دیوان پنجم غزل 1644

لطف جوانی کے ساتھ گئے پیری نے کیا ہے کیا محظوظ

کیونکے جئیں یارب حیرت ہے بے مزہ ایسے نامحظوظ

رونے کڑھنے کو عیش کہو ہو ہم تو تمھارے دعاگو ہیں

یوں ہی ہمیشہ عشق میں اس کے رکھے ایسا خدا محظوظ

زردی منھ کی اشک کی سرخی دونوں اب تو رنگ پہ ہیں

شاید میر بہت رہتے ہو اس سے ہو کے جدا محظوظ

میر تقی میر

دیوان چہارم غزل 1410

عشق ہمارا جی مارے ہے ہم ناداں ہیں کیا محظوظ

ایسی شے کا زیاں کھینچے تو دانا ہووے نامحظوظ

پانی منھ میں بھر آتا تھا اس کے عقیق لب دیکھے

اب ہے تشنہ کام جدائی میر وگرنہ تھا محظوظ

میر تقی میر