موضوعِ جبر بحث میں لانا پڑا مجھے

کس کو ہے اختیار جتانا پڑا مجھے

باغِ عدم کو چھوڑ کے دشتِ وجود میں

آتا کبھی نہیں مگر آنا پڑا مجھے

اِس درجہ روشنی سے عداوت بڑھی یہاں

"جلتا ہُوا چراغ بجھانا پڑا مجھے”

عالم وہ ایک ہُو کا کہ موت آ کے لَوٹ جائے

مرنے سے پہلے شور مچانا پڑا مجھے

ضامنؔ! وہ فردِ جرم تھی یا فردِ جبر تھی

خاموش ہو کے سر کو جھکانا پڑا مجھے

ضامن جعفری

دیوان دوم غزل 955

دزدیدہ نگہ کرنا پھر آنکھ ملانا بھی

اس لوٹتے دامن کو پاس آ کے اٹھانا بھی

پامالی عاشق کو منظور رکھے جانا

پھر چال کڈھب چلنا ٹھوکر نہ لگانا بھی

برقع کو اٹھا دینا پر آدھے ہی چہرے سے

کیا منھ کو چھپانا بھی کچھ جھمکی دکھانا بھی

دیکھ آنکھیں مری نیچی اک مارنا پتھر بھی

ظاہر میں ستانا بھی پردے میں جتانا بھی

صحبت ہے یہ ویسی ہی اے جان کی آسائش

ساتھ آن کے سونا بھی پھر منھ کو چھپانا بھی

میر تقی میر