دیوان دوم غزل 762

رہا میں تو عزت کا اعزاز کرتا

چلا عشق خواری کو ممتاز کرتا

نہ ہوتا میں حسرت میں محتاج گریہ

جو کچھ آنسوئوں کو پس انداز کرتا

نہ ٹھہرا مرے پاس دل ورنہ اب تک

اسے ایسا ہی میں تو جانباز کرتا

جو جانوں کہ درپے ہے ایسا وہ دشمن

تو کاہے کو الفت سے میں ساز کرتا

تو تمکین سے کچھ نہ بولا وگرنہ

مسیحا صنم ترک اعجاز کرتا

گلوگیر ہی ہو گئی یاوہ گوئی

رہا میں خموشی کو آواز کرتا

زیارت گہ کبک تو ہو بلا سے

ٹک آ میر کی خاک پر ناز کرتا

میر تقی میر

دیوان اول غزل 198

آوے گی میری قبر سے آواز میرے بعد

ابھریں گے عشق دل سے ترے راز میرے بعد

جینا مرا تو تجھ کو غنیمت ہے ناسمجھ

کھینچے گا کون پھر یہ ترے ناز میرے بعد

شمع مزار اور یہ سوز جگر مرا

ہر شب کریں گے زندگی ناساز میرے بعد

حسرت ہے اس کے دیکھنے کی دل میں بے قیاس

اغلب کہ میری آنکھیں رہیں باز میرے بعد

کرتا ہوں میں جو نالے سر انجام باغ میں

منھ دیکھو پھر کریں گے ہم آواز میرے بعد

بن گل موا ہی میں تو پہ تو جا کے لوٹیو

صحن چمن میں اے پر پرواز میرے بعد

بیٹھا ہوں میر مرنے کو اپنے میں مستعد

پیدا نہ ہوں گے مجھ سے بھی جانباز میرے بعد

میر تقی میر