ٹیگ کے محفوظات: خزینے

خاک طیبہ کے خزینے کی طرف آنکھیں ہیں

دسمبر 1, 2007منصور آفاق،شعراء،غزلمہینے،مدینے،نگینے،خزینے،زینے،سفینے،سینےadmin

منصور آفاق ۔ غزل نمبر 377

آسمانوں کے دفینے کی طرف آنکھیں ہیں

خاک طیبہ کے خزینے کی طرف آنکھیں ہیں

اس میں اک نام دھڑکتا ہے بڑے زور کے ساتھ

اپنی تو اپنے ہی سینے کی طرف آنکھیں ہیں

لوگ مشکل میں عبادت کریں واشنگٹن کی

شکر ہے اپنی ، مدینے کی طرف آنکھیں ہیں

روضے کی جالیاں چھونے کا شرف جس کو ملا

اُس انگوٹھی کے نگینے کی طرف آنکھیں ہیں

آرہا ہے جو سرِ عرش سے میری جانب

اُس اترے ہوئے زینے کی طرف آنکھیں ہیں

جس پہ بطحا کا سفر کرتے تھے عشاقِ رسول

اُس کرم بار سفینے کی طرف آنکھیں ہیں

جس میں آیا تھا اجالوں کا پیمبر منصور

اُس بہاروں کے مہینے کی طرف آنکھیں ہیں

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

خود کو کبھی بوذر کے مدینے سے نکالوں

دسمبر 1, 2007منصور آفاق،شعراء،غزلقرینے،مہینے،مدینے،نگینے،کمینے،گینے،پسینے،خزینے،دفینے،زینے،سفینے،سینےadmin

منصور آفاق ۔ غزل نمبر 270

مرنے سے نکالوں کبھی جینے سے نکالوں ؟

خود کو کبھی بوذر کے مدینے سے نکالوں

کچھ دھوپ چراؤں میں کسی گرم بدن کی

کمرے کو دسمبر کے مہینے سے نکالوں

جراح بلاؤں یا کوئی سنت سپیرا

کس طرح ترے درد کو سینے سے نکالوں

آ پھر ترے گیسو کی شبِ تار اٹھا کر

مہتاب سا بالی کے نگینے سے نکالوں

صحرا سا سمندر کی رگ و پے میں بچھا دوں

لیکن میں سفر کیسے سفینے سے نکالوں

ہے تیر جو سینے میں ترازو کئی دن سے

میں چاہتا ہوں اس کو قرینے سے نکالوں

افلاک سے بھی لوگ جنہیں دیکھنے آئیں

وہ خواب خیالوں کے خزینے سے نکالوں

ہر چیز سے آتی ہے کسی اور کی خوشبو

پوشاک سے کھینچوں کہ پسینے سے نکالوں

ہونٹوں کی تپش نے جو ہتھیلی پہ رکھا ہے

سورج میں اُسی آبلہ گینے سے نکالوں

ممکن ہی نہیں پاؤں ، بلندی پہ میں اتنی

تقویم کے ٹوٹے ہوئے زینے سے نکالوں

نیکی ! تجھے کیا علم کہ کیا لطف ہے اس میں

دل کیسے سیہ کار کمینے سے نکالوں

منصور دہکتے ہوئے سورج کی مدد سے

دریا کو سمندر کے دفینے سے نکالوں

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