ٹیگ کے محفوظات: مشاورت

فاتحہ پڑھ لیں ، تعزیت کر لیں

دسمبر 1, 2007منصور آفاق،شعراء،غزلقط،مفاہمت،مفارقت،مناسبت،مخالفت،مخاصمت،مراجعت،مراسلت،مزاحمت،مسافرت،مشاورت،مطابقت،معذرت،مغفرت،بچت،تربیت،تعزیت،جہت،سلطنتadmin

منصور آفاق ۔ غزل نمبر 302

مر گئے ہم، برت ورت کر لیں

فاتحہ پڑھ لیں ، تعزیت کر لیں

خواب دفنا کے لوٹ آئے ہیں

اب دعا ہائے مغفرت کر لیں

دائرے میں برے شگون کے، ہم

کیسے معلوم اک جہت کر لیں

کس طرف دوستوں کی منزل ہے

کچھ ہوا سے مشاورت کر لیں

گر چکی ہے زمین پیچھے سے

کس طرح ہم مراجعت کر لیں

من و سلویٰ کی کیا تمنا میں

آسماں سے مفاہمت کر لیں

روگ بنتے ہوئے تعلق سے

یہی بہتر ہے معذرت کر لیں

کوچۂ یار کی مسافت میں

طے حدودِ مسافرت کر لیں

وصل میں اِس لباسِ اطلس کی

ہم ذرا سی مخالفت کر لیں

بے تحاشا کیا ہے خرچ اسے

اب تو دل کی ذرا بچت کر لیں

یہ بھی صورت ہے اک تعلق کی

ہجر سے ہی مطابقت کر لیں

ڈھنگ جینے کا سیکھ لیں ہم بھی

وقت سے کچھ مناسبت کر لیں

طور بھی فتح کر لیں جلوہ بھی

کچھ وسیع اور سلطنت کر لیں

اس نظر کے فریب سے نکلیں

دل سے بھی کچھ مخاصمت کر لیں

کب کہا ہے زبان بندی کا

کلکِ ناخوردہ صرف قط کر لیں

کاٹ دیں راستے، گرا دیں پل

رابطوں سے مفارقت کر لیں

پوچھ لیں کیا کریں مسائل کا

کچھ خدا سے مراسلت کر لیں

جا بسیں قیس کے محلے میں

اک ذرا اپنی تربیت کر لیں

ظلم کا ہے محاصرہ منصور

آخری اب مزاحمت کر لیں

منصور آفاق

مگر اب فریب کی سلطنت نہیں چاہتا

دسمبر 1, 2007منصور آفاق،شعراء،غزلمفاہمت،مناسبت،مباشرت،مخالفت،مراجعت،مشاورت،مصالحت،مطابقت،پت،سلطنتadmin

منصور آفاق ۔ غزل نمبر 21

میں جنابِ صدر ملازمت نہیں چاہتا

مگر اب فریب کی سلطنت نہیں چاہتا

مرا دین صبح کی روشنی مری موت تک

میں شبوں سے کوئی مصالحت نہیں چاہتا

میں حریصِ جاہ و حشم نہیں اِسے پاس رکھ

یہ ضمیر زر سے مباشرت نہیں چاہتا

کرے آ کے گفت و شنید مجھ سے کوئی چراغ

کسی شب زدہ کی مشاورت نہیں چاہتا

میں کنارِ آب رواں نہیں شبِ یاد میں

کسی چاندنی سے مناسبت نہیں چاہتا

مجھے موت تیرے محاصرے میں قبول ہے

میں عدو سے کوئی مفاہمت نہیں چاہتا

شبِ ظلم سے میں لڑوں گا آخری وار تک

کوئی ظالموں سے مطابقت نہیں چاہتا

مجھے جلتی کشتیاں دیکھنے کی طلب نہیں

میں مزاحمت میں مراجعت نہیں چاہتا

مرے پاس اب کوئی راستہ نہیں صلح کا

مجھے علم ہے تُو مخالفت نہیں چاہتا

انہیں ’بھوربن‘ کی شکار گاہ عزیز ہے

ترا لشکری کوئی پانی پت نہیں چاہتا

منصور آفاق