ٹیگ کے محفوظات: کیا

جان کا روگ ہے بلا ہے عشق

اکتوبر 6, 2015میر تقی میر،اساتذہ،غزلہوا،مبتلا،مدعا،ناروا،کیا،بلا،بھلا،خدا،رہاadmin

دیوان دوم غزل 837

کیا کہوں تم سے میں کہ کیا ہے عشق

جان کا روگ ہے بلا ہے عشق

عشق ہی عشق ہے جہاں دیکھو

سارے عالم میں بھر رہا ہے عشق

عشق ہے طرز و طور عشق کے تیں

کہیں بندہ کہیں خدا ہے عشق

عشق معشوق عشق عاشق ہے

یعنی اپنا ہی مبتلا ہے عشق

گر پرستش خدا کی ثابت کی

کسو صورت میں ہو بھلا ہے عشق

دلکش ایسا کہاں ہے دشمن جاں

مدعی ہے پہ مدعا ہے عشق

ہے ہمارے بھی طور کا عاشق

جس کسی کو کہیں ہوا ہے عشق

کوئی خواہاں نہیں محبت کا

توکہے جنس ناروا ہے عشق

میرجی زرد ہوتے جاتے ہو

کیا کہیں تم نے بھی کیا ہے عشق

میر تقی میر

خوبی رہا کرے ہے مری جان کیا ہمیش

اکتوبر 6, 2015میر تقی میر،اساتذہ،غزللگا،نوا،وفا،کیا،خدا،دوا،رہاadmin

دیوان دوم غزل 828

ہم پر روا جو رکھتے ہو جور و جفا ہمیش

خوبی رہا کرے ہے مری جان کیا ہمیش

کس اعتبار دل کے تئیں گل کہیں ہیں لوگ

مجھ پاس تو مندی ہی کلی سا رہا ہمیش

کچھ عہد میں ہمارے محبت ہوئی ہے ننگ

آپس میں ورنہ رسم تھی مہر و وفا ہمیش

فرصت مرض سے دل کے ہمیں کب ہوئی تنک

تھوڑی بہت چلی ہی گئی ہے دوا ہمیش

اب عید بھی بغیر ملے اس کے ہے دہا

رہتا تھا جو ہمارے گلے ہی لگا ہمیش

ہم تو جو رفتنی ہیں ملے ہی رہیں تو خوب

رہتا نہیں ہے کوئی بغیر از خدا ہمیش

واقف نہیں ہوں میر سے تو پر تمام شب

کرتا ہے شور آن کے اک بے نوا ہمیش

میر تقی میر

غنچہ ہے وہ لگی نہیں اس کو ہوا ہنوز

اکتوبر 6, 2015میر تقی میر،اساتذہ،غزلہوا،لگا،وفا،وا،کیا،گرا،انتہا،آشنا،جفا،دعاadmin

دیوان دوم غزل 818

اس شوخ سے سنا نہیں نام صبا ہنوز

غنچہ ہے وہ لگی نہیں اس کو ہوا ہنوز

عاشق کے اس کو گریۂ خونیں کا درد کیا

آنسو نہیں ہے آنکھ سے جس کی گرا ہنوز

کیا جانے وہ کہ گذرے ہے یاروں کے جی پہ کیا

مطلق کسو سے اس کا نہیں دل لگا ہنوز

برسوں میں نامہ بر سے مرا نام جو سنا

کہنے لگا کہ زندہ ہے وہ ننگ کیا ہنوز

گھگھیاتے رات کے تئیں باچھیں تو پھٹ گئیں

ناواقف قبول ہے لیکن دعا ہنوز

کیا کیا کرے ہے حجتیں قاصد سے لیتے خط

حالانکہ وہ ہوا نہیں حرف آشنا ہنوز

سو بار ایک دم میں گیا ڈوب ڈوب جی

پر بحر غم کی پائی نہ کچھ انتہا ہنوز

خط سے ہے بے وفائی حسن اس کی آئینہ

ہم سادگی سے رکھتے ہیں چشم وفا ہنوز

سو عقدے فرط شوق سے پیش آئے دل کو یاں

واں بند اس قبا کے نہیں ہوتے وا ہنوز

یاں میر ہم تو پہنچ گئے مرگ کے قریب

واں دلبروں کو ہے وہی قصد جفا ہنوز

میر تقی میر

آوے گی بہت ہم بھی فقیروں کی صدا یاد

اکتوبر 6, 2015میر تقی میر،اساتذہ،غزلمزہ،کیا،ادا،جفا،خدا،دوا،رہا،صداadmin

دیوان دوم غزل 798

آواز ہماری سے نہ رک ہم ہیں دعا یاد

آوے گی بہت ہم بھی فقیروں کی صدا یاد

ہر آن وہ انداز ہے جس میں کہ کھپے جی

اس مخترع جور کو کیا کیا ہے ادا یاد

کیا صحبتیں اگلی گئیں خاطر سے ہماری

اپنی بھی وفا یاد ہے اس کی بھی جفا یاد

کیفیتیں عطار کے لونڈے میں بہت تھیں

اس نسخے کی کوئی نہ رہی حیف دوا یاد

کیا جائے کہی بوس لب یار کی لذت

جب تک جئیں گے ہم کو رہے گا وہ مزہ یاد

جی بھول گیا دیکھ کے چہرہ وہ کتابی

ہم عصر کے علامہ تھے پر کچھ نہ رہا یاد

سب غلطی رہی بازی طفلانہ کی یک سو

وہ یاد فراموش تھے ہم کو نہ کیا یاد

کعبے تو گئے بھول کے ہم دیر کا رستہ

آتا تھا ولے راہ میں ہر گام خدا یاد

اک لطف کے شرمندہ نہیں میر ہم اس سے

گو یاں سے گئے ان نے بہت ہم کو کیا یاد

میر تقی میر

سینہ چاکی اپنی میں بیٹھا کیا کرتا تھا رات

اکتوبر 6, 2015میر تقی میر،اساتذہ،غزلکہا،کیا،بہا،بکا،جلا،دعا،سناadmin

دیوان دوم غزل 781

کام کیا تھا جیب و دامن سے مجھے پیش از جنوں

سینہ چاکی اپنی میں بیٹھا کیا کرتا تھا رات

جن دنوں کھینچا تھا سر اس بادشاہ حسن نے

ہر گلی میں اک فقیر اس کو دعا کرتا تھا رات

اب جہاں کچھ بات چھیڑی سوچ لایا پیش ازیں

میں کہا کرتا غم دل وہ سنا کرتا تھا رات

ہجر میں کیا کیا سمیں دیکھے ہیں ان آنکھوں سے میں

زرد رخ پر لالہ گوں آنسو بہا کرتا تھا رات

کیا کہوں پھر کیسے کیسے دن دکھاتا سالہا

وہ سخن نشنو جو ٹک میرا کہا کرتا تھا رات

دیکھنے والے ترے دیکھے میں سب اے رشک شمع

جوں چراغ وقف دل سب کا جلا کرتا تھا رات

بعد میرے اس غزل پر بھی بہت روویں گے لوگ

میں بھی ہر ہر بیت پر اس کی بکا کرتا تھا رات

دیکھ خالی جا کہیں گے برسوں اہل روزگار

میر اکثر دل کا قصہ یاں کہا کرتا تھا رات

میر تقی میر

ہم برے ہی سہی بھلا صاحب

اکتوبر 6, 2015میر تقی میر،اساتذہ،غزلہوا،لکھا،مرا،وا،کہا،کیا،آشنا،بھلا،خدا،رہاadmin

دیوان دوم غزل 775

جو کہو تم سو ہے بجا صاحب

ہم برے ہی سہی بھلا صاحب

سادہ ذہنی میں نکتہ چیں تھے تم

اب تو ہیں حرف آشنا صاحب

نہ دیا رحم ٹک بتوں کے تئیں

کیا کیا ہائے یہ خدا صاحب

بندگی ایک اپنی کیا کم ہے

اور کچھ تم سے کہیے کیا صاحب

مہرافزا ہے منھ تمھارا ہی

کچھ غضب تو نہیں ہوا صاحب

خط کے پھٹنے کا تم سے کیا شکوہ

اپنے طالع کا یہ لکھا صاحب

پھر گئیں آنکھیں تم نہ آن پھرے

دیکھا تم کو بھی واہ وا صاحب

شوق رخ یاد لب غم دیدار

جی میں کیا کیا مرے رہا صاحب

بھول جانا نہیں غلام کا خوب

یاد خاطر رہے مرا صاحب

کن نے سن شعر میر یہ نہ کہا

کہیو پھر ہائے کیا کہا صاحب

میر تقی میر

کہ مجھ کو اس کی گلی کا خدا گدا کرتا

اکتوبر 6, 2015میر تقی میر،اساتذہ،غزللگا،چڑھا،وفا،کہا،کیا،گدا،پھرا،اٹھا،بھلا،برا،جلا،جا،دوا،رہا،صداadmin

دیوان دوم غزل 736

کوئی فقیر یہ اے کاشکے دعا کرتا

کہ مجھ کو اس کی گلی کا خدا گدا کرتا

کبھو جو آن کے ہم سے بھی تو ملا کرتا

تو تیرے جی میں مخالف نہ اتنی جا کرتا

چمن میں پھول گل اب کے ہزار رنگ کھلے

دماغ کاش کہ اپنا بھی ٹک وفا کرتا

فقیر بستی میں تھا تو ترا زیاں کیا تھا

کبھو جو آن نکلتا کوئی صدا کرتا

علاج عشق نے ایسا کیا نہ تھا اس کا

جو کوئی اور بھی مجنوں کی کچھ دوا کرتا

قدم کے چھونے سے استادگی مجھی سے ہوئی

کبھو وہ یوں تو مرے ہاتھ بھی لگا کرتا

بدی نتیجہ ہے نیکی کا اس زمانے میں

بھلا کسو سے جو کرتا تو تو برا کرتا

تلاطم آنکھ کے صد رنگ رہتے تھے تجھ بن

کبھو کبھو جو یہ دریاے خوں چڑھا کرتا

کہاں سے نکلی یہ آتش نہ مانتا تھا میں

شروع ربط میں اس کے جو دل جلا کرتا

گلی سے یار کی ہم لے گئے سر پر شور

وگرنہ شام سے ہنگامہ ہی رہا کرتا

خراب مجھ کو کیا دل کی لاگ نے ورنہ

فقیر تکیے سے کاہے کو یوں اٹھا کرتا

گئے پہ تیرے نہ تھا ہم نفس کوئی اے گل

کبھو نسیم سے میں درد دل کہا کرتا

کہیں کی خاک کوئی منھ پہ کب تلک ملتا

خراب و خوار کہاں تک بھلا پھرا کرتا

موئی ہی رہتی تھی عزت مری محبت میں

ہلاک آپ کو کرتا نہ میں تو کیا کرتا

ترے مزاج میں تاب تعب تھی میر کہاں

کسو سے عشق نہ کرتا تو تو بھلا کرتا

میر تقی میر

تجھ پر کوئی اے کام جاں دیکھا نہ یوں مرتا ہوا

اکتوبر 6, 2015میر تقی میر،اساتذہ،غزلمرتا،وا،کیا،اچھا،بہکا،برپا،دریا،رسوا،سوداadmin

دیوان دوم غزل 714

عاشق ترے لاکھوں ہوئے مجھ سا نہ پھر پیدا ہوا

تجھ پر کوئی اے کام جاں دیکھا نہ یوں مرتا ہوا

مدت ہوئی الفت گئی برسوں ہوئے طاقت گئی

دل مضطرب ایسا نہ تھا کیا جانیے اب کیا ہوا

کل صبح سیر باغ میں دل اور میرا رک گیا

بلبل نہ بولا منھ سے کچھ گل ٹک نہ مجھ سے وا ہوا

وے دن گئے جو یاں کبھو اٹھتا تھا دل سے جوش سا

اب لگ گئے رونے جہاں پل مارتے دریا ہوا

کتنوں کے دل بے جاں ہوئے کتنے نہ جانا کیا ہوئے

چلنے میں اس کے دو قدم ہنگامہ اک برپا ہوا

مستی میں لغزش ہو گئی معذور رکھا چاہیے

اے اہل مسجد اس طرف آیا ہوں میں بہکا ہوا

جوں حسن ہے اک فتنہ گر توں عشق بھی ہے پردہ در

وہ شہرئہ عالم ہوا میں خلق میں رسوا ہوا

فرہاد و مجنوں ووں گئے ہم اور وامق یوں چلے

اس عارضے سے چاہ کے وہ کون سا اچھا ہوا

یا حرف خط ہے درمیاں یا گیسوئوں کا ہے بیاں

کیا میر صاحب کے تئیں پھر ان دنوں سودا ہوا

میر تقی میر

پیغمبر کنعاں نے دیکھا نہ کہ کیا دیکھا

اکتوبر 6, 2015میر تقی میر،اساتذہ،غزلمزہ،نیا،کیا،اٹھا،بھلا،جا،خفاadmin

دیوان دوم غزل 707

دل عشق میں خوں دیکھا آنکھوں کو گیا دیکھا

پیغمبر کنعاں نے دیکھا نہ کہ کیا دیکھا

مجروح ہے سب سینہ تس پر ہے نمک پاشی

آنکھوں کے لڑانے کا ہم خوب مزہ دیکھا

یک بار بھی آنکھ اپنی اس پر نہ پڑی مرتے

سو مرتبہ بالیں سے ہم سر کو اٹھا دیکھا

کاہش کا مری اب یہ کیا تجھ کو تعجب ہے

بیماری دل والا کوئی بھی بھلا دیکھا

آنکھیں گئیں پھر تجھ بن کیا کیا نہ عزیزوں کی

پر تونے مروت سے ٹک ان کو نہ جا دیکھا

جی دیتے ہیں مرنے پر سب شہر محبت میں

کچھ ساری خدائی سے یہ طور نیا دیکھا

کہہ دل کو گنوایا ہے یا رنج اٹھایا ہے

اے میر تجھے ہم نے کچھ آج خفا دیکھا

میر تقی میر

کیا جانیے کہ میر زمانے کو کیا ہوا

اکتوبر 6, 2015میر تقی میر،اساتذہ،غزللڑا،لکھا،لگا،چھپا،ناخدا،کیا،گیا،پڑھا،پھٹا،بندھا،بھرا،بجا،جلا،رہاadmin

دیوان دوم غزل 691

ایک آن اس زمانے میں یہ دل نہ وا ہوا

کیا جانیے کہ میر زمانے کو کیا ہوا

دکھلاتے کیا ہو دست حنائی کا مجھ کو رنگ

ہاتھوں سے میں تمھارے بہت ہوں جلا ہوا

سوزش وہی تھی چھاتی میں مرنے تلک مرے

اچھا ہوا نہ داغ جگر کا لگا ہوا

سر ہی چڑھا رہے ہے ہر اک بادہ خوار کے

ہے شیخ شہر یا کوئی ہے جن پڑھا ہوا

ظاہر کو گو درست رکھا مر کے میں ولے

دل کا لگائو کوئی رہا ہے چھپا ہوا

ازخویش رفتہ میں ہی نہیں اس کی راہ میں

آتا نہیں ہے پھر کے ادھر کا گیا ہوا

یوں پھر اٹھا نہ جائے گا اے ابر دشت سے

گر کوئی رونے بیٹھ گیا دل بھرا ہوا

لے کر جواب خط کا نہ قاصد پھرا کبھو

کیا جانے سرنوشت میں کیا ہے لکھا ہوا

گو پیس مارے مہندی کے رنگوں فلک ولے

چھوٹے نہ اس سے اس کا لگا یا بندھا ہوا

اٹھتے تعب فراق کے جی سے کہاں تلک

دل جو بجا رہا نہ ہمارا بجا ہوا

دامن سے منھ چھپائے جنوں کب رہا چھپا

سو جا سے سامنے ہے گریباں پھٹا ہوا

دیکھا نہ ایک گل کو بھی چشمک زنی میں ہائے

جب کچھ رہا نہ باغ میں تب میں رہا ہوا

کیا جانیے ملاپ کسے کہتے ہیں یہ لوگ

برسوں ہوئے کہ ہم سے تو وہ ہے لڑا ہوا

بحر بلا سے کوئی نکلتا مرا جہاز

بارے خداے عزَّوجل ناخدا ہوا

اس بحر میں اک اور غزل تو بھی میر کہہ

دریا تھا تو تو تیری روانی کو کیا ہوا

میر تقی میر

شکر خدا کہ حق محبت ادا ہوا

اکتوبر 6, 2015میر تقی میر،اساتذہ،غزللٹا،مدعا،چلا،وا،کیا،ادا،بھلا،بجا،جلاadmin

دیوان دوم غزل 670

تیغ ستم سے اس کی مرا سر جدا ہوا

شکر خدا کہ حق محبت ادا ہوا

قاصد کو دے کے خط نہیں کچھ بھیجنا ضرور

جاتا ہے اب تو جی ہی ہمارا چلا ہوا

وہ تو نہیں کہ اشک تھمے ہی نہ آنکھ سے

نکلے ہے کوئی لخت دل اب سو جلا ہوا

حیران رنگ باغ جہاں تھا بہت رکا

تصویر کی کلی کی طرح دل نہ وا ہوا

عالم کی بے فضائی سے تنگ آگئے تھے ہم

جاگہ سے دل گیا جو ہمارا بجا ہوا

درپے ہمارے جی کے ہوا غیر کے لیے

انجام کار مدعی کا مدعا ہوا

اس کے گئے پہ دل کی خرابی نہ پوچھیے

جیسے کسو کا کوئی نگر ہو لٹا ہوا

بدتر ہے زیست مرگ سے ہجران یار میں

بیمار دل بھلا نہ ہوا تو بھلا ہوا

کہتا تھا میر حال تو جب تک تو تھا بھلا

کچھ ضبط کرتے کرتے ترا حال کیا ہوا

میر تقی میر

کچھ ٹھہرتی ہی نہیں کوئی کہے تو کیا کہے

اکتوبر 6, 2015میر تقی میر،اساتذہ،غزلکیا،دریاadmin

دیوان اول غزل 632

شوخ عاشق قد کو تیرے سرو یا طوبیٰ کہے

کچھ ٹھہرتی ہی نہیں کوئی کہے تو کیا کہے

کیا تفاوت ہے بڑے چھوٹے میں گر سمجھے کوئی

کیا عجب ہے مشک کو سقا اگر دریا کہے

میر تقی میر

کہ میاں خوش رہو ہم دعا کر چلے

اکتوبر 6, 2015میر تقی میر،اساتذہ،غزلنہا،چھپا،وفا،کیا،ا،اٹھا،ادا،بڑا،جلا،جدا،خدا،دوا،دکھا،دعاadmin

