ٹیگ کے محفوظات: متفرق اشعار

ہوائے طرب ۔ متفرق اشعار

ہوائے طرب،متفرق،باصر کاظمی

دیکھتے رہنے پر ہوئے مامور

ہم کبھی اس قدر نہ تھے مجبور

اپنی شہرت بڑھانے کی خاطر

اُس نے ہم کو بھی کر دیا مشہور

دسمبر 2009

ہم دوا سے ٹھیک ہوں گے تیرے دیکھے سے نہیں

کام کرنے سے ہوا کرتے ہیں چاہے سے نہیں

دوستی میں دیکھتے ہیں وہ بس اپنا فائدہ

پھول پھل سے اُن کو دلچسپی ہے پودے سے نہیں

16 دسمبر2010

آج بھی ہم ہی سُرخرو ہوں گے

تیری تلوار ہے ہمارا سر

تجھ سے کرنی ہے اک ضروری بات

عام سی بات ہے، خدا سے ڈر

جنوری2011

جو کان میں رہ گیا سو پتھر

جو ہاتھ میں آگیا وہ ہیرا

26جولائی2011

ہے دوستی کی طرح دشمنی کا اپنا لطف

حریف بن کے ملے ہو تو یار یوں بھی سہی

29جولائی2011

جن مناظر نے خوش کیا تھا کبھی

خواب میں آکے تنگ کرتے ہیں

9اگست 2011

اگر آنسو رُکے تو ابر برسا

یہ بارش میرے پیچھے پڑ گئی ہے

22اگست 2011

آسائشِ دنیا کا سامان کچھ ایسا ہے

چھوڑا بھی نہیں جاتا ڈھویا بھی نہیں جاتا

مانندِ سراب آگے اک شے ہے عجب جس کو

پانا تو ہے ناممکن کھویا بھی نہیں جاتا

17جنوری2012

بِنا علاج بھی جیتے تھے اچھے خاصے ہم

مرض تو کچھ بھی نہ تھا مر گئے دوا سے ہم

6مئی 2012

فائدہ یہ ہے بچھڑنے کا کہ دل میں وہ مرے

ہے حسیں اتنا ہی جتنا کہ بچھڑتے ہوئے تھا

12مئی 2012

دھوپ ہنستی تھی ابھی آنگن میں

آگئے رونے رُلانے والے

31جولائی2012

پھول ہر ڈھنگ کا بہار میں تھا

برگ ہر رنگ کا خزاں میں ہے

12نومبر2012

یہ الگ بات کہ اصنام بھی لے آئے ساتھ

’’پاسباں مل گئے کعبے کو صنم خانے سے‘‘

15فروری2013

یہ بے حسی نہیں اے دوست ضبطِ گریہ نے

ہماری آنکھوں میں اک رہگزار اتار دیا

سفر کیا ہے اک ایسی سواری پر جس نے

سوار ہونے دیا پر اتار اتار دیا 

27فروری2013

رات دن ساغرِ جم دیکھتے ہیں

کس نے دیکھا ہے جو ہم دیکھتے ہیں

کیوں ہے چہرہ ترا اُترا اُترا

آنکھ بھی تھوڑی سی نم دیکھتے ہیں

27جون2013

دوست وہ جو دوستوں کے ہوں فقط سب کے نہیں

وہ جو خوش کرتے ہوں سب کو میرے مطلب کے نہیں

31دسمبر2013 

باصِرؔ خلوصِ دل سے کیا تو ہے ایک عہد

اب یہ دعا کرو کہ نبھانا نصیب ہو

دوستوں کی مہربانی پوچھ لیتے ہیں ہمیں

ورنہ اِس شہرِ غرض میں کون کس کا آشنا

لڑتے کسی اور بات پر ہیں

غصہ کسی اور بات کا ہے

باصِرؔ دعائیں مانگیں تھیں عمرِ دراز کی

افسوس مت کرو کہ جوانی گزر گئی

مختلف ہیں اگرچہ ان کے نام

ملتے جلتے سے ہیں یہ سارے مقام

اُکھڑے اُکھڑے سے ہیں وہ کچھ دن سے

پھر کوئی بات ہو گئی ہو گی

اب انہیں فون کل کریں گے ہم

اب وہاں رات ہو گئی ہو گی

متفرق اشعار

متفرق،چمن کوئی بھی ہو،باصر کاظمی

1997

سُورج کا یہ رنگ نہ تھا جو وقتِ شام ہُوا ہے

دیکھو کیسا سَرکش گھوڑا کیسا رام ہُوا ہے

…

اِنصاف اگر کہیں ہے کچھ

جنّت کا نشاں وہیں ہے کچھ

