر رہا سورج

چپک جاتا ہے خاموشی سے میرے ساتھ بستر میں

یہ نم دیدہ دسمبر کی اداسی سے بھرا سورج

برہنہ پانیوں پر شام کی کرنیں ٹپکتی تھیں

مگر پھر یوں ہوا نیلا سمندر ہو گیا سورج

مرے دریا کے پانی کو ہوا ہونے نہیں دیتا

کہیں برفیلے کہساروں کو پگھلاتا ہوا سورج

یہ کافی دیر سے کھڑکی کھلی ہے میرے کمرے کی

ابھی نکلا نہیں ہے اِس گلی میں صبح کا سورج

ابھی کچھ دیر رہنا چاہتا ہوں میں اجالوں میں

بلاتا ہے مجھے اپنی طرف پھر ڈوبتا سورج

مجھے دل کی گلی میں بھی تپش محسوس ہوتی ہے

خود اپنے ہجر میں اتنا زیادہ جل بجھا سورج

اُدھر پوری طرح اترا نہیں وہ روشنی کا تھال

نکلتا آ رہا ہے یہ کدھر سے دوسرا سورج

رکھا ہے ایک ہی چہرہ بدن کے بام پر میں نے

کوئی مہتاب کہتا ہے کسی کا تبصرہ سورج

نگاہوں کو شعاعوں کی ضرورت تھی بہت لیکن

کہاں تک میری گلیوں میں مسلسل جاگتا سورج

جہاں اس وقت روشن ہے تبسم تیرے چہرے کا

انہی راتوں میں برسوں تک یہ آوارہ پھرا سورج

اسے اچھے نہیں لگتے سلگتے رتجگے شاید

اکیلا چھوڑ جاتا ہے ہمیشہ بے وفا سورج

اجالے کا کفن بُننا کوئی آساں نہیں ہوتا

نظر آتا ہے شب کے پیرہن سے جا بجا سورج

ابھرنا ہی نہیں میں نے نکلنا ہی نہیں میں نے

اتر کر عرش کے نیچے یہی ہے سوچتا سورج

افق پر اک ذرا آندھی چلی تھی شام کی منصور

کہیں ٹوٹی ہوئی ٹہنی کی صورت گر پڑا سورج

منصور آفاق

ہے کوئی میرے علاوہ حرف کی جاگیر کا وارث

دسمبر 1, 2007منصور آفاق،شعراء،غزلتحریر،تصویر،جاگیر،زنجیر،شبیرadmin

منصور آفاق ۔ غزل نمبر 144

خانقاہِ غم کا سجادہ نشیں ہوں میر کا وارث

ہے کوئی میرے علاوہ حرف کی جاگیر کا وارث

نظم تلوارِ علی ہے اور مصرع لہجہء زینب

کربلائے لفظ ! میں ہوں خیمہء شبیر کا وارث

چشمِ دانش کی طرح گنتا نہیں ہوں ڈوبتے سورج

میں ابد آباد تک ہوں شام کی تحریر کا وارث

کنٹرول اتنا ہے روز و شب پہ سرمایہ پرستی کا

کہ مرا بیٹا ہے میرے پاؤں کی زنجیر کا وارث

نقش جس کے بولتے ہیں ، رنگ جس کے خواب جیسے ہیں

حضرتِ غالب وہی ہے پیکرِ تصویر کا وارث

منصور آفاق

بہتے پانی کی قسم، گریۂ جاں کارِ عبث

دسمبر 1, 2007منصور آفاق،شعراء،غزلفغاں،مکاں،نشاں،اماں،جہاں،جاں،رواں،زیاںadmin

منصور آفاق ۔ غزل نمبر 143

ساحلِ یاد پہ آہوں کا دھواں کارِ عبث

بہتے پانی کی قسم، گریۂ جاں کارِ عبث

دھوپ میں ساتھ بھلا کیسے وہ دے سکتا تھا

ایک سائے کے لیے آہ و فغاں کارِ عبث

میں تماشا ہوں تماشائی نہیں ہو سکتا

یہ فلک فہمی یہ تسخیرِ جہاں کارِ عبث

تیرے ہونے سے مہ و مہر مرے ہوتے تھے

اب تو ہے سلسلہء کون و مکاں کارِ عبث

یہ الگ چیختے رنگوں کا ہوں شاعر میں بھی

ہے مگر غلغلہء نام و نشاں کارِ عبث

ایک جھونکے کے تصرف پہ ہے قصہ موقوف

بلبلے اور سرِ آب رواں کار عبث

خیر باقی رہے یا شر کی عمل داری ہو

دونوں موجود ہوں تو امن و اماں کارِ عبث

کوئی انگلی، کوئی مضراب نہیں کچھ بھی نہیں

کھینچ رکھی گئی تارِ رگِ جاں کارِ عبث

رہ گئے جنت و دوزخ کہیں پیچھے منصور

اب جہاں میں ہوں وہاں سود و زیاں کارِ عبث

منصور آفاق

مرے لیے یہ ذرا سا چراغِ طور بہت

دسمبر 1, 2007منصور آفاق،شعراء،غزلقصور،کھجور،شعور،ضرور،طور،ظہورadmin

منصور آفاق ۔ غزل نمبر 142

گمانِ صبح ہے کافی، خیالِ نور بہت

مرے لیے یہ ذرا سا چراغِ طور بہت

میں بارگاہِ محبت میں کس طرح جاؤں

مرے گناہ بہت ہیں مرے قصور بہت

یہی بہت کہ خزاں میں بہار ہے مجھ پر

ہے پھول پھول، یہی شاخ کو شعور بہت

تمام عہد نے آنکھوں پہ ہاتھ رکھے ہیں

ہوا ہے شعر میں شاید مرا ظہور بہت

یہ میرے بیگ میں رکھ دے نا کانچ کے ٹکڑے

میں بھیج دوں گا نئی چوڑیاں ، ضرور، بہت

نصیب، نسبتِ دشتِ عرب جسے منصور

بروز حشر وہی سایۂ کھجور بہت

منصور آفاق

ہم نے تیری نظر اتاری دوست

دسمبر 1, 2007منصور آفاق،شعراء،غزلہماری،قراری،مداری،کنواری،کاروباری،گزاری،گساری،پیاری،اتاری،باری،تمہاری،جاری،داری،راہداری،شہریاری،شکاریadmin

منصور آفاق ۔ غزل نمبر 141

کر کے آنکھوں سے بادہ خواری دوست

ہم نے تیری نظر اتاری دوست

اک تعلق ہے خواب کا اس سے

وہ زیادہ نہیں ہماری دوست

زد میں آیا ہوا نہیں نکلا

شور کرتے رہے شکاری دوست

اس کی اک اک نظر میں لکھا تھا

میں تمہاری ہوں بس تمہاری دوست

کیوں مہکتی ہے تیز بارش میں

اک دہکتی ہوئی کنواری دوست

راہ بنتی ہے آنے جانے سے

اور بناتے ہیں باری باری دوست

کچھ عجب ہے تمہارے لہجے میں

بڑھتی جاتی ہے بے قراری دوست

ہم اداسی پہن کے پھرتے ہیں

کچھ ہماری بھی غم گساری دوست

ہم اکیلے ہیں اپنے پہلو میں

ایسی ہوتی ہے دوست داری دوست

رات بھر بیچتے تھے جو سورج

اب کہاں ہیں وہ کاروباری دوست

کیا ہیں کٹھ پتلیاں قیامت کی

برگزیدہ ہوئے مداری دوست

حق ہمارا تھا جس کے رنگوں پر

تم نے وہ زندگی گزاری دوست

ہر طرف ہجرتیں ہیں بستی میں

کیا تمہاری ہے شہریاری دوست

دشتِ دل میں تمہاری ایڑی سے

ہو گیا چشمہ ایک جاری دوست

ہجر کی بالکونی کی شاید

میلوں لمبی ہے راہداری دوست

زندگی نام کی کہیں منصور

ایک ہے دوجہاں سے پیاری دوست

منصور آفاق

یک ہزار ماہ سے عظیم رات

دسمبر 1, 2007منصور آفاق،شعراء،غزلقدیم،میم،یتیم،بھیم،حریم،رحیم،عظیمadmin

منصور آفاق ۔ غزل نمبر 140

روشنی کی روح میں مقیم رات

یک ہزار ماہ سے عظیم رات

سجدہِ گاہِ شام کی مجھے قسم

مہر نیم روز کی حریم رات

سہہ پہر نکھر رہی تھی ہر طرف

گار ہاتھا چاند راگ بھیم رات

نت نئی ترنگ سے کرے نزول

قرن ہا قرن سے قدیم رات

باغ میں گلاب بھی اداس تھا

چاند کے بغیر تھی یتیم رات

دل میں حمد حمد کے چراغ تھے

آنکھ میں تھی نور نور میم رات

بار بار آئے میرے صحن میں

وہ کریم اور وہ رحیم رات

منصور آفاق

میرے ساتھ چلی جاؤ تم یا سورج کے ساتھ۔ ایک ہی بات

دسمبر 1, 2007منصور آفاق،شعراء،غزلہاتھ،فرمودات،مات،پات،برسات،حالات،ساتھ،ساداتadmin

منصور آفاق ۔ غزل نمبر 139

اُس کی منزل تاریکی ہے،میری منزل رات۔ ایک ہی بات

میرے ساتھ چلی جاؤ تم یا سورج کے ساتھ۔ ایک ہی بات

موسم اور میں ایک ہی دریا کے دو پاگل فرد۔درد نورد

برکھا رت کے آنسو ہوں یاآنکھوں کی برسات۔ ایک ہی بات

تیز ہوا کی زد پر دونوں ،ایک ہی پل کا روپ۔موت کی دھوپ

جیون سے آویختہ میں یا پیڑ سے مردہ پات۔ ایک ہی بات

اس کے کنجِ لب میں میری مسکانوں کی دھول۔ ہجرکے پھول

یعنی جیت کسی کی اور مسلسل میری مات۔ ایک ہی بات

میں گمنام یہاں تو اس کا جانے کون مقام۔کون غلام

ملک سخن کامیں شہزادہ اور ہے وہ سادات۔ ایک ہی بات

تیز کراہیں ، آہیں ، چیخیں ،گرمی اور سیلاب۔سانس عذاب

پاکستان کے منظر ہو ں یادوزخ کے حالات۔ ایک ہی بات

رنگ گریں گے قوسِ قزح سے،پھولوں سے سنگیت۔میت کے گیت

صبحِ بدن پر میرا ہو یا بادصبا کا ہاتھ۔ ایک ہی بات

کیسے کہوں میں باہو ، بلھا ، وارث ، شاہ حسین۔پیر فرید

کیسے کہوں منصور کے یا اقبال کے فرمودات۔ ایک ہی بات

منصور آفاق

بنے ہوئے ہیں بڑے راجپوت آخرِ شب

دسمبر 1, 2007منصور آفاق،شعراء،غزلہبوط،قنوت،بلوط،بھوت،ثبوت،حنوط،راجپوت،سکوتadmin

منصور آفاق ۔ غزل نمبر 138

مرے دماغ کے سب عنکبوت آخرِ شب

بنے ہوئے ہیں بڑے راجپوت آخرِ شب

عشائے غم میری خیرہ سری میں گزری ہے

سو پڑھ رہا ہوں دعائے قنوت آخرِ شب

اداسیوں کے تنفس میں میرے اندر سے

نکل پڑا ہے عدم کا سکوت آخرِ شب

لکھا گیا تھا مجھے آسماں پہ کرنوں سے

ہوا ہے خاک پہ میرا ہبوط آخرِ شب

میں اپنے پاس تہجد کے وقت آیا ہوں

ملا ہے مجھ کو خود اپنا ثبوت آخرِ شب

دبا دیا تھا افق میں امید کا پتہ

نکل پڑا ہے کوئی شہ بلوط آخرِ شب

ہزار رنگ جہنم کے دیکھتا ہوں میں

کیا ہے موت کا منظر حنوط آخرِ شب

بدن پہ دھوپ کا آسیب دیکھ کر منصور

چرا کے برف کے لے آیا بھوت آخرِ شب

منصور آفاق

مارا نہ جاؤں میں بھی کہیں نام کے سبب

دسمبر 1, 2007منصور آفاق،شعراء،غزلفام،مادام،نام،ناکام،کام،پیغام،الہام،ایام،اسلام،اصنام،بام،بدنام،دشنام،شامadmin

منصور آفاق ۔ غزل نمبر 137

منصور پر خدائی کے الزام کے سبب

مارا نہ جاؤں میں بھی کہیں نام کے سبب

بس رہ گئی ہے یاد میں بجھتی سی ریل کار

میں لیٹ ہو گیا تھا کسی کام کے سبب

مہکا ہوا ہے دیر سے میری گلی کا موڑ

خوشبو پہن کے چلتی ہوئی شام کے سبب

کر لوں گا آسمانوں پہ آباد بستیاں

میں پُر یقیں ہوں زینہء ایام کے سبب

چہرے تک آ گئی تھیں شعاعوں کی ٹہنیاں

جاگا ہوں آفتابِ لبِ بام کے سبب

کتنے سفید کتنے حسین و جمیل لوگ

چھوڑ آیا ایک حسن سیہ فام کے سبب

انجامِ گفتگو ہوا پھولوں کے درمیان

آغازِ گفتگو ہوا دشنام کے سبب

بیٹھا ہوں کوہِ سرخ کے پتھر تراشتا

دریائے سندھ ! آپ کے پیغام کے سبب

صحرا نے صادقین کی تصویر اوڑھ لی

اک نظمِ گردباد کے الہام کے سبب

جس کی مجھے تلاش تھی وہ درد مل گیا

ہوں کامیاب صحبتِ ناکام کے سبب

سورج پلٹ گیا ہے ملاقات کے بغیر

زلف سیہ کے بسترِ بدنام کے سبب

پروردگارِ اول و آخر سے پانچ وقت

ملتے ہیں لوگ کمرئہ اصنام کے سبب

شب ہائے زخم زخم گزارے خوشی کے ساتھ

لندن کی ایک غم زدہ مادام کے سبب

دینا پڑے گا شیخ کو میرا حساب بھی

کافر ہوا ہوں چہرئہ اسلام کے سبب

منصور آفاق

ناراض ہو گئے مرے ہمدرد بے سبب

دسمبر 1, 2007منصور آفاق،شعراء،غزلہمدرد،فرد،مرد،گرد،درد،سردadmin

منصور آفاق ۔ غزل نمبر 136

کچھ موتیے کے پھول ہوئے زرد بے سبب

ناراض ہو گئے مرے ہمدرد بے سبب

ویسے ہی محوِ آئینہ داری تھی میری آنکھ

پھیلی ہے میرے چاروں طرف گرد بے سبب

کرتا رہا ہے میرا تعاقب تمام دن

شہرِ شبِ سیہ کا کوئی فرد بے سبب

یہ سچ ہے اس سے کوئی تعلق نہیں مرا

پھرتا ہے شہر جاں میں کوئی درد بے سبب

شامِ وصال آئی تھی آ کر گزر گئی

جاگا ہے مجھ میں سویا ہوا مرد بے سبب

گرتی رہی ہے برف مگر بس خیال میں

منصور میرا کمرہ ہوا سرد بے سبب

منصور آفاق

کیسے وہ پھر رہی ہے جدا مجھ سے بے سبب

دسمبر 1, 2007منصور آفاق،شعراء،غزلہوئے،قہقہے،کے،گئے،بے،راستےadmin

منصور آفاق ۔ غزل نمبر 135

شاید وہ مانگتی ہے ملن کے نئے سبب

کیسے وہ پھر رہی ہے جدا مجھ سے بے سبب

کچھ اس کے کار ہائے نمایاں بھی کم نہیں

دل نے بھی کچھ بگاڑے ہیں بنتے ہوئے سبب

روشن ہے میرے صحن میں امید کا درخت

پچھلی گلی میں جلتے ہوئے بلب کے سبب

دیکھی کبھی نہیں تھیں یہ گلیاں بہار کی

جب چل پڑا تو راہ میں بنتے گئے سبب

کیا کیا نکالتی ہو بہانے لڑائی کے

آنسو کبھی سبب تو کبھی قہقہے سبب

منصور اتفاق سے ملتی ہیں منزلیں

بے رہروی کبھی تو کبھی راستے سبب

منصور آفاق

شاید یہ زندگی کی جادو گری ہے خواب

دسمبر 1, 2007منصور آفاق،شعراء،غزلوہی،یہی،کھلی،گلی،گری،ابھی،بھی،دیدنی،دری،رہی،روشنی،زنیadmin

