ٹیگ کے محفوظات: جین

سفید آگ سیہ جین سے نکل آئی

دسمبر 1, 2007منصور آفاق،شعراء،غزلقالین،یاسین،اباسین،تلقین،توہین،تدفین،جین،دین،سین،طواسینadmin

منصور آفاق ۔ غزل نمبر 448

کلی لبادۂ تزئین سے نکل آئی

سفید آگ سیہ جین سے نکل آئی

دکھائی فلم کسی نے وصال کی پہلے

پھر اس کے بعد وہی سین سے نکل آئی

مرے خدا کی بھی قربان گاہ مٹی تھی

بہار پھول کی تدفین سے نکل آئی

اسے خرید لیا مولوی کفایت نے

جو نیکی سیٹھ کرم دین سے نکل آئی

چراغ لے کے میں بیٹھا ہی تھا کہ صبحِ ازل

خرامِ آبِ اباسین سے نکل آئی

مریدِ خاص ہوئی تخلیے کی آخرکار

خرد نصیحت و تلقین سے نکل آئی

حروف وردِ انا الحق پہ کرتے تھے مجبور

سو میری آنکھ طواسین سے نکل آئی

مجھے جگایا کسی نے یوں حسنِ قرات سے

کہ صبح سورۃ یاسین سے نکل آئی

گریزاں یار بھی تکرار سے ہوا کچھ کچھ

طبعیت اپنی بھی توہین سے نکل آئی

گزر ہوا ہے جہاں سے بھی فوج کا منصور

زمین گھاس کے قالین سے نکل آئی

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

کون عریاں ہے نگاہوں میں سیہ جین پہن کر

دسمبر 1, 2007منصور آفاق،شعراء،غزلفراعین،قالین،نرمین،یٰسین،جین،سینadmin

منصور آفاق ۔ غزل نمبر 174

فلم چلتی ہے مسلسل وہی اک سین پہن کر

کون عریاں ہے نگاہوں میں سیہ جین پہن کر

کوئی کمرہ مرے پاؤں پہ اترتا ہی نہیں ہے

سیڑھیاں چلتی چلی جاتی ہیں قالین پہن کر

ہوتے رہتے ہیں جہازوں کے بڑے حادثے لیکن

کرتا رہتا ہوں سفر سورتِ یٰسین پہن کر

نرمگی اس کی ابھر آئی تھی ملبوس سے باہر

کتنی نازک سی سکرٹ آئی تھی نرمین پہن کر

تم مرے ہونٹوں کی کیا پیاس بجھا سکتی ہو وینس

میرا پیاسا ہے بدن، آبِ ابا سین پہن کر

ہیں خدائی کا مسائل کہ سرِ راہ پڑے ہیں

اک تماشے کا لبادہ سا فراعین پہن کر

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

فرمانِ چشمِ یار پہ واوین مت لگا

دسمبر 1, 2007منصور آفاق،شعراء،غزلفریقین،قوسین،مابین،چین،چیرمین،نعلین،واوین،بین،جین،دارین،طرفین،عینadmin

منصور آفاق ۔ غزل نمبر 79

مرکوز رکھ نگاہ کو، پھر نین مت لگا

فرمانِ چشمِ یار پہ واوین مت لگا

زردار! یہ جو تُو نے کیے ہیں ہزار حج

اس پر امیدِ رحمتِ دارین مت لگا

جس سے تُو دیکھتا ہے ابو جہل کے قدم

اُس آنکھ سے رسول کے نعلین مت لگا

خطرہ ہے انعدام کا میرے وجود کو

باہوں سے اپنی محفلِ قوسین مت لگا

دونوں طرف ہی دشمنِ جاں ہیں خیال رکھ

اتنے قریب حدِ فریقین مت لگا

کوئی تماشا اے مرے جدت طراز ذہن

تُو عرش اور فرش کے مابین مت لگا

جائز ہر ایک آنکھ پہ جلوے بہار کے

اپنی کتابِ حسن پہ تُو بین مت لگا

دیوارِ قوس رکھ نہ شعاعوں کے سامنے

لفظِ طلو کے بعد کبھی عین مت لگا

دشمن کے ہارنے پہ بھی ناراض مجھ سے ہے

مجھ کو تو اپنا دل بھی کوئی’ جین مت‘ لگا

ادراک سلسلہ ہے، اسے مختصر نہ کر

اپنے سکوتِ فہم کو بے چین ’مت‘ لگا

جس نے تمام زندگی بجلی چرائی ہے

اس کو تو واپڈا کا چیرمین مت لگا

لگتا ہے یہ مقدمہ یک طرفہ عشق کا

منصور شرطِ شرکتِ ’طرفین‘ مت لگا

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