منصور آفاق ۔ غزل نمبر 278

عدم کو صفحہء ادراک پر بناتا ہوں

الاؤ سا خس و خاشاک پر بناتا ہوں

زمیں سے دور بناتا ہوں خاک کے چہرے

خدا بناؤں تو افلاک پر بناتا ہوں

مری زمین کی بنیاد میں شرارے ہیں

مکان سوختہ املاک پر بناتا ہوں

ستارہ لفظ تراشوں میں چاند تحریریں

اک آسمانِ ادب خاک پر بناتا ہوں

لہو کی بوندیں گراتا ہوں اپنے دامن سے

دلِ تباہ کو پوشاک پر بناتا ہوں

مرا وجود مکمل ابھی نہیں منصور

سو اپنے آپ کو پھر چاک پر بناتا ہوں

منصور آفاق