منصور آفاق ۔ غزل نمبر 527

چیزوں سے گرد جھاڑتے، لان کی باڑ کاٹتے

کیسے نکلتے زخم سے، کیسے پہاڑ کاٹتے

پچھلی گلی کی نیند سے آتے طبیب خواب کے

ہجر کی فصد کھولتے، درد کی ناڑ کاٹتے

چلتیں گھڑی کی سوئیاں ، اپنے بدلتے روز و شب

دن کا ملال ٹوٹتا، شب کا بگاڑ کاٹتے

قیدی نظام زر کے ہیں دست بریدہ لوگ ہم

دانتوں سے کیسے لوہے کے بھاری کواڑ کاٹتے

قوسِ قزح بچھا کے ہم کنجِ صبا میں بیٹھ کر

دیدئہ صادقین سے تھور کا جھاڑ کاٹتے

یاد کے راٹ وائلر، ہوتے اگر نہ آس پاس

بھیڑے دشتِ درد کے جسم کو پھاڑ کاٹتے

حسنِ طلب کے شہر میں گنتے بدن کے لوتھڑے

تیغِ سکوتِ مرگ سے من کا کراڑ کاٹتے

بیج نئے وصال کے بوتے کہ ہم سیہ نصیب

کشتِ خرابِ عمر سے پچھلا کباڑ کاٹتے

لاتے کہیں سے ہم کوئی ابرِ حیات کھنچ کر

شاخِ خزاں تراشتے، دکھ کا اجاڑ کاٹتے

آتی تری ہوا اگر اپنی گلی کے موڑ تک

چیت کے صحنِ سبز میں عمر کا ہاڑ کاٹتے؟

اچھے دنوں کو سوچتے دونوں کہیں پہ بیٹھ کر

ہاتھوں کو تھام تھام کے لمبی دیہاڑ کاٹتے

منصور آفاق

منصور آفاق ۔ غزل نمبر 76

چاروں اور پہاڑ لگا

کوئی طلسمی باڑ لگا

غم کا کاٹھ کباڑ لگا

سارا شہر اجاڑ لگا

دنیا ایک مثلث ہے

دل میں تین کواڑ لگا

ہر اک عشق کی بستی کا

اشک شمار کراڑ لگا

چل منصور محبت کے

دل میں ایک دراڑ لگا

منصور آفاق