منصور آفاق ۔ غزل نمبر 75

کرم اسمِ محمدﷺ کا فنا ہونے کہاں دے گا

مجھے بیدار طالع قبر میں سونے کہاں دے گا

اگرچہ ہوں ابھی بچپن کی کچی نیند میں لیکن

مرے اندر چھپا بوڑھا مجھے رونے کہاں دے گا

وہ جس کو خوف ہے دوزخ کہیں خالی نہ رہ جائے

وہی اشکِ ندامت سے گنہ دھونے کہاں دے گا

جسے اپنی دھڑکتی زندگی سے خوف آتا ہے

وہی ،دل سینۂ مہتاب میں بونے کہاں دے گا

جمالِ اسم اعظم کے بہشت آباد میں منصور

وصالِ یار کا دوزخ مجھے کھونے کہاں دے گا

منصور آفاق