بنتی | سخن سرا کا نیا سفر

دُوئی اُس سے ذرا سی بھی نہیں ہے

مگر یہ بات کہنے کی نہیں ہے

بہت دیکھا ہے پھولوں کی ہنسی کو

بہت اچّھی ہے پر ویسی نہیں ہے

دیا ہے درد کو پیراہنِ لفظ

غزل بہرِ غزل لکّھی نہیں ہے

سکوں کیوں مل رہا ہے تم سے مل کر

علامت یہ کوئی اچّھی نہیں ہے

غلط ہے چارہ گر تشخیص تیری

محبّت ہو گئی ہے کی نہیں ہے

کرشمہ یہ بھی تیرے حسن کا ہے

جنون و ہوش میں بنتی نہیں ہے

غمِ دل ایسا راس آیا ہے ضامنؔ

کہ زخموں کی ہنسی رُکتی نہیں ہے

ضامن جعفری

حضور اِس میں خَطا میری نہیں ہے

محبّت ہو گئی ہے کی نہیں ہے

طبیعت اب کہیِں لگتی نہیں ہے

کوئی محفل وہ محفل ہی نہیں ہے

بُرا مَت ماننا باتوں کا میری

کوئی اِن میں لگی لپٹی نہیں ہے

گذارا کر رہا ہُوں اِس سے لیکن

زمانے سے مری بَنتی نہیں ہے

مجھے بھاتا نہیں آئینہ بالکل

مروّت تو ذرا سی بھی نہیں ہے

میں دِل کی بات کہہ دُوں اُن سے ضامنؔ

مگر وہ بات کہنے کی نہیں ہے

ضامن جعفری

سخن سرا کا نیا سفر