منصور آفاق ۔ غزل نمبر 247

بادِ صبا کے ساتھ صدائے فلاح دھوپ

منصور شامِ غم میں بھی کارِ مباح دھوپ

آنسو رکے ہوئے ہیں کہیں بادلوں کے بیچ

پھیلی ہے چشمِ یاد کے گرد و نواح دھوپ

فتووں کے ابر سے کسی پردے میں جا چھپی

رکھی ہوئی تھی گھر میں جو اک بے نکاح دھوپ

اندھی شبوں میں حضرتِ اقبال آفتاب

برفاب موسموں میں جنابِ جناح دھوپ

ہم لمس ہوں تو ذات کا دریا بہے کوئی

تیرا مذاق برف ہے میرا مزاح دھوپ

ہو جاؤں ساحلوں پہ برہنہ، نہیں ، نہیں

کیسی یہ دے رہی ہے مسلسل صلاح دھوپ

منصور آفاق