ٹیگ کے محفوظات: پیادہ

جو مل گیا ہے میں اُس سے زیادہ کیا کرتا

اگست 4, 2018ناصر کاظمی،دیوانِ ناصر،غزلپیادہ،استفادہ،جادہ،زیادہ،سادہadmin

اب اُن سے اور تقاضائے بادہ کیا کرتا

جو مل گیا ہے میں اُس سے زیادہ کیا کرتا

بھلا ہوا کہ ترے راستے کی خاک ہوا

میں یہ طویل سفر پا پیادہ کیا کرتا

مسافروں کی تو خیر اپنی اپنی منزل تھی

تری گلی کو نہ جاتا تو جادہ کیا کرتا

تجھے تو گھیرے ہی رہتے ہیں رنگ رنگ کے لوگ

ترے حضور مرا حرفِ سادہ کیا کرتا

بس ایک چہرہ کتابی نظر میں ہے ناصر

کسی کتاب سے میں اِستفادہ کیا کرتا

ناصر کاظمی

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

دل و نظر کے لیے اِس میں کچھ افادہ ہے

جولائی 24, 2018چمن کوئی بھی ہو،باصر کاظمی،غزلکشادہ،پیادہ،افادہ،ارادہ،اعادہ،جادہ،زیادہ،سادہadmin

زیاں جگر کا سہی یہ جو شغلِ بادہ ہے

دل و نظر کے لیے اِس میں کچھ افادہ ہے

دکھائی دی ہے جھلک اُس کی ایک مدت بعد

یہ خواب میرے لیے خواب سے زیادہ ہے

ملائے گا یہ کسی شاہراہ سے ہم کو

مٹا مٹا سا جو قدموں میں اپنے جادہ ہے

یہی بچائے گا تم دیکھنا مری بازی

بِساط پر جو یہ ناچیز سا پیادہ ہے

یہ سوچ کر وہ مری بات کاٹ دیتے ہیں

کہ ہو نہ ہو یہ کسی بات کا اعادہ ہے

یہاں رہیں گے وہ میرے حریف کے ہمراہ

اُنہیں گماں ہے مرا دل بہت کشادہ ہے

وہ اہلِ بزم کی رنگیں نوائی اپنی جگہ

ہزار رنگ لیے میرا حرفِ سادہ ہے

اگر خدا نے نکالا بُتوں کے چکّر سے

طوافِ کعبہ کا اب کے برس اِرادہ ہے

باصر کاظمی

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

کیا شوخ طبع ہے وہ پرکار سادہ سادہ

اکتوبر 7, 2015میر تقی میر،اساتذہ،غزلفتادہ،ندادہ،کشادہ،پیادہ،پیرزادہ،ارادہ،بادہ،خانوادہ،زیادہ،سادہadmin

دیوان ششم غزل 1874

مکتوب دیر پہنچا پر دو طرف سے سادہ

کیا شوخ طبع ہے وہ پرکار سادہ سادہ

جب میکدے گئے ہیں پابوس ہی کیا ہے

ہے مغبچہ ہمارا گویا کہ پیرزادہ

سائے میں تاک کے ہم خوش بیٹھے ہیں اب اپنا

اس سلسلے میں بیعت کرنے کا ہے ارادہ

دل اس قدر نہ رکتا گھبراتا جی نہ اپنا

چھاتی لگا جو رہتا وہ سینۂ کشادہ

شیشہ کنار جو ہے پنبہ دہان و رعنا

میناے مے چمن میں اک سرو ہے پیادہ

پڑتی ہیں اس کی آنکھیں چاروں طرف نشے میں

جوں راہ میں بہکتے ہوں ترک مست بادہ

جو شہرہ نامور تھے یارب کہاں گئے وے

آباد کم رہا ہے یاں کوئی خانوادہ

مت دم کشی کر اتنی ہنگام صبح بلبل

فریاد خونچکاں ہے منھ سے ترے زیادہ

کیا خاک سے اٹھوں میں نقش قدم سا بیٹھا

اب مٹ ہی جانا میرا ہے پیش پا فتادہ

حالات عشق رنج و درد و بلا مصیبت

دل دادہ میر جانے کیا جانے کوئی ندادہ

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