منصور آفاق ۔ غزل نمبر 134

بہتی بہار سپنا، چلتی ندی ہے خواب

شاید یہ زندگی کی جادو گری ہے خواب

ایسا نہ ہو کہ کوئی دروازہ توڑ دے

رکھ آؤ گھر سے باہر بہتر یہی ہے خواب

تُو نے بدل لیا ہے چہرہ تو کیا کروں

میری وہی ہیں آنکھیں میرا وہی ہے خواب

میں لکھ رہا ہوں جس کی کرنوں کے سبز گیت

وہ خوبرو زمانہ شاید ابھی ہے خواب

ہر سمت سے وہ آئے قوسِ قزح کے ساتھ

لگتا ہے آسماں کی بارہ دری ہے خواب

اس کے لیے ہیں آنکھیں اس کے لیے ہے نیند

جس میں دکھائی دوں میں وہ روشنی ہے خواب

دل نے مکانِ جاں تو دہکا دیا مگر

اْس لمسِ اخگری کی آتش زنی ہے خواب

اک شخص جا رہا ہے اپنے خدا کے پاس

دیکھو زمانے والو! کیا دیدنی ہے خواب

تجھ سے جدائی کیسی ، تجھ سے کہاں فراق

تیرا مکان دل ہے تیری گلی ہے خواب

سورج ہیں مانتا ہوں اس کی نگاہ میں

لیکن شبِ سیہ کی چارہ گری ہے خواب

امکان کا دریچہ میں بند کیا کروں

چشمِ فریب خوردہ پھر بُن رہی ہے خواب

رک جا یہیں گلی میں پیچھے درخت کے

تجھ میں کسی مکاں کی کھڑکی کھلی ہے، خواب

منصور وہ خزاں ہے عہدِ بہار میں

ہنستی ہوئی کلی کی تصویر بھی ہے خواب

منصور آفاق

کیا ہے جو دیکھتا ہوں پچھلی گلی کے خواب

دسمبر 1, 2007منصور آفاق،شعراء،غزللبی،کجی،کسی،گلی،اسی،حاصلیadmin

منصور آفاق ۔ غزل نمبر 133

لگتے ہیں خوبصورت گزری ہوئی کے خواب

کیا ہے جو دیکھتا ہوں پچھلی گلی کے خواب

ہیں بے چراغ دل کے جگنو قطار میں

پلکوں سے چُن رہا ہوں لا حاصلی کے خواب

آنسو بہا رہی ہیں آنکھیں فرات کی

پتھرا گئے ہیں جیسے تشنہ لبی کے خواب

ہے اجتماعی وحشت چشمِ شعور میں

اپنے خمیر میں ہیں کیا کیا کجی کے خواب

مجبور دل الگ ہے دل کی طلب الگ

بستر کسی کا بے شک دیکھے کسی کے خواب

منصور موتیوں سے جس کی بھری ہے جیب

تاریخ لکھ رہی ہے اک بس اسی کے خواب

منصور آفاق

جنت کے بنگلے کا پھاٹک اور شراب

دسمبر 1, 2007منصور آفاق،شعراء،غزلمسلک،ڈھولک،کالک،گاہک،پھاٹک،اجرک،بک،تک،دستک،شک،عینکadmin

منصور آفاق ۔ غزل نمبر 132

ایک شرابی ہاتھ کی دستک اور شراب

جنت کے بنگلے کا پھاٹک اور شراب

پیاس ہوائے شام میں اپنے بین کرے

ابر ہے بامِ ذات کی حد تک اور شراب

مجھ سے تیری یادیں چھین نہیں سکتے

اُس بازار کے سارے گاہک اور شراب

سات سمندر پار کا ایک پرانا کوٹ

بیچ سڑک کے ٹوٹی عینک اور شراب

سناٹوں کی آوازوں کا ایک ہجوم

شور میں گم ہو جانے کا شک اور شراب

تیری گلی آوازِ سگاں ، مجذوب ضمیر

ڈوب رہی ہے رات کی کالک اور شراب

عمر ہوئی میخانے کے دروازے پر

دست و گریباں میرا مسلک اور شراب

رات کے پچھلے پہر لہو کی صورت تھے

میری رگوں میں گھنگرو ڈھولک اور شراب

کھلتا سرخ سا فیتہ، دوشیزہ فائل

انٹر کام کی بجتی دستک اور شراب

دیکھ کے موسم خود ہی بچھتے جاتے ہیں

صحرا کی سہ پہر میں اجرک اور شراب

ایک گلی میں دو دیواریں ہیں منصور

ساتھ مری بے مقصد بک بک اور شراب

منصور آفاق

میرے کاہن عینک اور کتاب

دسمبر 1, 2007منصور آفاق،شعراء،غزلفورا،کاہن،برتن،جیون،درشن،ساونadmin

منصور آفاق ۔ غزل نمبر 131

غیب کا مدفن عینک اور کتاب

میرے کاہن عینک اور کتاب

ایک بہکتے حرف کے پہلو میں

رکھ دی فوراً عینک اور کتاب

ٹیرس پر تنہائی کی رم جھم

بھیگا ساون عینک اور کتاب

میر و غالب پھر مہمان ہوئے

چائے کے برتن عینک اور کتاب

یاد کی لائبریری زندہ باد

اپنا جیون عینک اور کتاب

برف بھری تنہائی میں منصور

یار کا درشن عینک اور کتاب

منصور آفاق

حادثے سے پہلے ہوٹل سے نکلنا پڑ گیا

دسمبر 1, 2007منصور آفاق،شعراء،غزلمچلنا،نکلنا،اچھلنا،جلنا،سنبھلناadmin

منصور آفاق ۔ غزل نمبر 130

برقی زینے پر مخالف سمت چلنا پڑ گیا

حادثے سے پہلے ہوٹل سے نکلنا پڑ گیا

ساحلوں کی ریت پر گرتے ہوئے آیا خیال

کیا ہواکہ موج سے مل کر اچھلنا پڑ گیا

آ گیا پھر یاد کہ پستی نہیں میرامقام

گرتے گرتے راستے میں پھر سنبھلنا پڑ گیا

دیکھ کر لاہور کو جاتا ہوا کوئی جہاز

ایک بچے کی طرح دل کو مچلنا پڑ گیا

درد تھا اس کی رگوں میں سلسلے تھے آگ کے

کار کے منصور انجن کو بھی جلنا پڑ گیا

منصور آفاق

چلنے لگے تو راستہ تقسیم ہو گیا

دسمبر 1, 2007منصور آفاق،شعراء،غزلکا،گیا،تھا،حوصلہ،راستہ،ساadmin

منصور آفاق ۔ غزل نمبر 129

دونوں طرف ذرا ذرا تقسیم ہو گیا

چلنے لگے تو راستہ تقسیم ہو گیا

کچھ دیدئہ سیاہ میں کچھ تیرہ بخت میں

کاجل شبِ فراق کا تقسیم ہو گیا

پہلے پہل تو ہنس پڑے سن کر کسی کی بات

پھر آنسوئوں میں حوصلہ تقسیم ہو گیا

خود کو کیا تھا جمع بڑی مشکلوں کے ساتھ

پھر کرچیوں میں بٹ گیا تقسیم ہو گیا

محسوس یوں ہوا کسی زلفِ سیہ کا لمس

شانوں پہ جیسے ابر سا تقسیم ہو گیا

منصور یادِ یار کے انبوہ میں کہیں

وہ دل جو دوست اپنا تھا تقسیم ہو گیا

منصور آفاق

آنکھ کا تالاب بد روحوں کا مسکن ہو گیا

دسمبر 1, 2007منصور آفاق،شعراء،غزلفورا،مسکن،کنگن،افگن،بچپن،تن،درشن،دشمن،روشن،ساونadmin

منصور آفاق ۔ غزل نمبر 128

آخرش ہجراں کے مہتابوں کا مد فن ہو گیا

آنکھ کا تالاب بد روحوں کا مسکن ہو گیا

دھوپ در آئی اچانک رات کو برسات میں

اس کا چہرہ آنسوئوں میں عکس افگن ہو گیا

دل چرا کر جا رہا تھا میں دبے پاؤں مگر

چاند نکلا اور سارا شہر روشن ہو گیا

رو پڑا تھا جا کے داتا گنج کے دربار پر

یوں ہوا پھر راہ میں سانول کا درشن ہو گیا

بجلیاں ہیں بادلوں کے بین ہیں کمرے کے بیچ

اور کیلنڈر کہے ہے، ختم ساون ہو گیا

کیوں سلگتی ریت نے سہلا دیے تلووں کے پھول

یہ اذیت کیش دل صحرا کا دشمن ہو گیا

جھلملا اٹھتا تھا برتن مانجھنے پر جھاگ سے

اس کلائی سے جو روٹھا زرد کنگن ہو گیا

تیری میری زندگی کی خوبصورت ساعتیں

تیرا بچپن ہو گیا یا میرا بچپن ہو گیا

ایک جلوے کی قیامت میں نے دیکھی طور پر

دھوپ تھی ایسی کہ سورج سوختہ تن ہو گیا

بے خدا ہوں سوچتا ہوں شکر کس کا ہو ادا

میں نے جو چاہا وہی منصور فوراً ہو گیا

منصور آفاق

گالی لہک اٹھی کبھی جوتا اتر گیا

دسمبر 1, 2007منصور آفاق،شعراء،غزلچہرہ،کا،پہیہ،بوسہ،جوتا،دریا،ستارہadmin

منصور آفاق ۔ غزل نمبر 127

خوابِ وصال میں بھی خرابہ اتر گیا

گالی لہک اٹھی کبھی جوتا اتر گیا

میں نے شبِ فراق کی تصویر پینٹ کی

کاغذ پہ انتظار کا چہرہ اتر گیا

کوئی بہشتِ دید ہوا اور دفعتاً

افسوس اپنے شوق کا دریا اتر گیا

رش اتنا تھا کہ سرخ لبوں کے دباؤ سے

اندر سفید شرٹ کے بوسہ اتر گیا

اس خواب کے مساج کی وحشت کا کیا کہوں

سارا بخار روح و بدن کا اتر گیا

کچھ تیز رو گلاب تھے کھائی میں جا گرے

ڈھلوان سے بہار کا پہیہ اتر گیا

منصور جس میں سمت کی مبہم نوید تھی

پھر آسماں سے وہ بھی ستارہ اتر گیا

منصور آفاق

سادہ دلوں کا نامہ ء قسمت بھرو گے کیا

دسمبر 1, 2007منصور آفاق،شعراء،غزلمرو،ڈرو،کرو،بھرو،دھروadmin

منصور آفاق ۔ غزل نمبر 126

جو خط لکھا نہیں اسے رسوا کرو گے کیا

سادہ دلوں کا نامہ ء قسمت بھرو گے کیا

کیا دیکھتے ہو مردہ بدن کو اے زندہ دل

پھر نفس کے محاذ پہ جا کر مرو گے کیا

رہنے دو میری قبر کو بے نام ، بے نشاں

اس نور کے وجود پہ پتھرو دھرو گے کیا

تم تو سگ مدینہ ہو ، باہو کے شیر ہو

بدشکل مولوی کی زباں سے ڈرو گے کیا

اے صاحب خرد! تری کامل سہی دلیل

بعد از ممات وہ جو ہوا تو کرو گے کیا

منصور آفاق

وہ اس کا مکاں تھا اپنا پتہ جا میں نے کیا

دسمبر 1, 2007منصور آفاق،شعراء،غزلیا،کا،تماشا،جا،رشتہadmin

منصور آفاق ۔ غزل نمبر 125

وہ چشم سراپا حیرت تھی کیا میں نے کیا

وہ اس کا مکاں تھا اپنا پتہ جا میں نے کیا

ہے فکر مجھے انجام مرے ہاتھوں سے نہ ہو

آغاز کا کیا ہے اس نے کیا یا میں نے کیا

کچھ زخم گلی کے بلب تلے تحریر کیے

پھر اپنے لہو سے اپنا تماشا میں نے کیا

صد شکر دیے کی آخری لو محفوظ ہوئی

ہے فخر مجھے دربند ہوا کا میں نے کیا

منصور وہ میری آنکھ کو اچھی لگتی تھی

سو ہجر کی کالی رات سے رشتہ میں نے کیا

منصور آفاق

خواب میں جا کر رقص کیا

دسمبر 1, 2007منصور آفاق،شعراء،غزلملا،منا،ٹکرا،اٹھا،بہا،بنا،بجھا،بجا،جھکا،جاadmin

منصور آفاق ۔ غزل نمبر 124

نیندجگاکر رقص کیا

خواب میں جا کر رقص کیا

خوشبو کے اکتارے پر

رنگ بجا کر رقص کیا

آبِ رواں کے پہلو میں

گیت بہاکر رقص کیا

نرم پروں پہ تتلی کے

شام بناکر رقص کیا

ابرِ سیہ کی بوندوں میں

شور مچاکر رقص کیا

دھوپ کے ننگے سینے پر

پیٹر جھکا کر رقص کیا

رات کے کالے شیشے سے

دن ٹکرا کر رقص کیا

خواب بھری آوازوں سے

لطف اٹھا کر رقص کیا

بزم سخن میں رومی سے

ہاتھ ملا کر رقص کیا

برف بھری منصور رُتیں

آگ بجھا کر رقص کیا

منصور آفاق

رنگ بکھرا دیے پھر تازہ ہوا نے کیا کیا

دسمبر 1, 2007منصور آفاق،شعراء،غزلہوا،فسا،نجا،دعا،زما،سرہا،صباadmin

منصور آفاق ۔ غزل نمبر 123

مل گئے مجھ کو بھی جینے کے بہانے کیا کیا

رنگ بکھرا دیے پھر تازہ ہوا نے کیا کیا

کیسی خوشبوئے بدن آتی ہے کمرے سے مجھے

پھول وہ چھوڑ گئی میرے سرہانے کیا کیا

میں تجھے کیسے بتاؤں مری نازک اندام

مجھ پہ گزرے ہیں مصائب کے زمانے کیا کیا

میری خاموشی پہ الزام لگانے والی

کہتی پھرتی ہیں تری آنکھیں نجانے کیا کیا

کیا غزل چھیڑی گئی سانولے رخساروں کی

شام کے گیت کہے بادِ صبا نے کیا کیا

میرے پہلو میں نئے پھول کھلے ہیں کتنے

مجھ کو شاداب کیا دستِ دعا نے کیا کیا

یونہی بے وجہ تعلق ہے کسی سے لیکن

پھیلتے جاتے ہیں منصور فسانے کیا کیا

منصور آفاق

فروزاں خواب کیے تیرہ طاق نے کیا کیا

دسمبر 1, 2007منصور آفاق،شعراء،غزلفراق،مذاق،نفاق،چاق،اتفاق،طاق،طباق،عراقadmin

منصور آفاق ۔ غزل نمبر 122

تری طلب نے ترے اشتیاق نے کیا کیا

فروزاں خواب کیے تیرہ طاق نے کیا کیا

میں جا رہا تھا کہیں اور عمر بھر کے لیے

بدل دیا ہے بس اک اتفاق نے کیا کیا

عشائے غم کی تلاوت رہے تہجد تک

سکھا دیا ہے یہ دینِ فراق نے کیا کیا

نری تباہی ہے عاشق مزاج ہونا بھی

دکھائے غم ہیں دلِ چست و چاق نے کیا کیا

وہ لب کھلے تو فسانہ بنا لیا دل نے

گماں دیے ترے حسنِ مذاق نے کیا کیا

مقامِ خوک ہوئے دونوں آستانِ وفا

ستم کیے ہیں دلوں پر نفاق نے کیا کیا

ہر ایک دور میں چنگیزیت مقابل تھی

لہو کے دیپ جلائے عراق نے کیا کیا

ہر اک شجر ہے کسی قبر پر کھڑا منصور

چھپا رکھا ہے زمیں کے طباق نے کیا کیا

منصور آفاق

ہجر کو وصل پر قیاس کیا

دسمبر 1, 2007منصور آفاق،شعراء،غزلقیاس،لباس،پاس،اداس،روشناسadmin

منصور آفاق ۔ غزل نمبر 121

یوں خیالوں نے بد حواس کیا

ہجر کو وصل پر قیاس کیا

اپنی پہچان کے عمل نے مجھے

روئے جاناں سے روشناس کیا

کچھ فسردہ زمیں سے تھے لیکن

آسماں نے بہت اداس کیا

ہم نے ہر اک نماز سے پہلے

زیبِ تن خاک کا لباس کیا

بھول آئے ہیں ہم وہاں منصور

کیا بسیرا کسی کے پاس کیا

منصور آفاق

آیت الکرسی پڑھی اور دم کیا

دسمبر 1, 2007منصور آفاق،شعراء،غزلموسم،ماتم،مدہم،پرنم،برہم،خم،دم،سانمadmin

منصور آفاق ۔ غزل نمبر 120

نیند کی ناراضگی کو کم کیا

آیت الکرسی پڑھی اور دم کیا

اس نے شانوں پر بکھیرے اپنے بال

اور شیتل شام کا موسم کیا

پہلے رنگوں کو اتارا اور پھر

اس نے ہیٹر کو ذرا مدہم کیا

ایک آمر کی ہلاکت پر کہو

سرنگوں کیوں ملک کا پرچم کیا

صبح آنسو پونچھ کے ہم سو گئے

روشنی کا رات بھر ماتم کیا

مان لی ہم نے کہانی رات کی

اس نے پلکوں کو ذرا سانم کیا

عاشقی کی داد چاہی شہر سے

ہیٹ اتارا اور سر کو خم کیا

دار پر کھینچا مرے منصور کو

اور سارے شہر کو برہم کیا

منصور آفاق

کبھی گھر کے درویوار سے مل کر رویا

دسمبر 1, 2007منصور آفاق،شعراء،غزلفنکار،ملہار،مسمار،انبار،اتوار،اشجار،درویوارadmin

