منصور آفاق ۔ غزل نمبر 380

فراق کی انتظار گاہ میں کہیں شرابیں کھلی پڑی ہیں

کہیں بجھی سگریٹوں کے ٹکڑے ،کہیں کتابیں کھلی پڑی ہیں

کہا تو ہے سر پھری ہوا سے چلے سنبھل کر بہت سنبھل کر

میں خیمہء کائنات ہوں اور مری طنابیں کھلی پڑی ہیں

کوئی توآیا ہے خواب گاہِ دل و نظر میں ، یہ چھپ چھپا کے

تجوری ٹوٹی ہوئی ہے غم کی ، تمام خوابیں کھلی پڑی ہیں

جو انتظاروں کے ہم نفس ہیں قفس میں بس ہیں وہی پرندے

ملن کے چڑیاگھروں میں وحشت بھری شتابیں کھلی پڑی ہیں

وہاں ہے رخشِ حیات منصور اپنا پہنچا ، جہاں ابد پر

کہیں پہ ٹوٹی ہوئی ہیں باگیں ، کہیں رکابیں کھلی پڑی ہیں

منصور آفاق

منصور آفاق ۔ غزل نمبر 329

باندھ کر رکھ آسمانوں کی طنابیں شلیف میں

ٹھیک رہتی ہیں ثوابوں کی کتابیں شلیف میں

سوچتی ہیں کس طرح تھے تیرے پیکر کے خطوط

میری بھیجی تین شرٹیں ، دو جرابیں شلیف میں

آتی صدیوں کے لئے کچھ تو مرے کاٹج میں ہو

میں نے آنکھوں سے چرا کر رکھ دیں خوابیں شلیف میں

میز پر تیرے کرم کی نرم آتش چاہئے

رہنے دے اپنی کہن سالہ شرابیں شلیف میں

بس کے اسٹاپوں پہ چپ ہیں دکھ کتابیں کھول کر

فائلیں ہیں راستوں میں اور جابیں شلیف میں

کچھ سوالوں کی بلند آہنگ سچائی کی خیر

سب دبے لہجے کی رکھ دی ہیں جوابیں شلیف میں

وقت کی دیمک ترے کچھ حاشیوں کے ساتھ ساتھ

درج ہیں تاریخ کی ساری خرابیں شلیف میں

منصور آفاق