ٹیگ کے محفوظات: جانکاہ

فقیروں کی اللہ اللہ ہے

اکتوبر 6, 2015میر تقی میر،اساتذہ،غزلہواخواہ،ناف،گاہ،افواہ،اللہ،آگاہ،جانکاہ،راہ،سرواہadmin

دیوان سوم غزل 1289

چلے ہم اگر تم کو اکراہ ہے

فقیروں کی اللہ اللہ ہے

نہ افسر ہے نے درد سر نے کلہ

کہ یاں جیسا سر ویسا سرواہ ہے

جہاں لگ چلے گل سے ہم داغ ہیں

اگرچہ صبا بھی ہواخواہ ہے

غم عشق ہے ناگہانی بلا

جہاں دل لگا کڑھنا جانکاہ ہے

چراغان گل سے ہے کیا روشنی

گلستاں کسو کی قدم گاہ ہے

محبت ہے دریا میں جا ڈوبنا

کنوئیں میں بھی گرنا یہی چاہ ہے

کلی سا ہے کہتے ہیں منھ یار کا

نہیں معتبر کچھ یہ افواہ ہے

نہ کی کوتہی بت پرستی میں کچھ

خدا اس عقیدے سے آگاہ ہے

گیا میر کے جی کی سن کر وہ شوخ

لگا کہنے سب کو یہی راہ ہے

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

شمع مزار میر بجز آہ کون ہے

اکتوبر 6, 2015میر تقی میر،اساتذہ،غزلہمراہ،اللہ،آہ،جانکاہ،راہadmin

دیوان اول غزل 576

مجھ سوز بعد مرگ سے آگاہ کون ہے

شمع مزار میر بجز آہ کون ہے

بیکس ہوں مضطرب ہوں مسافر ہوں بے وطن

دوری راہ بن مرے ہمراہ کون ہے

لبریز جس کے حسن سے مسجد ہے اور دیر

ایسا بتوں کے بیچ وہ اللہ کون ہے

رکھیو قدم سنبھل کے کہ تو جانتا نہیں

مانند نقش پا یہ سر راہ کون ہے

ایسا اسیر خستہ جگر میں سنا نہیں

ہر آہ میر جس کی ہے جانکاہ کون ہے

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

شب کو القصہ عجب قصۂ جانکاہ سنا

اکتوبر 6, 2015میر تقی میر،اساتذہ،غزلگمراہ،گاہ،آگاہ،جانکاہadmin

دیوان اول غزل 16

حال دل میر کا رو رو کے سب اے ماہ سنا

شب کو القصہ عجب قصۂ جانکاہ سنا

نابلد ہو کے رہ عشق میں پہنچوں تو کہیں

ہمرہ خضر کو یاں کہتے ہیں گمراہ سنا

کوئی ان طوروں سے گذرے ہے ترے غم میں مری

گاہ تونے نہ سنا حال مرا گاہ سنا

خواب غفلت میں ہیں یاں سب تو عبث جاگا میر

بے خبر دیکھا انھیں میں جنھیں آگاہ سنا

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