منصور آفاق ۔ غزل نمبر 119

کبھی غم سے کبھی آزار سے مل کر رویا

کبھی گھر کے درویوار سے مل کر رویا

کبھی تصویریں اٹھائیں کبھی رکھ دیں میں نے

کبھی کپڑوں کے میں انبار سے مل کر رویا

کبھی انگن سے اٹھا لایا میں یادیں اس کی

کبھی باغیچے کے اشجار سے مل کر رویا

جسے پاؤں میں بچھایا تھا گذشتہ رت میں

کبھی اُس منزلِ مسمار سے مل کر رویا

کبھی ہم بھیگتے تھے جس کی سروں سے مل کر

اُسی بارش اُسی ملہار سے مل کر رویا

کبھی اشعار کہے اشک گزیدہ دل کے

کبھی اندر کے میں فنکار سے مل کر رویا

کہا کرتا تھا جسے پیار کا دن وہ منصور

اسی روتی ہوئی اتوار سے مل کر رویا

منصور آفاق

آوارگی کی شام مجھے گھر نے آ لیا

دسمبر 1, 2007منصور آفاق،شعراء،غزلمحشر،ور،گھر،گر،ٹھوکر،پتھرadmin

منصور آفاق ۔ غزل نمبر 118

ٹوٹے ہوئے کواڑ کے منظر نے آ لیا

آوارگی کی شام مجھے گھر نے آ لیا

میں جا رہا تھا زخم کا تحفہ لیے بغیر

پھر یوں ہوا کہ راہ کے پتھر نے آ لیا

میں سن رہا ہوں اپنے ہی اندر کی سسکیاں

کیا پھر کسی عمل کے مجھے ڈرنے آ لیا

گزرا کہیں سے اور یہ آنکھیں چھلک پڑیں

یادش بخیر ! یادِ ستم گر نے آ لیا

وہ جس جگہ پہ اُس سے ملاقات ہونی تھی

پہنچا وہاں تو داورِ محشر نے آ لیا

منصور چل رہا تھا ابھی کہکشاں کے پاس

یہ کیا ہوا کہ پاؤں کی ٹھوکر نے آ لیا

منصور آفاق

سوحریر سرخ اتار دی ،ہے لباسِ خاک پہن لیا

دسمبر 1, 2007منصور آفاق،شعراء،غزلفراک،پاک،انہماک،تپاک،خاک،راکھadmin

منصور آفاق ۔ غزل نمبر 117

کہ جو فقر نے ہے عطاکیا وہی چاک چاک پہن لیا

سوحریر سرخ اتار دی ،ہے لباسِ خاک پہن لیا

لیا ڈھانپ ننگ نصیب کا اسی جامہ ء شبِ تار سے

جو جلادیا تھا فقیر نے وہی راکھ راکھ پہن لیا

کبھی سردمہر ہوئے کہیں تو سیاہ چین زمین تھی

گریں دوپہر میں بھی بجلیاں جو کبھی تپاک پہن لیا

کبھی شہر کے کسی موڑپریونہی خالی ہاتھ بڑھا دئیے

کبھی ذکر و فکر کی غار میں ترا انہماک پہن لیا

جو مٹھائیوں کی طلب اٹھی توزمیں کی خاک ہی پھانک لی

جو سفید سوٹ کو جی کیا تو سیہ فراک پہن لیا

جہاں یاد آئیں حکومتیں وہیں ہم برہنہ ہو گئے

جہاں حرف زاد کوئی ملا وہیں ملکِ پاک پہن لیا

منصور آفاق

بچے نے اپنے خواب کا منظر بنا لیا

دسمبر 1, 2007منصور آفاق،شعراء،غزللشکر،مندر،منظر،کنکر،کر،پتھر،پر،اندر،اکثر،دلبر،در،سمندرadmin

منصور آفاق ۔ غزل نمبر 116

موجوں کے آس پاس کوئی گھر بنا لیا

بچے نے اپنے خواب کا منظر بنا لیا

اپنی سیاہ بختی کا اتنا رکھا لحاظ

گوہر ملا تو اس کو بھی کنکر بنا لیا

بدلی رُتوں کو دیکھ کے اک سرخ سا نشاں

ہر فاختہ نے اپنے پروں پر بنا لیا

شفاف پانیوں کے اجالوں میں تیرا روپ

دیکھا تو میں نے آنکھ کو پتھر بنا لیا

ہر شام بامِ دل پہ فروزاں کیے چراغ

اپنا مزار اپنے ہی اندر بنا لیا

پیچھے جو چل دیا مرے سائے کی شکل میں

میں نے اُس ایک فرد کو لشکر بنا لیا

شاید ہر اک جبیں کا مقدر ہے بندگی

مسجد اگر گرائی تو مندر بنا لیا

کھینچی پلک پلک کے برش سے سیہ لکیر

اک دوپہر میں رات کا منظر بنا لیا

پھر عرصۂ دراز گزارا اسی کے بیچ

اک واہموں کا جال سا اکثر بنا لیا

بس ایک بازگشت سنی ہے تمام عمر

اپنا دماغ گنبدِ بے در بنا لیا

باہر نکل رہے ہیں ستم کی سرنگ سے

لوگوں نے اپنا راستہ مل کر بنا لیا

گم کربِ ذات میں کیا یوں کربِ کائنات

آنکھوں کے کینوس پہ سمندر بنا لیا

منصور جس کی خاک میں افلاک دفن ہیں

دل نے اسی دیار کو دلبر بنا لیا

منصور آفاق

ڈوب گیا ہے تھل مارو میں میری آس کا دریا

دسمبر 1, 2007منصور آفاق،شعراء،غزلوسواس،یاس،پاس،الماس،آس،باس،حواسadmin

منصور آفاق ۔ غزل نمبر 115

پیر فرید کی روہی میں ہوں ، مجھ میں پیاس کا دریا

ڈوب گیا ہے تھل مارو میں میری آس کا دریا

عمرِ رواں کے ساحل پر اوقات یہی ہیں دل کے

صبح ، طلب کی بہتی کشتی، شب ،وسواس کا دریا

سورج ڈھالے جا سکتے تھے ہر قطرے سے لیکن

یوں ہی بہایا میں نے اشکوں کے الماس کا دریا

جس کے اک اک لمحے میں ہے صدیوں کی خاموشی

میرے اندر بہتا جائے اس بن باس کا دریا

ہم ہیں آبِ چاہ شباں کے ہم حمام سگاں کے

شہر میں پانی ڈھونڈ رہے ہو چھوڑ کے پاس کا دریا

تیری طلب میں رفتہ رفتہ میرے رخساروں پر

سوکھ رہا ہے قطرہ قطرہ تیز حواس کا دریا

سورج اک امید بھرا منصور نگر ہے لیکن

رات کو بہتا دیکھوں اکثر خود میں یاس کا دریا

منصور آفاق

ولولہ کیسا حیرت زدہ دید کی ایک لپ نے دیا

دسمبر 1, 2007منصور آفاق،شعراء،غزللپ،کپ،پنپ،تپ،جھڑپadmin

منصور آفاق ۔ غزل نمبر 114

ایک کھڑکی سے آتی ہوئی روشنی کی تڑپ نے دیا

ولولہ کیسا حیرت زدہ دید کی ایک لپ نے دیا

اس لڑائی سے پچھلی لڑائی کا کوئی تعلق نہ تھا

اِس لڑائی کو لیکن بڑھاوا گذشتہ جھڑپ نے دیا

تیرے جیسی کئی اور تھیں تجھ سے بہتربھی مل سکتی تھی

تیرے غم کایونہی کینسردل میں برسوں پنپنے دیا

میں نے سورج کو پھراک کرشمہ کہا اس پہ نظمیں کہیں

پہلے کچھ دیرآتی شعاعوں سے کمرے کو تپنے دیا

برف کی رات میں تم ہمیشہ رہو یہ دعادی اسے

جس ڈرنک کارنر کاپتہ چائے کے گرم کپ نے دیا

منصور آفاق

پانیوں کو چاند نے اشکال کا تحفہ دیا

دسمبر 1, 2007منصور آفاق،شعراء،غزلچترال،گھڑیال،اشکال،بال،تمثال،جال،خدوخال،شالadmin

منصور آفاق ۔ غزل نمبر 113

دائروں کی آنکھ دی، بھونچال کا تحفہ دیا

پانیوں کو چاند نے اشکال کا تحفہ دیا

رفتہ رفتہ اجنبی لڑکی لپٹتی ہی گئی

برف کی رت نے بدن کی شال کا تحفہ دیا

سوچتا ہوں وقت نے کیوں زندگی کے کھیل میں

پاؤں میرے چھین کر فٹ بال کا تحفہ دیا

’’آگ جلتی ہے بدن میں ‘‘بس کہا تھا کار میں

ہم سفر نے برف کے چترال کا تحفہ دیا

رات ساحل کے کلب میں مچھلیوں کو دیر تک

ساتھیوں نے اپنے اپنے جال کا تحفہ دیا

کچھ تو پتھر پر ابھر آیا ہے موسم کے طفیل

کچھ مجھے اشکوں نے خدوخال کا تحفہ دیا

پانیوں پر چل رہے تھے عکس میرے ساتھ دو

دھوپ کو اچھا لگا تمثال کا تحفہ دیا

وقت آگے تو نہیں پھر بڑھ گیا منصور سے

یہ کسی نے کیوں مجھے گھڑیال کا تحفہ دیا

منصور آفاق

یعنی میرا استعارہ رکھ دیا

دسمبر 1, 2007منصور آفاق،شعراء،غزلنظارہ،کنارہ،استعارہ،تارہ،دوبارہ،سارا،ستارہ،شرارہadmin

منصور آفاق ۔ غزل نمبر 112

ریل کی پٹڑی پہ تارہ رکھ دیا

یعنی میرا استعارہ رکھ دیا

کھینچ کر اس نے نظر کی ایک حد

آنکھ میں شوقِ نظارہ رکھ دیا

خاک پر بھیجا مجھے اور چاند پر

میری قسمت کا ستارہ رکھ دیا

بچ بچا کر کوزہ گر کی آنکھ سے

چاک پر خود کو دوبارہ رکھ دیا

دور تک نیلا سمندر دیکھ کر

میں نے کشتی میں کنارہ رکھ دیا

انتظار آباد یوں رکھا بدن

ہر روئیں پر ایک تارہ رکھ دیا

دیکھا جو سوکھی ہوئی لکڑی کا دل

اس میں خواہش کا شرارہ رکھ دیا

پہلے رکھا یاد نے منصور ہاتھ

رفتہ رفتہ بوجھ سارا رکھ دیا

منصور آفاق

گردشِ دوراں پہ ساغر رکھ دیا

دسمبر 1, 2007منصور آفاق،شعراء،غزلمقدر،منظر،چیتر،کر،گھر،پر،اندر،باہر،برابر،در،دسمبر،سمندر،ساغرadmin

