سب کچھ تیرا، اے دنیا
دریا دریا بجتے ساز
نگری نگری موہن مُکھ
بام بام پر چاند
کرن کرن گلنار!
آسمانوں اور زمینوں کے سب روپ
سب کچھ تیرا — اے دنیا!
تیرے طاق پہ میں اک دیپ
تو صدیوں کے گارے میں اک گندھی ہوئی دیوار
میں اک پل کی راکھ
اک دھڑکن کی ہُوک
جل گئی عود کی شمع
گر گئی بےبس راکھ
رات کے پربت سے ٹکرا گئی خوشبو کی اک لہر
پھر وہی رنگ اور پھر وہی روپ
نگری نگری موہن مکھ
کرن کرن گلنار
مجید امجد
سخن سرا کا نیا سفر 