منصور آفاق ۔ غزل نمبر 252

رنگ تھے کچھ نیل پالش کے مری آنکھوں کے بیچ

اور کچھ ٹوٹے ہوئے ناخن بھی تھے زخموں کے بیچ

راکھ کے گرنے کی بھی آواز آتی تھی مجھے

مر رہا تھا آخری سگریٹ مرے ہونٹوں کے بیچ

ہاتھ میں تو لالہ و گل تھے مرے حالات کے

پشت پر کاڑھی ہوئی تھی کھوپڑی سانپوں کے بیچ

کون گزرا ہے نگارِ چشم سے کچھ تو کہو

پھر گئی ہے کون سی شے یاد کی گلیوں کے بیچ

دو ملاقاتوں کے دن تھے آدمی کے پاس بس

اور کُن کا فاصلہ تھا دونوں تاریخوں کے بیچ

گوشت کے جلنے کی بو تھی قریۂ منصور میں

کھال اتری تھی ہرن کی، جسم تھا شعلوں کے بیچ

منصور آفاق