ٹیگ کے محفوظات: دعا

شاید بگڑ گئی ہے کچھ اس بے وفا سے آج

اکتوبر 6, 2015میر تقی میر،اساتذہ،غزلہوا،وفا،حیا،خدا،دعاadmin

دیوان اول غزل 189

آئے ہیں میر منھ کو بنائے خفا سے آج

شاید بگڑ گئی ہے کچھ اس بے وفا سے آج

واشد ہوئی نہ دل کو فقیروں کے بھی ملے

کھلتی نہیں گرہ یہ کسو کی دعا سے آج

جینے میں اختیار نہیں ورنہ ہم نشیں

ہم چاہتے ہیں موت تو اپنی خدا سے آج

ساقی ٹک ایک موسم گل کی طرف بھی دیکھ

ٹپکا پڑے ہے رنگ چمن میں ہوا سے آج

تھا جی میں اس سے ملیے تو کیا کیا نہ کہیے میر

پر کچھ کہا گیا نہ غم دل حیا سے آج

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

گو کہ مرے ہی خون کی دست گرفتہ ہو حنا

اکتوبر 6, 2015میر تقی میر،اساتذہ،غزلہوا،وفا،کا،بلا،جلا،حنا،دعا،صباadmin

دیوان اول غزل 117

تیرے قدم سے جا لگی جس پہ مرا ہے سر لگا

گو کہ مرے ہی خون کی دست گرفتہ ہو حنا

سنگ مجھے بجاں قبول اس کے عوض ہزار بار

تابہ کجا یہ اضطراب دل نہ ہوا ستم ہوا

کس کی ہوا کہاں کاگل ہم تو قفس میں ہیں اسیر

سیر چمن کی روز و شب تجھ کو مبارک اے صبا

کن نے بدی ہے اتنی دیر موسم گل میں ساقیا

دے بھی مئے دوآتشہ زورہی سرد ہے ہوا

وہ تو ہماری خاک پر آ نہ پھرا کبھی غرض

ان نے جفا نہ ترک کی اپنی سی ہم نے کی وفا

فصل خزاں تلک تو میں اتنا نہ تھا خراب گرد

مجھ کو جنون ہو گیا موسم گل میں کیا بلا

جان بلب رسیدہ سے اتنا ہی کہنے پائے ہم

جاوے اگر تو یار تک کہیو ہماری بھی دعا

بوے کباب سوختہ آتی ہے کچھ دماغ میں

ہووے نہ ہووے اے نسیم رات کسی کا دل جلا

میں تو کہا تھا تیرے تیں آہ سمجھ نہ ظلم کر

آخرکار بے وفا جی ہی گیا نہ میر کا

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

دعا

نومبر 14, 2014پروین شاکر،آزاد نظمدعاadmin

چاندنی،

اُس دریچے کو چُھوکر

مرے نیم روشن جھروکے میں آئے ، نہ آئے

مگر

میری پلکوں کی تقدیر سے نیند چُنتی رہے

اور اُس آنکھ کے خواب بُنتی رہے

پروین شاکر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

دل میں بکھری کوئی خوشبوئے قبا آخر شب

اپریل 11, 2012فیض احمد فیض،غزلقبا،وفا،کیا،گیا،دعا،صباadmin

فیض احمد فیض ۔ غزل نمبر 4

یاد کا پھر کوئی دروازہ کھُلا آخر شب

دل میں بکھری کوئی خوشبوئے قبا آخر شب

صبح پھوٹی تو وہ پہلو سے اُٹھا آخر شب

وہ جو اِک عمر سے آیا نہ گیا آخر شب