دیوان اول غزل 605

فقیرانہ آئے صدا کر چلے

کہ میاں خوش رہو ہم دعا کر چلے

جو تجھ بن نہ جینے کو کہتے تھے ہم

سو اس عہد کو اب وفا کر چلے

شفا اپنی تقدیر ہی میں نہ تھی

کہ مقدور تک تو دوا کر چلے

پڑے ایسے اسباب پایان کار

کہ ناچار یوں جی جلاکر چلے

وہ کیا چیز ہے آہ جس کے لیے

ہر اک چیز سے دل اٹھاکر چلے

کوئی ناامیدانہ کرتے نگاہ

سو تم ہم سے منھ بھی چھپاکر چلے

بہت آرزو تھی گلی کی تری

سو یاں سے لہو میں نہاکر چلے

دکھائی دیے یوں کہ بے خود کیا

ہمیں آپ سے بھی جدا کر چلے

جبیں سجدے کرتے ہی کرتے گئی

حق بندگی ہم ادا کر چلے

پرستش کی یاں تک کہ اے بت تجھے

نظر میں سبھوں کی خدا کر چلے

جھڑے پھول جس رنگ گلبن سے یوں

چمن میں جہاں کے ہم آکر چلے

نہ دیکھا غم دوستاں شکر ہے

ہمیں داغ اپنا دکھاکر چلے

گئی عمر در بند فکر غزل

سو اس فن کو ایسا بڑا کر چلے

کہیں کیا جو پوچھے کوئی ہم سے میر

جہاں میں تم آئے تھے کیا کر چلے

میر تقی میر

آہ کریے کہ ٹک ہوا ہووے

اکتوبر 6, 2015میر تقی میر،اساتذہ،غزلہوا،لگا،مدعا،مزہ،کیا،بلا،خدا،رہاadmin

دیوان اول غزل 593

کب تلک جی رکے خفا ہووے

آہ کریے کہ ٹک ہوا ہووے

جی ٹھہر جائے یا ہوا ہووے

دیکھیے ہوتے ہوتے کیا ہووے

کر نمک سود سینۂ مجروح

جی میں گر ہے کہ کچھ مزہ ہووے

کاہش دل کی کیجیے تدبیر

جان میں کچھ بھی جو رہا ہووے

چپ کا باعث ہے بے تمنائی

کہیے کچھ بھی تو مدعا ہووے

بے کلی مارے ڈالتی ہے نسیم

دیکھیے اب کے سال کیا ہووے

مر گئے ہم تو مر گئے تو جی

دل گرفتہ تری بلا ہووے

عشق کیا ہے درست اے ناصح

جانے وہ جس کا دل لگا ہووے

پھر نہ شیطاں سجود آدم سے

شاید اس پردے میں خدا ہووے

نہ سنا رات ہم نے اک نالہ

غالباً میر مر رہا ہووے

میر تقی میر

الٰہی اس بلاے ناگہاں پر بھی بلا آوے

اکتوبر 6, 2015میر تقی میر،اساتذہ،غزلہوا،مدعا،چلا،یا،کیا،بلا،جلا،خداadmin

دیوان اول غزل 563

کہاں تک غیر جاسوسی کے لینے کو لگا آوے

الٰہی اس بلاے ناگہاں پر بھی بلا آوے

رکا جاتا ہے جی اندر ہی اندر آج گرمی سے

بلا سے چاک ہی ہوجاوے سینہ ٹک ہوا آوے

ترا آنا ہی اب مرکوز ہے ہم کو دم آخر

یہ جی صدقے کیا تھا پھر نہ آوے تن میں یا آوے

یہ رسم آمد و رفت دیار عشق تازہ ہے

ہنسی وہ جائے میری اور رونا یوں چلا آوے

اسیری نے چمن سے میری دل گرمی کو دھو ڈالا

وگرنہ برق جاکر آشیاں میرا جلا آوے

امید رحم ان سے سخت نافہمی ہے عاشق کی

یہ بت سنگیں دلی اپنی نہ چھوڑیں گر خدا آوے

یہ فن عشق ہے آوے اسے طینت میں جس کی ہو

تو زاہد پیر نابالغ ہے بے تہ تجھ کو کیا آوے

ہمارے دل میں آنے سے تکلف غم کو بیجا ہے

یہ دولت خانہ ہے اس کا وہ جب چاہے چلا آوے

برنگ بوے غنچہ عمر اک ہی رنگ میں گذرے

میسر میر صاحب گر دل بے مدعا آوے

میر تقی میر

کیا ناز کر رہے ہو اب ہم میں کیا رہا ہے

اکتوبر 6, 2015میر تقی میر،اساتذہ،غزللگا،مزہ،چھپا،وا،کیا،ا،آشنا،اٹھا،جا،جدا،خداadmin

دیوان اول غزل 555

طاقت نہیں ہے دل میں نے جی بجا رہا ہے

کیا ناز کر رہے ہو اب ہم میں کیا رہا ہے

جیب اور آستیں سے رونے کا کام گذرا

سارا نچوڑ اب تو دامن پر آرہا ہے

اب چیت گر نہیں کچھ تازہ ہوا ہوں بیکل

آیا ہوں جب بخود میں جی اس میں جارہا ہے

کاہے کا پاس اب تو رسوائی دور پہنچی

راز محبت اپنا کس سے چھپا رہا ہے

گرد رہ اس کی یارب کس اور سے اٹھے گی

سو سو غزال ہر سو آنکھیں لگا رہا ہے

بندے تو طرحدارو ہیں طرح کش تمھارے

پھر چاہتے ہو کیا تم اب اک خدا رہا ہے

دیکھ اس دہن کو ہر دم اے آرسی کہ یوں ہی

خوبی کا در کسو کے منھ پر بھی وا رہا ہے

وے لطف کی نگاہیں پہلے فریب ہیں سب

کس سے وہ بے مروت پھر آشنا رہا ہے

اتنا خزاں کرے ہے کب زرد رنگ پر یاں

تو بھی کسو نگہ سے اے گل جدا رہا ہے

رہتے ہیں داغ اکثر نان و نمک کی خاطر

جینے کا اس سمیں میں اب کیا مزہ رہا ہے

اب چاہتا نہیں ہے بوسہ جو تیرے لب سے

جینے سے میر شاید کچھ دل اٹھا رہا ہے

میر تقی میر

خمیازہ کش جو ہوں گے ملنے کے کیا کریں گے

اکتوبر 6, 2015میر تقی میر،اساتذہ،غزلہوا،چلا،وفا،کہا،کیا،پیا،ادا،دعا،رہاadmin

دیوان اول غزل 522

بند قبا کو خوباں جس وقت وا کریں گے

خمیازہ کش جو ہوں گے ملنے کے کیا کریں گے

رونا یہی ہے مجھ کو تیری جفا سے ہر دم

یہ دل دماغ دونوں کب تک وفا کریں گے

ہے دین سر کا دینا گردن پہ اپنی خوباں

جیتے ہیں تو تمھارا یہ قرض ادا کریں گے

درویش ہیں ہم آخر دو اک نگہ کی رخصت

گوشے میں بیٹھے پیارے تم کو دعا کریں گے

آخر تو روزے آئے دو چار روز ہم بھی

ترسابچوں میں جا کر دارو پیا کریں گے

کچھ تو کہے گا ہم کو خاموش دیکھ کر وہ

اس بات کے لیے اب چپ ہی رہا کریں گے

عالم مرے ہے تجھ پر آئی اگر قیامت

تیری گلی کے ہر سو محشر ہوا کریں گے

دامان دشت سوکھا ابروں کی بے تہی سے

جنگل میں رونے کو اب ہم بھی چلا کریں گے

لائی تری گلی تک آوارگی ہماری

ذلت کی اپنی اب ہم عزت کیا کریں گے

احوال میر کیونکر آخر ہو ایک شب میں

اک عمر ہم یہ قصہ تم سے کہا کریں گے

میر تقی میر

پر اس کے جی میں ہم سے کیا جانیے کہ کیا ہے

اکتوبر 6, 2015میر تقی میر،اساتذہ،غزلہوا،مدعا،چلا،چکا،کیا،گیا،آرہا،آشنا،جلا،دعاadmin

دیوان اول غزل 513

اپنا شعار پوچھو تو مہرباں وفا ہے

پر اس کے جی میں ہم سے کیا جانیے کہ کیا ہے

مت پوچھ میری اس کی شام و سحر کی صحبت

اس طرف سے ہے گالی اس طرف سے دعا ہے

بالیں پہ میری آکر ٹک دیکھ شوق دیدار

سارے بدن کا جی اب آنکھوں میں آرہا ہے

بے اس کے رک کے مرتے گرمی عشق میں تو

کرتے ہیں آہ جب تک تب تک ہی کچھ ہوا ہے

شکوہ ہے رونے کا یہ بے گانگی سے تیری

مژگان تر وگرنہ آنکھوں میں آشنا ہے

مت کر زمین دل میں تخم امید ضائع

بوٹا جو یاں اگا ہے سو اگتے ہی جلا ہے

شرمندہ ہوتے ہیں گے خورشید و ماہ دونوں

خوبی نے تیرے منھ کی ظالم قراں کیا ہے

اے شمع بزم عاشق روشن ہے یہ کہ تجھ بن

آنکھوں میں میری عالم تاریک ہو گیا ہے

جیتے ہی جی تلک ہیں سارے علاقے سو تو

عاشق ترا مجرد فارغ ہی ہو چکا ہے

آزردگی عبث کیوں تشہیر و قتل و ایذا

فرمایئے تو وہ کچھ جو کچھ کہ مدعا ہے

صد سحر و یک رقیمہ خط میر جی کا دیکھا

قاصد نہیں چلا ہے جادو مگر چلا ہے

میر تقی میر

پامال ہو گئے تو نہ جانا کہ کیا ہوئے

اکتوبر 6, 2015میر تقی میر،اساتذہ،غزلوا،کیا،ادا،جدا،رہاadmin

دیوان اول غزل 498

یاں سرکشاں جو صاحب تاج و لوا ہوئے

پامال ہو گئے تو نہ جانا کہ کیا ہوئے

دیکھی نہ ایک چشمک گل بھی چمن میں آہ

ہم آخر بہار قفس سے رہا ہوئے

پچھتائوگے بہت جو گئے ہم جہان سے

آدم کی قدر ہوتی ہے ظاہر جدا ہوئے

تجھ بن دماغ صحبت اہل چمن نہ تھا

گل وا ہوئے ہزار ولے ہم نہ وا ہوئے

سر دے کے میر ہم نے فراغت کی عشق میں

ذمے ہمارے بوجھ تھا بارے ادا ہوئے

میر تقی میر

اس پردے ہی میں خوباں ہم کو سلا رکھیں گے

اکتوبر 6, 2015میر تقی میر،اساتذہ،غزللکھا،منگا،مزہ،چھپا،کیا،اٹھا،بنا،روا،سلاadmin

دیوان اول غزل 493

آنکھیں لڑا لڑا کر کب تک لگا رکھیں گے

اس پردے ہی میں خوباں ہم کو سلا رکھیں گے

فکر دہن میں اس کی کچھ بن نہ آئی آخر

اب یہ خیال ہم بھی دل سے اٹھا رکھیں گے

مشت نمک کو میں نے بیکار کم رکھا ہے

چھاتی کے زخم میرے مدت مزہ رکھیں گے

سبزان شہر اکثر درپے ہیں آبرو کے

اب زہر پاس اپنے ہم بھی منگا رکھیں گے

آنکھوں میں دلبروں کی مطلق نہیں مروت

یہ پاس آشنائی منظور کیا رکھیں گے

جیتے ہیں جب تلک ہم آنکھیں بھی لڑتیاں ہیں

دیکھیں تو جور خوباں کب تک روا رکھیں گے

اب چاند بھی لگا ہے تیرے سے جلوے کرنے

شبہاے ماہ چندے تجھ کو چھپا رکھیں گے

مژگان و چشم و ابرو سب ہیں ستم کے مائل

ان آفتوں سے دل ہم کیونکر بچا رکھیں گے

دیوان میر صاحب ہر اک کی ہے بغل میں

دو چار شعر ان کے ہم بھی لکھا رکھیں گے

میر تقی میر

پس ہم نہ برا مانیں تو کون برا مانے

اکتوبر 6, 2015میر تقی میر،اساتذہ،غزللکھا،کہا،کیا،برا،صداadmin

دیوان اول غزل 489

اب ظلم ہے اس خاطر تا غیر بھلا مانے

پس ہم نہ برا مانیں تو کون برا مانے

سرمایۂ صد آفت دیدار کی خواہش ہے

دل کی تو سمجھ لیجے گر چشم کہا مانے

مسدود ہی اے قاصد بہتر ہے رہ نامہ

کیا کیا نہ لکھیں ہم تو جو یار لکھا مانے

ٹک حال شکستہ کی سننے ہی میں سب کچھ ہے

پر وہ تو سخن رس ہے اس بات کو کیا مانے

بے طاقتی دل نے سائل بھی کیا ہم کو

پر میر فقیروں کی یاں کون صدا مانے

میر تقی میر

کہ ہمراہ صبا ٹک سیر کرتے پھر ہوا ہوتے

اکتوبر 6, 2015میر تقی میر،اساتذہ،غزلہوا،مدعا،وفا،کیا،پا،جدا،خداadmin

دیوان اول غزل 481

برنگ بوے گل اس باغ کے ہم آشنا ہوتے

کہ ہمراہ صبا ٹک سیر کرتے پھر ہوا ہوتے

سراپا آرزو ہونے نے بندہ کردیا ہم کو

وگرنہ ہم خدا تھے گر دل بے مدعا ہوتے

فلک اے کاش ہم کو خاک ہی رکھتا کہ اس میں ہم

غبار راہ ہوتے یا کسو کی خاک پا ہوتے

الٰہی کیسے ہوتے ہیں جنھیں ہے بندگی خواہش

ہمیں تو شرم دامن گیر ہوتی ہے خدا ہوتے

تو ہے کس ناحیے سے اے دیار عشق کیا جانوں

ترے باشندگاں ہم کاش سارے بے وفا ہوتے

اب ایسے ہیں کہ صانع کے مزاج اوپر بہم پہنچے

جو خاطر خواہ اپنے ہم ہوئے ہوتے تو کیا ہوتے

کہیں جو کچھ ملامت گر بجا ہے میر کیا جانیں

انھیں معلوم تب ہوتا کہ ویسے سے جدا ہوتے

میر تقی میر

جو اپنے اچھے جی کو ایسی بلا لگائی

اکتوبر 6, 2015میر تقی میر،اساتذہ،غزلکیا،ا،بلا،جفا،جا،حنا،دواadmin

دیوان اول غزل 449

گیسو سے اس کے میں نے کیوں آنکھ جا لگائی

جو اپنے اچھے جی کو ایسی بلا لگائی

تھا دل جو پکا پھوڑا بسیاری الم سے

دکھتا گیا دو چنداں جوں جوں دوا لگائی

ذوق جراحت اس کا کس کو نہیں ہے لیکن

بخت اس کے جس کے ان نے تیغ جفا لگائی

دم بھی نہ لینے پایا پانی بھی پھر نہ مانگا

جس تشنہ لب کو ان نے تلوار آ لگائی

تھا صید ناتواں میں لیکن لہو سے میرے

پائوں پہ ان نے اپنے بھر کر حنا لگائی

بالعکس آج اس کے سارے سلوک دیکھے

کیا جانوں دشمنوں نے کل اس سے کیا لگائی

جو آنسو پی گیا میں آخر کو میر ان نے

چھاتی جلا جگر میں اک آگ جا لگائی

میر تقی میر

طرح اس میں مجنوں کی سب پا گئی

اکتوبر 6, 2015میر تقی میر،اساتذہ،غزلفردا،چھا،کیا،کھا،پھیلا،پا،تنہا،شرماadmin

دیوان اول غزل 439

ہمیں آمد میر کل بھا گئی

طرح اس میں مجنوں کی سب پا گئی

کہاں کا غبار آہ دل میں یہ تھا

مری خاک بدلی سی سب چھا گئی

کیا پاس بلبل خزاں نے نہ کچھ

گل و برگ بے درد پھیلا گئی

ہوئی سامنے یوں تو ایک ایک کے

ہمیں سے وہ کچھ آنکھ شرما گئی

جگر منھ تک آتے نہیں بولتے

غرض ہم بھی کرتے ہیں کیا کیا گئی

نہ ہم رہ کوئی ناکسی سے گیا

مری لاش تا گور تنہا گئی

گھٹا شمع ساں کیوں نہ جائوں چلا

تب غم جگر کو مرے کھا گئی

کوئی رہنے والی ہے جان عزیز

گئی گر نہ امروز فردا گئی

کیے دست و پا گم جو میر آگیا

وفا پیشہ مجلس اسے پا گئی

میر تقی میر

تو بھی ہم غافلوں نے آ کے کیا کیا کیا کچھ

اکتوبر 6, 2015میر تقی میر،اساتذہ،غزللکھا،لگا،چلا،وفا،کہا،کیا،گیا،ادا،بنا،تھا،جلا،دیا،رہا،سناadmin

