منصور آفاق ۔ غزل نمبر 285

اپنے جینے کے فوائد کچھ تو ہوں

زندگانی کے مقاصد کچھ تو ہوں

میرے گیتوں کو پہن لو تتلیو!

پھول میرے بھی مقلد کچھ تو ہوں

کوئی اچھا کام کرنا چاہتا ہوں

شہر میں میرے بھی حاسد کچھ تو ہوں

جن کی جنگیں زندگی کے واسطے

ایسے بھی تیرے مجاہد کچھ تو ہوں

تیرے قبضے میں زمین و آسماں

کچھ اِ دھر بھی ذاتِ واحد! کچھ تو ہوں

اس کی آنکھیں تیغ تیورہی سہی

قتل کے لیکن شواہد کچھ تو ہوں

لرزہ بر اندام جن سے دیوتا

ایسے منکر ایسے ملحد کچھ تو ہوں

کچھ تو ہوں منصور باتیں دین کی

نور پھیلاتے عقائد کچھ تو ہوں

منصور آفاق