چاند سے ماند ستاروں نے کہا آخر شب

کون کرتا ہے وفا، عہدِ وفا آخر شب

لمسِ جانانہ لیے، مستیِ پیمانہ لیے

حمدِ باری کو اٹھے دستِ دعا آخر شب

گھر جو ویراں تھا سرِ شام وہ کیسے کیسے

فرقتِ یاد نے آباد کیا آخر شب

جس ادا سے کوئی آیا تھا کبھی اوؐلِ شب

اسی انداز سے چل بادِ صبا آخر شب

مخدوم کی یاد میں
ماسکو

فیض احمد فیض

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

اور اک شمع تہہ خاک دبا بھی آئے

جنوری 11, 2012عرفان صدیقی،غزلہما،لگا،اُڑا،دبا،دعا،صداadmin

عرفان صدیقی ۔ غزل نمبر 243

اک دیا شام خموشاں میں جلا بھی آئے

اور اک شمع تہہ خاک دبا بھی آئے

اب کے اُس در سے نہ نکلا کسی اُمید کا چاند

شب کے سناٹے میں آواز لگا بھی آئے

یہ سفر کتنا اکیلا ہے کہ عادت تو نہ تھی

دُور تک ساتھ کوئی حرف دعا بھی آئے

اُس کی پرچھائیں کا دھوکا نہیں ہونے والا

اب مری سمت اگر ظل ہما بھی آئے

غم دنیا میں غم جاں کی حقیقت کیا ہے

دوسرے چپ ہوں تو کچھ اپنی صدا بھی آئے

تو بہت دیر میں دیوانہ بنانے نکلی

ہم تو اے باؤلی رُت خاک اُڑا بھی آئے

ماں کے انتقال پر

عرفان صدیقی

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

بے وطن جنگل میں بے جرم و خطا مارا گیا

جنوری 4, 2012عرفان صدیقی،غزلقافلہ،مرتضی،وفا،اشقیا،جفا،خطا،دعا،رضا،صداadmin

عرفان صدیقی ۔ غزل نمبر 78

حشر برپا تھا کہ سبط مصطفی مارا گیا

بے وطن جنگل میں بے جرم و خطا مارا گیا

چشمۂ خوں سے بجھاکر لشکر اعدا کی پیاس

بادشاہ کشور صبر و رضا مارا گیا

برگ گل سے کون سا خطرہ کماں داروں کو تھا

پھول کی گردن میں کیوں تیر جفا مارا گیا

گونج کر گم ہو گئی صحرا میں اکبر کی اذاں

اُڑتے اُڑتے طائر صوت و صدا مارا گیا

کیسے کیسے سرفروش اُس مہرباں کے ساتھ تھے

ایک ایک آخر سر راہ وفا مارا گیا

تم نکل کر کس کا استقبال کرنے آئے ہو

شہر والو، دشت میں وہ قافلہ مارا گیا

چھٹ گیا آشفتگاں کے ہاتھ سے دامان صبر

سینۂ صد چاک پر دست دعا مارا گیا

پردۂ خیمہ تک آنے ہی کو تھی موج فرات

ناگہاں سقائے بیت مرتضیٰ مارا گیا

زندہ ہم سب نوحہ گر بس یہ خبر سننے کو ہیں

لٹ گئے رہزن، گروہ اشقیا مارا گیا

عرفان صدیقی

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

پانی میں رنگ اس نے شفق کے ملا دیے

دسمبر 1, 2007منصور آفاق،شعراء،غزلہوا،ملا،نما،کہا،گنوا،بنا،حوصلہ،خدا،دعا،سجا،سراadmin