منصور آفاق ۔ غزل نمبر 111

ہاتھ سے ہنگامِ محشر رکھ دیا

گردشِ دوراں پہ ساغر رکھ دیا

اک نظر دیکھا کسی نے کیا مجھے

بوجھ کہساروں کا دل پر رکھ دیا

پانیوں میں ڈوبتا جاتا ہوں میں

آنکھ میں کس نے سمندر رکھ دیا

اور پھر تازہ ہوا کے واسطے

ذہن کی دیوار میں در رکھ دیا

ٹھوکروں کی دلربائی دیکھ کر

پاؤں میں اس کے مقدر رکھ دیا

دیکھ کر افسوس تارے کی چمک

اس نے گوہر کو اٹھا کر رکھ دیا

ایک ہی آواز پہنی کان میں

ایک ہی مژگاں میں منظر رکھ دیا

نیند آور گولیاں کچھ پھانک کر

خواب کو بستر سے باہر رکھ دیا

دیدئہ تر میں سمندر دیکھ کر

اس نے صحرا میرے اندر رکھ دیا

اور پھر جاہ و حشم رکھتے ہوئے

میں نے گروی ایک دن گھر رکھ دیا

میری مٹی کا دیا تھا سو اسے

میں نے سورج کے برابر رکھ دیا

خانہء دل کو اٹھا کر وقت نے

بے سرو ساماں ، سڑک پر رکھ دیا

جو پہن کرآتی ہے زخموں کے پھول

نام اس رُت کا بھی چیتر رکھ دیا

کچھ کہا منصور اس نے اور پھر

میز پر لا کر دسمبر رکھ دیا

منصور آفاق

اور پھر شہر کے پاؤں میں سفر باندھ دیا

دسمبر 1, 2007منصور آفاق،شعراء،غزلنظر،گھر،اجر،تر،دگر،سفر،سر،شجرadmin

منصور آفاق ۔ غزل نمبر 110

پہلے سورج کو سرِ راہ گزر باندھ دیا

اور پھر شہر کے پاؤں میں سفر باندھ دیا

چند لکڑی کے کواڑوں کو لگا کر پہیے

وقت نے کار کے پیچھے مرا گھر باندھ دیا

وہ بھی آندھی کے مقابل میں اکیلا نہ رہے

میں نے خیمے کی طنابوں سے شجر باندھ دیا

میری پیشانی پہ انگارے لبوں کے رکھ کے

اپنے رومال سے اس نے مرا سر باندھ دیا

لفظ کو توڑتا تھا میری ریاضت کا ثمر

وسعتِ اجر تھی اتنی کہ اجر باندھ دیا

ایک تعویز جسے میں نے اتارا تھا ابھی

اس نے بازو پہ وہی بارِ دگر باندھ دیا

پھر وہ چڑھنے لگی تیزی سے بلندی کی طرف

پہلے رسہ کہیں تا حدِ نظر باندھ دیا

چلنے سے پہلے قیامت کے سفر پر منصور

آنکھ کی پوٹلی میں دیدۂ تر باندھ دیا

منصور آفاق

وہ جو مرتبت میں مثال ہے اسی آستاں سے گرا دیا

دسمبر 1, 2007منصور آفاق،شعراء،غزلوہاں،کماں،آسماں،آستاں،سائباںadmin

منصور آفاق ۔ غزل نمبر 109

مری بد لحاظ نگاہ نے مجھے عرشِ جاں سے گرا دیا

وہ جو مرتبت میں مثال ہے اسی آستاں سے گرا دیا

مجھے کچھ بھی اس نے کہا نہیں مگر اپنی رت ہی بدل گئی

مجھے دیکھتے ہوئے برف کو ذرا سائباں سے گرا دیا

مجھے دیکھ کر کہ میں زد پہ ہوں سرِ چشم آخری تیر کو

کسی نے کماں پہ چڑھا لیا کسی نے کماں سے گرا دیا

ہے عجب مزاج کی وہ کوئی کبھی ہم نفس کبھی اجنبی

کبھی چاند اس نے کہا مجھے کبھی آسماں سے گرا دیا

میں وہ خستہ حال مکان تھا جسے خوفِ جاں کے خیال سے

کسی نے یہاں سے گرا دیا کسی نے وہاں سے گرا دیا

منصور آفاق

ہزار ٹوٹ کے بھی طوقِ غم کو توڑ دیا

دسمبر 1, 2007منصور آفاق،شعراء،غزلتوڑadmin

منصور آفاق ۔ غزل نمبر 108

شکستِ جاں سے حصارِ الم کو توڑ دیا

ہزار ٹوٹ کے بھی طوقِ غم کو توڑ دیا

یہ احتجاج کا لہجہ نہیں بغاوت ہے

لکھے کو آگ لگا دی قلم کو توڑ دیا

قریب تر کسی پب کے مری رہائش تھی

اسی قرابتِ مے نے قسم کو توڑ دیا

قدم قدم پہ دلِ مصلحت زدہ رکھ کر

کسی نے راہِ وفا کے بھرم کو توڑ دیا

ہزار بار کہانی میں میرے ہیرو نے

دعا کی ضرب سے دستِ ستم کو توڑ دیا

سلام اس کی صلیبوں بھری جوانی پر

وہ جس نے موت کے جاہ و حشم کو توڑ دیا

نکل پڑا میں تلاشِ یزید میں اک دن

اور احتجاج کے کالے علم کو توڑدیا

یہ انتہا ہے دماغِ خراب کی منصور

دھرم کو چھوڑ دیا اور صنم کو توڑ دیا

منصور آفاق

وہ میرے ساتھ کوئی دن رہا تو اس نے کہا

دسمبر 1, 2007منصور آفاق،شعراء،غزلہوا،مرگیا،کیا،گرا،پڑا،دیا،رہا،سناadmin

منصور آفاق ۔ غزل نمبر 107

میں زندگی ہوں وہ جانے لگا تو اس نے کہا

وہ میرے ساتھ کوئی دن رہا تو اس نے کہا

مجھے زمین سے رکھنے ہیں اب مراسم بس

جب آسماں نے فسردہ کیا تو اس نے کہا

میں تتلیوں کے تعاقب میں جانے والا ہوں

کسی نے ماتھے پہ بوسہ دیا تو اس نے کہا

اداس رہنے کی عادت ہے مجھ کو ویسے ہی

گلی میں اس کی کوئی مرگیا تو اس نے کہا

مجھے بھی شام کی تنہائی اچھی لگتی ہے

مری اداسی کا قصہ سنا تو اس نے کہا

خیال رکھنا تجھے دل کا عارضہ بھی ہے

جب اس کے سامنے میں رو پڑا تو اس نے کہا

مجھے تو رات کی نیت خراب لگتی ہے

چراغ ہاتھ سے میرے گرا تو اس نے کہا

کوئی فرشتوں کی مجھ سے تھی دشمنی منصور

پڑھا نصیب کا لکھا ہوا تو اس نے کہا

منصور آفاق

تمام رات کوئی میری دسترس میں رہا

دسمبر 1, 2007منصور آفاق،شعراء،غزلہوس،قفس،قصص،نفس،کینوس،برس،بس،خس،دسترس،عبثadmin

منصور آفاق ۔ غزل نمبر 106

میں بدنصیب تھا احمق تھا پیش و پس میں رہا

تمام رات کوئی میری دسترس میں رہا

میں ایک شیش محل میں قیام کرتے ہوئے

کسی فقیر کی کٹیا کے خار و خس میں رہا

سمندروں کے اُدھر بھی تری حکومت تھی

سمندروں کے اِدھر بھی میں تیرے بس میں رہا

کسی کے لمس کی آتی ہے ایک شب جس میں

کئی برس میں مسلسل اسی برس میں رہا

گنہ نہیں ہے فروغ بدن کہ جنت سے

یہ آبِ زندگی، بس چشمۂ ہوس میں رہا

مرے افق پہ رکی ہے زوال کی ساعت

یونہی ستارہ مرا، حرکتِ عبث میں رہا

کنارے ٹوٹ کے گرتے رہے ہیں پانی میں

عجب فشار مرے موجۂ نفس میں رہا

وہی جو نکھرا ہوا ہے ہر ایک موسم میں

وہی برش میں وہی میرے کینوس میں رہا

قدم قدم پہ کہانی تھی حسن کی لیکن

ہمیشہ اپنے بنائے ہوئے قصص میں رہا

جسے مزاج جہاں گرد کا ملا منصور

تمام عمر پرندہ وہی قفس میں رہا

منصور آفاق

آسماں تجھ کو بنا کر کافری کرتا رہا

دسمبر 1, 2007منصور آفاق،شعراء،غزلملتوی،نبی،وہی،کہی،کافری،کاسنی،پوٹلی،پیروی،پیغمبری،بری،تہی،دوستیadmin

منصور آفاق ۔ غزل نمبر 105

تبصرہ اس کے بدن پر بس یہی کرتا رہا

آسماں تجھ کو بنا کر کافری کرتا رہا

میں ابوجہلوں کی بستی میں اکیلا آدمی

چاہتے تھے جو،وہی پیغمبری کرتا رہا

نیند آجائے کسی صورت مجھے، اس واسطے

میں ، خیالِ یار سے پہلو تہی کرتا رہا

کھول کر رنگوں بھرے سندر پرندوں کے قفس

میں بہشتِ دید کے ملزم بری کرتا رہا

جانتا تھا باغِ حیرت کے وہی ساتوں سوال

اک سفر تھا میں جسے بس ملتوی کرتا رہا

تھی ذرا سی روشنی سواحتیاطً بار بار

پوٹلی میں بند پھر میں پوٹلی کرتا رہا

سارادن اپنے کبوتر ہی اڑاکردل جلا

آسماں کا رنگ کچھ کچھ کاسنی کرتا رہا

دیدہ ء گرداب سے پہچان کر بحری جہاز

اک سمندرگفتگو کچھ ان کہی کرتا رہا

دشت میں موجودگی کے آخری ذرے تلک

ریت کا ٹیلاہوا سے دوستی کرتا رہا

رات کی آغوش میں گرتے رہے ، بجھتے رہے

میں کئی روشن دنوں کی پیروی کرتا رہا

اپنی ہٹ دھرمی پہ خوش ہوں اپنی ضد پر مطمئن

جو مجھے کرنا نہیں تھا میں وہی کرتا رہا

میں کہ پانچوں کا ملازم میں کہ چاروں کا غلام

حسبِ فرمانِ خدا ، وردِ نبیﷺ کرتا رہا

منصور آفاق

یہ انتظار کدہ ہے، یہ گیٹ پر لکھا

دسمبر 1, 2007منصور آفاق،شعراء،غزللپیٹ،گیٹ،پلیٹ،پیٹ،ریٹ،سلیٹ،سمیٹadmin

منصور آفاق ۔ غزل نمبر 104

کب اپنا نام مکاں کی پلیٹ پر لکھا

یہ انتظار کدہ ہے، یہ گیٹ پر لکھا

پھر ایک تازہ تعلق کو خواب حاضر ہیں

مٹا دیا ہے جو پہلے سلیٹ پر لکھا

وہ انتظار تھا بگلے کی بند آنکھوں میں

میں دستیاب ہوں مچھلی نے پیٹ پر لکھا

لکھا ہوا نے ’’یہ بس میری آخری حد ہے

"اب اس اڑان سے اپنے سمیٹ پر” لکھا

جہانِ برف پگھلنے کے بین لکھے ہیں

ہے نوحہ آگ کی بڑھتی لپیٹ پر لکھا

جنابِ شیخ کے فرمان قیمتی تھے بہت

سو میں نے تبصرہ ہونٹوں کے ریٹ پر لکھا

ہے کائنات تصرف میں خاک کے منصور

یہی فلک نے کری کی پلیٹ پر لکھا

منصور آفاق

میری پیدائش کا لمحہ پھر اسی سن میں رکھا

دسمبر 1, 2007منصور آفاق،شعراء،غزلگردن،اوون،برتن،جوبن،سن،ساونadmin

منصور آفاق ۔ غزل نمبر 103

اس نے پہلے مارشل لاء میرے آنگن میں رکھا

میری پیدائش کا لمحہ پھر اسی سن میں رکھا

صحن میں پھیلی ہوئی ہے گوشت جلنے کی سڑاند

جیسے سینے میں نہیں کچھ اس نے اوون میں رکھا

جب سوئمنگ پول کے شفاف پانی سے ملی

آنسوئوں والا فقط اک ہار گردن میں رکھا

ہونٹ ہیٹر پہ رکھے تھے اس کی یادوں پر نہیں

تھا جہنم خیز موسم غم کے جوبن میں رکھا

سانپ کو اس نے اجازت ہی نہیں دی وصل کی

گھر کے دروازے سے باہر دودھ برتن میں رکھا

میں اسے منصور بھیجوں کس لیے چیتر کے پھول

جس نے سارا سال مجھ کو غم کے ساون میں رکھا

منصور آفاق

وقت پر پاؤں کہانی ختم ہونے پر رکھا

دسمبر 1, 2007منصور آفاق،شعراء،غزلہونے،ڈبونے،کونے،بچھونے،بھگونے،رونےadmin

منصور آفاق ۔ غزل نمبر 102

آسرا کس وقت مٹی کے کھلونے پر رکھا

وقت پر پاؤں کہانی ختم ہونے پر رکھا

دیکھتا کیا میں تری دنیا کہ ہجرِ یار میں

دیدہ و دل کو ہمیشہ وقف رونے پر رکھا

پانیوں کو ساحلوں میں قید کر دینے کے بعد

موج کو پابند ساحل کے ڈبونے پر رکھا

چاہتا تو وقت کا ہم رقص بن سکتا تھا میں

خود سے ڈر کر خود کو لیکن ایک کونے پر رکھا

اپنی آنکھیں چھوڑ آیا اس کے دروازے کے پاس

اور اس کے خواب کو اپنے بچھونے پر رکھا

سونپ کر منصور دل کو آگ سلگانے کا کام

آنکھ کو مصروف دامن کے بھگونے پر رکھا

منصور آفاق

تُو خالی ہاتھ مجھے بھیج… اور در نہ دکھا

دسمبر 1, 2007منصور آفاق،شعراء،غزلتر،ثمر،خطر،در،سحرadmin

منصور آفاق ۔ غزل نمبر 101

مرے نصیب پہ رو دے، کسی کا گھر نہ دکھا

تُو خالی ہاتھ مجھے بھیج… اور در نہ دکھا

تُو اپنی شام کے بارے کلام کر مجھ سے

کسی کے بام پہ ابھری ہوئی سحر نہ دکھا

ابھی تو وصل کی منزل خیال میں بھی نہیں

شبِ فراق! ابھی سے یہ چشمِ تر نہ دکھا

گزار آیا ہوں صحرا ہزار پت جھڑ کے

فریبِ وقت! مجھے شاخِ بے ثمر نہ دکھا

میں جانتا ہوں قیامت ہے بیچ میں منصور

مجھے یہ راہ میں پھیلے ہوئے خطر نہ دکھا

منصور آفاق

سرابِ ذات کا کیسا سموتھ پانی تھا

دسمبر 1, 2007منصور آفاق،شعراء،غزلاچھوت،بلوط،بھوت،ثبوت،حنوط،سموتھadmin

منصور آفاق ۔ غزل نمبر 100

ہوا تھی تیز مگر ، پُرسکوت پانی تھا

سرابِ ذات کا کیسا سموتھ پانی تھا

وہاں پہ آگ کو کیا سرخروئی ملنی تھی

جہاں حیات کا پہلا ثبوت پانی تھا

وہ تشنہ لب رہا دریا کے پاس آ کر بھی

مرے کنارے کا شاید اچھوت پانی تھا

کئی ہزار برس پہلے میرے پاؤں میں

بشکلِ برف زمیں پر حنوط پانی تھا

اکیلگی تھی جزیرے پہ اور ہوائیں تھیں

گرے ہوئے تھے کئی شہ بلوط ، پانی تھا

ہر اک خیال کے اس انجماد میں منصور

حدِ نگاہ کا بے شکل بھوت پانی تھا

منصور آفاق

سمندر جیسی آنکھیں تھی گل و گلزار چہرہ تھا

دسمبر 1, 2007منصور آفاق،شعراء،غزلگفتار،گلنار،گلزار،بیدار،بار،دلدار،درکار،شہکارadmin

منصور آفاق ۔ غزل نمبر 99

کنارِ صبحِ امکاں اک تبسم بار چہرہ تھا

سمندر جیسی آنکھیں تھی گل و گلزار چہرہ تھا

مری نظریں اٹھیں تو پھر پلٹ کر ہی نہیں آئیں

عجب سندر سی آنکھیں تھی عجب دلدار چہرہ تھا

سنا ہے اس لیے اس نے تراشے خال و خد میرے

اسے پہچان کو اپنی کوئی درکار چہرہ تھا

ہوا کی آیتوں جیسی تکلم کی بہشتیں تھیں

شراب و شہد بہتے تھے وہ خوش گفتار چہرہ تھا

جہاں پر دھوپ کھلتی تھی وہیں بادل برستے تھے

جہاں پُر خواب آنکھیں تھیں وہیں بیدار چہرہ تھا

شفق کی سر خ اندامی لب و رخسار جیسی تھی

چناروں کے بدن پر شام کا گلنار چہرہ تھا

جسے بتیس برسوں سے مری آنکھیں تلاشے ہیں

بس اتنا جانتا ہوں وہ بہت شہکار چہرہ تھا

جہاں پر شمع داں رکھا ہوا ہے یاد کا منصور

یہاں اس طاقچے میں کوئی پچھلی بار چہرہ تھا

منصور آفاق

نیند کی نوٹ بک میں تھا، کچھ تھا

دسمبر 1, 2007منصور آفاق،شعراء،غزلمدعا،معاملہ،کہا،کا،گرا،ٹوٹتا،پکارتا،آسرا،بڑا،بجا،تھا،سلسلہadmin

منصور آفاق ۔ غزل نمبر 98

یاد کچھ بھی نہیں کہ کیا کچھ تھا

نیند کی نوٹ بک میں تھا، کچھ تھا

میں ہی کچھ سوچ کر چلا آیا

ورنہ کہنے کو تھا ، بڑا کچھ تھا

چاند کچھ اور کہتا جاتا تھا

دلِ وحشی پکارتا کچھ تھا

اس کی پاؤں کی چاپ تھی شاید

یا یونہی کان میں بجا کچھ تھا

میں لپٹتا تھا ہجر کی شب سے

میرے سینے میں ٹوٹتا کچھ تھا

کُن سے پہلے کی بات ہے کوئی

یاد پڑتا ہے کچھ، کہا کچھ تھا

پھرفلک سے بھی ہو گئے مایوس

پہلے پہلے تو آسرا کچھ تھا

ہے گواہی کو اک سیہ پتھر

آسماں سے کبھی گرا کچھ تھا

لوگ بنتے تھے گیت پہلے بھی

مجھ سے پہلے بھی سلسلہ کچھ تھا

موسمِ گل سے پہلے بھی موسم

گلستاں میں بہار کا کچھ تھا

اس کی آنکھیں تھیں پُر خطر اتنی

کہہ دیا کچھ ہے مدعا کچھ تھا

آنکھ کیوں سوگوار ہے منصور

خواب میں تو معاملہ کچھ تھا

منصور آفاق

یاد ہے وصل کی سبز اتوار تھی شام کا پیڑ تھا

دسمبر 1, 2007منصور آفاق،شعراء،غزلفام،مادام،نام،ناکام،افہام،الہام،الزام،ایام،آلام،آم،ابہام،دام،دشنام،سرسام،شامadmin

