ٹیگ کے محفوظات: تک

ہم تمہیں ڈھونڈنے دور تک جائیں گے

جون 1, 2021یاور ماجد،آنکھ بھر آسمان،غزلبہک،بھٹک،تک،سرکadmin

راستے جب گلابوں سے ڈھک جائیں گے

ہم تمہیں ڈھونڈنے دور تک جائیں گے

پیش رو نسل کی دلبری کے لیے

زرد پتّے شجر سے سرک جائیں گے

ہم ہیں راہِ گُماں کے سفر پر رواں

راستہ مل گیا تو بھٹک جائیں گے

یوں نہ دیکھو ہمیں، یوں نہ دیکھو ہمیں

ہم بہک جائیں گے، ہم بہک جائیں گے

تم دلاسوں کے پتھر نہیں پھینکنا

درد کے دائرے دور تک جائیں گے

یاور ماجد

آنکھ بھر آسمان ۔ فہرست

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

حیرت سے پلک جھپک رہی ہوں

اکتوبر 25, 2015پروین شاکر،شعراء،غزلچٹک،کھٹک،پلک،بِلک،بھٹک،تک،تھک،جھپک،جھجک،سِسک،سےپکadmin

پروین شاکر ۔ غزل نمبر 56

منظر ہے وہی ٹھٹک رہی ہوں

حیرت سے پلک جھپک رہی ہوں

یہ تُو ہے کہ میرا واہمہ ہے!

بند آنکھوں سے تجھ کو تک رہی ہوں

جیسے کہ کبھی نہ تھا تعارف

یوں ملتے ہوئے جھجک رہی ہوں

پہچان! میں تیری روشنی ہوں

اور تیری پلک پلک رہی ہوں

کیا چَین ملا ہے………سر جو اُس کے

شانوں پہ رکھے سِسک رہی ہوں

پتّھر پہ کھلی ، پہ چشمِ گُل میں

کانٹے کی طرح کھٹک رہی ہوں

جگنو کہیں تھک کے گرِ چُکا ہے

جنگل میں کہاں بھٹک رہی ہوں

گڑیا مری سوچ کی چھنی کیا

بچّی کی طرح بِلک رہی ہوں

اِک عمر ہُوئی ہے خُود سے لڑتے

اندر سے تمام تھک رہی ہوں

رس پھر سے جڑوں میں جا رہا ہے

میں شاخ پہ کب سےپک رہی ہوں

تخلیقِ جمالِ فن کا لمحہ!

کلیوں کی طرح چٹک رہی ہوں

پروین شاکر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

کہیں ہم نے پتہ پایا نہ ہر گز آج تک تیرا

اکتوبر 25, 2015اساتذہ،داغ دہلوی،غزلملک،مشترک،نمک،یک،تک،دیکadmin

داغ دہلوی ۔ غزل نمبر 8

یہاں بھی تو وہاں بھی تو زمیں تیری فلک تیرا

کہیں ہم نے پتہ پایا نہ ہر گز آج تک تیرا

صفات و ذات میں یکتا ہے تو اے واحد مطلق

نہ کوئی تیرا ثانی کوئی مشترک تیرا

جمال احمد و یوسف کو رونق تو نے بخشی ہے

ملاحت تجھ سے شیریں حسن شیریں میں نمک تیرا

ترے فیض و کرم سے نار و نور آپس میں یکدل ہیں

ثنا گر یک زبان ہر ایک ہے جن و ملک تیرا

نہ جلتا طور کیونکر کس طرح موسی نہ غش کھاتے

کہاں یہ تاب و طاقت جلوہ دیکھئے مر دیک تیرا

دعا یہ ہے کہ وقت مرگ اسکی مشکل آساں ہو

زباں پر داغ کے نام آئے یا رب یک بہ یک تیرا

داغ دہلوی

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

اپنے ہی آپ تک گئے ہوں گے

اکتوبر 23, 2015Jaun Elia،جون ایلیا،شعراء،غزللٹک،چھلگ،کمک،کھٹک،اٹک،بہک،تک،تھک،سمکadmin

