پیار ہے بھید کا گہرا ساگر، اس کی تھاہ نہ پاؤ گے

جس دم پانی سر سے گزرا آپ کہیں کھو جاؤ گے

دھوپ بُری ہے او ر نہ چھاؤں، سمے سمے کی ساری بات

رَنگوں کے اس کھیل سے کب تک اپنی جان چُراؤ گے

جیتی جاگتی تصویریں ہیں دنیا بھر کی آنکھوں میں

اپنا آپ جہاں بھی دیکھا، سِمٹو گے شرماؤ گے

اتنا ہی بوجھل خاک کا بندھن، جتنی سُندر دھیان کی ڈور

پاؤں زمیں سے لگے رہیں گے، اونچا اڑتے جاؤ گے

بچھڑے لمحے راہ نہ بھولیں رات کے سُونے آنگن کی

خود ہی کریدو گے زخموں کو، خود ہی انھیں سہلاؤ گے

پاگل پن میں مَن کا موتی سستے داموں بیچ دیا

اب کنکر پتھر چُن چُن کر اپنا جی بہلاؤ گے

اس کے چَرَن کی خاک ہی چُھو لو، ہوش نہ ہو گا اتنا بھی

آنکھوں سے حسرت ٹپکے گی، دور کھڑے للچاؤ گے

شانت نگر کا کھوج لگا کر یہ دُکھ بھی سہنا ہو گا

جانے پہچانے لوگوں میں پردیسی کہلاؤ گے

شکیب جلالی

ماجد صدیقی ۔ غزل نمبر 35

بات سمجھو نہ اور ترساؤ

پھول ہو تم کلی نہ بن جاؤ

چاند سے اِس رُخِ منّور کو

حرفِ انکار سے نہ گہناؤ

ہم سمجھتے ہیں چشم و دل کی زباں

اتنا ناداں ہمیں نہ ٹھہراؤ

مثلِ خوشبُو در آؤ ہر در سے

مثلِ گُل اِس نظر میں لہراؤ

مسکنِ درد ہے یہ تن اِس کو

لمس و لطفِ نظر سے سہلاؤ

یخ ہیں پہلو مرے کبھی اِن کو

حدتِ جسم و جاں سے گرماؤ

ہو مزّین تمہی سے اپنا بدن

اِس کے صفحوں پہ یُوں اُتر آؤ

ماجد صدیقی