دیوان اول غزل 428

ہم سے کچھ آگے زمانے میں ہوا کیا کیا کچھ

تو بھی ہم غافلوں نے آ کے کیا کیا کیا کچھ

دل جگر جان یہ بھسمنت ہوئے سینے میں

گھر کو آتش دی محبت نے جلا کیا کیا کچھ

کیا کہوں تجھ سے کہ کیا دیکھا ہے تجھ میں میں نے

عشوہ و غمزہ و انداز و ادا کیا کیا کچھ

دل گیا ہوش گیا صبر گیا جی بھی گیا

شغل میں غم کے ترے ہم سے گیا کیا کیا کچھ

آہ مت پوچھ ستمگار کہ تجھ سے تھی ہمیں

چشم لطف و کرم و مہر و وفا کیا کیا کچھ

نام ہیں خستہ و آوارہ و بدنام مرے

ایک عالم نے غرض مجھ کو کہا کیا کیا کچھ

طرفہ صحبت ہے کہ سنتا نہیں تو ایک مری

واسطے تیرے سنا میں نے سنا کیا کیا کچھ

حسرت وصل و غم ہجر و خیال رخ دوست

مر گیا میں پہ مرے جی میں رہا کیا کیا کچھ

درد دل زخم جگر کلفت غم داغ فراق

آہ عالم سے مرے ساتھ چلا کیا کیا کچھ

چشم نمناک و دل پر جگر صد پارہ

دولت عشق سے ہم پاس بھی تھا کیا کیا کچھ

تجھ کو کیا بننے بگڑنے سے زمانے کے کہ یاں

خاک کن کن کی ہوئی صرف بنا کیا کیا کچھ

قبلہ و کعبہ خداوند و ملاذ و مشفق

مضطرب ہو کے اسے میں نے لکھا کیا کیا کچھ

پر کہوں کیا رقم شوق کی اپنے تاثیر

ہر سر حرف پہ وہ کہنے لگا کیا کیا کچھ

ایک محروم چلے میر ہمیں عالم سے

ورنہ عالم کو زمانے نے دیا کیا کیا کچھ

میر تقی میر

وہ نمک چھڑکے ہے مزہ ہے یہ

اکتوبر 6, 2015میر تقی میر،اساتذہ،غزلہوا،مدعا،مزہ،نما،کیا،گلہ،انتہا،آشنا،ادا،بلا،جا،رہاadmin

دیوان اول غزل 421

ہم ہیں مجروح ماجرا ہے یہ

وہ نمک چھڑکے ہے مزہ ہے یہ

آگ تھے ابتداے عشق میں ہم

اب جو ہیں خاک انتہا ہے یہ

بود آدم نمود شبنم ہے

ایک دو دم میں پھر ہوا ہے یہ

شکر اس کی جفا کا ہو نہ سکا

دل سے اپنے ہمیں گلہ ہے یہ

شور سے اپنے حشر ہے پردہ

یوں نہیں جانتا کہ کیا ہے یہ

بس ہوا ناز ہو چکا اغماض

ہر گھڑی ہم سے کیا ادا ہے یہ

نعشیں اٹھتی ہیں آج یاروں کی

آن بیٹھو تو خوش نما ہے یہ

دیکھ بے دم مجھے لگا کہنے

ہے تو مردہ سا پر بلا ہے یہ

میں تو چپ ہوں وہ ہونٹ چاٹے ہے

کیا کہوں ریجھنے کی جا ہے یہ

ہے رے بیگانگی کبھو ان نے

نہ کہا یہ کہ آشنا ہے یہ

تیغ پر ہاتھ دم بہ دم کب تک

اک لگا چک کہ مدعا ہے یہ

میر کو کیوں نہ مغتنم جانے

اگلے لوگوں میں اک رہا ہے یہ

میر تقی میر

رات جاتی ہے اسی غم میں کہ فردا کیا ہو

اکتوبر 6, 2015میر تقی میر،اساتذہ،غزلفردا،کیا،پروا،آیا،تمنا،تماشا،جاadmin

دیوان اول غزل 387

دن گذرتا ہے مجھے فکر ہی میں تا کیا ہو

رات جاتی ہے اسی غم میں کہ فردا کیا ہو

سب ہیں دیدار کے مشتاق پر اس سے غافل

حشر برپا ہو کہ فتنہ اٹھے آیا کیا ہو

خاک حسرت زدگاں پر تو گذر بے وسواس

ان ستم کشتوں سے اب عرض تمنا کیا ہو

گر بہشت آوے تو آنکھوں میں مری پھیکی لگے

جن نے دیکھا ہو تجھے محو تماشا کیا ہو

شوق جاتا ہے ہمیں یار کے کوچے کو لیے

جاکے معلوم ہو کیا جانیے اس جا کیا ہو

ایک رونا ہی نہیں آہ و غم و نالہ و درد

ہجر میں زندگی کرنے کے تئیں کیا کیا ہو

خاک میں لوٹوں کہ لوہو میں نہائوں میں میر

یار مستغنی ہے اس کو مری پروا کیا ہو

میر تقی میر

کہتا ہے ترا سایہ پری سے کہ ہے کیا تو

اکتوبر 6, 2015میر تقی میر،اساتذہ،غزلقبا،لگا،ملا،یا،کیا،اٹھا،بھلا،جا،رہاadmin

دیوان اول غزل 379

قد کھینچے ہے جس وقت تو ہے طرفہ بلا تو

کہتا ہے ترا سایہ پری سے کہ ہے کیا تو

گر اپنی روش راہ چلا یار تو اے کبک

رہ جائے گا دیوار گلستاں سے لگا تو

بے گل نہیں بلبل تجھے بھی چین پہ دیکھیں

مر رہتے ہیں ہم ایک طرف باغ میں یا تو

خوش رو ہے بہت اے گل تر تو بھی ولیکن

انصاف ہے منھ تیرے ہی ویسا ہے بھلا تو

کیا جانیے اے گوہر مقصد تو کہاں ہے

ہم خاک میں بھی مل گئے لیکن نہ ملا تو

اس جینے سے اب دل کو اٹھا بیٹھیں گے ہم بھی

ہے تجھ کو قسم ظلم سے مت ہاتھ اٹھا تو

منظر میں بدن کے بھی یہ اک طرفہ مکاں تھا

افسوس کہ ٹک دل میں ہمارے نہ رہا تو

تھے چاک گریبان گلستاں میں گلوں کے

نکلا ہے مگر کھولے ہوئے بند قبا تو

بے ہوشی سی آتی ہے تجھے اس کی گلی میں

گر ہوسکے اے میر تو اس راہ نہ جا تو

میر تقی میر

پر وفا کا برا کیا تونیں

اکتوبر 6, 2015میر تقی میر،اساتذہ،غزلوفا،کہا،کیا،پا،بلا،براadmin

دیوان اول غزل 367

مجھ کو مارا بھلا کیا تونیں

پر وفا کا برا کیا تونیں

حسرتیں اس کی سر پٹکتی ہیں

مرگ فرہاد کیا کیا تونیں

اس کے جور و جفا کی کیا تقصیر

جو کیا سو وفا کیا تونیں

یہ چمن ہے قفس سے پر اے ضعف

مجھ کو بے دست و پا کیا تونیں

کل ہی پڑتی نہیں ہے تجھ بن آج

میر کو کیا بلا کیا تونیں

وہ جو کہتا تھا تو ہی کریو قتل

میر کا سو کہا کیا تونیں

میر تقی میر

روز برسات کی ہوا ہے یاں

اکتوبر 6, 2015میر تقی میر،اساتذہ،غزلہوا،ہورہا،ماجرا،کیا،کربلا،گیا،گڑا،آنکلا،تعزیہ،جا،رہا،صفاadmin

دیوان اول غزل 353

آہ اور اشک ہی سدا ہے یاں

روز برسات کی ہوا ہے یاں

جس جگہ ہو زمین تفتہ سمجھ

کہ کوئی دل جلا گڑا ہے یاں

گو کدورت سے وہ نہ دیوے رو

آرسی کی طرح صفا ہے یاں

ہر گھڑی دیکھتے جو ہو ایدھر

ایسا کہ تم نے آنکلا ہے یاں

رند مفلس جگر میں آہ نہیں

جان محزوں ہے اور کیا ہے یاں

کیسے کیسے مکان ہیں ستھرے

اک ازاں جملہ کربلا ہے یاں

اک سسکتا ہے ایک مرتا ہے

ہر طرف ظلم ہورہا ہے یاں

صد تمنا شہید ہیں یک جا

سینہ کوبی ہے تعزیہ ہے یاں

دیدنی ہے غرض یہ صحبت شوخ

روز و شب طرفہ ماجرا ہے یاں

خانۂ عاشقاں ہے جاے خوب

جاے رونے کی جا بہ جا ہے یاں

کوہ و صحرا بھی کر نہ جاے باش

آج تک کوئی بھی رہا ہے یاں

ہے خبر شرط میر سنتا ہے

تجھ سے آگے یہ کچھ ہوا ہے یاں

موت مجنوں کو بھی یہیں آئی

کوہکن کل ہی مر گیا ہے یاں

میر تقی میر

پھر آپھی آپ سوچ کے کہتا ہوں کیا کہوں

اکتوبر 6, 2015میر تقی میر،اساتذہ،غزلماجرا،کیا،پا،بھلا،جا،دعاadmin

دیوان اول غزل 326

آتا ہے دل میں حال بد اپنا بھلا کہوں

پھر آپھی آپ سوچ کے کہتا ہوں کیا کہوں

پروانہ پھر نہ شمع کی خاطر جلا کرے

گر بزم میں یہ اپنا ترا ماجرا کہوں

مت کر خرام سر پہ اٹھالے گا خلق کو

بیٹھا اگر گلی میں ترا نقش پا کہوں

دل اور دیدہ باعث ایذا و نور عین

کس کے تئیں برا کہوں کس کو بھلا کہوں

آوے سموم جاے صبا باغ سے سدا

گرشمہ اپنے سوز جگر کا میں جا کہوں

جاتا ہوں میر دشت جنوں کو میں اب یہ کہہ

مجنوں کہیں ملے تو تری بھی دعا کہوں

میر تقی میر

رنگ رو جس کے کبھو منھ نہ چڑھا میں ہی ہوں

اکتوبر 6, 2015میر تقی میر،اساتذہ،غزلہوا،چڑھا،وفا،یا،کہا،کیا،گدا،پا،ا،برا،جلا،جا،صباadmin

دیوان اول غزل 299

درد و اندوہ میں ٹھہرا جو رہا میں ہی ہوں

رنگ رو جس کے کبھو منھ نہ چڑھا میں ہی ہوں

جس پہ کرتے ہو سدا جور و جفا میں ہی ہوں

پھر بھی جس کو ہے گماں تم سے وفا میں ہی ہوں

بد کہا میں نے رقیبوں کو تو تقصیر ہوئی

کیوں ہے بخشو بھی بھلا سب میں برا میں ہی ہوں

اپنے کوچے میں فغاں جس کی سنو ہو ہر رات

وہ جگر سوختہ و سینہ جلا میں ہی ہوں

خار کو جن نے لڑی موتی کی کر دکھلایا

اس بیابان میں وہ آبلہ پا میں ہی ہوں

لطف آنے کا ہے کیا بس نہیں اب تاب جفا

اتنا عالم ہے بھرا جائو نہ کیا میں ہی ہوں

رک کے جی ایک جہاں دوسرے عالم کو گیا

تن تنہا نہ ترے غم میں ہوا میں ہی ہوں

اس ادا کو تو ٹک اک سیر کر انصاف کرو

وہ برا ہے گا بھلا دوستو یا میں ہی ہوں

میں یہ کہتا تھا کہ دل جن نے لیا کون ہے وہ

یک بیک بول اٹھا اس طرف آ میں ہی ہوں

جب کہا میں نے کہ تو ہی ہے تو پھر کہنے لگا

کیا کرے گا تو مرا دیکھوں تو جا میں ہی ہوں

سنتے ہی ہنس کے ٹک اک سوچیو کیا تو ہی تھا

جن نے شب رو کے سب احوال کہا میں ہی ہوں

میر آوارئہ عالم جو سنا ہے تونے

خاک آلودہ وہ اے باد صبا میں ہی ہوں

کاسۂ سر کو لیے مانگتا دیدار پھرے

میر وہ جان سے بیزار گدا میں ہی ہوں

میر تقی میر

ہر چند کہ جلتا ہوں پہ سرگرم وفا ہوں

اکتوبر 6, 2015میر تقی میر،اساتذہ،غزلہوا،لگا،چلا،وفا،کیا،بلا،جلا،جیا،جزا،خفا،رہا،صباadmin

دیوان اول غزل 293

مستوجب ظلم و ستم و جور و جفا ہوں

ہر چند کہ جلتا ہوں پہ سرگرم وفا ہوں

آتے ہیں مجھے خوب سے دونوں ہنر عشق

رونے کے تئیں آندھی ہوں کڑھنے کو بلا ہوں

اس گلشن دنیا میں شگفتہ نہ ہوا میں

ہوں غنچۂ افسردہ کہ مردود صبا ہوں

ہم چشم ہے ہر آبلۂ پا کا مرا اشک

از بس کہ تری راہ میں آنکھوں سے چلا ہوں

آیا کوئی بھی طرح مرے چین کی ہو گی

آزردہ ہوں جینے سے میں مرنے سے خفا ہوں

دامن نہ جھٹک ہاتھ سے میرے کہ ستم گر

ہوں خاک سر راہ کوئی دم میں ہوا ہوں

دل خواہ جلا اب تو مجھے اے شب ہجراں

میں سوختہ بھی منتظر روز جزا ہوں

گو طاقت و آرام و خورو خواب گئے سب

بارے یہ غنیمت ہے کہ جیتا تو رہا ہوں

اتنا ہی مجھے علم ہے کچھ میں ہوں بہر چیز

معلوم نہیں خوب مجھے بھی کہ میں کیا ہوں

بہتر ہے غرض خامشی ہی کہنے سے یاراں

مت پوچھو کچھ احوال کہ مر مر کے جیا ہوں

تب گرم سخن کہنے لگا ہوں میں کہ اک عمر

جوں شمع سر شام سے تا صبح جلا ہوں

سینہ تو کیا فضل الٰہی سے سبھی چاک

ہے وقت دعا میر کہ اب دل کو لگا ہوں

میر تقی میر

جان و ایمان و محبت کو دعا کرتے ہیں

اکتوبر 6, 2015میر تقی میر،اساتذہ،غزلہوا،مزہ،وفا،کہا،کیا،پیا،پھرا،بھلا،جلا،دوا،دعا،دغا،رہا،سناadmin

