منصور آفاق ۔ غزل نمبر 246

غم کی طویل رات کا اک انتباہ دھوپ

صحنِ سفید پوش میں کالی سیاہ دھوپ

احمق ہے جانتی ہی نہیں میری برف کو

جم جائے آپ ہی نہ کہیں بادشاہ دھوپ

میں چل رہا ہوں تیری تمنا کے دشت میں

میرے رفیق آبلے، میری گواہ دھوپ

پردے ابھی نہ کھینچ مری کھڑکیوں کے دوست

مجھ سے بڑھا رہی ہے ذرا رسم و راہ دھوپ

برطانیہ کی برف میں کتنی یتیم ہے

صحرائے تھل میں جو تھی بڑی کج کلاہ دھوپ

جھلسا دیا دماغ بھی چہروں کے ساتھ ساتھ

مشرق کے المیے میں نہیں بے گناہ دھوپ

منصور اپنی چھت سے رہو ہمکلام بس

تنہائیوں کی شہر میں ہے بے پناہ دھوپ

منصور آفاق