منصور آفاق ۔ غزل نمبر 645

میں نے ذرا جو دھوپ سے پردے اٹھا دیے

پانی میں رنگ اس نے شفق کے ملا دیے

پوچھی پسند یار کی میں نے فراق سے

آہستگی سے رات نے مجھ کو کہا، دیے

کہہ دو شبِ سیاہ سے لے آئے کالکیں

ہاتھوں پہ رکھ کے نکلی ہے خلقِ خدا دیے

ہر دل چراغ خانہ ہے ہر آنکھ آفتاب

کتنے بجھا سکے گی زمیں پر، ہوا، دیے

بڑھنے لگی تھی دھوپ مراسم کی آنکھ میں

دریا کے میں نے دونوں کنارے ملا دیے

بالوں میں میرے پھیر کے کچھ دیر انگلیاں

کیا نقش دل کی ریت پہ اس نے بنا دیے

بھادوں کی رات روتی ہے جب زلفِ یار میں

ہوتے ہیں میری قبر پہ نوحہ سرا دیے

کافی پڑی ہے رات ابھی انتظار کی

میرا یقین چاند، مرا حوصلہ دیے

اتنا تو سوچتے کہ دیا تک نہیں ہے پاس

مٹی میں کیسے قیمتی موتی گنوا دیے

کچھ پل ستم شعار کی گلیوں میں گھوم لے

عرصہ گزر گیا ہے کسی کو دعا دیے

میں نے بھی اپنے عشق کا اعلان کر دیا

فوٹو گراف شیلف پہ اس کے سجا دیے

منصور سو گئے ہیں اجالے بکھیر کر

گلیوں میں گھومتے ہوئے سورج نما دیے

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

اک محمد خدا پہ اترا ہے

دسمبر 1, 2007منصور آفاق،شعراء،غزلہوا،کربلا،المنتہی،جگہ،خدا،دعاadmin

منصور آفاق ۔ غزل نمبر 599

آسماں کے حرا پہ اترا ہے

اک محمد خدا پہ اترا ہے

بول ! زنجیر ریل گاڑی کی

کون کیسی جگہ پہ اترا ہے

سوچتا ہوں کہ رحم کا بادل

کب کسی کربلا پہ اترا ہے

کس کے جوتے کا کھردرا تلوا

سدرئہ المنتہیٰ پہ اترا ہے

خیر کی آرزو نہ راس آئی

قہر دستِ دعا پہ اترا ہے

جھونک دے گی ہر آنکھ میں منصور

راکھ کا دکھ ہوا پہ اترا ہے

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

مرا دل تو جیسے جنازہ گہ کہیں مرگ ہو تو بسا کرے

دسمبر 1, 2007منصور آفاق،شعراء،غزللکھا،گلہ،بچھا،بسا،خدا،دعا،رہا،سناadmin

منصور آفاق ۔ غزل نمبر 530

مجھے شوخ و شنگ لباس میں کوئی دلربا نہ ملا کرے

مرا دل تو جیسے جنازہ گہ کہیں مرگ ہو تو بسا کرے

بڑی سر پھری سی ہوا چلے کہیں شامِ دشت خیال میں

مرے راکھ راکھ سے جسم کو کوئی ریت پر نہ لکھا کرے

تری کائنات میں قید ہوں بڑے مختصر سے قفس میں ہوں

بڑی سنگ زاد گھٹن سی ہے مجھے کوئی اس سے رہا کرے

مرے ہر گناہ و ثواب کو یہ چھپا لے اپنے لباس میں

بڑی لاج پال ہے تیرگی، کوئی رات کا نہ گلہ کرے

مرا ذکر و فکر ہوا کرے تری بارگاہِ خیال میں

مرے داغِ سجدہ کو چومنے تری جا نماز بچھا کرے

اسے پوچھنا کہ وصال کا کوئی واقعہ بھی عدم میں ہے

وہ جو خامشی کے دیار میں کسی ان سنی کو سنا کرے

ترا وصل آبِ حیات ہے ترے جانتے ہیں محب مگر

ہے طلب درازیِ عمر کی کوئی موت کی نہ دعا کرے

مرے جسم و جاں سے پرے کہیں بڑی دور خانہء لمس سے