دیوان اول غزل 292

کہیو قاصد جو وہ پوچھے ہمیں کیا کرتے ہیں

جان و ایمان و محبت کو دعا کرتے ہیں

عشق آتش بھی جو دیوے تو نہ دم ماریں ہم

شمع تصویر ہیں خاموش جلا کرتے ہیں

جائے ہی نہ مرض دل تو نہیں اس کا علاج

اپنے مقدور تلک ہم تو دوا کرتے ہیں

اس کے کوچے میں نہ کر شور قیامت کا ذکر

شیخ یاں ایسے تو ہنگامے ہوا کرتے ہیں

بے بسی سے تو تری بزم میں ہم بہرے بنے

نیک و بد کوئی کہے بیٹھے سنا کرتے ہیں

رخصت جنبش لب عشق کی حیرت سے نہیں

مدتیں گذریں کہ ہم چپ ہی رہا کرتے ہیں

تو پری شیشے سے نازک ہے نہ کر دعوی مہر

دل ہیں پتھر کے انھوں کے جو وفا کرتے ہیں

تجھ سے لگ جاکے یہ یوں جاتے رہیں مجھ سے حیف

دیدہ و دل نے نہ جانا کہ دغا کرتے ہیں

فرصت خواب نہیں ذکر بتاں میں ہم کو

رات دن رام کہانی سی کہا کرتے ہیں

مجلس حال میں موزوں حرکت شیخ کی دیکھ

حیز شرعی بھی دم رقص مزہ کرتے ہیں

یہ زمانہ نہیں ایسا کہ کوئی زیست کرے

چاہتے ہیں جو برا اپنا بھلا کرتے ہیں

محض ناکارہ بھی مت جان ہمیں تو کہ کہیں

ایسے ناکام بھی بیکار پھرا کرتے ہیں

تجھ بن اس جان مصیبت زدہ غم دیدہ پہ ہم

کچھ نہیں کرتے تو افسوس کیا کرتے ہیں

کیا کہیں میر جی ہم تم سے معاش اپنی غرض

غم کو کھایا کریں ہیں لوہو پیا کرتے ہیں

میر تقی میر

لیک لگ چلنے میں بلا ہیں ہم

اکتوبر 6, 2015میر تقی میر،اساتذہ،غزلمیرزا،چنا،ناروا،وفا،کیا،گدا،آشنا،بلا،خفا،خداadmin

دیوان اول غزل 282

گرچہ آوارہ جوں صبا ہیں ہم

لیک لگ چلنے میں بلا ہیں ہم

کام کیا آتے ہیں گے معلومات

یہ تو سمجھے ہی نہ کہ کیا ہیں ہم

تم ہی بیگانگی کرو نہ کرو

دلبرو وے ہی آشنا ہیں ہم

اے بتاں اس قدر جفا ہم پر

عاقبت بندئہ خدا ہیں ہم

سرمہ آلودہ مت رکھا کر چشم

دیکھ اس وضع سے خفا ہیں ہم

ہے نمک سود سب تن مجروح

تیرے کشتوں میں میرزا ہیں ہم

تیرے کوچے میں تا بہ مرگ رکھا

کشتۂ منت وفا ہیں ہم

خوف ہم کو نہیں جنوں سے کچھ

یوں تو مجنوں کے بھی چچا ہیں ہم

آستاں پر ترے ہی گذری عمر

اسی دروازے کے گدا ہیں ہم

ڈرتے ہیں تیری بے دماغی سے

کیونکہ پھر یار جی بلا ہیں ہم

کوئی خواہاں نہیں ہمارا میر

گوئیا جنس ناروا ہیں ہم

میر تقی میر

گئے گذرے ہیں آخر ایسے کیا ہم

اکتوبر 6, 2015میر تقی میر،اساتذہ،غزلفرا،لگا،مدعا،وفا،کیا،با،جھکا،جدا،دوا،رہاadmin

دیوان اول غزل 280

نہ پھر رکھیں گے تیری رہ میں پا ہم

گئے گذرے ہیں آخر ایسے کیا ہم

کھنچے گی کب وہ تیغ ناز یارب

رہے ہیں دیر سے سر کو جھکا ہم

نہ جانا یہ کہ کہتے ہیں کسے پیار

رہیں بے لطفیاں ہی یاں تو باہم

بنے کیا خال و زلف و خط سے دیکھیں

ہوئے ہیں کتنے یہ کافر فراہم

مرض ہی عشق کا بے ڈول ہے کچھ

بہت کرتے ہیں اپنی سی دوا ہم

کہیں پیوند ہوں یارب زمیں کے

پھریں گے اس سے یوں کب تک جدا ہم

ہوس تھی عشق کرنے میں ولیکن

بہت نادم ہوئے دل کو لگا ہم

کب آگے کوئی مرتا تھا کسی پر

جہاں میں کر گئے رسم وفا ہم

تعارف کیا رہا اہل چمن سے

ہوئے اک عمر کے پیچھے رہا ہم

موا جس کے لئے اس کو نہ دیکھا

نہ سمجھے میر کا کچھ مدعا ہم

میر تقی میر

شیخ کیا جانے تو کہ کیا ہے عشق

اکتوبر 6, 2015میر تقی میر،اساتذہ،غزلکیا،خداadmin

دیوان اول غزل 252

درد ہی خود ہے خود دوا ہے عشق

شیخ کیا جانے تو کہ کیا ہے عشق

تو نہ ہووے تو نظم کل اٹھ جائے

سچے ہیں شاعراں خدا ہے عشق

میر تقی میر

بسمل پڑی ہے چرخ پہ میری دعا ہنوز

اکتوبر 6, 2015میر تقی میر،اساتذہ،غزلہوا،نارسا،وا،کیا،تا،جابجا،حنا،دعا،صفا،صبا،صداadmin

دیوان اول غزل 231

ہوتا نہیں ہے باب اجابت کا وا ہنوز

بسمل پڑی ہے چرخ پہ میری دعا ہنوز

باقی نہیں ہے دل میں یہ غم ہے بجا ہنوز

ٹپکے ہے خون دم بہ دم آنکھوں سے تا ہنوز

دن رات کو کھنچا ہے قیامت کا اور میں

پھرتا ہوں منھ پہ خاک ملے جابجا ہنوز

خط کاڑھ لا کے تم تو منڈا بھی چلے ولے

ہوتی نہیں ہماری تمھاری صفا ہنوز

غنچے چمن چمن کھلے اس باغ دہر میں

دل ہی مرا ہے جو نہیں ہوتا ہے وا ہنوز

گذری نہ پار عرش کہ تسکین ہو مجھے

افسوس میری آہ رہی نارسا ہنوز

احوال نامہ بر سے مرا سن کے کہہ اٹھا

جیتا ہے وہ ستم زدہ مہجور کیا ہنوز

غنچہ نہ بوجھ دل ہے کسی مجھ سے زار کا

کھلتا نہیں جو سعی سے تیری صبا ہنوز

توڑا تھا کس کا شیشۂ دل تونے سنگ دل

ہے دل خراش کوچے میں تیرے صدا ہنوز

چلو میں اس کے میرا لہو تھا سو پی چکا

اڑتا نہیں ہے طائر رنگ حنا ہنوز

بے بال و پر اسیر ہوں کنج قفس میں میر

جاتی نہیں ہے سر سے چمن کی ہوا ہنوز

میر تقی میر

اڑتی ہے خاک میری باد صبا ہے شاہد

اکتوبر 6, 2015میر تقی میر،اساتذہ،غزلکیا،خدا،درا،دعا،صباadmin

دیوان اول غزل 200

ہوں رہگذر میں تیرے ہر نقش پا ہے شاہد

اڑتی ہے خاک میری باد صبا ہے شاہد

طوف حرم میں بھی میں بھولا نہ تجھ کو اے بت

آتا ہے یاد تو ہی میرا خدا ہے شاہد

شرمندئہ اثر کچھ باطن مرا نہیں ہے

وقت سحر ہے شاہد دست دعا ہے شاہد

نالے میں اپنے پنہاں میں بھی ہوں ساتھ تیرے

شاہد ہے گرد محمل شور درا ہے شاہد

ایذا ہے میر پر جو وہ تو کہوں ہی گا میں

بارے یہ کہہ کہ تیری خاطر میں کیا ہے شاہد

میر تقی میر

گل دستہ دستہ جس کو چراغی دیا کیا

اکتوبر 6, 2015میر تقی میر،اساتذہ،غزلکیا،پیا،جیا،دیا،سیاadmin

دیوان اول غزل 145

اس آستان داغ سے میں زر لیا کیا

گل دستہ دستہ جس کو چراغی دیا کیا

کیا بعد مرگ یاد کروں گا وفا تجھے

سہتا رہا جفائیں میں جب تک جیا کیا

ہو تار تار سیتے ہی سیتے جو اڑ گیا

اب تک عبث میں اپنا گریباں سیا کیا

سن سن کے تیری بات کو کیا کیا نہ کہہ سنا

کیا کیا کہوں میں تجھ سے کہ کیا کچھ کیا کیا

اب وہ جگر طپش سے تڑپتا ہے تشنہ لب

مدت تلک جو میر کا لوہو پیا کیا

میر تقی میر

دل جو عقدہ تھا سخت وا نہ ہوا

اکتوبر 6, 2015میر تقی میر،اساتذہ،غزلمدعا،وا،کیا،گدا،جداadmin

دیوان اول غزل 142

سینہ دشنوں سے چاک تا نہ ہوا

دل جو عقدہ تھا سخت وا نہ ہوا

سب گئے ہوش و صبر و تاب و تواں

دل سے اک داغ ہی جدا نہ ہوا

ظلم و جور و جفا ستم بیداد

عشق میں تیرے ہم پہ کیا نہ ہوا

ہم تو ناکام ہی جہاں میں رہے

یاں کبھو اپنا مدعا نہ ہوا

میر افسوس وہ کہ جو کوئی

اس کے دروازے کا گدا نہ ہوا

میر تقی میر

پر اتنا بھی ظالم نہ رسوا ہوا تھا

اکتوبر 6, 2015میر تقی میر،اساتذہ،غزلوا،کیا،برپا،تماشا،رسوا،صحراadmin

دیوان اول غزل 137

ترے عشق میں آگے سودا ہوا تھا

پر اتنا بھی ظالم نہ رسوا ہوا تھا

خزاں التفات اس پہ کرتی بجا تھی

یہ غنچہ چمن میں ابھی وا ہوا تھا

کہاں تھا تو اس طور آنے سے میرے

گلی میں تری کل تماشا ہوا تھا

گئی ہوتی سر آبلوں کے پہ ہوئی خیر

بڑا قضیہ خاروں سے برپا ہوا تھا

گریباں سے تب ہاتھ اٹھایا تھا میں نے

مری اور دامان صحرا ہوا تھا

زہے طالع اے میر ان نے یہ پوچھا

کہاں تھا تو اب تک تجھے کیا ہوا تھا

میر تقی میر

اشک فقط کا جھمکا آنکھوں سے لگ رہا تھا

اکتوبر 6, 2015میر تقی میر،اساتذہ،غزلہوا،لیا،لگا،ملا،مزہ،کہا،کیا،گیا،پھنسا،پا،بلا،جلا،جابجا،رہاadmin

دیوان اول غزل 119

لخت جگر تو اپنے یک لخت روچکا تھا

اشک فقط کا جھمکا آنکھوں سے لگ رہا تھا

دامن میں آج دیکھا پھر لخت میں لے آیا

ٹکڑا کوئی جگر کا پلکوں میں رہ گیا تھا

اس قید جیب سے میں چھوٹا جنوں کی دولت

ورنہ گلا یہ میرا جوں طوق میں پھنسا تھا

مشت نمک کی خاطر اس واسطے ہوں حیراں

کل زخم دل نہایت دل کو مرے لگا تھا

اے گرد باد مت دے ہر آن عرض وحشت

میں بھی کسو زمانے اس کام میں بلا تھا

بن کچھ کہے سنا ہے عالم سے میں نے کیا کیا

پر تونے یوں نہ جانا اے بے وفا کہ کیا تھا

روتی ہے شمع اتنا ہر شب کہ کچھ نہ پوچھو

میں سوز دل کو اپنے مجلس میں کیوں کہا تھا

شب زخم سینہ اوپر چھڑکا تھا میں نمک کو

ناسور تو کہاں تھا ظالم بڑا مزہ تھا

سر مار کر ہوا تھا میں خاک اس گلی میں

سینے پہ مجھ کو اس کا مذکور نقش پا تھا

سو بخت تیرہ سے ہوں پامالی صبا میں

اس دن کے واسطے میں کیا خاک میں ملا تھا

یہ سرگذشت میری افسانہ جو ہوئی ہے

مذکور اس کا اس کے کوچے میں جابجا تھا

سن کر کسی سے وہ بھی کہنے لگا تھا کچھ کچھ

بے درد کتنے بولے ہاں اس کو کیا ہوا تھا

کہنے لگا کہ جانے میری بلا عزیزاں

احوال تھا کسی کا کچھ میں بھی سن لیا تھا

آنکھیں مری کھلیں جب جی میر کا گیا تب

دیکھے سے اس کو ورنہ میرا بھی جی جلا تھا

میر تقی میر

مآل اپنا ترے غم میں خدا جانے کہ کیا ہو گا

اکتوبر 6, 2015میر تقی میر،اساتذہ،غزلہوا،لکھا،لگا،کیا،گیا،گرا،آشنا،بکا،بھلا،جیا،رہا،سناadmin

دیوان اول غزل 89

بھلا ہو گا کچھ اک احوال اس سے یا برا ہو گا

مآل اپنا ترے غم میں خدا جانے کہ کیا ہو گا

تفحص فائدہ ناصح تدارک تجھ سے کیا ہو گا

وہی پاوے گا میرا درد دل جس کا لگا ہو گا

کسو کو شوق یارب بیش اس سے اور کیا ہو گا

قلم ہاتھ آگئی ہو گی تو سو سو خط لکھا ہو گا

دکانیں حسن کی آگے ترے تختہ ہوئی ہوں گی

جو تو بازار میں ہو گا تو یوسف کب بکا ہو گا

معیشت ہم فقیروں کی سی اخوان زماں سے کر

کوئی گالی بھی دے تو کہہ بھلا بھائی بھلا ہو گا

خیال اس بے وفا کا ہم نشیں اتنا نہیں اچھا

گماں رکھتے تھے ہم بھی یہ کہ ہم سے آشنا ہو گا

قیامت کرکے اب تعبیر جس کو کرتی ہے خلقت

وہ اس کوچے میں اک آشوب سا شاید ہوا ہو گا

عجب کیا ہے ہلاک عشق میں فرہاد و مجنوں کے

محبت روگ ہے کوئی کہ کم اس سے جیا ہو گا

نہ ہو کیوں غیرت گلزار وہ کوچہ خدا جانے

لہو اس خاک پر کن کن عزیزوں کا گرا ہو گا

بہت ہمسائے اس گلشن کے زنجیری رہا ہوں میں

کبھو تم نے بھی میرا شور نالوں کا سنا ہو گا

نہیں جز عرش جاگہ راہ میں لینے کو دم اس کے

قفس سے تن کے مرغ روح میرا جب رہا ہو گا

کہیں ہیں میر کو مارا گیا شب اس کے کوچے میں

کہیں وحشت میں شاید بیٹھے بیٹھے اٹھ گیا ہو گا

میر تقی میر

دس دن جو ہے یہ مہلت سو یاں دہا رہے گا

اکتوبر 6, 2015میر تقی میر،اساتذہ،غزلچُما،چھپا،کیا،جھکا،جا،جدا،دہا،سداadmin

دیوان اول غزل 88

ہم عشق میں نہ جانا غم ہی سدا رہے گا

دس دن جو ہے یہ مہلت سو یاں دہا رہے گا

برقع اٹھے پہ اس کے ہو گا جہان روشن

خورشید کا نکلنا کیونکر چھپا رہے گا

اک وہم سی رہی ہے اپنی نمود تن میں

آتے ہو اب تو آئو پھر ہم میں کیا رہے گا

مذکور یار ہم سے مت ہم نشیں کیا کر

دل جو بجا نہیں ہے پھر اس میں جا رہے گا

اس گل بغیر جیسے ابر بہار عاشق

نالاں جدا رہے گا روتا جدا رہے گا

دانستہ ہے تغافل غم کہنا اس سے حاصل

تم درد دل کہو گے وہ سر جھکا رہے گا

اب جھمکی اس کی تم نے دیکھی کبھو جو یارو

برسوں تلک اسی میں پھر دل سدا رہے گا

کس کس کو میر ان نے کہہ کر دیا ہے بوسہ

وہ ایک ہے مفتن یوں ہی چُما رہے گا

میر تقی میر

جیتا ہوں تو تجھی میں یہ دل لگا رہے گا

اکتوبر 6, 2015میر تقی میر،اساتذہ،غزللگا،مزہ،یا،کیا،پا،ا،بھلا،جلا،جاadmin

دیوان اول غزل 79

کب تک تو امتحاں میں مجھ سے جدا رہے گا

جیتا ہوں تو تجھی میں یہ دل لگا رہے گا

یاں ہجر اور ہم میں بگڑی ہے کب کی صحبت

زخم دل و نمک میں کب تک مزہ رہے گا

تو برسوں میں ملے ہے یاں فکر یہ رہے ہے

جی جائے گا ہمارا اک دم کو یا رہے گا

میرے نہ ہونے کا تو ہے اضطراب یوں ہی

آیا ہے جی لبوں پر اب کیا ہے جا رہے گا

غافل نہ رہیو ہرگز نادان داغ دل سے

بھڑکے گا جب یہ شعلہ تب گھر جلا رہے گا

مرنے پہ اپنے مت جا سالک طلب میں اس کی

گو سر کو کھورہے گا پر اس کو پا رہے گا

عمر عزیز ساری دل ہی کے غم میں گذری

بیمار عاشقی یہ کس دن بھلا رہے گا

دیدار کا تو وعدہ محشر میں دیکھ کر کر

بیمار غم میں تیرے تب تک تو کیا رہے گا

کیا ہے جو اٹھ گیا ہے پر بستۂ وفا ہے

قید حیات میں ہے تو میر آرہے گا

میر تقی میر

دشمن کے بھی دشمن پر ایسا نہ ہوا ہو گا

اکتوبر 6, 2015میر تقی میر،اساتذہ،غزلفردا،مارا،کیا،پیدا،ایسا،برپا،دریا،سودا،صحراadmin

