منصور آفاق ۔ غزل نمبر 519

پانیوں کو منجمد ہوناتھا آخر ہو گئے

رُت بدلنے پر پرندے پھر مسافر ہو گئے

ہر طرف گہری سفیدی بچھ گئی ہے آنکھ میں

ایک جیسے شہر کے سارے مناظر ہو گئے

پھیر دی چونے کی کوچی زندگی کے ہاتھ نے

جو مکاں ہوتے تھے لوگوں کے مقابر ہو گئے

کھڑکیاں جیسے مزاروں پر دئیے جلتے ہوئے

چمنیاں جیسے کئی آسیب ظاہر ہو گئے

بین کرتی عورتوں کی گائیکی لپٹی ہمیں

روح کے ماتم کدے کے ہم مجاور ہو گئے

برف کی رُت سے ہماری سائیکی لپٹی رہی

اک کفن کے تھان میں سپنے بھی شاعر ہو گئے

بے پنہ افسردگی کی ایک ٹھنڈی رات میں

کم ہوئیں منصور آنکھیں خواب وافر ہو گئے

منصور آفاق