مجید امجد ۔ غزل نمبر 60

جاوداں قدروں کی شمعیں بجھ گئیں تو جل اٹھی تقدیرِ دل

اب تو اس مٹی کے ہر ذی روح ذرّے میں بھی ہے تصویرِ دل

اپنے دل کی راکھ چن کر، کاش ان لمحوں کی بہتی آگ میں

میں بھی اک سیّال شعلے کے ورق پر لکھ سکوں تفسیرِ دل

میں نہ سمجھا، ورنہ ہنگاموں بھری دنیا میں، اک آہٹ کے سنگ

کوئی تو تھا، آج جس کا قہقہہ دل میں ہے دامن گیرِ دل

رُت بدلتے ہی چمن جُو ہم صفیر اب کے بھی کوسوں دور سے

آ کے جب اس شاخ پر چہکے، مرے دِل میں بجی زنجیرِ دل

کیا سفر تھا، بےصدا صدیوں کے پل کے اس طرف، اس موڑ تک

پے بہ پے ابھرا سنہری گرد سے اک نالۂ دلگیرِ دل

وار دنیا نے کیے مجھ پر تو امجد میں نے اس گھمسان میں

کس طرح، جی ہار کر، رکھ دی نیامِ حرف میں شمشیرِ دل

مجید امجد