پوشیدہ ہے کچھ پردۂ اَسرار کے پیچھے

ہے کرب نمایاں تِرے انکار کے پیچھے

سایے کے بھلا کیا قد و قامت سے اُلجھنا

سورج سے تَو نمٹو جو ہے دیوار کے پیچھے

لَوٹ آئے ہیں خاموش نہ دیکھی گئی ہم سے

ارزانیٔ دل رونقِ بازار کے پیچھے

گر سچ ہے تمہیں ترکِ مراسم کا نہیں دکھ

پھر کیا ہے یہ سب چشمِ گُہَربار کے پیچھے

پاگل تو نہیں ہو جو یہ چہروں پہ سکوں ہے

کیوں بیٹھے ہو ہلتی ہوئی دیوار کے پیچھے

در اصل نگاہوں میں کھٹکتا ہے مرا سر

ہیں لوگ بظاہر مری دستار کے پیچھے

دنیا کی نگاہوں میں تو میں ناچ رہا ہوں

وہ ڈور لئے بیٹھا ہے دیوار کے پیچھے

کیوں لگتے ہیں یہ ٹوٹے ہوئے دل کی سی آواز

کیا راز ہے ضامنؔ ترے اشعار کے پیچھے

ضامن جعفری

دیوانِ غالب ۔ غزل نمبر 126

وسعتِ سعیِ کرم دیکھ کہ سر تا سرِ خاک

گزرے ہے آبلہ پا ابرِ گہربار ہنوز

یک قلم کاغذِ آتش زدہ ہے صفحۂ دشت

نقشِ پا میں ہے تپِ گرمئ رفتار ہنوز

مرزا اسد اللہ خان غالب