منصور آفاق ۔ غزل نمبر 97

ناریل کے درختوں کی شاخوں میں بادام کا پیڑ تھا

یاد ہے وصل کی سبز اتوار تھی شام کا پیڑ تھا

قمقموں سے پرویا ہوا، روشنی سے بھگویا ہوا

برف کے ڈھیر میں سرخ سا زخمِ ناکام کا پیڑ تھا

شاعری نہر کے ساتھ چلتی ہوئی چاپ تھی خواب کی

رات نظموں کی فٹ پاتھ تھی چاند الہام کا پیڑ تھا

میں ثمر باریوں کی توقع لئے دیکھتا تھا اسے

جو کرائے کے گھر میں لگایا ابھی آم کا پیڑ تھا

ایک دہکی ہوئی آگ کے تھے شمالی پہاڑوں پہ پھول

اک دہکتے چناروں میں کشمیر کے نام کا پیڑ تھا

جس کے پتوں سے تصویر کھینچی گئی میرے کردار کی

ٹہنیوں سے کئی جھوٹ لٹکے تھے، الزام کا پیڑ تھا

اک طرف نیکیوں کا شجر تھا سفیدی پھری قبر سا

اک طرف لمس افزا گناہِ سیہ فام کا پیڑ تھا

زلزلے بھی وبائیں بھی سیلاب بھی شاخ درشاخ تھے

ساری بستی پہ پھیلا ہوا کوئی آلام کا پیڑ تھا

سب پھلوں کے مگر مختلف ذائقے ، مختلف رنگ تھے

اپنی تفہیم کے باغ میں تازہ افہام کا پیڑ تھا

جس شجر کی جوانی کومیں چھوڑ آیا بہاروں کے بیچ

گالیاں چھاؤں میں چہچہاتی تھیں دشنام کا پیڑ تھا

کوئی انبوہ تھا اہلِ اسباب کا اس کی آغوش میں

کیا ہوس کار گلزار میں درہم و دام کا پیڑ تھا

برگ و بار اس پہ آئے ہوئے تھے نئی شاعری کے بہت

ایک دریا کے مبہم کنارے پہ ابہام کا پیڑ تھا

آگ ہی آگ تھی اس کی شاخوں میں پھیلی ہوئی لمس کی

باغِ فردوس میں ایک ممنوعہ مادام کا پیڑ تھا

اک جڑوں سے لپیٹی ہوئی موت کی بیل کی چیخ تھی

زندگی ، شورِ واہی تباہی تھی ، سرسام کا پیڑ تھا

جس سے منصور گنتے پرندے پھریں اپنی تنہائیاں

حسنِ تقویم کے صحن میں ایک ایام کا پیڑ تھا

منصور آفاق

یعنی قربانی کرتا ہوا شیر تھا

دسمبر 1, 2007منصور آفاق،شعراء،غزلہوا،ناطقہ،تھا،خدا،دلربا،ذراadmin

منصور آفاق ۔ غزل نمبر 96

اک سیہ بھیڑ تھی اک سیہ شیر تھا

یعنی قربانی کرتا ہوا شیر تھا

بلی کوبادشہ کیسے مانے وہ شخص

جس کی آنکھوں میں شیرِ خدا شیر تھا

شہر میں ہو گیا ہے درندہ صفت

جنگلوں میں مہذب ذرا شیر تھا

نوکری پیشہ یعنی کہ سرکس زدہ

لومڑی کا کوئی دلربا شیر تھا

ایک گیڈر جو گلیوں سے گزرا مری

شور اٹھا شیر تھا شیر تھاشیر تھا

ڈھاڑتا تھاجو منصور کو دیکھ کر

آدمی تھا کوئی ناطقہ شیر تھا

منصور آفاق

اس کی آنکھوں میں عزا کا درد تھا

دسمبر 1, 2007منصور آفاق،شعراء،غزلقضا،جزا،رضا،سزا،عزاadmin

منصور آفاق ۔ غزل نمبر 95

اک مقامِ پُر فضا کا درد تھا

اس کی آنکھوں میں عزا کا درد تھا

وقت کی قربان گاہ تھی دور تک

اور ازل بستہ قضا کا درد تھا

بات مجبوراً روابط کی تھی اور

مجھ کو رغبت اور رضا کا درد تھا

ہجر کے کالک بھرے ماحول سے

مجھ کو صحبت کی سزا کا درد تھا

اک طرف شہد و شراب و لمس تھے

اک طرف روزِ جزا کا درد تھا

منصور آفاق

خشک پتوں کو ہوا کا درد تھا

دسمبر 1, 2007منصور آفاق،شعراء،غزلہوا،نوا،نینوا،ناروا،دواadmin

منصور آفاق ۔ غزل نمبر 94

مضمحل ہوتے قویٰ کا درد تھا

خشک پتوں کو ہوا کا درد تھا

جان لیوا بس وہی ثابت ہوا

جو مسیحا کی دوا کا درد تھا

رک گیا، آہیں سُروں پر دیکھ کر

ساز کو بھی ہم نوا کا درد تھا

کچھ برس پہلے مرے احساس میں

تھا، سلوکِ ناروا کا درد تھا

مجھ کو دکھ تھا کربلائے وقت کا

اس کو خاکِ نینوا کا درد تھا

منصور آفاق

راکھ کو یعنی ہوا کا درد تھا

دسمبر 1, 2007منصور آفاق،شعراء،غزلہوا،چتا،پا،انا،انتہا،رساadmin

منصور آفاق ۔ غزل نمبر 93

دل کو یارِ بے وفا کا درد تھا

راکھ کو یعنی ہوا کا درد تھا

موت کی ہچکی مسیحا بن گئی

رات کچھ اِس انتہا کا درد تھا

ننگے پاؤں تھی ہوا کی اونٹنی

ریت تھی اور نقشِ پا کا درد تھا

کائناتیں ٹوٹتی تھیں آنکھ میں

عرش تک ذہنِ رسا کا درد تھا

میں جسے سمجھا تھا وحشت ہجر کی

زخم پروردہ انا کا درد تھا

رات کی کالک افق پر تھوپ دی

مجھ کو سورج کی چتا کا درد تھا

منصور آفاق

مجھ کو خاکِ کربلا کا درد تھا

دسمبر 1, 2007منصور آفاق،شعراء،غزلمبتلا،کربلا،ابتلا،بلا،برملا،خلاadmin

منصور آفاق ۔ غزل نمبر 92

آسمانوں کو الہ کا درد تھا

مجھ کو خاکِ کربلا کا درد تھا

اس کو خالی صحن کی تکلیف تھی

مجھ کو اندر کے خلا کا درد تھا

اب تلک احساس میں موجود ہے

کتنا حرفِ برملا کا درد تھا

رات تھی روتی ہوئی کوئل کہیں

اس کے لہجے میں بلا کا درد تھا

رو رہا تھا آسماں تک ساتھ ساتھ

ایسا تیرے مبتلا کا درد تھا

اب بھی آنکھوں سے ابل پڑتا ہے دل

کیسا پہلی ابتلا کا درد تھا

منصور آفاق

تیر سورج کی نظر میں لگ گیا تھا

دسمبر 1, 2007منصور آفاق،شعراء،غزلنظر،جگر،سفر،سحر،سر،شجرadmin

منصور آفاق ۔ غزل نمبر 91

اک چراغِ معتبر میں لگ گیا تھا

تیر سورج کی نظر میں لگ گیا تھا

اس پہ بچپن میں کہانی کھل گئی تھی

دکھ کا پتھر اس کے سر میں لگ گیا تھا

وہ کہیں رہتی تھی تاروں کے نگر میں

سارا دن بس کے سفر میں لگ گیا تھا

پہلے لکھے تھے ستاروں کے قصیدے

پھر قلم کارِ سحر میں لگ گیا تھا

رفتہ رفتہ چھاؤں میٹھی ہو گئی تھی

شہد کا چشمہ شجر میں لگ گیا تھا

پچھلے دکھ منصور جندڑی سہہ گئی تھی

زخم اک تازہ جگر میں لگ گیا تھا

منصور آفاق

صبح کے ماتھے پہ آ کر سج گیا تھا

دسمبر 1, 2007منصور آفاق،شعراء،غزلکج،اسوج،بج،تج،دھیرج،دھج،ذوالحج،سورج،ستلج،سجadmin

منصور آفاق ۔ غزل نمبر 90

پابجولاں کیا مرا سورج گیا تھا

صبح کے ماتھے پہ آ کر سج گیا تھا

وہ بھی تھی لپٹی ہوئی کچھ واہموں میں

رات کا پھر ایک بھی تو بج گیا تھا

کوئی آیا تھا مجھے ملنے ملانے

شہر اپنے آپ ہی سج دھج گیا تھا

پہلے پہلے لوٹ جاتا تھا گلی سے

رفتہ رفتہ بانکپن کا کج گیا تھا

مکہ کی ویران گلیاں ہو گئی تھیں

کربلا کیا موسمِ ذوالحج گیا تھا

تُو اسے بھی چھوڑ آیا ہے اسے بھی

تیری خاطر وہ جو مذہب تج گیا تھا

وہ مرے سینے میں شاید مر رہا ہے

جو مجھے دے کر بڑی دھیرج گیا تھا

کتنی آوازوں کے رستوں سے گزر کر

گیت نیلی بار سے ستلج گیا تھا

پاؤں بڑھ بڑھ چومتے تھے اڑتے پتے

تازہ تازہ باغ میں اسوج گیا تھا

چاند تاروں نے خبر منصور دی ہے

رات کی محفل میں کل سورج گیا تھا

منصور آفاق

وہ جنگ تھی کسی کی وہ جھگڑا کہیں کا تھا

دسمبر 1, 2007منصور آفاق،شعراء،غزلہفتہ،ویزہ،کاسہ،کتا،ٹکڑا،پتا،آتا،اجالا،ارادہ،تھا،جھگڑا،جالا،حوالہ،دریچہ،دریا،رستہ،سوچا،سایہadmin

منصور آفاق ۔ غزل نمبر 89

پھیلا ہوا ہے گھر میں جو ملبہ، کہیں کا تھا

وہ جنگ تھی کسی کی وہ جھگڑا کہیں کا تھا

پھر اک فریبِ ذات ہوا اپنا شاٹ کٹ

پہنچے کہیں پہ اور ہیں سوچا کہیں کا تھا

جبہ تھا ’دہ خدا‘ کا تو دستار سیٹھ کی

حجرے کی وارڈروب بھی کاسہ کہیں کا تھا

آخر خبر ہوئی کہ وہ اپنی ہے ملکیت

منظر جو آنکھ کو نظر آتا کہیں کا تھا

جو دشت آشنا تھا ستارہ کہیں کا تھا

میں جس سے سمت پوچھ رہا تھا کہیں کا تھا

حیرت ہے جا رہا ہے ترے شہر کی طرف

کل تک یہی تو تھا کہ یہ رستہ، کہیں کا تھا

سوکھے ہوئے شجر کو دکھاتی تھی بار بار

پاگل ہوا کے ہاتھ میں پتا کہیں کا تھا

بس دوپہر کی دھوپ نے رکھا تھا جوڑ کے

دیوارِ جاں کہیں کی تھی سایہ کہیں کا تھا

وہ آئینہ بھی میرا تھا، آنکھیں بھی میری تھیں

چہرے پہ عنکبوت کا جالا کہیں کا تھا

کیا پوچھتے ہو کتنی کشش روشنی میں ہے

آیا کہیں ہوں اور ارادہ کہیں کا تھا

شاید میں رہ رہا تھا کسی اور وقت میں

وہ سال وہ مہینہ وہ ہفتہ کہیں کا تھا

صحرا مزاج ڈیم کی تعمیر کے سبب

بہنا کہیں پڑا اسے، دریا کہیں کا تھا

تاروں بھری وہ رات بھی کچھ کچھ کمینی تھی

کچھ اس کا انتظار بھی کتا کہیں کا تھا

گاہے شبِ وصال تھی گاہے شبِ فراق

آنکھیں کہیں لگی تھیں دریچہ کہیں کا تھا

اے دھوپ گھیر لائی ہے میری ہوا جسے

وہ آسماں پہ ابر کا ٹکڑا کہیں کا تھا

جلنا کہاں تھا دامنِ شب میں چراغِ غم

پھیلا ہوا گلی میں اجالا کہیں کا تھا

پڑھنے لگا تھا کوئی کتابِ وفا مگر

تحریر تھی کہیں کی، حوالہ کہیں کا تھا

اتری کہیں پہ اور مرے وصل کی اڑان

منصور پاسپورٹ پہ ویزہ کہیں کا تھا

منصور آفاق

فلک پر اس کا ملبہ گر پڑا تھا

دسمبر 1, 2007منصور آفاق،شعراء،غزلملبہ،چہرہ،کمرہ،کنارہ،کھلونا،پرندہ،پردہ،آنسو،دانہ،رستہ،صحراadmin

منصور آفاق ۔ غزل نمبر 88

زمیں پلٹی تو الٹا گر پڑا تھا

فلک پر اس کا ملبہ گر پڑا تھا

میں بھر لایا ہوں مشکیزہ دکھوں سے

کنویں کی تہہ میں صحرا گر پڑا تھا

سُکھانا چاہتا تھا خواب لیکن

ٹشو پیپر پہ آنسو گر پڑا تھا

مری رفتار کی وحشت سے ڈر کر

کسی کھائی میں رستہ گر پڑا تھا

کھلی تھی اک ذرا بس چونچ اس کی

کہیں چاول کا دانہ گر پڑا تھا

مرے کردار کی آنکھیں کھلی تھیں

اور اس کے بعد پردہ گر پڑا تھا

مری سچائی میں دہشت بڑی تھی

کہیں چہرے سے چہرہ گر پڑا تھا

بس اک موجِ سبک سر کی نمو سے

ندی میں پھر کنارہ گر پڑا تھا

مرے چاروں طرف بس کرچیاں تھیں

نظر سے اک کھلونا گر پڑا تھا

اٹھا کر ہی گیا تھا اپنی چیزیں

بس اس کے بعد کمرہ گر پڑا تھا

نظر منصور گولی بن گئی تھی

ہوا میں ہی پرندہ گر پڑا تھا

منصور آفاق

مجھے بھی اپنا کوئی انتظام کرنا تھا

دسمبر 1, 2007منصور آفاق،شعراء،غزلقیام،کلام،کام،اہتمام،انتظام،احترام،اختتام،خرام،عامadmin

