عرفان صدیقی ۔ غزل نمبر 14

دیکھیے خون میں کیا اٹھتا ہے طغیانی سا

سر پہ چھایا تو ہے کچھ ابر پریشانی سا

ہاتھ میں موجِ ہوا پاؤں تلے ریگِ رواں

سرو ساماں ہے بہت‘ بے سرو سامانی سا

سیکھ لی کس نے مری شکرگزاری کی ادا

ریت پر ایک نشاں اور ہے پیشانی سا

یہ زمیں اِتنی پُراَسرار بنانے والے

کوئی عالم مری آنکھوں کو بھی حیرانی سا

وہ کسی ساعتِ حاصل سا وصال آمادہ

میں کسی لمحۂ نایاب کا زندانی سا

عرفان صدیقی