کوئی خانقاہی کبوتری کہیں گنبدوں میں رہا کرے

کوئی قم بہ اذنی کہے نہیں کوئی چارہ گر نہ نصیب ہو

مرا اور کوئی خدا نہ ہو ترے بعد جگ میں خدا کرے

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

ملا تھا خود سے میں بادِ صبا پہ چلتے ہوئے

دسمبر 1, 2007منصور آفاق،شعراء،غزلفنا،وفا،استوا،دعا،سما،صباadmin

منصور آفاق ۔ غزل نمبر 509

کنارِ چشمۂ حمد و ثنا پہ چلتے ہوئے

ملا تھا خود سے میں بادِ صبا پہ چلتے ہوئے

عدالتِ لب و رخ کا ملا طلب نامہ

کہ لڑکھڑا گیا نقشِ وفا پہ چلتے ہوئے

کوئی ستارہ بھی تیری خبر نہیں دیتا

میں تھک گیا ہوں فصیلِ سما پہ چلتے ہوئے

تمام راستے مسدود تھے رسائی کے

کوئی پہنچ گیا دستِ دعا پہ چلتے ہوئے

مری نگاہ میں قطبین ہی سہی لیکن

گرائی برف خطِ استوا پہ چلتے ہوئے

گرا ہوا بھی چمکتا تھا جھیل میں منصور

میں ماہتاب تھا راہ فنا پہ چلتے ہوئے

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

پڑھ کے کلامِ فیض جو پھونکا شفا ملی

دسمبر 1, 2007منصور آفاق،شعراء،غزلواسطہ،ابتدا،بقا،تجربہ،دعا،شفا،صباadmin

منصور آفاق ۔ غزل نمبر 456

اک حبس کے مریض کو تازہ ہوا ملی

پڑھ کے کلامِ فیض جو پھونکا شفا ملی

کل رات باغ میں مجھے پتوں کے دکھ ملے

لیکن وہاں سے نکلا توبادِ صبا ملی

کیسے کروں وسیلے کی عظمت سے انحراف

مجھ کو خدا کی ذات بھی بل واسطہ ملی

اک دن ملا بہار میں ہنستا ہوا مجھے

اک شام غم کا کرتی ہوئی تجربہ ملی

بولیں گے جبرائیل بھی میرے وجود میں

مجھ کو کسی فقیر سے جس دن دعا ملی

شہرِ ابد نژاد ابھی کتنا دور ہے

پوچھوں گا کائنات کی جو ابتدا ملی

منصور میں نے بانٹ دی خستہ حروف میں

مجھ کو جو آسماں سے شرابِ بقا ملی

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

ہے لام حرکتِ لا ، لا الہ الا اللہ

دسمبر 1, 2007منصور آفاق،شعراء،غزللکھا،لا،کہا،کیا،پڑھا،بادصبا،دعا،سوا،صداadmin

منصور آفاق ۔ غزل نمبر 424

الف ہے حرفِ الہ، لا الہ الا اللہ

ہے لام حرکتِ لا ، لا الہ الا اللہ

یہ میم ،میمِ محمد رسول اللہ ہے

یہی خدا نے کہا،لا الہ الا اللہ

یہی ہے برقِ تجلی،یہی چراغ طور

یہی زمیں کی صدا،لا الہ الا اللہ

کرن کرن میں مچلتی ہے خوشبوئے لولاک

خرامِ بادصبا،لا الہ الا اللہ

نگارِ قوسِ قزح کے جمیل رنگوں سے

وہ بادلوں نے لکھا،لا الہ الا اللہ

سنائی دے یہی غنچوں کے بھی چٹکنے سے

کھلے ہیں دستِ دعا،لا الہ الا اللہ

وہی وجودہے واحد،وہی اکیلا ہے

کوئی نہ اُس کے سوا ،لا الہ الا اللہ

وہ کس کے قربِ مقدس کی دلربائی تھی

تھاکنکروں نے پڑھا ،لا الہ الا اللہ

ہر ایک دل کے غلافِ مہین پر منصور

کشید کس نے کیا ، لا الہ الا اللہ

