حسرت و رنج و اَلَم قسمت مری کہہ لیجیے

کیوں کہیَں اپنی جفا میری خوشی کہہ لیجیے

ہر قدم پر گھونٹتا ہُوں اِک تمنّا کا گَلا

زندگی کو ایک پیہم خودکشی کہہ لیجیے

زندگی نے کیا دیا جز داغِ ناکامی ہمیں

جی رہے ہیں پھر بھی، پاسِ بندگی کہہ لیجیے

کیوں پشیماں آپ ہیں اپنی جفائیں سوچ کر

گردشِ دواراں ، فلک کی کجرَوی کہہ لیجیے

نقشِ حیرت یہ، وہ اِک پرتَو نگاہِ حسن کا

نقشِ مانی کہیے، سحرِ سامری کہہ لیجیے

کاشفِ رازِ حقیقت کہیے ضامنؔ موت کو

اُور فریبِ سَر بَسَر کو زندگی کہہ لیجیے

ضامن جعفری