دیوان اول غزل 54

اے دوست کوئی مجھ سا رسوا نہ ہوا ہو گا

دشمن کے بھی دشمن پر ایسا نہ ہوا ہو گا

اب اشک حنائی سے جو تر نہ کرے مژگاں

وہ تجھ کف رنگیں کا مارا نہ ہوا ہو گا

ٹک گور غریباں کی کر سیر کہ دنیا میں

ان ظلم رسیدوں پر کیا کیا نہ ہوا ہو گا

بے نالہ و بے زاری بے خستگی و خواری

امروز کبھی اپنا فردا نہ ہوا ہو گا

ہے قاعدئہ کلی یہ کوے محبت میں

دل گم جو ہوا ہو گا پیدا نہ ہوا ہو گا

اس کہنہ خرابے میں آبادی نہ کر منعم

یک شہر نہیں یاں جو صحرا نہ ہوا ہو گا

آنکھوں سے تری ہم کو ہے چشم کہ اب ہووے

جو فتنہ کہ دنیا میں برپا نہ ہوا ہو گا

جز مرتبۂ کل کو حاصل کرے ہے آخر

یک قطرہ نہ دیکھا جو دریا نہ ہوا ہو گا

صد نشتر مژگاں کے لگنے سے نہ نکلا خوں

آگے تجھے میر ایسا سودا نہ ہوا ہو گا

میر تقی میر

یا تو بیگانے ہی رہیے ہوجیے یا آشنا

اکتوبر 6, 2015میر تقی میر،اساتذہ،غزلہمارا،ہوتا،یا،کیا،کا،ایسا،اتنا،تھا،تا،جا،دریاadmin

دیوان اول غزل 30

کیا طرح ہے آشنا گاہے گہے نا آشنا

یا تو بیگانے ہی رہیے ہوجیے یا آشنا

پائمال صد جفا ناحق نہ ہو اے عندلیب

سبزئہ بیگانہ بھی تھا اس چمن کا آشنا

کون سے یہ بحرخوبی کی پریشاں زلف ہے

آتی ہے آنکھوں میں میری موج دریا آشنا

رونا ہی آتا ہے ہم کو دل ہوا جب سے جدا

جاے رونے ہی کی ہے جاوے جب ایسا آشنا

ناسمجھ ہے تو جو میری قدر نئیں کرتا کہ شوخ

کم بہت ملتا ہے پھر دلخواہ اتنا آشنا

بلبلیں پائیز میں کہتی تھیں ہوتا کاشکے

یک مژہ رنگ فراری اس چمن کا آشنا

کو گل و لالہ کہاں سنبل سمن ہم نسترن

خاک سے یکساں ہوئے ہیں ہائے کیا کیا آشنا

کیا کروں کس سے کہوں اتنا ہی بیگانہ ہے یار

سارے عالم میں نہیں پاتے کسی کا آشنا

جس سے میں چاہی وساطت ان نے یہ مجھ سے کہا

ہم تو کہتے گر میاں ہم سے وہ ہوتا آشنا

یوں سنا جا ہے کہ کرتا ہے سفر کا عزم جزم

ساتھ اب بیگانہ وضعوں کے ہمارا آشنا

شعر صائبؔ کا مناسب ہے ہماری اور سے

سامنے اس کے پڑھے گر یہ کوئی جا آشنا

تابجاں ما ہمرہیم و تا بمنزل دیگراں

فرق باشد جان ما از آشنا تا آشنا

داغ ہے تاباں علیہ الرحمہ کا چھاتی پہ میر

ہو نجات اس کو بچارا ہم سے بھی تھا آشنا

میر تقی میر

وہ زندگی کو بطورِ سزا قبول کرے

نومبر 17, 2013آفتاب اقبال شمیمکیا،حوصلہ،خدا،دوسرا،سزاadmin

آفتاب اقبال شمیم ۔ غزل نمبر 63

وفا یہی ہے کہ اُن کی رضا قبول کرے

وہ زندگی کو بطورِ سزا قبول کرے

رکھی ہے شرطِ ضرورت پہ منصفی کی اساس

خطا ہو اُس سے مگر دوسرا قبول کرے

برائے سیرِ شہر ہو اُفق اس کا

سوائے قیدِ مکاں اور کیا قبول کرے

یہ اور بات، ستم کی فضا نہیں بدلی

تری نیازِ دل و جاں ، خدا قبول کرے!

یہ سلسلہ تو چلے بارِ جبر ڈال اتنا

بقدرِ ظرف جسے حوصلہ قبول کرے

آفتاب اقبال شمیم

کوئی جواب مِثل آب سادہ و جاں فزا ملے

نومبر 15, 2013آفتاب اقبال شمیمفزا،کیا،پا،ابتدا،جگہ،ذراadmin

آفتاب اقبال شمیم ۔ غزل نمبر 35

تشنہ لبِ سوال کو دیکھئے کب شفا ملے

کوئی جواب مِثل آب سادہ و جاں فزا ملے

اپنی پرانی اصل پر آتا ہوں لوٹ لوٹ کر

سمجھوں میں انتہا جسے وہ مجھے ابتدا ملے

سرد حقیقتوں سے دور جبرِ یقین سے پرے

پائیں نمو، یہ ذہن و دل ایسی کوئی جگہ ملے

اپنے ہی آپ میں رہے گنجِ لئیم کی طرح

اُس بتِ خود پسند سے دل کی نیاز کیا ملے

ہار گیا ہوں بار بار، اتنا مگر ضرور ہے

ہاتھ قمار باز کا بدلا ہوا ذرا ملے

اُس جا تمہاری آس کیا اور ہماری یاس کیا

دھوپ جہاں سفر میں ہو سایہ گریز پا ملے

آفتاب اقبال شمیم

چاہا تو گھٹا لینا چاہا تو بڑھا لینا

نومبر 14, 2013آفتاب اقبال شمیممزا،نبھا،ڈھا،کیا،گنوا،بڑھاadmin

آفتاب اقبال شمیم ۔ غزل نمبر 10

سادہ سی حقیقت کو افسانہ بنا لینا

چاہا تو گھٹا لینا چاہا تو بڑھا لینا

ہو اوجِ مکاں جس جا معیار بلندی کا

ہم خاک نشینوں کو اُس شہر سے کیا لینا

کیوں تاکتے رہتے ہو رستے میں حسینوں کو

اس شغل میں تم اپنی آنکھیں نہ گنوا لینا

کچھ سہل نہیں ایسا، اِس دار کے موسم میں

سر تان کے چلنے کا اقرار نبھا لینا

یہ یاریاں ، یہ رشتے مضبوط بس اتنے ہیں

پرسوں کی عمارت کو اک آن میں ڈھا لینا

موجود ہیں کھونے میں گنجائشیں پانے کی

یعنی ہو زیاں جتنا اُتنا ہی مزا لینا

آفتاب اقبال شمیم

آسماں جتنا بڑا پینے کو دریا چاہئے

نومبر 14, 2013آفتاب اقبال شمیمملنا،کیا،دنیا،دیکھا،دریا،رہناadmin

آفتاب اقبال شمیم ۔ غزل نمبر 10

ہوں انا الصحرا کبھی پوچھو مجھے کیا چاہئے

آسماں جتنا بڑا پینے کو دریا چاہئے

اتنا سنجیدہ نہ ہو، سب مسخرے لگنے لگیں

زندگی کو نیم عریانی میں دیکھا چاہئے

جانتا ہوں کیوں یہ آسانی مجھے مشکل لگے

طے نہ کر پاؤں کہ کس قیمت پہ دنیا چاہئے

یہ رہا سامانِ دنیا، یہ رہے اسباب جاں

کوئی بتلاؤ مجھے ان کے عوض کیا چاہئے

کچھ نہیں تو اُس کے تسکینِ تغافل کے لئے

ایک دن اُس یارِ بے پروا سے ملنا چاہئے

یا زیاں کو سود سمجھو یا کہو سر پیٹ کر

سوچ کو حدِ مروج ہی میں رہنا چاہئے

آفتاب اقبال شمیم

فرد فرد

نومبر 14, 2013آفتاب اقبال شمیمچلا،واری،وصولی،کیا،پتھر،بھر،تر،حکم عدولی،خفا،خراب،دہائی،دور،سفرadmin