جون ایلیا ۔ غزل نمبر 189

گھر سے ہم گھر تلک گئے ہوں گے

اپنے ہی آپ تک گئے ہوں گے

ہم جو اب آدمی ہیں پہلے کبھی

جام ہوں گے چھلگ گئے ہوں گے

وہ بھی اب ہم سے تھک گیا ہو گا

ہم بھی اب اس سے تھک گئے ہوں گے

شب جو ہم سے ہوا معاف کرو

نہیں پی تھی بہک گئے ہوں گے

کتنے ہی لوگ حرص شہرت میں

دار پر خود لٹک گئے ہوں گے

شکر ہے اس نگاہ کم کا میاں

پہلے ہی ہم کھٹک گئے ہوں گے

ہم تو اپنی تلاش میں اکثر

از سما تا سمک گئے ہوں گے

اس کا لشکر جہاں تہاں یعنی

ہم بھی بس بے کمک گئے ہوں گے

جون ، اللہ اور یہ عالم

بیچ میں ہم اٹک گئے ہوں گے

جون ایلیا

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

عشق کی مے سے چھک رہے ہیں ہم

اکتوبر 6, 2015میر تقی میر،اساتذہ،غزللٹک،چھک،کھٹک،پک،پٹک،اٹک،بک،تک،تھک،جھٹک،سرکadmin

دیوان دوم غزل 854

کچھ نہ پوچھو بہک رہے ہیں ہم

عشق کی مے سے چھک رہے ہیں ہم

سوکھ غم سے ہوئے ہیں کانٹا سے

پر دلوں میں کھٹک رہے ہیں ہم

وقفۂ مرگ اب ضروری ہے

عمر طے کرتے تھک رہے ہیں ہم

کیونکے گرد علاقہ بیٹھ سکے

دامن دل جھٹک رہے ہیں ہم

کون پہنچے ہے بات کی تہ کو

ایک مدت سے بک رہے ہیں ہم

ان نے دینے کہا تھا بوسۂ لب

اس سخن پر اٹک رہے ہیں ہم

نقش پا سی رہی ہیں کھل آنکھیں

کس کی یوں راہ تک رہے ہیں ہم

دست دے گی کب اس کی پابوسی

دیر سے سر پٹک رہے ہیں ہم

بے ڈھب اس پاس ایک شب تھے گئے

سو کئی دن سرک رہے ہیں ہم

خام دستی نے ہائے داغ کیا

پوچھتے کیا ہو پک رہے ہیں ہم

میر شاید لیں اس کی زلف سے کام

برسوں سے تو لٹک رہے ہیں ہم

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

دل ساکنان باغ کے تجھ سے اٹک گئے

اکتوبر 6, 2015میر تقی میر،اساتذہ،غزلچھک،ٹپک،پک،اٹک،بھک،تک،تھکadmin

دیوان اول غزل 478

کبکوں نے تیری چال جو دیکھی ٹھٹھک گئے

دل ساکنان باغ کے تجھ سے اٹک گئے

اندوہ وصل و ہجر نے عالم کھپا دیا

ان دو ہی منزلوں میں بہت یار تھک گئے

مطلق اثر نہ اس کے دل نرم میں کیا

ہر چند نالہ ہاے حزیں عرش تک گئے

افراط گریہ سے ہوئیں آبادیاں خراب

سیلاب میرے اشک کے اژدر بھی بھک گئے

وے مے گسار ظرف جنھیں خم کشی کے تھے

بھر کر نگاہ تونے جو کی ووہیں چھک گئے

چند اے سپہر چھاتی ہماری جلا کرے

اب داغ کھاتے کھاتے کلیجے تو پک گئے

عشاق پر جو وے صف مژگاں پھریں تو میر

جوں اشک کتنے چو گئے کتنے ٹپک گئے

میر تقی میر

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

رستے ہمارے پاؤں تلے سے سرک گئے

نومبر 16, 2013آفتاب اقبال شمیممہک،ڈھک،بھٹک،تک،تھک،سرکadmin

آفتاب اقبال شمیم ۔ غزل نمبر 42

منزل قریب آئی تو ایسے بہک گئے

رستے ہمارے پاؤں تلے سے سرک گئے

نکلے کبھی نہ اپنے مضافات سے پرے

اپنی تلاش میں جو بہت دور تک گئے

اک نسل کے لہو سے چراغاں تھے راستے

یہ کیا ہوا کہ قافلے پھر بھی بھٹک گئے

خبروں کے شعبدے وُہ دکھا کر دم سحر

شہ سرخیوں سے چشمِ بصارت کو ڈھک گئے

آئے نظر چراغ سے چہرے فضاؤں میں

یادیں جو ٹمٹمائیں ، اندھیرے مہک گئے

دیکھو نا اب بھی ہال کی خالی ہیں کرسیاں

ہم تو دکھا دکھا کے کرامات تھک گئے

آفتاب اقبال شمیم

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

تم آدمی ہو، تو آدمی کی، ہتک نہ کرنا

نومبر 15, 2013آفتاب اقبال شمیمہتک،مشترک،کھنک،تک،شکadmin

آفتاب اقبال شمیم ۔ غزل نمبر 30

تمیزِ فرزندِ ارض و ابنِ فلک نہ کرنا

تم آدمی ہو، تو آدمی کی، ہتک نہ کرنا

یہ جمع و تفریق، ضرب و تقسیم کی صدی ہے

عقیدہ ٹھہرا عدد کی منطق پہ شک نہ کرنا

پسِ خراباتِ بند جاری ہے مے گساری

سکھایا جام و سبو کو ہم نے کھنک نہ کرنا

چھلاوے بن جائیں آگے جا کر یہی غزالاں

تعاقب ان مہ وشوں کا تم دور تک نہ کرنا

یہ غم کہ معنی تجھے لگے ہے سراب معنی

اکیلے سہنا، اسے غمِ مشترک نہ کرنا

آفتاب اقبال شمیم

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

زمیں اللہ کی ہے اور سب کا حق برابر ہے

دسمبر 1, 2007منصور آفاق،شعراء،غزلکالک،ٹھنڈک،اجرک،تک،حق،شکadmin

منصور آفاق ۔ غزل نمبر 612

دریچوں پر اذانِ وقت کی دستک برابر ہے

زمیں اللہ کی ہے اور سب کا حق برابر ہے

خدا پر رزق کی تقسیم کا الزام صدیوں سے

مساواتِ محمد میں مقدر تک برابر ہے

جہاں ہم خود نہیں رہتے وہ گھر اپنا نہیں ہوتا

کرایہ خاک کا اور سود کی کالک برابر ہے

تمہیں اے صاحبانِ زر ،ہے دوزخ کی وعیدِ خاص

ڈرو۔دنیا میں بھی اس کی پکڑبے شک برابر ہے

کبھی گزرے نہ وہ تجھ پرجوگزری مجھ پہ سوگزری

قیامت ہجر کی اورموت کی ٹھنڈک برابر ہے

مجھے لگتا ہے تم سوئے نہیں ہو رات بھر منصور

تمہاری چار پائی پر پڑی اجرک برابر ہے

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

یا مجھے اپنے ڈرائنگ روم تک محدود رکھ

دسمبر 1, 2007منصور آفاق،شعراء،غزلچہک،نمک،کھنک،تک،دھمک،دھنکadmin

منصور آفاق ۔ غزل نمبر 409

یا بدن کے سرخ گجروں کی مہک محدود رکھ

یا مجھے اپنے ڈرائنگ روم تک محدود رکھ

دھن کوئی کومل سی بس ترتیب کے لمحے میں ہے

اے محافظ کالے بوٹوں کی دھمک محدود رکھ

سو رہا ہے تیرے پہلو میں کوئی غمگین شخص

چوڑیوں کی رنگ پروردہ کھنک محدود رکھ

باغباں ہر شاخ سے لپٹے ہوئے ہیں زرد سانپ

گھونسلوں تک اپنی چڑیوں کی چہک محدود رکھ

جاگنے لگتے ہیں گلیوں میں غلط فہمی کے خواب

آئینے تک اپنی آنکھوں کی چمک محدود رکھ

لوگ چلنے لگتے ہیں قوسِ قزح کی شال پر

اپنے آسودہ تبسم کی دھنک محدود رکھ

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

طلسمِ شب ہے سحر تک بلائیں حاکم ہیں

دسمبر 1, 2007منصور آفاق،شعراء،غزلمبارک،مسلک،ناٹک،کالک،گاہک،ٹھنڈک،پھاٹک،بک،تک،زیرک،شک،عینکadmin

منصور آفاق ۔ غزل نمبر 371

دیارِ گل میں بھیانک بلائیں حاکم ہیں

طلسمِ شب ہے سحر تک بلائیں حاکم ہیں

سفید پوش ہیں سہمے ہوئے مکانوں میں

گلی میں پھرتی ہے کالک بلائیں حاکم ہیں

یہاں سے ہجرتیں کرنی ہیں خوش دماغوں نے

یہاں ہے موت کی ٹھنڈک بلائیں حاکم ہیں

یہ گفتگو سے سویرے طلوع کرتی ہیں

وطن پہ رات کی زیرک بلائیں حاکم ہیں

نکل پڑے ہیں ہزاروں سگانِ آدم خور

کھلے ہیں موت کے پھاٹک بلائیں حاکم ہیں

وہ ساری روشنیوں کی سہانی آوازیں

تھا اقتدار کا ناٹک بلائیں حاکم ہیں

جو طمطراق سے جالب کے گیت گاتی ہیں

وہ انقلاب کی گاہک بلائیں حاکم ہیں

کسی چراغ میں ہمت نہیں ہے جلنے کی

بڑا اندھیرا ہے بے شک بلائیں حاکم ہیں

سعودیہ سے ہواہے نزولِ پاک ان کا

چلو وطن میں مبارک بلائیں حاکم ہیں

خدا کے نام دھماکے نبیؐ کے نام فساد

بنامِ دین ہے بک بک بلائیں حاکم ہیں

یہ مال و زر کی پجاری ہیں وقت کی قارون

نہیں ہے مذہب و مسلک بلائیں حاکم ہیں

نظر نہ آئیں سہولت سے آنکھ کو منصور

لگا کے دیکھئے عینک بلائیں حاکم ہیں

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

ڈر رہا ہے دریچے تک سے تُو

دسمبر 1, 2007منصور آفاق،شعراء،غزلفلک،مہک،تک،جھلک،سڑکadmin

منصور آفاق ۔ غزل نمبر 223

رنگ لے کر نئے، دھنک سے تُو

ڈر رہا ہے دریچے تک سے تُو

یہ تجھے بھی مسافرت دے گی

مانگتا کیاہے اِس سڑک سے تُو

کھنکھناتی ہوئی زمیں سے میں

اور آیا ہوا فلک سے تُو

دل پہ تصویر ہو گیا کیسے

اپنی بس ایک ہی جھلک سے تُو

شور آنکھوں کا کیسا تھا منصور

بھر گیا لمس کی مہک سے تُو

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔

جنت کے بنگلے کا پھاٹک اور شراب

دسمبر 1, 2007منصور آفاق،شعراء،غزلمسلک،ڈھولک،کالک،گاہک،پھاٹک،اجرک،بک،تک،دستک،شک،عینکadmin

منصور آفاق ۔ غزل نمبر 132

ایک شرابی ہاتھ کی دستک اور شراب

جنت کے بنگلے کا پھاٹک اور شراب

پیاس ہوائے شام میں اپنے بین کرے

ابر ہے بامِ ذات کی حد تک اور شراب

مجھ سے تیری یادیں چھین نہیں سکتے

اُس بازار کے سارے گاہک اور شراب

سات سمندر پار کا ایک پرانا کوٹ

بیچ سڑک کے ٹوٹی عینک اور شراب

سناٹوں کی آوازوں کا ایک ہجوم

شور میں گم ہو جانے کا شک اور شراب

تیری گلی آوازِ سگاں ، مجذوب ضمیر

ڈوب رہی ہے رات کی کالک اور شراب

عمر ہوئی میخانے کے دروازے پر

دست و گریباں میرا مسلک اور شراب

رات کے پچھلے پہر لہو کی صورت تھے

میری رگوں میں گھنگرو ڈھولک اور شراب

کھلتا سرخ سا فیتہ، دوشیزہ فائل

انٹر کام کی بجتی دستک اور شراب

دیکھ کے موسم خود ہی بچھتے جاتے ہیں

صحرا کی سہ پہر میں اجرک اور شراب

ایک گلی میں دو دیواریں ہیں منصور

ساتھ مری بے مقصد بک بک اور شراب

منصور آفاق

Rate this:

اسے شیئر کریں:

• X
• فیس بک

پسند کریں لوڈ کیا جا رہا ہے۔۔۔