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

بولی وہ تھی خدا کے لہجے میں

دسمبر 1, 2007منصور آفاق،شعراء،غزلفنا،کافکا،بادصبا،خدا،دعاadmin

منصور آفاق ۔ غزل نمبر 343

سنتے ہم ہیں ہواکے لہجے میں

بولی وہ تھی خدا کے لہجے میں

دے رہی ہے ہماری تنہائی

بدعائیں دعا کے لہجے میں

رات کی آنکھ اوس کے آنسو

بھردے بادصبا کے لہجے میں

گفتگو کر رہی تھی بچوں سے

تھا تحیر فنا کے لہجے میں

خامشی کی کہانیاں منصور

لکھ گیا کافکا کے لہجے میں

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

ابھی نہ مجھ پہ شجر رو ‘ ابھی ہرا ہوں میں

دسمبر 1, 2007منصور آفاق،شعراء،غزلفرا،ملا،چلا،گیا،دیا،دعا،رہاadmin

منصور آفاق ۔ غزل نمبر 334

ابھی تو شاخ سے اپنی، جدا ہوا ہوں میں

ابھی نہ مجھ پہ شجر رو ‘ ابھی ہرا ہوں میں

یہ لگ رہا ہے کئی دن سے اپنے گھر میں مجھے

کسی کے ساتھ کہیں اور رہ رہا ہوں میں

وصالِ زانوئے جاناں کے انتظار میں رات

خود اپنے ہاتھ پہ سر رکھ کے سو گیا ہوں میں

لہو میں دوڑتی پھرتی ہے لمس کی خوشبو

تیر ے خیال سے شاید گلے ملا ہوں میں

ستم کہ جس کی جدائی میں بجھ رہا ہے بدن

اسی چراغ کی مانگی ہوئی دعا ہوں میں

یہ المیہ نہیں سورج مقابلے پر ہے

یہ المیہ ہے کہ بجھتا ہوا دیا ہوں میں

پڑے ہوئے ہیں زمانوں کے آبلے منصور

بس ایک رات کسی جسم پر چلا ہوں میں

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

آئینہ دیکھ کے میں حمد و ثنا کرتا ہوں

دسمبر 1, 2007منصور آفاق،شعراء،غزلکیا،پا،پتہ،ادا،ثنا،دعا،رہاadmin

منصور آفاق ۔ غزل نمبر 279

در کوئی جنتِ پندار کا وا کرتا ہوں

آئینہ دیکھ کے میں حمد و ثنا کرتا ہوں

رات اور دن کے کناروں کے تعلق کی قسم

وقت ملتے ہیں تو ملنے کی دعا کرتا ہوں

وہ ترا، اونچی حویلی کے قفس میں رہنا

یاد آئے تو پرندوں کو رہا کرتا ہوں

پہلے خود آپ بناتا ہوں تماشا اپنا

پھر تماشائی کا کردار ادا کرتا ہوں

پوچھتا رہتا ہوں موجوں سے گہر کی خبریں

اشکِ گم گشتہ کا دریا سے پتہ کرتا ہوں

کبھی آنکھوں سے بھری راہ گزر مجھ پہ گراں

دشت پیمائی کبھی آبلہ پا کرتا ہوں

مجھ سے منصور کسی نے تو یہ پوچھا ہوتا

ننگے پاؤں میں ترے شہر میں کیا کرتا ہوں

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

ٹوٹ کر نعت لکھوں داد خدا سے پاؤں

دسمبر 1, 2007منصور آفاق،شعراء،غزلنوا،پیا،خدا،دلا،دعاadmin

منصور آفاق ۔ غزل نمبر 265

اپنے لفظوں کی مہک باد صبا سے پاؤں

ٹوٹ کر نعت لکھوں داد خدا سے پاؤں

ٹافیاں جیب میں برسوں سے لئے پھرتا ہوں

کاش گلیوں میں کہیں تیرے نواسے پاؤں

میرے صحرائے عرب کے اے کرم ور بادل

