چھَنا جو رنگِ شَفَق گَہرے بادلوں میں سے ہے

چھُپا ہے کون وہاں ، کس کے قاتلوں میں سے ہے

جو حُسن و عشق و تغزل کے کاملوں میں سے ہے

سُنا ہے چاند کو تکتا ہے باولوں میں سے ہے

امیرِ شہر نے رکھ دی نوازنے کی یہ شرط

ثبوت لاؤ کہ یہ شخص جاہلوں میں سے ہے

رکھا ہے خارِ تمنا کی تشنگی کے لئے

بچا جو آبلہ پاؤں کے آبلوں میں سے ہے

یہاں تو نطق و سَماعَت کا فاصلہ ضامنؔ

یہ لگ رہا ہے کہ صدیوں کے فاصلوں میں سے ہے

ضامن جعفری