آفتاب اقبال شمیم ۔ غزل نمبر 2

آ یہیں ، عمر پسِ عمر گزاری جائے

جان سو بار اسی خاک پہ واری جائے

یہ جاہِ دنیا کروں گا کیا میں

تمہی سنبھالو اسے، چلا میں

انا کے اندر بھی اک انا ہے

وگرنہ کیوں خود سے ہوں خفا میں

تنہائی میں اک لمحے کو ٹھہرا کے امر کر لیتا ہوں

اور اپنے لہو کے رستے پر صدیوں کا سفر کر لیتا ہوں

احساس کی دو دنیاؤں میں جو دوری ہے، مجبوری ہے

تو جس پہ تبسم کرتا ہے میں آنکھیں تر کر لیتا ہوں

تو کیا ضرور ہے دل پر اثر لیا جائے

یہی طریقۂ دنیا ہے، کیا کیا جائے

پھر کیوں نہ دوسروں سے ہمیں اجتناب ہو

جب اپنے آپ سے ہی تعلق خراب ہو

ضبط کے گونگے سناٹے میں کوئی رہائی کب دے گا

وہ آنسو جو روک رکھا ہے اُس کو دہائی کب دے گا

کون تھا جو دور بھی رہ کر تمہارے اس تھا

وصل زار خواب میں شب بھر تمہارے پاس تھا

تم سے اے دنیا! یہ رشتہ تو ہمیشہ یہی رہا

سر ہمارے پاس تھا پتھر تمہارے پاس تھا

خدا تھا، کیا تھا مجھے بے شعور کر دیتا

تھکاوٹیں مرے جینے کی دور کر دیتا

کوئی مفاہمت بھی اُصولی نہ کر سکا

میں اپنے دل کی حکم عدولی نہ کر سکا

اک فاصلہ رہا مرا غم ناشناس سے

میں دادِ ناروا کی وصولی نہ کر سکا

آفتاب اقبال شمیم

ہم تہی دامنوں سے کیا لینا

اپریل 11, 2012فیض احمد فیض،غزلکیا،آزماadmin

فیض احمد فیض ۔ غزل نمبر 25

اپنے انعامِ حسن کے بدلے

ہم تہی دامنوں سے کیا لینا

آج فرقت زدوں پہ لطف کرو

پھر کبھی صبر آزما لینا

قطعہ

فیض احمد فیض

دل میں بکھری کوئی خوشبوئے قبا آخر شب

اپریل 11, 2012فیض احمد فیض،غزلقبا،وفا،کیا،گیا،دعا،صباadmin

فیض احمد فیض ۔ غزل نمبر 4

یاد کا پھر کوئی دروازہ کھُلا آخر شب

دل میں بکھری کوئی خوشبوئے قبا آخر شب

صبح پھوٹی تو وہ پہلو سے اُٹھا آخر شب

وہ جو اِک عمر سے آیا نہ گیا آخر شب

چاند سے ماند ستاروں نے کہا آخر شب

کون کرتا ہے وفا، عہدِ وفا آخر شب

لمسِ جانانہ لیے، مستیِ پیمانہ لیے

حمدِ باری کو اٹھے دستِ دعا آخر شب

گھر جو ویراں تھا سرِ شام وہ کیسے کیسے

فرقتِ یاد نے آباد کیا آخر شب

جس ادا سے کوئی آیا تھا کبھی اوؐلِ شب

اسی انداز سے چل بادِ صبا آخر شب

مخدوم کی یاد میں
ماسکو

فیض احمد فیض

ضبط کا حوصلہ نہیں باقی

اپریل 1, 2012فیض احمد فیض،نقش فریادی،غزلمزا،وفا،کیا،گلا،حوصلہadmin

فیض احمد فیض ۔ غزل نمبر 19

ہمت التجا نہیں باقی

ضبط کا حوصلہ نہیں باقی

اک تری دید چھن گئی مجھ سے

ورنہ دنیا میں کیا نہیں باقی

اپنی مشق ستم سے ہاتھ نہ کھینچ

میں نہیں یا وفا نہیں باقی

تیری چشم الم نواز کی خیر

دل میں کوئی گلا نہیں باقی

ہوچکا ختم عہد ہجرو وصال

زندگی میں مزا نہیں باقی

فیض احمد فیض

جو ان کی مختصر روداد بھی صبر آزما سمجھے

اپریل 1, 2012فیض احمد فیض،نقش فریادی،غزلمدعا،کیا،پا،آزما،اداadmin

فیض احمد فیض ۔ غزل نمبر 11

وہ عہد غم کی کاہش ہائے بے حاصل کو کیا سمجھے

جو ان کی مختصر روداد بھی صبر آزما سمجھے

یہاں دلبستگی، واں برہمی، کیا جانیے کیوں ہے؟

نہ ہم اپنی نظر سمجھے نہ ہم ان کی ادا سمجھے

فریب آرزو کی سہل انگاری نہیں جاتی

ہم اپنے دل کی دھڑکن کو تری آواز پا سمجھے

تمہاری ہر نظر سے منسلک ہے رشتۂ ہستی

مگر یہ دور کی باتیں کوئی نادان کیا سمجھے

نہ پوچھو عہد الفت کی، بس اک خوا ب پریشاں تھا

نہ دل کو راہ پر لائے نہ دل کا مدعا سمجھے

فیض احمد فیض

خرید لوں میں یہ نقلی دوا، جو تو چاہے

مارچ 5, 2012فردا،مجید امجد،غزلہوا،فیصلہ،مرتبہ،کیا،آسیا،دوا،ذرا،رضاadmin

مجید امجد ۔ غزل نمبر 187

بنے یہ زہر ہی وجہِ شفا، جو تو چاہے

خرید لوں میں یہ نقلی دوا، جو تو چاہے

یہ زرد پنکھڑیاں جن پر کہ حرف حرف ہوں میں

ہوائے شام میں مہکیں ذرا، جو تو چاہے

تجھے تو علم ہے، کیوں میں نے اس طرح چاہا

جو تو نے یوں نہیں چاہا تو کیا، جو تو چاہے

جب ایک سانس گھسے، ساتھ ایک نوٹ پسے

نظامِ زر کی حسیں آسیا، جو تو چاہے

بس اک تری ہی شکم سیر روح ہے آزاد

اب اے اسیرِ کمندِ ہوا، جو تو چاہے

ذرا شکوہِ دو عالم کے گنبدوں میں لرز

پھر اس کے بعد ترا فیصلہ، جو تو چاہے

سلام ان پہ، تہہِ تیغ بھی جنھوں نے کہا

جو تیرا حکم، جو تیری رضا، جو تو چاہے

جو تیرے باغ میں مزدوریاں کریں امجد

کھلیں وہ پھول بھی اک مرتبہ، جو تو چاہے

مجید امجد

میں عمر اپنے لیے بھی تو کچھ بچا رکھتا

مارچ 5, 2012فردا،مجید امجد،غزلڈھونڈھتا،کیا،کا،پتا،انتہا،بنا،جلا،جگا،سجا،عصاadmin

مجید امجد ۔ غزل نمبر 174

اور اَب یہ کہتا ہوں، یہ جرم تو روا رکھتا

میں عمر اپنے لیے بھی تو کچھ بچا رکھتا

خیال صبحوں، کرن ساحلوں کی اوٹ سدا

میں موتیوں جڑی بنسی کی لے جگا رکھتا

جب آسماں پہ خداؤں کے لفظ ٹکراتے

میں اپنی سوچ کی بےحرف لو جلا رکھتا

ہوا کے سایوں میں، ہجر اور ہجرتوں کے وہ خواب

میں اپنے دل میں وہ سب منزلیں سجا رکھتا

انھی حدوں تک ابھرتی یہ لہر جس میں ہوں میں

اگر میں سب یہ سمندر بھی وقت کا رکھتا

پلٹ پڑا ہوں شعاعوں کے چیتھڑے اوڑھے

نشیبِ زینۂ ایام پر عصا رکھتا

یہ کون ہے جو مری زندگی میں آ آ کر

ہے مجھ میں کھوئے مرے جی کو ڈھونڈھتا، رکھتا

غموں کے سبز تبسم سے کنج مہکے ہیں

سمے کے سم کے ثمر ہیں، میں اور کیا رکھتا

کسی خیال میں ہوں یا کسی خلا میں ہوں

کہاں ہوں، کوئی جہاں تو مرا پتا رکھتا

جو شکوہ اب ہے، یہی ابتدا میں تھا امجد

کریم تھا، مری کوشش میں انتہا رکھتا

مجید امجد

اک جیون ہار ڈر سا ہے ترے دل کے لیے

مارچ 4, 2012فردا،مجید امجد،غزلچمکا،کیا،کیسا،پنجرا،تنہا،زندہ،ساadmin

مجید امجد ۔ غزل نمبر 50

ان گنت امروں میں اور کیا ہے ترے دل کے لیے

اک جیون ہار ڈر سا ہے ترے دل کے لیے

رک کے اس دھارے میں کچھ سوچ اک یہ اچھا سا خیال

جو ترے حق میں ہے، کیسا ہے ترے دل کے لیے

اپنے جی میں جی، مگر اس یاد سے غافل نہ جی

جو کسی کے دل میں زندہ ہے ترے دل کے لیے

سب ضمیروں کے ثمر ہیں، پستیاں، سچائیاں

جانے تیرے ذہن میں کیا ہے ترے دل کے لیے

والہانہ رابطوں میں جبر کے پہلو بھی دیکھ

جو بھی دل ہے ایک پنجرا ہے ترے دل کے لیے

تو کہ اپنے ساتھ ہے اپنے بدن کے واسطے

کوئی تیرے ساتھ تنہا ہے ترے دل کے لیے

تیری پلکیں جھک گئیں امجد دیے جب یوں جلے

جانے کس کا ذکر چمکا ہے ترے دل کے لیے

مجید امجد

کیا دن تھے، جب خیالِ تمنا لباس تھا

مارچ 3, 2012مجید امجد،امروز،غزلکیا،کا،پردا،انوکھا،تمنا،سادہ،سراپاadmin

مجید امجد ۔ غزل نمبر 35

چہرہ اداس اداس تھا، میلا لباس تھا

کیا دن تھے، جب خیالِ تمنا لباس تھا

عریاں، زمانہ گیر، شررگوں جبلتیں

کچھ تھا تو ایک برگ دِل ان کا لباس تھا

اس موڑ پر ابھی جسے دیکھا ہے، کون تھا؟

سنبھلی ہوئی نگاہ تھی، سادہ لباس تھا

یادوں کے دھندلے دیس! کھلی چاندنی میں رات

تیرا سکوت کس کی صدا کا لباس تھا؟

ایسے بھی لوگ ہیں جنہیں پرکھا تو ان کی روح

بےپیرہن تھی، جسم سراپا لباس تھا

صدیوں کے گھاٹ پر، بھرے میلوں کی بھیڑ میں

اے دردِ شادماں، ترا کیا کیا لباس تھا

دیکھا تو دل کے سامنے، سایوں کے جشن میں

ہر عکسِ آرزو کا انوکھا لباس تھا

امجد، قبائے شہ تھی کہ چولا فقیر کا

ہر بھیس میں ضمیر کا پردا لباس تھا

مجید امجد

ہم نے ہر فکر کو فردا پہ اُٹھا رکھا ہے

جنوری 14, 2012عرفان صدیقی،غزللگا،وفا،کیا،کھلا،اُٹھا،اٹھا،بناadmin

عرفان صدیقی ۔ غزل نمبر 323

ابھی کھلنے کے لیے بند قبا رکھا ہے

ہم نے ہر فکر کو فردا پہ اُٹھا رکھا ہے

کیا چھپاؤں مرے مہتاب کہ تیرے آگے

دل کف دست کے مانند کھلا رکھا ہے

ہے مری خاک بدن آئینہ گر تیرا کمال

تونے کس چیز کو آئینہ بنا رکھا ہے

کیسی آنکھیں ہیں کہ دریاؤں کو پہچانتی ہیں

کیسا دل ہے کہ سرابوں سے لگا رکھا ہے

ایک ہی رنگ ہے، تیرے لب و رخسار کا رنگ

اور میرے ورق سادہ میں کیا رکھا ہے

MERGED ابھی کھلنے کے لیے بندِ قبا رکھا ہے

ہم نے ہر کام کو فردا پہ اٹھا رکھا ہے

کیا چھپاؤں مرے دلدار کہ تیرے آگے

دل کفِ دست کے مانند کھلا رکھا ہے

ہے مری خاکِ بدن آئینہ گر تیرا کمال

تو نے کس چیز کو آئینہ بنا رکھا ہے

ہم تعارف ہی سے دیوانے ہوئے جاتے ہیں

اور ابھی مرحلۂ کارِ وفا رکھا ہے

ایک ہی رنگ ترے اسم دل آویز کا رنگ

اور میرے ورقِ سادہ میں کیا رکھا ہے

عرفان صدیقی

برگ افتادہ! ابھی رقصِ ہوا ہونا ہے

جنوری 14, 2012عرفان صدیقی،غزلہوا،لکھا،کیا،بڑاadmin

عرفان صدیقی ۔ غزل نمبر 318

شاخ کے بعد زمیں سے بھی جدا ہونا ہے

برگ افتادہ! ابھی رقصِ ہوا ہونا ہے

ہم تو بارش ہیں خرابے کی ہمیں اگلے برس

در و دیوار کے چہرے پہ لکھا ہونا ہے

سر اگر سر ہے تو نیزوں سے شکایت کیسی

دل اگر دل ہے تو دریا سے بڑا ہونا ہے

کچھ تو کرنا ہے کہ پتھر نہ سمجھ لے سیلاب

ورنہ اس ریت کی دیوار سے کیا ہونا ہے

عرفان صدیقی

یہ کون شعبدہ گر ہے، یہ کیا تماشا ہے

جنوری 13, 2012عرفان صدیقی،غزلکیا،اکیلا،تماشا،دریا،رستہadmin

عرفان صدیقی ۔ غزل نمبر 304

جدھر بھی دیکھئے دل کی حریف دُنیا ہے

یہ کون شعبدہ گر ہے، یہ کیا تماشا ہے

ذرا بدن کسی موجِ رواں کو سونپ کے دیکھ

کنارِ آب مری جان سوچتا کیا ہے

تو کون ہیں یہ مرے ساتھ چلنے والے لوگ

وہ کہہ رہا تھا کہ ہر آدمی اکیلا ہے

رفاقتوں کو ذرا سوچنے کا موقع دو

کہ اس کے بعد گھنے جنگلوں کا رستہ ہے

خدا رکھے تری کھیتی ہری بھری، لیکن

تو اس پہ اتنا بھروسہ نہ کر، یہ دریا ہے

عرفان صدیقی

اے اندھیری بستیو! تم کو خدا روشن کرے

جنوری 12, 2012عرفان صدیقی،غزلہوا،کیا،حنا،خدا،دوسرا،دیا،دُعا،راستہadmin

عرفان صدیقی ۔ غزل نمبر 267

کوئی بجلی ان خرابوں میں گھٹا روشن کرے

اے اندھیری بستیو! تم کو خدا روشن کرے

ننھے ہونٹوں پر کھلیں معصوم لفظوں کے گلاب

اور ماتھے پر کوئی حرفِ دُعا روشن کرے

زرد چہروں پر بھی چمکے‘ سرخ جذبوں کی دھنک

سانولے ہاتھوں کو بھی رنگِ حنا روشن کرے

ایک لڑکا شہر کی رونق میں سب کچھ بھول جائے

ایک بڑھیا روز چوکھٹ پر دیا روشن کرے

خیر‘ اگر تم سے نہ جل پائیں وفاؤں کے چراغ

تم بجھانا مت جو کوئی دوسرا روشن کرے

آگ جلتی چھوڑ آئے ہو تو اب کیا فکر ہے

جانے کتنے شہر یہ پاگل ہوا روشن کرے

دل ہی فانوسِ وفا‘ دل ہی خس و خارِ ہوس

دیکھنا یہ ہے کہ اس کا قرب کیا روشن کرے

یا تو اس جنگل میں نکلے چاند تیرے نام کا

یا مرا ہی لفظ میرا راستہ روشن کرے

عرفان صدیقی

معرکوں کا فیصلہ ہو گا علیؑ آنے کو ہیں

جنوری 8, 2012عرفان صدیقی،غزلہوا،فیصلہ،لکھا،ملا،کیا،کھلا،پا،ادا،سلسلہ،عطاadmin

عرفان صدیقی ۔ غزل نمبر 175

خیمۂ نصرت بپا ہو گا علیؑ آنے کو ہیں

معرکوں کا فیصلہ ہو گا علیؑ آنے کو ہیں

دیکھتا ہوں آسمانوں پر غبار اُٹھتا ہوا

دلدلِ فرخندہ پا ہو گا علیؑ آنے کو ہیں

دُور اُفق تک ہر طرف روشن چراغوں کی قطار

داغ دل کا سلسلہ ہو گا علیؑ آنے کو ہیں

آئنے خوش ہیں کہ اُڑ جائے گی سب گردِ ملال

شہر میں رقصِ ہوا ہو گا علیؑ آنے کو ہیں

میں تو چپ تھا پھر زمانے کو خبر کیسے ہوئی

میرے چہرے پر لکھا ہو گا علیؑ آنے کو ہیں

ہو رہا ہے قید و بندِ رہزناں کا بند و بست

عاملوں کو خط ملا ہو گا علیؑ آنے کو ہیں

آج تک ہوتا رہا ظالم ترا سوچا ہوا

اب مرا چاہا ہوا ہو گا علیؑ آنے کو ہیں

جب اِدھر سے ہوکے گزرے گا گہر افشاں جلوس

میرا دروازہ کھلا ہو گا علیؑ آنے کو ہیں

چاکر دُنیا سے عرضِ مدّعا کیوں کیجیے

خسروِ دوراں سے کیا ہو گا علیؑ آنے کو ہیں

لفظ نذر شاہ کر دینے کی ساعت آئے گی

خلعتِ معنی عطا ہو گا علیؑ آنے کو ہیں

جان فرشِ راہ کر دینے کی ساعت آئے گی

زندگی کا حق ادا ہو گا علیؑ آنے کو ہیں

عرفان صدیقی

آؤ کہ اجر کار رسالت ادا کریں

جنوری 7, 2012عرفان صدیقی،غزلکیا،ادا،بقا،رہا،رضا،سوا،صدا،عزا،عطاadmin

عرفان صدیقی ۔ غزل نمبر 154

جاں نذر دے کے نصرت آل عبا کریں

آؤ کہ اجر کار رسالت ادا کریں

برپا کریں تو حشر کریں کربلا کے بعد

روشن اگر کریں تو چراغ عزا کریں

صدیوں سے سینہ زن ہے بدن میں لہو کی لہر

آج اس کو پیش تیغ ستم گر رہا کریں

صرف ایک سر ملا تھا سو نذرانہ کر دیا

اب ناصران معرکۂ صبر کیا کریں

صحرا میں شور کرتی ہیں موجیں فرات کی

زنداں میں جیسے اہل سلاسل صدا کریں

اس شاہ بے کساں پہ دل و روح و جاں نثار

مقدور ہو تو نذر کچھ اس سے سوا کریں

یاد آوران تشنہ دہانان کربلا

اس تشنگی کو چشمۂ آب بقا کریں

گریہ نشان جاں ہے مگر اس کے باوجود

مقتل مقام صبر و رضا ہے رضا کریں

تیرا قلم ولا کا علم ہے سو مجرئ

عباس تجھ کو ظل حمایت عطا کریں

عرفان صدیقی

میں جو گزرے ہوئے ہنگاموں کا خمیازا ہوں

جنوری 6, 2012عرفان صدیقی،غزلکیا،آئینہ،آتا،خمیازا،سنّاٹا،سکتا،شرماتاadmin

عرفان صدیقی ۔ غزل نمبر 139

دیکھ لے، آج تری بزم میں بھی تنہا ہوں

میں جو گزرے ہوئے ہنگاموں کا خمیازا ہوں

جانے کیا ٹھان کے اُٹھتا ہوں نکلنے کے لیے

جانے کیا سوچ کے دروازے سے لوٹ آتا ہوں

میرے ہر جزو کا ہے مجھ سے الگ ایک وجود

تم مجھے جتنا بگاڑو گے میں بن سکتا ہوں

مجھ میں رَقصاں کوئی آسیب ہے آوازوں کا

میں کسی اُجڑے ہوئے شہر کا سنّاٹا ہوں

اپنا ہی چہرہ اُنہیں مجھ میں دِکھائی دے گا

لوگ تصویر سمجھتے ہیں میں آئینہ ہوں

لمحۂ شوق ہوں، میری کوئی قیمت ہی نہیں

میں میسر تجھے آجاؤں تو مہنگا کیا ہوں

میں جھپٹنے کے لیے ڈُھونڈھ رہا ہوں موقع

اور وہ شوخ سمجھتا ہے کہ شرماتا ہوں

عرفان صدیقی

کیسا نالہ وہ فقیر بے نوا کرتا تھا رات

جنوری 4, 2012عرفان صدیقی،غزلہما،ہوا،فائدہ،ماجرا،نوا،نارسا،وفا،کیا،پا،آئینہ،آشنا،بجا،جلا،جدا،رونما،سیمیا،سرا،صداadmin