دور تک بھٹکے ہوئے آدمی پیاسے پاؤں

انگلیاں تیرے وسیلے کی مہک دیتی ہیں

اپنی بخشش کا یقیں دستِ دعا سے پاؤں

ایک تندور میں محراب کی تعمیر کروں

سایۂ ابر سے منصور دلاسے پاؤں

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

لکھ کر بکھیرنی ہے وفا کی رپورتاژ

دسمبر 1, 2007منصور آفاق،شعراء،غزلفنا،نما،وفا،ادا،بکا،خدا،دعا،رسا،سزا،صباadmin

منصور آفاق ۔ غزل نمبر 257

اک راکھ کے بدن کو ہوا کی رپورتاژ

لکھ کر بکھیرنی ہے وفا کی رپورتاژ

میں کھڑکیوں سے صبح کی پہلی کرن کے ساتھ

پڑھتا ہوں روز باد صبا کی رپورتاژ

تشکیل کائنات کی رودادِ گم شدہ

ہو گی کہاں پہ لوحِ خدا کی رپورتاژ

شاید ہے مانگنے کی جبلت وجود میں

لمبی بہت ہے دستِ دعا کی رپورتاژ

تقسیم کیا کرو گے وسائل زمین کے

لکھتے رہو گے جرم و سزا کی رپورتاژ

لکھتے ہیں روز خونِ جگر کو نچوڑ کے

سورج کے ہاتھ شامِ فنا کی رپورتاژ

لاشوں بھری سرائے سے نکلے گی کب تلک

جانِ جہاں کے ناز و ادا کی رپورتاژ

پڑھتے بنام علم ہیں بچے سکول میں

بالِ ہما کے بختِ رسا کی رپورتاژ

شاید لبِ فرات لہو سے لکھی گئی

اس زندگی کی نشو و نما کی رپورتاژ

برسوں سے نیکیوں کا فرشتہ رقم کرے

منصور صرف آہ و بکا کی رپورتاژ

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

سلام تجھ پہ ہو، باد صبا سلامتی ہو

دسمبر 1, 2007منصور آفاق،شعراء،غزلہوا،کہا،کیا،باوفا،بجا،ثنا،خدا،دیا،دعا،صبا،صدا،ضیاadmin

منصور آفاق ۔ غزل نمبر 236

تُو لائے یار کی خوشبو، سدا سلامتی ہو

سلام تجھ پہ ہو، باد صبا سلامتی ہو

میں دھڑکنوں کے تلاطم سے لطف لیتا ہوں

ہزار وحشتِ موجِ ہوا سلامتی ہو

مری حیاتِ گذشتہ سے لوٹ آتی ہوئی

صباحتِ لب و رخ کی صدا سلامتی ہو

ملالِ شامِ مسلسل کی حکمرانی ہے

الم نصیب، دلِ باوفا سلامتی ہو

تمام کون و مکاں کے لیے دعائے خیر

فقط یہاں ہی نہیں جا بجا سلامتی ہو

وہاں بچھانی ہے اک جانماز میں نے بھی

کنارِ چشمہء حمد و ثنا سلامتی ہو

میں چل رہا تھا کسی بد کلام بستی میں

کسی نے مجھ کو اچانک کہا سلامتی ہو

سیاہ دن سے گزرتی ہوئی سفید قبا

اٹھے ہوئے ہیں یہ دست دعا سلامتی ہو

پڑوس میں بھی ترے دم سے کچھ اجالا ہے

سلامتی مرے گھر کا دیا سلامتی ہو

میں خوشہ چین ہوں غالب ترے گلستاں کا

اے کائناتِ سخن کے خدا سلامتی ہو

شبِ فراق چمکتی ہے تیرے جلووں سے

اے مہتاب کی دھیمی ضیا سلامتی ہو

یہیں پہ خیر بھی رہتی ہے شر بھی ہے آباد

مری زمین پہ منصور کیا سلامتی ہو

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

پڑھتی ہے جن کو چوم کے بادِ صبا نماز

دسمبر 1, 2007منصور آفاق،شعراء،غزلقضا،لگا،وا،ادا،تھا،ثنا،جدا،حرا،خدا،دیا،دعا،رہا،صفا،صباadmin