آ جائیں گے دیکھنے تمہیں ہم

کہنا تو ہمیں نہیں ہے کچھ

ستمبر

…

حاضری کے واسطے سرکار کا دفتر کھُلا

کتنے چکّر کاٹنے کے بعد یہ چکّر کھُلا

دسمبر

…

2000

سب حسینوں کا حُسن تجھ میں ہے

اور تِرا حُسن سب حسینوں میں

12 ۱کتوبر

…

2001

جو منافع نہ مِل سکا باصِرؔ

اُس کو نقصان کیوں سمجھتے ہو

3دسمبر

…

2003

کھُلتے ہی نہیں کسی صورت

وہ ہونٹ بھی سُرخ فیتے ہیں

ہیں سارے کے سارے آدم خور

شہروں میں جو شیر چیتے ہیں

جنوری

…

یوں بھی کم تھی اُس کے آنے کی اُمید

اب تو ویسے بھی اندھیرا ہو گیا

28جنوری

…

نقصان پر جو میرے افسوس کر رہے ہیں

میں جانتا ہوں کتنا اندر سے خوش ہوئے ہیں

9مارچ

…

نیند میں بھی بھٹک نہیں سکتا

روز کا راستہ ہے یہ میرا

3اپریل

…

جس نے ماں باپ کو دیا ہو دُکھ

اُس نے اولاد سے نہ پایا سُکھ

4دسمبر

…

2004

گئے خط بے اثر سارے

اُسے بھیجوں گا اب سی وی

4اپریل

…

نکل گیا ہے مِری زندگی سے وہ شاید

کئی دنوں سے مِرے خواب میں نہیں آیا

10جون

…

وہاں جانے سے کیا ڈرنا

جہاں سب جائیں گے اک دن

غلط سمجھے ہیں جو ہم کو

بہت پچھتائیں گے اک دن

13جولائی

…

جن دنوں روتا تھا تیری یاد میں

رو رہا ہوں اُن دنوں کی یاد میں

3ستمبر

…

2005

کیا مشورہ کوئی دے اب ایسے آدمی کو

جانے دیا ہو جس نے گھر آئی لکشمی کو

10جولائی

…

اب آ کے دیکھتے ہیں شجر ہیں وہ سایہ دار

جاتے ہوئے جو بیج یہاں بو گئے تھے ہم

19ستمبر

…

شفا ہوتی دوا سے معجزہ ایسا تو کیا ہوتا

مگر بیمار کچھ دِن اور جی لیتا تو کیا ہوتا

ابھی اُس کے نہ مِلنے پر عداوت ہے زمانے کو

کسی تدبیر سے وہ ہم کو مِل جاتا تو کیا ہوتا

دسمبر

…

ہے اِتنا کچھ جہاں دل میں ہمارے ناخداؤں کے

خیالِ خلق بھی ہوتا اگر خوفِ خدا ہوتا

دسمبر

…

اب آ کے دیکھتے ہیں شجر ہیں وہ سایہ دار

جاتے ہوئے جو بیج یہاں بو گئے تھے ہم

19دسمبر

2006

کسی سبب سے جو وہ دے سکیں نہ میرا ساتھ

نہیں ہے اِس میں بُرا ماننے کی کوئی بات

سلوک اُس کا ترے ساتھ ٹھیک ہے باصِرؔ

کوئی تو ہو جو بتائے تجھے تِری اوقات

16فروری

…

گزر گئی ہے اِسی کاہلی میں عُمر تمام

یہ سوچتے رہے بس اب کریں گے کل سے کام

یہ سوچ کر کہ مِلے گا ضرور اب کے جواب

نجانے لِکھّے ہیں خط کتنی بار اپنے نام

نومبر

…

گو شاعری پڑھنے کا اُسے شوق بہت ہے

کیا کیجیے اِس کا کہ وہ بدذوق بہت ہے

دسمبر

…

ایک دشمن کی کمی تھی باصِرؔ

وہ بھی اِک دوست نے پوری کر دی

8دسمبر

…

2007

جب چاہیے ہو ملتی ہے تازہ ہَوا مجھے

شاید کبھی لگی تھی کسی کی دعا مجھے

5جولائی

باصر کاظمی

موجِ خیال ۔ متفرق اشعار

موجِ خیال،متفرق،باصر کاظمی

1970

ہماری آنکھ نہ ہوتی تو حُسن کیا کرتے

ہمارے دل میں نہ ہوتے تو وہ کہاں ہوتے

میری خوشی میں تیری خوشی تھی

اب دُکھ میں کیوں بھاگ رہا ہے

بعد موت کے ہماری روح 