عرفان صدیقی ۔ غزل نمبر 84

بام و در پر ایک سنّاٹا عزا کرتا تھا رات

کیسا نالہ وہ فقیر بے نوا کرتا تھا رات

شہر ہوُ میں ایک ویرانی کا لشکر صف بہ صف

ہر طرف تاراج بازار و سرا کرتا تھا رات

اس خرابی کے مکاں میں ایک سایہ ایک نقش

ہم کلامی مجھ سے بے صوت و صدا کرتا تھا رات

اک غبارِ ساعتِ رفتہ کسی محراب سے

میرے چہرے میرے آگے رونما کرتا تھا رات

طاقِ تنہائی سے اٹھتا تھا چراغوں کا دھواں

اور مرے ہونے سے مجھ کو آشنا کرتا تھا رات

وہم دکھلاتا تھا مجھ کو روشنی کی تیرگی

وہم ہی میرے اندھیرے پر جلا کرتا تھا رات

روشنی کے ایک ربطِ رائیگاں کے باوجود

اک خلا آنکھوں سے منظر کو جدا کرتا تھا رات

تھا مرے باطن میں کوئی قصہ گو‘ وہ کون تھا

مجھ سے اک طرفہ حکایت ماجرا کرتا تھا رات

ہو گیا تھا تاجِ سر میرے لیے سودائے سر

سایۂ شب سر بسر کارِ ہما کرتا تھا رات

زہر شب میں کوئی دارو کارگر ہوتی نہ تھی

ہاں مگر اک زہر شب جو فائدہ کرتا تھا رات

جسم میں میرا لہو درویشِ گرداں کی طرح

لحظہ لحظہ پائے کوبی جا بجا کرتا تھا رات

زرد پتوں کے بکھرنے کی خبر دیتا ہوا

رقص میرے صحن میں پیکِ ہوا کرتا تھا رات

میں کوئی گوشہ گزیں‘ ترکِ وفا کا نوحہ گر

دیر تک تحریر تعویذ وفا کرتا تھا رات

کیا بشارت غرفۂ حیرت سے کرتی تھی نزول

کیا کرامت میرا حرفِ نارسا کرتا تھا رات

بند میرے کھولتا تھا کوئی آکر خواب میں

جاگتے میں پھر مجھے بے دست و پا کرتا تھا رات

رنگ روشن تھا سوادِ جاں میں اک تصویر کا

ایک چہرہ میری آنکھیں آئینہ کرتا تھا رات

مجھ کو اپنا ہی گماں ہوتا تھا ہر تمثال پر

کوئی مجھ سے کاروبارِ سیمیا کرتا تھا رات

صبح سورج نے اسی حجرے میں پھر پایا مجھے

میں کہاں تھا کیا خبر عرفانؔ کیا کرتا تھا رات

عرفان صدیقی

آگ میں انسانیت ہے کربلا نیزے پہ ہے

دسمبر 1, 2007منصور آفاق،شعراء،غزلقبا،کیا،کربلا،پھرسوا،ثناadmin

منصور آفاق ۔ غزل نمبر 626

ہر قدم تلوار پر ہے ، ہر نگہ نیزے پہ ہے

آگ میں انسانیت ہے کربلا نیزے پہ ہے

دوپہر ہے موت کی گرمی ہے کالی رات میں

ظلم کا مصنوعی سورج پھرسوا نیزے پہ ہے

جاہلوں کے شہر میں ہے بے دماغوں کا خرام

علم کی دستار مٹی میں ، قبا نیزے پہ ہے

میں اسی کے راستے پر چل رہا ہوں دشت میں

ہاں وہی جس شخص کی حمدو ثنا نیزے پہ ہے

ہے محمدﷺکے نواسے سی شبیہ منصور کچھ

دیکھ کچھ نزدیک جا کر، دیکھ کیا نیزے پہ ہے

منصور آفاق

ہے لام حرکتِ لا ، لا الہ الا اللہ

دسمبر 1, 2007منصور آفاق،شعراء،غزللکھا،لا،کہا،کیا،پڑھا،بادصبا،دعا،سوا،صداadmin

منصور آفاق ۔ غزل نمبر 424

الف ہے حرفِ الہ، لا الہ الا اللہ

ہے لام حرکتِ لا ، لا الہ الا اللہ

یہ میم ،میمِ محمد رسول اللہ ہے

یہی خدا نے کہا،لا الہ الا اللہ

یہی ہے برقِ تجلی،یہی چراغ طور

یہی زمیں کی صدا،لا الہ الا اللہ

کرن کرن میں مچلتی ہے خوشبوئے لولاک

خرامِ بادصبا،لا الہ الا اللہ

نگارِ قوسِ قزح کے جمیل رنگوں سے

وہ بادلوں نے لکھا،لا الہ الا اللہ

سنائی دے یہی غنچوں کے بھی چٹکنے سے

کھلے ہیں دستِ دعا،لا الہ الا اللہ

وہی وجودہے واحد،وہی اکیلا ہے

کوئی نہ اُس کے سوا ،لا الہ الا اللہ

وہ کس کے قربِ مقدس کی دلربائی تھی

تھاکنکروں نے پڑھا ،لا الہ الا اللہ

ہر ایک دل کے غلافِ مہین پر منصور

کشید کس نے کیا ، لا الہ الا اللہ

منصور آفاق

ہمارے اور تمہارے خدا علیحدہ ہیں

دسمبر 1, 2007منصور آفاق،شعراء،غزلنما،وفا،کیا،ادا،تھا،خداadmin

منصور آفاق ۔ غزل نمبر 379

یزید زاد الگ، کربلا علیحدہ ہیں

ہمارے اور تمہارے خدا علیحدہ ہیں

نمازِ جسم میں کعبہ کی سمت لازم ہے

نمازِ عشق کے قبلہ نما علیحدہ ہیں

مرے فراق کے جلتے ہوئے سیہ موسم

تمہی کہو مری جاں ! تم سے کیا علیحدہ ہیں

سمجھ رہی ہو محبت میں وصل کو تعبیر

ہمارے خواب میں کہتا نہ تھا، علیحدہ ہیں

ہماری دھج کو نظر بھر کے دیکھتے ہیں لوگ

ہجوم شہر میں ہم کج ادا علیحدہ ہیں

سیاہ بختی ٹپکتی ہے ایک تو چھت سے

ترے ستم مری جانِ وفا علیحدہ ہیں

منصور آفاق

آئینہ دیکھ کے میں حمد و ثنا کرتا ہوں

دسمبر 1, 2007منصور آفاق،شعراء،غزلکیا،پا،پتہ،ادا،ثنا،دعا،رہاadmin

منصور آفاق ۔ غزل نمبر 279

در کوئی جنتِ پندار کا وا کرتا ہوں

آئینہ دیکھ کے میں حمد و ثنا کرتا ہوں

رات اور دن کے کناروں کے تعلق کی قسم

وقت ملتے ہیں تو ملنے کی دعا کرتا ہوں

وہ ترا، اونچی حویلی کے قفس میں رہنا

یاد آئے تو پرندوں کو رہا کرتا ہوں

پہلے خود آپ بناتا ہوں تماشا اپنا

پھر تماشائی کا کردار ادا کرتا ہوں

پوچھتا رہتا ہوں موجوں سے گہر کی خبریں

اشکِ گم گشتہ کا دریا سے پتہ کرتا ہوں

کبھی آنکھوں سے بھری راہ گزر مجھ پہ گراں

دشت پیمائی کبھی آبلہ پا کرتا ہوں

مجھ سے منصور کسی نے تو یہ پوچھا ہوتا

ننگے پاؤں میں ترے شہر میں کیا کرتا ہوں

منصور آفاق

سلام تجھ پہ ہو، باد صبا سلامتی ہو

دسمبر 1, 2007منصور آفاق،شعراء،غزلہوا،کہا،کیا،باوفا،بجا،ثنا،خدا،دیا،دعا،صبا،صدا،ضیاadmin

منصور آفاق ۔ غزل نمبر 236

تُو لائے یار کی خوشبو، سدا سلامتی ہو

سلام تجھ پہ ہو، باد صبا سلامتی ہو

میں دھڑکنوں کے تلاطم سے لطف لیتا ہوں

ہزار وحشتِ موجِ ہوا سلامتی ہو

مری حیاتِ گذشتہ سے لوٹ آتی ہوئی

صباحتِ لب و رخ کی صدا سلامتی ہو

ملالِ شامِ مسلسل کی حکمرانی ہے

الم نصیب، دلِ باوفا سلامتی ہو

تمام کون و مکاں کے لیے دعائے خیر

فقط یہاں ہی نہیں جا بجا سلامتی ہو

وہاں بچھانی ہے اک جانماز میں نے بھی

کنارِ چشمہء حمد و ثنا سلامتی ہو

میں چل رہا تھا کسی بد کلام بستی میں

کسی نے مجھ کو اچانک کہا سلامتی ہو

سیاہ دن سے گزرتی ہوئی سفید قبا

اٹھے ہوئے ہیں یہ دست دعا سلامتی ہو

پڑوس میں بھی ترے دم سے کچھ اجالا ہے

سلامتی مرے گھر کا دیا سلامتی ہو

میں خوشہ چین ہوں غالب ترے گلستاں کا

اے کائناتِ سخن کے خدا سلامتی ہو

شبِ فراق چمکتی ہے تیرے جلووں سے

اے مہتاب کی دھیمی ضیا سلامتی ہو

یہیں پہ خیر بھی رہتی ہے شر بھی ہے آباد

مری زمین پہ منصور کیا سلامتی ہو

منصور آفاق

وہ میرے ساتھ کوئی دن رہا تو اس نے کہا

دسمبر 1, 2007منصور آفاق،شعراء،غزلہوا،مرگیا،کیا،گرا،پڑا،دیا،رہا،سناadmin

منصور آفاق ۔ غزل نمبر 107

میں زندگی ہوں وہ جانے لگا تو اس نے کہا

وہ میرے ساتھ کوئی دن رہا تو اس نے کہا

مجھے زمین سے رکھنے ہیں اب مراسم بس

جب آسماں نے فسردہ کیا تو اس نے کہا

میں تتلیوں کے تعاقب میں جانے والا ہوں

کسی نے ماتھے پہ بوسہ دیا تو اس نے کہا

اداس رہنے کی عادت ہے مجھ کو ویسے ہی

گلی میں اس کی کوئی مرگیا تو اس نے کہا

مجھے بھی شام کی تنہائی اچھی لگتی ہے

مری اداسی کا قصہ سنا تو اس نے کہا

خیال رکھنا تجھے دل کا عارضہ بھی ہے

جب اس کے سامنے میں رو پڑا تو اس نے کہا

مجھے تو رات کی نیت خراب لگتی ہے

چراغ ہاتھ سے میرے گرا تو اس نے کہا

کوئی فرشتوں کی مجھ سے تھی دشمنی منصور

پڑھا نصیب کا لکھا ہوا تو اس نے کہا

منصور آفاق

لیکن اٹھی نہیں کوئی چشمِ سوالیا

دسمبر 1, 2007منصور آفاق،شعراء،غزللیا،مرثیہ،کیا،جیا،دیا،سوالیاadmin

منصور آفاق ۔ غزل نمبر 2

مدت کے بعد گاؤں میں آیا ہے ڈاکیا

لیکن اٹھی نہیں کوئی چشمِ سوالیا

رہنے کو آئی تھی کوئی زہرہ جبیں مگر

دل کا مکان درد نے خالی نہیں کیا

جو زندگی کی آخری ہچکی پہ گل ہوئی

اک شخص انتظار کی اس رات تک جیا

پوچھی گئی کسی سے جب اس کی کوئی پسند

آہستگی سے اس نے مرا نام لے لیا

تارے بجھے تمام، ہوئی رات راکھ راکھ

لیکن مزارِ چشم پہ جلتا رہا دیا

تکیے پہ بُن رہا ہے ترا شاعرِ فراق

منصور موتیوں سے محبت کا مرثیہ

منصور آفاق

گرچہ اُترے جی سے دل اکثر ابا کرتا رہا

نومبر 16, 2006الطاف حسین حالینشوونما،کہا،کیا،ابا،ادا،جفا،خطا،رواadmin

الطاف حسین حالی ۔ غزل نمبر 28

نفس دعویٰ بے گناہی کا سدا کرتا رہا

گرچہ اُترے جی سے دل اکثر ابا کرتا رہا

حق نے احساں نہ کی اور میں نے کفراں میں کمی

وہ عطا کرتا رہا اور میں خطا کرتا رہا

چوریوں سے دیدہ و دل کی نہ شرمایا کبھی

چپکے چپکے نفس خائن کا کہا کرتا رہا

طاعنوں کی زد سے بچ بچ کر چلا راہ خطا

وار ان کا اس لئے اکثر خطا کرتا رہا

نفس میں جو ناروا خواہش ہوئی پیدا کبھی

اس کو حیلے دل سے گھڑ گھڑ کر روا کرتا رہا

منہ نہ دیکھیں دوست پھر میرا اگر جائیں کہ میں

اُس سے کیا کہتا رہا اور آپ کیا کرتا رہا

تھا نہ استحقاق تحسیں پر سنی تحسیں سدا

حق ہے جود و ہمتی کا وہ ادا کرتا رہا

شہرت اپنی جس قدر بڑھتی گئی آفاق میں

کبر نفس اتنا ہی یا نشوونما کرتا رہا

ایک عالم سے وفا کی تو نے اے حالیؔ مگر

نفس سے اپنے سدا ظالم جفا کرتا رہا

الطاف حسین حالی

میری ہی طرح تو بھی غیروں سے خفا ہوتا

نومبر 15, 2006الطاف حسین حالیکیا،خفا،سناadmin

الطاف حسین حالی ۔ غزل نمبر 22

کچھ اپنی حقیقت کی گر تجھ کو خبر ہوتی

میری ہی طرح تو بھی غیروں سے خفا ہوتا

جو دل پہ گزرتی ہے کیا تجھ کو خبر ناصح

گر آج نہ تم آتے کیا جانئے کیا ہوتا

کل حالیؔ دیوانہ کہتا تھا کچھ افسانہ

سننے ہی کے قابل تھا تم نے بھی سنا ہوتا

الطاف حسین حالی

کبھی اس گھر میں آ نکلے کبھی اُس گھر میں جا ٹھہرے

نومبر 20, 2005امیر مینائی،غزلمرا،وفا،کہا،کیا،آشنا،بلا،جا،جدا،حیا،دوا،دعا،ذراadmin