منصور آفاق ۔ غزل نمبر 181

مٹی مرا وجود، زمیں میری جا نماز

پڑھتی ہے جن کو چوم کے بادِ صبا نماز

اک دلنواز شخص نے دیکھا مجھے تو میں

قوسِ قزح پہ عصر کی پڑھنے لگا نماز

پڑھتے ہیں سر پہ دھوپ کی دستار باندھ کر

سایہ بچھا کے اپنا ہم اہلِ صفا نماز

لات و منات اپنے بغل میں لیے ہوئے

کعبہ کی سمت پڑھتی ہے خلقِ خدا نماز

تیرا ہے کوئی اور تعین مرا میں آپ

تیری جدا نماز ہے میری جدا نماز

جانے کب آئے پھر یہ پلٹ کر شبِ وصال

ہو جائے گی ادا تو عشاء کی قضا نماز

میں نے کہا کہ صبح ہے اب تو افق کے پاس

اس نے کہا تو کیجیے اٹھ کر ادا نماز

مت پوچھ کیسی خواہشِ دیدار تھی مجھے

برسوں میں کوہِ طور پہ پڑھتا رہا نماز

قرباں خیالِ گنبدِ خضرا پہ ہیں سجود

اقرا مری دعا ، مری غارِ حرا نماز

اس مختصر قیام میں کافی یہی مجھے

میرا مکاں درود ہے میرا دیا نماز

پندارِ جاں میں آئی ہیں تجھ سے ملاحتیں

تجھ سے ہوئے دراز یہ دستِ دعا نماز

اے خواجہء فراق ! ملاقات کے لیے

پھر پڑھ کنارِ چشمۂ حمد و ثنا نماز

اے شیخ شاہِ وقت کے دربار سے نکل

دروازہ کر رہی ہے بغاوت کا وا نماز

اس کا خیال مجھ سے قضا ہی نہیں ہوا

لگتا ہے میرے واسطے منصور تھا نماز

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

رنگ بکھرا دیے پھر تازہ ہوا نے کیا کیا

دسمبر 1, 2007منصور آفاق،شعراء،غزلہوا،فسا،نجا،دعا،زما،سرہا،صباadmin

منصور آفاق ۔ غزل نمبر 123

مل گئے مجھ کو بھی جینے کے بہانے کیا کیا

رنگ بکھرا دیے پھر تازہ ہوا نے کیا کیا

کیسی خوشبوئے بدن آتی ہے کمرے سے مجھے

پھول وہ چھوڑ گئی میرے سرہانے کیا کیا

میں تجھے کیسے بتاؤں مری نازک اندام

مجھ پہ گزرے ہیں مصائب کے زمانے کیا کیا

میری خاموشی پہ الزام لگانے والی

کہتی پھرتی ہیں تری آنکھیں نجانے کیا کیا

کیا غزل چھیڑی گئی سانولے رخساروں کی

شام کے گیت کہے بادِ صبا نے کیا کیا

میرے پہلو میں نئے پھول کھلے ہیں کتنے

مجھ کو شاداب کیا دستِ دعا نے کیا کیا

یونہی بے وجہ تعلق ہے کسی سے لیکن

پھیلتے جاتے ہیں منصور فسانے کیا کیا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

کبھی اس گھر میں آ نکلے کبھی اُس گھر میں جا ٹھہرے

نومبر 20, 2005امیر مینائی،غزلمرا،وفا،کہا،کیا،آشنا،بلا،جا،جدا،حیا،دوا،دعا،ذراadmin