دنیا کو کیا پاتی ہو گی

یہ تھوڑا تھوڑا جو پینے کو مل رہا ہے تو کیا

مزا ہی جب ہے کہ پینے کے بعد پیاس رہے

1974

آشنا درد سے ہونا تھا کسی طور ہمیں

تُو نہ ملتا تو کسی اور سے بچھڑے ہوتے

1986

اب کے جھگڑا ہے مِرا خوبیِ تقدیر کے ساتھ

نامۂ شیریں ملا تلخیِ تاخیر کے ساتھ

ہم نے دانستہ بھُلا ڈالے جو دیکھے تھے خواب

زندگی کٹ نہیں سکتی تِری تصویر کے ساتھ

فاصلے کسی طرح کچھ اگر ہوئے کم بھی

دیکھتے رہے تم بھی سوچتے رہے ہم بھی

گرچہ اپنی جیب میں بھی کچھ سِکے ہیں

لیکن اِس بازار میں یہ کب چلتے ہیں

1987

یا تو مجنوں کی سی وحشت ہی دکھائی ہوتی

زندگی ورنہ قرینے سے بِتائی ہوتی

دور رہتا ہے وہ دانستہ مری محفل سے

ہے کوئی بات کہ جاتی نہیں اُس کے دل سے

یہ آنکھیں دماغ اور دل دشمن ہیں جگر تیرے

مارا تجھے اپنوں نے الزام ہے غیروں پر 

یہ مزاجِ یار کی بھول ہے بھلا یہ کہاں کا اصول ہے

کسی ایک دن جو بھلا لگا وہ تمام عُمر بھلا لگے

کہتا رہا میں اُس سے کہ ہاں ہاں کہو کہو

لیکن زبانِ دوست پہ ’بس کچھ نہیں‘ رہا

تم روشنیِ صبح ہو میں تیرگیِ شب

سچ ہے کہ مرے تم سے ستارے نہیں ملتے

جاتا نہیں ہے جڑ سے کبھی عشق کا مرض

ہوتا ہے چند روز دوائی سے فائدہ

شکوے کا اب خیال بھی آتا نہیں ہمیں

وہ بات ہی نہیں تو لڑائی سے فائدہ

مِل رہا ہے آج وہ جس طور سے

آپ نے دیکھا نہیں ہے غور سے

آپ تو اُس کے لیے سُولی چڑھیں

اور وہ پینگیں بڑھائے اور سے

1990

ہر بات کا سُراغ نہاں اُس کی ضد میں ہے

چاہا تھا اپنے آپ کو پانا سو کھو گئے

اچھے ہیں سب حیات کے جتنے بھی دور ہیں

یہ بات جو سمجھ گئے وہ لوگ اور ہیں

16اکتوبر

1991

ہو جائیں نفس چند کہیں آ کے جو آباد

سمجھو کہ وہیں پڑ گئی اِک شہر کی بنیاد

یکم جنوری 

1993

کرو میلا نہ دل اپنا سُنا ہوگا یہ تم نے بھی

بُرا کہنا بھلے لوگوں کو عادت ہے زمانے کی

بچھڑنے والے اپنے ساتھ کیا کیا لے گئے باصرؔ

یہ دنیا دلنشیں اتنی نہیں اب جتنی پہلے تھی

12فروری

اللہ ایسے موقعے مجھے بار بار دے

جتنا ادھار ہے مرے سر سے اتار دے

16جون

آتا نہیں اُنہیں کبھی خود سے مرا خیال

میں گاہے گاہے خود ہی بتاتا ہوں اپنا حال

باصرِؔ تمام دن کی مشقت بجا مگر

ہے ابتدائے شب ابھی سونے کا کیا سوال

اگست

1994

دنیا کے بکھیڑوں سے نکل پائیں گے کیسے

کہتے تو تھے آئیں گے مگر آئیں گے کیسے

7مئی

پڑا ہے آج ہمیں ایک مطلبی سے کام

خدا کرے کہ اُسے ہم سے کام پڑ جائے

13مارچ

1995

میری خوش وقتی سے پرخاش کچھ ایسی ہے تجھے

دل جلے جس سے مرا بات وہ کرنی ہے تجھے

مجھے کرنی تو ہے کچھ بات مگر ایسے نہیں

آج لگتا ہے کسی بات کی جلدی ہے تجھے

20نومبر

1996

ہو جس کی ہمیں طلب زیادہ

ملتی ہے وہ چیز کب زیادہ

پہلے سے زیادہ گرم ہے جیب

لینے لگے قرض اب زیادہ

18مارچ

اہلِ دل آ گئے کہاں سے کہاں

دیکھیے جائیں گے یہاں سے کہاں