پروین شاکر ۔ غزل نمبر 33

گئے موسم میں جو کِھلتے تھے گلابوں کی طرح

دل پہ اُتریں گے وہی خواب عذابوں کی طرح

راکھ کے ڈھیر پہ اب رات بسرکرنی ہے

جل چکے ہیں مرے خیمے،مرے خوابوں کی طرح

ساعتِ دید کے عارض ہیں گلابی اب تک

اولیں لمحوں کے گُلنار حجابوں کی طرح

وہ سمندر ہے توپھر رُوح کو شاداب کرے

تشنگی کیوں مجھے دیتا ہے سرابوں کی طرح

غیر ممکن ہے ترے گھر کے گلابوں کا شمار

میرے رِستے ہُوئے زخموں کے حسابوں کی طرح

یاد تو ہوں گی وہ باتیں تجھے اب بھی لیکن

شیلف میں رکھی ہُوئی کتابوں کی طرح

کون جانے نئے سال میں تو کس کو پڑھے

تیرا معیار بدلتا ہے نصابوں کی طرح

شوخ ہو جاتی ہے اب بھی تری آنکھوں کی چمک

گاہے گاہے،ترے دلچسپ جوابوں کی طرح

ہجر کی سب،مری تنہائی پہ دستک دے گی

تیری خوشبو ،مرے کھوئے ہوئے خوابوں کی طرح

پروین شاکر

عرفان صدیقی ۔ غزل نمبر 156

مجھے اُلجھا دیا دانش کدوں نے صرف خوابوں میں

کوئی تعبیر رکھ دو میرے بچوں کی کتابوں میں

طلسم ایسا تو ہو جو خوُبصورت ہو حقیقت سے

ہنر یہ بھی نہیں ہے آج کے افراسیابوں میں

تعلق اِک تعارف تک سمٹ کر رہ گیا آخر

نہ وہ تیزی سوالوں میں نہ وہ تلخی جوابوں میں

مکاں کیسے بھی ہوں، خوابوں کی خاطر کون ڈھاتا ہے

کم اَز کم اِس قدر ہمّت تو تھی خانہ خرابوں میں

ذرا سوچو تو اِس دُنیا میں شاید کچھ نہیں بدلا

وہی کانٹے ببولوں میں، وہی خوُشبو گلابوں میں

عرفان صدیقی