منصور آفاق ۔ غزل نمبر 87

اسے بھی ربطِ رہائش تمام کرنا تھا

مجھے بھی اپنا کوئی انتظام کرنا تھا

نگار خانے سے اس نے بھی رنگ لینے تھے

مجھے بھی شام کا کچھ اہتمام کرنا تھا

اسے بھی عارض و لب کے دئیے جلانے تھے

مجھے بھی چاند سے کوئی کلام کرنا تھا

بس ایک لنچ ہی ممکن تھا اتنی جلدی میں

اسے بھی جانا تھا میں نے بھی کام کرنا تھا

مراقبہ کسی بگلے کا دیکھنا تھا مجھے

کنارِ آبِ رواں کچھ خرام کرنا تھا

گلی کے لڑکوں کو سچائیاں بتانی تھیں

کوئی چراغ اندھیروں میں عام کرنا تھا

یہ کیا کہ بہتا چلا جا رہا ہوں گلیوں میں

کہیں تو غم کا مجھے اختتام کرنا تھا

بلانے آیا تھا اقبال بزمِ رومی میں

سو حکم نامے کا کچھ احترام کرنا تھا

گزر سکی نہ وہاں ایک رات بھی منصور

جہاں جہاں مجھے برسوں قیام کرنا تھا

منصور آفاق

نگار خانۂ جاں کا طلسم ایسا تھا

دسمبر 1, 2007منصور آفاق،شعراء،غزلقسم،بسم،جسم،رسم،طلسمadmin

منصور آفاق ۔ غزل نمبر 86

بدن کے قفل چٹختے تھے اسم ایسا تھا

نگار خانۂ جاں کا طلسم ایسا تھا

دہکتے ہونٹ اسے چھونے کو مچلتے تھے

سیہ گلابوں کی جیسی ہے قسم ایسا تھا

جگہ جگہ پہ دراڑیں تھیں ندّی نالے تھے

سوادِ چشم میں پانی کا رِسم ایسا تھا

کسی کا پاؤں اٹھا رہ گیا کسی کا ہاتھ

تمام شہر تھا ساکت، طلسم ایسا تھا

ہر ایک چیز برہنہ تھی بے کے نقطے میں

الف فروزاں تھا جس میں وہ بسم ایسا تھا

یہ اور بات کہ شیشہ تھا درمیاں منصور

چراغ ہوتا ہے جیسے وہ جسم ایسا تھا

منصور آفاق

یعنی کہ فلک سارا پتنگوں سے بھرا تھا

دسمبر 1, 2007منصور آفاق،شعراء،غزلملنگوں،پتنگوں،امنگوں،تلنگوں،رنگوں،سرنگوںadmin

منصور آفاق ۔ غزل نمبر 85

پیچوں سے اٹا دل مرا ، جنگوں سے بھرا تھا

یعنی کہ فلک سارا پتنگوں سے بھرا تھا

داتا علی ہجویری کا تھا عرس مبارک

لاہور محمدﷺ کے ملنگوں سے بھرا تھا

نکلا تھا گلستاں سے مگرخار کے ہمراہ

خوشبو کا وہ جھونکا کئی رنگوں سے بھرا تھا

اک، پاؤں کسی جنگ میں کام آئے ہوئےتھے

اک راستہ بارودی سرنگوں سے بھرا تھا

اونچائی سے یک لخت کوئی لفٹ گری تھی

اور لوہے کا کمرہ بھی امنگوں سے بھرا تھا

منصور فقط ہم ہی نہیں بہکے ہوئے تھے

بازارِ غزل سارا تلنگوں سے بھرا تھا

منصور آفاق

نسبت تھی کہ پتھر کوئی بوسوں سے بھرا تھا

دسمبر 1, 2007منصور آفاق،شعراء،غزلکتوں،بنوں،بوسوں،ستاروں،صداؤںadmin

منصور آفاق ۔ غزل نمبر 84

توحید پرستوں کے جو ہونٹوں سے بھرا تھا

نسبت تھی کہ پتھر کوئی بوسوں سے بھرا تھا

ہلکی سی بھی آواز کہیں دل کی نہیں تھی

مسجد کا سپیکر تھا صداؤں سے بھرا تھا

بارود کی بارش ابھی بادل میں بھری تھی

وہ باغ ابھی بھاگتے بچوں سے بھرا تھا

جس رات لہو چلتا تھا پلکوں کے کنارے

اُس رات فلک سرخ ستاروں سے بھرا تھا

آوارہ محبت میں وہ لڑکی بھی بہت تھی

منصور مرا شہر بھی کتوں سے بھرا تھا

منصور آفاق

اک ذہن تھا جو توپ کے گولوں سے بھرا تھا

دسمبر 1, 2007منصور آفاق،شعراء،غزلممولوں،ڈھولوں،گولوں،پٹولوں،اولوں،شعلوںadmin

منصور آفاق ۔ غزل نمبر 83

اک دل تھا مرا ، پیار کے بولوں سے بھرا تھا

اک ذہن تھا جو توپ کے گولوں سے بھرا تھا

کل رات جو کمرے کا بجھایا نہیں ہیٹر

اٹھا تو افق آگ کے شعلوں سے بھرا تھا

اک یاد تھی گزرے ہوئے معصوم دنوں کی

کمرہ کوئی گڑیا کے پٹولوں سے بھرا تھا

چھت ہی نہیں ٹوٹی تھی کسی کچے مکاں کی

چاول کا کوئی کھیت بھی اولوں سے بھرا تھا

بازوں کے تسلط میں فضائیں تھیں چمن کی

محفوظ تھا پنجرہ سو ممولوں سے بھرا تھا

منصور کی چیخیں تھیں کہ سینے میں دبی تھیں

کمرہ تھا کہ بجتے ہوئے ڈھولوں سے بھرا تھا

منصور آفاق

دیکھتا جسے بھی تھا کوہسار لگتا تھا

دسمبر 1, 2007منصور آفاق،شعراء،غزلوار،یار،کوہسار،اقتدار،انتظار،آبشار،بہار،بار،غمگسارadmin

منصور آفاق ۔ غزل نمبر 82

عرش تک میانوالی بے کنار لگتا تھا

دیکھتا جسے بھی تھا کوہسار لگتا تھا

بارشوں کے موسم میں جب ہوا اترتی تھی

اپنے گھر کا پرنالا آبشار لگتا تھا

منچلوں کی گلیوں میں رات جب مچلتی تھی

کوچہء رقیباں بھی کوئے یار لگتا تھا

ایک چائے خانہ تھا یاد کے سٹیشن پر

بھیگتے اندھیرے میں غمگسار لگتا تھا

ایک نہر پانی کی شہر سے گزرتی تھی

اس کا یخ رویہ بھی دل بہار لگتا تھا

ادھ جلے سے سگریٹ کے ایک ایک ٹکڑے میں

لاکھ لاکھ سالوں کا انتظار لگتا تھا

قید اک رگ و پے میں روشنی کی دیوی تھی

جسم کوئی شیشے کا جار وار لگتا تھا

باتھ روم میں کوئی بوند سی ٹپکتی تھی

ذہن پر ہتھوڑا سا بار بار لگتا تھا

ہمسفر جوانی تھی ہم سخن خدا منصور

اپنا ہی زمانے پر اقتدار لگتا تھا

منصور آفاق

تیرے بن باسیوں کا یہ گھر تھا

دسمبر 1, 2007منصور آفاق،شعراء،غزلقلندر،قادر،منظر،گھر،در،سلیپر،سکندرadmin

منصور آفاق ۔ غزل نمبر 81

ہجر تھل ریت کا سمندر تھا

تیرے بن باسیوں کا یہ گھر تھا

آدھے حصے میں رنگ تھے موجود

آدھا خالی گلی کا منظر تھا

چھت بھی بیٹھی ہوئی تھی کمرے کی

اور دل کا گرا ہوا در تھا

اک سلگتی سڑک پہ بچے کے

پاؤں میں ایک ہی سلیپر تھا

مملکت کی خراب حالت تھی

میں اکیلا وہاں قلندر تھا

وہ تھی یونان کی کوئی دیوی

اور قسمت کا میں سکندر تھا

ایک بس وہ خدا نہ تھا منصور

ورنہ ہر چیز پہ وہ قادر تھا

منصور آفاق

جیسے دوزخ میں میرا بستر تھا

دسمبر 1, 2007منصور آفاق،شعراء،غزلمنتر،چیتر،پلستر،پتھر،بہتر،بستر،تیترadmin

منصور آفاق ۔ غزل نمبر 80

خواب اتنا زیادہ ابتر تھا

جیسے دوزخ میں میرا بستر تھا

میرے آنے پہ کیوں دھڑک اٹھا

تیرا دل تو ازل سے پتھر تھا

جس کو چاہا اسی کو جیت لیا

جانے کیا اس کے پاس منتر تھا

کوئی باہوں کی دائرے میں تھی

اور تعلق کا پہلا چیتر تھا

بند درزیں تھیں رابطوں والی

اس کی دیوار پر پلستر تھا

راستے کے بڑے مسائل ہیں

مجھ سے کچھ پوچھتے تو بہتر تھا

وردِ الحمد کی صدا منصور

صبح ابھری کہیں تو تیتر تھا

منصور آفاق

فرمانِ چشمِ یار پہ واوین مت لگا

دسمبر 1, 2007منصور آفاق،شعراء،غزلفریقین،قوسین،مابین،چین،چیرمین،نعلین،واوین،بین،جین،دارین،طرفین،عینadmin

منصور آفاق ۔ غزل نمبر 79

مرکوز رکھ نگاہ کو، پھر نین مت لگا

فرمانِ چشمِ یار پہ واوین مت لگا

زردار! یہ جو تُو نے کیے ہیں ہزار حج

اس پر امیدِ رحمتِ دارین مت لگا

جس سے تُو دیکھتا ہے ابو جہل کے قدم

اُس آنکھ سے رسول کے نعلین مت لگا

خطرہ ہے انعدام کا میرے وجود کو

باہوں سے اپنی محفلِ قوسین مت لگا

دونوں طرف ہی دشمنِ جاں ہیں خیال رکھ

اتنے قریب حدِ فریقین مت لگا

کوئی تماشا اے مرے جدت طراز ذہن

تُو عرش اور فرش کے مابین مت لگا

جائز ہر ایک آنکھ پہ جلوے بہار کے

اپنی کتابِ حسن پہ تُو بین مت لگا

دیوارِ قوس رکھ نہ شعاعوں کے سامنے

لفظِ طلو کے بعد کبھی عین مت لگا

دشمن کے ہارنے پہ بھی ناراض مجھ سے ہے

مجھ کو تو اپنا دل بھی کوئی’ جین مت‘ لگا

ادراک سلسلہ ہے، اسے مختصر نہ کر

اپنے سکوتِ فہم کو بے چین ’مت‘ لگا

جس نے تمام زندگی بجلی چرائی ہے

اس کو تو واپڈا کا چیرمین مت لگا

لگتا ہے یہ مقدمہ یک طرفہ عشق کا

منصور شرطِ شرکتِ ’طرفین‘ مت لگا

منصور آفاق

یہ الگ پھر زخم پچھلے زخم کے اندر لگا

دسمبر 1, 2007منصور آفاق،شعراء،غزلہیٹر،منظر،نمبر،کینسر،پتھر،پر،اندر،بستر،تر،سرadmin

منصور آفاق ۔ غزل نمبر 78

یہ الگ اس مرتبہ بھی پشت پر خنجر لگا

یہ الگ پھر زخم پچھلے زخم کے اندر لگا

مجھ سے لپٹی جا رہی ہے اک حسیں آکاس بیل

یاد کے برسوں پرانے پیڑ کو کینسر لگا

موت کی ٹھنڈی گلی سے بھاگ کر آیا ہوں میں

کھڑکیوں کو بند کر، جلدی سے اور ہیٹر لگا

بند کر دے روشنی کا آخری امکان بھی

روزنِ دیوار کو مٹی سے بھر، پتھر لگا

کیا بلندی بخش دی بس ایک لمحے نے اسے

جیسے ہی سجدے سے اٹھا، آسماں سے سر لگا

پھیر مت بالوں میں میرے، اب سلگتی انگلیاں

مت کفِ افسوس میرے، مردہ چہرے پر لگا

گر محبت ہے تماشا تو تماشا ہی سہی

چل مکانِ یار کے فٹ پاتھ پر بستر لگا

بہہ رہی ہے جوئے غم، سایہ فگن ہے شاخِ درد

باغِ ہجراں کو نہ اتناآبِ چشمِ تر لگا

اتنے ویراں خواب میں تتلی کہاں سے آئے گی

پھول کی تصویر کے پیچھے کوئی منظر لگا

اک قیامت خیز بوسہ اس نے بخشا ہے تجھے

آج دن ہے، لاٹری کے آج چل نمبر لگا

منصور آفاق

رات بھر نعرئہ تکبیر لگا

دسمبر 1, 2007منصور آفاق،شعراء،غزلکشمیر،تقدیر،تیر،تکبیر،تسخیر،تصویر،تعمیر،دلگیر،زنجیر،شہتیر،شمشیرadmin

منصور آفاق ۔ غزل نمبر 77

سینہء ہجر میں پھر چیر لگا

رات بھر نعرئہ تکبیر لگا

دھجیاں اس کی بکھیریں کیا کیا

ہاتھ جب دامنِ تقدیر لگا

وہ تو بے وقت بھی آسکتا ہے

خانہء دل پہ نہ زنجیر لگا

میں نے کھینچی جو کماں مٹی کی

چاند کی آنکھ میں جا تیر لگا

اس سفیدی کا کوئی توڑ نکال

خالی دیوار پہ تصویر لگا

کیوں سرِ آئینہ اپنا چہرہ

کبھی کابل کبھی کشمیر لگا

سر ہتھیلی پہ تجھے پیش کیا

اب تو آوازئہ تسخیر لگا

آسماں گر نہ پڑے، جلدی سے

اٹھ دعا کا کوئی شہتیر لگا

رہ گئی ہے یہی غارت گر سے

داؤ پہ حسرتِ تعمیر لگا

پھر قیامت کا کوئی قصہ کر

زخم سے سینہء شمشیر لگا

بند کر پاپ کے سرگم منصور

کوئی اب نغمہ دلگیر لگا

منصور آفاق

کوئی طلسمی باڑ لگا

دسمبر 1, 2007منصور آفاق،شعراء،غزلکواڑ،کراڑ،اجاڑ،باڑ،دراڑadmin

منصور آفاق ۔ غزل نمبر 76

چاروں اور پہاڑ لگا

کوئی طلسمی باڑ لگا

غم کا کاٹھ کباڑ لگا

سارا شہر اجاڑ لگا

دنیا ایک مثلث ہے

دل میں تین کواڑ لگا

ہر اک عشق کی بستی کا

اشک شمار کراڑ لگا

چل منصور محبت کے

دل میں ایک دراڑ لگا

منصور آفاق

مجھے بیدار طالع قبر میں سونے کہاں دے گا

دسمبر 1, 2007منصور آفاق،شعراء،غزلکھونے،بونے،دھونے،رونے،سونےadmin

منصور آفاق ۔ غزل نمبر 75

کرم اسمِ محمدﷺ کا فنا ہونے کہاں دے گا

مجھے بیدار طالع قبر میں سونے کہاں دے گا

اگرچہ ہوں ابھی بچپن کی کچی نیند میں لیکن

مرے اندر چھپا بوڑھا مجھے رونے کہاں دے گا

وہ جس کو خوف ہے دوزخ کہیں خالی نہ رہ جائے

وہی اشکِ ندامت سے گنہ دھونے کہاں دے گا

جسے اپنی دھڑکتی زندگی سے خوف آتا ہے

وہی ،دل سینۂ مہتاب میں بونے کہاں دے گا

جمالِ اسم اعظم کے بہشت آباد میں منصور

وصالِ یار کا دوزخ مجھے کھونے کہاں دے گا

منصور آفاق

تجھے میں آنکھ کے دربند کر کے دیکھوں گا

دسمبر 1, 2007منصور آفاق،شعراء،غزلہنر،مر،نکھر،نظر،ور،کر،گھر،گزر،ٹھہر،ابھر،اتر،ادھر،بکھر،بھر،دھر،سفر،سنور،سحر،شجرadmin

منصور آفاق ۔ غزل نمبر 74

کرشمے تیری گرفتِ نظر کے دیکھوں گا

تجھے میں آنکھ کے دربند کر کے دیکھوں گا

پتہ کروں گا نہ ہونے میں کیسا ہونا ہے

مقامِ صفر پہ کچھ دن ٹھہر کے دیکھوں گا

نکل کے کمرے سے جاؤں گا صحن میں اپنے

مناظر اپنے شکستہ سے گھر کے دیکھوں گا

رکھا درخت کے بالکل ہے سامنے سورج

ابھی میں پھیلتے سائے اُدھر کے دیکھوں گا

جہاں جہاں ترے پہلو میں کھل اٹھا تھا بدن

میں بار بار وہیں سے گزر کے دیکھوں گا

سہار د ستِ دعانے تو لی ہے چھت لیکن

مگر فلک کی طرف روز ڈر کے دیکھوں گا

ہے ہمکلام بھی مائل بھی اور اکیلا بھی

سوہاتھ زانوئے جاناں پہ دھر کے دیکھوں گا

سناہے اسکے لبوں سے جھڑے مسیحائی

سومیں بھی یار کی چوکھٹ پہ مر کے دیکھوں گا

اے چشمِ یار کی تیرہ سواد کاجلی شب

تجھے میں آنکھ میں مہتاب بھر کے دیکھوں گا

بنا ہوا ہوں ازل سے زمین کا قیدی

میں سارے دائرے دا مِ سفر کے دیکھوں گا

ذرا سی اور ٹھہر جائے رات پہلو میں

سبھی چراغ بجھا کر سحر کے دیکھوں گا

ہوا وصال میں مہکے توچاندنی !تجھ سے

میں کھول کھول کے سائے شجر کے دیکھوں گا

مجھے یقیں ہے کہ تیرا سروپ ہے اسمیں

اب آئینہ بھی ہمیشہ سنور کے دیکھوں گا

تم اپنے خول سے باہر نکل کے آ ؤ تو

فرازِ عرش سے میں بھی اتر کے دیکھوں گا

مرے لبوں کو بھی تتلی کی نرمیاں چھو لیں

گلاب کی طرح میں بھی نکھر کے دیکھوں گا

خود اپنی آنکھ سے اپنی سویر کی کرنیں

کسی کے بامِ افق پر ابھر کے دیکھوں گا

یہ اور بات کہ موسم بدل نہیں سکتا

میں برگ برگ ہوا میں بکھر کے دیکھوں گا

ابھی لکھوں گا قصیدہ کسی کے چہرے کا

تماشا اپنے ہی حسنِ نظر کے دیکھوں گا

وہ گنگنائے گی اک دن مری غزل منصور

عجب وصال میں اپنے ہنر کے دیکھوں گا

منصور آفاق

سفر رستہ رہے گا بس، کبھی منزل نہیں ہو گا

دسمبر 1, 2007منصور آفاق،شعراء،غزلمنزل،محفل،محمل،مشکل،دل،ساحل،شاملadmin

منصور آفاق ۔ غزل نمبر 73

تمہیں یہ پاؤں سہلانے سے کچھ حاصل نہیں ہو گا

سفر رستہ رہے گا بس، کبھی منزل نہیں ہو گا

مجھے لگتا ہے میری آخری حد آنے والی ہے

جہاں آنکھیں نہیں ہوں گی دھڑکتا دل نہیں ہو گا

محبت کے سفر میں تیرے وحشی کو عجب ضد ہے

وہاں کشتی سے اترے گا جہاں ساحل نہیں ہو گا

مری جاں ویری سوری اب کبھی چشمِ تمنا سے

یہ اظہارِ محبت بھی سرِ محفل نہیں ہو گا

سکوتِ دشت میں کچھ اجنبی سے نقشِ پا ہوں گے

کوئی ناقہ نہیں ہو گا کہیں محمل نہیں ہو گا

ذرا تکلیف تو ہو گی مگر اے جانِ تنہائی

تجھے دل سے بھلا دینا بہت مشکل نہیں ہو گا

یہی لگتا ہے بس وہ شورشِ دل کا سبب منصور

کبھی ہنگامہء تخلیق میں شامل نہیں ہو گا

منصور آفاق

ملک اردو میں پڑ گیا ہو گا

دسمبر 1, 2007منصور آفاق،شعراء،غزلپہلو،پکھیرو،آنسو،اردو،بازو،تالو،ترازو،جگنو،خوشبو،دارو!admin