امیر مینائی ۔ غزل نمبر 41

فنا کیسی بقا کیسی جب اُس کے آشنا ٹھہرے

کبھی اس گھر میں آ نکلے کبھی اُس گھر میں جا ٹھہرے

نہ ٹھہرا وصل، کاش اب قتل ہی پر فیصلا ٹھہرے

کہاں تک دل مرا تڑپے کہاں تک دم مرا ٹھہرے

جفا دیکھو جنازے پر مرے آئے تو فرمایا

کہو تم بے وفا ٹھہرے کہ اب ہم بے وفا ٹھہرے

تہ خنجر بھی منہ موڑا نہ قاتل کی اطاعت سے

تڑپنے کو کہا تڑپے ، ٹھہرنے کو کہا ٹھہرے

زہے قسمت حسینوں کی بُرائی بھی بھلائی ہے

کریں یہ چشم پوشی بھی تو نظروں میں حیا ٹھہرے

یہ عالم بیقراری کا ہے جب آغاز الفت میں

دھڑکتا ہے دل اپنا دیکھئے انجام کیا ٹھہرے

حقیقت کھول دی آئینہ وحدت نے دونوں کی

نہ تم ہم سے جدا ٹھہرے ، نہ ہم تم سے جدا ٹھہرے

دل مضطر سے کہہ دو تھوڑے تھوڑے سب مزے چکھے

ذرا بہکے ذرا سنبھلے ذرا تڑپے ذرا ٹھہرے

شب وصلت قریب آنے نہ پائے کوئی خلوت میں

ادب ہم سے جدا ٹھہرے حیا تم سے جدا ٹھہرے

اٹھو جاؤ سدھا رو ، کیوں مرے مردے پہ روتے ہو

ٹھہرنے کا گیا وقت اب اگر ٹھہرے تو کیا ٹھہرے

نہ تڑپا چارہ گر کے سامنے اے درد یوں مجھ کو

کہیں ایسا نہ ہو یہ بھی تقاضائے دوا ٹھہرے

ابھی جی بھر کے وصل یار کی لذت نہیں اٹھی

کوئی دم اور آغوش اجابت میں دعا ٹھہرے

خیال یار آنکلا مرے دل میں تو یوں بولا

یہ دیوانوں کی بستی ہے یہاں میری بلا ٹھہرے

امیر آیا جو وقت بد تو سب نے راہ لی اپنی

ہزاروں سیکڑوں میں درد و غم دو آشنا ٹھہرے

امیر مینائی

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

تب ہم نہ رہے وفا کے قابل

نومبر 19, 2005امیر مینائی،غزلوفا،آسیا،جلا،دوا،دعاadmin

امیر مینائی ۔ غزل نمبر 17

جب یار ہوا جفا کے قابل

تب ہم نہ رہے وفا کے قابل

ہے خوف سے سارے تن میں رعشہ

اب ہاتھ کہاں دعا کے قابل

آئے مجھے دیکھنے اطبّا

جب میں نہ رہا دوا کے قابل

بولے مرے دل پہ پیس کر دانت

یہ دانہ ہے آسیا کے قابل

کلفت سے امیر صاف کر دل

یہ آئینہ ہے جلا کے قابل

امیر مینائی

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

رہ کے گلشن میں بھی کیا کیجے گا

جنوری 8, 1972شعراء،غزللڑا،ملا،کیا،گلا،دعا،صباadmin

باقی صدیقی ۔ غزل نمبر 53

سیر مانند صبا کیجے گا

رہ کے گلشن میں بھی کیا کیجے گا

کس توقع پہ صدا کیجے گا

نہ سنے کوئی تو کیا کیجے گا

حق پرستی ہے بڑی بات مگر

روز کس کس سے لڑا کیجے گا

بن گئے لالہ و گل جز و قفس

کس سے اب ذکر صبا کیجے گا

دوستی شرط نہیں ہے کوئی

بس یونہی ہم سے ملا کیجے گا

لو سلام سر رہ سے بھی گئے

اور جا جا کے گلا کیجے گا

طوف کعبہ کو گئے تو باقیؔ

میرے حق میں بھی دعا کیجے گا

باقی صدیقی

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