دیوان دوم غزل 694

اس قدر آنکھیں چھپاتا ہے تو اے مغرور کیا

ٹک نظر ایدھر نہیں کہہ اس سے ہے منظور کیا

وصل و ہجراں سے نہیں ہے عشق میں کچھ گفتگو

لاگ دل کی چاہیے ہے یاں قریب و دور کیا

ہو خرابی اور آبادی کی عاقل کو تمیز

ہم دوانے ہیں ہمیں ویران کیا معمور کیا

اٹھ نہیں سکتا ترے در سے شکایت کیا مری

حال میں اپنے ہوں عاجز میں مجھے مقدور کیا

سب ہیں یکساں جب فنا یک بارگی طاری ہوئی

ٹھیکرا اس مرتبے میں کیا سر فغفور کیا

لطف کے حرف و سخن پہلے جو تھے بہر فریب

مدتیں جاتی ہیں ان باتوں کا اب مذکور کیا

دیکھ بہتی آنکھ میری ہنس کے بولا کل وہ شوخ

بہ نہیں اب تک ہوا منھ کا ترے ناسور کیا

میں تو دیکھوں ہوں تمھارے منھ کو تم نے دل لیا

تم مجھے رہتے ہو اکثر مجلسوں میں گھور کیا

ابر سا روتا جو میں نکلا تو بولا طنز سے

آرسی جا دیکھ گھر برسے ہے منھ پر نور کیا

سنگ بالیں میر کا جو باٹ کا روڑا ہوا

سخت کر جی کو گیا اس جا سے وہ رنجور کیا

میر تقی میر

دیوان دوم غزل 682

غم ابھی کیا محشر مشہور کا

شور سا ہے تو ولیکن دور کا

حق تو سب کچھ ہی ہے تو ناحق نہ بول

بات کہتے سر کٹا منصور کا

بیچ سے کب کا گیا اب ذکر کیا

اس دل مرحوم کا مغفور کا

طرفہ آتش خیز سنگستاں ہے دل

مقتبس یاں سے ہے شعلہ طور کا

مر گئے پر خاک ہے سب کبر و ناز

مت جھکو سر گو کسو مغرور کا

ٹھیکری کو قدر ہے اس کو نہیں

ٹوٹے جب کاسہ سر فغفور کا

ہو کھڑا وہ تو پری سی ہے کھڑی

منھ کھلے تو جیسے چہرہ حور کا

دیکھ اسے کیونکر ملک بھیچک نہ ہوں

آنکھ کے آگے یہ بکّا نور کا

چشم بہنے سے کبھو رہتی نہیں

کچھ علاج اے میر اس ناسور کا

میر تقی میر