منصور آفاق ۔ غزل نمبر 72

سین ستو میں پڑ گیا ہو گا

ملک اردو میں پڑ گیا ہو گا

گر پڑا ہے افق کے شعلوں میں

دل پکھیرو میں پڑ گیا ہو گا

بے خیالی میں چھو گئے تھے لب

نیل بازو میں پڑ گیا ہو گا

اس طرف جھک گئی ہے سب دنیا

کچھ ترازو میں پڑ گیا ہو گا

ایک گجرے کے ٹوٹ جانے سے

داغ خوشبو میں پڑ گیا ہو گا

ایسا لگتا ہے عمر کا دریا

ایک آنسو میں پڑ گیا ہو گا

کتنی مشکل سے روکی ہے گالی

چھالا تالو میں پڑ گیا ہو گا

ہجر کی رات شور تھا کوئی

درد پہلو میں پڑ گیا ہو گا

شام سے جا گرا تھا کچھ باہر

نور جگنو میں پڑ گیا ہو گا

ہاتھ چھلکا نہیں یونہی منصور

چاند دارو میں پڑ گیا ہو گا

منصور آفاق

بے تحاشا فائروں کی سنسناہٹ سے ہوا

دسمبر 1, 2007منصور آفاق،شعراء،غزلہچکچاہٹ،مسکراہٹ،کپکپاہٹ،سنسناہٹ،سرسراہٹadmin

منصور آفاق ۔ غزل نمبر 71

خوف پیدا جشن ہائے چودہراہٹ سے ہوا

بے تحاشا فائروں کی سنسناہٹ سے ہوا

شمع کا شعلہ ہوا کی تھرتھراہٹ سے ہوا

اک غضب کی چیز اپنی مسکراہٹ سے ہوا

موسمِ گل کے دھڑکتے موسموں کا سلسلہ

اک دوپٹے کی ذراسی سرسراہٹ سے ہوا

راستے میں رک گئی ہے کیوں یہ چلتی روشنی

میں پریشاں کچھ زیادہ ہچکچاہٹ سے ہوا

اس قدر منصور موسم یخ ہوا ہے روح کا

سرد آتش دان میری کپکپاہٹ سے ہوا

منصور آفاق

قریہ ء جاں میں اچانک ایک آہٹ سے ہوا

دسمبر 1, 2007منصور آفاق،شعراء،غزلہٹ،مرگھٹ،پنگھٹ،پرمٹ،آہٹ،جھرمٹadmin

منصور آفاق ۔ غزل نمبر 70

راکھ دل کا یہ پلازہ شاٹ سرکٹ سے ہوا

قریہ ء جاں میں اچانک ایک آہٹ سے ہوا

ختم ہونا چاہئے جا کر کہیں دریا کے پاس

اس تعلق کا اگر آغاز پنگھٹ سے ہوا

تم جسے کہتے ہو تاروں سے چمکتی داستاں

یہ شروع افسانہ تو سورج کے مرگھٹ سے ہوا

مجھ کو بھی ویزا دکھا کر اپنے گھر جانا پڑا

داخلہ سامان کا بھی ایک پرمٹ سے ہوا

گا رہے تھے ایک وحشت ناک لے میں ماہیے

میں فسردہ اور بھی بچوں کے جھرمٹ سے ہوا

خوبصورت ہٹ ہوا منصور اُس گلپوش سے

اور سمندر خوبرو، پھولوں بھرے ہٹ سے ہوا

منصور آفاق

شاید مرا جمال مکمل نہیں ہوا

دسمبر 1, 2007منصور آفاق،شعراء،غزلمقفل،مکمل،معطل،پاگل،اوجھل،بادل،تھل،حلadmin

منصور آفاق ۔ غزل نمبر 69

اب تک انا سے ربطِ مسلسل نہیں ہوا

شاید مرا جمال مکمل نہیں ہوا

وحشت وہی مزاج کی رونے کے بعد بھی

بارش ہوئی ہے شہر میں جل تھل نہیں ہوا

پھر ہو گی تجھ تلک مری اپروچ بزم میں

مایوس جانِ من ترا پاگل نہیں ہوا

ممکن نہیں ہے جس کا ذرا سا مشاہدہ

میری نظر سے وہ کبھی اوجھل نہیں ہوا

ہر چیز آشنائے تغیر ہوئی مگر

قانونِ ہست و بود معطل نہیں ہوا

دستِ اجل نے کی ہے تگ و دو بڑی مگر

دروازۂ حیات مقفل نہیں ہوا

برسوں سے ڈھونڈتا ہوں کوئی اور شخص میں

اِس ہجر کا معمہ کبھی حل نہیں ہوا

منصور اپنی ذات شکستہ کیے بغیر

پانی کا بلبلا کبھی بادل نہیں ہوا

منصور آفاق

طلب شکستہ کا آخر ملال ختم ہوا

دسمبر 1, 2007منصور آفاق،شعراء،غزلملال،وصال،کمال،جمال،زوال،سوال،سالadmin

منصور آفاق ۔ غزل نمبر 68

فراق و رابطہ کا احتمال ختم ہوا

طلب شکستہ کا آخر ملال ختم ہوا

وہ بجھ گئی ہے تمناجو آگ رکھتی تھی

وہ ہجر راکھ ہوا، وہ وصال ختم ہوا

کوئی بھی اپنے مقاصد میں پیش رفت نہیں

یونہی حیات کا اک اور سال ختم ہوا

ہم اس کی سمت چلے وہ کسی کی سمت چلا

سوال کرنے سے پہلے سوال ختم ہوا

چلی تو جھونک گئی دھول ساری آنکھوں میں

رکی ہوا تو چمن کا جمال ختم ہوا

بجھی ہوئی ہے انگیٹھی سیہ دسمبر میں

اے چوبِ سوختہ تیرا کمال ختم ہوا

کسی کے واسطے افلاک پستیاں منصور

بلندیوں پہ کسی کا زوال ختم ہوا

منصور آفاق

یعنی ہجراں کا بدن مثلِ سحر نازل ہوا

دسمبر 1, 2007منصور آفاق،شعراء،غزلہنر،نظر،پر،بھر،دربدر،سفر،سحرadmin

منصور آفاق ۔ غزل نمبر 67

اک مسلسل رتجگا سورج کے گھر نازل ہوا

یعنی ہجراں کا بدن مثلِ سحر نازل ہوا

زندگی میری رہی مثبت رویوں کی امیں

میری آنکھوں پر مرا حسن نظر نازل ہوا

اس پہ اترا بات کو خوشبو بنا دینے کا فن

مجھ پہ اس کو نظم کرنے کا ہنر نازل ہوا

کوئی رانجھے کی خبر دیتی نہیں تھی لالٹین

خالی بیلا رات بھر بس ہیر پر نازل ہوا

اس محبت میں تعلق کی طوالت کا نہ پوچھ

اک گلی میں سینکڑوں دن کا سفر نازل ہوا

وقت کی اسٹیج پر بے شکل ہو جانے کا خوف

مختلف شکلیں بدل کر عمر بھر نازل ہوا

جاتی کیوں ہے ہر گلی منصور قبرستان تک

یہ خیالِ زخم خوردہ دربدر نازل ہوا

منصور آفاق

پھول اترا شاخ پراور مجھ پہ غم نازل ہوا

دسمبر 1, 2007منصور آفاق،شعراء،غزلقلم،قدم،محترم،کم،دم،غمadmin

منصور آفاق ۔ غزل نمبر 66

موسموں کا رزق دونوں پر بہم نازل ہوا

پھول اترا شاخ پراور مجھ پہ غم نازل ہوا

اپنے اپنے وقت پر دونوں ثمر آور ہوئے

پیڑ کو ٹہنی ملی مجھ پر قلم نازل ہوا

اوس کی مانند اُترا رات بھر مژگاں پہ میں

پھر کرن کا دکھ پہن کر صبح دم نازل ہوا

میں نے مٹی سے نکالے چند آوارہ خیال

آسمانوں سے کلامِ محترم نازل ہوا

لاکھ اترے یار کے غم، لاکھ لوگوں کے مگر

اپنے غم سے خوبصورت کوئی کم نازل ہوا

میری صورت پر ہوئی تخلیق آدم کی شبیہ

پھر اسی مٹی کے بت پر میرا دم نازل ہوا

یوں ہوا منصور کمرہ بھر گیا کرنوں کے ساتھ

مجھ پہ سورج رات کو الٹے قدم نازل ہوا

منصور آفاق

وہ علم و آگہی کا جو منظر تھا کیا ہوا

دسمبر 1, 2007منصور آفاق،شعراء،غزللشکر،منظر،مظہر،چیتر،کافر،کر،پر،اوپر،ازبر،تیتر،سمندرadmin

منصور آفاق ۔ غزل نمبر 65

سید نصیر شاہ کا جو گھر تھا کیا ہوا

وہ علم و آگہی کا جو منظر تھا کیا ہوا

کہتا تھا جو خدا سے کہ اک جیساکر ہمیں

مشہور شہر میں وہ جو کافر تھا کیا ہوا

وہ جس بلند طرے سے ڈرتے تھے کجکلاہ

وہ جو غریب چلتا اکٹر کر تھا کیا ہوا

ہوتے مشاعرے تھے جو اکثر وہ کیا ہوئے

وہ شاعروں کا ایک جو لشکر تھا کیا ہوا

وہ شام کیا ہوئی جو سٹیشن کے پاس تھی

وہ شخص جو مجھے کبھی ازبر تھا کیا ہوا

وہ ہار مونیم جو بجاتا تھا ساری رات

وہ ایک گانے والا یہاں پر تھا کیا ہوا

برگد ہزاروں سال سے سایہ فگن جہاں

وہ چشمہ جو پہاڑ کے اوپر تھا کیا ہوا

جلتے جہاں تھے دیپ وہ میلے کہاں گئے

آتا یہاں جو پھولوں کا چیتر تھا کیا ہوا

مکھن جو کھایا کرتے تھے وہ مرغ کیا ہوئے

ہر صبح وہ جو بولتا تیتر تھا کیا ہوا

عاجز کے وہ لہکتے ہوئے گیت کیا ہوئے

تنویر کچھ بتا وہ جو مظہر تھا کیا ہوا

چشمہ بیراج کیا ہوا منصور کچھ کہو

جو دیکھنے میں ایک سمندر تھا کیا ہوا

منصور آفاق

اس پرلکھا تھا نام بھی چرچل کا کیا ہوا

دسمبر 1, 2007منصور آفاق،شعراء،غزلچرچل،پیپل،بادل،تھل،جنگل،شیتلadmin

منصور آفاق ۔ غزل نمبر 64

کوئی یہاں پہ بورڈ تھا پیتل کا کیا ہوا

اس پرلکھا تھا نام بھی چرچل کا کیا ہوا

اس جگہ پہ تھا پارک جہاں پر مکان ہیں

اس موڑ پہ درخت تھا پیپل کا کیا ہوا

ہوتی تھی اس گلی میں کتابوں کی اک دکان

اسکول تھا یہاں پہ جو شیتل کا کیا ہوا

شیشم کے اس مقام پہ لاکھوں درخت تھے

جنگل یہاں پہ ہوتاتھا، جنگل کا کیا ہوا

قوسِ قزح کہاں گئی وہ آسمان سے

وہ دوپہر کے سرمئی بادل کا کیا ہوا

منصورہر گلی میں اڑے موسموں کی گرد

بارش کہاں چلی گئی جل تھل کا کیا ہوا

منصور آفاق

اک پہلوان رِنگ سے باہر پڑا ہوا

دسمبر 1, 2007منصور آفاق،شعراء،غزلمنظر،کر،پر،اندر،باہر،برابر،سمندرadmin

منصور آفاق ۔ غزل نمبر 63

وہ ہے شکست مان کے پتھر پڑا ہوا

اک پہلوان رِنگ سے باہر پڑا ہوا

آگاہ بھلا ہو کیسے کہ کیا ہے فلک کے پار

وہ جو ہے کائنات کے اندرپڑا ہوا

ڈالی تھی ایک میں نے اچٹتی ہوئی نظر

میرے قریب تھا کوئی منظر پڑا ہوا

آرام کر رہا تھا ابھی تو یہ ریت پر

دریا کہاں گیا ہے برابر پڑا ہوا

یہ بادِ تند و تیز کی آغوشِ گرم میں

خراٹے لے رہا ہے سمندر پڑا ہوا

وہ بھی گلی میں پھرتی ہے بے چین دیر سے

میں بھی ہوں گھر میں بلب جلا کر پڑا ہوا

منصور آسمان سے لے کر پہاڑ تک

کیا کیا اٹھانا پڑتا ہے سر پر پڑا ہوا

منصور آفاق

ہے موت کا نشان گھروں پر بنا ہوا

دسمبر 1, 2007منصور آفاق،شعراء،غزلوروں،گھروں،گروں،پروں،بروں،سروںadmin

منصور آفاق ۔ غزل نمبر 62

دیواروں پر تمام دروں پر بنا ہوا

ہے موت کا نشان گھروں پر بنا ہوا

بس زندگی ہے آخری لمحوں کے آس پاس

محشر کوئی ہے چارہ گروں پر بنا ہوا

آتا ہے ذہن میں یہی دستار دیکھ کر

اک سانپ کاہے نقش سروں پر بنا ہوا

ناقابلِ بیاں ہوئے کیوں اس کے خدو خال

یہ مسئلہ ہے دیدہ وروں پر بنا ہوا

کیا جانے کیا لکھا ہے کسی نے زمین کو

اک خط ہے بوجھ نامہ بروں پر بنا ہوا

اک نقش رہ گیا ہے مری انگلیوں کے بیچ

منصور تتلیوں کے پروں پر بنا ہوا

منصور آفاق

ہوتا تھا آسماں کا کوئی در بنا ہوا

دسمبر 1, 2007منصور آفاق،شعراء،غزلمقدر،منظر،محشر،کبوتر،پر،بستر،دلبر،در،سمندر،سرadmin

