دیوان چہارم غزل 1436

صبر کیا جاتا نہیں ہم سے رہ کے جدا نہ ستائو تم

پائوں کا رکھنا گرچہ ادھر کو عار سے ہے پر آئو تم

جس کے تئیں پروا ہو کسو کی آنا جانا اس کا ہے

نیک ہو یا بد حال ہمارا تم کو کیا ہے جائو تم

چپ ہیں کچھ جو نہیں کہتے ہم کار عشق کے حیراں ہیں

سوچو حال ہمارا ٹک تو بات کی تہ کو پائو تم

میر کو وحشت ہے گی قیامت واہی تباہی بکتے ہیں

حرف و حکایت کیا مجنوں کی دل میں کچھ مت لائو تم

میر تقی میر

دیوان دوم غزل 909

اتنا کہا نہ ہم سے تم نے کبھو کہ آئو

کاہے کو یوں کھڑے ہو وحشی سے بیٹھ جائو

یہ چاند کے سے ٹکڑے چھپتے نہیں چھپائے

ہر چند اپنے منھ کو برقع میں تم چھپائو

دوچار تیر یارو اس سے بھلی ہے دوری

تم کھینچ کھینچ مجھ کو اس پلے پر نہ لائو

ہو شرم آنکھ میں تو بھاری جہاز سے ہے

مت کرکے شوخ چشمی آشوب سا اٹھائو

اب آتے ہو تو آئو ہر لحظہ جی گھٹے ہے

پھر لطف کیا جو آکر آدھا بھی تم نہ پائو

تھی سحر یا نگہ تھی ہم آپ کو تھے بھولے

اس جادوگر کو یارو پھر بھی تنک دکھائو

بارے گئے سو گذرے جی بھر بھر آتے ہیں کیا

آئندہ میر صاحب دل مت کہیں لگائو

میر تقی میر