عرفان صدیقی ۔ غزل نمبر 108

ہر طرف کشتوں کا انبار ہے خاکم بدہن

یہ عجب نرگس بیمار ہے خاکم بدہن

کچھ نہ کچھ ہوش ہے باقی ابھی دیوانوں میں

یہ تو ابرو نہیں تلوار ہے خاکم بدہن

قیدخانے میں یہ مہتاب کہاں سے آیا

کیا کوئی روزن دیوار ہے خاکم بدہن

صید کرتا ہے کسی اور کی مرضی سے مجھے

خود بھی صیاد گرفتار ہے خاکم بدہن

یہ کوئی طنز نہیں تیری مسیحائی پر

عشق کیا جان کا آزار ہے خاکم بدہن

جب تلک گرد نہ چہرے سے ہٹائی جائے

صیقل آئنہ بے کار ہے خاکم بدہن

کوئی شے خاک پہ افتادہ ہے دستار کے ساتھ

یہ تو شاید سرپندار ہے خاکم بدہن

عرفان صدیقی