منصور آفاق ۔ غزل نمبر 61

اِس جا نمازِ خاک کے اوپر بنا ہوا

ہوتا تھا آسماں کا کوئی در بنا ہوا

دیوار بڑھ رہی ہے مسلسل مری طرف

اور ہے وبالِ دوش مرا سر بنا ہوا

آگے نہ جا کہ دل کا بھروسہ نہیں کوئی

اس وقت بھی ہے غم کا سمندر بنا ہوا

اک زخم نوچتا ہوا بگلا کنارِ آب

تمثیل میں تھا میرا مقدر بنا ہوا

ممکن ہے کوئی جنتِ فرضی کہیں پہ ہو

دیکھا نہیں ہے شہر ہوا پر بنا ہوا

گربہ صفت گلی میں کسی گھونسلے کے بیچ

میں رہ رہا ہوں کوئی کبوتر بنا ہوا

ہر لمحہ ہو رہا ہے کوئی اجنبی نزول

لگتا ہے آسماں کا ہوں دلبر بنا ہوا

پردوں پہ جھولتے ہوئے سُر ہیں گٹار کے

کمرے میں ہے میڈونا کا بستر بنا ہوا

یادوں کے سبز لان میں پھولوں کے اس طرف

اب بھی ہے آبشار کا منظر بنا ہوا

ٹینس کا کھیل اور وہ بھیگی ہوئی شعاع

تھا انگ انگ کورٹ کا محشر بنا ہوا

منصور آفاق

ہو گا کسی کے ہاتھ سے آخر بنا ہوا

دسمبر 1, 2007منصور آفاق،شعراء،غزلمسافر،ناصر،کافر،آخر،بظاہر،شاعر،طائرadmin

منصور آفاق ۔ غزل نمبر 60

آئے نظر جو روحِ مناظر بنا ہوا

ہو گا کسی کے ہاتھ سے آخر بنا ہوا

یہ کون جا رہا ہے مدینے سے دشت کو

ہے شہر سارا حامی و ناصر بنا ہوا

پر تولنے لگا ہے مرے کینوس پہ کیوں

امکان کے درخت پہ طائر بنا ہوا

یہ اور بات کھلتا نہیں ہے کسی طرف

ہے ذہن میں دریچہ بظاہر بنا ہوا

آغوشِ خاک میں جسے صدیاں گزر گئیں

پھرتا ہے وہ جہاں میں مسافر بنا ہوا

فتویٰ دو میرے قتل کا فوراً جنابِ شیخ

میں ہوں کسی کے عشق میں کافر بنا ہوا

کیا قریہء کلام میں قحط الرجال ہے

منصور بھی ہے دوستو شاعر بنا ہوا

منصور آفاق

یہ کون ہیں کہ رکا ہے طواف ہوتا ہوا

دسمبر 1, 2007منصور آفاق،شعراء،غزلانکشاف،اختلاف،اعتراف،طواف،غلافadmin

منصور آفاق ۔ غزل نمبر 59

ہجوم عاشقاں میں اک شگاف ہوتا ہوا

یہ کون ہیں کہ رکا ہے طواف ہوتا ہوا

خیال آ گیا لاکھوں کروڑوں تاروں کا

پلٹ پڑا میں کہیں انکشاف ہوتا ہوا

لے آیا ہے مجھے خوشبو بھری عمارت میں

کسی گلی سے مرا اختلاف ہوتا ہوا

طوافِ وجدِمسلسل سے عرش تک پہنچا

میں خانہ کعبہ کا روشن غلاف ہوتا ہوا

بس عین وقت پہ دستک ہوئی وہاں منصور

زباں پہ رہ گیا، پھر اعتراف ہوتا ہوا

منصور آفاق

گماں یقین کی ساعت سے سرفراز ہوا

دسمبر 1, 2007منصور آفاق،شعراء،غزلنواز،نیاز،ناز،بیاض،جواز،دراز،سرفرازadmin

منصور آفاق ۔ غزل نمبر 58

شعورِ عشقِ محمدﷺ مری نماز ہوا

گماں یقین کی ساعت سے سرفراز ہوا

تُو کائنات کا خالق ہے مانتا ہوں مگر

مرا وجود تری ذات کا جواز ہوا

ترے لبوں کی کرم بار مسکراہٹ سے

نیاز مند خدائی سے بے نیاز ہوا

میں رک گیا تھا جدائی کے جس جہنم میں

وہ انتظارِ قیامت سے بھی دراز ہوا

مرے سجود کی منزل ہے میری تنہائی

میں اپنی ذات کا خود ہی حریمِ ناز ہوا

پلک پلک پہ سجاتا ہے آنسوئوں کے چراغ

مزاجِ چشم سراپا مری بیاض ہوا

پڑی نگاہِ محمد جہاں کہیں منصور

ہر ایک ذرہ وہیں زندگی نواز ہوا

منصور آفاق

یہ مرا دیس مصیبت زدہ کاشانہ ہوا

دسمبر 1, 2007منصور آفاق،شعراء،غزلنہ،کاشانہ،شانہadmin

منصور آفاق ۔ غزل نمبر 57

جسم دو لخت ہواجب سے جدا شانہ ہوا

یہ مرا دیس مصیبت زدہ کاشانہ ہوا

وقت پھر ایسابھی آیا کہ اسے ملتے ہوئے

کوئی آنسو نہ گرا کوئی تماشا نہ ہوا

میں نے بھی وزن کیا لوگ جہاں تلتے تھے

ڈیڑھ سرسائی ہوا ،پورا میں ماشا نہ ہوا

یہ تری جنگ ہوئی امن و اماں کی تحریک

میرے آغشتہ ء خوں عہد کا لاشہ نہ ہوا

میری بستی میں رہی جسم کی اردو رائج

بولنے والا کوئی روح کی بھاشا نہ ہوا

تھانہ ء حسن میں تفتیش ابھی جاری ہے

ابر آلود کہانی میں مرا شانہ ہوا

یہ صحیفہ ہوا، منصور کوئی میرے خلاف

کسی بدنام رسالے کا تراشا نہ ہوا

منصور آفاق

وہی فانوس مری صبح کی قندیل ہوا

دسمبر 1, 2007منصور آفاق،شعراء،غزلقندیل،انجیل،تکمیل،تبدیل،تحلیل،جبریلadmin

منصور آفاق ۔ غزل نمبر 56

تیرے ماتھے کی جو محراب سے تشکیل ہوا

وہی فانوس مری صبح کی قندیل ہوا

نامکمل تھی ابھی مرے خدا کی تخلیق

وہ ترا نام تھا جو باعث تکمیل ہوا

میرے دامن میں بکھرنے لگے لاکھوں سورج

کوئی آنسو جو تری یاد میں تحلیل ہوا

تیرے انداز تمدن بھری تاریخ ہوئے

تیرا چلنامری تہذیب میں تبدیل ہوا

تیری رحمت کی بشارت سے بھرا رہتا تھا

ایک عیسیٰ جو کبھی صاحبِ انجیل ہوا

اس کے قدموں کی کرم باری کے صدقے منصور

میرا ہر لفظ مرے دور کا جبریل ہوا

منصور آفاق

سفید رنگ کا دستور کج کلاہ ہوا

دسمبر 1, 2007منصور آفاق،شعراء،غزلکلاہ،گناہ،گاہ،بادشاہ،تباہ،سیاہadmin

منصور آفاق ۔ غزل نمبر 55

سیاہ رنگ کا امن و سکوں تباہ ہوا

سفید رنگ کا دستور کج کلاہ ہوا

زمیں سے کیڑے مکوڑے نکلتے آتے ہیں

ہمارے ملک میں یہ کون بادشاہ ہوا

کئی دنوں سے زمیں دھل رہی ہے بارش سے

امیر شہر سے کیسا یہ پھر گناہ ہوا

شرارِ خاک نکلتا گرفت سے کیسے

دیارِ خاک ازل سے جنازہ گاہ ہوا

وہ شہر تھا کسی قربان گاہ پر آباد

سو داستان میں بغداد پھر تباہ ہوا

جلے جو خیمے تو اتنا دھواں اٹھا منصور

ہمیشہ کے لیے رنگِ علَم سیاہ ہوا

منصور آفاق

برقِ تجلیٰ اوڑھ لی سورج نشیں ہوا

دسمبر 1, 2007منصور آفاق،شعراء،غزلقریں،مکیں،نہیں،نشیں،وہیں،کہیں،جاگزیں،حسیںadmin

منصور آفاق ۔ غزل نمبر 54

جب قریہء فراق مری سرزمیں ہوا

برقِ تجلیٰ اوڑھ لی سورج نشیں ہوا

جا کر تمام زندگی خدمت میں پیش کی

اک شخص ایک رات میں اتنا حسیں ہوا

میں نے کسی کے جسم سے گاڑی گزار دی

یہ حادثہ بھی روح کے اندر کہیں ہوا

ڈر ہے کہ بہہ نہ جائیں در و بام آنکھ کے

اک اشک کے مکاں میں سمندر مکیں ہوا

ہمت ہے میرے خانہء دل کی کہ بار بار

لٹنے کے باوجود بھی خالی نہیں ہوا

منظر جدا نہیں ہوا اپنے مقام سے

ہونا جہاں تھا واقعہ بالکل وہیں ہوا

کھڑکی سے آرہا تھا ابھی تو نظر مجھے

یہ خانماں خراب کہاں جاگزیں ہوا

چھونے لگی ہے روح کا پاتال کوئی سانس

منصور کون یاد کے اتنے قریں ہوا

منصور آفاق

دست بستہ تجھے کہہ رہے ہیں وہ سارا ہمارا ہوا

دسمبر 1, 2007منصور آفاق،شعراء،غزلہمارا،ہارا،مارا،کنارا،پکارا،اتاراadmin

منصور آفاق ۔ غزل نمبر 53

جتنے موتی گرے آنکھ سے جتنا تیرا خسارا ہوا

دست بستہ تجھے کہہ رہے ہیں وہ سارا ہمارا ہوا

آگرا زندہ شمشان میں لکڑیوں کا دھواں دیکھ کر

اک مسافر پرندہ کئی سرد راتوں کا مارا ہوا

ہم نے دیکھا اسے بہتے سپنے کے عرشے پہ کچھ دیر تک

پھر اچانک چہکتے سمندر کا خالی کنارا ہوا

جا رہا ہے یونہی بس یونہی منزلیں پشت پر باندھ کر

اک سفر زاد اپنے ہی نقشِ قدم پر اتارا ہوا

زندگی اک جُوا خانہ ہے جس کی فٹ پاتھ پر اپنا دل

اک پرانا جواری مسلسل کئی دن کا ہارا ہوا

تم جسے چاند کا دیس کہتے ہو منصور آفاق وہ

ایک لمحہ ہے کتنے مصیبت زدوں کا پکارا ہوا

منصور آفاق

میں سنگ صفت تو نہیں رویا اسے کہنا

دسمبر 1, 2007منصور آفاق،شعراء،غزلمدینہ،اپنا،ادھورا،تنہا،رویا،رستہ،ستارہadmin

منصور آفاق ۔ غزل نمبر 52

ٹوٹا ہوا سینے میں کوئی تھا اسے کہنا

میں سنگ صفت تو نہیں رویا اسے کہنا

اک آگ لگا دیتے ہیں برسات کے دل میں

ہم لوگ سلگتے نہیں تنہا اسے کہنا

دروازے پہ پہرے سہی گھر والوں کے لیکن

کھڑکی بھی بنا سکتی ہے رستہ اسے کہنا

اے بجھتی ہوئی شام ! محبت کے سفر میں

اک لوٹ کے آیا تھا ستارہ اسے کہنا

نازل ہوں مکمل لب و عارض کے صحیفے

ہر شخص کا چہرہ ہے ادھورا اسے کہنا

شہ رگ سے زیادہ ہے قریں میرا محمدﷺ

لولاک سے آگے ہے مدینہ اسے کہنا

منصور مزاجوں میں بڑا فرق ہے لیکن

اچھا مجھے لگتا ہے بس اپنا اسے کہنا

منصور آفاق

جان اسکی ترے طوطے میں ہے، یاد سے کہنا

دسمبر 1, 2007منصور آفاق،شعراء،غزلفرہاد،ناشاد،یاد،امداد،باد،برباد،خداداد،شمشادadmin

منصور آفاق ۔ غزل نمبر 51

میں دیو کا قیدی ہوں پری زاد سے کہنا

جان اسکی ترے طوطے میں ہے، یاد سے کہنا

ممکن ہے ابابیلوں کے مالک سے ملاقات

اُس ہاتھیوں کے لشکرِ برباد سے کہنا

آنا ذرا خسروسے مگرآنکھ بچا کر

شیریں نے کیا یاد ہے فرہاد سے کہنا

کوہ قاف سے آیا ہے بلاوہ کسی رُت کا

تیار رہے اشہبِ شمشاد سے کہنا

میں بادِ زمانہ کا ازل سے ہوں مخالف

اے بادِ جہاں گیر ،شہِ باد سے کہنا

معلوم ہیں اسرار ہمیں تیرے کرم کے

طیاروں پہ آتی ہوئی امداد سے کہنا

حاکم تری گلیوں میں ہیں ابلیس کے بیٹے

یہ بات مرے ملکِ خداداد سے کہنا

منصور نہیں بھولا میانوالی کی گلیاں

اے باد صبا اُس دلِ ناشاد سے کہنا

منصور آفاق

یہی زندگی ہے اپنی، یونہی آنسوئوں میں رہنا

دسمبر 1, 2007منصور آفاق،شعراء،غزلمثلثوں،کھڑکیوں،پانیوں،آنسوئوں،بجلیوں،جنگلوں،سمندروںadmin

منصور آفاق ۔ غزل نمبر 50

کبھی بارشوں سے بہنا، کبھی بادلوں میں رہنا

یہی زندگی ہے اپنی، یونہی آنسوئوں میں رہنا

کبھی یونہی بیٹھے رہنا تری یاد کے کنارے

کبھی رات رات بہتے ہوئے پانیوں میں رہنا

کبھی سات رنگ بننا کسی ابرِ خوشنما کے

کبھی شاخ شاخ گرتی ہوئی بجلیوں میں رہنا

مجھے یاد آ رہا ہے ترے ساتھ ساتھ شب بھر

یونہی اپنے اپنے گھر کی کھلی کھڑکیوں میں رہنا

مجھے لگ رہا ہے جیسے کہ تمام عمر میں نے

ہے اداس موسموں کے گھنے جنگلوں میں رہنا

یہ کرم ہے دلبروں کا، یہ عطا ہے دوستوں کی

مرا زاویوں سے ملنا یہ مثلثوں میں رہنا

ابھی اور کچھ ہے گھلنا مجھے ہجر کے نمک میں

ابھی اور آنسوئوں کے ہے سمندروں میں رہنا

منصور آفاق

قیامت ہے مسلسل زندہ رہنا

دسمبر 1, 2007منصور آفاق،شعراء،غزلکارندہ،پائندہ،آئندہ،باشندہ،تابندہ،زندہadmin

منصور آفاق ۔ غزل نمبر 49

خود اپنے آپ سے شرمندہ رہنا

قیامت ہے مسلسل زندہ رہنا

یہاں روبوٹ کم ہیں آسماں سے

یہ دنیا ہے یہاں آئندہ رہنا

مجھے دکھ کی قیامت خیز رت میں

محبت نے کہا ’’پائندہ رہنا‘‘

سمٹ آئی ہے جب مٹھی میں دنیا

کسی بستی کا کیا باشندہ رہنا

سکھاتا ہے مجھے ہر شام سورج

لہو میں ڈوب کر تابندہ رہنا

یہی منصور حاصل زندگی کا

خود اپنا آپ ہی کارندہ رہنا

منصور آفاق

میں آؤں گا پلٹ کر، میرایقین رکھنا

دسمبر 1, 2007منصور آفاق،شعراء،غزلمیرایقین،مکین،مبین،متین،بہترین،حسین،زمینadmin

منصور آفاق ۔ غزل نمبر 48

سورج نکل پڑا ہے گھوڑے پہ زین رکھنا

میں آؤں گا پلٹ کر، میرایقین رکھنا

شیوہ یہی رہا ہے اپنے حسب نسب میں

اچھی شراب پینا ، ساتھی حسین رکھنا

بے شک روایتوں سے کرنا گریز لیکن

نازک خیال رکھنا،لہجہ متین رکھنا

کس کو بتایا جائے اِس اجنبی نگر میں

خالی مکان میں ہے کوئی مکین رکھنا

میں جارہا ہوں آگے ،دشمن پہاڑیوں پر

میرے لئے وطن میں دوگز زمین رکھنا

فنِ سپہ گری ہے دونوں طرف برابر

تلوار ہاتھ میں تم بس بہترین رکھنا

منصور ڈوب جانا دریا میں فلسفوں کے

لیکن بچا کے اپنا دینِ مبین رکھنا

منصور آفاق

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: