منصور آفاق ۔ غزل نمبر 427

عالمی بنک کے اک وفد کی تجویز پہ وہ

بم گراتا رہا خود اپنی ہی دہلیز پہ وہ

کیا بتاتا کہ مرا اس سے تعلق کیا تھا

رو بھی سکتا نہ تھا تکفین پہ تجہیز پہ وہ

کھوجنی پڑتی ہے ماتھے سے وہ قیمت لیکن

ایک لیبل سا لگا دیتا ہے ہر چیز پہ وہ

ہو نہیں سکتا شب و روز کا مالک کوئی

عمر ہر شخص کو دیتا ہے فقط لیز پہ وہ

جانے کیا دیکھ کے کل شام کتابِ دل میں

خامشی چھوڑ گیا صفحۂ تقریظ پہ وہ

خوش تھی مٹی کہ مجھے مل گئے صدیوں کے خطوط

چیخ اٹھی تھی مگر ذہن کی تفویض پہ وہ

اس نئے دور کا منصور عجب عامل ہے

نام خود اپنا ہی لکھ دیتا ہے تعویز پہ وہ

منصور آفاق