امیر مینائی ۔ غزل نمبر 41

فنا کیسی بقا کیسی جب اُس کے آشنا ٹھہرے

کبھی اس گھر میں آ نکلے کبھی اُس گھر میں جا ٹھہرے

نہ ٹھہرا وصل، کاش اب قتل ہی پر فیصلا ٹھہرے

کہاں تک دل مرا تڑپے کہاں تک دم مرا ٹھہرے

جفا دیکھو جنازے پر مرے آئے تو فرمایا

کہو تم بے وفا ٹھہرے کہ اب ہم بے وفا ٹھہرے

تہ خنجر بھی منہ موڑا نہ قاتل کی اطاعت سے

تڑپنے کو کہا تڑپے ، ٹھہرنے کو کہا ٹھہرے

زہے قسمت حسینوں کی بُرائی بھی بھلائی ہے

کریں یہ چشم پوشی بھی تو نظروں میں حیا ٹھہرے

یہ عالم بیقراری کا ہے جب آغاز الفت میں

دھڑکتا ہے دل اپنا دیکھئے انجام کیا ٹھہرے

حقیقت کھول دی آئینہ وحدت نے دونوں کی

نہ تم ہم سے جدا ٹھہرے ، نہ ہم تم سے جدا ٹھہرے

دل مضطر سے کہہ دو تھوڑے تھوڑے سب مزے چکھے

ذرا بہکے ذرا سنبھلے ذرا تڑپے ذرا ٹھہرے

شب وصلت قریب آنے نہ پائے کوئی خلوت میں

ادب ہم سے جدا ٹھہرے حیا تم سے جدا ٹھہرے

اٹھو جاؤ سدھا رو ، کیوں مرے مردے پہ روتے ہو

ٹھہرنے کا گیا وقت اب اگر ٹھہرے تو کیا ٹھہرے

نہ تڑپا چارہ گر کے سامنے اے درد یوں مجھ کو

کہیں ایسا نہ ہو یہ بھی تقاضائے دوا ٹھہرے

ابھی جی بھر کے وصل یار کی لذت نہیں اٹھی

کوئی دم اور آغوش اجابت میں دعا ٹھہرے

خیال یار آنکلا مرے دل میں تو یوں بولا

یہ دیوانوں کی بستی ہے یہاں میری بلا ٹھہرے

امیر آیا جو وقت بد تو سب نے راہ لی اپنی

ہزاروں سیکڑوں میں درد و غم دو آشنا ٹھہرے

امیر مینائی

اپنے سب کام بگڑ کر وہ بنا لیتے ہیں

نومبر 20, 2005امیر مینائی،غزلکیا،بنا،بڑھا،بٹھاadmin

امیر مینائی ۔ غزل نمبر 32

دل جُدا، مال جدا، جان جدا لیتے ہیں

اپنے سب کام بگڑ کر وہ بنا لیتے ہیں

مجلسِ وعظ میں جب بیٹھتے ہیں ہم مے کش

دخترِ رز کو بھی پہلو میں بٹھا لیتے ہیں

دھیان میں لا کے ترا سلسلۂ زلف دراز

ہم شبِ ہجر کو کچھ اور بڑھا لیتے ہیں؟

ایک بوسے کے عوض مانگتے ہیں دل کیا خوب

جی میں سوچیں تو وہ کیا دیتے ہیں کیا لیتے ہیں؟

اپنی محفل سے اُٹھاتے ہیں عبث ہم کو حضور

چُپ کے بیٹھے ہیں الگ، آپ کا کیا لیتے ہیں؟

امیر مینائی

ہر رہ گزر میں راہ تری دیکھتا ہوں میں

نومبر 20, 2005امیر مینائی،غزلقضا،کیا،پڑا،بنا،خدا،خطا،دیکھتاadmin

امیر مینائی ۔ غزل نمبر 29

وا کردہ چشم دل صفتِ نقش پا ہوں میں

ہر رہ گزر میں راہ تری دیکھتا ہوں میں

مطلب جو اپنے اپنے کہے عاشقوں نے سب

وہ بُت بگڑ کے بول اُٹھا ، کیا خدا ہوں میں

اے انقلابِ دہر، مٹاتا ہے کیوں مجھے

نقشے ہزاروں مٹ گئے ہیں تب بنا ہوں میں

محنت یہ کی کہ فکر کا ناخن بھی گھِس گیا

عقدہ یہ آج تک نہ کھُلا مجھ پہ کیا ہوں میں

رسوا ہوئے جو آپ تو میرا قصور کیا؟

جو کچھ کیا وہ دل نے کیا، بے خطا ہوں میں

مقتل ہے میری جاں کو وہ جلوہ گاہِ ناز

دل سے ادا یہ کہتی ہے تیری قضا ہوں میں

مانندِ سبزہ اُس چمنِ دہر میں امیر

بیگانہ وار ایک کنارے پڑا ہوں میں

امیر مینائی

سب تڑپنے بلبلانے کا مزہ جاتا رہا

نومبر 19, 2005امیر مینائی،غزلمزہ،ولولہ،کیا،گلہ،جھانکنا،حیا،خدا،رہاadmin

امیر مینائی ۔ غزل نمبر 11

ایک دل ہم دم مرے پہلو سے کیا جاتا رہا

سب تڑپنے بلبلانے کا مزہ جاتا رہا

سب کرشمے تھے جوانی کے ، جوانی کیا گئی

وہ امنگیں مٹ گئیں وہ ولولہ جاتا رہا

آنے والا جانے والا، بے کسی میں کون تھا

ہاں مگر اک دم غریب، آتا رہا جاتا رہا

مرگیا میں جب ، تو ظالم نے کہا کہ افسوس آج

ہائے ظالم ہائے ظالم کا مزہ جاتا رہا

شربت دیدار سے تسکین سی کچھ ہو گئی

دیکھ لینے سے دوا کے ، درد کیا جاتا رہا

مجھ کو گلیوں میں جو دیکھا ، چھیڑ کر کہنے لگے

کیوں میاں کیا ڈھونڈتے پھرتے ہو، کیا جاتا رہا

جب تلک تم تھے کشیدہ دل تھا شکووں سے بھرا

جب گلے سے مل گئے، سارا گلہ جاتا رہا

ہائے وہ صبحِ شبِ وصل، ان کا کہنا شرم سے

اب تو میری بے وفائی کا گلہ جاتا رہا

دل وہی آنکھیں وہی، لیکن جوانی وہ کہاں

ہائے اب وہ تاکنا وہ جھانکنا جاتا رہا

گھورتے دیکھا جو ہم چشموں کو جھنجھلا کر کہا

کیا لحاظ آنکھوں کا بھی او بے حیا جاتا رہا

کیا بری شے ہے جوانی رات دن ہے تاک جھانک

ڈر توں کا ایک طرف ، خوف خدا جاتا رہا

کھو گیا دل کھو گیا، رہتا تو کیا ہوتا امیر

جانے دو اک بے وفا جاتا رہا جاتا رہا

امیر مینائی

دل ترے درد کے سوا کیا ہے

جنوری 8, 1972باقی صدیقی،شعراء،غزلفاصلہ،مدعا،ناروا،کیا،پا،سوا،صباadmin

باقی صدیقی ۔ غزل نمبر 248

کیا بتاؤں کہ مدعا کیا ہے

دل ترے درد کے سوا کیا ہے

دور تاروں کی انجمن جیسے

زندگی دیکھنے میں کیا کیا ہے

ہر قدم پر نیا تماشا ہو

اور دنیا کا مدعا کیا ہے

کوئی لائے پیام فصل بہار

ہم نہیں جانتے صبا کیا ہے

درد کی انتہا نہیں کوئی

ورنہ عمر گریز پا کیا ہے

آپ بیٹھے ہیں درمیاں ورنہ

مرگ و ہستی میں فاصلہ کیا ہے

نہ رہا جب خلوص ہی باقیؔ

پھر روا کیا ہے ناروا کیا ہے

باقی صدیقی

اہل غم جانے تجھ کو کیا سمجھے

جنوری 8, 1972باقی صدیقی،شعراء،غزلکیا،ادا،دوا،ضیاadmin

باقی صدیقی ۔ غزل نمبر 233

بات کو جرم ناسزا سمجھے

اہل غم جانے تجھ کو کیا سمجھے

اپنے دعوے کو کیا غلط کہتے

تیری نفرت کو بھی ادا سمجھے

چھوڑئیے بھی اب آئینے کا خیال

دیکھ پائے کوئی تو کیا سمجھے

اک ستارہ فلک سے ٹوٹا تھا

ہم جسے صبح کی ضیا سمجھے

اس کے غم کا علاج کیا باقیؔ

جو محبت ہی کو دوا سمجھے

باقی صدیقی

تصویر کا رُخ ایک ہی رہتا ہے سامنے

جنوری 8, 1972باقی صدیقی،شعراء،غزلکیا،تمنا،رہتا،سایہadmin

باقی صدیقی ۔ غزل نمبر 225

اپنی نظر کے دام سے نکلے نہ ہم کہیں

تصویر کا رُخ ایک ہی رہتا ہے سامنے

سر پھوڑتا کہ دل کا سکوں دیکھتا کوئی

دیوار سامنے کبھی سایہ ہے سامنے

ہے موت کا خیال بھی کس درجہ دلخراش

اور صورت حیات بھی کیا کیا ہے سامنے

یہ خار ہے کہ تیرِ غم زندگی کوئی

یہ پھول ہے کہ اپنی تمنا ہے سامنے

باقی صدیقی

رات بھر کیا صدائے پا سنتے

جنوری 8, 1972باقی صدیقی،شعراء،غزلنوا،کیا،کا،پا،صبا،صداadmin

باقی صدیقی ۔ غزل نمبر 197

سو گئے دل کا ماجرا سنتے

رات بھر کیا صدائے پا سنتے

گو خموشی نہیں غموں کا علاج

پھر بھی کیا کہتے اور کیا سنتے

کارواں بھی گریز پا نکلا

ورنہ کیا کیا شکستہ پا سنتے

غم ہستی کا روگ کیا معنی

چل کے نغمہ بہار کا سنتے

کسی کنج طرب میں دم لیتے

مرغ آزاد کی نوا سنتے

حسن سرو و سمن کے پردے ہیں

داستان غم صبا سنتے

جرس غنچۂ امید کے ساتھ

طوق و زنجیر کی صدا سنتے

گاؤں جا کر کرو گے کیا باقیؔ

شور کچھ دیر شہر کا سنتے

باقی صدیقی

ایک طوفاں کی ابتدا ہو جائے

جنوری 8, 1972باقی صدیقی،شعراء،غزلکیا،ابتدا،خطا،روا،سواadmin

باقی صدیقی ۔ غزل نمبر 187

موج ساحل سے جب جدا ہو جائے

ایک طوفاں کی ابتدا ہو جائے

لاکھ مجبوریاں سہی لیکن

آپ چاہیں تو کیا سے کیا ہو جائے

ہم کہیں جو روا نہیں لیکن

تم کہو جو وہی روا ہو جائے

تیری رحمت پہ اس قدر ہے یقین

جب خیال آئے اک خطا ہو جائے

دل انوکھا چراغ ہے باقیؔ

جب بجھے روشنی سوا ہو جائے

باقی صدیقی

ایک طوفاں کی ابتدا ہو گی

جنوری 8, 1972باقی صدیقی،شعراء،غزلناروا،کیا،ابتدا،سواadmin

باقی صدیقی ۔ غزل نمبر 169

موج ساحل سے جب جدا ہو گی

ایک طوفاں کی ابتدا ہو گی

مجھ سے پوچھو نہ داستاں میری

میری ہر بات ناروا ہو گی

مدعا خامشی تک آ پہنچا

اب نگاہوں سے بات کیا ہو گی

دل انوکھا چراغ ہے باقیؔ

بجھ کے بھی روشنی سوا ہو گی

باقی صدیقی

کس سے ہم آس لگا بیٹھے ہیں

جنوری 8, 1972باقی صدیقی،شعراء،غزللگا،وفا،کیا،پا،آ،بنا،سنا،صداadmin

باقی صدیقی ۔ غزل نمبر 130

راہ میں شمع جلا بیٹھے ہیں

کس سے ہم آس لگا بیٹھے ہیں

رنگ محفل سے ہمیں کیا مطلب

جانے کیا سوچ کے آ بیٹھے ہیں

ختم ہوتی نہیں دل کی باتیں

اپنا قصہ تو سنا بیٹھے ہیں

کون سنتا ہے کسی کی آواز

ہم ابھی کر کے صدا بیٹھے ہیں

مسکرایا ہے زمانہ کیا کیا

کھا کے جب تیر وفا بیٹھے ہیں

خود کو دیکھا تو نہ پہچان سکے

ہم بھی کیا حال بنا بیٹھے ہیں

ابھی کچھ ملتے ہیں منزل کے سراغ

ابھی کچھ آبلہ پا بیٹھے ہیں

منزلوں رہ گئے پیچھے باقیؔ

وہ گھڑی راہ میں کیا بیٹھے ہیں

باقی صدیقی

اپنی زنجیر ہلا دیتے ہیں

جنوری 8, 1972باقی صدیقی،شعراء،غزلہلا،کیا،گرا،پا،اٹّھا،بڑھا،سناadmin

باقی صدیقی ۔ غزل نمبر 129

یوں بھی ہونے کا پتا دیتے ہیں

اپنی زنجیر ہلا دیتے ہیں

پہلے ہر بات پہ ہم سوچتے تھے

اب فقط ہاتھ اٹّھا دیتے ہیں

قافلہ آج کہاں ٹھہرے گا

کیا خبر آبلہ پا دیتے ہیں

بعض اوقات ہوا کے جھونکے

لو چراغوں کی بڑھا دیتے ہیں

دل میں جب بات نہیں رہ سکتی

کسی پتھر کو سنا دیتے ہیں

ایک دیوار اٹھانے کے لئے

ایک دیوار گرا دیتے ہیں

سوچتے ہیں سر ساحل باقیؔ

یہ سمندر ہمیں کیا دیتے ہیں

باقی صدیقی

درد دل مانگ کے پھر کیا مانگیں

جنوری 8, 1972باقی صدیقی،شعراء،غزلقطرہ،کیا،بینا،تمنا،تماشا،رستہ،سایہ،صحراadmin

باقی صدیقی ۔ غزل نمبر 118

موج ہاتھ آئے تو دریا مانگیں

درد دل مانگ کے پھر کیا مانگیں

کیا ملا انجمن آرائی سے

کیسے تنہائی سے رستہ مانگیں

دست کوتاہ نہیں دست طلب

مانگنے والوں سے ہم کیا مانگیں

دل کو غم ہائے جہاں سے فرصت

تجھ سے کیا تیری تمنا مانگیں

کس قدر تاب نظر ہے کس کو

کس لئے دیدہ بینا مانگیں

شہر کا شہر کڑی دھوپ میں ہے

کس کی دیوار سے سایہ مانگیں

کبھی قطرے کو بحسرت دیکھیں

کبھی دریا سے نہ قطرہ مانگیں

کبھی اک ذرے میں گم ہو جائیں

کبھی ہم وسعت صحرا مانگیں

تاب نظارا نہیں ہے باقیؔ

پھر بھی ہم طرفہ تماشا مانگیں

باقی صدیقی

آپ ہوں یا ہوا کا جھونکا ہو

جنوری 8, 1972باقی صدیقی،شعراء،غزلکیا،اپنا،جلتا،جھونکا،رہتا،سنتاadmin

باقی صدیقی ۔ غزل نمبر 95

کوئی نغمہ تو در سے پیدا ہو

آپ ہوں یا ہوا کا جھونکا ہو

وہ نظر بھی نہ دے سکی تسکیں

اے دل بے قرار اب کیا ہو

کام آتے نہیں تماشائی

ایک ساتھی ہو اور اپنا ہو

وہ اندھیروں کے طور کیا جانے

جس کے گھر میں چراغ جلتا ہو

دل سے اک بات کر رہے ہیں ہم

پاس بیٹھا نہ کوئی سنتا ہو

اس کے غم کا علاج کیا باقیؔ

بے سبب جو اداس رہتا ہو

باقی صدیقی

درخت سے ہمیں سایہ جدا نظر آیا

جنوری 8, 1972شعراء،غزلہوا،فاصلہ،کیا،آشنا،جدا،سلسلہadmin

باقی صدیقی ۔ غزل نمبر 66

تری نگاہ کا انداز کیا نظر آیا

درخت سے ہمیں سایہ جدا نظر آیا

بہت قریب سے آواز ایک آئی تھی

مگر چلے تو بڑا فاصلہ نظر آیا

یہ راستے کی لکیریں بھی گم نہ ہو جائیں

وہ جھاڑیوں کا نیا سلسلہ نظر آیا

یہ روشنی کی کرن ہے کہ آگ کا شعلہ

ہر ایک گھر مجھے جلتا ہوا نظر آیا

کلی کلی کی صدا گونجنے لگی دل میں

جہاں بھی کوئی چمن آشنا نظر آیا

بتاؤ کس لئے پتھر اٹھائے پھرتے ہو

کہو تو آئنہ خانے میں کیا نظر آیا

یہ دوپہر یہ پگھلتی ہوئی سڑک باقیؔ

ہر ایک شخص پھسلتا ہوا نظر آیا

باقی صدیقی

رہ کے گلشن میں بھی کیا کیجے گا

جنوری 8, 1972شعراء،غزللڑا،ملا،کیا،گلا،دعا،صباadmin

باقی صدیقی ۔ غزل نمبر 53

سیر مانند صبا کیجے گا

رہ کے گلشن میں بھی کیا کیجے گا

کس توقع پہ صدا کیجے گا

نہ سنے کوئی تو کیا کیجے گا

حق پرستی ہے بڑی بات مگر

روز کس کس سے لڑا کیجے گا

بن گئے لالہ و گل جز و قفس

کس سے اب ذکر صبا کیجے گا

دوستی شرط نہیں ہے کوئی

بس یونہی ہم سے ملا کیجے گا

لو سلام سر رہ سے بھی گئے

اور جا جا کے گلا کیجے گا

طوف کعبہ کو گئے تو باقیؔ

میرے حق میں بھی دعا کیجے گا

باقی صدیقی

تو جہاں آخری پردا ہو گا

جنوری 8, 1972شعراء،غزلنقشہ،چلتا،چرچا،کیا،پردا،بینا،بیٹھا،تنہا،جھگڑا،دیکھا،دھندلا،سمجھتاadmin

باقی صدیقی ۔ غزل نمبر 51

وہ مقام دل و جاں کیا ہو گا

تُو جہاں آخری پردا ہو گا

منزلیں راستہ بن جاتی ہیں

ڈھونڈنے والوں نے دیکھا ہو گا

سائے میں بیٹھے ہوئے سوچتے ہیں

کون اس دھوپ میں چلتا ہو گا

ابھی دل پر ہیں جہاں کی نظریں

آئنہ اور ابھی دھندلا ہو گا

راز سر بستہ ہے محفل تیری

جو سمجھ لے گا وہ تنہا ہو گا

اس طرح قطع تعلق نہ کرو

اس طرح اور بھی چرچا ہو گا

بعد مدت کے چلے دیوانے

کیا ترے شہر کا نقشہ ہو گا

سب کا منہ تکتے ہیں یوں ہم جیسے

کوئی تو بات سمجھتا ہو گا

پھول یہ سوچ کے کھل اٹھتے ہیں

کوئی تو دیدہ بینا ہو گا

خود سے ہم دور نکل آئے ہیں

تیرے ملنے سے بھی اب کیا ہو گا

ہم ترا راستہ تکتے ہوں گے

اور تو سامنے بیٹھا ہو گا

تیری ہر بات پہ چپ رہتے ہیں

ہم سا پتھر بھی کیا ہو گا

خود کو یاد آنے لگے ہم باقیؔ

پھر کسی بات پہ جھگڑا ہو گا

باقی صدیقی

دل کا حق ادا ہوا

جنوری 8, 1972شعراء،غزلکہا،کیا،ادا،بیوفا،برا،سواadmin

باقی صدیقی ۔ غزل نمبر 39

غم کا باب وا ہوا

دل کا حق ادا ہوا

دل بنا، دوا ہوا

درد کیا سے کیا ہوا

تم مٹے کہ ہم مٹے

جو ہوا برا ہوا

میرا تذکرہ ہی کیا

میں تو بیوفا ہوا

یہ کرم بجا مگر

وہ غرور کیا ہوا

ہم کہیں بھی کچھ تو کیا

تو نے جو کہا ہوا

باقیؔ ان سے مل کے درد

اور بھی سوا ہوا

باقی صدیقی

اور کچھ نشہ چڑھا ہے اپنا

جنوری 8, 1972شعراء،غزلچڑھا،چھپا،کیا،گیا،پڑا،بپا،دیا،رکنیلگا،سناadmin

باقی صدیقی ۔ غزل نمبر 37

کیا پتا ہم کو ملا ہے اپنا

اور کچھ نشہ چڑھا ہے اپنا

کان پڑتی نہیں آواز کوئی

دل میں وہ شور بپا ہے اپنا

اب تو ہر بات پہ ہوتاہے گماں

واقعہ کوئی سنا ہے اپنا

ہر بگولے کو ہے نسبت ہم سے

دشت تک سایہ گیا ہے اپنا

خود ہی دروازے پہ دستک دی ہے

خود ہی در کھول دیا ہے اپنا

دل کی اک شاخ بریدہ کے سوا

چمن دہر میں کیا ہے اپنا

کوئی آواز، کوئی ہنگامہ

قافلہ رکنے لگا ہے اپنا

اپنی آواز پہ چونک اٹھتا ہے

دل میں جو چور چھپا ہے اپنا

کون تھا مدِ مقابل باقیؔ

خود پہ ہی وار پڑا ہے اپنا

باقی صدیقی

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں:

Rate this:

اسے شیئر کریں: